#طوبى "جنة طوبى"
#جمان_فريد
#الجزء_الثاني_والثمانين "مارغريت5 "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
سمع النبي صلى الله عليه وسلم رجلا يقول:
اللهم إني أسألك بأني أشهد أنك أنت الله الذي لا إله إلا أنت.
الأحد الصمد الذي لم يلد ولم يولد، ولم يكن له كفوا أحد.
فقال: " قد سأل الله باسم الله الأعظم الذي إذا سئل به أعطى، وإذا دعي به أجاب "
. أَخْرَجَهُ الْأَرْبَعَةُ، وَصَحَّحَهُ ابْنُ حِبَّانَ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 مجبرون على الثبات وإن كان كل شيء حولنا يقودنا للسقوط🍃
________________________________________
ماأكتفاش بالجواب اللي جاه من رئيس لجنة العمارة..
وصل في صاحب العمارة نفسها ولما سأله عن صاحب الشقه...
طلع صديق قديم للجالي.. وبعد اصرار منهم اكدلهم معلومة زواجه وان الشقه حتكون بإسم مرته..
☘محمد شنيبه بصرامه..
/ردبالك توصله حاجه من اللي صار تعرف لو صار وعرف بجيتنا ليك قبل لأني نقوله حتندم هلبه..
الراجل حس ان محمد شنيبه جدي في تهديده مش مجرد تهديد وخلاص..اختار يطلع نفسه منها وقال..
/حاضر ياحاج مايسمع مني شي..
ناض محمد شنيبه وهو يفور ويغلي من الغضب وقال للمهدي..
/هيا..ومشي..
ناض المهدي وهو يشوف للراجل وقاله..
/السلام عليكم..
ولف ومشي ولحق بوه وماكانش اقل غضب من بوه..
🍃طلعوا الزوز من المكان اللي كان فيه الراجل وتوجهوا للسيارة..
محمد شنيبه وهو ماشي والغضب مسيطر عليه..
كان يجي بين عيونه ولمسامعه كلام لطفي الواعر وبنته لما فهموه انه غافل ومايندريش ع اللي قاعد يصير في حوشه..
ركب السيارة وولده ركب معاه..قاله..
/طلع عندهم الحق..طلعت غافل ومانندري ع شي..الميه تجري من تحت رجليا واني ماحسيتش بيها..
المهدي شافله بضيق..بعدين شاف القدام وشغل السيارة وتحرك وهو يسمع فيه يتوعد..
/لكن ياهي..تو نوريهم كلهم واحد واحد تو يشوفوا اللي يستغفلني ويضحك عليا شن يصير فيه..
المهدي ماحاولش يهديه لانه كان معصب اكثر منه ومستني منه عقاب يستاهلوه كلهم عيلته كلها بدون استثناء...
🍃هدا كله صاير والجالي.في محلات الاطفال يشري لبنته في حاجات...
🍃ونجاة غارقه في شغلها وماتفكر في شي غير انها ترضي العملاء والرؤساء متاعها..
🍃🍃🍃🍃🍃
وتولي.آلاء للفندق بعد ماكملت شغلها تبي ترجع الهاتف لصاحبه اللي ظنت انه حاجز فيه...
خشت داخل..وتلاقت مع الموظفه اللي تعرفها..
آلاء:نبي نعطيك التليفون هدا تحطيه في الامانات..للأستاذ عزيز *****
؛ايه نعرفه..لكن ماجاناش بكل..
هي بإستغراب:كيف!؟ بكري لما طلعت من هني تلاقيت اني وياه في الباب.!..
:اني من هني ماتحركتش وماشفتاش خش بكل..
مطت الاء شواربها للأسفل بإستغراب وهي تشوف للتليفون..
"السلام عليكم"
بعدت الاء لما جي واحد وقف ع الاستعلامات خلت صديقتها تشوف شغلها ومشت وهي تفكر من غير ماتوصل لنتيجه..بعدين شبحت للتليفون وقالت..
/كيف ندير توا!؟
شويه..وتشوف مهند مع ارام جايين من المطعم متاع الفندق كانوا يتغدوا فيه..
هالمرة مهند شافها..وفيسع غير عيونه عنها لكن لون وجهه تغير..وأرام لاحظت وضايقت..
الاء غيرت عيونها عنهم ومشت بتطلع وهي مضايقه ع الآخر..
🍃🍃🍃🍃🍃
واقف قدام شركه..
مغطي عيونه اللي كانوا يشوفوا للفراغ بنظارات سود وسرحان...
يتفكر في اللي صار قبل يوم..
اليوم اللي هو كان فيه بأسوأ حالاته..
🔺️في وقت سابق...
بعد المغرب..روح لحوشه من الصلاة...
وبدي بحملة تنظيف للشقه مالهاش أي داعي..
كان يفش في غله ويطلعه في غضبه المكبوت...
