طوبى ☕شارع القهوة☕

الجزء_الثاني_والتسعين

#طوبى  "جنة طوبى"
#جمان_فريد
#الجزء_الثاني_والتسعين"العضيد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء
‏مَنْ عوَّد لسانه وقلبه سُؤالَ الله في كل أموره ،
والالتجاء إليه في كل ما يقوم به ، والافتقار إليه في كل أحواله ؛ أورَثَه القوة في قلبه ، والبصيرة في شؤونه ،
والثبات في مبادئه ، والانشراح في صدره ،
والتوفيق في حياته ..

🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ‏قيل لي يوماً أنت قويه
لم أكن أعي معناها  كنت أعتقد أن القوة مرادف القسوة
وأيقنت أن القوة تكمن في قلب مهما تهشم  ﻻ يزال يعطي🍃
__________________________________________
وقفت ع حيلها بصعوبه وهي تقول بعدم استيعاب..
/مرتك!؟
هز راسه وقال..
/مرتي ليها خمسة ايام..
خديجه بصدمه..
/بوي!؟ انت عارف هادي من تكون!؟
شاف محمد لسميره لقاها منزله عيونها وبادي ع وجهها ملامح الضيق..
خديجه:هادي صاحبة هديكا العيله الحقيرة سميره في نفسها..
"ماحقيره الا انتي ياحقيرة"
محمد شنيبه بغضب..
/هييه..هييه..هادي توا مرت بوك قدرها من قدري ومكانها مكاني اني مادرتش غلط..لاعيب ولاحرام..حقي الشرعي..شاف لمغليه وقال..وانتي هني بتقعدي في الحوش بقدرك واحترامك كل وحده فيكم حتاخد حقها ومش حتزيد عن التانيه في شي..
عقدت مغليه حواجبها بغضب وعيونها مليانه دموع..
قدمتله وهي تقول..
/بالك تحسابني رخيصه بش نرضي ع روحي ع هالحال! فيق ع عمرك يابابا راني مغليه الجالي مش اني اللي تجيب عليامراة..توا بنتصل بخوي يجي يروح بيا..
"تطلعي من هني انتي طالق"
خديجه قعدت تشوف لبوها بفجعه..
وامها شدت ع قبضة يدها بغضب شديد..
بعدين مشت طلعت من الصاله..
خديجه بنظرات غضب غارقه في الدموع
/هادي اخرتها يابوي!هدا جزاء امي اللي عاشت معاك ع الحلوة والمرة وياما صبرت وتحملت..هدا جزاء ام صغارك المراة الباهيه اللي الناس قريب يحلفوا براسها تبدلها بوحده زي هادي!؟؟
محمد بصوت عالي..
/كلمة زياده والله بالهاء..نكسرك هني قدامها...
سميره؛معليشي محمد معذورة..
شافلها لقي ملامح الضيق قاعده ع وجهها..
قلبه ماتحملش فيها..رجع شاف لخديجه وقال بغضب..
/امشي انتلفي روحي..تحركي..
شدت سميره يده وقالت..
/محمد!
خديجه مشت بتطلع وهي تقول بغضب..
/حسبي الله ونعم الوكيل..
بوها بغضب:على من تتحسبي ياكلبه !
"الله لايسامحهم الله يعطيهم مايشتتهم.."
وسمع صوت الباب انفتح وتسكر بقوة..
سميرة شدت ع يد راجلها وقالت..
/مش مشكله..كله توقعناه يصير!
محمد:كان الوضع ماعجبكش نسكنك في حوش اكبر من هدا..
سميره:لالاخليني هني..قتلك قبل مانبيش نباعدك عن صغارك ولانبيك تتقطع بين زوز حياش..وكانك عليا نتحمل ولايهمك..
☘واللي صار كله كان ع عيون نجاه..
المتفرجه بصمت..وهي متفاجئه..ومتشمته..وفي نفس الوقت قلقه..
انتبهت لوجودها سميره قعدت تشوفلها..
شاف محمد لمن تشوف قال..
/شن قاعده ديري هني انتي!؟
ناضت نجاه وقدمتلهم..وصلت فيهم وقالت..
/مبروك..
سميرة طلقت يد راجلها ومشت بتقعمز وهي تقول..
/امتى بيجو الجماعه اللي بيركبوا دار النوم؟
محمد وهو يشوف لنجاة..
/شويه تانيه..وانتي بري روحي..
نجاة هزت راسها وقالت..
/تصبحوا على خير..
ومشت طلعت من الصاله...
التفت محمد لسميره..
ابتسمت ابتسامه حلوة ودارتله حركة بأنفها..
هو ضحك ومشي بيقعمز حداها...
🍃🍃🍃🍃🍃
"السلام عليكم استاذ عبد القيوم"
عبد القيوم بإبتسامه..
/وعليكم السلام..
