طوبى ☕شارع القهوة☕

تابع

#طوبى "جنة طوبى"
#جمان_فريد
#الجزء_الستون"فلاش باك"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
"صابرين..افتحي صابرين"
هادي نجاة دق ع اختها في الدار ..
شويه وفتحت صابرين وكانت تبان عاديه وجوها عادي قالت؛خيرك شن تبي؟
نجاة؛علاش مسكرة تليفونك..!؟
صابرين؛مافيشي شحن توا حطيته في الشحن..علاش تسألي.؟
نجاه؛وحده من صاحباتك اتصلت ع الارضي توا قالتلي نذكرك بلمتكم عندها..
هزت راسها وقالت؛شروق..تو نكلمها..
مررت نظرها عليها وقالت؛شكلك مش ماشيه..
صابرين:لابنمشي..
بآستغراب قالتلها؛مالا خيرك مش موتيه روحك؟
صابرين؛هي مش لمة مناسبه..لمة بنات عاديه..تشربي قهوة؟
نجاه؛تؤ..نسكافيه..
صابرين؛خلاص تو ندير نسكافيه..
ومشت للكوجينه ونجاة تشوفلها وهي تقول..في شعبيات في الدولاب..
صابرين وهي خاشه الكوجينه ردت..
"باهي"
ونجاه مشت خشت لدار صغارها تشوفهم شن يديروا..
🍃🍃🍃🍃🍃🍃
وفي شارع القهوة..
درسوا سيارات آلاء وأريج قدام حوش جدهم لطفي..
شافهم نضال..
طلع من القهوة ووقف قريب ع الطريق وهو يشوفلهم..
نزلوا من السيارات..
فردوس واريج وآلاء وفي ايديهم شناطي..
ومعتز معتاهم شاد شنطته متاع القرايه وشنطة اللاب توب..
فتحت فردوس باب حوش بوها..
بعدين رفعت شنطتها وخشت بيها..وخشوا وراها صغارها..
واخر من خش أريج..
وين جت بتسكر الباب جو عيونها ع نضال..
نظرات الاستغراب والقلق كانوا باديات ع وجهه..
وهي كانت حاسه بالإحراج فوق الحزن اللي هي فيه..
نزلت عيونها لوطا وسكرت الباب..
وخلاته في حالة قلق وتفكير..
ويزيد قلقه...
لما شاف سيارة طوبى جايه...
درست ورا سيارتهم..ونزلت بسرعه ومشت خشت للحوش..
نضال بقلق:في حاجه صارت...
طلع تليفونه من جيبه واتصل بأريج...
وزي المحاولات الاولى...ينادي لين يفصل وماتردش...
شبح للحوش وقال؛يستر الله..
بعدين لف ومشي ولى للقهوة...
🍃وفي مكان تاني..
بعيد عن شارع القهوة...
تلاقى الحاج لطفي مع صديقه والد مصطفى اللي كان متواعد هو وياه....
لطفي اللي جابه لمكان الموعد تاكسي..
حطه وقعد يستنى ع الطريق بروحه لين جت
سيارة والد مصطفى..
مشاله طول...وطبس ع روشن السيارة وقال:السلام عليكم..
:وعليكم السلام...اركب لطفي..
وقف ع حيله وفتح الباب وركب..
سكر الباب وقال؛كيف الحال...
تنهد وقاله:الحمد لله..انت اللي كيف حالك؟
لطفي بإبتسامة رضا:الحمد لله ع كل حال..
صاحبه قال؛الحمد لله الحمد لله..
ضيق عيونه وهو يشوفله قاله؛باين عليك من وجهك انك مش مزبوط..
شافله صاحبه شويه بعدين بدي يتكلم..
🍃🍃🍃🍃🍃
"نهارك أحرف!"
قالتها طوبى وهي تشوف بصدمه لآلاء بعد ماسمعت من فردوس باللي داراته..
اريج ودموعها في عيونها؛حطتنا في موقف حقير خلت اللي يسوى واللي مايسواش يتشمت فينا..
فردوس ودموعها ينزلوا؛وتوا جدها يبي ولد عمها ياخدها...قال هو أولى بيها..!
آلاء ببكي؛والله لو يقتلوني ماناخده والله..
بدت ع وجهه طوبى ملامح الغضب قدمتلها وبقبضة يدها ضربتها ع ذراعها وقالت؛يازفته ياتافهه عاجبك اللي درتيه في روحك وفي امك وخوتك..
حطت آلاء يدها ع ذراعها وقالت ببكي:خالتي والله العظيم نادمه هلبه...اصلا هدا كان في الاول ولما عرفت خالتي سدرة وهزبتني وهزباته حتى هو قطعت علاقتي بيه بكل...
كلهم انصدموا..
وفردوس قدمتلها وقالت بصدمه؛شن تقولي انتي!؟ سدرة كانت عارفه!؟
الاء ببكي؛ايه..
قعدوا يشبحولها وهما مش مستوعبين كيف سدرة عرفت بحاجه زي هادي وتكتمت عليها..
فردوس بصدمه؛علاش ماقالتليش وقتها علاش ماقالت!؟
طوبى وهي تشوف لآلاء بحده؛ماتبيش تزيدك على مابيك حلت الموضوع من عندها..برغم ان اللي داراته ماعجبنيش..
مفروض جبراتك تسيبي مهند جبر..
شبحولها بإستغراب..
وهي مكمله تقول:لأنك مادام درتيها وكلمتي واحد وانتي خطيبته ديريها حتى بعد تولي ع ذمته..
شبحت اريج لآلاء بنظرة غضب ممزوجه بالأسف..
