طوبى ☕شارع القهوة☕

الجزء_الرابع_والثمانين

#طوبى  "جنة طوبى"
#جمان_فريد
#الجزء_الرابع_والثمانين "حرب باردة/حرب النجوم2 "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر🌼
قال رجلاً لرسول الله ‎ﷺ، إنَّ شرائع الإسلام قد كثرت عليَّ، فأخبرني بشيءٍ أتشبَّث به؟
قال ‎ﷺ: “لا يزال لسانُك رطبًا من ذكر الله”
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 هدوء في الظاهر وفوضى في الاعماق."🖤🥀!!🍃
________________________________________
يوم الاربعاء..
3اكتوبر...سنة 2018..
الساعه 10:45صباحا..
في شارع القهوة..كانت اصوات الاغاني الشعبيه مسموعه فيه  وتعداته..
جايه من حوش الساحلي اللي دايرين عرس ولدهم اللي بدوا فيه من يوم الأحد..
اليوم كانت الكسوة..والمعروف ان اللي يمشي يرفع الكسوة اهل العريس بس..لكن عيلة الساحلي اللي افضال عيلة شنيبه مغرقتهم زي مايقولوا للناس طلبوا من مغليه وبنتها وحتى كنتهم اللي قبل كم يوم كانوا يذموا فيها يمشوا معاهم..
هادوا الناس..وهكي الدنيا..وهدا ماماشية عليه...
🌼في حوش لطفي الواعر..
كانت الاقحوانه الصامده بفستانها الطويل الانيق اللي لونه ترابي واقفه في الكوجينه دير في الدبله اللي بدت تتعلم فيها  جديد وجنبها جنة في قعمازها فاتحه عيونها وتتفرج وتسمع في أمها وهي تغني...
هالصيصان شو حلوين..عم بيدوروا حولا امن مبسوطين..
اليوم ماعندهاش جامعه ومستحيل ضيع منه ثانيه بعيده عن جنتها..
وقفت غني لما سمعت صوت قطوسه..
طوبى:وينك اليوم تأخير..
سيبت المكينه ومشت مصمصت ايديها وتوجهت للثلاجه..
طلعت منها باكو حليب وبعد سكرت التلاجه طلعت للجنان..
شافت للقطوسه وابتسمت وهي تقول..
/وين كنتي تصيعي يانسرافه..
وجابت الصحن اللي يخصها وقدماته ليها وصبت فيه الحليب..
كانت رافعه شعرها كعكه مبعثره وفي خصلات منه نازله ع رقبتها...
شكل شعرها ووجهها متغيرين عن قبل واضح فيهم التحسن..
والابتسامه اللي كانت مرتاحه زادت وجهها حلاوة..
كانت تسمع في اغاني الفرح وقفت ع حيلها وقالت..
/خاطري في عرس..مررت نظرها ع الجنان وقالت..يندار هني..ثبتوا عيونها ع كرسي بوها وتعبوا دموع..قالت بنبرة فيها ألم..الله يرحمك ويغفرلك ياعمري..
فجأه سمعت صوت تليفونها يرن..
خشتله طول خداته من ع الطاوله شافت المتصل ضحكت وقالت..
/خالتي سالمين..
وطول ردت عليها وهي تشوف لجنتها وع وجهه ضحكة فرح...
🍃وفي حوش شنيبه..
طلعت مغليه من دارها وهي لابسه كيس نايلو ع شعرها المصبوغ..
وصلت في الكوجينه وين خشتها انفضت بفجعه..
عمر ولابس بدلة قائد الطايرة وفيده طرف كيكه ياكل فيه شبحلها بضحكه وقال..
/اسف يام..
مغليه مشتله وقالت:امتى روحت..
هو جاها وباس راسها وقال:توا توا..من داير الكيكه..
مغليه تهكما:مرت خوك..
عمر طول حط الكيكه وقال..
/استغفر الله..
امه ابتسمت تهكما ولحقاته بعيونها وهو طالع قالت..
/بالله جيبلنا غدي من برا عمورة..
جاها رده من برا وهو يقول...
"حاضر"
ويجي اتصال لمغليه..مشت طلعت من الكوجينه للصاله خدت تليفونها من ع الطاوله شافت المتصل ردت طول..
