#طوبى "جنة طوبى"
#جمان_فريد
#الجزء_السابع_والتسعين"الأوركيد الأبيض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
عن أبي موسى الأشعري رضي الله عنه، قال: قال رسول الله صلى الله عليه وسلم: (مَثَلُ الذي يَذْكُرُ رَبَّهُ وَالَّذِي لا يَذْكُرُ رَبَّهُ، مَثَلُ الْحَيِّ وَالْمَيِّتِ) (رواه البخاري) .
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 عد تنازلي
أوراق شجرة تتساقط
شتاء على الأبواب !!
عد تنازلي
عروس تزف بالدموع
نهاية عشق !🍃
______________________________________
في رحلتهم هروبهم بحبهم نحو المجهول..
عدوا المانيا..ومنها خشوا لهولندا...
استغنى رضا عن سيارته الخاصه وكمل مع صابرين باقي الرحله بوسائل نقل مختلفه..
حافله..مترو..سيارة اخرى..لعند ماخشوا هولندا...
استقروا في فندق فمنطقه بعيده عن المدن والزحمة ودوشة الناس...
🍃خشوا للغرفه وصابرين تقول بإنفعال مبهج..
/تعرف اللي عشناه اني وياك حسسني بشعور حلو مش قادرة نوصفه..هكي حماس ع اثاره ع حب وحني نطلعوا من حاجه ونخشوا في حاجه نطلعوا من بلاد ونخشوا في بلاد..بضحكة كملت تقول..مش عارفه كيف نوصفلك بس شعور حلو هلبه..
كان يتأمل فيها كيف تعبر بطريقه طفوليه بتلقائيه وعفويه..
حس في هديكا اللحظه انها ماعاشتش المشاعر هادي قبل..
قربلها شد ايديها الزوز وقال..
/ضحكتك وصوتك وانتي تتكلمي يدخلوا فيا فعالم تاني..
تمعنت النظر في عيونه بحب وهي تسمع في كلامه بنبرة صوته الحلوة..
ابتسمت وقالت:غنيلي..
ضحك بعدين حمحم وبدي يغني..
/شو بحبك لما بتحكي..
ترسم ع شفافك ضحكه..
شوبحبك لما بتبكي وتشكي وعم بتغلغل فيي..
حبيبي انت الاحلى عمري بقربك عم يحلى..
عطرك سحرك صوتك رسمك صاروا مني وفيي...
صابرين بعشق:نحبك..
رد عليها بنفس النبره...
/نموت فيك....
🍀وعاشوا احلى ثلاته ايام في حياتهم في هداكا المكان..
نسوا كل شي وماحسبوا حساب لشي..وكأن الدنيا خلت من البشر وماقعدش فيها غيرهم...
🍃ومازال مختار عايش مع فاتن في العسل..
فاتن اللي تملك قلبها وخلاها تحبه حب كبير بعيوبه وميزاته وان كانت كفة عيوبه راجحه ع كفة الميزات اللي مايملكش منها الا ماهو بحجم ذرة..
وبرغم حلاوة اللحظات اللي قاعده تعيش فيها فاتن ماراحوش عن بالها رضا وصابرين.
عرفت من امينه انهم تزوجوا وهربوا وماكانش عندهم لاهي ولاأمينه اي معلومه عن وجهتهم..
لكن بقلق مخفي قعدت تستنى في اليوم اللي يعرف فيه مختار...
🍃🍃🍃🍃
2يوليو...سنة 2019..
يوم الثلاثاء..
الساعه 11:00ليلا..
ع مقعد مطل ع نهر وسط الطبيعه..
كانوا مقعمزين رضا وصابرين..
هي متوسده كتفه وهو متوسد راسها اللي كان ع كتفه..
يسمع فيها وهي تحكيله..
