#طوبى "جنة طوبى"
#جمان_فريد
#الجزء_الثالث_والسبعين"لاحياة لمن تنادي"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
(وَلَنَبْلُوَنَّكُم بِشَئٍ مِنَ الْخَوْفِ وَالجُوعِ وَنَقْصٍ مِنَ الأَمْوَالِ والأَنْفُسِ وَالثَّمَرَاتِ وَبَشّرِ الصَّابِرِينَ الَّذِينَ إِذاَ أَصَابَتْهُمُ مُّصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ أُولَئِكَ عَلَيْهِم صَلَوَاتٌ مِنْ رَبِّهِمُ وَرَحْمَةٌ وَأُولَئِكَ هُمُ المُهْتَدُونَ )
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃فات الأوان والندم مابقاش منه فايده قلبي ع ولدي انفطر وقلب ولدي ع الحجر🍃
__________________________________________
في شارع القهوة..
زحمة قدام حياش عيلة الواعر..
وسيارة الاسعاف واقفه تستنى..
شويه وطلعوا لطفي الواعر ع النقاله وهو مغطي تماما بعد ماحاولوا فريق الاسعاف انقاذه لكن دون جدوي
حان آجله..رفعت الأقلام وجفت الصحف...
بعد ماطلعوه من الحوش اصوات النحيب والنواح تعالت اكثر واكثر..فاجعه بكل معنى الكلمه...
🍃طلعت سيارة الاسعاف من هني...
خشت سيارة المحجوب اللي كانوا فيها هو ومرته ورؤوف وغرفه..
المحجوب لما شاف الزحمه عرف اللي صاير طول...
قعد يشوف لغرفه بخوف..
غرفه وهي تشوف من الروشن؛هدا شنو خيرهم!
عبد الرؤوف شبح لمحجوب بقلق..
لقاه يشوف لغرفه بنظرات حزن وخوف..
ونبيله كانت خايفه ومش قادرة تتوقع شي..
درسوا السياره قدام المطحن..
اصوات العياط كانت واضحه..
خبطت غرفه ع رجليها وقالت..
/بوي..
كلهم قعدوا يشوفولها بقلق ودموع نبيله نزلوا طول..
رجعت خبطت مرة تانيه وهي تتنفس بسرعه من الفجعه وتقول بنبرة مرتعشه..
/حاس روحه..كان حاس روحه..ووه عليا..بوي..بوي..
شد راجلها ايديها وقال:غرفه غرفه...قولي لاإله إلا الله..
غرفه وهي تتنفس بسرعه وبدت تبكي..
/بوي يارؤوف بوي..مالحقتش نفرحه مالحقتش...ياربي علاش حني هكي علاش يصير فينا هكي..
وبصرخه قالت...علاش..
ضمها راجلها ليه وقاللهم؛انزلوا انزلوا...
المحجوب وهو متألم ع الاخر فتح الباب ونزل ونزلت بعده نبيله وهي تبكي..
سكروا عليهم الباب..
وخلوا غرفه تبكي بفجعه ع بوها وراجلها يحضن فيها ويذكر فيها بالله..وهو نفسه كان مفجوع زيها...
🍃خشوا المحجوب ونبيله داخل..
الرجاله كانوا معبيين الجنان..
بسرعه نبيله خشت للحوش..
والمحجوب جي للرجاله وعيونه ع الحاج علي اللي كان مقعمز ع كرسي متكي ع عكازه وذهنه شارد..
قال:شن صار ؟
يوسف ودموعه ينزلوا؛لابيه لاعليه لقوه ميت ع كرسيه اللي مقعمز عليه جدي توا..
المحجوب بألم؛إنا لله وإنا إليه راجعون...
مرر نظره ع الرجاله اللي كانوا من بينهم فراس الصيد وولاده وبلال النجيري وباقي الجيران..
بس اللي استغربله وجود محمد شنيبه وولاده نضال وعمر..
غير نظره عنهم وعزا يوسف..
بعدين مشي للحاج علي..كب ع راسه وقال..
/البقاء لله ياحاج علي..
علي الواعر قال بنبرة الم..
/مادايم الا وجهه...
طبطب ع كتفه بعدين مشي عزا عبد المطلب اللي كان مفجوع ع خوه...
داخل..
الحوش كان زحمه نساوين الشارع كلهم فيه ماعدا نساوين عيلة شنيبه..
حال مطيره وفردوس بالويل الزوز ماكانوش صابرات...
بكاهم قطع القلوب...
وصفيه تبكي بحزن شديد ع سلفها اللي كانت تعرف انه حاس روحه بيموت قريب هدرزته مع شيبانها وراجلها اللي كانت تسمع منها في شي يسير اوحتلها بهالشي بس مابتش تشارك حد بإحساسها...
🍃بعيد عنهم...
في دار البنات..ورا بابها المسكر..
فايزة وآلاء واريج واميمه كانوا متحاوطات بطوبى..
طوبى اللي قعدت حالها من لما طلعت وهي مفجوعه وشافت اللي صار..
ملامح الصدمه نفسها ماتبدلتش..
مافيش دمعه في عينها..مانطقتش بحرف واحد..
فايزة وهي تبكي:مصدومه..
اميمه ببكي:طوبى حبيبتي بالله عليك قولي حاجه ماتقعديش هكي..
واريج مقعمزه تشوفلها وهي تبكي..
آلاء ببكي:ياربي رحمتك ياربي..
حطت فايزة يدها ع وجهها وقعدت تبكي بالعبره..
اميمه قعمزت ع ركابها قدام طوبى حضنت ايديها الزوز بإيديها وهي تقول برجاء..
/طوبى حبيبتي ماديريش في روحك هكي اللي في داخلك طلعيه..عيطي ياطوبى بش ترتاحي..ماتقعديش هكي بالله عليك..وقعدت تبكي..
وطوبى ع حالها ماتحرك فيها شي...
ملامح الجمود في وجهها..وعيونها كلهم حزن...
بس مافيش اي تعبير عن هالحزن...
🍃🍃🍃🍃
ويقولوا..
🍃مصائب قوم عند قوم فوائد..
وعيلة الانتهازيه شافوا في اللي صار فرصه جتهم لعندهم...
🕸خديجه:ايه بتمشي لازم تمشي والناس يشوفوك..
