طوبى "جنة طوبى"
#جمان_فريد
#الجزء_السابع_والثمانين "انتقام/لعبة الإنتقام"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 " ما حدا اختار غلَط ؛ بس الناس كلها
ب البدايات بتفرِش الأرض وَرد " 🖤 !🍃
_________________________________________
في غرفة المكتب الكبيره...بأثاثها الفخم الكلاسيكي..
تصدح انغام سنفونيه الحرب..وهو واقف يشوفله..
يشوفله ويسمع فيه شن يقول وهو يرتب في الجانب المظلم من رقعة الشطرنج..
مختار وهو يرتب في القطع ع اقل من مهله..
/في الحرب النهايه يكتبها الطرف الاقوى..وطبعا هالنهايه تكتب بعد صولات وجولات..فيها هزيمه وفوز وانسحاب..وكر وفر...يقعدوا الطرفين يضربوا في بعض ضربه ورا ضربه ضربه ورا ضربه لين تخور قوة واحد فيهم وياخد الضربه القاضيه..وينتهي...وحط قطعة الملك المظلم في مكانها..
بعدين حط رجل ع رجل وهو يقول لرضا..
/وحده من اكثر الاساليب جدوى في الحروب..هي التحالف مع عدو العدو..والاجدى ان لو يكون هالتحالف خفي يخليك تضرب عدوك بعدوه ..في الوقت اللي يكون فيها عدوك لاهي بيك تجيه الضربه من حيث لايحتسب..
رضا:علاش ماتكونش للحرب نهاية تانيه..السلم..
بدت ع وجه مختار ابتسامه واسعه وهو يقول..
/الخطوة اللي تسبق الحرب هي محاوله مد يد الصلح للسلام..
رضا:وتكون خطوة اخيره عادي..
مختار قعد يشوفله بنفس الابتسامه..
ورضا حافظ هالابتسامه حفظ ع قد ماتبان بشوشه في حقيقتها تكون كلها رعب..
رضا:انسى..
هز راسه وتبدلت ملامح ابتسامته لملامح عاديه وهو يقول..
/خدمتك ع المناقصه ادهشتني..بجديات درت جهدك كله فيها..
رضا:اكثر حاجه تمنيتها الفترة الاخيره وكنت نبي نحققهالك ع قد مانقدر.
مختار:عزيز وغالي يارضا..عزيز وغالي..ايه حقه تراضيتو انت وصابرين؟
رضا هز راسه وهو ساكت..
مختار:عينك عليها رد بالك..اني عارفها مستحيل تفكر في اي شي..لكن اني مش ضامن اللي برا..
رضا:تحت عيوني..
مختار:كويس..نفكر نعطيك اجازة بعد المناقصه ونبعتك للجزائر..
عقد رضا حواجبه وقال..
/لا..
مختار؛حاول..
رضا حرك راسه بالرفض..
تنهد مختار وقال:براحتك..تقدر تمشي..
هز رضا راسه بعدين مشي طلع من المكتب وعيون مختار معاه لين سكر الباب وراه..تنهد..وغير نظره لطاولة الشطرنج..عقد حواجبه بغضب وبين عيونه مشهد كل مايختلي بنفسه يشوفه...
🍃🍃🍃🍃🍃
مكتبه كبيره وحديثه في العاصمة..روادها قلة..
وهي وحده منهم..اتفقت معاه تشوفه فيها..ماكانش في بالها وهي جايه اي شي غير هدفها اللي يخص الهوايه اللي كرست حياتها كلها ليها..
🍃هو خش للمكتبه مرر نظره بإعجاب حواليها...بعدين قعد يدور بين الموجودين عليها..
عطاته علامه..الجاكيت البنفسجي..لقوها عيونه لما شافوا العلامه..
هو طول مشالها..وصل في الطاوله وقال بهدوء..
/السلام عليكم..
سمعت صوته اللي كان رخيم ومميز..قامت عيونها وشافاته..
