طوبى ☕شارع القهوة☕

الجزء السابع والستين

#طوبى "جنة طوبى"
#جمان_فريد
#الجزء_السابع_والستين"مقاومه"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن شَدَّاد بْن أَوْسٍ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قال : ( سَيِّدُ الِاسْتِغْفَارِ أَنْ تَقُولَ : اللَّهُمَّ أَنْتَ رَبِّي لَا إِلَهَ إِلَّا أَنْتَ خَلَقْتَنِي وَأَنَا عَبْدُكَ وَأَنَا عَلَى عَهْدِكَ وَوَعْدِكَ مَا اسْتَطَعْتُ ، أَعُوذُ بِكَ مِنْ شَرِّ مَا صَنَعْتُ ، أَبُوءُ لَكَ بِنِعْمَتِكَ عَلَيَّ وَأَبُوءُ لَكَ بِذَنْبِي فَاغْفِرْ لِي فَإِنَّهُ لَا يَغْفِرُ الذُّنُوبَ إِلَّا أَنْتَ ) ، قَالَ : ( وَمَنْ قَالَهَا مِنْ النَّهَارِ مُوقِنًا بِهَا فَمَاتَ مِنْ يَوْمِهِ قَبْلَ أَنْ يُمْسِيَ فَهُوَ مِنْ أَهْلِ الْجَنَّةِ ، وَمَنْ قَالَهَا مِنْ اللَّيْلِ وَهُوَ مُوقِنٌ بِهَا فَمَاتَ قَبْلَ أَنْ يُصْبِحَ فَهُوَ مِنْ أَهْلِ الْجَنَّةِ ) رواه البخاري
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 خُلِقتِ مني وخُلقتُ لَكِ ،  منك أستمِدُّ قوَّتي يا صغيرتي
و لأَجلكِ أتحملُ الكثير ..
أَنتِ ذخيرتي وقت عجزي وقلة  حيلتي .. فلا ندماً على جهدٍ ولا أسفاً على حب🍃
__________________________________________
وسط الأجواء الربيعيه الحلوة..
كان المهدي واقف ع الشوايه  هو يمروح بلوحه"كومبيساتا"
ع الفحم المحطوط فوقه قطع اللحم..
والشباب قدامه...يوتوا للعصبان..
كانوا ربيع ونضال يقرضوا في الخضره..
وحداهم محمود يخرط في المصارين..
وعبد القيوم يخدم في طاسة شاهي خضرا وحداه عمر يغني..
هز الشوق حنايا الخاطر..
وهما يسمعوا فيه..
ولأن صوته حلو..خلا المهدي يسرح معاه في عالم تاني..
عالم الذكريات اللي كانت هي البطله متاعهم..
ذكريات من ايام الطفوله..
حلوة ومؤلمه في نفس الوقت..
رسمت ع وجهه ابتسامة ألم وخلت لمعة الدموع تبان في عيونه..
ولولا انه كان منزل راسه ومركز بنظره ع اللحم اللي قاعده تشوي فيه نار الفحم..زي ماقاعد يصير في قلبه من نار الحب راهو كلهم شافوا اثر سدرة المنتهى ع وجهه..
وفي عاشق تاني كانت الكلمات تلعب بقلبه اللي قاعد يقاوم فيه بكل قوة قاعده يقمع فيه ويكتم في صوته...
وبانت ع وجهه ملامح الضيق والألم من اللي قاعد يحس بيه..
الحواجب كانت معقوده وهو يشوف للشاهي اللي قاعد يخدم فيه..
من البراد ل اللقامه..زي ماقاعد يصير بينه وبين قلبه مع مشاعرهم..
شبحله ربيع وركز عليه..
ربيع اللي كان عارف ان في شي في صاحبه..لغز مش قادر يحله...الشفراته متاعه...
الجالي...وبنت لطفي الواعر...
غير عيونه عنه وشبح لنضال لما سمعه قال..
الله عليك ياعادل عبد المجيد...الله..عندكم علم حني عيلة ربي ميزنا بالصوت الحلو..وكلنا كوم وصوت الجالي كوم تاني..
المهدي علق يقول؛سبحان الله خوك هدا ربي ميزة علينا في كل شي حتى في الصوت..
عمر بضحكه؛وفي هلبه حاجات تانيه..
نضال حس ان عمر كان قاصد شي هو يعرفه..
اما المهدي ماركزش مر عليه الكلام عادي..
عبد القيوم وهو يدير في "الكشكوشه" متاع الشاهي ركز في ملامح  عمر لما قال اللي قاله وفهم انه قاصد شي تاني غير المدح في خوه..
شبح لمحمود لما سمعه قال...
الباش مهندس ديما نشوفه بروحه مش زيكم لما خدم في المطحن زمان لاحظته..
نضال:شن لاحظت؟
محمود وهو يفكر؛مش عارف كيف بنشرحلك..انتم ساهل الواحد يخش فيكم وياخد عليكم لكن هو لا..كويس بس مداير ع روحه هكي زي السور..
ربيع؛صح وهالشي لاحظته توا زمان كان صغير يعني مايبان عليه شي زيه زي الصغار هداكا الوقت..
نضال؛وذنه تون توا..
المهدي ابتسم ع جنب..
عبد القيوم طول غير السيرة المستفزه بالنسبه ليه وقال؛الشاهي ياشباب..بالله قربلهم ياعمر..
عمر خدي السفره وقال؛الكشكوشه مليحه..
ربيع؛كشكوشه تارقيه هادي..
ابتسم  عبد القيوم وقال؛كان سخر الله ودرنا رحله للصحرا نخليكم تحقوا الكشكوشه التارقيه صح..هذي عاديه..
نضال وهو شاد الطاسه ويشوفلها:هادي عاديه؟
عبد القيوم؛مقارنه مع اللي تندار في الصحرا عاديه..تلاته ارباع الطاسه كشكوشه..
المهدي؛علاش؟
عبد القيوم؛في الصحرا وين تنوض الريح طبيعي ترفع معاها رمل زي العجاج..الكشكوشه تكون بزياده بش تمنع الرمل ينزل في الشاهي..
هز المهدي راسه وشرب من الطاسه..
ربيع:ناقصه السكر..
عبد القيوم بإبتسامه؛والتانيه نص نص والثالثه حلوة..
المهدي بعد ما رشف أول رشفه قال:في من وراها مغزى..
عبداليوم:صح..اول طاسه اللي تشربوا فيها ناقصة..وهذي نسموها كأس الحياه..لأنها زي الحياة ناقصه لاالفرح فيها دايم ولا الحزن دايم مرة هك ومرة هك..
كلهم سرحوا مع كلامه وتمر بين عيونهم مواقف تعبر عن اللي يقول فيه..
وهو مكمل يقول...الثانيه نص نص..وهذي يسموها كاس الصداقه والصداقه الحقيقيه تكون ع الحلوة والمرة..
ارتسمت ع وجوههم الابتسامه وهما يشبحوله..
وهو متابع كلامه..اما الثالثه تكون حلوة ونسموها كاس الحب لأن الحب حلو ومذاقه طيب..حتى عذابه حلو..
ضحك ربيع ضحكة خفيفه...والباقي سرحوا مع المعنى..
عبد القيوم؛وهذى الشاهي التارقي الاخضر اللي كان شربت منه الطاسه الأولى لازم تشرب التانيه والتالثه..من العادات راهو اللي مفروض يحترمها الضيف عند التوارق..
ربيع:واني نقول كيف ولينا اني وياك صحاب بسرعه من الشاهي..!
المهدي:والله مزبوط من اول مرة جيته الشقه طول صبلي طاسة شاهي اخضر بعدها لقيت روحي صاحبه..
قعد يضحك وهو يسمع فيهم..
نضال؛مادام هكي خلي بنديره في القهوة بش يكبدوا عليها..
عبد القيوم؛لاعاد هك قعد بسبوسه..
ضحكوا..
بعدين محمود قال وهو يخيط في الكرشه:تعرف في شن خاطري ياتارقي
شبحوله..
عبد القيوم؛فشني؟!
