#طوبى "جنة طوبى"
#جمان فريد
#الجزء_الستون"فلاش باك3"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب 🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير 🌸
🚫تنويه🚫
الرجاء التركيزع سياق الاحداث..والتركيزع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕
وانتي ضحكتي عليا ياصابرينه...ولعبتي بعداد عمرك...
هي بصدمه وخوف:كيف ضحكت عليكا؟ في شني!؟ ..
وهو يشوفلها بنفس النظرة البارده المخيفه..
هي بدت تبكي وتفند ؛والله والله العظيم يامختار اني عاقر اقسم بالله..الدكتورة هديكا مش هي بس اللي خديت بكلامها مشيت كشفت عند غيرها وقالوا نفس شي اني عاقر مانجيبش في صغار...
هو رفع الظرف وقال؛وهدا شنو؟..
هي بإنفعال؛مانعرفش مانعرفش..والله مانعرف..
وبدت تخبط ع وجهها وهي تبكي وعيونها مغمضات..
وتقول...والله مانعرف..
هو قدملهت بخطوات هاديه لين وصل فيها وشد ايديها الزوز وهو يقول؛خلاص خلاص..
هي شبحت بنظرات كلها ضعف وتوسل والدموع مغرقتهم؛
والله اني عاقر والله....وهي تشوفله وتقول؛غالطين متأكده غالطين..اني مانجيبش
في صغار...!
هو عطاها الظرف..
خداته وهي تشوفله بألم وخوف..
اشرلها بعيونه عليه..بمعنى افتحيه..
هي هزت راسها مواقفه وكانت ترعش مع بعضها..
فتحت الظرف بصعوبه بسبب الرعشه اللي كانت في ايديها من الخوف..
وهوحط رجل ع رجل وحطه مرفقه عليها ويده تحت فكه
الأيسر وقعد يتأمل في ملامح وجهها وبس..
طلعت الورقه وقرتها وهي تبكي بصمت..
فجأة تبدلت ملامح وجهها للدهشه..رفعت عيونها وشبحتله بنظرات عدم استيعاب..
هو ابتسم ابتسامه واسعه وفمه مسكر..
وهي تشوفله بنفس النظرات وتقول؛معاش فهمت شي..
نزل يده وقال،تمام انتي ماطلعتيش حامل..
بس هدا مايعبتش انك عاقر.وبش نتأكد درتلك
هالاختبار..وشبه90% صدقت واني مش حنرتاح لين نصدق 100%..العشرة في الميه اللي قعدت مش حتجي الا بطريقه وحده بس..
هي مازال تشوفله وعقلها مش مستوعب...
وهو كمل يقول؛تمشي معاى توا ياحلوة لعياده صاحبه صديقي يديرولك اللازم كله بش تجيني 10 في الميه ياحلوة ونرتاح من ناحيتك..
هي ودموعها ينزلوا:هدا كله وماارتحتليش !؟
هز راسه وقال؛كنت مرتاحلك بس لما كذبتي عليا في موضوع اختك هالراحه اختفت بالمرة..وتوا ولى نصها وبعد الكشف يولي ربع..وبعد...وسكت..
هي قالت:علاش سكتت كمل..
تنهد وقال؛شوفي صابرينه انتي عاجبتيني هلبه هلبه فوق ماتتصورى..وتعودت عليك هلبه وقتلك هالكلام من قبل ونبيك تقعدى موجوده في حياتي..بس لازم ياصابرينهالشخص اللي يكون مقرب مني في حياتي يثبتلي انه صادق ووفي ومش حيجي يوم ويبيعني مهما صار..
هي حطت يدها ع خده وقالت وهي تشوف لعيونه؛اني نحبك..نحوت فيك.. مستعده نعطيك روحي..اني كذبت عليك بش مانخسركش مختار.نموت فيك..
ودموعها كانوا زى السيل...
هو لما كان يسمو فيها ويشوف لعيونها اللي كان لونهم اخضر زيبتي..
سرح بتفكيره ورجع سنين وسنين طويله للخلف...
لما تبدلوا عيون صابرين الخضراء بعيون تشبه البحر في لونه مرة.. وللون المروج في فصل الربيو مرة اخرى...
《انا مش بحبك ع فكره ولاميته في دبابيك..
وخيره عيونك يكذبوا فيك !؟
علاش هربتي بيهم عني..اها. قولي..
مختار...بطل بواخه..ياثقل دمك... 》
"حبيبي مختار"
استاقظ ووخر عنها وناض وقف بدت ع وجهه ملامح الازدراء وهو يقول..نوضي هيا..معاش ضيعي وقت..
ناضت وهي تشوفله بألم..
هو لف ومشي للمنظومه طفاها وقال؛تحركي...
هي تنهدت بألم. بعدين لفت ومشت وطلعت من حداه..
وهو بعد ماطلعت..غحض عيونه وخدى نفس عميق بعدين فتح عيونه ولف ومشي طلو الصالون...
🍃🍃🍃🍃🍃
"لعنة الله عليهم كلهم هي باهي"
اريج ودموعها في عيونها ؛معاش تلعن..
نضال؛وانتي مازال مش راضيه فيهم!؟
اريج؛اني عليك انت مانبيكش تكسب ذنب في جرتهم اللعن حرام..
حط ايديه في نصه وتنهد بعصبيه بعدين قال؛استغفر الله العظيم..شي يطلو الواحد عن طوره.. صغار خوى الزفت لحمي ودمي اسمهم ع اسمي بعد بوهم اني بوهم ..
اريج؛هدا انت مش عمامي اني..
شبحلها وقال؛ورب العزه مايستاهلوا دمعه من عينك تنزل
اريج مسحت دموعها وهي تقول؛اني نبكي ع حالنا..
نضال؛وخيره حالكما؟ قاعدين في حوش جدك الراجل الحقاني اللي يخدم في الفريب قبل القريب.. واني موجود ومهند موجود..ياريتك شفتيه امس كيف جاني ينشد فيا عليكم وهو خايف وماطلعش من عندى لين اطمن عليكم..
غيرت عيونها عن نضال وهي شاده روحها عن البكي..
هو قال؛خلاص ياقلبي...انسي معاش تزعلي ولاتحرقي
دمك..ولو ع خدمه حاضر اخدمي بس في مكان كويس
اريج اني ندور عليه بروحي تماح
شبحتله وابتسمت من بين دموعها وهي تقول:قتلك قبل انك تهبل..
ابتسم ابتسامه عريضه وقال:لا..قوليها ترا..
هي قالت:زلفوت...توا قلتها..
هو قال:امتىإ؟؟ ماسحعتهاش ترا عاوديها..
هي قالت؛التكرار مش للشطار husband My
قاللها بغيظ مصطنع؛لسانك هدا لسانك..
رفعت حاجبها وقالت؛خيره لسانيا؟ انت شن طيحك في حبي كان لساني..لويته ع رقبتك لين جاب اجلك،وابتسمت بمكر وهي ترقص في حواجبها..
هو قال؛شفشة الشفشات..
وهي تشوفله بابتسامه وتسحح في دموعها..
وهو ابتسملها وقال؛مشي بكمك ع خشومك..
ضرباته بقبضة يدها ع كتفه وقالت؛ياتافه..
وهو يضحك عليها..
☘وياقداش تهون مواجع الدنيا وشدايدها لما يكون فيها شريك يمسح دمعتنا ويضحكنا ويحتوينا وينسينا همومنا☘
🍃وهذا اللي كان يبي يدير مهند لألاء
بس للأسف الاء ماكانتش موجوده بش يمسح دموعها ويرسم الضحكه ع وجهها..
لتاني يوم ع التوالي يجيها الكليه ومايلقهاش..
وياريتها غير خلاته يسمع صوتها ويطمن عليها...
خلاته غارق في الحيره ومش فاهم هي علاش دير معاه هكي !؟ علاش قطعاته تماما في الوقت اللي مفروض تلجأله فيها !؟
وياويل قلب مهند اللي بدى يخش فيه الشك ناحيتها
ويميل لتصديق كلام أكابر..
يامصعبها عليه لو طلو اللي قالاته اكابر كله صح..
واعرة. قاتله...
☘☘☘☘☘
الساعه 12:45 قبل الظهر..
انصرفوا بنات الثانويه اليوم بكرى بسبب اجتماع عقداته ادارة المدرسه..
وكان هدا من حسن حظ صفاء بش تنفذ اللي في بالها..
مشت لمدرسة اختها مروة وقعدت تراجي فيها..
وبعد دقايق جي موعد الانصراف ..
وبدوا يطلعوا الطالبات..
شافت اختها طالعه مع راما..
ابتسمت وقدمتلهم..
وصلت فيهم وقالت؛شن جو؟
اما توترت لما شافتها..
اما مروة قالت:بكرى اليوم!
صفاء؛دارو اجتماع في أخر حصه،.شبحت لراما وقالت.. شن
جو راما؟
راما ابتسمت بارتباك وقالت:تمام..
طلعت صفاء من جيب كبوطها العلبه ومروة تشوفلها باستغراب..
عطتها لراما وهي تقول:رديها وقوليله قاعد فاهم غلط..
مروة:شن هادى صفاء؟
خدت راما العلبه وحطتها في جيب جاكيتها وقالت وهي محرجه:تصام..
ابتسمت صفاء وقالت؛هيا مروة..
صفاء؛باهي شن هادي!..
خدتها من يدها وقالت؛تو نحكيلك..سلام راما..
مروة التفتت لراما وقالت؛تو نوريك باهي..
صفاء جبدتها وهي تقول؛تي تعالي هيا..
تأففت راما وهي تشوفلهم بعدين قالتبعليك موقف خيي..