شافت شاب اسمراني ملامحه بين القوة واللطف..طويل وعريض..لابس جاكيت رمادي غامق ع فانيليه ثقيله شويه رقبتها طويله لونها اسود غامق..وبنطلون من لون الجاكيت..
لفتها هلبه...ابتسمت وردت..
/وعليكم السلام..
هو قال؛سلافه..
هي زادت ابتسمت لما سمعت طريقة نطقه لاسمها مميزة هلبه اكتفت بإنها تهز راسها بإيجاب..
هو قعمز ع الكرسي اللي مقابلها وقال..
/ياريتك اخترتي مكان تاني..
هي بإبتسامه؛ليش؟
هو قال:في كلامنا مرات يصير نقاش ويعلى الصوت
عقدت حواجبها بإستغراب وقالت.
/ليش نحنا جابين نتخانق..
عبد القيوم حط نظاراته ع الطاوله وقال..
/خل نكون معاك صريح من البدايه..مش مقنتع..مانبيش للهوايه اللي نمارس فيها وقت نبي نغير جوي تولي عليا حمل ثقيل..نلقى روحي ملتزم بيها في كل وقت..يخف شغفي ومرات ينتهي ونخسرها..
سلافه بضحكه استغراب..
/اوف! لهالدرجة!؟..شوف يعني انا مثلك هواية وشغوفه كتير فيها وزاد شغفي لما كبرت مساحة وجودها بحياتي..ليش ماتفكر انو ممكن يصير معك نفس الشي!؟
عبد القيوم؛عندي شغف اكبر بغيرها..
سلافه:متل شو؟
عبد القيوم؛نخشوا في الموضوع اللي اصريتي تشوفيني ع خاطره؟
ابتسمت وقالت:ok..اني رحت ع المعرض مثل ماخبرتك من قبل ومالفت نظري غير شغلك.. لفت نظري اتقانك لخط الثلث اصعب انواع الخطوط..وفوق هيك عندك لوحه كاتب فيها آية قرآنية بالرسم العثماني..انت متأكد انك مو دارس هالمجال دراسه؟
عبد القيوم:نرجع ونقولك شغف..الشغف يخليك تتقن الشي اللي تحبه..
هي قالت؛سؤال تاني صغير..امتى بلشت تتعلم؟.
عبد القيوم؛من عمر العشرة سنوات في القرآنيه في عندي خال كانت عنده موهبه خديتها منه ومشيت فيها..
سلافه؛صرت تبحث بعدين وتتعلم اكثر صح؟
عبد القيوم: اكيد..
سلافه:اكثر شي اثار اعجابي..هو انك مانك عربي بس عندك شغف للكتابه بالخط العربي..
عبد القيوم:الحرف العربي مايشبه غيره..اللغه العربيه عندها شخصيه..لها هيبه..ماتلقيهاش في غيرها مع احترامي للغتي الام اللي ليها مكانتها في قلبي..بس مكانة الخط والحرف اللي نزل بيه القرآن لايعلى عليها..
هي تسمع فيه وتشوفله كيف يتكلم بثقه وقليل النادر مايحط عيونه عليها نظره وهو يتكلم يكون حوالين المكان..ويتكلم بيده اللي فيها الخاتم والساعه ركزت ع الخاتم..فيه كتابه..
غيرت عيونه ليه وقالت في نفسها..
"ماشفت بحياتي مثل هيك..."
عبد القيوم:برضو ماعرفتش انتي شن تبي مني بالزبط؟
هي ابتسمت وقالت..
/رح قلك..في ورشة للخط العربي رح تقام بمصر بنص شهر ديسمبر..
قاطعها وقال؛اسف..ماعنديش وقت للسفر مربوط بعمل ومسؤوليات هنا مانقدرش ولابأي شكل نخليهن..
هي بضحكه:روق روق..كلن 3ايام..مابعتقد انو راح تقوم القيامه لو اخدت اجازة تلات ايام!
عبد القيوم:مرات تقوم..
رفعت حواجبها تعجبا..
