#طوبى "جنة طوبى"
#جمان_فريد
#الجزء_الحادي_والتسعين"نهوض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#القرآن_المجيد
ثمُ إن القرآن أعظمُ مارُتّبت به بعْـثرة الأرواح وأجل ما هُذّب به شَعث السرائر وأنقى ما جُمع به شتات القُلوب فالزموه في الشدة والرخاء..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"إنّما الأخُ لأُخيه وأخته.. ظِلٌ وسكينةٌ وسنَدٌ
اهكذا انت ...!؟🍃
________________________________________
"الحمد لله ياربي الحمد لله"
هادي نجمه تكلم في بنتها عواطف هاتفيا..
"لكن لازم تقعد نهارين تانيات في العياده لين يولي حالها باهي"
نجمه:ايه ايه هكي خير..
"روح اشرف؟"
نجمه:لالتوا ماروحش..
"باهي..بعدين شويه مروحه..بالسلامه توا"
نجمه؛بالسلامه..
سكرت نجمه وهي تقول..
/الحمد لله اللي عدت ع خير الحمد لله..
🍃وفي العياده..
كانوا فايزة ومروة ونجاه حوالين صفاء وهي راقده ع السرير بعد مااسعفوها وانقدوا جنين اللي نجي من الاجهاض بفضل الله...
فايزة:فرفاشه شويه بالذات كان تبي تلحق دير حاجه قبل ليفوت وقتها..
عواطف؛لازم تحافظ ع روحها وتركز شويه ملاحظتها تتصرف وكأنها مش حامل..
فايزة؛عندك حق..
ومروة واقفه ع اختها وهي شاده في يدها وتسمع في حديثهم..
عواطف:قعمزي فايزة وجهك اصفر..
قدمت فايزة للكرسي وقعمزت..
مروة شافتلها وقالت..
/نجيبلك حاجه تشربيها..
عواطف:ايه بري شوفي عصير ولاحاجه..
فايزة:خودي فلوس من الشنطه..
مروة؛حاضر..طلقت يد اختها ومشت خدت شنطة امها طلعت منها فلوس وحطتهم في جيب بالطوها..حولت الستار الفاصل وطلعت ورجعت رداته..وطلعت من الحجرة اللي كان فيها حالات تانيه...
🍃مشت وهي دور في ممرضه تسألها عن مكان الكافتيريا لين لقت وحده سألتها ودلتها عليها..
وطول توجهتلها..
وصلت فيها وخشت..خدت عصائر وكيكات وطلعت..
وهي طالعه جاها اتصال..
طلعت التليفون من جيب البالطو شافت المتصل ردت طول..
مروة؛ايوه طوبى..
"هاه مروة طمنينا شن صار في اختك امك نتصلوا بيها ماتردش"
مروة:شكله تليفونها صامت..المهم صفاء حالها باهي والحمد لله العيل ماصارله شي..
"الحمد لله رب العالمين..باهي توا بتروحوا بيها ولاكيف!؟"
مروة:لاقالوا لازم تقعدوا تلاته ايام..
"باهي المهم مافيش خطر عليهم والباقي كله عادي"
مروة؛لاالحمد لله مافيش خطر..
توقف في مكانها لما تسمع صوت كان قبل يعجب فيها بس توا عندها اكره الاصوات اللي سمعتها في حياتها..
وجهت نظرها القدام شافاته واقف يتكلم بالتليفون..
هالمرة لافي طاقيه ولانظارات..هو نفسه..نفس المجرم اللي كانت بسببه حتجني ع روحها..
مروة توا معاش تحس اتجاهه غير بالكره الشديد..بغيض بشكل لايوصف في نظرها..
"مروة..معاي!؟"
مروة وهي بنظراتها الحاده ع مالك..
/ايه...
"شن اسمها العياده "
مروة:عياده الحكمة تو تعطيكم امي النعته متاعها..
"حداك هي!؟"
مروة؛لا اني كنت في الكافتيريا جبت منها حاجات..
"اه..تمام نخليك توا اول ماتوصلي في امك خليها تكلمني"
مروة؛حاضر..سلام..
"وعليك السلام"
نهت مروة المكالمه ولما جت بترد التليفون لجيبها..
مالك نهي مكالمته وشاف ناحيتها بنظرة عابره.. فيسه تحولت لنظرة مفاجأة...
هي مشت كملت طريقها بدون ماتعرف انه شافها..
وهو طول لحقها..
"مروة"..
غمضت عيونها بغضب وفتحتهم وسرعت خطواتها..
مالك؛لاباس مروة علاش انتي هني!..
لارد ومازال تمشي بسرعه وعصبيه ..
هو قعد يمشي وراها من سكات..لين وصل لقسم النساء وقف في مكانه وهي كملت طريقها..
تنهد بضيق بعدين لف ومشي للإستعلامات بش يستفسر منهم..
🍃🍃
مروة؛ماما يتصلوا بيك خالاتي..
فايزة؛تليفوني نسيته ع المدخل..
جتها طلعت تليفونها ومدتهولها وهي تقول..
/هاك كلمني طوبى..
خدت فايزة التليفون..
ومروة جت لعواطف عطتها عصير وكيكه..
عواطف:لابنتي ماخاطريش صحيتي..
مروة:اشربي العصير حتى انتي مفجوعه..
خدت منها العصير بس وهي تقول..
/صحيتي..
وقعدت مروة واقفه تراجي في امها تنهي مكالمتها مع طوبى.
وفي نفس الوقت قاعده ترجف من الغضب..
🍃🍃🍃🍃🍃
وتعدي الساعات..
ويجي وقت الزيارة...
جوا طوبى وفردوس لزيارة صفاء..
وهما خاشين..
شافتوا مناسك ومالك ومع وحده تانيه من خواتهم واقفين ويبانوا يتناقشوا..استغربوا....
كملت طريقها لقسم النساء لين وصلوا في الحجره اللي قاعده فيها صفاء..
كانت صفاء فايقه..وحواليها امها واختها وسلفتها سميره..
سلموا عليهم..وتحمدوا لصفاء بالسلامه..هدرزوا شويه بعدين قالت فردوس..
/تهيألي تلامحت صاحبة مروة وخوها وحني خاشين..
