طوبى ☕شارع القهوة☕

الجزء_الثامن_والتسعين

#طوبى  "جنة طوبى"
#جمان_فريد
#الجزء_الثامن_والتسعين"اوراق متساقطه/ورقة خيانه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
‏قال شيخ الإسلام ابن تيمية:
السكوت بلا قراءة ولا ذكر ولا دعاء ، ليس عبادة ولا مأمورا به؛ بل يفتح باب الوسوسة، فالاشتغال بِذِكْر الله أفضل من السكوت.
📙 الفتاوى | ج 23  ص 286
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 شيء غريب لم أستطع أن أذرف الدمع، لكن روحي كانت تتمزق "
دوستويفسكي
_________________________________________
إسبانيا..
في أحد الفنادق..
كان قاعد في غرفته يتغدى..
ياكل بعصبيه وتوتر وهو يستنى..وقف ماكله..خدي طاسة فيها نوع من انواع الخمر وشربه كله في مرة..
حط الطاسه ع رنة تليفونه..
بسرعه قامه من فوق الطاوله..فتح الخط بعد ماشاف المتصل  ورد باللغه الاسبانيه...الحديث اللي دار بينهم كالتالي..
"وجدناهم انهم في منزل يقع في مدينة*****..ونحن نراقبه الآن"
رد ايهم..
"قادم فورا"..
ونهي المكالمه وناض..خدي سلاحه حطه ع خصره ولبس جاكيته ومشي طلع من الغرفه...
🍃أيهم..شخص عاش حياته بطول والعرض..سلوكه غالبا غير سوي..عينه زايغة وعلاقاته بالنساء لاحصر لها..لما شاف صابرين عجباته وكان راغبها..حاول معاها كذا مرة وهي صداته وخلت رغبته اتجاهها تزيد فقرر يتزوجها..بعد خطبها زاد انجذبلها وحبها..بس لاحظ انها ماتبيش تحول الحواجز اللي بيناتهم وتعطيه فرصه يقرب منها..ومن هني زاد ركز معاها ولاحظ ان في شي بينها وبين رضا وتأكد اكثر يوم عزومة المطعم..
لما صارحاته بحقيقة علاقتها بمختار حس انه كان مغفل كبير وانلعب بيه منهم كلهم..ومن وقتها فكر ينتقم من مختار بس ع الهادي...لكن بعد اللي داروه صابرين ورضا واللي صار في بنت اخته المحببه لقلبه بسببهم..قرر يكون انتقامه من مختار عن طريق رضا وصابرين نفسهم..
كان يبي يخطف رضا ويجبره يعترف ويقول كل شي يخص عالم مختار المظلم وطبعا حيخلي صابرين تكون وسيله الضغط..
وبهكي ينحبسوا مختار ورضا..وضيع صابرين...
قعد يدور وراهم لعند ماجاته معلومات عن تواجدهم في اسبانيا وطول رتب اموره واستعان بأفراد من المافيا استأجرهم بش ينفذ المخطط متاعه...
اللي كان انهم بعد يلقوا مكان رضا وصابرين يحتجزوهم وينفد ايهم باقي اللي مخططله...🍃
🍃🍃🍃🍃
وصل في العنوان اللي قالوله عليه..
كان المكان شبه خالي..الحياش فيه شويه وبعاد عن بعض..
والمنطقه تبان زراعيه مش زي باقي المناطق السكنيه أغلبها شجر...
وصل في الحوش اللي قاعدين فيه رضا وصابرين..
عرفه من السيارة المظلمه العاليه اللي واقفه قدامه..
درس سيارته بعيد شويه ونزل...وهو نازل كان حاس بشعور غريب..نظره كان يغبش شويه..مسح عيونه كويس..
لاقاه واحد من الرجاله اللي مستأجرهم قاله انهم موجودين داخل ومكتفين وصاهم يشددوا الحراسه..بعدين خش للحوش..
🍃دور عليهم لين لقاهم وسط دار فيها سرير..
كانوا مقعمزين ع كراسي ومكتفين كويس واصواتهم مكتومه بشريط لاصق..