:قالوا دور عليا!؟
عبد القيوم:ايه..نبي نسألك عن صاحبة لوحة فرسان الصحراء..
:معناها انت اللي مرسوم فيها..
عبد القيوم:اها راسمه صورتي..نبي نعرف من تكون صاحبة اللوحه..
:اسفه سامحني مانقدرش نعطيك اي معلومه..
ضيق عيونه بعدين قال..
/تعرفي ان اللي داراته من حقي نحاسبها عليه ماطلبتش اذني قبل لترسم في صورتي..
:والله شن بنقولك يااستاذ..الموضوع مش مستاهل منك الانفعال هدا كله..المعرض خيري..واللوحه هادي لتوا تلاته طلبوا يشروها..
عبد القيوم؛مايشريها حد غيري..اللوحه هذي مرسوم فيها صورتي يعني انا احق بيها وندفع فيها شن ماتبوا..
ابتسمت وقالت..
/واني هدا علاش مابعتها لحد لتوا لين تجي انت تشوفها..
رفع حاجبه شويه بعدين قال..
/اخر كلام مش حتقولي من صاحبتها!؟
حركت راسها بالنفي وهي مبتسمه..
هز راسه وقال؛تمام...وخلاص اللوحه انا شاريها..نستأذن..
ومشي وكان باين عليه انه معصب بعض الشيء..
🍃برا الفندق..
وصل عبد القيوم في سيارته اللي كان واقف عليها ربيع..
ربيع:عرفت مني!؟
عبد القيوم حرك راسه بالنفي بعدين قال..
/بنرد للعمل اخرى انت كان تبي عدي للشقه مع محمد..
ربيع:تمام توكل..
فتح عبد القيوم الباب..ركب وسكره..
بعدين شغل السياره وتحرك..
وربيع معاه بعيونه...
🍃🍃🍃🍃🍃
وفي شقة محي الدين الصيد..
كان خديجه مقعمزة وهي حاطه راسها بين ايديها...
من الغضب اللي فيها كانت تهز في رجلها ودموعها تنزل ع الارض قدامها...
نزلت ايديها خبطتهم ع رجليها بقوة..بعدين ناضت وهي تقول..
/كله من تحت راسها..كله تدبيرها العقرب..
ومشت طول طلعت من الشقه وجبدت الباب وراها بقوة..
🍃وبنتها راما اللي قاعده في دارها وحداها خوها الصغير راقد..كانت هايمه في مراسلاتها مع صاحب اسما وماتندري ع شي..
🍃🍃🍃🍃
مقعمزة في الكوجينه وهي توكل بنتها سيريلاك..
جاها اتصال..
طوبى:شويه ماموتي..حطت كاشيك "ملعقة"البلاستيك في الصونيه..وخدت تليفونها اللي كان ع الطاوله..
شافت المتصل ابتسمت فتحت الخط وردت..
/السلام عليكم ابله نفيسه..
"وعليكم السلام..كيف الحال"
طوبى:الحمد لله..كيف حالك انتي وشن اجواء المعرض؟
"الحمد لله..واجواء المعرض ممتازة"
طوبى:بشري بضاعتي لقت من يشريها..
"قبل لنجاوبك بنسألك الراجل المرسوم في لوحتك من وحي خيالك؟"
طوبى:لاوالله..صورة لشخص..
"امم..باهي حضرتك تعرفي ان الشخص هدا عضو معانا في الجمعيه واليوم جي حضر المعرض وشاف لوحه ودار مشكله"
حطت طوبى يدها ع فمها بصدمه..ماقدرتش ترد..
"ايوه..قاعده معاي!؟"
طوبى بصدمه..
/بصراحه ماعنديش علم نهائي انه معاكم!..
"هو انزعج من انك ترسمي صورته بدون علمه"
غمضت طوبى عيونها بإستياء وحطت يدها فوقهم وهي محرجه ومتوتره...
"ع العموم هو اللي بيشريها.."
فتحت عيونها ونزلت يدها وهي متفاجئه قالت..
/بيشريها!؟
"ايه"
تنهدت بضيق وغيرت نظرها لجنه ابتسمت جنه لما شافتها وهي تلعب بالشكشاكه..
ابتسمت طوبى وهي تشوف لشكشاكه بعدين قالت..
/نسألك سؤال..هو مشارك في المعرض؟
"ايه هو خطاط ومشارك بلوحه"
طوبى؛في حد طلب يشريها..
"ايه"
طوبى:بعتوا؟
"لتوا لا"
طوبى؛خلاص اني بنشريها ونحط فيها اللي تبوه..
ضحكت المراة وقالت..
"نفس الجمله اللي قالها"
تسارعت دقات قلب طوبى وعيونها رمشوا بسرعه..
"خلاص..نبعتلك صورة ليها وانتي عطيني اخر كلام بعد ماتشوفيها"
طوبى بإبتسامه:تمام زي ماتبي..
