طوبى ☕شارع القهوة☕

الجزء_السادس_والتسعين

#طوبى  "جنة طوبى"
#جمان_فريد
#الجزء_السادس_والتسعين"إنت عيدي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
قال ابن مسعود رضي الله عنه :
" ما كُرِب نبي من الأنبياء إلا استغاث بالتسبيح فأكثروا من التسبيح في الرخاء والشدة ".
الجواب الكافي للإمام ابن القيم رحمه الله ( 1 / 7 )

🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 قد يتعودُ أحدهم على مُشاهدة ما أَبهرهُ أوّل مرّة؛ فيتوقّف قلبه عن قولِ كلمة "الله"
بعد مرّاتٍ عديدة، أمّا من يُحبّ فكُلُّ المرَّات لديه هي المرَّة الأُولى🍃
________________________________________
جوه يجروا خوت  

الولد لين وصلوا فيه..
عبد القيوم بإبتسامه..
/اهم خوتك..ونزله وهو يقول..افطنوله..قصدي خلوا عينكم عليه مرة تانيه..
خوه قال:حاضر..وشكرا..
عبد القيوم وقف ع حيله وهو يقول بإبتسامه..
/العفو..
ع جية تاله اللي كانت تقوله بإمتنان كبير..
/شكرا شكرا شكرا انقذتني..
عبد القيوم بضحكه:كان معاك..
تاله بإحراج:ايه وغفلت عنه..هيا تعالوا معاي..وشكرا مرة رابعه عمو..
ضحك عليها وقال..
/العفو..
مشت من قدامه والصغار معاه..
هو كان يشوفلهم بعدين غير نظره القدام جي عليها..
تلاشت ضحكته شويه شويه..
وطوبى تشوف للصغار وهما جايين ناحيتها وهي تقول..
/هكي دير فينا!!؟
الولد كان يشوفلها بخجل وقال..
/اسف..
ضحكت عليه غصب عنها..
"تاله"..
قامت عيونها وشافتله..
لقاته يأشر لتاله بيده يبيها تجيه..وتاله مشتله طول..
اميمه برفعه حواجب متسائله..
/زعمه شن يبي؟.
مروة بحماس:اشبح شن بيعطيها ماتشوفيش في الشنطه معبيه ان شاء الله يحسبنا معاها..
ضحكت اميمه..
🍃عبد القيوم:تعالي شوي..
ومشي لمقعد خشبي طويل..حط عليه الشنطه وفتحها..
وتاله تشوف لوسط الشنطه بفضول..
طلع طرمس ومدهولها وهو يقول..
/هدا طرمس شاهي تارقي..
خداته تاله وقالت:شكرا للمرة الخامسه..
ضحك وهو يسكر في السوسته بعدين قاللها..
/عدي مش قايل عفوا..
ضحكت ومشت..
وهو رفع الشنطه وقال في نفسه..
"عدي ياعبد القيوم عدي وفوت جو المراهقين"..
ومشي طول بدون مايشوفلهم..
وطوبى تسرقله في النظر..
شافاته طلع تليفونه من جيبه ويبان بيتصل بحد..
"شن هدا"
غيرت نظرها لاميمه لما سمعتها تسأل في تاله..
تاله؛قال شاهي تارقي..
سدره:بابا يموت فيه..
اميمه:الله واخيرا قداش خاطري نذوقه..
مروة:خسارة اني والشاهي مش صحاب..
طوبى قربت لتاله خدت منها الطرمس وهي تقول..
/هيا نولوا خليناهم مشغولين..
اميمه وهي تشوف للطرمس في يدها قالت..
/ايه صح..هيا..
جوري:مازال نبوا نلعبوا..
طوبى:شويه تانيه حبيبتي..
ومشت وهما معاها..
طوبى:صغار ابله حوا امشوا قدامي..
قدموا الصغار وهما شادين خوهم وهي تشوفلهم..
شويه وسرحت بتفكيرها في اللي صار..
مش قادره تصدق انها تلاقت مع التارقي قبل وصار كلام بينها وبينه
تسائلت في نفسها..
"زعمه هو متفكر ولالا!؟"
جاوبها عقلها..
"لو كان متفكر راهو بان عليه..وبعدين علاش بيقعد متفكر موقف زي هدا اذا انتي بروحك كنتي ناستيه بكل"
رجعت قالت في نفسها..
