قلوب سرقها الحب💔
الحلقه الثالثه والستون
"
"
أحمد/اختك محمطتني لاوافقت لارفضت
معاذ/تي لا ياراجل حالتك صعبه..
أحمد/بتلبسني توا ياامسخ؟
معاذ/تي ناسي انت مع من تدوي ولعبله حواجبه
أحمد/لا الله يربحك ياكليمتي رديلي
معاذيضحك/تو نحكي معاها
نحن نغسلو في الموعين وميسون تضحك عليا/شهد دموعك فيسع ماينزلن شنو هضا
نا/حرجني السخيف عليك موقف..كله منك ياسمر انتي اللي دزيتيه
سمر/والله ماصارت نحكي معاك في التلفون وتاريته كاسر وذنه بعدها اختفى ماجش في بالي انه ركبلكم
سلمى/مازلتي ما تعودتي ع سخافتهم؟
نا/باردين بصارتهم محرجه حتى معاذ عليك سماطه
تسنيم/ساره فاطنه لنظرات احمد امبدري؟
انا/اها شوي وفضحه اسماعيل
ساره/اها فاطنتله واضح للكل اكيد فطنله
سمر/حرام عليك ياساره امتى بتعطي الموافقه وتريحيه
ساره/مزال نمحمطه عشن يعرف مش بالساهل يزوج ساره
نا/واو عليك مكر حرام عليك اكيد في حال
ميسون/هيا يابنات تعالو نهدرزو جوا دبنا كملنا كرعيا طاحن
معاذ خش/ساره تعالي نبيك في شقتي وطلع
ساره قعدت ترجف/حي عليا شن يبيني
نا/كنك خفتي؟
ساره دموعهانزلن/حي عليا عشن احمد امبدري يبحت واسماعيل يلقح في الدوه حي عليا..شهد تعالي معايا
نا/ساره متجش قالك نبيك بروحك وجوا تمام مش حامق وكان نجي معاك يقولي نبي ساره بس..مش تزليطه
ساره/خايفه
نا/تو نرنلك عليه ورنيت/ ميدو..وسكتت معرفتش شن نقول
البنات يبحت فيا ويضحكن
معاذ/كنك دودي؟
انا/امم رايفت عليك
معاذ/اوو عليا حتى نا مرايف..سمر ماده وذنها وتوشوش لساره تطمن فيها
انا/بنركبلك لكن البنات مشبطات فيا..ومتعلقوش ع الصوت
والبنات يعلقن/خزي علييك
معاذ/حتى نا الشباب عالقين فيا بس نبي ساره في موضوع
نا/شن تبيها حبيبي..
معاذ/عليك قصقصه
نا/لابس قدرت تطلع من الشباب ع شانها ومتقدرش تطلع منهم عشاني..
معاذ/لا والله حبيبتي بس احمد لها فوق من اسبوعين خاطب وساره معش ردت عليه بنحكي معاها
نا/نبصر معاك ياعمري ساره قاعده تبخر تو ندزهالك
معاذ/باه عطيني بوسه قبل لاتصكري
نا/اه اه حبيبي بعدين
معاذ/شكلك محاصره
نا نضحك/ههه اها
معاذ/اموااه مع السلامه توا♥وصكر
سلمى/وااو ماتقدري
نا نضحك..
تسنيم/لنقانك صقع..ساره جت اضبطتني وقعدت تمسك في دموعها/اقسم بالله قلبي وقف
نا/ههه خلاص اركبيله
ساره/شن نقوله؟
نا/اللي في قلبك ههههه ساره طلعت
سمر/ياساره..
بحتت فيها/نعم
سمر/قلبي معاك
البنات يضحكن وساره ركبت..دقت معاذ فتحلها ومسكها من كتوفها/كيف حالك رايفت عليك وع لسانك..ساره حضناته/ ونا رايفت ع سماطتك
معاذ/ههههه قعمزي قعمزي..قوليلي احمد من قبل لانسافر خطبك والكل موافق نرجو في ردك..أمتى بتتحفينا؟
ساره وجهها انحمرو طبست راسها..
معاذ/ساره رايك مش حيغير ولايدير شي في العيله يعني لومنكش موافقه عادي..محد حيزعل والكلام هضا قاله ليا حتى أحمد..قالي ساره معش ردت راكم تغصبوها..
ساره/........