عبد القيوم تنهد وقال..اسف الموضوع عندي مرفوض مانقدرش..
ابتسمت بأسف وقالت..
/ok..مارح صر عليك اكثر من هيك..بس بدي اتأمل انو بهالفترة تاخد وقتك بالتفكير ماحدا بيعرف يمكن تغير رأيك..
ناض وهو يقول..
/اسف ضيعتلك وقتك..ومشكورة واجد ع التقدير..السلام عليكم..ومشي طول..
وهي معاه بعيونها المذهوله..مافارقوشي الا لما طلع من المكتبه..بعدين غيرت نظرها للكتاب اللي كان قدامها..يحكي عن الخط العربي..ابتسمت وقالت..بتمنى ارجع شوفك.
كثير بتمنى...
🍃🍃🍃🍃🍃
خش لحوش اهله...
كان هادي زي العاده في هالوقت..
نادى..
/امى...
جاه صوتها من دار المعيشه وهي تقول..
"في دار تقعميز"
مشي طول للدار..وخش..
تفاجأ لما شاف خديجه متمدده ومتغطيه..
/لاباس!
مغليه؛كان تتصل وتسال راك عرفت..
الجالي مشي قعمز جنب اخته حط يده ع راسها وقعد يمسح ع شعرها وهو يقول..
/كنت مشغول مافضيتش نحك راسي..لاباس دوجه خيرك.
خديجه بوجع؛حرق الدم والهم قريب ودرني..
الجالي:راك تقولي محي الدين!؟
مغليه:لاحاشاه مسكين..
الجالي شاف لامه وقال..
/مالا مني!
مغليه:الملعونه اللي قاعد شاد فيها..
الجالي بإستغراب
/من قصدك!؟
خديجه؛بنت الواعر حسبي الله فيها..قرقزت بيك ولادراتلنا قيمة ولاقدر ليله حفله بنت فايزة..ماشيه وتقول للناس قريب نطلق منه وفوق هكي جايه بكامل اناقتها واضح دور في الراجل تبي تزبط امورها..
عقد حواجبه بغضب وقعد ساكت..
مغليه بدت تنزل في دموعها وهي تقول..
/ولا الحركه اللي دارتها لاختك نسرين قهرتني سحنتني..اختك مشتلها تجيب بنيتك بش نشوفها ردتها..مابتش تخلينا نشوفوها حتى خمسة دقايق..بنتنا وحارمتنا منها هالظالمه اعوذ بالله منها هالمسمومه الشيطانه..وقعدت تبكي
خديجه بنبرة باكيه..
/ماترعشيش روحك ميمتي تو يصير فيك زي ماصار هديكا الليله لولا لطف ربي راك بعيد وبر رحتي فيها
مغليه ببكي:اللي صارلك انتي شويه جبتي ولدك مسبع قريب متي..
والجالي يسمع وملامح وجهه زي ماهما
مغليه؛طلقها هالكلبه طلقها وافتك منها وفكنا حتى حني من نسبة حوش المطلقات هدا..
خديجه ببكي:اعوذ بالله منهم ومن الساعه اللي ناسبناهم فيها والله نجاة الا طلعت خير منها الف مرة..نادمه نادمه بنموت اني اللي جنيت عليك ياوخيي..
"خلاص بنطلقها"
الزوز شافوله وهما متفاجئات..
الجالي:ليا وقت نسعى للموضوع..رفعت قضية بش تعطيني المحكمه حق زيارة بنتي...بعت المحاميه صاحبتك لخالها وتفاهمنا نشوفها في حوشه..تنهد وقال..وخليتها توتي ورقه زي ماتقولوا هكي للتفاهم ع الطلاق بالتراضي حطيت فيها مجموعه شروط واليوم ان شاء الله توصلها..
خديجه؛والله احسن حاجه درتها في حياتك..
مغليه؛باهي علاش البنت تشوفها في حوش خالها!؟
الجالي:توا بس ولما تكبر شويه نقدر نطلعها ونجيبهالكم تشوفوها..اليوم موعد اول زيارة..
