قلوب سرقها الحب💔
الحلقه الاولى
:
:
المنزل كله ع اهبة الاستعداد للتجهيز لعقد قراني والذي سيكون بعد يومين والفرح بعد شهر من الان أنا فرحه سأتزوج قريبا من الرجل الذي أحبه لم أكن معه على علاقه فأنا من عائله محافظه ولكني احببته بعد الخطبه بسنه عندما اهداني في احد الاعياد بايفون فقد كان متطوعا في الجيش وقال لي يجب أن نتحدث لكي افرج عن نفسي وبدأ حبنا يترعرع وينمو تعلقت به كثيرا وبعد يومين سأكون زوجته ..
رن هاتفي انزويت في احدى الغرف حتى لايراني أحد
راشد/هلا حبيبتي
شهد/هلا وغلا بغلاتي كيفك؟
راشد/ماسمعتش صوتك من امس اشتقتلك
أنا/اسفه الكل مشغول وملقيتش مكان فاضي نحكي معاك ههههه
راشد/معلش حبيبتي بعد بكره حنجيك نشوفك بعد البيان ونكلمك في اي وقت قدام الكل نحبك
انا/نموت فيك
راشد/اوووه يارب امتى تنقرا الفاتحه بس
انا/ههههه هي حبيبي ماما تضبحلي
راشد/سلام ♥
أنا/سلامات♥♥
صكرت وقعدت نتخيل فيه جايني بعد الفاتحه كيف حنطلعله بلاحجاب وقفطان ياربي منش مفكره كل شي في وقته ساهل خشت عليا غاده ونا هايمه في الحب
غاده/وين مستوهه؟ اللي واخذ عقلك يتهنى بيه
أنا/غاده اسكتي يابايخه صوتك عالي
غاده/باهي تعالي تعشي امتى حتى نا نهيم ونكلم خطيبي حتزوجي يابارده وتسيبيني نرايف عليك
انا/شنو معش بنشوفو بعضنا يعني حسستيني بنزوج برا بنغازي تي خطوتين حوشنا حتى ع الكرعين تجيني ونجيك
مشينا تعشينا ولمينا الحوسه ومشا اليوم عادي ..
:
:
جا يوم الفاتحه كان الحوش في عماتي ال3
عمتي فريحه عندها 3بنات :
خديجه من عمري ..
هدى من عمر غاده ..
وفدوى من عمرنجلاء اختي ..
وعيلين واحد متزوج و واحد شاب
عمتي عبيرمتزوجه وعندها 4بنات صغار :
سميه سنه 4 ابتدائي
وسلوى سنه 3 ابتدائي
وهند سنه1 ابتدائي
وندى 3 سنوات
وعمتي سمر الصغيره اكبر مني ب3 سنوات حبوبه وسموحه مخطوبه لدكتور معاها مجنونه فيه بس مزال فرحهم
بابا/خالد عمره 50 سنه طبعه واعر بس حنون.
نسكنوفي شقه في عماره حالتنا ميسوره بابا كلمته تمشي اين كان قراره محد يقدر يناقشه ربي يحفظه ليا .
