طوبى ☕شارع القهوة☕

الجزء_الخامس_والثمانين

#طوبى  "جنة طوبى"
#جمان_فريد
#الجزء_الخامس_والثمانين "انتقام/الزهرة السوداء"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 هذا الخراب الذي بداخلي لم يولد معي أقسم لكم أيها الناس إنه لو يولد معى لقد كنت ناصعًا كغيمة🌿
________________________________________
طلع من الفندق مشيا ع الأقدام قاصد المركز اللي ماكانش بعيد بمسافه طويله هلبه..
يعني لو في من يحب رياضة المشي حيكون عنده عادي قطع هالمسافه..
بس هو ماكانش يبي يتمشى..
هو من حرارة الغضب والصدمه قعد يمشي وكأنه حس ان الطريق لو قطعها بالسيارة حتولي اطول..!
يمشي ويمشي وهو يفكر ومازال تحت تأثير الصدمه..
انتي شني!؟ يابنت امي وبوي..شني!
وكأن ربي خالقك في هالدنيا بش تقهريني وتوقفي في طريقي..
خالقك يش تكوني شوكه في حلقي لأخر العمر...
وهي في حالة ضعفها وغيابها عن الدنيا قاعده مسببتله هاجس..
حقق هلبه مكاسب في نظره ومستحيل يفرط فيها..
والهاجس اللي اسمه سدره مش مخليه يتهنى باللي وصله..
فكان لازم ولابد يتخلص منها بس بطريقه تبان اقرب للطبيعيه..
وقت سأل عن حالتها وحكوله عليها بالتفصيل..
حتى انهم تكلموا عن محاولات يوسف معاها اللي ماحققتش اي تأثير ظاهر..
وصارحوه ان احتمال فيقتها اصبح ضعيف جدا لأن مافي شي قدر يحفزها ويخليها تستجيب...
هو هني فكر في تأثير ماعكس التحفيز..التحطيم..
مادام تسمع وممكن تتأثر..فحتما التأثير السلبي حيمحي أي امل فرجوعها...
وجاتك الفرصه ع رجليها..ع طول استغلها..
بس..مختار ماكانش يعرف..
ان اكبر محفز لأخته الماجده..الألم..الخوف ع من تحب...
سدرة الخوف والالم يقووها مايضعفوهاش..
يخلوها تزيد صلابه وتحدي وعناد بش تغلبهم...
وسبحان من اللي خلا نية مختار تخدمها وتخدم كل من يحبها وتجي ضده..
جعل كيده في نحره..ومكرله مكر يفوق مكره وخلاه يعرف حجمه..
ومازال يامختار حتعيش تحت العقاب وتنعطى معاها فرص وليك حرية الخيار...
🍃وصل في المركز وخش..
وسأل عن حالتها وقالوله انهم يديرولها في فحوصات شامله..
ودلوه ع مكان وجودها حاليا..
وطول مشي غادي...ومجرد ماوصل صار شي فاجئه..
تلاقى مع يوسف اللي كانوا عيونه حمر بسبب دموع الفرح..
وين شافه..جاه يجري وضمه بقوة..
ومختار زاد انصدم..
يوسف ببكي:مش عارف شن نقولك...لكن ماعندي مانقول تقعدوا خوت ومش اي خوت..تباعد عنه وهو شاده وقاله..
وانت وسدره زمان كنتوا روح وحده...
🍃الصدمه اللي جاته من ورا اخر جمله قالها يوسف رداته سنين وسنين لتالي...
🔺️قبل اكثر من 20سنه...
في كوجينة حوشهم..
مختار ولد 16عام كان واقف وفيده الشيته وقدامه كتف خروف بوه طلب منه يقطعه...
هو كان يخاف يقطعه غلط مش زي مايبي بوه وهو كان يبي يدير حاجه يشوف في عيون بوه الرضا عنها..
خدي نفس وحط الشيته ع الرخامه..بعدين خدي موس كبير حاد وقال بارتباك..
/خلي نقص اللحم من هني قبل بعدين نكسره العظام..
واول مابدي يقص جرح صبعه...توجع بقوة..
ع خشة سدره بنت11 بالمكنسه لما شافت الدم قريب ماتت من خوفها..
طلقت المكنسه وجاته تجري وشدت يده وهي تقول..
/وواك حاره..تعالى تعالي..
وخداته معاها لوين مافي سكريه القهوة..
فتحتها وقعدت تحط في القهوة ع الجرح وهي تقول..
/تو يوقف موخا..ورفعت عيونها فيه لقت عيونه مدمعات قلبها وجعها وقالت..خيرك موخا..
هو مسح دموعه قبل لينزلوا وقال..
/شي..