خديجه:ان شاء الله ماتصيرش مشاكل!
الجالي:لالا خلاص..اني بروحي فديت ومليت نبي نرتاح ونلهى بحياتي وشغلي..
خديجه؛ونجاة؟
الجالي:نبي ناخدها معاي هي والصغار..
مغليه؛بقولي هكي خير..
الجالي هز راسه وقعد ساكت..
خديجه؛برا شوفها..
ناض وقال:لاباس عليك وسامحيني..
خديجه؛انت اللي سامحني وخيي..
هز راسه وملامح الضيق باديه ع وجهه بعدين مشي وطلع من الدار..
مغليه بألم؛حسبي الله ونعم الوكيل..
🍃🍃🍃🍃🍃
وطوبى في هالوقت كانت في الكليه..
طلعت من مكتب الاستاذه المشرفه ع المشروع وهي متوترة..حاولت ع قد ماتقدر تركز معاها بس اللي بيصير اليوم سيطر ع تفكيرها..
مشت طول طلعت من الكليه لسيارتها..ركبت وشغلتها وتحركت طول..
شغلت المنظومه متاع السيارة..كانت الصبح مشغلتها ع قصة من قصص الانبياء ..القصة اللي اليوم بدت تسمع فيها..
قصة يوسف عليه السلام..
قعدت مركزة فيها وهي تسمع..كان واصل في جزئيه محاولات اغواء نساء مصر لسيدنا يوسف..
ابتلاء يوسف عليه السلام هدا كان قوي وممكن الاقوى عليه كرجل..خاف على نفسه خاف هلبه يميليلهم ولو بقدر شعره..
دعي ربه استنجد بيه سأله عونه ونصره..
وربي استجاب لدعائه استجابه عجيبه..
خلصه من بلاء ببلاء تاني..السجن..
راحت في عالم القصه وحست بشعور غريب وهي تسمع فيها..
الاغرب ان توترها كله راح في لحظه وحست وكأن في قوة من داخل قاعده تطلع من اعماقها وتتسرب لكل جزء فيها..
تنهدت وقالت..
/لاحول ولاقوة الا بالله...
ماحستش بروحها الا وهي واصله لفتحه شارعهم..
خشت بالسياره...وين وصلت في حوشهم شافت سيارة الجالي قدام حوش اهله..
درست ونزلت..ومشت بتفتح الباب..
فهاللحظه ينفتح باب الحوش ويطلع الجالي وهومحاوط نجاه ويهدرز عليها وهي ترد عليه..
شافوها الزوز..نجاة شافتله لقاته مااهتمش وقال..
/هيا حبيبتي اركبي وحولي من راسك كل شي زي ماقتلك ربي ردلي عقلي وخلاني نفرق بين الذهب والفالصو..
هي طبعا كانت زي المغيبه..تصدق فيه لأنها تبي تصدق..مش لانها مقتنعه بكلامه..
ركبها السيارة وسكر الباب..
ومشي هو ركب بدون مايشوف حتى بالغلط لجهة طوبى..
وهي هالمرة ماكانتش مهتمه نهائي بارده ومبرده ع الاخر..
بعد ليلة الانتقام ولوا معاش يفرقوا معاها ولايأثر فيها اللي يديروا فيه ولا بأي شكل..
ركبت سيارتها ودخلتها..بعدين نزلت وسكرت الباب..
🍃🍃🍃🍃🍃
وفي مكان اشبه بالجنة..
طبيعه خلابه وهواء نظيف..وهدوء تام...
هي كانت مقعمزه ع كرسيها المتحرك..سرحانه في عالم غير هالعالم..
استاقظت فجأه من سرحانها لما انحطت يد ع كتفها..
يدوب حركت راسها وعيونها جنبها..
شافت يوسف وهو مبتسم بحب ويقول..
/شوفي من جاك..
التفت وقال:قدموا..