محمد؛خاطري نشوفك لابس تارقي..
ربيع؛والله حتى اني..
نضال؛تفكرت لما جو ماليك عمك وقريبك التاني كانوا لابسينه وكان لونه ابيض عجبني..
ربيع؛علاش ماتلبساش عبدو؟
عبد القيوم؛ماجتش مناسبه والزي متاعنا كيف ماتعرف خاص شويه مايلتبسش في أي وقت برا مكانا..
المهدي؛قصدك مش شايفينك بيه ليوم عرسك!؟
محمود؛ايااه عاد الحي واللي يعيش قربها بالله عليك..
عبد القيوم بضحكه؛حاضر..ان شاء الله في العيد..
ربيع:كان عندك اكثر من واحد عطيني مليت من لبس الزبون نبي نغير..
عبد القيوم بضحكه؛مش مشكله عندي منه 3 واحد ازرق والتاني اسود والثالث بني..وانا نحب نلبس الازرق واجد..
نضال؛من غير مانسأل واضح انك تحب الأزرق والاسود..
هز راسه وهو مبتسم..
كمل المهدي الطاسه متاعه وقال؛واني نعطيك تلبس العربي الكاط الطويل يمشي معاك..
قعدوا يشبحوا لعبد القيوم ومحمود قال:صح هو عريض يمشي معاه هلبه..
عبد القيوم؛اهم شي الطاقيه اللي فيها كيف ذيل الحصان..
ضحكوا والمهدي قال؛البسكل..
عبد القيوم؛بالله في حاجه بنسأل عليها تخص البسكل هذى..في فاتحه نضال ركزت انه كان حاطه جهة اليمين بعدين غيره اليسار ولاحظتها ع اكثر من واحد اللي يمين بس واللي يسار بس مقصوده ولاعاديه؟
نضال بضحكه؛لا مش عاديه..لما كنت دايرها ع اليمين هدا كان قبل الفاتحه لأني قاعد اعزب وقتها بعد قراية الفاتحه اني راحت عن بالي ونسيتها لين فكروني بيها ودرتها ع اليسار لأني خلاص في حكم المتزوج..
عبد القيوم هز راسه وقال:مفهوم ولت واضحه خلاص..
المهدي:توا الشيابين تلقاهم دايرينها للخلف..
عبد القيوم؛قصدك كبار السن لازم يديروها للخلف؟
المهدي قدم وفي ايديه الزوز صونيه اللحم المشوي وطاسة الشاهي وهو يهز في راسه بإيجاب..
ناض عمر وهو يقول؛نمشي نحط المكرونه..
المهدي؛بسرعه..
وقعمز بالصونيه وقال:صفره ياشباب..
عبد القيوم مدله وحده من جنبه..
خداها المهدي وقال؛هيا سقدوا رواحكم انتم..
نضال:خلاص تمينا..
محمود؛اني كملت خلاص..انتم خفوا رواحكم بش ندير الخلطه..
عبد القيوم؛متشوق ناكل العصبان متاعك..
نضال؛-تحلف بعدين عمرك ماذقت زيه..
ضحك محمود..وناض بيغسل ايديه..
عبد القيوم:شني يامحمود يبالغ نضال ولايقول في الحق!؟
محمود؛بنشكرلك روحي لا..خل افعالي هي اللي تشكرني..
المهدي؛في الثقة بالنفس ماعنداش ياأمي ارحميني..
عبد القيوم؛جد هذى كلام الناس الواثقين في انفسهم افعالهم هي اللي تشكرهم..
محمود:اهو كلام الناس الفاهمه..
كلهم شبحوا لمحمود ونضال فنص فيه..
اما المهدي كان يقص في اللحم وداير روحه ماسمع شي..
ومحمود بعد قال كلامه استاقظ ومعاش عرف شن يقول بش يرقع..
عبد القيوم قال وهو يغير في الوضع:خطرها ع الشكيره..
في ابيات زمان قايلهن توا تفكرتهن تقول..
سماحـة الشكيره اتجيك م البراني
شكيرتك الروحك ما عليها قيمه
والناس لولـه قالت نصيب معـاني
حتى الشكيره ف الوجوه ذميمه ..
كلهم بأصوات متقطعه..
الله..الله..سلمت..
المهدي؛حتى الشكيره في الوجوه ذميمه..
محمود؛ماارتاحش لين ردها.
كلهم قعدوا يضحكوا..
ماعدا المهدي اللي قعد يشبح لمحمود بإمتعاض...
🍃🍃🍃🍃🍃
"ماردوش عليك خوتك"
قعمزت حداها نسرين وتليفونها في يدها؛
شكله المكان اللي مشوله مافيشي تغطيه..
مغليه بقلق؛كيف هكي!؟ باهي اتصلي بخوك الجالي شوفيه بالك كلموه ولاهو كلمهم..
نسرين:باهي تو نشوفه..
وقامت تليفونها وحطت ع رقم الجالي واتصلت..
ع خشة سدرة مشت قعمزت حدا حناها..
ومغليه حطت يدها ع شعرها وقعدت تمسح عليه وهي تشوف لنسرين بقلق..
نسرين؛ايوه جالي..
🍃الجالي وهو مقعمز ورا مكتبه..
هاه شن تبي؟
"جالي ماكلموكش الولاد"
الجالي؛تؤ..ماكلمني حد..
باهي ترا جرب كلمهم وشوفهم اتصلنا بيهم هلبه يعطي خارج التغطيه"
الجالي؛اكيد المكان اللي هما فيه مافيشي تغطيه..ع العموم تو نشوفهم ونرد عليك..
"باهي..سلام"
الجالي:سلام..وسكر..
وجي بيرد تليفونه ويرجع يشوف للاب التوب اللي قدامه..
بس جاه اتصال تاني..
تأفف وشافله لقي حسين يتصل..
استغرب وخاف في نفس الوقت..
تنفس بقوة من التوتر...
وفتح الخط ورد..
الجالي؛ايوه السلام عليكم..
"وعليكم الجالي في الخدمه انت؟"
الجالي؛ايه علاش في حاجه؟
"طوبى تعبت شويه وجبتها للمصحه"
الجالي بفجعه؛خيرها!؟
"ماتخافش حالها باهي توا"
الجالي بلهفة خوف؛وينها وين رفعتها؟
"مصحة القدس"
الجالي:تمام تمام..
وسكر..وناض خدي مفاتيحه وسكر اللاب..
ومشي بسرعه طلع من المكتب..
🍃🍃🍃🍃
وفي المصحه..
كانت اميمه تكلم في فردوس هاتفيا طمن فيها..
اميمه؛الحمد لله وضع الجنين كويس توا ربي قدر ولطف..
"وطوبى"
اميمه؛تعبت شويه لأنها نزفت بس توا حالها باهي..
"الحمد لله ع كل حال وحسبي الله ونعم الوكيل في حاجه صارت متأكده"
اميمه بإستغراب؛هي لما روحت كانت عاديه..
"ايه وحتى اريج قالت خشت عليا الدار وهدرزنا عادي "
اميمه وهي تفكر؛في حد اتصل بيها زعمه وقاللها شي؟
"مافيش غير هكي اصلا لقيت تليفونها ملوح في نص الدار"
اميمه بغضب؛زعمه تعاركت هي وهداكا!.
"شكلها هكي"
اميمه هزت راسها وهي تقول؛باهي فردوس ردي بالك تطلع منك حاجه خل نراجوها لين تفيق ونشوفوا شن بدير..
"حتى اني قلت هكي"
اميمه؛عمي قاعد ماروحش؟
"لامازال..والله ماعارفه شن بنقوله كان جي"
اميمه؛تعبت من الوحم
"ياحشمتي وخلاص فلقتها معاه بكل في الاول قتله حامل وتوا بنقوله تعبانه من الوحم"
اميمه بضيق:الله غالب شن بديري..الضرورات تبيح المحضورات..
"هو هدا.."
اميمه؛خلاص بنسكر فردوس خل نمشي لعمتي من بكري وهي تحقق معاي كلمتك قاعده في عقلها..
