#طوبى "جنة طوبى"
#جمان_فريد
#الجزء_الثالث_والستين"عيدالأم"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🍃ياسعد من عند إميمه حية
احصيصته مدسوسه وحاجته مقضيه🍃
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
"انت تعرف مختار زي مااني نعرفه تعرف شن داير قبل "
اب فاتن وهو يكلم فيها فيديو:ولإني عارفه لايم عليك يافاتن بتجبيلي وجع راس يابنتي..
"بابا سكر سكر..خل نكلمه"
؛ردي بالك تزيدي طينيها..
"ماتخافش سكر بس"
تنهد بوها وقال؛باي..
وسكر..وهو يفكر بقلق...
🍃ومختار فهالوقت..
كان مقعمز في سيارته اللي مدرسه قدام البحر..
يتفرج عليه بعيونه اللي تشابه في لونها لونه...
بس الفرق ان البحر كان هادي..
اما امواج عيونه كان عاليه وقويه تنبأ بقدوم عاصفه كبيرة...
رن تليفونه اتصال ماسنجر..
قال..رضا انزل شويه..
السواق؛حاضر..
ونزل السواق وسكر الباب وتباعد..
وهو فتح المكالمه ووجه شاشة التليفون ليه وقال..
علاش درتي هكي!؟
"خفت منك وعليك"
مختار بنظرات غضب:فاتن اني مش طالب منك تخافي عليا وماعندي علاش نضرك بش تخافي مني..
"مختار...صدقني نهاية اللي تفكر فيه حتكون بشعه صدقني"
هو غمض عيونه محاوله منه لتهدئة غضبه بعدين قال..
فاتن..فتح عيونه وهو يقول..لأنك تعزي عليا بنفوتلك حتى المرة هادي..مرة تانيه يافاتن صدقيني مش حنفوت بكل وانتي عارفتيني كويس شن نقدر ندير..
تنهدت وقالت..
"اني اللي نعرفك..ماعندي مانقولك يامختار غير نشوفك على خير"
هو سكر ونزل التليفون ورجع شاف للبحر ونظراته ليه اللي كانت كلها غضب لمعت بالدموع..
شويه ودق ع الروشن..
السواق طول جاه وركب..
مختار؛روح بيا..
:حاضر..
وشغل السيارة..وتحرك طول...
🍃🍃🍃🍃🍃
الساعه 1:00ظهرا...
في شارع القهوة..
خشت طوبى لحوش شيابينها..وقعدت تمشي بإتجاه الكوجينه وهي تنادي..
عمتي..
مارد حد...
عاودت نادت مرة تانيه..
عمتي..
كذلك مافيش رد..
خشت للكوجينه شافت طنجرة وكسكاس ع النار..
قدمتلهم..وعرت الغطا..
شافت الرز..
شهاها منظره..
طول مشت خدت كاشيك وجاته وغرفت منه..
وكلت..
ع خشة مغليه شافتها وقالت:طوبى..
طوبى طول غطت الطنجره والتفتت شبحتلها وهي محرجه وقالت واللقمه مازال في فمها..
كيف حالك عمتي؟
مغليه؛الحمدلله..شورك مش واكله شي اليوم؟
طوبى بلعت وقالت؛ايه من الصبح..
مغليه؛ديري حاجه تاكليها لبين مايطيب الغدي..
طوبى؛حاضر..نسرين مازال ماروحتش؟
مغليه؛مشت تروح بسدرة من المدرسه..
طوبى هزت راسها وهي ساكته..
مغليه؛انتي هادي مرواحتك من المدرسه؟
طوبى:ايه.
مغليه قدمت للكرسي وقعمزت وهي تقول؛شايفه الخدمه عجباتك ونساتك حاجات اهم..
عقدت حواجبها وقالت؛حاجات شني؟
مغليه؛الصغار...الصغار..امتى بيصير منهم!؟
توترت..وارتبكت...ووجهها تغير لونه...
مغليه بضيق:بنتي قولي الحق..في مشكله قصدي حاجه مانعتكم؟
انحرجت طوبى ومعاش عرفت تتكلم وتمنت من ربي لو يصير شي يطلعها من هالمأزق...
والاستجابه كانت سريعه..
لما خشوا نسرين وسدرة للحوش..
وسمعوا صوت بكي سدرة..
طوبى بخوف؛سدرة تبكي!..
مغليه بفجعه؛خيرها!؟
وناضت ومشت طلعت من الكوجينه..
وطوبى حطت الكاشيك ع الطاوله ولحقتها.
🍃نسرين ودموعها ينزلوا؛خلاص حبيبتي خلاص..
ع جية امها وطوبى..
مغليه بخوف؛خيرها؟
نسرين:اص شويه يام..
ومشت بيها لدارها وهي حاضنتها..
وطوبى ومغليه معاها بعيونهم اللي تعبت دموع..
مغليه بوجع؛وين نشوفها هكي قلبي يتقطع..
طوبى بألم؛شن بينسيها..!
مغليه؛يقولوا الصغار ينسوا فيسع..
بنبرة وجع ردت عليها..
هما اللي ماينسوش بكل...
🍃وفي دار نسرين..
سدرة ببكي؛باهي علاش ربي خدي امي اني علاش..علاش خلا لبنات كلهم امهاتهم الا اني علاش..
نسرين وهي تبكي؛خلاص ياسدرة يابنتي قطعتي قلبي..
