#طوبى "جنة طوبى"
#جمان_فريد
#الجزء_الثاني_والثمانين "مارغريت "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
سمع النبي صلى الله عليه وسلم رجلا يقول:
اللهم إني أسألك بأني أشهد أنك أنت الله الذي لا إله إلا أنت.
الأحد الصمد الذي لم يلد ولم يولد، ولم يكن له كفوا أحد.
فقال: " قد سأل الله باسم الله الأعظم الذي إذا سئل به أعطى، وإذا دعي به أجاب "
. أَخْرَجَهُ الْأَرْبَعَةُ، وَصَحَّحَهُ ابْنُ حِبَّانَ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃انا التي ترشد التائهين ولا تعلم كيف تخرج من المتاهه🍃
_________________________________________
يوم الاربعاء..
5سبتمبر..سنة 2018...
الساعه 10:30صباحا..
الجو كان معتدل...وخلا مطيره وفردوس يقعمزوا رقية الحشريه في الجنان يشربوا معاها شاهي اخضر ويعدوا بالكعك المالح وهما يسمعوا منها في اخبار الشارع..
🍃مطيره:اميمه روحت الصبح وحكتلي شن صار معاها..
رقيه:مسكينه بعد عطت بناتها قعدت في الحوش بروحها تعاني وعاد نجمه معروفه تحب تحوس وضم وتقلب ماتهنيش في روحها..
مطيره بتهكم؛وكنتها اللي مرزوعه فوقها شن دير!
رقيه:هديكا ياحنة متسبله بالحمل واصلا من قبله مادير معاها ف شي وين كانوا البنات قاعدات يحركوا فيها شويه توا خلاص..
مطيره بإزدراء:خزي..
فردوس:وامها تحرت ع بنات الناس..
ع جية طوبى..قالت..
/السلام عليكم..
قعدت تتفحص فيها برقيه بنظرها وهي ترد فالسلام..
جتها طوبى طبست عليها سلمت بالخد وسألت عن احوالها بعدين مشت قعمزت حدا اختها..
ومازالت رقية تتفحص فيها بنظرها بعدين قالت..
/شن حال بنيتك؟
طوبى:توا كيف رقدت..
رقيه؛حقه اللي سمعناه..
بترقب شبحولها..
ومطيره قالت:شني؟
رقيه:قالوا طوبى بتولي للجالي..
ضحكت طوبى نص ضحكه متهكمه..
مطيره بسخرية؛اوشاعات ياحنه اوشاعات.
رقيه؛ياوخيتي حتى اني ماخشتش راسي..
فردوس:منين سمعتي؟
رقيه:الجيران يهدرزوا..ويخي في منهم قال حاجه تانيه..
مطيره تهكما؛اطربينا..
رقيه وهي تشوف لطوبى..
/قالوا اللي صار بين طوبى والجالي وراه مراة..
فردوس شافت لطوبى..
وطوبى تبدلت ملامح وجهها للحده وهي تشوف لرقيه..
رقيه:وفي من قال المراة هادي نجاة مرت خوه المتوفي وانه كان يبيها من زمان..
الكلام كان جارح ومؤذي لطوبى..يعني المراة لما تسمع من الناس ان راجلها يبي وحده تانيه غيرها حتى لو كانت عارفه هالشي مسبقا حيكون مؤذي لما تسمعه من الغير لأن نظرتهم للموضوع حتكون اسوأ من نظرتها...
رقيه:حق الدوة هادي؟
طوبى قعدت تشوفلها وهي ساكته..
وفردوس خافت تجاوب..
اما مطيره قالت:يبيها هي يبي غيرها في داهيه كلهم المهم عندنا يطلق بنتنا ويمشي يدير اللي يعجبه..
رقيه:كان هكي حق حسبي الله ونعم الوكيل فيه..الواحد كان يبي وحده علاش يظلم في غيرها معاه! قسما بالله وجعتيني في وسط قلبي ماتستاهليش يابنتي..
طوبى:الحمد لله الابتلاء ع قد المحبة..
رقيه وهي تدوي بحماس:ايه الحمد لله..لكن والله الا واعرة الحق بالذات كان طلعت هي حق يعني زي مايقولوا الميه تجري من تحتك وانتي غافله..بيني وبينكم راهي مش هوينه مربطه حبالها معاهم وهما دايريلها قدر وقيمة سكنوها معاهم ووين مايمشوا معاهم...واضحه راسمه ع كبير..
مطيره؛مشبطين ملبطين ع بعض..
رقيه؛ايه...لكن كان تشوفيها كيف موليه هداكا الصباغي واللبس ومش عارفه شن دايره بش رايحه تقول بنت 20 عام..
فردوس بإنزعاج؛فكينا من سيرتها وسيرتهم ماعندنا مانديروا بيهم..
مطيره:ايه غيري الموضوع احسن صدري غم عليا..
رقيه بضحكه:صدقتوا سيره تغم..
وفتحوا موضوع تاني يحكوا فيه..
وطوبى تظاهر انها عاديه وولا ع بالها ومنتبهه معاهم..
بس كان في شي داخلها ينحرق حرق...
🍃🍃🍃🍃🍃
"باهي كيف حالها توا؟"
هادي عواطف تكلم في نجاح هاتفيا..
"مالهاش هلبه فايقه من البنج خشينا شفناها شويه"
عواطف بضيق:ان شاء الله مايتعبهاش البنج..
"إن شاء الله"
تأففت بضيق وقالت..
/ياريتني قتله يخليني عندها..
"كيف قصدك مش جايه؟"
عواطف؛شن بندير يانجاح الشارف سافر من الفجر..تو نشوف تونشوف ونرد عليك..
"خلاص مش مشكله ماتضغطيش ع روحك انتي بظرفك في النهايه"
عواطف هزت راسها وقالت..
/إن شاء الله خير..
🍃ونهت المكالمه مع اختها وقعدت بعدها تفكر شن بدير ولما وصلت لحل..جمعت شجاعتها ومشت طول لعزوزتها...
~~~~~~
ام الشارف:ان شاء الله لاباس عليها..لالازم تمشي وحني معاك..
ع خشة كوثر في يدها البخارة تبخر وهي تقول..
/وين بتمشوا مرت خوي!
:ام عواطف دارت عملية ع ظهرها اليوم..
كوثر:اه..لاباس عليها..
عواطف وهي تحاول تخفي توترها..
/لايوريك باس..
:قلت في بالي يرفعنا وجدي نطيروا عليها السو..
