#طوبى "جنة طوبى"
#جمان_فريد
#الجزء_الثالث_والثمانين "حرب باردة/ستار حديدي4 "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
وانت بتدعي خليك طماع، ايوا طماع، إدعي بـ كُل
حاجه نفسك فيها، انسي المنطق وانت بتدعي
ومتشغلش بالك ازاي الدعوه دي هتحقق، النبي
بيقول"إذا تمنى أحدكم فليستكثر فإنما يسأل ربه"
سيدنا موسى طلب من ربنا 7 حاجات مره واحده
وكان الرد ساعتها "قَالَ قَدْ أُوتِيتَ سُؤْلَكَ يَا مُوسَىٰ"
إنسى أي حاجه وقول يارب! 🤍🤍🤍🍀
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 إنَّ الإيمانَ إذا نزلَ بقلبِ امرأةٍ جعَلَ منها بطلًا لا يُغلَب.
- علي الطَّنطَاوي.🍃
________________________________________
"كيف يصير في بنت الناس!؟"
هدا بو الشارف يكلم فيه هاتفيا في وسط الحوش..
وعواطف اللي كانت مقعمز في دار قريبه تسمع فيه وهي تبكي..
والد الشارف:تروح يعني تروح.....اسمع كان بتصكر راسك لاولدي ولانعرفك بالله نحلف معاد نعرفك...
ومرته واخته حداه يسمعوا وهما خايفين..
:خلاص الاسبوع الجاي تكون هني الاسبوع الجاي..
ونهي المكالمه وهو يقول بغضب..الكلب هدا..
ومشي من حداهم..
مرته قالته بقلق ان شاء الله اخرتها خير..
عمة الشارف:اني والله ماواجعني حد كان المشكله اللي داخل..
تنهدت امه بأسف وقالت..
/خشي شوفيها بالله..
هزت حماتها راسها ومشت لعواطف...
🍃🍃🍃🍃🍃
"واخيرا تواضعت ورديت"
الجالي وهو يشوف للاب توب قدامه..
/كنت مشغول اليومين اللي فاتوا..شن حالك وحال الصغار..
"الحمد لله..مستاحشينك بس"
هو قال:مافيش جديد..
" جديد زي شني يعني"
هو مط شفايفه للأسفل بعد قال..
/عن اي شي العيله الشارع الخدمه هكي يعني..
"لامافيش جديد ع حطة ايدك"
هو تنهد بضيق وقعد ساكت..
"حبيبي"
الجالي:اممم..
"حاول تقصر المده وتروح بالله عليك"
الجالي؛مانقدرش مش في يدي الحاجه هادي..
"هلبه شهر والله هلبه"
الجالي ابتسم تهكما وقال..
/انتي صبرتي شهور جت ع الشهر هدا!؟..
"جالي..خلينا نبدوا من اول جديد..نولوا لهديكا ايام..ايام كنا لبعض ومافي بينا حد تتفكر قداش كنا منسجمين فاهمين بعض جونا راكب ع بعض اني وياك مخلوقين لبعض ياجالي شوف ربي كيف ردنا ع بعض بطريقه لاتخطر عليك ولاعليا"
الجالي رفع حاجبه وقال..
/نجاة فوتيهم طروحك هادم..راهو اني عارف ومتأكد انك ورا كل شي..
"لو كنت وراها كنت قلت ماعندي علاش ندرق..والله ماني وراها والله"
ضيق عيونه وقعد يفكر بصمت..
"جالي والله مانكذب عليك نترزى في صغاري"
الجالي بضجر:باهي خلاص خلاص..سلام توا..
وسكر عليها..وعيونه ع شاشة اللاب توب وهو يفكر.
بعدين غيرهم للتليفون حط ع رقم اخته خديجه واتصل بيها...
حط التليفون ع وذنه وقعد الخط ينادي لين ردت بعد تالت مرة..
"ايوه"
الجالي:الجالي معاك شن جو؟
"ياهلا..ماشيه شن جوك انت اكيد مليح مادام بعيد"
الجالي:فكيني من تلقيحك وقولي مافيش جديد؟
"لافي"
الجالي بإنتباه:شني!؟
"في ان بنت الواعر ضارباتك ع الحيط وعايشه حياتها طلعات ولمات وهدرزة ولاكأن صايرة حاجه بسبب عمايلك الناس بدت تشوف فيها صاحبة حق وحني الظالمين"
الجالي بغضب..
/وين تطلع وين تمشي!؟
"نصيحه ياجالي طلقها وفكنا وفك روحك من وجع الراس"
الجالي نهي المكالمة مع اخته وهو في قمة الغضب..
رفع عيونه في شاشه اللاب ونظراته عيونه كلها غيظ..
