طوبى ☕شارع القهوة☕

الجزء_التاسع_والتسعين"حمامة بيضا

#طوبى "جنة طوبى"
#جمان_فريد
#الجزء_التاسع_والتسعين"حمامة بيضا"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
‏قال شيخ الإسلام ابن تيمية:
السكوت بلا قراءة ولا ذكر ولا دعاء ، ليس عبادة ولا مأمورا به؛ بل يفتح باب الوسوسة، فالاشتغال بِذِكْر الله أفضل من السكوت.
📙 الفتاوى | ج 23 ص 286
🌿🌿🌿🌿🌿🌿🌿🌿🌿🌿🌿🌿
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 هناك أناس فقراء جداً ، لا يملكون سوى المال .!"
- جبران خليل جبران🍃
_________________________________________
"كريمه اني طالعه مشوار نص ساعه"
هزت العامله راسها ايجابا..
وزميلتها مليحه تبعت صاحبة البوتيك بعيونها لين طلعت بعدين غيرت نظرها للبانه اللي كانت لاهية بتليفونها..
🍃وتعدي عشرة دقايق..
وتولي صاحبة البوتيك..
لما خشت كل العاملات استغربوا ماعدا مليحة اللي كانت تسرق في النظر للبانه..
خشت صاحبة البوتيك لمكتبها وسكرت الباب وراها بالمفتاح..
وزادت استغراب العاملات وهني حتى مليحة استغربت..
🍀وتعدي بالزبط ربع ساعه..
تفتح صاحبة البوتيك باب المكتب وتنادي..
/مليحة تعالي..
ارتعبت مليحه..حست بروحها في عز الصيف جمدت..
مشت بخطوات باين فيهم للخوف للمكتب وعيون زميلاتها معاها ومنهم لبانه..
سكرت المراة الباب وقالت..
/شن في بينك وبين لبانه بش درتيلها هكي!؟
هي بصدمه قالت..
/شن عملتلها انا!؟
:كل شي ريته بعيوني يامليحه خشيتي لمكتبي دورتي فيه بعدين طلعتي فلوس من شنطتي وتسلحبتي لحجرة العاملات وحطيتي الفلوس في شنطة لبانه..
فهمت العامله ان البوتيك فيه كاميرات من الصدمه معاش قدرت تتكلم..
:في حد باعتك ديري هكي !؟
من الخوف بلعت ريقها وقالت..
/ايه يامدام ايه..بنت صاحبتك فاطمه..
عقدت حواجبها وقالت..
/احكيلي اللي صار بالتفصيل...
🍃🍃🍃
بعد بضع دقائق..
طلعت مليحة من المكتب وهي تمسح في دموعها وتوجهت طول لحجرة العاملات..شويه وولت منها للمكتب..
ماطولتش فيه طلعت منه ودمعتها ع خدها وبعدين من البوتيك كله..
وزميلاتها في حالة استغراب شديد..
فجأة نادت صاحبة البوتيك ع لبانه..
خافت وهي تمرر في نظرها ع زميلاتها بعدين مشت للمكتب..
🍃دقت الباب وخشت..
المراة ورا مكتبها قالت:سكري الباب ترا..
سكرت لبانه الباب وهي خايفه ومتوترة..
:تعالي قعمزي..
مشت لبانه قعمزت مقابلها..
تنهدت المراة وقالت..
/لبانه بنسألك سؤال ياريت تجاوبيني عليه بصراحه شن في بينك وبين فاطمه..
لبانه بخوف:ليش هالسؤال!؟
:جاوبيني حبيبتي وماتخافيش..
بلعت ريقها وقالت..
/مابعرف هي مابتحبنا انا واختي والله العظيم بدون سبب يعني ماعملنا شي ابدا..
:متأكده؟
لبانه بتوتر:هي مفكرة انو انا حاطه عيني ع ابن خالها بس والله مافي بيني وبينه شي هو حاول يحكي معي وانا صديته اكثر من مرة..