نجاه بعدم استيعاب:وهي لما تشوفني متوقعه ردة فعلها!
خديجه:انتي جايه معانا تعزي وديري في الواجب لو كنتي دايرتيلها حاجه شن بيرفعك غادي من اصله!؟
رفعت نجاة حاجبها وهي تهز راسها لما فهمت قصد خديجه بعدين تنهدت وقالت؛باهي خل نمشي نلبس حاجه مناسبه ونجيك..
خديجه؛اني نازله تلقينا في الجنان..
نجاة؛تمام..
ولفت خديجه ومشت طلعت من الشقه ونزلت للجنان اللي كانت مقعمزة فيه امها..
وقفت حداها وقالت؛شويه ونازله..
مغليه وهي تساوي في وشاحها؛برغم انهم مايستاهلوش بس هادي موت ماحد سالم منها..اللهم لاشماته..زي مانكدوا علينا وشتتونا ربي نكد عليهم وقسم ظهورهم هدا دعي المظلوم..
خديجه تسمع بصمت ومابتش تعلق..
ع جية نجاة وهي تقول:واتيه..
ناضت مغليه ومشت بتطلع هي الاولى ووراها نجاة وخديجه...
🍃وفي حوش لطفي..
مطيره وهي تنوح..
/ناري عليك ياوخي..خليت الدنيا وانت مهموم..ناري عليك ياغالي كملت عمرك وانت شاقي وراضي وديما تقول الحمد لله ع كل حال...
فردوس بألم وبكي:ياويلي اني كيف مازال بنعيش من بعده..كيف بتفوت عليا الايام وهو مش معانا...ياربي الصبر..ياربي الصبر....
نجمه وهي تبكي:الله يرحمه ويغفرله كان خيرة ناس هالشارع عمره ماوجع حد ولاطق في حد سيب الدنيا بسيرة طيبه الناس كلها تحكي بيها..
وحده من الجارات؛اللي زي الحاج لطفي مايموتوش يقعدوا ليوم الدين حيين بأفعالهم الباهيه...
سليمه عمة عبد القيوم:يسلم فمك ياخيتي..ادعنله توا بس ادعنله مايبي منكن شي كان الدعاء ماتعذبناش بعياطكن..
قعدوا هما الزوز يبكوا بالعبره..
واللي حواليهم متأثرين للغايه...
🍃ع خشة مغليه ونجاه وخديجه...
مشت طول لمطيره وطبست عليها وضمتها وقعدت تبكي...
فردوس قامت عيونها فيهم،وهي تبكي نظراتها لمغليه كانت كلها كره...
اما مطيره لولا ان العزي عزي خوها راهي ماخلت مادارت فيها..
بعدت مغليه وهي تقول ببكي مصطنع..
/الله يرحمه ويسامحه ويصبركم..
بعدين مشت لفردوس وطبست عليها وضمتها وقعدت تبكي..
الشي نفسه داراته خديجه مع مطيره...وبعدين داراته مع فردوس...
وهما في عز ألمهم كانوا يحاولوا ضبط اعصابهم ع قد مايقدروا احتراما لعزي اغلى من فقدوا...
جتهم نجاه ومدت يدها وهي تقول..
/عظم الله اجركم..
صافحتها مطيره عادي لأنها ماتعرفش حقيقتها..
وقبل لتجي لفردوس..
فردوس ناضت ومشت طلعت من الصاله..
هي تلافت اللي صار ومشت قعمزت حدا خديجه ومغليه..
صفيه قعدت تشبحلهم بنظرات حقد..
وهما دايرين رواحهم متأثرين ويبكوا وفي نفس الوقت كانوا يدوروا بعيونهم ع طوبى..
ع خشه غرفه ونبيله تساعد فيها..
غرفه ببكي والم؛بوي وينه...بوي...وينك يابوي..رؤوف طلع يابوي..رؤوف طلع..
جتها فردوس وهي تبكي وتقول..
/راح وبينا ياغريفه راح غالينا ياوخيتي راح ومالحقش يفرح ياغريفه..
وضمتها وقعدوا يبكوا هما الزوز بالعبرة..
مطيره ببكي ووجع..
/يامينتي عليكم يابنياتي يامنيتي عليكم ياكسرتي وكسرتكم...
🍃وفي دار البنات..
كانوا يسمعوا في كل شي ويشوفوا لطوبى..
يراجو فيها تتأثر وطلع اللي في داخلها ان شاء الله بدمعه وحده تنزل من عيونها..
لكن طوبى قاعده ع حالها زي الثمثال ونظرها مركز في الفراغ وبس...
🍃في الطريق..
كان عبد القيوم يسوق وجنبه حسين هما الزوز لحقوا سيارات الاسعاف اللي رفعت لطفي..وبعد ماتم حسين الاجراءات كلها روحوا مع بعض...
الحزن مسيطر عليهم..والصمت سائد...
كل واحد فيهم كان مش مستوعب اللي صار بالذات عبد القيوم اللي تفكر لقائتهم الاخيره..وتفكر كلام لطفي اللي حاس بروحه يودع في الدنيا..
الغمه اللي كانت قاعده ع صدره توا بس عرف سببها..وعرف سبب عدم راحة قلبه طول الايام اللي فاتت..
عبد القيوم حزين حزن شديد..بس للأسف دموعه مايبوش يرحموه..مايبوش ينزلوا حتى شويه يخففوا عنه..
زي ماقاعدات ينزلوا دموع حسين اللي مقعمز جنبه..
🍃وصلت السيارة الحوش..
نزلوا منها وخشوا داخل...
تلقوهم المحجوب ويوسف بعدين جاهم عبد المطلب وقعدوا يسمعوا منهم...
وعلي الواعر قاعد مقعمز ع نفس الكرسي ويشوفلهم بعيونه اللي تبان نظرتهم قاسيه بس كانت واخده حزن الدنيا كله وحابساته فيهم...
🍃خبر موت لطفي..
وصل للأصدقاء والمعارف اللي جوا طول بدون تأخير...
ومن بينهم إياد اللي اول ماسمع مشولهم هو ومهند..
وين خش عليهم للحوش..
عيونه جو ع علي الواعر مشاله طول وهو يقول..