مروة وجهها انقلب..وصفاء وطوبى شافولها..
فايزة بإستغراب:جايين!؟
فردوس؛مش عارفه بس صاحبة مروة تبان باكيه..ريتهم طوبى ولا!؟
طوبى وهي تشوف لمروة..
/إيه وكانت في معاهم وحده تبان شبههم..
فايزة بقلق:ان شاء الله مش فوزيه مسكينه عندها الربو..شافت لبنتها وقالت..مروة كلمي صاحبتك شوفيها..
طوبى:كان عندها الربو اكيد في قسم الصدريه..نمشولها وخلاص..
فايزة:ايه عندك حق..هي تعالي مروة..
مروة شافت لطوبى..
طوبى شافتلها بنظره وكأنها تقوللها..
"تعالي وخلاص"
استلسمت بغضب ومشت طلعت معاهم...
وصفاء معاها بعيونها وكل ماله شكها ان في مشكله كبيره صايره مع اختها تخص مالك يزيد..
🍃🍃🍃🍃
تمشي وراهم وهي تجر في رجليها جر..
سألوا عن قسم الصدريه..دلوهم..وتوجهوله...
وين قربوا يوصلوا..
قابلهم مالك واقف ع واحد من خوته..فاتوا من جنبهم هو شافهم...
مالك وعيونه ع مروة:شويه وجاي..
ومشي لحقهم...
"خالتي فايزة"
بدت ع وجه مروة ملامح الازدراء..
وقفت فايزة..
وطوبى خدت مروة وتباعدوا..هو لحقهم بعيونه بعدين رجع بنظرها لفايزة وقال..
/كيف حالك خالتي..
فايزة:الحمد لله ولدي..لاباس ع امك خيرها..
مالك؛والله قريب راحت فيها غير ربي لطف..
فايزة بفزع؛خيرها جتها بردة ولاشني!؟
مالك بضيق؛مخلطه..جايتها برده وهامله الدوا وصارت مشكله هكي..
فايزة؛لاحول ولاقوة الا بالله...باهي شن حالها توا..
مالك:وضعها مستقر قاعده بالاكسجين..
فايزة؛نقدر نشوفها عادي..
مالك؛ايه عادي..خشيلها خواتي داخل..
اشر ع الحجره وعيونه ع مروة وطوبى مركزة عليه..
/الحجره هديكا..
فايزة هزت راسها وقالت..
/باهي..
ومشت للحجره وطوبى ومروة مشوا معاها..
ومالك معاهم بعيونه لين خشوا..بعدين ابتسم..
ابتسامة أمل..تأمل لما عرف ان مروة ماحكتش لأمها وبهكي مش حتنقطع العلاقه بين العيلتين وممكن القدام تلين مروة ويتغير موقفها خصوصا انه عارفها تكنله مشاعر..
🍃مسكين مش عارف انها بعد ماعرفت من يكون اصبح عندها هو والشيطان سوا..ومن يطيق يشوف الشيطان! 🍃
☘☘☘
لما خشوا للحجرة ..
شافوا كيف ربيبات فوزيه محاوطاتها وفي عيونهم حب كبير وخوف عليها..
طوبى وين شافت حالتهم هادي..كبرت في عينها فوزيه وحست انها مراة تحمل في قلبها حنان فياض وطيبة نادرة...
بس القسوه اللي تشوف فيها مناسك في عيون مروة منعتها من انها تجيها وتكلمها قعدت شاده مكانها وخواتها لاحظوا واستغربوا..
🍃هدرزت فايزة عليهم شويه بعدين طلعوا...
☘طوبى؛حلوة علاقتهم بمرت بوهم..
فايزة؛امهم فوزيه مش مرت بوهم..امهم هي اللي يعاملوا فيها ع انها مرت بوهم....
طوبى؛مانستغربش..يقولوا الام اللي تربي مش اللي تجيب..الام اللي تتخلى عن صغارها وهما بأمس الحاجه ليها ماينقالش عليها ام اصلا..
فايزة:صدقتي..بس مهما كان يقعد عندها حق عليهم..
طوبى؛حق الله بس..اما حقها هي تخلت عنه من لما خلتهم...
تنهدت فايزة وهزت راسها موافقة لكلامها..
ومروة تمشي معاهم وهي مش طايقه تسمع سيرة اي حد يخص مالك...
🍃🍃🍃🍃🍃
"شن رايك ؟"
اريج:الحق كله حلو لكن..
"قولي اللي في خاطرك اللي مش عاجبك نغيره"
اريج:لاهو كله عاجبني بس في حاجه هكي نبيها تكون في الحوش خايفه نقولك عليها تقول شن المتخلفه اللي طحت فيها هادي..
ضحك وقال..
"لامانقولش هكي..قولي شن تبي؟!"
اريج:امم..نبي دار فيها شاشة كبيره نتفرجوا ع الافلام فيها و..نلعبوا بلاستيشن..
وتسمع صوت ضحكته...كان يضحك من جده..
اريج بضحكه:نشوف فيهم في المسلسلات محلاهم وفيهم جو...
هدا ضحك وقال..
"خلاص زي ماتبي"
اريج بفرح:بجديات!
"عجبتني الفكرة"
اريج بإبتسامه:حلو..
"مني!؟"
اريج بارتباك؛شني!؟
"مني الحلو"
ضحكت بدون ماتعلق..
"خلاص خلاص مش توا مش وقته"
اريج بضحكه:في شي تاني تبي تاخد رايي فيه..
"لاخلاص هدا بس"
اريج؛تمام..سلام توا..
تنهد وقال..
"وعليكم السلام"
نهت اريج المكالمه وهي تشوف للتليفون..
بدت ع وجهها ابتسامه ألم...هي مرتاحه مع اسكندر ومش حاسه معاه بفرق العمر...لكن قلبها ماباش يتحركله لتوا..
هو اصلا ماباش يفضى..ماباش يطلع اللي ساكن فيه منه..
لهدا قاعده تحاول بكل جهدها تتجاهل قلبها وتعطي فرصة لإسكندر..تتعرف عليه وتكتشفه وتبني معاه علاقة صداقه بعد الزواج..لعل وعسى المشاعر تتغير والقلب يرضى بالنصيب...