نظرات لغيظ لصورة طوبى اللي كان يتأمل فيها في كل وقت..
🍃🍃🍃🍃
وقدام مطحن الزعيم..
كانوا المهدي ومختار واقفين قدام بعض برواحهم هالمرة..
والحديث كان واحد اتجاه اخر عكس اللي كان عليه لما كان ربيع معاهم..
المهدي:مش عارف من وين ولامن يكون اللي وصل المعلومه المهم انها وصلت ومن بعدها صار اللي صار..
مختار بحده؛اني مانحبش ندخل في المشاكل للشخصيه حتى لو كانت لخواتي لكن كان دخلوني صدقني وقتها حنتصرف بطريقه قاسية هلبه..اني مانهددش وراهو لتوا قاعد نبي شملهم يلتم..لكن مش ع حساب كرامة اختي..خوك لو مايقدرش يحل مشاكله ويسيطر ع حياته يطلق اختي ويخليها تمشي لحال سبيلها ويدير مايبي بعدين..
المهدي:الموضوع هدا اني طالع منه وماليش بيه علاقه كلامك هدا اولى توجه لصاحب العلاقة نفسه..
تنهد مختار وهز راسه بعدين قال..
/تمام...نشوفك..سلام..
ومشي من قدامه..والمهدي يتبع فيه بنظرات حاده...
ومختار بدي يقص في الطريق متوجه لحوش بوه..
🍃وفي جنان حوش لطفي..
طوبى كانت تسقي في الشجر وهي تغني..
"لالا..لانحتاج المالا كي نزداد جمالا..
جوهرنا هنا في القلب تلالا
لالانرضي الناس بمالا نرضاه لنا حالا
ذاك جمالنا يزهوا يتعالى"
سكتت لما سمعت الباب دق..
شبحتله..بعدين نزلت الطوبو متاع الميه..ومشت للشيشمة سكرتها..وتوجهت للباب..
وصلت فيه وقالت..
/مني..
"افتحي"
غمضت عيونها محاولة منها لتهدئة نفسها..
بعدين فتحتهم وفتحت الباب..
مختار بآبتسامه..
/مفاجأه حلوة صح؟
وخرت عن الباب وقالت..
/تفضل..
هو قعد محافظ ع ابتسامته وخش..
وقعد يمرر في نظره ع الجنان..
هي سكرت الباب وعيونها عليه..
شبحلها وقال..
/كنت جاي هني نشوف الشباب قلته خل نخطم..
طوبى؛تفضل للمربوعه..
هو غير عيونه عنها وشبح القدام..
بعدين قدم..وهي وراه..
وقفت لما شافاته خدي زوز كراسي لوح وولى بيهم للمتسراح وهو يقول..
/خلينا برا احسن..
هي تسمع فيه وعيونها ع الكراسي..
وهو حطهم وكمل يقول..
/الجو قنين..جو الخريف يعجبني..نحب الخريف..
قامت عيونها فيه وهي تشوفله بنظرات دهشه..
قعمز ع الكرسي وشبحلها بعدين قال..
/تعالي قعمزي..
ارتخوا عيونها وقالت..
/نديرلك قهوة؟
ابتسم وقال:مش حنقول لا..
هي هزت راسها ومشت للكوجينه..
وهو قعد معاها بعيونه يشوف للالوان الخريفيه اللي لابستهم..
فستان لونه بني خافت فيه يستيك من النص ومن تحت واسع...وع راسها وشاح من نفس اللون بس كان غامق..
قاللها:مافي حد؟
هي وين قربت توصل للكوجينه علت صوتها وقالت..
/طالعين للسوق..
وخشت...
هو هز راسها بعدين شاف القدام..
جو عيونه ع مكان خلا ذكرى حلوة وفي نفس الوقت مؤلمة تجي قدامه..فيسع هرب منها ورفع تليفونه وانشغل بيه..
🍃وطوبى داخل دير في القهوة...
بعد ماطيبتها..جهزت السفره..وحطت حلو..
بعدين طلعت للجنان بش تقطف فل..
وهي واقفه ع الشجره جتها قطوسه وقعدت تتسمح فيها..
ضحكت طوبى وقالت..
/جيتي..
هو سمع صوتها شاف جيهتها...
ضيق عيونه وهي يتفرج عليها كيف تقطف في الفل والقطوسه تحوم عليها وتتمسح فيها..
حس بشعور غريب مش مفهوم..حس انه شايف مشهد زي هدا من قبل...
وكأنه امه..وهي تقطف في الفل..بس القطوسه!
امه ماكانتش تحب الحيوانات هلبه...
قعد معاها بعيونه لين ولت خشت داخل..
ونظره ولى ع القطوسه اللي قعدت واقفه في باب الكوجينه..
