#طوبى "جنة طوبى"
#جمان_فريد
#الجزء_التاسع_والستين"عابي على ربي"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#سورة_الفاتحه
عَنْ أَبِي سَعِيدِ بْنِ المُعَلَّى رَضِيَ اللَّهُ عَنْهُ، قَالَ: قَالَ لِيَ النَّبِيُّ صَلَّى اللهُ عَلَيْهِ وَسَلَّمَ: أَلاَ أُعَلِّمُكَ أَعْظَمَ سُورَةٍ فِي القُرْآنِ قَبْلَ أَنْ أَخْرُجَ مِنَ المَسْجِدِ. فَذَهَبَ النَّبِيُّ صَلَّى اللهُ عَلَيْهِ وَسَلَّمَ لِيَخْرُجَ مِنَ المَسْجِدِ فَذَكَّرْتُهُ، فَقَالَ: ( الحَمْدُ لِلَّهِ رَبِّ العَالَمِينَ). هِيَ السَّبْعُ المَثَانِي، وَالقُرْآنُ العَظِيمُ الَّذِي أُوتِيتُهُ ) رَوَاه البُخَارِي
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ثم هزمتني مواقف احتجت فيها الى أب 🍃
-------------------------------------------------------------------
وقفت البنت وقالت؛لفي يمين تلقيها..
هزت مروة راسها وهي ماشيه بدافع خوف شديد ع صاحبتها..
وين لفت يمين زي ماقالتلها البنت..
مالقت حد..
وقفت في مكانها وهي متعجبه هلبه وقالت..وينها راما..
وتلتفت..
وتنتفض من الفجعه لما تشوف واحد واقف قدامها وهو يتفحص فيها بإبتسامه كلها خبث وهو يقول..
حبي...
وخرت للخلف وهي ترعش وتقول بخوف..
/حول عليا غادي..
بعدين نزلت عيونها وجت بتهرب..
لحق عليها وشدها وحطها ع الحيط..
وقبل ماتصرخ حط يده ع فمها..
قعدت تقول.."حول" بصرخه مكتومه..
وتحاول تقاومه...
وهو ساكت ولاكلمه وكأن كان يراجي في حاجه...
ومروة مازال تصرخ وهي بتنجن من الخوف..
الخوف ع سمعتها...وع سمعة امها وخواتها..
مروة في هديكا اللحظه تخيلت حالة امها واللي بيصير فيها لو صابتها حاجه ..
غمضت عيونها بشده وقعدت تصرخ وهي تبكي...
الولد شبحلها وقاللها..
مش دايرلك ماتخافيش..
فتحت عيونها وشبحتله..
حرك راسه بالنفي وهو يقول..
مش دايرلك شي معاش تبكي..
قالت بصوت مكتوم وهي تتوسل...
خليني..
غير عيونه عنها وشاف يساره..
وهي تشوفله بخوف شديد
حول يده وشبحلها
"هذا شنو!!؟"
طلق مروة وطلع يجري
ومروة شافت لمصدر الصوت بصدمه جمدتها خلتها لاقادرة تتحرك ولاتتكلم
الأخصائيه الاجتماعيه وهي تشوف لمروة بصدمه قالت:انتي يامروة انتي ديري هكي يامروة!؟
مروة وهي ترعش وبلعثمه قالت
/لالا والله لا والله مادرت حاجه
الابله بأسف وبنظرات استنكار
/والله لما قالولي مابيتش نصدق لين شفت بعيوني خسارتك يامروة..
مروة وهي تحاول دافع عن نفسها ودموعها ينزلوا..
/والله العظيم..مادرت حاجه..والله مانعرفه..نترزا في صحتي..
الابله بغضب:سكري فمك معاش تحلفي..تحركي قدامي لمكتب ابله نجاح..
رجليها مش قادرة تحولهم ثقلوا من هول الموقف اللي انحطت فيه..
وعيونها في الابله ودموعها زي السيل..
الأبله؛مروة قتلك تحركي قدامي..
مروة بنبره باكيه مرتعشه..
/والله مانعرفه..والله مانعرفه..
الابله فقدت اعصابها..شدتها من ذراعها وهي تقول ..
تحركي وسكري فمك معاش نبي نسمع صوتك..
وقعدت تجر فيها وهي تقول..
/المدرسه هادي طلعت اجيال مافيش مرة طلعت عليها سمعه مش كويسه وتجوا انتم فرخات قاعدات ماطلعتوش من الدحيه ديروا فيها العار..
ومروة انهدت بالبكي ومعاش قدرت تتكلم ولادافع عن روحها..
الخوف..الفجعه..الصدمه...هدا كله خلاها اضعف من انها دافع ونفسها..
ويزيد ع مابيها منظرها وهي تنجر قدام الطالبات والابله تهزب فيها..
واللي مايشتري يتفرج ع قولة المصريه..
صاحباتها انفجعوا لما شافوها بهالحاله مشولهم يجروا وهما يقولوا..
"خيرك مروة..خيرها ياأبله شن دارت مروة!؟"
الابله؛سكري فمك انتي وياها وحولوا غادي..
ومروة تبكي ومنهارة وراسها لوطا وكأنها فعلا ارتكبت جرم ودارت فضيحه..
في هاللحظه..
طلعت من راما من وسط مكان مغلق في المدرسه..
كانت فيها مع زوز من زميلاتها يراجعوا للإختبار..
وين سمعوا الدوشه طلعوا يشوفوا شن في..
وين شافت مروة بهالحاله..
انصدمت وحست بشي في داخلها انوجع..
من الجهة التانيه في الساحه..
كان اسماء مقعمزة مع شلتها ويتفرجوا ع الموقف وكأن مشهد من مسلسل او فيلم قاعدين يستمتعوا وهما يشوفوا..
اسماء:نبهتي ع ثويبه واكرام ولا؟
؛ماتخافيش الامور كلها لوز اللوز..
🍃وخشت الابله بمروة داخل..وراها صحباتها..
وراما قعدت تشوف من بعيد لأسماء وكانت متأكده انها ورا اللي صار..
🍃🍃🍃🍃🍃🍃
"حسيت انهم حيادين وهما يحققوا معاك ولا متحاملين عليك؟"
عبد الرؤوف وهو يجاوب في اخته؛عادي زي كل ضباط التحقيق..
المحجوب حس ان عبد الرؤوف مش صادق في اجابته..
نبيله؛ع العموم اطمن المحامي اللي حطيناهولك ممتاز تخصصه القضايا هادي ماخسرش ولاقضيه قبل..
عبد الرؤوف:اني عابي على ربي مانضيعش..
المحجوب ونبيله؛ونعم بالله
شدت اخته ايديه وقالت؛مشغوله عليك غرفه هلبه..
ابتسم ع جنب وقال:شن حالهم؟
نبيله؛الحمد لله كويسين..
عبد الرؤوف؛أمنت ماليها عليها ونأمنك حتى انتي كان قدرتي طقي فيها كل يوم وقوليلها قالك رؤوف اصرفي من فلوس المحلات زي مايعجبك مادوري شي..
نبيله؛علاش هي ماتصرفش منهم؟
عبد الرؤوف:اخر مرة جاني فيها اسكندر قالي بعتتله مع حسين الفلوس اللي يطلعوا من المحلات يجيبهولي طول هي مش مستحقه..قولليها رؤوف مش مستحق شي ومهتمين بيه هني هلبه وماناقصه شي..
المحجوب بإبتسامه؛قوللها انت بروحك..
عبد الرؤوف استغرب..
قام المحجوب تليفونه واتصل بغرفه ونبيله تشوفله..
بعدين مد التليفون لعبد الرؤوف وهو يقول..
سمحولك بالمكالمه هادي..
خداه وملامح الفرحه كانوا باينات ع وجهه..
حط التليفون ع وذنه وكان الخط ينادي..
وبلهفه وقلب يدق بقوة يراجي فيها ترد..
🍃هي كانت واقفه في الجنان تتفرج ع شجرة الفل وتتفكر في موقف صار بينها وبينه قدامها..
قطع عليها سرحانها في هالذكرى الاتصال اللي جاها..
قامت تليفونها شافت خالها يتصل قلبها انقبض بخوف..
هي ماكانتش تعرف انهم ماشيينله زياره..
فتحت الخط وردت بخوف..
/ايوه خالي..
"ايوه بطه شن جو"
حست قلبها طار من مكانه لما سمعت صوته..
قالت بدهشه؛رؤوف!!؟
"ايه ايه..شن جو"
غرفه حطت يدها ع فمها وملامح البكاء بدت ع وجهها..
" نسكر راه"
حولت يدها وقالت بنبره باكيه..
/استاحشتك قريب نموت من غيرك ياعمري..
"شن دايره امورك تمام صحتك كويسه"
ابتسمت وسط دموعها وقالت..
/كويسه كويسه الحمد لله..وصغارك كويسين..
" باهي الحمد لله..المهم ردي بالك ع روحك وكولي كويس وراجعي عن الدكتورة متاعك"
غرفه بنبرة باكيه؛حاضر حاضر..
"سلمي ع الجميع"
غرفه بلهفه؛غير راجي شويه بس مازال نبي نسمع صوتك ليا قريب شهر لاسمعت صوتك ولاشفتك حبيبي ..
"باهي اللي تفكرت..اسمعي فلوس المحلات اصرفيهم براحتك هادم فلوسك انتي"
غرفه وهي ترشف وتمسح في دموعها..
/انت اولى بيهم اصرف بيهم ع روحك غادي..
"لالامش محتاج الامور هني تمام مادوري شي"
غرفه والعبرة خانقتها..
ترا عاودها مرة تانيه استاحشتك وانت تقول فيها..
"تي خلاص مادوري شي..سلمي ع الجميع"
وسكر عليها..
هي ببكي؛علاش تسكر علاش..
علي طلعة فردوس من الكوجينه وهي تقول بخوف..
/خيرك تبكي من كان يكلم فيك؟!