رضا لما شاف ايهم بدت ع وجهه ملامح الغضب..
نفس الملامح بانت ع وجه صابرين بس كان مخالطها الخوف.
ايهم بإبتسامه متهكمه؛تحسابوا ارواحكم بتهربوا بعملتكم!!؟ تحسابوا اللي درتوه بيعدي هكي من غير حساب!؟
سكت وهو يمرر في نظره عليهم..رجعت تشوشت الرؤيه وفي احاسيس غريبه كان يحس بيها..
ضيق عيونه ووسعهم لما بان عليه رضا وكأنه يضحك عليه..
بينما في الحقيقه رضا كان محافظ ع ملامح الغضب ع وجهه..
قدمله ايهم وهو يقول بعصبيه شديده..
/تضحك يا...ونعته بلفظ بنابي..وانهال عليه بالصفعات..
وصابرين تصرخ في صرخات مكتومه..كانت تحاول محاولات يائسه انها تخلص نفسها..دارت صوت دق قوي ع الارض بالكرسي..
وقف ايهم ضرب وشافلها..بانت عليه تضحك بسخريه واستفزاز..
بغضب نعتها بلفظ بذيئ ومشالها..
رضا قعد يصرخ بصوت مكتوم..قريب ينجن وهو يشوف فيه يقرب منها..
وصل ايهم في صابرين ومازال يشوف فيها تضحك..
صفعها بقوة..
من قوة الانفعال رضا طاح بالكرسي ع الأرض ومازال يصرخ..
صابرين قعدت تبكي وهي تشوفله..
لكن ايهم يشوف فيها تضحك ويسمع فيها تقول..
/تحسابني بنحبك..انت اخر واحد نفكر نشوفله مش نحبه..
هز راسه بوعيد وهو يقرب منها..
كان يشوف تكلم فيه بإستفزاز وتقوله..
/اني نحب رضا..نحب رضا بس..
وصابرين في الحقيقه كانت تشوفله بخوف شديد ودموعها ينزلوا..
ايهم بنبرة مخيفه..
/تو نوريك..ونعتها بألفاظ بذيئه..
رضا يسمع فيه وهو يحاول يفك نفسه ويخبط ع الأرض..
وقف فجأه لما سمع صابرين تتوسل..
"لالا بالله عليك لالا..حرام عليك"
حس رضا وقتها بالموت لما فهم شن اللي قاعد يصير مع صابرين..
ايهم اللي كان مش ف وعيه فكها ورفعها للسرير وهي حاولت تقاوم بس بدون فايده..
توالت صرخاتها..صرخات قطعت رضا بالعرق..
وللحظه بدي يشوف قدامه في مشاهد من حياته كان يشرف فيها ع أعمال انتقاميه اجراميه..
اغلبها كان يصير قدام عيونه..يسمع في استغاثة وتوسل اصحابها بدون ما يرفله جفن..
ودارت الدنيا وتجرع المر اللي سقاه لغيره أضعاف مضاعفه وهو يسمع في صوت عرضه اللي قاعد يهتك...
انهار..ادمر...وحس انه مات خلاص..دموعه نزلوا..دموع ألم..وضعف...وندم...
ممكن وقتها اكتر شي خلاه يحس بالندم انه جازف بصابرين هالمجازفه..
ممكن توقع كل الاحتمالات السيئه..الا الاحتمال البشع هدا..!
صابرين فقدت وعيها تحت ايدين ايهم..
وخر عنها وهو يشوفلها..ماكانش يشوف فيها فاقده الوعي..
كان يشوف فيها قاعدة تضحك عليه..
زي المجنون دور ع المسدس متاعه لقاه ع الارض جنب السرير..خداه ورفعه..وصوب عليها..واطلق النار..
مرة..واتنين..وتلاته.. طلقات صابت مناطق متفرقه من جسدها ونهت حياتها..
هو ماارتاحش لين شاف الدم...
وخر عنها وقعد يمشي..لين وصل في رضا..
شاف قدامه رضا مقعمز مع مختار..الزوز يضحكوا عليه..
