#طوبى "جنة طوبى"
#جمان_فريد
#الجزء_السادس_والستين"إنتفاضة الأقحوان1"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 أشعر بخيبة !
ك شمعة ضحت بِنفسها لِتضيء غرفة أعمى..! 🍃
________________________________________
فتحت عليها الباب بهدوء...
لقتها متمدده ع السرير وهي راقده ع جنبها الايمن وفايقه وتبان سرحانه..
آلاء؛بيبو..
حركت عيونها ليها..
آلاء؛صاحبتك عبير جت..
غمضت عيونها بنفاد صبر وتأففت..
والاء تشوفلها وتراجي في ردها..
فتحت طوبى عيونها وقالت؛جيبيها هني..
آلاء هزت راسها وقالت؛باهي..
ومشت طلعت وردت الباب..
ناضت طوبى قعمزت..فكت شعرها..
بعدين لماته كعكه مبعثره..
حطت ايديها ع بعضهم فوق رجليها وقعدت تراجي في عبير تخش عليها..
انفتح الباب وخشت آلاء ووراها عبير..
عبير وع وجهها باديه ملامح الضيق قالت بصوت مخنوق..
بيبو..
استغربت طوبى..
وعبير قعمزت جنب طوبى وضمتها وقعدت تبكي..
هي بخوف:خيرك عبير شن في!؟
الاء وهي تشوف لعبير بقلق قالت؛اني طالعه..
ومشت طلعت وسكرت الباب..
طوبى بعدت عبير وهي شادتها من ايديها وقالت بقلق:احكي شن في؟
عبير بنبرة باكيه؛كلمت بنت عمته تعرفي شن قالتلي؟
طوبى:شن قالت؟
رشفت عبير وقالت:قالتلي ان ولد خالها ملخبط بيني وبين بنت تانيه..
طوبى بعدم فهم:ملخبط بينك وبين بنت تانيه كيف مافهمتش!؟
هدت عبير شويه وهي تقول بنفس النبره:قالتلي انه البنت اللي يبيها وين سأل عن مكان سكنها دلوه بالغلط ع حوشكم
وقالت ماعرفش الا بعدين وحمد ربي انه ماصارش من الموضوع بش ماانحطش معاكم في موقف..
طوبى بعدم اقتناع؛الكلام مش راكب ع بعضه مااقتنعتش..
عبير؛والله وحتى اني ماصدقتش ولاخش راسى كلامها..
ويندق باب الدار..
طوبى شبحتله وقالت:خشي..
انفتح الباب وخشت آلاء وسكراته بعدين مشت قعمزت ع سريرها وقالت؛اسفه تصنت عليكم ماقدرتش نمنع روحي..
طوبى قعدت تشوفلها وهي تفنص..
والاء تشبح لعبير وهي تقوللها:اني نعرف قصتكم كلها وتوا سمعت اللي قلتيه طبعا الكلام هدا كله كذب ومافيش منه حاجه صح..هو موجوع منك وردهالك بطريقته بس..
عبير بلهفه هزت راسها موافقه ع كلام الاء وقالت؛والله حتى اني قلت هكي..
طوبى:تمام كان هكي فكرتي علاش تبكي؟
شبحتلها وقالت؛خفت يطلع منطقي كلامها ويتصدق غير اني مانبيش نصدقه..
آلاء:عبير اشبحيلي هني انتي تحبيه بجديات والا اعجاب بس..
عبير:والله نحبه ومن قلبي ياآلاء..
طوبى:عبير اسمعيني الموضوع هدا سكريه وانسيه زي ماهو دار خيرلك..
عبير برفض:لا مش مسكراته..قتلك نحبه افهمي وهو يحبني ومستعده ندير كل شي بش نكونوا لبعض..
الاء:صحه ليك دافعي عن حبك حتى لو غلطتي وشايفه ان فيها كيف تصلحي غلطك ردي بالك توخري..
عبير زادت تشجعت بكلام آلاء..
طوبى:نصيحه الاء معاش تنصحي حد..
الاء؛طوبى اطلعي منها...
فنصت فيها..
الاء برجاء:طوبى حرام خليها تحاول بالك ربي يجمعهم..
عبير بتأمل؛واني حاسه ان هكي حيصير لو حصلت فرصه ودويت معاه..
طوبى:ايوه زيدي ارفسي مش ساده المرة اللي فاتت..الثقل زينه ياعبير بالذات للبنت..
آلاء؛طوبى راك تنسي هو شن دار ع خاطرها شن بصير في الدنيا لو هي بادرت..
طوبى قعدت تشبح بآلاء وهي مضايقه عليها تجربتها مع مهند اثرت فيها هلبه وغيرت فيها هلبه حاجات..
عبير:والله تهبلي آلاء حاسه بيا وفاهمه عليا..
ابتسمت آلاء بحزن..
طوبى شافت لعبير وقالت؛باهي وين تشوفيه بش تكلميه ان شاء الله؟!
عبير؛في التليفون..مكالمة تليفون..
طوبى برفض قاطع؛لالالا اللي في بالك انسيه لوحيه من دماغك..
آلاء؛تبي رقمه؟
عبير؛ايه..
طوبى؛بلا هبال عبير طيحي من عينه هكي ومرات يسمعك كلام يوجعك..
الاء:لالا عبد القيوم مش هكي محترم هلبه وجنتل في تصرفاته مايديرهاش..
عبير تنهدت من قلبها بهيام..
طوبى:الاء اسكتي تربحي..شدت ذقن عبير ووجهت وجهها ليها وهي تقول..عبير حسين ولد عمي صاحبه هلبه قالي نوعيته صعبه مايحبش من يهنيه كان كلمتيه تو يحصلها فيك فرصه ويهزبك..
نزللتها عبير يدها وقالت؛مايديرهاش لما وقفت عليه وكلمته يومها كان محترم ع الاخر وماغلطش فيا حتى بعيونه..
طوبى غمضت عيونها بيأس..
عبير شافت لآلاء وقالت؛نبي رقمه بأي طريقه..
الاء؛ولايهمك توا نجيبهولك..
طوبى بصدمه؛حي عليك انتي..! بتحطيني في موقف زي الزفت..تو يعرف من بنت عمته انها حصلت الرقم مني فكوني من الاحراج يابنات بالله عليكم..
الاء؛قوليلهم بنت اختي عطتهولها..
وناضت ومشت طلعت..
وطوبى وهي مصدومه قعدت تنادي فيها؛الاء..الاء تعالي هني!
عبير بضجر:خلاص طوبى اطلعي منها اني وياه نصطفلوا..
طوبى وهي عاقده حواجبها بعدم رضا:تمام.من اليوم اني.طالعه من الموضوع هدا معاش ليا علاقه ياعبير..
عبير بضحكه؛مش حنكلمك فيه مرة تانيه الا واني نبشر فيك بس..
تنهدت طوبى بضيق وقعدت ساكته..
ع خشة آلاء وفي يدها تليفونها قعمزت جنب عبير وقالت؛سجلت عندك..
طوبى وهي تشوفلها؛من وين جبتيه؟
الاء:جدي ناسي نقاله في الحوش..
عبير:هيا ملي الاء..
وقعدت الاء تمل ع عبير في رقم التارقي..
اما طوبى ناضت ومشت طلعت من حداهم..
ماعندهاش جهد يخليها تفكر في امور غيرها..
سادها المصيبه اللي هي فيها...
مشت طول خشت للحمام...
🍃وفي الصاله وين مافي الجارات..
كانوا اميمه وغرفه مقعمزات جنب بعض ويهدرزوا..
غرفه؛كتبولي ع ايباري تثبيت للإحتياط لما قلتلهم عندي بنت عمي دكتوره قالوا كويس لو صار طارئ هي تضربهملك في الحوش خير..
اميمه:ان شاء الله مايصير شي..
تنهدت غرفه بحزن وقالت:إن شاء الله..
اميمه؛خليها على الله..
غرفه:ونعم بالله..
اميمه ؛خل نمشي نشوف طوبى..
هزت غرفه راسها بصمت..
اما اميمه ناضت ومشت طلعت من الصاله لدار البنات..
خشتلها لقت الاء وعبير يهدرزوا..
اميمه؛السلام عليكم..
عبير والاء:وعليكم السلام..