غرفه ببكي:رؤوف من تليفون خالي شكله مشاله زياره..
فردوس بفرحه؛الله!..شن حاله ؟!
بألم قالت؛يقول باهي بس نحس فيه يكابر،ااه ياوجع قلبي..لامتى يافردوس قوليلي لأمتى..
فردوس بحزن؛يفرج الله غرفه يفرج الله عاجلا غير اجل..
غرفه برجاء..
/يارب..يارب..
فجأه..انفتحوا عيونها ع وسعهم وقالت..
/حي!
فردوس بفجعه؛خيرك!؟
حطت غرفه يدها ع بطنها وقالت..
تحركوا!..
فردوس بفرح:حق!؟؟
خدت غرفه يد فردوس وحطت ع بطنها وهي تقول..
/اصبري شويه..
قعدوا الزوز يراجوا في حركه تانيه..
وبعد انتظار دام للحظات صارت الحركه المنتظره..
فردوس بضحكه:اهيا اهيا..
غرفه وهي تضحك ودموعها تنزل..
ياعمري استاحشوا بوهم ..زعمه يتحركوا الزوز ولا.واحد فيهم ولا واحد وبعده التاني!؟
فردوس بضحكه؛شن داراني ماحملتش بتوامه قبل..اهو اهو تحركوا تاني..
غرفه بضحكه؛ايه ايه..ياروحي اني..
فردوس:موعدك قرب خليها تشوفلك جنسهم..
غرفه؛لا لين يطلع عبد الرؤوف..
فردوس:اعرفي وخلي حد يوصهاله وهو في الحبس تفرحيه وتهوني عليه..
غرفه وعيونها غارقات بالدموع..
صح عندك حق..خلاص تونقوللها ديرلي الجهاز..
وفردوس قرصت خدها وهي تشوفلها بإبتسامه حب..
وهي ردتلها نفس الابتسامه..
🍃🍃🍃🍃🍃🍃
"اني كلمتها شويه بعدين مشيت وخليتها نحسابها ولت لصاحباتها"
مروة بصدمه؛شن تقولي ياكذابه!! اقسم بالله هي اللي رفعتني غادي ياابله وقالتلي راما تبكي وتبيك تجيها والله العظيم..
ثويبه وهي تتصنع في الصدمه..
/وتحلفي فوقها محق.رك بجديات!
نجاح بحده؛ثويبه!
ثويبه:اسفه ياابله لكن تتبلى عليا وتحلف فوقها !
مروة ببكي:والله ياابله نجاح والله العظيم هدا اللي صار..ان شاء الله نموت ان شاء الله نموت كان طلعت نكذب والله الولد هداكا مانعرفه والله..ابله نجاح انتي تعرفيني وتعرفي امي..
نجاح كانت تشوف لمروة بضيق وحاسه في داخلها ان مروة صادقه بس المشكله ان في من شاهد عليها مش طالبات بس حتى الاخصائية الاجتماعيه متاع المدرسه شافتها واقفه علي الولد..
غيرت عيونها عن مروة للأخصائيه وقالت..
/الطالبه اللي جت خبراتك ياابله وينها؟
:لحظه بس استاذه..
ومشت طلعت بتناديها..
مروة وهي تبكي؛ابله نجاح والله مانديرها والله هما داروهالي ياابله هما..
نجاح مابتش تشبحلها نهائي..
ماتبيش تظهرتعاطفها معاها تبي تكون حياديه وهادي وظيفتها..
ع خشة الابله ومعاها البنت اللي خبرت ع مروة..
لما شافتها مروة زدات صدمتها..
البنت تقرا معاها وعلاقتها بيها كويسه علاش دير فيها هكي!؟
الاخصائيه؛اكرام ياابله تقرا مع مروة في نفس الفصل..
نجاح؛شن شفتي يااكرام؟
البنت بضيق قالت:بصراحه ياابله مروة ليها هلبه دير في حاجات في الفصل مش كويسه..
مروة بصدمه:اني!!؟
نجاح:زي شني!؟
:تحكي للبنات في حاجات مش كويسه وتعلق في تعليقات سخيفه..وعندها نقال تجيب فيه معاها تكلم منه في الاولاد قدامنا وهي وياهم يقولوا في كلام يسخط..
مروة حست ان كل شي فيها هبط واولهم قلبها..
البنت كادت تنجلط..
الاخصائيه؛وعلاش ماتكلمتيش من قبل!..
؛خفت ياابله لكن توا لما شفتها ماشيه ورا المدرسه تبعتها لما لقيت واحد ينقزلها من السور خفت ياابله تنظر سمعه المدرسه من وراها قلت لازم نديرلها حد..
الاخصائيه؛جوني قبل وقالولي نفس الدوة وقالولي وين تطلع في المرواح يلحقوا فيها السيارات لكن ماصدقتش نشبح فيها بنت متربيه ومتفوقه صدمتني فيها هلبه..
مروة غمضت عيونها وهي تاخد في انفاسها بصعوبه..
مش قادره تستوعب شي من اللي صار معاها قداش تمنت وقتها يكون كل شي عاشاته توا كابوس وحتفيق منه في أي لحظه...
نجاح وهي تشوف لإكرام لاحظت عليها الارتباك حتى الكلام اللي قالاته كان مش مرتب هلبه..
غيرت عيونها عنها وناضت وقفت وهي تقول..
/لفصل تانيه اول ابله كريمه..
الاخصائيه؛اطلعوا قدامي..
طلعوا ثويبه واكرام..
ومروة كانت تمشي بخطوات ثقيله وراهم وهي مصدومه..
البنت مش قادرة تستوعب ولاثصدق اللي صاير فيها..
يمشوا بيها رجليها وعقلها يفكر في امها بس..
جي بين عيونها الايام الصعبه اللي عاشتهم امها..
توصياتها ليهم وتنبيهها عليهم انهم مايديروا شي يوطي راسها..
وهما عطوها وعد يقعدوا رافعينه مدى الحياة..
وصلوا للدور التاني..
ومشوا للفصل اللي تقرا فيه وخشوله
وهدا كله كان ع عيون الطالبات والمدرسات..
الاخصائيه بحده؛مقعدك وين؟
مروة رفعت يدها واشرت عليه بدون ماتنطق بحرف..
تأكدت انها ضحيه مكيده انحاكت بخبث شديد..
وهي مافي يدها شي..كل شي ضدها ومافي شي معاها..
الاخصائيه وصلت في شنطتها وخدتها وقعدت تفتش فيها..
ونجاح تمرر في نظرها بين الشنطه وصاحبتها..
ويطلع منها التليفون..
ضمت نجاح شفايفها لداخل بأسف..
والاخصائيه شبحت لمروة بحده بعدين شافت للتليفون وقعدت تفتش..
خشت ع الرسائل
لقت محادثات مع شباب كانوا ذاكرين اسمها اكثر من مرة..
واخر محادثه كانت مع الولد اللي جاها اليوم فيها الاتفاق ع الموعد والمكان..
مشت الاخصائيه لنجاح وعطتها التليفون تشوفه..
خداته نجاح وقعدت تقرا وهي مصدومه ومضايقه ع الآخر...
ومروة تشوفلها بنظرات استسلام..
عارفه روحها لو تحلف ع المصحف مش حيصدقها حد..
الأخصائيه:اني مش مستوعبه يامروة انتي يامروة انتي يطلع منك هدا كله!؟
مروة ولاردت بكلمه...
نجاح شافتلها بعدين قالت:مروة..خودي شنطتك..
جرت رجليها ومشت لمقعدها..
وصلت في مقعدها..خدت شنطتها وسكرت السوسته ورجعت انهارت بالبكي..
حطتها ع ظهرها وقعدت تمشي بإتجاه الباب...
وطلعوا وراها الأخصائيه ومعاها نجاح..
نجاح بصوت عالي: كل وحده لفصلها هيا..
الطالبات انتشروا بسرعه ومشوا لفصولهم ونظراتهم كانت محاصرة مروة..
اللي تمشي وهي منزله راسها وتبكي بالعبره..
فاتوا من جنب راما اللي كانت واقفه قدام فصلها..
هني مروة قالت بصوت يرتعش من البكي..
"حسبي الله ونعم الوكيل"
راما حست بضيق شديد ..
شافتلها عمتها وقالت بحده..
/خشي لفصلك..
خشت راما طول...
🍃ونزلوا بمروة لمكتب الادارة وهي متحاصره بنظرات المدرسات ومرة مرة تسمع في كلام مسموم واعر يقهرها قهر...
☘حطت الاخصائيه ملف مروة ع طاوله المكتب..
نجاح بشده مصطنعه:في الحالات هادي يامروة اي وحده ترتكب غلط زي هدا داخل سور المدرسه عقابها يكون الفصل..خودي ملفك واطلعي..
مروة وهي تبكي خدتها ملفها بصعوبه بعدين قالت..
قبل مانطلع بنقول حاجه وحده بس عمري مادرت حاجه توطي راس امي وان شاء الله نموت قبل لنديرها واني عابيه ع ربي يجي يوم يطلع الحق وحسبي الله ونعم الوكيل..
ولفت ومشت وطلعت من المكتب..
ونجاح والاخصائيه معاها بعيونهم لين سكرت الباب..
نجاح بضيق:في حاجه مش مزبوطه..
الاخصائيه بضيق؛والله كان ماشفتها بعيوني مانصدق يااستاذه..اصلا هي شن رفعها غادي..
نجاح؛قالت ثويبه قالتلها راما موجوده غادي وطلبت منها تناديهالها..
الاخصائيه؛مرات بلعاني قالت هكي بش تلينك ناحيتها
نجاح سكتت وهي تفكر في كل شي صار بحيره...
🍃ومروة طلعت من المدرسه وفي يدها ملفها..
حالتها اللي كانت فيها خلتها مافكرتش دس ملفها في الشنطه..
خلتها ماتفكرش انها قاعده تبكي في الشارع تحت انظار الماشي والجاي..