المراة قعدت تفكر في حكاية فاطمه ومعز اللي عندها عليها خلفيه وتعرف كويس ان فاطمه هي اللي رفضاته..استغربت وتسائلت عن سبب الحقد اللي وصل بيها لهالدرجة..
لدرجة انها تكيد مكيدة زي هادي للبانه..
لبانه بقلق:هي قالتلك شي!؟
:لالاماقالت شي..شافت لمكتبها خدت ظرف فلوس ومداته للبانه وقالت..هدا معاشك وفوقه مكافأة ع امانتك واجتهادك في الخدمه واني توا متمسكه بيك هني اكثر من قبل..
لبانه ماصدقتش اللي صار..قعدت تشوف للظرف بدهشه..
:خودي..
شافت للمراة بعدين ردت نظرها للظرف وخداته وهي تقول..
/شكرا..شكرا كتير..
:هدا حق تعبك حبيبتي..اطلعي توا ونادي البنات بش نعطيهم معاشاتهم..
ناضت وهي تقول بإبتسامه وعيونها يلمعوا بالدموع..
/حاضر..
ومشت طلعت وهي مش مصدقه اللي صار معاها..
كلمت زميلاتها بعدين مشت للحجرة متاع العاملات..
حطت الظرف في الشنطه وهي بطير من الفرح..
🍃في هالوقت.
وصلوا امها واختها للمستشفى اللي فيها نبيه..
ركبوا للقسم اللي قاعد فيه..شافوه طلع ومعاه معز وعبد القيوم..
شاديه وهي مبتسمه مفاجأه..
/ييي..مااحلاهن..
ضحكت سلافه..
قدمولهم ووصلوا فيهم وبدت شاديه تدعي لمعز وعبد القيوم..
/الله يعطيكن العافيه ويسعد قلوبكن ياتقبروا قلبي شو موجبين وولاد اصول..
معز وعبد القيوم وهما مبتسمين بإحراج..
"بارك الله فيك..تسلمي"
نبيه:الله يعطيكن العافيه عذبناكن معنا..
عبد القيوم:مادرنا شي..حمد لله ع سلامتك..
نبيه:الله يسلمك..
معز؛واجب ياعمي نبيه وياريت والله قدرت ندير اكثر من هكي..
شاديه؛لسا في اكثر من هيك ابني! الله يحميك لشبابك ويفرح اهلك فيك..
سلافه؛عنجد شكرا كتير..
عبد القيوم بإبتسامه؛العفو..انا نستأذن توا وبالله كان صار شي ولااحتجتوا شي كلموني..
كلهم بأصوات متقطعه..
"الله يخليك..شكرا كتير.."
عبد القيوم ؛السلام عليكم..
وفات من جنب سلافه اللي ردت عليه وهي حاسه بقلبها مشي معاه..
معز؛تبوا نوصلكم..
سلافه:معي سيارة..
معز بإبتسامه؛تمام..ماتبوا شي..
نبيه:سلامتك ابني الله يعطيك العافيه..
معز؛بارك الله فيك..استودعناكم..
ومشي من حداهم وهو متحسف ع شوفة لبانه..
نبيه:مابتلاقي بطيبة اهل هالبلد وكرم اخلاقهن..
شاديه:ايه والله..انت كيفك احسن اليوم..
نبيه؛ايه الحمد لله..
سلافه جت تعنقت ذراعه وقالت..
/يللا حبيبي..
نبيه بإبتسامه؛يللا..
ومشوا مع بعض وهما يهدرزوا لين طلعوا من المستشفى...
🍃🍃🍃🍃🍃
وفي حوش طوبى الواعر..
كانوا يجروا ويعولوا على عشي اهل هاديه..
الجو كان سخون بزياده اليوم والضي مقطوع ومع هدا تحملوا وداروا الواجب..
🍃اريج بتعب؛مش قادرة نتنفس..