اميمه بتساؤل:طوبى وين؟
الاء:شكلها خشت للحمام..
هزت اميمه راسها ومشت قعمزت ع سرير غرفه..
والاء وعبير رجعوا يهدرزوا..
عبير:هادي جابتهالي خالتي من دبي..
الاء وهي تشوف لصورة الشنطه في تليفون عبير:تجنن..
عبير؛يبيعوا زيها هني تبي نقولك وين؟
الاء:وين؟
عبير:في محلات***** شارع****
الاء؛تو بعد نبيع الطلبيات اللي حطيتهم المحل نمشي غادي ناخدها..
ابتسمت اميمه ابتسامه خفيفه..
ع خشة طوبى وهي تمسح في وجهها بالمنشف..
ركزت عليها عبير وقالت بإستغراب؛بيبو..تباني زي الحامل ببطنك هادي اول مرة نركز عليها..
طوبى لما سمعتها شن قالت..
تفكرت جمله قالها الجالي شبيهه بكلامها..
حست بشي تجمع في صدرها وغم عليه..
الاء بضحكه؛تي حامل يابنتي..
عبير بدهشه؛شني!؟
اميمه؛ايه حامل في الشهر الخامس..
حطت عبير يدها ع فمها وقالت بصدمه...
حيي!!..نزلت يدها وقالت..والله العظيم مالاحظتها بكل..
آلاء:كلنا مالاحظناش من اللبس الواسع اللي كانت تلبس فيه..
طوبى حطت المنشف ع حافة السرير..ووقفت قدام وطلقت شعرها وهي تسمع في عبير تقول..
مش لبسها بس حتى حركتها ماشاء الله مش حركة وحده حامل..
طوبى خدت المشط وهي تقول؛قولوا الله يبارك..
وبدت تمشط في شعرها..
وهما يقولوا؛الله يبارك..
بعدين صاحبتها قالت...
عبير:وعلاش درقتي ياحنه خايفه من العين..
طوبى وهي تمشط في شعرها:ايه..
عبير:لاانتي اليوم مودك صفر..
آلاء:ليها فترة مش غير اليوم..
واميمه تسمع فيهم وهي تشوف لطوبى بضيق..
كان باين عليها انها منهكه وتعبانه بس قاعده تقاوم..
من عيونها كان يبان الحزن..حزن الخذلان والخيبه..
تفكرت الكلام اللي قالتهولها..ومرت قدامها كل المواقف اللي كانت تبين علاقه الجالي بنجاة..المواقف اللي كانت حاضرتها طوبى بس مش شايفه ولاعارفه شي..
اميمه حست بوجع كبير وهي تتخيل اللي قاعده تحس بيه طوبى..
مافيش اقسى من اللي قاعده تحس بيه...
تنهدت اميمه تنهيده غير ملحوظه ودعت نفسها..
"ربي ياخد فيهم الحق كلهم"
🍃🍃🍃🍃
وشويه وتروح عبير..
وبعدين الجارات....
وقعدوا اهل الحوش يضموا ويوتوا في العشي..
وطوبى وغرفه كل وحده فيهم كانت مقعمزه في جهة تفكر في همها..
☘قبل صلاة العشاء بعشرة دقايق..
جي الجالي وهو جايب الحاجات اللي طلبتهم طوبى واستقبله عمه لطفي..
🍃الجالي:الشنطه هادي عطيها لطوبى..وابتسم بإحراج وهو يمدله في كيسه وقال..وهادي حتى هي عطيهالها..
خداهم لطفي وقال؛ولدي بنسأل سؤال وجاوبني عليه بصراحه..
ملي قلبه الخوف بس مابينش وقال عادي:تفضل اسأل..
لطفي:اني راضي ع قعاد طوبى هني؟
ابتسم وقال؛اني ياعمي اللي يرضي طوبى نديره..وبعدين اني ساعات خدمتي هلبه ونروح متاخر وهي تقعد بروحها لاقدر الله كان صارت فيها حاجه وهي بوضعها هدا كيف بدير!؟
لطفي هز راسه وقال:صح مزبوط عندك حق..
الجالي:بالك انت مضايقك قعادها..
توسعوا عيون لطفي وقال بشي من الانفعال؛اني بنضايق من بنتي!؟
الجالي ارتبك لما عرف روحه بل وعجن وقاله؛مش قصدي ياعمي اللي فهمته..اني نقصد لو في حد استغرب قعادها هني وكلام الناس هدا قصدي..
عقد لطفي حواجبه وقال:اخر همي شن يقولوا الناس اني بس نبي كل شي يمشي بالأصول..والاصول انك تكون راضي بقعاد مرتك هني..
ابتسم وقال:قتلك عمي اللي يرضيها نديره..همي راحتها بس..
لطفي هز راسه وقال:باهي تبي ناديهالك؟
الجالي:لا خليها ع راحتها..وضحك وهو يقول..بنتك جايتها عليا راهو..
هو لما فهم قصده ابتسم وقال:ربي يكمل حملها بخير ويرزقكم الذريه الصالحه..
لطفي:آمين..
الجالي:تمام..ماتبي شي..
لطفي:بارك الله فيك..
الجالي:فيك بارك الله..السلام عليكم..
ولف ومشي للباب وفتحه..
لقي في وجهه عبد القيوم..
تبدلت ابتسامه لملامح امتعاض.
وعبد القيوم رفع حواجبه بشي من الكبر ووخر عن الباب..
مشي الجالي وهو معصب..
اما عبد القيوم قال:حاج لطفي هيا؟
لطفي:لحظه بس..
شد عبد القيوم مقبض الباب وقال:تمام..
بعدين رده وقعد واقف برا..
شبح القدام..
لقي الجالي واقف حدا المطحن وهو يشبحله بنظرات الامتعاض نفسها..
تجاهله التارقي وغير عيونه عنه لحوش الصيد..
شاف الصيد طالع منه بيمشي للجامع..
ع طلعة لطفي وهو يقول:هيا مشينا..
عبد القيوم:الحاج علي سبقنا كالعاده..
لطفي بإبتسامه:ايه..وسكر الباب..
وترافقوا هو وعبد القيوم للجامع..
والجالي بعيونه معاهم..
ع طلعة المهدي من المطحن وهو يقول:هيا..
الجالي هز راسه ومشي هو وخوه..
المهدي:هداكا مروح زيارة؟
الجالي:لا..
المهدي؛معناها ناوي يرد بنت خاله؟
الجالي:لا..قال بنصرف عليها لين تجيبه بعدين ناخده..
المهدي؛وبعد ياخده شن بيدير..
رفع الجالي كتافه ونزلهم وهو يقول..
مش عارف..
التزم المهدي بصمت وهو يحاول يتوقع اللي يفكر فيه عمر..
🍃🍃🍃🍃🍃
"محلاه القفطان يجنن"
مطيره؛يطلع عليك طلعة مش عاديه..
طوبى وهي تشوف في فستان الحوامل اللي خداهولها الجالي كيف طارحاته عمتها..
خطر عليها كلام قاله قبل..
》 :قولي شن جبت لطوبى..
الجالي:شن بنجيبلها ماجبت شي..
:عليا اني غير قول قول..
:والله ماجبتلها حاجه..
:علاش عندها مناسبه كان جبتلها حتى لبسة قنينه..
:مقاسها معاش نعرفه ماتشبحيش فيها كيف ولت..
:هي صح زي اللي زايده بس شويه مش هلبه..
:لاهلبه..24ساعه وهي تاكل..معاش نشبح فيها الا في الكوجينه طيب وتاكل وشادتها ع المعجنات لين دارت كرشه ماتشبحيش فيها..
:باهي خلاص اسكت تو تسمعك..《
"هييه طوبى"
استاقظت لما سمعت عمتها تكلم فيها وقالت؛نعم؟
مطيره:نوضي قيسيه خل نشوفوه عليك..
طوبى برفض:لالاتوا لا ماعنديش جهد نتحرك من مكاني..
مطيره:بديتي تنبلي راك
اريج:اكيد من الحمل..
مطيره:بتخش الخامس هالرتيله الدساسه الوحم طار خلاص.
طوبى:تو نقسيه مرة تانيه عمتي بالله رديه لكيسته..
مطيره:براحتك ياحنه..وطواته وحطاته في الكيسه..