/ايوه..
"شن حالك يام توا"
مغليه:الحمد لله شن حالك انتي والعزري..
"الحمدلله..يما منها جد بنتك هادي معقوله بتخلي نجاة تصدر"
مغليه:شن بنقولك مش عارفه..هو مش طايب عليا بس في نفس الوقت عاجبني خل الناس تسكت وتسكر فمها..
"ع شن يسكتوا يام بتزيدوا الدوة هكي انتم"
مغليه:لابالعكس بتتغير الدوة..
"كيف! فهميني ترا"
مغليه:بالله بنتي خليني توا راسي مصدع والصبغه تغلي في راسي..بالسلامه..وسكرت عليها وقالت..هي وهداكا الكبير واقفين في صف هديكا الشومه ومعاديين خوهم ع خاطرها..لكن باهي ياطوبى يابنت الواعر باهي..
ومشت طلعت من الصاله لدارها...
🍃وخلت نسرين تغلي من الغضب..
اتصلت بفايزة اللي كانت في المركز وطول ردت عليها..
نسرين:شن صار؟
"خليت البنات يخدمولها اني والله ماني جايه جيهتها وهادي اخر مرة يانسرين والله مرة تانيه لز طول وماني دايره خاطر لمخلوق"
وسكرت عليها..
تأففت نسرين بغيظ وقالت..
/تو نوريك يانجاة الشياطين..
☘في المركز متاع فايزة..
خديجه:طز مادوريش..
نجاة؛ولامعبرتها المهم اللي نبيه يوصل حيوصل..
ابتسمت خديجه مكرا لأن اللي دير فيه نجاة ماشي ع هواها وعاجبها...
وبدوا العاملات في المركز يخدموا ع نجاة وخديجه اللي كانوا يبوا يصدروا وحده بتلبس شرقاوي والتانيه البدله الصغيره..
وفايزة مقعمزة ورا مكتبهم وهي تشوفلهم بحقد..
☘☘☘☘☘
"بتجي اليوم وبتاخديها فاهمه"
مناسك بضحكه؛ياودي مايبي شي قال سلامتهم شاده..
مروة وملامح الخجل باديه ع وجهها..
/ربي يحفظه بجد خوك هدا راجل بمعنى الكلمه .
مناسك تعكرت ضحكتها وهي ملاحظه كيف بدي واضح اعجاب مروة بخوها والخوف في قلبها قاعد يزيد..
مروة:هي نوضي نمشوا ناخدوا حاجه من المقصف..
مناسك:تمام..
وناضوا ومشوا مع بعض وهما يهدرزوا وقلب مناسك كان مقبوض ..
🍃وهو..
كان في المقهى متاعه يراقب في وضع الخدمه..
الفترة الاخيره المقهى متاعه كثروا زباينه وولى مشهور...
خش عليه واحد من صحابه وجاه طول..
لما وصل فيه قال..
/كينج شن الامور..
هوقال:ماشيه الحمد لله..شن جوك..
:مليح..كينج بالرجال الاقوياء..نبي الرانج اليوم..
ضحك وقاله..
/سلامتك..بعتها..
صاحبه:تي غير هيا ياراجل عطيت كلمة ماطلعنيش عيل..
مالك بضحكه:قسما بربي بعتها..
صاحبه بصدمه:كيف!!! انت مربي عليها كبيده كيف هانت عليه..
ابتسم ابتسامه حلوه ونزل راسه شويه بعدين رفعه القدام وقال..
/هدا اللي صار..
صاحبه بشك:انت فيك شي متغير وهلبه مش شويه ع العموم ان شاء الله خير وخلاص..
ضحك مالك..
:مش عارف توا كيف بندير عاطي كلمه للكبيده ومقايلها بنجي في الرانج تبي تشوفها..
مالك:كاذب عليها انت؟
:لا تعرف انها مش ليا لكن قالت خاطري نشوف رانج ع الطبيعه..
ضحك مالك..
:يللا مش مشكله..خلاص نشوفك بعدين..تشاوات..
خبط ع كتف مالك خبطه خفيفه ومشي طلع..