سدره وهي تشوفله بحزن قالت..
/قعمز قعمز..ورفعاته وقعمزاته ع الكرسي..
ومشت بسرعه طلعت وبعد لحظات ولت وفي يدها "شاش"
لفاته ع صبعه..
بعدين شافتله شدت وجهه بإيديها وقرباته ليها وباست جبينه..
هو ابتسم بألم..
اما هي ضحكت وقرصاته من خدوده..بعدين لفت ومشت للشيشمه..غسلت ايديها..وجت للكتف..خدت الموس وبدت تقص..
وهو يشوفلها بذهول..
سدرة:ماتقول لحد حتى امي تمام خليه سر من اسرارنا..
حطت الموس ومشت تجري للباب وسكراته وهي تقول..
/مرات تفيق البايره هديكا وتشوفنا..
ضحك ضحكه خفيفه..
وهي ولت قصت اللحم كله..بعدين طلعت الكتف برا وكسرت العظم بالشيتا وهو مصدوم فيها..
مختار:امتى تعلمتي هدا كله يانتفه انتي!
سدرة بضحكه؛ديما مع جدي وبوي نراقب فيهم..
مختار بضيق..تعرفي كل شي اكثر من خوك الكبير..
سدرة شبحتله وقالت..
/وشن فيها عادي مش لازم كل شي تعرف ديره..
وكملت شغلها اللي داراته ع اكمل وجه..
ولما روحوا بوها وامها الكل كان فاهم ان مختار هو اللي دار كل شي وهي ولاكأنها دارت حاجه..
كانت تبي تساعد خوها وماتبيش تشوفه مكسور حتى قدام بوها..
بس مع الأسف اللي دير فيه سدره كان يكبر في الاحساس بالنقص في نفس مختار وخلا في شي من البغض بادي يكبر في داخله ناحيتها...بغض كبر مع السنين وتحول لحقد عمره حيوصل لربع قرن...
🍃وشن اللي خلا قابيل يقتل هابيل !؟🍃...
🍃🍃🍃🍃🍃
طلعت من حجرة الاستاذه المشرفه وهي مستعجله.
طلعت تليفونها من جيب الجلباب غيرت الوضع من الصامت للعام..بعدين اتصلت بفردوس..
نادى لين فصل..
عاودت..ونفس الشي لين فصل...
اتصلت بعمتها..وكذلك حتى هي مادرتش عليها..
طوبى:اكيده لاهيين..
وصلت برا الكليه ومشت لسيارتها..
ركبت وسكرت الباب..واتصلت هالمرة بأريج وكان رقمها مقفل  مرة وحده..
طوبى بقلق:نبي نعرف شن صاير في جنة ان شاء الله مالهوش عليها بس...
خدت نفس..بعدين شغلت سيارتها وتحركت..
فتحت المنظومه متاع السيارة وكملت باقي درس السيرة اللي كانت تسمع فيه الصبح..
وبدت تردد في الصلاة الابراهيميه سرا وهي تعد بالمسبحه..
شويه ركزت مع القصه كانت هجرة الرسول اللهم صل وسلم عليه للطائف...
قعدت تسمع شن صار فيه هالمرة وهي عايشه القصه مش زي ماسمعتها قبل مرارا وتكرارا من المنهج الدراسي.
نزلوا دموعها وهي متأثرة ع الاخر وتردد في الصلاة على الرسول اللي ياما تعذب وياما صار فيه في سبيل تحقيق اعظم واسمى هدف يسعاله الانسان في حياته..
وصلت القصه عند الدعاء اللي دعاه الرسول وهو في عز ضعفه...
اللي سمعاته بقلبها قبل مسامعها...
"اللَّهُمّ إنْي أَشْكُو إِلَيْكَ ضِعْف قُوَّتي وَقِلَّة حِيلَتي وَهَوَانِي عَلَى النَّاس يَا أَرَحِم الرَّاحِمِينَ أَنْتَ رُبَّ الْمُسْتَضْعِفِينَ وَأَنْتَ رَبِّيٌّ إِلَى مَنْ تَكِلنِي إِلَى بِعِيد يَتَجَهَّمنِي أَمْ إِلَى عَدُوّ مَلِكَته أَمَرّي إِنْ لَمْ يَكُن بِكَ غَضَب عَلِيّ فَلَا أُبَالِي وَلَكِنَّ عَافِيَتكَ هِي أوْسَع لِي أَعَوَّذ بِنُور وَجْهكَ الَّذِي أَشْرَقَت بِهِ الظُّلْمَات وَصُلْح عَلَيْهُ أَمْر الدُّنْيَا وَالْآخِرَة مِنْ أَنْ يَحُلّ بِي غَضَبكَ أَوْ يَحُلّ عَلِيّ سُخْطكَ لَكَ العتبى حَتَّى تَرْضَى وَلَا حَوْلَ وَلَا قُوَّة إِلَّا بِكَ."