ناضت طوبى وهي شاده شنطة اللاب توب قالت..
بنخش نقرا بالله عليكم مايخش عليا حد..
ومشت طلعت...
مطيره؛غير تعالي ارفعي كيسة القفطان..
ماجاش رد من طوبى..
مطيره:خيرها هكي موليه مش عاجبتني..
فردوس:عاديه غير مضغوطه شويه ومنشغله ع الف حاجه..
مطيره:ربي يعاونها ويفرج ع اختها..
صفيه:ايه حقه مشيتوا شفتوها..
آلاء؛كنت عندها توا راقده بالنوم..
فردوس بحزن:تهرب بالنوم..
سكتوا كلهم وهو يفكروا في كلمة مغليه بحزن...
🍃وفي دار البنات..
طوبى بعد خشت للدار وسكرت ع روحها..
طلعت لاب توبها وشيتاتها وهي تبكي بصمت..
تمسح في دموعها وهما ينزلوا مش قادره توقفهم..
وكل شويه تقول بصوت هامس..
"حسبي الله ونعم الوكيل.."
🍃🍃🍃🍃🍃
وحماتها الكبيره شاغل تفكيرها حالها المتغير واللي مستغربه منه اكثر حال خوها..
وقوة ملاحظه خديجه لايمكن تخليها تعدي هدا كله عادي وكانت متأكده ان في شي صاير بينها وبين خوها وهو مايبيش يحكي..
خدت الريموت ونقصت صوت التلفزيون..
بعدين رفعت تليفونها وخشت ع سجل الاسماء..
طلعت رقم طوبى واتصلت بيها..
🍃وطوبى وقتها كيف خشت جو الدراسه..
لاهيه باللاب توب وهي تقرا منه..رن تليفونها...
شبحتله..وشافت اسمها طالع ع الشاشه..
ابله خديجه...
قعدت تشوفله بنظرات امتعاض لين فصل..
بعدين خدت التليفون وحطاته ع الصامت..
ورجعت لهت بقرايتها..
🍃نزلت خديجه التليفون وقالت وهي تفكر..
زعمه اللي في بالك صح ياخديجه؟!..
🍃🍃🍃🍃
جبدت طاسه من شباك الماعين طيحتها كسرتها من غيظها وغلها..
خشوا عليها اختها وبنتها وهما مفجوعات..
جوري بخوف:خيرك ماما..
نجاه بعصبيه؛بري اطلعي بري..
خافت البنت وخالتها قالت:بري جوري حبيبتي..
مشت جوري وهي زعلانه..
اما صابرين سكرت الباب وقالت؛حرام عليك اللي ديري في صغارك حمزة معاش دورتيه بكل وهو ماملش ينشد فيا عليك وجوري ومعاذ بدوا خايفين يكلموك ولايمشوا يقعمزوا حداك..
هدا كله ع خاطر منو!؟ ع خاطر كل.ب زي هالكل.ب؟!
نجاة بغل ودموعها ينزلوا؛الله لما نقربعها ع راسه والله ماني مخلياته يتهنى ع اللي داره فيا..الحق.ير يقولي تعالي للشركه نعطيك كلمتك السافل هدا..
صابرين؛تي طيب فيك افتكيتي منه..
نجاة وهي تبكي؛حرقلي قلبي حرقني كلي الله يحرق قلبه الله يحرق قلبه..
صابرين دمعوا عيونها بتأثر..
هدت نجاه وقالت بوعيد؛لكن والله ماني مخلياته لين نقربعها ع راسه هو وهديكا الغبيه ويعرف بعدين من هي نجاة المعلول يعرف الفرق بينها وبين الغبيه اللي قاعد شادلي فيها..اصلا هكي الرجاله يبوا المراة الهبله العبيطه اللي تمشي في طوعهم...
ومشت طلعت من حداها وهي تتوعد وتهدد..
"تو نوريهم..تو نوريهم كلهم الكل.اب"
بعدين سمعت باب دارها انخبط بقوة..
تنهدت صابرين بأسف وقالت..
مساكين هالصغار وخلاص..
ومشت لمت مرش الطاسه المكسور..
والصغار في دارهم..
مقعمزين بحدا بعض ..
حمزة وجوري كانوا في حالة من الحزن والخوف..
اما معاذ اللي مافاتش في عمره الثلاث سنوات لاهي بالرسوم المتحركه اللي في التليفزيون ومش واعي بكل اللي قاعد يصير حواليه..
🍃🍃🍃🍃🍃
"مبارك مبارك"
بلال وهو مبتسم بسعاده:الله يبارك في الجميع..
ربيع؛خونه يابلال مش اتفقنا ماتتزوجش قبلي!؟
بلال؛انت ماتبيش تتحرك انتظرك عمري كله يعني!؟
ضحكوا..
علي؛احسن حاجه درتها مامشيتش ورا كلامه..
ربيع شبح لعبد القيوم واشر بحواجبه ع الحاج علي..
وعبد القيوم كان شاد ضحكته..
بس اختفت مرة وحده لما سمع الجالي قال..
بلال العرس من الألف للياء عليا اني..
وبدوا الموجودين في الجامع..
"بارك الله فيك..كثر الله من امثالك"
بلال؛جزاك الله خيرا..عندي مايكفيني والحمد لله..
الجالي؛راك منا وفينا ماتتحشمش..
بلال؛بارك الله بك..
الجالي؛مالا ياسيدي بناخد مكان في الاستديو بنديرلك فيه هديه..
بلال؛-جاهز كله لاينقصه.. فقط المطبخ وقعد وعدني عبد القيوم بيه كاملا..
كلهم شبحوا لعبد القيوم..
ابتسم بإحراج وقال؛حاجه بسيطه ياريت نقدر على اكثر من هكي..
علي:شن مازال اكثر من هكي بارك الله فيك..
عبد القيوم بإبتسامه؛فيك بارك الله..
والجالي يشوف في الموجودين كلهم كيف يشبحوا للتارقي..
بعدين ثبت نظره عليه وهو يشوفله بكره..
المهدي:ع العموم شن ماتبي حني حاضرين مايردك شي يابلال..
بلال بإبتسامه؛جزاكم الله خيرا..
🍃وطلعوا من الجامع وكل حد مشي ع حاله..
ورفقه عبد القيوم هالمرة كانت مع بلال..
عبد القيوم؛ليش الاحراج الحاجه هذي بينا..
بلال؛كنت نبي نشكرك امام الجميع لأن اخ زوجتي عجبه المطبخ هلبه..
عبد القيوم بضحكه؛ باهي اللي عجباته منك حاجه طيب فيك..
ضحك بلال وقعد ساكت..
وصلوا للاستديو اللي يسكن فيه بلال..
عبد القيوم؛تصبح ع خير..
بلال؛تصبح ع خير..
وخش للأستديو..وعبد القيوم كمل طريقه للحوش..
🍃وهو راكب الدروج رن تليفونه..
طلعه من جيب سرواله..وين وصل لباب الشقه شافله..
لقي المتصل رقم غريب..
حط المفتاح في الباب فتحه وخش وسكره برجله..
بعدين فتح الخط ورد..
عبد القيوم..
ايوه..
جاه صوت انفاس متسارعه وكأن المتصل كان يجري..
عبد القيوم؛الو..
ماجاش رد..
حول التليفون شاف الشاشه لقي المكالمه قاعده..
رده وقال وهو يمد في الكلمه:آلو..
فصل الخط..
نزل التليفون وحرك راسه يمين ويسار..
بعدين قعد يحول في السبيدرو..وخش داخل..
وين وصل في الدار..
رن التليفون مرة تانيه..شافه لقاه نفس الرقم..
فتح الخط ورد بنبرة تذمر...
ايوه..
"الو"
هو تفاجأ لما سمع صوت بنت..
"عبد القيوم"
عقد حواجبه وقال:ايه..من معاي؟
تنحنحت وقالت..
"مساء الخير"
هو رد؛مساء الخير..من معااي!؟
"كيف الحال"
عبد القيوم بنفاد صبر..
بتقولي منو ولانسكر!؟
هي بسرعه قالت..
"عبير عبير معاك عبير"
ضم شواربه لداخل بإستياء وقعد ساكت..
"الو عبد القيوم معاي!؟"
عبد القيوم؛ليش متصله..
قعدت ساكته..
عبد القيوم..
