طوبى ☕شارع القهوة☕

الجزء الثاني والستين

#طوبى "جنة طوبى"
#جمان_فريد
#الجزء_الثاني_والستين"غضب خوف ندم"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🍃 ثمّة لحظاتٌ تكونُ فيها الروحُ جاثيةً على ركبتَيها مهما كان وضعُ الجسد.🍃
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
يوم الاثنين
19 من شهر مارس..سنة 2018..
الساعه 7:55صباحا..
كان اول يوم دوام لنسرين بعد الاجازه..
الابلات تلقوها بالترحيب والسؤال عن احوالها وهي كانت تجاوب ع القد..وتجامل فيهم مجامله..
كانت تبي تغير جو و تطلع من حالة الكآبه وترجع تنطلق في الحياة وتعيشها..
مش سهل في البدايه بس مع الوقت حيسهل اكيد وحتولي احسن...
🍃بس في من مكتوب عليهم فالحياة يعافروا ويشقوا ويتعبوا ديما ومايكونش ليهم نصيب كبير من الفرح في حياتهم..
حتى لو فرحوا فرحتهم تكون بغصه...
🍃درست اريج قدام عمارة الابله تراجي فيها..
طلعت الابله ومعاها بنت صغيره..
وقفت ع روشن اريج وقالت..
السلام عليكم اروجه صباح الخير..
اريج؛وعليكم السلام..صباح الورد..
:بنطلب منك طلب اروجه..هادي بنت جارتي تقرا في مدرسه قريبه ع مدرستي..تجي وراها ع طول اليوم امها مريضه وماقدرتش توصلها عادي توصليها في طريقك؟
اريج بإبتسامه؛ماعندكش مشكله هي اركبوا..
:جزاك الله خيرا ياروجه..هي اركبي بنتي اركبي..
🍃وركبوا الابله وبنت جارتها السياره..
ووصلت اريج الأبله هي الاولى لمدرستها..بعدين البنت..
اريج؛القدام مازال؟
؛هياهيا..
شافتها اريج وقالت؛تمام...
🍃"هيا ياطالبات هيا طابور"
هادي نسرين دور ع الساحه وتنادي ع الطالبات بش يمشوا لطوابيرهم..
وين قربت من بوابة المدرسه..
شافت برا بنظرة عابره..بس بعدين ثبتت عيونها..
لما شافت سيارة اريج مدرسه قدام المدرسه..
قدمت كم خطوه وهي مركزه في اللي تسوق وتأكدت انها اريج..
بعدين شافت البنيه نازله من سيارتها وخاشه للمدرسه..
واريج تحركت طول بسيارتها..
تبعت نسرين البنت بعيونها وهي مستغربه بعدين نادت عليها..
ياطالبه..
البنت ماركزتش..
نادتها مرة تانيه..
انتي ياطالبه..ياطالبه اللي لابسه دجاكه ورديه..
البنت وقفت وشبحتلها..
نسرين؛تعالي..
مشتلها الطالبه..وقفت قدامها وقالت..
نعم باأبله..
نسرين؛قريبتك اللي جاباتك؟
؛لالا ياأبله هادي سواقه توصل في جارتنا للمدرسه السلفيه اللي قدامنا..واشرتلها بيدها ع الجهة اللي توصل للمدرسه..
رفعت نسرين حواجبها وهي متفاجئه بعدين قالت..
وتوصل فيك حتى انتي؟
:لالا اني امي تجيب فيا غير اليوم مريضه وجارتنا خلتني نمشي معاها..
نسرين هزت راسها وقالت:باهي بري..
مشت الطالبه..
ونسرين وراها وهي متسائله..
معقوله نضال راضي لمرته تخدم هالخدمه !؟
عصبت من خوها اللي فكرت انه مقصر معاها ومايصرفش عليها ومخليها تخدم زي هادي حسب وجهة نظرها..
🍃واريج وهي في طريقها للجامعه..
جاها اتصال من نضال..
وقفت السيارة ع تركينه..
بعدين ردت عليه..
اريج:صباح الورد..
"ياصباح الفل وصلتي"
اريج؛قريب نوصل..
"تمام..بتبدي اليوم خدمه ولا"
اريج؛ايه دوام مسائي زي قبل..
"خلاص جايك بعد تكملي بش نروح بيك"
اريج:مش جاي للجامعه اليوم؟
"لا اليوم زي ماتعرفي ماعنديش محاضرات وحمزة عنده علاج طبيعي بنرفعه"
اريج؛باهي ربي يعاونك حبيبي..
"تسلمي عمري..فستق ماتبي شي"
اريج بإبتسامه؛سلامتك بس بس..
"تمام..سلام فستقتي"
وهي مبتسمه قالت؛سلام..
وسكرت منه بعدين تنهدت بحب وقالت..
نجك ليا..
ضحكت ضحكه خفيفه وحطت تليفونها جنبها..وتحركت بالسيارة مكمله طريقها للجامعه...
🍃🍃🍃🍃🍃
الساعه 10:00صباحا..
في فصل من فصول مدرسة اجيال..
كان في حصة تربيه اسلاميه..
الابله متاع الماده اسمها زينب..من المقربات لطوبى وهي اللي تساعد فيها في الخفاء والعلن ع ادارة المدرسه..
زينب:هيا ياطالبات افتحوا كتاباتكم ع السورة..
ومشت طول لتليفونها اللي كان ع الطاوله...
حطت ع السورة اللي بياخدوها..
بعدين وصلاته بسبيكر عندها..
مررت نظرها ع الطالبات وقالت.
كلكم فتحتوا عليها..
هما بأصوات متقطعه..
"ايه..فتحنا عليها"
هي شافت الساعه في تليفونها دعت في قلبها..
"ياالله اعنها ولاتعن عليها وانصرها ولاتنصر عليها"
وشغلت السورة...و صدح صوت القارئ في الفصل..
وهي والطالبات يسمعوا فيه..ومركزات مع الكتاب...
