طوبى "جنة طوبى"
#جمان_فريد
#الجزء_الثامن_والستين"رقعة شطرنج 2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن أنس بن مالك رضي الله عنه قال: قال رسول الله ﷺ: قَالَ اللهُ تَعَالَى: {يَا ابْنَ آَدَمَ إِنَّكَ مَا دَعَوتَنِيْ وَرَجَوتَنِيْ غَفَرْتُ لَكَ عَلَى مَا كَانَ مِنْكَ وَلا أُبَالِيْ، يَا ابْنَ آَدَمَ لَو بَلَغَتْ ذُنُوبُكَ عَنَانَ السَّمَاءِ ثُمَّ استَغْفَرْتَنِيْ غَفَرْتُ لَكَ، يَا ابْنَ آَدَمَ إِنَّكَ لَو أَتَيْتَنِيْ بِقِرَابِ الأَرْضِ خَطَايَا ثُمَّ لقِيْتَنِيْ لاَتُشْرِك بِيْ شَيْئَاً لأَتَيْتُكَ بِقِرَابِهَا مَغفِرَةً}.
رَوَاهُ التِّرْمِذِيُّ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃وإذا الفتى جمع المروءة والتقى
وحوى مع الأدب الحياء فقد كمل🍃
________________________________________
نظراتهم المتسمرة كانت محاصرته..
وهو كان متوقع ردة فعلهم..
بس تركيزه بالنظر كان ع شخص واحد..
لطفي الواعر..
اللي عاود اخر كلامه متسائلا للتأكيد:
تبي تشارك في المطحن!؟
عبد القيوم هز راسه وقال..
ايه..
لطفي عقد حواجبه وسأل:
وانت شن تفهم في الصنعه هادي؟
عبد القيوم؛
حاجات بسيطه..سألت واستفسرت وعرفت بعض الشي اللي شجعني ندير هالخطوه...وحاجه اخرى انا نحب القهوة الصح اللي تكون ع اصولها..بنتها توصل لوين وين والقهوة اللي تطلع من مطحنكم كانت احسن قهوة شربتها في حياتي وربي العالم..
🍃جاوبه هالاجابه الطويله بش يوضح هلبه استفهامات كانت باينه ع وجه لطفي ومن عيونه..
ومع هذا لطفي ماأقتنعش ورجع سأله وهو يقول..
علاش ماخطرش ع بالك كان توا بس؟
عبد القيوم اختار يكون صادق في اجابته..
بصراحه ماهانش عليا مطحن كيف مطحنكم يتسكر..
لطفي:معناها انت جاي تبي تساعد مش تشارك..
عبد القيوم..
جاي نساعد ونشارك..
مش عيب لو رديتلك معروفك..اللي درته معاي انت مش شويه..سعيتلي في الخدمه هنا خليتني نسكن في الشارع اللي انت فيه بش مانحسش روحي بروحي لإني موجود في مكان نعرف فيه حد..اصريت عليا نعزم هلي يجوني استقبلتهم في حوشك ودرت معاهم فوق الواجب..
الحكايه عندي تعدت المعروف بوين..انا نشوف فيكم هلي توا..وانت عندي بمكانة باتي اللي عمري ماشفته..
بدت ع وجه علي الواعر ابتسامه جانبيه وهو يهز في راسه ويشوف للتارقي..
وحسين كان يشوفله بنظره كلها احترام..
اما لطفي..
حس بوجع..وجعه هلبه كلام التارقي..
انوجع هلبه لما قارنه بولده اللي من صلبه..
اللي يوم سكر المطحن كان اول الشامتين واخرهم...
كمل عبد القيوم كلامه وهو يقول..
وفوق هالشي..انا نبي ندير مشروع نطلع منه دخل راتب الدوله مايدير شي..ومانبيش نعتمد ع فلوس انا مش دايرهن..وصدقني لو كان مشروع المطحن مش ناجح مانخشش فيه..
🍃الجمله الأخيره الوحيده اللي ماكانتش صادقه قالها بش يخفف شويه من الاحراج اللي كان باين ع وجه لطفي..
حمحم لطفي وقال؛مش عارف شن نقولك..بس يعني توا حني بنفتحوا محل مواد غذائيه وخشينا بالفلوس اللي عندنا في شراكه عليه..
عبد القيوم؛ربي يفتحها عليكم..بس وين المشكله؟..
حاج لطفي انا بنخش شريك بالفلوس وانتم بالخبره تشاركوني بالمكان والخبرة...
شبح لطفي لبوه وهو محتار..
وعلي بعد ماكان يشبحله غير نظره لعبد القيوم وهو يقول..
حصتك في المطحن كم تبيها؟
ابتسم وقال؛10في الميه..
هما اتفاجئوا..
لطفي؛10 في الميه!!؟
عبد القيوم؛هو انا فكرت في 5في الاول بس خفت ترفض الشراكه من اصلها..
لطفي:حتى 10مش راضي عنها انت بتخش شريك براس مال كبير معقوله هدا ماتاخد؟
عبد القيوم؛تمام 15 مش حنزيد عليهن..
كيف جي بيتكلم لطفي قاطعه وهو يقول..
سألتك بالله قول تم..راني مش طالع من هنا الا ونحنا متفقين ع كل شي..
ابتسم حسين وشبح لعمه..