بنبره مخيفه كلها غضب وحقد وقال..
/موتوا ياكلاب..موتوا..
وصوب..وبدي يضرب في النار..
جسد رضا اخترقه الرصاص في كل مكان..
ولحق صابرين...
ايهم وين شاف الدم وقف..بدت الرؤيه تتشوش قدامه اكثر من قبل وحس روحه بيفقد الوعي..
طاح ع ركابه وشد في واحد من الكراسي..
وكان يسمع في صوت ضحك مختار وهو يقول بصوت يدوب طالع..
/موت..موت ياكلب موت...
🍃في هاللحظه خش عليه واحد من الرجاله اللي مستأجرهم..
شاف اللي صاير في الدار..
وخر ومشي طلع من الحوش..
وقف في الباب وشاف من بعيد لواحد واقف ورا شجرة..هزله راسه..
رد عليه لما رفع يده وحركها من الخلف للأمام..
بعد جاته هالاشارة كلم جماعته..وطول ركبوا السيارة وهربوا..
واللي واقف ورا الشجره..لف ومشي..قام تليفونه واتصل برقم محدد..
/كل شي تم زي ماتبي..
سمع صوت منبهات سيارات الشرطه وقال..
/الشرطه وصلت توا...
🍃حاط في وذنه سماعة البلوثوت وهو  واقف في الكوجينه..
ورا الرخامه..وفاتن قدامه..
مختار:اليك سيدتي طريقه تحضير مشروب..الروقاان..
ضحكت فاتن..
مختار:اول شي تاخدي الكاتل تعبيه طاسة ميه..
صب طاسه ميه في الكاتل ورفعه لمكانه المخصص وشغله وهو يقول..
/لازم تراجي الميه لين تغلي..
وقعد واقف يشوف للكاتل وهو يقول..
/ع فكرة تعلمك الصبر وفن الانتظار..
فاتن بضحكه؛حتى الانتظار عنده فن!
مختار وهو يشوف للمية في الكاتل..
/yes..ياحلو...كل شي في الحياة ليه فن..اشر ع الكاتل وهو يقول..اها..اها..هاه...صفق بأصابعه وهو يقول..
/غلت..خدي الكاتل وجي للطاسه ع الرخامه وهو يقول..
/لازم تكوني قبلها موتيه طاسه فيها ورق مليسا..صبي فوقها الميه..
وبدي يصب في الميه لين عبى الطاسه..
حط الكاتل ع جنب وخدي غطا حطه فوق الطاسه وقال..
/استني جو 5دقايق وبعدين اشربي..
فاتن بإيتسامه:احسن حاجه انك بدلت المشروب بحاجه فيها فايده..
مختار بشي من الضيق..
/لأن العصبيه وحرق الدم بيكبروني قبل عمري..اخترت نكون هادي ورايق مهما صار..
ناضت فاتن ومشتله..وقفت قدامه وخدت وشدتهم وهي تقول..
/كاتم في قلبك الزعل..
بملامح حزن قال..
/علاش تفكري فيا!؟..اني نبي ننسى..
فاتن؛اني مانبيكش تكتم في نفسك..
مختار:خليني كاتم في نفس احسن للكل..
شافت فاتن عيونه تعبوا دموع..
ضماته وهي تمسح ع ظهره..
وهو حط ع وجهه ع كتفها وبدي يبكي..
فاتن بألم؛حبيبي..
مختار ببكي..
/موجوع يافاتن..
زادت ضماته وهي تبكي بصمت معاه..
🍃خلاته يبكي ع راحته لين هدي..بعدين عطاته المليسا يشربها..
بعد شرب المليسا مشي للمكتب متاعه وطلب منها يقعد بروحه..
🍃في المكتب..
شغل المنظومه ع سينفونيه ضوء القمر لبيتهوفن ومشي قعمز ورا مكتبه..
اتصل بشخص ما وقعد يكلم فيه بسماعة البلوثوث..
/تمشي للمطار تجيبهم هني وتمشي طول..تاني يوم الصبح تجيني وقت الفطور..ok؟
"تم"
نهي المكالمه وحول السماعه حطها ع قدامه ع الطاوله واسترخى بجسمه ع الكرسي وغمض عيونه وراح في عالم السينفونيه...
