طوبى ☕شارع القهوة☕

تابع

 #طوبى "جنة طوبى"
#جمان_فريد
#الجزء_التاسع_والخمسين"اسرار 3"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕
🍃وآلاء في هداكا الوقت موجوده في دار المعيشه اللي كانت فاضيه تكلم في خطيبها..
آلاء؛اهو حاجه فرحتنا شويه وغيرت جونا..
"ان شاء الله تكمل فرحتنا كلنا يارب..تعرفي الاء لما خالتك تنوض بنديروا عرسنا كلنا مع بعضنا اني وياك وبوي وخالتك"
ضحكت وقالت؛بلا هبال..
"ونهبلوا في حد عنده لينا حاجه!؟ طز فيهم.."
الاء بضحكه؛ياسيدي باهي..
"تسايري فيا عارفك"
هي قالت؛باهي اللي عارف..
"لئيمه..المهم بنقولك ع حاجه..بوي مسافر غدوة لوين ماقاعده خالتك"
اتفاجئت وهي تقول؛جديات!؟
"والله زي مانحكيلك..قال نبي نطمن عليها بروحي"
آلاء؛ياااه ع الحب..خالتي سدرة اللي يحبها يولي متيم فيها..
"حتى اني متيم ع فكره"
الاء بضحكه:ايه صدقتك..
"والله متيم..بالكيكه اللي درتيها يومها وبعتيها للراديو"
هي ضيقت عيونها وقالت؛تعرف انك مستفز..ومش بعتتلك ولاحاجه مرة تانيه باهي!..
وهو يضحك عليها...
☘هدرزوا شويه تانيه..
بعدين طلعت للصالون..
قعمزت تسمع فيهم شن يهدرزوا..
ووسط هالهدرزة..
كانت طوبى مقعمزة ساكته قليل ماتشارك في الحديث..
تمرر في نظرها عليهم وتحس انهم مش موجودين وهي مش بيناتهم..
هي الكل في الكل..وتغطي وجودهم كلهم ومافي حد يقدر ياخد مكانها في حياتهم..
طوبى بدت تشوف للحياة في غياب سدرة ناقصه اهم حاجه فيها..الحياة نفسها...
🍃🍃🍃🍃
وعدت الساعات..
وحفلة عروسة عمر الجديده قاعده قائمه اجوائها كانت اجواء حفلة عرس لوحده اول مرة تتزوج...
وكلهم هيجوا فيها..وع راسهم نجاه اللي كانت توري في روحها وتستعرض ع الموجودات..وخديجه كان تلقى تنوض تجبدها من شعرها وتلوحها برا الصاله...
اما العروسه..فكانت تبان فرحانه..كانت حاسه ان عمر هو العوض اللي عوضها بيه ربي بعد التجربه القاسيه اللي عاشتها..
🍃وعمر كان حاس ان اللي خسرها ماتتعوضش ولافي من تقدر تاخد مكانها في قلبه وحياته..
عمر من الندم اللي ياكل فيه..فكر مرارا انه يهرب..فعلا فكر في الهروب..
لكن تفكيره في العواقب كان اقوى..واختار يستسلم لنتيجه افعاله..
☘وفهالوقت..
كانت اميمه بين اهلها واحبابها يتعشوا في حوش غرفه وهما يهدرزوا ويضحكوا مرة مرة...
وعند الرجاله..
كانوا يزيد التعارف اكثر واكثر بين المحجوب وعبد الرؤوف..
وعلي الواعر وولده لطفي رجعوا معاه ذكريات ايام زمان اللي كان مستمع بسماعها عبد الرؤوف...
☘☘☘☘☘
الساعه 1:30 ليلا..
في دار المعيشه..
طوبى وهي تشرب في عصير فواكه طبيعي:والله زي مانحكيلكم..
اريج بضحكه؛حي ع الجو!..
فردوس وهي متكيه قالت؛والله طالعين ع بعض لبعض من عند غادي..
الاء وهي راقده وحاضنه المخده؛قعدت نتخيل في قصتهم كيف كانت الله محلاهم..
اريج؛كذابه..حني شن عرفنا منها قصتهم..
ضحكوا..
اميمه وهي مقعمزه مربعه رجليها وحاضنه المخده؛واضحه كانوا يقروا مع بعض وحبوا بعض بس ماصارش بينهم نصيب وربك بعد هالسنين جمعهم مرة تانيه لكن تعرفوا يابنات شن الحلو في القصه كلها..انهم الزوز ماتزوجوش لتوا..يعني الزوز ماقدروش يتقبلوا غير بعضهم في حياتهم..
طوبى بإبتسامه؛صح..وشربت باقي طاسة العصير..
فردوس ناضت بنص جسمها والتفتت لطوبى وقالت؛فرخه طوبى..
شبحتلها وهي فاتحه عيونها زين..
صغرت عيونها وقالت؛حامل؟!..
كلهم شبحولها واريج قالت؛حق!!؟
اميمه قعدت تشبح لطوبى وتراجي في الاجابه..
طوبى بلعت ريقها وقالت:ياريت..
اريج بزعل؛قصدك مش حامل!..
طوبى بإبتسامه اسف مصطنعه؛لا للأسف..
فردوس:مش عارفه..شفت عليك تصرفات تقول هكي..
طوبى؛ممكن لأن خاطري نحمل هي هادي وغرفه سهفتني..
رجعت اتكت وهي تقول؛كان تبي الصغار جيبيهم معاش تأجلي..
هزت راسها وهي تحاول تبان عاديه؛ايه حتى اني
فكرت هكي..عقدت حواجبها وقالت؛عمتي رقدت..
فردوس:خيرك مش قالت بتمشي تبات في حوش جدي..
طوبى:ايه صح نسيت..
واميمه تشوفلها كيف مرتبكه وهي تقول في نفسها
"يعني لأمتى بتقعدي مدرقه ياطوبى"..
🍃وبعد ربع ساعه تانيه..
كل وحده فيهم شدت فراشها ورقدت..
بس طوبى طلعت للدار التانيه وسهرت ع الكارتوني...
وهي حاطه سماعتها في ودانها وتسمع في صوت نبضات قلب جنينها..اللي كانت تعطي شعور حلو بالمرة..
ودفعه قويه للإستمرار بقوة في هالحياة...
☘وفي جناحها..
كان راجلها راقد ع جنبه الايمن وتليفونه في يده..
حاط ع رقمها..يبي يتصل بيها..بس مش قابلها ع نفسه..
كيف هي متجاهلاته وهو اللي ديما يقعد يجري ويدورها..
تأفف بضجر وحط التليفون ع السرير..
وناض منه ومشي للفيرندا..
فتح بابها..
وقعمز برا...وهو يشوف لحوش الواعر...
🍃وجنبه..
في الدار المقابله داره..
كان التارقي...
مقعمز يكتب ع لوحه..بيت شعر فصيح طلبه منه زميل ليه يبي يعلقها في حوشه...
كلمات البيت وقف عندها عبد القيوم هلبه وحس انها رساله جاته عن طريق هالرجل..
🍃دع الأيام تفعل ماتشاء
وطب نفسا إذا حكم القضاء🍃
وهو يكتب في البيت ويتفكر فيه..
سمع صوت رنة تليفون جايه من برا...
طولت شويه..
وهو ماركزش هلبه قعد لاهي في شغله..
لكن وقف فجأة لما سمع..
"صعب مانقدرش"
صوت الجالي...
تلقائيا بدون مايفكر سيب اللي في يدها ومشي وقف ورا السيرانتي وقعد يسمع..
"انتي هكي تقعدي ديما تدوي عليها قدامي ماتبنيش ننساها بكل.."
"يابنتي ليا كم يوم معاك انتي وفايتها بكل ومازال شاده فهالسؤال الغبي"
ناض خش وهو يقول..
"باش ترتاحي..لانحبها ولاحاير ولولا امي ماخديتها بكل"
وسكر باب الفيرندا..