☘☘☘☘☘☘
طلعت طوبى بسيارتها من المدرسه بعدين ماانتهي الدوام..
كانت متوجهه لحوشها..
لولا المكالمه اللي جتها في الطريق..
كانت رابطه التليفون بالسيارة..
فتحت الخط وردت..
طوبى؛السلام عليكم جالي..
"وعليكم السلام..روحتي من المدرسه؟!"
طوبى؛في الطريق..
"تمام.. حبيبي اني اليوم معطل في الخدمه مش مروح الا مع المغرب روحي طول لحوش ماليك.."
هي فرحت هلبه بس دارت روحها عاديه وهي ترد..
تمام جالي..
"بعد نطلع من الخدمه نجيك نروح بيك"
طوبى:تمام..
"سلام حبيبي "
هي قالت؛سلام..
وسكرت... بعدين خدت نفس وطلعاته...وبدت ع وجهها ابتسمت خفيفه.. وغيرت طريقها طول للمنطقه اللي فيها شارع القهوة..
🍃وفي الشارع..
في حوش الشيخ جويده هادي..
كانوا احفاده صغار بنته جايين يتفدوا عندهم..
وحناهم ووحده من كناينها طيبوا الذ الاصناف ع شرف جيتهم...
وفي الكوجينه كان يدور بينهم حديث..
عتيقه؛اني خايفه كان مايكون راجلها صايرتله حاجه ومايبوش يقولوا..
: ومش قلتي امس كلمتكم هي وياه؟
عتيقه بقلق؛ايه..لكن وجهه ماعجبنيش واضح تاعب..ربي
يستر وخلاص..
: الحق اني نكلم فيها مرة مرة ماسنجر جوها عادى..
ومرة كلمتها فيديو كانوا طالعين يدهوروا..هو توا ياعمتي في فترة نقاهه راهو طبيعي يبان عليه التعب..
عتيقه؛ياودى لما كان هني خير..
ع خشة سدره عليهم وهي تقول؛حنينه..
عتيقه بإبتسامه فرح؛ياروح حنينه..
وجتها سدرة طول وضمتها..
ومرت خالها تشوفلهم بابتسامه..
بعد ماسلمت عليها حتى هي..
قالت عتيقه؛وين محمد ويزن؟
سدرة؛مشوا مو جدو للجامو..شن درتوا غدى؟!
حناها بضحكه؛كل حاجه مليحه..تعالي شوفي..
🍃وفي حوش تاني من حياش شارع القهوة..
حوش لطفي الواعر..
خشت فردوس ع عمتها وقالت؛عمتي..جارتنا رقيه جت..
مطيره سيبت اللي في يدها وقالت؛تعالي كملي عليا..
ومشت طول طلعت وفردوس معاها بعيونها بعدين غيرتهم عنها وخشت للكوجينه وع وجهها قاعده مسيطره ملامح الهم...
وبعيد عنها شويه..
في دار خواتها..
ع سرير سدرة تحديدا..كانت الاء مازال راقده واثر الدموع واضح ع عيونها...
☘☘☘☘☘
ومازلنا في شارع القهوة..
وفي حوش تاني من حياشه...
الصيد...
روحت راما مع عمتها نجاح وخشوا للحوش الزوز مع بعض..
نجاح،برى شوفيه بالك في داره..
راما هزت راسها وقالت؛باهي..
خلتها نجاح وتوجهت لدارها..
وهي مشت طول للممر اللي يرفو لدار عمها اشرف..
وصلت فيها لقتها مفتوحه وفاضيه..
هي بضيق قالت؛ايااه شكله مهناش..
باهي كيف ندير فيها اني هادي..!؟
ع طلعة عواطف من دار الضيوف بعد ماضمتها..
شافت راما واقفه وفي يدها حاجه..
هي ماركزتش انها واقفه قدام دار اشرف..
اللي ركزت عليه ان بنت خوها تبان زى اللي واقفه في تركينه ومدرقه..وفي يدها حاجه تشوف فيها..
وطبعا سيناريو واحد بس اللي جي في عقل عواطف يشرحلها وضع راما..
وبغضب واندفاع مشتلها بسرعه..
شدت ذراعها وقالت؛شن هدا!؟
البنت من الفجعه انفضت..
جبدت منها العلبه وهي تقول:هدا اللي كنت خايفه منه هدا اللي كنت خايفه منه..
راما بخوف؛لالا عمتي لا ماتفتحيهاش.
وحاولت تاخدها منها لكن عواطف بعدت وهي تقول؛برى غاد ي..
وطلعت منها السلسال بدون ماتركز ع الحروف وقالت؛حي عليك!..
راما حركت راسها بالنفي وهي ترعش من الخوف قالت؛لاالا عمتي والله ماليا..
عواطف بغضب؛مالا ليا اني؟..هذا اللي كنت خايفه منه عرفتها رباية امك بضيعك..
نزلوا دموع راما وهي تقول؛والله ماليا الله..
صفعتها ع وجهها وقالت؛معاش تحلفي ياكذابه غير يروح عمك بس تو تشوفي..
سمعوا باب الحوش انفتح وتسكر..
عواطف؛اهو روح..اشرف..ياأشرف..
راما حطت ايديها الزوزع جبهتها وغمضت عيونها بأسف..
عواطف؛تعالى شوف بنت خوك شن دايره يااشرف..
وجاهم اشرف لكن ماكانش بروحه..
كانت معاه خديجه اللي قالت بخوف:شن دايرها؟
مدت عواطف العلبه لأشرف وهي تقول؛هدايا ورسايل وعبيتر..
وخديجه تشوف لبنتها بصدمه..
لكن اشرف شاف للعلبه..عقد حواجبه بإحراج وقال؛هاتيها..
خداها منها وقال؛خشي راما لداري..
نزلت ايديها ومشت وهي تبكي خشت لدار عمها..
خديجه ارتعبت ع بنتها وقالت؛اشرف بالله عليك بالشويه
البنت قاعده صغيرها..
عواطف؛وين صغيره ياللا مادام ولت تعرف الحاجات معاش صغيره..
اشرف بعصبيه؛خلاص عواطف اسكتي وبرى في حالك..
ع جية نجاح وهي مفجوعه؛خيركم..
اشرف؛خوديهم وبرا..
ومشي خش لداره وسكر الباب..
خديجه خبطت بيدها ع وجهها وقالت؛بيقتلي البنت..
رفعت عواطف حاجبها وقالت؛بيربيها..
خديحه بحدد..
ونجاح تمرر في نظرها عليهم وهي تقول:تي غير فهموني
شن صايرام
-🍃 في الدار..
اشرف وهو يشوف لخد راما قال؛معليشي عمو اسف..
راما؛عادى مش مدوره المهم ماانكشفش السر..
ابتسم وقرصها من انفها بعدين قال؛كيف صار؟
راما؛جتني في المرواح عطتهالي وقالت قوليله قاعد فاهم غلط...
ابتسم بعقدة حواجب بعدين قال؛هي هكي قالت؟
راما؛ايه..والحق تحشمت منها هلبه..
هو قال؛فوتي..
راما:باهي كيف بندير توا..
خداها من يدها وقال؛تعالي معاى
ومشوا طلعوا من الدار..
وهما الثلاثه في الباب يراجو فيهم..
اشرف؛عواطف اللي في بالك مافيش منه وراهو مرة تانيه تمدى يدك عليها مايصيرش طيب..
هي انصدمت..
وخديجه قالت؛ضربتيها!؟.
راما بقلق:مش بقوة ماما...
خدت خديجه راما من عمها وقالت؛الوضع زاد عن حده راهو صغارى ولوا ملطشه اللي يجي يضربهم..
اشرف؛ماتكبريش كلام..
خديجه بحده:لو سمحت اشرف ماطيحش القدر بينيوبينك ايوه.. وصفارى مازال حد يمد عليهم نقلب الدنيا ع روسكم..
وجبدت بنتهها ومشت بيها..
اشرف؛غير جيتي مرت خوى بس..
عواطف؛اني بنعاودها ونشوفك شن ديري!..
نجاح بنرفزة؛خلاص انت وياها..
🍃خديجه؛هادم عماتك اللي بتحوتي عليهم..
وطلعت بيها من الحوش وهي معصبه ع الآخر..
وراما مضايقه من اللي صار كله..
🍃🍃🍃🍃🍃
في الطريق..
كان مروح من عمله وفاتح الراديو ع قناة ثراتيه ويسمو في
أبيات شعر شعبي..
جاته ع الجرح...
🍃عارفك صعيب غلي
لو كان غير ما وآن المنام أتجِي .
مزات نتركك
عارفك غلي صعيب ...
أؤحاسبك بعيد الدآر وانت قريب
أنحاول سريبك يا عزيز أنسيب
إيجي الليل، وايجيبك منامي لي
دناك ميسه ما لي فيه نصيب
أليآسك أمسلم، سآاابلات ايذى
لو كان غير في وأن المنام أثغيب
مرات من أمهاياتك أنروق أشوي
🍃تنهد من وسط قلبه وقال بحسرة...
عارفك علي صعيب....
ومن انسجامه مع الابيات ماانتبهش لروحه الا وهو قدام فتحة شارع القهوة...
بس ماقدرش يخش..
علاش!؟...
بسبب السيارة اللي وصلت معاه في نفس اللحظه وسكرت
لما شافه اللي فيها...انقلبت دنيته اكثر ماهي مقلوبه..
والقلب ياما صار فيه..
عقد حواجبه وغير عيونه للطريق واشر بيده لصاحب
السيارة اللي قدامه يفوت..
- 🍃هي طول خشت بسيارتها..
وهو غير عيونه للسياره وباينه في وجهه ملامح الألم..
وجو في صدره يحسه وين يشوفها..