/عظم الله اجرك الله يغفرله ويرحمه ويجعل مثواه الجنه..
وضمه..طبطب عليه علي وهويقول..
/امين امين..مادايم الا وجه ربك ياولدي...
ومهند ولده كان يعزي في باقي العيله وهو متألم ع الاخر وماقدرش يدس دموعه اللي نزلوا غصب عنه ع راجل مر فحياته وسيب اثر لطيف لاينسى...
🍃عبد الله عم عبد القيوم مشاله وقف جنبه وقال..
/الشايب حاله يخوف..
عبد القيوم وهو يشوف لعلي قال بحزن:مفجوع في ولده ياعمي..الحاج لطفي الله يرحمه ماكانش ولده بس كان خوه وباته وصاحبه عاشرتهم وشفت علاقتهم اللي ماحقيتش كيفها من قبل..
عبد الله هز راسه وقال باسف:الله ينزل عليه الصبر ويربط ع قلبه..
تنهد بحزن وقال؛آمين...
🍃وعقله وقلبه غصب عنه مشغولين عليها..
يبي يعرف شن صاير فيها توا..هو اكثر واحد عارف ان ألمها حيكون بزياده ع باقي خواتها...
🍃وهي قاعده ع حالها في الدار..
بس هالمرة قاعدات معاها خواتها وبس..
غرفه وهي تشوفلها بألم:كان قعدت ع هالحال لغدوة لازم يديرولها حل..
فردوس وعيونها متورمات من البكي قالت بصوت مبحوح..
/نادي ع بنت السعداوي تقعمز حداها تكلمها؟
غرفه؛لالا خليها توا..رشفت وقالت..راجي شويه..ورفعت تليفونها وحطت سورة البقره عندها في التليفون وشغلتها..
وطوبى تسمع فيها...
بعد اول ايات فيها...تمددت ع السرير ورقدت ع جنبها الايمن وهي تسمع..
فردوس بألم قالت؛ااه ياربي رحمتك..
وناضت ومشت طلعت من الدار وسكرت الباب..
وغرفه حتى هي تمددت ع السرير متاع سدره وقعدت تسمع في القرآن مع طوبى وتبكي بصمت...
لكن طوبى حتى في عيونها مابتش تبان الدموع...
🍃🍃🍃🍃🍃🍃
"اليوم الصبح جوني وين ماكنت محبوس وقالولي افراج"
عبد القيوم بإستغراب:الصبح؟..
عبد الرؤوف تنهد وقال؛كانت في اجراءات طويله عريضه داروهالي وبعدين خلوني مقعمز في مكتب مدير الحبس لبعد صلاة العشاء وبعدها جوني وقالولي اطلع..
عبد القيوم قعد ساكت وهو يفكر..
مسح عبد الرؤوف ع لحيته الكثيفه وقال..
/ياريتني ماطلعت..
شبحله وقال:بالعكس باهي اللي طلعت توا...
شبحلها شويه بعدين قال؛شن صاير؟
عبد القيوم وهو يمرر في نظره ع رجالة عيلة شنيبه قال..
/بعدين مش وقته...
غير عبد الرؤوف نظره لوين مايشبح عبد القيوم بعدين قال..
/المهدي وين؟
عبد القيوم؛عدا لزليتن بعد العصر قبل ناوي يصيم رمضان غادي..
هز عبد الرؤوف راسه بصمت وهو عقله يفكر في حد تاني من حوش شنيبه بس ماكانش يبي يسأل عنه...
🍃🍃🍃🍃🍃
ويعدوا اصعب ساعات يمروا ع شارع القهوة من وقت طويل..
موت لطفى الواعر كان فاجعة قويه جدا للشارع كله..
لطفي يعتبر من وجهاء الشارع ومن احد اعمدته ان صح التعبير قيمته كبيره عند الناس وفقدانه حيكون مؤثر بقوة وصعب عليهم...
اول ليله...وكانت ليله رمضان..
والناس لابد تتسحر...ولأن اهل الميت قاعدة مصيبتهم جديده وحزنهم كبير مخليهم مش قادرين يفكروا في شي..
تعاونوا الجيران وكل حد جاب حاجه ودارو سحور المعزين اللي ماحضروشي نساوين عيلة شنيبه...
🍃🍃🍃🍃🍃
مع ساعات الصباح الأولى..
المهدي ركب سيارته مع ولده محمد وتوجهوا طول لطرابلس..
وصله الخبر بعد صلاة الفجر من بوه وكانت صدمته فيه كبيره..وزادت احزان محمد اللي كان فاقد امه في اول رمضان من غيرها...
🍃ومن تاجوراء..
طلعت سيارة سلف فردوس اللي فيها بوه كان يبكي بصمت وألم ع صاحبه..
ومعاه مرته اللي كانت متأثره..ومعتز حداها يبكي ع جده...
🍃بعد ماقطعوا مسافة لابأس بيها..
وصلوا لشارع القهوة..
وشاف حسن صديق لطفي وشيباني فردوس خيمة العزي منصوبه قال بنبرة باكيه..
/لاإله إلا الله..إنا لله وإنا إليه راجعون..
ومعتز يبكي بألم.
درست السيارة..
ونزلوا منها..ومشوا بسرعه للخيمه اما معتز مع حناه خشوا للحوش..
🍃حسن وين خش شاف الحاج علي مقعمز وشاد عكازه وع وجهه تعاسه كبيره مشاله وهو يقول بنبرة ألم..
/حاج علي..
شبحله علي بحزن...
وصل فيه وطبس عانقه..
وعلي حط يده ع ظهره وهو يقول..
/مادايم الا وجهه..
حسن بألم؛الله يغفرله ويرحمه وان شاء الله يكون مسامحنا..
علي:لطفي قلبه ابيض مايشد فيه ع حد الله يرحمه..الله يرحمه...
🍃داخل..
عزوزة فردوس وين جت خاشه جت قدامها صفيه..
حضنوا بعض وهما يبكوا وعزتها...فردوس اللي كانت مقعمزة في الصاله سمعت صوتها ناضت وطلعتلها..
فردوس بنبرة مخنوقه:عمتي..
جتها وهي تقول؛فردوس بنيتي..
وضمتها وقعدوا يبكوا الزوز بالعبره...
ع جية الاء واريج قعدوا واقفين يشبحولهم وهما يبكوا بألم..