🍃🍃🍃🍃
ويعدي النهار ويعقبه الليل..
هو كان في حديقة الفيلا ماشي جاي يستنى ومرته واقفه تشوفله..
انفتحت بوابة الفيلا..وجهوا انظارهم ليها..
وتخش سيارة من سيارته..درسها السواق قريبه عليه..بعدين نزل وفتح الباب الخلفي..
نزلت صفيه وهي مبتسمه مشتلها فاتن..
ومختار مشي للباب جهة سدره وفتحه..
ابتسم وهو يقول:حمد لله ع السلامه..
سدرة بإبتسامه:الله يسلمك..
قربله السواق كرسيها..
وهو قربلها ضمها وطلعها من السيارة وحطها ع الكرسي..
سلم عليها بالخد وهو يقول..
/شن جو..
سدرة:الحمد لله كل شي عال العال..
مختار بإبتسامه؛باهي الحمد لله..
جوهم صفيه وفاتن..
سلمت فاتن ع سدره بالأحضان ومختار صافح مرت عمه..
سدرة؛اهو دعوة ربي استجابها بسرعه ووليتي كنتنا..
ضحكوا..
فاتن بإبتسامه؛هو قالي كلام سدرة عليك شجعني..
شافتله سدره بإبتسامه وهو بادلها بعدين قال..
/خل نخشوا نحكوا داخل...
🍃وخشوا مع بعض للفيلا وهما يسألوا عن احوال بعض..
🍃🍃🍃🍃🍃
ووصل خبر مرواحة سدرة من السعوديه عن طريق يوسف للعيله..
"الحمد لله حالها متحسن هلبه وهما عطوها حاجات تستمر فترة معينه.."
بأصوات متقطعه قالوا..
"باهي..الحمد لله"
"خلاص اني توا بنسكر كلموا امي بعدين وزيدوا افهموا منها"
مطيرة:إن شاء الله..بالسلامه ولدي..
"في امان الله"
نهت مطيرة المكالمه وهي تقول..
/كان نلقى تروح توا ساد..
طوبى:غمضي عين وافتحي عين تلقي هالتلاته الشهور عدوا..
فردوس:يارب وهالحرب منتهيه ومترحيين..
طوبى:آمين..
اميمه:ع سيرة الحرب عيلة ابله هاديه كلهم جو لطرابلس..
مطيره:وكيف طلعوا وخشوا؟!
اميمه:قالوا جو من طريق آمنة..
طوبى؛يبولهم عزومه..
مطيره:صح..تو نكلم هاديه بعدين ونشوف الوضع..
سمعوا حمحمت الحاج علي..
وشويه وخش عليهم كانت ملامح وجهه متجهمه ماتبشرش بخير...
علي بأسف:عيال الشيخ جويده توفت..
بدت ع وجوهم ملامح الأسف والحزن..
واللي استرجعت واللي دعتلها بالرحمة..
مطيرة ودموعها ينزلوا..
/لحقت بنيتها..
طوبى بدموع؛الله يرحمهم ويغفرلهم..
انهارت اميمه بالبكي وين خطرت عليها عائشه..
🍃وفايزة وين سمعت الخبر كأنها سمعت بعائشه ماتت مرة تانيه..بكت بحرقه وألم وبكت بناتها معاها..
🍃واللي صار لمحمد المهدي لما سمع زي اللي صارله يوم  وفاة امه وعمه نضال قعد معاه يواسي فيه ويخفف عنه...
🍃زي ماقاعده سميره تواسي في سدرة اللي بكت بألم..برغم معاملة جدتها القاسية ليها لكن تقعد ام اغلى انسانه ع قلبها..
خبر موت عتيقه ام عائشه أثر في جيرانها كلهم..
حتى مغليه وخديجه تأثروا..
🍃بس نسرين اهل ربيع ماعطوهاش فرصه تحزن ع ام صاحبتها ومرت خوها..