سميرة بقلق:خيرك اريج!؟
ع جية فردوس من الكوجينه الخارجيه خشت عليهم وشافت وضع اريج قالت..
/والله توقعتها..
وبدي ينزف انف اريج وهي كانت حاسبه حسابها وشاده في يدها كلينكس حاولت توقف بيه النزيف..
فردوس بضيق:لاحول ولاقوة الا بالله..
🍃وتطلع طوبى من الحمام بعد مادوشت لجنة اللي قلقها الحمو..
خلتها في لبسه خفيفه وحطتها ع الزليز "البلاط" في دارهم وحطت قدامها العابها..
طلعت من حداها ومشت للكوجينه لقتهم يعانوا في اريج..
طوبى بإستياء:الجو بكل اليوم في طاعة الله..اريج نوضي نشغلك الفرارة وقعمزي قدامها..
اريج وهي شاده انفها..
/بطلع هوا سخون..
سميره:مش باهيه للي عندهم جيوب.
طوبى:ع الأقل تخفف شويه..
خشت مطيرة وهي تقول..
/كل شي واتي ياعيله؟
سميره وهي تشوف لأريج..
/ايه كله واتي..
مطيره بضيق:اروجه..
اريج:ماباش يوقف..بالله طوبى طلعي ادرينالين.
طوبى:خل نجيب قطن قبل..ومشت طلعت من حداهم..
🍃واسعفت اريج نفسها بشويه لما بخت شويه من الأدرينالين ع قطنه وسدت بيه انفها ووقف بعدها النزيف تماما..
☘وحال الصيف في وضع الحرب كان متعب جدا لصفاء وابتسام اللي ثقلوا من الحمل..
صفاء كانت تبكي بكي وسميره الوحيده اللي حاولت تخفف عنها الباقي مافي حد قادر يتحمل حتى نفسه..
🍃🍃🍃🍃
ويليل الليل...
ويجوا اهل هاديه مرافقين هاديه وعبد المطلب..
روحت اميمه من الخدمة واستقبلتهم مع العيله..
وقتها الجو كان بادي يتغير شويه ويولي الطف بس الضي قعد مقطوع..
شغلوا المولد..وشغلوا منه المكيف للضيوف..
ومشت العزومه على مايرام...
🍃قبل ليروحوا...
في الجنان جهة الكوجينه..
عبد المطلب:تختخيه جدك مايردلكش طلب.
اميمه بضحكه:باهي تو نحاول..
عبد المطلب:حاولي بقلب ورب والله الوضع مولي صعب الفترة هادي وفلوس الايجار يديروا حل..
اميمه بإبتسامه؛حاضر والله حاضر تو نقعد وراه لين يقولك باهي..
عبد المطلب:سلم بنتي..
ضحكت اميمه..
هو ابتسم وقال:ماتبي شي..
اميمه بإبتسامه:سلامتك..
عبد المطلب:تصبحي ع خير..ومشي...
ردت عليه وهي مبتسمه.
/قدامك كل خير...وخشت داخل..
*******
مطيره وشاده طاسه ليمونادا..
/خوي ونعرفه لازم يستفيد من الأزمه..
اميمه بضحكه؛حتى اني قلتها..
طوبى وهي مرقده بنتها في حجرها..
/المهم انتي ماعندكش مشكله..
اميمه؛نهائي..
شافت فردوس لغرفه اللي كانت راقده مقابلة المكيف وهي تقول..
/غرفه تعبها هلبه حملها هدا..
طوبى بإبتسامه..
/حتى هي قالتها..وقالت مش مدورة المهم تجيني بنيه..
ابتسموا وهما يشوفولها هي وصغارها كيف راقدين حدا بعض..
ع خشة اريج وهي شاده التليفون وع وجهها ملامح الفرح..
/للوشه بعتتلي رساله قالت حامل..
ضحكوا بفرح ومطيره قالت..
/الله يبارك الله يبارك...