سدرة ببكي؛كلهم خدوا هدايا لعيد الام بيعطوهالهم غدوة سعدودهم..قاعدين يقولوا ماما..
انهارت نسرين بالبكي..
وسدرة تبكي معاها وهي تقول..
وينك ياماما وينك علاش مارفعتنيش معاك..!؟
اندق الباب وانفتح..
وخشت طوبى وهي تشوفلهم كيف يبكوا..
بعدين سكراته وقالت:حتى اني امي ميتة ياسدره..
شافتلها سدرة وهي تبكي..
طوبى مشت قعمزت مقابلتها ع السرير وقالت:
امي ماتت واني صغيره هلبه هلبه..كنت بيبي..مانتفكرش منها شي..لانتفكرها وهي ديرلي في فطور المدرسه..ولانتفكرها وهي تقري فيا.. ولافي عقلي ذكرى وحده ليا مع امي ياسدره..تعرفي ياسدرة اني حتى صوت امي مانعرفاش..
هدت نسرين بكي وهي تشوف لطوبى..
وسدرة وقفت بكي بس قعدت عبراتها تطلع وهي تمسح في دموعها..
طوبى ابتسمت بألم:انتي خير مني ياسدرة..عشتي مع ماما وتعلمتي منها هلبه حاجات وعندك معاها ذكريات سعدودك..
ونزلت عيونها وقعدت تبكي بصمت..
انوجع قلب سدرة البريئ عليها...نست وجعها...وقربت من طوبى وقعدت تمسح في دموعها وهي تقول..
اسفه..
ابتسمت طوبى وخدت يدها وباستها من داخل بعدين قالت..
تقدري تعطي لماما هديه حتى انتي..
سدرة بتساؤل؛كيف!؟
طوبى رشفت وهي تقول؛اللي يموت حبيبتي ويكون عنده صغار اي حاجه كويسه يديروها يهدوهاله توصله طول وين ماقاعد..
سدرة؛قصدك في القبر؟
طوبى:ايه..
سدرة؛لكن القبر نعرف شكله ضيق ويخوف مش عارفه كيف مدايرة ماما غادي بروحها..
حطت نسرين يدها ع فمها وهي تكتم بكاها..
طوبى؛لالا القبر مش هكي للي زي ماما..ماما مراة طيبه وحنينه وديما دير في الخير وديما قريبه من ربي..تصلي وتقرا في القرآن وتساعد في الناس..ماما قبل لتموت كانت في مكه حبيبتي حدا الكعبه..اللي داراته ماما هدا كله وهي حيه كانت تبني بيه لروحها حوش حلو في القبر..
سدرة بتعجب:حوش في القبر؟
طوبى بإبتسامه ودموعها في عيونها؛ايه حوش بجناناته..ومش قاعده فيه بروحها.. الحاجات الكويسه اللي كانت دير فيها دعواتك ليها انتي وخوتك كل يوم قاعدين معاها يونسوا فيها..ومضويين عليها القبر كله..
سدرة وهي متعجبه هلبه؛اني القبر اللي شفته فاضي مافيه شي..!
طوبى بإيتسامه؛هي بس اللي تشوف الحاجات هادي حني مانقدروش نشوفوها..
سدرة سكتت وهي تفكر في كلام طوبى..
طوبى وهي مبتسمه مسحت دموعها وقالت:اني بنعطي لأمهاتي هديه العيد هدا نبيك تعطي لأمك هديه زيها..
سدرة؛امهاتك؟
طوبى بإبتسامه؛امي ورده اللي جابتني الله يرحمها..واختي سدرة امي التانيه هي اللي ربتني..
سدرة هزت راسها وهي تفكر..
ونسرين قالت بنبرة باكيه؛ربي يشفيها ويردها..
طوبى شبحتلها وقالت:آمين..
سدرة:باهي شن هي الهديه؟
طوبى وهي تشوفلها قالت؛بعدين لما يروحوا خوتك نقوللكم مع بعض بش تعطوها كلكم..
سدرة هزت راسها وقالت؛باهي..
طوبى وهي مبتسمه قالت؛نجيها ياربي..وقرصتها من خدها..
ابتسمت سدره ابتسامه صغيره..
طوبى؛هي بري للحمام اغسلي وجهك وايديك وتعالي بدلي..
سدرة؛حاضر..
وناضت ومشت طلعت من الدار..
بعد ماطلعت نسرين قالت..
قطعتلي قلبي في السيارة..صغيره ع هالوجع صغيره هلبه..
شبحتلها طوبى وقال؛يقعد الفقد بالموت اهون من الفقد بالحياة..
عقدت نسرين حواجبها وهي تشوف لطوبى..
طوبى بنظرة حزن؛حتى هو قاعد صغير..صغير هلبه ع الفقد..
نسرين بشي من الحده؛معليشي اطلعي بنغير حوايجي..
تنهدت طوبى بحزن وناضت ومشت طلعت وسكرت الباب من سكات..
وخلت نسرين ترجع تبكي مرة تانيه...
🍃🍃🍃🍃🍃
"كل وحده فيهم قالت بنرقد ماتنوضونيش للغدي"
مطيره:مش اول مرة ديما لما يروحوا يرقدوا طول..
فردوس بقلق:لكن اريج ياعمتي ماتفوتش وجبة الغدي عمرها مادارتها اصلا من لما خشت وجهها ماعجبنيش..