شويه وطلعت بصحن ومشت وهي تقول..
/هي تعالي ..تعالي..وحطت الصحن في مكان مناسب..
جاته القطوسه طول وبدت تاكل..
هي قعدت تشوفلها بإبتسامه بعدين ولت خشت داخل..
غير عيونه القدام وهو مستغرب في اللي يحس بيه..خلاه يرتبك ويتوتر..
شويه وجت هي بالسفرة..وفي طريقها خدت طاولة صغيره كانت للكراسي..
وين وصلت فيه هو ناض خداها منها وحطها في النص.
وهي حطت السفره عليها..
لما شاف السفره ضحك..وقعمز..
وهي قعمزت..
مختار؛ورثتي حتى هادي؟
طوبى؛تعلمتها من سدره..
حافظ ع ابتسامته بكل قوة..بعدين خدي الفنجان..
طوبى:معمول..تحبه ولا؟
هو قال؛راك تقولي عرفتي المعلومه هادي من سدره؟
طوبى ابتسمت ابتسامه خفيفه وقالت..
/من فردوس..
هز راسه وقال:اممم..
وشرب من القهوة بعدين قال:هي نفسها..قهوتها..
طوبى:انت جبت سيرتها..
مختار:مفروضه سيرتها مفروضه..
طوبى:تبي تشوف جنه..
انفزع وقال:لاالا..
ضيقت عيونها بإستغراب..
هو فيسع ادارك نفسه وقال..
/بطلعيها في جو زي هدا؟
طوبى:معناها ماتبيش..
ضحك بتوتر وقال:لا مش هكي..وسكت ماعرفش شن يقول..
طوبى؛معناها مش جاي ع خاطرها..
قعد يشوفلها وهو ساكت..
طوبى:انت قلت بتجي هني بش تشوفها..
ابتسم بعدين نزل فنجان القهوة وقال..
/الجيه ع خاطرك..
طوبى:ع خاطري؟!
مختار:اممم..بعد اللي صار جيت بنعرف ع شني ناويه؟
طوبى:موضوع شخصي مانبيش نحكي فيه..
مختار:انتي لو تبيني ندخل فيه..
قاطعاته وقالت..
/لو نبي اني نطلب منك..
سكت وهو يشوفلها..
وهي تشوفله بإبتسامه غالب عليها البرود..
هز راسه وقال..
/تمام..زي ماتبي..ورشف من القهوة..
وهي تشوفله بعدين شافت للسفره..قربت للمعمول خدت طرف ومدتهوله وقالت..
/اني درته..
هو شبحله..بعدين خداه وكلي منه..
وهي تشوفله..
قعدوا في لحظة صمت..
هو ياكل ويشرب ويبان سرحان.
وهي تشبحله وبس..
هو مركز وكان حاس بتوتر عالي..
وهي مابتش تحول عيونها عنه..
حط الفنجان وشبحلها وهو يقول..
/تسلم ايديك..
طوبى؛سلمك..مختار.
قعد يشوفلها وهو ساكت يراجي شن بتقول..
تنهدت وقالت..
/تعرف الاء قداش تحبك..تحبك لدرجة انها تشوف فيك بوها..ديما دافع عليك وماترضى فيك شي...
هو قال؛واني نفس الشي نشوف فيها بنتي مش بنت اختي..
طوبى؛الاء زي اريج ومعتز..التلاته بوهم خلا في حياتهم فراغ كبير...مصطفى ماكانش اب عادي كان قريب ع صغاره اكثر من امهم كان معبي حياتهم وقلوبهم...لما فقدوه فجأه..
سيب فراغ كبير هما التلاته قاعدين يحاولوا يعبوه وكل حد فيهم بطريقته..
اريج دور في الراجل اللي يقدر يعبي مكانه..
ومعتز يحاول يعبيه بغيره باللي يكفيه حاجته ورغباته زي مايدير اي اب حنين زي مصطفى..
اما آلاء من لما طلعت انت في حياتها وهي عبت بيك هالفراغ..وليت عندها بوها مش بس خالها...فاهم عليا؟!
هو وعيونه غارقات بالدموع قال..
/لا..
تنهدت وقالت؛ماديرش فيها زي مادرت لغرفه ماتستغلهاش بش توصل للي تبيه..
عقد حواجبه وبشي من الانفعال قال..
/هي اللي كانت تحكيلي عنك وعن بنتك..هي اللي بعتتلي صورة بنتك هي اللي تخبر فيا عنها ولامرة سألتها عنها هي اللي خلتني نجي هني نشوفها..اني حتى لو كنت نسأل فيها عنكم نبي نعرف اخباركم هدا حقي..ماليا تبوا ولاماتبوش..الاء مستحيل نضرها حتى لما جاني واحد طلبها مني ورفضاته مابيتش نضغط عليها بالعكس كان همي هي تكون راضيه ومرتاحه بس...
