طوبى ☕شارع القهوة☕

الجزء_السادس_والثمانين

#طوبى  "جنة طوبى"
#جمان_فريد
#الجزء_السادس_والثمانين "انتقام/فستان الإنتقام"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لا تسمح لأحدٍ أن يجعل ضوءك يخفت لمجرّد أنّه يزعج عينيه🍃
_________________________________________
تقطع في المسافات..تتخطى في الطاولات والعاملات..
ودف من قدامها في الصغار الصغيرين وعينها ع الهدف لين وصلتله..
ووقفت عنده..
رقيه بإبتسامه؛السلام عليكم..شن حالكم اليوم..
كلهم عارفينها جايه بش تشبع فضولها..
مارد عليها حد كان مغليه..
مغليه:الحمد لله في خيار خيرنا..
رقيه وهي تشوف لنجاة..
/دوم ياحنه..بعدين غيرت نظرها لطوبى وقالت..شني يامغليه الجالي رد بنت واعر..
شافتلها نجاة بنظره حاده مخيفه..
وسدرة المهدي كانت تشوف لنجاة بنفس نظرات الكره..
كيف جت مغليه بترد ردت عنها نسرين وهي تقول..
/معليشي خالتي مغليه هادي مواضيع شخصيه ومش كل شي بنحكوا فيه..
رقية برفعة حاجب؛اني جيت نسأل بش نطمن بس مدا بينا يلتم الشمل والبنيه تتربى بين بوها وامها..
جوري تسمع فيها وتشوف لأمها بحزن
مغليه:اللي فيها الخيره يجيبها ربك..
رقيه شافت لطوبى وقالت..
/ان شاء الله..رغم ان كل شي واضح..بالسلامه توا..
ومشت من حداهم..
خديجه:فتت من راسها وماشيه تنشرها..
نسرين:كان كذب سيورها الناس تعرف اما لو كان حق..رفعت حواجبها ونزلتهم..
نجاه من حرقتها خدت شيشه ميه اللي قدامها فتحتها وبدت تشرب من فمها طول..
ومغليه ونسرين يشوفولها..
اما خديجه فكانت مركزة ع طوبى وتفكر لو كلام اختها نسرين واستنتاج رقيه اللي حتما حيكون استنتاج اغلب الحاضرين صح!
🍃بس اللي استنتجاته سالمين من كلام صفيه وامها سليمه شي تاني خلاها في حالة عدم استيعاب..
☘برا القاعه..
في جنب مرايه طويله في ممر طويل وفاضي..
كانت واقفه ع صفيه وهي تقول..
سالمين بصدمه:اللي نعرفه انه يبي بنت هناوانه يبي ينتقل لطرابلس ع خاطرها..قصدك هو كانت في بينه وبين طوبى علاقه؟!
صفيه بضيق:لا..
سالمين:كيف!؟
صفيه تنهدت وقالت؛قصة طويله وغريبه شويه ياخالتي مش عارفه كيف بنحكيها..
سالمين؛حي عليه المراة ع ذمة راجل شن يبي فيها!؟
صفيه بضيق شديد..
/خالتي..عبدالقيوم عاش معاكم سنين عمرك ريتي عليه عيب ولاغلط!؟
تنهدت وقالت؛لا والله وشهاده لله ماريت منه عيب لكن انا مش فاهمه هو شن وضعه بالزبط؟ مازالت عينه عليها وهي ع ذمة راجل!
صفيه:خلاص نحكيلك وامري لله المهم ماتشككي في نيته ولااخلاقه..
سالمين؛وانا يابنتي والله ماشككت في حاجه نبي نفهم بس...
🍃في هالوقت .
كانت اميمه في الحمام تساوي في مكياجها..
وبعد ماكملت طلعت بطريقها للقاعه..
وهي ماشيه سمعت صوت صفيه تقول..
"هو سكن في شارع القهوة ومايعرف انها عايشه فيه ولاعنده علم ان لطفي الواعر باتها"
قعدت واقفه في مكانها وهي تسمع..
سالمين وهي متعجبه..
/سبحانك ياربي..راهو هذى تدبير رباني خالص..
صفيه براحه؛اها ياخالتي شفتي..ربك رايد شي ياخالتي شن هو لتوا مانعرفوه..بس والله ياخالتي ان نية عبدو صافيه وهو يحبها من قبل ماتزوج وبعد عرف انها زوجت حاول اكثر من مرة يطلع من الشارع بس ماقدرش ماقدر يطلع ويخليها وهو شاهد ع كل شي صار معاها من قبل ماهي نفسها تعرفه..
سالمين بإستغراب شديد..
/من قبل ماتعرفه!
صفيه:اها..اسمعي خالتي الكلام في الموضوع هنا مش صح كان لقينا فرصه اخرى نقعمزوا ونحكوا براحتنا..
سالمين:انتم امتى مروحين؟
صفيه؛يوم الثلاث..