🍃وعبد القيوم من ورا سيرانتي كانت في قمة القهر..
مشي ولى لمكانه وقعمز..
شبح للوحه بنظرات قهر وهو يقول؛شن طيحها فهالكل.ب! كيف عطهوله وكيف  هي رضت بيه بس..غمض عيونه وقال..ااه ياربي..ليش امتحنتي فيها هي!..ليش خليتني نشوفها بعيني عايشه بين شياطين وعاجز نديرلها شي..ولاأي شي..حتى مش قادر نخبرها لامن قريب ولا من بعيد..!
وبقهر كمل يقول..ااخ بس ااخ..الله ياخد قيلة الحيله...
وناض ومشي طلع من الدار...
من حرقة قلبه ومن نار القهر اللي حسها والعه في كل جزء فيه..
خش للحمام ودوش..كان تحت الميه كانه يبي يطفي هالنار ويهدا شويه..
ماطلع من الحمام لين توضا..
وبعد ماهيأ نفسه للصلاه..
فرش الصلايه وتوجه للقبله وبدي يصلي..
وفي كل سجده كان يدعي..
"ربي آتني من لدنك رحمه وهييء لي من امري رشدا.."
تمسك بهالدعاء وكأنه مش عارف غيره..
وبعد ماكمل صلاة..
حط ايديه ع ركابه وقعد يفرك فيهم وهو يقول..
يارب وانت اعلم باللي فالقلب...
☘☘☘☘☘
تاني يوم..
الأحد..
الصبح بكري..بعد الفطور..روحت عيلة فردوس في سيارة آلاء..
حطت امها في الحوش..
بعدين وصلت خوها للمدرسه..وكملت طريقها هي واختها للجامعه..
و...
اميمه طلعت بعدهم ومشت للمستشفى...
وقعدت طوبى مع عمتها...ضمت معاها الحوش..
وبعدين قعدت توتي في روحها بش بتمشي لحوش شيابينها..
خشت عليها مطيرة وهي تقول..
مش ماشيه للمدرسه؟
طوبى وهي تلبس في خراصاتها"اقراط":لالا قلتلهم اليوم مش جايه..
مطيره؛ماظنيش بتمشي للكليه لبستك ماتقولش هكي..
☘كانت لابسه بدله لونها برتقالي متاع قونه "تنوره"..ومن داخل بلوزة بيضا انيقه مدخلتها في القونه...
طوبى وهي تساوي في بلوزتها ؛لالا..ماشيه لحوش شيابيني..
اتصلت بيا نسرين وقالت تعالي خالاتي بايتات عندنا ويسألوا عليك..
مشت خدت بالطوها المعلق وهي تقول؛بنروح لحوشي من غادي..
مطيره؛باهي ارفعي معاك مكياج حطي حتى خفيف..
شبحتلها طوبى وهي ساكته..
مطيره بهدوء؛بنتي الحزن هلبه مش باهي وبعيد وبر فال مش كويس..ولي اهتمي بروحك زي قبل وبعدي عليك الحزن عندك راجل ليه عليك حق بنيتي فاهمه عليا..
فكرت في كلامها بعدين قالت؛مكياجي مش معاي..
مطيره؛اني عندي تعرفيني عمتك نحب المكياج وديما ع سنقة عشرة طالعتيلي في هادي انتي..
ضحكت طوبى..
مطيره؛راجي شويه بس..
ومشت طلعت من حداها..
بعد ماطلعت خفت ضحكتها..
وشافت للمرايه..لاحظت وجهها كيف ملامحه باهته وبشرتها تعبانه...
عمرها ماكانت هكي ولاتتحمل تكون هكي..
لكن توا معاش يهمها..معاش تحس بالمتعه اللي كانت تحس بيها قبل لما تهتم بتفاصيل مظهرها الخارجي ولاعادت عندها الرغبه...
خشت عليها عمتها وهي تقول؛خودي فيها كل شي..
خدتها منها وقالت؛قبل نروح نجيبهالك..
مطيره؛جيبها امتى تفضي عندي غيرهم بيت السبع مايخلاش من العظام..
ضحكت طوبى بعدين قالت؛تعالي هني تعالي..
ضمتها وباستها من خدودها وهي تقول؛سلمهالي ياربي..
مطيره وهي تضحك؛وينجيك ياغزيلتي..
🍃ولبست طوبى وشاحها وبالطوها الطويل وطلعت بشنطة للمكياج للكوجينه خدت منها حافظه فيها مبروشه دايرتها للجالي..
وسقدتها عمتها لحوش شيابينها..
🍃وفي جنان حوش شنيبه..
كانت نجاة طالعه مع صغارها اللي يلعبوا في الجنان..
غابوا الكبار الزوز عن المدرسه وغابت معاهم سدرة بنت المهدي حتى هي..
وتشاركوا اللعب مع بعض ع القطوسه...
☘من جهة الكوجينه كان الجالي يشرب في النسكافيه متاعه ع رواق وهو يتفرج ع الورد اللي طالع في الجنان...
قدم قطف منهم وحده..
ومشي خطوة ورا التانيه لين بان عليه الجنان القدامي..
وشاف نجاه مقعمزه تتفرج ع الصغار..
بصوت يشبه فحيح الأفعى نادى؛نجاة..
وهي سمعاته..والتفتت شافاته..
اشرلها تجي..
ابتسمت وشافت للصغار لقت لاهيين..
بعدين ناضت بهدوء ومشتله..
وصلت فيه..
هو مدلها الوردة وقال؛صباح الورد..
خدتها وشمتها وهي مبتسمه..
هو شرب من المق بعدين قال؛شن جو الحمل معاك لتوا؟
نجاه؛تمام..
الجالي؛ماتتعبيش يعني مش باينه عليك اعراض..
نجاه؛لا اطمن مش باينه عليا شي..
الجالي بتحذير:وردي بالك يبان عليك زي ماقتلك قبل خديجه اختي ماقادرها كان ربك..
نجاة بملل:باهي فهمت..
🍃فهالوقت..
طوبى كانت فم الباب..
طلعت مفتاح الحوش من جيب بالطوها..
حطاته في الباب وفتحاته وخشت..
لما خشت..
جو عيونها ع الصغار وهما لاهيين بالقطوسه ومن كثر ماهما منسجمين معاها ماحسوش بيها لما خشت..
ابتسمت وغيرت عيونها عنهم..
جو ع غيرهم...
اللي كانوا يهدرزوا بإنسجام حتى هما..بس من بعدهم عن الباب ماسمعوشي لما انفتح..
هي دفت الباب شويه من غير ماتسكره..
قعدت حاطه يدها عليه وعيونها عليهم...
تشوفلهم..وهي حاسه بشي تجمع في صدرها لين كتم ع انفاسها..
ضيق..ضيق شديد..
عيونها لنجاه وهي شاده ورده وتهدرز والابتسامه مافارقتش وجهها..
وهو يهدرز معاها وبيده اللي شاد بيها النسكافيه كان يوصف مع الكلام...
افكار وافكار في عقل طوبى تزاحمت..
فكرة وضدها..ويتصارعوا..
وهي مش عارفه شني الصح فيهم.
او انها تبي تخلي الصح فيهم الفكره اللي تريحها...
وهي غارقه في دوامة افكارها وعيونها عليهم..
جت حماتها خديجه طالعه دور ع سدرة المهدي..
وين شافت طوبى كيف واقفه قدام الباب..
وكيف شاده..وكيف تشبح لجهة معينه بنظرة غريبه..
استغربت..
قدمت كم خطوه..وشافت وين ماتشبح طوبى..
وشافت اللي تشوف فيه..
تبدلت ملامح وجهها للحده وقالت بصوت غير مسموع؛جالي يازفت..
خدت نفس بعدين رسمت ع وجهها ابتسامه وبصوت عالي قالت؛طوبى!..
🍃هو انفجع وطول التفت وشبح لطوبى...
ونجاة رفعت حاجبها وهي تشوفلها..
