قلوب سرقها الحب 💔
الحلقه الواحده والستون
"
"
معاذ/حتمشي معايا للسياره وتقصري لسانك ولايصير فيها كلام اخر
مشيت معاه ونا دموعي يصبن لين منحقش منهن
وركبت السياره
معاذ ركب بعدي وطربق الباب لين وذنيا صفرن وولع
انا نبكي/معاذ انت كنك هكي تفسر بطريقتك
ليش درت هكي؟
معقوله تكرني من يدي قدامهم ..انا ندوي ونبكي معدلش عليا وقعد يدوي بالتلفون/السلام عليكم
بابا/وعليكم السلام
معاذ/كيف حالك ياعمي
بابا/كويس كيف حالك معاذ وين غاطس
معاذ/الحمدلله كنت مضغوط شغل..قتلك ياعمي راني تكيت ع الجامعه وروحت بشهد
بابا/باهي يامعاذ مفش مشكله
معاذ/تسلم ياعمي باهي متوصش ع حاجه
بابا/سلامتك وخلي بالك من شهد
معاذ/حاضر من عيوني هي مع السلامه وصكر وكمل طريقه
انا رديت نبكي وصلنا للحوش حطني/اركبي ندرس ونركب
ونا راكبه قابلتني ساره/ شهد كنك؟
انا شيرتلها بيدي بتاع سيبيني ومنقدرش ندوي معاك وركبت وسيبتها قعدت مصبيه قدام الباب ماعندش المفتاح قعدت نرجى فيه ركب فتح الباب ومادوش معايا سلح ساعته وحط مفاتيحه ع الطاوله وخش يغير في دبشه ونا قعمزت في الصاله نبكي معش سمعتله حس خشيت لقيته متكي ع الفراش بيرقد..فتحت عليه الضي/ماترقدش خلينا نحكو قبل لاترقد
معاذ/شهد نا باطل خليني نرقد
انا بعياط/عليش تروح بيا من الجامعه دبنك باطل وبترقد
معاذ/مو أصلي كنت جاي بنفطر معاك ونحضر معاك المحاضره ونروحو..لما خشيت شفت شي ماعجبنش
انا/معاذ حرام عليك تعبتني بغيرتك شرحتلك واحد راجل اختي واللاخر وقف يبي محاضره تحشمت نفوته حرام عليك يامعاذ من اول امس وانت تقهر فيا معش نتحمل راني ارحمني ليش هكي ليش
معاذ/.............
انا نبكي ونترجى/معاذ انت وعدتني معش تشك فيا صح ولا لا؟
معاذ انا طلعت من حوش هلي بعبايه مطرزه وكعب كيف بنمشي بيهن للجامعه لبست من غاده..مانش منسقتها اللبسه والدبله واسعه تطيح مني سلحتها امس اليل ونسيتها الصبح
معاذ رد ليش ساكت؟
معاذ/يبحت فيا وساكت
انا/معاذ أنا نحبك ليش تعامل فيا هكي؟
وقعمزات في الوطا وضميت كرعيا لصدري وقعدت نبكي
معاذ/قديش سخفتني وحسيت روحي زودتها
نزلت من السرير وقعمزت قدامها/خلاص باهي معش تبكي
انا/زدت نبكي
معاذ/شهد انا اسف سامحيني
انا رميت روحي في حضنه ونا نبكي بقوة
معاذ يمشي في يده ع شعري/نحبك والله يادلوعه..معلش حبيبك غبي يعرفش يصرف
انا قعدت نضحك ونبكي
معاذ/خلاص معش تبكي بالله عليك وقعد يبوس فيا
انا/حول زعلانه منك ودفيته
معاذ/تو بعد كملتي بكاك دفيتيني..سامحيني عصبت وانتي عارفتيني بعد نعصب معش نستوعب
انا/......
معاذ/سامحيني خلاص
انا/........
معاذ/هيا دودي خلاص حولتلها راسها من حضني لقيتها راقده!!؟؟
-مشعارفه كيف رقدت كنت نعسانه واعصابي تالفه وبعد حضني رقدت
معاذ شمرني وغطاني ورقدنا
....................
نضت العشيه على صوت الباب يدق صبيت ملقيتش معاذ.. أنا/شويه شويه وقف الدق...
صبيت غسلت وجهي وفتحت الباب لقيتها ساره سارة/اهلين شهد كيف حالك؟
انا/تمام خشي
خشت وصكرت الباب
ساره/كنك امبدري؟
انا/والله خوك هبلني
ساره/كنه شن في؟
انا/فوتي كلمي سلمى وتو نرن ع سمر تركب تهدرز
ساره/باهي..ورفعت تلفونها رنت ع سلمى قالتلها تركب وركبت سمر وقعمزنا نهدرزو
...................