حناهم باست امهم ع راسها وهي تقول..
/في الجنه ان شاء الله في الجنه ياربي..
بعدين شافت لحفيداتها وهما جوها ضمتهم الزوز وقعدت تبكي هي وياهم..
وفردوس حداهم عبراتها تشق القلب..
كل من موجود في الحوش يسمع ويدعيلهم بالصبر ويدعي للطفي بالرحمه..
الا طوبى اللي قاعده ع حالها..
مارقدش دقيقه وحده..مابتش تحط في فمها شي..
اميمه بألم؛ياطوبى حرام عليك بنتك كولي ع خاطرها هي..
غرفه وهي تمسح ع شعر طوبى:طوبى ياعمري بالله عليك طلعي اللي تحسي بيه طلعي..تكلمي قولي شن قاعده تحسي..
اميمه حركت راسها بالنفي وقالت:لالا الوضع يخوف ماينسكتش عليه..
حطت السفره ع الطاوله وناضت طلعت من الدار..
وخلت غرفه مع طوبى تشوفلها بنظراتها اللي كلها ألم وحزن وتمسح ع شعرها...
🍃شويه وخشوا عليهم اميمه وبنت السعدواي..
مراة ملتزمه ومعلمة قرآن وطالبة علم شرعي..
قالت؛السلام عليكم..
ردت عليها غرفه السلام..
سكرت اميمه الباب..
والمراة قعمزت جنب طوبى وقالت..
/ياطوبى كل من عليها فان ويبقى وجه ربك ذو الجلال والاكرام..الموت علينا حق كلنا يابنتي كلنا اخرتنا ليها في هالدنيا الفانيه..وعمي لطفي رحمة الله عليه جي امس اجله وتوفاه الله تعالى..عمي لطفي مات زي ماماتت امك قبل وزي ماتت عائشه جويده رحمة الله وزي ماماتت خالتي مشتده وزي ماتوا هلبه ناس تعرفيهم كل حد جاه اجله اللي لايقدر يقدمه ولايقدر يأخره واني وانتي وغرفه واميمه وكل حي ليه ساعه امتى تجيه خلاص...الموت مكروه صح بس راحة للمؤمن وعمي لطفي ولاازكيه ع الله لكني احسبه عاش ع خير طول عمره يعني انتي مفروض تكوني مطمنه عليه اللي داره في دنيته حيحصده في قبره واخرته واهم حصاده ياطوبى انتم الولد الصالح تقعدوا تدعوله تستغفروله ديروله صدقات جاريه بش يقعد وكأنه حي حسناته تمشي ليوم القيامه..اللي يموت ع صلاح ياطوبى يابنتي لازم يفرحوله..وفي نفس الوقت لاباس لو بكيتي شويه وطلعتي اللي في داخله البكي رحمة يابنتي..والرسول قال بعد موت ولده ابراهيم..
ان العين لتدمع وان القلب ليحزن وانا على فراقك ياإبراهيم لمحزونون...
🍃🍃🍃🍃🍃
الساعه 11:00صباحا..
في طريق ترفع لطرابلس انقطعت قبلها مسافه طويله من بنغازي...
ماشيه احدى سيارات الاجرة الكبيره راكبين فيها جبريل وزوجته سالمين مع زوز ركاب تانيين...
سالمين:ماردش عليك حتى هو؟
نزل تليفونه وقال بإستغراب؛لاعبد القيوم ولاعمه عبد الله..
سالمين؛اكيد مرقدين توا اليوم صيام..
جبريل بقلق:لالا..مااعتقدش..
سالمين بإستغراب؛كيف قصدك مايبوناش نجوهم؟
هو قال؛سالمين فاهمه قصدي..
ضحكت وقالت؛شن تبيني نقولك كلامك غريب ليش مايردوا يعني!؟
تنهد وقال:إن شاء الله خير..
سالمين ؛الله يربحك ماتخوفنيش..
جبريل بضيق:الحلم قاعد في بالي ياسالمين..
سالمين؛قتلك ختاريف ماتعدلش عليهن..انت من لما سمعت اللي صاير لسدره وانت خايف وعقلك يشيل ويجيب..
شبحلها وقال:وانتي ماخفتيش..
بدت ع وجهها ملامح القلق لفت وجهها للروشن وقعدت ساكته..
وهو زابطها عارفه تفسير الحلم وماتبيش تقوله عليه ماباش يكثر معاها كلام لف بوجهه للروشن حتى هو وقعد يفكر بقلق...
🍃بعد ساعه مباشره..
كانوا واصلين للمنطقه اللي فيها شارع القهوة..
جبريل؛خش من الفتحه هذي ..
كمل بيهم السواق وخش للشارع..
ويشوف جبريل من بعيد الخيمه...
جبريل بنبرة مرتعشه؛سالمين..مش قتلك ياسالمين...
حطت سالمين يدها ع قلبها وقالت..
/يالطيف ياربي..
جبريل:وقف هنا وقف..
وقف الراجل السياره..
طلع جبريل الفلوس مدهوله خداهم منه..
نزل هو وبعدين نزلت مرته ونزلوا شناطيهم..
وعيون جبريل ع الناس اللي تجي للخيمه ماباش يسأل حد من خوفه..
سالمين بقلق:جبريل..
بلع ريقه بعدين قال؛عدي خشي للحوش عدي..
هزت راسها ومشت خشت داخل..
وهو مشي للخيمه خشلها...
مرر نظره ع الموجودين...شاف كل اللي يعرفهم ماعداه..
عبد الله عم عبد القيوم لما شافه ناضله طول..
وصل فيه وقال:جبريل..
جبريل:من ياعبد الله؟
عبد الله بألم؛الحاج لطفي..
غمض جبريل عيونه بألم..
وعبد الله يمسح ع ذراعه وهو يقول..
/إنا لله وإنا إليه راجعون..
فتح جبريل عيونه اللي فيسع دمعوا وطاحوا دموعهم..
قعد يمسح فيهم وهو يقول..
/لاإله إلا الله..لاإله إلا الله...امتى صار؟
عبد الله بحزن؛امس في الليل..
جبريل بحسره:والله قبل بنجوا امس لاحول ولاقوة الا بالله..لاحول ولاقوة الابالله..