اما فردوس قالت لطوبى:تسمعي في اللي تقولي فيه طوبى!..
شبحتلها بقوة وقالت؛هدا كلام الحق يافردوس ماتزعليش منه..راهو هدا علاش جدها يبي يزوجها ولد عمها لأنه خايف من الحاجه هادي خايف لو بنتك دارتها وهي متزوجه وراجلها اللي كشفها تصير كارثه وفضيحه لبنت ولده ولعيلتهم كلها...
اللي سمعاته فردوس من اختها كان اشبه بالصفعه ونزلت ع وجهها..
وحسستها فعلا بحجم الغلطه اللي ارتكبتها آلاء..
غلطه كبيرة هلبه وممكن يكون ليها تابعات كارثيه بعدين زي ماقالت طوبى..
كملت طوبى كلامها وهي تقول؛مفروض قعدتي في حوشك وخليتي كلام جدها يمشي..مش عارفه اصلا علاش جيتي هني على شن كنتي عابيه!..
آلاء وهي تبكي؛طوبى خيرك هكي تتكلمي! علاش حكمتي عليا هكي من غير ماتسمعيني..طوبى اني توا نحب مهند والله نحبه ونبيه هو بس..
طوبى ؛انت ماتحبي حد كان روحك ياآلاء ومن الاول قلتها انتي انخطبتي لمهند بش تقهري وليد ولما وليد فسخ مشتيله تجري ومش لانك تحبيه حتى هو..انتي تبي فلوس بوه وعيشتهم بس..
فردوس كانت تشوف لبنتها وهي تسمع في كلام طوبى وقلبها مليان عليها..
واريج مش طايقه تشوف وجهها..
وهي ردت بإنفعال ع طوبى وقالت؛خلاص عاد خلاص ياسر حرام عليكم علاش كلكم عليا علاش..غلطت واعترفت اني غلطت ومافي حد مايغلطش واني توا نادمه نادمه ياناس والله نادمه ونبي خطيبي والله نبي مهند لانبي فلوس حد ولاعيشة حد..نبي نقعد مع مهند وبس..
ابتسمت طوبى بتهكم وغضب بعدين قالت؛امم..ومهند لما يعرف بيقعد معاك!..
سكتت آلاء وهي بتموت بالخوف..
حركت طوبى راسها يمين بعصبيه وأسف وهي تشوفلها بدون ماتتكلم..
🍃وبرا الحوش..
كانت مطيره مروحه من عند الجارة وهي تفكر في الكلام اللي سمعاته عندها..
وين وصلت لحوش خوها شافت السيارات المدرسات ورا بعض خافت..
مطيره بخاف:يارب سترك وعفوك!..
ومشت بسرعه خشت للحوش...
☘وقدام قهوة الزعيم..
كان نضال شاد معتز يسأل فيه..
معتز؛مش عارف امي فجأة قالت لمو حوايجكم وين قلتلها علاش قالت بنقعدوا في حوش جدك لطفي..
نضال هز راسه وهو يقول بقلق؛تمام..اشرله براسه ع الاولاد وقال...برا..
مشي معتز ليزن وولاد الشارع..
ونضال شاف جهة حوش الواعر وهو يفكر بقلق...
🍃وفي حوش الواعر..
مطيره بعصبيه؛والله ماتبي كان الذبح..كان سمع بيك لطفي يكرك من شعرك ويردك لحوش جدك..
وهي مقعمزه ع سرير خالتها سدره وحاطه راسها بين ايديها وتومي بجسمها وتبكي..
وامها مسحت بإيديها ع وجهها ووخرت بيهم ع شعرها وهي تقول؛كان ربي ياخدني ويريحني بس..
كلهم بأصوات متقطعه؛بعيد السو..اعوذ بالله..!
بدت تبكي وهي تقول؛تعبت والله تعبت معاش نقدر نتحمل..
نحساب روحي بنقدر نربيهم صح ونهني عليهم كنت نقول لروحي ردي بالك يافردوس هادوا امانه بش لما يولي صاحبهم يلقاك حافظتي عليهم صنتيهم طلعتيهم زي ماهو يبي..ماكنتش يبيهم يعيشوا من صدقة هدا وهداكا زي ماعيشنا هو من قبل كنت نبي نعيشهم معززين مكرمين..درت اللي عمري وحياتي ماتخيلت نديره بش نكفيهم حاجتهم ومانخليهم بعازة حد..رفعت عيونها في طوبى وقالت..اوماليهم  كانوا يتفرجوا من بعيد تقول ماصدقوا..رفعوا ايديهم وخلوني بروحي نعاني..وبعد ما عمهم استاقظ لروحه وتفكرهم صار اللي صار ورفع يده  شن ذنب معتز يقطع عنه المصروف علاش  خداه بذنب غيره!؟ ماهو ماصدق حتى هو حصل سبله ورفع يده واضح هلبه ان مصلحته مع مختار تمت..
رفعت الاء راسها وشبحت لأمها..
وطوبى وهي مستغربه قالت؛كيف كيف!..
رشفت فردوس وقالت؛مش سامعه بجيته لفاتحه اريج!؟ ماقالولكش ع اللي داره سلفي المحترم وين خش عليهم مختار!..
آلاء بنبرة مبحوحه؛ايه صح..خالي بروحه لمح بحاجه زي هادي..
اريج هني تفكرت اليوم اللي جاها فيه وطلب منها تجيه للسيارة وهي شن ردت عليه..
قالت:فهمت توا...
شبحولها..