"السلام عليكم"
طوبى:وعليكم السلام..ونهت المكالمه..
شافت لجنه وعضت ع شفها السفلي بعدين قالت..
/حي عليك ياحشمه ياماما..عمو التارقي شاف اللوحه! مانندريش عليه مشارك ولامن الجمعيه اصلا كان هدا والله ماشاركت بيها!..
جنه قعدت تتكلم بلغتها العسليه..
طوبى حطت يدها ع خدها وقالت..
/ريتي بالله..حشمه حشمه..قولي باهي اللي مادرتش اسمي عليها فضيحة بجلاجل بعدين..لكن تعرفي هو اللي شري اللوحه..وحتى اني بنشري اللوحه متاعه...
جنه كلمتها..
طوبى:بندسها في دارنا مايشوفها حد براني..ويقعد سر بيني وبينك باهي..وغمزتلها..
جنه رفعت الشكشاكه وقعدت تحرك فيها..
طوبى ضحكت...وفجأة خفت ضحكتها شويه شويه وهي تسمع في صوت باب الحوش يدق بقوة...
غمضت عيونها بعدين فتحتهم وتنهدت...
🍃حطت فردوس وشاحها ع راسها وطلعت وهي تسمع في الباب يدق بقوة..
وصلت فيه وفتحاته وهي عارفه من حتلقى وراه..
اللي كانت وراه طول خشت بعد مادفتها من كتفها وهي تقول..
/وينها الشلولح عمتك الشيطانه..
سكرت فردوس الباب بقوة وهي تشوف لخديجه بكره..
خديجه بصوت عالي..
/اطلعي ياشلولح يامسترجله..اطلعي ياخرابه الحياش العامره..اطلعي يامطيره..
طلعت مطيره وهي تلم في شعرها وتقول بعصبيه.
/خير دعوة جدك يامريضه!..
خديجه بغل:اني المريضه ولاانتي ياشيطانه تكتكتي انتي وصاحبتك الشوارعيه وخليتي بوي ياخدها ع امي !!؟ تبي امي تعيش ماعشتي يالفعه!؟؟
مطيره قعدت تضحك..وفردوس ضحكت معاها..
استفزوا غضب خديجه الثاير...قالت..
/تضحكي ع خيبتك ياخايبه! امي عندها صغار ولاد وبنات يجيبولها حقها ويعرفوا كيف يردولها بوهم..
فردوس:معليشي ماتواخديهاش المصيبه قاعده جديده..
مطيره بضحكه؛ حتى اني مش مدورتها...ليس على المريض حرج..
🍃وطوبى لبست بشت مفتوح فوق حوايجها وخدت شاربه حطتها حط ولفتها ومشت طلعت برا..
قالت بنبره متهكمه..
/خديجه!..خيرك خديجه!؟ جايه هاده علينا في هالمغاريب وتردحي!!شن درنالك ياحبيبتي!
وقفت قدامها وهي مبتسمه بتعجب تهكما..
ومطيره وفردوس يضحكوا بصمت..
خديجه رفعت حاجبها وهي تمرر في نظرها عليها من فوق لتحت..
مطيره:واجعتها كيف بوها خدي ع امها..
طوبى بدهشه مصطنعه..
/كيف!..معقوله انتي توجعك حاجه زي هادي!هدا حق الراجل وشرع الله ياخد تنين وتلاته واربعه..وبوك فيه الخير اللي عطي لأمك علم ماخلاهاش غافله..وبعدين وين المشكله كان بيراعي فيها حق الله وبيعدل بيناتهم! قولي لأمك صلي ركعتين شكر لله ع العز اللي معيشها فيه وع القدر اللي دارهولها لما خبرها..غيره يطلقوا فيهم وينسوهم وكأنهم ماكانوا...
وطوبى تتكلم بنبرة تهكميه واضحه..وكلامها اللي تقول فيه هدا كله وصل خديجه لأقصى مراحل الغضب ولت معاش تشوف في شي..
قدمت لطوبى بتضربها..
وتشدها مطيره وتجبدها للباب وهي تقول..
/تعالي جاي ياكلبه تعالي..
خديجه بغضب وغل..
/والله نخليك تبكي دم ياطوبى والله..
طوبى:لو طقيتي فيا خليتك الليلة تباتي في الحبس ولو تبكي دم مانخليهم يطلعوك..
خديجه هزت راسها بوعيد وهي تقول..
/اني وياك والزمان طويل..
فردوس مشت بسرعه فتحت الباب وقالت..
/لوحي البلي برا..
جبدتها مطيره بكل قوتها وطلعتها برا..
وفردوس سكرت الباب..
ويسمعوها تقول بصوت عالي..
"تو تشوفوا ياحوش المطلقات والله كله لما نحاسبكم عليه ياعايبات ياخايبات ياللي مش لاقيات راجل يحكمكم"
طوبى بلامبالاة:خلوها تنبح..