دموعها زي السيل ينزلوا..وقلبها كان متألم هلبه..
بكت بصمت..بكت من وسط قلبها المكسور والمجروح..
زي اليوم قبل سنة كانت تستعد لدخول حياة جديده تأملت فيها كل خير ورسمتلها احلى الاحلام اللي رفعتها فوق..فوق هلبه..احلام ع قد ماكانت بسيطه كانت حلوة هلبه...
ضحكت بألم ع بساطتها في هداكا الوقت..
ماكانتش عارفه انها في هداكا اليوم كانت تستعد بش طيح في مقلب كبير...حفرة غريقه والعه فيها النار ومعبيه بالأفاعي...
ياااه..فرق كبير بين 7نوفمبر 2017 و7نوفمبر الحالي..
فرق كبير بين حالها قبل هداكا اليوم وحالها اليوم..
فرق كبير هلبه بين طوبى في هداكا الوقت وطوبى في هالوقت..
حست روحها كبرت عشرة سنين مش بس سنه..
سنة ياما شافت فيها وخلتها وحده تانيه...
خدت نفس عميق ومسحت دموعها..
ورجعت تردد في الصلاة الابراهيميه وتحاول ع قد ماتقدر تركز فيها وهي تسمع في البرنامج...
لعند ماوصلت لشارعهم...
☘خشتله بالسيارة وهي تشوف قدامها..بإستغراب ركزت في السيارات المدرسه قدام حوشهم..
طوبى؛علاش رؤوف موقف سيارته هني!؟..ضيقت عيونها وقالت..واللي قدامها سيارة حسين!..
درست السياره..وبعدين نزلت منها وسكرتها..
وعيون محمود اللي كان مبتسم بسعاده معاها وهي ماشيه بإتجاه حوشهم..
قال بضحكه تعجب؛شكلها مازال ماتعرفش..!
🌼هي وين قربت توصل للباب..
قعدت تسمع في اصوات تصفيق وشتاوات تنقال ويردوا وراها..
فتحت الباب وخشت..
عيونها جو ع جمهور من النساوين متجمعات قدام جنان الكوجينه..سكرت الباب وهي مبتسمه بإستغراب في الزحمه..
قعدت تقدم وع وجهها نفس الابتسامه اللي تلاشت شويه شويه لما سمعتهم يغنوا...
《 طيب في نفظت امراضي  مخليت مكاني فاضي》
هالشتاوة كانت بصوت سالمين..
وقفت طوبى في مكانها وبكل مافيها قعدت ترجف وهي تسمع..
《 يانجمة في الحوش ضويتي ياطيب فينا صحيتي》
نزلت الشنطه لوطا لما حست روحها فشلت ومعاش قادرة ترفعها...
هادوا على من يغنوا!؟ من المريضه اللي يغنوا عليها وقالوا صحت!!؟..
لحظه!
نجاح وعواطف شن يديروا هني !!؟
《 بعد اليبرة والدويان ،،، إن شاء الله ترجع كيف زمان》
فتحت عيونها ع وسعهم لما شافت عمتها ترقص وهي تغني..
《خلوني بنطير طيارة خلوني زي الفرارة》
وتتعالى اصوات الزغاريد...
طوبى قعمزت ع رووس صوابعها وهي تتفرج عليهم بعدم استيعاب..
مش عارفه هي في حلم ولاعلم!
ولازعمه بدت تحلم احلام يقظه بهاليوم اللي راجاته شهور وشهور...!؟
معقوله تعبها النفسي زاد عن حده وخلاها توصل لهالحاله!؟
"طوبى"
شافت الانظار كلها توجهت ليها..
وعمتها جايتها بسرعه وهي تقول ببكي وفرح وعياط..
"سدرة ناضت ميميتك ناضت"
غمضت طوبى عيونها بشده..بعدين فتحتهم وتأكدت انها ماتحلمش..
قعمزت قدامها عمتها ع ركابها وضمتها وهي تقول ببكي..
/طيب فيك وفينا..طيب فيك وفينا يابنتي..
نزلوا دموع طوبى..وشويه وبدت تشوف في الدنيا كلها ظلام بعدين معاش وعت بشي...
🍃🍃🍃🍃🍃🍃
"سبحانك ياربي قادر على كل شي"
عمر:سبحانه..راهو حالتها تعتبر من الحالات النادرة اغلب اللي يطول في الغيبوبه مايفيقوش..
مغليه:من يومهم بنات الواعر ماينقدروا بالذات هادي مايغلبها شي..