"اعرفي كيف تسكري عليها"
اميمه؛هدا اللي ندير فيه..هي سلام..
"سلام...
🍃وسكرت فردوس ومشت خشت للحوش..
كانت الاء تسيق في الممر..
واريج تحول في بساط الدار..
جتهم وهي تقول؛الحمد لله حالها باهي هي والعيل..
اريج طلعت للباب وقالت براحه؛الحمد لله ..
الاء وهي شاده السياقه؛يبرة الثبيت اللي ضربتهالها اميمه انقدت العيل راهو..
فردوس؛خل نمشي نطمن غرفه..
ومشت امها من حداها وهي تتخطى في الميه والصابون وتوجهت لدار المعيشه..
اريج بحزن:حتى هي حصلتها رعشه..
الاء بقلق؛يستر الله عليها حتى هي..
اريج وعيونها يدمعوا؛اللي صار قاعد بين عيوني كأنها مش طوبى بكل علاش هكي صار فيها شن جاها!؟
الاء بضيق؛والله اني مصدومه وخايفه اكثر منك ان شاء الله مش سحر ياربي..
اريج بخوف؛بعيد السو...بعدين قعدت تنادي..معتز يامعتز تعالى ارفع معاي البساط..
ومشت خشت داخل وهي تفكر بقلق..
🍃وفي المصحه..
في الحجره اللي قاعده طوبى..
كانوا معاها اميمه وعمتها مطيره..
مطيره وهي تشوفلها كيف راقده والتعب واضح في ملامح وجهها قالت بألم..كان نعرف شن جاها..حالتها بكري فكرتني بحالة اختها ياكبدي شن دايرلهم بس كل وحده فيهم حالها احرف من الثاني..كبدي عليهم وع وبيهم مسكين اللي مش مكتبوله يفرح بيهم..
اميمه؛ماتقوليش هكي عمتي ربي يفرجها ان شاء الله شدة وتزول..قولي الحمد لله ع كل حال..
تنهدت مطيره بألم وقالت:الحمد لله ع كل حال..الحمد لله الذي لايحمد ع مكروه سواه...
🍃وفي هالوقت..
روح لطفي مع بوه من مشوارهم للراجل اللي طلبوا منه يدخل في موضوع عبد الرؤوف..
وللأسف روحوا خاليين الوفاض..
ولطفي تكدر هلبه..بس وين جي بيخش عليهم دار روحه عادي..
وهو خاش للحوش استغرب لما شاف اريج برل تكد في البساط وقاللها:ربي يعاون بنتي..
اريج وهي تكد:سلمك جدي..خش خش تغدا الغدي واتي..
هو مرر نظره ع البساط بعدين مشي خش داخل..
شاف الاء تنشف الممر قال؛ربي يعاون..
الاء وقفت وهي تقول؛جديدي روحت!؟
هو قاللها؛خيركم حتى اليوم قايمنيها مش الايام اللي فاتوا سيقتوا!؟
ع طلعة فردوس من الكوجينه؛روحت بوي!..خش بدل بش نحطلك غداك..
هو قال؛غرفه فايقه؟
فردوس؛ايه متكيه في الدار..
لطفي؛شن حالها توا؟
فردوس؛الحمد لله وبيي كويسه..هيا خش بش نحطلك غداك..
هو هز راسه ومشي لداره..
وفردوس وآلاء معاه بعيونهم لين خش لدار النوم..
تنفست فردوس براحه..بعدين مشت الكوجينه..
وآلاء رجعت تنشف في الممر...
🍃🍃🍃🍃
ويخش الجالي وهو يمشي بسرعه للمصحه وكان مرعوب..
مرعوب من فكرة فقدان عيل تاني ليه..
مرعوب من فكرة فك ارتباطه بطوبى نهائي..
كان وهو يمشي بطريقه للإستعلامات حاس ان قلبه حيوقف في أي لحظه  من تسارع نبضاته..
وقف فجأه..لما سمع حسين ينادي فيه..
شبح لمصدر الصوت شافه جاي ناحيته..
قال بخوف؛شن صار!؟
حسين لاحظ الخوف اللي باين ع وجهه وقال؛اهدا وماتخافش مافي شي يخوف..
الجالي بقلق:باهي مني المشرف حالتها دلني ع حد نقدر نفهم منه..
حسين؛تعالى معاي..
ومشي وهو معاه..
الجالي وهو متوتر:اني خليتها في حوش ماليها من خوفي عليها قلت اني نخدم ساعات طويله برا وهي تقعد بروحها مرات يصير فيها شي واني مش معاها واللي توقعته صار..تخيل يعني تخيل صار فيها اللي صار واني مهناش ومافي حد معاها !؟ غمض عيونه وفتحهم وهو يقول..لاإله إلا الله وخلاص.
حسين اللي كان يجامل فيه مجامله وهو مش طايقه:قتلك ماتخافش ماصار شي يخوف..
وقف قدام حجرة الدكتورة وقال:خشلها تو تفهمك..
خدي الجالي نفس وطلعه بعدين دق الباب دقتين وفتحه وخش..
وحسين مشي تباعد عن الحجره وقعد يراجي فيه..
🍃🍃🍃🍃
في حوش لطفي..
حطتله بنته الغدي..
وقعمز تغدا...
وهي مابتش تقعد حداه بش مايسألها عن حد وتضطر تجاوبه..
لعند ماسمعاته ينادي فيها.
فردوس بتوتر: استغفر الله..ياربي شن بنقوله بس!..
غرفه؛قوليله وخلاص فردوس مافيهاش كيف..
تنهدت بضيق وقعدت ساكته..
غرفه بنفاد صبر؛تي نوضي..
ناضت فردوس وهي متوتره ومحرجه..
مشت طلعت من دار المعيشه للصاله..
خشتلها وهي تقول:نعم بوي تبي حاجه؟
لطفي:عمتك وين؟
قعمزت فردوس وهي تشوف لصونية الغدي:كمل غداك..
لطفي؛لاخلاص الحمد لله هداكا هو..قولي وين عمتك ماعندهاش حس..
هي بشي من الارتباك؛عمتي مشت مع طوبى..
عقد حواجبه بإستغراب وقال؛وين؟
فردوس؛طوبى تعبت شويه ورفعوها..
قاطعها بفجعه وهو يقول؛شني!؟
فردوس زادت توترت؛بوي غير اسمع خيرك.مافي شي يخوف حاجه طبيعيه تصير للنساوين..غيرت عيونها عنه وهي محرجه وقالت..وحمها متعب شويه..
ناض وهو يقول؛وين رفعوها؟
فردوس شبحتله وقالت؛للمصحه اللي هني..
مشي طلع من حداها..
وهي ناضت وراه وكانت تقول؛ماشيه معاك بوي راجيني..يابنات وحده فيكم ترفع الصفره...
🍃🍃🍃🍃🍃
ويطلع الجالي من عند الدكتوره وهو مطمن وباله مرتاح..
بس قعد في باله جزء من كلامها لما قالت..
"الباين المدام تعرضت لشي تسبب في انفعالها بقوة"
وهو يفكر قاده تفكيره ليها..
نجاة...اللي توقع منها دير ردة فعل بس ماتوقعهاش تكون بالسرعه هادي..
وقف ع حسين وقاله؛قاعده في جناح بروحها؟
حسين؛ايه..ودفعت..
الجالي بعدم رضا؛مشكور ع كل حال بس ياريت مرة تانيه اي شي يخص زوجتي من مصاريف اني بس اللي نتحمله...
ومشي من حداه بيطلع من المصحه..
وحسين معاه بعيونه وهو يشوفله بتعجب وازدراء...
بعدين قال..واحد تافه..
🍃وهو طلع برا ركب سيارته..
شغلها وتحرك طول لوجهه معروفه..
🍃🍃🍃🍃🍃
"ماحصلتيش خوتك!؟"
نسرين بقلق:لا والجالي معاش رد عليا..
مغليه بخوف؛حي عليا اشبح شن في اشبح شن صاير..
سدرة بخوف؛حي عليا بابا!
جتها نسرين وضمتها وهي تقول؛مافي شي بنتي ماتخافيش..