عبد القيوم مرر نظره عليهم وقال؛حاج علي..حسين احضرونا..
علي؛بالنسبه ليا اني ياولدي ماعنديش مانع..
حسين:ولااني..
عبد القيوم شبح للطفي وقال..
شني ياحاج لطفي؟
تنهد لطفي وقال؛نبي ناخد شور بناويتي..
🍃رعشه صابت قلب عبد القيوم لما سمعه شن قال..
رد عليه وهو يقول..باهي..خود شورهن وحاول تقنعهن بس في عندي شرط..
كلهم ركزوا معاه..
عبد القيوم؛مانبي حد يعرف..
حسين:شني؟
عبد القيوم؛اني نا اللي مشارككم..حتى هلكم لازم مايكونش عنده علم..
لطفي:السبب..؟
عبد القيوم:مانبي حد يقول التارقي دار جميل في عيت الواعر..عارفين الناس ونظرتهم..تفكيرهم عمره مايتغير لو قلنا مش كلهم اغلبهم..مرات تقولوا ع كلامي غبي وكلام واحد ضعيف شخصيه ومهزوز..بس هذى الواقع مايقدر حد ينكره..ارجوكم خلوا الموضوع سر ويقعد بينا نحنا الأربعه..
استغرب الحاج علي كلامه لأنه مايشبهلاش عبد القيوم معتز بنفسه وشخصيته قويه وديما يتكلم بتباهي عن أصله..
وحسين كان حاس بنفس الاستغراب..
لكن لطفي..حس بشي تاني...حس لعبد القيوم سبب تاني غير هالسبب يخليه يطلب اخفاء الموضوع..
اكيد يبي يعرف السبب بس مش في الوقت الحالي..
جاوبه وهو يقول؛شرطك مقبول..
علي:واني قبلته..
حسين؛اكيد حتى اني معاهم وان شاء الله خير..
ابتسم عبد القيوم وهز راسه وهو يقول..
إن شاء الله...
🍃🍃🍃🍃🍃
"ياوخيتي سلمه زي العسل"
نجاح وهي تشوف لأختها كيف ضامه ولد راجلها وهي تبوس فيه قالت بإبتسامه:زي العسل وبس ماريتش وليد مؤدب زيه..
اويس"ولد عبد الحفيظ" وهو يسمع في كلامهم الحلو عنه كان في قمة الخجل..
نجمه بضحك؛تحشم ياروحي..
عواطف:شويه ونجيك..
وناضت من حداهم ومشت طلعت من الصالون..
نجاح شبحت لأمها وقالت؛خديجه عند ماليها؟
نجمه؛من صبح ربي..سمعتي بنسرين اختها؟
نجاح بضيق؛ايه قالتلي عواطف..
نجمه؛خيره وجهك انقلب؟
نجاح تنهدت وقالت؛واجعني عواطف يام ان شاء الله ربي يعجل بنصيبها ويجبى خاطرها..
نجمه بشي من الحزن:ان شاء الله يجيها راجل يخاف ربي كانهدا تقعد في حوش بوها معززة مكرمه..
نجاح؛عندك حق...باهي راما حتى هي ماشيه مع امها؟
نجمه؛ايه ياحنه ماهو اشرف في الصحرا..
نجاح سكتت وهي تفكر..
ع جية عواطف قعمزت جنب اويس وعطاته كيسه وهي تقول...
لما قلتي بتجي خديتهوله..
نجاح بإبتسامه:قول شكرا لخويله عواطف..
هو شبح لعواطف وقال؛شكرا خويله عواطف..
عواطف بضحكه؛ياوخيتي سلمه..طبعت ع خده قبله بعدين ضماته..
وامها تشوفلها بإبتسامه فيها مسحة حزن..
🍃🍃🍃🍃🍃
بعد العصر...
لم لطفي بناته حواليه في المربوعه الخارجيه..
ماكانش في غيرهم هما وياه..
طوبى كانت كلها حماس وترقب كانت متأكده ان بوهم بيفتح معاهم موضوع المطحن...
وبدي لطفي يتكلم..
لطفي؛تو انتم يومها جيتوني وقعدتوا تعاتبوا فيا كيف سكرت المطحن من غير ماناخد رايكم صح؟
هما الثلاته هزوا روسهم بإيجاب وغرفه قالت..
صح..
لطفي؛باهي..اني توا نبي ناخد رايكم في حاجه بخصوص المطحن..
الثلاته كانوا يسمعوله بإنتباه وترقب..
وهو مكمل يقول؛في راجل عرض عليا يشاركني في المطحن ومصر هلبه ع الشراكه وبيخش معانا بفلوسه وحني بالخبره والمكان..
غرفه؛كويس..
فردوس:يعني هو اللي بيمول المطحن زي مايقولوا؟..
هز لطفي راسه بإيجاب..
فردوس وهي تفكر؛باهي انت شن رايك بوي؟
لطفي؛اني ماعنديش مشكله اكثر شي ع خاطركم انتم اللي ماتبوش المطحن يتسكر..
فردوس؛حتى اني ماعنديش مشكله..
شبح لطفي لطوبى وقال؛وزعيمة المعارضه خيرها ساكته..
خواتها شبحولها وهما شادين ضحكتهم..
طوبى بضيق؛مش قصدي نعارض بوي..بس حكاية الشراكه هادي شويه..ودارت حركه "نص نص" بيدها..