ومشت خشت داخل..
فردوس:فوتيها وتعالي خشي وخل الناس تشهد ع عارها..
مطيره بقهر:ماريتش ناس زي هالناس..
ومشت مع بنت خوها وخشوا للحوش وسكروا عليهم.
وهي برا بعد ماقالت اللي عندها وخلت الناس تتفرج عليها..
مشت روحت وهي تدعي ع بنات الواعر..
ولابوها ولاالمهدي كانوا موجودين وقتها مع بعضهم مشوا للجامع...
اللي حضر الموقف غير الجيران والناس اللي جايه للشارع..
محمود بس..
🍃🍃🍃🍃🍃
بعد المغرب..
روحوا محمد وولده المهدي من الجامع ع وصول الكنتر اللي كانت جايبه اثات دور النوم الجديده..وحتكون جناح نجاة قديم..
قعد المهدي مع العمال..
اما محمد خش لسميره الصاله وقعمز يهدرز حداها..
☘ومغليه في دارها تسمع في الاصوات وهي تبكي بقهر بدون ماطلع الصوت..
🍃بعد ماتم تركيب اثات دار النوم..
سقد المهدي العمال وعطاهم اجرتهم..بعدين ولى خش للحوش..
☘وصل في الصاله دق الباب ونادى..
/بوي..
"خش يامهدي خش"
خش المهدي وعيونه في الارض وهو يقول..
/السلام عليكم..
سميره بإبتسامه:وعليكم السلام..
محمد شنيبه:وهدا بكري المتسمي ع جده وهو سما ولده ع جده حتى هو..
ضحكت سميره..
والمهدي ابتسم..
سميره:كيف حالك يامهدي وحال الصغار وقرايتهم؟
المهدي:الحمد لله كله ماشي تمام..
سميره شافت لراجلها وقالت..
/نعرف بنيته الصغيره الله يبارك عليها عويقله وزي العسل..
محمد شنيبه؛لاسدره بروحها الله يبارك تكبر قبل وقتها..
سميره؛زي سميتها سبحان الله..
المهدي ارتبك..
ومحمد فنص في سميره وهي شدت ابتسامتها..
حمحم المهدي وقال..
/الشباب تموا الموضوع..ماتبي مني شي تاني!؟
بوه قاله:لابارك الله فيك ياولدي ربي يكافيك..
المهدي بإبتسامه:تصبحوا ع خير..
ومشي طلع من حداهم...
وهو طالع وقف وشاف جهة دار نوم امه..قلبه رقلها ووجعه عليها..لكن مع هذا ماباش يمشي يرضيها لسبب واحد شايف ان هي السبب في جاها ولازم تتحمل نتيجة افعالها وتتأدب..
تنهد ومشي طلع من الحوش...
🍃🍃🍃🍃
وفي الحوش اللي جنبهم كانت القيامه قائمه..
🍃اشرف بعصبيه..
/عار يابوي هدا عار وهادي كنتنا ومحسوبه علينا!
نجمه بإنزعاج..
/تقشر وجهي قدام الجيران وهما يتصلوا ويسألوا..
الصيد بضيق..
/لاحول ولاقوة الا بالله توا الواحد شن بيقول بس..
🍃في الكوجينه..
صفاء:قعدت تردح في الشارع..
سميره بصدمه؛خيرها هادي هبلت!..
عواطف بشماته..
/لما داروها في غيرهم عادي لكن وين وصلت فيهم حسوها..
صفاء:مروة اختي قالت عابت في خالاتي بكلام مش كويس..
سميره:من يومها لسانها زي لسان اللفعه..
عواطف؛قولي صفاء..امك عندها علم!
صفاء:بصراحه مانعرفش..
~~~~~~~~
"يعني كنتي تعرفي وماقلتيش يافايزه!"
فايزة؛علاش انتي قلتي اللي تعرفيه قبل يانسرين!؟
"مادخليش المواضيع في بعضها"
فايزة؛لامادخلتش مواضيع في بعضها لأنه هو هو..يخي اللي درقتيه انتي احرف..انتي حتى ع جريمة اختك سكتي يانسرين..
معاش سمعت صوت نسرين..
فايزة؛ مش من حقك لاتلومي ولاتعاتبي يانسرين..وفي النهايه كل حد لازم يتحاسب ع اللي داره والجزاء من جنس العمل..تصبحي ع خير..
ونهت المكالمه وهي تقول..
/انتي اخر من يحاسب الناس...
🍃🍃🍃🍃🍃
"جت قطفت وكلت في جنابها ولوحتها عمتك برا"
غرفه:ياريتك مرجتيها طريحه..
مطيره؛الود ودي..لكنوا هالرتيله قعدت فوق راسي تنصح وتوصي شقلبتلي دماغي..
طوبى:نسيتي شن دارت قبل!؟
مطيره:لكن قعدت في خاطري الطريحه نحس في روحي قاعده مافشتيش غلي..