🍃وين وصل للكوجينه وبدي يحوس فيها..
قعد وقت طويل واقف يمسح الامواس الكبار اللي كان غاسلهم يمسح ويعاود وهو يتخيل في حاجات تخلي فيه يستعيذ بالله من الشيطان..
فجأة..دق باب الشقه..
تجاهل وكمل اللي يدير فيه..
دق مرة تانيه..قعد يمسح بعصبيه زياده وماباش يتحرك من مكانه..
دق مرة تالته..بعصبيه لوح الموس ع الرخامه ومعاه الفوطه وهو يقول بضجر..
/اييه!..
بعدين خدي نفس وزفر..ومشي طلع من الكوجينه لباب الشقه..
وين وصل فيها..قعد يحاول يهدي نفسه..
بعدين حط يده ع مقبض الباب..زفر ورخي ملامح وجهه وفتح الباب..
بدت ع وجهه ملامح الاستغراب لما شاف اللي واقف وراه..
فراس؛ ع السلامه..ان شاء الله مانكونش ازعجتك بس!
عبد القيوم قعد يشوفله للحظات بعدين حرك راسه بالنفي ووخر عن الباب وهو يقول..
/تفضل..
🍃خش فراس اللي كان باين عليه الارتباك والتوتر..
قعدوا يسألوا عن احوال بعض..
استغرب فراس في حال الشقه وانحرج كذلك لأنه حس انه جي في وقت مش مناسب..
فراس؛ياريت عطيتك علم قبل لنجي..
عبد القيوم؛لامافيش داعي مش مشكله..تفضل قعمز..
قعمز فراس ع فراش حطه التارقي..
وحط لروحه وقعمز قدامه..
وبدي فراس يحكي مع التارقي ليبي بش يفهمه كويس الموضوع اللي جاي فيه مش متحمل..
فراس:نبيك..تسمعني للآخر ارجوك ومتقاطعنيش نهائي شن ماسمعت مني..
عبد القيوم زاد استغرب وبدي فيه القلق وهو يقول..
/تمام...احكي...
🍃وحكاله فراس عن كل شي بالتفصيل من اول الحكايه لأخرها..كان مرتبك وهو يسرد فيه ع التارقي اللي كانت ملامح الغضب مسيطره ع وجهه...
فراس:وماكانش عندي مصلحه ولانيه خايبه غير انهم ليهم فضل عليا وبالذات هي ماهانتش عليا بعد عرفت اللي قاعد يصير فيها من وراها..
عبد القيوم كان حاس بمجموعه من المشاعر وقتها..
حزن..وضيق..وغيره..وغضب..
بس حاول يضبط نفسه ع قد مايقدر..قعد ساكت للحظات بعد مانهي فراس كلامه..
وفراس زاد توتر...
عبد القيوم؛ليش جيتني ؟
فراس:قصدك ليش حكيلتلك انت بالذات..
عبد القيوم هز راسه بآيجاب..
فراس:اول شي..لأنك مقرب من العيله برشه ولاحظت ان يهموك ومن قبل ملاحظ عدم تقبلك للجالي..
وتاني شي..لأني اني وياك كيف كيف...غراب عن الحومة..الناس هني مستحيل يصدقوني ويكذبوا ولد حومتهم..ولااعتقد انهم يرضوا فيه..ونطلع اني بعدين الجاني الوحيد في القصه كلها ونخسر ومانربح حتى شي..
عبد القيوم قعد يشوفله وهو ساكت..
فراس:صدقني فكرت برشه قبل لنجيك ونحكيلك وكنت ناوي نسكت ع الموضوع مرة وحده بس بعدين حسيت اني لازم نحكيلك لعل وعسى يكون في اللي تعرفه مني شي يدير فايده..
عبد القيوم هز راسه بعدين قال..
/قتلي انك شوفتهم مرتين ماشيين لعمارة..وين بالزبط؟
فراس:في ******..حافظ الوصف الطريق..
عبد القيوم رفع حواجبه لما سمع اسم المنطقه..
وفراس يشوفله..
شويه عبد القيوم قال..
/اللي حكيتهولي توا ماتحكيشي مع غيري...
فراس:قتلك اني ترددت قبل لنحكيلك انت مستحيل موضوع زي هدا يعرف بيه حد غيرك..
عبد القيوم هز راسه وهو ساكت...
🍃ومن بعد ماطلع من عنده فراس..وهو مكمل في الحملة اللي دايرها للشقه وعقله مابطلش تفكير..
لين وصل في هديكا الدار..
الدار اللي شهد فيها ع تفاصيل في قصة مايعرفها حد غيره..
وقف فيها بدون مايحرك فيها حاجه..عيونه ع الفيرندا المفتوحه وهو يشوف لفيرندا جناح الجالي مسكرة..