سكت شويه وهو منفعل..
ونظرات طوبى ليه كانت هاديه ع الآخر..
هو كمل يقول:امتى طلعي افكار سدرة عني من عقلك..امتى تشوفيني بنظرتك انتي مش نظرتها هي..
طوبى:مقعمز في حوشي..درتلك قهوة..وحطيتلك من المعمول اللي انت تحبه...انت مركز!؟
هدي شويه وهو يشوفلها..
طوبى:قاعد حابس روحك في عقدة سدرة..مش قادر تطلع منها..كل شي مش كويس صار معاك في الدنيا سببه سدرة..
خلاص تخطا وانسى تجاوز المرحلة هادي..
مختار:سؤال وجاوبي بصراحه زي ماانتي.متعوده..لو سدرة ولت لحياتكم مرة تانيه وقالتلك اقطعي مختار انتي شن ديري؟
طوبى:قبل الحادث سدرة كانت عاطيه للكل حريته ان يتواصل معاك ولايقاطعك واني اولهم..
سكت وغير عيونه عن طوبى وقعد يوزع في نظره القدام وهو يهز في رجله..
وهي تشوفله..
شويه ناض وهو يقول..
/ماتبي شي؟
ناضت طوبى وقالت..
/راجي شويه..
ومشت للكوجينه وهو معاها بعيونه...
زفر بتوتر..
شويه وطلعت وفي يدها حافظه صغيره..
وصلت فيه ومدتهاله..
/اشرب معاهم القهوة..
شبح للحافظه شويه..بعدين خداها..ومشي طول للباب فتحه وطلع وسكره وراه..
هي غمضت عيونها وخدت نفس عميق بعدين زفرت...
فتحت عيونها ونزلت للسفره..بعدين طبست خدتها ولفت ومشت للكوجينه..
🍃🍃🍃🍃🍃
"باهي علاش اني!؟علاش يجيني اني!؟"
عمة الشارف:كوثر كانت تبيه ياخد وحده بمواصفاتك..
عواطف بتعجب:بمواصفاتي!؟ ابتسمت تهكما بعدين قالت..عانس فاتها القطار ترضى باللي يجي ولا؟!
سكتت عمة الشارف وزادت ضايقت لأن كان هدا حالها حتى هي..
نزلوا دموع عواطف وهي تقوللها..
/واكيد قالتله نبيها ممرضة بش تعانيني!..
:هي مرته الاولى كانت حرفه وراسها قوي وتعاند هلبه..
قاطعتها وقالت؛ماكانتش مذلوله ليها قولي هكي..
سكتت عمة الشارف..
مررت عواطف نظرات عدم الاستيعاب ع المكان..بعدين مسحت بإيديها ع راسها للخلف وهي تقول بصدمه..شن درت في عمري..شن درتي في روحك ياعواطف..شبحت لعمة الشارف..اني قبل هالمقلب كنت واكله مقلب زيه قري فاتحتي واحد كان يبي مني فلوس بش يكمل حوشه وياخد قريبته وبعد ماخدي مصلحته مني طلقني..وقعدت بعدين ندفع في حق القرض اللي خديته ع خاطره..القهرة هادي قعدت معاي سنين سنين..ماتخطيتها الا بعد وين..علاش يدير فيا هكي حرام عليه..علاش اني!..رفعت عيونها فوق وقالت..علاش اني ياربي شن دايرة بش يصير فيا هدا كله!..
عمة الشارف كانت تشوفلها بألم وهي تسمع فيها وقلبها موجوع..
وامه برا تسمع وهي حزينه ع حالها وخايفه ع ولدها من عاقبة اللي داره فيها..
🍃مش ديما اللي نبوه فيه الخيره..لما ربي يمنعه وحني نصروا عليه بكل الطرق يخليها ناخدوه بش يورينا ان الخيره عمرها ماكانت فيه🍃
🍃🍃🍃🍃🍃🍃
"اهوا السبيدرو اللي قلتي عليه"
طوبى وهي حاطه جنة في حضنها وتشوف للسبيدرو..
/ايوه هو هدا...
اريج:حتى خديت منه واحد..
آلاء:حتى اني عجبوني وخديت..
طوبى بضحكه:نتبادلوا بينات بعضنا..
ابتسموا البنات..
فردوس:وتوا حولي انتي وياها خل نوري حبيبتي جنونه شن خديتلها..
بناتها قعدوا يشوفولها بإبتسامه..
اما طوبى كانت متشوقه..انفتحوا عيونها ع وسعهم بدهشه لما "قعماز" اشبه بالدرجيحه "مرجوحه" مناسب لعمر جنة كان شكله حلو بالمرة..