ماما/امال عمره 45 سنه طيبه وحنونه ربي يحفظها
فدوى اختي الكبيره متزوجه من سنه عمرها 23 سنه عندها بنوتين سمحات ساره وهاجر توأم
وانا شهد عمري 18 سنه سموحه وشعري كستنائي حلو وغزير عيوني رماديات بيضا حمرا مسمييني بيبي لانهم يقولولي طفله رقيقه اي شي يزعلني ويبكيني وابسط هديه تفرحني صوتي واطي وناعم (طبعا مش نا نشكر في روحي هذه الكاتبه توصف فيا)
خواتي كلهن حلوات بس نا المميزه فيهن
غاده 16 سنه اكثر وحده من خواتي مقربه مني
نجلاء 13 سنه
موسى خويا عمره 10 سنوات
ويوسف7سنوات
راشدحبيبي طويل وعريض شعره اسود مصبي حواجبه عراض كثيفه عيونه كبار بشرته قمحيه في نظري احلى راجل في الكون هههه
:
:
"يوم الفاتحه"كنت لابسه جلابيه بودريه مطرزه ومشدايره شي غير كحل خفيف ولمعة روج ونقشة حنه بسيطه في ايديا وطالقه شعري جو هل حبيبي جايبينلي بدله بيضه بالجوبير بكندرتها وشنطتها وتاقم فضه ودبله وساعه ماركه حلوة وعطر شانيل وشنطة مكياج
كان كل شي مرتب وحلو ودرنا حفله حلوة بالدرابيك والاغاني والشتاوات وبعدها غيرت لبست البدله تجنن وجتني لميس اخت راشد قالتلي هي راشد جا خشي مانوصفلكمش شعوري خفت وسقعت قعدت نرجف
لميس/كنك ترعشي راتحسابيها زفتك اليوم
انا/لميس والله متحشمه فوتيها الخشه
لميس/عنجدفوتيها خويايرجى اطلعي تونخش نخششك خشتت معايا لميس خشيت نبحت في الوطا من الحشم
انا/بصوت يادوبك ينسمع السلام عليكم
راشد/وعليكم السلام وصبى خذاني بالاحضان انا خلاص تدوريني ماتلقيني وقتهاههههه ولميس الكلبه ردت باب المربوعه وخشت وسيبتني قعدت خلاص حايسه قلبي يدلف وحميت تشنجت كاني في عالم بروحي فطنت ع ضحكت راشد ههههه دودي قعمزي تعالي قعمزي عليش مصبيه وجهي قعد حمر وجيت قعمزت
ر
اشد/مبروك حبيبتي وباسني في خدي انا خلاص تحشمت ع الاخر
انا/الله يبارك فيك
راشد/ هدرزي شويه كنك ساكته قبل تحكي معايا في التلفون
تخزرطت اكثر في اللحظه هذه نقذتني لميس ولمياء خواته خشن هي ناخذوكم صوره تنفست السعداء وخذولنا كم صوره مؤدبه هههه لان هو متهور بس متحشم من لمياء وخلاص جيت بنطلع سلمت عليه وطلعت انا وخواته بعد فتت باب المربوعه ضبحلي دودي.. انا/برمت رديت قالي تعالي نوصيك ع حاجه جيته لصقني في الساس ووووو فنصت عيوني انصدمت شن شارب هضا وطلعت نجري وهو طلقها ضحكه عااليه هههههه صبيت في الصاله نجري مسكت قلبي ونفسي يعلى ويرقى وغاده السخيفه ولميس منشرطات ضحك احراج عموما مشت الحفله وروحوا هله ولمينا حوستنا وخشينا فراشاتنا منهكين وتعبانين من الحوسه
رقدت ع فراشي وقعدت نسترجع في اللي صار امبدري وتعابير وجهي يحكن اللي نفكرفيه مانندريش ع العيون اللي تراقبني صحيت من افكاري ع صوت مسج من حبيبي
(بالفعل كنت اميره تجنني والاحلى شكلك وانت مصدومه وسيبتيني وجريتي)
وجهي انحمر وقفلت التلفون وحطيت يدي ع قلبي تعالت ضحكات غاده وخديجه تاريتهن يراقبن فيا ممبدري وبدن يشفطن عليا هدرزنا ورقدنا ومشن الايام ونا نطلع نجيب في بتاتي وكملت حاجتي كلها وبابا حبيبي مفش شي جا في بالي الا وجابه ليا ورشودي كل يوم نهدرزو مرتين ثلاثه خاطره يجيني بس نا نقوله لا نتحشم من بابا وهو قدر هالشي خصوصا وان هو مشغول في الجبهه ربي يحميه
يتبع.....
#كاتبه_أميمه_اسامة
