قلوب سرقها الحب💔
الحلقه التاسعه والخمسون
"
"
معاذ/حبيبتي انا 5 دقايق ونكون عندك نرن عليك تنزلي
أنا/معااذ العرب تو كيف طلعو انكملو الحوسه وبعدها تعالي
معاذ/خلاص شهد انا وصلت
انا/معاذ عيب والله ماتجي العرب كيف مصكرين وراهم الباب احراج قدام هلي اركب هدرز مع بابا ولا ابرم كم برمه لين نكملو الحوسه
معاذ/شهد جو شين اللي تديري فيه
انا/معاذ انت اللي جو شين اللي تدير فيه
سمر تدوي بصوت واطي /روحي خلاص تو نلموها الحوسه
معاذ بنفتير/انا وصلت تبي تنزلي ولا نروح
انا/معاذ أضني شرحتلك وقتلك الدنيا مقلوبه متحطنش في موقف محرج كيف امس
معاذ بحمق وصوت عالي/باهي ياشهد باتي معناها
انا/معاذ ليش تهزب وتدوي هكي شن قتلك نا
معاذ بهدوء مصطنع/شهد صدعتيني خلاص هي مع السلامه وصكر عليا
انا/الو الو معاذ
قعمزت اف شنو هضا كنه هكي هو؟
وقعدت نرن عليه ميردش بعدها قفل تلفونه...قعدت نبكي عليش هكي يامعاذ عليش؟
سمر/خلاص يادودي سيبيه تو يفطن لروحه بعد يهدا
انا/نبكي..قالي باتي وصكر عليا..زعل مني
سمر/خلاص يادودي خليه يزعل انتي مغلطتش..خليه زعل بلاش يرضى بلاش
نجلا/صاح عندها حق سمر تعالي غار نشوفو السلات بتاع غاده مسحت دموعي وغيرت دبشي وطلعت
معاذ روح راقيله وطايرتله وميحقش قدامه..طبعا عربي روح بيهم عمي من امبدري
خش لقى سلمى مازالت بدبشها وكان قفطانها قصير ومش فاطنتله و تهدرز
معاذ بنتا/هاي انتي سلمى شن القفطان اللي لابستيه هضا؟
سلمى تحشمت وتخزرطت ومالقتش قدامها الا المصليه قعمزت وغطت روحها بيها
معاذ وعروقه بارزات وعاض ع سنونه و ماسكها من وذنها/نهارك ياسلمى تلبسي مره اخرى قصير هكي ماتحشميش انتي معندكش حياء
سلمى متخزرطه وتبكي
معاذ شد يده/تفهمي ولا لا؟ نشوفك لابسه هكي مره اخرى نضربك تسمعي؟
سلمى/وهي تبكي وحاسه بالاهانه/ باهي ..طلقها وكان حامق ومهوش فاطن لروحه وانتي ياساره شن لابسه كيفها؟
ساره ترعش/لا..لامش لابسه كيفها
معاذ/ساره اقسم بالله
تطلعي تكذبي نضربك طريحه ترقدك في الفراش
ساره تبكي من الخوف عارفته بعد يحمق يبقى مجنون/معاذ والله ما لابسه قصير قفطاني طويل
معاذ بصوت عالي/هضا انذار وتوقعني ندير لكن كبسه في يوم قبل لا تطلعن..تفهمن انتي وهيا؟
سلمى وساره مع بعضهن وهنا يبكن/حاضر
امهن خشت/هي معاذ كنك قالب الدنيا..
بحتت لقتهن يبكن/شن في يا معاذ؟
معاذ/اساليهن وطلع
امه بحتت فيه باستغراب وصكرت باب الدار/شن في شن درتن اللي معاذ شاطح؟
ساره/عشن قفطان سلمى
امه/تستاهلن اصلي مش راضيه عليه القفطان نا وطلعت وسيبتهن..سلمى غيرت وخشت رقدت وساره طلعت الجنان كانت مخنوقه برمت ع الجنان من لاورا قعمزت تحت شجره ومسكت نقالها قعدت تقرا في مسجاتها هي وعثمان وتبكي
فيصل اتصل بريان كم مره متردش..دزلها رساله (السلام عليكم انا صديق معتز ممكن تردي نبيك في موضوع ضروري؟) واتصل اخرى..