لطفي؛وعلاش..وقلد حركة يدها..
طوبى تنهدت وقالت؛شريك معناها بيشاركنا في حاجه تعودنا نكونوا فيها اسياد نفسنا..
لطفي بضحكه؛كان نعرف منين تجيبي فيه هالكلام..
فردوس:زعيمه معارضه حتى هي..
ضحكت غرفه..
شبحتلهم بنرفزة وقالت؛كان بتقعدوا تتسهوكوا نوض نطلع.. ونزلت عيونها وهي لافه وجهها لبوها وقالت..معليشي بابا..
فردوس بضحكه؛غير وسعي بالك نبصروا عليك..
لطفي هدا ضحك وقال بإبتسامه؛باهي قولي علاش مش عاجبك موضوع الشراكه..
طوبى؛مش قصة مش عاجبني..خوفني خايفه بعد وقت يقعد يتحكم فينا ويعاملنا وكأن نخدموا عنده..
لطفي؛من هالناحيه تريحي ع الآخر الراجل قال ماليا علاقه بشي غير المربح اخر كل شهر اني نرفعله حصته وبس..
طوبى؛يعني عارفه كويس وضامنه؟
لطفي:زي مانعرف نفسي..
طوبى مازالش خوفها وكانت شبه مش مقتنعه بس في شي داخلها يقوللها اقبلي...
هزت راسها وقالت؛مادام ضامنه خلاص..
لطفي؛راضيه؟
طوبى:ايه راضيه وإن شاء الله خير..
لطفي هز راسه وهو يقول:إن شاء الله..
مرر نظره عليهم وكمل يقول..
مازال نشوفوا راي باقي صغار عمكم واللي فيها الخيره يجيبها ربي..
بناته قالوا بأصوات متقطعه..
يارب..ان شاء الله...
🍃🍃🍃🍃🍃
"ماما ماشيه لحوش جدي نشوف عمتي نجاح"
خديجه من الصاله..
"بري"
ومشت راما بسرعه للمدخل..
وقفت قدامه وطلعت من جيب سروالها المسكره..
فتحتها..وزينت بيها رموشها..بعدين سكرتها وردتها لجيبها..
وخرت وشاحها شويه ومابتش ديره الخلال"دبوس"..
خلاته مفتوح ومشت بتطلع وهي متأمله تشوف محمد في الجنان...
وطلعت ومالقت حد في الجنان..
حست بخيبه..
بس فجأه انفتح باب الحوش وخش محمد..
لما شافاته طارت من الفرحه وارتبكت في نفس الوقت..
هو ماركزش عليها جي بيمشي طول لدروج شقتهم..
لكن هي وقفاته لما قالت..
محمد..
وقف وشبحلها...
هي قدمتله وقالت؛شن الجو..
هو ركز ع اللي مدايراته في روحها وبان عليه عدم الرضا وقال..
تمام..شن جوك وجو القرايه..
راما بإبتسامه؛تمام..ماعندكش خدمه اليوم؟
محمد؛خدمت الصبح..المهم انتي خيرك تبي حاجه؟
راما؛لانسأل عليك بس..
محمد هز راسه وبعدين قال؛راما بنسألك ع حاجه..
هي بلهفه؛على شني؟
محمد بشي من الضيق؛في المرواح اكثر من مرة لاحظت سيارة سودا تلحق في بنات خالتي فايزة ماتعرفيش شن قصتها؟
راما عصبها هلبه سؤاله بس خلاها تظاهر بالضيق وهي تجاوب..
هدا متاع السيارة السودا يلحق في مروة..
هو بشي من الغضب؛الح.يوان شن يبي؟
راما زاد غاضها بغيرته الواضحه ع مروة وقالت..
شن بنقولك توا يامحمد صح اني ومروة معاش صاحبات بس مانقدرش نتكلم ع حاجه تخصها..
هو رد يقول؛متعاركين قصدك؟
راما؛ايه ومعاش نبي نكلمها ماما هي اللي قالت معاش تكلميها..
محمد بإستغراب شديد؛علاش!؟
راما تأففت بضيق مصطنع بعدين قالت..
ماهو يامحمد..مروة تكلم في الولد اللي عنده سيارة سودا وعمتي نجاح مش عارفه من قاللها من المدرسه قالت لماما معاش تخلي بنتك تكلمها..
محمد بصدمه؛مروة تكلم في اولاد؟
راما سكتت وهي دير في روحها مضايقه..
محمد بشي من الانفعال؛تكلمي؟
راما؛قتلك يامحمد مروة تكلم فيه وعندها رقمه..
محمد كان مصدوم لأبعد حد وفي صدره والعه نار...
راما بخوف مصطنع؛اني والله معاد نكلم فيها خلاص..
شبحلها بنظرة غضب ولمعة الدموع باينه في عيونه بعدين قاللها..
اللبز اللي دايرتيه في عيونك معاش ديريه وشعرك غطيه كويس..
ومشي من حداها طول لدروج شقتهم
اما هي انزعجت وضايقت لأنه هزبها..
مشت طلعت من الحوش وهي تفكر في كلامه الاخير ليها وقعدت تقول في نفسها..
