طوبى ☕شارع القهوة☕

الجزء_السابع_والتسعين

#طوبى  "جنة طوبى"
#جمان_فريد
#الجزء_السابع_والتسعين"الأوركيد الأبيض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
عن أبي موسى الأشعري رضي الله عنه، قال: قال رسول الله صلى الله عليه وسلم: (مَثَلُ الذي يَذْكُرُ رَبَّهُ وَالَّذِي لا يَذْكُرُ رَبَّهُ، مَثَلُ الْحَيِّ وَالْمَيِّتِ) (رواه البخاري) .

🌿🌿🌿🌿🌿🌿🌿🌿🌿🌿🌿🌿🌿🌿🌿
🍃اقلب الساعه الرملية بدأ العد التنازلي🍃
_______________________________________
"زي ماتعرفوا العطلة الصيفيه بدت وحنبدوا بدورات التقويه للخط للأطفال من 8سنوات ل12 سنة..وكيف ماهو معروف منظمتنا خيريه يعني اللي يخش علينا من الدورات هادي نساهموا بيه في أعمال خيريه..الكلام للأستاذ عبد القيوم لأنه جديد علينا ولأني طامعه انه يوافق يكون من الاساتذه اللي يعطوا في الدورة هادي"
موظف في المنظمه قال..
/كان استاذ عبدالرزاق الحصادي السنوات اللي فاتوا بس لأنه من برا طرابلس وبسبب الحرب مش حيكون معانا العام هدا،
نتمنوا حضرتك توافق ع العرض وتكون مع استاذ عبد الحكم والانسه سلافه العام هدا..
نفيسه:هما 3ايام في الاسبوع استاذ عبد الحكم وسلافه ماعندهمش مشكله ياخدوا اي يوم عادي الايام هي السبت الاثنين الخميس والمده ساعتين مسائي من 4ل6..انت اختار من الأيام هادي اللي يناسبك..وكملت تقول بضحكه..هدا ف حالة وافقت طبعا..
سلافه كانت تشوفله بترقب ولهفه..
وهو بإبتسامه حلوة قال..
/ماعنديش مانع ونبي يوم الخميس..
شافوا سلافه وميار لبعض وهما مبتسمات..ردت سلافه نظرها ليه تاني وهي بطير من الفرح..
نفيسه بإبتسامه..
/تمام متفاهمين..سلافه استاذ عبد الحكم تفاهموا مع بعضكم ع اختيار باقي الايام..
عبد الحكم؛شن ياسلافه؟
سلافه بإبتسامه؛السبت..
عبد الحكم؛خلاص الاثنين..
نفيسه؛كويس..بإذن الله حنبدوا من الاسبوع الجاي مدة الدورة شهرين...
هز عبد القيوم راسه بالموافقه..
نفيسه:تمام بعدين تمشي مع وائل للمكتب وتكمل معاه باقي الاجراءات..
عبد القيوم؛إن شاء الله..
شبكت نفيسه ايديها في بعض وقالت..
/وتوا نجوا لجماعتي جماعة الرسم..زي ماتعرفوا وضع العاصمه والحرب وماتجيب الحرب من خراب ومآسي موت نزوح..يعني اكثر ناس تعاني وقت الحرب هما الناس النازحه..بصدق ومن كثر ماالوضع مأساوي بدوا في ناس يباتوا في الشوارع حدا الجوامع تحت الكوبريات..يعني شن بنقول ولاشن بنحكي شي يفطر القلب..
بدت ع وجوه الحضور ملامح الاسف والحزن وهما يسمعوا فيها..
نفيسه:في وضع زي هدا لازم كل حد يدير اللي يقدر عليه بش يساعد وحني حنستخدموا الموهبه اللي عطاهلنا ربي في اللي فيه نفع الناس..حنديروا معرض خيري جديد وفي هلبه ناس مهتمه وحتحضر حيكون في تغطيه اعلاميه سوا كان ع التلفزيون او مواقع التواصل..وشافت لسامي اللي هز راسه ردا عليها..اكيد بتقولوا توا من بيشري ومن بيتبرع..لافي ناس هلبه يهمها الموضوع..تتأثر لما توصلها المعاناة بطريقه مختلفه طريقه تمسهم شخصيا..وبإبتسامه ساخره كملت تقول..ومش حنضحكوا ع بعض في ناس دايرتها جو برستيج يستفيدوا ويفيدوا حني مش خاسرين شي ولارابحين شي الناس المستهدفه اللي بنساعدوهم هما بس الرابحين..
:عندك فكرة معينه في راسك تكون هي الفكرة اللي بنمشوا عليها..
نفيسه بإبتسامه..