فدوى مقعمزة يلا فااطمه وتبكي/بنفضها معش بنردله
فاطمه/استهدي بالله يافدوى متصكرش راسك
عمو/السلام عليكم
فدوى وفاطمه وعليكم السلام خش عمي قعمز يلا فدوى/كيف حالك اليووم؟
فدوى/الحمدلله
عمي/ممبدري ونا نرن عليكم مقفل بنسأل كان تبو شئ قبل لانجي
فاطمه/تلفوني سندس حاطه عليه اكيده قفلاته
عمي/فطومه ديريلنا قهوة ....صبت فاطمه
عمي/شنو رن عليك اللي مصكره تلفونك؟
فدوى/من امس سكن شوي قفلته
عمو/شن بتديري ؟
فدوى/خلاص ياعمو معش نبيه وقعدت تبكي
عمو/مسحلها دموعها وسعي بالك فيفي في جرتكم عيال
فدوى/خلاص منقدرش نسامحه
عمو/انا بنخبر خالد لازم يعرف
فدوى/عمو ناخايفه بابا يقولي من حقه يزوج ويطلعني غلطانه
عمو/القصه مش في زيزته القصه في مدة يده متزعلش روحك والله نشعفه عليها والحوش حوشك خوذي راحتك
فدوى/شكرا ياعمو
فاطمه خشت بالقهوه شربوا القهوة وطلع عمو مشى لبابا حكاله
بابا/تي شن يحساب روحه والله نوريه
عمو/ياخالد وسع بالك
بابا/كنها ماكلمتني؟وليش ماجبتها معاك
عمو/قالت مبتش ترعشك..خليها اليوم وتو بكره نجيبها
بابا حمق وضغطه رقا ومعش يحق قدامه
...............
عند هل معاذ وعماد
عمتي وجدتي طالعات فرح والشباب كلهم ملتمين يلا جدهم
احمد/ياجدي انا قررت نزوج نبي نخطب
جده/ماشاء الله واالله كبرت ياولد من مطيوحة السعد
أحمد/حرام عليك ياجدي نا عابي عليك دايرك جاها تخطبلي
جده/نبصر عليك من بتخطب
احمد وجهه تخزرط..اه نبي..ساره
جده/من ساره؟
احمد واطى راسه/ساره بنت عمي مفتاح
كلهم/..........
أحمد/هاشن ردكم؟
جدي/الراي راي عمك وساره
مفتاح/ماعندي مانقول فيك ياوليدي تو نشوف ساره
معاذ حط يده ع كتفه/ونعم النسيب
احمد عيونه رقرقن
عماد/انا موافق
................
بلقيس ترن ع فدوى مقفل رنت ع غاده/اهلين غاده كيف حالكم؟
غاده/الحمدلله كويسين
بيسه/قتلك نرن ع فدوى من امس مقفل
غاده/اييه فدوى قصتها قصه
بيسه/كنها
غاده/منش عارفه اللي نعرفه انها حرجانه في حوش عمي من امس
بيسه/باهي كيف نوصل فيها نبيها ضروري
غاده/تو نمل عليك رقم مرات عمي...اكتبي ....092 باهي
بيسه/باهي اوكي مع السلامه
غاده/مع السلامه
ماما/ياغاده سيبي التلفون وامشي ديري العشاء نجلاء ممبدري تلسون وباتك راقيله
غاده/هي هي ماشيه
..............
معاذ قرب من عماد/عماد نبيك في خدمه
عماد/ادلل
معاذ/لنقاني مزعل شهد ونبي نديرلها جو
عماد/طول عمرك نكدي شن المطلوب
معاذ/...............
عماد/حاضر
...............
سمر/بنات خاطري في عصيده
انا/معاذ عصيدته سمحه هههه
سلمى/متقولش اللي يوم...
ساره قاطعتها/اها اها
سلمى/طايح خويا بالرسمي
تلفون سمر رن/اس اسكتن مزلت بنهدرز ورفعت/ألو حبيبي
عماد/سمورتي رانا جواعه لوطا ونبو عشا
سمر بدلع/دادي انا منقدرش البيبي متعبني
عماد/حبيبتي انزلن كلكن واساعدن ديرنلنا مكرونه
سمر/مزال بدري حبيبي ع العشا الساعه 7
عماد/مغير انزلن كلكن نزليهن وتعالي بنقولك سر
سمر/نعرفهن اسرارك نا
عماد/دلوعتي عشن نجيبلك شكلاطه
سمر/باهي حبيبي 5دقائق نازلين وصكرت
بحتت فينا/اجتماع القمه لوطا ويبو عشا
ساره/اييه عليا نا
سمر/هيا بنات يرجو حياكلونا
انا/هيا باهي ننزلو
ولبسنا ونزلنا......