غيرت طوبى عيونها عنهم..ورسمت ع وجهها ابتسامه وهي تشوف لخديجه وقالت؛صباح الخيرات..
خديجه سلمت عليها بالخد وهي تقول؛ياصباح الفلات..ليك وحشه..
طوبى:ليك اكثر..
بعدت خديجه وهي تقول؛شن الاخبار..
طوبى بإبتسامه مصطنعه؛تمام الحمد لله..شن اخبارك انتي..
خديجه بإبتسامه؛مستاحشينك..
مشالهم الجالي طول..
ونجاه وهي معصبه لحقاته وبالقصد خلت الورده في يدها..
وصل فيهم وسمع خديجه تقول؛العيله يسألوا عليك خالاتي ونساوين خوالي..
طوبى؛قالتلي نسرين بايتين..
خديجه؛ايه روحوا من الصاله هني طول العرسان بيجوا من الفندق بعدين شويه..
هزت طوبى راسها وقالت مجامله؛مبارك عليهم..
بإبتسامه ردت تقول:الله يبارك فيك..
الجالي هني تكلم وقال:صباح الخير..
شبحتله وقالت؛صباح الورد..وابتسمت ابتسامه تبان عاديه..
بس هما حسوها مريبه..
خديجه؛شن جايبه معاك استاحشتك ماكلتك..
شافت للحافظه وقالت؛مبروشه..رفعت عيونها فالجالي وقالت؛حبيبة الجالي..
هو دار روحه واخد موقف وهز راسه وهو ساكت..
ونجاه تشوف للحافظه وهي تشد ع ساق الورده بقوة لين قريت كسراته..
شويه جت جوري وقالت؛ابله طوبى زعلانه منك..
شبحولها..
طوبى بإستغراب؛علاش حبيبتي؟
جوري بزعل؛وين قطوستي؟
ضحكت وقالت؛حاضر تو نقول لعمك بعدين يجيبهالك من حوشنا..
نجاة؛لا مش لازم..اني قلتلها تو ناخدلك وحده..شافت لبنتها وقالت..ماما جوري مش اتفقنا امس؟
طوبى نزلت راسها وهي زعلانه..
وسدره وحمزة يشبحولهم..
طوبى شافت لنجاة وقالت بإبتسامه؛كيف حالك نجاه؟
شافتلها وقالت؛الحمد لله..
والجالي وخديجه مركزين ع ملامح طوبى وهي تكلم فيها..
طوبى؛اني وعدتها نعطيها القطوسه خلاص..
هني الجالي قال؛طوبى كان عطت وعد ماتخلفاش يانجاة..
شبحتله طوبى وهي مبتسمه ابتسامه..مش مريحه للجالي واخته خديجه نهائي...
بس هو قاعد مكمل يقول:بعدين واني مروح من الخدمه نخطم ع حوشكم ونجيبها..
شافت طوبى لجوري وقالت؛سمعتي جوري..
ابتسمت جوري بفرح وهي تشوفلها وهزت راسها بأيجاب..
وطوبى ابتسمت لإبتسامتها..
خديجه مررت نظرها عليهم بعدين وهي مبتسمه مجامله قالت؛هيا طوبى خشي تلحقي ع الفطور مع العيله..
طوبى بإبتسامه؛هيا..ومشت بتخش..
وخديجه قبل لتلحقها شبحت لنجاة والجالي بحده من فوق لتحت..
بعدين لفت ومشت خشت داخل...
هو تأفف..بعدين مشي بيخش من جهة الكوجينه ونجاه بعيونها معاه لين ادرق من قدامها..
تنهدت بشي من التهكم بعدين رفعت حاجبها ومشت خشت داخل والوردة في يدها..
☘☘☘☘☘
"مطيره"
مطيره وهي تقطف في الزيتون؛نعم لطفي..
قدملها وهو يقول:روحت طوبى؟..
مطيره؛لا مشت لحوش شنيبه..
مشي قعمز ع الكرسي وهو يقول:كويس..تعالي قعمزي قدامي خل نحكيلك ع حاجه..
استغربت وجاته قعمزت قدامه وهي تقول:ان شاء الله خير!
ضحك ضحكه خفيفه وقال:امس جاني الحاج محمد
فتح معاي موضوع..
فتحت عيونها ع وسعهم وقالت؛راك تقول خطبني منك!
قعد يضحك لطفي..
وهي تقوله بصدمه؛نهار احرش شكله حق!
لطفي بضحكه:ضحكتيني وماخاطري في ضحك يامطيره..لا مش انتي مش انتي..
هي بإستغراب:مش اني!؟ مالا مني كان مش اني؟!
لطفي:هو ماخطبش مني اني هو دايرني واسطه..
مطيرة؛بينك وبين مني؟!..
لطفي:عبد الرؤوف..
ضيقت عيونها وهي تفكر بعدين قالت؛طيح سعده ومزاله..نبيله..نبيله بترضا بيه.!! تصيم تصيم وتفطر ع بصله شارفه...وضحكت ضحكه متهكمه..
لطفي؛حتى اني قلت هكي لكن رسول وماعليا الا البلاغ..
مطيره بتنبيه:رد بالك..ردبالك ديرها وتفتح الموضوع مع عبد الرؤوف والله يحرج منك بعدين معقوله بيرضى لاخته تكون مراة تانيه لا ولمن!؟ لمحمد شنيبه اللي عنده احفاد اطول منه..!
لطفي؛اني مش مكلم عبد الرؤوف اني فتحت معاك الموضوع بش تفتحيه مع اخته وتشوفي رايها ماتندريش مرات ترضى..
مطيره؛تعالالي هني..هو يبي ياخدها علني!؟
لطفي؛ايه..
مطيره بتعجب؛والله وصار منه وولى معاش يخاف من العنقروفه..
لطفي بضحكه؛ياودي قوليلي بتكلميها ولاكيف!؟
هزت راسها وقالت:تو نقولهالها بس نكته نضحكوا عليها..
لطفي قعد يضحك..
وهي تقول؛مصح وجهه..
🍃وفي حوش محمد شنيبه..
تحديدا جناح ولده الجالي..
كانت طوبى واقفه ع المرايه تحط في الزينه..
حطت زينه بسيطه بدون مبالغه..
وشعرها رفعاته ذيل حصان..
بعد ماكملت...حطت من عطرها كانت متقبله ريحته مش كرهاته..
بس لما شافت شيشة عطر الجالي حست بالغثيان..
ومن خوفها انها ترجع خدتها وحطتها في الدرج وسكراته..
ع خشته هو للجناح..
شبحتله..
عجباته هلبه طلتها..وكانت نظراته كلها اعجاب...
قدملها وقال؛الله يبارك..خيال ياعمري..قداش ليا ماشفتك هكي..
وقرب منها باس جبينها وهي تقول..
يعني مش حلوة في كل حالاتي!؟
وخر عنها وقال بإبتسامه استغراب؛من قال هكي؟
طوبى:انت اللي قلت..قداش ليك ماشفتنيش هكي!..
ضحك وقال؛مش هدا قصدي..قصدي قداش ليا ماشفتكش مبهجه هكي فاهمه عليا..يعني فيك حيويه وتبرقي برق..
ابتسمت وقالت؛فهمت عليك...
وجت بتمشي شد يدها وقال:خليك شويه نبي نهدرز عليك مستاحشك...
شبحت لعيونه بعدين بنفس الابتسامه الغير مريحه قالت؛والله لتوا ماسلمت ع العيله اللي لوطا وقاعدين يستنوا..بعدين نقعمزوا ونهدرزوا..جبدت يدها ومشت للباب..
وهو يشوفلها بضيق..
لما وصلت في الباب حطت يدها ع المقبض وقالت؛ماعندكش خدمه اليوم..
هو قال؛عندي بعد ساعه ماشي..
التفتت وقالت؛مع نجاه؟
السؤال اربكه بس كعادته جاوب وكأنه عادي جدا؛لانجاة واخده اجازة..