سالمين؛خلاص عدوا للشقه اللي قاعد فيها وانا نجيكم ونحكوا براحتنا..
صفيه هزت راسها وقالت؛إن شاء الله..هي تعالي نردوا للقاعه..
سالمين تنهدت وهزت راسها ومشت وصفيه معاها..
وخلوا اميمه واقفه في مكانها وهي متفاجئة ع الآخر..
🍃🍃🍃🍃🍃🍃
مقعمزة في بالكونه دارها..حاطه شال ع كتافه ولافه نفسها بيه ومربعه ايديها...في وذانها حاطه السماعات تسمع في اغنيتها الطليانيه المفضله وهي مغمضه عيونها ومنسجمة مع كلامها وعقلها غصب عنها يفكر فيه..
☘يفكر فيه وهو كيف خش من بوابه العمارة بسيارته اللي جابهالها واحد من رجالهم..
درس السياره..نزل الراجل ومشي طلع يشوف شغله..
وهو نزل بعده..وطول رفع عيونه في بالكونتها وشافها..
وحس وقتها ان السواد اللي شاف بيه الدنيا الايام اللي فاتوا تبدد في لحظه والدنيا كلها ولت زاهيه بالوان حلوة ردتله روحه..
قعد واقف يشوفلها بشوق وقلبه يرجف في صدره..
كل ماله يتأكد من صدق حبه ليها..المشاعر اللي يحسهم اتجاهها عمره ماحسهم في حياته وكانوا اقوى منه بهلبه..
☘في فتحت عيونها بعد ماتمت الأغنيه..
وكيف جت بتنزلهم للتليفون..جو عليه..
فتحت عيونها ع وسعهم بمفاجأه..وقعدت تشوفله وخلاص..
وهو معلق عيونها فيها مش قادر يغيرهم..
ناضت وهي شاده تليفونها وهربت تجري خشت داخل وسكرت باب الفيرندا بقوة وهي ترعش بكل فيها وقلبها يدق بسرعة..غلبتها ملامح الابتسامه ماقدرتش تكبحها..
كانت مشتاقتله وهلبه مش شويه...
🍃بعد ماخشت هو تنهد من قلبه..بعدين مشي بطريقه لشقته...
🍃🍃🍃🍃🍃
وع انغام اغنيه شعبيه مصريه كانت المنشطه في حفلة صفاء  مولعه الاجواء..
واقفه ع المسرح وترقص هي وفايزة ومطيره وسميره..
وباقي الحضور يرقصوا حدا طاولاتهم..
ومنهم خديجه ونجاه اللي كانوا يبوا يفشوا غلهم وخلاص..
طوبى مقعمزه وفي حضنها بنتها وتتفرج عليهم كيف يرقصوا مع المنشطه وتضحك على جوهم وع تعليقات اريج عليهم..
وعيون نسرين عليها..
شويه قربت نسرين من وذن امها وقالت..
/خاطرك تشوفي ياجنه؟.
تنهدت مغليه بضيق..
نسرين ابتسمت وناضت..
سدرة المهدي؛بتمشي لخالتي طوبى؟
نسرين؛ايه..
سدرة :بنمشي معاك..
نسرين بضحكه؛تعالي..
جوري:عادي نمشي حتى اني؟
مغليه؛قعمزي بنتي قعمزي..
نسرين؛خليك جوري ماشيه نجيب جنه بنت عمك..
جوري سكتت وملامح الحزن بانت عليها..
تنهدت نسرين وقالت؛هيا سدرة..
ومشت وسدره معاها..
وعيون نجاة وخديجه وهما يرقصوا لحقوهم..
🍃ع طاولة عيلة الواعر..
وقفت وحده من الجارات وسلمت..
بعدين قالت؛الله يبارك طوبى طالعه حاجه تانيه..
طوبى بإبتسامه مجامله:مشكورة ..
:شن مالا نقولوا طيب فيكم راجلك ردك؟
كلهم قعدوا يشبحوا للجارة بنظرات امتعاض وحده..
طوبى:لا حبيبتي اني قراري نهائي وقريب ان شاء الله حنطلق..
هزت راسها وشافت لنجاه وقالت..
/ان شاء الله خير..ردت عيونها ليها وقالت..ربي يحفظك انتي والعسوله..
هي بإبتسامه:تسلمي..
:تشبه بوها هلبه ع فكره..
طوبى بإبتسامه:اكيد..مش بوها!؟
ابتسمت الجارة وقالت؛صح..هي مالا نخليكم ع راحتكم سلام..
ماحد رد عليها الا طوبى اللي قالت..
/وعليكم السلام.
اريج وهي تتهكم ع الجارة..
/تشبه بوها هلبه ع فكره..
الاء دارت نفس الشي وقالت..
/نقولوا طيب فيكم راجلك ردك..
اميمه؛كلهم هكي فكروا فيها..