مطيره؛زعمه ماصارلهاش من الخدمه؟
فردوس وهي تفكر بقلق:مش عارفه..ان شاء الله خير وخلاص..
🍃وكل وحده فيهم كانت راقده في سرير وحده من خالاتها ومغطيه روحها..وتحت الغطا تذرف في دموع اما خوف او الم بصمت...
🍃🍃🍃🍃
"الله يبارك الله يبارك"
هادم قريبات بنات الصيد..بين الخالات والعمات وبناتهم..
خاشين لدار فاضيه محطوط فيها بتات نجاح ويتفرجوا..
ويبركوا ويباركوا..
ونجمه فرحتها كانت باينه عليها هلبه..بعد سنين طويله واخيرا بتتهنى ع وحده من بناتها..
وهادي اغلى امنيات الام انها تشوف متزوجه ومستقره وتتهنى عليها...
بس الأحلى..
هو الشعور اللي حاسه بيه نجاح..
كانت مرتاحه ع الآخر..فرحانه هلبه وان كانت مش مبينه..
والأهم من هدا كلها انها مقتنعه..
تأخر نصيبها صح..
ومافيش خطاب دقوا بابها في حياتها غير عبد الحفيظ ممكن زمان كان هالشي واجعها..
لكن توا نظرتها تغيرت...وفهمت ان العبره مش في كثر الخطاب ولاانها تتزوج وهي صغيره..
العبره في الاختيار الصحيح....
☘مش مهم تنخطبي لواحد ولاميه تتزوجي صغيره ولاكبيره..المهم انك تعرفي تختاري صح..تختاري الراجل اللي ينفع يشاركك الحياة في كل شي ويكون معاك راجل العمر كله☘
بس عواطف اللي قاعده تمثل بكل جهدها بش تبان سعيده وفرحانه وجوها عادي كانت متحسره من داخل ع نفسها وع اللي داراته في روحها قبل لما قدمتطت هلبه تنازلات بش تتزوج والنتيجه فشل ذريع..انهدرت بسببه كرامتها..وبدل ماتعيش فرحة العمر..عاشت قهرة العمر...
:عادي نقولوا شتاوات ع الماشي يانجمه..
نجمه:عادي عادي مايوصلش الصوت..
وبدوا نساوين العيله يصفقوا ويقولوا في الشتاوات..
يامبروك على البنيه...ان شاء الله تعيش ايام هنيه..
ونجاح في وسطهم تمرر في نظرها عليهم وهي فرحانه ومبتسمه بخجل..
وامها تشوفلها وهي مبتسمه بفرح ودموعها في عيونها..
وعواطف تصفق معاهم وتغني وهي تشوف لنجاح وقلبها موجوع...
🍃🍃🍃🍃🍃
بعد الغدي..
كانت طوبى في الكوجينه تغسل في ماعين الغدي ومعاها سدره تعاون فيها..
🍃وفي الصاله.
مغليه؛قاعده ع مسكرة راسك ع المشيه..
نسرين؛يام والله مابالي بال عراس..
مغليه؛المرحومه وصتنا مانحزنوش ولدها قالها بلسانه قال اني قالت فوق تلاته ايام مايحزن عليا وكان جاكم فرح ما تتمنعوش عليه..هكي بالحرف الواحد..
نسرين وهي تشوف للتلفزيون قالت بحزن:الله يرحمها..اني مش عليها هي بس اني يام نفسيتي قاعده تاعبه..
سكتت مغليه وهي تشوف لبنتها بضيق بعدين قالت..
ع راحتك..المهم قلت لنجمه بنجيب معاي نجاة..
شبحتلها وقالت؛ومن قالك ترضى تمشي؟
مغليه؛كلمتها وقالت باهي..
رفعت حواجبها وقالت؛جديات!؟
مغليه؛والله زي مانحكيلك المراة تبي تغير جوها صحه لإيدها قويه ماتنكسرش..
نسرين فهمت ان امها تسمع فيها في الكلام تجاهلتها..
مغليه تنهدت بعدين ضيقت عيونها وقالت:مركزه ع طوبى كيف موليه؟
نسرين؛خيرها؟
مغليه:سامنه هلبه لكن وجهها رايح رامض وشاحب..
نسرين:شويه اللي فات ع راسها مسكينه راهو اللي ملوحه برا بين الحياة والموت كانت امها مش اختها يام..
مغليه؛عارفه..لكن الدنيا ماشيه يابنتي اهو ولد عمها وخطب..وخالها وبيتزوج مافي حد وقفت حياته ..
نسرين؛اكيد يام بتمشي الحياة لكن الحزن يقعد في القلب..تعرفي يام وجع عيشه اهون من وجع سدره..
عيشه ماتت وارتاحت وماتعبت معاها الله يرحمها..لكن سدرو شني..عايشه ومش عايشه يام وفي كل لحظه يراجو يسمعوا عنها خبر مش معروف يسر ولايكدر..دوامه يام دوامه..مابعدهم والله مابعدهم..
مغليه؛ماقلت شي يانسرين..لكن اني قصدي ع شي تاني..قصدي ع خوك انتي تعرفي الجالي كيف يحب تكون حاجته احسن حاجه..وحوشه ومرته احلى واحسن مراة ديما واقفه لروحها وزاهيه في عينها..طوبى ولت مهمله هلبه ماتقولش واحد وعشرين عام تقول اكبر بعشرة سنين والجالي بديت نلاحظ فيه مش مرتاح ولدي..