ضيقت عيونها وقالت؛علاش!؟
الجالي؛ع حسب مافهمت ع خاطر صغارها هي تخدم واختها تخدم ومرات الزوز يروحوا ماخر ويخلوا فيهم عندهم التانيه وهي ضايقت وهكي يعني فقالت تقعد معاهم لين دبرلهم في مراة كويسه يقعدوا عندها لما ماتفضاش..
سيبت مقبض الباب ولفتله بجسمها كله وقالت:شكلها تشكيلك هلبه..صحبتكم قويه..
ابتسم وقال؛قتلك قبل حبيبي نجاة زي اختي الكبيره اسراري عندها..
مصمصت شاربها التحتاني بعدين ابتسمت وقالت:يللا ربي يسخرلها الحال..ولفت وفتحت الباب وهي تقول..سلام حبيبي..
ومشت طلعت..
وخلاته جامد في مكانه ومصدوم من الكلمه اللي سمعها..
لدرجة انه شك في حاسة السمع عنده..
ماصدقش وذانه اللي سمعوها قالت..
"حبيبي"
مش عارف هو وقتها بشن حس..
شعور عمره ماحس بيه..ماعرفش يترجمه ولايفهمه..
🍃اما هي انصدمت في روحها شن طلعت من فمها..
كلمه مش قاصدتها..وماطلعتش من قلبها..
كلمه طلعت من الخوف..خوف من شي هي ماتبيش تعترف بيه..
قالت بصوت هامس وهي نازله في الدروج:يارب ماسمعها يارب..
وصلت لوطا..خدت نفس ومشت خشت للصاله وقالت..
السلام عليكم...
بنظرات اعجاب كلهم كانوا يشبحولها..
طلتها..اناقتها..ووزنها الزايد شويه كان محليها بزياده..
بس اللي زاد عليها هالمره..
هيبه ماكانتش واضحه فيها من قبل..
خلت مغليه وهي تشوفلها كيف تسلم ع خواتها تشبح روحها بيها..
وهدا كله تشوف فيه ضرتها اللي كان تلقى تطلق عليها الموت..
☘☘☘☘☘
جامعة طرابلس..قاطع_ب
كلية الاقتصاد..
كانت اريج تاخد في محاضرة يعطي فيها نضال..
طول ماهو يشرح هي ماتبيش تشبحله..
شاغله روحي بالكتابه..تسمع في اللي يقول وتكتب فيه وماتبيش تقيم عيونها..
اما هو فكان يشرح ومركز بنظره عليها اكثر شي..
نضال؛في حاجه مهمه نبي نشرحهالكم بدقه شويه..ركزوا معاي..اللي يكتب يحط اللي في يده ويشبحلي...
اريج مابتش تقيم عيونها..
وهو هو قعد يشبحلها وعاود يقول؛قلت ركزوا معاي واشبحولي هني..
الطلبه كلهم شافوا لأريج..
وصاحبتها في جنبها نخصتها وهي تقول بصوت منخفض؛يكلم فيك..
هي حطت البيرو..وتنهدت..بعدين شبحتله بنظرة كبر..
هو قال؛ركزوا معاي..لما تجوا تحسبوها....
وكمل شرح واريج تشوفله بإمتعاض وزعل..
وهو يمرر ف نظره عليهم كلهم بس عقله عندها هي وهو يشرح...
وقعدوا هالحاله لين تمت المحاضرة..
نضال؛ونتلاقوا المحاضرة الجايه..
الطلبه ناضوا وبدوا يطلعوا شويه شويه..
ولما جت بتطلع اريج..
نضال؛اريج خليك..
وقفت بالغصب كانت شاده شنطتها وقالبه وجهها عنه وتشبح للباب..
وهو استنى يطلعوا الطلبه كلهم بعدين خدي شنطته ومشالها..
وقف قدامها وقال؛علاش ماترديش ع تليفونك؟
شبحتله وقالت؛مزاجي قالي ماترديش..
نضال؛ايوه حطيها في راس مزاجك..
غيرت عيونها عنه ورفعت حاجبها..
ابتسم وهو عاقد حواجبه وقال؛بستاشيو..قلبي..ستاحشتك..
شبحتله من فوق لتحت وقالت تهكما؛بالله!
ضحك وقال؛والله!.
ضيقت عيونها وقالت؛انت هكي!!؟..باهي..ومشت طلعت ..
هو ضحك ولحقها..
كانت تمشي بعصبيه وهو وراها؛بستاشيو..نبصر عليك ياشفشه..اوقفي يافرخه خيرلك خلتينا فرجه..شمطاء تعرفي كان ماوقفتيش ماتلومي الا نفسك.وقفت ومررت نظرها ع المكان وتشوف كان في حد مركز معاهم..
وهو وقف قدامها وقال؛شن حركات الصغار هادي!
اريج بعصبيه مكتومه؛حركاتي اني حركات صغار ولاحركاتك انت!!اسمع انتي ماعنديش مشكله ندير زي مادارت اميمه نعفس ع قلبي ونحدفك وراي وكأنك ماكنتش..
هو بصدمه؛علاش الدوة هادي كلها!؟
اريج ودموعها في عيونها؛انت عارف علاش!.
عقد حواجبه بغضب وقال؛لا مش عارف..
اريج؛تمام اني نقولك علاش..لما تسافر غادي وتنقلب عليا فجأة..تكلمني بالسيف عليك ولما نكملك ترد عليا بالسيف حتى هي..وتسكر تليفونك وتروح من غير ماتعطيني علم..شن معناه هدا كله؟
هو قال؛ايه شن معناه!؟
هي بتهكم قالت؛والله الجواب عندك انت!
سكت شويه وهو يشوفلها بعدين قال:عقلك جابلك افكار غلط ولا؟
سكتت وهي تشوفله بحده ودموعها محبوسات في عيونها..
هز راسه وقال؛شكرا..منورة..منورة بالهلبه..
وجي بيمشي هي قالتله..
الحركات هادي ماتمشيش معاي..
شبحله وضيق عيونه..
اريج؛متاع نتغدا بيها قبل لتتعشى بيا..
☘جرحه تفكير اريج فيه..بينله انها ماعندهاش ثقه فيه لدرجة تفكر انه يدير الحرام عادي وهدا في نظره طعن في اخلاقه وتربيته ورجولته..وفي نفس الوقت استفزاته هلبه☘
وقف قدامها وشبحلها زين بعدين قال:عيشه عندها الخبيث..مشيت معاهم واني مش عارف ان عندها خبيث..المراة قاعده تموت بعيده عن صغار وناسها وبرا بلادها كلها..خوي قاعد يتقطع قدامي خوف عليها وع صغاره اللي مايعرفوش لتوا..ويبيني مانقوللهمش لاهما..لاماليا..ولاحتى انتي..بالذات انتي..لكن انتي جبرتيني نقولك بش نخليك تعرفي عقلك قداش صغير وتعرفي الراجل اللي حطك في ذمته كويس..
وبعد ماعطاها نظره واعره قسمت قلبها نصين..مشي وخلاها..
مصدومه..وموجوعه...ومش مستوعبه اللي سمعاته عن عائشه...
وفي نفس الوقت صغرت في عين نفسها هلبه ع تفكيرها فيه..
🍃وفي نفس الجامعه..
في كلية اللغات..
كانت اختها واقفه ع خطيبها تهدرز هي وياه..
مهند وهو حاط يد في جيبه والتانيه شاد بيها نظاراته؛سقدته وجيتك طول..
آلاء؛يوصل بالسلامه ان شاء الله..
مهند :آمين..ايه شن جوك انتي حاسك مش ع بعضك مش زي ماكنتي اخر مرة شفتك فيها..
ابتسمت ابتسامه تخفي بيها ضيقها؛لاعادي مافيا شي..بس ناقصه نوم..
عقد حواجبه بتساؤل وهو يقول؛ع شني سهرتي؟
آلاء؛كنت نقرا في روايه..
مهند بتعجب؛روايه!؟
الاء؛ايه نقرا في روايه..وبالفصحى يخي..