كوثر:امك اليوم دارت العمليه معناها مازال تبي تقعد في المستشفى..خلي اين تطلع وبعدين تمشوا..
عواطف شافت لعزوزتها اللي قالت بقلة حيله..
/صح..لين تطلع بنتي خير..
عواطف:اني مانقدرش نقعد عنها هادي امي!
كوثر:حالتها مش خطيره مافيها شي..تطلع ع خير وبعدين يرفعوك تقعدي عندها نهارين..
عواطف سكتت وهي مضايقه ع الاخر..
كوثر وهي تشوفلها بنظرات امتعاض .
/شكله مش عاجبها كنتك!
ام الشارف:لامش هكي غير متغششه ع امها..
كوثر:احكيلها عليك انتي احكي مش مرة امك مرضت ورقدت في العنايه في عزي راجل خالتي مش قعدتي لين درتي واجبك بعدين مشتيلها..الله يرحم ميمتي قداش كبرتي في عينها وقتها..
:الله يرحمها..
كوثر:امك حالها باهي ياعواطف..وهيا نوضوا معاي بش نضموا فوق الحوش مادام الجو كويس..
ومشت طلعت بالبخاره..
عواطف قعدت تشوف لعزوزتها بضيق..وعزوزتها قالت..
/هيا نوضي بنتي نوضي خل نلحقوا نكملوا ضمان قبل وقت الغدي..
وناضت ومشت طلعت من حداها..
وخلتها الى جانب ضيقها مستغربه فيهم..في خوفهم منها في قلة حيلتهم معاها..لهالدرجه حاكمه فيهم ومسيطرة عليهم!
🍃🍃🍃🍃🍃
الساعه 1:00 ظهرا..
في كوجينة حوش لطفي الواعر..
فردوس طيب في الغدي..
ومطيره حداها تفرط في البازلياء..
فردوس:كلامها حرقلي دمي اني يابال هيا كان نلقى معاش ندخلها الحوش بكل..
مطيره؛معاك وهي راهو تزيد في بهارات من عندها بش طلع منا دوة وتنشرها واني ناديت عليها بش نعرف اخر الاخباربس ماتوقعتش طوبى تطلع نعرفها ماتقبلهاش..
قربت فردوس من عمتها وقالت..
/هي طلعت بش تعرف اخر الاخبار حتى هي..تبي تعرف ع شن ناويين..
مطيرة:حتى اني حسيتها..وياريتها ماطلعت سمعت كان اللب حرقلها دمها...
☘وطوبى في الدار مقعمزه حدا بنتها..
سرحانه بتفكيرها..جي في بالها ذكريات حاولت تهرب منهم لكن بعد كلام رقيه اليوم لقت روحها فيهم..
ايامها مع الجالي في وجود نجاة..المواقف اللي غفلت روحها عنهم..الكلام اللي قالاته نجاة في المكالمه الاخيره بيناتهم..
نزلوا دموعها قهرا ع نفسها..وياقداش وجعت روحها في هديكا اللحظات..
《 لكن كان تشوفيها كيف موليه هداكا الصباغي واللبس ومش عارفه شن دايره بش رايحه تقول بنت 20 عام..》
غيرت نظرها والتفتت للمرايه وشافت لنفسها...
زادت تألمت..غيرت نظرها ع المرايه للاب توب متاعها..
بعدين ناضت خداته وولت قعمزت جنب سرير بنتها..
فتحاته..وخشت ع الملفات..وتحديدا ملف الصور..
وقعدت تتفرج ع صورها القديمه ايام الثانويه واول سنة في الكليه..
صور ليها في المناسبات والطلعات مع العيله..
معقوله هادي هي نفسها اني!!؟
رجعت شافت للمرايه مرة تانيه..وحست روحها وكأنها ليه سنين ع حالها هدا مش شهور تنعد ع اصابع اليدين..
فجأه سمعت صوت بنتها تبكي..فز قلبها..حطت اللاب ع جنب وناضتلها..
طوبى:جيتك مامي جيتك..وخدتها من السرير ورفعتها وهي تقول...خلاص مامي خلاص..خلاص ياقلبي..
🍃🍃🍃🍃🍃
"واخيرا رضيتي علينا "
الاء بإبتسامه:يعني جديات شغلي عجبكم مش واسطه..
الموظفه في الفندق ردت بضحكه..
/لا والله نهائي..في زباين دائمين كانوا يسألوا ع الحلو متاعك تحديدا..
الاء ابتسمت بفرح..
الموظفه؛هدا غيري اني طبعا..
ضحكت وقالت؛مشكورة...
ع جية آرام اللي قالت..
/مرحبا هديل..
:اهلا ارومه شن جو؟.
الاء بعد ماشافتها غيرت نظرها عنها ومابتش تشوفلها..
اما ارام ماركزتش عليها وقالت..
/بالله عليك قهوتنا اني ومهند ياخد ويوصي فيا من لما طلعت من الحوش نبي نلقى القهوة سابقتني للأستديو..
ضحكت وقالت:حاضر لكن قوليلي حق اللي سمعته حددتوا موعد العرس؟.
ارام بإبتسامه:ايه خلاص اخر الشهر بالزبط يوم 25..
:باهي باهي مبارك ربي يتمم ع خير..
ارام بإبتسامه؛تسلمي..عقبالك..سلام توا..
وين جت بتمشي شافت لآلاء..تعكرت ابتسامتها ومشت كملت طريقها..
الاء حمحمت وقالت؛هيا مالا اني مروحه..
:نشوفوك الخميس..
الاء بإبتسامة مجامله..
/إن شاء الله..سلام...
:سلام..
ومشت بسرعه طلعت من الفندق وهي مضايقه الآخر وشاده دموعها بقوة..
وبش تزيد عليها...تشوفه وهو نازل من سيارته وبعد ماسكرها قعد يمشي بإستعجال بس يخش الفندق..
فات من جنبها بدون ماينتبه لوجودها وخش...
نزلوا دموعها ومسحتهم طول..بعدين مشت كملت طريقها...
🍃🍃🍃🍃🍃
"والله ياعيوني بترقعي اللي درتيه دبري"
سميره:لا والله ماليا عين..بعدين افهم هما رفضوا ع خاطر فرق العمر..وفرق العمر بينك وبين البنات الزوز هو هو..
اسكندر:البنت مقتنعه..
سميره:هي قالتلك؟
اسكندر:لا لكن اني عارف..
سميره:من الاخير وخيي اني معاش نقدر ندوي فيه الموضوع..