"اشبح شن يقول عليا توا"
ومافكرتش نهائي في الافتراء اللي رمت بيه بنت جيرانها اللي كانت اقرب الناس ليها يوم من الأيام..
وصلت في حوش جدها وخشت..
ركبت طول لشقتهم مسحت عيونها وغسلت وجهها بعدين نزلتلهم...
🍃تلاقت هي وعمتها نجاح وتعرفت ع اويس وهدرزت لين قرب موعد مرواح عمتها..
نجاح قبل لتروح خدتها معاها للجنان وقعدت تكلم فيها..
🍃نجاح بحده؛ابلاتك قالولي عليك كلام يزعل..
هي بخوف؛شن قالوا؟
نجاح؛كلهم قالوا ان مستواك نازل وقالوا وليتي متغيره هلبه من لما خالطتي اسماء وصاحباتها..
راما معاش عرفت شن تقول لعمتها قعدت تشوفلها بخوف وهي ساكته..
نجاح بتحذير:ابعدي عن هالبنت وشلتها معاش نبيك تخالطيهم بكل والهي في قرايتك ياراما..راما اني درتك كبيره وواعيه وكلمتك طول لكن لو ماسمعتيش الكلام طول لبوك ياراما وقعد اعذر من أنذر..
هزت راما راسها وهي خايفه ومحرجه..
نجاح؛خلاص بري خشي..
لفت راما وطول خشت للحوش...
🍃ع جية محمد خوها اللي كان نازل من الشقه وقتها وسمع جزء بسيط من كلامها هي ونجاح..
مشي لعمته وسلم عليها وعقله مع اخته...
🍃🍃🍃🍃🍃
ومن احفاد الصيد لحفيدات لطفي الواعر...
كانوا الزوز في دار البنات..
الاء واقفه ع دولاب خالتها طوبى وطلع في ملابس طوبى متاع الطلعه اللي قاعده فيه..
الاء:وااو وااو جديات بيبو ملكة النزاكه والذوق..
اريج بتهكم؛من بعدك طبعا..
الاء بغرور :طبعا..وجت للحوايج اللي طلعتهم وقالت..
قوليلي شن نلبس غدوة..
اريج؛عندك محاضرات؟
الاء:تي لا يازهايمر..غدوة بنمشي للفندق اللي فيه المطعم بش نتفاهم اني وصاحبه..
اريج؛نسيت بكل..قعدت تشبح للبس بعدين قالت..
للوش..
آلاء وهي تشوفلها؛امم..
غيرت نظرها ليها وقالت؛المطعم هدا في نفس الفندق اللي فيه القناه ولا؟
تنهدت الاء وقعمزت ع السرير وهي تقول:ايه..
ابتسمت وقالت..مش عارفه بس حاسه الموضوع مش صدفه..
اريج بإبتسامه؛هذا علاش انتي فرحتي بزياده..
الاء:قولي هدا علاش فرحت اصلا..
اريج ؛زعمه هو؟!
الاء؛باهي انتي فكري فيها يعني معقوله الشغل متاعي من البدايه ينباع كله وفي فترة قصيرة ويجوني طلبيات وينباعوا لحفلة في الفندق!؟ باهي شن رايك ان الحفله هادي طلعت بعدين حفلة القناه متاعهم..
اريج وهي متفاجئه:كيف عرفتي؟
الاء وهي مبتسمه؛شفت الصور في صفحة القناه وشفت حتى التشيز كيك متاعي..
اريج:لامعناها هادي اكيد مش صدفه..
الاء بضحكه؛ريتي ولا..
اريج بإبتسامه؛محلاه مهند بجد راجل بمعنى الكلمه وشكلها قاعد يموت فيك..
الاء تنهدت بحب وقلبها يدق بقوة بعدين قالت:تتوقعي نولوا؟
اريج خفت ابتسامتها وهي تقول..
مش عارفه الحق..
خالط الضيق ملامح الابتسامه ع وجهها وهي تقول؛اني وليت متأمله..
اريج:زعمه يفتح معاك صفحه جديده بعد اللي صار!؟
الاء طلعت منها تنهيده فيها وجع بعدين قالت..
يارب..
🍃🍃🍃🍃
وفي هالوقت مهند..
كان مقعمز في واحد من المقاهي بروحه..
في يده تليفونه..خاش ع الماسنجر..
تحديدا ع "شات" اكابر..
كان يفكر ويفكر ليه وقت..
وبعدين حسم امره..وبدي يكتب..
(سلام اكابر)
طول ردت..
(ياهلا واخيرا تواضعت وكلمتنا)
تعكرش وجهه بإزدراء ورد عليها..
(كيف الحال)
(الحمد لله)
(شن جو القرايه)
(ماشيه)
وقف شويه وهو يفكر بعدين كتب وبعت..
(علاقتك بآلاء تحسنت شكلها)
(علاش قلت هكي؟)
(هكي استنتجت لما شفت الحلو متاعها في الحفله امس)
بعتتله رمز تعبيري ضاحك وبعده بعتت..
(ولا ليا بيهم علاقه ولابيها هي)
هو شد ع تليفونه بقوة بعد بدي يكتب وبعت..
(تمام)
جي بيطلع من المحادثه بس لقاها قاعده تكتب..
وهو يستنى ع نار...
وجاته الرساله..