طوبى:ياريتك خلتيها تضربني راني بيتهالك في الحبس اقلها ليله وبعدين يطلعوها كان بيطلعوها..
اميمه؛مايربيها شي المخلوقه بالنسبه ليا اني مفقود منها الامل..
مطيره؛غير من متأمل في شيطانه زي هادي!
غرفه:اعوذ بالله منها..راهو مش مخليه حد في حاله..
فردوس:من يوم يومها..من ينسى ايام كيف كانت متكبره ومتعاليه ومافي حد سالم من لسانها الكي..
اميمه؛لاصغير ولاكبير..
طوبى:بذرة شر المخلوقه هادي..
مطيره:اقلب الجره ع فمها..
ويزن تليفون فردوس بمكالمة ماسنجر فيديو..
ضحكت وقالت؛اكيد اريج..
قامت التليفون وشافت الشاشه وبضحكه قالت..
/آلاء..
غرفه بلهفه؛الشفشه استاحشتها..وقربت من فردوس..
مطيره:حس بنتك تعيط..
طوبى وهي تسمع..
/ايه..
وناضت بسرعه وطلعت من حداهم..
"هاي قايز"
مطيره:زاد تعوج لسانها..
ضحكوا..وبعدين بدوا يهدرزوا  عليها ويسألوا عن احوالها...
🍃🍃🍃🍃🍃
"شن انتي هبلتي خلاص!"
هدا المهدي كان جاي مع محي الدين لحوشه بش يحاسب اخته ع اللي داراته..
المهدي:اللي درتيه اليوم هدا اسمه عار..سمعة العيله اللي ع خاطرها خربت حياة هلبه ناس انتي كملتي عليها اليوم..ماشيه زي الشوارعيه تتهجمي ع حياش الناس وتردحي في الشارع!!علاش هدا كله!..شن الجريمه اللي داره بوي! هدا حقه الشرعي مافي حد فينا ليه حق يدخل فيه الموضوع هدا بينه وبين امك بس..
خديجه؛عندك عادي!؟
المهدي:ماليش دخل..
خديجه بإبتسامه متهكمه..
/جي ع هواك..
شاف محي للمهدي..
والمهدي قال؛ماتخلنيش نوض نضربك قدامه..واشر ع محي بسبابته..
سكتت وهي تشوف للفراغ بنظرات حاده..
المهدي؛حكمك عليها انت اللي ماشي يامحي..ورد بالك دور كلامها لو هدداتك بشي..اني وبوي عطيناك الضي الاخضر..
وناض ومشي طلع من المربوعه ومحي لحقه وهو يشوف لخديجه بنظرات حاده..
بعد ماسقد المهدي بيولي لقاها ماشيه بأتجاه دارهم..
خشتلها وهو خش وراها...
سكر الباب بقوة وقال..
/عاجبك الموقف اللي حطتيني فيه يامحترمه!! مراة في عمرك بنتها اطول منها كان ماعقلتش توا امتى بتعقل..
خديجه بتهكم:اعقل انت قبل..
شد ذراعها بقوة وقال بغل..
/صلحي من نفسك خيرلك..مش حنصبر عليك زي ماصبر بوك ع امك..
وهي تسمع فيه وعيونها لوطا وع وجهها ملامح الكبر..
دفها لين طاحت ع السرير..بعدين مشي طلع من الدار..
وخرت شعرها للخلف وقعمزت ع حيلها وهي تقول..
/تو نوريكم واحد واحد..
🍃🍃🍃🍃🍃
"حي عليها!!؟"
نجاة بإبتسامة شماته..
/برد ع قلبي يا ياصابرين..الحمد الله اللي وراني هاليوم..وهادي اعمالهم تسلطت عليهم..هادي طوبى اللي فضلوها عليا..
"طوبى هادي تخوف يانجاة..نسخه من خوها ماتعرفيش منين تجيك ضربتهم وامتى"..
نجاة؛غير طلقها الجالي معاش مدورتها ولاتعنيلي في حاجه..
"ايه حقه كلمتيه؟"
نجاة بضيق:ممنوع قاعد تحت العلاج..
"امم..نجاة"
نجاة؛نعم..
"بنسافر الايام الجايه والله اعلم امتى نروح"
نجاة؛علاش!؟
"تسمعي باللي صار في البلاد راهو الحرب صايره لامحاله ومختار قال تقعدوا برا خيرلكم"
نجاة بقلق..
/حسك خوفتيني!
"يستر الله وخلاص..المهم توا كان فيها تبعتي الصغار نشوفهم ونسلم عليهم"
نجاة؛هما غدوة بيمشوا لهديكا لطفيه..انتم امتى مسافرين؟
"يوم 27 العشيه"
نجاه؛خلاص الصبح نروح بيهم من غادي ونتلاقوا في جردينه*****
"تمام"..