خل نختصر عليك..يااختي القصه كلها انبنت ع سوء فهم والله سوء فهم مش اكثر..مع احترامي ليك بس انا ماكنتش قاصدك انتي دلوني ع العنوان الغلط والحمد لله رفضتوني وقتها وكفانا ربي الإحراج اللي بيصير بعدين..
"معليشي بس كلامك مش منطقي ومش مقنع انت تقول هكي بلعاني بش تردهالي ولا"
عبد القيوم غمض عيونه بملل وبعد التليفون شويه..
بعدين فتح عيونه ورده وهو يقول:انا اللي عليا نشرحلك سوء الفهم اللي صار وبس تقتنعي ماتقتنعيش مش مشكلتي..
وسكر عليها..بعدين حط رقمها في الحظر..
واتصل طول ببنت عمته..
اول ماردت قعد يعاتب فيها وهو فاهم انها هي اللي عطتها الرقم..
"والله ماعطتيه لها ولاهي طلباته مني وكان طلباته مستحيل نعطيه من غير ماناخد اذنك"
عبد القيوم بإستغراب:مالا من وين بتجيبه الرقم!؟
"عبدو بنسكر شويه بعدين نعاودلك"
وسكرت عليه..وهو مش محتاج يفكر بعدين بش يعرف من عطاها الرقم..
~~~~~~~~
طوبى؛مش حنكذب صفيه خداته مني..
"مش عارفه هي كيف تفكر صدقيني ياطوبى مايبيها وماهي هي في باله الحكايه كلها سوء فهم في سوء فهم.."
طوبى بضيق:الحق موقف صعب انحطت فيه وبايخ..
"هي اللي حطت روحها فيه معليشي الموضوع كان مسكر علاش تفتح فيه مرة تانيه!؟"
تنهدت طوبى وقالت:عندك حق..اسفه صفيه..
"ليش تأسفي ياقلبي انتي مادرتي شي..يللا صار خير واهو حصلنا فرصه سمعنا فيها صوتك"
طوبى بإبتسامه خفيفه؛تسلمي حبيبتي..
"تمام مانعطلش عليك سلمي ع الكل..سلام"
طوبى:حتى انتي سلمي ع خالتي سليمه..
"يوصل..سلام"
طوبى:سلام..
وسكرت وهي تشوف للتليفون بضيق..
فكرت تكلم عبير بس تراجعت عن هالفكره سادها اللي هي فيه ماعندهاش حيل توجع راسها بمشاكل غيرها..
وين جت بتحط تليفونها وترجع تقرا..
رن..شافاته...
لقت نسرين تتصل بيها...
ولأنه ع الصامت قلباته ع وجهه وحطاته..
ورجعت لهت بقرايتها..
🍃ونسرين بدل المرة اتصلت مرتين..
ولما ماردتش طوبى اتصلت بأختها..
نسرين؛لارسمي في إن
"امشيلها غدوة للمدرسه شوفيها"
نسرين هزت راسها وقالت؛تمام..ايه حقه في حاجه نسيت نقولك عليها..
"شن هي!؟"
نسرين:اليوم مش نجاة جت تغدت هني..
"ايه؟"
نسرين:المهم كلمتني وقالت قولي لخوك يطلقني بسرعه..
"ايه؟"
نسرين:واني طبعا وصلتله قال قوليلها تجي للشركه بش نعطيها كلمتها..
"تو يدير زي كل مرة ياخد قرار ويرجع فيه..مرة بنطلق طوبى مرة بنطلق نجاه"
نسرين:لاالمرة هادي حسيته حاسم امره مش زي المرات اللي فاتوا قالهالي وهو واثق من روحه مش باين عليه الارتباك ولاالتوتر زي قبل..
"والله اني نفسي ومنى عيني..بس اسمعي جاي قوليله لو ناوي طلقها جديات خلي معاك حد شاهد انك طلقتها"
نسرين وهي تفكر:صح..باهي الحد هدا مني؟
"اني ولا انتي ولاحد شهد ع زواجهم الميمون"
نسرين؛تمام..تو نقوله..
"وبالله كان صار حق بشريني"
نسرين؛ان شاء الله..
"اني توا اللي نموت ونعرفه شن اللي صاير مع طوبى قالبها علينا هالقلبه وشن اللي قلب حال خوك حتى هو كان مش متحملها وتوا يدور في رضاها"
نسرين وهي تفكر بقلق:يستر الله وخلاص..
🍃🍃🍃🍃🍃
"غبي اقسم بالله شن شفت فيها هادي بش تحبها"
الجالي بضيق:مش هدا المهم..المهم توا نلقى حل للمصيبه اللي اني فيها..
عمر:مافيش حل حبيبي من توا نقولك..اني مجرب قبلك وعارف بالطابيه السودا ياغالي..
الجالي:هداكا انت مش اني..مش اني اللي نسلم في حاجتي..
عمر ضحك بسخريه..
الجالي ضيق عيونه وهو يشوفله.وقال:تو انت بتفهمني ان مرواحتك هادي مافيش وراها موال تبي تغنيه..
عمر تنهد وقال؛اني مروح ع خاطر العيل قتلك قبل..
الجالي:وبعد ماتاخده شن بدير؟!
عمر:اللي بنديره نديره..
الجالي هز راسه وهو يشوفله بشك..
عمر:اسمع مني وسلم للامر الواقع خير ماتزيد تخسر..طوبى والله معاد تكسبها طلقها ع الهادي اسلملك..
الجالي بانفعال؛طلاق مش مطلق ماتبيش تولي تقعد هكي معلقه..
عمر؛مانيش موجع راسك معاك عقلك في راسك تعرف خلاصك..
🍃ومن شقة عمر..
لجنان الحوش..اللي كانوا واقفين فيه المهدي وبوه يتناقشوا..
المهدي:قال مولي ع خاطر العيل..
محمد شنيبه بإزدراء؛توا بيدير روحه راجل ويبي عيله هالعيل..
المهدي؛اهدا ياحاج خلاص اللي صار صار..المهم هو بيتحمل مسؤولية العيل في حالة دار خالي اللي قال عليه وجابهولنا..
تنهد بوه بضيق بعدين مشي خش داخل وهو ساكت..
والمهدي بعد ماخش بوه قال بحده..
كان في دماغك حاجه تانيه ياعمر ياويلك مني..
🍃🍃🍃🍃🍃
الساعه 10:00 ليلا..
ليالي الربيع المعتدله..هواها مش صافي..بس ريحته حلوة في الاماكن اللي يكثر فيها الورد..
وياعيني ع الياسمين وريحته...
وياوجع قلب اللي مقعمزين تحته...
🍃بحرقه قلب ودموعها تنزل كانت تحكي..
تذكري جيات اختها والتلقيح والكلام؟تذكري!؟ اني من وقتها كنت حاسه ان نجاه حاطه عينها ع حد منهم كنت نبعد عن عقلي الجالي ونحط فيها في خوته حتى مرة خطر عليا ان سبب طلاقك انتي وعمر نجاة..غمضت عيونها بألم وهي تقول..يااه ياأميمه لو تعرفي توا في شن قعدت نفكر ونتخيل..! وسكتت معاش قدرت تكمل..
اميمه بألم؛الله ياخد فيهم الحق كلهم..
فتحت طوبى عيونها وقالت بحزن؛باهي علاش اني..علاش نبي نعرف..لإني صغيره!؟..ولالإني فالحه..ولاع خاطر متربيه كويس وطيبه زي مايقولوا نتحرك ونخدم من فم ساكت..!
هما مش عارفين يفرقوا بين المتربي وبين الضعيف..
بين الطيب وبين الساذج..الطيب والمتربي لازم يكون ضعيف وساذج في نظر الناس يرضى باللي يجيه وينضحك عليه بالساهل..لالازم ينضحك عليه لأنه طيب ويفوت ويسامح..
مسحت دموعها وقالت..قصدي بش الواحد مايكونش ضحية ناس قذرة زي هادم لازم يكون واطي عديم احساس ماعنداش قلب ومش متربي!؟
اميمه؛هما هكي يبوا الطيب والمتربي يولي..يبوه يولي بلااحساس وبلااخلاق بش يقدريعيش معاهم..