(ياسيدي الاء تعرفت ع واحد ريتش مان فوق الريح سألت عنه وعرفت من يكون اسمه عزيز ***** الراجل عاي برا ويجي لليبيا بين فترة وفترة بس كيف جاباته الله اعلم )
(تعرف اللي يعجبني فيها البنت هادي انها ماضيعش وقت بكل)
يقرا في كلامه وحاس ان كل جزء فيه قاعده ينحرق..
بالذات قلبه...
معاش يبي يعرف اكثر هكي مش حتيحمل..
طلعت من المحادثه ودار كتم لأكابر..
بعدين ناض..طلع تزدانه وايديه يرجفوا من الغيره الغضب..
دفع الحساب بعد ماحط الفلوس ع الطاوله ومشي طول طلع من المقهى...
🍃🍃🍃🍃🍃
وتعدي الساعات..
ويجي موعد وصول المحجوب ونبيله..
استقبلوهم جماعة المرافقه..
وركبوا سيارة المحجوب..
طلع بيهم السواق ووراهم زوز سيارات..
وتوجهوا بيهم لشارع القهوة..
طول الطريق ونبيله ملهوفه من شوقها لخوها وكل الناس اللي تحبهم ولشارع القهوة حتى هو..
وين قربوا يخشوا لشارع القهوة..
المرافقه درسوا السيارات برا من الشارع..وخشت بس سيارة المحجوب...
اللي شافوها محمد شنيبه وولده المهدي وهما واقفين قدام المطحن..
نزل المحجوب بعدين نزلت نبيله..طلب المحجوب من السواق يمشي..ومشي..
وهما قعدوا واقفين في الباب..ودق عليه المحجوب..
كان محمد يشوفلهم وهو مستاء ومضايق..
والمهدي يشوفله حمحم بعدين قال؛خلاص بوي انت
خش توا واني لاحقك..
محمد شبحله وهز راسه بعدين مشي بيخش للحوش..
ضحك المهدي ضحكه خفيفه وحرك راسه يمين ويسار..
🍃ونبيله مع المحجوب خشوا للحوش بعد مافتحتلهم أريج الباب...
استقبلوهم احلى استقبال..
بس غرفه كانت متوتره وخايفه..
بعد السلام الحار...
المحجوب مشي للرجاله في المربوعه..
والنساوين قعمزوا مع يعض في الصاله..
واول ماتقعمز نبيله تسأل سؤال يخلي الصمت يعم الأجواء.
نبيله؛معقوله مبروك مانلقاشي قدامي وينه ؟
لاحظت صمتهم وارتباكهم وتغير حالتهم..
قلبها انقبض..
ثبتت نظرها ع غرفه وقالت..
غرفه راجلك وين؟
غرفه انهار عزمها..وطول قعدت تبكي..
كلهم شبحولها بحزن وضيق..
ونبيله بفجعه والدموع عبوا عيونها..
وينه خوي؟ جاوبيني ياغرفه!..
غرفه ماقدرتش تتكلم..
واللي تكلمت عنها عمتها مطيره وهي تقول..
نبيله صلي ع النبي قبل كل شي خوك حاله باهي لكن توا محبوس..
حطت يدها ع فمها بعد ماشهقت بصدمه..
🍃الصدمه نفسها اللي جت للمحجوب لما خبره لطفي..
المحجوب بصدمه؛كيف ماتعطوناش علم معقوله تخلونا هكي!؟ يالطفي مرتين كلمتك كيف ماتخبرنيش !؟
حسين؛عبد الرؤوف هكي يبي هو اللي وصاني قال ردوا بالكم تخبروهم خلوهم سيورهم مروحين
~~~~~~~~
نبيله بصدمه ودموعها ينزلوا..
كيف هكي كيف!؟ اني ندهور ونهيج وخوي محبوس والله اعلم شن صاير..كيف تسمعوا كلامه كيف ماتخبرونيش..كيف ياغرفه نسأل فيك عليه وتكذبي عليا!!؟
غرفه ببكي؛والله هو هكي يبي اسألي حسين ولد عمي اسألي اسكندر صاحبه تعرفيه خوك مايبيش يفسد عليك فرحتك..
نبيله ودموعها سيل يجري ع خدودها:
فرح شني هدا!!؟ مانبيشي الفرح وخوي هكي صاير فيه..
غلطتوا هلبه غلطتوا لما سمعتوا كلامه...
غرفه انهارت بالبكي وكأن اللي صار سبب بش يخليها طلع اللي في قلبها..
بس حالتها خلت اللي حواليها يرتعبوا عليها..
طوبى بخوف وهي شادتها؛خلاص غرفه اهدي..خلاص مش باهي ليك ياغرفه..
فردوس بخوف؛ياحليلي المرة اللي فاتت قريب اجهضت..
نبيله نست فجعتها بالخبر وناضت لغرفه..
قعمزت قدامها وشدت يدها بإيديها الزوز وهي تقول..
خلاص غرفه خلاص..تو يطلع بإذن الله يطلع ويحضر ولادتك ويديرلك اسبوع كبير مش هو قالها بنديره مهرجان مش اسبوع..عمره ماقال كلمه وولى فيها ياغرفه..
واللي حواليهم يسمعوا وقلوبهم تتقطع..
طوبى وهي تحاول تهدي اختها رغم انها كانت ترعش:هاه سمعتي شن قالت خلي عبد الرؤوف وين يطلع يفرح بصغاره غرفه بالله عليك وخيتي شدي حيلك ع خاطرهم..
