قلوب سرقها الحب💔
الحلقه الثالثه والسبعون
"
" خشينا حوش جدي انا ومعاذ لقينا الكل قاعد حتى عمات معاذ .قعدن الصبايا يزغرتن
كان الحوش مزين كله بالامبولات..ومفش حد من العيله مش موجود.. عمات معاذ وبناتهن حتى تسنيم اللي كيف جايبه جت.. انا ومعاذ بحتنا في بعضنا..
ساره جتني تجري حضنتني/شن رايك في المفاجئه؟
انا/تهبل
معاذ حضنها/حلوة شكرا
ساره/فكرتنا كلنا
الكل يبارك
انا ومعاذ من الفرحه عيونا دمعن
(كم أنا محظوظه جدا..أصبح الان لديا عائلتين.. عائلة ابي التي تربيت في أحضانها منذ طفولتي وعائلة معاذ الحبيبه..كانت تصرفاتهم تنم عن الحب الشديد) فطنت ع فلاش الكمرا
سلمى تضحك/هضا وين فطنتي؟ممبدري ونا نصور
انا/هههه فكرة من التصوير؟
سمر برفعة حاجب/اكيده نا
اضبطتها/نجك ليا عميمه الغاليه
سمر/ههههه هذه ثاني مرة تقوليلي عميمه من يوم تزوجتي معاذ
بحتت فيها وقعدت نضحك معاذ ضحك ع البنه بدون مايعرف القصد..بس انتو اكيد عرفتو
رانيا وميسون يمدن في الباستي والقازوزا
عميمه/ان شاء الله نحوسو في فرحكن
امهن/ان شاءالله
أبراهيم وشوش لعمته في وذنها
عمته تضحك/باتها قدامك
ابراهيم/انتي موافقه؟
كان هي وباتها موافقين انا موافقه
ابراهيم/لنقانك صقع
بعدها ساره وسلمى قعدو يمدو في القهوة والحلويات
جدي/هيا احمد امتى تسقد روحك عشن نطلعوا الفرح
أحمد/خلاص حاجات بسيطه وتكمل الشقه
ابراهيم/لا أرجاني نبني ونطلعوا فرحنا مع بعضنا
أحمد/في أحلامك..مازلت بنرجاك لين تبني
عماد/عليش مستعجل؟
أحمد/انحرج..
سالم/هذه الساعه المباركه سقد روحك وابدا ابني بنتهنى عليكم شغل وتشتغل وقرايه ومكمل بنشوف عويلتك
إسماعيل/ونا متبش تشوف عويلتي ياباتي؟
باته/تي مغير كمل قرايتك بس..وانت ديما مستعجل
كلهم يضحكو عليه..بعدها بحتو في اسلام
اسلام/متبحتوش فيا هكي..مش حنزلط روحي ونعبر ع شعوري
كلهم/هههه
كانن اجواء سمحه مفش حقد ومفش حسد كلهم كيف الخوت..فعلا عائلة نادرة وفعلا لما توفى راشد وياما زعلت ويامادرت قالتلي فتحيه الله يذكرها بالخير/قولي اللهم أجرني في مصيبتي واخلفني خيرا منها..الحمدلله ربي عوضني بالخير
.............
ثاني يوم جوني هلي كلهم يباركولي بعد سمعو ع اني حامل
سمر الليه ماسيبتها بكل عبير/شكلك تجيبي اليوم
سمر/حي عليا خايفه بكل
حليمه/لاما تخافي يابنتي دزيتلك عماد ع عشبة مريم..وان شاء الله ربي يسهل عليك.. كان تعبتي حتى متأخر دقي عليا نمشي معاك ماتمشش بروحك..نستاذن منكم نعدي نعشي عمكم مفتاح
هي مع السلامه وطلعت
غاده دايره جو هيا وساره طباعهن يشبهن بعضهن وسلمى ونجلا مع بعضهن
سلمى/محد مأيد الموضوع..والله انا نحس في 12سنه مش فرق
نجلا/والعيال؟
سلمى/عادي العيال عمرهم سنتين يعني معتمدين ع نفسهم
نجلا/مازلتي صغيره ووراك قرايه حتتعبي مسؤليه
سلمى/منبش نشتغل نا نكمل قرايتي ونوقف
نجلا/مش مقتنعه انا منفكرش نحب ولا ننخطب لين نكمل قرايتي..مالي ومال النكد
سلمى/هههه كلا انتي غريبه
انا/فدوى شن جوك انتي وسيف
فدوى/الحمدلله سمن ع عسل الاسبوع الجاي ماشيين تركيا
نا/الله عليك جو سمحه بعدك..ربي يكمل عليكم
كملت السهره وروحو هلي
................