غرفه بضحكه نصر:وهو المطلوب نبي هديكا الحيزبونه دور في كصبرة..
طوبى شافت لبنتها بعدين طبست ع راسها وباساته..
"السلام عليكم"
طوبى قعدت تشوف القدام وهي ساكته..
ومافي حد رد ع نسرين ع الطاوله غير نبيله..
سدرة جت لطوبى وقالت:خويله طالعه تهبلي زي الاميرات..
ضحكت طوبى وقالت..
/مش احلى منك..
سدرة بضحكه؛خطفتي الاضواء..
ضحكوا كلهم..
وطوبى قالت بضحكه:سلمها ياربي..
سدرة شافت لجنه مسحت بصبعها ع خدها بحنان..
وطوبى تشوف لسدرة بإبتسامه..
نسرين تنهدت وقالت؛طيب فيكم اللي اطمنتوا ع سدرة..
مافي حد رد عليها..
هي هزت راسها وقالت..
/طوبى:امي تبي تشوف جنه..
غرفه بتهكم؛طيب فيها اللي خطرت ع بالها..
نسرين؛طوبى..هدا حقنا جنة بنتنا زي ماهي بنتكم..
رفعت طوبى عيونها فيها وقالت..
/جنة بنتي اني بس..
نسرين تنهدت ومررت نظرها ع القاعه..
طوبى:امك تبي تشوفها تجي توقف غادي..واشرتلها ع نهاية الجهة متاع اهل العروس..
نسرين هزت راسها وقالت؛تمام خلاص...هي تعالي سدره..
سدرة اللي كانت مبتسمه بضيق باست صبعها اللي كان يداعب في خد جنه وقالت..
/سلام..
كلهم ردوا عليها بأصوات متقطعه..
"سلام."
ومشت سدرة المهدي ورا عمتها..
غرفه؛مصح وجهها صدقوا لما سموها بليده..
طوبى جبدت كروسه بنتها ليها ودرتها فيها وسكرت عليها وقعدت شادتها..
وكلهم لاحظوا ع طوبى شويه من التوتر..
🍃وصلت نسرين لطاولتهم وهي مضايقه ع الاخر ووقتها نجاه وخديجه كانوا مقعمزات..
مغليه؛مابتش..
نسرين قعدت ساكته..
مغليه بحقد:مسمومه قلب اسود..
خديجه لنسرين:زيدي دافعي عليها..
نجاة قعدت تشوف لنسرين برفعة حاجب..
ونسرين تجاهلتهم وقعدت تشوف لصفاء..
وعيون مغليه وخديجه توجهوا لطوبى وقعدوا يشوفولها ببغض..
ونجاة نظراتها ليها كانت مليانه حقد..
🍃🍃🍃🍃
ومن صالة النساء..للمكان اللي كانوا فيه الرجاله..
قدامه ع الشارع كان عبد القيوم واقف يتكلم هاتفيا مع زميل ليه في الخدمه عن امور تخص الخدمه..
وراه بمسافه بسيطه كان الجالي واقف يشوفله بنظرات كبر وكره وهو يراجي فيه ينهي المكالمه...
ونهاها التارقي بعدين جي بيولي يخش شافه..
ابتسم وقال؛اهلا باللي يرجى فيا نعطيه بظهري..
قدم وقف قدامه وقال..ماتقدرش تجيني من القدام انا نجيك عادي..
الجالي بإبتسامه متهكمه؛ان شاء الله عرفاتك حجمك الطريحه اللي كليتها؟
عبد القيوم:الحقيقه..عرفتني حجمك انت..
رفع الجالي حاجبه وقال؛ماتزيدش تتمادى بش مانتماداش حتى اني..
تنهد عبد القيوم وقال:بحت ياغالي..انا عديتها لك لأني اعتبرتها وحده بوحده انا عطيتك طريحه وانت بعتت من يعطيني طريحه لأنك ماتقدرش تردها وحدك وتمت القصه..بس القدام لو تصرفت ببلطجه مرة تانيه صدقني حنرد نرد عقلك مايتخيله..
الجالي قعد يشوفله بحده للحظات بعدين قال وهو يشدد ع الكلمات..
/حتطلع..من الشارع..واني اللي بنطلعك..
ابتسم عبد القيوم ابتسامه هاديه مستفزة..
الجالي؛رد بالك تنسى حيجي يوم وتقول قالها..
عبد القيوم؛اللي تقدر عليه ديره ورد بالك تقصر..
ومشي خش وخلاه..والجالي معاه بعيونه اللي نظراته كلها وعيد...
🍃🍃🍃🍃🍃
ومازالت اجواء الحفله مشتعله..
العروسه كانت واقفه قدام الكوشه ترقص بحركات بسيطه وهي تتفرج ع البنات اللي يرقصوا ع المسرح قدامها..
صاحباتها واختها وصاحبة اختها ومعاهم اريج وآلاء واميمه..