ماتخيلش يجيه يوم وتكون هي مصدر وجع وألم ليه بعد ماكانت زها لخاطره..وبهجةلحياته..وحبها احلى شعور يعيشه في حياته..
خش بالسيارة بعدها.. وهي قدامه..
كان يحاول يشوف لأى شي تاني الا سيارتها..
ومازال قلبه غاير وسط احشائه..وفي صدر ألم رهيب..
وصل هو للحوش..
درست قدام حوش بوها..
وهي في الوقت اللي درس فيه حسين قدام حوش جدهم..
كان جاى من الجهة التانيه..
نزلت من السيارة وهي مبتسمه لما شافت صفيه نازله..
مشتلها طول...
حسين لما شافها ابتسم من قلبه وقعد يطلو في الشناطي من الكرسي الخلفي..
وصلت فيهم وقالت:حمد لله ع السلامه..
سلمت عليها مرت عمها بالأحضان وقالت؛الله يسلمك بنتي..
طلو حسين الشناطي وقال:هيي مش في الشارع خشوا
داخل..
بعدوا عن بعض وضحكوا..
وهو قال بابتسامه:افتحيلنا الباب ابله طوبى.
هي بضحكه قالت؛حاضر..
ومشت طلعت المفاتيح من جيبها..
كانوا "شوك مفاتيح" لحوش بوها وجدها وحوش شيابينها
وحوشها ومكتب الادارة في المدرسه..
فتحت الباب وخشت..
وخشت صفيه بعدها وهو خش وراهم بالشناطي...
هي سكرت الباب من غير ماتبان ع عبد القيوم..
اللي كانت الفيرة تحرق فيه حرق وهو يشوف في حسين كيف يكلم فيها وهي تكلم فيه..
حس انه سخيف وتافه وهو يفير من ولد عمها وهي مراة متزوجه اصلا..
بس برغم هكي مش قادر يمنو هالشعور بالذات وهو عارف حقيقة مشاعر ولد عمها اتجاهها..
نزل من السيارة وهو مضايق هلبه...
وبعد سكرها مشي خش للحوش..
🍃وفي حوش علي الواعر..
كانت اميمه اللي خدت اجازة اليوم وقعدت في الحوش بش تستقبل امها حاضنتهل بقوة من الشوق..
وهي تقول:ياعمرى الحوش من غيرك ظلام الله لايغيبك..
وصفيه تقول؛ياروحي بنيتي..
وطوبى تشوهلهم وع وجهها ابتسامه خفيفه ودموعها في عيونها..
شاف حسين هالدموع وتنرفز قاللهم:خلاص عاد حسستيني انها كانت مسافرة سنين..
شبحتله اميحه وجت بترد..
هو فنص فيها..
فهمت طول وبعدت عن امها وقالت بضحكه؛نحسابكم مروحين عشيه..
صفيه؛من كثر مااستاحشتكم قتله يروح بيا توا..
هو قال:اني بروحي كنت نروح بكرى طلعنا من قريب الفجر..
اميمه؛معناها ناقصين نوم..
صفيه؛لارقدت بكرى وخديت غايتي في النوم..
حسين؛جيعانين بس..
اميمه؛كل شي واتي درت غدى مبدع..
حسين؛يستر الله ع بطونا..
طوبى؛لاحرام عليك اميحه تطييبها يهبل..
اميحه بآبتسامه؛سلم بيبيتي..
ضحكت طوبى..
هو مشي للكوجينه وقال؛ترا نشوفوا شن دايره..
لحقاته وهي تقول:لاحسين ماتمش شي..
ضحكوا عليهم هي وصفيه..
بعدين شبحتلها وقالت بابتسامة ألم؛كيف خليتي سدرة؟
ضحكتها وقالت؛خليت عقلي وفلبي عندها
بنيتي..والله ماكنت نبي نروح بس قالوا قعادى زى قلته..
طوبى ودموعها ينزلوا؛مصورتيها.. ع قد ماترجيت يوسف يبعت صور يفوت فيا..
صفيه ودموعها في عيونها قالت؛خل نخش نبدل حوايجي بعدين نعطيك تليفوني تشوفي صورها
هزت راسها وقالت بابتسامه مجامله؛باهي..
مشت صفيه لدارها..
وطوبى مسحت دموعها..بعدين مشت للكوجينه...
🍃خشت وهي تسمع في ولد عمها يقول..
حسين وهو ياكل:ديما ماكلتك صامته..
ضحكت بخفة وين شافت في يده زوز طروف بوريك..
وفي ذفس اللحظه جي خاطرها فيهم معاش قدرت تحول
عيونها عنهم..
اميحه:في الحوش في مرضى ضغط..
حسين؛باهي طيبي ع زوز صامت وفيه ملح..
بابتسامه سخريه قالت،بالته عليك ماهو ماعندى ماندير ولا!؟
قاللها؛ماقالك حد ديرى روحك فالحه قلتي لعمتي طيبت هي..
هي بربو عين شبحتله وقالت؛عمتي بطيب وبتجيب معاها..
هو قال؛قولي هكي من الاول..
تجاهلاته وقالت لطوبى؛ماما وين طوبى؟
شبحتلها وقالت؛في دارها قالت بتغير..
اميمه؛خل نشوفها بالك تبي حاجه..
ومشت طلعت من حداهم..
حسين حرك عيونه وشاف لطوبى..
لقاها تشبح للي في يده..
شافلها شويه..بعدين قدملها بيها ومدهالها..
توسعوا عيونها لما استاقظت لروحها بعدين قالت بضحكه:لالا مانبيش ناكل توا..
حسين؛عينك فيها شفتك..خودي..
بضحكه احراج قالت؛ تحسابني نشبحلهاا؟.. لالا كنت سرحانه..
حسين:طوبى خودى مش باهي تقعد في خاطرك..
هي انصدمت..
هو بنرفزة قال:تي خودى عاد..
خدتها وهي مبتسمه بصدمه ومحرجه..
وهو طلو بالطرف اللي كان ياكل فيه...
ع خشة اميحه..
جتها شدتها من يدها وقالت وهي مفنصه عيونها:طالعه منك حاجه لحسين!؟
اميحه باستغراب زي شني!؟
طلقتها وقالت؛توا شوره شافني واني نشبح للبوريك في يده جاني بوحده وقالي خوديها مش باهي تقعد في خاطرك!
رفعت اميمه حواجبها بتعجب..
طوبى وهي تفنص:شكلك زالقه قدامه ولا!؟
اميحه؛شن تشبحي فيا قدامكا؟ معقوله بنحكي ع حاجه زي هادي لخوي!؟
طوبى ؛باهي شن قصده بكلامها؟
اميمه؛عادى شاف عينك فيها عطاك..
حركت راسها بالنفي وقالت؛لالا اشبح كيف قالهالي كان شفتيه راك زيي قلتي هدا عارف..
اميحه؛كان بيعرف منك انتي انتي تفضحي في روحك لما ديرى حركات غريبه عليك..
سكتت طوبى وهي مضايقه..
اميمه وهي تشوفلها بأسف لحالها وتساؤل؛باهي لعند امتى ياطوبى !
شبحتلها طوبى وفي عيونها هلبه كلام بس اللي قالاته بلسانها؛خلاص اميمه سكرى ع الموضوع..
وكلت من البوريك..
تنهدت اميحه ومشت بتسخن الفدى..
طوبى وهي تاكل،باهي مش صامت هلبه..
اميحه؛حاطه شويه بس انتي تعرفي حسين يحب الماكله الحانطه...
طوبى:تو تجيبله عمتي...ايه حقه وينهم لتوا!؟
اميحه؛قالت بعد مانكملوا الحوسه نجوكم.. خاطرى اليوم هكي نديروا جو حلو.،ع خاطر فردوس والبنات..
طوبى قعدت ساكته وهي تفكر في حال اختها بضيق..
🍃وبرا هالكوجينه من برا...
ورا سور جنانها... في جنان حوش لطفي
شهقت الجارة الجزيرة..او رقيه وهي تقول:نبيله المحاميه!
مطيره؛ايه ياحنه نبيله المحاميه..
ضحكت وقالت؛شكله معاش يخاف الحاج محمد.. !
مطيره بضحكه؛حطم القيود وتحرر حتى هو..
رقيه:والله مامصدقه! الحاج محمد بيديرها وبياخدع مغليه وامة محمد شاهده..
مطيره؛ياخد والله طيح سعده ومزاله.. مالا نبيله المراة الراقيه المتعلمه بترضى بواحد زى هو..شيباني وبأحفاده وعنده العنقروفه مغليه..
؛تبي الحق مستحليتها فيها من كثر ماساحنه كبدي وهي تدوى عليه.. الحاج محمد يشوف فيا زى الميه الشويه.. الحاج محمد يحلف براسي ومايحنث..
مطيره؛طيح والله سعدها... الكذب هدا تكذبه ع اللي مايعرفش..
ضحكت وقالت؛والله وصار منك الحاج شنيبه وولى راجل.
حطت مطيره يدها ع فمها وضحكت بعدين حولتها وقالت؛
عطيك دعوة يامنجوهه..
وفي نفسها تقول..
"باذن الله ماتجي العشيه الا والشارع كله عارف"
🍃🍃🍃🍃🍃
في مكتبه مقعمز.
يشوف في وراق عقود قدامه ويراجو فيهم..
قطع عليه تليفونه اللي دن..
خداه وفتح الخط وقال؛ايوه..
"اهلا استاذ مختار..اني الدكتورة وفاء"
هو قال؛شن صارا؟
"مزبوط كلامها استاذ عاقر وماعندهاش ادنى امكانيه انها تجيب صغار"
هو رفو حواجبه وقال؛اعتبرى امورك العالقه كلها تيسرت دكتورة..