إسماعيل يهدرز هو وزهراء في اليل ع التلفون
زهراء/بتقنعني انك عمرك ماحبيت؟
إسماعيل/تبي الصراحه؟
زهراء/ نبي بنت عمها
إسماعيل/نكلم في 100 بنت بس ماحبيتش ولا وحده
زهراء/عليش تكلم فيهن باهي؟
إسماعيل/ أهو كساد
زهراء/باهي بنصكر
إسماعيل/عليش خليك
زهراء/لاخلاص نعسانه
إسماعيل/تصبحي ع خير
زهراء/وانت من اهله وصكرت
بارد معندش احساس يكسد عليا كيف ال100 اللي قبلي..معش نحكي معاه
إسماعيل/زعمه كنها صكرت؟! قلتلهاحاجه تزعل؟؟ دار تلفونه صامت ورقد
..............
سمر/عماد..عمااد نوض
عماد/نعم..وبرم ع الجنب اللاخر
سمر تعيط/ اه عماد نوض شيلني المستشفى
عماد/ارقدي ياسمر نعسان انا
سمر قعدت تعيط/عمااد بنجيب نوض
عماد صبا/سمر كنك تبكي
سمر مقطعه روحها بالعياط..حي عليا عماد خلاص معشش نقداار
عماد متفلوج قعد يبرم في الدار مشعارف شن يدير..بعدها قرب منها
سمر مسكاته/عماااد معشش نتحمماال كلمليي عمييمه
عماد نزل يجري كيف المجنون ودق ع باب دار امه
مفتاح/حليمه نوضي الباب يدق
حليمه قفزت هذه اكيده سمر تعبانه وصبت فتحت الباب
عماد يبرم في مكانه/امي سمر..شن نديرلها
حليمه كراته من يده/تعال وركبت لسمر
سمر كانت مصبيه ماسكه في العرصه وتبكي بالصوت/اه ياعميمه بنموت حي علياا خلااص لين تسخف ادعني ربي يسهل عليها يابنات
عمتي/متخافش حبيبتي ساهله هي وقعدت تلبس فيها عبايتها
عماد مصبي يبحت فيها ويبكي
عمتي/عماد اشمرها مهش قادره اتحرك
عماد/اها..باهي وشمرها ونزل ومشو جري للمشتشفى
سمر في السياره تعيط وعمتي تصبر فيها وعماد يكلم في دكتورتها.. واخيرا وصلو وخششوها جري عمتي خشت معاها
د/خلاص حاله ولاده ديرولها اوراقها
سمر في حال وتعيط/عماد عميمه متسيبينش ياعميمه
عماد واخذ المستشفى ماشي جاي ودموعه في عيونه
عمتي/قعمز ياباتي ريح روحك
الممرضه/انتو هل سمر***
عمتي صبت/اها شن صار فيها
الممرضه/حمدلله ع سلامتها جابت وليد ونزلناها شويه ونخششكم عليها وعدت
عماد يضبط في امه ويبكي
عمتي تبكي/مبروك مبروك الحمدلله ع سلامتها
ساره حست بالحركه وقت طلعت عماد وامها ناضت بس ماطقتش فيهم رنت عليهم
ساره/ها يمي شن صار في سمر
حليمه/جابت الحمدلله الحمدلله
ساره/الحمدلله ع سلامتها باهي هي بعد تشوفوها رني عليا نكلمها
سلمى تهدرز مع أوس تحت البطانيه
حبيبي/خايفه هلي ما يوافقوش
أوس/والله نحبك ياسومه..نحبك ومتفكرش في العيال نعانيهم انا هما توا 3 سنين يعني حملهم اخف ساره سمعتها تدوي رفعت عليها البطانيه/انتي واعيه تهدرزي ونا نحسابك راقده
سلمى/فجعتيني كنك
ساره/سمر جابت