🍃وفي مكتب الادارة..
اللي مقعمزة فيه طوبى..
وهي لابسه في سبابتها خاتم التسبيح..
وتضغط بإبهامها ع زره..
وعيونها مغمضات..تستشعر وتعيش في كل كلمه قاعده تردد فيها..
"لاحول ولاقوة الا بالله"
كانت عارفه روحها ضعيفه..وفي حاله ماتسمحلهاش تقاوم وتواجه..
بس كذلك كانت عارفه روحها انها ملزمه تواجه وتقاوم..
ملزمه تقعد تقعد واقفه ع حتى لو كانت في داخلها طايحه ع ركابها..
مش ع خاطرها هي..ع خاطر غيرها اللي تحبهم وماتبيش تخذلهم..
فتحت عيونها لما سمعت صوت الباب دق..
شافت للخاتم..لقت روحها واصله في العدد ل 200...
حولت الخاتم وحطاته ع الطاوله قدامها..
وخدت نفس عميق...
دق الباب مرة تانيه..
زفرت..ورسمت ع وجهها ملامح الحزم والقوة المصطنعه وقالت..
خشي..
انفتح الباب وخشت نائبتها..ابله نجوي وهي تقول..
نعم استاذه قالت ابله عاتكه تبيني..
طوبى؛تعالي قعمزي..
مشت نجوى قعمزت مقابلها..
وهي خدت تليفونها وقعدت مركزه عليه وتقول؛الامتحانات الاسبوع الجاي خلاص..
نجوى:ايه مدابينا نكملوا قبل رمضان..
طوبى عقدت حواجبها وهي تشوف للتليفون وقالت؛صعب..بعدين قالت..ابله نجوى ترا شوفي هدا..
ومدتلها التليفون..
نجوى خداته..وقعدت تشوف للشاشه..
بدت ع وجهها ملامح الصدمه..
وطوبى  مركزة عليها..
اللي كانت تشوف فيه نجوى مقطع فيديو تصور في مكتب الادارة..
كانت فيه نجوى مع وحده من الابلات ويتكلموا في مصلحه بيناتهم يبوا يقضوها..
《نجوى:هي تبي اسئلة الامتحان بس انتي لو قدرتي تقنعي الابلات يعطوك تاخدي حقك ع كل وحده..
:ايه يعني الفلوس اللي بناخدهم ع اسئله متاعي بروحهم وهادم بروحهم..
نجوى؛مالاشنو..وانتي عاد عارفتيها تحب تبحبح وتعطي بزياده وقالت كان بنتي سكرت درجاتها ونجحت بتقدير بتزيد هديه ع اللي عطاته..
:قوليلها ماتخممش تو نجيبهم..
نجوى:تعجبيني..قوليلي شن تسمعي في الابلات يهدرزوا الايام هادي ع الفرخه هاديكا..
:ياوخيتي كان حكوا عليها يشكروا ويحطوا وعندك زهرة متاع الروضه ماترضا فيها كلمه..
نجوى:يشبعوا بيها حني بعد السنه هادي طالعين منها وخل يقعدوا هما وياها..
؛غير من اللي بيقعدلها الكافآت كلهم ولوا معانا في مدرسة اختك هي من بيقعدلها كان اللي من غير شهايد بمكالمه وحده لمكتب المراقبه يطيروهم كلهم وياخدوا في المدرسه اجراء..
نجوى:وتوريني بعدين شن تقدر دير....يللا خلاص نوضي كملي خدمتك وماتنسيش في اقرب وقت تجيبي الاسئله الامتحانات قريب..
:في اقرب وقت يكونوا عندك خليك هانيه..》
وناضت ومشت طلعت من حداها..
وبعد طلعت دارت نجوى مكالمه مع ولية امر طالبه في المدرسه طمنها انها حتلبي طلبها عن قريب وكانت تتملقلها وتتمسحلها بطريقه مثيرة للإستفزاز...
ونجوى وهي تتفرج ع الفيديو كادت تنجلط من الصدمه..
تبلع في ريقها..وحست روحها عرقت من الخوف..
ومعاش قدرت تحرك عيونها لطوبى..
وقف الفيديو..
وطوبى قالت:اني بس نبي نعرف كيف سدرة حطت وحده زيك في مكان حساس زي هدا؟!..شن درتيلها بش خلتيها تحط فيك الثقه وتقربك منها لهالدرجه..
ونجوى ساكته ولاكلمه..وعيونها في التليفون وبس..
طوبى:نتوقع انك قعدتي تتمسكني بش تتمكني وفعلا تمكنتي وخليتها توثق فيك لدرجة انها مادورش وراك شن ماديري..
وفي الفترة الاخيره فتره تعبها استغلتيها احسن استغلال ودرتي مايعجبك..دخلتي للمدرسه ابلات معرفتك انتي من غير مؤهلات..او مؤهلاتهم كانت مزورة لأنهم معارفك..كنتي تاخدي في رشاوي من اولياء الامور بش تدفعي جزء منها للأبلات بش يهتموا بصغارهم اهتمام خاص عن باقي الطلبه..
وولية الامر اللي كنتي تبي تسربيلها اسئلة الامتحان بنتها مستواها الدراسي ضعيف جدا وتعتبر من أسوء الطالبات عندنا وحضرتك تبي تخليها تنجح وتعدي بمعدل درجات عالي ولا؟..مش هكي وبس..الطالبه هادي سبق ونجحت بسرقة الدرجات والزياده وخططتي للموضوع صح بش ماتصيرش شوشرة تلفت انتباه سدره...
ونجوى تسمع وهي حاسه ان قلبها حيوقف في اي لحظه..
طوبى:بعد اللي صار لسدرة كنتي تسعي بش تاخدي مكانها في المدرسه وماحسبتيش حساب ان ممكن في حد من عيلتها يستلم ادارة المدرسة بعدها..اني خربتلك المخطط بس مش هلبه طبعا لأنك بعدين قلتي في عقلك صغيره وقليله خبره وماتقدر دير شي بروحها..