ع خشة محمد وجده كانوا في المربوعه يتغدوا..
محمد المهدي؛حطيت الصفره في الكوجينه عمتي..
مغليه؛محمد ولدي مااتصلش بيك بوك ولا انت كلمته!؟
محمد وهو مستغرب؛لا علاش..
وجده مركز معاهم وبادي يقلق..
مغليه؛من لما طلعوا مااتصلوش ومن بكري وحني نتصلوا يعطي فينا خارج التغطيه!..
محمد شنيبه؛اكيد المنطقه اللي هما فيها مافيهاش تغطيه..
مغليه وتمسح ع رجلها بخوف:زعمه ياحاج!
محمد المهدي:ماتخافيش حناي ان شاء الله مافيش الا الخير..شبح لاخته وقال..خيرك تبكي!؟
شبحولها..
قالت بنبرة باكيه؛خايفه؟
محمد تقطع قلبه وهو يشوف لملامح الخوف في وجهها..
وجدها قال:معاش تبكي بنتي معاش تبكي مافي شي يخوف تو يتصلوا...
ع خشة يزن وهو يقول بخوف؛شفتوا الاخبار في الفيس..
كلهم شبحوله بخوف..
يزن؛قالوا صارت رمايه في طريق******
🍃الطريق اللي ترفع للمنطقه اللي فيها المهدي وصحابه🍃
محمد وجده قالوا مع بعض بصدمه؛شني!؟
ونسرين بفجعه؛حي عليا..
ومغليه ماتحملتش طول فقدت وعيها..
🍃🍃🍃🍃
"مفروض مشيتوا لتركينه فيها تغطيه"
نضال؛نحسابوا فيها تغطيه..
"تعرف كان عطلت ساعه تانيه وماكلمتنيش راهو اشبح شن صار فيا"
هو بضحكه؛بعيد السو ع الفستق ماتخافيش ياحلوة قاعدلك مش مخليك لحد تاني..
هي ضحكت وقالت..
"أهبل"
نضال بضحكه؛ختشه..هيا فستقتي بنسكر وبنولي لجماعه..
"صور صور"
نضال؛يابستاشيو توا بعتلك صور..
"ايه وزيد عليهم نبي كل شي موثق"
نضال بضحكه؛باهي ياودي باهي..سلام ختوشي..
"سلام وكلمني بعدين هاه"
نضال؛بااهي باهي...تشااو..
وسكر وهو يقول بضحكه؛ شن الفرخه هادي..!..
بعدين حط تليفونه جنبه وتحرك بالسيارة بش يولي للمكان اللي هما فيه..
🍃وين وصل غادي..
جاهم وهو يقول؛-القدام حصلت تغطيه..
ربيع:طويله المسافه..
نضال؛لامش طويله..
وقعد ينعت فيه..
ربيع؛خل نمشي نكلم امي..
ومشي من حداهم..
ونضال قعمز وهو يقول؛اااه ياريحة العصبان شن دير في قلبي..
عبد القيوم وهو لاهي؛كلنا مش غير انت بس..
نضال ركز عليه وهو يقول؛فطيره هادي ولا مشلتت؟
عبد القيوم؛كرزيكه..فطيره..
نضال؛تقولولها كرزيكا؟
عبد القيوم هز راسه بإيجاب..
المهدي؛اني نبي خبزة الملة..
عبد القيوم وهو يشوف حواليه؛تو نشوف كان لقيتلها مكان مناسب نديرها..
وقعدوا يهدرزوا ع عبد القيوم وهو يدير في الكرزيكا ماعدا عمر ومحمود اللي خشوا الخيمه وقيلوا هما الزوز...
🍃🍃🍃🍃
مقعمزة ع الصالون في صالة شقتها وتقرض في ظوافرها بسنونها من الغيظ والتوتر..
جتها اختها وهي تقول ؛ياسرك صوابعك ولوا دم..
نزلت يدها وقالت،خيره ماجاش لتوا مفروض يجي ويقلبها ع راسي..
صابرين؛خيرك نجاة هبلتي! تراجي فيه يجي يقتلك!
نجاه بمكر:عادي المهم تخرب بينه وبينها..
فجأه..
رن جرس الشقه ودق الباب..
ناضت نجاه وهي تقول؛نوضي بسرعه خشي حدا الصغار وسكري الباب..
صابرين بخوف؛ونخليك معاه بروحك!..
نجاه جبدتها ورفعتها لدار الصغار حطتها فيها وسكرت الباب..
ومشت بتفتح باب الشقه وهي متلهفه للشماته فيه..
وصلت في الباب فتحاته..
ويخش ويسكر الباب برجله..
وهو يشوفلها بغل..
وهي بإبتسامه.مستفزة قالت؛قبل كنت نقولك يااني يا هي وتوا نقولك لاأني ولاهي اقعد بروحك...
وينزل ع خدها بصفعه حست انها شلت نص وجهها ومعاش حست بيه..
شدها من شعرها من الخلف وهو يقوللها بنبرة تهديد..
ورب العزة يانجاه ديري حركه تانيه..وربي نخليك تجري وتصفقي في الشوارع بالله المعظم وانتي تعرفيني كويس شن نقدر ندير..
وطلقها وهو يشوفلها بإزدراء وهي تشوفله بحده من فوق لتحت ودموعها ينزلوا..
بعدين لف وفتح الباب وطلع من الشقه وجبده وراه بقوة..
طلعت صابرين بهدوء من حدا الصغار بعد ماسمعت صوت باب الشقه انخبط بقوة..
ومشت لأختها وهي خايفه..
وصلت فيها وقالت؛شن دار..ويجوا عيونها ع خدها الأيمن لقت صوابعه معلمات عليه...قالت بحقد..الحق..ير كسرة تكسره ان شاء الله..
هي غمضت عيونها بشده بعدين مسحت ع شعرها لين وخراته للخلف وقالت..
تو نشوفوا من اللي يقعد يجري ويصفق في الشوارع..
فتحت عيونها وهي تقول...تو نشوفوا..
🍃🍃🍃🍃
"يام بالله عليك شدي حيلك مش هكي عاد"
مغليه وهي تبكي؛نبي ولادي دبرولي فيهم..
خديجه بقلق؛وقت زرادي هو!..
نسرين؛الناس كلها تطلع زرادي..
خديجه؛باهي مشوا لمنطقه قريبه علاش ماشيين غادي..
مغليه وهي تبكي؛ياريتني ماخليتهم يمشوا..
نسرين:تي شن صغار صغيرين هما بش تشديهم..!
مغليه وهي تبكي؛ووك عليا ياربي ولادي وين وين..
خديجه تنهدت بضيق وقالت؛لاحول ولاقوة الا بالله..
🍃برا..
كان محمد واقف يتصل ببوه ويعاود..
وراما واقفه في الباب تشبحله..بعدين مشتله وهي تقول..
محمد..
هو بتوتر قال؛نعم!
راما؛خالو نضال ماشي معاهم ولا؟
هو بنفاذ صبر:ايه..ياراما..ايه..
راما:شن رايك نتصل بمرته بالك تعرف حاجه..
محمد؛كان ماعرفناش هي بتعرف..
راما؛ايه ماهو مرات هو اتصل بيها هي وطمنها..
محمد؛ويفوت ماليه!؟
هي بجرأة مش عارفه من وين جتها؛ماهو الراجل يحب يقول كل شي لحبيبته قبل غيرها وديما يحسها هي بس اللي خايفه عليه ودور فيه..
رفع حاجبه اليسار تعجبا وهو يشوفلها..
هي انحرجت وارتبكت وقالت:تو نتصل بيها عندي رقمها..
وطول رفعت تليفونها وقعدت دور ع رقم اريج وهي ترعش..
وهو قاعد يشوفلها بنفس نظره الريبه وحاجبه مرفوع..
حطت ع رقمها واتصلت بيها..
واريج ردت طول..
"ياهلا رموش"
راما؛اهلا مرت خالي كيف حالك؟
"الحمد لله حبيبتي كيف حالك انتي وماما"
راما؛الحمد لله..مرت خالو بنسألك..