بلقيس رنت ع فاطمه وقالتلها انها تبي فدوى
فدوى/اهلا بيسه كيف حالك
بيسه/تمام شن صار؟
فدوى انهارت/خلاص انتهى كل شي معش قدرت نصبر
بيسه/اسمعي تي مجهزتلك لها فيديوهات وصور تو ندزهم له نبي ايميله
فدوى/خلاص يابيسه شن ينفع ضربني يابيسه وتبكي
بيسه/طيح سعده اللي ميتحشم عليش
فدوى حكتلها
بيسه/ياعليك حاله حقير والله غار اسمعي عطيني ايميله وحلي تلفونك تو ندزهن لك
فدوى/منبش نفتح فكيني منه
بيسه/افتحي وفوتيه كان رن يزيد ينقهر
فدوى/باهي صكرت وقعدت تبكي جتها فاطمه تهدي فيها وعطتها تلفونها
فاطمه/ارقدي فدوى تريحي وارتمت فدوى ع السرير تبكي
بعدها فتحت تلفونها ودزتلها بيسه الصور والفيديوهات واتفرج وتبكي ولكن كانت فررحانه لان سيف حينصدم بعد يشوفهن
سيف كاين يبرم يبرم واعصابه تالفه جرب يرن ع فدوى رن رن ماردتش بغدها فدوى حضراته زاد تعصب وعزق التلفون وخش رقد
بيسه دارت ايميل ودزتله الصور والفيديوهات بتاع ريان وصورة معتز مغبشه دزتهن كلهن ودزت رساله(السلام عليكم اخ سيف للامانه هذين صور خطيبتك ريان**** عشن تبقى ع بينه) وتأكدت انهن وصلن وحذفت الايميل وتنهدت ورقدت
...............
أما عندي نا طيبنا مكرونه وحطينا العشاء ومعاذ مابنش عليا الاوقت حطة السفره..وتعشو وغسلنا الموعين جيت بنركب
سمر/استني شهد تركبش تعالي نديرو حمامات وتمكيجنا ساره مكياجها سمح قبل لانركبو
انا/فكيني مزلت راقيتلي منه
ساره/تي مكيجي والبسي وفوتيه
انا/باهي تونركب نلبس ونجي
ساره/غار خشي ديري حمام الحوش فاضي تو تركبي تحصلي هو فوق
انا/اف باهي عطيني لبسه من عندك
سمر حطت يدها في شنطتها وطلعتلي اللبسه الفضيعه اللي هدتها لنا فاطمه انا واياها كيف بعضنا اذكرتنها؟
انا/من وين جبتيها هذه؟
سمر/امبدري نزلتها ونا نازله وبعدين اذكرت انها ضيقه ع بطني تو نلبس غيرها
اسبحت ودارتلي سلمى شعري بالفير فلو كله..وكانت سارة تمكيج لسمر
بعدها مكيجتني مكياج خفيف وحلو ع الترابي وروج نحاسي
سمر/الله تهبلي
انا/شكرا عيونك هن اللي يهبلن
ولبست عبايتي وقعدنا نهدرزو...
معاذ جا دق ع باب الدار/ شهد هيا اركبي ومخشش
انا كرمشتت وجهي وتنهدت/تصبحن ع خير وطلعت ركبت وهوا ورايا فتحت الباب الحوش مظلم كله.. مبيتش نسأله وقعدت نتلمس وبعد خشيت الصاله بانت عليا الانبولات والشموع والورد..انا بصوت عالي/ الله عليك جو
سلحت العبايه وسمعت الباب اصكر وجاني حب راسي واضبطني/نحبك شهودتي نحبك ياعسل نحبك ياعمري معش تزعلي مني
انا مسكت فيه بالقوة نحبك نحببك حبيبي منش زعلانه منك وحبيته شمرني وخش بيا الدار انا/الله مفاجئه سمحه مدلي باقه ورد وظرف شكرا حبيبي وفتحت الظرف وعيطت من الفرحه تذكرتين لتركيا تهبل تهبل نموت فيك نا معاذ ساكت ويتأمل فيا
انا/ امتى ماشيين؟
معاذ/بعد بكره..وخذا مني التذكره تعالي وريني السماحه اه تعالي مرايف عليك و........
عمتي روحت هي وجدتي وعمي حكالها قالتله احمد ماشاء الله عليه وتو بكره ندوي لساره
احمد متوتر ويرجى في الرد طول مارقد صارله أرق
وسيف ناض الصبح بيمشي للعمل رن ع ريان..ريان كانت راقده مفش رد..في نفسه تو نوريك ليا يومين متردش عليا..رن ع فدوى لقاها مقفل ..اف شن هالطامه اللي حطيت روحي فيها
ودار فنجان قهوة وفتح النت وخشن الرسائل وهنا بس شعر سيف بالطامه صح
.....
.....
يتبع
#كاتبه_أميمه_اسامة