ريان/ألوو
فيصل/اهلين ريان كيف حالك
ريان/........الحمدلله من حضرتك؟
فيصل/صديق معتز اسمعي ريان را معتز مريض بككل وبكره 10 الصبح خاش ع عمليه وعمليته نسبة نجاحها 30% خاطره يشوفك وميبش يكلمك
ريان/عملية شنو
فيصل/استئصال ورم سرطاني
ريان تبكي/وين جايه؟
فيصل/في الدماغ
ريان تشهق وتبكي وبدون تفكير/مستشفى شنو؟
فيصل/مستشفى****
ريان/خلاص الساعه 8 ونص نكون قدام المستشفى
فيصل/صحيتي بعد توصلي رني عليا تو نطلعلك نوريك اين دور..
انا قعدت نحوس مع هلي وعقلي مش معايا بكل
سمر/شهد.شهد.يا شههد
انا/اه..نعم
سمر/عماد نص ساعه وجايني كان بتروحي معايا
انا/خلاص هو اللي خلاني وصكر عليا منش مروحه
سمر/تي عليك عناد فيك
انا دموعي نزلن خلاص خاطيني سمر حطيت ايديا ع وجهي وقعدت نبكي
غاده/خلاص يادودي فوتيه متبكش
خشيت فراشي وتغطيت ودرت روحي راقده
ماما خشت علينا/شهد سمر مروحه توا بيجيك راجلك ولا تروحي معاهم.. البنات سكتن
ماما جتني رفعت البطانيه /شهد رقدتي
انا/ماما انا بايته
ماما/نوضي روحي عليش بايته؟
انا/متبينش نبات عندكم؟
ماما/لا..بس مزال بدري ع البيات ساد أمس بتي
انا/سكتت وكريت البطانيه وغطيت روحي كلي
...................
ساره كانت تبكي مع مرواحته من اصحابه كانو مسهريين..درس سيارته ونزل فطنلها مقعمزة تحت الشحره
كانت ضامه كرعيها بايديها وشعرها كله جاي ع الجنب..قعد يتأمل في شعرها وقعميزتها
احمد/سبحان الله من وهي وصغيره لما تزعل تجي عند الشجره هبا ونفس القعميزه..وقدملها
احمد/بس هاي ساره كنك قاعده هنا؟
ساره رفعت راسها وجت عينها في عين احمد نزلت راسها
احمد نزل ع ركبيه ورفعلها راسها/كنك تبكي
ساره كانها قاللها زيدي
احمد/ساره بالله عليك كنك من مزعلك
ساره رمت روحه في حضنه..
احمد قعد مستك بعدها لف يديه عليها وقعد يمسح ع شعرها وساكت..ساره شاده فيه بالقوة وتبكي..لين خف بكاها وخرها من عليه/ ساره خلاص بكا سادك وقعد يمسحلها في دموعها..
احمد/ممكن تقعمزي وتحكيلي كنك؟
ساره/مفش شي يا احمد مضايقه بس
احمد وهو مش فاطن لروحه/شن اللي مضايق حبيبتي
ساره/دارت روحها مش مركزه مفش شي مضايقه وبعد بكيت نفست
احمد/وااو البكا هضا كله ضيقه مش مصدق نا
ساره/والله مضايقه وخش معاذ حامق كمل عليا نا وسلمى
احمد/شن دارلك؟
ساره/مادارلي شي هزبنا بس
احمد حمق/كنه هكي معاذ..
ساره بحتت فيه زين
احمد/ربي يهديه..خلاص ياساره خشي اغسلي وجهك وارقدي ليل
ساره هزت راسها ومشت وقفلها احمدلين خشت شويه..زعمه ياساره كان خطبتك توافقي؟ااخ ومشي لنفس الشجره وقعمز يفكر
...................