🍃في وحده جهة اهل العريس مانزلتش نظرها عن اميمه
وفي بنوته صغيره من عمر تاله واقفه حدا طاولتهم وعيونها ع مناسك...
المنشطه؛ياعيني عليكم ياعيني ياهكي صاحبات والجارات يالوح..وعلت صوت الاغنيه..
والبنات تحمسوا..ع جية راما ومعاها وحده من بنات الجيران وقعدوا يرقصوا معاهم..
كانت راما تتحرك بطريقه مستفزة القصد منها اغاضة مروة..
ومروة ماقدرتش تتحمل طول نزلت وولت لطاولتها ومناسك لحقتها..
مناسك:خيرك مروة..
مروة بغضب وعيونها معبيات دموع..
/مش عارفه كيف كنت دايره وحده زي هادي صاحبتي..
مناسك عقدت حواجبها وقالت..
/كان تقوليلي شن دايرتلك بس..
فجأه حست بحد يضرب ع ظهرها بأطراف اصابعه..
التفتت شافت بنيه جميله شعرها برتقالي مبتسمه ابتسامه حلوة وقالت..
/ممكن شويه..
مروة نست كل شي وقعد تبتسم لأنها تعرف البنت من تكون..
مناسك بإبتسامة استغراب..
/تفضلي حبيبي..
البنت طلعت من جيب سروالها ورقه مطويه وقالت..
/هادي من خويا..
مناسك التفتت لمروة..
مروة ضحكت بغمزة عين..
ابتسمت مناسك وهي متفاجئه بعدين التفتت للبنت وخدت منها الورقه..
البنت:ع فكرة انتي حلوة هلبه..
ومشت وخلتها ومناسك معاها بعيونها وهي فرحانه..
مجرد ماوصلت البنت في طاوله اهلها..
لقت اللي ع الطاوله كلهم يشوفولها وهما مبتسمات..
هي نزلت عيونها بخجل والتفتت لمروة وقالت..
/تعالي معاي نبي نقراها توا توا..
ضحكت مروة وقالت؛تعالي.
ومشوا مع بعض متوجهين برا القاعه...
🍃واميمه تعبت من الرقيص وولت لمكانها...
وشويه وتمت الاغنيه..
المنشطه؛حني في ليبيا ولينا عايشين بالبركه..لاضي زي الناس..لامعاشات تنزل في وقتها زي الناس هدا غير هلبه حاجات مانبيش ندوي فيها معانا غرفه وسميره..
قعدوا يضحكوا..
المنشطه؛والله بلاد ماتودها لعدوك..تخلينا رجاله ونساوين نبوا نحرقوا سباحه..
كلهم بأصوات متقطعه ردوا عليها..
"الله غالب..ربي يفرج"
هي قالت؛اني نفكر نحرق..قولولي زعمه نديرها.!؟
قعدوا يردوا عليها..
"اصبري..احرقي ..ارفعينا معاك"
هي غنت:زعمه نحرق ولالا!؟
صاحوا البنات بصوت عالي..
ماعدا اريج اللي ولت في عالم تاني..
وتشغل المنشطه الاغنيه والدنيا تنقلب حوالين اريج وهي تسمع في الاغنيه بصوته هو...
الدموع تجمعوا في عيونها وغرقهم..بدت ترقص وهي تغني مع الاغنيه وتتفكر كيف كانوا يغنوا فيها مع بعض كل مايتلاقوا..
انخنقت بدموعها..وقعدت تفرغ في مشاعر الحزن والالم وهي ترقص..
🍃وهو كان بين الحاضرين وسط الرجاله يشوف للعريس وهو وسط صحابه كيف يهدرز والفرحه باينه في عيونها..
ممكن لو حال غير الحال كان هو في مكانه توا
بعد كم ساعه حتكون معاه اريج ويكمل عمره معاها..
بس رب الاقدار شاء غير ذلك..
حسرة قلب نضال ع اريج سببها الجالي..خوه..وبرغم هدا كله لايكمن يهون عليه ولايقطعه وهو الادرى بحالته واللي عاشه..
لكن الجالي ماكانش يهمه حد غير نفسه ومستعد يدير كل شي بش ياخد اللي يبيه...
🍃🍃🍃🍃🍃
ومازال الحفله في عزها..
وبعد وصلة من الاجواء اللي كلها بهجة..
فضي المسرح..والمنشطه شغلت اغنيه لمغنيه عربيه..وقعدت مقعمزة تشوف لطوبى..وبعدين لغرفه..
غرفه هزت راسها..
ردت عليها بنفس الحركه وقعدت تقلب في السيديهات لين لقت اللي تبيه..
وقفت الاغنيه اللي كانت حاطتها..وغيرت السيديهات بعدين ناضت وقفت وقالت بالمايك..
/طوبى..ياوردتنا السودا..
كلهم قعدوا منتبهين معاها..
وهي مشت بطريقها ليها وقالت..