اريج وهي تشوف لطوبى؛جاني من فتره للكليه وبعتلي السواق متاعه بش نمشيله للسيارة واني قتله قوله لانبي نشوفه ولانعرفه..
طوبى وهي تسمع فيها كانت تفكر..
فردوس؛امتى صار الكلام هدا!؟
اريج وهي تحاول تذكر؛مش متفكره كويس بالك بعد ماسافروا بخالتي سدرة ولاقبل مانذكرش..
مطيره بغيظ؛زي العم زي الخال عطيهم رهمه..
طوبى بتفكير:شكلها امه تعرف بالموضوع من قبل ولا..
شبحولها..
والاء قالت وهي منزله عيونها بضيق؛ايه..هددتني توري المسجات اللي كانت بيني وبينه لأمي..
اريج؛امتى!؟
الاء؛ليلة بيانك...
حطت فردوس يدها ع عيونها..
وطوبى بدت ع وجهها ملامح ابتسامة ازدراء وقالت؛معناها بلعاني داروا هدا كله بش يتنصل من مسؤوليتكم...
الاء؛هدا اللي نبي نقوله من بكري وانتم ماتبوش تسمعوني..
شبحتلها وقالت؛الاء اسكتي بكل معاش تتكلمي..انتي اللي ساعدتيهم اساسا..
نزلت الاء راسها وقعدت تشد ع قبضة يدها اليسار بقوة..
فردوس بألم؛حسبي الله ونعم الوكيل...
"فردوس"
كلهم انفجعوا لما سمعوا لطفي ينادي في فردوس بصوت غاضب..
ناضت آلاء وقالت بخوف؛خيره ينادي فيها هكي!..
"فردوس"
طوبى بقلق؛اطلعي يافردوس..
فردوس بخوف؛اكيد عمي قاله..حي عليا حي..
مطيره؛تو نطلع معاك بري قدامي..
خدت نفس وقالت؛يارب..
ومشت طلعت..
ومطيره وراها..
وهما الثلاته قعدوا في الدار وكلهم قلق وخوف من اللي مازال بيصير..
🍃في الشارع...
خش مهند بسيارته....
ودرسها حدا القهوة بالزبط..
نزل منها..
ونضال واقف قدام القهوة شافه...
كان يسكر في سيارته بعدين مشي ناحيته..
وين شاف مهند لنضال ابتسم مجامله..
وهو ردله الابتسامه..
وصل فيه مد يده وقال؛عديل شن جو..
صافحه.نضال وقال:مليح..شن جوك انت..
طلقوا ايدين بعض ومهند قال؛تمام..الحمد لله..كيف حال العيله ان شاء الله الكل بخير..
نضال؛الحمد لله في خير ونعمه..شن حال الدكتور..
قاله؛الدكتور مسافر...
هو بإبتسامه قال؛ربي يرده سالم..
مهند؛آمين..
تنهد وشاف لحوش لطفي الواعر.
جو عيونه ع سيارة آلاء استغرب هلبه..
نضال قال؛عديل..في حاجه؟
شبحله شويه بعدين قال؛في حاجه جديده صارت عندهم؟
نضال؛سألتك نفس السؤال توا..اريج من امس لليوم ع قد مااتصلت بيها ماتردش وللكليه ماجتش..
مهند بإستغراب وقلق:اكيد في حاجه..
نضال؛نقولك..شويه تانيه نمشيلهم غادي ونعرف شن صاير..
مهند؛مالا اني قاعد هني نستنى فيك..
هز نضال راسه وقال؛تمام..خش..
مهند مشي بيخش ونضال معاه..
خش داخل وقال:السلام عليكم..
اللي سمعه رد عليه..
قعمز ورا وحده من الطاولات..
ونضال قال:شن تبي تشرب؟
مهند؛قهوة وسط..
نضال:ثواني بس..
ومشي من حداه...
وخلاه يفكر في اللي صاير مع آلاء وعيلتها...
🍃🍃🍃🍃🍃🍃
"اني الغالط اني...لما خليتك ع راحتك وسمعت كلام سدرة الله يسامحها"
فردوس قدامه تسمع لصوت غضبه وهي منزله راسها ودموعها تنزل ومش قادرة ترد بكلمه..
وهو متابع يقول:غادي معاش تولي طول ماني عايش مكانك ومكان صغارك حوش بوك...حوشك هداكا تنسيه بكل..يقعد لصغارك بعدين يديروا فيه اللي يبوه...
مطيرة واقفه تشوف لخوها بقلق خافت يرتفع ضغطه..
وبأسف وقهر قال؛صاحبي عمر خليتوني نخسره اليوم..لكن هادي غلطتي اني بروحي اللي عطيتك من اصله..
ومشي وخلاهم...
خلا مطيره تبع فيه بعيونها وهي خايفه عليه..
وخلا فردوس بنته تنهار وتبكي بالعبره..
🍃في الدار..
اريج بعد ماسمعت كلام جدها الاخير..
التفتت ع اختها وصفعتها بقوة..
وجت طوبى شدتها وهي تشوف لآلاء بضيق ممزوج بالغضب والعيون معبيات دموع..
وتسمع في اريج تقول بكل غضب لأختها:عاجبك ياح.قيرة عاجبك هكي!...إن شاء الله تمو.تي..
وجبدت روحها من طوبى وطلعت من الدار وهي تبكي ..
وآلاء ولت قعمزت ع سرير خالتها سدره.. وحطت ايديها ع وجهها وانهارت بالبكي..
وطوبى واقفه تشوفلها بنظرات أسف بس هالمرة فيهم حزن واضح...
🍃في هالأثناء..
فاق الجالي من النوم..