"لكن زي ماتفكرته توا اكيد هو تفكره من قبل"
عقلها رد
"اول شي انتي كنتي صغيره وقتها شكلك تغير عن توا..تاني شي حتى لو تفكره شن يعني!؟"
وقالت بصوت خارجي...
/صح شن يعني!
اميمه؛شني!؟
طوبى بشي من الربكه
/لاشي غير كنت نفكر في حاجه..
اميمه:امم..باهي شن رايك في حركة التارقي كيف حسبنا في الشاهي..
طوبى بلامبالاة مصطنعه..
/كيف شن رايي فيها..حركة عاديه ومش غريبه عليه..
اميمه سكتت بس في داخلها كانت تقول..
"مش عارفه لو اللي نشوف فيه صح ولااني هكي نبي نشوف..مرات نحس فيها شي ناحيته ومرات نحسه مش مهم عندها بكل..ياريت لو نقدر نحكي اللي عرفته..لكن صعب..خايفه طوبى تفهم غلط ودير ردة فعل مش حلوة اتجاه الراجل"..
وكملوا طريقهم لين وصلوا في طاولتهم..
مطيره:قعمزوا هني معاش تتحركوا بكل..
هاديه:لاعاد مش جايبينهم بش نقعمزوهم!..شويه تانيه حبايبي واني نمشي معاكم للألعاب..
مطيره:عارفاتك تبي تدرجحي
هاديه بضحكه؛ديما زارقه عليا
ضحكوا
غرفه شافت للطرمس وقالت..
/شن هدا!؟
اميمه:ياحنه الوليد لقاه التارقي
مطيره:سلمه ياربي
ابتسمت طوبى ابتسامه خفيفه وهي تشوف لجنه اللي كانت شاده الشكشاكه متاعه..
اميمه بضحكه:المهم بعد مارده عطانا براد شاهي اخضر..
غرفه:بالله صبيلي منه طاسه خل نذوقه..
مطيره؛صبيلنا كلنا وجيبي حافظه الفطاير..
طوبى حمحمت وقالت..
/خلوا حافظه للرجاله بروحهم اكيد يبوه مع الشاهي..
اميمه ركزت عليها
مطيره؛حاسبينهم في كل شي..
مروة:حتى هو حاسب حسابه شكله وجايب شنطه معبيه..
هاديه؛هو عاد متاع جو زرادي قال عليه حسين سعدودهم..
مطيره بنفاد صبر..
/تي صبي الشاهي يابنت..
🍃🍃🍃
وهو قرب يوصل في الرجاله..
وين شافه عبد الرؤوف بدي يغني..
/اهو جي اهو جانا..
المهدي بصوت مفخم..
/عبدو..
هو قلده وقال..
/مهدي...
نضال:الله الله شنطه وجو..
وصل فيهم وسلم عليهم واحد واحد..بعدين قعمز جنب محمد المهدي..
عبد القيوم:احسن مادرتوا فكيتونا من جو الكراسي والطاولات..
حسين:اسعفنا بالشاهي من بكري نراجو..
ضحك وقال..
/هيا هي..
وفتح الشنطه وطلع طرمس الشاهي وطواسي "التيك اوي" وبدي يصب..
وهما حداه يهدرزوا وهو يشارك فيهم..
فرقوا ع بعض من يد ليد طواسي الشاهي..
عبد القيوم:خديتوا كلكم!؟
عبد الرؤوف:مازال الجلاميد هادم..
ضحك وقال:بعد 6سنين تانيات ان شاء الله..
حسين:قول 10..
عبد الرؤوف:انت بتفسدهم عليا ..
حسين:قول نسقمهم..
عبد القيوم؛عكسري عاد كل شي ماشي عنده بنظام..
وطلع حافظه وهو يقول..
/عدوا بالجو السمح..
حطها في النص وفتحها..
ويبان عليهم اصناف حلو شامي..
نضال:نتعب معاه الجو هدا..
وقدم خدي طرف..
عبد القيوم:هيا اهجموا..
خداها عبد الرؤوف وقعد يفرق عليهم بعدين قعمز وحطها في حجره..
حسين؛جوك يجروا حي عليك..وخداها منه..
ويغيروا مهاب واواب طريقهم لحسين..
عبد الرؤوف بضحكه..
/نهارك المعسل..