ضحك وقال؛كبيره..
هي بنرفزة؛الحق فيا اني علاش نقولك..
مهند بضحكه؛باهي قولي شن هي..
الاء؛مش حتعرفها ماتقراش فالنوع هدا انت..
ابتسم وقال؛رومانسيه..
هزت راسها بآيجاب..
هو بإبتسامه؛كويس..وحده وحده وتخشي ع الثقيل..
الاء:قاعد تتسهوك..
هو بضحكه قال؛لا والله ندوي جديات..وبإبتسامه كمل يقول..المهم عندك يهمني...
ابتسمت بخجل وقلبها يدق بقوة..
وهو يشوفلها بإبتسامه..
☘وعيون أكابر تراقب فيهم بنظرات كلها حسد وغيره..
🍃🍃🍃🍃🍃🍃
"انتي تعرفيها قلاقه ماتقعدش في الحوش اللي تسكنه سنتين تلاته"
مغليه؛الفجي في عادل مسكين..
نجاه؛خيرها هي عندها وسواس؟
اخت مغليه؛ايه..وسواس من كل شي..وشكاكه وحالتها حاله..
خديجه؛شيبت راجلها بكري بكري..
؛ايه مسكين وركباته الضغط والسكر..
نسرين وهي متكيه بمفرقها ع يد الكرسي وحاطه قبضة يدها ع صدغ راسها؛حتى هو عديم شخصيه..
مرت خالها؛صح..ماعنداش شخصيه معاها فالح في امه وخواته..
وهما يهدرزوا..
وطوبى تشرب من فنجان الشاهي ومكتفيه بالإنصات..
مغليه:ربي يفرج عليه وخلاص..
هما باصوات متقطعه؛اي والله..ان شاء الله..
وسكتوا شويه..
بعدين وحده من خوات مغليه قالت؛ايه حقه..ريتي جارتي مهيبه اللي ولدها يخدم في *****
مغليه؛هادي اللي ديما نازله في كنتها..خيرها؟
:ولدها ياحنه طلع مداير فالطه هكي كبرها..
كلهم انتابهم فضول بش يعرفوا القصه..
مغليه؛شن مداير!؟
:ياحنه المده اللي فاتت مقعمزين لابيهم لاعليهم خشت عليهم وحده وفي يدها بنيه عمرها 5سنين..
فتحت نجاه عيونها زين وهي تسمع..
وخديجه ونسرين عقدوا حواجبهم بشي من القلق وهما يسمعوا فيها..
:مني انتي يافلانه اللي خاشنا علينا بهالبنيه..قالتلهم اني مرت ولدكم وهادي بنته..
مغليه بصدمه؛نهار احرش!..
:وجابتلهم ورقة الزواج وشهاده ميلاد البنت..
خديجه حطت الفنجان بصونيته ع الطاوله اللي جنبها..
وحطت رجل ع رجل وايديها الزوز علي ركبتها وهي تسمع في خالتها شن تقول وتفكر في نجاة اللي قاعده تسمع...
ونجاه مركزة وتسمع بكل حواسها..
وحده من خوات مغليه قالت؛ومرته حضرت؟
؛ايه ياحنه حضرت..
مغليه؛وهي كلامها طلع صح ؟!.
:ايه صح..ولما واجهوا ولدهم اعترف وقال ايه مرتي والبنت بنتي..
؛غبر فيه!؟
نجاه؛باهي علاش واخدها في السر!؟ وعللاش خدي عليها!؟
نسرين شافت لنجاه...
وخديجه شافت لطوبى..
لقتها تشوف لفنجان الشاهي وهي عاقده حواجبها وواضح انها مش سرحانه..معاهم وتسمع..
:ماهي اكبر منه ومطلقه ماليه مش حيرضوله بيها..
نسرين حركت عيونها لخديجه..وخديجه شافتلها..
؛غبر فيه..
؛كانهو راجل راهو واجه ماليه وفرضها عليهم مش ياخد بنت ناس تانيه ويغشها ويضحك عليها بش يرضي ماليه..
؛هو كان يبي يقوللهم درت اللي انتم تبوه خلوني ندير اللي اني نبيه..
مرت خالهم؛وانتي الصادقه..كان يبي ياخد ويطلق.بش بعدين يبدا ساهل عليها ياخد اللي يبيها هي مطلقه وهو مطلق مافي حد خير من حد..
نجاة وهي تسمع كانت مركزه ع ردة فعل مغليه اللي قالت..
مغليه؛المراة اللي واخدها شن دارت لما عرفت؟
:سكتت مسكينه وبلعتها حملت خلاص ماعندها مادير..
نسرين؛ببساطه هكي!؟
؛مش ببساطه يانانسي ماتبيش تشرد عيلها وتشمت الناس فيها..رضت بالأمر الواقع وقالت الشرع حلل اربعه..
خديجه؛صحه ليها..
نجاه شافت لخديجه..
خديجه؛هدا المراة الصح اللي تعرف تفكر..ماتخليهمش يعيشوا حياتهم متهنيين وتخرب حياتها لا..تفرض روحها عليهم وتقعدلهم زي العظم في الرقبه..
نسرين؛مقواها كان تفكر هكي..
"لاهادي مش قوة.."
توجهت انظارهم ليها لما تكلمت بعد صمت..
طوبى وهي تشوف لاخت مغليه؛هادي يا مغلوبه ع امرها..يامعندهاش كرامه..المراة اللي ترضى ينضحك عليها هكي وتقبلها ع روحها..ضعيفه وماعندهاش كرامه..
؛قصدك تخليهم يديروا مايبوا ويعيشوا حياتهم وهي تاكلها في عمرها..
طوبى؛لا..لو كنت مكانها..
خديجه ونسرين ونجاه قعدوا يشبحولها بترقب...
وهي مكمله تقول...
نقربعها ع راسه..وراسها..وراس ماليه...
مغليه توسعوا عيونها شويه وهي تشوف لطوبى وحست بشعور غير مريح لما سمعت كلامها..
هالشعور حسوه خديجه ونسرين..ومعاهم نجاه..
خالتهم قالت؛وشن دخلهم ماليه ماعندهمش علم زيهم زيها!
غيرت طوبى مكان الفنجان بصونيه من يدها ليمين يدها اليسار وحطت رجل ع رجل وهي تقول؛البنت عمرها 5سنين..معقوله يكون ليه خمسه سنين ع اقل تقدير متزوج ومافيش حد من عيلته يعرف! مااعتقدش..
:في اللي بالعشرة سنين ومايندروش عليه..
طوبى؛الا مايكون في واحد ولااتنين ع الاقل من عيلته يعرفوا وزوجوه اجباري بش ينسى اللي خداها غصب عنهم..
خديجه قعدت تفرك بصوابعها باطن يدها اليمين من التوتر..
ونسرين تشوف لطوبى وفي داخلها شعور كبير بالخوف..
اما نجاه فكانت متفاجئه في طوبى..
كلامها مش من فراغ وفي وراه مقصد..
وقعدت تسأل في نفسها..
معقوله عرفت ودير في روحها مش عارفه!؟
او انها لما شافتهم بكري مع بعض كبر الشك بداخلها وقاعده تعطي في رسائل وعيد للعيله باللي حديره لو طلع شكها في محله..
غيرت عيونها عنها وشبحت لمغليه اللي ضحكت فجأة وهي تقول..
صحه ليك ياطويبه ماتفوتك حاجه تهني ع روحك..
ابتسمت طوبى وهي تشوفلها..
خديجه؛شن جاب لجاب يام!..طوبى طاحت في الجالي اللي ماعنده في اللف والدروان والوجيج..نهار قال بنتزوج دلنا عليها طول وقال..وهادي اول مرة نقولها قدامك طوبى..قال كنت نراجي فيها تكبر...
مغليه؛ايه صح قالهالي..
نجاة ابتسمت تهكما وهي تشوف لخاتم في يدها هاديهولها الجالي..