🍃🍃🍃🍃🍃
فتح باب الشقه ع وسعه..
بعدين خش وهو رافع اللوحه المغطيه..
سكر الباب برجله..رمي كندرته...ومشي طول للدار اللي يخدم فيها..
خشلها وحط اللوحه فيها..بعدين طلع وسكر الباب..
عبد القيوم؛محمد..
"في الدار"..
مشاله وخش عليه..لقاه مقعمز يقرا..
عبد القيوم؛ربيع روح بيك؟
"ايه من النادي طول هني"
عبد القيوم؛طلبت عشا شويه ويوصل..قدمله عطاه تليفونه وقال..
/كان كلموك رد عليهم..خاش ندوش..
خدي محمد التليفون وهو يقول..
/تم..
وعبد القيوم مشي طلع من الدار...
🍃🍃🍃🍃
وهو تحت الميه الدافيه..عقله كان مع اللوحه..يبي يعرف من اللي رسمتها بأي شكل...وياقداش قلبه متمنى تكون هي لكن عقله قاله..
"وليش بترسمك!شن اللي يخليها ترسمك من اصله! غير كيف فكرت فيها بس!"
مسح ع شعره للخلف والميه تنزل عليه وقال بعصبيه..
/غبي..
🍃🍃🍃🍃🍃
وهي فاقت قبل الفجر بنص ساعه لصلاة القيام..
صلت..بعدين قعمزت تستغفر...وهي تستغفر خطر عليها موقف اللوحه..
تلقائيا ابتسمت وسكتت..وسرعان ماتلاشت ابتسامتها ورجعت استغفرت بصوت عالي شي بش تسكت صوت افكارها الغريبه عليها...
لحظات ونزل عليها النوم...حاولت تقاوم ماقدرتش..
حطت راسها ع الصلايه..وغمضت عيونها وخدت غفوة...
☄وهالغفوة خدتها العالم الاحلام...
شافت وكأنها واقفه في مكان وهو واقف قدامها لابس الزي التارقي..لكن هالمره كان غام وجهه بالشاش ماعدا عيونه..
رفع ايديه اللي كان ماسك بيه شال..
حطه ع راسها...هي نزلت راسها لوطا شافت روحها لابسة الزي التارقي..رفعت عيونها فيه..
لقاته يشوفلها وباينه عيونه ابتسامه حلوة...
رفعت يدها للثامه..حطتها عليها ونزلاته بشيء من البطء..
وكملت ملامح ابتسامته اللي خلتها تبتسم تلقائيا وهي تتأمل في ملامحه..
☄فتحت عيونها فجأه..حست بقلبها يدق بقوه..وفي شعور حلو بالمرة ماليها...
ناضت قعمزت وحطت يدها ع قلبها اللي قاعدة دقاته متسارعه...
"الله أكبر الله أكبر"
نزلت يدها وغمضت عيونها وقالت..
/الله أكبر...
🍃🍃🍃🍃🍃
الساعه 8:30صباحا..
"شهاده ماعندي مانقول..غزاله زين وعرض وطول"
هادي سميره في كوجينه حوشها دير في الفطور..
وضرتها في دارها مقعمزه في سريرها وهي رابطه راسها تسمع فيها...تهز في رجليها بغضب..ودموعها ينزلوا...
☘فات محمد شنيبه من قدام دارها وهو يسمع في غني سميره ويضحك..
خش عليها الكوجينه وقال..
/الفطور واتي!؟
جاته وهي تقول..
/ايه لكن راجي..مدتلها طاسه وقالت..هادي ميه مرقيه مذوبه فيها كاشيك عسل طبيعي..اشرب..
هو ابتسم وخدي منها الطاسه وبدي يشرب..
وسميره تشوفلها وهي تتفكر في نصيحة صاحبتها مطيره..
《ردي بالك ياسميره..مغليه ماتخافش ربي..زمان سمعت من ناس تعرفها انها مفرقه بين محمد ولطفيه بالسحر والدوة متاع خيراته بينها وبين ضرتها كلها كذب! ومرات حق  اللي دارتهوله خلاته يختارها ويكره لطفيه..ديما شربيه مية رقيه وخليه يغسل منها وحتى انتي نفس الشي وشدي في المعوذات وسورة البقرة》
حط الطاسه وهي قالتله..صحتين..
وقعمزت قريبه عليه وبدت تفطر فيه بإيديها..
🍃🍃🍃🍃🍃
الساعه 9:00صباحا..
"ماماتي اني ماشيه للجامعه سلام"
واشرت بيدها تحي فيها..
وجنه رفعت يدها وقعدت تقلد فيها..
فردوس بضحكه:نجيها ياربي..
مشت طوبى وهي تقول بإبتسامه..
/ماتبي شي دوسه؟
فردوس:سلامتك طويبه..
طلعت طوبى وهي تقول..