تنهدت نسرين بضيق ورجعت شافت للتلفزيون..
مغليه:اني مش متكلمه بنراجيه هو يتكلم ويشكي بعدين نكلمها..
نسرين وهي تشوف للتلفزيون؛هكي احسن..
🍃"سدرة بالله جيبيلي شيشة ميه من داخل"
وقعمزت طوبى ع كرسي الجنان..
خشت سدره جابت شيشه وجتها مدتهالها وهي تقول..
نادي ع محمد ويزن؟
طوبى هزت راسها بإيجاب وشربت الميه..
وسدرة مشت بسرعه لخوتها..
نزلت طوبى شيشة الميه وحطتها ع الطاوله..
وسرحت بتفكيرها..
شويه وجوها صغار المهدي...
محمد ويزن وين قربوا قالوا بصوت عالي شويه..
السلام عليكم..
هي شبحتلهم وابتسمت وقالت؛وعليكم السلام..كيف حالكم..
الزوز ردوا؛الحمد لله..
طوبى:قالتلكم سدره في شن نبيكم؟
محمد وهو مغير عيونه عنها؛مافهمتش منها هلبه..
طوبى:تو نفهمكم..اني نبي نكفل ايتام بنيه امي الله يرحمها وسدره ربي يشفيها..ونبيكم ديروا نفس الشي بنية عيشة الله يرحمها..
شبح يزن لمحمد ومحمد شبحله..
بعدين شاف لطوبى وهو عاقد حواجبه بتساؤل..
طوبى:اسمعوني..انتم بتمشوا تقولوا لبوكم ع الفكرة واني متأكده انه حيوافق عليها قولوله نبوا نكونوا معاك خطوه بخطوه ماديرش كل شي بروحك..
محمد قعد ساكت وهو يفكر..
يزن:اني مداير شقاقه بنعطيه الفلوس..
سدرة؛حتى اني عندي وحده دارتهالي ماما مانعرفش قداش فيها لكن هلبه ليا وقت نحط فيها في الفلوس..
ابتسمت طوبى وهي تشوفلهم..
محمد قال؛حتى اني عندي..خلاص نقولوا لبوي بنشاركوك مانحطش فلوس بروحك..
طوبى بإبتسامه؛حلو..تو نعطيك اسم جمعيه لكفالة الايتام قول لبوك عليها وهو يزيد يسأل عنها ويتأكد منها بروحه..
محمد هز راسه وقال؛إن شاء الله..
سدرة:ابله طوبى قالت توصل لماما في القبر الهديه..
ابتسموا الزوز بحزن..
سدرة؛وقالت ماما مش قاعده بروحها في القبر الحاجات الكويسه اللي دارتهم وهي حيه قاعدين معاها..
تأثروا الزوز بكلامها وقعدوا يتخيلوا فيه..
سدرة؛قالت ماما وهي حية دارت حوش في القبر بجناناته مش ضيق القبر على ماما يامحمد..
شدوا الزوز ارواحهم بقوة بش تنزلش دموعهم..
وطوبى تشوف ودموعها ينزلوا..
سدرة؛اول مايروح بابا نقولوله على طول باهي..
سمعوا باب الحوش انفتح..
سدرة؛بابا!..
ومشت تجري..
ويزن لحقها...
لكن محمد قعد واقف وقال لطوبى؛هديتها ختمتين لتوا.
طوبى بإبتسامه؛ربي يتقبل يارب..
محمد شبحلها وقال بشي من الألم؛كتبت عليك حاجه في الرساله اللي خلتهالي..
طوبى تفاجئت وقالت؛عليا اني!؟ شن كتبت؟
محمد؛قالت طوبى اختك الكبيره كان احتاجاتك رد بالك توخر مهما صار..
ابتسمت طوبى بألم..
محمد وهو مبتسم بألم؛ واني نعاهدك خالتي نهار تحتاجيني تلقيني..
طوبى بإبتسامه ودموعها ينزلوا؛ربي يحفظك يامحمد ..
محمد:ويحفظك..
ولف ومشي وخلاها وضميره يوجع فيه ع الآخر...
وهي حست بالفرح لما سمعت اللي قاله محمد..
ودعت من قلبها...
"ربي يوسع عليك ويجعل قبرك روضه من رياض الجنه.."
🍃🍃🍃🍃🍃🍃
"لالا مش بلاش ياعمتي في حاجه صايره"
مطيره بقلق؛تي غير شن بيصير بس.!؟
فردوس بخوف:مفروض تفيق وتتغدا وتوتي روحها بش تمشي للخدمه توا لما نوضتها قالتلي مش ماشيه نسأل فيها خيرك تقولي اطلعي يام وخليني نرقد..
مطيرة؛لاحول ولاقوة الابالله كنا في اختها ولينا فيها هي..
فردوس؛طوبر تقدر تعرف شن صاير معاها..
مطيره؛المراة بتقعد في حوش شيابينها اليوم..
فردوس؛نبيها تجي تشوف خيرها وبعدين تولي غادي..
وقامت تليفونها واتصلت بيها..
ومطيره في خاطرها تقول..
"قداش منها هالمسكينه"
🍃وفي هالوقت ركبت طوبى لجناحها بش ترتاح...
او ماجت بتخش السرير..
رن تليفونها..