وبعد طول تفكير وصل لشي تمنى من الله سبحانه وتعالى انه ينفع طوبى ومايضرهاش...
🍃🍃
وبفارغ الصبر استنى يطلع الصبح..
جهز نفسه ومشي طول للخدمه...
وقعد في مكتبه يراجي في زميله عيسى..
ويجي..في الاول كان الوضع عادي..
الراجل يخدم في خدمته زي كل يوم..
لكن عبد القيوم كان مركز عليه بنظره اغلب الوقت وهو يفكر..
لعند ماناض وهو يقول..
/عيسى تعال شويه برا..
ومشي طلع طول..
استغرب زميله..بعدين ناض ومشي طلع وراه وسكر المكتب..
🍃طلعوا برا الشركه للباحه متاعها...
عيد القيوم؛نبيك في خدمه وعابي ديرها ليا..
عيسى:راك تقولي المزرعه قتلك قبل..
قاطعه وهو يقول..
/لا بعيد.عنها..الموضوع حساس واجد وجدي..
عيسى:إن شاء الله خير..
تنهد عبد القيوم وقال..
/في راجل نعرفه عنده بنت طاحت في واحد مايخافش ربي..خداها وهو يعرف وحده قبلها وبعد ماخداها قعد معاها..يعني خيانه..المهم البنت لما عرفت طلبت الطلاق وتبي يكون عندها اثبات قوي ع خيانته..المهم امس سمعت انه يتلاقى مع التانيه في شقه في عمارة موجوده في المنطقه متاعكم..نبيك تسألي عليهم كويس نبي معلومات تنفع فاهمني..
قاله:ايه فاهم..تمام نسألك..
عبد القيوم:اليوم..
قاله:حاضر..اليوم اليوم..
🍃وقعد عبد القيوم باقي اليوم يستنى ع أعصابه لين جاه اتصال في الليل من صاحبه..
"والله شن بنقولك..سألت كويس كويس..والعمارة اللي حكيتلي عليها اللي يسكنوا فيها كلهم عائلات..بس في شقة في الدور الرابع صحابها معاش جوها بكل من فترة هما راجل ومرته وماعندهمش صغار وع كلام الجيران كانوا يجوها من فترة لفتره يعني مش قاعدين فيها.."
عبد القيوم بإنتباه:هما مافيش غيرهم..لكن شن قصة راجل ومرته هذي!
"مش هني المفاجأه..حسب ماسمعت انهم متزوجين مافيش شك..لكن الشقه للمراة...مكتوبه بإسمها يعني"
عبد القيوم بصدمه..
/متأكد من المعلومه هذي!؟
"مصادر موثوقه..جارهم اللي مقابلهم بالزبط.."
🍃والمعلومات هادي لخبطت دماغ عبد القيوم وخلاته يلغي حساباته كلها..
وكمل هديكا الليله وهو يفكر..يدوب رقد ساعتين بعد الفجر بعدين مشي للخدمه..
وغادي..كان ينفد في باقي اللي مخططله بس النتائج في نظره تختلف..
وهي ان اللي لازم يعرف بالمعلومات هادي محمد شنيبه نفسه.. حتى لو فرض انه لازم توصله فكرة ان في ناس تعرف السر اللي يحاولوا يخفوه بش يداروا ع كذبهم ودنائتهم...
وممكن بعد مايعرف..يضغط ع ولده ويخليه يطلق طوبى..
🍃وفي يوم الخميس...
في باحة الشركه..
عبد القيوم:نبيك تحكي معاه وتقوله اللي عرفته بإختصار بطريقه تخلي عقله ينشل..وبعدها تسكر..ونطربقوا الشفرة
صاحبه بضحكه..
/هي هادي! نحسابك تبيني نقتل قتل..
عبد القيوم:الوضع جدي هلبه مش متحمل بصارة لو تقدر عليه كان بيها..لو ماتقدرش مش مشكله ساد تعبك معاي امس..
قاله:تي هات الرقم ياراجل..نحبه الجو هدا اني..
عبد القيوم؛عيسى الوضع جدي...الوضع جدي ياعيسى..
ضحك وهز راسه وهو يقول..
/فاهم فاهم..هات رقمه هات ومادورش الباقي...
🔺️في الوقت..
استاقظ عبد القيوم ع خبطة صاحبه لكتفه..
/قاعد ماروحتش!
عبد القيوم؛نراجي في عياد قال جايبلي ورقه ماورقه..
قاله؛انت قاعد جوك ملخبط..المهم الامور حتمشي تمام..سلام..
ومشي..
وعبد القيوم يتبع فيه بعيونه وهو يقول..
/وعليكم السلام...
🍃🍃🍃🍃🍃🍃
الساعه 6:15مساءا..
طلع عبد القيوم من شقته وهو لابس سوريه لونها زيتي وسروال جينز ونظاراته فيده..