سكت شويه وهو يشوفلها بعدين قال..
/تو نتصرف بروحي..
🍃🍃🍃🍃🍃
الساعه 6:00مساءا...
في جردينه صديقات العمر...
وين مافي الطاوله والكراسي اللي تعودوا يقعمزوا عليهم الاربعه...
هما الزوز مقعمزات بفكر سارح في ايام زمان..زمان اللي ماتخيلوش فيه يجيهم يوم ويولي هدا حالهم..
من اربعه لزوز..
من ايام كان البال فيهم خالي والضحكه ماتفارقش الوجوه..
لأيام ولت فيهم ملامح الحزن جزء من تقاسيم وجوههم..
قطع عليهم سرحانهم ولد نسرين اللي فكروسته لما طلب ميه بلغة طفوليه..
شبحوله الزوز..
بعدين قالت نسرين..
/هيا ماما..وعطاته الطاسه متاعه يشرب منها..
فايزة؛كان لاقدر الله صارتله حاجه راك عرفتيها تلقيه حرجان منك ويتغلى عليك..
نسرين بحزن..
/اني حظي هكي يافايزة مش مكتوب عليا نتهنى نقعد طول عمري واني في الهم وخلاص..
فايزة:ماتقوليش هكي احمدي ربك اللي عوضك براجل متفهم ويحبك..
نسرين دمعوا عيونها وهي تقول..
/حاسه روحي مش مطوله معاه..ماليه مش طايقيني يافايزة..
فايزة:طز فيهم مادام ساكنه بروحك وبعيد عنهم ماتعدليش عليهم..
نسرين بقلق:خايفه يقلبوه عليا..
فايزة:تفائلي خير..ربيع راجل كويس يانسرين ويحبك مايفرطش فيك وفي ولدك اللي داره ولده..
شافت نسرين ليحيى وقالت..ان شاء الله..
شبحتلها فايزة شويه بعدين قالت..
/ غير كان تقنعي خوك الجالي يخلي بنت الناس في حالها..
نسرين:الجالي يحبها يافايزة..
فايزة؛يحبها يدير فيها هكي!
نسرين سكتت ومابتش ترد..
فايزة:المراة مش ناقصه حالها مايعلم بيه الا ربي ارحموا صغر سنها ع الاقل..
نسرين شبحتلها وقالت..
/علاش تكلمي فيا وكأني راضيه باللي صاير!
فايزة:حساتك مش راضيه في خوك..
نسرين بضيق:لا والله ماهكي اني ناقمه عليه زيكم بالذات بعد عرفت طوبى كيف كشفاته..لكن اني نشوف لهالعيل حرام تتشرد بيناتهم..كان في فرصه للصلح علاش مانلموش شملهم..
فايزة؛وهديكا الشيطانه موجوده!..
نسرين؛هو خلاص حولها من راسه بكل..
فايزة:مافي شي مضمون ومادامها ولت مفضله عندك امك وخديجه اختك انسي انها تخلي خوك ولاخوك ينساها..
تنهدت نسرين بضيق وقعدت ساكته..
وفايزة قالت..
/حاولوا تقنعوه يطلق لأن بعد اللي صار خلاص معاش في امل طوبى مازال تقبل تشوف لوجهه مش توليله...
نسرين بضيق..
/لاحول ولاقوة الا بالله...
🍃🍃🍃🍃🍃🍃
"عجبها التصميم وقالت توكل ع الله"
الجالي بإبتسامه؛قتلك من الاول حيعجبها..
حكيم بآبتسامه:بإذن الله من الاسبوع الجاي بنبدا في البني..
الجالي:ع البركه ان شاء الله..
حكيم:مطول المرة هادي..
الجالي:يوم 16 مولي..
حكيم هز راسه ورشف من القهوة..
الجالي تنهد وقال..
/صاحبك متعذب هلبه..
نزل الفنجان وقعد يشوفله..
الجالي بضيق..
/من اللي شفتها يومها واني حالي كل يوم في النازل..متخيل عيلك كبدك من اللي يجي للدنيا ماتشوفاش الا مرة وحده بس بالحباب والكباب..وممنوع تشوفه مرة تانيه الا بشروط..
حكيم:انت اللي تعذب في روحك ياجالي..
الجالي:باهي وطلقتها..شن الفايده ماهو بنقعد نشوفها مرتين في الشهر..
حكيم؛مع السنين تطول المده وتقعد معاك بالايام ومرات امها تشوف نصيبها وتقعد عندك نهائيا..
بنظرات حاده قعد يشوف لصاحبه وهو ساكت..
ابتسم حكيم تهكما وحرك راسه يمين ويسار ورجع يشرب في قهوته..
والجالي غير عيونه وبغضب رفع فنجانه وشرب القهوة في مرة بعدين نزل الفنجان وانفاسه متسارعه..
وحكيم مركز معاه لكن ماباش يكلمه..
🍃🍃🍃🍃🍃
"رجعت العلاقات بيناتكم"
شبحت صابرين لرضا اللي كان واقف قريب عليهم بعدين شافت لمختار وقالت..
/اكيد وصلولك انها حاولت تكلمني واني ماعطيتهاش فرصه..
قام مختار عيونه في رضا لقاه يشوف لصابرين بإمتعاض نزل عيونه لصابرين وقال..
/برافو..خليك هكي..
صابرين تهكما:ايه وانت ترفع فيها وتعطي فيها مناصب!
مختار:مالكش علاقه بالموضوع هدا ومع تتكلمي عليه..
خدت نفس وقالت..
/باهي..لكن نبي منك حاجه..
مختار:اللي هي..
اشرتله بعيونها ع رضا..
مختار:ماندرق عليه في شي تكلمي..
رفعت عيونها فرضا لقاته مبتسم ابتسامة استفزاز خفيفه..
رفعت حاجبها ورجعت نظرها لمختار وقالت..
/نبي راجل مروة يقعمز في الحوش..
ابتسم مختار ابتسامه عريضه وقال..
/تعجبيني..هز راسه وقال..حاضر غالي والطلب رخيص..
رضا قعد يشوف لصابرين بإستياء..
وهي كان باين ع وجهها ملامح الحقد..
مختار:تمام توا خلينا في شغلنا..من غدوة نبيك تنسي الخدمه في المعمل حتولي تخدمي معاي اني بس..اظن الفترة اللي فاتت خديتي خلفيه كويس عن الوضع وعرفتي تتعاملي مع الناس..قدم بجسمه للطاوله وحط ايديه عليها وقال..نبيك تمشيلي بعض الامور..بأسلوبك الخاص نبيك تكوني بمعنى اصح مديرة المكتب متاعي اللي تساعدني في تسهيل الشغل متاعي....