صابرين:كانت اخر رحله نمشيلها في المدرسه واني فالشهاده الثانويه..يوم ماينتساش قاعد في عقلي بتفاصيله لتوا..ضحكت وهي تقول..قلبنا الباص دربوكه وغني..وياسواق اجري ع الميه ماتخافش ع البتاريه..
ضحك رضا..
صابرين؛سواقنا مقنينته..قرصها رضا من يدها..ضحكت وهي تتوجع وكملت تقول..مش لازم نكملوها..تنهدت وقالت..المهم..لما وصلنا غادي بعد مافطرنا حني والابلات قعمزنا هدرزنا واغلب الهدرزة مشت في الضحك وتعليقات البنات..الابلات نسوا انهم ابلات هداكا اليوم..لعبنا طايره معاهم..ولعبنا كورة ولعبنا حتى يستيك...سكتت شويه ..
رضا؛كملي..
صابرين:ترا شن كنت نقول..
رضا وهو يقلد فيها..
/ولعبنا كورة ولعبنا حتى يستيك..
ضرباته ع يده وقالت بضحكه..
/مبيخك..
هو بضحكه:كملي..
شدت يده وفتحتها وقعدت تمشي ع راحة يده براحة يدها وهي تقول..
/وبعدين درنا بكبوكي وكل وحده طلعت شن جايبه معاها وتغدينا..وبعد الغدي طلعنا لعبنا ع الشط لين جي وقت المغرب وروحنا..وهو هدا..
شد يدها وقال..
/ياريتني عرفتك من هداكا الوقت راني سيبت كل شي وكملت عمري معاك..
شدت يده بقوة وقالت..
/ياريت...
ولحقت جملة التمني هادي لحظة صمت خلتهم يتفكروا كيف كان شكل حياتهم..يتفكروا كل ذنب ارتكبوه..كل حد آذوه بدون وجه حق..كل ألم جرعوه لناس مامسوهمش بضرر..
تنهد رضا ورفع نظره للسمي..وهي رفعت عيونها بعده..
وكأنهم كانوا يبوا يعتذروا ويطلبوا الغفران من اللي مش خافي عنه شي من ماضيهم وحاضرهم...
لكن زي ماقدر عليهم الشيطان وسهلهم ارتكاب الذنوب..
قدر عليهم لما صعب التوبه وخلاهم يحسوا انهم مش اهلها وان الله لن يغفرلهم...
نزلوا عيونهم بيأس واستسلام..وقعدوا ملازمين الصمت لعند ماقالت صابرين..
/تتوقع يسامحنا ولالا؟
رضا:ربي ولا مختار..
صابرين:اخر همي مختار لو كنت خايفه منه ماكنتش هني توا..
تنهد وقال:مش عارف..بس ياما سمعت امينه تقول ربي رحيم..
صابرين ابتسمت بألم وقالت..
/واني نقوللها ربي عدل..
تنهد مرة تانيه وقال..
/صح..عدل..
🍃🍃🍃🍃🍃
3يوليو..سنة2019..
يوم الإربعاء..
الساعه 6:00مساءا..
في البوتيك اللي تخدم في لبانه..
كانت اخت فاطمه جايه زياره لصاحبة امها تشوف الوضع..
في المكتب..
:والله ياروما البنيه الله يبارك عليها تخدم بقلب ورب ولسانها زي العسل مع الزباين تخلي الزبونه ماتطلعش من هني الا وهي شاريه حاجه..
بتعجب قالت..
/ماتوقعتش نسمع كلام زي هدا!
:هو اني صح ناقمه ع السوريات بعد العمله اللي صارت معاي لكن البنت نفعتني هلبه الحق..
:باهي كويس لكن مع هذا نقولك ردي بالك مرات ترقد فيك فالعسل وبعدين تضرب ضربتها ماتعطيهاش ثقه..
:اكيد الحرص واجب حبيبتي وهي فالنهايه مجرد بياعه..