🍃🍃🍃🍃🍃
ويروح اشرف للحوش..
كان مروح بشوق كبير وفرحة اكبر بحمل صفاء..من لما خبراته بيه وهو يعد في الايام بش يروح..
☘وين خش للحوش مشي بإتجاه الصالون وهو ينادي في امه...
وصل فيه وخش مالقي حد غير راما..
ناضتله وهي تقول بإبتسامه..
/حمد لله ع السلامه..
هو رد بإبتسامه...
/الله يسلمك..
وسلموا ع بعض بالخد بعدين هو قال..
/خيره الحوش تقول فاضي!؟
راما:ايه مافي حد..كلهم عند صفاء في العياده..
هو بفجعة:كيف!؟؟؟
راما:اللي فهمته من حناي ان صفاء زلقت في الكوجينه لما كانت عمتي عواطف تسيق فيها..
اشرف من الغضب والخوف خبط بيده ع قفص الباب بعدين قال..
/وقت تسييق هو!!؟
راما:هما قالوا توا كويسه مافيها شي عمو..
اشرف:ماتعرفيش في اما عياده..
راما:لا الحق مانعرفش أسأل جدو..
خبط بيده فقص الباب مرة تانيه وقال..
/توقعتها قلبي ماكانش مستريح..
راما:قصدك ع عمتي عواطف!؟
شافلها وهو ساكت وعيونه فيهم خوف وغضب وتساؤل في نفس الوقت..
راما:مش عارفه..لكن هي تبان ماتحبهاش..
هز اشرف راسه ومشي طول من قدامها..
ابتسمت راما مكرا بعدين ولت قعمزت في مكانها..
شويه وجاها اتصال..
خدت التليفون من جنبها لما المتصل ردت طول..
/سوما شن جو..
"شن جوك انتي ياكلبه "
راما بضحكه؛خيرك!
"ياحيوانه شن اللي وصلني من البنات هدا حقه العيل هداكا صاحب الجربه بنت المزينه؟!"
راما:ايه ريتي بالله.!
"لبعضهم من غادي..اسمعي ريمو عندك رقمها الجربه هادي؟"
راما؛لاماعنديش لكن نجيبه عادي مش حاجه صعبه..
"مليح بكل لما تحصليه ابعتيهولي طول عند كلمات في خاطري نبي نعطيهولها في جنابها"
راما بإبتسامه مكر...
/في اقرب وقت يكون عندك سوما..
🍃🍃🍃🍃🍃
"ماتقدرش تخش الحجرة اللي فيها معبيه نساوين"
اشرف بنرفزة:وعلاش ماحطوهاش في دار بروحها!
عبد الفتاح؛هدا اللي صار توا..المهم حالها باهي والعيل ماصارله شي..
اشرف؛قريب راح ياعبد الفتاح قريب راح وفي جرة مني..!
ع جية عواطف عرفت انه في العياده وهي اللي طوعت تشرحله وضع مرته واللي صار..
بس سمعت اللي خلاها تنصدم صدمة كبيره في خوها الصغير.
عبد الفتاح:شن قصدك!؟
اشرف:المراة زلقت طاحت في الكوجينه اللي اختك هديكا كانت تسيق فيها..
عبد الفتاح؛شن تقول انت تعوذ من الشيطان عواطف صح عصبيه شويه لكن ماديرش هكي..
اشرف:لا ديرها ونص بالذات بعد اللي صار فيها تعقدت ونفسيتها ولت احرف من قبل..
عبد الفتاح حرك راسه بالنفي وقال..
/مستحيل..معاش تعاودها الدوة عادي..
"بارك الله فيك"..
الزوز شافوا يمينهم..لقوها واقفه تشوف لأشرف بصدمه وعيونها مدمعات..
/بارك الله فيك ياخوي..
ومشت بسرعه فاتت من حداهم وعبد الفتاح لحقها طول..
اشرف بعصبيه؛ماقلت الا الحق تحسابني مانفهمش في الجو اللي دير فيه..
🍃وعواطف اللي زاد ع قلبها جرح جديد..
طلعت من العياده وهي تبكي وخوها الكبير وراها..
حاول يهديها ويبرر كلام اشرف لكن عواطف رفضت تسمع منه وخلاته يروح بيها..
🍃وانتهي موعد الزياره..
وماقعد مع صفاء حد غير امها واختها واشرف اللي كان مقعمز في سيارته برا العياده..
فايزة؛مش كان روحتي ياماما خير..!
مروة؛لامانخليكش بروحك..وبعدين توا بيطلعوها لحجرة بروحها تسدنا..
فايزة؛لكن كلفتي ع رجل اختك..
مروة:مش خسارة فيا حتى اني اخت الحب..
صفاء فنصت فيها..
ومروة تضحك..
فايزة بضحكه؛جعانه..
صفاء:وخيركم ماوصيتوا اشرف يجيبلكم عشي!؟
مروة:قلتلها هي تحشمت..
صفاء:منك جد ماما! هدا ولدك راهو!؟
مروة؛كلميه انتي صفو..
فايزة خدت شنطتها وطلعت منها فلوس مدتهم لمروة وقالت..
/انزلي عطيهوله وقوليله امي حلفت تاخدهم..
صفاء بضحكه؛وااك ياماما..
خدت مروة الفلوس وهي تضحك وقالت..
/باهي تو نقوله..وغمزت لصفاء..
فايزة؛والله تعطيهوله باهي!..
مروة بضحكه؛علاش يافزفز قطع الارزاق..
صفاء بضحكه؛بري من غير كترة دوة..
مروة:باهي كلميه بش يعرف اني جاياته..
صفاء:باهي غير بري بس..
مروة حطت الفلوس في جيب البالطو ومشت طلعت من الحجرة..
فايزة:في حاجه صايره بين اختك ومناسك؟
صفاء؛لاحظت لكن والله مانعرف شن في وهي تسأليها تقول مافي شي..
فايزة؛كتومه هلبه اختك هادي ديما تخلي فيا نخمم..
صفاء:عادي ياماما وين الصاحبات اللي مايتعاركوش !؟
فايزة بضيق:تبي الصراحه اني مانبيش نخسر العيله بالذات مالك وليد ماشاء الله عليه وباين عليه عاجباته اختك..