صح اني صغيره..وقليله خبره..بس راحت عن بالك حاجه مهمه ان المكان هدا لأختي اختي اني..يعني حندير المستحيل واللي مايخطرش ع بالك بش نحافظ عليه..بش مايضيعش شقا وتعب اختي سنين طويله ع الفاضي..
ابله نجوى...رأفة مني بيك وشفقه ع عمرك مانبيش نفضحك ونخلي القصه هادي تكبر اكثر وتوصل للجهات المسؤوله..
انتي والابلات اللي مدايرين معاك عصابه اليوم حيكون الاخير ليكم في المدرسه هادي..
هي غيرت عيونها لطوبى وعيونها كانوا مليانات دموع..
لما شافتهم طوبى قلبها وجعها..دموع مراة في عمر امها ماهانوش عليها..
لكن عفست ع قلبها وقست بزياده وهي تقول..
الفيديو هدا عندي غيره ومش معاي اني بس حطيها في بالك الحاجه هادي..
نزلت نجوى عيونها وهي مقهورة ع الاخر..
دق الباب..
طوبى:خشي..
خشت ابله عاتكه وهي تقول؛الابلات اللي تبيهم كلهم برا استاذة..
طوبى:دخليهم...
🍃🍃🍃🍃🍃
ومن المدرسه للجامعه...
كانت الاء مقعمزة بروحها في القاعه قبل لتبدا المحاضرة بربع ساعه..
ولاهيه بتليفونها..
كالعاده في صفحة مهند العامه لأنه دارلها حظر ع الشخصيه..
لقاته منزل اعلان عن برنامج جديد يجي كل عشية ثلاثاء..
بس الصدمه كانت في مشاركه ارام ليه تقديم البرنامج..
اللي غاضها وقهرها أكثر اسم البرنامج..
"قهوة عشيه مع مهند وآرام"
من غيرتها وحسرتها دموعها نزلوا..
كانت حاسه ان في الناس ولعت في قلبها وقاعده تحرق فيه حرق..
شويه ولمت حاجاتها وناضت طلعت من القاعه قبل تبدا المحاضرة لأنها مش حتقدر تحضرها وهي فهالحاله...
🍃🍃🍃🍃🍃
الساعه 11:30صباحا..
في صالة حوش شنيبه..
كانت مغليه مقعمزة تتفرج ع مسلسل بدوي في القناة البدويه ومنسجمه معاه..
بروحها في الحوش مامعاها حد..
تشرب في قهوتها وتاكل في التمر وهي تابع في الاحداث..
شويه يخش عليها نضال وهو يقول..
السلام عليكم..
مغليه وهي تشوفله؛وعليكم السلام..هاه شن حال ولد خوك اليوم..
نضال؛تقدري تقولي خير من قبل..لكن مازال يبي يام مازال..
مغليه؛ربي يشفيه مسكين..
نضال؛امين..كان نقولك شن صار غادي..
هي بتساؤل:شن صار؟
نضال؛مشت معاي نجاة المرة هادي وغادي المركز لقت حناه سابقاته..
رفعت مغليه حاجبها..
وهو كمل يقول؛وولعوا في بعضهم هكي بدون انذار فجأة قعد يلعلعوا ع بعضهم وانتي صفتك وانتي نعتك وانتي حلك وانتي تركك..اني وخرت وخليتهم الحق مالي ومال..
مغليه؛وفي الاخير شن صار؟
نضال؛شفت ام طاهر مروحه وهي تبكي..وجعتني الحق..
مغليه بتهكم؛مايوجعك غالي ياسيدي..هادي وحده شيطانه واني نعرفها ع شني ترسم..
نضال؛حتى اني يام هو بوي فيه طميعه!؟
مغليه؛ياسفتول فلوسه اللي فيهم الطميعه..
رفع يده ونزلها وهو يقول بعدم اقتناع؛إيااح..
ويسمعوا باب الحوش انفتح..
هو قال:مني؟
مغليه:اكيد نسرين روحت..
شويه وخشت عليهم..شافت لنضال بعدم رضا بعدين شافت لأمها وقالت...السلام عليكم.
مغليه؛وعليكم السلام..هاه كيف كان اول يوم خدمه..
نسرين:تمام كويس..شافت لنضال وقالت..ترا شويه نضال..
ومشت طلعت..
مغليه استغربت..
وهو اكثر منها..ناض من غير مايتكلم..
ومشي طلع من الصاله..
شبح يساره لقاها واقفه قدام دارهم..
عقد حواجبه بإستغراب ومشالها..
وصل فيها ووقف عليها وهو يقول؛خيرك شن في؟
هي ربعت ايديها وقالت؛علاقتك بمرتك كويسه؟
هو قال؛الحمد لله..
نسرين؛متأكد؟!
نضال؛شن الاسئله هادي نسرين خشي في الموضوع في طول من غير مقدمات..
نسرين بشي من الحده؛انت عارف ظروفهم ولا؟علاش ماتساعدهاش؟!
نضال بعدم فهم؛انتي شن تقولي؟!
نسرين:نضال..كيف مخلي مرتك تخدم سواقه؟
ضيق عيونه وهو يشوفلها بعدم استيعاب قال..
خير بلاك انتي شن تقولي ضاربتك الشمس ؟!.
نسرين عقدت حواجبها بإستغراب وهي قالت...
قصدك ماتعرفش!؟
نضال بنرفزة؛شن هو اللي مانعرفاش تكلمي كويس يانسرين..
نسرين بتوتر؛اليوم الصبح شفت اريج موصله بنيه تقرا عندنا في المدرسه في الاول نحسابها قريبتها..بس بعدين لما سألتها قالت..
نضال بعصبيه:شن قالت تكلمي الزفت!..
نسرين بقلق وارتباك؛قالت هادي سواقه توصل في جارتنا وصلتني ع طريقها..