خداته من الكامدينو وقعمزت..
ووين شافت المتصل فتحت الخط وردت..
طوبى:ايوه فردوس..
"طوبى تقدري تجي توا"
طوبى بقلق؛علاش شن في؟!
"اريج مش عارفه خيرها ياطوبى مش ع طبيعتها بكل"
تنهدت طوبى وقالت..
ماتخافيش فردوس دايرة عركه هي وبنات معاها في الكليه..
"عركه!؟ عركة شني!؟"
طوبى حكت جبينها بعدين قالت؛
عركة بنات عاديه يافردوس مافي شي يخوف صدقيني..
"باهي بالله عليك كان قدرتي تجي بعدين تعالي وشوفيها باهي..ماترتاح وماتدوي كان ليك انتي"
طوبى هزت راسها وقالت؛حاضر تونجي بعد العصر..
"سامحيني وخيتي والله مانبي نتعبك لكن وضع اريج خوفني"
طوبى؛شن تقولي فردوس شن تعبيني مانعبيني اني اختك راهو وبنتك بنتي حتى لو كانت اكبر مني ماهو يقولوا الخاله ام..
ضحكت فردوس وقالت..
"تخيلتك تولي ام رتيله امس بس كنت نغيرلك في شمالاتك انتي وياهم مسرع الوقت"
طوبى بضحكه؛ياعليك ذكرى خطرت عليك...
"باهي مانبيش نعطل عليك بعدين نتلاقوا"
طوبى :ان شاء الله...سلام..
"سلام"
سكرت فردوس..وطوبى نزلت التليفون وتنهدت..
قعدت تشبحله للحظات وهي تفكر في اريج ..بعدين ردت التليفون في مكانه..
وتمددت ع السرير وتغطت..
وقعدت تفكر وتفكر وتفكر..في الف حاجه وحاجه..
لين غلبها النوم من التعب ورقدت..
🍃ومع العصر..
فاقت..صلت صلاتها..وجهزت نفسها وطلعت من جناحها..
وين نزلت لوطا..
لقت عزوزتها موتيه روحها بتطلع..
طوبى:عمتي طالعه؟
مغليه شبحتلها وقالت؛ايه ماشيه لنجمه تمشي معاي؟
طوبى:لامانقدرش بنمشي لحوش بوي..
مغليه ماعجبهاش بس مابينتش وقالت؛اها..ايه حقه بنتشدك خديتي حاجه لنهار الحفله؟
طوبى؛ايه امس بعد طلعت من الكليه خديتها..
مغليه؛شن خديتي؟
طوبى:قفطان مغربي متاع مناسبات..
مررت مغليه نظرها عليها بعدين قالت..
الحاجه الوحيده اللي تطلع عليك توا..
ولفت ومشت وخلتها وهي مصدومه في الكلام اللي قالاته..
قالاته بكل كبر وشي من الازدراء...
ونبرة الكلام والنظره وجعوا طوبى ع الآخر..
شبحت جيهة المدخل..بعدين مشتله..
وصلت فيه وقفت قدام مرايته وقعدت تشوف لروحها..
معقوله لهالدرجه ولت قبيحه ومنظرها غير مقبول!؟
شن السبب؟!..
هل الحمل...ولا نفسيتها التعبانه!؟
كل اللي حساته وقتها...ان نفسها وجعتها..ووجعتها هلبه...
ونفس نظرة الكره شافتها لإنعكاس صورتها في المرايه..
وهربت منها لأنها مش متحمله تشوفها اكثر من هكي..
ومش طول من الحوش...
وهي طالعه...
خش نضال للحوش..
بلعت وخدت نفس..بعدين مشت ناحيتها..
نضال اللي كان باين ع وجهه الغضب..
وين شافها نزل عيونه وقال:السلام عليكم..
طوبى؛وعليكم السلام..نضال معليشي شويه..
وقف بالسيف وهو قالب وجهه عنها..
طوبى بضيق؛عارفني في شني بنحكي معاك.
نضال؛وبالله ماتحكيش مهما قلتي مش حتقدري تصغري في عيوني غلطتها مهما بررتي ياطوبى مش حتقنعيني..
طوبى بضيق؛اني مش مبررة شي هي غالطه وغلطها كبير وراهو نادمه عليه لين خلاص لو شفت حالتها بكري قلبك يوجعك عليها..
نضال؛لاوالله ماهو واجعني.مراة ماديرش لراجلها اعتبار وتهزى عليه لأنه متساهل معاها وعاطيها حريتها مايوجعنيش حالها لو شن يصير فيها..
طوبى؛باهي اني متفهماتك ومش حنكثر دوة معاك لأنك حامق توا بس نبيك تعرف حاجه وحده قيمتك عندها كبيره هلبه ولوماكانتش مجبورة مادارتش هالغلط..
ومشت وطلعت من الحوش..
وخلاته بعد ماحطت ع جرحه ملح موجوع ع الآخر
~~~~~~~
طوبى:شن متوقعه يااريج راهو مش شويه اللي صار..
اريج ودموعها ينزلوا:تمام بنخليه هالفترة لين يهدا..
طوبى:احسن شي..وبالنسبه للمراة اللي قاعده توصلي فيها قولي لآلاء توصلها عنك..
اريج؛آلاء شني يااريج ماتشبحيش في حالتها كيف موليه..