~~~~~~~
فاطمه برفعة حاجب:مش مشكله نلقالها دبارة..غير توا قوليلي قاعدة مليحة تخدم عندها!؟
:ايه شفتها اليوم..
هزت راسها بصمت..
:علاش تسألي عليها!؟
فاطمه؛هكي وخلاص..هيا نوضي خل نمشوا نقعمزوا معاهم اكيده فقدونا..
وناضت هي واختها ومشوا مع بعض للصالون وين مامجتمعه العيله في حوش جدها من بوها..
ميار ركزت بنظرها عليهم وهما جايات..لين قعمزوا بعدين غيرت نظرها عنهم..
شويه ويخشوا ولاد العيله ومعز كان من بيناتهم..
من اول ماخش وعيون فاطمه عليه وميار معاها ع الخط..
هدرز شويه بعدين قال..
/فاطمه تعالي نبيك..
كلهم اتفاجئوا..وفاطمه حست روحها بطير من الفرحه..
معز شاف لأمها وقال..
/بعد اذنك عمتي..
ردت عليه بإبتسامه؛عادي حبيبي..
مشي....وفاطمه ناضت لحقاته..
والعيله كلها تكهنوا برجوعهم لبعض وكلهم فرحهم هالشي ماعدا امه وخواته...
ميار الوحيده اللي كانت عارفه حقيقة ما يجري..
🍃🍃🍃🍃
وقف في اخر الممر وهي جاته وقفت عليه..
فاطمه:نعم؟
عقد حواجبه وضيق عيونه وهو يسأل..
/بشن قاعده تحلمي فاطمه؟
بإستغراب قالت..
/مافهمتش..
رفع حاجبه وقال..
/لافاهمه وفاهمه كويس لولا مكانة امك عندي وقدر بوك وخوتك تصرفت معاك تصرف تاني..لكن جيتك وجبتك ع تركينه بش نحذرك لأول وأخر مرة..لبانه مازال تفوتي من جنبها مش تكلميها ماتلومي الا نفسك..خودي كلامي حرفيا ماتلومي الا نفسك وانتي تعرفي كويس شن نقصد..
ومشي وخلا نيران الغيره والحقد ياكلوا فيها..
🍃🍃🍃🍃
حطت راسها ع المخده وهي تتفرج ع اختها كيف كملت صلاة..
لمت الصلايه وحولت المصليه وحطتهم فوق الطاوله..
ومشت فتحت الروشن...
بعدين جت للمروحه اللي تخدم بالشحن فتحتها..وخشت فراشها..
حطت سلافه ايديها تحت خدها وقالت بأبتسامه..
/ياالله شو صرت حب الخميس بزياده..
لبانه بضحكه:نيالك..
سلافه؛دخلك ع شو!!؟ مافي بينا غير السلام..وهو بطبيعته مابيحب يطلع كثير بالمراة يعني بيخطف نظرة عابره..هالنظره العابره مارح تخليه يشوف شي..
لبانه:طيب انتي بهالفتره مالاحظتي عليه شي يدل ع انه في بحياته حدا؟
سلافه؛نهائي..تعرفي بكل يوم بشوفوا فيه بظل اطلع ع ايديه ليكون لبس محبس خطبة او زواج ..
لبانه بضحكه:زواج بفرد مرة!؟
سلافه بضيق؛شو بيعرفني...تنهدت من قلبها وقالت..صعب كثير اللي عم حسوا يالبانه كتير..يعني تخيلي ظلي سنين من عمرك عم دوري ع فارس احلامك لحد ماتيأسي انك تلاقيه وفجأه يظهر قدامك..تحبيه وتتعلقي فيه ومابتعرفي شو تعملي لحتى تلفتي انتباهه وتخليه يشوف قلبك من جوا شو فيه..وظلك طول الوقت خايفه ليكون في حدا بحياته ولا يروح لغيرك...
بدت ع وجه لبانه ملامح حزن والضيق..وجعها حال اختها وخافت عليها من عواقب اسوأ انواع الحب..