حالتها اللي هي فيها خلتها تفكر في أمها وبس..
كيف بتبررلها...شن بتقوللها!!؟
وكان ماصدقتهاش!!.
خطر عليها شن دارت وقت عرفت باللي داراته صفاء مع الدكتور إياد..
قلبها انعصر عصر من الألم والخوف...
كيف حتتحمل هدا كله!!!؟
وهي تمشي وغارقه في دوامة الافكار السوداء
فاتت من جنبها سيارة اريج اللي كانت مروحه من كليتها..
شافت حالتها وقفتلها ونزلت المرش وهي تقول
مروة..!
مروة كملت طريقها وهي تبكي وكأنها ماسمعتهاش..
اريج خافت عليها درست سيارتها جنب الطريق ونزلت منها ومشتلها طول..
اريج شدتها من ذراعها وهي تقول؛مروة خيرك شن صاير معاك.
شبحتلها مروة وقالت ببكي..
/روحي بيا لحوش جدي لطفي بالله عليك..
اريج بقلق بالغ:باهي باهي..تعالي معاي..
وخدتها معاها وركبتها السيارة بعدين هي ركبت وتحركت بيها طول للشارع..
ومروة تبكي ورافضه تتكلم ع قد ماسألتها اريج..
وصلت بيها للحوش..وخشت بالسيارة داخل..
ونزلت بمروة من السيارة وخشت بيها للحوش..
انفجعوا فردوس وغرفه لما شافوا حالتها..
قعمزوها في الصاله وقعدوا يهدوا فيها..
واريج جابتلها مية بش تشربها..
مروة ببكي؛مانبي شي..نبي ربي ياخدني بس..
فردوس بخوف:بعيد السو معاش تقولي هكي يابنتي
اريج بضيق:باهي اشربي ميه اشربي..
حاولت تهدي روحها وخدت من اريج طاسة الميه وشربت منها شويه وحطتها..
غرفه وهي تشوف لملفها قالت..
/لزوك من المدرسه!؟
مروة ببكي..
/والله العظيم مادرت حاجه والله هما اللي كذبوا عليا ولعبوا عليا..والله اني مادرت حاجه..
مسحت اريج ع راسها وقالت وهي تشوفلها بألم وقلق..
/اهدي شويه يامروة واحكي شن صار معاك فالمدرسه..
مروة حاولت تهدي نفسها لما حست بشويه راحه وبدت تحكيلهم...
🍃🍃🍃🍃🍃
وامها في هالوقت كانت مقعمزه ورا مكتبها في مركز التجميل..
عيونها ع خدمة العاملات عندها مع الزبونات..
ووحده من العاملات عندها اللي كانت نفسها المراة اللي ساعدتها طوبى..
كانت واقفه تتفرج ع زبونه عندهم وسرحانه فيها..
وزميلتها ديرلها اقنعه تجميليه ع وجهها..
شويه فايزة نادت المراة وهي مشتلها طول..
:نعم ابله فايزة؟
فايزة:لاحظتك ليا وقت واقفه ع العروسه وتتفرجي عليها..
:ايه صح سرحت فيها وتفكرت روحي..
فايزة عقدت حواجبها بإستغراب..
المراة وضحتلها وهي تقول..
/في عمرها تزوجت وسيبت قرايتي وكنت بنطير من الفرحه وطاهقه بروحي زيها بالزبط..تنهدت بحسرة وقالت..وتوا نادمع بنموت اللي سيبت قرايتي وضحيت بأهم شي حاجه تلقاها المراة في حياتها اكثر من اي حد..الشهاده..
فايزة وهي تشوف للعروسه قالت..
/البنيه يتيمه وبكرة امها والوحيد ع اربعه ولاد جو بعدها عطتها بش بكري بش تطمن عليها..
المراة بحزن:ان شاء الله ماتندمش بعدين وتقول ياريتي خليتها تحتي تحمل قرايتها وتعيش حياتها..
فايزة:إن شاء الله..ماعندك شي ديريه توا؟
:تراجي في الزبونه هديكا اللي قاعده في الطرف تكمل استشوار بش نمكيجها..
فايزة بإبتسامه؛مالا قعمزي نشربوا قهوة لين تكمل..
ابتسمت المراة وقعمزت وهي تقول..
/باهي..
وطلبت فايزة قهوة من كافتيريا المكتب بعدين قعدت تهدزر هي والعامله اللي عندها ومرة مرة تسرق في النظر للعروسه وعقلها يرفع في الافكار ويجيب..
🍃🍃🍃🍃🍃
"شن الوس.اخه هادي!؟"
مروة ببكي:حسبي الله ونعم الوكيل فيهم..
اريج:باهي شن سبب العركه اللي بينك وبينها؟
مروة مسحت دموعها وقالت..
عركه عاديه..اصلا البنت هادي مش كويسه ولسانها طويل وماتنفعش بكل قالولي ماتعدليش عليها لكن اني مانسمعش في الكلام..وياريتني سمعته..وقعدت تبكي..
فردوس بصدمه؛اني مصدومه صراحه معقوله عيلات صغار يديروا هالعبيتر شن خلوا للي الأكبر منهم!؟
اريج؛كان تشوفي الشوفات اللي نشوفوا فيها كل يوم دايرات احرف من هكي يام..
فردوس:يالطيف ياربي جيرنا من هالوقت..
غرفه:حتى انتي يامروة ربي يهديك شن مشاك معاها ورا المدرسه..
مروة قعدت تبكي بصمت وماردتش..
خافت تحكي كل شي..خافت لو أمها عرفت ان لراما يد في اللي صار معاها تصير مشكله كبيره يطلعوا منها هما الخاسرين..كان داروا فيها هي هكي شن بيديروا في امها!؟
اريج؛خلاص توا اللي صار صار..
مروة ببكي قالت؛اني واجعتني ماما اكثر من روحي من غير شي الناس مش مسبينها في حالها..
فردوس:علاش تقولي هكي!؟ من يجبد في امك بسو الناس كلها تشكر فيها..
مروة وهي ترشف:مش صغيره اني ياخالتي نعرف كل شي ونسمع شن يقولوا عن المزينه وبنات المزينه..تحسابوني ماسألتش روحي علاش ماما ماتواصلش في غيركم انتم وخالتي نسرين!..ع خاطر النساوين في الشارع يخافوا يدخلوها حياشهم خايفين ع رجالتهم..
كلامها اثر فيهم هلبه وفي نفس الوقت تفاجئوا بتفكيرها..
وهي كملت ودموعها مابطلوش نزول..
/اصلا امي عطتها عمرها كلها وعمرها مافكرت في غيرنا ديما تقوللنا عايشتلكم انتم بس..اصلا مامت عمرها مانست بابا ديما تقول بوكم ما فيش راجل زيه..بعبرتها قالت..ياريته قاعد معانا كان بابا قاعد معانا ماداروش فيا هكي..
وانهدت بالبكي..وخلت اريج تنهار معاها..
فردوس قعدت تشوف لبنتها بألم ودموعها ينزلوا زي السيل انقض الجرح اللي كانت خياطته مرخيه وقعد يسطر جرح مايشفيه الزمان مهما مروا سنينه..
وفي من الخوف قبضله قلبه وقعد يفكر في ضناه اللي مازال ماجوش ع الدنيا ويدعيلهم مايعيشوا هالألم..
🍃🍃🍃🍃🍃
الساعه 1:00ظهرا..
وقفت صفاء قدام المدرسه تراجي خواتها امتى يطلعوا..
شويه شافت تاله طالعه بروحها وهي تبكي..
صفاء بخوف:خيرك!
تاله ببكي:لزوا مروة من المدرسه..
صفاء بصدمه؛شني هيا!!؟
ع جية صاحبات مروة اللي كانوا حزينات ع اللي صار في صاحبتهم..
؛صفاء..
صفاء بفجعه؛شن صار لمروة؟
:الكلبه راما والحقيرات اسما وصاحباتها حفرولها..
صفاء ودموعها قالت بإنفعال:كلموني عربي
مروة علاش لزوها؟
تاله ببكي:حني كنا في فصلنا ماطلعناش استراحه ع خاطر الاختبار جوني بنات الفصل التاني وقالولي اختك لزوها من المدرسه..
:لزوها في جراير راما الحق.يره وحني كنا مقعمزين في الاستراحه جتنا وحده حيوانه اسمها ثويبه..
وكملت البنت سرد باقي الاحداث وصفاء تسمع وهي مصدومه..
اكثر شي قهرها ان اختها انفضحت قدام المدرسه كلها واللي اغلب طالباتها من سكان المنطقه متاعهم وشارعهم تحديدا مديرة المدرسه بروحها جارتهم..!
:صدقيني كله تدبير راما واسما الوس.خات..
؛قلنالها اكثر من مرة فوتيها معاش دخلك بيها رامة الشياطين هادي لكن هي فيك ياوادي..
:اختك طيبه هلبه لين مفسده هدا علاش صار فيها هكي..
وصفاء تسمع فيهم ودموعها تنزل والغضب مسيطر عليها..
فجأه سمعت تاله اختها تقول بحقد..
"ياحي.وانه ياحق.يره..تفي عليك..تفي ياصاي.عه"
هالكلام كان موجه لأسما اللي كانت طالعه مع صاحباتها ووراها بمسافه راما وهي تشوفلهم بضيق..
اسما وقفت في مكانها وقالت لتاله..
/الدوة هادي ليا يا فرخه انتي!!؟ سكري فمك خير مانجي نعطيك كف نرقدك في مكانك ناقص عليا الا فرخه زي انتي قليله ادب مش متربيه...
تاله؛انتي اللي مش متربيه يامتاعة الولاد..
صفاء بحده:تاله!..
وحده من صاحبات مروة قالت..
خودي اختك وروحوا صفاء..
وتقدم اسماء لتاله وهي تحول في شطنتها قالت..
تعالي جاي يافرخه نربيك كان مالقتيش من يربيك..