شويه وبانت عليها صفيه اللي كانت في حالة لهفه..
وين شافتها حطت يدها ع فمها وقعدت تبكي وهي ترجف..
سدرة لما شافتها بدت ع وجهه ملامح الحنين والدموع عبوا عيونها..
لكن..لما بان عليها حسين..
تبدلت ملامح وجهها لعدم الاستيعاب..وفجأه بدت تتنفس بسرعه...وارتسمت ع وجهها ابتسامه فرح كانت تصارع عضلات وجهها الخامله بعض الشيء..
يوسف اتفاجأ واستغرب في نفس الوقت..
اما حسين فكان يشوف فيها ومش مصدق دموعه نزلوا غصب عنه..
هي قعدت تأشرله بعيونها وهي تسكر فيهم وتفتح..
يوسف بلهفة فرح؛اقربلها ياحسين اقرب..
طول مشالها وضمها وحضنه..
وسدره غمضت عيونها وهي تبكي..
صفيه تشوف لهالمشهد وهي متأثرة وتبكي..بس يوسف كان مستغرب ويفكر علاش كانت مشتاقه لحسين اكثر من صفيه!!!؟
🍃🍃🍃🍃🍃
خشت لدارهم وهي تمسح في ايديها بالفوطه..
شافت اختها مطروحه ع السرير وتشبح للسقف وهي مبتسمه وسرحانه..
ضحكت بإستغراب وقعمزت ع السرير وقالت..
/سلافه..
سلافه؛اممم..
قالتلها؛من لما رجعتي وانتي ع هالوضع الغريب شوصاير معك وليك احكي!؟
شافت لأختها بعدين ناضت قعمزت وربعت رجليها وهي تقول..
/متذكرة الزلمة اللي كنت عم بحكي معو مبارح اللي قلتي عنو ع شو شايف حالو..
اختها بإنتباه؛ايه صحيح شفتيه اليوم!؟
ضمت ايديها لبعض وقالت بضحكه..
/ايه..
اختها بآستغراب..
/وليش كل هالقد مبسوطه !!؟..
بضحكه قالت؛شو بدي لاحكي يالبانه..بالاول روحي سكري الباب..
اختها ناضت تجري من الحماس وولت للسرير وقعمزت عليه وهي تقول
/يللا احكي..
تنهدت وقالت..
/اما شو رجال يالوبي..بحياتي ماشفت هيك..بتعرفي اول ماشفتوا غنت براسي نجوى كرم عاشقه اسمراني
لبانه بضحكه؛اسمراني؟
سلافه:اسمر طويل عريض..انيق كثير ومبين انو بيحب الالوان الغامقه...بس مو هدا المهم..الشخصيه يالبانه الشخصيه..راكز محترم..وكثير واثق من حالو وهو بيحكي..بس بتعرفي شو اكثر شي جذبني ألو؟
لبانه بإنسجام؛شو؟
سلافه؛انو ماكان عم يطلع فيني وهو عم يحكي..
لبانه بضحكه؛لهالدرجه مو طايقك!؟
سلافه؛ياهبله..من الاحترام ياغبيه الاحترام..لكن متل ماقلتي..شايف حالو شوي وكان مبين عليه انو متوتر..
لبانه:الباين انو اول مرة بيلتقي بوحده..
سلافه بفرح:فكرك هيك!؟
لبانه بضحكه:طيب شو صار اقنعتيه بالآخر!
هي بضيق؛ لا..
لبانه؛يعني هي اول واخر مرة؟!..
تنهدت وسرحت في الفراغ وقعدت ساكته وهي مضايقه..
"سلافه لبانه الغدا جاهز"
لبانه ناضت وهي تقول؛انسي..وتعي تغدي..
ومشت فتحت الباب وطلعت..
اما سلافه ابتسمت ابتسامه خفيفه وين تفكرت طريقة نطق التارقي لإسمها..رجعت تنهدت بعدين ناضت ومشت لحقت اختها..