وين قربوا يوصلوا مدها لعمر بدون انتباه..
عمر انصدم وخداها طول من الصدمه..
هما لما شافوها ولت عند عمر طاحوا ع حسين ودفنوا وجوههم في صدره..
ضحكوا عليهم..
وعمر قعد ياكل وهو يشوف للتوأم بإبتسامه..
🍃🍃🍃🍃
وفي شارع القهوة..
وصل ربيع نسرين لحوش اهلها وخدي منها يحيى بيهرب للمنتزه..
وين جي بيتحرك بالسياره شاف سامي جاي ناحيته..
ابتسم بمفاجأه وهو يقول..
/اووو..
ونزله من السيارة..عيدوا ع بعض وسلامهم كان حار..
ربيع:ليك وحشه ياراجل..
سامي بإبتسامه؛ليكم اكثر..
ربيع:امتى جيت؟
سامي:الصبح كنت هني تريحت في الحوش وقلت نجي العشيه ونفتح المصور..
ربيع:نقولك حاجه فوت الخدمه اليوم وتعالى معاي لجردينة **** جماعة الشارع كلهم غادي..
سامي ابتسم وقال:نفوتوا المصور لكن الكاميرا بنرفعها معاي..
ربيع:فكرة مش بطاله..جيبها وتعالى
سامي:لحظه..
ومشي للمصور..وربيع رجع ركب السياره وقعد يراجي فيه..
شويه وجي وفي يدها الكاميرا بغلافها..
ركب جنبه وقال:يحيى هني..التفت وشافله وهو يقول شن جو..
يحيى رد عليه بلغة طفوليه..
/تمام..حدف منها تاء..
ضحكوا ربيع وسامي..
وشويه وتحرك ربيع بالسياره وطلع من شارع القهوة..
🍃وفي حوش طوبى..
كانوا فردوس وفايزة وحواء مدايرين تقعميزة حلوة في الجنان ع الحصيرة..
قدامهم سفرة قهوة وحلويات يحلوا بيها في الهدرزة..
اما اريج كانت في الدار غارقه في النوم..روتين رمضان قاعد مأثر فيها..
🍃🍃🍃🍃
رافقوا هاديه ومطيره ومروة الصغار للألعاب..
اما اميمه وطوبى قعدوا يتمشوا مع جنه اللي قاعده في كروستها..
🍃اميمه:عادي..معاش نحس بشي نهائي ناحيته..قبل وين كنت نسمع بإسمه نحس قلبي يرعش وتوا نشوف فيه ومش حاسه بولا حاجه..
طوبى في نفسها..
"تسمع بإسمه قلبها يرعش!!"..
شافتلها وقالت..قصدك يطلع الحب من القلب بسرعه!؟
اميمه:امم..شوفي..الحب زي النبته لو زرعيتها في تربه صالحة للزراعه حتكبر وتمد جذروها بقوة في الارض..لكن لو انزرع في ارض بور فيسع يموت..
طوبى شافت المهدي اللي كان منسجم في الهدرزة وقالت..
/معناها حب سدرة ومهدي مزروع في المكان الصح..
اميمه بأبتسامه..
/حبهم زي الشجره المعمره قويه جذورها واصلات للعمق ع قد ماتتعرض للعواصف مستحيل تتقلع..
طوبى:يهبل كلامك ياميمو..
اميمه بضحكه:قراية الكتب خلتني نعرف نعبر..
طوبى:جديات القرايه تقوي قدراتك من هلبه نواحي..وقراية القرآن بالذات..
اميمه:صح..كثرة قراية القرآن خلت عندي طلاقه في الكلام..
سكتوا شويه وهما يمرروا في نظرهم ع المكان.
شافت اميمه عبد القيوم يسرق في النظر لطوبى..غيرت عيونها عنه وقالت..
/بنمشي لجماعة الالعاب..
طوبى:خلينا نتمشوا خير..
اميمه بضحكه:الحق خاطري نلعب..
تنهدت طوبى بإبتسامه بعدين قالت..
/براحتك..اني بنكمل تمشايه مع بنوتي..
اميمه ابتسمت وقالت..
/سلام..ومشت طول..
وطوبى كلمت طريقها وهي تقول..
/خل نهدرز اني وبنتي..قولي جنونتي عجبك المكان!؟ حلو هلبه ولا!؟..لو كنتي تقدري تمشي طلعتك من الكروسة عسولتي..