"اسألي حبيبتي"
راما:كلمك خالو نضال؟
"ايه كلمني بكري شويه"
فنصت في محمد وهي تقول؛كلمك!
وهو اتفاجئ ع الأخر..
"ايه علاش تسألي"
راما؛ماهو معاش حصلناهم وسمعنا ان في رمايه صارت في الطريق خفنا يكونوا هما اللي جت عليهم الرمايه..
"لابعيد السو عليهم مافيهم شي وكلهم امورهم تمام غير المكان المخيمين فيه مافيشي تغطيه اني بش كلمني مشي لمكان تاني"
راما؛اها..باهي خل بنسكر توا بش نقوللهم..
"لالاماتسكريش عطيني نكلمهم امك ولاحناك"
راما؛باهي..شويه بس..
ونزلت التليفون..
سألها محمد؛شن قالتلك؟
راما؛ خالو كلمها بكري وقالت مافيهم شي ..
ومشت خشت داخل..
وهو لحقها..
🍃🍃🍃🍃🍃
"اطمن وخيي والله مافيها حاجه تعب عادي يجي للحوامل"
لطفي وفي عيونه الخوف واضح؛لاحول ولاقوة الا بالله استغفر الله العظيم..
مطيره؛خيرك لطفي والله كويسه بنتك الله..!
غير عيونه عنها وهو يشوف للجهة التانيه بضيق..
مطيره؛تبي نخش تشوفها
شبحلها وهز راسه بإيجاب..
مطيره؛باهي تعالى..
ومشت وهو مشي معاها..
🍃وفي الحجره...
اميمه كانت مقعمزة حدا طوبى وهي سرحانه بتفكيرها..
وطوبى..بدت تفيق..
فتحت عيونها شويه شويه...قعدت تشبح فوق لين استعادت وعيها تماما..تفكرت اللي صار...
وتلقائيا رفعت يدها حطتها ع بطنها..وقعدت تتحسس فيها..
قاعده زي ماهي كبيره شويه وبارزة بعض الشي..
غمضت عيونها براحه وقالت في نفسها..
الحمد لله..
بعدين فتحت عيونها ومررت نظرها حواليها لين ثبت ع اميمه..
ابتسمت ابتسامه خفيفه متعبه وقالت بصوت يدوب طالع..
ميمو..
استاقظت اميمه وشبحتلها ناضت وجتها وهي تقول..
شني حبيبتي تحسي في حاجه..
طوبى وهي مبتسمه يدوب حركت راسها بالنفي..
ابتسمت اميمه وحطت يدها ع بطنها وقالت:قاعده جنونه..
طوبى بصوت متعب:شكرا..
اميمه ودموعها في عيونها؛الشكر لله..
غمضت عيونها وقالت همسا؛الحمد لله..
دق باب الحجره..
فتحت عيونها ولفت وجهها جيهته..
اميمه؛تفضل..
انفتح الباب وخشت مطيره شافتها فايقه قالت بإبتسامه؛نضتي حبيبتي..شافت للباب وقالت..خش لطفي خش...
طوبى انحرجت وتحشمت وكانت تبي تنوض تقعمز لكن مش قادره..محرجه من بوها يشوفها بشكل بطنها البارز وهي متمدده..
خش لطفي لما شافها قلبه وجعه عليها هلبه..
قربلها وهو يقول..لاباس يابابا لاباس..
وطبس ع جبينها وطبع عليه قبله بعدين قالت..خيرك بابا شن تعبك؟
طوبى وهي تشوفله قالت وهي تحاول تتكلم كويس؛بابا مافيا شي..ماتخافش حاجه عاديه..
لطفي شبح لأميمه وقال؛شن ياأميمه؟
اميمه؛الحمدلله عمي حالها باهي مافي شي يخوف..
لطفي هز راسه وهو مازال قلق وقال؛الدكتورة متاعها قاعده..
مطيره فنصت في اميمه..
اميمه شافتلها بعدين شافت لعمها وقالت؛مش حتقولك غير اللي اني قلته عمي اصلا هدا كلامها..
هو شاف لطوبى بعدين مسح ع راسها وقال؛باهي امتى تطلع..
وطوبى تشوفله كيف يشوفلها بقلق وقلبه يتقطع من نظراته هادي..
اميمه؛السبت ان شاء الله..
شبحلها وقال؛وتقولوا مافيها شي!
اميمه؛طبيعي جدا بش يطمنوا عليها وع الجنين..
لطفي هز راسه ورجع يشوفلها بإبتسامه ماقدرتش تبدد ملامح القلق اللي ع وجهه وقال؛باهي يابابا الحمد لله ع سلامتك وشن تبي حاضر..
طوبى:نبي سلامتك بس..
مسح ع راسها وقال..ربي يحفظك ويرضيك ويرضى عنك..هي نخليك ترتاحي..
ومشي بيطلع ولحقاته مطيره..
بعد طلع..طوبى تنهدت بحزن...
واميمه قعدت تشبحلها..تبي تسألها عن سبب الحاله اللي كانت فيها بس خافت تعبها زياده فضلت تسكت..
وطوبى هربا من هالسؤال رجعت غمضت عيونها ودارت روحها بترقد..
وولت أميمه قعمزت وهي تشوفلها..
🍃برا..
لطفي؛روحي معاي وخلي فردوس تجي تقعد معاها شدت فيا قبل بتجي قلتلها نروح بعمتك ونجيبك مكانها..
مطيره:باهي عادي نروح لكن بعدين مش توا..
لطفي:راجلها عطيتوه علم؟
مطيره؛حسين قال جي بكري ومشي للدكتورة متاعها سألها ع حالتها بعدين طلع.
هو هز راسه وقال:باهي..تو يروح بيك حسين..السلام عليكم..
ومشي..
ومطيره ردت عليه وهي تلحق فيه بعيونها:وعليكم السلام..
🍃🍃🍃🍃🍃
"ريتي بالله ريتي مرته اهم من امه كلم مرته بش يطمنها وخلا امه النار تاكل فيها..ياطياح سعدك يامغليه"
نسرين؛غير علاش تسحني في روحك هكي شن صار لهدا كله هو  كلمها لأن هي قالتله كلمني..
مغليه؛اقعدي رقعيله توا تحاسبيني عيل يمشي عليا كلامك هدا..
خديجه؛خلاص يام المهم طمنا عليهم توا..وبعد يروحوا لكل حادث حديث..
مغليه:بعد يروحوا مانبي حد يكلمني ولايفوت من ركني..ظنوة معفنه..
وناضت ومشت طلعت من حداهم..
وبناتها وحفيداتها معاها بعيونهم..
بعدين خديجه قالت:عندها الحق..
نسرين؛ماتزيديش النار حطب..
خديجه قلبت عيونها وناضت وهي تقول..نوضي راما هيا..
راما:خليني شويه بعدين نروح..
خديجه بحده:قلت نوضي اني مش ناقصه لسان عمتك..
ناضت راما وهي تقول بضيق؛باي..
ومشت طلعت قبل امها..
وامها لفت ع راسها الوشاح ومشت طلعت..
نسرين نفخت خدودها وزفرت بضجر..
سدرة:عمتي..
شبحتلها..
سدرة؛علاش ابله طوبى معاش جت متعاركه مع حنينه؟
نسرين:لاحبيبتي مافيش منها الدوة هادي..وهيا نوضي قدامي نمشوا نديروا قهيوه وحاجات حلوة قبل لتجي ابلة فايزة..
سدرة:باهي..
وناضوا الزوز ومشوا طلعوا من الصاله..
🍃وشويه وجت فايزة ومعاها تاله...
واستقبلوهم  نسرين وسدرة....
رفعت سدرة تاله لدار المعيشه..وقعدوا نسرين وفايزة في الصاله...
وهما يشربوا كانوا يهدرزوا عن...
نسرين؛طوبى متغيره هلبه ريتيها لما جينا المرة اللي فاتت كيف مابتش تطلع وبعدين على مااتصلنا اني وخديجه وامي مابتش ترد علينا اني متأكده ان في حاجه كبيره طوبى ماديرش هكي ع شي تافه..
