طوبى ☕شارع القهوة☕

تابع

#طوبى "جنة طوبى"
#جمان_فريد
#الجزء_الستون"فلاش باك"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
يوم الأحد
25فبراير..سنة 2018
الساعه 10:45 صباحا..
في مدرسة "أجيال" الخاصه..
كانت طوبى واقفه في أحد الممرات..
وفي يدها تليفونها..
خاشة ع الماسنجر وتكتب في رساله لراجلها..
(السلام عليكم صباح الخير)
(امتى تطلع الطيارة)
🍃هو كان مقعمز مع نجاه في صالة الانتظار يهدرز هو وياها..
جاته الرساله..
طول قام تليفونه وشافها..
ونجاه تراقب فيه..
بعدين قامت تليفونها وخشت تشوف من مني جاته..
لقتها من طوبى..
غيرت عيونها ليه...
لاحظت ملامح عدم الرضا باينه في وجهه..
رفعت حاجبها وابتسمت ابتسامه خفيفه ورجعت شافت لتليفونها..
هو ماباش يرد ع طوبى وحط التليفون في جيبه..
هي هني شافتله وقالت بإستعباط:مني؟
هو مرر نظره ع المطار قدامه وقال؛مش مهم..
رفعت حواجبها ونزلتهم بعدين قالت؛نبي نولي للخدمه..
شبحلها وقال؛شن غير رايك؟
هي قالت؛مليت ودرهت كبدي من قعاد الحوش..
هو قال؛اللي يريحك..
شويه سمعوا نداء الرحله..
ناضوا الزوز..
شبحوا لبعض لحظات..بعدين ودعوا بعض وهي تقول..
نجاة ودموعها في عيونها؛تعبت واني نودع فيك في كل مرة نخاف معاش نتلاقوا مرة تانيه..
مسح ع ظهرها وقال:انتي كان تفكي روحك من الوسواس وتتفائلي بس..
بعدت عنه وهو مسح دموعها وقال؛رد بالك ع روحك حبيبي..
هي قالت:حتى انت...
تنهدت بعدين مشي وخلاها..
وهي قعدت معاه بعيونها المليانات دموع...
ودقايق ولحقاته...
🍃هو قبل مايركب الطياره..
بعت لطوبى رساله بعدين سكره...
ونجاه سكرت تليفونها من قبل ماتوصل للطيارة وماعرفتش بالرساله..
🍃اللي وصلت طوبى..
وهي واقفه في الساحه تشوف في العمال اللي يخدموا في المبنى الخارجي وكان يفصله عن الساحه سياج كبير...
قامت تليفونها..
وشافت الرساله..
(توا ركبت الطيارة)
ابتسمت وبعتت .
(توصل بالسلامه ان شاء الله)
تنهدت ونزلت تليفونها..
بعدين قامت عيونها شافت عبد القيوم جي ومتوجه ومعاه واحد لمكان المبنى..
قامت تليفونها طول واتصلت برقم محدد.
طول رد عليها صاحبه..
لفت ومشت بتخش وهي تقول..
السلام عليكم عبورة........ايه ياحنه تعالي.
"قريب نوصل فيك خلاص".
ضحكت طوبى وخشت داخل...
☘☘☘☘☘☘
وفي مكان بعيد عنهم...
في فندق موجود فيه الراديو اللي يخدم فيه مهند..
كان موجود يومها بش يخرج برنامج احدى زميلاته..
واقف معاها ويتناقش هو وياها عن الحلقه..
مهند:الموضوع حساس وجريء نهنيك هلبه..
آرام بإبتسامه؛مشكور..بس جديات موضوع مهم وكارثي في نفس الوقت اني لما مشيت بروحي غادي وقابلت موظفي السجل المدني حكولي حاجات صدمتني اليوم تسمعها بروحك..
تنهد وقال؛اني بديت معاش نستغرب شي كله وارد وكله يصير..
هي لاحظت ملامح وجهه كيف تبدلت لملامح الخيبه ونبرة صوته كذلك..
تشجعت وكانت حتسأله شن صاير معاه..
بس جاهم واحد يخدم معاهم في البرنامج يسأل في مهند ع شي..
🍃في باب الاستديو..
:تفضلي ياأبله..هونا استاذ مهند..
خشت آلاء وهي شاده في يدها نفس الكيسه اللي حاطه فيها هدايا مهند كلها..
وين شافاته..قلبها فر فران..وفي نفس الوقت حست ضلوعها طبقوا عليه..
قعدت مركزه عليه تتأمل فيه كيف يتكلم ويسمع..
نظرات عيونه وحركات ايديه اللي كان شاده بوحده فيهم شيشة ميه..
مرة يفتحها ويسكرها..ومرة يتكلم بيها..
وهي تشوفله..
آرام اللي صدفه شافت للباب..جو عيونها عليها...
هي ماكانتش تعرفها بالشكل..بس من نظراتها ليه عرفتها من تكون..