/هو اني فكرت في كذا فكره بس اليوم في حد عطاني فكرة احلى من اللي فكرت فيهم..رسامه حتى هي..
وبدي قلب عبد القيوم يرف وهو يشوف ويسمع في نفيسه..
وسامي يشوفله بطرف بعينه..
ونفيسه مكمله تقول..
/قالتلي اكثر من حتأثر في نفسياتهم الحرب الاطفال..وفعلا لأنهم مش واعيين بما فيه الكفايه الخوف والذعر اللي عندهم حيكون اكبر واثره النفسي يكبر معاهم..في اطفال ماتوا في الحرب واكيد غيرهم لما يسمع عنهم حيتخيل نفسه يلقى نفس المصير..وقالتلي في اللي تيتموا وفقدوا ابائهم في جبهات القتال ولا بالقذائف العشوائيه او رصاص القناصه..في اطفال ابائهم ماتوا قدامهم...وغير هكي النازحين يللي ممكن كانوا في حال مرتاح وبين يوم وليله لقوا رواحهم في وضع سيء..يعني بالمجمل اول ضحايا الحرب هما الاطفال..
:معناها الفكرة عن معاناة الاطفال في الحرب..
نفيسه بإبتسامه:هي عطتني فكرة برا الصندوق..قالت ان نقيض الحرب السلام..واكبر احلام الاطفال في الوقت هدا هو  ان تنتهي الحرب ويرجعوا يعيشوا حياتهم الطبيعيه..الفكرة حوالين الشي هدا..يعني كأنكم حتخشوا احلام الاطفال تتفرجوا عليها وترسموها..
:الحق فكرة حلوة وفيها تحدي..
نفيسه اشرت ع البنت اللي تكلمت وقالت..
/صح هكي حسيتها فيها تحدي..
واحد من الموجودين قال بضحكه..
/سؤال يعني هي بتشارك معانا صاحبة الفكرة؟
تبدلت ملامح وجه عبد القيوم للإمتعاض الشديد وهو يشوفله..
وسامي مبتسم..
نفيسه بضحكه:اكيد هي حتكون من المتطوعين..
هز راسه بإيجاب وهو مبتسم..
وعبد القيوم مازال يشوفله بنفس النظرات..
نفيسه وزعت نظرها عليهم وقالت..
/المعرض حيكون في نص شهر يوليو 17 يوليو والمكان تحدد في *******..استعدوا من توا..
:في حال ماوصلوش فينا..
ضحكوا..
ونفيسه قالت بإبتسامه..
/نتمنى من الله مايجي هداكا اليوم الا والحرب منتهيه ونخلصوا من هالكابوس..
كلهم بأصوات متقطعه قالوا..
"آمين"
☘☘☘☘☘
بعد الاجتماع..
توقعت نفيسه ان عبد القيوم حيلحقها بش يسألها عن طوبى..واللي توقعاته صار..
نفيسه بإبتسامه؛نعم؟
عبد القيوم:هو سؤال..صاحبة الفكرة اللي حكيتي عنها طوبى الواعر صح؟
نفيسه بإبتسامه:صح..
عبد القيوم؛صاحبة اللوحه هي ولا؟
ضحكت نفيسه وهي تمرر في نظرها ع المكان بعدين شافتله وقالت بإبتسامه..
/صاحبة اللوحه اسمها قاصرة الطرف هدا اللي نعرفه..
هز راسه بإبتسامه بعدين قال..
/تمام نستأذن..
ولف ومشي بإتجاه مكتب الموظف..
وهي مشت بإتجاه مكتبها تضحك..
🍃🍃🍃🍃
وفي نفس الوقت اللي دار فيه الاجتماع...
روحت طوبى للحوش..
نزلت من سيارتها ونزلت معاها اكياس فيهم قضيه وضروريات للحوش وتوجهت طول لباب الكوجينه..
🍃خشت..وحطت الاكياس ع الطاوله..
شويه سمعت صوت الجارة الحشريه رقيه..
عقدت حواجبها وسيبت اللي في يدها ومشت طلعت من الكوجينه بإتجاه الصاله..
وصلت لما سمعت رقية تقول.
"خديجه كانت تلقح ع طوبى"
خشت طوبى وهي تقول..
/السلام عليكم..
ردوا عليها السلام..
مشت لرقيه سلمت وعيدت عليها..بعدين ولت وقفت فم الصاله وقالت..
/ايه كملي خالتي رقيه شن تلقح خديجه..
شافت رقيه لمطيره وفردوس..
مطيره:فوتي مادوريش قطاف زايد..
طوبى:معليشي نبي نسمعه..