عمر بضحكه؛لاحول ولاقوة الا بالله..
مغليه برفعة حاجب:وخيرك حمقت انت !؟
عمر بتعجب:اني!!؟
مغليه قعدت تشوفله من فوق لتحت وقالت..
/انت باين عليك فرحان اكثر من صحاب شان..
عمر بضحكه:والله يام مافي واحد فرحان اكثر منهم غير ولدك المهدي الراجل وزع بكلاوة ع شوارع المنطقه مش غير شارعنا..
مغليه:ايييه ع يامي السود المعججات وخلاص..تي اني نحسابه خلاص نساها..
عمر؛من ينسى مني! المهدي ينسى سدرة!؟ تي كانك ماتعرفيش ديما يسأل عليها..
مغليه بصدمه:يسأل في مني!؟
عمر:يوسف ولد عمها..
مغليه حطت ايديها ع راسها وقال..
/ياحيه وحيه عليك يا مغليه..نزلت ايديها وقالت..شن مدايرت هادم شن دايرات فيكم..لالالا اللي انتم فيه مش طبيعي بكل..
عمر بضحكه:طلعيني منها..
ع خشة نضال وهو ياكل في طرف بكلاوة ويغني..
/جيبها ياسيدي الجياب جيبها..
مغليه:اهو جي المسحور الاخر..شن اللي فيدك هدا
نضال بضحكه:بكلاوة يابكلاوة انت..
مغليه؛وخيرك تضحك هكي لين فمك بينشرك!
نضال بربكه:عادي يام اني ديما نضحك مش جديد عليك..
مغليه وهي تشوفله بربع عين:ايه مش جديد عليا ايه..
خش الجالي وقال بضحكه..
/المهدي ولى مراهق بالرسمي..
مغليه:شن دار تاني!؟؟.
الجالي بضحكه؛يوزع في البكلاوة يام..وين فات من حداي سمعته يغني..جيبها ياسيدي الجياب..
مغليه ناضت وهي تقول بعصبيه...
/اني اليوم مانيش ماشيه لعيت الصيد مش ماشيه..
ومشت طول طلعت من حداهم وهما يضحكوا..
شويه تنهد عمر وقال..
/تراهنوا ان اللي في بالي بيصير..
نضال:كان زي اللي في بالي مش حنراهنك اني معاك..
الجالي:لكن بالرسمي فضايح..
نضال:الحب ياغالي الحب مهناكش معاه عقل..
الجالي لما سمع نضال شن قال سرح وهو يشوف في الفراغ..
وعمر مركز معاه..
🍃🍃🍃🍃🍃
وبعيد عنهم في نفس الشارع..
اختهم نسرين في حوشها..
مقعمزه بروحها وتبكي بالعبره..
تبكي فرح..قهر..ندم...وخوف..
تمنت تكون في حوش عمها لطفي فهالوقت وسط احباب سدرة وفرحانه معاهم...
بس الشي هدا يقعد مجرد امنيه مستحيل تتحقق..
خش عليها راجلها وهو مروح من برا ومعاه يحيى ومحمد ولدها اللي جايبه معاه مفاجأه ليها ..
بس وين شافها تبكي خلاهم ومشالها طول قعمز جنبها وهو يقول بخوف..
/نسرين!
ونسرين اللي لقت امانها فيه ارتمت في حضنه وهو احتواها بحنانه وقعد يهدي فيها...
ومحمد ولدها يشوفلهم بإبتسامه...
🍃🍃🍃🍃🍃
صوت جنة وهي تناغي في الدار كان واصل مسامع امها اللي كانت تصلي في ركعتين شكر لله..
تصلي وابتسامتها ع وجهها ودموعها زي السيل..
وين سجدت من قلبها قعدت تقول
"لك الحمد والشكر..لك الحمد ياربي..كلمة الحمد شويه في حقك لونحمدك عمرين فوق عمري مانوفيك حقك..ياحنان يارحيم ياودود يالطيف..نحبك ياربي"
ورفعت من السجود والابتسامه والدموع مش مفارقات وجهها..
كملت الصلاة..وناضت طول لجنة رفعتها من سريرها وهي تقول..
/خويله فاقت ياروحي واخيرا فاقت ياقلبي وربي استجابلي وحيخليها تربيك معاي زي ماربتني وتولي بنتها زي امك..
ضمت جنه وهي تقول..ااه يابنتي ياريتها جنبي توا راني بوستها وضميتها وشميتها ومافارقتش حضنها بكل..خالتك هادي روحي ..ضحكت وقالت وحتى انتي روحي..امك قطوسه بتلاته ارواح..وقعدت تضحك..
بعدين تنهدت وقالت..