نزلت عيونها لكيسة الهدايا..ضايقت..ورجعت شافت لمهند وقالت..
مهند..
هو غير عيونه عن زميله وشبحلها وقال:نعم آرام..
ارام:في وحده واقفه في الباب شكلها جايتك..
هو طول شبح للباب وشافها..
وزميله كذلك التفت وشبحلها بعدين رجع وشاف لمهند..
لقاها يشوفلها بنظرات حاده ولمعة الدموع باينه في عيونه..
شاف لآرام سألها بحركة الراس..
هي ماردتش عليه بس نظرتها خلاته يعرف كل شي..
☘كلهم عرفوا ان في شي صاير بينه وبين خطيبه من اللي صار في حلقة برنامجه اللي فاتت ومافي حد فيهم تجرأ يسأله شن  صاير☘
آرام؛ترا تعالى معاي وائل بنوريك حاجه..
فهم عليها وقال:Ok..
ومشي هو وآرام اللي قعد عقلها مع مهند..
🍃وآلاء..
قاعده واقفه تشوفله بنظره ..
مش باين فيها لاحزن ولاندم..نظرة مغرورة وبارده للغايه..
قدملها لين وصل فيها..
حط يده في جيب سرواله وقال:تفضلي..
هي ردت تقول؛نبيك برا مش واحده من وقتك اكثر من خمسه دقايق ..
هز راسه وقال؛تفضلي..واشرلها ع الباب..
هي مشت طلعت..
وهو طلع وراها...
مشت وقفت لمكان بعيد شويه عن الزحمه..
وهو وقف عليها..
وكان يبين في روحه قدامها وكأنه مافيش بينهم سابق معرفه يتعامل معاها بسطحيه...
مهند؛تفضلي بشن نقدر نخدمك؟
رفعت حواجبها شويه بعدين قالت؛كنت تقدر تقول اللي قلت يومها في البرنامج ع التليفون او في رساله الحركة اللي درتها هادي اسمها شهدرة وعيب في حقك قبل ليكون في حقي لأنك ديما تدعي انك خلوق وتصرفات المفرخ مش ليك..
هو يسمع فيها شن تقول ويشوف فيها كيف تتكلم ولاكأنها دارت حاجه ولافارق معاها اللي دارته..
وفوق هكي حاجه تحاسب فيه...
في داخله كان بركان يغلي نظرات عيونه تبين اللي قاعد يدور في داخله..
بس مع هذا ماقدرش يتكلم..ماقدرش ينطق بحرف..
وهي فهمت انه مايبيش يرد عليها احتقارا ليها..
قالتله؛مانبيكش ترد اصلا...حطت قدامه كيسه الهدايا بطريقه مهينه وقالت..
آلاء:اهم شي عندي انك بنت ع حقيقتك بش مانلوم روحي ع شي بعدين..
ومشت من حداه وخلاته...
وكل شي فيه قاعد ينحرق بحمم البركان اللي قاعد يفور في داخله..
واحد تاني كان حيرد عليها بطريقه يخليها تكره روحها..
بس تربيته..
تربيته هي ماخلتاش يدير هكي...
كمدها ردة هالفعل في نفسه...
بس صدمته فيها زادت كبرت..خيبته زادت تقوت..
والندم قعد ياكل فيه ماكله اللي سمح لنفسه يكون مع وحده زيها يوم من الايام...
وكره قلبه اللي حبها...
🍃وهي اللي كانت طول الوقت تتصنع في البرود..
اول ماركبت سيارتها وسكرت الباب انهارت وقعدت تبكي..
وفيسع شغلت سيارتها وهربت بدموعها بعيد عنه..
🍃🍃🍃🍃🍃
"ياهلا"
سلمت عليها بالخد وقالت؛شن جوك اليوم بيبو..
طوبى:تمام الحمد لله..وين الشيتات؟
عبير:خيرك مستعجله خلي نقعمز خل ناخد نفس ونهدرزوا شويه مستاحشاتك..
ابتسمت طوبى وقالت؛تستاحشك العافيه ياحنه..هي تعالي نقعمزوا في المكتب..
عبير:خليها في الساحه..الساحه متاعكم حلوة هلبه..
ضيقت طوبى عيونها ع اساس تفكر بعدين قالت:اممم..باهي..
عبير:هيا قدامي..
ومشت هي قدامها..
ضحكت عليها طوبى ولحقتها..
☘عبير وين طلعت للساحه كانت تساوي في وشاحها ع شاشة التليفون ..
وطوبى وراها تشوفلها شويه وقالت؛حلوة وتهبلي..
نزلت التليفون وقالت؛حسيته تلخبط في السيارة..
قعدت تمرر في نظرها ع الساحه وقالت؛في عمال غادي؟.
طوبى جت جنبها وقالت؛ايه..
ويبان عبد القيوم ع عبير..