رقيه:والله يابنتي اني نحسابكم سمعتوا من سميره..الدوة صارت نهار رابع يوم العيد مشينا اني والجارات لحوش شنيبه  بش نعزوها ونعيدوا ع ضرتها..شوي في الدوة هكي اني نشدت ع سميره كنة عيت شنيبه شن دايرة مع ضرتها..بدت خديجه تلقح وتقول سميرة مراة عاقله وين راجلها قال بنتزوج هي اللي ساعداته مادارتش العار وامها كملت معاها تقول..نجمة عندها حظ في الكناين..
مطيره؛طيح سعدها ومزالها الكناين اللي كانوا عندها هي غيرها تمناهم تمني..سوا عيشه الله يرحمها ولابنات خوتي..
فردوس:هما اللي ماعندهمش بخوت اللي طاحوا فيها وفي اولادها..
وطوبى تسمع بصمت..
رقيه؛خل نكملكم سميره مابردتهاش ردت عليهم وقالت..حتى مغليه بنت اصول وين قاللها راجلها بناخد عليك قالتله اللي يريحك ديره..
ضحكوا مطيره وفردوس من جدهم..
وطوبى كانت مبتسمه بنصر..
رقيه بضحكه:وقالت المراة وين طيح في راجل وعيله باهيين تتحمل ع خاطرهم  حتى الضره ونجمه وولادها الكنة عندهم تعيش بقدرها عافنه ولاباهيه..
فردوس بضحكه:الله عليها الله..
مطيره بضحكه:نعرفها سميرة تعطيهالك في جنابك بهداوة تخليك ماتقدريش تردي عليها..
رقيه:ماقد اللفعه خديجه كان هي..
طوبى:خديجه هادي كان تخلي الناس في حالها وتلهى بصغارها اسلملها..
قالت كلامها هدا وطلعت من حداهم وخلت رقيه تفكر في قصدها منه..
🍃🍃🍃🍃🍃
"مش عارفه خيره مولي دراه كبد شكلي بنفوته من الاول مش خاش راسي درته بش نقهر الحيوان مالك بس"
راما؛ احسن ماديري مش ليك بكل ياسومه
"سحيقه مافيهم واحد يستاهل..خليني منهم وقوليلي مافيش اخبار عن الكلبه هديكا"
راما:معاش نندري عليها بكل.
"نبي نعرف قاعدين مع بعض ولافاتاته"
راما:شكلك تبي تولي..
"الحق مستاحشاته وقريب نموت عليه سمعت من البنات انه تغير هلبه ولى مستقيم وحتى صلاته في الجامع"
راما:مفعول مروة هدا..
"بلعاني انتي!؟"
راما:مش قصدي..بس هدا الحق مروة أثرت فيه..عاد اني وياك نعرفوها مروة كويس..
"باهي خلاص معاش تجيبي سيريتها حرقتيلي دمي"
ابتسمت راما تهكما..
"باهي يابلوة قولي ماخاطركش في طلعه؟"
راما:لالا مانقدرش عمي دراه الكبد محاصرني حتى حوش جدي ممنوع..
"مابعدك من هالعيله المتخلفه"
راما؛الصبر وخلاص..
🍃🍃🍃🍃🍃
"والله ماعارفه كيف بندير في الامتحانات"
مروة بضحكه:نتخيل فيك مقعمزه ع المقعد.
صفاء بإنزعاج؛حيوانه..شافت لبطنها كانت تاله حاطه وذنها عليها..
/تي غير شن بتسمعي بس..حي!
تاله بدهشه:تحرك ولا!؟.
صفاء بضحكه؛ايه..
مروة:الله!..
وجتها تجري حطت يدها ع بطنها..
ع جية فايزة بسفرة جيلاطي"أيسكريم" شافتهم وقالت..
/خلوا اختكم..
وحطت السفره وقعمزت..
مروة بضحكه:تحرك تحرك!
فايزة:حقه!!! وزحفت ع ركابها لين وصلت في صفاء وحطت يدها معاهم وصفاء تضحك عليهم..
🍃🍃🍃🍃
مقعمزين في راس الشارع..
معين ومالك وزوز تانيين من صحابهم..
:فوت ياراجل وخليك مع امك خيرلك..
مالك؛الرسول جاه واحد يبي يمشي يجاهد قال كان امك حية اقعد حداها..
:مالك العفاسي..
ضحكوا..
مالك:من اليوم وبرا غادي معاش في قعاد في قهوتي بلاش واللي عليك كله من لما فتحت تجيبهولي..
معين:رديته فاجر..
ضحكوا..
مالك؛قالولي غير الصحبه متاعك لكن ماهنتوش عليا..
:قوللهم بناخد بيدهم للهدايه يااعوان الشيطان..
مالك:انتم اللي بتاخدوا بيدي وتردوني وين ماكنت..