/هي خل نحطك ونبدل حوايجي بش نطلعوا...
🍃وبرا..
ماقعدش في الحوش الا اهله وكلهم كلامهم عن حدث اليوم اللي نساهم عقد القران اذا العروسه بروحها نساته..
مطيره؛قال يوسف شويه وبيبعت فيديو..
فايزة بنفاذ صبر..
/ياربي مش طايقني صبر..
ضمتها صفاء وباستها وهي شدت في بنتها وكانت مبتسمه..
فردوس ودموعها في عيونها..
/ااه ياربي تقول نحلم والله لتوا مش مصدقه..
غرفه بضحكه؛كلنا نفس الشي..
اريج بضحكه:اسكتي انتي يامتاع الكشايف..
ع جية طوبى وهي رافعه جنة في حضنها قالت بضحكه..
/شن دارت؟
كلهم قعدوا يشوفولها كيف كانت لابسه فستان ياجوري كم ضيق من فوق وواسع من تحت وفي النص فيه حزام ع هيئة سلسال ذهبه..
رفعه شعرها ذيل حصان وحاطه مكياج ناعم..
كانت ع بساطه طلتها مبهرة للعين وجنتها زايده الزين زين..
كلهم ابتسموا ببهجه واريج كملت تقول..
/ياحنه بعد ماسمع رؤوف جي وقف في الجنان ينادي في جدي..تطلعله زي المهبوله وتتغمره..
طوبى بضحكه صدمه؛راكم تقولي جدي شافهم!؟
غرفه بضحكه خجل:لالا باعدني رؤوف وطلع هارب..
قعدوا يضحكوا..
سالمين بضحكه؛والله من الفرحه قريب طلعت ضبطت الحاج علي..
ضحكوا وسميره قالت..
/مظني درتها ياكبدي قعدت نمشي ونتغمر مانعرفش مني من مني..
مطيره؛حي عليك ترسمي ع بوي نشردك ..
قعدوا يضحكوا..
سميره؛هو الحاج علي سموح لكن خسارته كبير هلبه كان هدا والله ماخليته وانتي ان شاء الله تكلبي..
ووسط ضحكاتهم ع كلام سميره رن تليفون مطيره بنغمة رساله واتساب..
هي بلهفه كبيره..
/يوسف يوسف بعت الفيديو..
كلهم التموا حواليها ماعدا طوبى اللي كانت حاسه قلبها بيطلع من ضلوعها..
فتحت مطيره الفيديو وهي ترعش..
وتشوف وهما معاها.. في سدرة متنسده بمخده وهي راقده..
تبان تشوف لروشن جايها منه الضي..
سمعوا يوسف ينادي عليها..
"سدرة"
حركت عيونها ناحيته..
هما كانوا مش مستوعبات قعدوا يبكوا بفرح وألم في نفس الوقت ع حالها..
وقف الفيديو..تباعدت فايزة وحطت ايديها ع وجهها وهي تبكي بالعبره..
وانقلب جوهم في لحظه وقعدوا كلهم يبكوا..
طوبى اللي كانوا دموعها ينزلوا..حطت جنه ع الفراش ..
وناضت لعمتها وهي تقول..
/ترا نشوف عمتي..
مدتلها التليفون..
خداته طوبى بيدها اللي ترجف..
وفتحت الفيديو..
لما شافتها حست للحظه ان قلبها حينفجر من قوة الدق..
اللي شافاته زاد فرحها اكثر واكثر..
تفكرتها شكلها لما سافروا بيها..وتفكرت الصور اللي كانت توصلها من يوسف..
كلهم كانت فيهم بوضع واحد..راقده وبس..
بس توا فايقه وتحرك في عيونها وتستجيب!!
طوبى بفرحه من بين دموعها..
/من قال بيه قولولي..من قال تفيق بكل!!؟ كلنا كنا نتمنوا هاليوم شهور وحني ندعوا..شهور وحني حاطين ايدينا ع قلوبنا..كلنا كنا نتمنوا فيقتها لكن من خوفتا قعدت نراجو في خبر يفجعنا عليها..واهو الحمدلله ربي ردهالنا...شوق خير راهو شوق خير..في ناس اخرتهم كانت موت وهي ربي ردهالنا..وتو مع الوقت تتعالج وتولي زي قبل واحسن..وتفكروا كلامي هدا..وين تروح وتقعمز معانا هني قولولها طوبى قالتها..
كلامها اثر فيهم هلبه وخلا فايزة توقف بكي وهي تشوفلها بإبتسامه حب..
هي ضحكت وبدت تغني بنبرة مرتعشه بعض الشي..
/هالنهار تمينته طلبت العالي ولقيته..
وقعدت تصفق وتليفون عمتها في يدها وعاودت غنت نفس المقطع..