خفت سرعه مشيتها وهي تشوفله وطوبى مركزه عليها..
بعدين وقفت وقالت؛قلتيلي بتحكيلي ع جية اماليه وشن قالوا عليا..
طوبى وهي مبتسمه؛تعالي نقعمزوا وبعدين نحكيلك..
ومشت بيها لمقعد طويل وقعمزوا عليه الزوز..
عبير قعدوا عيونها عليه..
تراقب في حركاته..وسكاناته...
طوبى:عبير خلاص عاد..
شبحتلها وقالت:خيرك؟!
طوبى؛مش حلوة تقعدي مبلحقه فيه هكي..
عبير سكتت وشافت القدام..
طوبى؛هدا اللي كان مش عاجبك لانه اصله تارقي..راجل بكل معنى الكلمه في كل شي..اخلاق..احترام..جدع وشهم..وغير هكي حاكي عليك لعيلته..لدرجة ان بنت عمته خيطتلك لبس العروس اللي عندهم بش تلبسيه في عرسكم..
عبير؛مش عارفه هما علاش كانوا واثقين اني حنقبل بيه اني ولا عيلتي..
طوبى:لان اللي زيه ماينردش..
شبحتله عبير بضيق وقالت؛بس صعب ياطوبى..تعرفي نظرة اغلب الناس للتوارق وشن يشوفوا فيهم..
طوبى:نظرة متخلفه وجاهله وبعيده ع الدين..الدين قال لافضل لعربي على أعجمي الا بالتقوى وهدا المقياس الوحيد اللي مفروض تاخدي بيه...
راجل يخاف ربي..وبعدين اصله يشرف تاريخهم طويل ومليان بطولات..تصدقي الايام اللي فاتوا قريت عنهم وشفت عنهم برامج خلتني نتفاجئ هلبه..ناس مثقفه وراقيه ويقدسوا في هويتهم هلبه هادي اكثر حاجه عجبتني فيهم...
تنهدت عبير وقالت؛كلها دوة مالهاش معنى عند الناس لو خديته حنعاني هلبه ياطوبى..
عقدت طوبى حواجبها وقالت؛باهي علاش جيتي اليوم؟! بش تزيدي تعلقيه فيه اكثر وتخليه يتأمل ع الفاضي!؟
عبير؛هو اصلا مش معبرتي ولاكأني موجوده شافني يدوب شافني وبعدين معاش شاف هني بكل..
طوبى؛طبيعي يعني راجل وانرفض ع سبب يمس كرامته شن متوقعه منه..بش تعرفي انه راجل حق لو واحد من هالشلتت راهو قاعد يجري في جرتك من تركينه لتركينه وداير العار..
عبير شبحتلها شويه وقالت؛معاش تزيدي دخليه في راسي..
طوبى:والله ياعبير انتي ربي يحبك لو كان من نصيبك..راهو فوق كل ميزاته فلوس فلوس..معبي..
عبير؛تغري فيا قصدك!
طوبى بضحكه؛عارفه هادم بس اللي يعبوا عيونك..
ضربتها عبير وقالت؛خزي ع وجهك..
وطوبى تضحك..
غيرت عبير عيونها عنها ورجعت شافتله وهي تقول؛تصدقي..ماتخيلتش ان في حد في الدنيا يحبني هكي..لهالدرجه ننحب اني!؟
طوبى؛يقولوا القلب ومايهوى وانتي بنيه حليوه ومهضومه وتخشي الخاطر..
عبير ابتسمت وهي تشوف لعبد القيوم كيف لبس نظراته..
وماشي بيطلع..
قعدت معاه بعيونه لين درق من قدامهم..
بعدين قعدت تغني..
حصلتيه ولد صحراوي..لايسكر لايخش قهاوي..
ضحكت طوبى وقالت؛لايخش قهاوي القهوة اللي في شارعنا ديما فيها..
عبير عقدت حواجبها وقالت؛تلقيها ولت قهوة مهيوبه بعد خشلها..
طوبى:اوووو..طحنا وماحدش سمى علينا رانا..
عضت عبير ع شاربها وهي مبتسمه بخجل..
اما هو ركب سيارته السودا العاليه وهو تعبان ..
قلبه تعبان وكل ماله يزيد يتعب في قربها المؤلم المفروض عليه فرض...
تحرك بالسيارة وين خطروا عليه ابيات حفظهم عقله..
ولقي روحه يردد فيهم...
🍃 عارفَك صعيب عَلَيّ
                لُو كان غير مآوآن المنام أتْجِي🍃
☘☘☘☘☘☘
مقعمزة بروحها في الدار..
تتفرج ع التلفزيون وتبان حزينه ومضايقه..
خشت عليها عمتها وهي تقول..
سوسو صباح الفل..ترا قولي شن جبت معاي..
ابتسمت سدرة وقالت؛شني..
قعمزت جنبها وقالت؛احزري ترا..
قعدت تفكر بعدين قالت:دونات..