صابرين بضيق؛وضحلي اكثر..
هو شبحلها شويه وقال..
/اللي فبالك مش صاير ومش حيصير مافي حد مايعرفنيش ويعرف ان اللي يخصني ممنوع ح يقرب منه فهمتي عليا..انتي بس بتستخدمي لسانك وجمالك لكن بطريقه غير اللي فبالك..
خدت نفس عميق وزفرت من التوتر وقالت..
/فهمت عليك..
ابتسم وقال..
/خليك ديما هكي فاهمه عليا وحتشوفي روحك شن تولي بعدين..
هزت راسها وهي مبتسمه بإرتباك..
شويه جاه اتصال..طول شافت لتليفونه اللي كان قريب منها لقت المتصل..
فاتن...
وجهها تغيرت ملامحه..
هو خدي التليفون وناض ومشي طلع من حداهم..
تبعاته بعيونها وقالت..
/كان نعرف شن تكونله فاتن هادي..
رضا ضحك تعجبا وقال..
/قصدك لتوا ماتعرفيش من هي!
صابرين تهكما..
/لا..قولي انت يابو العريف..!
بضحكه قال..
/طليقه الاستاذ اللي ماخداش ومش حياخد غيرها..
رفعت حاجبها تهكما وهي تشوفله بعدين قالت..
/طلعت تعرف تضحك..
ابتسم بجديه وقال..
/بهزوة بس..
ناضت وهي تشوفله بنظرات حاده..
بعدين مشت طلعت ..
وهو تبعها بنظراته الساخره المتشفيه...
🍃🍃🍃🍃🍃
"شن غير رايك ؟!"
المهدي:مانبيش نتعبك معاها...
كامله بصدمه؛شن تقول انت؟..اني قتلك قبل بنتك مونستني وتعودت عليها هلبه..معاش نقدر نتخيل نقعد من غيرها..
هو بضيق قال..
/سامحيني مانقدرش نخليها بعيده عن عيني..
كامله؛وعلاش توا بس خطرلك! ولافي من غير رايك!؟ هي مافيش غيرها من جيتها للعيد واني حاستها بدير حاجه..
المهدي قعد ساكت مالقاش بشن يرد..خاف يقول كلام يجرح بيه عمته بدون قصد..وفي نفس الوقت هو اقتنع بكلام امه بغض النظر عن نيتها لكنه كان منطقي في محله..
كامله بضيق واستسلام:خلاص براحتكم البنت بنتكم ماعندي ماندير..
المهدي:سامحيني..
كامله؛لاياولدي لا ماعندك علاش تطلب السماح حقك..لكن رد بالك ع بنتك راهو فاقده امها هلبه وتبي من يحن عليها..
المهدي وعيونها معبيات حزن هز راسه بإيجاب وهو يفكر في كلام عمته..
🍃وطلعت معاه سدره وهي بتتقطع من البكي..ع قد ماترجت فيه يخليها رفض..وكامله وهي تبكي بدموعها اقنعتها تروح مع بوها...
وطول الطريق وسدرة تبكي..وبوها يسمع وساكت وقلبه متقطع عليها..
لكن مافيش قدامه غير هكي..سدرة في النهايه بنت ولازم تقعد تحت نظر بوها وخوتها....
🍃وخوتها لما روحت..حاولوا يحتوها ويهدوها..
بالذات محمد..
محمد؛تكرهي تقعدي معانا؟ استحشناك هلبه راهو..
سدرة ببكي:انتم ماتقعدوش معاي ديما برا واني نقعد بروحي مانعرفش عند مني نقعد..حناي لزتني..وعماتي مش معدلين عليا..وابله طوبى معاش تبوني نمشيلها..وانت معاش تبيني نمشي لحوش خالتي فايزة شن ندير باهي اني نقعد بروحي! ياريتني متت مع ماما..
محمد خداها في حضنه وهو شاد دموعه بقوة..
ويزن يشوفلها بحزن..
اما بوها اللي قلبه وجعه بمعنى الكلمه بعد سمعها شن قالت..
بحزم قال..
/معاش في حد يقدر يمنعك تمشي لطوبى بريلها..بري لحوش فايزة اقعدي فيه لين تملي..
تباعدت عن خوها وشبحت لبوها بعيونها الباكيه وهي تقول..
/بعدين حناي تغيرلك رايك..
ولاده شبحوله بضيق..
المهدي بأسف:يابنتي حناك ماغيرتليش رايي حناك خلتني نشوف حاجه اني كنت غافل عنها..
سدرة:شن هي!؟
غمض عيونه وخدي نفس بعدين فتحهم وقال..
/خلاص بابا غدوة ان شاء الله تطلعي مع عمتك تاخدي حاجات المدرسه وين ماتبي تقعدي بعدين اقعدي عندها عند فايزة عند طوبى اللي يريحك ووالله مامنعك واحد..
نزلت عيونها الحزينه وهي تمسح في دموعها..
مسح محمد ع راسها وقال..
/حتى اني معاش مكلمك ع شي بري لصاحبتك امتى ماتبي واني نرفعك شن رايك.
رفعت عيونها فيه وهي تشوفله بحزن..
يزن؛خلاص عاد اضحكي مافي حد محصله الدلع هدا..
ضحك محمد وهي شبحتله وضحكت من وسط دموعها.
يزن:خلاص امسحي دموعها وخشومك..
ضرباته ع رجله وهي مبتسمه بإحراج..
وهما ضحكوا عليهم...
🍃وعند الليل رقدت سدره في حضن بوها بهدوء..
لكن هو ماقدرش يرقد يغمض وهو يتفكر في حالتها كيف كانت وكلامها قاعد ينقال في وذانه...
🍃🍃🍃🍃🍃🍃
ومش غير المهدي ساهر ليل..
حتى هما..
الخالة وبنات اختها..في دارهم..كل واحد سرحانه في همها..
لعند ماتكلمت وحده فيهم وقالت..
/بس..فايقات؟!
الزوز قالوا مع بعض..
/اممم..
اريج:امس صارت معاي حاجه..
الاء:عارفه باين عليك..
اريج:باهي سمعينا..
الاء بتهكم:كملي ياحنه..
اريج تنهدت وقالت..
/امس جاني صاحب عبد الرؤوف راجل خالتي..
شبحولها الزوز..
الاء:اسكندر!
