Heart of Leona[completed]

Part-28

[Unicode]
ရိန်း အိပ်ရာနိုးသည်နှင့် ရိုလန်လက်မောင်း၌ ဒဏ်ရာရထားသည်ကို သတိရသွားကာ ရိုလန်ဆီသို့စာတစ်စောင်ပို့လိုက်သည်။

[လက်က ဘယ်လိုနေသေးလဲ]

ဆက်သွယ်ရေးကိရိယာကို ခုံပေါ်တင်လိုက်ပြီး ရေချိုးရန်ပြင်လိုက်စဥ် စာတစ်စောင်ဝင်လာသည်။

[တော်တော်လေး သက်သာနေပါပြီ စိတ်ပူပေးလို့ ကျေးဇူးပါပဲ]

ရိုလန်ဆီက ပြန်စာရပြီးသည်နှင့် ဆက်သွယ်ရေးကိရိယာကို ပိတ်ကာ ရေချိုးလိုက်သည်။

တစ်ပတ်လုံးလုံးအပြင်မထွက်ဖြစ်သော်လည်း ရိုလန်နှင့်တော့ နေ့တိုင်းစာပို့ဖြစ်သည်။

တစ်ပတ်အတွင်း ရိုလန်နှင့်လည်း ပိုအဆင်ပြေလာခဲ့သည်။ ချစ်သူရည်းစားအဆင့်ထိ မရောက်သေးတာ တစ်ခုပဲရှိသည်။

"ရိန်း အဘိုးခေါ်နေတယ်"

အယ်လ်ဗင်၏ အသံကြောင့် ရိန်း အခန်းထဲမှ ထွက်ပြီး အဘိုး၏ စာကြည့်ခန်းထဲသို့ သွားလိုက်သည်။

"အဘိုး ရိန်းကိုခေါ်တယ်ဆို"

စာကြည့်ခန်းထဲတွင် ကယ်လ်ဗင်ရော အယ်လ်ဗင်ပါ ရောက်နေသည်။

"အင်း လာဦး ဒီကို"

ရိန်းလည်း အစ်ကိုနှစ်ယောက် ဘေးတွင် ဝင်ထိုင်လိုက်၏။

"မနက်ဖြန်ည Black Wolfနဲ့
Blue Falcon ဂုဏ်ပြုညစာစားပွဲရှိတယ်၊
ခဏနေကျရင် မင်းအတွက်ဝတ်စုံရောက်လိမ့်မယ်"

"ပွဲတက်ဝတ်စုံတွေက ရိန်းမှာရှိသားပဲ"

" ဒီတစ်ခုက ထူးခြားတယ်"

"ဘယ်လိုထူးခြားတာလဲ"

"ရောက်ရင်သိမှာပေါ့"

အဘိုးဖြစ်သူကပဲ ဆက်ကာ...။

"ပြောစရာကတော့ ဒါပဲ၊ မေးစရာမရှိတော့ရင် လုပ်စရာရှိတာဆက်လုပ်ကြ"

သုံးယောက်သား အဘိုး၏ စာကြည့်ခန်းထဲမှ ထွက်လာပြီး ကယ်လ်ဗင်က သူ၏အလုပ်ခန်းထဲသို့ ဝင်သွားသည်။ အယ်လ်ဗင်ကတော့ နေသန်နှင့်တွေ့ ဖို့ထွက်သွားသည်။

ရိန်းက အခန်းထဲပြန်ရမှာလည်း ပျင်းတာမို့ အဘွား၏ စာကြည့်ခန်းထဲသို့ ဝင်ခဲ့သည်။
အသုံးမပြုတာကြာပြီဖြစ်သည့်တိုင် အခန်းထဲတွင် ဖုန်တစ်မှုန့်မှတောင်မရှိဘဲ သန့်ရှင်းနေသည်။