ومالك معاه بعيونه..وبين عيونه جت مروة ونظراتها ليه امس لما مشي لشارع القهوة واجتمع بالمهدي واشرف وحكالهم اللي صار بالتفصيل وقص جزء تسديد الدين وكيف تسدد..
🔺️يوم الامس..
قدام مطحن الزعيم..
كان مالك بهيئته المعتاده تخفيا واقف ع اشرف والمهدي وعيون محمد المهدي عليهم وهو واقف قريب ع قهوة عمه وجنبه صاحبه مؤيد..
مالك:خلاص الموضوع منتهي معاش دوروه بكل..
اشرف:بارك الله فيك ويرحم والديك..
مالك:والدينا ووالديك بس في حاجه يعني من باب الاحتياط لو عندكم كيف تأمنوا المركز متاع خالتي فايزة وتحطوا من يقعد ورا البنات..
المهدي:علاش؟
مالك:مش متريح لعمامهم بكل مش مزبوطين..
المهدي هز راسه وهو يقول..
/خليهم عليا هادم تو نعرف شن ندير معاهم..
اشرف:يبوها..يبوا من يربيهم وحتى اني في موال في راسي لازم نتمه قبل لنولي..
ابتسم مالك لأنه فهم عليه..
والمهدي كذلك..
محمد المهدي كان يشوف لمالك وهو ينحرق حرق بنار الغيره..
غير عيونه لروشن شقة فايزة ومش عارف علاش وقتها كان عنده احساس ان مروة واقفه وراه..
☘وفعلا مروة كانت واقفه وراه ومعاها مناسك وصفاء .
مناسك:خطيبك يهبل صفو..
صفاء بضحكه:وحتى مؤيد يجنن..
مناسك بخجل:من مؤيد؟
صفاء وهي تقلد فيها:من مؤيد..تستعبطي..
ضحكت مناسك بخجل وعيونها ع مؤيد..
لكن مروة كان تركيزها كله ع مالك البنت قاعده تنجذبله انجذاب غير عادي..خلاها تنسى مشاعرها تجاه محمد المهدي وكأنها ماكانت..
اي مروة قاعده صغيره ومشاعرها مش حتكون ثابته..لكن اللي قاعده تحس بيه اتجاه مالك شي مختلف هلبه...
شافت فيه شي فاقداته هلبه وبقوة...الامان..الاحساس بإن في حد وراك ويحميك..
اللي فقداته صفاء ودورت عليه لين لقاته في أشرف..
وتوا مروة لقاته في مالك..
وااه يامالك..ياريت اللي جرى ماكان...
🌼شويه واستأذن مالك ونزلوا مناسك وفوزيه اللي كانت مع فايزة تحكيلها في التفاصيل حتى هي وطلبت تنزل معاهم بش تسلم ع مالك وتشكره..
مروة فتحت شويه من الروشن بش تسمعهم او تسمعه هو شن يقول..
ومحمد ومؤيد واقفين وعيونهم عليهم..
مؤيد يسرق في النظر لمناسك اللي كانت تسرقله في النظر حتى هي ويتبادلوا في الابتسامات..
لكن محمد نظره بين الروشن وبين مالك..
مالك وهو مبتسم احراجا:بارك الله فيك خالتي تسلمي..
فايزة بإبتسامه؛ربي يحفظك ولدي ويفرح بيك وبيك وميمتك..
فوزيه بإبتسامه:ويفرحك ببنياتك..
فايزة:تسلمي..تصبحوا ع خير..
فوزيه ركبت السيارة وهي تقول:قدامك كل خير..
مالك:خشي خالتي..
ابتسمت فايزة ومشت خشت وهي تقول..
/في أمان الله..
هو مشي لف ع السياره لين وصل في باب السواق..
فتحه ورفع عيونه لروشن الشقه وشافها...
هي ابتسمتله ابتسامة امتنان..اما هو كان في عالم تاني..
وين شاف ابتسامتها ماصدقش عيونه وطول بادلها نفس الابتسامه..
سكرت مروة الروشن..
هو عقد حواجبه وضحك ضحكه خفيفه وركب السيارة...
🔺️في الوقت الحاضر..
تنهد بقلق  وهو يفكر في بعدين اللي مهما حاول يهرب من التفكير فيه ويلقى روحها غصب عنه موليله..لامفر...