معاذ/ساره منكش موافقه؟؟
ساره/سخنت وقلبها يدق ودموعها نزلن
معاذ قرب منها/ساره عليش تبكي خلاص خلاص تو نقوله انك مش موافقه
ساره/لالا
معاذ/موافقه؟
ساره/هزت راسها
معاذ/خلاص نقوله انك موافقه أكيده؟
ساره/اها
معاذ/صليتي استخاره
ساره/اها..
معاذ/اضبطها مبروك ياسوسو..ربي يهنيكم أحمد شاب مفش منه
ساره تحشمت
معاذ/خلاص انزلي حتى نا بننزل
صبت ساره بعد وصلت لباب الحوش
معاذ/اول مره نشوفك ساكته هكي درتي عقل ساره ضحكت
معاذ/اضبطها وحب راسها. نجك ليا كبرتي ياسوسو وأحسن حاجه انك حتكوني قريبه منا مانرايفوش عليك
ساره/ربي يخليك ليا معاذ ونزلت
نزلت لقتنا كلنا وجدتي ومرات عمي وعمتي وعماتي في الصاله اول ماخشت/ها شن صار؟
ساره بحتت فينا وضحكت
أم أحمد/موافقه؟
ساره/موافقه
مرات عمتي قعدت تزغرت وعمتي وجدتي ونحنا نضبطو فيها ونباركولها
معاذ خش عليهم يضحك بحت في أحمد/تسمع في الزغاريت؟
عمي/شن في؟
أحمد نط بفرحه /ساره وافقت؟
معاذ اضبطه وافقت يالهبل وافقت شد معانا طول اللسان
أحمد/ع عيني وراسي
وقعدو يهدرزو وفرحانين
أحمد/شويه نجيب حلو بالمناسبة وتو القهوة وطلع
..............
ريان تبكي وفي دارها ومبتش تطلع من دارها ومن الكفوف وجحها منفخ..دايره روحها مريضه عشن محد يفطنلها/بنعرف من الحقير اللي مصورني،؟
هكي توا سيف خسرت سيف وتبكي خشت عليها ربا/ريان قالتلك امي تعالي تعشي
ريان/منبش نرقد طفي الضي ..ربا طلعت وسيبتها
بعدها في اليل تسمع فيها ربا تبكي..ولعت الوناسه/ريان كنك تبكي
ريان/مكني شي وزادت تبكي
ربا/منش مصدقه انك مريضه شن في احكي
ريان/خاطيني معندش لك راس
ربا/متعاركه انتي وسيف صاح
ريان/لالا..
ربا/ريان احكي لك 3 ايام بالحاله هذه وسيف مارنش عليك..احكيلي انا اختك تدسي عليا
ريان/انا وسيف خلاص
ربا شهقت/علييش؟
ريان/متسألينش
ربا/باهي نكلمه نحكي معاه نصالحكم؟
ريان/ردبالك..خلاص
ربا/مشكله وتعدي تو نكلمه نقوله ريان مريضه
ريان/ردي بالك ياربا راهو معش نحكيلك خلاص حتى نا معش نبي نردله
رباقعدت تسكت فيها/ خلاص خلاص ربي يعوضك خير منه
ريان/ان شاء الله
.... .........
ماما/يافدوى سيف كلم بياخذ العيال
فدوى/ماما خليهم تو ياخذهم معش يجيبهم
ماما/فدوى قوليلي شن تبي قالك باتك عشن نعرف كيف نحكي مع الراجل
فدوى/ياماما متحكيلش عليه نبش نسمع اسمه وقعدت تبكي
نجلا/هيا قاللكم بابا تعالو نشربو القهوة..وطلعت فدوى وماما من الدار
.............
نا ضبحت لمعاذ جاني في المدخل/نعم دودي
نا/معاذ تشيلني اليل لهلي نبات مرااايفه بككل عليهم..