خديجه بضحكه؛دونات بالشوكلاته والكريمه متاع الفرواله..
فتحت البوكس...
سدرة عيونها لمعوا بفرح..
ابتسمت خديجه بحزن..
سدرة؛حلوة مع الكاكاو..
ناضت وهي تقول؛باهي تو نديرلك..شويه وجايه..
ومشت طلعت من الدار وخلتها فرحانه بالدونات..
🍃تلاقت هي وامها في الكوجينه..
مغليه بقلق؛هاه شن دارت وين شافتهم..
خديجه؛فرحت بيهم هلبه..طفله قاعده ياعمري..
تنهدت مغليه بضيق بعدين قالت؛تو نقول لنضال يكلم خوه ويقوله يروحوا سادهم..
خديجه مطت شواربها بملل بعدين بدت دير في الكاكاو..
☘☘☘☘☘
"دخلتها الصالون مدام"
ثريا؛باهي بري..
مشت الشغاله..
وثريا كملت طريقها للصالون..
خشتله..ابتسمت تهكما وقالت؛اللي تحشموا ماتوا..
الاء اللي كانت واقف لما شافتها خاشه وسمعت شن قالت..
قدمتلها ووقفت قدامها وقالت؛اللي تبيه صار فرقتي بينا وبين حوش جدي وماخلتيش عمي يدير واجبه جيهتنا حني صغار خوه..وفوقها خربتي بيني وبين خطيبي...
نزلوا دموعها وهي تقول بحقد ووعيد..وقالت..لكن والله واللي اسمه الله ياثريا لما نبكيك زي مابكيتي امي وبكتيني ونقهرك زي ماقهرتينا وقولي قالتها الاء..
رفعت حاجبها تهكما وقعدت ساكته..
والاء هزت راسها بوعيد بعدين مشت من قدامها..
وقبل لتوصل في الباب ثريا قالتلها؛نعرف جمعيه خيريه ترعى في الارامل والمطلقات وزوجات المفقودين تو نسجل اسم امك فيها..
وقفت الاء والتفتت وقعدت تشوفلها بحقد وعيونها مليانه دموع..
ثريا تشوفلها بملامح مستقزة وهي تقول؛بش تعرفي قداش اني طيبه ومانشدش في قلبي من حد مهما كان وضيع وواطي..
لفت وجهها عنها وقبل لتطلع من الباب خبطاته بيدها بقوة..
ثريا بإزدراء؛بيئة...عديمة تربيه...
🍃🍃🍃🍃🍃🍃
الساعه 2:00بعد الظهر..
وصلت الرحله اللي جايه من اسطنبول وجايبه الجالي ونجاة لمطار معتيقه..
نجاه كانت لابسه عبايه اماراتيه ووشاح ونظارات سود بش ماتنعرفش..
نزلت بعد مانزل الجالي...
والزوز كانوا بعد عن بعض في كل اجراء داروه..
🍃خدي الجالي الشنطه متاعه..
ومشي بيطلع...
بس وهو ماشي وقف في نص الطريق..
وين شافها..
واقفه ع بعد مسافه بسيطه منه..
تشوفله بإبتسامتها الحلوا البريئه وفي يدها باقة ورد..
تفاجئ..فرح..ارتبك..وخاف...
لأن عمله الاسود معاهم في نفس المكان..
بعيده عليهم شويه تشوفلها وهي مصدومه ومقهورة..
وقعدت معاها بعيونها وهي تقدمله لين وصلت فيه..
مدتله باقة الورد وقالت..
حمد لله ع السلامه..
هو مازال متفاجئ ومش مستوعب خداها منها وقال؛الله يسلمك..قداش ليك هني؟
هي بآبتسامه قالت؛مش هلبه..
قعدت يشبحلها وهو ساكت..
وهي قالت؛لهالدرجه فاجئتك؟
هو قال؛مادرتيهاش قبل..
طوبى ابتسمت بدون ماترد..
بدت ع وجهه ابتسامه وقال؛لكن حلوة..
رفعت حواجبها..
هوقال؛مفاجأة حلوة..
ضحكت وجت جنبه وشدت ذراعه وهي تقول؛ومش هكي وبس..امشي امشي..
هو بضحكه استغراب:شن في تاني؟
هي قالت؛نطلعوا من هني تعرف..
ومشوا مع بعض..
وهي تشوفلهم كيف يهدرزوا ويضحكوا..
كيف هو نساها بكل وكأنها ماكانتش معاه..
نزلوا دموعها من القهر والغيره..
وقالت بصوت مسموع ليها وبنبرة حقد؛الله ياخدك..ان شاء الله تموتي...
🍃🍃🍃🍃🍃
"والله ماتبي كان هكي الحقي.رة هادي"
آلاء وهي تمسح في دموعها؛كان ماخليتهش يبكوا دم مانتسماش آلاء..