🍃🍃🍃🍃🍃
الساعه 12:46قبل الظهر..
كان اشرف واقف بسيارته قدامه مدرسة صفاء يراجي فيها تطلع...
وطلعت صفاء طول لباصها..ركبت..
وهو طول لحقها...
وبعد مسافه بسيطه...وصلوا للشارع..
هو درس قدام حوش اهله..
وهي درس بيها الباص قدام حوشهم..شافاته في السيارة يدوب ابتسمت وطول خشت للحوش..
وهو تنهد..بعدين نزل من سيارته ومشي خش لحوشهم وبيبدا يغني مواله...
🍃🍃🍃🍃🍃
وفي قاعة من قاعات كلية الاقتصاد..
كانت اريج مقعمزه لاهيه باللاب توب تفكر في موضوع لمشروع تخرجها..
كانت موجود مع تلاته طالبات بس في القاعه والمحاضره مازال عليها اقل من عشرة دقايق
هو خش...شافها..وبدي قلبه يدق بقوة لدرجة ان تخيل ان الموجودين كلهم يسمعوا فيه
قعمز ورا الطاوله متاعه..وعيونه عليها..
والطالبات اللي فالقاعه يمرروا في نظرهم بيناتهم ويتهامسوا عليهم..
اريج ماحستش بيه لما خش من كثر ماكانت منسجمه..شويه وحكت عيونها بعدين قالت بصوت مسموع..
/همه هم مشروع التخرج هدا..
:مع مني نزلك اريج؟
شافت للبنت وقالت..
/مع استاذ رافع..
:لاهدا متفهم هلبه
اريج بضحكه؛ناعليا منه..حظي هالمرة جي معاي
ضحكوا البنات مجامله لأنهم كانوا متوترين شويه..
اريج تنهدت وولت شافت للاب توب وهي تقول..
/المهم نتخرج ونفتك من هالكليه والعزاوات اللي فيها..
البنات فنصوا عيونهم وشافوا لنضال لقوه مركز مع اللاب توب متاعه وع وجهه ملامح ابتسامه خفيفه
رن تليفون اريج..قاماته من ع الطاوله وشافت المتصل ردت طول..
/وينك ياشنكه؟ في القاعه من الفجر..تي هيا تعالي قبل ليجي هداكا....قلداته بالصوت وهي تقول..بعدي مايخش حد..غير من امتى بس..
البنات مصدومات ومش عارفات كيف ينبهوها لوجوده..
وهو كان رافع عيونه فيها ويشوفلها برفعة حاجب..
اريج؛والله لولا قراية الهم هادي ماحضرتله محاضرة....باهي هيا سقدي روحك..وسكرت..وشافت للباب بعدين غيرت عيونها للطاوله متاعه وجمدت...
وجهها بدي يحمر شويه شويه..وقلبها عداد دقاته في العالي.
كانوا عيونه ع الشاشه وملامح وجهه عاديه وكأنه مافي شي..
غيرت عيونها للبنات لقتهم اللي تفنص واللي شاده ضحكتها واللي تندب وهي عاضة ع شاربها بضحكه مكتومه..
هي غيرت عيونها عنهم ودكت راسها في الشاشه وكانت في قمة الارتباك..
شويه وخشوا باقي الطلبه واخرهم صاحبتها..
قعمزت جنبها وقالت:امتى جي هدا..
اريج بربكه:خليني توا ماتسأليني عن شي..
استغربت صاحبتها وشافتله..
هو ناض من مكانه وكان يشوف في الساعه وصل في الباب قعد واقف للحظات بعدين سكر الباب..
وولى لكرسيه وهو يقول..
/مساء الخير..
ردوا عليه بأصوات متقطعه..
/صباح النور..
وخش طول في موضوع المحاضره وهو متجاهلها تجاهل تام وكأنها مش موجوده.
وهي تحاول دير روحها عاديه برغم من داخل مش قادره تكون هكي نهائي..
🍃🍃🍃🍃🍃🍃
وفي كلية اختها..
كانت ماشيه في الباحه مع معيد يقري فيها..
واكابر مع بنات صاحباتها يشوفولها من بعيد..