هو قعد يشوف لاخته بصدمه وعصبيه بعدين قال..
متأكده يانسرين متأكده..اريج!؟
نسرين "عطيني كيه عطيني دي"
نضال بعصبيه شديده؛تكلمي..
انتفضت وهي تقول بخوف:ايه..هي..
هو قعد يشوفلها وهو يتنفس بعصبيه..
بعدين لف ومشي..
لحقاته وهي تنادي؛غير راجي يانضال..نضال..نضال..
وهو طلع من الحوش وسكر الباب وراه بقوة..
نسرين بضيق وقلق؛عطيني قصة في لساني ياربي..
ع طلعة امها من الصاله وهي تقول؛
خيره خوك؟
غمضت نسرين عيونها وهي تقول في نفسها..
"شن بنقوللها توا.."
🍃وبرا..
نضال ركب سيارته واتصل بأريج..
نادى الخط مرتين بعدين فتحت وهي تقول..
"هاه شن غيرت رايك بتجي"
هو قال؛وينك توا؟
"في الكليه في مكانا المعتاد"
سكر عليها..ولوح التليفون جنبه..
بعدين شغل السيارة وتحرك طول..
🍃وهي في الكليه..
كانت مستغربه في نبرة صوته وتسكيرته الخط في وجهها..
عاودتله ونادى الخط لين فصل وماردش..
هني اريج بدي يتسلل الخوف لقلبها وحست ان في شي حيصير...
🍃🍃🍃🍃🍃
"حاولوا ينكروا اكيد"
زينب؛الحق تمنيتك وصلتي الموضوع لمكتب المراقبه غلط تفوتيه هكي بدون حساب..
طوبى بضيق:مش حمل مشاكل ووجع راس اكثر من هكي اللي يهمني انهم مايقعدوش في مدرسة اختي بس..
شافتلها زينب شويه بعدين قالت..
لأمتى يابنتي؟
تعبوا عيونها دموع وهي تقول..
والله ماني عارفه ياأبله زينب..كيف بنقول كيف بنبرر وردة فعله كيف بتكون..
زينب بأسف؛غلطه كبيره يابنتي غلطه كبيره..
مسحت دموعها وقالت؛عارفه..بس شن بندير قوليلي كيف نتصرف..
زينب بضيق:مانبيش نحلل حرام..بس وضعك صعب وان شاء الله يكون كذب لغرض دفع الشر..انتي قوليله ماكنتس منتبهه لروحي مع المشاكل والخدمه والظروف ماركزتش ع روحي ولما زادت عليا الاعراض كشفت وطلعت حامل..
طوبى ودموعها في عيونها؛كيف بتمشي عليه قوليلي بيقولي كيف ماركزتيش ع روحك ولاحظتي العذر معاش جاك بكل؟!
سكتت زينب ومعاش عرفت شن تقول..
طوبى نزلت راسها وشافت لإيديها وهي تفرك فيهم ببعض..
بعدين رفعت عيونها في زينب وقالت..
لما بيروح بنقوله ويصير اللي يصير خلاص...
هزت زينب راسها وقالت؛المهم يعرف ومهما زعل اخرته يرضى ويفرح بالعيل مش يحب الصغار تو ينسى الزعل فيسع..
طوبى رشفت وهزت راسها وهي تقول..
إن شاء الله...
🍃🍃🍃🍃🍃
"ياريتك جبت معاك المدام ياباش مهندس"
الجالي بإبتسامه مجامله؛ان شاء الله مرة تانيه..
صديقه قال؛ضروري جدا في جية تانيه تجيبها معاك نبيها تصاحب المدام ..
مرت صديقه:ونولوا نمشوا ع بعض ونجوا ونتأمروا عليكم..
ضحكوا..
والجالي قال؛ان شاء الله..
🍃وسلم ع صديقه وزوجته اللي كان يفطر هو وياهم في مطعم من مطاعم اسطنبول..
بعدين مشي بيولي للفندق وهو يفكر في طوبى..
مش من شوق ولامن حب..لا..
🍃خش للغرفه وهو يقول بتهكم..
شن جابها ليك بس..مراة انيقه ومثقفه وعندها تلاته لغات وبنت واحد من اهم رجال الاعمال الليبين..
من يوم يومه عنده حظ عثمان رغم انه والله ماعنده شويه من اللي عندي..تي اصلا تخرج مقبول..
ااخ بس اااخ..ولوح الجاكيت متاعه ع السرير..
ومشي للشنطه بش يطلع منها حوايج...
🍃🍃🍃🍃
ويخش خوه للكليه والغضب عاميه..
نزل من السيارة..وتوجه للمكان اللي يقعمز فيه هو وياه..
وين وصل غادي..
شافها مقعمزة تراجي فيه...
وهي لما شافه ناضت وقفت..
قدملها..لين وصل فيها ووقف قدامها..
حول نظاراته وقال طول..
في حاجه مدرقتيها عليا وماتبيش تقوليها..
هي قعدت تشبحله بخوف وحواجبها معقودات وقالت..
زي شني!؟.
نضال وهو يحاول يتمالك اعصابه..
اريج كان في حاجه مدرقتيها عليا قوليها توا يااريج..
اريج قعدت تشبحله بخوف ومعاش قدرت تتكلم بكل..
اول مرة تشوف بهالحاله..اول مرة تخاف منه...
هز راسه بعدين قال؛ماتبيش تقولي!؟
هي قالت بخوف:شن نقول؟
نضال بعصبيه مكتومه؛من امتى تخدمي سواقه!؟
بدت ع وجهها ملامح الصدمه..ولسانها انعقد..
هو قال؛ساكته ولا ساكته بلعتي لسانك معناها حق..!
عيونها تعبوا دموع وهي تقول بنبرة مرتعشه:
نضال..