غرفه؛يستاهلوا مكثر...وصدقيني ياللوش لودخلتي خالك مختار يمسح عمك مسح ع خاطر عيونك..
هزت راسها وقالت؛بعدين يجي وقته خالي مختار..
غرفه بتحريض:صحه لإيدك والله صحه ليك في الوقت هدا الواحد لازم ياخد حقه بروحه كيف ماكان يكون..
رشفت آلاء وقالت؛هو هدا..عقدت حواجبها وقالت..عطلوا ولا؟
غرفه بضيق:مش عارفه امتى يروحوا..
الاء:واخدين منك موقف الزوز توا..
غرفه؛روفه زاد لما شاف نبيله تعارك فيا..
الاء؛بالك تطلع قايلته..
غرفه؛لالا نبيله مش من النوع هدا..
تنهدت وقالت؛حتى غادي ناقمين عليك..
غرفه؛ماقالوش لبابا ولا؟
الاء:لاماقالوش..ايه حقه..اسمعي اخر الاخبار حسين بيخطب..
غرفه بضحكه مفاجأة ؛واخيرا انفكت عقده طوبى..
آلاء؛البنوته احلى من خالتي هلبه..
غرفه؛من هي؟
الاء؛صاحبة اميمه اللي مرة جت لحوش جدوا بعد طيحة خالتي سدره اللي لابسه بالطو وردي..
غرفه وهي تتفكر فيها:اللي مطلعه شويه من شعرها من القدام..
الاء:ايوه هي هادي..
غرفه؛حلوة هلبه هديكا..بس اختي احلى..
قعدت تضحك الاء...
☘☘☘☘☘
"نبي تزكيه من اخصائين في القسم بش نخشله"
حسناء:تحصليها ان شاء الله..
اميمه؛يارب..
حسناء:هاشن جوك مع الدكتور خالد؟.
اميمه بضيق:قاعده نخاف منه ونتوتر..يضغط ع اعصابك ويوترك لما يسأل يخليك تتلخبطي وانتي عارفه المعلومه  مش عارفه علاش هكي يدير..
قالتلها؛تغير رايك فيه!
اميمه بضيق:الحق واعر هلبه..
رن تليفونها..
طلعاته من جيب البالطو لقت الطبيب المساعد يتصل بيها؛يانهاري..
فتحت الخط وردت؛ايوه دكتور وسام..
"تعالي بسرعه اميمه"
اميمه بتوتر:شن في؟.
"تعالي قتلك"
وسكر عليها..
نزلت التليفون وقالت بإستعجال؛سلام..
وقعدت تجري..
حسناء؛الله لايسامح اللي كان السبب..
🍃وصلت اميمه في الحجره وخشت..
لقت رئيس القسم موجود مع خالد وباقي القروب..
لما خشت خالد كان يشوفلها بحده..
رئيس القسم؛اكتمل العدد..
خالد هز راسه بإيجاب..
:تعالوا..
ومشي طلع..
وهما وراه..
وسام جي جنب اميمه وقال:وين مشيتي..
اميمه؛قريبه من هني..
وامل تشوفلهم بغيره..
🍃بدوا يلفوا ع الحالات..
ورئيس القسم يشرح ويسأل..
واغلب الاجابات كان تجاوب فيهم اميمه..
لفتت انتباه رئيس القسم..
وخالد كان مركز معاها..
فجأة..
والرئيس يشرح هو كون سؤال في عقله وسأل اميمه مباشرة..
هي انصدمت بالسؤال كان صعب استعيابه..
رئيس القسم بضحكه؛دكتور خالد واسئلته الساهله الممتنعه..
المجموعه كلهم يشوفوا لأميمه..
وامل كانت متشمته فيها..
خالد رفع حاجبه وجاوب..
وكانت الاجابه ساهله وواضحه في السؤال نفسه بس كانت تبي شويه تركيز..
وتوتر اميمه شتت تركيزها..
فوق الاحراج...ضايقت هلبه وحست وقتها ان خالد يتعمد يدير معاها هكي بش يطفشها من المجموعه..
🍃وفات باقي نهارها وجوها معكر...
☘اما بنت عمها..
فكانت معيشه راجلها في اجواء حلوة بعد مارفعاته لمطعم حلو كانت حاجزه فيه من امس..
هو فرح هلبه..وصل لأقصى مراحل الفرح وهو يحس ان طوبى الاولى رجعت..
طوبى اللي مخلياته محور حياتها وقاعده تهتم بكل شي يخصه..
🍃وفي الحقيقه..
طوبى توا مش نفسها طوبى بداية الزواج..
اللي دير فيه توا مش من قلبها..دير فيه بش ترجع تكسبه وتخليه راضي عليها...
خوفها هو اللي يحرك فيها...
🍃🍃🍃🍃
وضرتها..
لما روحت للشقه..
طول خشت دارها وسكرت عليها..
وهالوضع خوف خواتها هلبه...