عبد الله؛الجنازه بعد صلاة الظهر..
تنهد جبريل بحرقه بعدين قال:
/عمي علي وين؟
رد عليه وقاله..
"في مغسلة الموتى"
🍃داخل..
خشت سالمين بالشنطه متاعها..
قابلتها مطيره اللي كانت جايه من دار البنات..
وين شافتها ملامح وجهها الباكيه قالت؛يانعلي ياخيتي..
طلقت شنطتها ومشتلها طول وضمتها..
مطيره ببكي؛راح لطفي ياسالمين راح وخيي..
سالمين وهي تبكي..
/يانعلي ياكبدي..يانعلي عليك خبارة سودا يانعلي..
ومعاش مسموع صوت غير صوت بكاهم ونحيبهم..بكي سالمين كان من قلبها وبحرقه...
وين شافت فردوس ضمتها بقوة ووجع وهي تقول..
/يانعلي عليكن...ربي يصبركن ربي يصبركن...
مافي حد مابكاش معاهم...
الا هي..هي اللي فشلت كل المحاولات تخليها تحرك ساكن اوتنزل دمعه وحده...
🍃🍃🍃🍃🍃🍃
في الصاله ...
سالمين بملامح وجه باكيه وصوت مخنوق..
/وين طوبى؟
مطيره بألم؛مصموته يارويحتي لاعيطت لابكت لاتكلمت..
سالمين بقلق:قصدك مصدومه!؟
فردوس بوجع؛الوحيده اللي قعدت معاه في الحوش اخر من شاف واخر من شرب من ايديها القهوة..
سالمين بألم؛ياروحي يابنيتي...!
أميمه بقلق:وضعها ماينسكتش عليه من امس للهالحظه وهي ع نفس الحاله ولاكلت ولاشربت..
غمضت سالمين عيونها بوجع..
نبيله بحزن؛صدمتها قويه..
فردوس ودموعها ينزلوا؛قعمزت حداها الشيخه نجوى ع قد ماقالتلها شي شي كأنها ماتسمعش فيها تشوف في تركينه وحده بس ملامح وجهها زي ماهما..
فايزة بنبرة باكيه؛مابعدها ياروحي مابعدها..
سالمين شبحت لفايزة وهي تفكر في كلامها اللي حسسها ان في شي تاني صاير مع طوبى..
وخلال هالحديث اللي يدور..
كانوا بنات فايزه مقعمزات يسمعوا ودموعهم مابطلوش نزول من امس..
بس صفاء وهي تسمع فيهم..جي بين عيونها يوم وفاة بوها..
تفكرت لما روحت بيهم سدره وهما راكبين الدروج والرجاله نازلين ببوهم وهو ميت..
منظره قاعده ذاكرته حافظاته بكل تفاصيلها..
مسحت دمعه نزلت ع فمها بعدين قالت..
/بيجبوا ثابوت جدي لطفي هني؟
كلهم توجهوا بأنظارهم ليها..
صفاء بحزن؛قولولهم يجيبوه كان مش جايبينه وخلوها تشوفه وهو في الثابوت..
تبادلوا النظرات التفكير بين بعض
وصفاء تقول:لما تشوفه في الثابوت تستوعب وتصدق وتطلع من الحاله اللي هي فيها..هكي نحس..
~~~~~~~~~
اميمه وهي تمشي وتجي في دار المعيشه وتتكلم بالتليفون..
/ضروري ياحسين ع خاطر طوبى المراة حالها مايطمنش..
"باهي استني شويه"
وقعدت اميمه تمشي وتجي وتراجي فيه..
شويه قاللها..
"اسمعي قوليلهم عياط فوق راسه مانبيش يودعوه كويس ويدعوله وخلاص"
اميمه هزت راسها ودموعها في عيونها وهي تقول..
/حاضر حاضر...
وسكر حسين وهي مشت طلعت طول بش تخبرهم..
🍃🍃🍃🍃🍃🍃🍃🍃🍃🍃🍃🍃🍃🍃🍃
في جنان حوش لطفي الواعر..
قريب من المربوعه الخارجيه كانوا واقفين..
يوسف وحسين والمحجوب وعبد الرؤوف والمهدي وخوته
معاهم عبد المطلب وجبريل ومحمد شنيبه..
وعبد القيوم بعيد عنهم شويه يمشي ويجي بتوتر...
🍃داخل..
من دار البنات..
طلعت مطيره وراها فردوس ولحقتها غرفه يمشوا ورا مع عمتهم..
ووراهم طلعوا اميمه واريج وهي شادين طوبى كانت تقدر تمشي عادي بس هما خافوا عليها دوخ ولاتفقد الوعي لأنها مش واكله ولاشاربه شي..
ووراهم آلاء اللي كانت خايفه هلبه من اللي بتشوفه...
🍃وصلوا في الباب اللي يدخل للمربوعه الخارجيه من الحوش..
وقفوا كلهم..
كانوا خايفات هلبه..الموقف الاول قاعدين ماتخطوشي..كيف حيتحملوا الموقف هدا...
خدت مطيره نفس وفتحت الباب وخشت..
لما شافت التابوت قلبها غاص في احشائها...
قعدت تقرب منها بخطوات خائفه..
زي خطوات فردوس وغرفه...
كل مايقربوا يبان عليهم الكفن الأبيض لعند ماوصلوا فيه وشافوا وجهه..
اللي كانت ملامح تشبه ملامح الحزن باينه عليه...
وين شافاته غرفه انهارت بالبكي وقالت..
"بابا"
قعمزت بصعوبه...ومدت يدها لمست بيها وجهه وهي تبكي وتقول..
/ياعمري ياروحي...سامحني شقيتك وتعبتك ماكنتش زي ماتبي بس والله يابابا نحبك نحبك هلبه اكثر حد في الدنيا حبيته في حياتي انت..ياربي في الجنه يارب..
فردوس طبست عليه وباست جبينه بعدين بعدت وقالت..
/يارب الراحه اللي مالقيتها هني تلقاها غادي يارب..شقيناك تعبناك حملناك همومنا لأخر لحظه في حياتك ربي يكتب اجرك كله ربي يجازيك علينا خير الجزاء ياربي...
ورجعت باست جبينه مرة تانيه وخلت لعمتها الدور في الوداع الاخير...