نزل لوطا..ومجرد ماطلع من الحوش لبس نظاراته وقدم كم خطوة وهو يمرر في نظره ع الشارع ويشوف في الوضع..
ثبت نظره ع مطحن حوش شنيبه لقي محمود واقف قدامه..
محمود اول ماشافه حياه باليد وهو مبتسم ابتسامه عريضه..
وعبد القيوم لأنه كان قلق ومتوتر يدوب ردله الابتسامه ورفع يده..بعدين مشي لمطعم ربيع..خشله وقعمز فيه...
🍃🍃🍃🍃
في حوش لطفي الواعر...
فتحت طوبى باب الدار وطلعت منها متوجهه لدار المعيشه..
خشت ع اختها وبنات اختها..
ومشت قعمزت..
هما قعدوا يشبحولها..وهي تشوف للتلفزيون..
فردوس:جنة راقده؟
شافتلها طوبى وهزت راسها وهي تقول..
/امم..
فردوس:مخليتلك من الغدي نجيبهولك؟
طوبى:لالا شن تجيبهولي اني ناخده بروحي لكن مش توا..
سكتت فردوس وغيرت نظرها للتلفزيون وهي تخفي في قلقها..
اما بناتها فكانوا يسرق في النظر لخالتهم سرقه بش ماتلاحظهمش..
شويه قالت..
/بعد غدوة جنونه تسكر شهر..
شبحولها بإبتسامه..
هي ابتسمت وقالت..
/خاطري نديرلها اللقطه هادي اللي يديروا فيها..نصورها وهي راقده وفي جنبها رقم الشهر اللي يعدي من عمرها..
الاء:اني عليا التصوير والله ناخدلك لقطات احلى من اللي شفتيهم..
طوبى وهي تحرك في ايديها..
/نبي نديرلها البوم صغير..
اريج:حلوة الفكرة..
طوبى وهي مبتسمه..
/خلاص غدوة نطلعوا العشيه ناخدوا اللي ناقص..
فردوس:بتطلعي انتي..
طوبى تلقائيا..
/ايه نبي نتنفس ونغير جو..
اخفوا ضيقهم عليها من الكلام اللي قالاته وقالت فردوس..
/اطلعي..وجنونه في عيوني..
طوبى بتبرير:نبي ناخد ع اني نطلع ونخليها بس يبدا ساهل عليا وقت القرايه..
اريج:كويس..
سكتوا..بعدين رجعوا شافوا للتلفزيون..
طوبى حطت يدها ورا رقبتها ودلكتها شويه بعدين قالت..
/مفروض جدي يجيب الحسابات متاع الشهر اللي فات الاسبوع هدا..غريبه عطل بيهم..!
فردوس:لاجي امس ونشدني عنك..كنتي راقده مابيتش نوضك..
طوبى وهي دلك في رقبتها..
/اها..
اريج:رقبتك توجع فيك؟
طوبى وهي تشوف لفردوس:راقده رقدة غلط..لكن مش مشكله ماتوجعش هلبه..ماخلا معاك شي؟
فردوس:لا..
ناضت طوبى وقالت:في حوشه ولا؟جدي قصدي..
الاء:شن نسيتي اليوم خميس مع صحابه في المدينه..
طوبى:ايه صح...اكيده خلاهم في المطحن..مشت بتطلع وهي تقول..ماشيه للمطحن..
طلعت من حداهم..وهما قعدوا يشبحوا لبعض بأسف وحسرة..
🍃🍃🍃🍃🍃
طلع من المطعم ...شاف جهة حوش شنيبه بعدين كمل القدام بطريقه للمطحن..
وصل فيه وخش وهو يقول...
/السلام عليكم شباب شن جوكم..
الزوز بأصوات متقطعه..
/ماشيه..الحمد لله..
عبد القيوم:نبي وحده حبهان اللي عندي كملت اليوم الصبح..
:حاضر..
مرر نظره ع المطحن وكيف جاي بيتكلم..
ينفتح الباب التاني للمطحن..
وتخش طوبى وهي لابسه عبايه رماديه وشاربه من نفس اللون..
جو عيونها في عيونه من ورا النظارات..
هو تلخبط وارتبك وغير عيونه عنها طول..
هي سكرت الباب وقعدت في مكانها وقالت..
/السلام عليكم..
ردوا عليها الزوز لكن هو ماردش..
لاحظت بس تجاهلت..بعدين قالت..
/ايوب..جدي خلا مذكرة الحسابات هني!؟
:ايه الصبح حطها هني.
هي قالت .
/جيبها ترا..
ومشت وقفت في مكان ادرقت فيه عن مدخل المطحن القدامي..
وهو واقف يراجي في طلبه وكان في قمة التوتر والارتباك..والغيره..
مشي العامل عطاها المذكرة وولى مكانه..