تاله خافت ودرقت ورا صفاء...
ويجول بنات يشدوا اسماء عنها..
اسماء وهي تفك في روحها منهم..
خلوها.عليها خلوني قليلة الأدب هادي تمشي تشوف اختها اللي شدوها ولد ورا المدرسه والله اعلم شن دارت ولا الكبيره اللي قاعده ترسم ع خو ابلة نجاح وتبعتله في راما بش طيحه نسكت ولانزيد نفضحكم ياعيله وخالها ميلاد يارباية المزينه..
هني صفاء اللي حاولت تكبت غضبها من البدايه انفجرت مرة وحده..
وهجمت ع اسما وطاحت فيها ضرب زي العميه المجنونه..
جوا صاحبات اسما بيضربوا صفاء لولا باقي الطالبات اللي حزوهم عن بعض..
وراما وسط هدا كله هربت للباص وقعمزت فيه وقعدت تتفرج وهي خايفه..
شويه وركبت اسماء اللي كانوا صوابع واظافر صفاء معلمات ع وجهها ووشاحها مجبود وشعرها مقطع وكانت تتحلف وتهدد وهي تقول..
/تو نوريهم بنات المزينه كان ماخليتهم سيره ع كل لسان مانبداش اني هيا..
راما بتوتر:ضروري تردي عليهم!؟.طنشتيهم
اسماء بعد قعمزت جنبها قالت:مش اني اللي نسكت لحد يوصل فيها تو نوريهم تو يشوفوا شن ندير فيهم..
وقعدت تساوي في وشاحها..
وراما تشوفلهت بريبه بعدين قالت..
/انتي ورا اللي صار لمروة اليوم؟..
شبحتلها برفعة حاجب وقالت؛وانتي شن رايك؟
راما بضيق:قتلك مانبيش نضرها.
ابتسمت تهكما وقالت؛لا بالله صدقتك!..انتي اخر وحده تتكلمي، وبعدين اني رديتلها الكلام اللي قالتهولي يومها وخليها توا تعرف من فينا ماشيه في طريق غلط والناس تدوي بيها..وبدت ع وجهها ملامخ المكر والتشفي..
وراما قعدت ساكته من غير ماتعلق وفي داخلها كان في خوف كبير..
قربت منها اسماء وقالت؛هبله توا بيخلالك الجو وولد خالك يوليلك بروحك..
شبحتلها راما..
اسماء بإبتسامة مكر:شغلك دماغك واعرفي كيف تتستغلي الفرص..
فجأه رن تليفون اسماء قالت..
/بيبي تاحشته..
وطلعت تليفونها من جيبها وردت عليه..
وراما بعد ماكانت تشوفلها غيرت عيونها عنها وشافت للروشن وقعدت تفكر في كلامها..
🍃🍃🍃🍃🍃
"نحس فيك مش متقبلتيني مش عارف علاش بس هكي نحس فيك مقعمزة معاي بالسيف"
نجاة تنهدت وقالت؛بصراحه انت دمك خفيف وجوك حلو..
قاطعها وقالت؛نعرف المقدمات هادي وين ترفع..مش مشكله عادي راهو ع القبول الامور هيا..بس نبي نقعد كاسبك صديقه مانبيكش تفوتيني بكل..
ضحكت نجاه وقالت:اكيد حتى اني مانبيش نخسرك..
ابتسم بعدين قال:كان نعرف شن اللي مزعلك ومخليك ديما مضايقه ومهمومه كان تحكيلي بس..
نجاه بإبتسامه؛مافي شي مهم ماتشغلش بالك..
🍃وبعد ماانتهي موعدها معاه..
طلعت من المطعم وركبت سيارتها وتحركت وهي تفكر بحزن وشوق شديد..
مش قادره تنساه لثانيه وحده..مش قادره تشوف لغيره.
قلبها مش مطاوعه ع نسيانه مستحوذ عليها استحواذ رهيب..
ليها مدة بالنسبه ليها وكأنها سنين اللي ماشافتاش فيها..
من كثر ماتفكر فيه ومشغوله بيه ومشتاقتله لسانه بروحه ينطق اسمه..
"جالي"
مش حتقدر تنساه ولاطلع من حياتها هالشي بالنسبه ليها ضرب من المستحيل..
روحت للشقه وكلمت اختها هي اللي تروح بصغارها بالمدارس..وصرفت المراة اللي تقعد مع معاذ وفرحت لما لقاته راقد...
بش تخش سريرها وترقد...
بس قبل ماترقد كانت لازم تمر ع ذكرياتها معاه اللي قعدوا منهم صور بس..
وترقد ودمعتها ع خدها وهي تسمع الاغنيه الايطاليه اللي غنهالها أخر مرة...
🍃وهو في هالوقت..
كان يسمع في نفس الاغنيه في سيارته وهي متوجهه بيه لحوش أهله..
لكن ماكانش يفكر في نجاه..عقله كله كان مع بنت الجيران المتمنعة..الصادة..المعرضه..
درس السيارة قدام حوش اهله..
ووجه نظره لحوش اهلها وقعد يفكر يمشي يشوفها ولالا..
🍃وهي في بداية الشارع.
حطتها سيارة عبير..بعد ماسلمت عليها نزلت منها وكملت ع رجليها..
تمشي وهي حاسه بشي من راحه وجوها كان حلو نوعا ما..
مرت من قدام محل الحلاق التونسي اللي كان يسقد في زبون حلق عنده..
شافها وهي فايته ولما طلع ور الزبون شاف سيارة الجالي واقفه قدام حوشهم قعد واقف في الباب..
🍃والجالي وهو يشوف لحوش لطفي الواعر شافها..
وتفاجئ بهيئتها..
كانت لابيه عبايه لونها اخضر غامق جدا وعليها شاربه لونها رمادي فاتح..
نزل من السيارة وحول نظاراته وقعد بعيونه معاها لين وصلت في الباب..
بسرعه حط يده ع منبه السيارة لما طلع صوته..
هي انفجعت والتفتت..
شافاته...هو ابتسم وسكر باب السياره ومشالها..
غيرت طوبى عيونها للباب وهي تقول بنفاد صبر..
"ياصبور ياربي"
🍃وفي من يبي اضعاف صبرك ياطوبى وهو خاش بسيارته ويشوفك بعدين يشوف هو جايك..
وكان لازم يغض بصره..يلفت نظره قلبه عنك ويتغاضى عن وجودكم..وكأن يحط ع جرحه النازف ملح ويكبس عليه...
التارقي..
درس سيارته قدام حوش المهدي ونزل منها سكرها ومشي طول خش للحوش وكأنه هارب..هو فعلا كان هارب..
🍃بس وين عندها طوبى من شر القضاء نزل بيها..!؟
الجالي بإبتسامه:شن جوك ؟
طوبى هزت راسها من غير ماترد ولاتشوفله..
الجالي:صحتك تمام بنوتنا امورها تمام؟
شبحتله بنظرة حاده فيها إزدراء..
هو ركز ع نظرتها بعدين ضحك وحك رقبته بتوتر وقال..
غدوة مسافر..
ابتسمت ابتسامة سخرية خفيفه..
هو فهمها وقال..
/بخصوص مشروع الملعب اللي قتلك عليه اصحابه في الاصل طلعوا اماراتيين بيديروه في *******..
طوبى:كان مافي شي مهم بتقوله بنخش..
الجالي شبحلها شويه بعدين قال..
/في..الليله راجي مني مفاجأة حلوة تاخد عقلك..
طوبى شبحتله من فوق لتحت بإستصغار بعدين لفت وفتحت الباب وخشت وسكراته في وجهه..
هو بلع ريقه وكبت غضبه..لبس نظاراته..
ولف ومشي لحوش اهله...
وهدا كله كان ع عيون التونسي ..
🍃🍃🍃🍃🍃
"عطيك الصحه الشاورما خيال"
عواطف وهي لاهيه بتليفونها؛صحتين..
؛تي في شن لاهيه من بكري..
عواطف بضحكه؛بعتلي..
ناضت قعمزت جنبها وهي تقول:العب يا..مش قتلك اني؟
عواطف:بعتلي مساء الخير..
:شوفيها وماترديش بسرعه..
عواطف:حتى اني هكي بندير..لكن ياوخيتي اسمه مستفز..
:بالعكس حلو الذئب الأزرق..
عواطف:لا وفوقها حاط صورة ارطغرل وهمي نحس فيه..
:اللي خداته نائله كان مسمي روحه ع الفيس ميماتي باش وحاط صورته..
عواطف بعدم تقبل؛شن جو المراهقين هدا!؟
:تو انتي مالك ومال اسمه وصورته المهم شخصيته ونيته بس..
عواطف:حي!..شوفي شن بعت..
قعدت تقرا صاحبتها..
"ابله عبق ردي من فضلك متعي انظاري برؤية حروفك"
:شكله رومانسي..
عواطف ضحكت وقالت؛شن نرد عليه؟
:ردي مساء الخير وانطلقي في الهدرزة عادي..
خدت عواطف نفس بعدين قالت؛باهي..
وناضت صاحبتها من حداها وهي تقول..
/ربي يقدملك اللي فيه الخير..
عواطف وهي تكتب في الرد..
/اجمعين
🍃🍃🍃🍃🍃
"اني خوفي كله من ماما وعليها"
طوبى:من امك ماتخافيش مستحيل تصدق فيك..
صفاء بغضب:قوليلها تحكيلها كل شي مادس شي..
مروة بخوف؛لالامانقدرش..
عقدت طوبى حواجبها وقالت..
/علاش ؟
مروة:خايفه ماما تكبر المشكله وتعلق مع خديجه شنيبه اسفه ابله طوبى لكن المراة هادي مسمومه وحرفه مانعرفش شن ندير لماما..
صفاء؛شن بديرلها ماعندها مادير..
طوبى بتفكير:امك لازم تعرف يامروة لازم تحكيلها كل شي بالتفصيل وخلي عليا اني ابله نجاح..