طوبى بدهشة:منين جبتي حقه!؟
فردوس:تو انتي شن دخلك في حقه..حطيها فيه حطي..
ضحكت طوبى وهي تقول..
/شفتي خويله دوسه شن جابتلك..
🌼وجربت جنة القعماز..وكانت طوبى فرحانه بيه هلبه ماخطرش ع بالها ومافكرتش فيه لكن فكرت فيه اختها وهدا اللي فرحها🌼
☘مابتش تجيب طوبى سيرة زيارة مختار مابتش تنغص الاجواء الحلوة اللي كانوا عايشينها لحظتها..
🍃بس مختار يومها بعد ماروح من عندها..حبس روحه في شقه من شقق عمارته وقعد يشرب فيها..
كان يبي ينسى كلامه معاها..يبي ينسى الذكريات اللي ياما هرب منها ورجعت حاوطاته وسيطرت عليه..
كانت ليلتها نفسيته تعبانه لأبعد حد..ليه وقت ماعاشش هالحاله حتى بعد موقف جنازة ماتعبش هكي..
ومن كثر ماكان متألم اتصل بيها..اقرب انسانه ليه واكثر من يفهمه ويعرف يخفف عليه..
"مختار خيرك!؟"
مختار وهو متدد ع الكنبه قال بصوت باكي مترنح..
/تعالي..تعالي فاتن..نبيك حداي...
ونزل التليفون وحط يدها ع عيونه وقعد يبكي...
🍃🍃🍃🍃
وماكذبتش خبر زي مايقولوا..
تاني يوم بعد المغرب كانت في ليبيا..
🍃خشت للعمارة بعد مافتحولها البوابه..درست سيارتها في الموقف..
ونزلت طول...
وهي متوجهه لباب العمارة تلاقت مع رضا تكلمت معاه شويه بعدين خداها وركبها فوق..
وعيون صابرين وهي مقعمزه في بالكونه شقتها كانت معاهم...
🍃🍃🍃🍃🍃
حطت شنطتها ع تركينه وجاته خدت منه الطاسه..وخدت الشيشه ومشت بيهم وهي دور في الشقه ع مكان تحطهم فيه..
وهو ارتمي ع ظهر الكنبة وحط ايديه ع عيونه..
شويه وجاته وهي تقول..
/قلتلهم يديرولك قهوة ساده..
قعمزت جنبه وقالت..
/خيرك!؟ شن صار معاك..
حول يده ع عيونه وقال..
/تعبت هلبه..هلبه..
فاتن بنظرات حزن..
/من شني!؟
مختار بألم:من كل شي..حتى الموت مايبيش يعطيهولي بش يريحني...
فاتن خدت يده وشدتها بإيديها الزوز وقالت..
/احكيلي شن صار بالزبط نسمع فيك...
🍃تنهد من قلبه..وبدي يحكيلها وهي تسمع فيه..اغلبه كلامه كان مكرر ياما سمعاته منه بس في كل مرة كان قلبها يوجعها عليه..خلاته يطلع اللي عنده لعند ماجابولهم القهوة..
قعد يشرب هو وياه..وهو خش في حالة صمت وهي تراقب فيه..لعند ماشبه صحصح..وناض بش ياخد دوش..
وهي قعدت ترتب في الشقه...
🍃فهالوقت..
كانت صابرين مقعمزه في حديقة العمارة وهي تحرق من الغيظ..
ورضا وهو مقعمز في مكانه كان مرة مرة يشوفلها بإبتسامة شماته..
جي في خاطره يزيد يحرق دمها..
ناض ومشالها...هي لما وصل فيها قالت بحده..
/بري من حداي احسنلك مش ناقصاتك..
هو بإبتسامة شماته..
/مش مكثر معاك دوة بس نفكرك بكلام قلته قبل..هادي الوحيده اللي خشت ذمته ومش حتكون في غيرها صدقيني..قلبي حاس انه حيرجع يتزوجها..وتفكري كلامي..
هي وصلت حدها عنده..ناضت ودفاته من كتفه بقوة..بعدين مشت خشت للعمارة...وهو يضحك عليها بتشفي...
🍃🍃🍃🍃🍃
"نطلعوا كان تبي نمشوا للبحر"
هو هز راسه بإيجاب..
ابتسمت فاتن وقالت..
/نراجي فيك لوطا..
هو هز راسه بالموافقه مرة تانيه ومشي لداره..
هي تنهدت بحزن..بعدين مشت طلعت من الشقه..
🍃🍃🍃🍃🍃
بخت شعرها يمية الرقيه وهي تشوف للمرايه وتسمع فيهم بحداها شن يحكوا..