عبد القيوم:استعجل شويه ايوب..
ايوب وهو يطحن في القهوة..
/لحظه بس..
هو تنهد ومرر نظره ع المكان..
اتفاجئ لما بانت عليه وهي تشبحله..
رفعت سبابتها وهي تشوفله بمعنى..
"تعالى شويه"
لحظات واستوعب..بعدين مشالها وهو ع قد مايقدر يتماسك ويغض بصر قلبه قبل عيونه..
وقف عليها وعيونه بعيد عنها وقال..
/تفضلي..
هي قالت وكانت تحرك في المذكرة..
/الربح ينقص مايزيدش هدا غير مدايرين دعاية كبيره!
هو قال..
/في منافس قعد يحاول ياخد الاماكن اللي تبيع في القهوة متاعنا..
طوبى تهكما:دار دعايه بش ياخدهم!
عبد القيوم عقد حواجبه وقال..
/المسأله مش هكي..بعدين المنافسه في التجارة وارد فيها كل شي..ربح خساره..ربح كبير ربح صغير وهكذا..
طوبى:حني مش متحملين خساير مازلنا في البدايه علاش الدعايات اللي ع الفاضي..
عبد القيوم؛الدعايه اني بس اللي صارف عليها..
طوبى :اه..معناها بتبدا تمن علينا من توا
عبد القيوم:هذى اللي فهمتيه !
طوبى:الربح لازم يزيد الشهر الجاي مش معقوله الحرارات والحاجات هادي تنشرى وقهوتنا تقعد..
عبد القيوم:قاعدين نديروا في جهدنا بش يتحسن الوضع ان شاء الله..
هي قعدت تشوف لخطه في المذكرة بعدين قالت..
/ان شاء الله...
سكرتها بعدين قالت..
/نستأذن..
هو بجرأة قال:لحظه..
وقفت وهي تشوفله..
عبد القيوم:ياريت معاش تجي هنا وتخلي الحسابات يجنك لعندك..
هي قالت:علاش!
قاللها؛انتي توا في وضع حساس وفي من يراجي فيك ع زله..
هي بحده قاطعاته وقالت.
/معليشي الامور هادي ماتخصكش ماليكش حق تدخل في حياتي الشخصيه...ياريت ماتتماداش وتتخطى حدودك..
ولفت ومشت طلعت..
وخلاته مصدوم ا..
التفت لما كلمه العامل وقاله القهوة واتيه..
هز راسه وقال..اها القهوة..تمام
ومشي خداها منه..وعطاه حقها.
وطلع من المطحن طول...
:اشبح شن صار بيناتهم..
:من وجهها كانت زي اللي تهزب فيه..
:تعرف..حاسه ليه علاقه بالمطحن عنده شي فيه..
:كيف؟
:مش عارف كل لكن كل شي يقول هكي..
🍃وهو اللي كان في حالة غضب وصدمه في نفس الوقت..
ماركزش ع الطريق وهو ماشي الا لما سمع سيارة شدت فرينو..
غمض عيونه بشده وفتحهم بعدين كمل طريقه طول..
ويفوت الجالي بسيارته وهو يشوف للتارقي كيف خش لحوش خوه بنظرات حاقده..بعدين قال..
/غبر مانبيش ندير في رقبتي رقبة...
بعدين غير نظره القدام..
وصل في حوش بوه..درس السيارة ونزل خش داخل..
ويتكرر نفس المشهد..ويشوف نجاه كيف خاشه من باب الحوش الدخلاني..
الجالي سكر الباب وقال بملل..
/إياااه!
ومشي رمي كندرته وخش وراها...
☘تلاقوا داخل..
الجالي جي جنبها وقال..
/شن في تاني!
هي شبحتله بفجعه و قالت..
/وين نندري عليهم!
وكملوا طريقهم لين وصلوا في الصاله..
خشوا الزوز..ومرورا نظرهم الموجودين..
خديجه ومغليه...
اللي كانوا مقعمزات حدا بعض وباديه ع وجوههم ملامح التوتر والخوف...
بعيد عنهم شويه المهدي اللي كان يشوفلهم بنظرات غضب حاده..
ومحمد شنيبه اللي لما خشوا كان يمشي ويجي حدا الطاوله اللي في نص الصاله..وين شافهم خشوا وقف وحط ايديه ورا ظهره وعيونه عليهم تقدح شرار..
تسلل لقلوبهم الخوف...
غير الجالي نظره عنه ويجي ع الطاوله..شاف المصحف استغرب استغراب شديد وزاد خوفه..
وهي بعدين لاحظت المصحف اللي ع الطاوله..بلعت ريقها وشافت لخديجه..لقت ملامح الخوف باديات ع وجهها..
محمد شنيبه تهكما..
/يااهلا وسهلا..خيركم واقفين غادي..تفضلوا قعمزوا...تريحوا..