اريج:ايه..
طوبى:علاش..
اريج شبحت لآلاء وقالت..
/قالي اني نبي نخطبك انتي مش اختك..
ضحكت الاء..
اريج:علاش تضحكي!؟
الاء بضحكه:اني من الاول استغربت لما قالوا خطبني وهو معروف انه معجب بيك..
اريج:اني نحسابه غير رايه بعد عرف اني كنت متزوجه يعني..
طوبى تسمع وبس..
الاء:باهي انتي شني؟
اريج بحيره..
/مش عارفه..ماحسيتش روحي رفضاته..
الاء:يعني عاجبك..
اريج:ممكن..
شبحتلها طوبى..
الاء؛حتى لو..امي مش حتعطيك لواحد فرق العمر بينك وبينه16 سنه..
اريج بضيق؛اووف..هلبه..
الاء بضحكه؛ماكنتيش حاسبتيها..
اريج؛لالا..مايبانش عليك بكل..
الاء:صح..
شافت اريج لطوبى وقالت..
/بيبو خيرك ساكته..
طوبى:ماعندي مانقول..
اريج ناضت قعمزت وهي تشوفلها وقالت..
/علاش؟
طوبى ناضت قعمزت بعدين قالت..
/تبي نصيحتي..
اريج هزت راسها بإيجاب..
الاء ناضت وربعت رجليها وهي تمرر في نظرها بيناتهم..
طوبى:ماتربطتيش مرة تانيه لبعد ماتتخرجي انتي ماليكش هلبه طالعه من تجربه صعبه شويه مرات الارتباط التاني بسرعه يكون ردة فعل مش اكثر تندمي عليها بعدين..
الاء:كلامها صح...
اريج؛لكن اني نسيت نضال خلاص..
الاء:انتي تقولي هكي..لما تنحطي في الامر الواقع تلقي العكس..
سكتت اريج وهي تفكر فكلامها..
طوبى:وفي النهايه انتي حرة اللي يريحك ديريه..
وولت رقدت مرة تانيه..
الاء:اصلا مشروع فاشل امي مسكرة راسها..
وتمددت ع سريرها حتى هي..
وقعدت اريج مقعمزه للحظات وهي تفكر في كلامهم..بعدين ولت رقدت حتى هي....
🍀🍀🍀🍀🍀🍀
وتمر من هداكا اليوم ايام...
كانت فيهم سدرة المهدي تتردد ع حوش فايزة وتقعد غادي للمغرب لحوش لطفي الواعر مامشتش الا مرة وحده شافت فيها جنه وطوبى كانت فرحانه بجيتها هلبه..
لكن ولامرة مشت لحوش جدها ماكانش عندها رغبه وبوها ماباش يفرض عليها شي...
🍃وتطلع نجمه من المصحه..
بعد ماطلعت ارتاحت يومين في حوشها..
حواليها كناينها..وبناتها..نجاح وعواطف اللي جت قعدت يومين مع عزوزتها وروحوا وكانت في اليومين اللي قاعده فيهم محسسه اهلها انها عايشه مرتاحه وراضيه..
لكن هالشي ماعداش ع امها اللي كانت برغم اللي هي فيه حاسه ان بنتها مش مرتاحه...
☘بعد هاليومين..
الجيران لموا بعضهم ومشوا يطيروا السو عليها..
لكن حوش الواعر..
🍃فردوس:المصايب هدوكا اكيد كل يوم غادي..
مطيره:شن يعني بنقعدوا ع المراة! الوحيده اللي قاعده تجينا وتنشد علينا...
وكلامهم كانت تسمع فيه طوبى وهي واقفه في الكوجينه تغسل في طاسة كانت تشرب فيها حليب..
بعد ماكفتها..طلعت عليهم وقالت..
/زي ماقالت عمتي المراة ماقصرتش معانا مش ع خاطرهم هما نقعمزوا عنها..
فردوس:قصدك تبي تمشي..
رفعت حاجبها وقالت:ايه..
ابتسمت مطيره ابتسامه خفيفه وقالت..
/خلاص بعد العصر نمشوا...
🍃🍃🍃🍃🍃
الساعه 6:00مساءا..
في حوش الصيد..
الصالون كان معبي نساوين اقارب وجيران ومعارف..
وع راسهم..مغليه ونجاة وخديجه من لما جو وهي مقعمزة حداهم ومابتش تتحرك من غير شي دايرة سبلتها الحمل بش مادير شي..
اساسا ماكان في حد طايقها من حوش اهل راجلها بعد اللي داراته في سميرة..
لاسلفات..ولاحموات..
بس نجاح بزايد..مقعمزة مقابلتهم..
عيونها عليهم هي ونجاة..تشوف فيهم كيف مقعمزات جنب بعض ويهدرزوا ومنسجمات..
وتتفكر في كلام ابتسام..وتزيد تنقهر ع طوبى..
🍃🍃🍃🍃🍃
"بالله ردي بالك اريج"
اريج؛شن اول مرة خدينا ع بعض راهو..
ابتسمت طوبى بعدين شافت للمرايه ساوت شاربتها كويس..
بعدين خدت تليفونها من ع الزيانه ومشت طلعت..
☘☘☘
وين طلعت من الحوش لقت عمتها وفردوس يراجوا فيها فالجنان..
طوبى:سامحوني عطلت غير كنت نرضع في جنة..
مطيره:عادي بنتي مازال وقت..
ويدق باب الحوش..
استغربوا..
ومطيره قالت..
/زعمة مني!..
قدمت للباب وقالت...
/شكون؟
"اني افتحي"
مطيره فتحت الباب وقالت..
/اهلا..
خشت نبيله وهي تقول..
/السلام عليكم..
ردوا عليها السلام..
مررت نظرها عليهم وقالت..
/ماشيين لحوش الصيد..
مطيره:ايه..
نبيله:معاكم..
ابتسمت طوبى..
ومطيره قالت:هيا مالا قدامي..
☘طلعت نبيله وهما طلعوا وراها..
🍃ومن الصدف السيئه..بل والسيئة جدا..
ان الجالي يكون مقعمز في قهوة خوه نضال مع صاحبه حكيم اللي كان عازمه..
وفي جنبهم قدام مطعم ربيع..
كانوا واقفين عبد القيوم وربيع مع بعض يهدرزوا..
لما انفتح باب حوش لطفي الواعر..
الجالي شبحله طول..وشاف طوبى طالعه..
بس هي ماركزتش عليه..قعدت ماشيه مع النساوين وتسمع فيهم وهما يهدرزوا..