وهما قعدوا يردوا وهما يصفقوا..
وهي تمرر في نظرها عليهم بإبتسامة فرح..
ثبت نظرها ع سالمين اللي كانت تشوفلها بحب ودموعها تنزل..
دارتلها حركة بخشمها خلت سالمين تضحك..
"السلام عليكم"
التفتت طوبى..
شافت نبيله خاشه ومعاها اميمه الزوز كانوا مبتسمات بفرح..
بس اميمه دموعها كانت تنزل وهي تشوف لطوبى..
طوبى اللي مشتلها بسرعه وضمتها بكل قوة..
واميمه ضمتها اكثر والزوز قعدوا يبكوا..
واللي حواليهم كانوا متأثرين ع الآخر وهما يشوفولهم...
🍃🍃🍃🍃🍃
"يعني مازال مطوله الحكايه"
جهينه:طبيعي يوسف..هو البنادم العادي لما يفيق من النوم يبيله ساعه ع مايصحصح ويستوعب ويروق..يبال البنادم المريض اللي ليه شهور راقد..اكثر من تسعه شهور وهي راقده لاتكلمت لاشافت لاكلت لاشربت لاتحركت..تبيلها وقت ع ماترجع تدوي عادي وتتحرك وتعيش حياة طبيعيه..حني توا خشينا في المرحلة الثانيه الاولى ع حسب ماقال البرفسور كانت قبل هادي لما شافها دكتور اياد وقت حركت حواجبها هي ممكن من قبلها كانت باديه تفيق..
اندهش يوسف من اللي سمعه يعني اللي داره الشهور اللي فاتوا جاب نتيجه ماكانش ع الفاضي..
جهينه:وفي المرحلة هادي حيكون صعب عليها الكلام حتستجيب وقت تناديها ممكن تتفاعل بملامحها شويه..انت حتقعد دير اللي كنت دير فيه قبل وبجهد مضاعف هالمرة بش ترجع تتكلم ولو كلمات بسيطه..
يوسف هز راسه وقال؛بعون الله..بس نبيك تكوني صريحه معاي في شي تاني؟
جهينه؛حاليا مانقدر نقولك شي خل يفوتوا هالاسبوعين وبعدين يصير خير..
هو تنهد بضيق وقعدت ساكت...
جهينه؛يوسف انت اخر مرة فاقد الامل انها تفيق وشوف اليوم شن صار..خليك متفائل وصبور..واني معاك..
شافلها شويه بعدين ابتسم..
وهي بادلاته الابتسامه بعدين قالت..
/خوها وين؟
يوسف:نفسيته تعبت شويه روح بش يرتاح..
في بال جهينه تساؤلات عن مختار فضلت تسكت عنهم حاليا
🍃 اما اياد..
فكان يكلم في المحجوب هاتفيا ويشرحله عن وضعه..
🍃زي ماقاعده دير أميمه اللي عطتهم امل كبير وريحت نفسياتهم اكثر بكلامها..
🍃🍃🍃🍃
آلاء بفرح؛قداش ليا مافرحتش هكي ياعزيز بنطير طيارة..
"لابالله عليك لا خليك في مكانك ماصدقت حصلتك"
قعدت تضحك وهي تقول..
/مبردك..
وفي الدار اللي مقابلة دار المعيشه اللي فيها الاء..
كانوا فايزة وسميرة مع مطيره وهي تلبس لصفاء في الردي البودري وهما يغنوا عليها..
فايزة قلبها مليان فرحه وهي تشوف لبنتها..
وصفاء تسمع في الغني وتشوف لمطيره كيف تلبس فيها وهي مبتسمه بسعاده..
🍃بعد كملت..
طلعوا بيها البنات لسيارة طوبى ركبت وهما يغنوا عليها وركبوا معاها خواتها وطوبى..
شويه وطلعت بيها طوبى..ولحقتها اريج وهي رافعه سميرة واختها آلاء..
ووراهم سيارة حسين اللي كان مش عارف وين يحط فرحته..
ويدوروا بصفاء شوارع المنطقه وهما قالبينها بكلاكسات..
وفي سيارة اريج مشغلين اغاني اعراس وسميره تهيج...
اما في سيارة طوبى شغلت اغنيه..
"يامحلا الدنيا لما تبي تجمع بينهم"
برغم انها ولت مربوطه بألم عندها بس حاولت تتجاوزه بفرحتها اللي عمرها ماعاشت زيها في هاليوم...
🍃🍃🍃🍃🍃
بعد العصر..
في جامع المنطقه اللي كان مزحوم بالرجاله ومعاهم المأذون الشرعي..
بدي عقد قران اشرف وصفاء..