واشرلهم ع الكراسي المقابلات للطاوله..
شافت نجاة للجالي اللي مشي طول قعمز والتوتر بادي عليه..
وهي بعدين لحقاته وقعمزت...
والزوز المصحف ولى قريب عليهم وعيونهم عليه..
محمد شنيبه..
/ترا حط عينك في عيني..
قام الجالي عيونه في بوه..
قال بوه..
/توا انت لما حطيت يدك عليه وحلفت يومها ع من كنت تضحك وقتها عليا اني ولاعلى ربي!
هو ارتبك..شاف لأمه..
بصوت عالي بوه قال..
/شوفلي هني..
انفزع وشافله طول..
بوه قال..
/اني اللي نكلم فيك معاش تشبحلها..
الجالي؛شن في تاني شن في من كذبه جديده مطلعينها!
المهدي حرك راسه يمين ويسار يأسا..
وبوه قال..
/كان في من كذاب هني انت..
نجاة قعدت تشوف للجالي بخوف..
الجالي خبط كفوفه ببعض وقال..
/لاحول ولاقوة الا بالله..اني شن داير لربي بش يدير فيا هكي.
بوه بغضب..
/ماتجيبش اسم الله ع لسانك ياكذاب ياضلايلي..
الجالي؛لو سمحت..
بوه وصل لأقصى مراحل الغضب..خبط رجل الطاوله برجله ومشاله وهو يقول..
/وليك عين تعلي صوتك ياكلب..
هو خاف وطول نزل عيونه..
بوه طبس عليه وقال..
/اني..اني.تستغفلني.وتضحك عليا!.. تخليني مهزله اللي يسوى واللي مايسواش.تخليهم يشوفوني مغفل راقد ع وذاني مانندري على شي...
ويصفعه ع وجهه صفعه من قوتها لين يده وجعاته..
انصدمت نجاه وماتت من خوفها..
وامه واخته زاد خوفهم وقلوبهم انوجعت عليه..
اما المهدي ماكانش خايف الا على بوه..اما الجالي في نظره يستاهل اكثر من هكي...
محمد شنيبه..
/عام..عام وفوق ليك واخدها..وواخدلها شقه وتتلاقوا فيها..
عام وفوق..يعني ماطق خوك متوفي..معناها بعد موته بكم!؟ تي لوخشت عده ماظني كانت مكملتها وقتها!..
شبحلها وقال...قولي يا شن بنطلع عليك من فمي بس..قولي..كنتي تقرني في ولدي مع خوه!
الزوز شبحوله بفزع وقالوا مع بعض..
/لاالا..والله لا..
الجالي؛انت كيف تفكر هكي معقوله توصل بيك لهني!
قاله بعصبيه:مع كذابين زيكم توصل بيا لهني وابعد!..
نجاة انهارت وقالت.
/لا والله نترزى في صحتي نترزى في صغاري كان صار هكي..كله اللي صار صار بعد ماخدمت عنده بعد وفاة طاهر والله.العظيم ياعمي..
محمد شنيبه ودموعه في عيونه..
/يعني بعد شهر ولا شهرين..لااني قدرتي تصبري لين تفوت شهور العده لو كانت عليك وقتها..ولا هو الكلب احترم موت خوه..
نزل الجالي عيونه وهو مصدوم ومقهور..
وخر عنهم وهو يشوفلهم بكره وألم بعدين لف ومشي بيقعمز قريب عن المهدي..
ومرته وصغاره يشوفوله بقلق..
قعمز بهده وقال...
/بنت الواعر عندها حق..خليتوني نظلم بنت الناس مرتين..مرة لما رضيت ناخدهالك و اني.عارف علتك..ومرة وانت مداير الخونه اللي هي كشفتها قبلي وقالتلي عليها وقالي عليها حتى خوك المهدي...وكذبت الكل وصدقتك لأنك حلفت ع كتاب الله..والله ماتخيلت ان ولدي.اللي ربيته وفرحان بيه يديرها ويتجرأ ع ربي ويكذب وهو يحلف بكلامه..
بدي الجالي يتصبب عرق وامه تشوفله بألم ودموعها ينزلوا..
شاف محمد لخديجه وقال..
/وانتي ياسبب الخراب وين ماتمشي مافيش حاجة شر الا وسعيتي فيها..والكذب عندك زي شراب الميه..شن الضنوة هادي..من مازال بنصدق فيهم ولانحط فيه ثقه..كان امكم نفسها اللي مفروض تصوني ومادرق عليا شي استغفلتني ودارتني طرطور وضحكت عليا..
نزلت مغليه راسها وهي مخزيه منه ودموعها تنزل..
اما خديجه كانت شاده ع قبضة يدها بقوة من الغضب وعيونها في الارض..
غمض عيونه بحسرة وقال..