🍃واتصلت أريج بأختها فيديو عن طريق الماسنجر باركولها وهدرزوا عليها وهي ارتاحت لما حست ان الخبر فرحهم وغير جوهم...
🍃🍃🍃🍃
"في شي صار ماسألتك هالسؤال من فراغ اللي حكتيه قبل شوي ببيبن هالشي"
لبانه بقلق:انا كمان فكرت هيك لو بتحكي لميار بيجوز تعرف شي تخبرنا عنه..
سلافه هزت راسها هي تفكر..
🍀🍀🍀🍀🍀
ويعدوا يومين..
وتبدا بعدهم امتحانات الشهاده الاعداديه..
مروة ومناسك كانوا في حالة توتر وخوف..
عكسهم يزن اللي كان واثق من نفسه وحاط بين عيونه وصية امه..
اما محمد ولد خديجه اخر همه..زي أمه اللي ماكانش مستقبل ولدها ع قائمة اهتمامتها حاليا...
🍃🍃🍃🍃
في أخر يوم امتحانات..
الساعه 7:30صباحا..
طلعت مناسك لسيارة مالك وهو طلع وراها ومعاه مازن..
مازن:خلاص جيبه بعدين مع 11 اني بنرفع المراة لحوش ماليها..
مالك:تمام..اوينا..
ولبس نظاراته ومشي طول لسيارته..
ركبها وشغلها وطلع بأخته للمدرسه وخوه خش للحوش.
🍃بعد ماقطع مسافه لابأس بها وصل للمدرسه..
وفايزة كيف وصلت معاه..
مناسك؛مروش..ونزلت بسرعه من السيارة..
ومالك بعيونه من ورا النظارات مع مروة..شافها كيف مشت لأخته وسلمت عليها وخشوا مع بعض وهما يراجعوا..
تنهد وكيف جي بيتحرك جاه اتصال..
خدي تليفونه اللي كان جنبه شاف المتصل كان نفس الرقم..
عقد حواجبه وفتح الخط ورد وهو يقول..
/مني انتي مني!؟
لارد..
مالك:اسمعي بنديرلك حظر تتصلي برقم تاني ماتلومي الا نفسك..
"مالك"
ارتخوا حواجبه وهو يقول..
/اسما!؟
"ايه اسما يامالك اسما..اللي نسيتها بسرعه وهي ماقدرتش تنساك.."
غمض عيونه ورفع حواجبه بعدين نزلهم وقال..
/اسما..فتح عيونه وكمل يقول..اخر مرة تتصلي بيا تمام خليني مراعي الايام اللي كانت بينا..
"هدا كله ع خاطر مني!؟ ع خاطر وحده مش حاسباتك مخلوق اصلا"
مالك؛ماعلي خاطر حد ياأسما..لاهي ولاغيرها اني خلاص السريب هدا قطعته معاش نبيه بكل وحتى انتي يااسما راجعي نفسك وشوفي الحياة اللي عايشتيها انتي صح ولاغلط..بالذات انتي بنت والبنت راس مالها سمعتها وشرفها..فكري في مستقبلك بعدين كيف بيكون يااسما..وفكري في وضعك مع ربي تمام!! راهو الموت كل يوم ترفع وماحد واخد منها شي واخرتنا لربي..ديري الباهي بش تلقي بشن تقابلي يااسما..ونهي المكالمه وهو يشوف للطريق..قعد يفكر في الكلام اللي قاله للحظه مااستوعبش ان هالكلام طلع منه هو..ابتسم ابتسامه خفيفه ورد التليفون لمكانه بعدين تحرك بسيارته...
🍃🍃🍃🍃🍃
بنغازي...
في احد مصايفها الجميله..
كانوا صفيه وراجلها معمر حاجزين شاليه بمناسبه ذكرى زواجهم..
هو وياها كانوا مقعمزين تحت شمسيه قدام الشط..
حاطه راسها ع كتفه وتحكي هي وياه عن موضوع بدي شاغل العيله كلها الفترة الاخير..