الحب من طرف واحد..
مسحت سلافه دموعها قبل لينزلوا وحطت ايديها ع صدرها وهي تقول..
/كل مابشوفوا او فكر فيه او احكي عنه..بحس بشي عم يوجعني كثير وبنفس الوقت بيخليني مبسوطه..
لبانه بتعاطف وحب:الله يجعله من نصيبك حبيبتي..
شافتلها بإبتسامه وقالت..
/يارب..تنهدت وقالت..خبريني انتي مبسوطه بشغلك..
لبانه بإبتسامه؛كثير..بتعرفي شو احلي شي بشغلي الفساتين والتياب ع اللي عم شوفن كل يوم..كل قطعه احلى من التانيه..
سلافه بضحكه:انتي والتياب قصة عشق لاتنتهي..
لبانه تنهدت وقالت..
/المهم هلأ الراتب عم عد الايام لأخدوا..
سلافه بضيق:وانا كمان المعهد اللي عم درس فيه رح يعطوني الراتب الاسبوع الجاي..بس المشكله انه مابيعمل شي..
لبانه بضيق:يارب..
سلافه؛ماما رح تشتغل..
لبانه بقلق:شو؟
سلافه بضيق؛شغله مثل البيبي ستر يعني اي وحده بدا تروح ع محل او عندا شي مناسبه بتروح ماما ظل مع ولادها..
لبانه ناضت قعمزت وهي تقول بصدمه..
/كيف!!؟
قعمزت سلافه وهي تقول..
/وطي صوتك..
لبانه بصدمه؛هي اخرتا ماما تشتغل هيك شغله!؟
سلافه ودموعها في عيونها..
/نحنا بوضع مابيسمحلنا نشوف حالنا ..
نزلوا دموع لبانه وهي تقول..
/بابا بيعرف!؟
سلافه هزت راسها بإيجاب..
لبانه بعدم استيعاب..
/ماعم صدق!
سلافه بشي من الانفعال..
/شو بدنا نعمل!؟ بسبب هالحرب بابا خسر شغله وانجبر يشتغل اجير بمحل مفروشات وهو صاحب الشهادات العاليه والكفاءة ..الظروف هيك يالبانه ونحنا لازم نساير الظروف..
لبانه بألم:الله لايسامح اللي كان السبب..الله لايسامحهن..
وولت رقدت وهي عاطيه اختها بالظهر وبدت تبكي..
تنهدت سلافه بحزن ورجعت حطت راسها ع المخده..
🍃🍃🍃🍃🍃
واقفه ع المرايا تمشط في شعرها..تجهز في نفسها لطلعه هي وراجلها..
فجأه خش عليها راجلها وهو يقول..
/فاتن جهزي نفسك بنروحوا..
هي بخوف قالت..
/علاش؟
مختار وملامح القلق باديه ع وجهه..
/رضا مختفي..
بلعت ريقها وقالت..
/مختفي!؟
مختار بنرفزة وقلق:ايه مش باين بكل..لاسافر بش يتم الشغل اللي قتله عليه ولاقاعد يخدم في النمسا اصلا مافي حد قدر يوصله..اني ماقدرتش نوصله!..شافلها شويه بعدين قال..معقوله يكون...!؟
فاتن بخوف:يكون شني!؟
رفع حواجبه بشي من البطء بعدين قال..
/معقوله يكون...زفر وقعد ساكت شويه وهو يمرر في نظره ع الدار..
وفاتن تشوفله لخوف وتوتر..
رد نظره ليها وقال..
/معقوله يكون انتحر مرة تانيه!!؟
فاتن بخوف؛انتحار!!؟
هز راسه وقال..
/ايه..حادث المرة اللي فاتت انتحار...اشرله بيده وهو يقول..هيا هيا وتي روحك بعد ساعه بس الرحله..
ومشي طلع من حداها..