قاطعها وقال بنبرة قهر ولوم؛نضال شنو نضال يااريج!؟ راجلك ياأريج..راجلك اللي مش دايرتيله قدر ولاقيمه ودايره ماتبي من وراه..معقوله يااريج معقوله..معقوله انتي تحطيني في موقف زي هدا..تخليني نعرف من غيرك نعرف ان مرتي تخدم سواقه ترفع وتجيب معقوله طلعيني مش راجل يااريج!؟
دموعها نزلوا وهي تقول:حشاك..انت راجل وسيد التريس..انت درقت عليك خفت منك تقول وانا مجبورة ع الخدمه يانضال..
هو بعصبيه؛واني وين اللي نخليك تحتاجي وين!؟
اريج:انت ملزوم بيا بس مش ملزوم بحد تاني..
نضال؛لاملزوم ملزوم ونص هادوا ماليك معناها ماليا يااريج والله مانسوى لو مانوقفش معاهم..
اريج بنبرة باكيه؛ويقولوا يصرف عليها وعلى اماليها..
نضال بغضب؛مالك ومال امهم انتي..اني راجلك راجلك افهمي علاش تعاملي فيا المعامله هادي معاملة واحد غريب عنك..
بنبرة بكاء وهي تحلف:والله ماهكي يانضال..بس انت لو تحط روحك مكاني تفهمني يانضال..
هو هز راسه وقال؛لااني فهمتك كويس..انتي مش محترمتيني مش شايفتني راجل..تشوفي فيا نضحك ونبصر ونفوت وعاطيك حريتك هزيتي عليا..
اريج؛والله ماهكي..
قاطعها وقال:اريج اسكتي معاش نبي نسمع صوتك..اسكتي..
قعدت تشبحله بألم ودموعها مابطلوش نزول..
نضال؛غلطتك هادي مش مسامحك عليها مش مسامحك عليها يااريج..
ولف ومشي وهو يلبس في نظاراته..
وهي تشوفله كيف باين عليه غضب عمرها ماشافاته منه..
خلاها تخاف هلبه..واكبر خوفها انه يتخلى عنها..
قعمزت بهده..وهي تفكر في اللي صار وتحاول تستوعبه..
وخطر عليها كلام طوبى..
《 نضال راجل كويس ويحبك هلبه رد بالك تعاودي غلطة اختك وتقعدي تتحسفي بعدين..》
حطت يدها ع فمها وقعدت تبكي..وقلبها موجوع وخايف...
بعدين شافت لشنطتها..خدتها وطلعت منها التليفون..
واتصلت بطوبى وهي ترجف وتبكي..
🍃فهالوقت..
طوبى كانت برا مكتبها..
في المبنى الجديد بعد ما وصلوله الضي..
دارت عليه كله دورة...بعدين طلعت منه ومعاها ابله عاتكه واستاذ فتحي..
طوبى:بإذن الله يبدوا يعطوا فيه حصص العملي الاسبوع الجاي..
عاتكه؛ان شاء الله..
شافت طوبى للأستاذ ومدتله ظرف وقالت:سلمه للباش مهندس..
هو خداه منها وقال؛حاضر...
ع جية ابله تانيه وهي تمشي بسرعه قالت..
استاذه طوبى..ولية امر الطالبه سيرين جت..
عاتكه؛هدا اللي كنت حاسبه حسابه..
طوبى؛كلنا حاسبين حسابه..
ومشت طول..وهما وراها....
اما فتحي..توجه طول لعبد القيوم ..
وصل فيه وقال:عطيكم الصحه..
عبد القيوم؛تسلم واجبنا..المهم يكونوا راضيين ع الخدمه..
فتحي بإبتسامه؛تمام الرضا..مدله الظرف وقاله..تفضل..
عبد القيوم:لامش واخد شي..
بإستغراب؛كيف!؟
عبد القيوم؛الخدمه هذي رد جميل لراجل عزيز عليا..
قاله؛باهي واللي معاك..
عبد القيوم؛حقهم وصلهم...
هو شبحلهم بعدين شاف للظرف وقال؛باهي شن بنقول للأستاذة؟!
ابتسم عبد القيوم وقال؛رد شويه مش جمايل الحاج لطفي..
فتحي:والله شن بنقول..ربي يديم المعروف بين الناس..
عبد القيوم بإبتسامه؛آمين..هي السلام عليكم..
فتحي:وعليكم السلام...
🍃وداخل..
في مكتب الاداره..
اللي طالع منه صوت ولية الامر وهي تلعلع بعلوه...
:لاياماما بنتي تقرا هني بفلوسها مش بجميلك
طوبى وهي تتصنع في البرود؛اهم فلوس الشهور اللي فاتوا مش ناقص منه دينار ؛تحسابيني بعازة فلوسك! قدري نشري اكبر من المدرسه مرتين..
طوبى:والله هادوا فلوسك حطيهم ع اللي عندك واشري اكبر من مدرستنا بمرتين ونص..
؛تتسهوكي يافرخه انتي تتسهوكي.!
طوبى؛احترمي نفسك والزمي حدك خير مانمسح بيك الارض..
استشاطت غضبا وقدمتلها وهي تقول؛تمسحي بمني يافرخه انتي اها تمسحي بمني..
🍃فم الباب..
؛عاتكه خشي..
عاتكه بخوف؛بنمشي نادي ابله زينب..
ومشت تجري..
🍃داخل..
طوبى وهي تحاول تتصنع القوة والبرود وعدم الخوف..
دقات قلبها كانت متسارعه..كل شي فيها كان يرتعد من الخوف..
مرعوبه مش خايفه بس...
قالت بصوت عالي:هي انتي وين جايه!؟ خليك مكانك احسنلك..
:علاش كان قدمت شن بديريلي..
طوبى؛اسمعي لأخر مرة نقولك خليك في مكانك احسنلك..
والمراة ضخمة الجثه كان تقدملها وهي تقول؛ناقص عليا الافرخه..وقالت لفظ نابي وكملت تقول بعده..زيك انتي تكلمني فيا اني هكي..انتي مش عارفه اني مرت مني وخوتي من يكونوا..