رشفت طوبى وقالت؛واني عمري ماحنكون زي ماهما يبوا...لكن..رفعت حاجبها وهي تكمل كلامها..حقي حق قلبي وحسن النيه اللي مشيت معاهم بيها حق سنين عمري الجايه اللي حنعاني فيها هلبه القدام بسبب اللي داروه فيا حناخده..
حناخده ياأميمه والله لما ناخده.. بوي.واختي وعيلتي اللي تعشموا فيهم خير وهما كانوا يشبحوا لعيونهم ويضحكوا عليهم حق العشم والله لما ناخده..
اميمه ركزت ع ملامحها ووجهها..نبره صوتها واسلوبها..
ماكانوش يشبهوا طوبى اللي تعرفها...
للحظه شافتها سدره..بس لاماكانتش زي سدره..
كانت تبان غير عنها...
اللي شافاته اميمه حسسها بالخوف عليها وخلاها تقوللها..
اطلقي منه وخلصي روحك منهم ووكلي ربي ياخدلك حقك..
طوبى وهي تشوفلها بقوة ودموعها ينزلوا..
ربي حياخده حقي هادي حاجه مفروغ منها اميمه حياخد حقي وحقك وحق كل من كان ضحية لهالعيله الظالمه..
والمظلوم عنده حقين ياأميمه..
حق الدعاء وهدا لله وهو اللي حياخدهوله..
وحق الرد ياأميمه..وبالمثل...
اميمه وهي تشوف لطوبى بألم وقلبها موجوع لأقصى حد عليها..
كانت تقول في نفسها..
"الله ينتقم منكم شن درتوا فيها!"
ع طلعة فردوس من الكوجينه..
مشتلهم طول..
وصلت فيهم ووقفت عليهم وقالت..
هاه طوبى شن جو ؟
مسحت طوبى دموعها وهي تقول :تمام..بعدين شافتلها وقالت..قوليلي بكري هدوكا ماقالوا شي؟!
فردوس؛لا اصلا ماهناك ماقعدوا خمسه دقايق وناضوا..قالتلي فايزة نسرين سألت عليك وقالتلها اعرفيلي منها خيرها..
طوبى تهكما وقالت؛تعرف مني صار!..
فردوس بضحكه متهكمه قالت؛ايه..
اميمه ضيقت عيونها وقالت؛واضح انهم
مش عارفين شي..
طوبى:ايه زابطتاه هداكا مش حيطلع شي من مصلحته يقعد الوضع هادي ومايدخل حد..عابي بروحه بيلم الموضوع من غير ماحد يعرف..
فردوس بتعجب:منه جده هدا!؟ قصدي مصدق ان بعد اللي صار مازال توليله..
اميمه بإبتسامه متهكمه:العيله هادي الايجو عندهم عالي يافردوس..
طوبى:الغلط اللي يديره في حقهم الغير مهما كان صغير يكبروه ولو هما غلطوا مهما كان غلطهم كبير يحولوه لصح..
ضحكت اميمه..
فردوس بعدم استيعاب؛اني لتوا مش قادره نصدق معقوله في ناس تقدر تنافق وتمثل لهالدرجه!..
اميمه؛تعرفي يافردوس لو ماكنتش معاشرتهم مانصدقش هدا علاش نعذر الناس اللي صدقت كلامهم عليا..
طوبى وهي تشبح في الفراغ..
مراة 24 ساعه ع لسانها ذكر الله وتمشي في حاجة الناس وتساعد كل من يطلب منها المساعده وخيرها زي مايقولوا مغرق الشارع من بيصدق فيها..
وولدها اللي ينضرب بيه المثل في كل خير..اللي نساوين عيلته وجيرانه يتمنوا ولادهم يطلعوا زيه من بيصدق فيه!..
الناس ليهم الظاهر..الظاهر وبس..
قعدوا ساكتين وهما يسمعوا في كلامها ويفكروا فيه..
اما هي كانت تفكر في حاجات تانيه بعيده عن تفكيرهم..
شويه وناضت وهي تقول..
بنخش نرقد غدوة ان شاء الله عندي امتحان بكري بالله فردوس نوضيني ع الفجر..
فردوس:باهي تو نعدل المنبه..
هزت راسها وشافت لأميمه وقالت؛تصبحي ع خير..
اميمه؛وانتي من اهله...
ومشت طوبى خشت داخل...
بعد ماخشت ناضت اميمه وهي تقول..
وضعها مخوفني عليها خايفه دير تصرفات ضرها..
فردوس؛خايفه عليها تاخد حقها ؟!
اميمه بقلق:الناس هادي ماتقدرش ناخد منهم حق..يطلعوها هي المحقوقه والظالمه وسيئات العالم كله فيها..مش ناسيه اللي داروه فيا يافردوس ولا..
فردوس؛باهي كان كل من غلطوا في حقه وظلموه يهرب منهم ويحط راسه في التراب..من بيوقفهم عند حدهم!؟
السكوت ع الظالم يخليه يتمادى يااميمه..في الاول عيشه وبعدين انتي وتوا طوبى..حتى اللي ليهم ماسلموش منهم..
اطلقت بإهانه..وبعد الطلاق طلعت حامل انكسروا ماليها وجربوا يردوها لراجلها ع خاطر العيل هما شن داروا استغلوا الفرصه ومسحوا بيهم الارض وذلوهم وقالولهم العيل بعد تجيبه ناخدوه حني ونربوه..
اميمه كانت تسمع وهي مصدومه..
فردوس؛الناس هادي تبي من يوقفها عند حدها تبي من يعطيها درس عمرها والباين ان ربك حط في طريقهم من يحطلهم حد...
اميمه وهي مازال مصدومه هزت راسها وقالت..ان شاء الله خير..ان شاء الله..تصبحي ع خير..
ولفت طول ومشت لحوشهم..
فردوس:قدامك كل خير..
بعدين تنهدت وقالت من قلبها..
حسبنا الله ونعم الوكيل..
ومشت خشت داخل وسكرت باب الكوجينه الخارج كويس..
وطلعت منها..ومشت لباب الحوش..سكرت الحديد بالمفتاح بعدين اللوح حتى هو بالمفتاح..ومشت لدار المعيشه..
🍃وفي دار البنات..
كانت كل وحده فيهم راقده ع سرير..
الاء ع سرير غرفه..
اريج ع سرير سدره..
وطوبى ع سريرها..
اريج كانت مشغوله بالهدرزة ع راجلها برسائل الواتساب..
اما آلاء كانت لاهيه بالصفحه الجديده اللي تفتح فيها ع خاطر مشروع الحلو اللي بديره..
وطوبى..
خشت ع الفيس تشوف شن في جديد..
ويجي قدامها منشور للجالي..
كان منزل فيه فيديو فيه اغنيه لفنانه المفضل..
مقطع من زيديني عشقا..
طوبى فتحاته وقعدت تسمع فيه...
وهي تسمع جت قدامها ذكريات شهر العسل..
حست بشي قاعد يشد في قلبها ويعصر فيه عصر..
وقفت المقطع طول وتخطاته..
مسحت دموعها اللي نزلوا قبل ليشوفوهم..
وقعدت تتفصح بسرعه ..
لين وقف عند منشور لنجاه..
هالمنشور كان عبارة عن صوره ليها..
وفي واقفه في اليخت اللي ركبت فيه مع الجالي في انطاليا..
كانت مدرقه وجهها بملصق..ومدايره حركه وكأنها تبعت في قبله للي يصور فيها..
وكاتبه فوقها...
"Ti amo Mi Manchi"
وختمت الجمله برمز القلب الأحمر..
طوبى وهي تشوف في الصورة كانت حاسه بالألم والإشمئزاز في وقت واحد..
تفكرت سفرته هادي..تفكرت كيف كانت وقتها تعاني في همها بروحها وهو مسافر معاها وعايش حياته...
وقتها كانت تبي تبصق ريقها برا مش تبلعه من كثر ماحست بالقرف..
بس انجبرت تبلعه وهي حاسه روحها كأنها بلعت سم يفتت فيها من داخل..
قعدت تشوف للصوره..وتقرا في الكلام..وتحاول تعرف هو بأما لغه..
نسخت الجمله وبحتت عن معناها في القوقل..
طلع معناها..
احبك..اشتقت لك..
حطت اطراف اصابعها ع فمها لما حست غثيان..
تماسكت..وشدت روحها بقوة..