/حسبي الله ونعم الوكيل فيكم كلكم..
فتح عيونه وشاف لنجاه وقال..
/اني قدرتك ودرتك بنتي وحويتك مع صغار ولدي في حوشي..هدا جزائي..هدا اللي نراجي فيه منك.
نجاة بألم..
/عمي سامحني لكن اني كنت مجبورة..اني.لاعندي مالي.ينشد فيهم الظهر ولانقدر نرعى صغاري بروحي..وانت كنت رافض فكرة الردان..وولدك قالي تتزوجوا في.السر وبعدين نحطوهم تحت الامر الواقع وتو يرضوا..
شافلها الجالي بحده..
نجاة وهي تبكي..
/اني مالياش ذنب...اني اصلا مظلومه اكثر من طوبى ياعمي..هي اللي خشت عليا...هي اللي كانت مرته في العلن واني مدرقه تقول مدايرة عيب وحرام..هي اللي طلقني.ع خاطرها لما انفضح.قدامها وخاف منك تعرف..
الجالي في هديكا.اللحظه.كان يبي يخنقها لين يطلع روحها..
وامه واخته يشوفولها بغضب..
اما نظرات المهدي ليها كانت كلها ازدراء استفزاته لما حاولت طلع روحها مظلومه وخلاته يطلع عن صمته ويقول.
/فوتيهم الطروح هادم الجو هدا معاش يمشي ع حد..لو نيتك صافيه وكنتي مراة محترمه حق راك مارضتيش لروحك بهالوضع..تقولي مجبورة ومظلومه وتتحججي بظروف غيرك عاش اسوأ منها ومادارش ربع اللي انتي درتيه..واقرب مثال بنت الخويلدي المراة هادي كانوا عندها مالي لكن خلوها لمصيرها ماحد فيهم وقف معاها ..مالي راجلها بعد توفى خلوها في الشارع هي وبناتها...متخيله وضعها انتي متخيله اللي عاشاته!!؟ وشوفيها ليها عشرة سنين وفوق عايشه مع بناتها تجري وتكد عليهم لين كبرتهم بروحها ومااستغلت حد مااستغلتش ظرفها زي ماانتي درتي صانت نفسها ليومنا هدا..كانت تقدر دير زيك..لكن مادارتش..وهني يبان الفرق..
هي قعدت تشوف للأرض بغضب ودموعها ينزلوا..
المهدي:معاش تبرري لروحك المبررات السخيفه هادي..وكان انظلمتي حق مافي حد ظلمك كان نفسك..
محمد وهو يسمع فكلام ولده كان يشوف لنجاة بخيبة أمل وحس روحه وقتها كارهها لأبعد حد..
المهدي:وانت مش حنديرك بريئ لكن مازال اسوأ منها بوين..ساد الكذب اللي كذبته وظلمك لبنت الناس حتى بعد ماطلع اللي مدرقه..لااعترفت بغلطك ولاقلت نصلحه كنت دافع ع روحك بالكذب وطلع فيها هي اللي ماتنفعش وهي اللي ظالمه..شن الجبروت هدا شن هدا! حطيت يدك ع كلام الله وحلفت كذب..تي وصلت بيك تعرض عليا في.المراة اللي كانت مرتك ناخدها.بش تبعد ع روحك ع الشبهه!!..
بوه بغضب قال..
/تفي..
المهدي:والله لتوا مامستوعب ان هدا كله يطلع منك انت..
والجالي كان في.حالة يرثى لها..ويقطر تقطير عرق من الغضب والتوتر...
محمد شنيبه وهو يشوف لولده بغضب..ساوا تقعميزته وقال..
/اشبحلي هني..
قام الجالي عيونه في بوه...
وبوه قال...
/عندك واحد من هالزوز وانت اختار..
يانتبرا منك ونحرم عليك تجي هني ونحلف ع امك بالطلاق معاش تشوفك ولاتسأل ولانخليك توقف في عزاي ولاتحضر جنازتي ولا تورثك قرش واحد ..ونسلب منك كل شي عندك حتى لو كنت انت دايره لأنك لولاي اني مادرته.. ونخليك ترجع للصفر وتقعد بروحك دبر راسك...
مغليه تشوف لراجلها بصدمه وقلبها بيوقف من الخوف..
والجالي من الخوف لين لون وجهه انخطف..
عارف بوه كويس..في الحالات هادي يهدد وينفد دون رجعه..
وكمل محمد شنيبه وهو يقول..
"ياإما..تعقد ع نجاة مرة تانيه"
رفعت نجاة عيونها في شيبانيها بصدمه سمعت دقة من قلبها كانت اشبح بصوت ضرب المدافع قوتها لدرجة انها كانت تحسابها الاخيره..
ومغليه وخديجه الصدمه جمدتهم وهما يشوفوله لمحمد شنيبه ومش قادرين يصدقوا ودانهم..
