قلوب سرقهاالحب💔
الحلقه الاربعون
"
"
سيف خش الحوش لقى فدوى لابسه شرت وبدي ودايره شعرها فلوو ومكياج خفيف ومبخره الشقه وترجى فيه استقبلاته/كنك طولت
سيف/البلاد زحمه شن هالسماحه
فدوى ضحكت فوق من نفسها/وسيفه بكره بنفطر في حوش جدودي وبنبات
سيف/عليش تفطري باهي لكن بيات لا
فدوى لانها مضايقه منه وماسكه روحها غصب بكت/نبي نعدي سمر وشهد جايات زاير وبايتات متحرمنيش من اللمه
سيف/فيفي خلاص حبيبتي ليش تبكي خلاص تو نشيلك
فدوى تسب فيه في نفسها يضحك عليا الحقير بكلمتين وزادت تبكي
قعد سيف يرضي فيها واذن المغرب فطرو ومشى جوهم تمام غصب عن فدوى حاولت تمشي الجو
&ساره&
طلعت من يلا سلمى وشهد وسمر وفتحت الحظرو دزت لعثمان مسج وهي تبكي (هلي موافقين عليك بس انا اللي رفضتك لاني منش مسامحتك على كلامك اللي قلته ليا وشكك فيا وهضا درس عشن تبطل شك ياشكاك انسى ساره) وردت حظراته وطلعت من الحمام مع جية تسنيم جايه تفطر عندهم تسنيم جايبه باستي وقزوزه قابلتها ساره سلمن
تسنيم/كنك شكلك باكيه؟
ساره/ لا مكني شي شن قصة القزوزه والباستي رمضان الواحد يجيب بكلاوة ولا كنافه
تسنيم سلمت عليهم/عندي لكم خبر ... كلهم شنو وسكتو معاذ بحت فيها وعيونه رقرقن /قولي حامل صاح؟ تنسيم هزت راسها جاها يجري وشمرها من الفرحه/مبروك مبروك
جده/نزل البنت ياولد
معاذ نزلها/احلى خبر والله حنقعد خال واذكر فرحته بحملة هاجر وتمن دموعه ينزلن وقعد يمسح والكل يبارك لتسنيم وتسنيم الفرحه مش سايعتها
انا نسال في سمر/كم لها متزوجه؟
سمر/4سنين
انا فرحت لفرحتها..كانت فرحتها لاتوصف واستغربت في معاذ فرحان وعيونه يدمعن معرفتش دموع فرح ولا شنو واذن المغرب وفطرنا وكانن اجواء سمحه بصارة الشباب ع هداريز جدو وجديده ع الحوسه بعدها عدو الرجاله للجامع وروحو بدو قهوة وحلو كانن اجواء مش عاديه ولمة سمحه..بس ساره مش عاجبتني..
انا/ساره كنك؟
ساره/شي
انا/لالا في حاجه
ساره قصه طويله تو مره ثانيه نحكيلك .. احكيلي انتي عن اخر التطورات؟؟
قعدت نحكيلها ساره/ماشاء الله ..تو أبدي اسهري معاه اليل وهدرزو وخليك قريبه منه
انابحتت فيها/مزلت منقدرش
ساره فنصت/ مع خشت سمر عليهم
انا/خلاص عيونك بلطن تو نحاول
ساره/هههههه
ع الساعه 11 ونص معاذ خش علينا قالي هي نطلعو..؟ قتله جو سمح والعيله ملتمه خليها مره اخرى قالي باهي براحتك
ساره سرت ع سنونها وقطعت شواربها
انا نضحك
سمر/ليش ماطلعتي معاه
ساره/اه حتى عمتك قالتها ليش ماطلعتي
انا/لمة ماتعوضش تو نطلع معاه يوم اخر
ساره/ غبيه للاسف
وكملنا السهره والشباب بدو يلعبو كوره في الجنان حتى عمي وعمهم وجدي المعلق ههههه
وجدتي تحكيلنا في قصص وعبر من ايام الشياب الاولى.. طقت الساعه 3 عمتي/اسمعو اسحرو هنا مافيكم ماركبتو
خشينا المطبخ درنا برداك شاي وحليب وكعك واللي يبي قهوة واللي يبي حلو ومحلابيه اذن الفجر عدو الرجاله صلو في الجامع ونحن صلينا في الجنان نسمه سمحه وركبنا كل واحد شقته خشيت غيرت خش معاذ انا/الله عليك جو اليوم انسجمت
معاذ/ماتلتموش هكي
انا/نلتمو بس جدودي الله يرحمهم وعم واحد وعماتي متزوجات يعني مفش عمام واجد وعيال عم عيلتنا صغيره