آلاء:هادي تمشي معاها اكثر..
اريج وهي تشوف للبلوزة اللي فيد اختها..
/ايه احلى..
آلاء ركزت ع اختها حستها مضايقه سألتها..
/خيرك اريج!؟
اريج:شي..
التفتت طوبى وقعدت تشوفلها..
الاء شبحتلها شويه وقالت..
/خايفه تشوفيه غدوة؟
اريج:من هو!؟
الاء:من غير استعباط اريج..
اريج ضيقت عيونها وقالت..
/ريتي انتي في شن تفكري واني في شن نفكر..اخر همي واصلا مش خاطري ع بالي بكل..
طوبى:مالا فشن تفكري..
اريج بحزن:في امي..في حال معتز معاها..بكري سمعتها تكلم في عمتي وتسأل فيها عليه كان خدي حاجات المدرسه وكان بيمشي من اول يوم ولالا..نزلوا دموعها وهي تقول..منين جايب قسوة هالقلب والانانيه مش عارفه..
تنهدت طوبى بحزن وقعدت ساكته..
آلاء:مفروض معاش تخمم فيه ولادوره وتقسي قلبها عليه مش لازم تكون الام ديما هي اللي ضحي وتنوجع..
طوبى بإبتسامة اسف..
/ساهل الكلام ياللوشه تو تولي ام ان شاء الله وتعرفي اللي تحس بيه امك..
الاء مطت شواربها بعدم اقتناع...
طوبى غيرت عيونها عنها لأريج وقعدت مركزه فيها وفي نظرات عيونها وهي سرحانه..حست بالضيق والحزن على حالها...
🍃🍃🍃🍃🍃
حط النعناع في براد الشاهي وهو يسمع في صاحبه شن يقول..
ربيع:قلت امس كيف مروح مابيتش نكد عليك بأخبار الشارع الجديده..
عبد القيوم شبحله وقال..
/لاعادي نكد..واخد عليه..
ربيع ضحك بعدين قال..
/نسيبي دار العار الايام اللي فاتوا..
عبد القيوم تبدلت ملامح وجهها للإمتعاض لما فهم ع من يدوي..
ربيع:رد ارملة خوه بالنوبه..
حلت محل ملامح الامتعاض ملامح الصدمه وهو يقول..
/كيف!!!؟
ربيع؛زي ماسمعت شكله الدوة اللي طلعت مزبوطه..
عبد القيوم قعد سرحان في الفراغ وهو مصدوم..
وربيع مركز عليه..قعد ساكت شويه بعدين قاله..
/ماعندكش تعليق!
غير نظره لربيع وقعد يشوفله وشبه فهم هو لشن يبي يوصل..
عبد القيوم غير نظره عنه والتفت ومشي خدي سفره وهو يقول..
/ماليش دخل..
وقعد يحط في الطواسي في السفره وهو يخبط تخبيط..
وربيع يشوفله بإبتسامة اسف ويقول في نفسه.
"كان نعرف كيف وامتى!؟ مستحيل تكون حاط عينك عليها وانت عارف انها متزوجه..متأكد ان اللي في بالي صح البنت اللي تبيها هي نفسها طوبى..ام العيون الحايرة"
ويدق باب الشقه..
حط التارقي البراد في السفره وهو يقول..
/المهدي..عدي حل الباب..
ومشي ربيع وهو مبتسم لباب الشقه..
فتحه...وتفاجئ..
لما شاف المهدي ومعاه واحد شافه كذا مرة في الشارع..
المهدي خش وهو يقول..
/تفضل سامي تفضل..
سامي ابتسم وهو يقول:يزيد فضلك..
ع طلعة عبد القيوم من الكوجينه جاهم وقعد يشوف لسامي وهو يقول..
/تو انت من قالك جيبه!؟ مش كانهو حوشك دخل فيه من تبي ماتنساش مأجره منك!..
المهدي:عادي توا نلزك ونعطيك فلوسك اللي حطيتهم من اول ماسكنت..
عبد القيوم:بينا عقد مش مهزله هي..
سامي كان يمرر في نظره عليهم وهو مصدوم..
ربيع؛صلوا ع النبي..
عبد القيوم؛عليه الصلاة والسلام..اسمع مانيش قاعد عندك لاجئ من توا نطلع ونعدي نسكن في احسن مكان..
المهدي:الطريق قدامك..
سامي بصدمه؛ياجماعة خيركم!؟ اني اسف نحسابه عطاك علم..
عبد القيوم؛لامعطانيش علم...
سامي وهو محرج شاف للمهدي بعدين رجع نظره لعبد القيوم وقال؛مالا سامحني خوي..اسف..ولف بيمشي
شده ربيع وهو يضحك ويقول..
/تي خش حش..