اخت ربيع:مسكينه ماتت من حسرتها ع بنتها اللي ماشافتش نهار ابيض في حياتها..
ام ربيع:ياويلهم من ربي اللي كانوا السبب..
نسرين ودموعها ينزلوا قالت بعصبيه..
/حتى في وضع زي هدا تلقحوا!!
:شن حرك شعيرك انتي!؟
نسرين؛معنى كلامك واضح كويس..
ام ربيع:ايه الدوة علي ماليك لاتبلينا ولا كذبنا ماقعدلكمش كناين من بلاكم الاسود حتى اللي ليكم ماسلمت منكم..
نسرين:اني نبي نفهم حاجه وحده كان حني ماننفعوش هكي علاش تناسبوا فينا!.
:انغشينا زي ماانغشوا غيرنا ماعرفانكم كان لما ناسبناكم وياريتها ماصارت..
ناضت نسرين وهي تقول بنفاد صبر...
/تحملتكم بما فيه الكفايه لعند هني وخلاص..
ومشت طول لدارها..
ام ربيع بإزدراء:في ستين داهيه..
:ايه والله ان شاء الله معاد تولي..
🍃ولمت نسرين حوايجها وحوايج ولدها في شنطة صغيره
وطلعت من الحوش بدون ماتعطي علم لربيع اللي كان وقتها موجود في الفرع التاني للمطعم متاعه...
🍃🍃🍃🍃🍃
"مافي شي يام..هما في حالهم واني في حالي يام...علاش دسي علاش"
نسرين ببكي:مانبيش المشاكل..
مغليه؛وهاك جتيها المشاكل كان حكيتي من الاول راهو بوك خلا راجلك يديرلك حل..
بنبرة باكيه: اني سعدي طايح هو هدا..
سميره:ماتقوليش هكي المشاكل هادي تصير في كل حوش..
رفعت مغليه حاجبها وقالت..
/راجلك يندري!
رشفت وقالت؛لا..
سميره؛بري خشي داركم وكلميه ماتركبيش روحك الغلط..
هزت نسرين راسها وناضت وهي تقول..
/حداكم يحيى..ومشت طلعت من الصاله..
مغليه:لأمتى بتقعدي صحيحة وجه هكي..
ناضت سميرة ليحيى خداته وهي تقول..
/الهي ببنتك ووريها كيف تحل مشكلتها وفوتيني..
ومشت طلعت من الصاله..
مغليه هزت راسها بوعيد وهي تقول
/تو نلهى بيك..
🍃🍃🍃🍃
وخبرت ربيع نسرين باللي صار وهو روح متكدر فوق مشكلة مرته مع اماليه خبر وفاة الحاجه عتيقه..
🍃وصل لشارع القهوة ومشي طول لحوش الحاج جويده
كانوا كيف ناصبين الخيمه قدامه والمعزين بدوا يجوا...
🍃🍃🍃🍃🍃
15يوليو..سنة 2019
يوم الإثنين..
الساعه 9:30صباحا..
في حديقة فيلا مختار كانوا ملتمين ع الفطور هو عيلته..
وامينه تصبلهم في الشاهي وهي تحاول تخفي حالة القلق اللي عايشتها قلبها من امس مقبوض وحاسه بغمة...
وقفت ع فاتن تصبلها في الشاهي..
فاتن:ماتكتريش حبيبتي..
ويجي واحد من رجال مختار يوقف بعيد شويه وهو يقول..
/استاذ..
توجهت انظارهم ليه ومختار اشرله يجي..
هو قال:معليشي نبيك بروحك..
امينه زاد احساس امينه بالخوف..
غيرت نظرها لمختار شافت ع وجهه ملامح القلق..
ناض ومشاله..
تباعدوا عنهم شويه وهما يشوفولهم بقلق..
سدرة:إن شاء الله خير..
امينه بخوف؛يارب..
ركزت فاتن ع ملامح مختار اللي بانت فيهم الصدمه..
لحقت بعيونها الراجل اللي مشي بعدين ردتهم لمختار اللي كان جاي ناحيتهم وملامح وجهه ماتتفسرش..