معين:نصيحه تعال معاي نختصر عليك الطريق ونرفعك للجنه طول..
:من الاخير..
مالك؛جنة شني!؟ راهم خوت يتقاتلوا في بعضهم!؟
معين؛من مات دون ماله وعرضه ياصاحبي شهيد إن شاء الله..
:والله مارابحها واحد واخرهااللي صارت ع خاطرهم الحرب يتحالفوا ويولوا سمن ع عسل زي مايقولوا
ماباش يعلق معين واحتفظ بصمته..
وهما سكتوا معاه وكل واحد عقله راح في مكان..
ع جية واحد من جماعتهم بسيارته وهو مشغل اغنيه..
مالك وين سمعها غمض عيونه وبدي يغني..
/جاته جلطه جاته جلطه..فتح عيونه وقال لصاحبه..عليها علي..
علا صاحبه الصوت..
وهو ناض يرقص..
معين قعد يتفرج عليه وهو مبتسم..
وصحابه وهما مقعمزين يصفقوا ويغنوا وشاشين معاه..
معين؛كيف صار ياشيخ مالك!؟
ومالك يرقص وداير روحه مايسمعش فيه..
ابتسم معين بأسف وهو يشوف لصاحبه حاس بيه شايل ع قلبه هموم ياهموم..لكن كاتمها كعادته..
مالك قليل مايشكي..يكره الشكوى ويحب يكون كتوم..
وهدا اللي مخوف معين عليه..ومخليه يبعد عن حياته بش مايزيداش هم جديد يكسرماقعد ثابت فيه..
🍃🍃🍃🍃
وفي من معاش قعدله هم في الدنيا غير هم الآخره..
نضال..اللي قاعد يبان عليه التغيير في اسلوبه وشكل حياته..
نضال بدي يدور ع رضا الله في كل شي يديره..
بدي يحس بمراقبة الله ليه في كل تصرف وكلمه..
واهم شي انه فاهم هالمراقبه مراقبه رحمة وحب...
ومع هدا قاعد هو نفسه نضال خفيف الظل المشاغب الحيوي..
القرب من الله زاده بهجه ولين..وهادي هي حقيقة القرب من رب العالمين..يحيي البني آدم يخليه مصدر راحه وفرح لغيره يحببهم فيه..
مايخليشي جامد منفر وبغيض غليظ القلب..🍃
🍃🍃🍃🍃🍃
واقفه تستنى في صاحبتها وهي تراقب فيه..
كان مع صاحبه ومعاهم ولد مدينته اللي كان صديق قديم ليه يهدرزوا مع بعض..
ماملتش وهي تشوفله..تمنت عيونها مايرمشوش بش مايفوتها شي..
شويه ومشوا هو وصاحبه بيطلعوا.
تبعاته بعيونها..تشوفله كيف لبس نظاراته وهو يضحك..واختفي من قدام عيونها..
بدت ع وجهها ملامح الضيق..
ع جية صاحبتها وهي تقول..
/خيرك لوفا؟
سلافه بضيق..
/مافي شي يللا..ومشت بإتجاه المخرج وميار مشت معاها..
🍃🍃🍃🍃🍃
"ماقدرت احكي معه ولا كلمه وهو ماكان شايفني بالمرة"
لبانه بتعاطف:طبيعي حبيبتي يعني هو من وين بدوا يعرف انك بتحبيه..
سلافه بحزن:مو هيك..انا بدي ياه يشوفني إلي..عم تفهمي عليي..
لبانه؛فهمانه والله..بس هالشي بيبلش بالتعود يعني انتوا هلأ رح تلتقوا كتير وبعد يتعود عليكي اكيد رح تصير شغلات حلوة بعدين..
سلافه بأمل:هيك قولتك؟
لبانه بحب:يعني انتي متخيله انه في رجال بيعرفك ومابيحبك لك انتي ياما دوبتي قلوب.
سلافه بضحكه؛حاج تبالغي.
لبانه؛بالغ بشو بدك عدلك ياهون!!؟..
ضحكت سلافه بعدين قالت..
/ايه ذكرتيني..ميار قالت ان في وحده بتكون رفيقة عمتها عندها بوتيك وبدها وحده تشتغل فيه تبيع وهيك..شو رايك؟
لبانه بقلق..
/مين عمتها لتكون ام هديك!؟
سلافه:ايه بس القصه ماإلها علاقه فيها..مو ميار عم دورلنا ع شغل حكت لأمها  وخالة جميله صارت دور كمان اكيد حكت قدام بنت حماها وهي حبت تساعد..
لبانه سكتت وهي تفكر بقلق..
سلافه؛عماتها لميار حبابات مو مثل بناتن الحيايا..