غمضت عيونها وزفرت بخوف بعدين فتحتهم وقالت..
/يارب..
🍃بعد ساعه..
انطلقت رحلة عودتهم للنمسا..
في الوقت اللي بيطلعوا فيه صابرين ورضا من هولندا ويخشوا بلجيكا..
☘رضا:هيا خطوة..تنين..تلاته...خشينا بلجيكا..
ضحكت صابرين وهي تقول..
/جو...
خداها ومشوا مع بعض وهما رافعين شناطيهم..
صابرين؛شن بنديروا توا..
رضا:بنقعدوا ليله في فندق واليوم التاني في الليل بنسافروا في الطيارة لإسبانيا..
صابرين:تتوقع لتوا مافاقش بينا مختار..
رضا وهو يشوف للطريق يراجي في سيارة اجرة قال..
/لاخلاص اللي هناك يعرفه اليوم..
صابرين:علاش اليوم بالذات!؟
رضا:بعتت رساله لياسمين..
شدت يده بقوة وغيرت نظرها للطريق..هو حاوطه بذراعه وقال..
/ماتخافيش..باسها ع راسها...ع جية سيارة اجرة..
اشرلها توقف..وقفت..
وركبوا فيها ورفعتهن لوجهتهم...
🍃🍃🍃🍃
وعدت ساعات السفر ع فاتن ببطء شديد من الخوف..
طول الوقت كان مختار ملتزم الصمت وهي ماقدرتش تتكلم معاه نهائي..
🍃لعند ماوصلوا للنمسا...
جتهم السيارة للمطار وروحوا طول للفيلا...
🍃🍃🍃🍃
"أمينه"..
لما سمعت صوته حست بالموت جاها..خدت نفس عميق..
وطلعت تجري من الكوجينه..
وصلت فيهم وهي تقول بتساؤل لإخفاء توترها..
/ايه ده انتوا جيتوا!؟..حمد لله ع السلامه..
مختار بقلق ممزوج بالغضب..
/رضا وين؟
امينه بلعت ريقها وشافت لفاتن..
فركت فاتن رقبتها من الخلف بتوتر وقالت..
/مختار.. مختار بعصبيه:اسكتي شويه يافاتن..
فاتن:مختار اني نعرف وينه..
رفع حاجبه..والتفتلها..
وامينه تشوفلهم وهي تفرك في ايديها بتوتر بالغ..
مختار:وين؟
كيف جت بترد..يدق باب الفيلا بقوة..
وجهوا انظارهم ليه..
مختار؛امينه بري افتحي..
امينه مشت بسرعه للباب وهي تقول..
/استر يارب..
وصلت فيه فتحاته..
ويخش ايهم بغضب..شاف لمختار وقال..
/الكلب متاعك وين..
رفع مختار حواجبه وهو يشوفله بصمت..
ايهم بعصبيه شديده..
/السافل الوسخ اللي ضحك ع بنت اختي..اللي دارها كوبري بش يوصل في الوسخه هديكا..قدم لمختار وحط سبابته ع صدره وهو يقول..الوسخ متاعك اللي جيت بتمسحه فيا..
فاتن بغضب..
/تكلم كويس ولا اطلع برا..
ايهم شافلها بغضب وهو يقول..
/مافي حد يوريني كيف نتكلم مع نماذج زيكم...رجع شاف لمختار واشر بسبابته عليه وهو يقول..
/اللي داره الكلب متاعك مش حيعدي هكي لويكون تحت الارض نطلعه ونوريه شن شكله اللعب ببنت اختي اني..
ولف ومشي طلع من الفيلا..
فاتن بكره:وقح..
وامينه تشوف لمختار كيف قاعد واقف في مكانه موجه نظره للباب..
فاتن شافتله وقالت..
/مختار..
رفع يده سكتها..بعدين مشي طول بإتجاه داره..
وامينه وفاتن يتبعوا فيه بعيونهم..
امينه بخوف شديد..