:ماضيعش في وقت الاء بكل..
:الحق هو يجري في جرتها من السمستر اللي فات..
اكابر بغيظ:مش عارفه شن شايفين فيها !؟نموت ونعرف شن عاجبهم في هالمزيته..
:هكي اغلبهم موليين يموتوا ع الفولغير..
:حي يابنات عبد العزيز ******
كلهم وجهوا انظارهم وين ماهي تشوف..
اكابر رفعت حاجبها وهي تلحق فيه بنظرها لين وقف وهو يشوف لآلاء كيف واقفه تكلم في المعيد..
:اي شي تبيه الاء تعاليلي طول..
الاء بإبتسامه جاده:شكرا استاذ..سلام ..
:سلام..
ومشت الاء بطريقها لسيارتها وعيون المعيد والبنات معاها..
اما هي كانت تمشي وتشوف لتليفونها..
الطريق اللي ماشيه فيها غير طريق عبد العزيز بس هو هالمرة مشي وقف قدامها وخلاها تتصادم بيه لين يطيح تليفونها من يدها...
:شفتوه شن دار!؟
:انتي شوفي الاستاذ كيف يشبح!
واكابر قريب تنفجر من الغيظ..
الاء بتذمر:لاياربي! استغفر الله العظيم..
هو مشي طول طبس ورفع التليفون قبلها لما شافاته تفاجئت وتوترت..
وقف ع حيله وهو يشوف فيه بعدين قال..
/اموره تمام..ومدهولها.
هي بدون ماتشوفه مدت يدها بتاخده وخر بيده للخلف..
هي شبحتله وعيونها متوسعات...
عزيز وهو رافع حاجبه؛هدا علاش رفضتيني للمرة الرابعه..
الاء:شن قصدك؟
عزيز حول نظاراته وشاف للمعيد وهو رافع حاجبه وواضحه نظرات الغيره في عيونه..
التفتت الاء شافت للمعيد..
هو قاللها بصوت عالي..
/في مشكله آلاء!.
عقد عزيز حواجبه..
الاء حركت راسها بالنفي والتفتت لعزيز وقالت..
/تليفوني.
شبحلها وقال:لازم نحكوا..
هي تنهدت وقالت؛باهي..
ابتسم..
الاء:تليفوني..
عزيز بإبتسامه:نحكوا قبل ..
هي مررت نظرها ع المكان بعدين هزت راسها بإيجاب..
ومشت..وهو ابتسم ابتسامه حلوة ومشي معاها..
🍃🍃🍃🍃🍃
"عرس مني!!؟"
اشرف بملل:عرسي يام..عرسي نبيه في11
نجمه:سلم وليدي نوض اطلع من حداي وفكني من برادتك..
اشرف بضحكه؛والله ندوي من جدي يام..
نجمه بتعجب:مش بعد ماتكمل السنه هادي!
اشرف:جد في الامور جديد..
نجمه بريبه:شن جد!؟
اشرف:يام نبي نتزوج بالمشرمحي..
نجمه؛يللي ماتتحشم...عرس شني اللي بنديروهولك في شهر هدا!؟
اشرف؛يوم واحد وكان الله ويبقى الله..
نجمه بقلق:غير قول شن في خوفتني راهو!
اشرف بضحكه:والله مافي حاجه..
نجمه:متفاهم انت والبنت؟!
اشرف:ايه يام ونبيكم تتفاهموا مع امها..
نجمه:ماظني تقول باهي ع خاطر عمك لطفي كان بوها حتى هي راهو..
اشرف:يام انتم تفاهموا معاهم واني تونقنع عمتي بمعرفتي..
نجمه قعدت تشوفله وهي مضيقه عيونها بشك..
هو ابتسم وقال:من الاخير يام نبي نجيبها تعاونك..
نجمه:نهاري! اني بنديرها كنه ولا خدامه!؟
اشرف بضحكه:خدامة شني يام!؟ انتي في مكان امها تخدمك زي ماتخدم امها زي مادايرين نساوين خوتي..وبعدين يام اني هكي نطمن عليك اكثر..
نجمه:البنيه مازال تبي تقرا حرام عليك!