"مادرتش الا واجبي استاذ"
هو قال؛عارف بس نبي نخدمك ولاماتبيشا
ضحكت وقالت..
"في حد يقول للخير لا"
ابتسم وهز راسه وهو يقول؛امتى مانحتاجوك نلقوك..
"واني ديما في الخدمه"..
هو قال؛تمام..تشاج..
وسكر. بعدين حط ع رقم صابرين وكتب رساله وبعتهها..
وحط التليفون ع الطاوله وكمل شغله..
🍃وهي في دارها..
راقده ع سريرها بالجنب وفي يدها تليفونها خاشه ع محرك جوجل للبحث..
تبحث عن حاجه طبيعيه مضمونه تجهض المراة الحامل من غير ماضرها..
كانت تبحث وهي تبكي .
فجأة وصلتها الرساله..
ناضت قعمزت وفتحتها...
(%100)
بدت ع وجهها ملامح البكاء...وقلبها كان موجوع ع الآخر..
اللي صار معاها اليوم اهدر ماقعد من كرامتها..
ولت انسانه بلاقيمه تماما.. معاش عندها غالي تملكه كله
ضيعاته وفرطت فيه...
وهدا علاش توا تشوف في مختار حياتها كلها مكسبها الوحيد..
تعلقت بيه ومعاش تقدر تعيش من غيره..وحدير كل شي بش تحافظ عليه...
🍃🍃🍃🍃🍃
بعيونها اللي تنسكب منهم الدموع..
كانت تشوف في صورة اغلى انسان ع قلبها..
اختها الكبيره وامها الثانيه سدره.
ع السرير رايحه في سبات عميق.. وحواليها الاجهزة..
منظر يقطع فيها بالعرق..
وحداها مرت عمها تحكي..
صفيه ودموعها في عيونها؛وين نقرالها القرآن نبدا نتخيل فيها زى اللي متبسمه ووجهها مرتاح.. تعرفوا الدكاتره غادى قالوا نفسيتها تتأثر هلبه ودماغها يولي ناشط وين تسحعه..
رفعت طوبى عيونها المدمعه وهي تشوفلها..
أميمه بدموعاكويس بكل تستجيب معناها..
شبحتلها طوبى وقالت؛شن يعني!؟
اميمه؛مريض الفيبوبه لما يقعد دماغه في حالة نشاط دائم معناها انه سليم وقاعد يتحسن واحتماليه فيقة المريض تولي عاليه ومرات تكون في وقت قريب..
طوبى بأمل ورجاء:يارب..
مطيره وهي ترشف،باهي توا يوسف غادى بيخدم قال المحجوب من بيقعد حداها يقرالها قرآن؟
صفيه؛مش خادم اليوم كله يامطيره..وبعدين يوسف مش قادر يفارقها كان تشوفوا شن صاير فيها تقولوا هادم صغار بطن وحده توامه حق مش خوت من الرضاعه..
ابتسمت وقالت؛ياروحي..
فردوس ابتسمت ابتسامه باهته وقالت؛ربي مايحرمهم من بعض...
صفيه؛آمين..
ع خشة آلاء واريج عليهم وهما يقولوا:السلام عليكم..
ردوا السلام..
وعيون طوبى واميحه ع آلاء..
كانت في قمة اناقتها وحاطه مكياج وطالعه زى العاده حلوة بزياده..
سلحوا هي واختها ع صفيه بعدين قعمزوا..
اريجاتعبتي في السفر؟
صفيه:لا الحمد لله ربك سهلها..
آلاء بابتسامه:كنتي في الجنه ولا؟
صفيه:اني مادهورتش فيها لكن المستشفى جايه في مكان سبحانك ياربي تقولي الجنه كيف!؟
آلا؛ امنيتي نسافر لسويسرا ربي يكتبهالي... وضحكت..
طوبى كانت تشوفلها بإمتعاض تهدرز عادي ولاسألت ع خالتها..
وامها ماكانتش طايقه تشوف في وجهها..
اما اريج كان تسحن في روحها منها من لامبالاتها وانانيتها..
وهدا حال مطيره..
الوحيده اميمه اللي كانت تشوف لعيون آلاء.
وحست انها قاعده تمثل وتتصنو في اللامبالاة والبرود..
🍃"اسف اليوم مانقدرش نخرج الحلقه سامحني"
: خيرك مهند لاباس!؟
مهند بضيق؛جوى مش تمام ومش قادر نركز في شي..
لبس شنطة اللاب توب متاعه وقال:اسف مرة تانيه آرام..
:ولايهمك مهند المهم راحتك..
ابتسم مجامله وقال:تسلمي.
خدى نظاراته وتليفونه ومق القهوة متاعه وقال:سلام..
ومشي..
وهي تبع فيه بنظراتها القلقه وقالت؛سلام..
🍃🍃🍃🍃🍃
الساعه 500عصرا..
في صالة حوش علي الواعر..
كانوا النساوين مقعمزات يهدرزوا حدا عالة الشاهي اللي دير
فيها مطيره..
وفي المربوعه..
الحاج علي وولاده لطفي وعبد الحطلب..
وحفيده حسين اللي ناض من حداهم ومشي للصاله..
قبل ليخش تنحنح..
مطيره قالتله:تعالى حسونه الحق..
خش عليهم وهو عاقد حواجبه باستفراب:ع شني نلحق..
وقعمز حدا امه..
مطيره:الأكبر منك والاصفر منك تزوجوا حتى المتزوج بيثني وانت قاعد عانس..
قعدوا يضحكوا..
حسين؛يادى السيرة الهباب..
صفيه؛علاش تقول هكي!
مطيره؛الحق روحك قبل يفوتك القطار..
حسين قعد يشبح لعمته بامتعاض..
غير عيونه لطوبى لما قالت؛خاطرى نديروا حاجه نتفائلوا
بيها.. فرحنا حسين بالله عليك..
أميمه كانت مركزه ع خوها وشافت كيف قاعد يفرك في صوابعه يده اليسار بالإبهام ..
بعدين شافت لعيونه بانت فيهم لمعة الدمعه وهو يقول:هدا
علاش تبوني نتزوج؟!
مطيره؛اكيد نبوك تتزوج ع خاطرك بش دير عيله ونشوفوا صغويرتك..
طوبى:انت غير انوى العروسه واتيه..
هما شافوا لطوبى وهو قال بابتسامه:صاحبتك!
طوبى؛لالا صاحبة ميحو..بنيه زى العسل الله يبارك وطالعه عليك من عند غادى حتى من اسمها..
صفيه بفرحه؛قصدك حسنا إ؟
طوبى بابتسامه؛ايه حسناء.
اريج؛حسين وحسناء يهبلوا!..
الاء؛ايه خالو بالله عليك وافق البنيه مش عاديه ليك من عند غاد ي..
مطيره؛تكلمي اميحه..
هو شاف بنظره مع ابتسامه وجعوا قلبها عليه ابتسمت بالغصب وقالت:صاحبتي ونعرفها كويس ونودهالك حسونه بنيه مافيش منها..
هو غير عيونه عنها ونزل راسه بعدين ابتسم وهز وهو يقول؛تمام..
كلهم بصوت واحد؛الحمد لله...
قام عيونه وشاف لطوبى..
لقاها تشوف لأميحه بضحكه وغمزتلها بعينيها..
انقهر منها هلبه..
وقاللها في .
"ماأقساك ياطوبى.."
🍃🍃🍃🍃🍃
خشت للشقه وهي تقول..
صابرين؛هي خشوا..
خشوا حمزة وجورى وقعدوا يرموا من رجليهم..
وهي سكرت الباب ورمت من رجليها ومشت وراهم بعد خشوا لأمهم...
في الصاله..
كانت نجاة مقعمزة تتفرج ع التلفزيون..
وحداها معاذ راقد..
وين خشوا عليها صغارها قالت؛روحتوا ماما..
جورى:سكرت الدرجه في تطبيق الرياضيات..
نجاة بابتسامه فرح؛صحة لبنيتي الشاطره..
وصابرين واقفه تشوفلهم بعدين قالت:شريت قهوة بيضا تشربي معاي؟
نجاه وهي تشوف في كراسة اختبار جورى؛ايه..
مشت صابرين من حداهم لدارها..
خشتلها وحولت وشاحها وجاكيتها وقعدت ببلوزة وسروال..
طلعت من شنطتها علبة دوا وحطتها في جيب سروالها وتأكدت انها مش حتبان وهي في جيبها..
بعدين مشت طلعت من الدار بسرعه وخشت للكوجينه
وبدت دير في القهوة البيضا..
بسرعه.. وكأن في حد يجرى وراها..
ضميرها اللي قاعد فيه شوية روح كان يأنب فيها ..
وهي تتجاهل فيه..
المهم دير مافي بالها..المهم تقطو الحبال اللي بين الجالي واختها..وبعدين تفرقهم عن بعض..
وبهكي تكسب رضا مختار مدى الحياة..
بعد ماطيبت القهوة..
وصبتها في مق لنجاة..
طلعت الدوا من جيبها..وخدت منه حبه..
حطتها في المق.. وقعدت تحرك فيها بش ذوب فيه..
وكانت دير في هدا كله بايديها اللي يرجفوا..
وين جت بتصب لروحها..
وقفت.. معاش قدرت تشد دموعها..
بصمت.. غمضت عيونها بشده وقالت بألم؛
ياربي..
بعدين فتحتهم وشبحت للحق اللي داراته لأختها..
وقعدت تتخيل في حال نجاه بعد تاخده..
اكيد حتتعذب..حيقطعها الألم..حتتوجع نفسيا لما تفقد ومرات دير في روحه حاجه..