؛نقولهالك ياطوبى ومش تقولي تشكر في ولد اختها بس ربي يحبك اللي خلاك من نصيب الجالي طحتي في خيرة التريس.
مرت خاله قالت:الجالي ينحط ع الجرح يبرا..طيب وخدوم ونشاد..وين نحتاجوه نلقوه..
خالاته بأصوات متقطعه؛ايه والله.
وحده تانيه من خالاته قالت؛راك محسوده عليه ياطوبى ردي بالك يابنتي..
ضحكت طوبى وهي تقول؛شوفوا وين كنا ووين وصلنا شن جاب سيرة الجالي توا!؟..
مغليه:دوة جابت دوة..
طوبى؛ع العموم ربي يكون في عونها المسكينه لانها قاعده تكمد في نفسها وساكته..
:ايه والله..
بدلت طوبى مكان الفنجان ونزلت رجلها وولت تشرب من الشاهي مرة تانيه بكل هدوء..
وخلت بنات مغليه ونجاه في حيره في امرهم..
مش عارفين..هل هي كانت تتكلم هكي وخلاص ولاتوصل في رساله.!؟
وهل فعلا لو جي يوم وانفضحوا وهاليوم حتما جاي عاجلا او آجلا طوبى حتنفد اللي قالت عليه!؟..
وهالسؤال اجابته كانت مخوفه خديجه هلبه..
رجعت خدت فنجان الشاهي متاعه وقعدت تشرب منه وهي تفكر....
اما نجاه..فكانت تشوف للي صار من جميع الجوانب وتفكر هل في شي في صالحها!؟ ولو في كيف تقدر تستفيد منه!؟..
☘☘☘☘
وفي هالأثناء..
كان الجالي في مكتبه يجهز في نفسه بش يمشي لموقع وحده من المشاريع المسؤول عنها..
مشي للخزنه متاعه فتحها..
طلع منها ورقه تخص الخدمه..
لما طلع شاف للصندوق اللي عنده في الخزنه..
طلعه منها وقال؛مش مكانه الشركه ياالجالي..
سكر باب الخزنه ووقف ع حيله وقال..نروح بيه للحوش خير...
ومشي حطه ع طاولة المكتب..بعدين خدي الشنطه حط فيها الورقه وخدي الصندوق ومشي طلع من المكتب..
☘☘☘☘☘
وبعيد عن هذا كله..
في المدرسه اللي تحت ادارة نجاح الصيد..
كانوا الطالبات طالعات استراحه..
وفي الاستراحه متعوده راما تمشي نقعمز مع مروة بنت فايزه وصاحباتها رغم انهم سابقينها بسنه لكن صاحبتهم وانسجمت معاهم..
وطبعا الصديقات فهالعمر غالبا يحكوا في كل شي بالذات اللي يصير في حوشهم..
راما؛معاش يخلي فيا نمشي لحوش جدي بكل بعد سافر خالي المهدي بمرته يقول الحوش توا فيه ولاد معاش تمشيله..
مروة؛علاش!؟ محمد محترم هلبه عمري ماشفته ناشب بنت ولايبصبص..
؛محمد المهدي البنات يبعتوله ويحدفوله في ارقامهم..
ضحكوا..ومروة تحركت فيها الغيره..
راما بضحكه؛ولد خالي ونعرفه محترم..لكن عمي اشرف حزار وواعر هلبه...
:باهي اللي مش عمي اني وولاد العيله صحاب اكثر من بناتها..
مروة؛غلط هكي ع فكره..
؛بتبدا الشيخه..
وقعدوا يضحكوا..
وهي تشوفلهم بإمتعاض وتقول؛مبردكم..
☘☘☘☘☘
الساعه 12:00قبل الظهر..
كان نضال متوجه لسيارته بيطلع من الكليه..
وقف لما سمع اريج تنادي..
"استاذ نضال..استاذ"
حط يده ع باب السياره من غير مايشوفلها..
هي وقفت جنبه وقالت؛نضال..اسفه..
تنفس بقوة من غير مايرد..
اريج بضيق وتبرير؛حط روحك مكاني نضال تلقالي عذر..
قعد يمرر في نظره قدامه من غير ماينطق بكلمه..
اريج؛باهي اني غالطه والغلط راكبي من رجليا لقبوعة راسي..
وعقلي صغير وغبيه..قسما بالله لما عرفت باللي خلاك دير هكي كرهت روحي.حسيت روحي وحده سخيفه وتافهه..
شبحلها وقال؛حاشاك حتى اني غالط...
دموعها نزلوا وهي تقول:اني غالطه اكثر منك ضغطت عليك واستفزيتك وخليتك طلع سر خوك..تعرف حسيت روحي مراة مش كويسه كان طلقني خير..
ضحك غصب عنه وقال؛شن هالهبله اللي طحت فيها!..حتى الواحد بيتكدر ماتخليشي..
مسحت دموعها وقالت؛جديات نضال والله قلبي واجعني ه اللي صار لعيشه..وخنقتها العبره وقعدت تبكي بصمت..
تنهد بضيق وقال:حبيبي نروح بيك..خاطري نهدرز عليك ونحكيلك كل شي والله نحس في روحي مخنوق ومكمود..
اريج؛عادي حبيبي بس سيارتي كيف فيها!؟..
نضال؛مادوريش اني تو نوصي عليها..
اريج؛باهي خل نكلم امي ونعطيها علم..
هز راسه وهو ساكت..
تباعدت عنه واتصلت بأمها..
وهو كلم واحد من جماعة الكليه ووصاه يرد باله ع السيارة لين يجي يروح بيها...
وبعد ماكملت اريج مكالمتها ركبت مع راجلها السيارة وطلع بيها من الجامعه...
☘☘☘☘☘
الساعه 1:00ظهرا..
كعادتهم..
مروحات بنات فايزة ع رجليهم من المدرسه ومحمد وراهم بمسافه هو وواحد من صحابه..
وين خشوا لشارع القهوة..
مروة؛اني بنمشي لحوش جدي لطفي ناخد الكارتوني..
صفاء؛تعاليلي للسوبر ماركت بعدين..
مروة؛باهي..
ووصلوا لحوش الواعر..
وقفت مروة ع الباب وقعدت دق عليه..
وصفاء كملت طريقها للسوبر ماركت..
ع طلعة اشرف الصيد من حوشهم..
لما شافها طالعه..
لحقها بعيونه..بعدين بيه كله..
🍃ومحمد مشي وقف حدا القهوة وهو يشوف لمروة كيف فتحتلها مطيره ودخلتها للحوش...
☘☘☘
وصلت صفاء للسوبر ماركت بش تاخد حاجات للحوش..
خشت طول..
وطعت من جيب كبوطها الورقه اللي فيها الحاجات..
خدت كروسه وبدت تلم بالحاجه..
وين وقفت ع رفوف الجبنه معاش عرفت شن نختار لان في هلبه انواع...
فات من جنبها ووقف مقابلها وهو يشوف لواحد من الرفوف وقال؛هديكا اللي ع يمين اللي جايه قدامك احسن حاجه..
هي لما انفجعت..وارتبكت..
وتعاملت معاه بحده لما قالت:تلحق فيا!
هو شبحلها بإبتسامه وقال؛ايه..
صفاء؛وتقول فيها عادي!..
ابتسم بتعجب وقال؛تبيني نكذب عليك!..
عقدت حواجبها وقالت؛من الاخير انت شن تبي؟!
بإبتسامه؛عطيني رقمك وتونقولك شن نبي..
رفعت حواجبها وقالت؛رقمي!.
اشرف؛حتى حسابك ع الفيس مافيش مشكله..
🍃هي من داخل كانت متوتره وقلبها يدق بقوة..معجبه بيه جدا..بس مابتش تعطيه الفرصه بش مايشوفهاش ساهله..🍃
رفعت حاجبها وردت عليه تقول؛لاانت فاهم غلط وهلبه..
وخلت الكروسه باللي فيها ومشت طلعت من السوبر ماركت وهي حامقه..