ضيق عيونه شويه بعدين وسعهم وهو يرمش فيهم..
وقعد يدور بيهم حواليه..كانت الدار فاضيه..
ناض قعمز..
ولما قعمز تفكر شويه شويه اللي صار من لما شاف سيارة الكتيبه..
لعند مااستاقظ بروحه وهو شاد المسدس ومابعده..
ومش متفكر اللي صار بين هالموقفين..
بس اللي قعد بين عيونه خوف طوبى وهربها منه..
الموقف كان مؤلم هلبه بالنسبه ليه..
مسج وجهه بيده...بعدين شبح يمينه بيشوف كان تليفونه ع الكامدينو..
مالقاشي..لكن لقي في مكانه ورقه مطبقه..
عقد حواجبه بإستغراب..بعدين خداها وفتحها...
(اتصلت بيا فردوس تبيني نمشي بسرعه لحوش بوي مابيتش نوضك..ولو الأمر مش ضروري ماطلعتش من غير اذنك)
كرمش شويه من الورقه في يده وهو يشوفلها بنظرات باين فيهم الغضب..
طلقها طاحت ع السرير..
وقعد يدور في جيوبه وحواليه ع التليفون مالقاشي..
وقال؛شكله قاعد في السياره..
ناض من السرير ومشي طلع من الدار..
ونزل لوطا بسرعه..
طلع من الحوش وتوجه للسياره..
فتحها..
لقي التليفون ع التابلو..
خداه وطلع من السيارة لقي فيه مكالمات من احمد حميدا..
بضجر تأفف..بعدين..حط ع رقم طوبى واتصل بيها..
 🍃وهي وين جت بتطلع من جنب آلاء وتخليها بروحها..
رن تليفونها..
مشت للزيانه وخداته..
وين شافت المتصل حست بالخوف..خافت ترد..
بس بعدين طلعت من الدار وسكرتها وراها وردت...
طوبى؛السلام عليكم..
"وعليكم السلام...ان شاء الله خير!"
خشت للكوجينه ومشت طلعت منها للجنان وهي تقول؛خير..مشكله عاديه وانحلت..
"باهي الحمد لله..معناها نجيك نروح بيك"
بشي من التوتر؛كان تخليني لبعد العشي بعدين تجي..
سكت شويه بعدين رد عليها يقول..
"تمام..ماتبي شي"
طوبى:لاسلامتك بس..
"سلام"
طوبى؛سلام..وسكرت..وهي تاخد في نفس بعدين طلعاته وشعور الخوف قاعد ملازمها..
☘وفي الحوش اللي في جنبهم..
روحت اميمه من الخدمه...
وين نزلت من سيارتها بعد مادرستها في الجنان..
جاها اتصال..
ردت عليه طول..
اميمه؛وصلت امي؟
"ايه توا طلعت بيها من المطار غدوة بإذن الله نكونوا في الحوش.."
اميمه بإبتسامه؛ان شاء الله...ترا اعطيني ماما..
وخشت للحوش وسكرت الباب..
بإبتسامه واسعه قالت؛حبيبتي حمد لله ع سلامتك..
"الله يسلمك بنتي..كيف حالك اليوم"
اميمه وهي تحول من رجليها:الحمد لله..كيف حالك انتي ارتحتي في سفرتك؟
"ايه الحمد لله العيله اللي كانوا معاي ساعدوني هلبه"
اميمه؛بارك الله فيهم..
"ايه والله..انتي وين في الحوش ولاالمستشفى؟"
اميمه وهي خاشه داخل:توا كيف خشيت الحوش .
"الرصيد يام الرصيد..الرصيد دكتور نتلاقوا غدوة"
هي بضحكه قالت؛ان شاء الله..وسكرت..
مشت طول لدار بوها..
فتحت الباب شويه لقاته يتفرج ع التلفزيون..
تنهدت وخشتله..
وقفت حداه وقالت؛جاتك عمتي..
هو شبحلها وهز راسه بإيجاب..
اميمه؛جدي كان حداك؟
كذلك هز راسه بإيجاب..
اميمه؛تغديت كويس وعطوك دواك؟
هو تكلم؛إيه..
هزت راسها بعدين مشت طلعت من الدار وهو بعيونه معاها..
بعد ماطلعت من حداه شافت لدار جدها وقالت؛اكيد مشي للجامع..
تنهدت بعدين مشت لدارها...
☘☘☘☘☘
بعد صلاة المغرب..
روح لطفي لحوشه..
وطول الطريق وهو ماشي عقله ماكانش معاه..
كان يتفكر في تفاصيل النقاش بينه وبين صاحبه..
اللي قال كلام جارح في حقه ع بنته فردوس هو ماتحملاش..
النقاش بيناتهم خلا والد مصطفى يجبد القديم والجديد..
وكأنه كله كان داسه بش يطلعه في الوقت المناسب..
ولأن لطفي الواعر مايرضاش في بناته حتى لو كان غالطات..
وقفه عند حده..وقاله..
"لابنتي ولاصغارها مازال يجاوروكم ولايعرفوكم"
وبعد هالكلام معاش قال كلام ومشي عنه وخلاه..
لطفي وهو في الحاله..
زوز بس اللي كانوا ملاحظينه ويخمموا فيه..
بوه..علي الواعر..
وعبد القيوم اللي تعود يترافق هو وياه للجامع في اغلب الصلوات..
بعد خشوا شارع القهوة..
وقف التارقي قريب ع مطعم ربيع وهو يشوف في لطفي وصل لحوشه وخشله بدون مايكلم بوه..