وصل فيهم وقعمز ع الكرسي بهدة وهو يمرر في نظرات عدم الاستيعاب حواليه..
سدره بقلق بالغ..
/خيرك مختار شن سمعت!؟
مسح بيده ع وجهه وهو يقول..
/هدا اللي كنت خايف منه..هدا اللي حسبت حسابه!؟
فاتن بخوف:تكلم شن في!؟
غمض عيونه وهو يقول..
/لقوا صابرين ورضا في اسبانيا..مقتولين..
حطت فاتن ع فمها بصدمه..
وبعدها يسمعوا صوت تكسر ابريق الشاهي الفخار اللي طاح م ن يد امينه..
بنبرة مرتجفه قالت..
/مين اللي قتلهم..مين!!!؟
مختار بألم..
/الكلب..ايهم..
وناض مشي من حداهم..
امينه وهي ترجف..
/لا ياربي! لا..ازاي..ازاي قتلهم!
ناضتلها فاتن وهي تبكي وخدتها في حضنها..
بعدتها امينه وهي شادتها تقول..
/قلتلهم بلاش! ماتعملوش كدا!..بلاش..ماسمعوش كلامي..وانفعلت بقوة وهي تقول..ليه!! عملوا لده كلوا ليه ياست فاتن!! ملعون ابو الحب وسنينه..ده اللي نابهم من الحب...غمضت عيونها وقالت بألم..ااه ياربي..ياعيني عليكم ياحبايبي ياعيني عليكم عشتوا طول عمركم محرومين من الحب ولما لقتيوه خلص عمركم وانتم بتهربوا بيه..ااه..
ضمتها فاتن بقوة وقعدوا الزوز يبكوا بالعبره..
وصفيه وسدرة اللي ماكانوا فاهمين شي اثر فيهم حال امينه  اللي كانت كأنها تبكي ع ضناها...
🍃🍃🍃🍃🍃
وسافر مختار لإسبانيا...
اول ماوصل غادي طول توجه للمستشفى اللي كانوا فيها جثث رضا وصابرين كانت متحفظه عليهم الشرطه الاسبانيه لعرضهم ع الطب الشرعي...
🍃هالنهايه..
ماكانتش نهاية رضا وصابرين بس..كانت نهاية حتى ايهم وهو ع قيد الحياة..
جريمه قتل شخصين..
وتعاطي المخدرات..
واغتصاب..
برغم انه حاول يدافع عن نفسه ويشرح للشرطه اللي صار معاه..لكن في كل العالم القانون ياخد بالأدله الماديه الدامغه وايهم كل شي ضده وموقفه كان ضعيف للغايه..
اللي داره وصل لأخته اللي انهارت تماما وراجل اخته اللي حتقعد فضيحة نسيبه لاحقاته وحترجع عليه بالضرر بالذات وان ايهم كان شاغل منصب مهم ساعده هلبه في مسيرته المهنيه...
🍃🍃🍃🍃🍃
في احد الفنادق في العاصمة الاسبانيه..
مقعمز يشرب في المليسه وواحد من رجاله واقف عليه يعطي فيه معلومات..
:وصلناله حتى هو وجماعتنا غادي داروا معاه اللازم نبيك تطمن من اليوم وبرا غادي اي حد يسألهم عليك حيسمعوه موشحات مدح وتمجيد..
مختار بإبتسامه..
/اقجم..تعجبني فيك البساطه اللي تبان ع مظهرك..يعني اللي يشوفك يقول هدا دوريش وعقله ع قده وانت في الحقيقه ثعبان..
بضحكه قال..
/شهادة نعتز بيها..
ضحك مختار بعدين قال..
/اللي صار قدامك كله درس لازم تتعلم منه..
:من غير ماتوصي وبعدين حني بن عمين..
مختار:وهدا اللي خلاني نقربك..والاهم من هدا كله انك مش خالي..
بإبتسامة خجوله قال..
/ايه والله يااستاذ وان شاء الله قريب نعرس..
مختار:عرسك من بابه لمحرابه عليا اني.
:بارك الله فيك عليتنا حني في عراسنا ديما واقفين لبعض.