هدا كله خلا قدرة صابرين ع كبت صوت ضميرها تتلاشى..
خدت المق.. وصباته كله في اللاوندينو وهي تبكي..
تبكي وهي كاتمه صوت بكاها...
كرهت روحها هلبه لما فكرت واقدمت ع ايذاء اختها..
اختها اللي ياما تحملت ع خاطرها وياما عانت..
ولعند اليوم وهي حاويتها عندها وولامرة تخلت عنها..
حطت الحق في اللاندينو..
وفتحت الميه.. وقعدت تمسح في دموعها ..
بعدين التفتت لكيسة القهوة بتاخدها بش دير غيرها..
وين التفتت لمحت
رجعت عيونها للباب..وانصدمت..
وين شافت نجاه واقفه تشوفلها بنظرة..
مليانه حزن غارقه في الدموع...
🍃🍃🍃🍃🍃
"اسمعي اني نتحمل كل شي وكله عندى عادى الالن حد يمد يده ع راما.."
عواطف؛درت هكي من خوفي عليها اني عمتها نضربها ونضرب عليها.
محي بآنفعال؛تي اني بوها بوها..عمرى مامديت عليهالليوم.. ولانخلي في امها تشد حتى وذنها..عماتها ع عيني وع
راسي.. عاركوها هزبوها عاقبوها بأي طريقه الا الضرب بنتي ماتنضربش..
نجمه بخوف:باهي ولدى باهي والله معاد نخلي يقوللها حولي من الطريق..
محي؛اخر مرة يام ولا ورب العزة مانخليها تنزل
ولاتشوفوها..
عواطف ودموعها في عيونها؛خسارة ماكنت دايرتها بنتي مش بنت خوك..
محي؛هادى بنت خوك مش بنتك...لما ديرى بنت اقتليها حتى القتل..
ومشي وهو معصب ويقول..جايبهم من الشارع اني..)
نجمه قعدت تشوف لعواطف بضيق..
وعواطف مشت لدارها وهي تبكي .
خشتلها وخبطتها بقوة..
تنهدت امها بألم وقالت؛حسبي الله ونعم الوكيل..
ونجاح في الكوجينه..
كانت واقفه دير في القهوة وهي تذرف في الدموع ..
الكلمه اللي قالها محي لعواطف.. وجعت قلبها ع اختها أكثر ماهو موجوع...
🍃وفي الدار..
كانت عواطف مقعمزه ع سريرها وهي مربعه رجليها
وحاطه يدها ع عيونها وتبكي وهي تقول..
"حسبي الله ونعم الوكيل.."
☘☘☘☘☘
"والله يافيزة بنقعد ع حنه خير مانتصلع"
فايزة بضحكه؛في صبغات آمنه عمتي مانستخدمش في غيرهم لزبابيني..
طوبى؛الصبفه ماديرش اللي دير فيعه الحنه..
فايزة؛انتي ياعزوز مكمله اسكتي خيرلك..
فردوس وهي مبتسمه نفس الابتسامه الباهته؛عندها الحق..شوفي شعرى ولى شعرتين من الصبغه..
آلاء؛ماك تستعملي في نوعيه أى كلام..
شبحتلها طوبى..
وامها واريج يحاولواع قد مايقدروا يتجاهلوها بش ماينفجروش فيها..
"السلام عليكم"
فردوس؛روح عز..
اريج بضحكه؛خش عكيد خش..
وهما يضحكوا..
خش عليهم معتز وهو مبتسم بإحراج من فايزة وبناويتها
قال:السلام عليكم..
ردوا عليه كلهم؛وعليكم السلام..
اريج؛من روح بيك..
كلهم شبحولها بنظرات تعجب..
وطوبى قالت؛قوللها عزو ماتعرفش..
معتز بضحكه؛تنوض تحطلي غدى نقوللها..
ضحكوا..
وهي ناضت تقول:من عيوني يابوبو عيوني..
وشدت يده و قالت؛تعالى معاي..
ومشت بيه للكوجينه
فردوس؛غير خليه ياخد ذفس..
مطيره؛تبي تعرف من جابه ماعندهاش صبر..
ضحكوا..
وفردوس كانت الضحكه متاعها مش من قلبها..
مش قادره تنسى اللي صار حتى شويه..
وآلاء.. اللي كانت مستمره في تصن اللامبالاه كانت تكمد في نفسها بقوة....المهم عندها مايبان عليها شي قدامهم ولاقدام روحها حتى..
🍃🍃🍃🍃🍃
"انتي عارفه اللي نحس بيه..مريتي بيه وقاعده فيه يانجاة..
سامحيني لأني كنت هازيه عليك وقتها لما جربت عرفت
انتي شن كنتي وقاعده تحسي.."
ونجاة تسحعلها ودموعها ينزلوا..
صابرين ببكي؛قبل كل اللي كان يهمني في الراجل فلو وشن عنده... يهمني دلاله ليا وانه مايستخسر فيا شي..لكن مو مختار اللي يلعب بالفلوس لعب.. اللي عطاني حاجات حتى في الحلم ماشفتها..لقيت روحي ماهامني شي من هدا كله غيره هو.. مختار ولى يجرى في دمي يانجاة نحس في روحي سيبني نموت..
وقعدت تبكي..وهي تضغط بأصابعها بقوة ع رجليها من قوة الالم اللي كانت تحس بيه..
نجاه رشفت ومسحت دموعها بعدين قالت؛عمرى كله واني نتمنى تعيشي خير من عيشتي.. وتكون ليك حياة احسن من حياتي ومايصيرش فيك اللي صار فيا..
والله ياصابرين ماواجعني اللي جيتي بديريهولي قد ما وجعني حالك.. الحال اللي وصلتيله...كيف عاجزة هكي ومنهارة ع خاطر راجل.. صابرين ماتوليش زيي بالله عليك مادمريش روحك.. خليك اقوى مني..ديرى اللي اني ماقدرتش نديره واعفسي ع قلبك ع خاطرك انتي..بشمايستعبدك حد ويقعد يذل فيك لأنك تحبيه
صابرين وهي تبكي؛ياريت نقدر..
ضمت نجاة اختها بقوة وقالت؛تقدرى والله تقدرى..تقدري.
انتي مش زيي صابرين انتي اقوى مني بهلبه..
صابرين زادت ضمتها بقوة وقالت بنبرة باكيه؛سامحيني بالله عليك
نجاة ودموعها تنزل:مسامحاتك حبيبتي مسامحاتك
🍃🍃🍃🍃🍃
"لاعاد تتصل لاعاد تنشد. توصل لهني وماتوقفش عليا حتى خمسة دقايق معقوله"
الجالي بضيق:عارفه ظروفها يام..
مغليه؛ظروف شني هادم اللي يخلوها ماتقيمش تليفون تسأل فيه ع عزوزتها. نجاة يوميا تتصل بيا،.عيشه اللي في قطو الدنيا وين تتصل بمحمد تقوله عطيني حناك نكلمها.. وهي اللي بيني وبينها خطوه مستخسرة توقف عليا حتى خمسه دقايق..
الجالي قعد ساكت وهو مضايق..
ونسرين ونضال ومعاهم محمد المهدى يشبحوله..
شويه قال نضال،يام بالله عليك هدى شويه. طوبى تعرف الواجب والأصول وهدا شي شفناه كلنا بعيونا عمرها ماقصرت راهو الفتره هادين عندهم مشاكل.. عمتي تعاركت هي شيابينها و سيبتها حوشها بكل ...
تفاجئوا كلهم..
والجالي قال:من قالك؟
نضال:مرتي من بيقولي يعني!..
عقد الجالي حواجبه ورفع الأيمن شويه بغضب..
مغليه؛علاش شن صار بيناتهم!؟
نضال؛مش مهم يام المهم ان الوضو في حوش عمي لطفي
متفركس هلبه مش سادهم اللي صاير لسدرة وبعدين طلاق
اميمه وتوا المشكله هادى ربي يكون في عون الناس يام..
تنهدت مغليه وقعدت ساكته..
نسرين بضيق؛ربي يكون في عونهم ويفرج عليهم..
محمد المهدى وهو يشوف للجالي؛عمي سمعتك بكرى تقول
بتسافر..
رفو حواجبه شويه وقال؛ايه لتركيا عندى خدمه غاد ي..
ضيقت نسرين عيونها وهي تشوفله..
مغليه؛بتمشي معاك طوبى؟
الجالي؛نقولك خدمه يام شن بندير بيها رافعها معاي..!
مغليه؛امتى..
الجالي:مسافر الخميس بنروح الاحد ان شاء الله..
مغليه؛تمشي وتجي سالم يارب..
هو قال؛آمين..
بعدين ناض وقال؛هي اني مروح..ماتبوا شي..
نسرين؛اقعد تعشا..
هو حرك راسه بالرفض وقال؛تاعب ونبي نرقد..تصبحوا ع
كلهم قالوا؛قدامك كل خير.وانت من اهله..
وهو مشي طول طلو من حداهم..
مغليه؛جوه مش عاجبني..
نضال،بالعكس كان عادى انتي اللي لخبطيه ياحاجه..
محمدبدف ايباري..
شد نضال ضحكته وهو يقول؛تحشم.
ومحمد يشوف لحناه كيف تشبحله بريع عيون ويضحك ع الصامت..
نسرين بضحكه؛تو بتستلموا امي ببرادتكم اطلعوا انت وياه خيرلكم..
نضال؛والله مستاحشها ونبي نهدرز عليها ليا هلبه عليك يام..
مغليه:ليك هلبه مارقيتهمش الزوز.
شبح لمحمد باستفراب وقاله؛شن هما؟
محمد هز راسه وقال؛قصدها الضغط والسكر..