اشرف؛واني والله ماحارمها من القرايه..يام صفاء قد نفسها وواخده ع مسؤوليه تو تشوفي كيف تهنيني عليك..
نجمه؛كلامك ماخشلي راس..خلي تجي اختك وافتح الموضوع معاها ونشوفوا رايها وحتى سموره جايه نقوللها؟
اشرف:عادي مش مشكله..لكن وجه الشر اللي فوق فوتوها..
نجمه فنصت فيه وقالت:راما هني!.
اشرف عكرش وجهه بلامبالاة..وراما اللي كانت واقفه في الممر اللي يرفع للصاله سمعت كلامهم كله ونقمت ع عمها اللي عاب في أمها..
🍃وعمتها نجاح كانت في حوشها تكلم في اختها عواطف هاتفيا..
نجاح:مش صايرلك بكل؟
"لاوالله مافيها كيف يانجوحه"
نجاح؛مش مشكله بتسايري ظروف راجلك ماعندك ماديري..
"هو هدا..هي بالسلامه توا نجوحه"
نجاح؛بالسلامه بالسلامه...وسكرت منها وهي مستغربه وقلقه صوت اختها ماريحهاش وبدت تميل لإحساس امها بإن عواطف مش مرتاحه في حياتها..
☘وعواطف بعد ماسكرت رجعت لخدمتها في المعمل..
معمل كوثر اللي خدت عواطف تخدم فيه وطيحت جهدها فيه فوق معناتها ليها...
كوثر:والله مافي حد ضربها ع يدها هي اللي رضت لروحها اللي داره فيها الشارف وقالت نقعد ونتحمل..
ام الشارف؛مجبورة مش بيدها وكان ولت لماليها مطلقه ياما بيطلع عليها ولسانات الناس ماترحم حد..
كوثر بإنزعاج:وراس مرت خوي ماتوجعلي راسي مش ناقصاتك..عليلي التلفزيون وسكري الضي قبل لتطلعي..
بقلة حيله ناضت ام الشارف دارت ماتبي كوثر ومشي طلعت من حداها...
☘وفي الحوش اللي فجنبهم بمسافه..
الشارف بعصبيه:ماخلتهاش تمشي العزي هادي..
مرته بضيق:مش عارفه كيف بيحاسبها ربي عمتك هادي وحتى انت ياخوفي اللي درته فهالمسكينه يوصل فيك..
الشارف بضيق:واني ع خاطر منو درته هدا كله!؟
:عارفه وفاهمه..لكن هالمسكينه واجعتني والله قلبي متقطع عليها ومش قادره نسامح روحي اللي مشيت معاك في عملتك هادي..
الشارف سكت وهو مضايق لأبعد حد..
ومرته تشوفله بقلق وهي تفكر في حال عواطف اللي واجعها..
🍃🍃🍃🍃
في مصحة القدس..
مقعمزات الزوز في مكتب وحده فيهم يهدرزوا..
هناء بإبتسامه:هني عمره 4سنين بيخش 5
اميمه بإبتسامه؛ياعمري زي العسل الله يبارك نسخه من الدكتور خالد..
هناء بإبتسامة اسف:ايه في كل شي..
اميمه ركزت علي ملامح الاسف اللي ع وجهها وقالت..
/عادي نسألك سؤال خاص؟
هناء بضحكه:تبي تعرفي علاش انفصلنا..
اميمه :لو ماتبيش تقولي عادي..
هناء:بصراحه اميمه انتي وليتي قريبه عليا هلبه وزي مانعرف عنك كل شي مافيش باس لو عرفتي عني كل شي حتى انتي..تنهدت من قلبها وحطت التليفون ع الطاوله وقالت..اني وخالد تزوجنا عن حب..ماكانش في بينا علاقه ومشاعرنا كانت مخفيه..هو كان الدكتور اللي دربت عنده اعجبت بيه هلبه حبيته وحبيت جديته ومواقفه القويه يوم صارحني وطلب يتزوجتي كنت اسعد خلق الله وماصدقتش في البدايه..خالد بجلالة قدرته بوسامته وهيبته وعلمه وسمعته يحبني اني كنت شايفاته هلبه عليا وبكل صراحه..تنهدت وكملت تقول..تزوجنا..وخدمت معاه بعد الزواج وماسكرتش شهرين الا وشفت الوجه المخفي لخالد..خالد غيور غيور هلبه لدرجة لاتوصف..خنقني بغيرته وقيدني وكنت نتحمل لإني نحبه هلبه...