فايزة:الحق اني ليا يومين مشغوله من الخدمه للشقه ومن الشقه للحوش ماشفت منهم حد لكن اللي نعرفه انهم كلهم واخدين منكم موقف لما ماجيتوش اول ماشدوا راجل غرفه..
نسرين:باهي عندهم حق واني معاهم لكن وين جينا حسيتهم عاديين معانا الا طوبى وجهها ماريناشي..تؤ..لالا يافايزة شي اكبر من هكي اللي مخليها قاطعتنا بكل..
فايزة؛بالك متعاركه مع الجالي؟
نسرين؛وين متعاركه معاها!؟ ماتشبحيش في منشوراتها عليه في الفيس هو بروحه خدي معاها موقف..
رشفت فايزة من القهوة بعدين قالت:والله ماعارفه شن نقول الحق..
نسرين بقلق؛يستر الله وخلاص ماناش ناقصين ساد عمر اللي طلق مرتين والمرتين مافاتش شهرين متزوج والله لو تصير حاجه تانيه مافي واحد مقايل فينا استغفر الله..
فايزة بضيق:لا ان شاء الله مايصير شي عمي لطفي مش ناقص حتى هو يعلم الله بحاله وهو يشوف في بناويته شن صاير فيهم..كان تشوفيه كيف راح كبر عشرة سنين..
نسرين بضيق؛ربي يكون في عون الجميع..
فايزة؛آمين..
رشفوا من فناجينهم القهوة...بعدين فايزة قالت..
ايه شن هي المفاجأة اللي قلتيلي عليها!؟
ابتسمت نسرين وقالت؛انخطبت..
فايزة وهي متفاجئه:الله!
نسرين بضحكه:والله..بس قولي مني؟
فايزة بفضول:مني؟!
نسرين؛سنان...
فتحت فايزة عيونها ع وسعهم وقالت بنبرة دهشه..
ربيع..
ضحكت نسرين وهي تهز في راسها بإيجاب..
فايزة قعدت تضحك وهي متفاجئه بعدين قالت..
احكيلي كيف وامتى بالتفصيل الممل..
نسرين تنهدت بإبتسامه وقالت؛من كم يوم مش متفكرة امتى......
🍃🍃🍃🍃🍃
الساعه 7:00مساءا..
روح حسين بعمته...بعدين جي ورا آلاء اللي كانت جايبه امها للمصحه وقعد غادي..
طول مشوا للحجرة اللي فيها طوبى..
وين خشوا..لقوها راقده..
ولقوا اميمه متكيه ع الكرسي ولاهيه بتليفونها..
🍃فردوس وهي تشوف لطوبى بحزن؛باهي المهم حالها باهي..
اميمه:الحمد لله..
آلاء وهي تشوف لخالتها قالت..ياروحي بكري وهي تعيط وتقول بنتي قلبي تقطع عليها قعدت ندعيلها ربي يحفظهالها..
اميمه بإبتسامه:الحمد لله استجاب لدعواتك.
فردوس شافت لأميمه وقالت؛روحي انتي اني قاعده معاها الليله..
اميمه هزت راسها وقالت؛خل نراجيها لين تفيق تاني ونطمن عليها بعدين نروح..
فردوس:كليتي حاجه ولاقاعده هكي من بكري!؟
اميمه؛ماجي خاطري في شي ..
فردوس:معقوله من الواحد لتوا من غير ماكله شن تبي طيحي حتى انتي!
الاء؛تو نمشي للكافتيريا نجيبلك حاجه..
اميمه:لاوالله مالازم تو نروح ناكل..
فردوس؛بتراجي لين تروحي! شبحت لبنتها وقالت..بري خوديلها بري..
اميمه بإستسلام؛باهي نمشي معاك..
آلاء؛باهي سايريني..
لبست اميمه كندرتها ومشت  طلعت مع آلاء..
وفردوس خدت كرسي قرباته لسرير طوبى..وقعمزت وهي تشوفلها بحزن وتقول همسا..
حسبي الله ونعم الوكيل..
🍃🍃🍃🍃
مشوا البنات لكافتيريا المصحه وهما يهدرزوا..
وين وصلوا فيها وخشولها..
شافهم قصي اللي كان فيها ومعاه دكاترة يشرب معاهم في القهوة..
استغرب هلبه وكان يبي يمشي يسألها..
بس سبقه خالد اللي شافها حتى هو ماشيه للكافتيريا ولحقها بش يستسفر عن وجودها في المصحه فهالوقت..
🍃اميمه بإبتسامه؛شن بنقولك دكتور قريبتي تعبت شويه وجيت معاها..
خالد؛شكلهم معتمدين عليك في المرض اللي يتعب تجي معاه..
آلاء ضحكت ضحكه خفيفه..
واميمه وهي مبتسمه بجديه هزت راسها بدون ماتعقب..
هو قال؛وين موجوده قريبتك خل نتوصوا فيها..
اميمه ضحكت ومعاش عرفت شن تقول..
هو قال؛في النساء والولاده قصدك هي نفسها؟
اميمه بإبتسامه عاديه؛لاوحده تانيه..
رفع حواجبه وقال؛اها..تعرفي شكلها اشارة ليك بش تغيري التخصص..
الاء تمرر في نظرها عليهم وهي مستمتعه بحوارهم..
اميمه بثقه؛وممكن اثبات ليك اني نستاهل التزكيه لأني قاعده نخدم برا وداخل..
ضحك ولأول مرة يضحك من قلبه..
والاء تشوفله وهي مبتسمه..
اميمه؛دوم ان شاء الله دكتور..نستأذن..
وخدت يد الاء ومشوا وخلوه..
هو هدا ضحك وقعد يشوف لأميمه بإبتسامه جانبيه بعدين  مشي طلع من الكافتيريا..
وعيون قصي اللي كانت تشوفله بحده تبع فيه..
🍃الاء:حي عليك كيف تمشي وتخليه هكي تو يحطك في راسه..
اميمه؛-حاطني في راسه من الاول كرهني في اليوم اللي فكرت فيه نخش طب..
آلاء:ياوخيتي هدا مفروض يحببك في الطب مش يكرهك فيه عليك شخصيه وعليك قنانه ياناس..
اميمه بضحكه؛تحشمي ياقردة في عمر جدك..
الاء؛لا حرام عليك اصغر قولي في عمر بوي..
اميمه؛المهم كبير..خلينا منه وقوليلي شن ناخد جعانه..
الاء؛بيتزا..
اميمه؛-برغر استر..
ضحكت الاء وقالت..براحتك..
🍃وخدوا الزوز برغر..وطلعوا من الكافتريا..
وهما ماشيات..
شافوا الدكتور اياد واقف يشوف القدام..
الاء وين جو عيونها عليه..حست بضيق شديد..
واميمه كيف جت بتلقي عليه التحيه..
شافت مهند وقف عليه وهو يقول..
جيتك نجري قريب درت حادث..هاك..
ومدله حاجه خداها اياد وهو يقول بضحكه..
الله غالب بوك كبر ومعاش بدي يجمع..
🍃والاء وين شافاته وسمعت صوته..
حست برغبه شديده في البكاء..
غيرت عيونها عنه ومشت طول وهي تقاوم في دموعها..
واميمه لحقتها وهي مضايقه عليها..
اياد ماركزش عليهم لما فاتوا من حداه كان يشوف في الحاجه اللي جابها مهند ولما مشوا هو ولى عاطيهم بالظهر..
لكن مهند كان عاطيهم بالوجه.
بنظره عابرة شافهم..وجو عيونه عليها..
شاف شويه من ملامح وجهها بعدين عطاته بالظهر واميمه وراها..
للحظه نسي كل شي...
رجف قلبه ورجفة القلب هني النبض المتسارع القوي اللي يصير فجأة...
حس بقشعريره سرت في جسده...
حس ان نفسه ولى يطلع بصعوبه...
الحب الحقيقي اللي متجذر في اعماق البني آدم مايزولش ولاينتسى بالساهل...