صفاء؛قصدك حتى مروة تبيها تتزوج بكري!..
فايزة:علاش انتي نادمه!؟
صفاء بضيق؛بالعكس..لكن نحس في مروة ماتبيش ياماما ماتجبريهاش ارجوك..
فايزة تنهدت وقالت..
/خليها ع النصيب وخلاص..
🍃🍃
ومروة ماشيه بطريقها لمدخل العياده..
وين قربت منه يجي معين خاش..
هالمرة ماتصادموش..هو قعد واقف يشوفلها بإمتعاض..
وهي تشوفله بآستغراب..
وخر ع جنب ومد يده للباب..بمعني تفضلي..
هي عطاته نظره حاده من فوق لتحت ومشت طلعت..
نزل يده وهو يشوفلها بتعجب بعدين قالت..
/الشبحات هادي ليا اني!؟...وجي بيلحقها...
"معين"
التفت وشاف مالك جاي ناحيته عقد حواجبه ومشاله..
سلموا ع بعض وسأله عن حال امه..بعدين مشوا طلعوا مع بعض يقعمزوا برا...
🍃مروة بضحكه:حلفت عليهم..
اشرف:ربي يهديها وخلاص..اني بناخدهم منك بش ماتحنثش ولما نردهولك..
ابتسمت مروة وقالت..
/تمام...ولفت ومشت بإتجاه باب العياده..
واشرف ركب سيارته وتحرك وطلع من العياده..
🍃🍃🍃
ع كرسي رخام طويل قدام العياده..
مالك؛امي ديما هكي تحمل في روحها ذنب شي مادارتاش ديما في بالها ان هي اللي دارت حاجز بينا وبين هديكا المراة..وشوف توا مشتلها لحوشها بش تتفاهم معاها بالعقل مدت يدها عليها..
معين؛ربي يهديها حتى هي خالتي فوزيه معقوله تمشيلها وهي عارفتها تكرهها في الدم..
مالك؛امي طيبه لين مفسده يامعين..تنهد بعدين شاف لباب العياده..لقي مروة كيف خاشه..
طول ناض ومشي لحقها..معين استغرب وناض لحقه وهو يقول..
/خيرك!..
مالك؛شويه بس..
وخش للعياده ومعين معاه..
معين:فهمني شن جاك!؟
مالك؛صبر يامعين..
سكت معين وهو يشوف لصاحبه بعدم فهم..
خشوا للممر شبه فاضي..
سرع مالك خطواته..معين شاف القدام..
لقي بنت لابسه بالطو لونه خمري ووشاح اسود تمشي قدامهم بمسافه..
بعدين شاف صاحبه سابقها وواقف قدامها..
مروة بفجعه؛حول ياحقير..
مالك؛اوكي اني حقير غير بس عطيني فرصه واسمعيني..
مروة بغضب؛اني مش طايقه نشوفك تبيني نسمعك!..
ولفت بتمشي مالك سبقها وقف قدامها وقال..
/عارف اللي درته غلط ماينغفرش والله عارف..بس صدقيني درت المستحيل بش نصلحه..وصدقيني ماكنتش نعرف انك حولتي لمدرسة اختي ولااختي تعرف كله صدفه شي ربي مقدره..
معين ماكانتش باينه عليه مروة كان واقف بعيد شويه ويشوف ناحيتهم وشبه عرف من تكون بالنسبه لمالك..
مروة بغضب؛شن ماتقول مايعنيني في شي انت ولااختك ولااي حد يعرفك مسحتهم من حياتي مسح..اللي درته فيا كرهني في نفسي كرهني في حياتي عيشني اني وامي وخواتي ايام سود اني عمري ماكرهت حد زي ما كرهتك انت والحقيرات اللي كانوا معاك..انت اصلا باللي درته مهما حاولت تصلح تقعد واحد بلانخوه ومانبيش نقول اكثر من هكي..بإختصار لايمكن نشوفلك بإحترام ولايمكن نسامحك لو تموت قدامي..برا لأمثالك اسما واللي زيها هادوا اللي يليقوا بيك...
ومشت وخلاته..
بانت على معين..لما شافها تفاجئ هلبه..لكن لما غير نظره عنها وشاف نظرات الالم اللي يشوفلها بيهم صاحبه عصب ع الأخر..
غير نظره ليها وين جت فايته من قدامه وقال بغضب.
/طز فيك وفي عشره زيك..تحسابي روحك حاجه كبيره..
جاه مالك يجري شد ذراعه وقاله بغضب..
/معين..
معين بعصبيه؛من هي هادي اللي ذل في روحك ليها..راك هلبه عليها.....
مالك جبد ذراعه قريب خلعها وهو يقول :معين!
مروة وهي ماشيه كانت تسمع في كلام معين بدون اهتمام..
لعند ماسمعت الجمله الاخيره..
جتها جرأة عجيبه خلتها لفت وولتله..
وقفت قدامه وقالت بحده..
/كان ترضى لأختك اللي داره فيا عطيهاله..
ولفت ومشت بسرعه وهي خايفه....
وخلت عقل معين يوقف عن التفكير..
شاف لصاحبه وقال..
/شن قصدها!..
مالك هرب بعيونه عن صاحبه وهو محرج منه..
عقد معين حواجبه وقال..
/حسيت انك مدرق حاجه !؟ قول شن داير للبنت..!؟
🍃ومروة تمشي بسرعه وهي مش عارفه وين ماشيه من الخوف والحزن...
الموقف اللي كانت فيه يوجع..وزاد حسسها بالنقص..
وخلاها ترجع تقول لو كان في وراي رجاله ماصارش فيا هذا كله..!
🍃🍃🍃🍃🍃
مركز بنظره في صاحبه وهو يشوفله بصدمه..مش مستوعب اللي سمعه..
وصاحبه منزل نظره للأسفل وهو محرج ومضايق وكاره نفسه..
رفع معين حواجبه ونزلهم بعدين تنهد وقال بعدم استيعاب..
