قلوب سرقها الحب💔
الحلقه السابعه والثلاثون
"
"
روح سيف قبل المغرب بساعه الحوش نظيف ومبخر والفطور طايب وفدوى لابسه فستان حوش كحلي فيه دوائر بيض ودايره شعرها ذيل حصان ومكحله وتوكل في ساره وهاجر مافطنتلش وين خش..
فدوى/هيا يا سوسو هم هم هجوري بيب بييب هيا هيا همم سيف حس بالذنب صبا يبحت في فدوى وقال /السلام عليكم
فدوى/ابتسمت وعليكم السلام اهلين سيف كيف حالك اليوم؟
سيف/تعب اليوم شكلي العصر نصكر احسن فدوى/اها مو تفتح بعد التراويح صكر اذان العصر سيف/هضا اللي بيصير شكله
خش دارحمام وامتد ع السرير .
&عندي نا&
صبيت في المطبخ شن ندير الفطور؟ اتصلت بساره/الوو ساره ساعديني معاذ شن يحب في الصيام؟ ساره/هههههه متعب بككل في الصيام
نا/صاح؟ حي عليا باهي كيف شنو يحب؟ ساره/الطبق الرئيسي الشربه ونوعين 3 موالح ونوع نوعين سلاطه
انا/ياكل هضا كله؟
ساره/اها مو يتمرن ويسحر بيهن بعدها
انا/باهي شن الانواع اللي يحبهن مقليات معجنات؟ شنو ساره/عادي كلهن يحبهن
انا/باهي ي يالله نلحق
خشيت المطبخ درت بطاطا مبطنه واسياخ دجاج وخليتهن ع القلي ودرت طاجين بيتسه وحطيتها في الكوشه وبديت نقلي .. اييه وقت ع الشربه قرضت اللحم بسرعه وحطيتها ع النار.. ودرت سلاطه عاديه وجهزتها في الصواني ودرت سلاطه الخيار والزبادي لميت المطبخ وجهزت الطاوله فتلكتها وخشيت درت حمام وندعي مايجش لين نكمل نسمع في صوته لوطا عند هله..طلعت لبست جونه امريكيه تحت الركبه وبدي سماوي وجففت بالاستشوار ومسكت شعري قلبه ودرت رسم عين رقييق ولمعة روج وبخيت عطري وطلعت بخرت وهو خش
معاذ/السلام عليكم
انا/وعليكم السلام
معاذ/جيعان المغرب قريب طيبتي ولا نتغدو لوطا؟ انا/لا طيبت غار هويت وبخرت
معاذ خش/شن درتي؟
انا/شربه وبطاطا مبطنه واسياخ دجاج وبيتزا وسلاطه عاديه وسلاطه زبادي وخيار
معاذ/اممم نعدي نديرحمام قبل لايذن المغرب
انا/معاذ بننزل نعطي من فطورنا لعميمه باهي علي ماطلعت
معاذ/هاتي تو انزله ع السريع ونركب خذيت تبسي حطيت موالح وقزرته ونزل
معاذ/امي هاكو ذوقه من فطورنا
حليمه/سلمكم دزازين
استنى خوذ من فطورنا حطتله عصبان وركب كان كل شي جاهز واذن المغرب وفطرنا
معاذ/ماشاءالله حلو تطييبك
انا/صحه انا كنت فرحانه معاذ بدا ينطلق معايا حتى فكرة انا نبقوا اصدقاء كويسه مليت من الوحده
/عدا معاذ يصلي في التراويح وناصليت في الحوش وبعدها قعدت نهدرز مع سمر ع الماسنجر
انا/رايفت ع هلي بنقول لمعاذ نزورهم الاسبوع هضا سمر/استني نزورو مع بعضنا شن رايك؟
انا/انتي معش روحتي رايفت عليك حتى انتي سمر/خلاص الخميس طياره 10 اليل نروحو خليك نتريحو الجمعه وانسقو مع هلي نزورو السبت حوش هلي شن رايك نلتمو كلنا ونباتو
انا/باهي خلاص تو نصبر
سمر/شن تديري؟
انا/شي معاذ طلع للتراويح وناصليت ومكسده ع النت سمر/باهي شن جوك انتي واياه؟
انا/تمام عليش؟
سمر/نسال بس بنطمن عليك
انا تنهدت/اطمني جونا مليح
سمر/تحسابيني مانعرفكش ياشهد تي نا حافظتك حفظ
انا/غار روحي مرايفتلك والله
معاذ روح الساعه 1 خش كنت ناعسه بكل ولابسه فستان موف سيور و في نص الساق ورافعه شعري عشوائي كنت راقده ونضت ع حلة باب الحوش/طولت معاذ ولاتهيالي
معاذ/البلاد زحمه كملي نومك حتى نا بنرقد نوضيني قبل الفجر نسحر
انا/باهي ورديت رقدت
مفتاح/ياحليمه راهو في واحد جاي يخطب في ساره وسألنا عليه شوفي ساره شن رايها
حليمه/باهي تو نخش تو نحكيلها
ساره وسلمى مسهريات في دارهن ع النت ومره مره يهدرزن دقت امهن وخشت/مازلتن مصحصحات امالا؟ ساره/بنرقد لكن شوي اخرى حتنوضوني الفجر قلت خلي نصلي بالمره ونرقد
امهن/باتك قالي في واحد جاي يخطب فيك اسمه عثمان ال*** باتك ومعاذ سألو عليه يبو رايك كانك موافقه يتفضل هو وهله..
ساره/لا يا ماما مزال موضوع الزيزة مش حاطته في بالي منبش توا مزلت صغيره.
امها/عليش رافضه موضوع الزيزة
ساره/مزال بدري خليني نعيش حياتي
امها تضحك/براحتك تو نخبر باتك وطلعت ..وساره قعدت تبكي
سلمى/مانني عارفه عليش تعذبي في نفسك؟ ساره تبكي/طفي الضي بنرقد
....
.....
....
يتبع
#كاتبه_أميمه_اسامة