/السلام عليكم..
توجهت للسيارة..فتحتها وحطت شنطة اللاب توب والدوسيه في الكرسي التاني بعدين سكرتها ومشت بتفتح الباب الخارجي...
فتحت اول جهة منه...
وتشوف للشارع...ويجوا عيونها عليه..وع طول خطر عليها الحلم..
ورجع قلبها يدق بنفس القوة اللي يدق بيها لما فاقت من الغفوة..وهداكا الشعور رجع اجتاحها اجتياح..
غيرت عيونها طول..للجهة التانيه من الباب ومشت بتفتحها وهي ترجف..
🍃وهو كان واقف حدا سيارته مع جدها وولد عمها يتكلموا في موضوع سيارة اميمه..
سمع باب حوشها لما انفتح لكن ماغلطوش عيونه وشافولها برغم الحاح قلبه الرهيب..
🍃وهي غضت طرفها عنه ومعاش شافت جيتهه...
طلعت بالسيارة بعدين سكرت الباب..وركبتها من جديد وتحركت وفاتت من جنبهم بدون ماتشوف جيهتهم...
☘حسين:تنميرت ياغالي..
عبد القيوم بإبتسامه:نخدمك بعيوني افندينا..
علي:معاش كلمت ناس الكفره؟
عبد القيوم:اليومين اللي فاتن امورهم ماشيه..
حسين:ماقالولكش روح؟؟
عبد القيوم:عراك انا وياهم ع القصه هذي..مانيش طالع من هنا..بنغازي ع قد ماصار فيها ماخليتها..وقال في نفسه..
" يابال طرابلس اللي روحي فيها"..
حسين؛يستر الله وخلاص..الحرب كان قامت نحس فيها لاتبقي ولاتذر..
علي:ندعوا الله يطفي نارها ويحقن الدماء..
عبد القيوم:آمين..بنقوللكم..ليش ماديروا باب سحاب للحوش! قصه كان اللي بيطلع ولابيخش ينزل يحله ويرد ينزل ويسكره..
علي:فكرت فيها الحكايه هادي..
حسين:خليها عليا..غير اهم شي اقنع القياده..
ضحك نص ضحكه وهز راسه..
عبد القيوم فهم قصده وع قد مابان عادي من برا كانت النار والعه في قلبه المغرم...
🍃🍃🍃🍃🍃
ومرت الساعات ع طوبى في الكليه..
بين المحاضرات..ومشروع تخرجها اللي تخدم عليه مع المشرفه...
وتناصفت الساعه11 وهي مكمله..
لكن هالمرة مابتش تروح طول..مشت للكافتيريا خدت عصير..
ومشت قعمزت في مقعدها المفضل..
وشربت العصير ع رواق وبهدوء وماكانتش تفكر في شي..
فجأه خطرت عليها حاجه في المحاضره تبي تعديل..
طوبى:ايه قلت في راسي بنعدلها ونسيت..خل نعدلها توا قبل لننساها بكل..
حطت علبة العصير ع جهه..
وطلعت مذكرة المحاضرة من الدوسيه ومعاها قلم رصاص..
فتحتها ع المحاضره وعدلت المعلومه..بعدين قعدت تقرا فيها..مرت عليها معلومه عن الاطفال..خطرت عليها بنتها..ابتسمت..وبنتها وهي تذكر فيها تلعب بالشكشاكه فكرتها  بصاحب هالهديه...وراحت بتفكيرها في صاحب الهديه..ولوحة صاحب الهديه..والحلم اللي كان فيه صاحب الهديه..
وصاحب الهديه من تفكيرها بيه خلاها ترسمه وهو لابس الشاش ومتلم بيه..
فجأه..يجيها اتصال..استاقظت شافت روحها شن رسمت..
سكرت المذكرة طول وهي مرتبكه..
بعدين غيرت نظرها لجيب الجلابيه..طلعت منه التليفون وشافت المتصل..
ضحكت ..فتحت الخط وردت..
/السلام عليكم ابله نفيسه كيف حالك؟
"وعليكم السلام..حالي باهي الحمد لله..كيف حالك انتي؟"
طوبى:الحمد لله..
"شني ياطوبى بتجي انتي تاخدي اللوحه ولابتبعتي حد ياخدها؟"
طوبى:لااني بناخدها..بس قبلها بنسألك..الخطاط اللي قلتي مايجيش توا ولا؟
"لااستاذ عبد القيوم شبه مايجيش بكل الا في الاجتماعات بس"
ابتسمت وقالت..
/باهي وين نلقاكم؟
☘وعطتها نفيسه عنوان المكان اللي هما فيه..
وطوبى بعد مانهت المكالمه معاها طول طلعت من الجامعه..
🍃🍃🍃🍃
بعد ماقطعت مسافه خدت من وقتها عشر دقايق وصل للعنوان..
درست سيارتها ونزلت منها..ومشت خشت داخل..