/قصدي..اني مش مصدق انت دير حاجه زي هادي!لاوفي جرة مني..في جرة وحده تافهه زي اسما كنت تفوت بيها في الوقت..تمام اني مش حندير روحي نبي ولاصحابي..وياما غلطت في حياتي لكن ياصاحبي ماتوصلش بيا لهني!! وع مانعرف حني صحاب عمر ونعرفك كويس..! غمض عيونه بعدم استيعاب بعدين فتحهم وقال...بجديات بجديات دماغي وقف..ومش قادر نصدق...
مالك يسمع بس مش قادر يرد حتى بالنظر عارف ان اللي داره مع مروة يحط من قدره كراجل قبل اي شي..وهدا اللي كانت تبي تقوله مروة...
معين مسح ع لحيته وقال..
/خلاص فوتها البنت..
وطبطب ع كتفه ومشي خلاه وهو مازال مش مستوعب اللي سمعه منه..
اما مالك فكان مضايق هلبه..محبط هلبه..وكاره نفسه لدرجة تمنى فيها الموت...
🍃🍃🍃
هدت مروة شويه..ومسحت دموعها..بعدين ولت من جديد للحجرة اللي فيها اختها لقتها هي وامها مش موجودات عرفت انهم نقولها لحجرة بروحها..
طلعت برا وسألت الاستعلامات متاع القسم علي مكانها..
ومشت وحده من الموظفات معاها وصلتها للحجرة...
🍃🍃🍃🍃
"وهادوا المفاتيح ومبارك عليك"
خدي عبد القيوم المفاتيح وهو مبتسم يقول..
/الله يبارك فيك..
عيسى:توا اني بنتسقد ياغالي وراي طريق ماتبي شي؟
عبد القيوم:سلامتك بس..
عيسى:هي السلام عليكم..
ومشي عيسى وعبد القيوم معاه بعيونه شافه ركب سيارته بعدين تحرك طول وطلع من المزرعه..
المزرعه اللي كانت وكأنها قطعه من الجنه بكل شي فيها..اليوم ولت ملك عبد القيوم بعد ماشراها من صاحبه..
ماكانتش في باله الفكره قبل لصفية بنت عمته تحطها في راسه..
🔺️🔺️🔺️في وقت سابق🔺️🔺️🔺️
سليمه؛مهتمين بيها واجد ماشاء الله..
عبد القيوم؛عيسى يحب الاهتمام بأي شي ليه علاقه بالزراعه..كان تحقي جنان حوشه المنظر فيه يخطف القلب..
صفيه بصوت منخفض..
/حتى ام العيون الحايرة تحب المناظر هذي ومتسهفه تجي هنا..شافت لأمها وقالت..تعالي يما نعدوا للمشتل..
وخدت امها ومشت هي وياها بعد ماخلت قلبه في حاله..
اول مرة يعرف عن رغبة حبيبة قلبه في شي معين..وهو توا يبي يلبي هالرغبه بأي شكل...
وبعد تفكير دام يوم كامل خلاه يسافر بأحلامه بعيد...قرر يشري المزرعه بكبرها...
🔺️🔺️🔺️الوقت الحاضر🔺️🔺️🔺️
تنهد بإبتسامه..بعدين التفت للحوش..نظراته ليه اللي كان تلمع حب خلاته يتخيل ان هالمكان في يوم ما حيجمعه بيها..
من وسط قلبه طلعت في هاللحظه كلمة وحده بس..
"يارب"..
ومن غير يقدر يجمعهم..زي مالايم قلوبهم ع بعض...
ماهي قلوب متشابهه وان اختلفت اطباع صحابها...
🍃🍃🍃🍃🍃🍃
وهي في هالوقت كانت توكل في بنتها اللي كانت مقعزة في حجر تاله مهروس التفاح...
تاله:ماكنتش خايفه تصير للبيبي حاجه لأن ربي استجاب لدعائي خلاص مستحيل يصيرله شي..
طوبى بضحكه وقالت..
/صح انتي دعيتي في يوم عرفه يجيكم بيبي تعرفي راحت ع بالي القصه هادي..
تاله؛اني مانسيتش بكل والحمد لله ربي عطاني مانبي..بس توا خاطري في حاجة تانيه..
طوبى؛شن هي؟
تاله؛قطوسه..زي اللي عند سدرة كان تشوفيها جابت قطاطيس صغار..
طوبى بإبتسامه حزن؛هادي هريره بنت بينكا قطوستي اللي ماتت..
تاله:عندك غيرها؟
طوبى؛ايه لكن ما ماربيتش عليهم كبد زي مايقولوا مرات يريحوا ولايموتوا واني مش نتحمل..
تاله:معناها مانديرش قطوسه خلاص..
ضحكت طوبى..
صفقت جنه وقالت كلمه بلغتها وهي منفعله..
طوبى بضحكه؛باهي باهي..هاه..
وغرفت كاشيك من المهروس ووكلها.
تاله بضحكه:عسل لما تتكلم صوتها كربوج..
ضحكت طوبى..
"ع بالي حبيبي ع بالي حبيبي"
طوبى بصوت:آلاء!!
جاها صوت الاء وهي تغني..
"ليلة البسلك الابيض وكون ملكك ودني تشهد"
خشت عليها وهي تغني وتلف في مكانها..
"ع بالي حبيبي"
طوبى بضحكه؛تحشمي..واشرت بعيونها ع تاله..
الاء؛ع اساس مش فاهمه..
طوبى فنصت فيها..
تاله؛انتي معاش تراجي لليوم العرس..
انصدمت طوبى..
والاء قالت بضحكه..
/انتي بس اللي قاعده طفله يابيبو..
طوبى بصدمه؛اي والله قلتي الصادقه..
تاله باست راس جنه وهي تضحك بخجل..
آلاء:ماما وين كنت ندور فيها اصلا..ماما..
ومشت طلعت من حداهم..
فجأه..
"ما..ما"
قلب طوبى دقه قويه..شافت لجنه وهي مندهشه وعيونها تعبوا دموع..
عاودت جنه قالت..
"ما..ما"..
حطت طوبى الصونيه وهي تقول بنبرة باكيه..
/ياروح ماما..
وخدتها من تاله ضمتها وقعدت تبوس فيها..
وتاله تشوفلها بإبتسامه وهي متأثرة ع الاخر..
🍃🍃🍃
ماما..كلمه من حرفين تكرروا مرتين...بس معناهم تبي مجلدات لشرحه..