مروة بحزن:نحسابها بتصدقني وتوقف معاي صدمني موقفها..
طوبى:ماغلطتش يامروة غادي مديرة مدرسه مش بنت جيرانكم..
مروة مسحت ع صدرها وقالت بضيق..
/حاسه في شي هني غام عليا امتى تروح ماما بش نحكيلها ونرتاح تعبت..
صفاء وهي تشوفلها بحزن؛حبيبتي ماديريش في روحك هكي كانك ع المدرسه تو تحولك ماما لخير منها..
مروة ودموعها في عيونها:شن تقولي ياصفاء بتحولني توا في أخر السنه!؟ بعدين وينها المدرسه عادي ومن فيها نعرفهم بنقعد فيها بروحي..
صفاء:احسنلك مليون مرة..
طوبى:ماتسبقوش الاحداث مانعرفوش شن يصير بعدين..
وينفتح باب الدار اللي هما فيها وتخش فايزة وهي خايفه ترعش ع بنتها..
/مروة شن اللي سمعته هدا؟
مروة طول ناضت وقفت وقعدت تبرر وهي تبكي..
/والله ياماما مادرت حاجه هما تبلوا عليا هما..
ضمتها امها وهي تقول..
/اهدي ماما اهدي..اهدي واحكيلي اللي صار...
ناضت طوبى ومشت طلعت من حداهم وسكرت الباب..
لقت قدامها عمتها قالتلها..
/انتي خبرتيها؟
مطيره؛ايه ضروري امها تعرف قبل فايزة ماتبيش من يدرق عليها اللي يصير مع بناتها..
طوبى:حتى اني فكرت هكي..
مطيره بضيق:ربي يكون في عونها مابعدها مسكينه..
طوبى تنهدت بحزن بعدين قالت:بنمشي نكلم ابله نجاح..
مطيره:ايه بنيتي شوفيها بالك تقدري تغيريلها رايها..
طوبى بقلق:يستر الله..
~~~~~~
مروة وهي تفرك في ايديها ببعض بتوتر وقلق قالت لأمها..
ماما خيرك سكتي هكي!؟
فايزة وهي تشوف في الفراغ كانت باديه ع وجهها التجهم..
صفاء بقلق:ماما اكيد ماصدقتيش في مروة ولا؟
غمضت فايزة عيونها وقالت..
/اني مانصدقش لكن غيري..فتحت عيونها وقالت..شني؟
صفاء:طز فيهم..
فايزة:شن طز فيهم!؟ راكم عايشين وسط الناس مش برواحكم!..يابنتي علاش مافكرتيش قبل لتتصرفي علاش ماجيتيش وحكتيلي..علاش دسوا عليا من الاول وتتكلموا بعد يفوت الفوت علاش!؟..انتي مالك ومالها يامروة مالك ومالها..تستقيم تضيع ولية امرها انتي!؟
مروة وهي تبكي..
/راما كانت صاحبتي زي ماانتي وخالتها صاحبات مارضتيش فيها ياماما زي ماانتي مارضتيش في صاحبتك قبل اني
درت زيك بس..
فايزة بانفعال:اني قاطعتها سنين لما حسيت ان صحبتها ليا بديرلي مشاكل اني مانقدرش عليها تنزل عليا مصايب مانقدرش نطلع منها علاش يابنتي اللي هربت منه طول السنين اللي فاتت تحطيني فيه علاش يامروة..
مروة ماكانش في عندها رد غير البكي..
تفرك في ايديها ببعض وهي تبكي بالعبره..
صفاء ودموعها في عيونها..
/ماما اهدي بالله عليك..
فايزة بقهر..
ااه ياربي ااه...توا الناس كلها بتدوي بيا وبيكم ياما بيطلعوا علياوعليكم..في منهم يراجي فيا ع اتفه غلطه بش يكبروها وينعنعوها ويقولوا هاه هادي رباية المزينه..
الزوز قعدوا يبكوا ومالقوش بشني يردوا عليها بش يهدوها .
تنهدت بقهر وقالت..
ااااه..الله يرحمك يام توا بس فهمتك توا بس..
الزوز قاموا عيونهم وشبحولها بصدمه..
هي مسحت دموعها وشبحتلهم بحده بعدين قالت..
/نوضوا انتي وياها للحوش هيا..
ناضوا صفاء ومروة وهما مصدومات في ردة فعل امهم لأبعد حد..
مشت فايزة طلعت من الدار وهي في قمة الغضب..
وبناتها وراها..
سلمت بالكلام ع العيله وطلعت هيا وبناتها من الحوش..
🌿في الصاله..
فردوس:مش شويه اللي صار راهو كذب ولاحق اسمهم شدوها مع ولد ورا المدرسه..
مطيره بضيق:حق والله كبيره هلبه..
اريج بأسف وتهكم؛عاد الناس توا حصلت فاش تهدرز..
آلاء؛سحيقتهم..كان ربي يحن عليا ونهج برا هالبلاد المتخلفه المعبيه عاهات..
خشت عليهم طوبى وقالت:روحوا؟
مطيره؛ايه وفايزة طايرتلها وجرتها باكيه،انتي شن صار فيك مع نجاح..
طوبى بضيق:القصه معقده هلبه كل شي ضد مروة..
غرفه؛يعني قرار الفصل نهائي؟
ردت عليها تقول:ايه في الحاله هادي الفصل يكون نهائي..
كلهم ضايقهم ع الآخر اللي سمعوه..
وطوبى قعدت تفكر بقلق في مروة اللي كانت منهارة كيف حتتحمل ردود افعال اللي حواليها اللي حتكون بعيده كل البعد عن حسن الظن والانصاف...
🍃🍃🍃🍃🍃
الساعه 4:30عصرا..
"اللهم صل ع النبي الله يبارك ع وليدي اني"
الجالي بضحكه:تسلمي ياغلاي والله كله من دعواتك ومن ورا رضاك عليا..
نسرين بإبتسامه:حتى انت شاطر واجتهدت ع روحك هلبه..
هز راسه وهو يقول بإبتسامه:الحمد لله،المهم اني غدوة بإذن الله مسافر بش نتم اموري معاهم مش مطول بالكثير يومين ثلاثه ومروح..
مغليه؛تمشي وتجي سالم وليدي..مرتك عندها علم؟
الجالي:أول من يعلم..
مغليه رفعت حواجبها وقالت..
/ياسلام!
ونسرين فنصت فيه وهي شاده ضحكتها..
الجالي بضحكه؛طبيعي هي اول وحده تعرف يام ماتنسيش وضعها نبي نفرحها ونعدل نفسيتها..
مغليه؛فرحها ياسيدي وعدل نفسيتها وخلينا حني نطربقوا..
هوناض وقال؛الانسحاب طيب..
ولف ومشي طلع من الصاله وركب لجناحه وكانت هادي اول مرة يركب فيها لجناحه بعد اللي صار بينه وبين طوبى..
🍃بعد ماهو خش لجناحه..
دق باب الحوش..
مغليه:مني زعمه؟
نسرين ناضت وهي تقول؛بالك سدره..
ومشت طلعت من الصاله للباب..
وصلت فيه وفتحاته..
وارتسمت ع وجهها ملامح المفاجأه لما شافت نجاة قدامها..
🍃🍃🍃🍃🍃
"نتكدر لما تضايقي يابنت"
اريج بحزن:قتلك مانبيش نكلمك عارفه روحي بنكد عليك..
"بستاشيو شن تقولي انتي راك مرتي..مرتي والله لولا الظروف راني عجلت بالعرس ودرته بعد العيد نبيك تكوني معاي بش مانقعدش نخمم فيك هكي وانتي بعيده عني"
اريج؛تعرف نضال ومن غير حشم حتى اني نتمنى هكي..
"لاحشم لادياولي مافيش بين الراجل ومرته حشم ياقلبي..ربي يسخر الحال وتتعدل الظروف ونديروا العرس"
اريج؛والله نحبك ياولد انت مانقدرش نعيش من غيرك يامصيبه..
"ولا اني يانكبة والله نموت في مواطي كرعيك"
اريج بقرف:كرعيك يعع..شن كرعيك هادي!؟
"زعمتيني بندير روحي شاعر سايري ياعنشكلك سايري"
اريج بضحكه:باهي قولي شن دير توا..
"نكحل"
اريج؛نعمم!
"نعمل..نع..مل"
اريج؛هابا منك انت هابا..
"اعع شن هابا هادي"
اريج؛صقع عليك الكلمه هادي البنت اللي تخدم مع اختي ديما تقول فيها..مقنينها دوتهم زي العسل ملحنه ماتملش منها وهي تهدرز.
"كان عندك رقمها هاتيه"
اريج:باهي تو ننزل لآلاء وناخده منها..
"بالله راك تنسي قلبي مستاحش الاصوات الحلوة اللي كلها انوثه عييت من الهدرزة مع صحابي"
اريج؛اها هي هكي صار..تمام..فوتهم صحابك الفتره هادي ورد بالك تغلط وتتصل بيهم ورقم البنت والله لما نبتعهولك..
وسكرت عليه..
اريج وهي تشوف لتليفونها..
عاود اتصل بيها خلاته لين يفصل بعدين سكرت تليفونها..
اريج؛لين نوريك انت وبصارتك المالغه...
ومشت طلعت من دار الدروج..شافت للقهوة متاعه..لقاته واقف قدامها ورافع عيونه وهو يشوفلها..
لفت وجهها عنه ومشت..
وهو قعد يضحك بروحه.
🍃🍃🍃🍃
"والله جيت نشوفكم قداش ليا ماجبتش"
مغليه؛سلمها ياربي اللي تنشد ودور وتاخد بالخاطر..قوليلي كيف كان عرسكم..
نجاه:عادي مافيه ماينحكي عليه..
مغليه؛يللا ربي يهني..فاتحه نسرين نهار 3 خمسه..
نجاه برفعة حواجب وهي مبتسمه؛والله!..ربي يكملها ع خير..
