Heart of Leona[completed]

Extra-4

[Unicode]
(Leona Lorrinn & Alex)

ရင်းနဲ့ အဲလက်စ်ရဲ့ ဆက်ဆံရေးက သူငယ်ချင်းအဖြစ်မှ စတင်ခဲ့တာဖြစ်သည်။
ရင်းက သူအဲလက်စ်ကို သဘောကျနေမှန်း သတိထားမိသည့်အချိန်တွင် ပွင့်ပွင့်လင်းလင်းပင် ပြောပြခဲ့၏။

ဒီနေ့တော့ ချစ်သူသက်တမ်း 1လပြည့်သည့်အနေဖြင့် အဲလက်စ်ကို လာတွေ့ခြင်းဖြစ်သည်။
နေ့တိုင်းတွေ့နေရစေရန် Cမြို့တော်ကို ပြောင်းလာခဲ့ဖို့ခေါ်သော်ငြား အဲလက်စ်က သူ၏ဝံပုလွေသားများအား သံယောဇဥ်မပြတ်နိုင်ဖြစ်နေရှာ၏။
ထို့ကြောင့် ရင်းလည်း ခေါ်မနေတော့ဘဲ အခုလို သူအားသည့်အချိန်များတွင် လာတွေ့လေ့ရှိသည်။

Black Wolfဌာနရှေ့တွင် ရပ်ကာ အခြေအနေအားစောင့်ကြည့်နေရင်း အဲလက်စ်အိမ်ပြန်သည့်အချိန်မှ နောက်ကလိုက်သွားကာ အံ့သြသွားအောင် လုပ်ဖို့စီစဥ်ထားသည်။

သိပ်မကြာမီတွင် ရုံးဆင်းချိန်ရောက်လာကာ အဲလက်စ်၏ ယာဥ်ပျံလည်းဌာနအတွင်းမှ ထွက်ခွာသွား၏။
ရင်းလည်း အဲလက်စ်၏ ယာဥ်ပျံနောက်မှ ကပ်လိုက်သွားခဲ့သည်။

အဲလက်စ် သူ့ရဲ့နောက်ကနေ ထပ်ကြပ်မကွာ လိုက်နေသည့် ယာဥ်ပျံအားကြည့်ကာ မျက်ခုံးများအား အလိုမကျစွာ တွန့်ချိုးလိုက်၏။

"ဘာလဲဟ"

အဲလက်စ်က လမ်းတစ်ခုထဲချိုးဝင်ကာ လမ်းကြိုလမ်းကြားမကျန် ဝင်လိုက်ထွက်လိုက်လုပ်ကာ သူ့နောက်က ယာဥ်ပျံအား အောင်မြင်စွာ မျက်ခြေဖြတ်လိုက်နိုင်၏။

အိမ်အပြန်လမ်းတွင် ယာဥ်ပျံ၏ ဆက်သွယ်ရေးစက်ဖြင့် ရိန်းကို ဆက်သွယ်လိုက်ပြီး ယာဥ်ပျံအား ‌ဖြည်းဖြည်းမှန်မှန်မောင်းနှင်ကာ အကြောင်းစုံကိုပြောပြတော့သည်။

"ငါ့ကို နောက်ယောင်ခံလိုက်နေတဲ့လူတွေများ ရှိနေမလား"

"မပြောတတ်ဘူး၊ အဲ့ဒီယာဥ်ပျံက မင်းနောက်လိုက်နေတာ ဘယ်နှရက်ရှိပြီလဲ"

"ဒီနေ့မှစတွေ့တာ၊ ငါဌာနကထွက်လာပြီး အိမ်ပြန်တဲ့လမ်းတစ်လျှောက်လုံးလိုက်လာတာပဲ၊ ငါလည်း လမ်းကြိုလမ်းကြားစုံအောင် ပတ်မောင်းပြီး မျက်ခြေဖြတ်ခဲ့တယ် ဟားဟား"