الامومه نعمه اكيد وميزة عظيمه للمرأة...
نجاح في يوم من الايام فقدت الامل اتها تكسب هالميزة..
لكن بعد ماربي نور بصيرتها وقربها ليه..بدون ماتطلب منه لقت كل اللي تتمناه تحقق بأضعافه..
تزوجت راجل يحبها ومعيشها احلى عيشه..
حملت بسرعه وحمل وولادتها كانوا ميسرات وجابت ولد وهي عمر 38عام..وكأنها بنت 18 عام..
ماتعجبتش نجاح من كرم ربي ولانعمه عليها نسوها في يوم انها تحمده وتشكره..
التزمت اكثر بدينها..لازمت الاذكار اكثر..الختمات ولت في الشهر مرتين..سورة البقرة هادي ولت زي النفس عندها..
لابطلت استغفار ولاتسبيح..ولاجف لسانها عن الصلاة ع النبي..وقعد تاج الذكر مرافقها..
الصدقات بشكل مستمر طلع فيهم..كانت تتقرب لله حتى في معاملتها لولد راجلها اللي تعلق بيها هلبه..
وكانت كل ماتقرب..كل ماربي يزيدها من نعمه..
واليوم ربي وصلها لمستوى جديد اعلى زاد قربها ليه..
نجاح اليوم لبست الملايه والنقاب...وراجلها من فرحته بقرارها جابلها هديه مميزة..موجوده في صندوق هدا كبير لونه وردي مربوط بتول لونه ابيض..
نجاح بضحكه؛خلاص بنفتح..
عبد الحفيظ بإبتسامه؛هي افتحيه..
خدت نفس وسمت بالله وفكت الشريط..
بعدين قامت الغطا وتفاجئت لما شافت اللي تحته..
مجموعه ملايات بألوان مختلفه مش ملفته..بالنقاب وكان منثور عليهم ورق ورد احمر..
شدت بأصابعها عظمة انفها ودموعها انهمروا..
هو ضحك وجاها ضمها وقال..
/لالافكينا من الدموع ..
نجاح:ربي مايحرمني منك ياعبدو.
عبد الحفيظ؛ولامنك...اني ماحسيتش روحي مرتاح ولاعايش الا معاك انتي..نحبك..
ضحكت..
وهو قال:مبروك حبيبتي والفال لحفظ القرآن إن شاء الله..
نجاح؛يااارب...
☘يابختها..ويابخت الانسان اللي عطاها في يوم نصيحه اثرت فيها وغيرت حياتها كلها..
وهادي اعظم نعمه من بيها الله ع طوبى اللي ماتندريش ع جبال الحسنات اللي قاعده تنكتبلها..
واهو بلال اليوم حفظ نص القرآن..وفي الجامع متحفلين بيه بش يحفزوه يكمل الحفظ....
بلال فهاليوم المميز مانساش طوبى وحب يهديها هديه بسيطه...
🍃🍃🍃🍃🍃
"ياروحي! محلاهم"
علي؛قال ماعرفش شن يجيب..
طوبى ودموعها في عيونها..
/والله احلى هديه تجي لجنونه..معاش بندير لشعرها غير التوكات هادم..
علي ابتسم وقال..
/قالي قوللها لايضيعها الله..
نزلوا دموعها ومسحتهم وهي متأثره هلبه..
مسح جدها ع شعرها وقال..
/هنيالك يابنتي..
🍃🍃🍃🍃🍃
"اني نحبك هلبه..نحبك لأنك ديما معاي ديما..اللي ديرلي فيه ياربي يبي عمرين ع عمرين بش نحمدك عليه وشويه..مافي حد يقدر يوفيك حقك..ربي انت خليت كل شي صعب مريت بيه اليوم في عيوني ولاحاجه..حتى لو رجع وجعني مرة تانيه حنقول الحمد لله واني راضيه لان حتى في هادي انت تكتبلي في حسنات..مامهون عليا هالحياه ومخليني متفائله بيها غير حنك عليا ورحمتك بيا ومعيتك...اللهم لك الحمد"
وحطت راسها ع مسند المندار اللي كانت تحت شباك الصاله وقعدت تستغفر بصمت...
🍃 🍃🍃🍃
اقدار الله كلها خير..
وياريت عواطف تفهم ان اللي قدره عليها ربي فيه خيره ليها..
بس حني البشر اغلبنا يصعب علينا ادراك حكمة المنع والرضا بيه..
ومرات حني نصعبوا فيها ع بعض..لما نحسسوا اللي ربي منع عليه نعمه معينه بالنقص..
زي مادار اشرف معاها بكلامه الجارح...
بعد ماحست روحها باديه ترضى بتقدير الله عليها هو ردها لنقطة الصفر..
رجعت حبست روحها في دارها....
وامها عرفت باللي صار ووجعها خاطرها من اشرف هلبه..
🍀🍀🍀
وجي يوم الخميس وروح اشرف بمرته من العياده..
لما خشوا للحوش مشوا طول للصالون بش يسلموا ع العيله اللي كانوا ملتمين..
سلمت صفاء ع سلفاتها بحرارة ماعدا خديجه صافحتها بس..
واخر من سلمت عليه عزوزتها..
شدتها نجمه وخلتها تقعمز حداها...
اما اشرف لما مالقاش خوته سلم من بعيد وطلع..
نجمه قربت من وذن صفاء وقالت..
/اشرف لبز هلبه مع عواطف.
صفاء بإستغراب..
/شن دار؟
نجمه:حط عليها اللوم في اللي صارلك ودارها هي السبب.
انصدمت صفاء..
نجمه ودموعها في عيونها..
/ليها حابسه روحها في دارها مابت تطلع منها..
ناضت صفاء وهي مضايقه هلبه ومشت طلعت من حداهم..
وعيون خديجه وراما معاها...
🍃🍃🍃
وصلت في الدار..دقت الباب وخشت..
لقت عواطف راقده وغامه روحها بالبطانيه..زاد ضيقها..
سكرت الباب وقربتلها وهي تقول..
/عواطف..
"شن ديري خاشه هني"
صفاء بضيق:غير حولي الغطا وقعمزي..
"اطلعي وخليني لو سمحتي"
صفاء:ماتعدليش ع كلام اشرف لما يعصب مايعرفش شن يقول..