مغليه:آمين..وعقبالك..
نجاه؛تسلمي..شوره الحوش فاضي؟
مغليه:قاعدين اني ونسرين والجالي جي تغدا وهدرز حداي شويه بعدين ركب لجناحه يرقد..
نجاة وين سمعت اسمه قلبها قريب طلع منها بس تمالكت نفسها بقوة قدام مغليه وقالت..اها خديجه مش جايه؟
مغليه:لالا اليوم لا..
هزت نجاه راسها بعدين قالت؛معليشي عمتي بنخش الحمام..
مغليه؛خودي راحتك بنتي..
وناضت نجاة ومشت طلعت من الصاله وهي حاجه وشاحها ع كتافها..
قعدت تتفحص في المكان ودور بعيونها بعدين شبحت اعلى الدروج وهي تفكر بتردد تركب ولالا..
فجأه..
قعدت تسمع في صوت خطوات نزول ع الدروج..
وتزيد تتسارع نبضات قلبها..
ويبان عليها..
وين شافاته نازل وهو بكامل اناقته كعادته دموعها عبوا عيونها..
اما هو لما شافها انصدم..
ومن داخله خاف طوبى تعرف بطريقه اوبأخرى بجيتها..
فكر سريعا وتصرف سريعا لما دار ردة فعله غالبا فكر انها حتنفعه ع المدى البعيد..
وقف في الدروج..
عقد حواجبه بغضب وقال بصوت عالي..
استغفر الله العظيم شن هدا!..
هي انفجعت..
ع طلعة نسرين من الكوجينه تجري لما سمعاته..
كمل نزوله وهي بيقول بعصبيه..
معاش تطلعي هكي قدامنا البسي حجابك واستري روحك..
نسرين:جالي خيرك بالشويه المراة ماتندريش عليك هني..
الجالي وهو متنرفز..
ماتندريش عليا!؟ حركاتها هادي من ايام المرحوم طاهر تحسابنا #### طالعه تدهور قدامنا بشعرها العريان هدا غير اللبس..
نجاه وهي مصدومه ع الاخر خشت تجري للصاله..
ع طلعة مغليه وهي تقول..
/اني قلتلها راقد فوق هدا علاش خدت راحتها..
الجالي:امي بالله عليك العوج معاش دافعوا عليه تشوفوا غلط معاش تبرروله ارجوكم وكان تبونا معاش نجوا للحوش معاش نجوا خلاص..
ومشي بسرعه من حداهم وطلع من الحوش..
ونسرين معاه بعيونها..
مغليه؛خيره هدا اللطف مش لهالدرجه!
نسرين؛حتى هي ربي يهديها اكثر من مرة دير في المواقف هادي ومرة قدام طوبى وحتى هي علقت..
طلعت نجاه وهي لابسه وشاحها وشاده شنطتها قالت بإنفعال..
خلاص معاش بنزعجكم لاانتم ولاكناينكم سامحيني عمتي معاش بنجي هني مرة تانيه..
ومشت بسرعه ومغليه مشت وراها بش ترضيها..
نسرين:احسن..وخشت للكوجينه..
🍃برا..
شدت مغليه نجاه وهي تقوللها..
/معليشي يابنتي اعذريه الفترة هادي وضعه مع مرته ملخبط شويه المراة حامل وتتوحم عليه ومسيبه حوشها وهو مش متحمل..
🍃ويانار نجاه زيدي توقدي واكبري وشن يطفيك..
بلعت ريقها اللي نزل في جوفها يحرق وقالت..
حصل خير حصل خير..بالسلامه عمتي..
ومشت طلعت من الحوش..
مغليه بتذمر؛بديرلي مشاكل مع بوك ياجالي ع خاطرها..
🍃وهي برا..
ركبت سيارتها وشغلتها وهي تحرق في العجل..
☘وعمر ونضال اللي كانوا واقفين قدام القهوة يشوفوا فيها..
نضال:هادم خيرهم في الاول الجالي وتوا هي!؟
عمر :خوك دبور وزن ع خراب عشه..
عقد نضال حواجبه وشبح لخوه وقاله..
/علاش شن دار!؟
عمر:انسى انسى..شبحله شويه بعدين قال..استعد حتى انت..
ومشي وخلا خوه واقف في مكانه مش فاهم شي من اللي سمعه..بس في شعور بالخوف تسلل لقلبه...
هالشعور خلاه يلحق عمر بش يفهم منه القصد من ورا تلميحاته المريبه..
🍃🍃🍃🍃
"نجاح..نجاح"
استاقظت من سرحانها وشبحت لراجلها وهي تقول..
/نعم
عبد الحفيظ:قصدك الهدرزة اللي هدرزتها هادي كلها ماسمعتي منها شي
تنهدت بضيق وقالت:سامحني عقلي مشغول هلبه
عبد الحفيظ:بشني ان شاء الله خير
نجاح:مشكله في المدرسه مانوجعش راسك بيها
عبد الحفيظ؛لااني نبي نوجع راسي احكيلي شن صاير بالك نساعدك
سكتت شويه وقالت:باهي تونحكيلك
🍃🍃🍃🍃
"شن بنحكيلك ماعندي شي نحكيه"
نضال بعصبيه؛نرفزت امي ياراجل تي قول اللي تعرفه طول من غير لف ودوران..
عمر لوح جاكيت بدلة الطيران ع الكنبه وقال.
/كل اللي نقدر نقوله ان خوك الجالي بيلحقني..
نضال بصدمه؛علاش شن صار!؟
عمر:اللي يديره الراجل بش يخسر المراة غالبا..الخيانه..
نضال وعيونه متوسعات ع الآخر قعد يشبح في الفراغ ويفكر في اللي يعرفه..
عمر:وضع الجالي اصعب من وضعي وحكايته معقده هلبه وللأسف حتوصل فيك حتى انت..
تبدلت ملامح وجهه للغضب وقال..
/اني واريج مالينا علاقه بحد يتزوجوا يطلقوا ينحرقوا مايهمونا في شي..وكان حارت وبارت ناخدها ونهاجر بيها برا هالخاربه ووجهي والله معاد تشوفوه..
ومشي طلع من شقة خوه وخبط وراه الباب بقوة..
عمر ابتسم بأسف وقال..
مسكين...
🍃🍃🍃🍃🍃
"انتي ماظلمتي حد حكمتي باللي يظهرلك"
نجاج بضيق:بس اني حاسه البنيه مظلومه..
عبد الحفيظ؛دوري ورا القصه زيدي دوري ع الأقل يرتاح ضميرك..
نجاح وهي تفكر:وهدا اللي بيصير..
🍃🍃🍃🍃🍃
فتحت الباب ع دارهم لقت اختها مقعمزه ورا لاب توب خالتها وهي تتفرج وتضحك..
الاء وهي شاده تليفونها بإيديها الزوز:انتي هني
تضحكي وراجلك قالب عليك الدنيا..
اريج برفعة حاجب؛يبي رقم الشرقاويه..
الاء:شن هي؟!..
اريج:جيبي جاي نظني رصيده تم..
مدتلها التليفون وهي مش فاهمه شي بعد خداته منها هي طلعت..
واريج ردت..
/يااهلا..
"علاش مسكره امه التليفون لتوا؟ بري افتحيه وياسر من لعب الصغار متاعك"
اريج صدمها اسلوبه قالتله..
/خيرك تدوي معاي هكي!؟
هو قعد ساكت..
اريج؛الو..نضال معاي..
"آسف..اسف والله ماقصدي كنت مغلول شويه وانفشيت فيك سامحيني حبيبي"
اريج:ولا يهمك ياقلبي بس اني نبي نعرف خيرك شن صاير معاك ماتعصبش هكي من غير سبب انت!
"مافيش حاجه مهمه..'
اريج؛لافي تراجي في رقم الشرقاويه ولا؟
"لاشرقاويه لاجنوبيه اني نحبك انتي بس وعمري ماحبيت غيرك وعمري ماحنحب حد غيرك"
اريج بضحكه؛عارفه..
"لالامش عارفه انتي شنو عندي اريج اني بلاك زي الحوته برا الميه نموت.."
اريج؛خير جدك انت علاش ترعش فيا!؟
"مش قصدي ياقلبي بس نبيك تعرفي اللي فقلبي ليك معاش نبيك تشكي في حبي بكل "
اريج بإبتسامه:ياودي لاشاكه لاشي عارفه روحي اني شن عندك من غير ماتشرح.
"باهي واني"
اريج؛نسخ لصق من اللي قلته توا غير بصيغة المذكر..
"نحبك"
اريج قعدت تضحك وهي تقول؛حتى اني..راجي نسكر ونعطي لآلاء تليفونها ونمشي نفتح تليفوني ونكلمك..
"تمام فستقتي"
سكرت اريج وهي مبتسمه وتقول..
طرشوقي ياناس..
🍃🍃🍃🍃🍃
وتخش نجاة لشقتها وهي تبكي بصمت وغضب..
فاتت من قدام دار صغارها وهي ماشيه لدارها..
وقفت فجاه..
بعدين ولت وقفت ع الباب وقعدت تشوف لصابرين كيف دايرتلهم سفرة وتاكل هي وياهم وقدامهم التلفزيون مفتوح ع برامج الاطفال..
مسحت دموعها وقالت:صابرين تعالي لداري..
ومشت طول..
صابرين التفتت للباب وهي مستغربه بعدين شافت لحمزة وجوري قالت..
ردوا بالكم معاذ يلبز حاجه..
جوري:باهي..
وناضت صابرين ومشت وخلتهم..
جوري شبحت لحمزة وقالت..
/ماما تبكي
حمزة بضيق:امي ماتحبناش زي قبل..
جوري بحزن؛ايه صح..
ومعاذ حداهم ياكل في التفاح ويشوف ومنسجم مع التلفزيون..
🍃وفي دار امهم..