هداها كلامهم..سكتت شويه شويه..
لكن خشت في حضن طوبى وهي تقوللها:نبي نمشي للدار..
طوبى:حاضر حاضر..بالله ساعدوها يابنات..
ونهضوها واريج بمساعدة امهم..
وكلهم مشوا معاها للدار...
غرفه قعدت شادة في طوبى بشكل غريب تبيها تقعد جنبها..
وطوبى برغم استغرابها قعدت جنب اختها مابتش تخليها..
شويه وطلعوا وخلوهم...
وقعدت طوبى تقرا ع غرفه لين رقدت...
وحتى بعد رقدت غرفه طوبى ماقدرتش تنوض من حداها..
🍃اما نبيله..
معاش تبي تقعد بعتت للمحجوب بش يروحوا..
والمحجوب لبى طلبها ع طول..
🍃🍃🍃
في الطريق..
المحجوب؛اقسم بالله العظيم ماكان عندي علم..معقوله نعرف حاجه زي هدا وندس عليك!؟ ثقي وتأكدي يانبيله لو خبروني طول خديتك وروحت بيك...
نبيله ودموعها ينزلوا..
ياربي دماغي بينشل..من هو هدا اللي عنده معاه عداوة وخطفه ولامش عارفه شنو!؟ تي علاش مادارهاش قبل علاش توا!؟ خوي ليه فوق السنه مسيب هالضجيج هدا كله..
خبطت بإيديها ع رجليها وقالت..علاش خشيت فيه من اصله علاش يامبروك..!
🍃وفاتت عليهم ليله صعبه..
السعاده اللي عاشوها في الاسبوعين اللي فاتوا كانوا بمثابة لحظه قدام هالليله..
نبيله تفكرت كل المآسي اللي صارت معاهم في حياتهم..
تفكرت موت خوتها وعائلاتهم..
تفكرت موت امها..
خافت هلبه نبيله مايقعدش غيرها هي ورقه في شجرة عيلتها اللي تساقطت اوراقها كلها..
والمحجوب كان يسمع فيها كيف تتكلم وهي تبكي وهو متألم لأبعد حد وحاول يحتويها ع قد مايقدر..
🍃المحجوب:صدقيني مش حنخليه قاعد غادي اكثر ماقعد..
نبيله بنبره باكيه:نبي نشوفه بالله عليك يامحجوب .
المحجوب:حاضر حبيبتي حاضر...
🍃🍃🍃🍃🍃
"الموضوع عندك توا عابي عليك......كان شفت منك مايرضيني حنرضيك هلبه...."
وهي مختار المكالمه وحط تليفونها ع الكامدينو اللي جنبه..
بعدين حط راسه ع المخده ووجهه نظره للسقف اللي كان يشبه السمي في الليل...اسود..ومعبي حاجات تبرق وكأنها نجوم..
قعد يتأمل فيهم..
وشويه وبدي يغني...
ياشعر ليل ياليل ياليل وفارد ضفايرك عالقمر
ياقمر ياقمر...
يابو ضحكه حلوه منوره في ليل السهر ياليل ياليل...
وسكت فجأه لما قعد يسمع في هالمقطع بصوت حلو وعذب بالمرة...
《انتي شني قوليلي..كل شي فيك حلو كل شي..قلبي مش حمل هدا كله صدقيني هلبه عليه..
ضحكت بخجل بعدين ردت عليه تقول..
لو كنت مش قد الحب بتحب ليه..
رد عليها يقول..
لو كان بيدي والله ماحبيتك ع اللي درتيه فيا..
هي قالت..
انا ماعملتش حاجه..انت اللي عملت فينا كل حاجه...》
نزلت من عينه دمعه ومازال نظره معلق في السقف...
وبعد هالذكرى الحلوة المؤلمه..
تجي ذكرى مفجعه واكثر الم بالنسبه ليه ماكانش عمرها طويل..
《المراة اللي تبي عنها معلومات عنها وصلت في حد يعرف معلومه عنها بعد عرفتها عنها معاش دورت غيرها
هو بلهفه وخوف..
شن هي؟
رد عليه يقول..
ليها سنين ميته جاها مرض وتوفت》
لف ع جنب وغمض عيونها بألم...
شد بيده طرف المخده وقعد يبكي..
كان يبكي بألم وجرح قلبه اللي عمره ماألتأم قاعد ينزف...
🍃🍃🍃🍃
تاني يوم...
الساعه 9:00صباحا..
مقعمزين خديجه وراما يفطروا برواحهم..
ع جية محمد قال لأمه..
شن يام معاش كلمك خالي..
خديجه:قول صباح الخير قبل..
محمد بملل:صباح الخير..معاش كلمك خالي..
خديجه؛لا..
محمد بضيق قال:كيف مايبيش يخدمني معاه؟
خديجه حط فنجان الكابتشينو وقالت..
كلمه انت..
محمد؛شن نكلمه اني بيعدل عليا كان كلمته.
خديجه؛لايعدل عليك خالك يحبك وفرح هلبه لما قتله يبي يخدم..
محمد؛عارفه بيحطني في المطحن واني مانبيشي..
خديجه؛حاول معاه واعرف كيف تكلمه خوده باللسان زي ماتاخد فيا بيه..