طوبى؛طز فيك وفيهم..خودي ملف بنتك واطلعي يللا..
المراة جن جنونها اسلوب طوبى معاها استفزها ع الاخر..
قدمتلها وهي تقول..طز فيا وفيهم صار..
وطوبى وهي تشوفلها لون وجهها انخطف وقلبها طاح في رجليها...
اخوف طوبى وقتها كان ع عيلها مش ع نفسها...
خافت عليه لدرجه خلتها دير ردة فعل لااراديه لما وصلت فيها المراة..
دفتها بإيديها الزوز بقوة كبيره...
ولأن ردة الفعل جت فجأه..المراة فقدت توازنها وهي توخر لتالي وطاحت...
🍃ع وصلة زينب ومعاها عاتكه والابله التانيه..
سمعوا صوت الطيحه..
عاتكه؛حي عليا!.
زينب بخوف:لالالا..
وفتحت الباب وخشت مع الابلات..
وقفوا في مكانتهم مصدومات..
لما لقوا المراة هي اللي كانت طايحه وقاعده توقف وهي تقول:والله وبكسر الهاء..لما نكسرك اليوم..
وجت بتوليلها وقفوا الابلات بيناتهم..
وطوبى تشبحلها بعيونها المتوسعات ع الاخر...
:تي حولوا خلوني عليها حولوا..بالله لما نكسرها تكسير ونبعت من يقصف هالمدرسه ويمسحها مع ع الخريطه..
طوبى بغضب؛شن تحسابي ماوراي حد..بري اسألي وتو تعرفي من وراي...
عاتكه؛وراها ناس كبار هلبه ماتعلقيش معاها..
طوبى؛كان مش مصدقه..تو ندير اتصالاتي بش تتأكد بروحها..
وخدت تليفونها من ع الطاوله وقالت..
هي تبي تطلع من هني بفضيحه..
المراة بغضب نفضتهم وقالت؛خلاص حولوا..حولوا..
شافت لطوبى وقالت بتهديد؛اني وياك والزمان طويل..
وقدمت خدت ملف بنتها ومشت طلعت وهي تقول..
والله لما نوريكم بالله...
بعد ماطلعت..
الابلات التفتوا لطوبى..
لقوا غمضت عيونها وتنفست براحه..
بعدين فتحتهم وقالت بتعجب؛شن هدا!؟ بنادم هادي ولاوحش!؟
عاتكه بضحكه؛انتي اللي طلعتي وحش استاذه..
زينب:كيف قدرتي طيحيها هكي!
طوبى وهي متعجبه:لتوا مش عارفه كيف درتها!..
هما قعدوا يشبحولها وهما يضحكوا..
🍃وبرا المدرسه..
وصلت المراة لسيارتها وهي بركان وفاير..
اتصلت بأبله نجوى وقالت..
هادي ...وقالت لفظ نابي...من في وراها؟
"قولي من مافيش راجل اختها واحد من قادة ******..وخالها مسؤول كبير في البلاد..وخوها اخطبوط عنده ذراع في كل تركينه"
؛تدوي من جدك انتي!؟
"مال من كذبي علاش سكتلها اني ماهو عارفه من عندها ومن وراها.."
:وعلاش ماقلتيش من الاول؟!
"عطتيني فرصه ندوي..من اول ماقتلت وانتي تسربطي في السبان بعدين سكرتي "
:باهي بري بري..وقالت لفظ بذيئ وسكرت عليها..
بعدين شغلت سيارتها وتحركت وهي تسب وتلعن وتشتم بأفضع الألفاظ..
🍃🍃🍃🍃🍃
"استاذ الآنسة آلاء وصلت"
مختار؛دخليها طول..
"حاضر"
سكر السماعه..وشاف للباب وهو يراجي فيها تخش.
وينفتح الباب وتخش آلاء..
ناضلها وهو راسم ع وجهه ابتسامه وقدملها وهو يقول..
ياأهلا وسهلا بالبرنسس آلاء..
ابتسمت الاء مجامله..
وسلم عليها ع خالها بالخد..بعدين قال..تعالي قعمزي..
خداها وقعمزها ع كرسي..
ومشي قعمز مقابلها وهو يقول:شن تبي تشربي؟
الاء؛شي خالو اصلا مش معطله مازال في عندي محاضرات..
مختار:تمام براحتك..باهي خبريني شن حالك شن حال ماما واختك والباقي..
الاء قالت:الحمد لله..انت شن حالك؟
مختار بإبتسامه؛تمام التمام..
آلاء:دوم ان شاء الله..خالو..
مختار؛نعم..
الاء:وليد مختفي ليه اسبوع اواكثر شن صار فيه؟
ضحك ضحكه خفيفه وقال؛قاعد عندنا اقامه خمسة نجوم واكل شارب راقد..
الاء بخوف:خالو اني ماكنتش نبي نضره نبي نحوله من طريقي وبس..
مختار:ماتخافيش حبيبتي اسبوع تاني ونطلعوه وبعدها بفتره حتسمعي انه طار..يعني سافر..
هي بخوف؛قصدك بيموت!
هو بضحكه:لا اني مانقتلش اني نربي بس..
هي قعدت تشبحله بخوف وساكته..
وهو قال؛صدقيني ماصايرتله حاجه حنطلعه بس مش توا..
الاء تنهدت وقالت؛باهي ..
ابتسم وقال؛انتي شن جوك شن معنوياتك..
الاء بحزن واضح في عيونها؛عادي..
مختار:اكيد!؟
هي قالت:اكيد..ايه حقه بنقولك..فاتن تهبل حبيتها..
هو عقد حواجبه بآستغراب وقال؛من هي!؟
الاء؛فاتن طليقتك..انت مطلق خالو صح وطليقتك اسمها فاتن..ولا
هو بعدم فهم؛ايه صح..بس انتي من وين تعرفيها!؟
هي بإستغراب؛كيف من وين نعرفها مش انت اللي باعتها لحوش جدي بش تكلمه!؟..معناها حقه جت من راسها..!.