رفع حواجبه ونزلهم وهو يقول:اها.وشبح لأمه وقال..يامبوي وين..
هي.تجاهلتهم وقعدت تشبح للتلفزيون..
نضال؛يام نسأل فيك بوي وين..
محمد :واضح ماتعرفش..
هو قال؛مشكله والله يام مشكله..راجلك يطلع من الصبح
يروح بعد الحفرب ومرات يبات برا الحوش ويقولك في
زليطن عند خوى وانتي مش مدورة...
محمد؛ركز كل خميس وجمعه عند خوه..
نضال؛تقولي اني ركز قوللها هي..
محمدءايه صح..ركزى حناي..راهو زى الميه في الغربال..
نضال؛من هو؟
محمد؛الثقه في الرجاله قصدى..
نضال شبح لأمه وقال؛ايه صح زى ماتقول ام زكي قال
يامأمنه بالرجال يامأمنه للمي بالغربال..
نسرين بضحكه:اطلعوا ياتافهين خيرلكم..
نضال وهو يشوف لامه كيف تتفرج ع التلفزيون:شكلها تفكر
فى كلامنا..
محمد؛مازال تفكر هيا!؟
نضال؛حناك تراجو مستواها معاش زى زمان ولا
يام..يام..امي..يما.. مامتي..ماميشكو.. مغليه..
محمد شافها كيف تمد في يدها للريموت بضحكه قال:حق الرد جاي..
شبح نضال للريموت وقال:ايه غيرى عن عمي الهادي اللي
حاط راسه براس كناينك وحطي ع رضوى ولحقي ع روحك قبل لطيح الفاس بالراس..
غمضت عيونها ورفعت يدها اللي فيها الريموت وهي تقول
بوعيد:قسما بالله كان ماطلعتوا توا انت وياه مصيركم
اسود..
نسرين بضحكه؛تي نوضوا اطلعوا يامصايب..
نضال مط شواربه للأسفل بإستياء بعدين ناض وهو
يقول:نوض نوض..قالوا زمان النصيحه بجمل وحناك
بالبلاش ماتبيش تاخدها..
ناض محمد وهو يقول؛حني اللي علينا درناه عم..
نضال:ايوه ع قولتك ماتجيش بعدين وتقولي علاش
ماوريتوني علاش ما وقضتوني..
ومشي طلو ومحمد معاه والزوز شادين ضحكتهم..
نسرين فعدت تضحك..
وامها شبحتلها بطرف عينها بعدين شافت للتلفزيون وهي
تقول؛ماجبت فيكم عاقل..
ويجيها صوت نضال من ورا الباب...
"والله مانك خير من امي يالفعه ياضرت امي"
انفجرت نسرين بالضحك..
ومغليه قالت؛والله والله يانضال والله والله نلزك اسبوع
وادحنس بعدين ع حوش الواعر..
جاها صوته من وهو يغني..
"هالنهار تمنيته طلبت العالي ولقيته..لزيني يام بالته عليك
لزيني حطيني في الصندوق الكبير هداكا عرفتيه اللي
حاطه فيه قرابيجك اللي من عام الطليان.. وحطيني قدام
حوش عمي لطفي.. واكتبي في ورقه...احتووه ووكلوه
ماذاقش حنان ولاعرف طعم الامان ولا طعم الطعام طول
عمره"
مغليه:خزى قرد معفن...
بين راسه من الباب وقال:بالته عليك ديريها..
ويدرق راسه قبل مايوصل فيه الريموت اللي انضرب بالباب
وطاح وتنطرت منه كل حاجه في تركينه..
🍃وفي نفس الوقت..
في حوش علي الواعر...
وفي وسط اللمة الدافيه..
دن تليفون طوبى..
وين شافت المتصل ناضت وطلعت من حداهم..
وحسين معاها بعيونه..
🍀في الجنان..
طوبى؛ايوه جالي..
"اني برا وتي روحي واطلعي"
طوبى؛باهي خش شويه سلم ع بوى وجدى.
"طوبى تعبان وراسي مصدع اطلعي توا"
تفاجنت برده وضايقها هلبه..
بس خلت روحها هاديه وقالت؛باهي..
بعدين سكرت وهي مضايقه ومشن خشت داخل..
خدت بالطوها وشطنتها..
ومشت خشتلهم وهي تقول؛هي بالسلامه ياعيله..
مطيره؛قعدتوا تعيشتوا العفو!
طوبى بابتسامة مجامله؛الجالي تاعب من الخدمه ويبي يروح يرقد..
مطيره؛باهي باهي..في امان الله بنيتي..
هي قالت؛تصبحواع خير.
كلهم ردوا عليها باصوات متقطعه:قدامك كل خير..
مشت طوبى..
وشويه وناض حسين وطلو وراها واميحه تراقب فيه وهي مضايقه..
لبست طوبى بالطوها بعدين كندرتها ومشت طلعت..
شافها محي اللي كان واقف فم باب حوشهم وهو يهدرز ع واحد من الجيران..
وين يشوفها قلبه يوجعه عليها يعز طوبى من لما كانت صغيره ومش راضيه اللي صاير فيها..
وهي تمشي بإتجاه سيارتها..
ركبتها وشافت الجالي واقف قدام محل الحلاق التونسي يهدرز هو وياه..
دارتله كلاكس..
هو التفت شافها هز براسه بعدين رجع شاف لفراس وقاله؛
ماقتلك فراس تمام..
زي
ابتسم وهز راسه وهويقول:تمام..يعيشك..
ومشي الجالي لسيارته وركبها..
وفراس قاعد واقف قدام الحلاق يشوفله..
كلكس الجالي لطوبى..تحركت بسيارتها وهو لحقها..
وعيون حسين معاهم وهو واقف فم حوش جده..
فراس بعد ماكان يشبحلهم..شاف لمحي الدين ولقاه كاين
يشوفلهم حتى هو.. بعدين غير عيونه وشاف لحسين..
حسين لما غير عيونه عنهم شافله..
حياه فراس بحركة اليد..
هو ردهاله..
ورجع فراس خش للمحل متاعه مرة تانيه..
🍃وفي حوش المهدي..
تحديدا شقة التارقي..
اللي كان يفرش ويجهز فيها لاهله اللي جايين يوم الخميس
من الكفرة..
وهو واقف من بعيد يشوف للدار متاعه؛هكي كويس..
خل نعدى نشوف الدار التانيه..
ومشالها وفتحها يشوف فيها؛ماشي حالها نباتوا فيها نحنا.
بعدين شبح للفيرندا المسكره..تنهد بضيق وسكر الباب..
دق باب الشقه..
عبد القيوح؛ربيع..
ومشي للباب وفتحه طول..
وقعد واقف في مكانه يشوف للي قدام الباب بنظرة مفاجئه وفي نفس الوقت عدم تقبل.. وحواجبه معقوده..
حسين بابتسامه استفراب:شفت شيطانا..
رد عليه؛حاشاك..
هو قاله؛ضيف مش مرغوب فيه..
وخر عبد القيوم عن الباب وقال:تفضل..
ابتسم حسين وخش وهو يقول؛يزيد فضلك..
سكر عبد القيوم الباب وهو مش طايق روحه..
حسين شاف للشقه وقال؛فرشتها كلها..
عبد القيوم جي جنبه وقال؛تفضل خش..
مشي حسين خش داخل وهو يقول؛ولت ادفى من قبل ولو ان الشتي يعتبر تم خلاص..
وخشوا للدار. وقعمز حسين. في المكان اللي تعود يقعمز فيه وعبد القيوم قعمز مقابله..
حسين شبحله وقال؛شن جو..
عبد القيوم بملامح عدم تقبل؛تمام الححد لله..
حسين؛عبد القيوم شن في!؟
عبد القيوح؛في شني!؟
حسين؛لاجديات عبدو انت منقلب 180 درجه بالذات معاى اني..من بعد ماوليت وانت متفير هلبه..تكلم فيا بالسيف تشبحلي في شبحات مش عارف كيف..زى اللي مش طايقني بكل.. والله ياراجل قعدت نراجو في روحي ندور ع حاجه درتهالك زعلاتك وخلاتك تاخد موقف مش لاقي..بالك اني درت حاجه مش متفكرها فكرني..
تنهد وقال؛حتى لو درت شي انا مش النوع الحقود ولانحب
ندس في قلبي مش كل حد يستاهل ينزعل منه..
حسين؛نبرتك ولهجاتك متغيرات هلبه ياعبد القيوم..
قاله؛لاابدا انا هك من يوم من يومي.. وبعدين تريح انت
مادرتلي شي ولاشفت منك غلط ولاعيب..
حسين؛بتقنعني توا وانتي تكلم فيا وتشبحلي هكي انك مش واخد مني موقف!
تنهد بعدين قال:انا جوى مش تمام معكر شويه..
حسين؛باهي علاش سمانا صحاب مش بش تحكيلي ونحكيلك بالك نديرلك حل كان في عندك مشكله ولا ع الأقل نغيرلك جوك..
عبد القيوح؛تو نروق بروحي..
حسين؛الموضوع ليه علاقه بيها..
عقد حواجبه وقاله؛انساه الموضوع هذى معاش نبي نحكي ..
هز راسه وهو يتنهد بحسره وقاله:عندك حق.. فاهم
عليك..حتى اني حاولت نسكره لكن ماقدرتش..
شد عبد القيوم ذقنه بيده وهو يحاول يتمالك اعصابه لما
زبطه بيحكي عن طوبى..
حسين؛تعرف خلتني ناخد قرار ان شاء الله ماتكونش
نتيجته عكسيه عليا..