لبانه بضيق:مافي خيار تاني..دورنا كتير ومالقينا شي مناسب بروح بشوفن وخلص..
سلافه:واذا ماارتحتي او شفتي شي ماعجبك بتتركي فورا الله بيرزق..
تنهدت لبانه وهي تفكر بضيق وقلق..
🍃وشن اللي جابرك ع المر..الأمر منه🍃
🍃🍃🍃🍃🍃
وهدا اللي جابر صابرين تتحمل شوفة ياسمين قريبة ع رضا وهي بعيده عنه...
🍃رضا اليوم طلع من المستشفى..
وكان في استقباله خطيبته واهلها جنب فاتن وامينه..
هو ع نار قعد معاهم يراجي في طلتها واكيد ظاهره يبين العكس بش مايلفتش نظر اللي ماتوفته الفايته..مختار..
وتخش عليهم صابرين للصالون..
صابرين:مساء الخير..
ومشت لام ياسمين سلمت عليها..وبعدين سلمت ع ياسمين..
وسلم ع اب ياسمين بالكلام..
بعدين وجهت نظرها لرضا وقالت بإبتسامه.
/حمد لله ع السلامه رضوض..شد حيلك بش نفرحوا بيكم..
هو قال:ان شاء الله..
مشت صابرين قعمزت جنب فاتن وهي تسمع في ياسمين تقول..
/مايصير شي لوتاجل العرس لأخر الصيف..
مختار:اخر الصيف!
اب ياسمين:حالته تتحسن تماما هداكا الوقت..
شاف مختار لرضا وقالت..
/انت شن رايك؟
رضا:اللي يريح ياسمين..
صابرين قلبت عيونها ومطت شفايفها بملل.
ياسمين بإبتسامه:واني نبي راحتك..
رضا ابتسم وهو يشوفلها..
وصابرين تشوفله وهي تقول في نفسها..
"زيد بلحق و تبوسم"
فاتن كانت تسمع فيهم وهي مضايقه..واجعتها ياسمين اللي كانت مستغفله وعايشه في الوهم..لهذا ماشاركتش في الحديث وقعدت محتفظه بصمتها..
في هاللحظه يخش عليهم ايهم وهو يقول..
/مساء الخير..ومشي لرضا طول مد يده وصافحه وهو يقول..حمد لله ع سلامتك..
رضا:الله يسلمك..
التفت ايهم شاف لصابرين بإبتسامه بعدين مشي قعمز جنبها..
شافله رضا ومن داخله كان يسب فيه ويلعن..
ايهم قرب لوذن صابرين وقال.
/شن جو ياهرابه..
تباعدت عنه شويه وهي مبتسمه بالغصب..
وايهم يشوفلها من فوق لتحت بعدين غير نظره لرضا..
لقاه يشوفله..
ناضت صابرين وهي تقول..
/خل نمشي نشوف العشي واتي ولامازال..
ومشت طلعت من حداهم..
ناض ايهم وشاف لمختار وهو يقول..
/ممكن؟
هز مختار راسه بالموافقه..
مشي ايهم لحق صابرين ومختار معاه بعيونه بعدين غير نظره لرضا لقاه يشوف للباب..
مختار:ياسمين خودي خطيبك واطلعوا للحديقه..
رضا:لا معليشي حاس روحي تاعب وناعس نبي نمشي لداري..
ياسمين:عنده حق طلعة المستشفى مجربتها..
بوها قال:خود راحتك ولدي..
مختار:من رايي تتعشا بعدين ترتاح..
رضا:ماعنديش نيه توا غير في النوم..
مختار هز راسه وقال..
/براحتك..
ناض رضا بالقيلا وياسمين ناضت معاه تساعد فيه..
رضا:خليك مرتاحه..
ياسمين بإبتسامه؛اني هكي مرتاحه..
ابتسم رضا ابتسامه يخفي بيها ضيقه..
ياسمين طيبه قلب ماتستاهلش اللي قاعد يصير فيها..
ضميره كان واجعه..بس وجع العشق كان اقوى منه..
🍃وصابرين في حديقه الفيلا واقفه تسمع في ايهم اللي كانت ناويه تنهيها معاه بدون تردد..
ايهم: سوء الفهم اللي صارمش مستاهل منك الزعل هدا كله..
صابرين:مش زعل ياأيهم..أيهم اني طول الفتره اللي فاتت كنت نفكر في علاقتي بيك...للأسف مش حنقدروا نتفقوا..
هو بصدمه؛صابرين اهدي شويه خيرك! مش لهالدرجه!
صابرين:ماقدرتش ننجسم معاك ماحسيتش ان في بيني وبينك شي مشترك..نحس فيك بعيد عليا هلبه..
ضحك بعدم استيعاب وهو يقول..