وعلي هو متوجه لحوشه حس ان ولده صايره معاه مشكله مايبيش يحكيله عنها...خلاه ع راحته..لكن عقله قعد عنده..
وصل الحاج علي حتى هو لحوشه وخشله..
وعبد القيوم يشوفله..
فات من قدامه ربيع وقف جنبه وهو يقول؛ديما شاغلينك حوش الواعر..
شبحله بإستغراب وهو يحاول يخفي ارتباكه؛كيف شاغليني!؟مافهمتش..
ابتسم ربيع وقال؛قصدي يهموك هلبه..
عبد القيوم؛وواجد اخرى الناس هذوما ليهم عليا جمايل واجده ياراجل الوحيدين اللي شدوا فيا نعزم هلي يجوني..
ربيع؛عزمتهم!؟
عبد القيوم؛ايه..جايين الخميس إن شاء الله..
ضحك ربيع وقال؛مرحبتين مرحبا..اول عليا اني غدي وعشي..
ابتسم وقال؛ع عيت الواعر هما اللي شدوا قتلك..
ربيع بضحكه؛خلاص تاني يوم..
بإبتسامه قاله؛مشكور ياسيدي..بالسلامه..
ربيع بإبتسامه؛سلام..
مشي عبد القيوم خش للحوش..
وربيع اللي كان يشوفله بإبتسامه عاديه تبدلت لإبتسامه أسف وهو يقول في باله..
"ياريت نقدر ندوي معاك في حاجه زي هادي من خوفي يطلع اللي في بالي صح قعدت ساكت..هكي خير"
تنهد وبعدين لف ومشي خش للمطعم..
☘☘☘☘☘
لبست وشاحها وهي تقول..
صابرين؛طالعه نجاه..
جاها صوت نجاة من الدار وهي تقول..
"في امان الله"
مشت صابرين طلعت من الشقه..
ونزلت لوطا..
ولسيارتها طول..
ركبتها..وشغلتها...وتحركت..
طلعت بيها من باب العمارة ولحظات وتخش سيارة الجالي...
درس في مكان معين واتصل بنجاه...
"ايوه حبيبي"
الجالي؛انزلي نبيك..
"بروحي مع الصغار في الشقه مانقدرش نطلع ونخليهم"
الجالي بنرفزة:مش صغار هما يانجاه..
"خيرك جالي شن صاير معاك"
هو بنفاذ صبر:بتنزلي ولانمشي!؟
"باهي باهي هاني جايه"
سكر ونزل التليفون وقعد يستنى فيها..
عشرة دقايق وجاته...
دقت ع روشن السياره..
هو اشرلها تفتح الباب..
فتحاته وركبت وسكرت الباب وهي تقول؛شن جو..
الجالي:ساعه!
نجاه؛وصيتهم ع خوهم معاذ قاعد صغير جالي مايقدروش عليه برواحهم..
الجالي:اختك وين؟
نجاة؛ماشيه لحوش صاحبتها..
هو قال؛المهم..خل نقول اللي عندي بسرعه تقدري تسافري في وضعك هدا؟
هي بإستغراب:ايه عادي..
هو قال:خلاص الخميس مسافرين..
نجاة بتعجب؛شن جاك فجأة!؟..
هو بآستياء؛دارهه كبدي من البلاد باللي فيها تبي تغير جو يومين برا منها وانتي معاي..
ابتسمت بفرح وقالت؛خلاص حبيبي الخميس الخميس..
ابتسم نص ابتسامه وقرص خدها بعدين قال؛هي انزلي..
نجاة بإبتسامه؛نحبك..
بعتلها قبله طايره..
ردتهاله بعدين ضحكت..ونزلت من السياره..
وبعد ماتأكد انها خشت للعماره..
شغل السيارة وتحرك وطلع طول من العمارة...
🍃🍃🍃🍃🍃🍃
طلعت طوبى من الكوجينه للجنان..
شافت بوها مقعمز حدا الفاسكيه ويبان سرحان ومهموم..
قلبها وجعها عليه هلبه..
المصايب جاته ورا بعضها...
كانت تبي تواسيه وتخفف عنه..
لكنها ماعرفتش شن لازم تقوله في حالة زي هادي..
لأول مرة تحس روحها مش قادره تواسي حد...
بس فكرت في شي تاني بش تنسيه اللي صار شويه..
مشتله..
وصلت فيه وقالت؛الربيع بدي يخش..
شبحلها وقال؛انتي هني!؟
ابتسمت وقالت؛ايه حبيبي..تشم في ريحة مسك الليل..
بدت ع وجهه ابتسامه خفيفه وقال؛هدا وين شميته..
هي بإبتسامه قالت؛والفل والياسمين..قداش نحب جنانا في الربيع..
هو مرر نظره ع الجنان وقعد يهز في راسه وهو مبتسم..
شبحتله شويه وقالت؛بابا.
شبحلها..
طوبى؛في المدرسه كيف كملوا مبنى خارجي بيديروه معمل حاسوب..المهم نبوا نديروله ضي كان تعرف حد في يخدمنا في الحاجه هادي نبيها خدمه صح مش أي كلام..
هو قال؛تو نشوفلك الموضوع...لكن قوليلي شن دايره في المدرسه امورها ماشيه معاك تمام لتوا..
طوبى بإبتسامه؛تمام التمام والحمد لله..ماتخافش ع بنتك بابا عارفني زي الطقاشه وصاحبة سبع صنايع لكن الحمد لله البخت مش ضايع..ضحكت..
وضحك بوها..
وهي فرحت ع الآخر وقالتله بإبتسامه:ماتخممش فيا من ناحيتي اني كون مطمن ع الآخر..