🍃🍃🍃🍃🍃
واقفه ع اللاندينو وتغسل في ماعين الغدي وهي تغني..
/شو جاني شو جاني من حبك يااسمراني..
ع خشة مرت خوها قالت بضحكه..
/عطك حبه..
حنان بفجعه؛خلعتيني!..
مرت خوها؛شن صار في موضوع خدمتك مع بنات الواعر؟
حنان؛كلمت طوبى قالت تعالي غدوة نتفاهموا..
مرت خوها:ربطي حبالك معاهم كويس هادوا للتارقي زي ماليه..ولما تخدمي معاهم تبدي تطلعي وتخشي وتعوديه يشوفك تفلحني واعرفي كيف تجبيه تربحي..
حنان؛ان شاء الله ان شاء الله..
مرت خوها تنهدت ومشت طلعت من حداها.
حنان؛بيك وبلاك هدا اللي بنديره..تنهدت وقالت..ااه ياربي قداش نحبه..يارب يارب خليه نصيبي يااارب...
🍃🍃🍃🍃🍃
والتارقي فهاليوم كان متوتر ومش ع بعضه..
عقله مايفكرش الا في مشية طوبى بجنة لحوش خالها بش يشوفها بوها..
عبد القيوم من لما سمع بالموضوع هدا من المحجوب وقلبه مقبوض...
واجهه المحجوب بحقيقة اللي صار معاه والتارقي اقر انه انضرب ضرب مادارش حادث..وحكاله عن الكلام اللي صار بينه وبين الجالي ليلة حفلة زواج اشرف..
ومنها المحجوب حكاله عن مستجدات وضع الجالي مع طوبى..حاول عبد القيوم يحذر المحجوب من الجالي بس المحجوب ماباش يعطي الموضوع اكبر من حجمه وطمنه انهم حاسبين حساب كل شي...
🍃ومن بعد الغدي كانت طوبى في حوش خالها بجنة..
تراجي في موعد الزياره وفي قلبها شي من الخوف..وهدا الطبيعي..
وحان وقت الزيارة..وجي الجالي مع خوه عمر لحوش محجوب..
عمر قعد في السيارة..والجالي خش للحوش والمحجوب استقبله استقبال عادي..
☘مكره اخاك لا بطل☘
🍃🍃🍃🍃
خش المحجوب للصالون اللي كانوا فيه طوبى ونبيله وجنه في قعمازها..
المحجوب:نوضي خالي..
طوبى بإستغراب؛علاش!؟
المحجوب؛قال يبي يتكلم معاك شويه..
نبيله؛في شني؟
المحجوب:شكله اللي فكرتي فيه صح ياطوبى..
طوبى حست بفرحه وقالت..
/زعمه؟
نبيله بتفاؤل:ان شاء الله يارب..خلاص نوضي خودي بنتك وبري مع خالك..
طوبى ناضت وهي متحمسه ومتوتره في نفس الوقت..
رفعت جنة بقعمازها ومشت مع خالها وتوجهوا للمربوعه...
🍃وصلوا فيها..
خش المحجوب هو الاول..
وطوبى خشت بعده بجنه وهي متصنعه القوة والثبات ومن داخلها كانت ترجف خوفا..
هو لما شافهم ناض وقف وعيونه ع بنته..
طوبى:السلام عليكم..
الجالي بدون مايشوفلها؛وعليكم السلام..
قدمتله ومدت القعماز..
هو خداه وعيونه ع بنته وكان مبتسم بشوق وحب ويقول..
/حبيبة بابا..
مشت طوبى قعمزت مقابلاته..
وخالها واقف يراقب في الجالي..
حط الجالي قعماز جنه ع الصالون..فتحه وطلعها منه وضمها وهو يشم في ريحتها..
شاف المحجوب لطوبى اشرلها بعيونه انه بيطلع..
هي هزت راسها بالموافقه..
حمحم المحجوب وقال..
/نستأذن..ومشي طلع من المربوعه..
الجالي قعمز ع الصالون وبنته في حضنه يساوي في فستانها ويقول..