عبد القيوم:قرار شني!؟
حسين؛اليوم بكل اريحيه فتحت معاى الخطبه تبيني
نخطب..اقسم بالله لو نقولك ياعبد القيوم وقتها كأنها
خدت موس وحطاته في قلبي وقعدت تحفر فيه حفر وهي
تقترح عليا من نخطب...
وحسين يدوي عنها..
ودرجات الفضب عند التارقي قاعده درجه درجه..
حسين؛ماريتش في حياتي اقسى من هكي..اقسم لك
بالله وبدون مبالفه اللي ريته منها ماريتاش من عدوى في
الجبهه..
ويزيد غضب التارقي وهو يشوفله بنظرات حاده وحواجبه
معقوده..
حسين؛باهي تخليني ننساها وبعدين تخطبلي وتقيم عرسي
ذي ماتبي.
ووصل الدم للراس..وانفلت فيه مرة وحده وقاله..
ياراجل قتلك قبل طلعها من عقلك معاش تحكي عنها
معاش تفكر فيها راهي ع ذمة راجل تاني..عيب...عيب
عليك والله عيب..
عيب حتى في حق رجولتك..تخيل روحك توا انت متزوج وحده راجل تاني يحكي عنها نفس كلامك توا شن تحسا.. اشر عليه وقال..بحت في المرايه شوف وجهك كيف قعدا.. خليها اختك من اليوم وغادى.. وفكر في روحك عدى زوج ودير عيله خلاص هذى وقتك..ولوح ام الماضي ورا
ظهرك..تمام..إ
حسين وهو مصدوم ومضايق لان كلام عبد القيوم احرجه
قدامه وقدام نفسه قاله؛كلامك مزبوط وعندك حق..
ناض وقف وهو يقول؛ايوه سلم خيي.،خلك من الحب
والخياب والكلام الفاضي..تشرب شاهي؟
هز حسين راسه بالموافقه..
هز عبد القيوم راسه حتى هو ومشي طلو من حداه وتوجه
للكو ب.
خشلها وخدى براد الشاهي..حطه ع الفاز لكن ماولعاش..
قعد واقف يفكر في اللي قاله توا..وقال لنفسه..
"قداش انت منافق وكذاب ياعبد القيوم..تبيه يدير اللي انت
ماقدرتش ديره. ع اساس تنصح فيه... انت قلت هالكلاح
من غيرتك وبس..انت اولى بالنصايح اللي تعزق فيهن يمين
ويساد
غمض عيونه وتأفف..
"امتى بيجوا ماليك"
فتح عبد القيوم عيونه وشغل الفاز وهو يقول؛كيف
عرفتع
حسين بضحكه؛من عمي لطفي..
هز راسه بعدين قال؛الخميس..
قاله؛نبوا طلعة بر..نفيروا جو درهت كبدى من طرابلس
وزحمتها..
عبد القيوم وهو يجامل فيه مجامله؛تو نشوف..
🍃وقعمزوا شربوا الشاهي مو بعض.. ومع الهدرزة انطلق
عبد القيوم مو حسين وهدرزوا في كل شي وعن كل شي
طبعا..ماعداها...طوبى..
🍃🍃🍃🍃🍃
"خيرك قالبه وجهك"
شبحتله وهي تقول؛كيف نقولك انزل سلم ع بوى وجدى
وتقول لا..
الجالي؛ماقلتش لا..
طوبى؛قصدتها..
الجالي تتأفف بضجر وغير عيونه عنها..
هي قالت؛شوف قداش ليك معاش جيت ولادورت ولاسألتهم حتى بالكذب عن حال سدرة..
الجالي؛والله ياطوبى حتى انتي ليك فتره مش مدورة ماليا
وماسألتيهمش حتى بالكذب عن حال المهدي..
هي سكتت وقعدت تشبحله بعصبيه وبس..
الجالي؛معقوله بينك وبينهم خطوتين ماتمشيش تسلمي
خمسه دقايق..حتى بالتليفون
ع عزوزتك وتهدرزى عليها
معاش تنشدي عنها..
طوبى؛كيف عرفت!؟
الجالي؛كيف ماعرفت عرفت.. عقد حواجبه وقال.. وبعدين
شن قصدك بيه السؤال هدا ترا!؟
سكتت مرة تانيه..
الجالي؛مش انتي اللي يوقضوك ع واجباتك ياطوبى..مانبي
حد يشد عليك شي..مانبي حد يشدع مرتي اني شي
ويقعدوا يقارنوا بينها وبين غيرها....
هي قالت؛عندك حق اني قصرت شويه بس انت عارف
الظروف..
الجالي:لامش عارف شي..اني مانعرف شي لأنك ماتحكي
في شي..انتي وكان تلقي حتى طيحة سدرة مانسحعش
بيها..
هي قالت؛شن تقول جاليا..
الجالي؛في الحق.. معقوله نعرف من نضال خوى اللي صاير
لأختك فردوس!.
طوبى بضيق؛خصوصيات غيرى مانحبش نحكي عنها..
الجالي؛اختك اللي تدوى عليها ع فكره.. واني اللي يصير في
حوشنا ومو خواتي نحكيلك فيه عادى جدا..لأنك مرتي
واني وياك واحد وعندى فيك كل الثقه لكن الباين انها مش
متبادله..
طوبى؛ماتكبرهاش وتعطيها اكبر من حجمها...
هو انفعل بعض الشي وقال؛هي كبيره بروحها ياطوبى..اني
ملاحظك راهو..ماعندكش فيا ثقه..قدم خطوة..
هي وخرت خطوه..
شافها وقال..علاش درتي هكي!؟ علاش وخرتي توا..خايفه مني ولا!..
حركت راسها بالنفي وهي تحاول تخفي توترها وقالت؛
لاالا..وعلاش بنخاف منك!..
قدم خطوة تانيه وخرت خطوة تانيه..
الجالي؛هاه عاودتيها مرة تانيه!
هي قالت؛حركه عفويه ماقصدى بيها شي!
قدم خطوه وهو يقول؛حركة عفويه!..
هي شدت روحها ومعاش وخرت وقعدت تحاول بكل قوتها
دير روحها عاديه..
وقلبها يبرق ويرعد من الخوف..
هو وصل فيها شد وجهها وقال؛معاش تخافي مني طوبى..
وخداها ليه وضمها وقعد يمسح ع شعرها وهو يقول..معاش
تخافي..معاش تخافي..
وهي تزيد تخاف..اكثر واكثر..
نزل ايديه لذراعاتها وشدهم بقوة.. بعدين بعدها عنه شويه
وقال؛وتيلي شنطة وحطيلي دبش ع ذوقك مسافر الخميس
عند جدمه
هي قريب طارت من الفرحه..بس في داخلها طبعا..
وظاهريا قالت؛وامتى تروح؟
الجالي:الاحد.غدوة العشيه نوصلك لحوش ماليك لأن
سفرتي تاني يوم الفجر..
هي قالت؛باهي ع راحتك..تمشي وتجي سالم..
الجالي:آمين..وماتنسيش خودى يوم اقعدى فيه عند ا
ي
هي قالت؛حاضر..
هو هز راسه ومشي طلو من حداها..
وهي خدت نفس وطلعاته.. والقلق مسيطر عليها من حالة
الجالي اللي باديه تسوء بشكل ملحوظ..
🍃وهو حس ع روحه..
برغم انه ياخد في الدوا بس وضعه مش مزبوط..
طلو من الفيلا بكل واتصل بالطبيب النفسي متاعه وحكاله
اللي صاير معاه..
والدكتور طلب منه يجيه تاني يوم...
🍃🍃🍃🍃
وجي تاني يوم..
الاربعاء..
21..فبراير..
مع الساعه 10:00صباحا..
درس عبد القيوم بسيارته قدام حوش لطفي..
بعدين نزل منها ومشي دق الباب..
انفتح وطلو لطفي وهو يقول؛يااهلا..
عبد القيوم بابتسامه؛اهلا بيك..جبتلك الامانه اللي قتلك
عليها الفجر..
لطفي؛قبلها شن صار في الموضوع اللي اني كلمتك فيه
متاع مدرسة بنتي..
عبد القيوم بابتسامه؛نخدمك بعيوني..
لطفي؛والله ماكنت نبي غيرك يدير الحاجه هادى ماعنديش
ثقه الافيك انت..
رد عليه يقول؛بارك الله فيك..
لطفي؛غدوة بإذن الله تمشيلهم تتفاهم معاهم..
عبد القيوم : بإذن الله..هي خل نجيبلك الأمانه..
لطفي بابتسامه؛جيبها..
☘☘☘☘☘
في جامعة طرابلس قاطع_ب
كلية اللغات .
كانت آلاء مقعمزه وفي يده كيسة هدايا كبيره شويه..
كعادتها بكامل اناقتها...
واللي يشوفها يقول هادى مافيش احسن من حالها..
كانت تسمع في تسجيل مكالمه دار بينها وبين خالتها غرفه..
"انتي غلطتي وغلطتك كبيره..بس بصراحه للوش
نبيك تسيبيه مش ليك لاهو ولا ولد عمك الخايب..انتي تبي واحد يستاهلك يعيشك ملكه..انتي ربي خلقك بش تعيشي حبيبتي ولامهند ولاوليد يقدروا يعيشوك ملكه"
هي مش مقتنعه بولا حرف من كلام خالتها غرفه..
بس كانت تسمو فيه بش تحفز روحها ع اللي بديره بعد شويه..
بعد ماكملت سماع التسجيل..
قامت تليفونها.. وحطت ع رقم مهند..
بلعت ريقها وتنفست بقوة..
بعدين اتصلت بيه..
نادى مرة وحده..
وانفتح الخط ومالحقتش تقول..آلو..
وهو..