وجنه تسمع فيها وهي شاده الشكشاكه وتتفرج ع المكان وتسمع مع كلامها في الدوشه
🌼🌼🌼
شويه وسكتت طوبى وهي تتفرج ع المكان..
تشوف في احوال الناس..كلهم كانوا منسجمين مع اجواء العيد في المنتزه..كلهم كانوا هاربين من الضغط النفسي والهموم..
وين جو عيونها ع الالعاب شافت هاديه ومطيره راكبات الدراجيح واميمه ومروة يدفوا بيهم..قعدت تضحك بعدين قالت..
/محلاهم هاديه وعمتي مطيره هما وخالتي سميره ينغبطوا ع عفويتهم..ينغبطوا معناها قريب شويه من ينحسدوا بنوتي..ايااه ع اساس انتي فاهمه شن نقول اصلا..ضحكت ع روحها..
وكملت طريقها بجنه..ورجعت لحالة الصمت..
سرحت بتفكيرها مرة تانيه...ذاكرتها خدتها لأكثر من مكان لعند ماوقفتها عند اسوأ مرحله..
يوم كشفت الجالي ونجاة..رجعت حست بنفس الشعور البشع اللي قعد يكبر وهي تتفكر اللي صار بعد هاليوم
صدرها ضاق ع الأخر..
انتفضت بفجعه لما سمعت عيطه بنتها..
وقفت الكروسة ومشت بسرعه وقفت قدامها..
لقتها تبكي قالت:خيرك ماما!
نزلت نظرها لإيديها مالقتش الشكشاكه..
طوبى:حي! وين طاحت!؟
شافت القدام..بانت عليها طايحة قريبه شويه عليهم..
طوبى:اهيا ياماما..ورجعت وقفت ورا الكروسه ولفت بيها ومشت لمكان الشكشاكه..
ولما قربت توصل وقفت في مكانها
وين شافاته وصل قبلها..نزل خدي الشكشاكه ورفعها وقعد ينفض فيها من التراب كويس
وهي تشوفله بنظرات باين فيهم الاعجاب..
نظفها كويس..وقرب من جنه اللي وين شافاته سكتت..
ومدهالها وهو يقول...
/هاك ياسمحه..
طوبى حست قلبها بيطلع منها..
خدت جنة اللعبه..وهو قعد يتأمل فيها بإبتسامه ويقول.
/مالقيتش فرصه قبل بش نقولك اسف..اسف ع الموقف اللي صار يومها اسف جدا..
ماسمعش منها كلمه..ولادارت اي ردة فعل..
رفع عيونه اللي  كانت مدرقه نظراتهم النظارات..
ويجو في عيونها الحايره اللي داروا فيه وفي قلبه الهوايل.
صدمت قلبه المغروم بنظراتها..نظرات ماكانتش عاديه وفيهم لمعه زادت حلتهم..
وتختفي الاصوات..ويختفوا الناس..ويختفي المكان كله..
وماقعدش كان هو وهي...
هو معاش حس بشي غير قلبه اللي يبي يطلع منه ويمشيلها يبيه يعترفلها بحبه حالا..
لكن العقل ماشجعاش ومنعه يتهور...
اما هي..
مش فاهمه شي من اللي صار معاها غير ان قلبها اليوم في اكثر حالاته جنونا..
بس عقلها قاللها..
"شن قاعده ديري..نزلي عيونك وخودي بنتك وبري يللا"..
ويرجعوا المكان..والناس...والاصوات..
وتنزل طوبى عيونها وتاخد كروسة بنتها وتلف وتمشي بدون ماترد بحرف..
هوحس وكأنه قلبه غاص في جوفه..وكأنه احبط بعد ماكان متحمس حماس مفرط..
خاف..خاف هلبه يكون بالنسبه ليها مرفوض ومش خاطر في بالها..
التفت ومشي وهو مضايق..خدي نفس..وقعد يمرر في نظره ع المكان..
جو عيونه ع ربيع وسامي..يدوب ابتسم ومشالهم..
🌼وهي..
مجرد مالفت ومشت..بدت ع وجهها ملامح ابتسامه حلوة..
وكانت حاسه بشعور مفرحها بدون سبب..
مر قدام عيونها شريط ذكرياتها معاه..بس اكثر ذكري وقفت عندها ذكري الملاهي..ضحكت..بعدين ابتسمت وهي تقول في نفسها..