ابتسم وقاللها؛اختك غرفه معاش مشتيلها؟
هي حاولت تحافظ ع ابتسامتها وقالت؛تو نمشيلها..
هو قال؛امشوا شوفوها بنتي ماتخلوهاش..
طوبى؛اكيد بابا..ريح بالك بابا كله ينحل ان شاء الله..
هو تنهد وقال:إن شاء الله..
وجعتها تنهيدة بوها..كان طالعه من داخل قلبه تنهيده وجع..
تعبوا عيونها بالدموع بس شدتهم وهي تقول؛مرت عمي غدوة تروح ان شاء الله..
هو قال؛يوصلوا سالمين..
هي قالت؛آمين..وان شاء الله قريب نفرحوا بمرواحة سدرة واقفه ع رجليها شامخه زي قبل واكثر..
ضحك ضحكه خفيفه وفي عيونه لمعة الدموع لما قال؛آمين..
سكتوا الزوز وهما يفكروا..
بعدين هو قال؛ايه قريب نسيت..التارقي جارنا..اهله جايين نهار الخميس..واني قتله عشاهم عندي راهو..
طوبى بإبتسامه؛مرحبتين بيهم..
🍃وفوق السطوح..
تحديدا في دار الخزين..
كانت اريج تكلم في نضال..
اريج؛والله العظيم غدوة نحكيلك كل شي..
"باهي توا قوليلي حتى رووس عناوين مش راقد الليله راهو"
سكتت شويه وهي مضايقه بعدين قالت؛صايره مشكله بينا وبين حوش جدي وسيبنا حوشنا..
"كيف!؟"
هي قعدت تبكي..
"تمام تمام اريج..خلاص ياقلبي..غدوة نتلاقوا ونهدرزوا"
وهي مازال تبكي بألم..
"طز في جد اصلهم كلهم مادوريهمش اهو حوش جدك الواعر موجود..واني موجود والله ياعمري مستعد ندير ع خاطرك اي شي يريحك ويريحكم كلكم..انتي قوليلي بس شن تبيني ندير واني نديره"
هي ببكي:نبيك توقف معاي وتدعمني ماتوقفش في وجهي بكل..
"تبي تولي للخدمه صح"
هي قالت؛ضرروي يانضال والله ضروري..
"لامش ضروري اني موجود اريج شن تبي يكون عندك والفلوس اللي نعطيك فيهم كل شهر تو نزيدهم"
هي برفض:لالا نضال..انت ملزوم بيا اني بس..
"شن دخلك انتي اني نصرف على من نبي انتي مادخلكش"
اريج؛نضال لو حق تحبني يانضال تخليني ندير اللي نبيه..خليني رافعه راسي ديما ومش مكسوفه بالله عليك
تنهد من قلبه بعدين قال..
"تي غير كيف بتكوني مكسوفه بس"
هي رشفت ومسحت دموعها بظهر يدها وهي تقول:مانتحملش حد يقول راجلها يصرف ع ماليها اني بروحي مانتحملش ناخد منك فلوس بش نصرف ع ماليا والله مانقدر نتحمل..بالله عليك نضال افهمني..
"نقولك حاجه..سكري توا وغدوة ان شاء الله نتلاقوا ونتفاهموا"
هي تنهدت وقالت:هكي احسن..تصبح ع خير..
"وانتي من اهله"
هي سكرت..بعدين مسحت دموعها..
ومشت طلعت من دار الخزين..
شافت جهة القهوة متاعه..
لقاته واقف قدامها ويشوفلها..
مشت طول وهي في قمة الحزن..
وهو كان موجوع عليها..
التفت وشاف لمهند لقاه يشبحله وواضح عليه يراجي فيه
وهو تنهد بضيق ومشاله...
🍃🍃🍃🍃🍃
في صالة حوش مليان بنات ونساوين متزوجات كانواصديقات دراسه...
في وسطهم صابرين اكثر وحده ملفته للإنتباه فيهم.
بلبسها اللي كله ماركات غاليه..
الالماس والذهب اللي لابساته..
نوع تليفونها..هذا غير سيارتها الغاليه المدرسه برا..
كلهم كان عندهم فضول يعرفوا من وين ليها هدا كله وهما عارفين حالتها الماديه كيف كانت..
وهي كانت مركزه عليهم كيف يشبحولها وفي عيونهم كان باين الفضول..
بس هي استغلت الفرصه وقعدت تتباهى عليهم وتشوف في روحها..
تبي تغيظهم..وترد لبعض منهم حركات داروها مش قادرة تنساها...
☘روحت من هديكا اللمه وخلتهم يقطعوا فيها بالقرمه..
وكلهم اتفقوا ع استنتاج واحد..
انها مصاحبه واحد من جماعة اللي يحلوا ويربطوا في البلاد..
🍃وهي بعد وصلت للشقه وخشتلها..
كانت تعيسه وخايفه الحلم اللي عايشه فيه نفيق منه ع كابوس وتخسر مختار..اللي حباته هو اكثر من فلوسه..
حباته لدرجة لاتوصف..
لدرجة انها فكرت في شي عمرها في حياتها ماتخليت روحها إنها حتفكر فيه..
لما بتخش لدارها..
"روحتي"
شبحت جنبها وقالت؛نحسابك رقدتي..
نجاة؛مازال بكري ع النوم الساعه تسعه ونص..شن جو اللمه..
صابرين؛عاديه مافيها مانحكي عنه..
نجاة؛باهي بنقولك يوم الخميس مسافره..