حكيم ركز ان الجالي سرحان في حاجه التفت وشاف طوبى اللي كان مش حافظ شكلها كويس بس قدر يميزها من بين اللي معاها لأنها اصغرهم..
وين قصوا الطريق ووصلوا في الجهة التانيه..
يجي نظر عبد القيوم عليها..
طول شبح بعدها للجالي اللي لقاه معاها بنظره..
ربيع:خيرك شن في!..والتفت شاف وين مايشوف صاحبه ولقاهم..رجع شبحله ولقي ملامح الغضب كانت باديه ع وجهه..
ربيع؛تارقي..
شبحله عبد القيوم..
ربيع:ندوي معاك..
هو ارتبك..عقد حواجبه بعدين رخاهم وقال..
/كمل...
☘☘☘
الجالي بغضب؛مع مني مخليه البنت!
حكيم:اكيد عندها على من عابيه..
الجالي:عيل عمرها ماسكرش شهر من يقدر يردباله عليها غير امها!
سكت حكيم مالقاش بشن يجاوبها..
حده رفع حواجبه ونزلهم بعدين شرب من القهوة متاعه..
🍃🍃🍃🍃🍃
"متغير وجهك هلبه عن قبل"
نجاة:قتلك عيادة ممتازة احسن من يدير هيدرافيشل"
خديجه:خل نشوف قبل كان مافيشي خطر ع المراة الحامل..
نجاة:مااعتقدش بس زيدي اسألي..
"السلام عليكم"..
وجهوا نظرهم لمصدر الصوت..زي ماكل من فالصاله توجهوا بأنظارهم ليهم...
ولأول مرة بعد اللي صار بين العيلتين يتلاقوا في مكان واحد..
شافت نجمه لمغليه واللي معاها..
لفت ملامحهم كلها حده وامتعاض..
غير نظرها لنساوين عيت الواعر لقتهم متجاهلين وجودهم ويسلموا ع الحاضرات عادي جدا..
نجاة وهي تشوف لطوبى بإبتسامه متهكمه..
/شن دايره في عمرها هادي خير ولت هكي!..
وخديجه تشوفلهم وهي ساكته..
مغليه قربت منها وقالت..
/نقص ايدي كان مش جايه بلعاني..
خديجه:ماتحسبيهاش ذبانه تزن..
☘وسلموا ع الحاضرات وحده وحده ووقفوا عند نجمه وطولوا وهما يسلموا عليها ويسألوا عن حالها..
بعدين كملوا الباقي لعند ماقربوا يوصلوا في عيلة شنيبه..
ووقفوا ومشوا بيقعمزوا..
والناس تراقب بشغف وحماس..
نجاح؛تفضلوا هني..تفضلوا...
مطيره:يزيد فضلك...
وقعمزوا كلهم حدا بعض..
☘وولت نجاح قعمزت في مكانها وعيونها ع نجاة..
لقتها تشوف لطوبى بنظرات تهكميه..
وخديجه تكلم فيها وهي ترد عليها..والزوز يشوفوا لطوبى..
شويه سمعت زوز من الجارات يقولوا..
:عنده الحق يشوف لغيرها..
:ايه..شكله زي ماقالت مغليه مش مهتمه بروحها وهاملاته واللي زيه كان لقي اللي قايمه روحها وحاطه عليه عين اكيد مش حيفوتها..
:الحق ماينلامش شوفيها كيف رايحه زي الغزاله..
:وكان يحطوها جنب بنت الواعر تبان اصغر منها..
التفتت نجاح وشافت لطوبى اللي كانت تسمع لهدرزة عمتها مع النساوين..
صح..شكلها توا بعيد هلبه عن شكلها زمان..
هيئتها هيئه مراة يائسة من الحياة...
مقارنه باللي كانوا سبب في دمار حياتها...
استاقظت من سرحانها لما سمعت وحده من نساوين خوتها تنادي فيها..ناضت ومشتلها..
🍃🍃🍃
:طوبى قاعده تقري؟
وجهوا مغليه وخديجه ونجاة نظرهم ليها..
وفردوس تشوفلهم..
طوبى:ايه مازال ماكملتش مازال عام..
: موفقه...باهي المدرسه معاش بتفتحوها خلاص؟
طوبى:للأسف ايه..
:كان نعرف شن صار بالزبط كل مرة نسمعوا قصة شكل حقه في ابله تهجم عليكم راجلها بكتيبه؟
طوبى؛ايه مزبوط..لكن مش للسبب هدا تسكرت..
:باهي علاش؟
طوبى:ناس ماتخافش ربي نفوسها خبيثه دبرولنا دبارة...
:لاحول ولاقوة الا بالله..
:الناس توا معاش في حد يحب الخير لحد..
طوبى:هلبه..يحسدوك ع اللي عندك..يحطوا عينهم ع حاجتك لين ياخدوها منك وكان ماقدروش ياخدوها منك يخربوا عليك...
🍃 كلامها كان مسموع...تلقيح..ورمي الكلام ليه هلبه معاني خلت الموجودات يفكروا فيه وانظارهم مرة ليها مرة لعيلة شنيبه وتحديدا نجاه..
مغليه كانت تحاول تتجاهل..
وخديجه كانت تحاول تسيطر ع اعصابها..
امانجاة كانت حاسه بالقهر..
حاجه شن اللي بتاخدها منها! هي اللي خدت منها راجلها..
الجالي كان راجلها قبلها..!
ع شن بنحسدك ع حاجة كانت ليا قبلك!!..
:ايه والله صدقتي ياكثرهم ربي يجيرنا منهم..
:حقه شن سميتي بنيتك..
طوبى بآبتسامه:جنة
:الله! ع اسم المطحن متاعكم..
طوبى بإبتسامه:ايه...وهي عاد الكامله الشامله..جنه ومنها الفردوس والغرفه وفيها طوبى وسدرة المنتهى..
كلهم بأصوات متقطعه..
"الله...ماشاء الله..كلام حلو"
خديجه فقدت اعصابها وقالت..
/خوي يحبه الاسم ومن قبل قال كان جتني بنت بنسميها جنه..
مطيره بدت ع وجهها ملامح الازدراء..وفردوس الكره..
اما طوبى طنشت ولاكأنها سمعت..
والجارات اللي تهز في راسها..واللي تقول..اها وايه مسايرة..
نجمه:ربي يحفظها وتشوفيها كيف ماتبي..
طوبى بإبتسامه:آمين تسلمي خالتي..