/الله يبارك الله يبارك ع بنتي..قام عيونه..وشاف لطوبى وقال..شن حالك؟
طوبى؛الحمد لله..
تنهد وقال..
/يعلم الله اني برغم كل شي كنت شاريك ومن وسط قلبي وحبيتك حبيتك مش مجرد كلام ياطوبى وحاولت نحافظ عليك..لكن للاسف الباين نصيب مافيش..ذليت نفسي بما فيه الكفايه وقدام الناس وليت الراجل اللي طايح لمراة مش طايقاته..واني معاش بنرضى لروحي هالوضع..لهذا ونقولهالك من ورا قلبي واني موجوع..قررت نطلق..وعيونه بانوا فيهم الدموع..واخترت تجي مني بش الناس تعرف اني مانجبرش حد يقعد معاي وهو كارهني..
طوبى:هدا احسن شي ليك وليا ولجنة..
ضم بنته وقال:صح..هي اكبر سبب خلاني ناخد هالقرار..
غيرت نظرها لبنتها..
وهو قال؛الظرف اللي غادي فيه النفقه متاعك ومصروف بنتي..النفقه متاع الشهور اللي فاتوا كلها..
هزت راسها وقعدت محتفظه بصمتها..
الجالي:سامحيني..
طوبى:ربي يسامحك..
تنهد وقال؛تسمحيلي نطلعها لعمر يشوفها..
هي بدت ع وجهها ملامح الخوف..
الجالي:يطلع معاي خالك رجله ع رجلي..
قعدت تشوف لبنتها بقلق..
الجالي؛طوبى حتى اهلي من حقهم يشوفوها...
طوبى في نفسها..
"ياربي ياحي ياقيوم"
الجالي:جي معاي ع خاطرها راهو..
خدت نفس وقالت؛باهي..لكن مش اكثر من خمسه دقايق..
هز راسه وقال؛حاضر..
طوبى بلعت ريقها ونادت..
/خالي...
🍃شويه وخش المحجوب وقاله الجالي انه يبي يطلعها لعمر ويبيه يطلع معاه..ولأن طوبى وافقت...
طلع المحجوب مع الجالي بجنة لسيارته..
ومافارقاش نهائي..شافها عمر لعبها وحطلها فلوس..
بعدين ردها الجالي لقعمازها وعطاها للمحجوب..
الجالي:لحظه..حط يده في جيب الجاكيت وطلع ورقه وقال..
/هادي ورقه فيه شروط اتفاق الطلاق خليها تشوفهم واللي مش عاجبها نعدلوه ولما نتلاقوا ان شاء الله الزيارة الجايه نتفاهموا ع كل شي..
هز المحجوب راسه وخدي الورقه..
شاف الجالي لبنته وابتسم..بعدين مشي بيركب وهو يقول..السلام.عليكم..
ركب سيارته وتحرك بيها..
المحجوب خدي نفس وقال..
/واهو هم بنزاح..لف ومشي بجنة وهو يشوفلها بإبتسامه وصل في حوشه خش بيها وسكر الباب..
🍃🍃🍃🍃🍃🍃
وبعد ساعه..طلع المحجوب بنبيله وطوبى وبنتها لحوش لطفي الواعر..
كلهم كانوا مرتاحين..وطوبى حست وكأن جبل وانزاح عن صدرها..
🍃🍃🍃🍃
زغرودة مطيره كانت تعبيرها الوحيد عن فرحتها..
فردوس؛واخيرا ياربي الحمد لله..
طوبى بضحكه؛راجو شويه مازال في شرط مانبيشي وان شاء الله يقتنع ويلغيه..
اريج:شن هو؟
طوبى؛طلب يزيد عدد الايام اللي يشوف فيهم جنه مستحيل نرضى بيه الشي هدا اللي حدداته المحكمه نمشوا عليه..
نبيله:المحجوب قال مخلي الكورة في ملعبك وشن ماتبي انتي يدير..