/ماليناش هلبه مسكرين شهر خطوبه ماحلك عرفتيني!..
صابرين:بالعكس كل شي يبان من البدايه..
ايهم هدا نفسه وقال بإبتسامه..
/انتي شكلك قاعده واخده موقف وعندك حق..مش مشكله خودي وقتك لين تنسي وترضي..
تنهدت وقالت..
/ايهم علاش ماتبيش تفهم عليا..اني معاش نبي..
عقد حواجبه بغضب وقال..
/مش لعب هو..ماخطبتكش بش نسيبك..
سكتت صابرين وهي تشوفله بحده بعدين قالت..
/اني كنت صاحبة مختار.
تبدلت ملامح وجهه للصدمه بعد اللي سمعه..
صابرين؛هدا علاش رضا مش عاجباته علاقتي بيك مايبيكش تكون مخدوع..
كل حواسه شبه عطلت..حس روحه زي الريشه في مهب الريح..
صابرين:ياريت ننهوها بهدوء وخليها تجي منا حني الزوز احسن..
غير نظره ومشي لسيارته..ركبها وطلع من الفيلا..
زفرت صابرين ومشت خشت داخل..
🍃🍃🍃🍃🍃
الساعه 2:00ليلا..
صابرين في دارها مقعمزه ع سريرها تتكلم بالتليفون..
/ماشاءالله ماشاء الله وخشت معاك الدار!!
"بجديات صابرين البنت واجعتني ماتستاهلش"
صابرين:ياريتك فكرت في الحاجه هادي من الاول..
"تو بالله من خلاني ندير هكي!؟"
صابرين:انت ماصدقت..
"تعرفي لونوصل فيك نعطيك  كف من الصح للصح"
صابرين:اني بس اللي نعطي في الكفوف ولانسيت..
ضحك وقال..
"لفعه"
ضحكت بعدين قالت..
/تتوقع ايهم يصرف نظر عني ويفسخ..
"كان مادارهاش وقتها حنضطر نتصرف معاه بطريقتي"
صابرين:قتل لا بالله عليك..
"قتل شني..فوتي مش شورك"
تنهدت وقالت..
/خايفه..
"ماتخافي من شي معاي."
صابرين؛اني خايفه عليك.
"صابرين..اني يانعيش معاك يانموت معاك"
ابتسمت وقالت..
/نحبك..
"شني!!؟ عاوديها عاودي ماسمعتهاش كويس"
صابرين بضحكه: طلعت بعفويه معاش نقدر نعاودها..
"سكري سكري خل نكلم ياسمين اللي تقولي فيها كل خمسه دقايق".
قعدت تضحك..
"ااه من ضحكتك واللي ديريلي فيه.."
صابرين بإبتسامه؛باهي خلاص ارقد نعست..
"تمام ياروحي..تصبحي ع خير"
صابرين بإبتسامه:وانت من اهله..
نهت المكالمه وضمت التليفون وارمت ع المخده وهي مبتسمه بحب..
🍃وهو بعد نهت المكالمه فتح اللاب توب متاعه وحط ع صورها وقعد يتأمل فيهم...
☘☘☘☘☘
وعبد القيوم واقف قدام اللوحه ..
وبين عيونه شكلها الخجول..العيون في الارض..الوجه بلون حبات الرمان..والاصابع متشابكه في بعض..
ابتسم ومسح بيده ع شعره للخلف وهو يتخيل فيها ترسم فيه..قرب للوحه وركز في تفاصيلها..مركزه في ادق تفاصيل ملامحه وراسمتهم...
حط يده عليها وقعد يتحسس فيها وهو يقول..
انتي العقل وانتي هى الطفوله
ملامح فيك مرسومه خجوله
........انتي هى حياتى.........
وانتى الروح  وانتى  كل ذاتى
.وانتى هي من فيها نجاتى
. ومافى شى ايجى بسهوله...
تنهد من قلبه وقال..
/ومافي شي يجي بسهوله...
🍃🍃🍃🍃🍃
وهي في صاله حوشها..
جنبها الصلايه مطويه محطوط عليها المصحف..
وهي راقده جنب جنة اللي قامت ليلتها..
طوبى:مانقولكش  قداش تحشمت..اول مرة نتحشم هكي في حياتي..حسيت روحي بندوخ تصدقي..
وجنه حاطه يدها في فمها وتشوف لأمها وهي تسمع فيها..
طوبى:لكن تعرفي ماما..من لما روحت واني نفكر في الموقف مش قادره نحوله من بالي..ضحكت وقالت..اول مرة نركز ان نبره صوته حلوة..فيها رجوله بزياده..وطريقته في الكلام مميزة الفصحى غالبه عليه..كان لابس رمادي..خاطري نعرف علاش يحب الالوان الغامقه رغم ان الابيض والاخضر يطلعوا عليه هلبه..