سلمى/والله شن جابت
ساره/وليد
سلمى نست اوس ع الخط وحضنت ساره/يعني قعدنا عميمات.. الله محلاه..امتى جابت
ساره/توا ممبدري ونا نبرم نحسابك راقده وانتي تحكي مع سي السيد
أوس يسمع ويضحك
سلمى حطت صبعها ع فمها/اس
اوس/سلمى خليها تعبر ع شعورها
سلمى/سامحني اوس ساره ديما هك لسانها طويل
أوس/عادي عادي وغير الموضوع مبروك عليك قعدتي عمه
سلمى تضحك/ متشوقه نشوفه
أوس/تحبي العويله
سلمى/نموت فيهم..قولي اوس:منيش توفت مراتك ؟
اوس جوه ضحاك/ياحنه ريمه تبقى بنت خالتي كيف ماقتلك وهي كانت تحبني الله يرحمها بس نا لا..يعني حب من طرف واحد
سلمى/يعني ماحبيتهش؟
اوس/لا لا تو نحكيلك
كانت اتوددلي وتلمحلي بس نا داير روحي عبيط هي كويسه لكن انا مش مقتنع اني نزوج وحده من دون حب
لين جت دوت لامي وقالتلها انا نحب اوس ..انا بعدصار هكي كرهتها وقعدت انتهرب من موضوع الزيزة
بعدها هيا مرضت جاها بعيد عنك الخبيث وحالتها النفسيه قعدت صفر ومبتش تتعالج امي زرت عليا اني نزوجها ونشيلها نعالجها لانها معندهش خوت
ازوجتها زواج عادي مفشي حب بس كان فيه احترام وهيا كانت تحبني موت
طبعا الدكاتره منعوا عليها الحمل وعطوها موانع لين تكمل فترة العلاج بس هيا اصرت انها تحمل ونا كنت معارض الفكره عشن صحتها
اكتشفت بعدها انها ماتاخذش في المانع وانها حامل
اصريت عليها ان نديرلها عملية اجهاض مابتش
أوس/ليش ياريمه هكي انتي مش هامتك صحتك توهي تلبسي ونمشو المستشفى
ريما/منبش نمشي عليش بتشيلني المستشفى
أوس/لازم تجهضي صحتك اهم
ريما تبكي/اوس حرام عليك عليش تبي تحرمني من البيبي
ياريما صحتك اهم بعد تصحي تو تجيبي
ريما/اوس المرض هضا معش يصح صاحبه اوس حلم حياتي انك تكون شريك حياتي ونجيب منك عويله
انا نحبك يااوس عارفه انك متحبنش بس هضا اللي نبيه من الدنيا قبل لا نموت متستخسرهش فيا خاطري نجرب الامومه
اوس/ يبكي ليش تتشاءمي تو تصحكي وتبقي كويسه
ريما صكرت راسها حاولت نقنعها ع مادارت معاها امها وخواتها وامي كانت مصره ع رايها
روحنا ليبيا بعد وصلت الشهرالرابع قعدت صحتها في النازل تعبت وااجد ومن الشهر الخامس وهيا في المستشفى تحت رعايه خاصه
سلمى تسمع فيه وتبكي
كنت نجي نزور فيها يوميا
نجيها من 11 الصبح نقعد معاها لل2 الظهر وبعدها نروح ونجيها من 5العشيه ونروح 8اليل بما ان كان صاحبي في المستشفي كان دايرلي واسطه نقعد معاها الوقت هضا كله
وتبادل امي وخالتي عليها
نقولك تعلقت بيها وخذيت عليها..كنت نعامل فيها كانها اختي نعطف عليها ومنقصش عليها حاجه بس مش كزوجتي..منش عارف ليش