/قالولي ترقص مليح وماشفتش تحركتي من مكانك واني مش مروحه قبل لتنوضي ترقصي..
طوبى قعدت تضحك..
غرفه:ايه بيبو نوضي..
الاء:بيلز بيبو..
طوبى قعدت ساكته وهي تفكر بتردد
وصلت فيها المنشطه وقالت..
/توا تنوضي..
عيون نساوين عيلة شنيبه عليها بالذات نجاه اللي كانت بتموت من الغيظ..
طوبى:معليشي اعفيني..
المنشطه؛وكان قتلك ع خاطر صفاء!..
شافت طوبى لصفاء لقتها تطلب منها تنوض بالإشارات..
فايزة:ع خاطري اني بيبو..
المنشطه:طوبى...طوبى...طوبى..
وقعدوا اللي حواليها يردوا وراها..
وطوبى تضحك..بعدين رفعت ايديها جنبها بقلة حيلة وناضت..
المنشطه صاحت:هيييه..
قعدوا يضحكوا..
ومشت طول تجري بش تشغل الاغنيه..
ونظرات نساوين عيلة شنيبه ع طوبى..
نجاة مركزه عليها بدقه..
ناضت وقفت..وبدت تفك في الطرف متاع الفستان..
بعد مافكاته حطاته ع كرسيها ونادت:
/فردوس..
جتها فردوس وقالت:عندي جنة بري انتي..
ابتسمت طوبى وحركت شعرها بإيديها للخلف..
بعدين لفت ومشت للمسرح..
وهني المنشطه شغلت اغنية..
"ع النار سخن شاهينا"..
وصلت طوبى في المسرح..وبانت ع الحضور.
من غير طرف الفستان بانت بشكل تاني اكثر جاذبيه وجمال..
حولت الكندرة وحطتها ع تركينه..
مشتلها المنشطه تجري..وخدتها وقفتها في نص المسرح وبدت ترقص فيها وهي تغني..
ع النار سخن شاهينا طيبناه وماهو لينا..
وطوبى في الاول كانت متحشمه وتضحك بخجل..
بس وحده وحده انطلقت..
المنشطه؛هو ده..
ووخرت وخلتها بروحها..
خلتها تتألق وتزيد تسحر في عيون الحاضرات والكل مبهور بيها..
وكأنها وحده تانيه..كانت اجمل من أي وقت..
وسالمين وهي تتفرج عليها دموعها نزلوا وقعدت تمسح فيها.
ونظرات الحسره في عيون سليمه وبنتها ملاحقتها..
عكس نظرات الفرحه في عيون احبابها ليهم وقت ماشافوهاش منطلقه وبهالحيويه..
لكن نظرات مغليه وبناتها كانت نظرات قهر بمعنى الكلمه..
هادي الكنه اللي تحلم بيها اي عيله..وهما بطروا ع النعمه وخسروها..
بينما نجاه اللي كانت تحرق فيها نار الغيره مستعده تنوض تقتلها حتى القتل...
وفي عز انشغال الكل بيها..
كانت نسرين المقهورة من خوها وعيلتها اللي كانوا اكبر سبب في خسارتها لأعز صديقه ليها تفكر تقهرهم حتى هما بالذات للجالي..
رفعت تليفونها بدون ماحد يركز..دارت روحها وكأنها تستعمل فيه عادي..
مررت نظرها ع اللي حواليها لقتهم مركزين ع طوبى..
فتحت تسجيل الفيديو..وبدت تصور فيها..
وطوبى كانت تتفنن في ادائها ع مسرح الصاله..
خواتها وقريباتها كانوا مذهولات فيها اللي يشوفوا فيه جديد عليهم..
بس ممكن نار الانتقام طلع من الانسان اللي هو نفسه يتفاجئ منه..
المنشطه؛ابداع ابدااااع..ابداااع....
طوبى قربت للجهه اللي فيها طاولة خواتها وقعدت ترقص بطريقه خلتهم يصيحوا من الحماس..
ومطيره تزغرد..
المنشطه:ماهدا ياهدا يابنت الايه ياطوبى..
رجعت طوبى لنص المسرح وقعدت دور عليها وهي ترقص..
واصوات الصياح قلبت الصاله..
وهي تضحك وتزيد تتحمس..
شويه التفتت لصفاء ومشتلها..
هني نسرين وقفت التصوير..وقعدت تشوف لطوبى كيف نوضت صفاء ونزلتها ع المسرح وقعدت ترقص هي وياها.
المنشطه:ملكات الحفله مع بعض الابيض والاسود ياودي
.ابداااع..وع النار سخن شاهينا.
وشويه ونوضت طوبى نساوين عيلتها..ونادت نساوين عيلة الصيد..
وكلهم ناضوا ومشوا للمسرح دارو دايرة كبيرة حوالين صفاء وقعدت ترقص في وسطهم ..
جتهم المنشطه تجري وخشت في الدائرة ..وقعدوا يدوروا ع صفاء وهما يغنوا..