وكيل صفاء خالها ووكيل اشرف بوه..
والمأذون في مقعمز في نص ويقول في كل كلام كل مرة يردد واحد فيهم..
واشرف يراجي ع اعصابه..
وسط هدا كله..نضال اللي كان يشوف للمشهد تفكر يوم عقد قرانه ع قداش كان فرحان وقتها سعاده الدنيا كلها في قلبه..وتوا قلبه هدا تعيس..تعيس ع الآخر..وقاعد يخفي في هالتعاسه بضحكته المزيفه..
غير نظره لاسكندر اللي كان حاضر وقعد يشوفله بنظرات حاده كلها غيره وكان يلقى يطلع روحه...
اما الجالي فكانوا عيونه بين حسين والتارقي...
حسين في نظره غريمه..لكن التارقي عدو..
وفي الحقيقه التارقي حاليا غريمه الوحيد..غريمه اللي مايبيش يحسبه موجود بين الحاضرين ومتجاهل وجوده تماما ويزيد يقهر فيه...
تمت مراسم عقد القران وقال الشيخ الدعاء الحلو المحبوب سماعه..
"بارك الله لهما وبارك عليها وجمع بينهما على خير"..
🍃🍃🍃🍃
والشارع يصدح بأصوات الزغاريد والاغاني والدربوكه اللي جايات من حوش لطفي الواعر وحوش الصيد..
🍃في حوش الصيد كانت نجاة حاضره مع عزوزتها..
وواقفات هي وحماتها جنب بعض يصفقوا ويقرموا..
خديجه؛ياودي حتى كان فاقت منظني تولي طبيعيه زي قبل ليها شهور في غيبوبه..
نجاة:ايه ومرات تكمل عمرها ع كرسي متحرك اكيد الضربه دارتلها مضاعفات..
خديجه برفعة حاجب؛ستي اخر همي ولايعنوني في حاجه المهم توا يوم غدوة..
نجاة ابتسمت بمكر وهي ساكته وشويه قالت...
/حماتك عواطف مش مزبوطه..
خديجه؛ايه باين فيها الهم هادي اللي تنزل ع ضرة..
شافتلها نجاة ع جنب من فوق لتحت...
وخديجه تصفق وكأنها ماقالت شي..
وعيون نجاح وسميره عليهم ونظراتهم كلها امتعاض..
🌼وفي حوش اهل العروس..
الكل سلموا عليها وهنوها..وهي فرحانه من قلبها...وين جو امها وخواتها سلموا عليها..كان ضروري من ذرف الدموع..بس الدربوكه اللي شدتها وحده من الجارات وبدت تدربك كفكفت هالدموع وبدلتها بملامح الفرح لما رجعوا دارو شوط جديد..
🍃وقف هالشوط لما انسمع صوت النوبه وهي تضرب..
والبنات انطلقوا لفوق السطوح بس يتفرجوا من ورا الشباك متاع المخزن...
🍀النوبه جابها المهدي هديه فاجئ بيها اشرف..وطبعا كان عنده من وراها غرض تاني...
تاله:حي مالك!!
مروة قعدت دور فيه بعيونها لين جو عليه وهو لابس عربي وطاقية بسكل ونظارات..
تاله:خاطري مرة نشوف من غير نظارات..
مروة فنصت فيها وقالت؛اسكتي خيرلك..
وجنبهم صفاء تتفرج ع اشرف اللي كان طالع وسيم بالعربي والشيانه زاداته جاذبيه كان واقف مربع ايديه ويتفرج وهو مبتسم..
واريج جنبها تتفرج ع نضال اللي قالب الدنيا ع راسه مع شباب الشارع...
شويه قدمله المهدي خداه ع تركينه وقعد يكلم فيه..
وهو يضحك...
وشويه وولى المهدي وقف قدام المطحن حدا صحابه وهو يتفرج بإبتسامه حلوة..
وربيع وعبد القيوم وسامي اللي عرف القصه اليوم بس يراقبوا فيه وهما مبتسمين..
نضال وقف النوبه وبدي يغني بصوت عالي..
/جيبها ياسيدي الجياب جيبها..
جيبها حتى من الابعاد جيبها..
ايه والله جيبها..وان شاء الله يقسم نصيبها..
واشر ع الفرقه رجعوا يعزفوا مرة تانيه ونضال وولاد الشارع يغنوا في نفس الاغنيه...
واريج تتفرج وشاده دموعها بالسيف وآلاء تشوفلها بحزن..
صفاء:اعوذ بالله من الشيطان الرجيم وجه اللي اسمه الجالي مش طايقه نشوفه يابال يخش يرقص في نوبه فاتحتي!