"مش عارفه شن هو اللي حاساته لكن حلو هلبه"
فجأه ومن حيث لاتحتسب..
انغموا عيونها..
طوبى:مني!؟
"حي عليك ياكلبه نسيتي الحركه متاعي"
طوبى بدهشه:عبير..
حولت عبير يدها وقالت بضحكه.
/تي ايه عبير!..
التفتت طوبى طول وهي تضحك..
وعبير ضمتها بقوة..
طوبى عذرتها وطبطبت عليها..
بعدت عبير وبدت تبكي..
طوبى:خيرك يامهبوله..
عبير بنبرة باكيه..
/قداش خفت عليك لما جيتك لحوش هداكا الحقير ومابوش يدخلوني
ابتسمت طوبى بحزن ودموعها في عيونها..
عبير رشفت وهي تمسح في دموعها وتقول..
/نكدت ع راجلي اول اسبوع واني نبكي ع خاطرك..
طوبى:راك تقولي طلقك ياهبله..
بضحكه قالت؛بعيد السو..وسع باله معاي وخيتي سلمه..خدت يد طوبى وحطتها ع بطنها..
طوبى بإبتسامه فرح..
/ياقلبي مبارك مبارك..تحلي عويناتك ع خير..
عبير بإيتسامه:سلمك ياروحي..شافت الكروسه وقالت..جنونه..مشت وقفت قدام الكروسه بش تشوفها لمت شافتها بإنبهار قالت...
/ياعمري الله يبارك..الله يبارك تنزمط زمط..
وقرصت خدها بخفه وهي تقول..
/قنوشه ربي يحفظها ويفرحك بيها..
طوبى بإبتسامه:آمين..امشي نقعمزوا غادي.
اشرتلها ع مقعد طويل..
التفتت عبير وشافاته بعدين قالت..
/تمام..
🌼ومشوا مع بعض وهما يهدرزوا وكل وحده كانت مشتاقه للتانيه وايامها معاها..
وماكانش لطوبى بس نصيب في لقاء الصدفه..
🍃اميمه:خلاص عييت واني ندف دفوا بيا..
مطيره:مصح وجهك دكتورة وتبي تلعب بالدرجيحه..
اميمه بتعجب:ياسلام!!
واللي حواليهم يضحكوا..
"اميمه"..
كلهم شافوا للي نادتها..
وهي التفتت بش تشوفها ومجرد ماجت عينها عليها قالت بمفاجأه.
/داليا!
داليا بضحكه:والله لأخر لحظه كنت شاكه..
وضموا بعض بقوة..
داليا:متغيره هلبه زايده محلوة تهبلي..
اميمه بإبتسامه:عيونك الحلوة..
وعمتها والباقي كانوا يتفرجوا عليهم بإبتسامه..
🍃🍃🍃🍃
"واطلقت منه وافتكيت وهو بعد الطلاق طلع برا البلاد"
عبير:سحيقه..معاش كلمك بكل..
طوبى:ولامرة الحمد لله..
عبير:افتكيتي منه وربي يعوضك خير.
طوبى ابتسمت وقالت..
/وانتي شن صار فيك!؟
عبير:الحمد لله اموري تمام وهو طلع راجل كويس وعيلته ناس طيبه..
طوبى :ع قيس نيتك وطيبة قلبك..
عبير:مافيش اطيب من قلبك ولااصفى من نيتك تو يعوضك ربي باللي يستاهلك وقولي قالتها عبير..
طوبى بإبتسامه؛تسلمي ياقلبي..
عبير:حبيبتي...ايه حقه كأني لمحت التارقي..
ملامح وجه طوبى تغيرت عقدت حواجبها وقالت..
/ايه جاي هني مع ولد عمي وراجل اختي وولاد جيرانا..
عبير:شن صار فيه خداها البنت اللي يبيها..
طوبى حست بضيق شديد وين تفكرت القصه هادي وقالت..
/لا قاعد عزابي..
عبير بضحكه:خله يقعد هكي بتتعب معاه اللي بتاخده مولي جذاب بزياده..
طوبى:تحشمي راك مراة متزوجه!
عبير بضحكه تعجب..
/خيرك ندوي عادي!..
طوبى وهي عاقده حواجبها احمروا خدودها وهي تقول..