خشتلها امها..صاحوا كلهم..
وقعدت فايزة ترقص مع بنتها وهما يدوروا عليهم ويصفقوا ومطيره وسميرة يزغردوا..
شويه المنشطه خلتهم وولت لمكانها..
خدت المايك وقالت بيه..
/طوبى..
شافتلها وهي تضحك..
قعدت المنشطة تغني.
مالقيت الحلول وطاريلي مطرى المهبول..
وراني ماعندي مانقول ومتبهدل وحتى دمع العين نزل مع ناسك..
كلهم صاحوا...
وطوبى تضحك..
المنشطه:يزيدك منه..
قعدوا يضحكوا..
وخديجه ونجاة ومغليه قعدوا يشوفوا للمنشطه اللي كانت ترقص ولاع بالها..
اما نسرين لهت بتليفونها كانت تعدل في مقطع الفيديو ببرنامج عندها..
ومرة مرة تشوف للمسرح..بعدين بعتت المقطع للشخص المقصود..
🍃🍃🍃🍃
في المكان اللي فيه الرجاله..
كان الجالي لاهي بالهدرزة مع عمر..
قطع عليهم الرساله اللي جت لتيلفون الجالي..
خداه مع الطاوله وفتح الرساله..
كانت مقطع فيديو..بانت عليه وحده لابسه فستان اسود..
شاف المرسل لقاه اخته نسرين..
طول ناض ومشي طلع من القاعه..وعيون عمر معاه...
🍃هو مشي لسيارته..
فتح الباب وركب وسكره..
خدي نفس وفتح المقطع..
ويشوف مايذهب اللي قعد من عقله..قرب الشاشه لنظره..
نظراته كانت بين الذهول..والاعجاب..والشوق...
قلبه يكاد ينفجر من قوة الدق...وزادت تقوت النار اللي فصدره لين حس ان النفس اللي يطلع منه وكأنه مصهود..
مسح بيده ع شعره للخلف بقوة وهو يتفرج..
بعدين حط يده ع صدره وقعد يمسح عليه وانفاسه متسارعه..
اصلا اللي قاعد يشوف فيه يحبس الانفاس..
☘عمر طلع برا..شاف سيارته وبان عليه هو فيها يشوف لشي في تليفونه..فجأه..حط التليفون ع تركينه وشغل سيارته وتحرك بيها وهو يحرق في العجل..
عمر بقلق؛يستر الله...
🍃🍃🍃🍃🍃🍃
وجي وقت العشي...
نجاة كانت تاكل بغل..
اما خديجه نيتها انسدت قعدت تنقش تنقيش..
ومغليه مابتش تقربه نهائي..
اللي كانوا ياكلوا عادي نسرين وبنات خوتها...
🍃وع طاوله عيلة الواعر كانوا ياكلوا بنفس مفتوحه وهما يهدرزوا ويضحكوا..
ضحكة سميره بالذات كانت قالبه الصاله ع راسها ومغليه وين تسمعها يزيد غضبها..
🍃وع طاولة عيت الصيد..
كانت عواطف يدوب تاكل واغلب وقتها سرحانه..
لكن نجاح تاكل بشراهه..
واللي تاكل بنفس مفتوحه سميرة وعيون ابتسام عليها..
🍃والمنشطه تتعشا وهي تمرر في نظرها ع الحاضرات عادي..
بعد بضع دقائق..
طوبى:حداكم جنة ماشيه شويه للحمام وجايه..
اميمه جبدت الكروسه ليها وقالت..
/بري..
مشت طوبى وطلعت من القاعه وعيون نجاة معاها...
🍃في نفس الوقت..
جت قريبة عيلة الصيد لطاوله نساوين الواعر وقالت..
/السلام عليكم...
كلهم ردوا عليها السلام...
هي شافت لاميمه وقالت..
/اميمه..
هي بإستغراب قالت:ايه..
:نقدر نقعمز عادي..
اميمه؛تفضلي..
والكل عيونهم ع المراة..ماكانتش كبيره..شابه صغيره لكن تبان متزوجه..
:اني نزبطك لكن انتي لا شايفاتك كدا مرة وين نمشي لكلية طب نشوف في راجلي ايام كان خطيبي غادي..
هي قالت:راجلك كان زميلي؟
:ايه..وقريبي اللي يكون ولد عمتي كان زميلك حتى هو اكيد تتفكريه كويس..
"أسامه"
اميمه تفاجئت..ومش عارفه علاش لما سمعت اسمه حست بشعور حلو..
ضحكت وقالت:اسامه عبد الرزاق؟
:ايوه هو هدا..
اميمه جي بين عيونها اول مرة ناداها فيها..
"كناريه"..ولما كان يقول..
"كناريه صفي النيه"
ضحكت وقالت:الله عليك ايام ايامه..قاعد في كندا؟
:ايه..الله يبارك تفوق هلبه غادي شاطر هلبه هو.