والمهدي كان متوقع هالقرار رغم انه مابلغاش بيه قبل لأنه عارف بوه كيف يفكر..
عكس الجالي اللي كانت الحاجه هادي اخر مايتوقع...
مغليه بصدمه..
/شن تقول ياحاج...عارف الناس شن بتقول علينا بعدها..
بغضب قاللها..
/بكري قلت اللي جابلي الدوة ع ولدك واحد مانعرفاش لاقال اسمه ولاقدرت نعرف من هو..معناها فضيحة ولدك في من يعرف بيها..والناس من غير شي مستغربه كيف اني مخلي هادي عايشه هني تتوقعي بعد يطلع عار ولدك مش حيفكروا في اللي فكرت اني فيه بعد عرفت!..انتي لو كنتي مراة مقومه راك من اول ماعرفتي جيتي قلتيلي طول راني درت حل..لكن والله يامغليه ماني معديها وحنحاسبك عليها انتي واللي فجنبك..ورجع شاف للجالي وقاله..
/مش حتطلع من هني الا وانت ومقرر ومختار...
ساد الصمت المكان...
كلهم كانوا يترقبوا في جواب الجالي واكثرهم نجاة..
والجالي ماطولش هلبه بس يختار وياخد قرار شاف لبوه وقال..
/باهي..نرجعها..
نجاة حاولت بكل ماعندها من قوة تخفي ملامح فرحتها اللي بانت ع وجهها عصب عنها لكن فيسع اختفت لما سمعاته قال..
/لكن بنت الواعر مش مطلقها.
المهدي:نعم!..
الجالي:هادي حاجه تخصني ماتدخلش فيها..
محمد شنيبه..
/اني اصلا معاش نبيك طلقها..نبيك تتحمل مسؤوليه اللي درته..بينك وبينها بنت...مايجيش نسعى بش نشردها ونخليك تربي صغار عمها..!
نجاة ضمت يدها بقوة من الغضب..
الجالي خدي نفس وارتاح بعض الشي بعدين قال..
/خلاص..واني مستعد نتحمل المسؤوليه..لكن..مش حيطلع للناس شي..
المهدي:كيف قصدك زواج في السر مرة تانيه!
الجالي:اكيد لا ومش حيكون هكي..قصدي نبي الناس يعرفوا اني رديتها ع خاطر صغار خوي بعد ماانت رفضت تردها..
المهدي بإزدراء..
/شن الحقارة هادي!.
فنص الجالي بغضب..
وبوه قال..
/مالا شن.تبيني نقول للناس لقيته واخدها من وراي..
غمض المهدي عيونه بإحباط..
مغليه:شن تبينا نفضحوا برواحنا..
فتح عيونه وقال بإنفعال..
/لا اكيد مش حنرضي..كيف نرضى..الله غالب جيتوا عيلتي ماعندي ماندير..
بوه قاله..
/مهدي اهدى..
ناض وهو يقول..
/طالع بكل انخنقت....
ومشي طول طلع من حداهم..
نجاة في نفسها..
"مشية الحصان لفزان..ودرة"
محمد شنيبه تنهد وقال..
/تأجل سفرك مش حتسافر الا بعد ماتعقد عليها.
الجالي ع مضض..
/حاضر..
محمد شنيبه..
/وانتي من اليوم معاش عندك ليا وزن ولااعتبار واعرفي اني لولا الفضيحه ماخلتيكش هني دقيقه زياده..نوضي اطلع من قدام وجهي..
ناض وعيونه لوطا بعدين مشت طلعت من حداهم..
توجهت لباب الحوش وابتسامتها ع وجهها..
طلعت من الحوش وهي تجري لشقتها..
وصلت في الدروج وركبت تجري لين وصلت فيها فتحت الباب وخشت وسكراته وبدت تغني وترقص..
خلوني نرقص خلوني..
امه وخواته خطبوني..
وقعدت تزغرط بصوت واطي..
بعدين قعدت تضحك من قلبها بفرحه..ومشت تجري لتليفونها..
خداته ركبت فيه السماعات وحطتهم في وذنها وشغلت اغاني وحطاته في جيب سروالها وبدت ترقص..
ع طلعة صغارها من دار المعيشه لما سمعوها تغني..
قعدوا يتفرجوا عليها وهما متفاجئين..
ماعدا معاذ اللي مشالها يرقص معاها..
هي وين شافاته ضحكت وقالت..
/ياعمري..
وقعدت ترقص هي وياه..
وجوري وحمزة يشبحوا لبعض وهما مش فاهمين شي...
🍃في الوقت اللي فيه..
كانت طوبى غارقه في كآبتها وهي مقعمزة حدا بنتها تتفرج عليها بحزن...ودموعها ينزلوا....
#مارغريت
#طوبى
....يتبع...