مختار وهو يشوف لآلاء تبدلت ملامح وجهه للغضب..
لدرجة ان الاء خافت وقالت..والله نحسابك انت باعتها بش تصالح جدو..
هو غير عيونه عنها بعدين هز راسه وقال؛تمام حبيبتي بري لجامعتك نشوفك يوم تاني..
هي ناضت وقالت؛اسفه خالو..
هز راسه بدون مايرد عليها..
وهي مشت طول طلعت وكانت خايفه هلبه..
وخلاته مع غضبه...
🍃🍃🍃🍃🍃
"ماباش ياخدهم!؟"
:ايه استاذه وقال هدا رد جمايل الحاج لطفي..
قعدت تشبح طوبى لظرف الفلوس بعدين هزت راسها وقالت:بارك الله فيه..وفيك انت استاذ فتحي.
؛وفيك بارك الله استاذه..نستأذن..
هزت راسها بدون ماتتكلم..
مشي استاذ فتحي..وهي تنهدت..
بعدين مشت لمكتبها...
خشتله وسكرت الباب..
ومشت لتليفونها...خداته من ع الطاوله..
وين جت بتفتح الشاشه..شافت مكالمات فائته من اريج..
ومعاهم رساله..
فتحت الرساله وقرتها..
"ردي عليا ياطوبى بالله عليك"
طوبى خافت..واتصلت بيها طول..
وهي طول فتحت الخط...
جاها صوتها وهي تتكلم ببكي..
"زوديلي طوبى زوديلي نضال عرف وسيبني"
طوبى بقلق؛وينك انتي؟!..
"اني في سيارتي حدا مدرستك"
طوبى؛شويه وطالعه..
وسكرت عليها...بعدين خدت شنطتها..
ومشت طلعت برا المكتب وسكراته بالمفتاح...ومنه برا المدرسه..
🍃🍃🍃🍃🍃
في حجرة الاطباء..
التابعه للقسم اللي يخدم فيه الدكتور خالد مع مجموعته...
هو كان موجود يشوف في ملف مريض..
وحداه مجموعته وهما يتكلموا عن..
؛باين عليها سيبت..
؛مابعدها الحق موقف صعب هلبه..
وسام بضيق: والله ماتستاهل وحده زيها يصير فيها هكي..
امل قلبت عيونها وهي بتموت من غيرتها..
الدكتور؛خسرت حتى روحها..
شبحوله كلهم..
"السلام عليكم"
غيروا عيونهم عنه وتوجهت انظارهم للباب.
اميمه بضحكه؛ضعتوا من غيري صح..
هما ضحكوا..
ووسام بضحكه؛ضعنا بس!..
خالد؛اني كنت ناوي نتعزل المهنه بكل..
اميمه؛مالا باهي اللي جيت اليوم..
ضحكوا زملائها...
وهي مررت نظرها وهي مبتسمه..
لين جو عيونها ع الدكتور خالد..
هو هز راسه وقال؛غيري الهيئة وتعالي بش تشوفي الملف هدا..
ورفع فوق شويه..
هي بإبتسامه؛دقايق بس..
ومشت طول لحجرة تبديل الملابس..
وسام بإبتسامه؛ديما عكس التوقعات البنت هادي..
خالد هز راسه وهو يفكر...
🍃🍃🍃🍃🍃
"خلاص ياطوبى اني وياه خلاص"
طوبى بحزن؛ماتقوليش هكي يااريج هو زعل منك وطبيعي ياخد منك موقف..
اريج ببكي؛قالي مش مسامحك..
طوبى:مهما يقول معذور وانتي عاد ماتشديش في الكلمه في لحظة الغضب ياما يقولوا..
اريج وهي تبكي؛انتي ماشفتيشي ياطوبى ماشفتيش ملامحه كيف كانت اول مرة نشوفه هكي..
طوبى حطت يدها ع يد اريج وقالت؛باهي اني اليوم بنمشي لحوش عمي وكان حصلت معاه تو نكلمه.
شدت اريج يدها وقالت؛بالله عليك طوبى حاولي..
طوبى بقلق وحزن؛حاضر ياعمري حاضر والله نكلمه ع خاطرك غير هدي شويه وياسرك بكي..
واريج تبكي مش قادره تهدا..
خدتها طوبى في حضنها وهي تقول؛نضال طيب ويحبك ويموت فيك يزعل منك لكن مايقدرش يخليك صدقيني روجه..
واريج وهي تبكي في حضنها قعدت تقول..
حتى اني نحبه..نحبه هلبه..نضال اغلى حاجه عندي..عوضني عن كل شي انحرمت منه..عوضني عن بابا ياطوبى..هون عليا فراقه..اني لو يخليني نضال نموت طول..
قعدت تمسح ع ظهرها وهي تقول ودموعها تنزل..
بعيد السو عليك..ربي مايفرقكم يارب...
🍃🍃🍃🍃🍃🍃
وبعيد عنهم..
اختها اللي قاعده تعاني عذاب الفراق..
مشت لرجليها لسبب عذابها..وكأنها تقوله مازال نبيك تعذبني وتقهرني اكثر..
خشت للفندق اللي فيه الاذاعه اللي يخدم فيها..
وين سألت عنها قالولها انه في كافي الفندق..
وطول مشت غادي..
🍃مهند؛بوي ديما هكي يحب يبان قدامي فاهم في كل شي واني نساير فيه وخلاص..
ارام بضحكه؛بس والله يهبل بوك محلاه ودمه خفيف..
مهند بإبتسامه؛بوي سهل لين ومحبوب..وقلبه زي الحليب
ارام؛ربي يخليكم لبعض..
مهند وهو مبتسم قال:آمين..
🍃وبعيده عنهم بمسافه بسيطه..
كانت واقفه تشوفلهم...
وقلبها قاعد يحترق...كل شي فيها يحترق..