/شكله ده انا اعرفوا كويس..
فاتن حطت يدها ع كتف امينه وقالت..
/ماتخافيش تو نعرف كيف نهديه ونخليه يتفهم..
امينه برجاء..
/يارب لين قلبه عليهم يارب..
فجأه..
سمعوا صوت موسيقى السينفونيه الخامسه لبيتهوفن..
امينه بخوف:لا كده انا تشائمت اكثر من الاول...
وفاتن تنهدت بقلق..
🍃عدا الليل كله..
ومختار حابس روحه في داره..حاولت فاتن تخشله منعها وخلاها في حالة قلق وهي تتوقع في الأسوأ...
بينما امينه قضت الليل كله في دارها تصلي وتدعي لله تعالى وقلبها مش مرتاح...
🍃🍃🍃🍃
لكن نفس الليله قضتها طوبى وهي عايشه حالة حلوة..
مع الرسم والالوان..
بيدها اللي كانت لابسه فيها المسبحه..
ترسم في تفاصيل لوحة المعرض وهي تردد في الصلاة ع النبي..
كانت فرحانه لأن الشكل النهائي للرسمه طلع احلى مما تخيلت...
طوبى بحماس:مالا بعد مانلونها كيف!؟..
وخرت كم خطوة وهي تتفرج ع اللوحه بالتركيز بعدين قالت..
/ردي بالك ياطوبى لازم يكون في اختلاف واضح بين اللوحتين...
شويه بدت ع وجهها ابتسامه لما تفكرت هداكا اليوم..
غمضت عيونها بإحراج وحطت يدها ع جبهتها وهي تضحك..
بعدين نزلتها وفتحت عيونها وهي تقول بخجل..
/ان شاء الله مايزبطهاش ياربي كان زبطها معاش نقدر نوريه وجهي..
خدت نفس..وردت نظرها للوحه...
🍃🍃🍃🍃🍃
5يوليو..سنة 2019..
الساعه 10:15صباحا..
كانت نسرين في دار النوم تكوي في اللبس العربي لراجلها وحداها ولدها يلعب..
تسمع في صوت دوشتهم برا مع صوت المكنسة الكهربائيه..
حمواتها قاعدات من امس حدا امهم وكعادتهم كانوا نابذين نسرين..
🍃برغم محاولاتها معاهم..حاولت دخل روحها فيهم وع قد ماحصلتش منهم لااحترام لاتقدير لدرجة انها وين تجي تقعمزوا معاهم ينوضوا ويخلوها...
مابتش تحكي لربيع شي من اللي يصير معاها في غيابه لكن هو كان ملاحظ وعارف كل شي..🍃
☘خش عليها ربيع وقال..
/نسرينتي تعالي افطري..
نسرين بأبتسامه؛لاماخاطريش شربت قهوة وكليت حلو قنعوني..
ربيع:امتي!؟
نسرين؛الصبح بكري..
قعد يشوفلها للحضات بعدين هز راسه وطلع سكر الباب..
تنهدت نسرين بضيق..
كملت كوي اللبسه متاعه وعلقتها..
بعدين مشت لولدها وقالت..
/هي شويه تانيه نمشوا لحوش جدو محمد نفطروا غادي..
طبعت قبله ع خده..ومسحت ع شعرها بعدين ناضت مشت لدولابها بش طلع حوايجها..
خش عليها ربيع وفي يده سفرة وهو يقول..
/نسرينتي..
التفتت شافاته تفاجئت..
ويحيى اللي كان جعان ناض لربيع يجري ويقول
/نبي..
ربيع:هي حبيبي خل نحطها..
نسرين جاته وقالت..
/مش قتلك ماخاطريش!؟
قعمز وهو يقول..
/نسرين قعمزي..
تنهدت بعدين قعمزت وهي تقول..
/تجيب لروحك في الدوة..