وهو كان يلحق فيها بعيونه اللي كانت نظراتهم كلها اعجاب..
وقال في نفسه..
"زي ماتوقعت"
ومشي طلع من السوبر ماركت والبنت اللي واقفه ع الكاصه كانت تراقب في اللي صار وهي مبتسمه..
☘قعد وراها بمسافه..
وشافها لما وقفت ع اختها مروة..
مروة بإستغراب؛خيرك وليتي وماخديتي شي!..
صفاء وهي معصبه:بعدين نولوله اني وياك..هي تعالي..
ومشت ومروة وراها وهي شاده الكارتوني متاعها وتشبحلها باستغراب..
اما هو ضحك ضحكه خفيفه..بعدين تنهد..ولف ومشي ولى للسوبر ماركت..
☘في هالوقت..
جت سيارة عمر ومعاه مرته..
اللي يشوف وجهه يقول جاي لعزي..
ومرته في جنبه كان باين عليها من ملامح وجهها انها مش مرتاحه..
هو وين شاف لحوش علي الواعر حس بوجع في قلبه..
خلا لمعه الدموع تبان في عيونه..
غيرهم عنه وطول خش بالسيارة للقراج...
☘☘☘☘☘
"من مده طالعه الدوة وراهو جت من الممرضات اميمه"
اميمه وهي تفكر:ماعنديش عداوة مع ولاوحده فيهم ياأسمهان..
؛في حد وراها الاشاعه حد وحده في مجموعتك تغير منك..او واحد من الدكاترة يبي يشوه سمعة الدكتور قصي..
حسناء؛مرات صح..
اميمه وهي تسمع في كلام زميلتها كانت تفكر..
وجي بين عيونها كل تصرفات الدكتور قصي معاها من بعد زواجها لليوم..
وصلت لنتيجه خلتها تقول؛خلاص فوتوا الموضوع سيورهم يعرفوا ان مافي شي بيني وبينه وان اللي طلع علينا كله دوة فاضيه..
جتهم ممرضه وقالت؛دكتور خالد يبيكم..
حسناء ؛ووك مبرده الدراه هدا..
ضحكوا..
ومشوا مع بعض واميمه وهي ماشيه معاهم وعقلها مابطلش تفكير..
☘☘☘☘☘
"قسما بالله يااريج النوم نسيته..وين نحط راسي ع المخده نقعد نفكر فيهم..في محمد بالذات..محمد متعلق بامه هلبه يااريج"
اريج ودموعها ينزلوا؛لكن حرام هكي يانضال..هما في بالهم بوهم وامهم مسافرين يهيجوا وعايشين احلا ايامهم لو لاقدر الله صارت لعيشه حاجه صدمتهم حتكون قويه..مش عارفين اللي يفقد بوه ولاأمه فجأه شن يحس وشن يصير فيه..
نضال بضيق وحزن؛والله نفس الدوة قلتها للمهدي وحتى هو مش طايب عليه..لكن عيشه محلفاته مايقوللهم شي بش مايودروش قرايتهم..
اريج حركت راسها بالنفي وهي تمسح في دموعها؛لالا مش هكي..هي ماتبيهمش يتعذبوا معاها ويشوفوها وهي تتعذب..
نضال وهو يفكر في كلامها قال؛صح..عندك حق..
رشفت وهي تقول؛سيورهم يعرفوا حاجه زي هادي ماتدرقش..
تنهد نضال بقلق وقال؛يستر الله..
واريج تبكي بصمت وقلبها موجوع ع عائشه وصغارها ع الآخر..
هو شافلها بعدين مسح دموعها بأصابع يده وهو يقول؛خلاص حبيبي اهدي..تو لما تروحي وماليك يشوفوك يبدوا يسألوك وانتي طلعي اللي هناك..
اريج وهي تمسح في دموعها؛لالا اني مش هكي نضال...مايطلعش مني سر ع قطع رقبتي..كان طلعته طلقني من غير ماتفكر..
نضال بنرفزة؛تي خير عمك انتي وكلمة طلقني..
اريج؛سحيقه..
نضال؛نعم!..
اريج؛مش عليك..
نضال؛مالا على مني!؟
هي قالت؛فوت خلاص..روح بيا قلت لأمي مش معطله راهو..
نضال؛حاضر..بس زي ماقتلك اريج..
اريج؛قتلك ع قطع رقبتي..
ابتسم وسط حزنه وقال؛بعيد السو..
ابتسمت من بين دموعها وهي تقول؛قريب متت الايام اللي فاتوا من تحتك احتمال كان زدت يومين تانيات تروح تلقاني ميته..
نضال بضحكه؛بعدين طول تحطني عمتك مغليه في قرقارش قداش ليها دورلي فيها..
ضحكت اريج..
وهو تحرك بالسياره ويقول؛بعيد السو عليك فستقتي..اسف قلبي..
اريج؛حتى اني اسفه..ايه حقه سيارتي..
نضال؛نحطك ونولي نروحلك بيها..
ومشوا من قدام البحر..متوجهين لسانيه عيلة التاجوري..
وين وصلوا غادي ودرس قدام الحوش..
نضال؛بستاشيو استني..
قعدت تشبحله..
هو طلع من درج السيارة ظرف ابيض ومدهولها وهو يقول:مع حبي..
هي ابتسمت والدمعه في عيونها وقالت؛ربي يعوضك..
نضال؛هي انزلي قلبي..
نزلت اريج وسكرت الباب بعدين وقفت ع الروشن وقالتله بآبتسامه؛نحبك..
هو رد بإبتسامه؛نموت فيك..
☘ونزلت من السيارة..
ونضال تحرك طول...
هي مشت خشت داخل السانيه.
ومشت بطريقها لحوشهم..
وين قربت توصل فيه سمعت صوت دوشه..
هي بخوف؛شن في!..
وين خشت للحوش سمعت امها تقول..
"قصرتيلي رقبتي قدامهم خليتي وحده زي ثريا تعيب فيا وفي ربايتي"
كملت تمشي لين وصلت في وسط الحوش..
لفت امها وافقه تكلم في الاء اللي كانت تبكي بإنفعال شديد:علاش ديري فيا هكي يابنتي علاش حرام عليك راني امك...!
اريج وهي مفجوعه؛شن في خيركم صوتكم طالع برا!..شن صاير يام!.
التفتت فردوس اللي كان وجهها احمر من الغضب ودموعها ينزلوا؛تعالي شوفي اختك الكلبه اللي ماعرفتش نربيها شن دارت..!
اريج وهي تشوف لآلاء قالت:شن دارت..
آلاء ببكي؛بالله عليك اسمعيني قبل..
عيطت عليها امها وقالت:سكري فمك ياكلبه سكري فمك..
اريج فقدت اعصابها وقالت بصوت عالي:شن دارت قولي يام!
وخرت فردوس شعرها للخلف وقالت بصوت غاضب وهي داهشه؛اختك الوس.خه..تكلم في وليد عمك وهي مخطوبه لغيره..وطلعت معاه مدايره معاه سريب زمان من وراي ...
اريج قعدت تشبح لامها بصدمه وهي تقول:وانتي صدقتيها يام!! آلاء ماديرش هكي يام كذابه الحقيره هديكا..
فردوس بإنفعال؛مش كذابه مش كذابه..شفتها بعيوني وهي تقوله..انت اضمن امك ترضى واني بعدين نفسخ..
بري لعمتك بري..بري اسأليها وهي تقول وتوريك رسايلها في التليفون هي وياه هالفاسده..
شافت اريج لآلاء اللي كانت تبكي وهي خايفه..
ومازال مش قادره تصدق ان آلاء اختها دير حاجه زي هادي...
مشت من حداهم طول لحوش جدها..
كانت تمشي بسرعه ومن داخلها تردد..
"ماديرهاش..مستحيل ديرها.."
لين خشت لحوش جدها..
وقعدت تنادي؛عمتي..عمتي..
