Heart of Leona[completed]

Part-14

[Unicode]
ငွေစန္ဒာသည် ရိန်းနှင့်ဒီပအကြား သွေးထိုး၍ မရမှန်းသိလိုက်သည်။
ထို့ကြောင့် ရိန်းကသူမကို ရိုက်ပါတယ်ဟူ၍ လူအများအထင်မှားအောင် စတင်ပြောဆိုလာတော့သည်။

ဦးဥာဏ်မှာ ဒီပအား တိတ်တဆိတ်ခေါ်ကာ အခုလိုသတင်းမျိုးပျံ့နှံ့နေတာ မကောင်း‌ကြောင်း တိုင်ပင်လာခဲ့သည်။ ပြီးနောက် ဒီပကိုလည်း ရိန်းနှင့် လိုအပ်သည်ထက် မနီးကပ်နေစေရန် သတိပေးလာခဲ့သည်။

ဒီပလည်း ရိန်းကို လူအများ အမြင်မစောင်းစေရန် ရိန်းနှင့် ခပ်ကင်းကင်းနေရန် နားလည်လာခဲ့သည်။
ထိုနေ့မှစကာ ရိန်းနှင့်ဒီပတို့၏ ဆက်ဆံ‌ရေးသည် သိပ်မပြေလည်တော့ချေ။

ဒီပဘက်မှ အရင်ကလောက် မနွေးထွေးတော့သည့် အလျောက် သဘာဝကျစွာ
တစ်ယောက်နှင့်တစ်ယောက် ရှောင်ဖယ်လာကြသည်။

တစ်နေကုန်နေမှစကားတစ်ခွန်းပင်မဆိုဖြစ်ကြချေ။

အချိန်1ပတ်ကျော်ကြာပြီးမှပင် ဒီပဘက်မှ ငွေစန္ဒာကို ဟန်ပြတောင်းပန်ရန် ပြောလာခဲ့သည်။
အကြောင်းကတော့ ငွေစန္ဒာမှာ ရိန်းကို ဒီပအနားမှ လုံးဝရှင်းထုတ်ပစ်ချင်နေပြီး မဟုတ်မဟတ်များအား ဆက်လက်ပြောဆိုနေခြင်း‌ကြောင့်ပင်။ ကြာတော့ ရွာထဲကလူများက ငွေစန္ဒာ၏ စကားများကို ယုံကြည်လာကြကာ ရိန်းအားသိပ် မကြည်ဖြူကြတော့ပေ။

ဒီပကလည်း ရိန်း ငွေစန္ဒာကို တောင်းပန်လိုက်ရင် ထိုကိစ္စတွေ ပြီးသွားမည်ဟု တွေးမိလိုက်၏။
ရိန်းလည်း ဘာမှမပြောချင်တော့တာကြောင့် စိတ်ရှုပ်ရှုပ်နှင့်ပင် လက်ခံခဲ့သည်။

ရိန်း ငွေစန္ဒာ၏အိမ်သို့ ဒီပနှင့် အတူရောက်လာခဲ့သည်။ သုတ၊ရသ နှင့် ခင်၊ရွှေစာ တို့ပါ လိုက်လာကြသည်။

သူဌေးမင်း၏သမီးဟု ရွာထဲ မော်ကြွားနေသော ငွေစန္ဒာ၏ အိမ်အားကြည့်၍ ရိန်းနှာခေါင်းရှုံ့မိလေသည်။

အိမ်တော်ကရေချိုးခန်းတောင် ဒီထက်သားနားသေးတယ်...

"‌အစ်မငွေစန္ဒာကို ကျွန်တော်ကပဲတောင်းပန်တယ်"

"ကျွန်တော်မလုပ်ခဲ့တဲ့ ကိစ္စတွေအတွက်..." ဆိုတာကိုတော့ ငွေစန္ဒာကြားရုံလောက်သာ ဖြည့်စွက်လိုက်လေ၏။