ربيع:اخر همي..خدي بريوشه فتحها ودهنها بالشكولاته وقال..خودي..
خدتها وهي تشوفله بإبتسامه حب..
بعدين بدي يوكل في يحيى..
قعدوا لحظات ساكتين لعند ماقال ربيع..
/بتمشي لحوش ماليك؟
نسرين:ايه..
ربيع:ماتفهمنيش غلط..ياريت ماتكوني حكيتي لحد..
نسرين بضيق:حاولت وماقدرتش..امي متكدره ع خوي لين مريضه مش حنزيدها على مابيها واختي نعرفها مش حتسكت..
ربيع بضيق:اسف نسرين..اسف بجد ماكنتش نبي يصير هكي لكن هادم ماليا مانقدرش نقوللهم دوروا وين تقعدوا..
نسرين:واني ماقتلكش لزهم..
ربيع:مش قصدي..بس قاعد نبررلك في موقفي مانبيش تقولي راضي فيا اللي يديروا فيه..
نسرين:عارفاتك واني لالمتك ولاحنلومك..راضيه ومتحمله لين ربي يفرج..
تنهد بضيق والتزم الصمت وهو يوكل في يحيى..
ونسرين تاكل وهي تسأل في نفسها..
"لعند امتى بتقعد متحمله هالوضع!؟"
🍃🍃🍃🍃🍃
طلعت لحديقة الفيلا وهي تشوف فيه كيف مقعمز بروحه..
يبان سرحان ومضايق...
توجهتله..وصلت فيه وقالت..
/نقعمز..
تنهد وهز راسه بالموافقه..
قعمزت جنبه وقالت..
/انت عارف انهم يحبوا بعض..
مختار:وعارف انها ماتصلحش بيه هدا علاش بعدتهم عن بعض..
فاتن:وشن استفدت في النهايه!
مختاربحسرة:نحساب قدري كبير عند رضا..ماجاش في بالي لحظه انه يحطني في هالموقف ويخلي واحد سخيف زي ايهم يحصل فيا فرصه ويهيني..لاويكملها راجل اخته اتصل بيا الصبح وسمعني كلام خلاني مش عارف نرد عليه..هدا كله ع خاطر مني!؟ ع خاطر وحده ماتسواش زي هادي..نسي الراجل اللي داره ولده وقف معاه ودعمه وعطاه قيمه..ولاهي التافهه هادي بعد ماعطيتها فرصه تولي بنادمه وتعيش حياة نظيفه هكي ديريلي!؟..برغم اني متوقع منها كل شي وحده رخيصه ومنحطه زيها دير كل شي..لكن رضا..رضا يدير فيا اني هكي!!؟
خدت يده وحضنتها بإيديها وهي تقول..
/انت اكثر واحد تعرف الحب وشن يدير..كويسه مش كويسه هو حبها وتعلق بيها وماقدرش يكون مع غيرها وهي نفس الشي..خليهم يعيشوا حياتهم زي مايبوا ويتحملوا نتيجة اختياراتهم..
مختار:بالنسبه ليا اني من بعد اليوم معاش نعرف واحد اسمه رضا معاش يعنيني في شي كان ضربه الحيط وولى نطرده شر طرده..شد ع قبضة يده التانيه بقوة وهو يقول..ااخ بس لو يهون عليا زي ماهنت عليه..لكن الله غالب مانقدرش..مانقدرش نفرط فيه..
فاتن؛لاحبيبي بالله عليك خليهم وانساهم..
فك يده من ايديها وضمها لقلبه وهو يقول..
/مانقدرش نديرله شي..وياريت نقدر..لكن يقعد اللي داره درس يعلمني معاش نحط ثقتي في حد ولانعلق امال كبيرة ع حد..
فاتن؛الا اني..مستحيل نسيبك..
مسح ع شعرها بدون مايعلق..
وهي حطت يدها ع يده وقربتها ليها وطبعت عليها قبله..