سامي شبحله بعدم فهم..ورجع شافلهم..
لقي عبد القيوم يضحك..والمهدي مبتسم..
تعجب هلبه..
ربيع؛شافوك خاش بعضك ومعقد روحك دارولك صدمه بش تفكفك شويه..
المهدي بضحكه؛خش خش..
سامي شبح لعبد القيوم وقال..
/نخش عادي!..
جاه عبد القيوم شد ذراعه ودخله وسكر الباب بعدين صافحه وهو يقول..
/اول ماجيت هنى كان حالي احرف من حالك..تفضل خش..
سامي ضحك وهو مازال مش مستوعب وقال..
/يزيد فضلك..
ربيع؛هرب عليه الضي راهو..
المهدي ضحك..
عبد القيوم حاوطه من كتافه وقال..
/خلوه عليا..وخش بيه وهو يقول..جيب الشاهي يامهدي..
لحقه ربيع..
والمهدي خش للكوجينه وهو يضحك...
🍃🍃🍃🍃🍃
وشرب عبد القيوم الشاهي التارقي لسامي اللي جي للشارع جديد ماكانش من سكانه لكن يخدم فيه..
فتح فيه مصوارتي من ثلاته شهور..لكن كان شبه انطوائي ومتحفظ وماتعرف ع حد ولاخالط حد..خش فيه المهدي وتعرف عليه وتريحله..وقرر يعرفه ع باقي الشله..
وقعد عبد القيوم ياخد في معلوماته..
انت من وين؟..وامتى جيت..؟ ووين تسكن.!؟ وخدمتك عن دراسه ولا هوايه..متزوج ولااعزب؟ ساكن بروحك ولامع اهلك..
سامي بإبتسامه:بروحي زي حالاتك..
عبد القيوم؛هلك مش هنا!؟
سامي:لاهني لكن اني اخترت نسكن بروحي..
ربيع:صعبه الوحده..
سامي؛بالعكس اريح..بالذات لواحد زي اني داير عالم لروحه وعايش فيه..
المهدي:سامي مصور ع مستوى مش أي كلام معروف في العالم العربي..
عبد القيوم؛ماشاء الله..
سامي بإبتسامه؛هي هوايه لكن قريتها وتعملت في اكثر من دوله وخديت اكثر من 30 دوره في اوروبا وآسيا..
ربيع:السؤال..شن جابك هني علاش فتحت المحل متاعك هني!؟
سامي:ببساطه قررت نديره باب رزق..
عبد القيوم:ربي يفتح عليك..
سامي بإبتسامه:آمين..اخترت الشارع لأنه حيوي ومشهور..
ربيع؛شن تصور بالزبط يعني خدمتك صور ثابته بس؟
سامي بضحكه؛طبعا لا..اني نصور فيديو وواخد دورات في المونتاج صورت حتى اعلانات...
المهدي:وصور افراح..
عبد القيوم؛حلو..
سامي:بصراحه زرت مطحن الزعيم ولما خشيت لفتت.انتباهي لوحه مكتوب عليها اسم المطحن بخط اليد عجبني الخط هلبه وشكل اللوحه ولما سألت قالي المهدي من دايرها..وقال عندك غيرها هلبه..
عبد القيوم بإبتسامه؛تبيني نديرلك وحده؟
سامي:هو مش حنقول لا..لكن نبي نشوف اللي عندك..
عبد القيوم هز راسه وقال:حاضر..اشرب الشاهي وبعدين ساهل..
سامي وهو يشوف للطاسه..
/ع فكرة اول مرة يعجبني الشاهي مانشربش فيه بالعاده..
ربيع:شاهي تارقي ياحبيبي يعجبك غصب عنك..
ضحكوا..وسامي رشف من الشاهي وهو حاس بإرتياح معاهم وشبه انسجم مع جوهم...
🍃تعشوا مع بعض من مطعم ربيع وقعدوا لنص الليل..
روحوا سامي وربيع وقعد المهدي..
حك عبد القيوم حاجبه وهو يشوفله وقال..
/هات اللي عندك..
المهدي ابتسم بعدين قال..
/جيتك في خير..
هو ضيق عيونه بدون مايتكلم..
المهدي؛قبل كل شي..معاش تعرف شي عنها..البنت اللي تبيها..
تبدلت ملامح وجه عبد القيوم للحزن مع التجهم..
المهدي:مانبيش نضايقك بس نبي نعرف نفتح الموضوع ..
عبد القيوم هز راسه وقال..
/اكيد موضوع زواج...الموضوع هذى سكرته بكل ومعاش نبي من يفتحه معاي..
المهدي:كيف تبي تترهبن؟
عبد القيوم؛علاش نظلم في بنات الناس! ناخد وحده وقلبي مع غيرها لايمكن نديرها..