نزلت يدها عن فمها وهي تفتح فيها وتسكر..
طلعت من الفيس..
وعطت البنات بالظهر..قعدت تبكي بصمت وهي مقهورة...
🍃اما هو..
كان بايت في شقة خوه عمر..
راقد ع الكنبه..وهو يشوف لتليفونه..
يفكر يتصل بيها ولايبعتلها رساله ولاشن يدير..
غمض عيونها وقعد يفرك مابينهم بأطراف اصابعه وهو يفكر..
لين جاته في باله حاجه..
فتح عيونه..وبدي طول ينفذ في الفكرة اللي جاته...
🍃وطوبى في عز الالم اللي كانت عايشه فيه..
لما سمعت نغمة رساله الماسنجر..
قامت التليفون وشافت ان في رساله جتها منه..
🍃فتحتها نجاة قبل طوبى..
كانت صورة ليهم من شهر العسل..
لما فطروا في الغابه.
وبعتلها بعدها..
(ماعشتش احلى من ايامنا هادي تتفكري فيها عمري)
حطت نجاة يدها ع فمها وشداته بغيظ..
بعدين حطتها بين سنونها وعظتها..
🍃اما طوبى تعمدت تشوف الرساله بش تخليها من غير رد وتلعب بأعصابه..
🍃هو لما ماردتش..
قعد يفكر شن يدير تاني..
واللي يخطر على باله يديره طول..
وراه خوه عمر طلع من الدار للكوجينه بش يشرب سمعه يغني..
التفت شافله..
لقاه مقرب التليفون لفمه ويغني..
عرفه بيبعت مقطع لطوبى..
لقي روحه غصبا عن يضحك..بعدين خش الكوجينه..
🍃سمعت نجاه المقطع..
كان مقطع لأغنيه من اغاني فنانه المفضل..
بنبرة باكيه قالت..ياحق.ير...ياحق.ير..
🍃وطوبى
تتفرج من غير ماتسمع المقطع..
ولارد..
هو بعت بعدها..
(ياقلبي متفكره كيف كنتي تحطي راسك ع كتفي واني نغينلك..ولا لما نقعد نمشطلك في شعرك ونقولك عليه في شعر..اااه ياقلبي قداش مستاحشك بنموت عليك)
طوبى بقرف وبصوت هامس..
خسيس...
🍃لكن نجاه لما قرت الرساله معاش تحملت بكل..
وبدت تكتب في رساله..
وبعتتها في نفس الوقت..
(حتى اني Mi Manchi حبي..مش عاديه الصورة اللي نزلتيها تراابعتيلي صورك في نفس الليله بالتايقر)
الرساله قروها الزوز مع بعض طوبى والجالي..
الجالي من الفجعه ناض قعمز وهو فاتح عيونه ع وسعهم ويشوف في الرساله..
اما حطت يدها ع رقبتها وشدت عليها بقوة لما فهمت انه يكلم فيهم في وقت واحد..
ناضت ونزلت من السرير ومشت بتطلع..
اريج:وين بيبو..
طوبى وهي عاطيتها بالظهر:للحمام..
طلعت من الدار..
وعيون اريج معاها وهي تشوفلها بضيق..
🍃اما هي..
كانت تبي تهرب وتبكي بعيد عنهم..
لقت ببيان الحوش مسكره..كان بتفتحهم بش تطلع بيحسوا بيه وينوضوا يشوفوا شن اللي فتحه...
قعدت واقفه في مكانها..تاخد في انفاسها بشي من الصعوبه..
تشوف حواليها ومش عارفه وين تمشي..
مالقتش قدامها غير الصاله..
خشتلها ومشت رقدت تحت الروشن..
غمت راسها بالمخده وقعدت تبكي..وتبكي..
وحروف الرساله بين عيونها وهي تتخيل في المكتوب فيها...
🍃اما هو..
كان يشوف للرساله وهو مصدوم ويقول..
الله يلعنك يا حي وانه..!
سمعه عمر وطلع من الدار وجاه وهو يقول..
خيرك تعيط!
شبحله وقال؛الكلبه نجاة طلعت مهكره الماسنجر..
عمر عقد حواجبه وقال؛كيف عرفت!؟
وقف وقال وهو منفعل:تول كنت نكلم في طوبى بعتت رساله زي وجهها الوسخه..
عمر حرك راسه يمين ويسار وهو يقول..
عليك وحلة وحلت فيها روحك..
ومشي ولى للدار وخلاه..
هو بعد ماخلاه خوه..رجع شاف للرساله..
شويه وتفكر المكالمه اللي دارت بينه وبين طوبى لما سافر اخر مرة وقتها هو عاتبها لأنها ماتراسلش فيه..
وهي سألاته كان شاف الماسنجر متاعه...
يعني هي كانت تراسل فيه ونجاة تمسح في رسايلها ومرات تكون راده عليها..!
غمض عيونه ومسح ع وجهه بعدين فتحهم وقال بغل..
يابنت الكل.ب..يابنت ستين كل.ب..
طلع من الماسنجر وخش ع قائمه المكالمه..
حط ع رقمه وحوله من الحظر..
اتصل بيها طول...ويقعد الخط ينادي لين يفصل ومايرد حد..
🍃وهي تتفرج ع المكالمه متاعه..
وع وجهها ابتسامة مكر وتشفي..
🍃نزل التليفون وقال وهو يتوعد..تو تشوفي ياكل.به يابنت ستين كل.ب تو تشوفي...
🍃🍃🍃🍃
وبكت طوبى لين تعبت..
حطت المخده تحت راسها..ورقدت ع جنبها..
وقعدت فايقه..مسيطرة ع وجهها ملامح الوجوم..
والوجوم هو الحزن الذي يسكت صاحبه..
تحت المخده تليفونها يرن..كان صوته مكتوم بس هي تسمع فيه وماتسمعش فيه في نفس الوقت..
قعدت ع حالتها هادي ساعات...لين نزلت عليها رحمة من الله خلت النعاس يغشاها ورقدت...
🍃وترقد لقرب آذان الفجر...
في دار المعيشه رن منبه تليفون فردوس فيقها..
ناضت طفاته..بعدين مشت طلعت من الدار لدار البنات بش تنوض طوبى..
وين خشتلها لقت سرير طوبى فاضي..
استغربت..
طلعت ومشت تشوف الحمام..كان فاضي..
خافت..
قعدت دور عليها في الحوش لين لقتها راقده في الصاله..
تنفست براحه..
بعدين مشتلها بتنوضها..
فردوس:طوبى..طوبى..
فتحت طوبى عيونها..
فردوس؛نوضي الفجر بيذن خلاص..
هزت راسها بإيجاب..
ويسمعوا صوت المؤذن وهو يكبر...
فردوس؛خل نمشي نتوضا وانتي صحصحي..
ومشت من حداها..
وهي ناضن قعمزت..
شافت لبطنها..ارتسمت ع وجهها الحزين..
ملامح ابتسامه خفيفه..
حطت يدها عليها وقالت بصوت مبحوح..
صباح الورد جنونتي..اسفه ياعمري ضايقتك ووجعتك هلبه سامحيني..
رفعت يدها وباست كفها..بعدين حطتها ع بطنها وهي تقول..
نحبك..
سمعت صوت باب الحمام انفتح..عرفت ان فردوس طلعت..
ناضت وهي تقول همسا..
يارب..
ومشت طلعت من الصاله للحمام..
هي خشت وبوها طلع من داره..
سمع صوت باب الحمام تسكر..مشي طلع للخارجي...
🍃🍃🍃
ويعدي وقت الفجر..
بعد ماصلت طوبى..
خدت شيتاتها وطلعت قعمزت في الجنان...وفردوس دارتلها طاسه ميه دافيه وعسل..
شربتها بعدين بدت تقرا..
قرت ساعتين كاملات في هدوء..
لين فاقوا اهل الحوش كلهم ماعدا اريج اللي ماكانش عندها كليه..
طوبى بعد ماكملت قرايه خشت بحاجاتها داخل للدار...
طوبى:خيرها اريج راقده؟
الاء:شن نسيتي مش امس قالتلك ماعندهاش كليه
عقدت طوبى حواجبها وقالت:ايه صح نسيت معناها بترفعيني انتي..
الاء:امتى امتحانك؟
طوبى:9..