جابت بعمليه قيصريه في بداية التاسع وتفاجئت بيهم توأم وليد وبنيه
تعبت واجد وقعدت اسبوعين في العنايه اسبوعين
بعدها فاقت وقعدت كويسه يوم واحد شافت العيال
ريما تحب فيهم/شن سميتهم؟
ريما ورياض
بحتت فيا/الله محلاهم خلي بالك منهم يا اوس متزعلوهمش وقعدت توصي بس ماكنتش واخذ بالي
المغرب روحت وامي روحت بالعيال ع امل انها ثاني يوم الصبح يعطوها خروج
بس الساعه 10اليل جاني تلفون من المستشفى وخبروني انها توفت
سلمى تشهق وتبكي واوس حتى هو كان يبكي
زعلت وبكيت عليها وقعدت نعاني في العيال مع امي كإني امهم مش بوهم
وهضا اللي صارتوا عمرهم سنتين انتي عجبتيني ياسلمى وحبيتك ووالله ماحنظلمك صدقيني
سلمى تبكي وساره تبحت فيها باستغراب
سلمى/ان شاء الله خير يااوس
خلي تو سمر تطلع من المشتشفى وتخف الزحمه وتعال اخطب
ساره/تشقم واتأفف
سلمى/خلاص حبيبي بنصكرتوا
اوس/هيا مع السلامه خلي بالك من روحك
سلمى/سلام
وقعدت تمسح في دموعها..وجعها اوس ووجعتها ريما ووجعوها العويله..وزادت تعلقت بيه اخرى
.............
عماد خش ع سمر/الحمد لله ع سلامتك حبيبتي ويمسح في دموعه
سمر وهي تبكي/حبيبي معش بنجيب قريب متت عمتي تضحك
عماد/بعيد السو عليك من الموت وحبها وبعدها فطن ان امه هنا انحرج
عماد/نعدي نشوف وليدي وطلع
عمتي/الحمدلله ع سلامتك يابنيتي خوفتيني عليك
سمر/سامحيني ياعميمه
عميمه/انتي بنتي
..............
معاذ ناض يصلي في الفجر وتوضني
شهد نوضي الفجر اذن ينوض فيا وبعدها جاه مسج من ساره/مبروك قعدت عمو سمر جابت
معاذ/شهد نوضي شهد سمر جابت
اناصبيت/ صاح امتى
معاذ/بشويش عليك معش صبي بالقوة
انا نبرم/تلفوني تلفوني بنكلمها
معاذ/بشويه بشويه جابت وكويسه كنك مفجوعه
أنا نبكي/حبيبتي اكيده تعبت واعر الجياب وسمر خوافه لازم نسمع صوتها بش نطمن عليها
معاذ مدلي التلفون ورنلي عليها
انا/سمر الحمدلله سلامتك كيف حالك
سمر/دودي كويسه نا متبكش جبت وليد يهبل
نا/الحمدلله باهي امتى بتطلعي
سمر/اكيده بعد الظهر
انا نمسح في دموعي/ باهي مبروك قعدتي ماما هي نسيبك تريحي ودزيت رساله لماما وعمو وفريحه وعبير وحطيت التلفون
معاذ يبحت فيا/خلاص اطمنتي؟
انا/حبيته مبروك حبيبي
معاذ/توا اذكرتي تباركيلي
انا/حبيبي والله خفت عليها متزعلش ياحبي وقعدت نبوس فيه
معاذ/باهي خلاص هي وقت ع الصلاة ألحقي ارقدي بعد تطلع سمر من المستشفى مفش نوم ..وطلع
........
.........
يتبع
ءاراءكم و تتوقعو من تكون اللي يبيها ابراهيم؟
وهل حتوافق ولا لا؟
....
.....
....
#كاتبه_أميمه_اسامة