"خيرها حالتي!؟"
شبحولها الزوز وهي طالعه من باب الكوجينه..
كانت نظرتها بارده وملامح وجهها تبان لامباليه برغم الأثر اللي مخليه البكي ع وجهها..
قعمزت حداهم وقالت؛توقعتك تكذبي لما قلتي قالي باهي..
سكتت اريج وهي محرجه ومضايقه..
الاء:مش عارفه كيف انتي غبيه هكي ماشعفتيش من اللي صار معاي!؟
اريج؛انجبرت وانتي عارفه..
ابتسمت آلاء تهكما..
طوبى:المهم توا توصلي المراة مكانها؟
اريج؛لالا الاء تنباله ياطوبى يوم تمشي وعشرة تفوت وتحشمني مع المراة..
الاء؛مانحشمكش ماتخافيش..عطيني العنوان ورقمها بش نكلمها..
اريج:منك جد آلاء!؟
الاء؛وجد الجد..اصلا حتى اني خشت دماغي..
طوبى واريج يشبحولها بتعجب..
الاء:نفكر نولي نخدم في الحلويات..
مررت نظرها عليهم وهي تقول..
خيركم تشبحولي هكي!؟..ندوي من جدي راهو مانتسهوكش..الوضع توا صعب نشوف في كل شي وحاسه بكل شي..ونبي نتحمل المسؤوليه معاكم..
نزلوا دموعها وهي تقول
اقتنعت خلاص..اقتنعت بأن هدا قسمنا من الدنيا..مانبيش نعيش حياة غيري نبي نعيش حياتي والواقع متاعي بش نرتاح..زي ماربي كاتب لناس الراحه والعز في الدنيا كاتب لناس تانيه تشقى وتتعب بش تعيش
اريج:صدقيني اللي يشقى ويتعب هو اللي يحس بقيمة حياته هو اللي يعيشها صح ياآلاء..حياة
الناس المرتاحه حياة فارغه مايحسوش فيها بقيمة شي من كثر ماهما فارغين تلقيهم ينافسوا في بعض ع اللبس والعزايم والسفر وغيره من متعة اللحظه اللي تعدي بسرعه بلامعنى..تعرفي الناس هادم بعد وقت يتكشفوا انهم عايشين حياة فارغه بلاهدف وجودهم وعدمه واحد...
اما اللي يشقى يحس بقيمة القرش اللي يطلعه بالذات وين يسد بيه حاجة عيلته ولايصرفهم ع روحهم ويساعد عيلته..
القرش اللي تتعبي عليه انتي اللي درتيه مش هو اللي دارك
عكسهم هما فلوسهم اللي دارتهم ياالاء لولاها يولوا صفر شن صفر قولي سالب واحد..
ضحكت طوبى وقالت؛كلامك حلو بس ماينطبقش ع الكل..
آلاء:لكن ينطبق ع الأغلبيه..
اريج؛صح..كلامي خش راسك معناها..
ابتسمت الاء ابتسامه باهته وقالت؛وهلبه..
اريج؛معناها خلاص نعبا عليك تكملي معاها..
آلاء:وكوني هانيه..
ضحكت طوبى وقالت؛تريسه..
اريج؛وسيدة التريس.
ضحكوا الثلاثه..
بس كانت ضحكاتهم تخفي وراها آلام وغصايص قاعد وجعها ينخر في الروح من داخل...
سكتوا شويه وهما يفكروا..
بعدين اريج قالت؛غدوة عيد الام..
آلاء؛في بالك حاجه؟
اريج؛شن رايكم نطلعوا غدوة لوحده من الجرادين نغيروا جو..
طوبى؛بالك في طلوع انتي؟!
اريج:ايه مانبيش نكد ع امي اكثر من هكي وكانك ع نضال تو نعطيه علم..
طوبى؛وكان قالك لا؟
اريج؛مش حيقولي لا لانه مش حيرد عليا من اصله..
آلاء:وكان ماردش تطلعي؟
اريج؛المهم عطيته علم..
طوبى:اريج ماتزنيش ع خراب عشك يااريج..
اريج بلامبالاة مصطنعه؛كان خرب نصيب مش حنموت من بعده..
طوبى وهي تشوفلها عرفتها تقول في كلام مش طالع من قلبها..تعرفها ماتحبش تبان ضعيفه حتى لو كانت من داخل منهارة..
الاء:بعيد السو ربي مايكتب عليكم فراق..
طوبى:آمين..ع العموم اني مانقدرش نمشي معاكم غدوة الجالي مروح من السفر..
اريج؛خسارة..باهي قوليلي بديروا عيد طفل في المدرسه ولا؟
طوبى بإبتسامه:اكيد..
اريج؛بنجيك بش نحضره خاطري فيه..
طوبى بضحكه؛تعالي..وشافت لآلاء وقالت..تعالي حتى انتي..
الاء؛لالا ماعنديش خلوق للزحمه ودوشة الصغار..
اريج؛تي احلى دوشه هادي..
طوبى بإبتسامه؛ايه والله احلى دوشه...
🍃🍃🍃🍃🍃
تاني يوم..
الثلاتاء...
20 من شهر مارس...سنة 2018..
الساعه 12:30قبل الظهر..
في احدى الجمعيات النسائيه المتكفله بإعانة الارامل والايتام..
كانت طوبى خاشه ع مكتب..
فيه اكثر من مراة..