معاذ خش الشقه قعمز وهو حامق بحت في الشموع والجو اللي دايره وعابي عليا نروح معاه عدا لمه كله وقعمز يفكر ويدوي بصوت عالي بروحه/انا دايرلهاجو ومتفق معاها نجيها ماتابش تطلع تقولي مزال ورايا حوسه، انا قتلها حنجيك بدري ونبيك لابسه متغيريش دبشك..بس ممكن هي صاح عندهم حوسه ومتحشمه من هلها تطلع..بس مهما كان متجيش تقولي ساد احرجتني امس..اف يا شهد اف..وقعد يبرم في مكانه..بس حنوريك ياشهد حتى بكره منش مروح بيك خليك باتي عند هلك دبني نحشم فيك وقعد يدور في مكانه سمع باب حوش عماد انطبق بحت ساعته لقاها 12 ونص/زعمه استناها لين كملت الحوسه مع هلها..معناها نا غلطان؟ بس مهما كان ماكانش حكت معايا هكي؟ اييه واتكى ع السرير ماجش نوم فتح الروشن لقى احمد مقعمز وسارح وعقله مش معاه بككل
نزله واحمد في وسط سرحانه ويفكر في ساره معاذ حط يده ع كتفه/وين سارح ياراس؟
احمد التفتله وبحت فيه/ مش عارف
معاذ/اللي واخذ عقلك يتهنى به
احمد/معاذ شكلك فايق شوف الساعه كم مسيب مراتك ليش؟
معاذ/مراتي في حوش هلها
أحمد/كيف بايته حتى اليوم هههه ربي يكون في عونك
معاذ تعقد
أحمد/متقوليش متعاركين
معاذ هز راسه
أحمد/تي لاياراجل محلكمش تتعاركو
معاذ/مشعارف كيف تعاركنا
أحمد/حط يده ع كتفه سوء تفاهم ان شاء الله تنحل عدي بكره روح بيها وراضيها فكني من تصكير راسك وعصبيتك الزايده
معاذ/يصير خير وبحت فيه زيين وانت كنك سهران؟
أحمد/لامكني شي
معاذ/احمد انا نعرفك من وجهك شن في؟
أحمد/نبي نزوج ونزل راسه
معاذ/هههه وتبي تزوج تقعمز سرحان وشايل الهم اهو شقتك قريب تكمل وبشغلك وشهادتك وماناقصك شي فيش تخمم عدي اخطبها
أحمد/المشكله مش هنا..خايفها هي ترفضني ولا هلها يرفضوني
معاذ/كانك تحكي ع ساره ماتلقى خير منك وكان غيرها نمشي نخطب معاك
أحمد تعنق معاذ زين/ أصلي والله الا اصلي
معاذ/ههههه خلاص خلاص باهي اللي ضحكت معناها ساره
أحمد/نزل راسه..خش كلم مراتك وتراضو مترقدوش متزاعلين
معاذ/والله اني شايل عليها اليوم تو بكره ساهل خليها اليوم
أحمد/عليك تصكير راس فيك،باهي هي ليلتك سعيده خش تريح وصبى كل واحد خش حوشه
................
اما نا فليلتي مشت نكد بسبب الافندي معاذ كملنا حوستنا وخشيت فراشي قعدت نذكر في مكالمتي انا ومعاذ قعدت نبكي عاودت رنيت عليه كم رنه مبش يرد زدت نبكي
فدوى/خلاص يادودي انتي غلطانه بصراحه كنتي روحتي في كم يد تو تكمل الحوسه
انا/بس نا مقتلش منبش نروح ناقتله عطيني ساعه اخرى نكمل معاهم
فدوى/كنتي لماقالك خلاص وصلت راه قلتي باهي مش تطولي لسانك..معقوله تقوليله متحشمنش كيف امس طبيعي بيزعل
انا/حي عليا باهي شن نديرله ميبش يرد عليا
فدوى/مشعارفه خليه اليوم حامق بكره الصبح كلميه اعتذري منه
غاده/دودي خلاص اللي صار صار توا بلاش بكا
وقعدن البنات يهدرزن ونا غميت وجهي في المخده وقعدت نبكي لين خذاني النوم
..................