سألت عن مكان مكتب نفيسه دلوها عليه ومشتله..
لما وصلت فيها..
طلعت منه سلافه وهي تقول بضحكه..
/بشوفك حبيبتي..
لفتت انتباه طوبى بجمالها المميز بالذات لون شعرها..قعدت معاها بعيونها لين فاتت من حداها..
طوبى بصوت منخفض..
/اللهم بارك..بعدين دقت ع باب المكتب وخشت...
🍃سلافه وهي ماشيه تلاقت مع ميار وقالت بضيق..
/ميوش..
ميار:شن صار!؟
سلافه بضيق:في حدا اشتراها..
ميار بأسف:خسارة..
سلافه:ياريت لو حكيت عنها من اول ماشفتها..
ميار:مش مشكله الجايات اكثر ان شاء الله..
سلافه هزت راسها وقالت..
/طيب انا رايحه بدك شي؟
ميار؛عقلي اختك تربحي راهو بتهبل خوي..
ضحكت سلافه وهي تهز في راسها بعدين قالت..
/سلام..
ومشت طلعت من المكان...
وميار مشت تشوف في شغلها..
🌼ع جية طوبى مع نفيسه ماشيات مع بعض ناحية المكان اللي فيه لوحات الخط متاع المعرض..
وصلوا فيه..وخشوله...
نفيسه:هديكا هي..
طوبى لما شافتها ومشت ناحيتها وقفت عليها وقعدت تتأمل فيها..
كان كانت بيت شعر بالخط الديواني..
《ياليبيا لوصار مهما صار..
انت الغلا وانت زهى الانظار》
ابتسمت بعدين قربت وخدتها...ورجعت تتأمل فيها مرة تانيه..
🍃رفعتها لمكتب نفيسه وغلفتها غادي..
وقبل لتطلع قالت..
/هو موضوع العضويه صعب بس نحاول نشاركم في نشاطات تانيه ان شاء الله..
نفيسه:بإذن الله..
ويدق الباب وينسمع بعده صوت حد يقول..
"استاذه نفيسه"
فتحت طوبى عيونها ع وسعهم بفجعه وهي تقول بهمس وفلوشه..
/درقيني درقي...
استغربت نفيسه وارتبكت وقالت..
/لحظه شويه استاذ..واشرتله ع المكتب الدخلاني..
طول طوبى مشت باللوحه للمكتب  وخشت وسكرت الباب بهدوء..
ونفيسه مشت فتحت باب مكتبها ورسمت ع وجهها ابتسامه وهي تقول..
/تفضل استاذ..
خش عبد القيوم..
وهي خلت الباب مفتوح وولت لمكتبها وقالت..
/تفضل قعمز..وقعمزت..
عبد القيوم؛لا معليش مستعجل..غير جيت نسأل كان لقيتي من يشري..
نفيسه:واستلمت المبلغ وحيخش الصندوق بعد شويه..
عبد القيوم:الحمد لله..
🍃طوبى واقفه ورا الباب تسمع وهي مبتسمه..
عبد القيوم شافلها شويه بعدبن قال..
/تواصلتي معاها الرسامه؟
ضمت طوبى شفايفها لداخل وهي رافعه حواجبها..
نفيسه:ايه وبلغتها عن اعتراضك وهي اعتذرت هلبه ..
عبد القيوم:وصليلها اني لولا هدف المعرض ماعديت اللي داراته..وهذي اخر مرة ترسمني فيها من غير اذني..
شدت طوبى ضحكتها..
نفيسه بجديه؛حاضر تو نبلغها..
هو قال:مشكورة استاذة..السلام عليكم.. ومشي طلع من المكتب..
ونفيسه قالت:وعليكم السلام..
بعدين ناضت ومشت سكرت المكتب وقالت..
/طوبى..
فتحت الباب وطلعت..
ونفيسه وهي تشوفلها لاحظت احمرار وجهها وقالت..
/تعرفيه معرفه شخصيه!
طوبى وهي محرجه:نوعا ما..زعمه طلع خلاص..
نفيسه:اكيد قال مستعجل..كان تبي نسايرك لبرا..
طوبى بإبتسامه:مش حنقول لا..
🌼وطلعوا مع بعض لين وصلوا للباب..
نفيسه؛فرصه سعيده..
طوبى بإبتسامه؛اني اسعد..السلام عليكم..
ومشت طول..
ونفيسه ردت السلام وخشت داخل..
🍃وفي هالوقت كان سامي واصل للمكان نفسه..
وهو نازل من السيارة شاف طوبى طالعه وهي رافعه حاجه في يدها..وصلت بيها سيارتها حطتها من الخلف..
بعدين ركبت وشغلت السيارة وتحركت..
وخلاته يلحق فيها بعيونه اللي نظراتهم كلها مفاجأة...

#العضيد
#طوبى

....يتبع....