وحاسه بألم..فضيع..
وهما يهدرزوا ومنسجمين مع بعض هلبه..
هي ركزت بنظرها عليه..
تشوفله كيف يهدرز وهو مبتسم..
وتتفكر في ايامها معاه...
كلامه ليها...اسلوبه..نظرات عيونه اللي كلها حب..
حب ماقدرتاش وفرطت فيه وخاناته...
وخسراته للابد..
🍃مهند؛هي خلاص نوضوا..
ارام:هي..
وناضوا هما الزوز..
ولما جو بيمشوا..
هو شافها وانصدم..
وآرام لما شافتها تفاجئت واضايقت هلبه في نفس الوقت...
قعدوا يتبادلوا في النظرات هو وهي..
نظرات ليها الف معنى وتعبر عن الف شعور..
بس لحظه تبادل النظرات ماطالتش.
لما قال مهند؛نستأذن آرام..شويه بس..
ومشي بيطلع من الكافي لباحة الفندق...
آلاء لما شافاته طلع مشت لحقاته طول..
وآرام معاها بعيونها وهي مضايقه..
🍃طلع برا..ووقف..
وهي طلعت بعده..
شافاته واقف..بخطوات متردده خجوله قدمتله..
لين وقفت قدامه..
هو بنظرة غضب قال:شن مازال تبي جايه؟
الاء ودموعها في عيونها قالت..
آسفه..
ابتسم تهكما وقالت..
على شني!؟
نزلت عيونها وهي ساكته..
هو قال:على انك ضحكتي ولعبتي بقلبي ودرتيني طرطور!..
قامت عيونها وهي تشوفله بألم ودموعها ينزلوا..
هو بإنفعال؛اني عطيتك قيمه ماعطيتهاش لحد في حياتي..اني عطيتك قلبي..عطيتك عمري..وكنت مستعد ندير كل شي يخليك ترضي عليا وتحبيني..
حبيت عيوبك مش حبيتك بعيوبك..لالا عيوبك نفسها حبيتها تعرفي علاش لانها حاجه تخصك انتي واني اي شي يخصك كنت نحبه..
هي تسمع فيه وقلبها قاعد يتقطع..
وهو مكمل يقول..جيتك بنية صافيه وربي شاهد جيتك بالاصول بالاحترام..درتك خطيبتي وخططت في وجودك لمستقبل نحلم نعيشه واني واعي وراقد..
لكن انتي كنتي تخططي بيا..درتيني وسيله بش تقهر بيا غيري وتخليه يوليلك..ياااه ياربي ياااه قداش انت كبير
نقذني منك بسرعه قبل لطيح الفاس في الراس وطلع حقيقتك قدامي وخلاني نعرف قداش انتي وحده تافهه وسخيفه وماتستاهليش حتى نظرة الشفقه..
تعرفي شن درتي فيا اني لما سمعت مكالماتك مع ولد عمك وانتي تتكلمي عليا وكأني..وكأني..
وسكت شويه بعدين قال..
حسبي الله ونعم الوكيل فيك..
نزلت عيونها وحطت يدها ع فمها وهي تبكي..
مهند بغضب ودموعه في عيونه:ياريتك وجعتني قلبي..والله وجع القلب ساهل ويبرا مع الوقت..لكن جرح الكرامه يقعد العمر كله..تي انتي..انتي قللتي من رجولتي انتي اهنتيني اهانه لين نموت ماننساها...لكن تعرفي كيف..
ليك عليا فضل واحد..انك علمتيني درس حياتي كلها..
خلتيني نتعلم ان الجعان واللي عينه فارغه عمره مايولي بنادم مهما يحاولوا يعزوه.
نزلت يدها وحطتها ع صدرها اللي حست وكأنه قاعد ينطعن في طعنات متتابعه...
وهو انهى عليها لما قال..
مرة تانيه كان شفتك هني تخلي امن الفندق يلوحوك برا زي الكلبه..
ومشي عنها وخلاها...
وهي في حالة يرثى لها..
انسودت الدنيا في عيونها...وقلبها قاعد يتكسر لأجزاء مجزئه..
قعدت تمشي زي التايهه وكلامه قاعد يتردد في وذانها..
وكأنها في مكان خالي مافيه حد غيرها هي..
وصوته وكلامه..
وين وصلت في سيارتها..
حست بدوخه..خلتها تشد في السيارة وقعدت واقفه عليها للحظات..
بعدين..
قلبها نبضاته قاعده تتسارع بشكل رهيب..
لدرجه تخيلت فيها انه حينفجر...
مشت خطوة ورا التانيه لين وصلت في باب السياره..
فتحاته..وركبتها..
قعدت لحظات وهي تشوف للدومان..وتحاول تستجمع نفسها..
بعدين شغلت سيارتها..وتحركت...
🍃🍃🍃🍃🍃
فتحت الشغاله باب الفيلا..
هو خش بآندفاع وغضب وهو يقول..
سيدك وين؟
جاوباته؛مكتب..
مشاله بسرعه..
لين وصل فيه..خش عليه وقاله..
تكلم بنتك وتقوللها قالك مختار اللي درتيه مش حيعدي بالساهل..
بوها بفجعه؛خيرها شن دارت..
مختار بغضب:كلمها وتو تعرف منها شن دايره..
؛ماتخلنيش هكي يامختار فهمني..
مختار بصوت عالي؛تدخل في مالهاش فيه تحشر في روحها في امور ماتخصهاش..شن اللي خلاني نطلقها اني غير هالطبع الزفت اللي ماتبيش تخليه..اسمع قوللها قالك مختار
.هالمرة غلطتي وغلطتي هلبه..
ومشي طلع من حداه..
وبو فاتن ينادي عليه ولاحياة لمن تنادي..
تنهد بقلق وقال..
علاش ديري فيا هكي يابنتي علاش وانتي عارفه ان رقبتي في يده.....علاش!!

#غضب_خوف_ندم
#طوبى

....يتبع...