صابرين برفعة حاجب:تلاقيتي انتي ومني غادي؟
نجاه رشفت وقالت:حد..اسمعي جاي هديكا المراة اللي قبل دارتلك حاجات..السحر هادي قاعده تخدم..
صابرين وهي مستغربه؛مانعرفش ليا مده عليها شن تبي فيها؟
نجاه؛انتي تأكديلي منها قبل قاعده تخدم ولالا بعدين نقولك شن نبي فيها..
صابرين بتهكم؛مش ع اساس ماتبيش تجبيه بالطرق هادي؟!
نجاه بحقد:مانبيش نجيبه..نبي نحرقه نبي نبهدله ونقهره قهر ونقهرها حتى هي..
صابرين بعدم فهم؛نجاه فهميني شن صار معاك غادي شن دارلك الحقير!؟
نجاه وهي تحاول تمنع نفسها عن البكاء..
/طلعت حامل الحقيره هديكا حامل هدا علاش طلقني وهدا علاش هي قاعده شاده فيه،وفوق هكي النذل اليوم دارلي موقف لين نموت ماننساه تو نوريه عليه تو نهبله اكثر ماهو مهبول الوس.خ..وقعدت تبكي بحرقه..
وصابرين تشوفلها بحزن وأسف..خطر عليها مختار اللي ماكانش احسن من الجالي في شي بس كان مسببلها رعب مانعها انها تنتقم منه حتى بالكلام..
صابرين؛تو نشوفلك غيرها وحده كانت تسكن في شارعنا الأول المغربيه هديكا..
نجاه هدت بكي وقالت:ايه تفكرتها لكن هديكا..شباحه بس..
صابرين:هدا زمان لكن توا تمرست هلبه ومن كل تركينه يجوها..
نجاه:من وين تعرفي عنها هدا كله؟
صابرين:من بنات شارعنا الاول يومها تلاقينا عند فدوى وجبدنا سيرة الجيران كلهم وجت سيرتها هي حكولي عليها..
نجاة مسحت دموعها وهي ترشف قالت:شوفيهالي بسرعه..
صابرين بسخريه..
/قبل لتهدي ويحن عليه قلبك وتغيري رايك بعدين ولا؟
نجاه حركت راسها بالنفي وقالت..
/لا المرة هادي لا..المرة هادي والله مانخليها تعدي زي ماعدا اللي قبلها ياسر ماطيحت من نفسي ونزلت من روحي لواحد مايستاهلش مني نظره مش اني نديره بنادم ونحبه ونخليه ياخدني..
صابرين؛كان تقوليلي شن دارلك هالحقير!
"خالتو تعالي لمعاذ"
نجاة مسحت وجهها وقالت؛بري اطلعيلهم بري توا بعدين نقعمزوا ونزيدوا نحكوا..
هزت صابرين راسها وهي مضايقه ومشت طلعت من الدار وخلت نجاه تتفكر في الموقف اللي دارهولها الجالي وتزيد تنقهر منه وتحقد عليه..
🍃🍃🍃🍃🍃
الساعه 10:00ليلا..
"خمسه فردات بالله"
محمد المهدي:لحظه شويه..
ومشي يعبي للزبون في اخر خمسه فردات خبزة..
عباله كيسه وعطهاله وخدي منه الفلوس وحطهم في الدرج..
ع خشة صاحبه ولد شارعهم...
:عشيري تمت خبزتكم؟
محمد؛اخر مافيها طلع بيه الراجل توا..
:مانحصلوش حتى فردة ناكلوا بيها دحي..
محمد بضحكه؛وين مشت الخبزة اللي خداها خوك بكري30 فردة راهم..
:تي عازم صحابه ع العشي كلوها كلها ماخلوا فيها حاجه..
محمد المهدي بضحكه؛مجاعه..
:بكل ياراجل هوايش والمشكله مش طالع بكل كلهم نظام خوي مكرونه سباقيتي..
ع خشة صاحب الكوشه وهو يقول؛هاه شني يامحمد بعت الخبزة كلها..
محمد؛ايه قبل شويه تمت..
مشي صاحب الكوشه يشوف الفلوس وهو يقول..
/شن جابك توا انت؟
؛جيت ناخد خبزة ناكل بيها ترديده الليل ماحصلت شي..
:هدا فاش فالح ماكله ونوم.مش يقولوا الصاحب ساحب خيرك م سحبتاش معاك يامحمد..
ابتسم محمد وهو ساكت..
وصاحبه قال: مش ضروري نولي زيه المهم ننفعه لولايا اني ماحصلهاش الخدمه هادي..
ضحك محمد..
:هي تفضل يامحمد هادي يوميتك..
خدي محمد اجرته وقال:تمام..تصبح ع خير..
؛قدامك كل خير..بعدين نادى ع العمال اللي يطيبوا في الخبزة بش يعطيهم اجرتهم..
ومشي محمد طلع هو وصاحبه..
🍃"ايه حقه ماسمعتش باللي صار اليوم لبنت احمد محجوب"
محمد المهدي قلبه بدي بقوة وهو يتظاهر بلامبالاة لما قال..
من فيهم؟
:مروة..
محمد بلامبالاة مصطنعه؛خيرها؟
:قالوا لزوها من المدرسه..
محمد بصدمه؛لزوها!؟
:ايه اختي قالتلي شدوها ورا المدرسه مع واحد..
محمد بعصبيه؛خلاص اسكت اسكت..غير الموضوع فكنا من الدوة في اعراض الناس..
؛اني ماندويش في اعراض الناس وانت عارفني كنت نبي نشوفك عندك علم ولالا..
محمد بإنفعال؛علاش ضروري يكون عندي علم!؟
؛لامش ضروري خلاص فوت..
وقعدوا ساكتين طول الطريق لين وصل محمد للحوش..
بعد ماصاحبه كمل طريقه لحوشهم..
هو رفع راسه وشاف لشقة فايزة بنظرات أسف وعيونه فيهم لمعة الدموع..
بعدين نزل راسه وخش لحوشهم..
🍃وفي شقة فايزة..
كانت مروة راقده في الدار بعد مابكت لين تعبت..
وخواتها تاله وصفاء في الدار التانيه..
صفاء كانت تتكلم بالتليفون وتاله حداها تسمع فيها..
صفاء بنبرة باكيه:ماما حبست روحها في دارها مابتش تخلينا نخشولها ولاهي طلعت الا بش تخش الحمام ومروة بكت لين هلكت من البكي اني خايفه هلبه ياطوبى خايفه تصيرلها حاجه..
"خليك حداها صفاء وامك خليها براحتها"
صفاء بألم:مروة واجعها موقف ماما هلبه وحتى اني الحق وجعني ماتوقعتش ماما دير هكي..
"معليشي اعذروها الموضوع كبير ومش ساهل وانتي ياصفاء كبيره وواعيه وعارفه كل شي"
صفاء بحزن..
/عارفه عارفه...وعارفه كان عندنا راجل راهو ماصارش فينا هكي..
"حبيبتي لو ربي مقدرلكم يصير معاكم هكي كان عندكم الف راجل مايقدروا يردوه عليكم معاش تفكري هكي صفاء"
سكتت صفاء ودموعها نزلوا..
"المهم ردي بالك ع مروة..شجعيها وقويها ماتخليهاش تزيد تتحطم ونفسيتها تتعب راهو هي توا مركبه روحها الذنب وردة فعل امك بتزيدها على مابيها مروة حساسه هلبه..هي اختك تعرفيها اكثر مني.."
صفاء بحزن:صح وهي تبكي دعت ع روحها هلبه..
"ياعمري...ردة فعل امها اثرت فيها هلبه برريلها ياصفاء برريلها ردة فعل امك بش تهوني عليها شويه"
هزت راسها وقالت:حاضر..بعدين قالت..اني توا نخمم في غدوة كان نلقى نغيب بش نقعد معاها لكن عندي اختبارات..
" تجي تقعد عندنا ولاحني نمشوا نقعدوا معاها"
صفاء هزت راسها وقالت؛باهي..
"خلاص صفو انتي ارقدي توا غدوة عندك اختبارات حاولي ماتخلي شي يأثر ع قرايتك تمام؟"
صفاء؛تمام..سامحيني طوبى وجعتلك راسك..
"بري ارقدي بري خير مانفصل عليك"
ضحكت صفاء من وسط دموعها وقالت..
/تصبحي على خير
🍃طوبى بإبتسامه؛وانتي من اهله..
وسكرت وهي تشوف للتليفون لفتت انتباهها رساله وصلتها ع الماسنجر من الجالي..
《 الليله راجي مني مفاجأة حلوة تاخد عقلك》
بشي من الخوف فتحت الرساله...
لقتها صورة...
فتحت الصورة بش تتأكد مم اللي شافاته فيها...
قعدت تتمعن فيها ع قد ماعجبتها للحظه نست كل شي
الصورة كانت لغرفة نوم اطفال كامله بناتيه..
هذا غير ديكورها المبهر..
تخيلت روحها هي وجنة فيها...
تخيلتها وهي تكبر فيها...
ارتسمت ع وجهها ابتسامه خفيفه وحلوة وهي سرحانه في عالم الخيال متاعها اللي سرعان مااختفي لما جتها رساله بعدها من الجالي...
(شن رايك)
شافتها واكيد مش حترد..
بعت بعدها..
(جايه من برا )
كذلك لارد
(بنت الجالي حتى هي)
طوبى استفزتها اخر رساله..طلعت من الماسنجر وحطت التليفون ع الطاوله قدامها وهي تقول بعصبيه..
/حق.ير..
وقعدت تفكر في كلام اخر رساله..
"بنت الجالي"
في داخل هالرساله رساله تانيه مبطنه هي اللي يبيها توصلها..
خافت..خافت هلبه...
ومن خوفها لقت روحها تدعي وهي تقول..
"يارب خلصني منه يارب "
وقعد القلق مسيطر عليها وعقلها مابطلش تفكير..