مروة بضحكه:هدا شن جاه هبل!!؟
اريج:من يوم يومه..
آلاء وهي تضحك؛زعميته فرحان وحياتها حلوة..
صفاء؛طيح سعده ومزاله فضح روحه بروحه يوما قريب يموت ع طوبى..
اريج:ان شاء الله والله يموت متحسر عليها ياالله...
🍃عبد القيوم بإزدراء..
/سرافه معفنه..
ربيع شد ضحكته وهو يشوف للمهدي..
بعدين سمعوه وهو يغني معاهم..
ابتسم عبد القيوم من قلبه وقال بصوت مسموع لربيع بس..
/اااه من الحب..
ربيع شافله بطرف عينه..
وعبد القيوم عرفه سمعه شافله بنفس النظره..انحرج منه وغير نظره لجماعة النوبه..
🍃وعند النساوين في الجنان وسط الخيمه..
كانوا يرقصوا ويصفقوا مع النوبه..
وعمتك مطيره ماغيبت جهد وكل مرة طلع وحده ترقص فيها لين جت لطوبى واميمه جبدتهم جبد وحكمت عليهم يرقصوا..
هما الزوز ضحكوا بإستسلام وبدوا يرقصوا..
في الاول كانوا متحشمات بعدين انطلقوا...
علت مطيره صوتها وهي تغني..
"هدا هو هدا هو هدا هو اللي نبوه"
سمعوها الشباب وقعدوا يغنوا معاها..
"هدا هو هدا هو هدا هو اللي نبوه..
هدا هو الجو الصح..هذا هو اللي يصلح"
وطوبى ترقص وهي فرحانه واللي حواليها يصفقولها..
ع خشة العروسه ومعاها باقي البنات وين شافوا طوبى ترقص صاحت اريج وقعدوا يصفقوا بحرارة..
وطوبى تزيد تتحمس معاهم...
"العيله شايشه ياناس العيله ترقص في الكياس"
معاش تحمل ربيع خش معاهم..
رؤوف بضحكه:استغربت كيف شد روحه.
ضحك عبد القيوم..
وجنبهم اسكندر يشوف لربيع كيف يرقص مع نسيبه نضال عيونه ركزوا ع نضال وقعد يشوفله بنظرات حاده..
نفس نظرات محمد المهدي لمالك اللي كان واقف يتفرج بإستمتاع..
🍃ومايندريش محمد بنظرات راما اللي تلاحق فيه هي تشوفله من الروشن ونجاة تراقب فيها..
شويه سمعت وحده من الجارات قالت..
/الجالي ولى منطلق مش زمان..
نجاة:عنده اني وماتبيشي ينطلق..
مغليه وخديجه ابتسموا غصبا قدام الناس..
وفي من ضحك ع كلمتها وفي من كان مش طايق وجودها اساسا..
خشت للدار وسكرت الباب وردت ع مكالمته..
هو قال..
"حرم اشرف الصيد"
صفاء بإبتسامه حب..
/نحبك نحبك نحبك نحبك نحبك نحبك نحبك نحبك..
سمعت صوته ضحكته كان عالي ومن قلبه..
صفاء بضحكه؛هدا وين ارتحت..
" واني نموت فيك موت بابنتي موت"
وهي تضحك بخجل وقلبها يرفرف وسط ضلوعها....
🍃🍃🍃🍃🍃🍃
"اهلا رضا ازيك"
رضا وهو واقف في فيرندا الفندق اللي قاعد فيه..
/الحمد لله..انتم شن حالكم؟
"الحمد لله بخير"
رضا:مشت للخدمه؟
"لا"
رضا:كلت كويس؟
"اه"
رضا؛امينه.!
"والله العظيم اكلت وكتير كمان حسيت انها حطت غلها كله في الاكل"
ابتسم وقال.
/اهو جي بفايده..باهي شن دير توا؟
"بتشوف مسلسل في التلفزيون"
رضا؛باهي تمام..خليك عينك وباتي حداها وردي بالك تطفي الضي تخاف من الظلام كانهدا خلي السهارات مفتوحات بس ..
هي بضحكه ردت..
"حاضر"
رضا:كان نعرف علاش تضحكي..
"مجنونه"
ضحك ضحكه خفيفه وقال..
/تصبحي ع خير..
"احلام سعيده"
ابتسم وسكر الخط..بعدين تنهد وولى خش داخل..
قعد يمشي لين وصل في السرير لقي مختار راقد بعد ماشرب شيشة خمرة كامله..
حرك راسه يمين ويسار اسفا..بعدين قدمله وغطاه كويس..
ومشي تمدد ع الكنبه اللي جنبه....

#انتقام
#طوبى

....يتبع.... 🍃🍃🍃🍃🍃