والمصيبه الاكبر لو زاد هالحب بعد الفراق..
رغم سيئات المحبوب واخطائه القاتله يقعد محبوب ومايتغيرش عليه القلب..
عذاب مابعده عذاب...
شبحله بوه وقال؛خلاص برا...
ركز عليه لقاه مركز بنظره ع شي وراه..
التفت طول شافهم وهما واصلين نهاية الممر بعدين ادرقوا..
رجع شاف لولده ابتسم بضيق وقال..
هييه..مهند..
شبح لبوه وقال؛شن عندهم هني؟
اياد:طوبى تعبانه شويه..
هو رفع حاجبه ونزله بعدين قال لبوه؛خلاص ماتبي شي؟
اياد تنهد بعدين قال؛الكبر مهلك بالذات مع الحب خليه عنك وحاول ترجعلها..
ابتسم بألم وقال:مش مقتنع ان هي اللي تخلت..
اياد؛مش منها هي واضح هلبه..
مهند؛بوي مافيش خط رجعه للأسف..
اياد قعد يشوفله بأسف..
وهو غمض عيونه وفتحهم وع وجهه ابتسامه الألم وقال..
تو نروح بكري..
ولف ومشي..
وبوه معاه بعيونه اللي كانت نظراتهم كلها ألم..
يشوف في ولده يتعذب ومش عارف شن يدير بش يخفف عنه وينسيه..
🍃وهي كان مقعمزه مع اميمه في تركينه مستخطيه تبكي وتاكل في نفس الوقت..
واميمه تشوفلها بحزن..
ألاء بنبرة باكيه؛ماتشبحليش كولي كولي مادورنيش..
ورجعت تاكل..
واميمه غيرت عيونها عنها وبدت تاكل حتى هي بس بدون ماتستطعم شي...
🍃وفي الحجرة..
كانت فردوس شاده مصحف صغير وهي تقرا..
وطوبى قاعده راقده...
دق الباب..
سكرت فردوس المصحف وقالت..خش..
انفتح الباب..
وخش الجالي...
تبدلت ملامح وجه فردوس للحده مع الازدراء..
وهو سكر الباب وقال؛السلام عليكم..
قرب من السرير ووقف في اخره وهو يشوف لطوبى بألم وقال...راقده..
فردوس ماتحملتش تقعد معاه في مكان واحد ناضت ومشت طلعت من الحجرة من غير ماتنطق بحرف..
هو قعد معاها بعيونه لين سكرت الباب..
وفهم ان فردوس عارفه كل شي وتسائل في نفس الوقت..
هل في حد تاني عارف غيرها!؟
رجع نظره لطوبى...
مشي بيقربلها...لين وقف جنبها...
قعد يشوف لملامح وجهها وهي راقده..ملامح التعب مسيطره عليه..ولونه شاحب...
وقتها خطروا عليه كل المواقف اللي كانت فيهم طوبى في احلى حالاتها..
تضحك..تبصر..مبتسمه ديما..كلها حيويه ونشاط وكأنها فراشة طير حواليه..
فراشة الضوء اللي وين تشوفه تنبهر بيه تتشوق لقربه..
وين تقربله تنحرق...
مش عارف شن كان يبي يتمنى وقتها..
لو انها ماجتش في طريقه ابدا وقعدت بنت جيرانهم وبس..
او...
انها طلعت في حياته قبل كل الناس بش ملكها وملكاته..
ممكن لو صار هكي كانت تغيرت هلبه حاجات فيه وفي حياته..
هو هكي فكر وقتها...
بس بعد كل اللي صار..بعد ماولت مرته واهم جزء في حياته مايقدرش يستغنى عنه..
فكرة الفراق عنده ولت هي وفكرة الموت واحد..
الخوف منهم واحد...
واللي يخاف ع حياته يدير المستحيل بش يحميها..
وهو عنده استعداد يدير اللي مايندار بش مايخسرهاش وتقعد ليه هو بس...
مد يده وحطها ع راسها..وبإبهامه يمسح ع صدغها وهو يقول بصوت حنون...
طوبى..طوبى...
هي فتحت عيونها... شمت ريحة عطره..
قعدت ثواني تحاول تستوعب وتوعى..
ووعت تماما لما سمعاته يقول..
طوبى..شن حالك توا..
بعدها بدت تسمع في صوت نجاة..وكلام نجاة...
》 الجالي اول ليلة زواج انتي وياه خلاك لين رقدتي وجاني لشقتي وقعد معاي للصبح وانتي خلاك ملوحه بروحك في الفندق زي الكلبه..《
》 .يوم المحضر كنا اني وياه في جناحك ايه اني وياه وع نفس السرير...وانتي لوطا ترقصي وتغني..《
》 لجالي دارك وسيله بش يوصل للي ييبه واللي هو اني ياغبيه ياهبله وانتي شي ماتبيش تفهمي ع قد مالمحت حيط بلااحساس بلاكرامه...》
لفت وجهها جيهته وشبحتله..
نظرات عيونها كانوا نظرات كره ممزوجه بالغضب غرقوههم الدموع..
وهو يبتسملها ويقول..
لاباس عليكم حبيبي..
ويده جت ع خدها..وابهامه قعد يمسح عليه...
لمسته حسستها بالتقزز والاشمئزاز الشديد..
شدتها بقوة وقعدت تحول فيها وهي تشوفله بقرف..
وهو يشوفلها بألم وضيق..
غيرت عيونها عنه ليده وكيف جت بتتكلم..
عيونها جو ع الساعه متاعه...
ويجي قدامها موقف علق في الذاكرة من بين هلبه مواقف اثارت شكوكها وقتها..
لما جاته جوري بالساعه وهي جايه من جناح امها..
الكلام اللي قاله بش يبرر وجود الساعه عندها..الكلام اللي قالته نجاة بعد مالحقتها..
توا بس فهمت المشهد كله ع حقيقته..وعرفت انه وقتها كان في جناح نجاة..
جناح نجاه اللي قبل كان ليها ولخوه...
شن البني آدم هدا..!؟
معقوله هو لهالدرجه من القذارة ودناءة النفس!!
زادت انقهرت ع روحها..القهر اللي حست بيه توا ماتحساش الا مراة مرت بحالتها..
قهر وحسرة وخيبه وخذلان...
مشاعر تكبر في داخلها وكأنها نار..
وكأن قلبها الحلو الطيب اللي كان اشبه ببستان اخضر معبي ورود من كل الاوان ملكه شيطان بدال مايسقيه عذب الحب ولع فيه نار الكذب والخداع اللي حرقت فيه كل شي وحولاته لرماد...
علاش اني حرام عليك!؟
شن درتلك بش دير فيا هكي!؟
علاش تقهر فيا قهرة عمري!؟
ماشفعليش عندك صغر سني ماوجعكش ضميرك عليا ولو شويه!؟
حرام عليك وعليهم..
عاملناكم بنية طيبه تعشمنا فيكم الخير..
وانتم جيتونا بنية خبيثه وقابلتونا بالشر..
حرام عليك..
فرحتي اللي قتلتها..
راحتي اللي نهيتها..
استقراري اللي ضيعته..
عمري اللي ياما حيضيعوا منه سنين واني نعالج في روحي من اللي درته فيا...
استهلكت مشاعري استنفزتوا طاقتي انت وياهم وكبرتوني قبل عمري...
خليتني نرضى بيك علي علتك ونخاف ربي فيك وناخد بيدك ونحسسك ديما انك كامل بش مانشوفش في عيونك الكسر..لأن كسرة الراجل واعره..واني مارضيتهاش فيك...
وبعد هدا كله ياريته في الاخير ثمر فيك..
طلعت بعد هدا كله قليل بخت وماعندكش حظ..
ياجبروتك يااخي...!
الكلام هدا كله قالاته طوبى بعيونها وهي مركزه بنظرها ع الساعه  ودموعها تنزل..
هو تكلم مرة تانيه وقال..
حبيبي طوبى معاش تبكي دموعك يقهروا فيا..
رفعت عيونها فيه وهي تشوفله بصدمه..
