قلوب سرقها الحب 💔ا
الحلقه التاسعه
:
:
عماد وقف السياره ومسك يدها حبها اسف ياعمري والله غرت عليك
سمر/لابستلك ودايرتلك جووفي النهايه تهزبني
عماد/والله سمحه حتى بشوال نحبك يادلوعه من يومنغادي عبايه وفكينا من الكخل باهي
سمر ضحكت باهي قرب حب خدها بسرعه
سمر تحشمت وحطت يدها ع خدها
عماد يضحك تو اليوم كله يدك ع خدك وتذكري البوسه سمر ضرباته ع يده سخييف وضحكت
عماد ايوا نجيلي ههالضحكه خلاص صافي يالبن؟ سمرهزت راسها
وتكى خذا سنترافيش ومدلها ووصلها الحوش
فدوى جاها النشاط واستشورت ودارت مكياج وفتلكت وجا سيف هدرز مع بابا وماما وروحت ركبت السياره السلام عليكم
سيف/ وعليكم السلام وين بناتي؟
سمر/مسكتهم شهد
سيف/لنقانها تفهم في الجو
فدوى/ساكته
سيف تكى ع مطعم انزلي..
نزلت فدوى خشو في مكان العائلات وتعشو مشاوي
سيف/فيفي حبيبتي كنك ساكته وماتاكليش
فدوى نزلن دموعها متوقعتكش تهزبني يلا هلك حرجتني
سيف/والله حمقت ونا بعد نحمق معش نحق قدامي فدوى/يومين حامق متدوش معايا وبعد مشيت لهلي ماكلمتنش ولادزيت رساله
سيف/مو انتي طلبتي تمشي عشن هك زعلت فدوى/ انت غلطت اكثر من غلطي كان الحق عليا انت باللي درته خليته عليك ومعش تحملت النكد سيف/انا الغلطان توا؟
فدوى/اها غلطان لانك خربت عليا فرحتي كنت جايبتلك بشاره انت دفنتها
سيف/شنو متقوليليش اللي في بالي وعيونه قلوب قلوب
فدوى/انا حامل درت تحليل لماطلعت
سيف/مبارك ياروحي وباس يدي يارب توأم عيال فدوى/لا واعر عليا توأم
سيف/سامحيني فيفي انا اسف
فدوى/ابتسمت بخبث (خليتك تتاسف يامغرور في سرها طبعا)
سيف هي كولي حبيبتي
وروحو فرحانين وجوهم تمام .....
معاذ/ألوو
هاجر/الو حبيبي تاخرنا ع العياده
معاذ/هي بيني وبينك 3 دقايق انزلي
هاجر نزلت نزل معاذ فتحتلها الباب تفضلي يا اميرتي هاجر/ههههه ياحليلي منه هالعسل
معاذ/بديرلك صوره الدكتوره نخش معاك
هاجر/مزال مايبانش بس براحتك خش معايا بس فكنا من حركات المره الاولى درنا العار
معاذ/ههههههه ان شاءالله
هاجر/حبيبي مرايفه لهلي بككل ليا كم يوم نحلم بيهم معاذ/تو تجيبي ويجوك هلك ولا تمشيلهم
هاجر/اللطف مرايفه نقولك تقولي بعد تجيبي والله بنتفتت رياف
معاذ/ههههه بلكي تو نسالو الدكتوره كان مفش اظرارعليك من الطياره نمشو
هاجرفرحت حقه معاذ
معاذ/ايه حقا ياعيون معاذ
خشو ع الدكتوره وقيست النبض والضغط وشافتلها وضع البيبي
د/ماشاءالله ماشاءالله وضع الجنين مستقر واخر اسبوع في الثاني شن اخبار الوحم معاك ؟
هاجر/ايه نفسه ماتغيرش فذيت
د/الاغلب بعد الشهرالثالت تو يوقف
معاذ/عادي السفر يادكتوره بالطياره؟
د/لا توا مزال في خطر ع الجنين بس عند الشهر الخامس والسادس خلاص متخافش
طلعو اركبوا السياره وهاجر تبكي معاذ والله بنهبل عليهم
معاذ/باهي شن ندير ياهاجر وانتي ماخطرلك بتسافري لين حملتي كان قلتي قبل الحمل را شلتك غار اصبري الايام فيسع مايمشن اول متخشي الخامس نشيلك ونقعد معاك مانروحوا الا بنهاية السابع غار وسعي بالك هاجر/باهي ربي يصبرني
معاذ/اكيد يصبرك مش نامعاك
هاجر/والله انت مافي زيك نعشققك
معاذ/ونا نعشق الوطا اللي تمشي عليها