تنهد بعدين لفت بيولي للدار..
خديجه؛ماتبيش تفطر..
جاها صوته وهو يقول..
"بنولي نرقد"..
شويه وولى وجي لراما وهو يقول؛ايه حقه انتي تعالي جاي..
خديجه شبحت لراما..
وراما وهي تشوف لخوها بخوف:خيرك؟
محمد؛خيرها عمتي نجاح كانت شداتك في الجنان امس وتتحلف فيك..
استغربت خديجه..
وراما وجهها شحب لونه وهى تقول؛لالاتتحلف فيا لاشي انت تحلم..
محمد؛سمعتها بوذني تقولك فوتيها البنت هادي ولانحرش بوك..
راما بتوتر:مافيش منها الدوة هادي انت تتخيل..
محمد بحده؛راما..
خديجه بحزم؛محمد برا ارقد..
محمد:مش ماشي لين نعرف..
خديجه بغضب:الله كان مامشيت نعفسلك في الخدمه مع خالك..
هو شبحلها بعصبيه بعدين خبط برجله الكرسي ومشي لداره..
وكان بهمس يقول في الفاظ بذيئة..
اما امه..
التفتت ع بنتها وقالت..
قولي الحق احسنلك خيرها معاك نجاح ومن هي البنت اللي تبيك تفوتيها..
راما وهي خايفه كانت تفكر شن بتجاوب امها..
خديجه؛ياتقولي بروحك يانتصل بعمتك ونعرف منها لكن وقتها حتى بوك نقوله..
راما بخوف:ع مروة مروة قالتلي معاش تخالطي مروة..
خديجه بإستغراب؛من مروة؟بنت فايزة؟
راما:ايه..
خديجه؛وعلاش شن دايره؟
راما:بدت بكل ياماما تتعرف ع الولاد وتهدرز بالتليفون وفي واحد يلحق فيها فالمرواح عنده سيارة سودا الدنيا كلها شافته كيف يلحق فيها..
خديجه بفضول؛وشن دايره تاني؟
راما؛هو هدا..ومش عارفه من حرش فيها عمتي وقالتلي معاش تكلميها..
خديجه؛طبعا..مافيش فوق دماغهم راجل يشدهم..امهم هايمه في هالمزين وهما ماشيات ع حل شعرهم..
راما قعدت تسمع في امها وهي ساكته..
خديجه؛المهم انتي اسمعي كلام عمتك وردي بالك مازال تشبحيلها حتى الشبح..
راما هزت راسها وقالت؛حاضر...
ورجعت خديجه تفطر وهي تفكر في اللي سمعاته..
وراما حتى هي ولت تفطر براحه...
🍃🍃🍃🍃🍃
"اتصلت بيها ماردتش"
طوبى:اكيد راقده..
غرفه بضيق:مرات ماتبيش ترد عليا.
طوبى:لالاماديرهاش نبيله..هي كملي طاسة الحليب قبل لتهزبك عمتك..
غرفه قعدت تشرب في الحليب وهي تفكر بقلق..
طوبى:نمشي شويه للحمام وجايه..
وناضت ومشت طلعت من الدار..
ع خشت فردوس شافت للسفرة وقالت..
كملي فطورك كله..
غرفه:باهي..
قعمزت جنبها فردوس وقالت بضحكه؛تبيني نوكلك..
يدوب ضحكت غرفه..
فردوس:تتفكري زمان كيف كنت نحط فيك ع رجلي ونوكل فيك..ايااح كنتي صغيره هلبه وقتها شن بيفكرك..
غرفه بإبتسامه؛صح مانتفكرش بكل..
ابتسمت فردوس بعدين قالت..
خيرك امس شديتي في طوبى هكي؟
تنهدت غرفه بحزن وقالت..
حسيتها سدره...
عيون فردوس تعبوا دموع..
غرفه :تشبهلها هلبه سبحان الله مطبعه بطباعها مرات نشوف فيها هي..تصدقي مرات نهابها زي ماكنت نهاب في سدرة رغم انها اختي الصغيره..
فردوس؛باهي شن تقول عليا اني العزوز..طوبى اصغر من اريج لكن مرات نحسها اكبر مني..زي سدرة اللي كنت نشوف فيها اختي الكبيره..
غرفه:بس طوبى كبرت قبل وقتها..
فردوس انوجع قلبها لما سمعت كلام غرفه..
غرفه:موليه تقول اكبر مني..نشوفلها مرات قلبي يوجعني عليها اني في عمرها كنت نهيج من سوق لسوق وكل يوم معزومه عند وحده من صاحباتي واكبر همي مسلسل تركي مانبيش حلقه منه تفوتني..
فردوس نزلوا دموعها قعدت تمسح فيهم..
غرفه وهي تشوفلها بحزن..
حاسه ان فيها شي..وحاسه انه شي كبير ماتبيش تقوله..
ناضت فردوس وهي تقول..خل نوض نرحي الطعميه معاش في وقت...ومشت طلعت من الدار..
وخلت غرفه تفكر في حال طوبى..
شويه وخشت طوبى وهي تقول:بدت مشيتي تثقل نحس في روحي وليت رزينه..
رسمت غرفه ع وجهها ابتسامه وهي تقول..
مالا شن نقول اللي في بطني زوز وفي السادس..