حولت الغطا وقالت بإنفعال..
/لايعرف شن يقول..كلام زي السم يحطولي فيه خوتي ع خاطر نساوينهم..اصلا عمرهم مادارولنا خاطر لااني ولانجاح..
صفاء:عندك حق..وغلطه كبير هلبه..واني تو نتفاهم معاه..
عواطف ودموعها ينزلوا...
لابالله عليك لا..تو يديرني عاركتك ولاضربتك مرة وحده..
بالله عليك ياصفاء اطلعي وخليني مانبيش نزعلك..
صفاء بضيق:قصدك مش ماشيه للمة نجاح!؟
غمت وجهها وقالت..
/لا..اطلعي..
تنهدت صفاء بحزن ومشت طلعت من الدار وسكرت الباب وتوجهت طول لجناحها..
🍃🍃🍃🍃
مرت الساعات ونجمه وكناينها كانوا جاهزات..وطلعوا كلهم مع بعض..
وماقعدش في الحوش غير صفاء وعواطف..
🍃وفي حوش لطفي الواعر..
خش حسين وهي يده كيسه كبيره وقعد ينادي..
/عمتي..
"تعالى للكوجينه"
مشي طول للكوجينه..
خش لقي فيها مطيره وطوبى..
حسين؛تعالي خود قشيش الرسم متاعك..
جاته طوبى وخدت الكيسه وقالت بإبتسامه..
/صحيت..
حسين:سلمك..شاف لعمته وقال..وتوا ارواحكم من الليله غدوة بنتسقدوا للخمس..
هما تفاجئوا..
مطيره؛علاش!؟
حسين:زردة يومين تغيروا جو وهوا..
طوبى:وين!؟
حسين:في مزرعة صاحبي..
مطيره بضحكه:نحساب بتطلعلنا بمفاجأة جديده وتطلع واخد مزرعه..
حسين:كان عجبتني الحوازة متاعه ناخد زيها غادي..
مطيره؛مالا خود وحده قبل بعدين ارفعنا نزردوا فيها مانعرفش ناخد راحتي في مكان لحد براني..
حسين:مش لحد براني..لعبد القيوم..
طوبى فتحت عيونها ع وسعهم بدهشه..
مطيره؛غير راجي..اللي نعرفه ان صاحبه عنده حوازة ياخد فيها منه مرة مرة راهي حتى هادي تطلع كذبه!
حسين ابتسم؛لاكلام مزبوط..كانت لصاحبه وهو شراها منه وامس كنت عنده جاني بمفاتيحها وقالي كونوا انتم اول من يقعد فيها بعد ما خديتها..
طوبى قلبها ماباش يهدا بكل..
مطيره بإمتنان:ياوخيتي سلمه..شوره ماليه عاودوله كلامنا نهارتها..
حسين:شن قلتوا!؟
مطيره:هما حكوا عليها قدامنا سهفونا نشوفوها قلنا خاطرنا في مشيه غادي..
حسين:جديات الراجل هدا فضيع..تنهد بعدين قال..المهم اني قلتلكم وراهو خبرت جدي قبلكم..
مطيره؛باهي باهي..
حسين؛كان في حاجه ناكلوها عطونا..
ومشي قعمز ورا الطاوله...
مطيره:في كل خير..راجي شويه..
وطوبى طلعت من حداهم وخلتهم وعقلها يفكر في الكلام اللي سمعاته من حسين..
خشت للدار وسكرت الباب..
شافولها اريج والاء بإستغراب...
اريج؛خيره وجهك احمر!
طوبى بربكه؛احمر!..لاعادي..
الاء:شني اللي في يدك!؟
طوبى شافت للشكاره وقالت..
/كراسه رسم وادوات..
اريج بفرح؛بترجعي ترسمي!! ارسميني اني الاولى بليز..
طوبى مشت قعمزت ع السرير وقالت..
/بري طيري..اول من بنرسمه حلوتي بنيتي..
آلاء:واني بعدها..
طوبى :امشي اقلبي وجهك انتي وياها..
اريج:خزي لئيمه..
طوبى ضحكت ولوحت روحها ع المخده وهي مبتسمه ابتسامه حلوة..
واريج مركزه معاها...
🍃🍃🍃🍃🍃
"كيف تدوي من غير ماتفهم"
اشرف:صفاء اني مش غافل راهو عارفها مش مريحاتك وقعدت ساكت لأنك ساكته مفروض ماسكتش من البدايه..
صفاء:ياريتك ماتكلمت..شن بنستفيد لما تجرح اختك بسببي! بعد ماعلاقتي بيها تحسنت حضرتك خربتها بكل..
اشرف؛قصدك كلماتك!؟شن قالتلك..
صفاء بنفاذ صبر:اللهم صبر..اشرف ارجوك معاش دخل روحك في دوة النساوين..تانيا اختك مالهاش ذنب في اللي صار اني المهمله..واخر شي وهو اهم شي بتمشي لأختك تستسمح منها وماتخليهاش لين تسامحك..مش هكي بس وطلعها تدهور بيها وتاخدلها حاجه..يادير هكي ياأشرف يااما معاش تكلمني..
هو قعد يشوفلها بتعجب..
صفاء خافت منه لكن ظاهرت بالثبات والقوة..
اشرف:شوفي اني نحبك وهلبه تمام...لكن تكلميني بالاسلوب هدا مرة تانيه نزعلك..
قعدت تشوفله وهي ساكته..
اما هو مش طلع وخلاها..
زفرت بخوف بعدين قعمزت ع السرير وقالت..
/ياربي يسمع الكلام..
ورقدت ع السرير بالجنب وبدت تصلي ع النبي...
🍃🍃🍃🍃🍃
تاني يوم..
الجمعه..
1مارس...سنة 2019...
☘☘☘☘☘
"وهادي الخمس ياسادة"
لما سمعت هالجمله من ولد عمها..نزلت الروشن شويه..
وخشلها هوا الخمس...لما شماته حست بشعور حلو..
حست قلبها فرح..رقت المرش..وضمت جنه..واتكت براسها ع الروشن وهي تتفرج ع الطريق..
وجنبها بنات فردوس كانوا يتفرجوا حتى هما..