طلعت عمتها وجتها طول خدتها من ذراعها ودخلتها الكوجينه وهي معاها وسكرت الباب..
اريج وهي مصدومه ودموعها تنزل؛ماديرش الاء ماتصدقيش ياعمتي..
؛كيف مانصدقش يااريج واني شايفه محادثاتها معاه بعيوني..
اريج برفض؛كذب كذب..فبركه فوتوشوب هادي كذابه..
؛لامش كذابه يااريج اختك بروحها اعترفت..
وكأن من صب عليها ميه سخونه..
قعدت تشوف لعمتها وهي مش مستوعبه..
؛قالت هدا قبل لكن توا معاش نكلم فيه..تعرفي شدينا عليها عمامك بالسيف..ومازال الدوة لما توصل لعمتك وتعرف ان اختك ورا اللي صار مع بنتها..
اريج كانت في حالة من الصدمه مخليتها مش قادره تنطق..
دموعها قاعده تنزل ورا بعض وخلاص..
؛من قبل تجيني وتحكيلي وتقولي خطيبها مش عاجبها وتبي تفسخ..اصلا هي انخطبت بش تقهر وليد وخلاص..
فجأة انفتح عليهم باب الكوجينه واللي خاش كان واحد من عمامها..
؛ريتي اختك شن دارت !؟ شفتي بشن جازتنا ع الثقه والحريه اللي عطيناهالكم.!!؟هكي امكم ربتكم ياأريج!!
ولسان اريج انربط مش قادره تتكلم..
هادي كانت اكبر مخاوفها ان يصير شي يخليهم يقولوا هالكلمه..
"هكي امكم ربتكم"
هو كمل يقول؛اختك آلاء لازم تتزوج في اقرب وقت ولا العيله بتخش بعضها من وراها..
هي معاش تحملت اللي تسمع فيه..
مشت طول طلعت وخلتهم..
وعمها وراها وهو يقول؛اني بنكلمها خطيبها وحتى انتي معاها قبل ديرولنا خارقه ماتترقع..
اخته قالت؛خلاص اسكت..
؛شن نسكت ع شن نسكت باهي اللي قاعد نتكلم بس..هادي رباية النساوين وشن يجي من وراها...
🍃وهالكلمات تسمع فيهم اريج..
وهي ماشيه بإتجاه حوشهم ومشاعر الغضب متملكتها..
ودموعها مابطلوش نزول..
خشت لحوشهم..
وتوجهت لدارهم..
كانت امها مقعمزة في الصاله وهي حاطه راسها بي ايديها وتومي...
وهي خبطت باب الدار وخشت..
كانت الاء مقعمزه ع سريرها وهي تبكي..
وين شافت الغضب في عيون اختها قالت ببكي وخوف؛بالله عليك اسمعيني قبل ياأريج..
وتوصل فيها اريج وتنهال عليها بالضرب وهي تقول؛جبتيلنا الدوة ياحيوانه..جبتي لأمك الدوة ياحق.يرة..خليتي اللي يسوا واللي مايسواش يوصل فينا..
كانت الاء تعيط وهي تتلقى في الضرب..
واريج تضرب من غير وعي..
في ودانها يرن كلام عمها...وكانت تحت تأثيره..
ومش حاسه بروحها وهي تضرب في اختها ضرب مبرح..
لين خشت عليها وهي تقول؛اريج خلاص اريج..
وشدتها وقعدت تجبد فيها عنها.
واريج تقول بغضب ودموعها سيل؛خليني نقتلها يام..الحقيره اللي جابتلك الكلام..اللي شمتت فيك الكلاب..خليني يام بالله عليك..
فردوس وهي تبكي وتجبد فيها؛خلاص يابنتي بالله عليك خلاص والله ماعاد عندي جهد..نحس في روحي بنطيح..
اريج قعدت تشوف لآلاء بحقد..
بعدين مشت طلعت..
وامها لحقها..
وخلوا آلاء وهي متمكشه في بعضها تبكي..
ويجيها صوت اريج وهي تقول..
"والله ماتستاهليه مهند..راجل مش لأشكالك انتي..وليد وهلبه فيك ياحق.يره"
لما سمعتها شن قالت خافت هلبه..
لويوصل اللي صار لمهند..حتخسره..وفكرة خسارة مهند عند آلاء ولت مخيفه هلبه...
☘☘☘☘☘
وفي حوش محمد شنيبه.
ع الغدي..
كانت طوبى تسرق في النظر لعروسة عمر..
ملامح البنت كانت تبان ملامح حاده وقويه..
لكن تعابير وجهها تبين انها تتصنع في الابتسامه والضحكه..
وخديجه ومغليه يدلعوا فيها أخر دلع..
عكس نسرين اللي كانت تتعامل معاها جدا...
بعد الغدي..
قاموا السفر..وطوبى من حرصها ع جنينها مابتش تقيم السفر لمت المفارش بس..
وين جت بتنوض بيهم..حست بدوخه بانت عليها لما فقدت توازنها وجت بطيح غير شدت روحها..
مغليه بخوف؛خيرك طوبى!
وحده من خوات مغليه؛دختي!
طوبى وهي تمرر في نظرها وتحاول دير روحها عاديه؛مافي شي دوخه عاديه تصير ديما لما نوض..
؛حتى اني تصيرلي لما نوقف بسرعه..
طوبى:ايه صح..
مغليه؛ارفعي المفرش وتعالي قعمزي..
طوبى؛لاعادي عمتي مافيا شي راهو..
مغليه؛معليشي بنتي اسمعي كلامي حطي المفرش في الكوجينه وتعالي قعمزي ماشاء الله في عشرين يد تعول مش واقفه عليك..
جت وحده من خوات مغليه وخدت منها المفرش وقالت؛بري قعمزي بنتي..
ومشت طلعت..
طوبى خافت لتكون مغليه فكرت في حاجه تانيه وتبدا تسأل فيها اول ماتقعمز جنبها..
وفعلا هدا اللي صار لما مشت قعمزت حداها..
مغليه بصوت منخفض؛تصلي انتي..
طوبى هزت راسها بإيجاب..
مغليه؛بالك حامل؟!
طوبى؛ياريت والله..لكن عارفه عمتي هدا من الارهاق وقلة النوم..
قالتلها؛انتي اللي تجيبي لروحك في التعب..
طوبى:مسؤوليات في رقبتي مانقدرش نسيبها ومادامني قاعده فاضيه بندير اللي عليا..
مغليه؛وهاك قلتيها مادامك قاعده فاضيه..بعد ديري صغار بتردي بالك من روحك اكثر شي..
ابتسمت مجامله وقالت؛إن شاء الله..
وعيون دنيا مرت عمر عليها...
🍃وفي الكوجينه..
نجاة تعول مع بنات عيلة مغليه ومعاهم خديجه اللي تعطي في الاوامر اكثر ماتخدم..
خشت عليهم خالتها بالمفرش وهي تقول؛مرت الجالي شكلها حامل..
التفتت نجاه شبحتلها زي المخلوعه..
وخديجه بإستغراب قالت؛لاماظنش كان حامل رانا نعرفوا..
؛مرات مش مستاقظه لروحها..باين عليها من وجهها ومن طريقة ايكالها بكري حتى توا وين ناضت وقفت داخت شويه..
وحده منهم قالت؛خالتي في الموضوع هدا ماتغلطش ياخديج..
شبحت خديجه لنجاه..
نجاة غيرت عيونها عنها ورجعت ضم وهي ترعش مع بعضها ودموعها في عيونها..
خديجه؛يصير وتغلط مرة..اصلا مالهاش اسبوع تصلي..
خالتها قالت؛اها كان هكي معناها اني الغالطه الحق.
؛خالتي الشاهي واتي بالله ديري سفره..
:هي...
خديجه غيرت عيونها عن خالتها وولت تنشف في الماعين وهي تفكر..
ونجاة كانت شاده دموعها بالسيف..
ماصدقتش كلام خديجه برغم انها خاطرها تصدقه
وخافت هلبه من استنتاج الخاله...