معمر:الكلام بدا ينتشر في العيله عبد القيوم بياخد سوريه..
صفيه بضيق:امي ربي يهديها هي السبب..
معمر:كيف يعني مافيش منها دوة؟
صفيه؛نهائي..امي تبي تحط عبد القيوم في الأمر الواقع وكيف ماتعرف عبد القيوم مش خالي..
معمر:باهي كنه مايخطب اللي يبيها..
رفعت راسها وقالت..
/الحكايه معقده شويه يامعمر..
معمر:شن معقدها!؟
تنهدت وقالت..
/عندك مكان للسر..
ضربها ع يدها وقال..
/متعوده بيا نطلع في الاسرار!؟
هي بضحكه؛لا مش قصدي..بس الحكايه حساسه شويه وعبد القيوم مايبيهاش تطلع..
معمر؛غير احكي احكي مستحيل يطلع مني شي..
🍃🍃🍃🍃🍃
"لهون وصلت معها!!؟"
ميار بضيق:والله لولا امي راني ضربتها ضرب امها نفسها قريب كلتها..
سلافه بصدمه؛ياربي دخيلك..يعني لو ماكانت رفيقة عمتك بتخاف الله كنا وقعنا بمصيبه كبيره.
ميار سكتت وهي محرجه ومضايقه..
سلافه بحزم ودموعها في عيونها..
/ميار انتي رفيقتي وكنتي معي بأصعب ظروفي عملتوا معنا انتي واهلك شغلات منيحه كتير لايمكن ننساها..بس هلأ ياريت تسامحيني ماعاد بدي شي يربطني فيكي..
ميار بصدمه:سلافه!؟
نزلوا دموع سلافه وهي تقول..
/بترجاكي حاولي تتفهميني هيك احسن للكل..
ولفت ومشت وخلتها وهي تبكي بصمت وقاعده ترجف من صدمتها وخوفها...
🍃متأكده ان فاطمه مش حتخليهم في حالهم مادامهم قاعدين اصحاب لحوش خالها وقاعد معز قريب ع اختها ويحاول معاها..
فكرت انها لما تقطع علاقتها نهائيا بميار حتبعد عن شر بنت عمتها..🍃
وهي طالعه من المعهد اللي تخدم فيه ماركزتش ع عبد القيوم وهو جاي..
لما شافها طالعه تبكي استغرب وخاف ومشالها طول..
"سلافه"
وقفت وهي متفاجئه تحساب روحها تتخيل!..
"سلافه"..
شافت جنبها لقاته هو بنفسه واقف قدامها..
بدت ع وجهه ملامح القلق وهو يسأل فيها..
/كنك تبكي صايرة حاجه!؟
سلافه مسحت دموعها وهي تقول..
/لامافي شي مشكله صغيره..
عبد القيوم؛في حد ضايقك !؟
بإبتسامه قالت..
/لا والله نهائي بس يعني انا مضايقه شوي وهيك صارت مشكله عاديه مافي شي محرز ..
عبد القيوم هز راسه وقال..
/تمام..مرر نظره قدامه وقال..كيف حال بوك؟
سلافه:الحمد لله صار احسن..
عبد القيوم؛الحمد لله..بصراحه انا جيت نسألك عن وضعكم يعني مرتاحين مش صايرة معاكم مشاكل!؟ لأني حسيت من اللي صار لبوك اخر مرة ان وضعكم متأزم شوي..
سلافه انحرجت وضايقت وهي تقوله..
/لاعادي الحمد لله مثلنا مثل كل هالناس.
عبد القيوم؛اسف لوضايقتك..انا معتبر نفسي من العيله ع قولتكم في بينا خبز وملح
ابتسمت وقلبها يدق بقوة..
وهو مكمل يقول..
/ومواقف..يعني وقفتوا معاي ووقفت معاكم..
سلافه بضحكه:شو عملنا ماعملنا شي.