والجد علي القدام يقول..
/اول مرة نجيها..
حسين:بطول عمرك ياغالي...
🌼وفي السيارة اللي وراهم..
عبد الرؤوف:اما خير سبانجا ولاالخمس..
غرفه؛كيف خشينالها رانا!
عبد الرؤوف:كان عجباتك وين طيرلك من العيشه معاي نجيبك هني..
نبيله وفردوس كانوا يضحكوا بكتمان..
غرفه؛بكل انت عندك علم!
عبد الرؤوف؛عندي علم بأنت بكل بس مع الأسف..
وفردوس ونبيله يضحكوا..
سكتت غرفه وهي معصبه..
شافلها بطرف عينه بعدين بدي يغني.
/نارجهنم..من يقربها..
غرفه اشرلته بيدها وهي ضامه صوابعه ع بعض وتحرك فيها تهديدا..
هو شافها وضحك..
ونبيله وفردوس محصلين عليهم جو..
🌼اما في سيارة عبد المطلب..
مطيره:شغللنا حويجه شهلوليه..
ضحكت اميمه..
عبد المطلب:نزلك في الطريق!؟
هادية شدت ضحكتها..
مطيره:بش بوي بعدين ينتفك..
اميمه فنصت فيها بضحكه...
عبد المطلب:اسكتي خيرلك يامطيره..اسكتي خيرلك..
شبحتله بإزدراء واميمه تضحك عليها..
وهاديه تشوف للروشن وهي تضحك بكتمان..
🍃🍃🍃🍃
وبعد طول مسافه...
وصلوا للمزرعه...من فم بابها بان ربيعها...
واغصان شجر لون الورد متاعه ياجوري نازله ع البوابه ع الخارجيه...
ابتسمت طوبى بحماس وين شافتهم...
وشويه وتحركت السيارة اللي هي فيها وخشت للمزرعه ووراها باقي السيارات..
ونظرات الاعجاب بعد الدعاء بالبركه عبرت عن ردة فعلهم من الجمال اللي شافوه..
نزلوا من السيارات..
وطوبى رجليها قعدوا يرفعوا بش تدهور في المكان وتتفرج عليه..وجنه في حضنها تستكشف بنظراتها الفضوليه المكان..
ويامحلا الشعور اللي عايشاته طوبى..
تشم في ريحة حلوة..تشوف في مناظر حلوة..
الجمال محاوطها من كل مكان..
ثبتت نظرها ع الحوش...خفت ابتسامتها وهي تتأمل فيه..
للحظه اجتاح قلبها شعور غريب...لكن من حلاوته لين لمعوا بالدموع...
🍃🍃🍃🍃🍃
خشوا للحوش وقعدوا يتفرجوا عليه..
عجبهم نظامه وديكوره..
بس عاد في من عنده طبع ديما غالبه...
عبد المطلب مشي طول للثلاجه بش يشوف كان قاعد فيها شي..
فتحها وتفاجئ ع الآخر...
جاته هاديه وقالت بضحكه؛مستعجل ع التلاجه ..
عبد المطلب:بوك وخوك مش فيها.
شافت الهاديه للتلاجه وتفاجئت حتى هي..
بعدين فتحت الفريز وتزيد تتفاجئ..
هاديه؛جاي قبلنا حسين انت!؟
حسين؛اول مرة في حياتي نعفسها الخمس..
هاديه؛التلاجه والفريز معبيات بضاعه..
كلهم اتفاجئوا..
جت مطيره تجري وشافت اللي هما شافوه..
/حي عليه!!؟ حتى اللحم والدجاج جايبهم!!
حسين:كيف!!!
مشت مطيره للدواليب فتحتهم وتلقى بضاعة سبيزه..
/لاعاد هلبه هلبه هكي!
علي ضحك وحرك راسه يمين ويسار..
ع خشة غرفه وهي تقول..
/تعالوا دخلوا الحاجات..
مطيره:غير وين بنحطوهم!؟
غرفه؛كيف!؟
الاء بصوت منخفض؛الجنتله مش مقصر عبا الكوجينه بضاعه..
اريج طول شافت لطوبى...
نبيله قربت من اميمه وقالت..
/مش عارفه علاش حاسه في إن ..
اميمه وعيونها ع طوبى قربتلها وقالت..
/إن واخواتها..
نبيله هزت راسها وهي تشوف لطوبى بإبتسامه..
وطوبى في عالم تاني...
🍃🍃🍃🍃🍃
وبعد مارتبوا حاجاتهم..
قعدوا النساوين الكبار داخل يوتوا في الفطور...
اما البنات طلعوا برا..
وقعمزوا تحت مظله مزينه بشجر العنب..
الاء كانت حاطه اللاب توب ع الطاوله..
وحواليها اميمه واريج يتفرجوا ع المناظر بإستمتاع..
اما طوبى..فكانت شاده دفتر الرسم والاقلام وجنبها جنة في كروستها..
تتفرج ع الطبيعه ومش عارفه من وين بتبدا ترسم...
فجأه..سمعت كلمات اغنيه شغلتها آلاء..
اسمها(انكتبلي عمر)
شافت لآلاء كيف سرحت معاها وهي مبتسمه بحب عرفتها في من تفكر..
تنهدت بإبتسامه..وغيرت نظرها للدفتر..
شويه وبدت ترسم وهي تسمع في الكلمات..
🌼قدام عينك انا صعب الاقى كلام اقوله
ده كل حلم زمان انا كان نفسى اطوله
انا شفته فيك 🌼
وتمر قدام عيونها كل المواقف اللي جمعتها بيه..
لعند اخر نظره كانت بينها وبينه..
ابتسمت ابتسامه حلوة..وبدت ترسم....
🍃وهو في هالوقت..
كان يقطع في مسافه طويله بش يوصل للبر ويزرد مع صحابه من الكفره...
يسوق وعقله مايفكر كان فيها..وقاعد يتخيل في ردة فعلها ع جمال الطبيعه غادي..وياقداش تمنى لو تعرف اللي في قلبه ليها..بش تعرف ان كل شي داره وقاعد يدير فيه على شان عيونها الحايره اللي مالكاته بكل مافيه....
#نهوض
#طوبى
...يتبع....