☘☘☘☘☘
روحوا الجالي وطوبى لحوشهم بعد الغدي..
هو طول دار دوش ورقد..
وهي قعدت فايقه طلع في حوايجه من الشنطه بش تردهم لدولابه...
وهي تحول في الحوايج..
وين وصلت في أخر الشنطه...
شافت حاجه صدمتها...
مشبك شعر "تايقر" كبير..
خداته ورفعاته وهي تشوفله وقلبها يدق بقوة من الخوف والصدمه..
غيرت عيونها ليه وهي تشوفله كيف راقد..
وقالت في نفسها بخوف..
"ياربي مانبيش ننصدم فيه اكثر مااني مصدومه ياربي'
وقعدت طوبى في حالة من القلق..
والخوف..والتوتر..والتفكير...
كل ماتجي تحاول تقرا قرآن ولاتذكر الله ماتقدرش..
خوفها مسيطر عليها...
راجت لين فاق...
وبعد مافاق وصحصح كويس..
حاولت وبكل هدوء تسأله عنها..
🍃طلع من الحمام وهو يمسح في وجهه ويقول:آذن المغرب..
هي قالت؛مازال شويه..جالي..
حول الفوطه وقعد يشوفلها..
وهي قدمتله وقالت؛شن هي هادي؟
ووراته المشبك..
هو لما شافه انصدم..
المشبك هدا لبساته نجاه وهما غادي..!
عقله طول قعد يألف في الكذبه اللي بيكذبها على طوبى..
خدي منها المشبك وقال؛هادي لبنت صديقي..
هي بإستغراب؛بنت صديقك؟
الجالي وهو مبتسم؛في واحد معاي سافر بعيلته عنده بنت الله يبارك زي العسل خشت خاطري وشبطت فيها ويومها مابتش تروح مع بوها لين خليني ونخليك.. ضحك وقال..وقبل لنروحوا بنهار عطتني التوكه متاعها هديه..
تو نوريك صورتها راجي..
ومشي بياخد تليفونه وملامح وجهه تبدلت للغضب..
خداه وخش ع الصور..
حط ع صورة ليه هو بنيه حلوة قابلها غادي وعجباته واستأذن ماليها وخدي معاها صورة سيلفي..
ولحسن حظه صار هالموقف..
ومشالها بيها وهو يقول؛فكرتني بيك..شوفيها..
هي خدت التليفون وشافت الصورة..
هو قال؛الله ياطوبى لو تجينا بنيه..ربي يرزقني منك ببنيه مانبيش منك كان.البنات نبيهم كلهم يكونوا زيك..
هي ابتسمت وقالت؛الله يبارك عليها..ومدتله التليفون..
هو خداه وقال؛ترا قولي شن خطر في عقلك لما شفتيها في الشنطه..
طوبى:اللي بيخطر في عقل اي مراة تكون مكاني..
ابتسم وقال؛عندك حق..لكن عجبتني كيف تصرفتي بعقل وسألتيني بهدوء..
هي بضحكه؛مايغركش الهدوء اللي شفتني عليه داخل صاير اعصار وكام طلع عليك رفعك..
هو فنص بضحكه بعدين قال:انتي!؟ مستحيل..ماريتش الطف منك في حياتي...
ابتسمت وهي تقول بغرور مصطنع؛ميرسي...
فجأة آذن المغرب..
هو قال:خلاص خليني نصلي..
وهي قالت؛حتى اني ماشيه نتوضا..
ومشت للحمام..
وهو معاها بعيونه لين خشت..
تبدلت ملامح وجهه للغضب وقال؛شن تحساب روحها دير هادي مانمشيش اني بالجو المعفن.هدا...
وحط المشبك في جيب التوته..
ومشي خدي الصلايه وفرشها وبدي يصلي..
☘☘☘☘☘
"هدا امتى؟!"
صابرين؛قتلك الجمعه اللي فاتت..
نجاه بصدمه؛تو تفكرتهم توا تفكرت ان عندها احفاد!؟
مروة؛استغربنا حتى حني..
صابرين؛ياسامعه بشي ياشايفه شي..
نجاه عقدت حواجبها وهي تفكر بعدين قالت؛في حد موصللها معلومه وشبه عارفاته من هو ولشن يبي يوصل..
صابرين؛قصدك خديجه؟
نجاة؛وهو في غيرها شيطانة الرجيم لكن والله ماهي كاسبه حاجه..
مروة؛وخوها امتى بيدير موقف ويحطهم كلهم عند حدهم..
نجاة؛قريب هلبه يامريوه وراسك قريب..
مروة تنهدت وقالت؛ان شاء الله..
🍃وشويه وجي راجل مروة روح بيها هي وصغارها...
وقعدوا صابرين ونجاه مع بعض براحتهم..
حكت نجاة ع اللي داراته كله في السفره..
صابرين؛وشن بتسفيدي ماهو كله بيجي ع راسك بعدين..