ثاني يوم ناضت ريان بدري ومشت للمستشفى ورنت ع فيصل وجاها يوريها في الدور وخشو قسم الاورام خشت ع معتز كان راقد وفيصل رد الباب وطلع
ريان/قربت منه ومسكت يده لاباس عليك معتز معقوله متقوليش انك مريض ونزلن دموعها
معتز وجعاته وتأثر لكن مضطر يكمل التمثليه/منبش نخرب عليك حياتك وبرم وجهه للجيهه الثانيه
ريان/معتز انا نحبك والله حبيتك
معتز نزلت دمعته غصبا عنه من تأنيب الضمير/ خلاص ريان انتي مخطوبه ربي يهنيك انا مرات نموت أثناء العمليه ريان تشهق وتبكي/لا معتز متقولش هكي خلي ايمانك بالله قوي
معتز/ونعم بالله..خلاص ريان روحي ناشويه وبنخش العمليه روحي وبعد انوض من العمليه نرن عليك
ريان تمسح في دموعها/ يارب تديرها وتطلع طيب
معتز/خلاص ريان اطلعي بنلبس دبش العمليات روحي
ريان/لابنرجى لين تطلع
معتز/بالله عليك روحي
ريان تبكي/لامعتز
معتز/كانك تحبيني صاح روحي
ريان بحتت فيه وضغطت ع يده/باهي مع السلامه
معتز/مع السلامه وطلعت ريان ولقت فبصل برا
ريان/بالله عليك بالله عليك بعد يطلع من العمليه طمني
فيصل/ان شاءالله هي وركبت سيارتها وكانت تسوق بالسيف من كثر الدموع
اما فيصل رد للدار/نوض يابايخ نوض
معتز/وجعتني ياراجل والله
فيصل/تي اسكت تو وجعاتك بعدما ترجيتني نفكر لك..خلاص يافيصل منش دازه الفيديو حرام
فيصل/والله إلا نا ندزه
معتز/البنت مصدقتني
فيصل/خلاص عدي اخطبها
معتز/بايخ لنقانك امشي امشي ..خش ربيع تي اطلعو اطلعو انتهت التمثليه تي والله شكلهم بيفصلوني بسباكم درقو وجههكم طلعوا هما الاثنين وهما يضحكو
..................
ماما/شهد تعالي افطري
انا/معندش نيه ياماما
ماما/شنو معندكش نيه غار تعالي
بابا/تعالي ياشهد افطري
صبيت وقعدت نجامل دروحني ناكل
بابا/موسى بعدين العشيه تعدي تحلق شن هالتحليقه اللي دايرها
موسى/ياباتي هذه الموضه
بابا/موضة عينك هذ اليوم لازم تحلق
موسى/اليوم جمعه الحلاق مصكر
بابا/الحلاق اللي في شارع****يفتح في العشيه
موسى/باهي
فطرنا ونا صبيت نرن ع معاذ ميردش..بعد تقريبا عشر رنات رد/نعم
انا/معاذ كنك متردش عليا من امس حرام عليك
معاذ/كنك متردش عليا منكش عارفه روحك شن دايره
انا/معاذ انا اسفه مكنش قصدي والله
معاذ/باهي مش وقتك شهد وقت ع الصلاة وصكر قعدت نبكي
نجلا/خلاص ياشهد فوتيه مترنيش عليه يدلع عليك
انا/لا انا غلطت معاه
نجلا/متقعديش غبيه متعودش ع هكي بعدها ياخذ عليها هو غالط صاح انتي طولتي لسانك بس
انا/نجلا بالله عليك سيبيني بنرقد..
نجلا/ديما تهربي بالنوم
انا/نجلا خلاص اطلعي برا
نجلا طلعت وصكرت الباب
.................
معتز دز الفيديو لبيسه شن رايك في مواهب خوك يصير مني؟
بيسه شافت الفيديو وهي تشهق واتصلت بيه / الوو ممتاز ياعزو والله الا طاحت
عزو/تعرفي وجعتني يابيسه اقسم بالله
بيسه/اسكت شن وجعاتك
تي كيف وحده مخطوبه تقولك نحبك تي هضا دليل انها اي حد يقوللها كلمتين سماح تطيح فيه..بالله اسكت
معتز/باهي امتى ندزوهن؟
بيسه/تو اصبر شويه نشوف فدوى ونقوللها قبل ونجيب منها ايميله
عزو/باهي خلاص وجهك بس مدخلنيش نبي عزومه مطنطنه انا واصحابي
بيسه/من عيوني..وصكرت من معتز ورنت ع فدوى..فدوى حايسه تجهز في روحها ماشيه لمه..وسيف ساكنلها هيا تأخرتي وبيسه ساكنه ع التلفون
شوي فدوى مسكت التلفون/الوو ايوا بيسه انا مشغوله توا سيف يرجى فيا في السياره بعد نروح نرن عليك
بيسه/باهي متاخريش عليا نرجى فيك
فدوى/ok وصكرت ونزلت حطت العيال عند عمتها ونزلت تجرى للسياره
يتبع.....
زعمه شن حتكون ردة فعل سيف بعد يشوف صور ريان وشن حيصير بينه وبين فدوى؟
ومعاذ وشهد امتى حيتصالحو؟
هيا توقعاتكم رانا على مشارف نهاية الروايه
.....
.....
....
يتبع
#كاتبه_أميمه_اسامة