🍃وامينه واقفه من بعيد تشوفلهم بقلق ومابطلتش دعاء..
🍀🍀🍀🍀🍀
ويعدي اسبوع...
وياسمين في حالة يرثى لها..نفسيتها تعبت لدرجة انها اقدمت ع الانتحار وانقاذها من الموت كان في أخر لحظه..
وزاد غضب اهلها من مختار ورضا..
بوها مشي لمختار وصب عليه كل غضبه ومختار ماردش بكلمة..
اما خالها هلبه فكان يهدد ويتوعد انه حيقعد وراهم لين ويحاسبهم بنفسه..
من جهة تانيه..
مشت فاتن تزور ياسمين في المستشفى كانت تبي تحاول تحكي معاها وتشرحلها اللي صار بطريقة تخفف عنها بس امها منعتها وخلت الامن يطلعوا فاتن من المستشفى كلها..
🍃🍃🍃🍃🍃🍃
14يوليو..سنة 2019
يوم الأحد...
🍃في إسبانيا...
وصلت سيارة اجرة رضا وصابرين لطريق كملوا فيها ع رجليهم متوجهين لنقطة محدده..
🍃رضا:تو بيجينا واحد يوصلنا للميناء هو اللي دبرلنا امور الرحله كلها..
صابرين بضحكه..
/ياربي ركبت مترو وطيارة وتوا بنركب باخره.
ضحك وقال:هيا خفي رجلك بش نوصلوا فيه بسرعه...
🍃وكملوا طريقهم لين وصلوا في سيارة عاديه..
ركبت صابرين من الخلف..
وهو ركب القدام..كلم الراجل باللغة الاتجليزيه وهو رد عليه..
وانطلق بيهم للوجهة متاعهم...
🍃🍃🍃
صابرين؛ترا ميه من عندك رضا..
خدي شيشة ميه والتفت مدهالها..
خدتها وفتحتها وكيف جت بتشرب طاحت منها الشيشه لما وقفت السيارة فجأه..
شافتلهم كانوا يتكلموا الزوز بإستغراب وتوتر..
صابرين بخوف:رضا شن في.!؟
ورضا يقول للراجل بالانجليزيه..
"ارجع للخلف ارجع"..
الراجل شغل السيارة ولما جي بيتحرك للخلف..
توقفه سيارة تطلع وراه مباشرة..
تحاصرت السيارة من الجيهتين..
صابرين بخوف شديد..
/رضا..
رضا طلع سلاحه وطلع يده من الروشن وكيف جي بيضرب عليهم تجيه طلقه تصيب يده خلاته يطيح سلاحه..
وينزلوا من السيارات رجال ضخام الاجساد مناظرهم مخيفه
جوهم بسرعه وهجموا عليهم...
فتح واحد منهم الباب الخلفي بيطلع صابرين..
وهي تعيط حاولت تهرب من الجهة التانيه..لكن لحق عليها وشدها..
رضا وهو يصرخ بصوت عالي..
/خلوها ياكلاب..خلوها..
وحاول محاولات يائسه يخلصها منهم..
وهي تصرخ وتنادي بإسمه....
وقبل ليطلعوها....خشله واحد ضربه ع راسه افقده الوعي.
صرخت صابرين بأعلى صوتها لين اختفي..
"رضا"...
وطلعوها...غمولها وجهها بمنديل فيه مخدر افقدها الوعي..
ورفعوها لسيارتهم...وهو خداه اللي ضربه ورفع لنفس السيارة..
وقعد السواق اللي كان يتوسل ليهم يخلوه حي لكن دون جدوى..
ضربوه بطلقه في راسه نهت حياته..
بعدين خش واحد للسيارة حوله للكرسي التاني وركب مكانه وشغلها وتحرك طول...
وبعده تحركوا السيارتين اللي فيهم رضا وصابرين ورا بعض...
#الاوركيد_الابيض
#طوبى
....يتبع.....