مطيره قربت منه وباست جبينه وقالت..
/وخي ياغالي..كسرت ظهري وخيي والله كسرت ظهري حاسه في حاجه مني مشت معاك ياوخيي حاسه الدنيا فضت عليا والله هكي حاسه ياوخيي..مش عارفه كيف بنعيشوا بعدك والله ماني عارفه..ربي يصبرنا ربي يصبرنا..وانت الله يرحمك ويسامحك ويجعلك من اهل الجنه يارب...
مشت اريج من جنب طوبى وهي تبكي وجاته..
طبست عليه وباست راسه وقالت..
/اني اليوم بس حسيت ان بوي مات..حسيت اني وليت يتيمه حق..اني توا يتيمه ياجدي من بعدك..
فردوس قعدت تبكي بالعبرة..
اريج رشفت وقالت..
/ياربي ياحبيبي جدي بعدين شويه بيكون بين ايديك ياربي ياربي ارحمه ياربي وبرد عليه وخليه مرتاح ياارحم الراحمين ياربي..
كلهم انهاروا بالبكي..
🍃وطوبى واقفه تشوفله وتسمع فيهم...
والدموع بدوا يتجمعوا في عيونها..
آلاء بعبرتها؛سامحني..مانقدرش نجي حداك..كان جيت حداك مش مخليه حد ياخدك من جنبي..ياروحي ياللي عمرك ماخليت شي في خاطري ديما مدلعني ومفرحني وحتى لمازعلتك فيسع رضيت عليا..قولي توا شن ندير من غيرك..لمز بنقول جديدي ياجديدي.....
وارتفعت اصوات بكاهم وعبراتهم والرجاله برا يسمعوا فيهم وقلوبهم موجوعه...
🍃طوبى وهي تسمع فيهم كيف يبكوا بالعبره..
وهي تشوف لملامح وجهه الحزينه تفكرت موقف جمعها بيه في مكان ما من فتره قريبه..
《كان ضامها في حضنه وهو يقول؛تي غير علاش هدا كله علاش بس..
طوبى وهي شاده فيه قالت ببكي:انت اللي علاش درت هكي علاش خليتني ندير هكي؟!
بعدها وهو شادها قعد يشوف لعيونها بحنان وهو يقول..
/نبيك تكوني قويه نبيك تعتمدي ع روحك وماتخافي من حد..بنتي بنقولك حاجه ردي بالك تنسيها ردي بالك..اللي يبيع حقه مقابل حريته هدا مايستاهلش يكون حر لأنه تنازل ع كرامته..ردي بالك تتنازلي ع حقك ردي بالك..ماتخلي شي يجبرك تتنازلي عنها..خودي حقك وحق كرامتك اللي هدروها يابنتي..
طوبى وهي تشوفله بخوف:تزيد تخوف فيا هكي ؟
مسح بإيديه دموعها وشد وجهها وقال:ماتخافي من شي وربي معاك..واني جنبك بنيتي..
طوبى خشت في حضنه وقالت..واني نبيك ديما معاي بابا مانبي شي تاني من الدنيا غير وجودك..》
🍃طاحوا دموعها...
وشافتهم اميمه مدت يدها لذراع فردوس وشدتها..
فردوس شبحتلها بعدين شافت وين تشبح لقت دموع طوبى ولأول مرة بعد مافقدوا بوهم يجروا ع خدودها...
هزت راسها وقلبها معصور من الألم...
"هيا خلاص معاش في وقت"
مطيره تماسكت وقالت؛خلاص تعالوا ياحسين...
جو فردوس واميمه لغرفه ساعدوها بش ناضت وقعدوا شادينها وهي تبكي بالعبره..
واريج مشت وقفت جنب اختها خدتها في حضنها وقعدت تبكي...
ومطيره تشوف لطوبى اللي قاعده تشوف لوجه بوها ودموعها تنهمر انهمار..
جي بين عيونها لما ناضلها خدي منها سفرة القهوة وقال..
" ومن ايدين احلى بنيه.."
وهادي كانت اخر جمله يقولها في حياته
انفتح باب المربوعه ع مصرعيه خش حسين شاف لطوبى طول زاد وجع قلبه غير عيونه عنها للثابوت..
وخشوا وراه يوسف وعبد الرؤوف والمحجوب...
عبد الرؤوف شاف حالة مرته ضايق صدره بزياده وخاف عليها تصيرلها حاجه...
تنهد بألم ومشي ساعد يوسف وحسين اللي قاموا غطا التابوت وغطوه بيه..
والمحجوب عيونه ع طوبى بس..
وهي ماحولتش نظرها عن وجه لطفي لعند مادرق عليها...
عبد الرؤوف:محجوب..
غير محجوب عيونه عنها ومشي وقف للخلف مقابل عبد الرؤوف..
والقدام يوسف وحسين..رفعوا مع بعض الثابوت وحطوه ع كتافهم ومشوا بيطلعوا بيه..
والنساوين يبكوا بألم ومطيره تقول..
/في امان الله ياغالي...
طوبى شبحتلها...بعدين مررت نظرها عليهم كلهم..
كانت دور فيها..الوحيده اللي ماودعتاش...
رجعت نظرها للتابوت وهو مشي وقالت بصوت يدوب طالع..
"سدرة"
كلهم سكتوا عن البكي وشبحولها..
وهي بين عيونه تمر مشاهد لبوها مع سدره من صغرها لعند اخر لحظه ودعها فيها وهي مسافره للعلاج..ودعها وهي مش حاسه بيه ولاعارفه..وطلع من الدنيا من غير ماتودعه!..
طوبى تحركت من مكانها ومشت بتلحقهم وهي تقول..
/استنوا سدره..سدره ماودعتاش سدره..سدره..
طلعوا بالتابوت وهما يسمعوا فيها..
يوسف ماقدرتش يتمالك نفسه قعد يبكي..
🍃واميمه واريج جو لطوبى شدوها وهما يهدوا فيها..
وهي نقول بعياط..
/سدره ماشافتاش..ماودعتاش..جيبوا بوي ردوه خلوه هني لين تودعه سدره..
والرجاله برا يسمعوا فيها وهما متألمين..
بس القلوب اللي كان مقطعها الألم..