هاجر/ياحليلي منك وخلاص عسل يقطر
معاذ/وين خاطرك تتغدي؟
هاجر/اممم مشعارفه بس خاطري في وجبة حوت معاذ/امالا ناخذوها ونروحوا الحوش
هاجر/ايه مفش مشكله براحتك
عندي نا اليوم مفش جامعه ولاهيه مع ساره وهاجر خش بابا لقاني نلعب معاهن
بابا/شهد جايك عريس وعاجبني الراجل مافيه ميتعيب انا/واطيت راسي بابا والله مانبي
بابا/باهي جربي ديري مقابله بلكي تغيري رايك
انا/لايابابا الغيها المقابله قوله مش موافقه بنكمل قرايتي بابا/مقابلتك بكره بعدالعصر وطلع وسيبني
سيبت البنات وقعمزت نبكي نبكي جا قدامي راشد صوته ضحكته(اوعديني تزوجي) يارب منش قادره والله ياراشد ومنش قادره ننساك خشيت ع الفيس كتبت شهد تشعر بالاحباط وغيرت صورتي الشخصيه وحطيت صوره مكتوب فيها
نحسابها ماتصير لكن صارت عزيز اندفن روحه علي توارت.... نحساب مايعزوني ونحساب ماتنزل دموع عيوني.....ولاكان في بالي الناس يجوني يقولو افلان اليوم روحه طارت.....نحساب ماننظرها ليلة رحيله ودفنته نحضرها.....وماحسبت فجعة غيبته نقدرها ونصبرع دنيا معايا دارت......نحساب مانجربها فقدت عزيز ودمعتي نسكبها....ونحساب نار الفقد مانقربها لكن الله غالب الموت اختارت .........
وصكرت الفيس وبكيت لين خذاني النوم
غاده/حي ع اللي ماسكه البنات رقدت ومخليتهن ينتشن ويحوسن في الحوش متنفعش ربة بيت
بابا كان يتالم عليا وشاف دموعي ع خدي ونا راقده بس قال في نفسي ماعندي مانديرلك ياشهد والله لمصلحتك جتني نجلاء توعي فيا نوضي ياشهد عندك جامعه رديت عليها منبش نمشي سيبيني نجلاء تي نوضي قتلك نبش نمشي وكملت نومي نضت بعد المغرب صليت بابا مشقاعد وماما مقعمزه تصفح ع الفيس ونجلاء وموسى ويوسف يقروا وغاده حايسه في هاجر وساره
انا/حاطه يدي ع راسي شربتو قهوة
ماما/شربنا بس كان بديري احسبيني
غاده/حي ع فدوى عابيه عليك
انا/ليش ناخاله وانتي عمه يعني؟وسيبتهها درت قهوة وجبتها وجيت قعمزت يلاماما
انا/ماما ليش بابا يزر فيا يعني بيزوجني بالغصب؟ ماما/وانتي ليش ترفضي في الديار المصقمه تريح عليك بعدها معد حد يدورك انتي شايفه حال الشباب عندهم عمر معين يشرطوا ويريح عليك القطار
انا/انا منبش نزوج مش بالسيف قعدت نبكي مسكت تلفوني ورنيت ع عمي محمد
انا/الوو خير عمو كيف حالك؟
عمو/خير دودي كنك تبكي؟
انا/ياعمو بكره عندي مقابله
عمو/ماشاءالله من سعيدالحظ
انا/منبش ياعمو بابا يبش يفهم بيغصبني
عمو/ليش ترفضي ياشهد حرام عليك باتك بيتهنى عليك يبيك تفرحي وانتي رايحه ضاعفه ومنكده ع روحك معد نشوفو في ضحكتك
انا/غصبا عني ياعمو باهي ياعمو ادويله منبش عمو/منقدرش اكيد عطا كلمه للراجل انتي خشي ومعجبكش ارفضي ميقدرش يغصبك انا نصبي معاك
بس را في هذه نصبي معاك بس مره اخرى منقدرش حاولي تطلعي من الجو اللي دايرتيه وتبدي حياة جديده انا/باهي تعال انت خش معايا
عمو /حاضر تو نجي نتغدى عندكم بكره ونقوله خليني نا نخش معاها بس افرديها
انا/ههههه ربي يخليك ليا عمو
عمو/ايوا اضحكي هي نتلاقوا بكره
انا/ان شاء الله وصكرت
...توقعاتكم شن بيصيرفي المقابله؟ وهل حتوافق شعد ع العريس ولا لا؟
....يتبع
#كاتبه_أميمه_اسامة