في اللي واقفه تمل في اسمها..وفي اللي تاخد في ظرف مسكر وتمشي ع حالها..
كانت تمعن النظر فيهم وهي تفكر في حالهم..
وتسأل في نفسها...
زعما قداش عندهم صغار!؟
وشن صار فيهم بش وصلوا لهالمرحله؟
وكيف قاعدين يمشوا في امور حياتهم بأرواحهم؟
ياااه قداش هالكائن الحساس الضعيف يتحمل...
هلبه نساوين ع ظهورهم حمل جبال...
اثقال مايقدروش يحملوها رجاله...
وقاعدين يعافروا في هالحياة بش يعيشوا ويعيشوا صغارهم..
وهي تشوفلهم..
انتبهت بكل حواسها مع وحده كانت واقفه تكلم في موظفه تخدم في الجمعيه برجاء.
الموظفه:قتلك والله مابيدي والله العظيم الجمعيه هادي للأرامل وصغارهم الايتام..الايتام يعني اللي ابهاتهم ميتين وماعندهمش معيل..
المراة بألم؛باهي واللي اباهاتهم في حكم الميتين كيف يصير فيهم؟
الموظفه:اني عطيتك وعد نشوفلك حد يساعدك وصدقيني عرضت مشكلتك ع اكثر من شخص وكلهم رفضوا يساعدوا لأن اب صغارك حي..
المراة بكسرة نفس:لاحول ولاقوة الا بالله..لينا الله ياوخيتي لينا الله..
ومشت طلعت من حداهم وهي مكسورة..
وطوبى معاها بعيونها وقلبها موجوع عليها..
رجعت شافت للموظفه لما سمعت قالت..
تفضلي أختي..
قدمتلها طوبى وقالت؛السلام عليكم..
:وعليكم السلام..تفضلي..
طوبى:بنسألك ع المراة اللي طلعت توا سمعت كلامكم ووجعني حالها هي شن وضعها بالزبط..
:يعني تبي تساعديها..
طوبى:إن شاء الله بس نبي نعرف وضعها..
:هادي ياأختي ام لخمسة صغار راجلها طلقها ولوحها هي والصغار..مسكينه مقطوعه من شجرة وماعندها حد..عايشه في استديو اجار مساعدها في الاجار واحد من اهل الخير..
بس الحياة المعيشيه ليها ولصغارها معتمده ع مرتب المطلقات اللي مايدير شي لخمسه صغار كلهم يقروا..
طوبى وهي عاقده حواجبها بألم:معقوله بوهم مخليهم هكي !؟
تنهدت الموظفه بحسرة وقالت؛شن بنقولك..حني لما مشينا نتحروا عن وضع الاب صدمنا..الاب وضعه المادي مرتاح..
طوبى:وكيف مخلي صغاره محتاجين!؟
الموظفه:يااختي المراة هادي كانت عايشه مع راجلها وصغارها حياتها طبيعي جدا حياة مستقره لعند قبل سنه..
قبل سنة سلفها توفى وعقب صغار حتى هو وسلفتها كملت عدتها وبدت تمشي وتجي ع حوش العيله وحجتها الصغار طبعا وبحكم ان راجل المراة هادي هو الكبير ووضعه كويس قعد يرعى في صغار خوه وهي طبعا استغلت الوضع يوم تتصل بيه تعالى واحد من الصغار مريض..تعالى ارفعهم للمدرسه..الصغار يبوا دبش..ويوم عن يوم بدت تلاحظ في حركات وتصرفات عليهم الزوز مش طبيعيه بس كانت تكذب في عيونها وتقول لروحها كله وسواس..
لعند ماجاها في يوم وقال نبي مرت خوي ع خاطر الصغار بس..وهي رضت قالت ماكانش قدامي غير
نرضى لأني حسيت ان ممكن يستغنى عني عادي بش ياخدها..
وخداها..وبعد الزواج بدي يهمل فيها ويهمل في صغار وهمه كله مرته التانيه وصغاره خوه..
ولما اعترضت وشكت..طلقها طول..طلقها ولوحها بصغارها اللي هما صغاره وقعد يربي في صغار خوه..
تصدقي ان مدخلهم مدارس دوليه وقاعد يصرف عليهم في صرف ماصار وصغاره اللي من لحمه ودمه يراجو في الصدقات..
طوبى هي تسمع فيها حست بضيق..ضيق شديد...
ووجع ع حال المراة وصغارها...
وخوف...خوف كبير...
الموظفه كملت تقول بمرارة:تصدقي يااختي المراة لما يتموا فلوسها ماتوكل في صغارها كان في مكرونه بيضا..والله من كثر ماوجعوني اني خديتلهم بضاعه كان حوشي اولى بيها
قلت في بالي صغاري عندهم من يعوضهم لكن هالصغيويره مساكين ماعندهم حد كان هالمسكينه اللي قاعده تتمرمد بش تجيبلهم مايسد جوعهم..
مسحت طوبى دموعها وقالت؛باهي علاش مافي حد رضي يساعدهم معقوله عرفوا بوضعهم هدا وماصخفوش عليهم!؟
:اللي يعرف القصه يااختي ينقهر من بوهم ويقول مفروض هو يتحمل مسؤوليه صغاره ويصرف عليهم..
طوبى:شن هالمنطق بوهم كان هامينه صغاره يلوحهم من الاساس ويخليهم يوصلوا لهالوضع!.