عبد القيوم؛نسيتي رمضان قريب كله وانا يانفطر عندكم يامنكم..
ابتسمت وهي تقول..
/اقل من الواجب..
عبد القيوم:حتى انا اللي نديره معاكم اقل من الواجب..سمعت من استاذة نفيسه انك دوري ع خدمة تانيه..عندي صديق زوجته فاتحة مركز تقويه ومدايرة دورات صيفيه يدوروا ع ابله خط واملا ويبوها فترة مسائية شن رايك..
هي بإبتسامه:كتير منيح بس بدي اعرف وين؟
عبد القيوم:مش بعيد عنكم في******..
سلافه بضحكه:كتير قريب..
عبد القيوم؛كويس..لو تقدري تمشي اليوم وتشيلي معاك ملف سيرة ذاتيه وقوليلهم من طرف عبد القيوم عمران..
سلافه حاسه قلبها بيطلع من مكانه تشوفله كيف يشبح القدام طول الوقت وهو يكلم فيها..مش قادره تغير عيونها عنه..راجل بمواصفاته واخلاقه كيف تقدر تمنع قلبها عن حبه والانجذاب ليه!؟
بنظرات حب تلمع بالدموع..
/إن شاء الله...
عبد القيوم:تمام..حاجه اخرى يعني بما اني فتحت الموضوع انا الحق لما عرفت بوك شن كان يخدم ضايقت واجد..نعرف مؤهلاته وشغله شن كان قبل متأكد ان نص مرضه حسره..
نزلت سلافه عيونها وهي مضايقه..
عبد القيوم:اسف مش قاصد نحرجك..لكن نبي نقولك لقيتله شغل في مكان احسن عندي صديق عنده سلسلة مطاعم فاتح واحد في ****** ويبوا محاسب كويس تتوقعي لو حكيت معاه في الموضوع يتقبل عادي!؟
سلافه بإبتسامه؛ابدا مافي مشكله شغل بمحل محترم وإلو علاقة بتخصصه اكيد رح يقبل فيه..
عبد القيوم بإبتسامه:خلاص تو نكلمه..ضم كفوفه لبعض..هي طول ركزت بنظرها ع الخاتم وتسمع فيه يقول..اسف جيتك هنا وممكن سببتلك احراج..
رفعت عيونها فيه وقالت بإمتنان..
/ابدا..شكرا كتير الك عن جد مو عرفانه شو بدي قول غمرتنا بلطفك..
هو قال:لطف الله..والشكر لله..هي نستأذن..السلام عليكم..
ولف ومشي وهي تلحق فيه بنظراتها المتيمه لين ركب سيارته وتحرك..
تنهدت وغيرت نظرها لبوابة المعهد..تفكرت اللي صار مع ميار تبدلت ملامح وجهها للحزن ومشت حتى هي لسيارتها ركبتها وشغلتها وتحركت بإتجاه الحوش...
🍃🍃🍃🍃🍃
"عندها حق عمتي وجيجها واجد مش حيجيه من وراها كان وجع الراس"
صفيه:تصدق ندمت اللي حكيتلك!؟
معمر:تراهين "حبيبتي"..فكري بعقلك مش بالعاطفه تخيلي لو عبد القيوم خداها وسمع طليقها وقتله ولابعتله من يقتله شن ينفع الحب بعدين!؟
صفيه بضيق؛حتى انا مخوفتني الحاجه هذي لكن يامعمر عبد القيوم بيموت عليها مايبي من الدنيا شي غيرها هي..راهو عايش عشانها..يعني مافي شي يقدر يمنعه عنها لو من يصبي في وجهه يتخطاه ويكمل طريقه ليها..
معمر:باهي شن يدريه ان هي تقبل بيه!؟
صفيه:وليش ماتقبل ياسيدي شن ناقصه عبد القيوم!؟
معمر:انا نحكي ع الفرق في الاصل ياصفيه هما مايقبلوش في الغالب..
صفيه:لاياما منهم عرب عاطيين لتوارق والعكس.