معاذ/لادودي بيات لا
نا شقمت فمي/باي معاذ مرايفه ع ماما وبابا بككل.. فرصه مفش جامعه وبكره نروح
معاذ/عارفتيني نقدرش نرقد وانتي مش يلايا..نشيلك بكره الصبح بدري
نا/معاذ باهي خاطري في سهرة اليل مع البنات رايفت عليها
معاذحرك راسه بمعنى لا
نا/باهي خلاص وخنقتني العبره وجيت بنخش
معاذ/بنركب نجيب الهدايه من فوق وين قاعدات؟
نا نزلت دمعتي/في دار المعيشه
معاذ/حبيبتي تبكي؟
نا/لالا وخشيت
معاذ/شهد شهد تعالي
ناصبيت وعاطيته بظهري وصبيت في مكاني/نعم معاذ/تبكي عشن قتلك متباتش..مرديتش عليه
معاذ برمني له/دموعك واتيات انتي لنقانك دلوعه
حطيت يدي ع وجهي وطلقت البكا
معاذ ضمني له/اش اش خلاص خلاص تو نشيلك فضحتي بينا
سلمى جايه/شهد..شهد تعال...وشافتنا انحرجت وردت خشت
معاذ/خلاص يادودي كلميهم وبعد العشا نشيلك
نا فعت راسي وبسته/ نحبك
معاذ/باهي يافرخه تو مش كنتي تبكي
نا نضحك ونبكي/مو توا رضيتني
معاذ يهز في راسه/بيبي
نا/بيبيتك نا
معاذ اضبطني وحب راسي خلاص خشي وامسحي دموعك يابكايه
نا خشيت وهو ركب
البنات دايرات حولاقه بعيد ع الصبايا ويهدرزن سلمى تحكيلهن عليا نا ومعاذ بعد جيت بحتن فيا وضحكن
نا/كنكن
سلمى/معندكمش حوش تضبطو فيه حرجتوني جايه نضبحلك جت عيني في عين معاذ وهو مضبطك
نا انحرجت وحطيت يدي ع فمي /هئ شفتينا.. والله مافطنتلك
سمر/وين تفطني وانتي غاطسه في صدره كيف العصفوره
البنات يضحكن
تسنيم/ههههه بعدك انتي طشه ومعاذ طويل وعريض هههه ااكيد بعد تدويله ترفعي راسك فووق بش تشوفيه
نا/هههه يهبل..وقعدت نمسح في كحلي وبديت نرن ع ماما
ميسون/نعدي نكلم خطيبي احسن مانمص الليم وصبت نحن نضحكو ماما/شهد روحتي؟
انا/ماما كيف حالك رايفت عليك..كيف حال بابا
ماما/.... .
انا/امس متاخر في اليل شن تديرو مرايفه عليكم ماما/........
نا/صوت من هضا عمو حميده عندكم؟
ماما/..........
نا/نفس صوت عمو..باهي مامي ناجايه بايته عندكم وابتسمت
ماما/.....
نا/حنجي متأخر راه تعشو
ماما//....
نا/باه باي وصكرت
صفاء تبحت فيا/ههههه شن ياسمر بنت خوك سحسوحه
نا طلعتلها لساني
سمر تكتني ع جنبها/دلوعة العيله هذه
عماد مركز معانا شكله نغر/مزال العشا ياسمر؟
عمتي/مش شور سمر العشاء تو نصبي خلاص رمينا المكرونه
سمر/خلي عميمه تو نشوفها
عميمه/لاتريحي يابنيتي قاعده تكري في روحك
عماد بصوت دوب ينسمع /اسملا علينا وبحت في سمر سمر قعمزت وفاتاته
ساره/كنه عماد؟
سمر/غيره قاتله
نا/قصدك عشن انا توا
سمر/تصوري يغير من البيبي يقولي تحبيه اكثر مني بعد نجيب شن يدير؟
سلمى/ههههه غباء
نا/معلش دلعيه ناقص حنان
تسنيم تضحك/عطكن حبه غيرن الموضوع عينه عندنا..واخرى اهو جا اللاخر قصدها ع معاذ
معاذ خش وقعد يوزع في الهدايه..نا نبحت فيه وسارحه قديش نحبه نموت فيه حنون وطيب وعصبي وكريم نعشقه تعلقت بيه ربي يحفظه
ميسون تحرك في يدها قدام عيوني/هاي اسمعي شهد
بحتت فيها/نعم
ميسون/لمي عيونك مش وقت هيام
نا/اسكتي ياسامطه فضحتيني
سمر/هههههه نعدي يلاعماد وعدت قعمزت يلاه
..............
تامر/شن في ياسيف بينك وبين فدوى
سيف/عجيته ياتامر..خسرتها خسرتها بغبائي
تامر/احكي بلكي نقدر نساعدك
سيف/كيف بتساعدني مشيتلهاكم مره متتبش تطلعلي وحاضرتني
تامر/باهي احكيلي تو نا نكلمها
سيف/.....
تامر/محد حيعرف بيني وبينك بس
............