الاء:واني محاضرتي 9..
طوبى:خلاص نطلعوا توا معناها..
الاء:باهي بسرعه وتي روحك..
طوبى وهي ماشيه للدولاب بطلع حواجيها اللي جهزتهم لليوم وقالت..هيا هي..
والاء خدت حوايجها ومشت طلعت بيهم للحمام بش تبدل..
🍃جهزت طوبى نفسها..
وقفت ع المرايه ولبست شاربتها..وحطت الطرف من طروفها ع واحد من اكتافها..بعدين قعدت تتمعن في وجهها في المرايه..
خدت نفس..ورسمت ع وجهها ملامح الحيويه الزائفه..
وخدت شنطتها ومشت طلعت من الدار..
خشت للكوجينه..
جتها مطيره بسندويتش شاميه وهي تقول..
كولي كولي يعطيك طاقه وحيويه..
خداته طوبى وهي تضحك وقعدت تاكل فيه..
ع خشة بوها قال؛عندك امتحان بنتي!؟
طوبى وهي تاكل هزت راسها وقالت..امم..
هو طبطب ع ظهرها وقال؛بالنجاح..
ابتسمت من قلبها وهي تشوفله كيف مشي بياخد فنجان القهوة..
قعدت تتأمل فيه وهو يشرب فيه..
من اقوى اسباب تماسكها وقوتها..واغلى بني آدم ع وجه الدنيا بالنسبه ليها..شمس حياتها...
من بعد سدره هو سندها الوحيد ع الارض...
"هيا بيبو"
فردوس؛خشي افطري..
الاء:No no بناكل في الكليه..
صحه القهوة جديدي..
لطفي التفت وشبحلها بإبتسامه وقال:سلمك..
طوبى وهي تاكل قالت؛سلام توا..
ومشت بتطلع..
الاء؛ماما دعواتك..
فردوس؛ربي يفتحها عليكم..
☘ومشوا الزوز مع بعض طلعوا من الحوش..
ع خشة غرفه للكوجينه وهي تقول..
صباح الخير..
ردوا عليها اختها وعمتها..
اما بوها ناضلها وشدها وقعد يساعد فيها..
وخرلها كرسي وساعدها تقعمز وهو يقول:كان قعدتي في الدار وجابولك فطورك لعندك..
غرفه؛لابابا مليت منها الدار..
لطفي:باهي يابابا براحتك..شبح لفردوس وقال..قربليها الفطور..مطيره صبيلها عصير..
الزوز قالوا؛حاضر..
وهو قعمز حداها وقال؛شن بابا حالك باهي اليوم..
غرفه ابتسمت في وجه بوها وقالت؛الحمد لله بابا ماتخممش حتى اني قويه لعيت الواعر..
مطيره:هو ده الكلام..
ضحك لطفي وابتسموا بناته ع كلام عمتهم..
🍃والقلوب يشوف فيها خالقها🍃
🍃وعن القلوب اللي تكون محط نظر الخالق..
اللي يعرف شن فيها وشن تحس..
ويعرف كيف قاعد عبد القيوم يصارع في قلبه مصارعه بش يمنعه من انتهاك الحرمات..
وهو طالع من الحوش..
شافها طالعه من حوشهم..
غير عيونه طول وجي بيمشي لسيارته..
بس وقفاته تاله بنت فايزة لما ناداته..
ركبت طوبى للسياره وهي تشوفله..
كيف مشتلها وسلمت عليها ومدتلها حاجه ملفوفه بمنديل ابيض..
هوضحك لما خداها..بعدين ضم تاله..وطبع.قبله ع راسها ومسح عليه..
شويه ومشت تاله..
وهو مشي ركب سيارته..
ركبت آلاء وهي تشوف لسيارته وقالت..ايه حقه ماكلماتكش عبير..
طوبى بإمتعاض:كلمتني صفيه..
عضت الاء ع شاربها وهي شاده ضحكتها وتحركت بالسيارة..
آلاء؛شن قالتلك..
طوبى؛حطيتوني في موقف خلاني نتمنى الارض تنشق وتبلعني..
الاء:سألاتك منين خدت الرقم؟
طوبى؛ايه وقلتلها اني مع الاسف..
ضحكت الاء..
طوبى؛ماحصلت شي هالهبله غير الحشمه وخلاص..
الاء:قصدك كلامه طلع حق..
طوبى وهي تفكر:الباين هكي بس مش زي مافهمت عبير..
الاء:كيف؟
طوبى:مش عارفه هو الكلام اللي قالاته صفيه نفس اللي قالتهولي عبير بس حسيت في حاجه ناقصه..
الاء:معناها يبي وحده تانيه غيرها..
طوبى بنرفزة:ايه وهي تتصل بالراجل وتكلم فيه زي المتخلفه..تو بيقول هي اللي شارت عليها دير هكي مدامها صاحبتها وعطتها الرقم..
حطت يدها ع وجهها وقالت..ياحشمتي وخلاص..
والاء تضحك بكتمان..
🍃بعد شويه..
حطت الاء طوبى في كليتها وهي كملت طريقها لجامعتها..
🍃طوبى وهي خاشه للكليه قعدت دور بعيونها في صاحباتها لين لقتهم كلهم مقعمزات في مكانهم المعتاد..
مشتلهم وين وصلت فيهم قالت..
السلام عليكم..صباح الخير..
هما ردوا عليها بعدين وحده فيهم قالت..
ياخاينه..
قعمزت وهي تقول؛ماتعرفيش تصبري لين نجي ونقول بروحي...
عبير بضيق؛فوتيني ترا..
مطت طوبى شواربها بملل..
؛في الخامس ياظالمه كيف درقيتها بس..
:اصلا بطنها مش واضحه وهي الله يبارك حركتها مش حركة وحده حامل..
طوبى:واهوا عرفتوا شن زاد فيكم؟
:خلاص في الجديد معاش بنقول ع حاجه تخصني الا بعد ماتصير..
؛قولي كل شي صار فجأه.
ضحكوا البنات..
طوبى:باهي حولوا البصارة ع تركينه وخل نراجعوا..اسمعي نهله هادي مش فاهمتها..
:تمام..ركزي معاي..
وقعدوا يراجعوا..وعبير معاهم بس باين عليها مضايقه هلبه..
🍃جي وقت امتحانهم وخشوا داروه..
كانت عبير اول من طلع..
وبعدها بوقت طلعت طوبى..
🍃دورت عليها لين لقتها في مكانهم المعتاد..
مشت قعمزت جنبها وقالت..
جاوبتي؟
عبير بضيق؛لا..امس الليل كله فات عليا واني نبكي..ماعنديش حظ اني بكل..
طوبى؛ماتقوليش هكي مرات ربي داسلك احلى حظ..
عبير:زعمه واحد زي عبد القيوم ولاخير منه؟
ضحكت طوبى غصب عنها وقالت..ان شاء الله خير منها..
تنهدت بضيق وقالت..تعرفي شن اكثر شي خلاني متمسكه بيه..تصرفاته واخلاقه ورجوليته مانشبحش فيهم توا شوفي حواليك بالله شوفيهم مافيش فرق بيناتهم..عكسه هو مايشبه حد..
طوبى:نقولك حاجه عبوره..ردي بالك تحكمي ع حد من منظره ردي بالك تحكمي ع حد قبل لتعرفيه عن قرب وتعاشريه..عبد القيوم هدا حني شن نعرفوا عنه غير اللي هو يطلع فيه!؟ الله اعلم المدرق علينا شن شكله..مرات يكون اشر خلق الله..
عبير:لاعاد مش لهالدرجه!
طوبى وهي تشوف في صورة الجالي قدام عيونها؛لالهالدرجه واكثر اني تعلمت معاش نحكم ع الناس من غير مانعاشرهم..
عبير قعدت ساكته وهي تفكر في كلامها بعدين مررت نظرها القدام وقالت..
بيبو..راجلك..
انفزعت طوبى وشافت وين ماتشبح عبير..
شافاته واقف بعيد شويه..كان بكامل اناقته يشوفلها من ورا النظارات وهو مبتسم..
عبير؛ نوضيله خيرك!..
ناضت بالغصب ومشتله..
وهو يشوفلها كيف تمشي..مشيتها فيها قوة اول مرة يشوفها..