نجاه؛المهم يخش لعقلها الشك..
صابرين؛والله ما مانقول كان ان شاء الله ياربي تفتكي منه ع اهون سبب..
نجاه ماعجبهاش الكلام غيرت الموضوع وقالت؛وانتي شن صار فيك؟
صابرين؛زي مااني علاقتي معاه قعدت علاقه في حدود الخدمه بس..هو راجل متحضر وماعنداش ع حركات الصيع المتخلفين اللي هني..
نجاة؛احسنلك..
صابرين؛مش هدا المهم..المهم بعتلك معاي عرض خدمه..
نجاة بإستغراب:عرض خدمه؟
صابرين:ايه..شايف تصاميمك وشغلك وقالي نبي نتعاون معاها في مشاريع برا البلاد..
نجاة بخوف؛خيرك انتي زي الهبله واثقه فيه لهالدرجه! راهو هدا ولد الواعر طوبى اخته...
صابرين؛وهو ناقم عليها اكثر منك..
نجاه؛كيف!؟
صابرين؛يومها حكالي قصته كله وفهمت انه ناقم ع عيلته كلها وبالذات سدرة وطوبى..
نجاة.بفضول؛ترا احكيلي..
صابرين؛نحكيلك بس بشرط..
نجاة بضجر؛مبردك..شن هو ؟
صابرين؛تمشي غدوة عازمني ع الغدي تتلاقوا وجهه لوجه وتتفاهموا..فرصة عمرك هادي يانجاة..
نجاة؛والجالي!؟
قالتلها؛ضروري يعرف!..
سكتت وهي مضايقه..
صابرين؛خلاص عاد نجاه اشحطي روحك شويه درهتيلي كبدي..
هي قالت؛باهي باهي..قلتي ع الغدي..
صابرين:ايه..
نجاه؛باهي احكيلي هيا..
صابرين بحماس؛اسمعي ياحنه..سنه 95 وقتها كان عمره 21عام.............
☘☘☘☘☘☘
في دار الخزين فوق السطوح...
كانت مسكره ع روحها وهي تتكلم بالتليفون..
آلاء؛تبيني نوافق جيب امك..امك هي اللي تجي تخطبني من امي بغير هكي ياوليد ماتحلمش..
"حاضر حبيبتي حاضر انتي غير توا خلي جدي يعطي فيك كلمه بس"
الاء:الكلمه يعطيها.بوك واللي تجي تخطب امك هدا اخر كلام عندي وليد..سلام..وسكرت عليه..
رجع اتصل بيها مرة تانيه..
فصلت المكالمه..وسكرت تليفونها ومشت طلعت من دار الخزين..
🍃وفي الحوش اللي في جنبهم..
صفيه؛اني اللي يهمني انكم تاخدوا اذن لطفي وبناويته.
علي:من غير ماتقولي قال ليكم الاذن خلوا الفرح يخش لحوشنا ونتفائلوا بيه خير..
اميمه:نفسه كلام البنات ماما..
صفيه شافت لحسن كيف يشبحلها بعدين قالت؛خلاص ربي يقدم اللي فيه الخير نهار الخميس نمشولهم..
علي؛ع خير ان شاء الله ع خير..
اميمه.وهي تشوف لحسين قالت؛ربي يتمم ع خير..
هو نزل عيونه وقال؛ان شاء الله..
🍃🍃🍃🍃🍃🍃
"متوقع هي ترضي تزوج طول بعد اللي صار معاها"
ربيع بضحكه؛اني نخليها ترضى..
عبد القيوم؛افطن لروحك دير في حركات تخلي اي حد يشك فيك داير معاها سريب ولاحاط عينك عليها من قبل..
ربيع؛نبان خفيف لهالدرجه!؟
عبد القيوم؛اها..اثقل..
رفع حواجبه ونزلهم بعدين قال؛باهي خليك مني توا وخبرني عنك انت مافيش جديد..
حرك راسه بالنفي وقال؛لاجديد يذكر ولاقديم يعاد..وخدي طاسة الشاهي وشرب منها..
وربيع حتى هو قعد.يشرب ويشوفله ..
🍃🍃🍃🍃🍃🍃
تاني يوم...
الاثنين..
26فبراير..سنة 2018
الساعه 2:30بعد الظهر..
في احد المطاعم..
كانوا ع وحده من الطاولات مقعمزين يتغدوا..
ماعدا نجاة اللي كانت خايفه..
شافتله بفجعه لما سمعاته قال..
مايشوف فيك حد..حني هني في مكان خاص مغطي
ع الموجودين..وهو في كل الحالات مايجيش لمكان زي هدا..
نجاه؛علاش؟
مختار ابتسم وقال؛ذوق مش عالي لهالدرجه..
صابرين وقفت ماكله وشبحت لنجاه..
ونجاه اللي بدت تعصب قالت؛ياريت تخش في موضوع الخدمه مانقدرش نطول..
هو قال؛تغدي قبل..