مطيره غيرت الموضوع لما قالت
/ياوخيتي شن جاك مرة وحده منين جيتينا قلتي حالك باهي!
نجمه:والله كان باهي ماكنتش نحس هلبه بس المده الاخيره درت مجهود ولى عليا..
فردوس:عاد الحوش كبير الله يبارك وبعد مشت عواطف قعد كل شي عليك..
نجمه:ايوه بالزبط..وعاد اني معروفه نحب نحوس ونضم هلبه زي الوسواس عندي..
مطيره:اني اللي نعرفك توا لازم ديروا شغاله..
وحده من الجارات
/ولواه الشغاله وعندها بدل الكنه خمسه وحده منهم فوقها يتبادلوا ع عزوزتهم ونجاح معاهم..
نجمه:لالالا ياكبدي اني مانفرض ع حد شي اللي بتجي تعاون من كيفها الحوش حوشها اللي ماتبيش سلامتها تشد حوشها سلامتها..
ع جية نجاح ووراها نساوين خوتها بالضيافه ..
قعدوا يضيفوا في الموجودات..نساوين عيلة شنيبه ولا وحده فيهم خدت حاجه..كلوا وشربوا لين شبعوا قبل شويه..
اما نساوين حوش الواعر اللي كانوا قمة في الاستكراد والتجاهل خدوا من الضيافه وعدوا بيها هدزرتهم وماهمهم حد...
مغليه معاش تحملت القعده اكثر من هكي زياده ع طوبى وتلقحيها وتلقيح عمتها كانت نبيله موجوده وهي تشوف الموت ولاتشوف وجهها..
مغليه:بنوض..
خديجه؛ردي بالك يام ديريها شن بيقولوا عليك كان طلعتي!..وبعدين من هما هادم يش يخلوك تطلعي!!هو اللي مفروض يطلعوا مش انتي...
ونجاة تسمع فيهم وعيونها ع طوبى اللي كان تلقى تطلق عليها الموت..
شويه شافتها ناضت وقفت..
وشافت نجاح وقفت ومشت ناحيتها..
تكلموا شويه بعدين خدتها من حداهم..
وعيون مغليه وخديجه ونجاه معاهم...
🍃🍃🍃🍃
في دار المعيشة..
خشوا طوبى ونجاح..
ردت نجاح الباب..وطوبى اتصلت بأريج..
طوبى:ايوه روجه شن جو؟.
"قاعده راقده"
طوبى:باهي مرة مرة شوفيها ماتغفليش عنها مرات تنوض تعيط وماتسميعهاش..
"والله حاضر حفظتهم توصياتك حفظ"
ضحكت وقالت:خلاص طيري هي..
"سلام"
سكرت طوبى..بعدين شافت لنجاح لقتها تشوفلها بنظرات ألم..
استغربت..
قدمتلها نجاح وقالت..
/ترا قعمزي..
طوبى قعمزت وهي مستغربه..
ونجاح قعمزت مقابلتها وقالت...
/شوفي بنتي..اني مابيتش نسألك عن مشكلتك قبل..قلت حاجه شخصيه..لكن بعد عرفت اللي صار وبعد الكلام اللي انقال هني وغادي..قعد حاصل في قلبي كلام ونبي نقولهولك..تسمعيني عادي؟
طوبى بضيق..
/اكيد..قولي..
نجاح:بنتي مهما يصير معاك ردي بالك تبيني للناس اللي تراجي في فرصه بش طيحك وتتشمت فيك انك ضعيفه ومتحطمه زي توا...سامحيني مرات كلامي يكون واعر شويه لكن صدقيني من كبر معزتك عندي...
بنتي معاش تخلي روحك حد مصخوف عليه..الناس تشوفله بعين الشفقه..معاش تخلي حد يشوفك مسكينه ويقول ياناري عليها..معاش تخليهم يحطوك مقارنه مع ناس ماينحطوش جنبك اصلا..اني نعرفك كويس ..نعرف كيف تربيتي نعرف قداش عاقله ورزينه وواثقه في روحك..
قبل كنا نشوفوا فيك حاجه تانيه..ديما نقولوا هالبنيه سابقه سنها في كل شي..مش ليك صدقيني الحاله اللي انتي فيها توا...اللي زيك انتي مفروض مهما يمر عليهم من ظروف مايخلوا حد يشوفهم ضعاف..تعرفي حالك هدا مش بس يشمت عدوينك فيك..ويمكنهم منك..
كانت طوبى تسمع فيها شن تقول وصدرها كل ماله يزيد يضيق وقلبها يغم..
نجاح؛مانبيش نقولك ماتبكيش وماتشكيش ابكي واشكي لكن لربي بس مافي حد يعرف اللي تمري بيه ويقدر يطلعك منه غيره هو وانتي ادرى بالكلام هدا مش محتاجه حد يقولك عليه...عارفه في نفسك مرات تقولي لو تمري باللي مريت بيه مش حتتحملي..ايه عارفه صعب هلبه ومايتحمله حد..مراة تتزوج راجل واخد قبلها وهي مش عارفه مش حاجة بسيطه..اني لما تخيلت الوضع كيف كان ماتحملتش يابال انتي..
هني طوبى قاطعتها وقالت وهي مضيقه عيونها بعدم استيعاب...
/دقيقه ابله نجاح...كيف واخد قبلي..من قالك كان واخد قبلي!؟
نجاح استغربت وقالت..
/كيف!..قصدك انتي ماتعرفيش!؟
طوبى تسارعت انفاسها من التوتر قعدت ساكته شويه بعدين قالت...
/مش واخد قبلي هو..هو كان يبي وحده تانيه..بلعت ريقها وقالت..كان يبي ارملة خوه ولما اخته خديجه عرفت خافت ياخدها وخلاته ياخدني بش يحولها من دماغه..لكن هو..تنهدت بضيق وقالت..قعد معاها حتى بعد ماخداني علاقه يعني..
نجاح وهي مستغربه ومصدومه في نفس الوقت..
/اللي سمعته مش هكي بكل..
طوبى وعيونها تعبوا دموع..
/شن اللي سمعتيه ومن مني!؟
نجاح خافت تصير مشكله كبيره بسببها قعدت ساكته وهي تشوف لطوبى...
طوبى دموعها نزلوا وهي تقول بإصرار ورجاء..
/بالله عليك قولي ابله نجاح..مانيش طالعه من هني قبل لتحكي اللي تعرفيه..