مطيره:المهم ربي هداه وبيفكنا من هالنسبه العرة..
ابتسمت طوبى وشافت لجنه وهي متفائله ومرتاحه..
🍃في المربوعه..
علي:باهي الحمد لله..الهم وانزاح..
المحجوب:والله حتى اني قلتها هم وانزاح..
🍃والتارقي ع اعصابه وهو مقعمز في المطعم مع ربيع..
ربيع:تقريبا اسبوع تاني وكل شي يكون واتي.
عبد القيوم؛هذى عليش هو كان مختفي المده اللي فاتت..!
ربيع بضحكه هز راسه وقال..
/اها..
شاف عبد القيوم من مرش المطعم المحجوب وهو طالع من حوش لطفي..
ناض بهدوء ومشي بسرعه طلع وتوجهله..
وعيون ربيع من ورا المرش عليه..
عبد القيوم قص الطريق وهو ينادي..
/خال محجوب..
وقف محجوب وابتسم..
وصل فيه التارقي وقال..
/السلام عليكم..
المحجوب:وعليكم السلام..
هو قال:الامور عدت ع خير؟!
المحجوب بضحكه:فوق ماتتصور..
هو بإستغراب؛كيف؟
المحجوب:ياسيدي خلاص قرر يطلق..
لولا دوشة الشارع وصوت حركة السيارات راهو سمع المحجوب ضربات قلب التارقي اللي كانت اشبه بضربات المدفعيه..حسه حينخلع من مكانه من قوة الدق..
ومع تماسك وقال..
/كيف!؟
المحجوب:شكلها الدوة اللي نسمعوا فيها متاع انه يبي ارملة خوه اللي هي مرته حاليا مزبوطه..واللي يبيه وصله خلاص ماعنده علاش يقعد شادها..
عبد القيوم؛وجنة؟
المحجوب؛يقعد يشوفها في الزيارات وخلاص..
عبد القيوم؛يعني هو طلق ولابيطلق؟
المحجوب؛دار ورقه عند محرر عقود فيها شروط عرضهم عليها تشوفهم اللي مايعجبهاش تعدله ويسلموها للمحكمه ويصير الطلاق..
حاول جاهدا يسيطر ع نفسه ويخلي روحه عادي مرر نظره ع الشارع وقال..
/ربي يعوضها خير..رجع شاف للمحجوب وقال..المهم الامور عدت ع خير..
المحجوب:الحمدلله..
عبد القيوم؛مانعطلكش توكل..السلام عليكم..
المحجوب بإبتسامه؛وعليكم السلام..
وركب سيارته وشغلها بعدين تحرك..
اما عبد القيوم..طول توجه لحوش المهدي..
خشله..وقف في مكانه لما جو عيونه ع الاقحوان..
ابتسم من وسط قلبه..بعدين خدي نفس..وكمل طريقه لداخل الحوش.
ركب بسرعه لشقته...خشلها وسكر الباب وقعد واقف ياخد في انفاسه..وهو يتخيل في اللي بيصير بعدين..وخياله شطح لبعيد..
ضحك وقال:هدي هدي..كنك..مازال ماطلقت ومازال في عده بعدها اسرح كيف ماتبي..
تلاشت ضحكته وقال..
/لكن مش حتكون طريقك سالكه ياعبد القيوم اللي صار معاها اثر فيها واجد تبي وقت بش تتعافى منه..ابتسم وقال..المهم تفهمني وتعرف اللي فيا وبعدين ساهل..
غمض عيونه وقال..ياربي انا توا نبي صبر اكثر من قبل صبه علي قلبي صب ياربي...
فتح عيونه ورجع ابتسم..بعدين غمضهم تاني وقال..
/قلنا مازال..مازال..اهدا اركز..استغفرالله العظيم..
فتح عيونه ومشي لداره رجع سرح وابتسم ورجع غمضهم تاني وقال..
"خلاص قلنا خلاص..الصبر ياربي"
#انتقام
#طوبى
....يتبع...