اميمه بإبتسامه:ايه متفوق اسامه..اكيد تزوج؟
:لا لتوا لا..
اميمه هزت راسها وهي مبتسمه من غير ماتعلق..
واللي حواليها وهما يسمعوا للحديث ويشوفولها لاحظوا ملامح وجهها زادت احلوت وهي تتكلم عنه..
🍃في جهة تانيه..
تحديدا في الحمامات..
كانت طوبى واقفه قدام المرايه تعدل في مكياجها..
بعد ماكملت ضمت المكياج في الشنطه..وين جت بتطلع..وقفت في مكانها وارتسمت ع وجهها ابتسامة تهكم..
"ماشفتش وحده مفرطه في كرامتها زيك"
عقدت طوبى حواجبها وهي مبتسمه.
نجاة:بعد اللي ريتيه واللي سمعتيه ومازال تبي تولي..ديري في محاولات رخيصه مكشوفه للناس بش تخلي الجالي يردك..مسكينه..اللي ديري فيه كله ع الفاضي لويبيك ماكانش معاي..لو يبيك ماخلا حد يشاركك فيه..اساسا انتي عارفه كويس علاش خداك وكيف مافيش داعي نقلب عليك المواجع ونفكرك..وابتسمت بسخريه استفزازا..
قدمتلها طوبى وقالت..
/ايه صح عارفه ومتفكره كويس..وعرفت انك كنتي مرته قبل يعني مش صاحبته ولاعشيقته..
نجاة بإبتسامه ساخره؛يعني عرفتي انك جيتي عليا وشاركتيني في حقي!؟
ابتسمت طوبى..
نجاة بمكر:ع العموم هدا شي تاني يأكدلك ان الجالي عمره ماكان ليك لصقوك بيه تلصيق..
ضيقت طوبى عيونها وقالت..
/الاولى..وجيت عليك..ولصقوني بيه تلصيق..مش ملاحظه ان هدا كله ينطبق عليك انتي توا..
اني الاولى..وانتي جيتي عليا..وهما لصقوك بيه تلصيق بعد ماانفضحت قصتكم..
نجاة قعدت تشوفلها بغل وهي ساكته..
طوبى:عموما هو توا معاك علاش قاعد ماطلقنيش..علاش قاعد يسكر في راسه!!؟..دارت بيدها حركه قالت بيها..
"خوديه معاش نبيه.." وحاولي فيه بش يطلقني...
ومشت من جنبها..ضربت كتفها بكتفها وكملت طريقها وهي تمشي ع اطراف فستان نجاة وطلعت من الحمام وخلت نجاه في حاله لايرثى لها لأنها تستحقها...
اما هي قعدت تمشي بإتجاه القاعه وكانت حاسه بقلبه برد ع الاخر...والضيق اللي كان كاتم نفسها انزاح..
حست روحها مرتاحه..مرتاحه ع الاخر...
اما نجاه اللي كانت جايه وراها..
حقدها الشديد قاعد يكبر اكثر واكثر في قلبها تجاه طوبى ومش معروف لوين ممكن ياخدها..
وصلوا الزوز في طاولاتهم في نفس الوقت..
نبيله كانت تشوف لنجاه..وخديجه بنظرها مع طوبى..
بعدين كل وحده غير نظرها للي جنبها..
شافت نبيله الاريحيه والفرحه باينه ع وجه طوبى..
اما خديجه شافت وجه نجاة يقطر سم وفهمت ان في كلام صار بينها وبين طوبى..وطوبى كملت ع باقيها في هاليله...
🍃🍃🍃🍃
وتمت الحفله ع خير وكانت ليلة العمر فعلا لصفاء..
وطلعوا بيها حمواتها لراجلها اللي خداها لسيارته وركبها وانطلق بيها لفندق بيقعدوا فيه ليله واليوم التاني بيسافروا لشهر العسل..
وعاد صار في فايزة حال بعد ماطلعت بنتها لدرجة انها فقدت الوعي وقعدوا يعانوا فيها..
🍃🍃🍃🍃🍃
في الطريق.
اشرف بإبتسامه؛شفشه..
ضحكت..
اشرف؛نحبك..
قعدت ساكته..
اشرف؛نلقاك باكيه تشوفي ..نردك لحوشكم..
ضحكت مرة تانيه..
اشرف:ااه ياقلبي وخلاص..غير شن درتي فيا ياصفاء بس قوليلي..
قالت؛مادرت شي..
اشرف ضحك وشغل اغنيه عاطفيه قعدوا يسمعولها الزوز لين وصلوا في الفندق اللي بيقضوا فيه ليلتهم الاولى في حياة ان شاء الله دوم لأخر العمر..
🍃🍃🍃
وبعيد عن الحب وحلاوته
كانوا مغليه وخديجه ومعاهم نجاه والبنات الصغار مروحين في سيارة عمر..
مغليه؛ماقالش وين ماشي!