🍃🍃🍃🍃🍃🍃
مقعمزة كرسي الدرجيحه"المرجوحه،الأرجوحه"
وهي تتكلم بالتليفون بغيظ شديد..
اسماء:لولا اللي وقفوا بيني وبينها راهو نتفتها الكلبه هادي لكن والله مابايته فيا..
"فوتيها حبي فوتي سادهم ماجاهم"
اسماء؛نعم!!؟ تمد يدها عليا وتبيني نفوتها!!؟ نموت كان مارديتهاش وقتي..تعرف..نفكر نلبس امها قضية دعاره في المزين متاعها..
"لالالا اهدي مش لهالدرجه ماتوصلش لهالمواصيل قلبي راك وليه وهما ولايا اللي درتيه فيهم ساد يربيهم عشرة سنين القدام"
سكتت شويه وهي تاكل في اظافرها بغيظ..
"اسماء"
اسماء؛مالك مش قادره نبلعها مش قادره..
"نقولك حاجه حبي خليهم شوري اني"
اسماء؛شن في فبالك؟
"تو يجي وقتها وتعرفي"
اسماء:توا حبيبي نبيها توا نموت من قهرتي كان طولت بيها..
"بعيد السو عليك قلبي صدقيني ياعيني لما ناخدلك حقك.. نبدا مش راجل كان ماخديتش حق حبيبتي"
اسماء بإبتسامه وبنبرة مائعه قالت؛ربي مايحرمني منك بيبي..
🍃🍃🍃🍃🍃🍃
تاني يوم..
ومع الساعه ثمانيه ونص الصبح خلت فايزة مروة في حوش لطفي الواعر..
وطلعت ببناتها صفاء وتاله...
حطت صفاء في مدرستها..
بعدين مشت بتاله لمدرستها اللي هي نفسها مدرسة مروة..
بعد مامشت تاله لفصلها..
هي توجهت لمكتب الإداره..
🍃نجاح:الابله شاهده زميلاتها في الفصل شهدوا عليها مانقدرش نحط هدا كله ع جنب ونقول هادي بنت جارتي ونعرفها ماديرش هكي..!
فايزة هزت راسها وقالت:تمام..تمام..لكن انتي بينك وبين نفسك حاسه ان في من كاد لبنتي ولا؟
نجاح تنهدت بعدين هزت راسها بإيجاب.
فايزة؛خل مالا نقولك الحاجه هادي بري لبنت خوك وراما اسأليها كان ليها علاقه باللي صار..
نجاح بإستغراب؛راما!..
فايزة؛ايه راما اللي بنتي كانت دايرتها صاحبتها واختها ولما لقتها ماشيه مع بنت مش مزبوطه خربت اخلاقها حاولت تباعدها عنها ووصلت بيها انها كلمت البنت نفسها وهددتها لو ماخلتهاش في حالها حتوصلك انتي الموضوع وطبعا بنت خوك لما عرفت جت لبنتي وماخلت ماقالتلها..اسألي بنت خوك ع اللي حكتيهولك هدا كله وشوفيها شن ترد عليك..
قعدت نجاح ساكته وهي متفاجئه من اللي سامعته..
وفايزة كملت تقول...بنتي للمدرسه هادي مش حتولي حتى لو طلعت برائتها لأن مدرسه فيها طالبات واصلات لهالدرجه من الخبث وقلة الربايه مانأمنش ع بناتي يقروا فيها...ياريت تبعتي من يجيب ملف تاله حتى هي..
نجاح قعدت تشبحلها للحظات وهي تفكر ان قعاد تاله في المدرسه فعلا حيضرها من بعد اللي صار لأختها ولقت ان من الأنسب تطلع من المدرسه مع اختها...
ردت ع فايزة وقالت..حاضر..
🍃وخدت فايزة تاله بالملف متاعها وطلعت بيها من المدرسه وتوجهت طول لمدرسه تانيه كانت ابعد مسافه برا المنطقه تماما..المديره تعرفها معرفه شخصيه؛لعيون فايزة سجلت البنات في المدرسه ع اخر السنه وعطتها وعد تمشيلهم امورهم كلها بسلاسه وبدون تعقيدات..
🍃🍃🍃🍃
"شفتيها كيف ماتبيش تشبحلي بكل"
طوبى بنظرةتعاطف ونبرة ضيق:شن كنا نقولوا يامروة بكري؟..
مروة ببكي؛اني مانتحملش ماما تعاملني هكي نحس في روحي خي كارهه روحي هلبه..
طوبى شدت ايديها وقالت:مروة انتي مادرتي شي ماغلطتيش معاش تحملي روحك ذنب انتي مادرتيشي وكانك ع امك هي مضايقه ومعصبه حتى حني كانت تكلم فينا بالسيف..
ع خشة فردوس وفي يدها طاسة مية وسكر وهي تقول:هاك اشربي بنتي..
طوبى طلقت ايديها وقالت:خودي مروة اشربي..
مروة وعبراتها تطلع منها ورا بعضها خدت الطاسه من فردوس وقعدت تشرب..
طوبى؛تاله وين؟
فردوس؛مقعمزة حدا غرفه تتفرج ع التلفزيون..
مروة بألم:حسبي الله ونعم الوكيل حسبي الله ونعم الوكيل..
خدتها فردوس في حضنها وهي تدعي..
/ربي ياخد فيهم الحق يابنتي..
طوبى بقهر؛ياربي الحق في كل ظالم..
وفردوس تشوفلها بحزن وهي تقول..
ايه والله...
🍃🍃🍃🍃🍃🍃
الساعه 1:00ظهرا..
ع بعد مسافه لابأس بيها عن مركز تجميل اميراتي اللي تملكه فايزة..
كانت في سيارة نوع "رانج روفر" واقفه وفي واحد واقف ع روشن السواق متاعها..
مالك:قوللهم يكسروه ع الخفيف ويعطوا العاملات كفين تلاته ويردوا بالهم يقربوا صاحبة المكان وربي يغلطوا ويمسوا منها نبيتهم في جديده..
:حاضر ياراس مايصيرش الا اللي تبيه كون هاني..
مالك:توكل..
مشي الراجل اللي كان واقف ع السيارة..
وخلا مالك واقف بالسيارة...
سرح بتفكيره وهو يذكر في حديث دار بينه وبين صديق ليه..
🔺️في وقت سابق..
في احد اشهر المقاهي في العاصمه..
؛البنيات محترمات ومتربيات الحق مانبيش نكمل فيه الموضوع..
مالك؛خيرك انت مولي حساس هكي!؟ الموضوع عادي جدا الحقهم بالسيارة وهما مروحات لوح كم كلمه وتوكل هو هدا..
:واني معاش نبي..اقسم بالله ماتحملت كان تشوفهم كيف يمشوا وهما منزلات روسهم ويجروا مني جري..البنيه نفسها اقسم بالله وجعت قلبي تحسها ياراجل هكي بريئه ومش زي السرايف اللي نعرفوهم...اني بنات الناس اللي زي هادم مانضرهمش من الاخير..
مالك:نزيدك الف..
؛ان شاء الله عشره والله معاد قاصها خطوة..
مالك بضحكه صدمه؛حي ع امه هدا!؟ مش من جدك..لهالدرجه!.
:انت تعرفني مش واطي لدرجة نشوه سمعه بنات محترمات..
مالك بإزدراء؛الحق مش فيك الحق فيا اللي عبيت ع واحد زيك..
؛خلاص في الجديد اعبا ع روحك ودير حاجتك بروحك..
ابتسم وهو مضيق عيونه بعدين حك تحت شاربه التحتاني وقال..
وليكن..
🔺️في الوقت الحاضر..
رن تليفونه..رفعه شاف المتصل كانت اسماء..
سكر الصوت ولوح التليفون ع الكرسي اللي في جنبه ورجع سرح بتفكيره وتفكر يوم قعد عالق في راسه مش قادر ينساه..
《 خير ياغالي تبي حد هني ومش عارفه حوشه وين بالزبط اني ندلك؟
هو قاله؛اللي نبيه عارف وين يسكن..
قاله؛وخيرك ماتمشيلاش..
مالك بسخريه:وانت شن دخل عمك؟
محمد بحده؛البنات اللي خشوا توا وربي كان مازال نشوفك لاحقهم مايصيرش طيب..
ابتسم بسخريه وقاله؛برا الهى في قرايتك سلم ولدي برا..
محمد بغضب؛ماتخلنيش ندير حاجه نندم عليها..
مالك بتهكم:هاك دير فيها لما تدخل في حاجه ماتخصكش البنت هادي نبيها وفي بيني بينها علاقه نقولك اسمها..نسميلك رقمها نتصلك بيها توا بش تتأكد.》
تنهد وقال؛يللا حتى كان في بينها وبينه حاجه تفركشت..
وابتسم ع جنب..
🍃وبعيد عنه في مركز اميراتي..
كانت فايزة مقعمزة ورا مكتبها وباين ع وجهها الهم..
والعاملات يخدموا في المركز حواليها زي خلية النحل..
ويخشوا عليهم اربعه نساوين ضخام الجثه اشكالهم توحي بالإجرام.
مرروا نظرهم ع المكان وهما يتفحصوا فيه..
جتهم عامله سوريه وهي مبتسمه ببشاشه وقالت..
/اهلا وسهلا فيكن تفضلوا...
ويجيها كف خلاها تفقد وعيها بالمرة..
انفجعوا الزباين والعاملات..
وبدوا هما يجبدوا ويكسروا..
فايزة استاقظت لما سمعت الدوشه طلعت من ورا مكتبها ومشتلهم تجري..
لقتهم طايحين يكسروا ويضربوا..
وقفت في مكانها وحطت ايديها ع فمها وهي مصدومه..
الزبونات يعيطوا..والعاملات يعيطوا ينضربوا وكل شي قاعد يتكسر في المكان..
وهدا كله فايزة كانت تشوف فيه وهي مستوعبه..
ومن خوفها ماقدرتش تحرك ساكن..
#عابي_على_ربي
#طوبى
....يتبع