ركبت جهزت روحي وخذيت هدايا هلي وطلعت..وصلنا وشرب معاذ شاهي مع بابا وماما وروح نا نضبط في البنات ونهدرز تقول زامطه راديو
معاذ رن عليا/الو معاذ وصلت؟
معاذ/اها وصلت تو كيف خشيت الشقه
نا/باهي تصبح ع خير حبيبي
معاذ/وانتي من اهله صكرت عليه ودزيت رساله لعمو حميده وعماتي قتلهم يجو بكره
ووزعت الهدايا ع هلي فرحو بيهن..
بابا/كيف حال سمر
نا/تمام كويسه تو تجي بكره
وخش بابا وماما رقدو
ونا خذيت ساره اضبطتها ورقدتها عندي وهاجر رقدتها غاده وفدوى ماسكة عبدالله
غاده ترقد في هاجرو تحكي مع علي/تمام ياحبي..اها ساهرين انا وفدوى وشهد ونجلا
غاده/اها روحت امس وبايته عندنا
نا/سلمي عليه
غاده/قالك الحمدلله ع السلامه
نا/الله يسلمه
غاده/اها مزالت فدوى
باهي حبيبي نكلمك بعدين
سلام ولفت علينا
فدوى/شن جوتركيا
نا/يهبل الله عليك جو درناه اها جبت الالبوم بتاع الصور وصبيت حليت الشنطه وقعدنا نتفرجو
موسى خش علينا/خلونا نرقدو يلاكم مرايف ع شهد
انا/تعال ياموسى حبيته
غاده بحتت فيا بغل/لايرقد في داره
نا/باهي خلي شويه ويعدي يرقد
موسى/لنقانك سخيفه ياغاده امتى تزوجي ونفتكو منك
غاده رفعت يديها/يارب
موسى/قليلة ادب متحشميش
غاده/قليلة ادب قليلة ادب اطلع خلاص الساعه 1 بنرقدو
موسى صبى طلع
نا/حرام عليك ياغاده كنك هكي بشويه
فدوى/ديما ناقر ونقير هما الاثنين تقول منداد
نا/شن صارفيك يافدوى
فدوى/شي قاعده
غاده/احكيلها ياشهد الراجل نحفن كرعيه يبيها ترد وهي مصكره راسها
نا/فدوى عندها حق مهوش ساهل اللي داره بس يافدوى حرام لك شهر عويلتك تبهدلو وهو فسخ الخطبه وعارف روحه غالط..ياستي اسمعي منه وحطيله شروط صعبه وشوفي رده
فدوى/منش طايقه نشوف وجهه مجروحه منه زعلانه مقهورة استغفلني وضحك عليا..وقعدت تبكي..
يغازلني وبعدها يكلمها هيا..ويعدي يخطب من ورايا وفي النهاية يضربني منش مسامحته نا
غاده/باهي حددي تبي تشعفيه عليها ولا بتنهيها وتطلقي؟
فدوى بحتت فيها زين
غاده/احكي بتطلقي؟
فدوى/لا
نا/اسكتي ياغاده..انتي منكش حاسه لانك مش مجربه
انا معاك يافدوى انتي مازلتي تحبيه بس مجروحه منه وهو كانهو يحبك حيصبر عليك لين ترضي ويحاول يرضيك بكل مستحيل
فدوى هزت راسها وزادت تبكي..حضنتها /خلاص فيفي فكينا من سيرته خلينا مبسوطين وغيرنا الموضوع
علي رن علي غاده/حبيبتي انا فم الباب جايبلك حاجه توكيف روحت
غاده/عليوه الساعه 1:30حي عليا نقدرش
علي/من فم الباب والله مرايف عليك هيا حلي وصكر عليها
غاده ترعش/المجنون جاي تواحي كان يشوفه بابا
نا/اطلعيله تو نراقبلك الطريق
صبت غاده لبست توته حمرا ضيقه ولفت شعرها بطريقه عشوائيه وفتحت وهي خايفه..بس بعد شافاته نست خوفها وتعنقاته/كيفك عليوة
علي/محلاك بالاحمر
بنخش مرايف عليك
غاده/علي تعال بكره توا بابا يشوفك وتصير مشكله
علي/حرمان هضا نا راجلك معقوله نجيك مرتين في الشهر بس
غاده/تعال في الجامعه بكره نفطرو مع بعضنا
علي/ناخذش راحتي الناس تبحت
غاده/عليش ناوي روح
بعدها علي حل عيونه زين ووجهه تغير
غاده عرفت ان في حد جا برمت وتلقى
.....
.......
يتبع
توقعاتكم من اللي زرق على غاده؟ قلبكن طاح من الخوف؟