عمر:تقريبا جاه تليفون شغل.
سكتت مغليه وهي تسحن....وخديجه من السحن بدت تحس بوجع لكن كانت تقاوم فيه.
اما نجاه من تحت خمارها كانوا دموعها ينزلوا وقلبها محروق حرق..
🍃🍃🍃🍃
والجالي نار الشوق خلت قلبه رماد..
واقف بسيارته قدام البحر..هو كان نازل منها ومتكي قدامها ويسمع في الاغنيه الطليانيه اللي مشغلها فيها ويغني معاها ودموعه في عيونه..عيونه اللي يشوفوا في ذكرياته مع طوبى اللي بدي يحس وكأنه عاشهم توا...
🍃نفس الاغنيه كانت تسمع فيها صابرين وهي راقده ع سريرها ودموعها مبلله وسادتها وتغني معاها..
🍃اللي كان رضا يسمع فيها لأول مرة وهو سارح وابتسامته ع وجهه...
يشوف قدام عيونه في اليوم اللي  تحداته بيها وكانت تبي تعصبه بش تسببله في مشكله مع مختار...
ضحك ضحكه خفيفه..بعدين تنهد من وسط قلبه الموجوع وقعد يسمع في اخر مقطع..
غناه الجالي بنبرة باكيه..كانت هادي ترجمته..
وهذه المرة لن تأتي امرأة اخرى..
لإلغاء بصمتك من على الوساده..
حتى وان سألت القمر ولم يكن موجودا..
لايريد بعد الان..
كوني قريبة مني...
وغمض عيونه بألم وتنهد تنهيده طالعه من اعماق قلبه...
🍃🍃🍃🍃🍃
الساعه 3:00بعد منتصف الليل..
في حوش لطفي الواعر من التعب الكل كانوا راقدين بعمق..
فجأه..هي فاقت لما هز تليفونها تحت راسها..
طلعاته من تحت المخده وشافت المتصل رقم غريب..
فصلت عليه..عاود طول..فصلت من جديد عاود جي في بالها ان في خبر يراجي فيها من ورا هالاتصال..
طوبى بقلق:ان شاء الله مش شر ياربي..
وفتحت الخط بدون ماترد..
وجاها صوت وهو يقول..
"علمني حبكِ أن أتصرف كالصبيان
أن أرسم وجهك بالطبشور على الحيطان
يا امرأة قلبت تاريخي
إني مذبوح فيكِ .. من الشريان إلى الشريان
علمني حبك كيف الحب يغير خارطة الأزمان
علمني أني حين أحب .. تكف الأرض عن الدوران
علمني حبكِ أشياء ما كانت أبداً في الحسبان"
رفعت حاجبها وقعدت ساكته..
"مانحب حد ولاحبيت حد غيرك في حياتي وماعنديش مراة غيرك انتي..انتي وبس..ياحبي وياقلبي وياعمري ويامرتي..مرتي انتي مرتي ليا اني لأخر نفس فيك وفيا"
مازال ساكته وتبي تسمع..
"حبيبتي خلاص عاقبتيني بما فيه الكفايه واني والله عرفت غلطي وتعلمت منه ومستعد نصلح كل شي..اللي نبيه توا ترضي عليا ياقلبي انتي ارضي عليا بس وشوفي الجالي شن يدير ع خاطرك.."
سكرت عليه الخط وحطت الرقم في الحظر وهي مبتسمه بغرور..
ماصدقتش حرف من اللي قاله..بس حست بشي من الارضاء لكرامتها...الليله فعلا خدت طوبى بتار كرامتها...
🍃اما هو اللي كان في حالة نفسيه صعبه..
خش للشقه ومشي طول لدار النوم..
كانت نجاه فايقه تراجي فيه وهي تبكي.
لما شافاته وقفت وكيف بدت بتتكلم هو ماخلاهاش...
🍃🍃🍃🍃
مع ساعات الصباح الاولى هو بعد ماخدي دوش لبس وتأنق وجهز شنطه صغيره وفات من حداها وهو يقول..
/مسافر...وطلع من حداها..
وخلاها تبكي بالعبره وتتفكر كيف كان ينادي فيها طوبى ويعترف بحبه ويطلب فالسماح عيشها شعور بشع ع الآخر ومع هذا هي اللي اختارت لروحها هالحياة ولازم تتحمل النتيجه..
🍃اما هو بعد ماوصل لسيارته..
ركب وهو يتكلم بالتليفون..
/ايه يعني امتى بالزبط..
"اخر الاسبوع يوم الخميس.."
الجالي:كويس هلبه..تمام بنسكر توا لأني مستعجل بعدين نحكوا في التفاصيل...
ونهي المكالمه..حط التليفون جنبه وشغل سيارته وتحرك وطلع من القراج شاف لحوش الواعر بنظرات وعيد..بعدين كمل طريقه..

#انتقام
#طوبى

....يتبع....