دموعها هي يقهروا فيه ومش متحمل يشوفهم!!!!؟
تعدا الوقاحه والتبلد..استخفاف مابعده استخفاف...
وصلها لأقصى مراحل الغضب والقهر...
وخلاها دير حاجه عمرها في حياتها ماتخيلت حتى مجرد التخيل انها ديرها..
جبدت يده وحطتها بين فكيها وعضت عليها بقوة من قهرتها..
تعض وهي تبكي بالصوت..
ويمر بين عيونها شريط حياتها معاه من اوله لعند مكالمة نجاة اليوم..
كل ماتتفكر حاجه وتوجعها...توجعه هو أكثر..
كانت تبيه يحس باللي هي قاعده تحس بيه وتعرف هو شن دار فيها..
وهو..
كان شاخص بصره فيها وهو مصدوم بقوة...
عيونه تعبوا دموع وفاضوا وهو متألم مش من قوة عضها ليده..
بل من قوة الوجع اللي تسببلها فيه..
هي بعد ماحطت غيضها كله فيه..
فكت يده ودفتها بقوة وهي تبكي..
وحطت ايديها الزوز ع عيونها وقعدت تدعي من وسط قلبها وعبراتها تتلاحق..
الله لاتسامحك..الله لاتربحك..
وهو شاد يده ويشوف للفراغ بصدمه...
وينفتح الباب وتخش فردوس اللي كانت دموعها تنزل وهي تقوله..اطلع برا..امشي اطلع برا..
جبداته من كم جاكيته وقعدت دف فيه وهي تقول..
حسبنا الله ونعم الوكيل فيكم كلكم..
هو معاش تحمل مشي طلع بسرعه..
كان يمشي وهو رافع يده اليسار لمستوى صدره..
ومازال في حالة صدمه من اللي صار..
فات من قدام اميمه والاء اللي كانوا جايات من ممر تاني..
شافوه..
آلاء:الجالي هدا؟
اميمه سرعت خطواتها ووقفت لما قعدت تشوف فيه وهو يمشي بسرعه وضعه يبان مش طبيعي..
خافت هلبه..
وطول لفت ومشت بسرعه لحجرة طوبى وآلاء لحقتها وهي مستغربه..
🍃وين وصلوا في حجرة طوبى..
لقوها في حضن فردوس اللي كانت تقرا ودموعها ماوقفوش..
خشت اميمه وهي تشوف لطوبى كيف تبكي بوجع..
والاء خشت وهي تشوف لحالة خالتها وقلبها مليان خوف عليها وهي مش فاهمه شي..
🍃ولحظات وجتها الدكتورة متاعها تشوف فيها..
قعمزت معاها ع انفراد وقعدت تنصح فيها تبعد عن اي شي يخليها تنفعل وتزعل قدر المستطاع ع خاطر الجنين لأن حالة الأم النفسيه تأثر عليه بقوة وممكن تتسببله في مشاكل..
وطوبى لما سمعت كلامها خافت هلبه ع بنتها...
راجت لين الدكتورة طلعت وقالت..
نبي نصلي..
اميمه؛تمام لكن اليوم تيممي عادي ولما تحولي الكانيولا تقدري تخشي للحمام وتتوضي..
🍃وبعد التيمم..
صلت طوبى الصلوات اللي فاتتها كلها..
بعدين خدت المصحف من فردوس وقعدت تقرا ودموعها مرافقتها...
🍃اميمه بضيق؛بنبات معاك مانقدرش نروح ونخليها..
فردوس؛يكلف يااميمه ساد اللي دفعه خوك اليوم..
اميمه؛ع المرافق ياخدوا 80 جني واني ندفعهم عادي..
فردوس؛ع راحتك..
اميمه؛شويه وجايه..
ومشت من حداهم..
وفردوس شبحت لآلاء وقالت؛زي ماوصيتك ردي بالك تحكي لحد ع اللي صار..
الاء بضيق:باهي علاش ماتبوش تحكولي عيل اني دسوا عليا راهو كل شي ولى واضح..
فردوس؛تحكيلك صاحبة الشان كان تبي..المهم انتي اسكتي تطلع منك كلمه ياآلاء نقاطعك عمري كله..
الاء هزت راسها وهي مضايقه وقالت؛باهي..تصبحي ع خير..
فردوس؛قدامك كل خير..
ومشت آلاء وامها معاها بعيونها لين درقت من قدامهم..
بعدين مشت ولت لحجرة طوبى..
☘واميمه كانت مع حسين في الحسابات ودفعت حق قعادها الليله..
حسين؛كان روحتي خيرلك..
اميمه؛مانقدرش نخلي طوبى..المهم..انت برا روح بآلاء توا الدنيا ليل..
حسين:تمام تو نولي بعدين..
اميمه:تمام..سلام..
حسين:سلام... ومشي بيطلع من المصحه..
وهي مشت بتولي لحجرة طوبى..
رن تليفونها وهي ماشيه قاماته لقت حسناء تتصل بيها..
فتحت الخط وردت...
السلام عليكم حسنا..
"وعليكم السلام..اميمه حسين وين وخيره مايردش ع تليفونه"
اميمه وقفت في مكانها وقالت بإستغراب:علاش شن في متعاركين!؟
"مش متعاركين ياأميمه لكن قعدت ساعه نراجي فيه ماجاش اضطريت نروح بروحي"
غمضت اميمه عيونها بشده بعدين فتحتهم وقالت؛والله ياحسنا صارلنا ظرف قوي شويه..
"شن صار!؟"
اميمه؛بنت عمي طوبى تعبت شويه ومالقيناش من يرفعها المصحه غير حسين..
"لاباس عليها..امتى صار؟"
اميمه:مع الظهر..
"تمام مع الظهر واني مروحه قبل المغرب علاش ماجاش!؟ وعلاش مايردش ع تليفونه!؟"
اميمه؛تلقيه تفلوش مسكين واشبح وين حاذفه ومايندريش عليه..
سكتت شويه بعدين قالت..
"تمام تمام..وان شاء الله لاباس ع بنت عمك..سلام"
وسكرت عليها..
نزلت اميمه التليفون وهي تأفف بتذمر..
بعدين كملت طريقها....
🍃🍃🍃🍃🍃
"كان ماجيتش راهو ماقلتوش"
مطيره بضيق:والله يابنتي ماقعد فينا عقل ع عينك كل شي .
فايزة بحزن:لاحول ولاقوة الا بالله..باهي قداش بتقعد في المصحه؟
مطيره؛لبعد غدوة إن شاء الله
فايزة:خلاص غدوة بإذن الله نمشيلها..
مطيره؛ان شاء الله..خشي فيزة..
فايزة:لا والله مافيها كيف البنات يراجو فيا..ان شاء الله لاباس ع طوبى..
مطيره؛لايوريك باس.
فايزة:تصبحي على خير..
مطيره:قدامك كل خير..
ومشت مطيرة سقدت فايزة بعدين ولت

خشت للحوش..
🍃وفي جنان حوش بوها..
كان مقعمز مع خوها واحد يفضفض والتاني يسمع..
لطفي:خاطري نمشي عمره رمضان هدا لكن على هالحال مانقدرش..
علي:برا يالطفي برا مش قاعدات بروحهم راهو..
لطفي:عارف يابوي لكن خاطري مايهنينيش حتى سدرة نبي نشوفها ومش قادر...
تنهد علي وقعد ساكت..
لطفي:سامحني بوي كدرتك بمشاكلي ومشاكل بناويتي اللي في عمرك انت مفروض مرتاح توا..
علي:فكك من القطاف الزايد اللي مانحباش..انت ولدي وهادوا بناتك بنات ولدي اعز منك انت..وبعدين الابوه ماياخدوش فيها تقاعد راهو الاب يقعد اب لين يموت..
ابتسم لطفي وقال؛بعد عمر طويل ع الطاعه ان شاء الله..
علي:آمين..اسمع مني وبرا للعمرة وماتفكر في شي بإذن الله كله ينحل وكل شي يمشي ع الكيف..
لطفي بإبتسامه باهته؛ان شاء الله..إن شاء الله..

...يتبع....