قلوب سرقها الحب💔
الحلقه السادسه والسبعون والاخيره
"
"
طلعت من الحمام ونا لابسه قفطان حوش بتاع حوامل رمادي كت وفي نص الركبه قعمزت ع المرايا نمكيج بروق ..بخيت برفاني وطلعت للمطبخ وتيت القهوة وخشيت بالسفره ع معاذ/حبيبي القهوة وا... وصلت نص المربوعه..وانصدمت وتيبست في مكاني معش قدرت نتحرك
كان في رجاله اصحاب معاذ في المربوعه!!.من صدمتي وحشمتي صبيت في مكاني كرعيا تيبسن
معاذ.الدم فار في وجهه وصبى يجري قدامي مغطيني وماسكني ويدف فيا لين وصلت للصاله ولصقت في الساس..كان يفنص وطلقني
عروقه بارزات ووجهه أحمر ومتعقد وخبط يده في الساس
انا خفت وحطيت يديا ع وجهي
معاذ سيبني وقعمز في الصاله ونفسه عالي يحاول يهدي نفسه
عديت نجري للدار
معاذ/خشت عليا في المربوعه لابسه لبسه سمحه ومكياج حلو طالعه أميره..اذكرت اني قتلها بعد تديري حمامك ديريلنا قهوة وتعالي يلايا في المربوعه وخشت عليا ونا معايا هيثم وفرج اصحابي..انصدمت ومعرفتش شن تدير.. صبيت نجري حضنتها وغطيتها بجسمي والغيره اشتعلت عندي..وحمقت وشوي وتهورت بعدها فطنت لروحي خبطت يدي في الساس وهيا خافت وغطت وجهها خافتني نضربها..
قعمزت نهدي في روحي..لاني لما نحمق معش نفطن لتصرفاتي..وهيا مشت تجري للدار
قعدت فترة مقعمز منش لاقي وجه نخش المربوعه ع أصحابي
في النهايه استجمعت شجاعتي وخشيت عليهم كانو بروحهم مرتبكين ومنحرجين
هيثم/نستاذنو منك يامعاذ عندنا شغل هيثم من الربكة افتعل كذبه ونا عارف ان شغلهم معايا نا
معاذ/باهي تفضلوا
شهد/خشيت الدار قعدت نبرم يا فضيحتك ياشهد بس معاذ غلطان المفروض قالي معاه رجاله نوحى نا ان في حد في المربوعه؟
بحتت في روحي في المرايه..عليك لبسه خليعه شافوني بيها.. كلا ناغبيه وقعمزت في داري ع السرير..حي معاذ راقيتله ع الاخر شن ندير؟؟
............
إسماعيل/زهراء زهرتي الجميله سمح صوتك وانتي واعيه من النوم
زهراء/امم
إسماعيل/صحصحي صحصحي عشن تهدرزي معايا.. في واحد يرقد لعند توا؟
زهراء/هذي نا
إسماعيل/نحبك يافرخه نحبباك
زهراء/سمعه انت في الشارع اعقل شويه الناس تسمع فيك
إسماعيل/شن ندير مجنون فيك يابنت
زهراء/حتى نا نحبك ومجنونه فيك بس لو نعيط بيها كيفك..يكون اخر يوم في عمري
اسماعيل/بعيد السو عليك
............
أسيل تهدرز مع اسلام في التلفون بعدها/حبيبي انا مضطره نصكر توا نكلمك بعدين طالعه مع ماما
إسلام/وين طالعين؟
أسيل/للمحلات ماما بتشري دبش..
إسلام/وين بالزبط عشن نجي نشوفك
أسيل/حي عليا اسلام ماما تفطنلك
اسلام/والله نشوفك من بعيد
أسيل/محلات******
اسلام/تشاو وصكر
..............
معاذ/طلعو اصحابي خشيت نشوف شهد..مازالت في الدار دقيت الباب وخشيت لقيتها مقعمزة ع السرير و مضبطه المخده
معاذ/شهد..رفعت راسها وبحتت فيا وبدن دموعها ينزلن/معاذ منحسابش في حد معاك في المربوعه
معاذ/اس خلاص يالهبله حصل خير..مشيها بالجو ..رمت روحها عليا كيف البيبي/نحبك نحبك
معاذ/نحبك شهد..حبيبتي تاج راسي..احلى هديه من ربي
قعدت شهد تبحت فيا زيين..وبدت تبوس فيا
.............
رانيا/حبيبي عندي لكل خبر حلوو
ابراهيم/شنو حبيبتي
رانيا/شريت اسدال
ابراهيم/ناعليا منك مبروك حبيبتي..شكرا يا احلى بنوته في الدنيا
رانيا/تحبني
ابراهيم/تي نعشقك مش بس نحبك
وقعدو يهدرزو
...........