🍃🍃🍃🍃🍃
"زعمه في شن هدرزة معاها حماتك هدا كله؟"
خديجه:وين نندري ع دعوتهم.!؟ هما من قبل علاقتهم كويسه مع بعض نجاح مدايرة روحها محاميه ليها بكل..
نجاة:زعمه حكلتها؟
خديجه؛مااعتقدش نجاح نوعها مادسش سر كان قالتلها حاجه تقولها طول..
تنهدت نجاه وقعدت ساكته..بعدين قالت..
/وين الحمام؟
خديجه وهي تأشرلها بيدها..
/غادي ع اليمين..
التفتت نجاح شافت وين اشرت..بعدين ناضت ومشت...
🍃🍃🍃🍃
نجاح بضيق وتوتر..
/هدا اللي حكتهولي كله لازدت ولانقصت..
طوبى وهي مصدومه..
/هي قالتلك انهم ماكانوش يعرفوا بعض كويس..بعني لاهادي كانت تعرف انها مرت خوك ولاهديكا تعرف ان نجاة كانت كنة عيلة شنيبه..
نجاح هزت راسها وهي متوترة ومضايقه وقالت..
/ايه..
غيرت طوبى نظرها للفراغ...وكأنها في دوامه...معاش فهمت ولااستوعبت شي..
نجاح حاولت تطرد توترها وقالت..
/طوبى..حتى كان توا بس عرفتي بالحاجه هادي حاولي تشدي روحك بش ماديريش تصرف مش فصالحك..
ناضت طوبى وقالت بنبرة مخنوقه..
/ماتخافيش مش دايرة شي نبي نروح بس..
رن تليفون نجاح..سكرت الصوت بدون ماتنتبه للمتصل وقالت..
/طوبى..
طوبى:والله ماصايرة حاجه..اصلا ماعنديش حيل...
ومشت بتطلع..
جت نجاح بتلحقها لكن تليفونها رن مرة تانيه بنرفزة شافت المتصل لقاته راجلها..انجبرت ترد عليها...
🍃وطوبى طلعت برا الدار وهي مش حاسه بروحها..
وكأنها فقدت الاحساس بكل شي حتى نفسها..
حست برعشه في جسمها..حطت يدها ع الحيط ووقفت بش تهدي روحها وترجع طبيعيه حتى بالكذب..
قعدت تتفكر في الكلام اللي قالاته في مجمع النساوين..
ابتسمت بهزوة ع روحها تلقائيا..
الصورة عندها وكأنها كانت مقلوبه وتوا تساوت...
الجالي متزوج نجاه قبلك..
نجاة مرته قبلك..
انتي خشيتي ع نجاة..
هو دارك ستار بش يدرق بيه زواجه منها..
وماليه داروك ستار بش يدرقوا بيك اللي داره ولدهم..
هو ساير ماليه معاك..
هما خلوك اللاهايه متاعه اللي بالك تقدر تنسيه مرته الاولى وتخليه يطلقها...
وهو اختار يرضيهم بش بعدين يرضوه ويرضوا بيها معاه...!
انتي تزوجتي راجل متزوج..ملك غيرك شرعا..
ماكانتش مجرد نزوة او علاقه طايشه..
يعني انتي توا ياطوبى شبه مالكش حق في أي شي...
مافي شي تقدري تثبتيه او تستخدميه ضده...
🍃وهي واقفه في مكانها غارقه في دوامه افكارها القهريه..
طلعت وراها نجاة من الحمام..
شافتها وهي واقفه وعاطيه بالظهر..
ونجاه المنغاظه والمغلوله من طوبى..كانت تبي تحصل فيها اي فرصه طلع فيها حقدها عليها..
قدمت...
وهي تمشي وين وصلت في طوبى..
خطبت كتف طوبى بكتفها بقوة..
الخبطه جت طوبى وهي فحالتها هديكا ع غفله..
انفجعت وكانت حطيح بس شدت في الحيط..
ونجاة مكمله طريقها وقبل لتدرق من قدام عيون طوبى...
رمقتهت بنظرة مكر..بعدين مشت..
هي رمت بنظرها للأرض...
خدت نفس عميق...بعديت طلعاته ومشت كملت طربقها للصالون..
خشتله ومشت طول للي معاها..
قعمزت جنب فردوس وقالت .
/هيا..نبي نروح..
لاحظت فردوس شحوب وجهها قالت بقلق..
/خيرك.!؟
طوبى:نبي نروح لبنتي مانقدرش نخليها بروحها..بتروحوا معاي ولا نروح بروحي..
فردوس بقلق:باهي راجي ..التفتت لعمتها وقالت.
/بنوضوا نروحوا اني وطوبى..
مطيرة:كان ماقلتيهاش جيت ينقولها..شافت لنبيله وقالت..
/هيا
نبيله وهي مركزة ع حالة طوبى قالت..
/هيا...
وناضت مطيرة وهما ناضوا معاها...
ع جية نجاح..
شافتهم يسلموا..قعدت واقفه تشوف لطوبى بحزن واسف..
وقعدت معاها لين جوها سلموا عليها..
ومشوا طلعوا من الحوش..
مغليه زفرت براحه..
/تقول كان في جبل ومقعمز ع قلبي..
نجاة:والله حتى اني نفس الشي هدا وين تنفست..
خديجه..
/زي جو زي مشوا..لاقيمة لاوزن..
🍃🍃🍃
وطلعوا من الحوش ومشوا بيقصوا الطريق..
طوبى مازال ترعش..وعقلها في عالم تاني...
قصت معاهم الطريق..وين وصلت في جيتهخ..
حست بنفسها ضاق هلبه...
حطت يدها ع صدرها..وحست ان النفس خلاص حينقطع عليها...
فجأه شدت ذراع عمتها..
مطيره شبحتلها وبخوف قالت..
/خيرك.. !
كف جت بترد عليه..معاش قدرت تنطق..
وفي هاللحظه...طاحت مغمى عليها بين احضان عمتها...
🍃وطبعا لأنه كان في الشارع كل من فالشارع كان مركز معاهم..
بعد ماطاحت الجالي مشالها يجري..
والمهدي كان سابقه..
لكن عبد القيوم اللي فز قلبه من الفجعه والخوف عليها..
جي بيمشيلها حتى هو لولا ان ربيع شده..
شبحله عبد القيوم بفزع وغضب..
ربيع وهو يشوف للموقف اللي صار..
/خليك انت هني احسن..
غير التارقي نظره ليهم و هو يشوفلهم بغضب وخوف وقلة حيلة....
#مارغريت
#طوبى
....يتبع....