طلعت من جنه عبارة بلغتها لذيذه..
حركت طوبى عيونها ليها وقالت..
/ندوي عليه هلبه ولا!؟ من بكري واني ندوي..شافتلها شويه بعدين قالت..شن معناه هدا جنونتي!؟
حطت جنه يدها ع فم امها..باست طوبى يدها بعدين قالت..
/حي ع امك ياجنونتي لو طلع اللي في بالها صح!..
غمضت عيونها وخشت في حضن بنتها..
وجنه حطت يدها ع راسها..
طوبى :البنت سر مامتها حبيبتي ردي بالك طلعي سري باهي.
خبطت جنه ع راس امها..وطوبى ضحكت بعدبن باستها من رقبتها..
🍀🍀🍀🍀
بعد مرور ثلاثه ايام...
17يونيو..سنة2019..
يوم الإثنين...
الساعه 7:00مساءا..
مقعمز ورا مكتبه موجه نظره ليهم بصمت بعد ماسمع منهم..
طال صمته لثواني بعدين قال..
/ok..كل شي ممكن يصير بالإجبار الا الزواج ولو كنتوا مش مرتاحين مع بعض..خلاص..
ايهم بجديه ورسميه:ان شاء الله تلقى اللي يستاهلها...تنسجم معاه وهو يتقبلها بماضيها.
عقد مختار حواجبه بعدم فهم..
صابرين؛اني وانت ان شاء الله..
ناض ايهم بدون مايشوفلها وقال..
/معاش في وقت ع موعد الطيارة..نستأذن..
مختار:توصل بالسلامه..
هز ايهم راسه ومشي طلع من حداهم..
غير مختار نظره عنه لصابرين وقال..
/شن صار بيناتكم بالزبط؟
صابرين:نتيجة صراحتي معاه حكيتله عن الماضي متاعي حضرته ماتقبلاش..
مختار:ماضي شني!!؟
صابرين:اكيد ماحكيتش ع اللي في بالك..
ركز بالنظر في عيونها..
وهي قعدت تشوفله بثبات ظاهر عكس اللي فداخلها..
رفع حواجبها وتنهد بعدين نزلهم وقال..
/تمام..بري..
ناضت صابرين ومشت طلعت من المكتب..
غير نظره عنها للأرفف المكتبه متاعه..
ركز ع ساعة رمليه كانت محطوطه افقيا...
"الخيانه في توافه الامور تجر وراها الخيانة العظمى..وللفرص رصيد حيجيها وقت وتم"
ناض من مكانه ومشي بإتجاه الساعه الرمليه..
حط ايديه ورا ظهره وقعد يتفرج عليها ويفكر...
🍃🍃🍃🍃🍃
"هدا اولك يوم..شفتي البوتيك وعرفتي شويه من زباينه وعرفتي النظام متاعنا..حنجربك اسبوع لو شفت منك شي ماعجبنيش تتوكلي من غير ماتاخدي قرش واحد"
هزت لبانه راسها وقالت..
/تمام..
صاحبة البوتيك..
/نعاود ونقولك الامانه عندي فوق كل شي ردي بالك..
لبانه:إن شاء الله بكون عند حسن ظنك..
اشرتلها بيدها وقالت..
/بري..
ومشت وخلتها..
خدت لبانه نفس..بعدين لفت ومشت للباب..
☘طلعت وهي دور في سيارة بوها اللي جايه بيها سلافه مالقتهاش استغربت.
قعدت تمشي وهي دور لين قربت من شجره..
يطلع من وراها معز وهو يقول..
/بخ...
البنت قريب خشت في عقلها وطلعت..
حطت ايديها ع وجهها وعيطت وهي تقول..
/ياماما..ياماما..
معز بقلق..
/لبانه..اني معز..لبونتي..
نزلت ايديها وشافاته..حطت ايديها ع صدرها وغمضت عيونها وهي تاخد في انفاسها..
معز بضحكه:اسف جيت بنفاجئك بس.
فتحت عيونها وقالت بعصبيه..
/قول جيت تفجعني..شو هالحركات المولدنه هي!؟
هو بإبتسامه:قلنا اسف..وبعدين انتي جبرتيني ندير هكي..
لبانه بضيق:وين سلافه..
معز:خديت اذنها بش نكلمك..
لبانه:وينها!؟
معز:مش حنقولك لين تعطيني فرصه وتسمعيني..
لبانه تنهدت بضيق وقالت..