/ماتجيش الدوة هادي وانتي ع ذمة راجل..
عبير بضحكه:باهي بالله شوفي البنات اللي غادي وين يشبحوا..
شافتهم وين مااشرتلها عبير لقت زوز بنات يشوفوا لعبد القيوم وهو واقف ع سامي وربيع..
كان يهدرز كعادته بإيديه..حول نظاراته وصكرهم ع صوابع يده اليمين وهو يتكلم بيها..كانت حركة حلوة بالمرة..
عبير:الراجل مايحليه في عين المراة كان جاذبيته اخرحاجه تجي الشكل رغم انه قنين حتى هو
طوبى بشي من العصبيه..
/خلاص عاد!..
تفاجئت عبير..
طوبى استاقظت لنفسها وقالت..
/عيب مهما كان هدا راجل مايجوزش تتغزلي فيه هكي..
عبير شافتلها بطرف عينها وقالت بإبتسامه..
/فهمت..
طوبى بخوف:شن فهمتي!؟
عبير:فهمت كلامك..
طوبى غيرت نظرها عنها وهي تشوف لبنتها وكانت تتسائل في نفسها
"خيرني اني خيرني !؟"
وعبير تمرر في نظرها بينها وبين عبد القيوم وهي مبتسمه..
🍃🍃🍃🍃
"نصيبات وبصراحه يااميمه من قبل نشوف فيك هلبه ع عمر"
اميمه ابتسمت بصمت..
داليا ابتسمت وقالت..
/كان نقولك مع من تلاقينا قبل لنروحوا!؟.
اميمه:مني؟!
داليا بإبتسامه..
/اسامه..
ابتسمت اميمه وقالت..
/وين؟
داليا:سافرنا لكندا راجلي كان عنده خدمه فيها شفناه في وحده من المطاعم قلت لراجلي عليه وين عرفه ليبي مشاله طول سلم عليه..
اميمه بإبتسامه:ماعرفتيش جديده؟!
داليا:عزابي قاعد.
نزلت اميمه عيونها للأرض وهي مبتسمه..
داليا بإبتسامه:جاني سلم عليا وسألني عليك..
شافتلها وهي متفاجئه..
داليا:قاعد يحبك..
غيرت اميمه نظرها القدام وهي مبتسمه وحاسه بشعور حلو بالمرة..
داليا:لو يعرف انك اطلقتي حيروح طول صدقيني.
تنهدت اميمه وقالت..
/لامش لازم يعرف خل يشوف حياته مع وحده تناسبه..اني مطلقه ومافيش فرق عمر بيني وبينه...
داليا:شن التفكير الرجعي هدا!؟
اميمه:هدا الواقع مانقدروش نهربوا منه. وبعدين بعد اللي عشته تعلمت ان مش كل شي الحب مازال في حاجات اهم..التوافق والتكافؤ ياداليا اهم من الحب الف مرة..
داليا ماقدرتش ترد ع كلامها لأنها اقتنعت بيه..
الكلام اللي قالاته اميمه وهي تتحسر من داخلها ع حالها..
🍃🍃🍃🍃
"مش هديكا صاحبة طوبى اللي جت مرة بتعزمها ع عرسها لما كانت عند هداكا؟"
غرفه وهي تشوف للمقعد اللي مقعمزين عليه طوبى وعبير..
/تقريبا هادي عبير..
ع جية أميمه قعمزت جنبهم وهي تقول..
/من قال نتلاقوا بعد هالوقت..
غرفه:شكله يوم اللقاءات العالمي حتى طوبى تلاقت مع عبير..
شافت اميمه وين تشبح غرفه قالت بإبتسامه.
/سبحان الله..
مطيره؛ماشاء الله سامنه ومزيانه قبل كانت زي المسواق..تنهدت بحسرة وقالت..ماراحت كان طوبى مسكينه..
غرفه:علاش تقولي هكي!؟
اميمه قعدت تشوف لطوبى بحزن..
هاديه:الطلاق مش اخر الدنيا يامطيره..
مطيره:طلاق عن طلاق يفرق ياهاديه..تو اميمه طلعت منها لا وراها لاقدامها واللي كان واخدها حط عقله في راسه وخلاها في حالها..لكن طوبى مازال مربوطه بيه وصدقوني كان ولى مزال بيعاود اللي داره ومرات احرف..