اليوم قعدت في شقتي وثاني يوم من الصبح عديت لهلي
طبعا اليوم العشيه التفريش
حوسه وزيطه وغاده مازالت طالقه الشيانه هههه تغدينا ولمينا حوستنا بسرعه وطلعنا طبعا طول الطريق تبييب واللي حال اغاني واللي يمتع وموسى مقعمز هو ويوسف في الكنتر لاورا وزايطين فيها بالميش وصلنا..وكان حوشها في شقه في الكيش جديده وملمومه وسمحه بنات بنغازي يعرفنهن تفصيلة شقق الكيش وهو دايرلها صيانه..يعني شقه سمحه استقبلونا هل علي بالزغاريت (اخته وخالته بس قاعدات) ونحن نزغرتوا وسلمنا وخشينا الصبايا في دار وحده لين الرجاله يركبولنا الدبش نزلو الرجاله وبدينا نفرشو..انا وعمتي عبير خذينا المطبخ وعمتي فريحه وبنتها هدى خذن دار النوم
ونجلا وخديجه خذن المربوعه.. وسمر وفاطمه الحمام والصاله
وبدو هله يضيفو فينا جايبين ضيافتهم كلها معاهم ..وكانت الضيافه عصير وشكلاطه وقهوة و4 انواع حلويات وقزوزه وتبسي بيتزا وبطاطا مبطنه واسياخ دجاج وبوريك
بعد كملنا التفريش..بدت نجلا تصور في الشقه فيديو..وبدينا في النوبه خالة علي ملقتش حاجه تدربك عليها مشت للمطبخ جابت طاجين وبدت تدربك..
يامبروك عليه وليته.. تغسل وتحددسوريته..
البنات يصفقت
كريمه اخته/يامبروك ع خيي اللي عمره ماوجعني..يامبروك ع خيي اللي ديما مدللني..
فريحه/ اللهم امصلي ع النبي .. علي خوتي و ضني عمي
-عندي خوت اتقول حكومه .. لباسين العالي سومه
خالته/سلم خوتي اتقول كواسر .. ما يخشوش السوق الخاسر
سمر صبت ترقص
الصقر اللي دايرلك قيمه اجعنك تحت جناحه ديما
خديجه/ ههههنهارعليه ندور .. ههههنهار اليوم منور.. ههههنهار اللي تمنيته ***** طلبت العالي ولقيته
ان شاء الله السعد ينوشنا*** انديرو عرس في حوشنا.. ان شاء الله السعد يتبعنا***** انديروا عرس في شارعنا
عبير/رورررررريييي
فريحه/روروررريييي
عمي رن ع فاطمه/هيا انزلو
لبسنا وسلمنا ونزلنا بالزغاريت والتشتاي
وبدو الرجاله يبيبوا لين روحنا وخشينا حوش هلي ونحن نزغرتوا وكانن صاحبات غاده يلاها بدن يغنن ويصفقن بدينا معاهم
يا مبروك عليك خديتي**** ياطباقة فراشيتي
صلن علي الهادي وارعنها*** راكن بالعين تخودنها.. يامبروك افراح ضنانا *** من عين المعيان ارعانا..
ان شاء الله تسلملي ياباتي ****يامدلعني اني وخواتي .. جا يخطب قالوله باهي *****من الفرحة ملحت الشاهي
ههههنهار اليوم تمنيته ***** طلبت العالي ولقيته ان شاء الله السعد ينوشنا**** انديروا عرس في حوشنا ان شاء الله السعد يتبعنا**** انديروا عرس في شارعنا..
غاده/صورتي كل شي يانجلا؟
نجلا/ماعقبت شي
غاده/شكرا وخذت الكمرا وبدت تتفرج هيا وصاحباتهاع الشقه
.............
طبعا فرح غاده مش حيكون نفس فرحي نا 3ايام..انتو عارفين افراح عرب بنغازي توا صار فيهن اختصااار شدييد ليله وحده تديرها العروس وهل العريس يجيبو اسياقهم ويجو يتعشو وياخذوها نظرا لظروف علي الماديه وظروف هلي والغلا اللي توا..ربي يحن علينا..ماعلينا باهي
ثاني يوم الساعه 11الصبح جو هل علي امه وباته نذكركم متوفيين ..جن خواته وصبايا خوته وخالته وعمته و2 عزايز جيرانهم جو بالتبييب ورمي الميش واجواء سمحه اللي كل بنيه وين ماتسمع الصوت دبشش رمي تجري ع الروشن واتباوع
عمتك غدا جرت البلكوني بالكمرا من ورا الرواق تصور ..
ركبن الصبايا يزغرتن
هن هاذين كساوي ريدك كان ماسدن راه نزيدك
هن هاذين كساوي ريدك كان ماسدن راه نزيدك
بدينا نحن نشتو
العين قالت يامرحب بيه اللي جانا وجاب كساويه
العين قالت يامرحب بيه اللي جانا وجاب كساويه روروروررريييييي
روروروررررييييي اي اي
بدينا نضيفو فيهم
حميده/هيا ياسمر القهوة للرجاله
حوش كبير وفمه واسع .....راجاله يبنو علي التاسع ... قولو بسم الله وخشو ...في حوش الزينين تمشو دوري ياخيمة لافراح..دوري ماتخلي مطراح..
ان شاءالله ما تشتاقه العين..ايخش يقول بناتي وين.. يامبروك افراح ضنانا *** من عين المعيان ارعانا..
ان شاء الله تسلملي ياباتي *** يامدلعني اني وخواتي ..