تنهد وقال:تبي الصراحه مانبيله هالموضوع بكل يعز عليا واجد نتمناله احسن من هكي..
صفيه:لأنها مطلقه !؟
معمر:مطلقه وعندها بنت ووراها مشاكل..مايستاهل يكون هذى نصيبه..
صفيه وجعتها طوبى مارضتش فيها كلام راجلها دمعوا عيونها وهي تقول بشي من الانفعال
/والله هي اللي مافي راجل يستاهلها..احسنلها تقعد من زيجه خير ماطيح في ناس هذي عقليتهم..
معمر بتعجب:كنك حمقتي!؟
صفيه بنرفزة:خطاني...
شبحلها شويه بعدين غير نظره للبحر وهو يحرك في راسه يمين ويسار...
🍃🍃🍃🍃🍃
ويخش مالك للحوش وهو جايب معاه راجل بش يصلح المولد..
رفعه لمكان المولد وحكاله بالتفصيل شن صار فيه..
:تمام فهمت العله وين..غير بالله ياخوي ع رحمة الوالدين طاسة ميه..
مالك:حاضر..شويه وجاي..
ومشي بإتجاه باب الكوجينه الخارجي ع باله ان الحوش فاضي..
شاف الباب المفتوح استغرب وتوقع انهم نسوه..
خش داخل ولما جي بيفتح الثلاجه بش يطلع منها ميه..
سمع كلام صدمه بقوة..
كانت مرت خوه في دارها تتكلم بالتليفون ولأن الدار قريبه من الكوجينه كان صوتها واصله..
"عارفاته مايبنيش نطلع يبيني نقعد ديما محبوسه نخدم في خوته............وين نندري عليه كلمني قالي حصلت في الزحمه ومش عارفه شنو......والله مادخلي فيه بيرفعني غصب عنه..عييت وفديت من الحبسه والتقييد مش قادره ناخد راحتي.............تي خوه كل شوي ينط في تركينه بيني وبينك هو واحد مش مزبوط واني مش متريحه لتصرفاته.........شن بندير كان تكلمت مازن يقلبها عليا..."
ماقدرش يسمع اكثر من هكي..
فتح الثلاجه وخدي شيشة مية وطلع طول وهو مصدوم ع الآخر..
كان يشوف فيها زي الاخت..ليها احترام وقدر وشايفها خير من سلفاتها..وللأسف طلعت اشر منهم..
وصل في الراجل ومدله الميه وتكلم بالغصب..
قعد يمسح ع لحيته كل شويه من العصبيه..وصدره كان ضايق ع الاخر..
🍀عدت ساعه..
كمل فيهم الراجل شغله وطلع بيه مالك من الحوش..
وبعده طول جي مازن..اتصل بمرته طلعتله تجري زي اللي كان في حبس وطلقوا سراحه..
🍃🍃🍃🍃🍃
خشت السيارة للفيلا ودرست في الحديقه..
نزل الاقجم وفتح الباب الخلفي..
وينزل مختار وهو يقول..
/سكر الباب والحقني..
ومشي وشويه ولحقه الاقجم ..
وصلوا في الباب الخلفي للفيلا..
وقف وراه وبدي يدق..
لحظات وفتحت امينه اللي كانت ملامح الحزن مسيطره ع وجهها قالتله..
/حمد لله ع السلامه..
مختار وهو يمرر في نظرها ع عيونها المحمر من البكي..
/الله يسلمك..التفت وقال..اقجم هادي امينه..
شافتله امينه..
وهو قال بإبتسامه..
/شن حالك خالتي امينه..
هي قالت:الحمد لله..
مختار:مروحين جعانين نلقوا غدي!؟
هي قالت:اكيد..بعدت عن الباب..
خش مختار ولحقه الاقجم..
وامينه لاحقاته بنظراتها الحزينه..
🍃داخل..
مختار بصوت عالي..
/اووي..