قلوب..المهدي..والتارقي..
فكت طوبى روحها من اريج واميمه ومشت بتطلع وهي تعيط وتقول..
"ردوا بوي"
ولأن صوتها قرب عرفوها بتطلع..
وبسرعه مشي يجري عبد القيوم للباب..
لما وصلت فيه هو وصل فيه وجبده وسكره عليها من غير مايشوفلها..
قعدت نخبط عليه وهي تعيط وتقول..
/جيبوا بوي...سدرة ماشافتاش..
جوها عمتها واختها فردوس شدوها وهما يبكوا..
وهي تقول ببكي وعياط..
/سدرة ..سدرة..
وبأعلى صرخت صرخه تكاد تشق السمي وهي تنادي..
"سدرة"
🍃وسدره في مكانها البعيد قاعده راقده بهدوء..
صوت صرختك ماوصلهاش ياطوبى بش يفيقها..يوقظها ويخبرها..ان بياض جبينها وتاج راسها سيب الدنيا وقلبه مفطور عليها من الحزن....🍃
🍃🍃🍃🍃🍃🍃🍃🍃🍃🍃🍃🍃🍃🍃
بعد صلاة الظهر..
في اقرب مقبرة للمنطقه...
كان في جمع كبير من الناس..
احباب لطفي الواعر من كل مكان جو يشهدوا جنازته...
وهو محمول ع الاكتاف توجهوا لأخر مكان ليه في الدنيا...
🍃ومن بعيد شويه..
بحذائه الأسود كان يمشي خطوة ورا التانيه بإتجاه القبر...
وصل في الناس قعد يفوت من وسطهم..
وهما يشبحوله...
وقعدوا يوسعوله في الطريق..اغلبهم غارفين من يكون..
وصل القدام..
وجده كان قدامه عاطيه بالظهر...
هو ركز بنظره ع حلة بوه البيضا اللي مغطياته كله...
بعدين قدمله...
شافوه..
ولاد عمه وعمه..وخواله..والجيران..المهدي والتارقي...
فات من جنب جده..
شافه جده...طول انفعل وهو يقول..
/تعالي هني انت وين ماشي..طلعوه من هني طلعوه بوه محلفني مانخليشي يحضر جنازته ولايوقف ع قبره..
من قوه انفعال علي..
خافوا عليه احفاده وجو طول لمختار شدوه بيطلعوه..
هو قال؛خلوني...خلوني..بنسأله بنسأله بس مانبي منه بنسأله..
حسين بعصبيه؛حتى بعد موته ماتبيش تهنيه..حرام عليك ياراجل .
يوسف:اتقي الله في بوك وهو ميت يامختار وماتفسدش حلفانه..
مختار بإنفعال؛حولوا حولوا...ودفهم عنه وجي لعبد الرؤوف شده من ذراعه وهو يقول يقول بذعر وألم.
/اهوا طلعته..طلعته...مش قتلي طلعه طلعته..اهو قدامك قدامك..درت اللي تبيه وطلعته..
وعبد الرؤوف رمي بنظراته للأرض وهما موجوع ومضايق..
طلقه مختار وهو يقول..
/قولي توا قولي توا..انت سيبتها غاضب ولالا..قولي.تكلم..
وجي بيمشيله..يتلقى خبطه ع صدره بعكاز جده وهو يقوله بصوت عالي مرتعش..
/ماتقربش ولدي..خلي ولدي...طلعوه من هني طلعوه..
ويمشوا طول المهدي ومحي الدين يشدوا مختار ويجبدوه بقوه..
ومختار يعيط وهو يقول..
/باهي انت قولي شن قالك عليا تاني..قالك غاضب ولاراضي..قولي...قولوا ياناس ياللي تعرفوا..
لطفي الواعر سيب الدنيا وهو راضي عن ولده ولاغاضب عليه..
قولوا..حد فيكم يقول حاجه..ريحوني...قولولي..
سيبها راضي عني ولاغاضب عليا..
🍃وكل ماله يبعد ويبعد..
البعد اللي سعاله وهو صغير...كلفه ثمن غالي يقعد عمره كله يدفع فيه...
باع رضاهم بأبخس الاثمان..وشري غضبهم بأغلى ثمن...
نزلوا بوه لقبره..زي مانزلوا امه قبل..والزوز حسرتهم عليه كانت اقوى سبب لرحيلهم...
هو في هاللحظه اللي كان يصرخ فيها ..
كان شبه مسهتر...ضمه المهدي وقعد يحاول يهديه..
المهدي؛مختار..خلاص يامختار...سادك لهني ساد...
مختار انهار بالبكي وقال..
/انت ماتعرف شي مافي حد فيكم يعرف شي..ماتعرفوا شي...
وهني تفكر اخر حوار دار بينه وبين بوه...
《شويه قال لطفي..
/نقولك حاجه اول مرة نقولها في حياتي لحد..ع قد مادرت وع قد ماقاعد دير توا قعدت نصارع في نفسي..تعرف ع شني..ع حاجه وحده..مانبيش نطلع من الدنيا..واني غاضب عليك...
"ماتخلنيش نطلع منها واني غاضب عليك"
غمض عيونه وطلعت منه صرخه ألم قويه..
مافي حد في المقبره مافزعش منها...
نظرات الناس ليه..
بين متأسف ع حاله..
وبين اللي يدعي مايكونش في مكانه..
واللي حاقد عليه وكارهه...
ومنهم جبريل....
🍃🍃🍃🍃🍃🍃🍃🍃🍃🍃🍃🍃🍃🍃🍃
ومن جبريل لسالمين..
اللي كانت ضامه طوبى لحضنها وطوبى تبكي بعبرتها..
تمسح ع شعرها وهي تقرا عليها..
وعيون سليمة عمة عبد القيوم عليها..
كانت موجوعه على طوبى هلبه..
زي ماموجوعه عليها نبيله اللي كانت تبي ديرلها حل في قصتها مع الجالي بس اللي صار حال بينها وبين اللي تبيه..
اما نجاح فكان خاطرها حتي هي تاخد طوبى في حضنها وتهدرز عليها وتخفف عنها ولو شويه..
عمتها وخواتها وبنات اختها كان حالهم حال اللي تعب من البكي وقعد في وضع يحاول يستوعب فيه كل اللي مر بيه..