/تركني بحالي ارجوك لاانا ولااهلي حمل مشاكل نحنا هون ناس غربا..عندنا مثل بيقول ياغريب كون اديب..مشان هيك اني بدي بعد عن المشاكل وعن اي حدا بدوا يجيني من وراه وجع راس..ارجوك ارجوك مشان الله..اتركني بحالي..
ومشت عنه وخلاته ودموعها ينزلوا..
وهو قعد معاها بنظراته اللي كلها ألم وغضب في نفس الوقت وقال في نفسه..
"كله من تحت راس فاطمه تو نعرف بروحي شن دايرتلها الكلبه"
ومشي لحق لبانه بيشوفها وين مشت..
لقاها كيف ركبت للسيارة مع اختها..وتباعدت السيارة لين اختفت من قدام عيونه..
🍃🍃🍃🍃🍃
تاني يوم
18يونيو..سنة2019..
الساعه 10:00صباحا..
طلعت من دارها وهي تلبس في شنطتها..
وصلت في باب الصالون وقالت..
/هاني طالعه عمتي ماتبي شي؟
كيف جت نجمه بترد عليها تفاجئت لما شافتها لابسه عبايه ووشاح..هزت راسها بعدين بدت عليها..
/لاياحنة سلميتكم بس..
ابتسام:باهي بالسلامه توا..
نجمه؛بالسلامه..
مشت ابتسام..وبعد بشويه خشت عواطف وهي تقول..
/اللي شفته صح ولا ابتسام لابسه عبايه ووشاح!
نجمه:ايه ياحنه لابسه عبايه ووشاح..
عواطف بتعجب؛ياهادي ياربي..!
🍃وكانت ردة الفعل نفسها لعبد الفتاح لما شافها بالحجاب..
عبد الفتاح:الله يبارك..
ابتسمت وقالت؛هكي خير ولا؟
عبد الفتاح؛من غير سؤال..هيا اطلعي..
مشت وهو وراها..طلعوا من الحوش..
تحت عيون خديجه اللي كانت واقفه في روشن شقتها..
/مانكش ساهله ياإبتسام بكل صحة ليك..
☘مالا شنو..الدنيا مصالح..وفي ناس بش تخدم مصلحتها مستعده دير اي شي☘
🍃بس اللي ناويين عليه رضا وصابرين مش بس ضد مصالحهم..ضد وجودهم في الحياة..
في الكوجينه..
ملتمين يهدرزوا وهما يسمعوا في برنامج امينه المفضل..
كانوا يعلقوا ع المذيع وامينه دافع عليه ببساله..
امينه:اسكت انت احسن ماافضحك..
هو بإبتسامة تعجب..
/شن بتفضحي!!؟
صابرين بضحكه:حكاية ولد البلاد ورسايله..
ضحكت فاتن..
صابرين:اسلوبه العنيف هو اللي فضحه..
هو بإبتسامه حب..
/طلعتي حافظتيني صم..
ابتسمت بخجل..
وفاتن وامينه يمرروا في نظراتهم عليهم بإبتسامه..
اختفت في لحظه لما سمعوا باب الفيلا انفتح وتسكر..
صارت ربكه..ورضا قال لصابرين..
/خليك عاديه..
لحظات وخش عليهم وفي يده باقة ورد..
كلهم ركزوا بالنظر ع نوع الورد..
وهو مرر نظره عليهم وقال بإبتسامه واسعه..
/اووو لمة فيها حبايب قلبي كلهم..
صابرين نزلت عيونها لطاسه العصير اللي قدامها..
ورضا يشوف لمختار غادي..
فاتن؛أوركيد!؟
قدم للطاوله وقال..
/النوع اللي تحبيه..
طلعه من الباقه وحطه في المزهريه..
فاتن؛لكن مش باللون اللي نحبه..
وخر ومد غلاف الباقه لأمينه خداته وهي متوتره..
مختار:عارف بس اني خديته لأني بنمشي نحضر جنازه خديت زوز وحده للجنازة ووحده للحوش..
صابرين قامت عيونها وشافت للورد بعدين شافت لرضا..
رضا:جنازة مني؟.
مختار:قريب رجل الاعمال ليو فرانك..
رضا هز راسه بصمت..
فاتن:مالقيتش غيره تجيبه هني!؟
مختار:هو يرمز لأكثر من شي مش الموت بس..في من شعوب يفسروا شوفتها في الحلم ع انها حفاظ ع الحب والرومانسيه..
فاتن؛وانت شفته في الحلم؟
ابتسم ابتسامه ساحره..
حط يده في جيابه وطلع منها علبة مجوهرات صغيره وهو يقول..
/وشفتك حتى انتي..
فتحها وركع ع ركبته وقال وهو يشوف لعيونها..
"Merry me"

#الأوركيد_الأبيض
#طوبى

.....يتبع.....