غرفه:يعاود عينه والله مايقدر يدير حاجه..وبعدين في حاجه انتم ماتعرفوهاش في واحد عارف ظروف طوبى كلها ويبي يخطبها..
كلهم قعدوا يشوفولها بنظرات مفاجأة..
مطيره؛مني!؟
غرفه:زينب اللي تقري في طوبى القرآن..خوها..
مطيره بدهشه:الله!
غرفه؛والله وكلم رؤوف عليها ورؤوف فتح معاي الموضوع وقالي تقبل طوبى ولالا واني قتله توا ماتفكرش في الموضوع هدا والسبب معروف..
مطيره:هو صح صعب ينفتح موضوع زي هدا مع طوبى توا بعد اللي صار فيها..لكن..مافيش باس لو قعدنا نمهدولها..
غرفه:هدا اللي فكرت فيه بعدين في النهايه زيه زيها الزوز اصحاب تجربه فاشله..
اميمه قعدت تفكر في كلام غرفه وهي تشوف لطوبى وحساته منطقي هلبه..وشافت ان عدي الانسب لطوبى من عبد القيوم من جميع النواحي..
وهي تفكر خطرتلها حكايه البنت السوريه اللي قالوا ان عمته مأيدتها..لما تعمقت بتفكيرها فهالقصه استنتجت ان اهله رافضين ارتباطه بيها..وقالت لنفسها..
"الحمد لله اللي قعدت ساكته وماحكيتلها شي..هكي احسن ايه هكي خير..وزي ماقلت مش كل شي الحب التوافق والتكافؤ اهم من الحب"
🍃🍃🍃🍃🍃
وبعيد عنهم كانت مروة تتكلم بالتليفون وهي تتمشى والصغار يلعبوا حواليها وهما رادين بالهم من بعض..
☘مروة:المكان قنين والجو حلو
"خسارة ياريت قدرت نجي"
مروة:معليشي حبيبتي نعوضوها إن شاء الله..
"ان شاء الله..اسمعي بنسكر توا مروة بعدين نهدرزوا الناس كل شويه يخشوا"
مروة:تمام حبيبتي سلام..
"سلام"
نهت مروة المكالمه وهي تقول بتعاطف..
/ياروحي عليها..
"مروة"
رفعت حاجبها وشافت يمينها..
لقاته واقف يشوفلها بإبتسامه..
محمد المهدي:اول شي كل سنه وانتي طيبه..تاني شي معليشي يعني لو ناخد من وقتك شويه كلمتين بس مش مطول..
مررت نظرها حواليها بعدين شافتله وقالت..
/تفضل..
محمد بإبتسامه..
/شكرا..حمحم وقال..شوفي هو مازال بكري ع الكلام هدا بس اني..توا خلاص يعني بنخش مرحله جديده في حياتي وحتى انتي..تنهد من التوتر بعدين قال..مروة اني..معجب بيك هلبه وانتي تعرفي..
ملامح وجه مروة كانت جامده ونظراتها بارده ماتأثرتش نهائي وهالشي زاد وتره..
بلع ريقه وقال:عارف اني غلطت في حقك هلبه ومش حنبرر لروحي..لكن يقولوا جل مالا يخطئ والواحد يتعلم من غلطه..
🍃من بعيد المهدي وهو يتمشى بروحه عيونه جو ع ولده وهو واقف ع مروة..
عقد حواجبه بإستغراب ووقف في مكانه وهو يشوفلهم..
مش بس هو...حتى يزن ونضال..وعبد القيوم..
☘محمد؛مروة انتي بصراحه ماتتعوضيش ع صغر سنك وع اللي نشوف فيه من البنات اللي في عمرك نحس فيك حاجه نادره اللي يلقاها مايفرطش فيها..
مروة:كملت؟
عقد حواجبه بتوتر وقال..
/لامازال..مروة..بعد مانتخرج من الثانوي نبي نعطي فيك كلمه..
مروة:كملت؟
هز راسه بصمت وهو في قمة التوتر..
مروة:لا..لاتوا ولابعدين..
ولفت ومشت وخلاته مضايق لأبعد حد..
المشكله انها كل ماتصده مشاعره ناحيتها تقوا اكثر..
تنهد ولف ومشي وهو يقول في نفسه..
"مازال يامحمد مازال الاصرار تو يلينها مع الوقت"