معاذ/عشن هكي جدي ميحبش حد يطلع برا العيله
اللي بيزوج يزوج هنا في نفس الفيلا يحب اللمه يقول بنشوف احفادكم
انا/ربي يطول في عمره جوه سمح جدي
معاذ/جدي نا مش جدك
انا/جدي حتى ناههههههه
معاذ/شكلك بترقدي ع روحك خشي ارقدي
انا/تصبح ع خير
معاذ/الصبح طلع ههههه ومسكني من كتوفي وصلني الدار/خشي ارقدي
انا/تعرف منبش نرقد
معاذ/تي عيونك مصكرات وصلتها في فراشها وغطيتها وتمنيت نخش نرقد جنبها بس نكابر..وهي دغري استسلمت للنوم قديش بريئه وطفله قديش سمحه قديش دلوعه رديت الدار وخشيت اتكيت ع الفراش رحت في سابع حلمه
ثاني يوم معاذ وعماد شالو السقيطه والخضره لحوش هل سمر وباتي وعماتي التمو في حوش جدودي الله يرحمهم انا نضت بعد الظهر..ظهري يوجع فيا وصداع .. اييه جتني اللي ماتسمى مش وقتها نضت بالسيف طبخت نعناع وحطيته يلايا و شربت طاسه ورديت رقدت .. اذان العصر فطنت لمعاذ ينوض فيا/نوضي شهد لعند توا راقده..نضت الساعه كم؟
معاذ/العصر اذن صبيت خشيت الحمام وطلعت مشيت للمطبخ ندور ع بندول..ملقيتش
معاذ/كنك شن تدوري؟
سكتت معرفتش شن نقول/لاشي
معاذ/شكلك تعبانه مطيبش فطور
انا/لا متجش تو نطيب حتى حاجه وحده
معاذ عرف ان جايتني الدوره ومتحشمه
معاذ/ شويه تو نجي مشى جاب مسكن وخش عليا بنطلع دجاج ونتلوى..خش صبلي طاسة اميه/هاكي مسكن وخشي تريحي بحتت فيه طلعلي الحبه ومدها في يدي ..اضطريت خذيتها ونا متخزرطه
معاذ خذاني من يدي/تريحي شهد تو تنوضي كويسه وصبلي من النعناع اللي دايرته مطقتش شويه خذاني النوم
انا رقدت معش فطنت معاذ صلى المغرب وجا ينوض فيا/شهدنوضي نفطروا
انا/هي المغرب اذن..مطيبتش فطور
معاذ/عادي انا طيبت! هي صبي اغسلي وجهك وتعالي ع ماجهزت الطاوله
صبيت الحمام وخذيت غيرت لبستي لبست بيجامه بودريه حلوه ودرت شعري قلبه ودرت كحل ع السريع طلعت لقيت معاذ مجهز الطاوله ويرجى فيا.. وكر الكرسي قعمزي
اناقعمزت و مستغربه/مكرونه بشاميل!
معاذ يبحت فيا بفصفيص/شنو ما تاكليش فيها نا/نحبها انت درتها
معاذ/انا طيبت هي كولي وعطيني رايك
مسكت الكشيك وبديت ناكل/الله سلم ايديك سممحه معاذ/صاح عجباتك؟
نا/سمحه والله مكنتش نحسابك تعرف تطيب معاذ/زمان جتني فتره اشتغلت في طرابلس مع مجموعة عزاب قعدنا كم شهر نتغدو في مطعم بعدها معش ساعدنا الحال بدينا نطيبو مره نمرطزو مره نعزقو في الكناسه مره يجي سمح لين تعلمنا
انا/ماشاءالله طولت في طرابلس امالا؟
معاذ/اها اشتغلت حاجه 4 سنين وبعدها نقلت بنغازي.. شن تحسي في روحك توا؟
انا واطيت راسي/الحمدلله كويسه... شكرا معاذ اسفه تعبتك
معاذ/مفش تعب شهد حتى انتي تعبتي معايا بعدين نحن اصدقاء وضحك
انا اطربقت ضحك
معاذ متت في ضحكتها/سمحه ضحكتك
انا تحشمت بككل..الحمدلله
معاذ/صحه
نا/سلمك وصبيت نلم في السفره وغسلت الموعين معاذ ولع يسخن الشاهي وصب طاسه له وليا..قتلك جهزي روحك بدري نرن عليك أول مانطلع من الجامع عشن نعدو بدري حتى هلي وصيتهم
نا/حاضر
عثمان فطر مع هله وكان تلفونه في الشحن خش فكه لقى مسج من ساره فتحه وانصدم!
....
...
...
يتبع
#كاتبه_أميمه_اسامة