مراة رفعت كتافها ونزلتهم بعدم معرفه لتفسير ردود افعال هالناس..
طوبى هزت راسها وقالت؛باهي عطيني رقمها وعنوانها..
الموظفه قامت تليفونها وقالت؛هي لحظه شويه..حطت ع رقم المراة وقالت..هي سجلي عندك..
🍃وسجلت طوبى رقم المراة..وخدت عنوانها ومشت طلعت من الجمعيه...
خدت بجزء من الفلوس اللي رفض ياخدهم عبد القيوم قضيه حوش من كل شي..
خضرة سبيزة..ودجاجه...وحاجات حلوة للصغار ومواد تنظيف..
وتوجهت بيهم للإستديو اللي ساكنه فيه المراة..
🍃وين وصلت غادي...
استقبلتها المراة وهي متفاجئه...
اما طوبى فركزت ع اثر البكي اللي قاعده ع وجهها..
واثر الحاجه..والشقى..
وشافت للمكان اللي عايشه فيه هي وخمسه صغار بروحها...
قلبها تقطع عليهم..ونقمت نقمة شديد ع الأب واللي خداته منهم...
مابتش طوبى تسأل المراة عن أي شي يخص قصتها..
سألتها بس عن قراية الصغار وكيف يمشوا لمدرستهم...
وسألتها عنها هي...
طوبى:باهي انتي تقدري تخدمي؟
المراة:ايه عادي مستعده نخدم بس خدمة ماتكسرش صغاري..
فهمت عليها وقالت؛باهي في انتي في حاجه تعرفي ديريها يعني فالحه فيها..
المراة ابتسمت وسط ملامح الهم اللي كانت محفورة ع وجهها وقالت:نحب نمكيج زمان نساوين عيلة طليقي خواته قريباته وهكي..كانوا يحبوا مكياجي وين تجي مناسبه يقعدوا عليا بالطابور..
ابتسمت طوبى لما لاحظتها كيف تحكي بثقه وحب وقالت:امم..حلو..باهي..مدتلها ظرف وقالت..تفضلي هادم للصغار..
مدت المراة يدها وخدتهم وكانت باينه فيها الكسره..
طوبى:ربي يحفظك ويطول في عمرك ويعوضك خير بصغارك ويفرحك بيهم يارب..
المراة بإبتسامه امتنان ودموعها في عيونها؛بارك الله فيك..
طوبى بإبتسامه؛فيك بارك الله...
🍃وطلعت من عند المراة..
والمراة بعد ماطلعت مشت تشوف شن جابت طوبى وهي تبكي من الفرحه..
بس اكثر شي فرحها علبه "تشيز كيك" اللي كانت مع الحاجات تخيلت فرحة صغارها بيها وين يشوفوها..
وقعدت تدعي لطوبى من وسط قلبها...
🍃وطوبى وهي تسوق في الطريق مروحه..
كانت تفكر في وضع المراة وصغارها..
تفكر في هلبه نساوين في وضعها وممكن اسوأ قداش يعانوا وقداش متحملات..وقداش شافوا ظلم وقهر وقداش انكسروا وانهانوا في سبيل صغارهم..
كانت طول الطريق تقول لنفسها..
"هادم الامهات اللي يستحقوا يندار ع خاطرهم عيد..هادم الامهات حق اللي مفروض تجيهم هدايا الدنيا كلها..هادم الامهات اللي يستحقوا يحتفلوا بيهم..هادم بس"
وجوا بين عيونها..
فردوس اختها واللي عاناته بعد غياب راجلها وكيف تعبت وشقت بش تعيشهم عيشه كريمه..
فايزة اللي ياما شافت ومر عليها بعد موت راجلها صمدت وصبرت وقاومت وربت بناتها وحافظت عليهم ومااحتاجتش لوجود الراجل في حياتها..
عائشه اللي برغم انها عاشت حياة كريمه مع المهدي لكنها تعذبت معاه وهي عارفه ان قلبها مع غيره..
ومع هدا ربت صغارها احسن تربيه وكانت لراجلها نعم الزوجه لعند أخر يوم في حياتها...
وأخيرا..
الانسانه اللي ضحت بسنين شبابها وحب حياتها بش تربي اختها الصغيره احسن تربيه وعطتها عمر بحاله بش تعوضها عن وجود الأم وتكونلها اكثر من الأم في حياتها..
اختها الكبيره...سدرة المنتهى...
وقفت السيارة ع تركينه..
وقعدت تبكي بألم ووجع وشوق...
تبكي وهي تتفكر في كل ايامها معاها وقلبها متحسر عليها وع سنين عمرها اللي راحت وهي شاقيه وتاعبه وقلبها مجروح ونهايتها راقده ع سرير وعايشه بين الدنيا والبرزخ...
ومش معروف وين حيستقر بيها الحال...
🍃سدرة..
اللي قاعدين في جنبها خالها وخوها يوسف يشوفولها بحزن..
المحجوب:علاش ماخبرتنيش ع الاقل..
يوسف:شن بنقولك ان حالتها زادت تعقدت...
المحجوب: بس توا وين سألت عنها الدكاتره قالوا ان وضعها مستقر
يوسف:ايه العمليات الحيويه في جسمها قاعده تمشي وكأنها فايقه..وقالولي ان نشاط دماغها كويس نوعا ما..قعدت كل يوم نهدرزلها ونحكيلها حتى اللي