جاه صوت فاتن وهي تقول..
"تعالى للصالون"
كمل مختار طريقه والاقجم معاه لين وصلوا في الباب..
وقف الاقجم..وخش هو..
مختار؛مساء الخير..
ردوا عليه فاتن وسدرة وصفيه..
/مساء الخيرات..مساء النور..
سدره:حمد لله ع السلامه..
مختار:الله يسلمك..شاف للباب وقال..خش اقجم..
حمحم وخش وعيونه لوطا وهو يقول..
/السلام عليكم..
ردوا عليه السلام وهما يشوفوله بإستغراب..
مختار:هدا بن عمنا ياسدره *******..
ابتسمت..
مختار:المساعد والملازم ليا وحيكون في خدمتكم حتى انتم..
فاتن قلبها وجعها ماتوقعتش مختار يجيب حد في مكان رضا بالسرعه هادي..
الاقجم؛ان شاء الله نكون قد المسؤوليه استاذنا..
مختار؛لو ماكنتش قدها مانحطكش فيها..
ع جية امينه قالت..
/الغدا جاهز..
مختار:حطيه في مكتبي وخودي معاك الاقجم غديه..
امينه:تفضل..
مشي طلع وهي وراه...
تنهد مختار ومرر نظره عليهم وهو يقول..
/الحياة مستمرة..شاف لمرته وقال..تعالي فتون..
ومشي طلع..
ناضت فاتن ولحقاته..
سدرة:عليك جو عايشه خوي مختار فكرني بالفيلم متاع العراب
صفيه بضحكه؛من يكون هدا!؟
سدرة برفعة حاجب:زعيم مافيا ياحنه..
ضحكت صفيه..
🍃في الكوجينه..
كانت امينه تجهز في الغدي للأقجم وهي تسرقله في النظر
كان مقعمز ورا الطاوله وحاط تليفونه قدامه وعيونه ع باب الفيرندا يشوف للحديقة..
امينه:ممكن أسألك سؤال..
وجه نظره ليها وهو رافع حواجبه..
امينه:انت متجوز؟
ابتسم وحرك راسه بالنفي..
بدت ع وجهها ملامح الضيق..
هو شبه فهم قصدها ضحك ضحكه خفيفه وقال..
/خاطب وعرسي قريب..
ارتسمت ع وجهها الباهت ابتسامه وهي تقول..
/ربنا يتمم بخير..
هو قال..
/آمين..
هي جاته بالسفرة حطتها قدامه وقالت..
/بالهنا والشفا..
بإبتسامه قال..
/بارك الله فيك..
وبدي ياكل ومن طريقته في الاكل بان انه جعان هلبه..
هي طلعت من حداه وخلاته ياخد راحته..
بعد ماطلعت جاه اتصال..نغمة تليفونه كانت اغنيه لفنانه المفضل..
دمعك غير زايد....
ما يقضي فوائد
لا حاجة يجيب"....
واصبر ع الشدايد .
.هك الله رايد ؛ ما تعلم بغيب
قعد يغني معاه وهو يشوف للشاشه ابتسم وقال..
/نتغدا حبي ونرد عليك..
🍃وامينه اللي طلعت للحديقه سمعت كلمات الأغنيه قلبها وجعها وبدت دموعها تنزل..
قعدت تتمشى وهي تبكي بصمت ..
وقفت لما جاها اتصال..قامت تليفونها وشافت المتصل قالت بألم..
/يارب..
بلعت ريقتها..فتحت الخط وردت..
"الو..خالتي امينه"
حطت يدها ع فمها وهي تكتم في صوت عبرتها..
"آلو"
خدت نفس وردت بنبرة باكيه..
/ايوه..
"خالتي امينه خيره صوتك!؟ "
وتنهار امينه بالبكي...
🍃وقدام باب الكوجينه كان الأقجم واقف يشوفلها وع وجهه ملامح الأسف...

#حمامة_بيضا
#طوبى

.....يتبع....