ونظرات عيونها وهي تمرر في نظرها حواليها زادت قوة الحضور متاعها..
هو مش عارف لو كانت هي هكي من قبل وماكانش ملاحظها..ولاهدا تغير مفاجئ طرأ ع شخصيتها..
وصلت فيها وقالت..
شن جابك؟
الجالي بإبتسامه؛صباح الورد..
عكرشت وجهها بإزدراء..
هو تنهد وقال:حبيبي اللي صار امس..
قاطعاته وقالت ببرود؛مايعنيني في شي انتي بالنسبه ليا منتهي من هداكا اليوم..اني مطلقاتك من يومها..
سكت شويه وهو يشوفلها..
وهي كانت تشوفله ببرود وباين عليها الكره..
شويه تكلم وقال؛اني نموت من غيرك راهو..
ابتسمت تهكما وقالت:ايه صح..
الجالي:والله العظيم ندوي صادق مانقدرش نكمل حياة انتي مش معاي فيها..
طوبى:ايه اكيد من اللي قايمك ويجري ع خدمتك زيي اكيد مش حتلقى مغفله تانيه غيري بالساهل..
الجالي:كلامك مافيشي حاجه صح...طوبى انتي عندي..
قاطعاته وقالت بحده ونظرات حاده..
اني عندك زي بداليك الماركه وسيارتك موديل السنه زي ساعتك الرولكس وكنادرك البالي ونظاراتك الكينج سفن..
اني نكمل في برستيج الجالي شنيبه وفي نفس الوقت جاريه ليه ولماليه..اني ع قد مادرت معاك مش عاجباتك وتحسرت ع روحك اللي جيت نصيبك..
الجالي:طوبى..
قاطعاته بقوة وهي تقول؛اسمي معاش نبيك تقوله وجهك معاش نبي نشوفه معاش تضغط ع اعصابي اكثر من هكي بس ماننفجرش...قالت كلامه الاخير كتحذير...
ولفت ومشت وخلاته وهو عاجز حتى انه يحول عيونه عنها..
كان حاس بشعور سيء للغايه..وكأنه في شي قاعد ينسحب منه لين طلع ومشي وراها..
تنهد بضيق وهو يشوفلها كيف ولت قعمزت جنب صاحبتها
بعدين مشي وطلع من الكليه...
تحت نظراتها الحاقده...
🍃🍃🍃🍃🍃
"امي"
هادي خديجه خاشه حوش اماليها تنادي في أمها..
سمعت صوتها وهي تهدرز..
خشت للصاله لقتها تتكلم بالتليفون..
شافتلها مغليه وحييتها بحركة حواجبها..
وخديجه رفعت يدها وردتها وقعمزت حداها..
مغليه:تفضلي في أي وقت حبيبه.........خلاص غدوة العشيه ان شاء الله.....بالسلامه...بالسلامه...يوصل يوصل حتى انتي سلمي ع بناويتك..بالسلامه..
وسكرت..
خديجه:مني؟
مغليه؛مرت مسعود الباني..
خديجه؛اياااه شن فكرها بينا؟
مغليه؛شورها باتت تحلم بينا البارح..قالت غدوة العصر بنجي نهدرز..
خديجه رفعت حواجبها ونزلتهم وهي تقول:مرحبتين بيها ياحنه..مهناك حد غيرك في الحوش؟
مغليه؛ايه..
خديجه؛ماصار شي بين بوي وعمر؟
مغليه؛ماتلاقوش..
خديجه:باهي وولدك الجالي امس بات هني..
مغليه؛بات مع عمر في شقته..
خديجه؛امي..ترا اتصلي بطوبى..
مغليه برفعة حاجب:اني نتصل بيها!؟
خديجه؛ايه يام..اعرفي منها خيرها اني حاستها متعاركه هي وولدك..
مغليه بقلق؛زعمه!؟ ياودي لا مااظنش تي هو يضرب معاها بعصاتين..
خديجه؛ماهو هدا اللي محسسني ان في شي صاير..
مغليه؛حسك خوفتيني..
خل نشوفها..وقامت تليفونها ودورت ع رقمها لين لقاته بعدين اتصلت بيها..
نادى لين فصل...
مغليه؛ماتردش..
خديجه وهي عاقده حواجبها؛عاودي ترا..
تأففت وعاودت عليها..ونفس الشي نادى لين فصل وماردتش..
مغليه بعصبيه:مصح وجهها قليلة الادب تتصل بيها عزوزتها ماتردش!؟
خديجه قعدت ساكته وهي تفكر..
وامها تقول بتسخط؛عليك بخت بختي في الكناين كل وحده احرف من التانيه..
خديجه؛اهدي يام اهدي..غير نعرفوا ش صاير قبل وبعدين نعلموها كيف تحترم الاكبر وتقدرهم..
مغليه بغضب؛سحيقه سريفه وحده هي وبنت عمها..
🍃🍃🍃
وبنت عمها كانت طالعه لوحده من مبنى المشفى لوحده من العيادات الخارجيه..
تلاقت هي والدكتور قصي اللي وقفها..
قصي؛عندك حاجه مهمه توا..
اميمه بشي من الارتباك؛توا لا..
ابتسم وقال:تمام نبيك في موضوع مايتحملش التأجيل..
هي حطت ايديها في جيول البالطو وقالت..
ان شاء الله خير..
تنهد قصي وقال:تتفكري في الطلب اللي طلبته منك قبل التخرج..
اميمه نزلت عيونها وهي مضايقه..
ضم كفوفه لبعض وقال؛ارجوك اميمه ماتستجعليش الرد ارجوك..اقسم بالله يااميمه لو وافقتي نخليك اسعد من خلق ربي..اميمه..اني نحبك هلبه فوق ماتتصوري ومستعد نديرلك اللي يرضيك المهم تعطيني معاك فرصه..
رفعت عيونها وقالت؛اسفه دكتور طلبك مرفوض وانت بالذات لايمكن نرضى بيك لو شن ديرلي وانت عارف علاش كويس..
قعد يسمع فيها ويشوفلها وهو مضايق لأبعد حد..
اميمه؛برغم اللي درته قعدت محافظه ع احترامي ليك وحنقعد..
هو قال؛اميمه صدقيني مش حتلقي راجلك يحملك في قلبه ربع اللي في قلبي ليك..
هي ابتسمت تهكما وقالت؛مانبيش نلقى اساسا..دكتور اني مكتفيه بنفسي ومعاش تبي حد في حياتي غير عيلتي..شوف نصيبك مع غيرك معليشي..
ومشت بسرعه وخلاته وهو تبع فيها بعيونه اللي كانت نظراتهم كلها غضب وغارقه بالدموع...
🍃🍃🍃🍃🍃
خشت لمحل الحلويات اللي حاطه فيه شغلها من التورتات والكيك..
اول ماشافها صاحب المحل قال بإبتسامه؛-يااهلا وسهلا..
هي ابتسمت بإستغراب وقالت؛ اهلا بيك..
هو قال:شغلك اللي حطيتيه عندنا ماقعد منه شي..
هي تفاجئت..
:ومش هكي وبس نبوا منك غيرهم عليهم طلب كبير..
الاء وهي مبتسمه بدهشه؛جديات!؟
ضحك وقال؛وجد الجد..طلع فلوسها وقال..
وهدا حقك كامل خدت منه نسبتي..
خدت الفلوس وهي تقول؛بصراحه مش مصدقه اني حطيتهم عندكم اول الاسبوع كيف انباعوا كلهم بسرعه هكي
هو بإبتسامه قال؛هدا اللي صار..
هي بفرح قالت؛باهي الحمد لله...قولي شن هي الطلبيات الجديده؟
هو طلع ورقه من الدرج ومدهالها وقال..
هادي هي..
خدتها وقالت؛السبت الجاي ان شاء الله نجيهم..
هو قال:ان شاء الله..
خطت الفلوس والورقه في الشنطه وقالت..
السلام عليكم..
الراجل قال:وعليكم السلام..
قعد يشوفلها لين طلعت وسكرت الباب..
بعدين قام تليفونه واتصل برقم محدد...
:ايوه السلام عليكم....ايه جت قبل شويه....خدتهم وعطيتها الورقه اللي عطيتهالي..........تمام.....ان شاء الله...السلام عليكم....
...يتبع...