مختار؛تمام كان احتجت بعدين مايحشمك شي..
بضحكه قال..
/بارك الله فيك..
مختار؛اقجم..خلينا في الجد..
:نسمع فيك..
تنهد وقال:اكيد تعرف القوانين كويس لكن مافيش باس لو سمعتها مني مرة تانيه اكيد حتستوعبها اكثر من قبل..
🍃وعدد مختار قوانينه لمساعده الجديد وكان اكثر حزما وصرامه وهو يتكلم وفي طيات كلامه تهديد..
وصل للأقجم اللي مابين السطور من كلام مختار وفهم عليه كويس..وهو اساسا كشخصيه وحسب الطبيعه متاعه شخص وفي جدا جدا لايمكن يخون ولو ع قطع رقبته...
🍃🍃🍃🍃🍃
"لالاتزوجوا وهربوا واللي كان خاطبها قعد وراهم لين لقاهم وقتلهم"
مطيره بألم؛لاحول ولاقوة الا بالله ..
فردوس؛استغفر الله تو الواحد شن بيقول الله يرحمهم وخلاص..
"سبحانه ربك مايخلي شي اللهم لاشماته لكن نبيها لأختها اكثر منها"
مطيره:الله ينتقم منها شر انتقام..
"آمين..طوبى وين؟'
مطيره:روحنا من العزي من هني ركبت لدار الخزين من هني عندها رسمه ترسم فيها بتخش بيها في معرض..
"ولت ترسم مرة تانيه!؟ وخيتي سلمها"
🌼وطوبى واقفه قدام لوحتها تتفرج عليها بعد ماكملتها..
طوبى:يارب توصل فكرتها والاهم  تخليها ماتشبهش هديكا يارب..
خدت نفس بعدين غطتها وخدت تليفونها من ع الطاوله واتصلت بنفيسه..
🍃🍃🍃🍃🍃
16يوليو...سنة 2019..
دار مختار الاجراءات اللازمه بس ينقل جثامين رضا وصابرين للجزائر ويندفنوا حدا بعض في مدينة أم رضا..
وتم نقلهم للجزائر  صبيحة يوم 17من يوليو...
حتى هو سافر للجزائر ولحقوه فاتن وأمينه غادي..
🍃🍃🍃
حالة ام رضا لما شافاته في الثابوت يرثى لها..ناحت ندبت بكت عليها بقهرة وحسرة..
بس امينه كانتش عندها القدره اللي تخليها تشوفهم لأخر مرة هي وين شافت الثوابيت بس قلبها تفتت حسرة وحزن عليهم...
وفاتن وهي تشوف ف المشيعين كيف رافعين ثوابيتهم جنب بعض..تفكرت الجمله اللي كانوا يكرروا فيها لما قرروا يتحدوا كل شي ويكونوا لبعض..
"يانعيشوا مع بعض يانموتوا بعض"
🍃🍃🍃
دفنوهم..والجمع الغفير من الناس اللي حضرت الجنازة فض
وقعد مختار بروحه واقف ع قبورهم...
🍃مختار:عطيتك بدل الفرصه تنين وتلاته اختبرت اخلاصك وفي نفس الوقت حاولت نساعدك بش تنجح في الاختبار..درت معاك اللي مادرتاش مع أي حد حاول يخوني قبلك..لكن انت شن درت..بعتني..بعتني ع خاطر وحده ماتسوى شي..لكن شوف مع هدا اني شن درت..خليتك تعيش معاها يومين حلوين..ونفدتلك رغبتك وخليتهم يدفنوك في المكان اللي ساكنه فيه امك..مش انت كنت تقول ماقدرتش نكون معاها في الحياة خليني قريب عليها لما نموت درت ماتبي وزياده ودفنت معاك المراة اللي تحبها واللي عمرها ماكانت تستاهل ظفرك..ااخ يارضا ااخ..ياخسارتك..
لبس نظاراته الشمسيه وهو يلقي في اخر نظرة ع قبره..بعدين طبس وحط عليه باقة زهور اوركيد ومشي...

...يتبع....