المهدي حس بضيق..
عبد القيوم:مش حنفكر في الزواج مرة اخرى الا في حالة وحده لو ربي خلا قلبه فاضي كيف ماكان قبل عشرة سنين غير هكي نقعد بروحي طول عمري احسن..
المهدي هز راسه وقال..
/هدا الصح..هدا الصح..تعرف مواقفك كلها من لما عرفتك لهاللحظه تخليني متمني لو بنت كانت اكبر شويه والله نعطيهالك وماناخد منك حاجه..
ضحك عبد القيوم وقال..
/تكبر تحت جناحك ويجيها اللي خير مني ان شاء الله..
هز المهدي راسه وناض وهو يقول..
/هي مالا نخليك ترقد وراك مادير غدوة..
ناض عبد القيوم وهو يقول..
/إن شاء الله..
🍃وسقد التارقي المهدي..بعدين مشي طول للدار اللي فيها اللوحات متاعه..
توجه للدولاب فتحه وطلع منه لوحه كاتب عليها اسمها..
خدي نفس عميق..
بعدين مشي بيها لمخزن صغير في الشقه فيه سطل زواق "طلاء" صغير..
فتحه..وخدي الفرشه...خدي نفس عميق وزفر..
بعدين غطس الفرشه في الزواق وطلعها..ودهن بيها اللوحه كلها...
كان قلبه موجوع...وهو زاد عفس عليه...يبي يطلعها منه بأي طريقه..معاش يبي يحس اتجاهها بأي شعور اخطى شعور الجيره...
🍃🍃🍃🍃🍃
وتعدي هالليله...
ويطل صبح اليوم التاني...
والشارع تعبا بالطلبه اللي بيبدوا اول يوم دراسي في سنة جديده...
طلعت فايزة من حوشها مع بناتها..
صفاء ومروة وتاله اللي سنه هادي شهاده اعداديه وثانويه وابتدائيه..
ع طلعة المهدي ومعاه خوته يزن وسدره..
سدرة بسرعه قصة الطريق ومشت لسيارة فايزة..
وعيون المهدي عليها...
شاف لمروة كيف ركبت السيارة تنهد بضيق..
"محمد"
غير نظره لصاحبه مؤيد اللي جاه يجري من بعيد..
مؤيد؛صباح الخير..
محمد؛صباح الخير..
ومشوا الزوز مع بعض ويزن كان سابقهم..
وفاتت من جنبهم سيارة فايزة وعيون محمد معاها ومؤيد مركز عليه...
☘بعد شويه ..
طلعوا من حوش الواعر ورا بعض سيارات واريج...
اما طوبى..
🍃فردوس:طوبى عاد ياسرك اول مرة تقعد عندي..
طوبى بضيق:بنطول هلبه..
فردوس:ياودي بري وماتعطليش روحك بري..
شافت طوبى لجنة اللي كانت في القعماز..
قربتلها وباست خدها بلطف بعدين قال..
/باي ماماتي..
ولفت ومشت بسرعه وفردوس تضحك عليها..
🍃وتطلع طوبى بسيارة سدرة من الحوش اللي شافها المهدي ورجع انقلب حاله مرة وحده...
مجرد مااختفت السياره..
طلع عبد القيوم من الحوش..ومشي ركب اللاند كروزر..
وشغلها وتحرك طول لعمله....
🍃🍃🍃🍃🍃
ومشي اول يوم في الجامعه..
وكل وحده فيهم كانت تجري ع تنزيل موادها....
وبعد كملوا...
اريج والاء مشوا طول لأعمالهم..اما طوبى ماصدقت تكمل بش تروح لبنتها..
☘اما اول يوم دراسي في المدارس..
كانت مروة متحمسه وماركزتش ع مناسك اللي اغلب والوقت كانت في حالة توتر..من يوم ماعرفت اللي عرفاته وهي خايفه تخسرها...
لكن صفاء اللي كانت اكثر حماس من اختها للسنة الدراسيه بعد ماحطت خطة ليها بعد تتخطاها بتفوق...
لكن ماكانتش عارفه بأن القدر المكتوب كان عكس ماخططتله تماما...
☘طلعت في المرواح من المدرسه ومشت لسيارة امها اللي كانت تستنى فيها..
ومن بعيد شويه كانت في سيارة اللي فيهم يراقبوا فيها..
:هديكا هي شن رايك فيها؟
قعد يتفحص فيها بنظره لين ركبت للسيارة وقال بإعجاب..
/تمام التمام..نبي نتم في الموضوع بسرعه..
:اعتبره تم خلاص..
وتحركت سيارة فايزة..
وهما تحركوا بعدها....
#الحرب_البارده
#طوبى
.....يتبع....