هي بإستغراب؛وين؟
نجاة:سفرة تركيا اللي تأجلت..
شبحتلها شويه بعدين قالت:قلتي لمروة؟
نجاة:ايه وقالت هي بتجي بصغارها تقعد هني..
صابرين؛باهي امتى تروحي؟
نجاة؛ياالسبت ياالأحد..
هزت صابرين راسها وقالت؛تمشي وتجي بالسلامه..
ومشت خشت وسكرت الباب وراها..
ونجاه وهي تفكر ولت لدارها...
🍃وفي الطريق..
الجالي مروح بطوبى..
والزوز طول الطريق ماقالوش كلمه لبعض نهائي..
لعند ماوصلوا للفيلا..
ولبعد ماخشولها..
وركبوا لدارهم..
والصمت سائد..
هو خش للحمام بيدوش..
وهي بدلت حوايجها وخشت السرير تبي ترقد..
بس مش قادره من الخوف..
لما طلع من الحمام..
هي عطت بالظهر وغمضت عيونها وتغطت
هو شافها...
وبعدين غير عيونه عنها ومشي وقف ع المراية..
وهي فتحت عيونها وقعدت تسمع في صوت الحركه متاعه وكلها خوف...
كانت بهمس تقرا في الأذكار...وقلبها دقاته متلاحقه من الخوف..
وفجأة..دق دقه قويه..
لما حست بيه وهو يطبع في قبله عميقه ع راسها...
بعدين قال؛طلعته من الحوش ..
هي لفت وجهها ليه وقالت بنبرة خوف ودموعها في عيونها؛معاش تجيبه للحوش بكل بالله عليك..
هو طبس وباس جبينها بعدين قال:حاضر..
وخداها ليها وقعد يطبطب عليها وهويقول؛مافي شي يخوف خلاص..
هي قالت؛عادي تحكيلي شن صار معاك من البدايه..
تنهد وقال؛كنت واقف بسيارة عند الاشاره سيارة تابعه ليهم درست جنبي بالزبط لما شفتها خشيت في عالم تاني..
قعدت تسمع في دقات قلبه كيف تسارعت وهو يحكي عنهم..
الجالي:مانعرفش شن صار بعدين..استاقظت والمسدس في يدي بس..
حطت يدها ع مكان قلبه وقالت:علاش ماقتليش عليه؟
الجالي؛مافي حد يعلم بيه...
طوبى:بالله عليك بيعه ولاتصرف فيه ماعندك مادير بيه..
هو قال بإنفعال:شن ماعندي ماندير بيه ياطوبى اللي زيي مفروض يكون عندهم سلاح..
هي في نفسها قالت..
"اللي زيك مفروض مايكونش عندهم"
مسحت بيدها ع صدره..وثبتتها ع مكان قلبه وقال؛باهي اهدا اهدا..اني اسفه..
هو هدي شويه وقال؛ماصار شي علاش تتأسفي..
ابتسمت ابتسامه حنونه..بعدين حطت راسها ع صدره وبدت تقرا في ايات السكينه..
هو وين بدت تقرا..زاد ضمها ليه وغمض عيونه وقعد يسمع فيها كيف تقرا في الآيات...
وهي تسمع في دقات قلبه اللي بدت تهدا..
ولحظات..وراح الجالي في النوم...
بعد مارقد...وتأكدت هي انها راقد..
نزلت من السرير ومشت بهدوء طلعت من حداه وتوجهت لحجرة المكتب..
فتحت الباب بالشويه وخشت..
دورت ع مفتاح الدولاب لقاته راكب فيه..
مشت فتحاته..مالقتش الصندوق..
غمضت عيونها وتنفست براحه..
بعدين فتحتهم..وسكرت الدولاب..
ومشت طلعت وتوجهت لدارها..وخشت السرير جنبه..
وقعدت تشوفله وهو راقد..
وافكارها ومشاعرها ناحيته كانت متضاربه..
لاعرفت تخاف منه ولاتخاف عليهد.
ولاتزعل منه ولاتزعل عليه..
حالته اليوم..خلت عقلها يبني سور متين بينه وبين الافكار السودا اللي جتها بخصوصه هو ونجاه..وقرر يسميها وساوس واوهام...
🍃بعدها جاها النوم وقدرت ترقد..
لكن بنت اختها آلاء الوحيد اللي في حوش لطفي الواعر ماجاهاش النوم...
كانت حاطه سماعاتها في وذانها..وتسمع في تسجيل مكالمات مهند..
وهي تسمع كانت تضحك وتبكي...
وقلبها يوجع فيها...
هي حبت مهند..وتعلقت بيه...ومش قادرة تتخيل حياتها من غيره...
لكن اللي صار...دار عائق كبير بينهم وبين استمرارهم مع بعض..
آلاء في هديكا الليله كرهت نفسها كره شديد وهي اللي كانت ماتحبش شي قد نفسها...
وتمنت لو تموت..ولا تنحط بين خيارين احلاهما مر..
انها تسيب مهند ..
او هو اللي يسيبها ووقتها مش بس حيكرهها حيزدريها ويقرف منها...
🍃ومن الحب اللي يموت في مهده..
لحب قاعد ينولد في ظروف خاصه بعض الشي...
🌷كملت صفاء قرايتها...
ومشت بترقد خلاص وراها مدرسه بكري..
خشت سريرها وقالت:واخيرا..سريري..حبيبي..
ولما جت بتساوي المخده..يدها جت ع حاجه تحتها..
استغربت ورفعتها فوق...
شافت بوكس مربع صغير متاع مجوهرات..
اول مرة تشوفه..