ووسط وجعهم..
كان في ناس لاتعرف الرحمه ولاعندها جنس الضمير جايه بش تبيض صفحتها قدام الناس وتستغل الموقف لصالحها...
ومني غير مغليه وبنتها اللي توا كيف خشوا..
بس المرة هادي نجاة ماجتش معاهم..
طوبى في عز بكاهم سمعوت اصواتهم اللي عرفتها لما قالوا..
"السلام عليكم"
وقفت بكي وتباعدت عن سالمين وهي تشوفلهم..
كيف يعزوا عادي ودايرات رواحهم متأثرات...
مستفزين..يحرقوا الدم...يتلفوا الاعصاب..
ناضت وقفت..
واللي حواليها شبحولها..
طوبى بغضب؛خودي بنتك واطلعي...
سكتت الاصوات والانظار توجهت ليها..
مغليه وخديجه الزوز تصنعوا الصدمه وهما يشبحولها..
طوبى بإنفعال..
/ماتشبحوليش هكي...اطلعوا توا اطلعول برا الحوش هدا معاش تخشوله..وجوهكم معاش نبوا نشوفوها معاش نبوا نعرفوكم اطلعوا برا..
مطيره؛طوبى بنتي قعمزي واسكتي..
طوبى بإنفعال؛لامانيش ساكته ومعاس بنسكت عليهم خلي ناس تعرف من هما هالمنافقين الكذابين الغشاشين اللي لاعنذهم ذمه ولاضمير اللي يقتلوا القتيل ويمشوا في جنازته..
خديجه هزت راسها وقالت..
/كان الله في عونك انتي من قبل وضعك بالهون يابال توا..
شبحولها وهما يفكروا في المقصد من كلامها..
طوبى ضحكت بسخريه وقالت..
/تي بري ياخديجه جعنك تلقيه في اعز ماعندك والزمان طويل..
ناضتلها مطيره وهي تقول..
/مغليه خودي فرختك واطلعوا احسن ما وقسما بالله نمرجها قدام مرج..
خديجه؛هيا يام يام اللي علينا درناه..
مغليه هزت راسها ومشت مع بنتها وهي تقول..
/لاحول ولاقوة الا بالله العلي العظيم..
طوبى بقهر ومن وسط قلبها..
/بروا الله لايسامحكم ..الله يردهولكم في اعز ماعندكم الله يقهركم كيف ماقهرتونا..الله يفضحكم قدام خلقه فضيحه لاتنستر ولاتنلم..
والحاضرات يسمعوا وهما مصدومات..
واولهم سالمين ...
شويه لاحظت ان صوت طوبى بدي يضعف..
واللي حواليها لاحظوا نفسها بدي ينقطع وماهي الا لحظات وفقدت الوعي....
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
الساعه 6:15مساءا..
في مطار معتيقه..
كان واصل من رحلته وماشي بطريقه لخارج المطار..
ركب تاكسي وصله للشارع...
درس قدام فتحة الشارع ونزله..
وهو مشي طول بإتجاه الخيمه..
وصل فيها..حول نظاراته وخش...
اول من شافه عبد القيوم...
تبعه بعيونه وهو ماشي يعزي في الحاج علي بعدين عبد المطلب..وبعدهم يوسف وحسين اللي قاعدين مايندروا على شي..
الجالي:الله يرحمه ويغفرله..باهي معليشي لو فيها كيف نبي نشوف طوبى..
حسين غير عيونه عنه وقعد يمرر فيهم ع المعزين..
ويوسف قاله بحزن..
/طوبى تعبت ورفعوها لمصحه القدس..
هو بفجعه قال:خيرها؟
يوسف؛صارلها هبوط لاكلت لاشربت ومفجوعه ع بوها..
الجالي هز راسه وقال؛ماشيلها..
ومشي طول طلع من الخيمه..
عبد القيوم غير عيونه عنه وشاف للمحجوب لقاه قاعد يشوفله لين طلع من الخيمه..وزيه عبد الرؤوف والمهدي...
🍃هو ركب تاكسي تاني..
وتوجه بيه طول للمصحه..
وصله غادي..نزل بسرعه وخش للمصحه سأل عنها..
عطوه معلومات عن المكان اللي قاعده فيه..
طول مشاله...
اول ما وصل للممر..جي بيخشله..
ويتفاجئ بزوز طوال عراض لابسين زي عسكري واقفين قدامه..
مرر نظره بينهم وقال..
/خير ياطيبين..
واحد منهم قال..ممنوع..
الجالي بإستغراب:شن هو الممنوع توا قاعد وقتي زياره وبعدين اللي هني زوجتي ومن حقي نمشي نشوفها في أي وقت..
التاني قاله..ممنوع..
شويه جي واحد بيفوت وسعوله ومشي..
الجالي ضيق عيونه وقال..
/شن اللي قاعد يصير بالزبط..
؛اللي قاعد يصير ان انت ممنوع تخطي خطوة وحده في الممر هدا..وتوا لف وارجع وماتكثرش الدوة وتكسر الراس الحال حال صيام ونو والخلوق في راس الخشم..
شبحله شويه بعدين هز راسه وقال..
/باهي..باهي..
ولف ومشي وهو في قمة الغضب..
ويده اليمين قاعد يفتح فيها ويسكر...
🍃🍃🍃🍃🍃🍃🍃
"تبي حاجه تانيه استاذ"
مختار وهو متكي ع الكرسي الجلد:جيب ريموت المنظومه واطلع..
رضا:حاضر..
ومش جابله الريموت وعطاهوله..
بعدين مشي طلع وسكر الباب وراه..
قعمز ع حيلة وخدي شيشة المسكر..
فتحها..وصب منها في الكاس..
بعدين خدي الريموت وشغل المنظومه ع معزوفة ضوء القمر لبيتهوفن..
قعد يسمع فيها وهو يشرب ويتفكر في اللي صار اليوم ودموعه ينزلوا منه وبعد ماشرب لين بدي يذهب عقله قال..
"خلاص معاش عندك شي تخسره يامختار معاش في شي خلاص"
وغير عيونه لرقعة الشطرنج اللي قعد يشوفلها بتعمن وتفكير....
#لاحياة_لمن تنادي
#طوبى
....يتبع....