ورجع ياكل عادي...
نجاه قعدت تشوفله من فوق لتحت بعدين شبحت لأختها..
قعدت صابرين تترجى فيها بعيونها تفوت..
وهي حاولت تهدي روحها ع خاطر اختها..
☘☘☘☘☘☘☘
وفي حوش محمد شنيبه..
رفعت نسرين المفرش للدار بش بتفرشه لسفرة الغدي..
فجأة رن تليفونها..
سرعت خطواتها لين وصلت في باب الدار..
نسرين؛خديجه خودي..وحدفتلها المفرش...
تلقاته خديجه..
ومغليه قالت؛خيرك ماتجيش؟
نسرين؛تليفوني يرن..
وولت للكوجينه بسرعه..
فرشت خديجه المفرش..
وحطت راما سفرة الغدي..
خديجه؛اقربي سدورة حبيبتي..
قدمت سدره..
حطتلها خديجه المفرش ع حوايجها
وحناها.مدتلها كاشيك؛هي خودي بنتي..
خدت سدرة الكاشيك وبدت تاكل..
وبدوا يتغدوا..
مغليه:والله ماوقت تليفونات..
خديجه؛في ناس مايحلالهم الاتصال الا فهالوقت..
وسكتوا وقعدوا ياكلوا...
فجأه..
"زودولي..زدويلي يما"
وصرخت بصوت عالي..
كلهم سيبوا سفرة الغدي وطلعوا يجروا....
🍃🍃🍃🍃🍃
بعد الغدي..
جتهم القهوة..
وبدي الكلام في الشغل...
مختار:بصراحه لما شفت شغلك وسمعت عنك من هني وهني..استغربت..قلت كيف وحده زيك ماتكونش في مكان افضل في الشركه..
هي قالت؛اني في مكاني اللي ينسابني..
ابتسم؛قلتها لأختك..
فنصت صابرين..
هوكمل يقول؛قلتلها اختك مش عارفه قدر نفسها..
ارتخوا عيون صابرين وقالت:عندك حق..
شبحتلها نجاة..
مختار؛حرام تدفني امكانيات تحت رجلين واحد زي الجالي مايملكش ربع اللي تملكيه ولولا الواسطه..ووجود خوه طاهر وقتها ماكانتش فهالمكان اللي قاعد فيه حاليا..
نجاة بحده؛الجالي وصل للمكان اللي هو فيه توا بشطارته واجتهاده.الجالي مهندس ممتاز..
مختار:Ok مهندس كويس..وكويس جدا..بس مش حيوصل لمستواك اللي انتي وصلتيله بسبب طاهر والجالي نفس الشي..طاهر كان الاحق منكم الزوز ع فكرة بس هو كان بسيط احلامه ع قد حاله وماعنداش طموح..
نجاة وهي تحاول.تخفي توترها:الله يرحمه..اني مش فاهمه لتوا انت شن تبي بالزبط..
مختار:نبيك تحطي عقلك في راسك وتوافقي ع خدمة معاي وتطلع من هداكا المكان اللي قاعدين يمصولك في دمك فيه.
وطبعا نقصد زوجك المصون..
نجاة بعصبيه؛انت من بكري  تتجاوز في حدودك واني نفوتلك ونمشي لكن لعند هني وخلاص..
صابرين؛اهدي نجاه واسمعيله بعقل ارجوك..
نجاه؛انتي اللي خلي عندك عقل..
مختار بإبتسامه مستفزة:انتي اولى بالنصيحه والله..
شبجتله وقالت:احترم نفسك ماتخلنيش نمسح بيك الارض..
صابرين بصدمه؛نجاة!
مختار:خليها عاذرها..خايفه تسمع كلام الحق اللي هاربه منه..
عارفه كويس ان الجالي الانتهازي قاعد يسرق في تصاميمها ويعدل فيهم ويقول ليا اني وياخد الجمل بما حمل..وعارفه كويس انه كان يدير في نفس الشي مع طاهر..ولان البنادم هدا شخصيه مريضه كما هو ظاهر يدير اي شي بش يخلص من خصومه.ومنافسيه..تنهد وقال..الله يرحمك ياطاهر..الله يرحمك ويسامحك..
صابرين عقدت حواجبها وهي تشوفله..
اما نجاة بدت ع وجهها ملامح الصدمه..
هو كمل يقول؛علقتي بعد السيف منجل ياباش مهندسه..
هي خدت شنطتها وناضت تقول:هي نوضي انتي نوضي ع اللي يسمع كلامك مرة تانيه..
ودفت الكرسي ومشت..
هو قال لصابرين؛الحقيها..
ناضت طول.وهي تقول؛اسفه حبيبي..
بعدين مشت لحقتها..
وهو قعد معاهم بعيونه..
بعدين ابتسم بمكر..وخدي طاسة الميه وشربها...

#فلاش_باك
#طوبى

.....يتبع....