صفاء:هدا شني!؟
خداته وقعمزت وفتحاته...
بدت ع وجهها ملامح الدهشه وين شافت سلسال ذهب..
التعليقه متاعه فيها حرفين لاصقات في بعض..
SF
قالت؛اول حرف من اسمي واول حرف من اسم ماما!..
ضحكت وقالت..شن المناسبه زعمه!؟..وخدت الورقه المطبقه المحطوطه في الباكو..
فتحتها..
ولما قرتها اختفت ملامح الضحكه اللي كانت ع وجهها..
(أول حرف من اسمك اخر حرف من اسمي)
غيرت عيونها عنها وهي تفكر بعدين قالت؛هادي راما...هو بعتها...رجعت شافت للسلسال..ارتسمت ع وجهها ملامح ابتسامه خفيفه وهي تقول:يبيني نلبسه ديما..بس مانقدرش لانه ذهب وماعندي من وين نجيب حقه بش نشريه بروحي..
ضحكت وقالت..لكن حركته حلوة..
وتفكرت اخر مرة لما تلاقت هي وياه في السوبر ماركت وشن الحديث اللي دار بينهم..
ابتسمت ع جنب وقالت؛به..
وردت السلسال لمكانه والورقه وسكرت الباكو بعدين حطاته تحت المخده ورقدت عليها وهي تضحك بدون صوت...
🍃🍃🍃🍃🍃
تاني يوم...
20..فبراير...2018...
الساعه 8:30صباحا..
طلعت صابرين من الشقه..
وهي نازله من الدروج جتها رساله..
وقفت وفتحتها طول..
(تعالي ل****** الساعه تسعه)
هي استغربت هلبه..
بعدين ردت عليه برساله..
(حاضر)
🍃🍃🍃🍃
وجت الساعه تسعه...
ودرست صابرين سيارتها قدام مخبر تحاليل غير اللي دير فيه..
ومشت خشتله..
وين خشتله شافاته هو مقعمز داخل يهدرز مع الدكتورة اللي فيه..
بنظرة غيره قالت؛صباح الخير..
الدكتورة؛صباح الخير..
هو ناض من مكانه وقال:هي هادي دكتوره..تعالي تعالي..تعالي خشي هني..
واشرلها ع المكان اللي يسحبوا فيه التحاليل..
هي كانت تنفذ في كلامه رغم استغرابها الشديد..
خشت وقعمزت ع الكرسي وهي تشوفلها وتسأل فيه بملامح وجهها..
هو ابتسم ابتسامه عريضة بعدين التفت للدكتورة وقال:هي تفضلي دكتوره..
جتها وهي تقول؛كيف حالك..
صابرين وهي تتكلم بالغصب:الحمد لله..
الدكتورة:قيمي كمك..
رفعت صابرين كم ماليتها وهي تشوفله..
وهو قاعد يشوفلها بنفس الابتسامه..
ظاهرها عادي..لكن للي يتعمق فيها يخاف منها..
وبدت تسحب الدكتورة في الدم..
وصابرين تشوفله ودموعها عبوا عيونها لأنها شبه فهمت اللي قاعد يصير..
وخرت الدكتورة وقالت؛خلاص..
هو اشر لصابرين تنوض..
ناضت وقفت وهي شاده يدها ودموعها نزلوا..
طلعت الدكتورة..
وهو قدم لصابرين وقال؛روحي طول وخلي تليفونك جنبك..
رشفت وهزت راسها بإيجاب بعدين مشت طلعت بسرعه..
هو رفع حواجبه بعدين نزلهم والتفت للدكتورة يسأل فيها..
امتى تطلع النتيجه؟..
هي قالت؛ من نص ساعه إلى ساعه بالكثير..
هو قال؛تمام ندير دورة ونوليلك..
هي بإبتسامه قالت؛ع راحتك..
ردلها الابتسامه ومشي طلع من المخبر...
🍃ومرت ساعه...
بعد الساعه..
صابرين وهي في دارها كانت مسكره ع روحها وتبكي...
جتها رساله..
(رضا قدام عمارتكم يراجي فيك انزلي)
مسحت دموعها وهي خايفه..
ومشت...طول طلعت من الدار...
وهدا كله ونجاة قاعده راقده وصغارها لاهيين اللي بقرايه واللي بالتلفزيون...
🍃🍃🍃🍃
وصل السواق بصابرين للعمارة..
نزلت من السياره ومشت خشت وهي خايفه ع الاخر..
وين وصلت للشقه ورنت الجرس فتحت الشغاله..
:مستنيكي في الصالون..
هزت راسها ومشت لغرفه الصالون...
وصلت فيها وخشت عليه...
سمعت صوت موسيقى زادت وترتها..
كانت معزوفه لبيتهوفن..اسمها الحرب..
وهو واقف ع المنظومه اللي مشغلها فيها...
كان عاطيها بظهره لما قال؛قعمزي..
هي قعمزت بخوف..
التفت وشبحلها..وملامح وجهه اللي كانت تبان بارده خوفتها هلبه..
شافت في يده ظرف..
رجعت شبحتله وقالت بخوف؛شنو؟
هو مط شواربه بإستياء ورفع الظرف لمستوى وجهه وقال؛يادكتورة اللي كنتي تعايني عندها زمان مش ولابد..نزل الظرف وهو يقول..ياأنتي كذبتي عليا..
هي بدت ترعش مع بعضها..
لدرجة انه شواربها تقوسوا وقعدوا يرعشوا..
وهو كمل عليها لما قال...
وانتي ضحكتي عليا ياصابرينه...ولعبتي بعداد عمرك...