قعمزت طوبى وهي تقول بإبتسامه؛الله يبارك..الله يبارك..تعرفي نحس فيهم الزوز ولاد..
غرفه؛زعمه!؟
طوبى:هكي حاسه مش عارفه...
غرفه؛كان جو ولاد الزوز بيتعاركولي ع بنتك..
طوبى بضحكه:خلهم والله يتعاركوا حتى هي جنونه بنتي..
غرفه؛جيبولي يبرة خل نفشها..
طوبى بضحكه؛انتي اللي تبي الفشان شوفي روحك كيف موليه..
غرفه؛قالتها الرشيقه..تي انتي موليه زي الفوسي..
قعدت تضحك طوبى وهي تقول..والله حق..
ع خشة فايزة..
صحه صحه يافوسيات انتم الزوز نسمع فيكم من فم الباب..
ضحكوا الزوز..
قعمزت حداهم وهي تقول..
شن جوكم اليوم..
هزوا روسهم وكل وحده فيهم ردت بإبتسامه فيها حزن..
الحمد لله ع كل حال..ماشي..
فايزة؛شن صار امس نبيله شن صار فيها بعد ماعرفت..
غرفه بحزن؛قريب هبلت زادت وجع قلبي..
شدت فايزة يد غرفه وهي تقول؛غمه وتنزاح ان شاء الله..
الزوز قالوا..
يارب..
فايزة؛باهي شن صار في المطحن قاعد عمي لطفي مسكر راسه؟
غرفه:اسمعي اخر الأخبار
وبدت غرفه تحكي عن قصة الشراكه..
وطوبى قعدت ساكته لأنها لهالحظه مش متقبله الفكره..
🍃وصاحب الفكره اللي كان في مقر عمله كان يراجي بفارغ الصبر في رد لطفي الواعر عليه..
🍃عبد القيوم:بعتنالهم من يشوف وضع القابينه واضح جدا عملية تخريب..
:كثروا عمليات التخريب في المنطقه هديكا..
عبد القيوم:المسؤوليه يتحملها رئيس بلديتهم مفروض يجيب من يأمن القابينات..
:اييه ياتارقي..خليها ساكته..
عبد القيوم بضحكه؛حتى نا سكتت.
ضحك وقال:تقدر تولي لمكتبك..
هز راسه وهو يضحك بعدين مشي بإتجاه مكتبه..
تلاقى في الممر مع زميله في المكتب وهو يقول..
سبعيناتي باهي اللي لقيتك..تارقي خوك مكسور في 700دينار..
عبد القيوم؛تاخذهن بس نعرف قبل لشني؟
وهو محرج؛عارف العيل جي شارق وشدوه في العياده والفلوس نقصوا عليا...
عبد القيوم؛تعال معاي للسيارة..
ومشي وزميله معاه وهو يقول..
نردهم في اقرب فرصه..
عبد القيوم؛مش بيناتنا..
:والله متحشم منك ياغالي..
رد عليه يقول؛فوت الطروح ياراجل من امتى تحشم انت..
ضحك وقاله؛بندير روحي سبعيناتي حتى اني..
قعد يضحك التارقي وهو يحرك في راسه يمين ويسار وطلعوا هو وزميله برا المبنى...
🍃🍃🍃🍃🍃
مع الساعه 12:00 تماما..
طلع المحجوب من مبنى احد المؤوسسات التابعه للحكومه..
بعد مادور ورا القضيه اللي اعتقل بسببه نسيبه..
ركب السيارة وهو يفكر في المعلومات اللي عرفها..
"انت صديق عزيز ومانبيش ندرق عليك..موضوع نسيبك كبير هلبه ومدبر وفي ناس واصله هلبه خاشه فيه ننصحك لاتسعى ولاتعب روحك لأنك مش حتستفيد شي"
~~~~~~
نبيله:اكيد مش حتعبر كلامه..اصلا كان سمعتله اني بنتصرف بروحي وبندير لخوي اكبر محامي يشد قضيته ويطلعه منه..
المحجوب؛نبيله اهدي..اكيد مش حنخليه..بس نبيك قبلها تهدي وتفكري بالعقل بش نعرفوا من اللي بينه وبين خوك عداوة تخليه ينتقم منه هكي..
نبيله بعجز؛مانعرفش مانعرفش يامحجوب..مش كل شي بيحكيهولي هو..
المحجوب تأفف بضيق بعدين قال..
صاحبه اسكندر تعرفيه..
هي قالت:ايه خميس السايح..
المحجوب؛اسمه خميس السايح؟
نبيله:ايه..
المحجوب؛عنده الخبر اليقين..تو نقول لحسين الواعر يوصلني بيه..ونفهم منه كل شي..
نبيله ؛باهي مادبرتليش كيف نشوفه؟
المحجوب:حاليا ممنوع باديين في التحقيقات معاه..
نبيله؛معناها بيتحاكم..
المحجوب هز راسه وقال بضيق:اكيد
نبيله؛لازم نوكله محامي توا !
جاها وخداها في حضنه وهو يقول..
درتلها محامي كبير ومتخصص في القضايا هادي..انتي اهدي بس وشدي حيلك وخلي املك بالله كبير..
نبيله بنبرة باكيه..يارب ...
#رقعة_شطرنج
#طوبى
....يتبع....