"واخيرا.. واخيرا تفكرتي النكره اللي قريب هبل الايام اللي
فاتوا من خوفه عليك...نمشيلك الكليه مانلقاكش نتصل
ماترديش..النت ومسكرتيه.. معقوله هكي علاش دير فيا
هكي فهميني
شدت ع فبضة يدها يقوة وغمضت عيونها بعدين فتحتهم
وقالت ببرود مصطنو؛تقدر تجي اليوحا؟
هو تنهد من وسط قلبه..تنهيده وجعت قلبها..
بعديين قال..
"نقدر "
هي قالت؛ توا..
"حاضر... عشرة دقايق ونكون عندك ماتبي نجيبلك معاى
شي واني جاي"..
بعدت التليفون شويه وتنفست بقوة بعدين رداته وقالت؛
لاشكرا..سلام..
وسكرت.. ونزلت تليفونها وهي تشوفله بقهر وقالت..
الله ينتقم منك ياثريا..
🍃🍃🍃🍃🍃
وفي مكان تاني..
درست سيارة صابرين قدام العمارة اللي يسكن فيها مختار..
نزلت ومعاها حتى كيسة هدايا كبيره شويه..
وفي وذانها يرن كلام اختها..
" ديرى اللي اني ماقدرتش نديره واعفسي ع قلبك ع خاطرك انتي..بش مايستعبدك حد ويقعد يذل فيك لأنك تحبيه .
ياريت نقدر.....
تقدرى والله تقدرى..تقدرى،انتي مش زيي صابرين انتي اقوى مني بهلبه.."
زفرت بقوة..بعدين مشت خشت للعمارة..
🍃وهو كان..
مقعمز في حجرة المكتب متاعه..
شاد ورقه تخص شي مهم عنده قاعد يقرا فيها بتحعن..
خشت عليه الشغاله وقالت..
مختار بيه الانسه صابرين جت وعايزة تقابلك..
اشرلها بيده بمعنى دخليها..
هي قالت؛حاضر..
ومشت طلعت..
وهو حط الورقه في ملف قدامه ..
بعدين اتكا بمرفقه ع الطاوله وحط السبابه متاع يده اليمين
ع صدغ راسه الايمن وابهام نفس اليد عند فكه السفلي
الايمن..وقعد يشبح للباب..
شويه وخشت عليه صابرين..
قعد معاها بعيونه لين وقفت قدام مكتبه..
حطت كيسة الهدايا ع الطاوله ومفتاح السياره..
هو شبحلها ..
وهي فهمت انه يسأل "هدا شني!؟"
هي استجمعت شجاعتها وقالت؛اني لعند هني وخلاص
معاش نقدر نستمر معاك لاني تعبت بجديات ومعاش عندي
طاقه نتحمل اكثر من هكي..
كل شي جبتهولي وعطتيهولي اهو قدامك ماخليت عندى
شي..نبي نطلو من هالعلاقه زى ماخشتيلها..
نزل يده وحطها ع الطاوله وقال؛Oمعاش تقدرى تستمرى
معا انتي حره اني مانجبرش مراة تقعد معاى غصب عمها
ولافي مرة خديت من مراة هدايا جبتهالها..ولو بينا شغل
لايمكن نطلعها منه لو كانت ماشيه صح فيه..
خودي هدا كله.. وبرى لخدمتك وبالنسبه ليا اعتبريني
من هاللحظه وبرا غادى صاحب المكان اللى.تخدمى فيه وخلاص..
قعدت تشبحله وكانت تقاوم في مشاعرها المتحركه تجاهه
بكل قوة..
ابتسم ع جنب وقال؛عارف روحي ماننتساش..بس حنعطيك
فرصه تنسيني...
غيرت عيونها عنه وشافت للحاجات اللي حطتهم ع
الطاوله..
بعدين لفت ومشت طلعت وسكرت وراها الباب بقوة..
ضحك ضحكه وهو حرك راسه يمين ويسار..
بعدين قعد قعد يفني..
الهوا هوايا..
ناض من كرسيه وقعد يمشي وهو يغني..
ابنيلك قصر عالي.. واخطف نجم الليالي..
واشغلك عقد غالي..يضوى احلى الصبايا..
انا الهوايا هوايا هوايا..
ووصل في الباب وفتحه..
وابتسم وكمل يفني..
الهوى هوايا
يبقى القمر قاربنا
والليل بحر مهاودنا
والنسمة اللى تاخدنا
ترجع شايله الحكايه
الهوى هوايا...هوايا
هي انهارت بالبكي وجاته طول...
وهو ضمها وقعد يضحك وقال؛مش قتلك اني..ماننتساش..
ويجيه الرد بس ماكانش من صابرين..
كان من ذاكرة عقله..
صوت يرد عليه ويقوله..
《لاتتنسي ع فكره نسيتك وشلتك من دماغي من زمان 》
لمعوا عيونه بالدموع وقعد يطبطب ع صابرين وهو يقول.. خلاص معاش تبكي...
🍃🍃🍃🍃🍃
مقعمزة ع اعصابها..
تهيأ في نفسيتها للقائه. تمرن في قلبها ع القسوة..
تبيها تطلع منه وتبان ع ملامح وجهها بش تكون
وماتبانش مصطنعه..
بش يصدق.. ويقتنع..
شافوه عيونها جاي..
قلبها رفله..حساته بيطلع منها ويمشيله..
بس كبتاته بقوة...
رسمت ع وجهها ملامح البرود واللامبالاة وناضت وقفت..
وصل فيها وكان يحرك في راسه يمين ويسار..
ولما وقف قدامها قال؛شن تبيني ولاندير فيك..خاطرى
نعطيك كف..
رفعت حاجبها شويه وقالت:مهند خليك جدى معليشي
بنحكي معاك في حاجه مهمه...
ابتسم وحول نظاراته وهو يقول؛عارف اللي صار كله..
هي قالت؛مش عارف شي..
مهند بضحكه؛قتلك عارف ومش هامني صدقيني اني الحق
عمامك كلهم ماخشوش خاطرى ولا قبلتهم.. واحسن اللي
صار..ضحك وقال..استففر الله مانشجعش ع القطيعه بس
في ناس قطعهم خير وبركه..
هي من داخلها..
"ياربي ساعدني يارب"..
تنهدت وقالت؛مزبوط..هدا علاش نبي نفسخ...
بدت ع وجهه ملامح الاستغراب وزادت عليهم ضحكه وهو يقول:شن تبي؟
بملامح بارده/نبي نفسخ...
ضيق عيونه بعدم استيعاب وقال؛كيف تبي تفسخي
مافهمتشإم
هي تنهدت وقالت؛مهند انت فاهم قصدى..
قاطعها وقال وهو يحرك في راسه بالنفي؛لامش فاهم مش
فاهم شي..
هي قالت؛تمام تمام..ذفهمك..شوف مهند اني قبلت بيك
لسبب واحد كنت نبي نرتبط بحد ارتباط رسمي مايخلي حد
يدخل فيا غيره.. وقصدى هني عمامي..وتوا خلاص..
هو قال:شن تفترشي انتي شن تقولي!..
هي في نفسها..
"ياربي كيف ندير ياربي "
وقالتله بنرفزة؛معاش نبيك من الاخير يامهند اني مانبيكش
مانقدرش نكمل معاك واني مانبيكش..ماقدرتش نحبك..
قعد يشبحلها وهو ساكت..
وهي تشوفله بنظرات عصبيه ممزوجه بالتوتر..
هو بعدين تكلم وقال؛شوفي الفترشه متاعك هادي كلها
ماخشتش راسي..في حاجه تانيه صايره انتي ماتبيش
تقوليها..تمام..اني بنخليك الفتره لين تهدى وامتى ماتحسي
روحك هديتي وعقلك ولى لراسك كلميني..
هي قالت:مهند..
مد دده في وجهها بمعنى اسكتي ولف ومشي طول
وخلاها...
قعدت معاه بعيونها ودموعها ينزلوا وهي تقول:ياربي كيف
ندير.ياريتك خديتني وريحتني ياريت..
وهي فهالحاله..
جتها الصديقه المشتركه بينها وبين اكابر من فضولها سألت
طول؛خيركم الاء...!؟
شبحتلها الاء بكره وقالت؛برى قولي للي بعتاتك تفرح اني
ومههند سيبنا بعض خلاص...
ومشت من جنبها خدت الكيسه وبعدت عنهها...
والبنت فرحت ع الآخر ومشت طول لأكابر بس تبشرها
وهي تقول؛عطيك دعوة خليتيهم يسيبوا في الاخير..
اكابر بدهشه؛قولي والله!
: والله هي توا قالتهالي..
ضحكت بعدين عضت ع شاربها وشافت لآلاء وهي ماشيه
وتبان تبكي من المنديل اللي طلعاته بش تمسح دموعها..
🍃اما هو اللي كان يغلي من الفضب ومن داخله كان مصدوم وعقله يفكر في هلبه حاجات..
طلع من الجامعه وركب سيارته..
لما شغلها..سمع صوت دق ع مرش روشن السياره..
شبحله...وبدت في عيونه نظرات الحده..
نزل مرش الروشن والشخص اللي وراه قاله..
اكيد متفكرني صح؟
وهو يشوفله بنفس النظرات ومايبيش يرد عليه..
هو بابتسامه مستفزة قاله؛نفكرك معليشي..وليد ولد عم
الاء..
شد ع الدومان بقوة من الغضب..
وهو كمل يقول؛نبيك في كلمتين ضرورى تسمعهم..وضرورى وهلبه ..
#فلاش باك
#طوبي
......يتبع......
"ملاحظه اللي مل من الروايه يفوتها مافيش داعي يتحفني بنقده البناء"