..اميمه بدت ع وجهها ملامح الضيق وهي تسمع في هناء..
لمعوا عيون هناء بالدموع وهي تقول... فاتوا مايقارب السته شهور واني عايشه في ضغط نفسي مع الحمل اللي داره سبله وقعمزني في الحوش..قعدت في الحوش وبعض الشي ارتاح راسي من المشاكل ورجع خالد اللطيف الرومانسي اول شهر زواج..لبعد ماجبت وولدي سكر تلاته شهور وقلت بنولي نخدم..قلب عليا الدنيا وياما صار بينا وكانت اول مرة نطلب فيها الطلاق هو هني حسيته لان وخاف..ممكن خاف يفقدني مش عارفه..وليت للخدمه ورجعت للخنقه ومافيش يوم يمر من غير مشاكل.. لعند ماسكر ولدي سنة....صارت بينا مشكله خلتني نسيبله الحوش وطلبت الطلاق مرة تانيه اهلي وقفوا معاي بس هو سكر راسه ورفض يطلق وبعت ناس وواسطات وياما دار..واني لإني نحبه هلبه..وليت بس بشروطي واولهم اني مايدخلش في خدمتي نهائي وصار وكان اللي نبيه ..وعشنا كم سنه امورنا تقدري تقولي كويسه هو زي اللي كان يحاول يغلب طبع الغيره اللي فيه وانتي قعدت نساعد فيه..امتحنت زماله ونجحت وطلعت برا وقعدنا سنه وروحنا وامورنا ولت تمام وحلوة بالمرة...لعند ماسكر ولدي 5سنوات..
سكتت وبلعت ريقها..بعدين غمضت عيونها بشده..وبدت تبكي..وحطت ايديها ع فمها..
اميمه دمعوا عيونها وقالت:خلاص مش لازم تكملي..
رفعت هناء يدها درقت عيونها وقعدت تبكي بالعبره..
واميمه موجوعه عليها هلبه صبتلها ميه كانت حداهم وعطتها تشرب..
ومازال هناء تبكي..
ويدق بابها دقه وحده..طول وقفت بكي ومسحت دموعها والباب انفتح ويخش خالد مع ولدهم ويجوا عيونه ع هناء..
اميمه قعدت تشوفله بضيق..
وولدها مشالها وقال بخوف:امي تبكي!؟؟
هي شربت الميه بعدين قالت بإبتسامه؛لا حبيبي مانبكيش..هاه تبي نروحوا؟
خالد شاف لأميمه وهي غيرت عيونها لولده وكانت تبان مستاءة..
:ايه ماما نبي نروح..
ناضت وقالت؛تمام حبيبي..شافت لخالد وقالت..تبي حاجه؟
قعد يشوفلها بدون مايتكلم.
وهي تشوفله وبين عيونها ذكرياتها المؤلمة معاه..
حرك راسه بالنفي ولف وطلع وسكر الباب..
اميمه بضيق:نستأذن..
هناء وهي تحول في اليونيفورم:لا خليك نطلعوا مع بعض..
كانت عارفه ان خالد يراجي في اميمه بش يسألها عن حالتها وهي خافت اميمه تقوله..
واللي في بالها كان في محله..ولأن اميمه عطلت وماطلعتش هو اضطر يمشي ويتابع باقي شغله وعقله مش معاه..
🍃🍃🍃🍃🍃
في نفس الوقت..
في المكان اللي قعمزوا فيه عزيز وآلاء ومابينهم مسافه لاباس فيها..
هو كان يتكلم وهي تسمع بكل مافيها..
عزيز؛شن بنقولك..بإختصار الاء اني حياتي تلخبطت ومعاش عرفت ندير شي ولانركز في شي ولانحس بشي..عقلي عندك تفكيري كله فيك..انتي بس..نغمض عيوني نشوف عيونك..وليتي اكبر همومي ويشهد ربي اني مانبالغش في ولا حاجه من اللي قلته..الاء اني نحبك نحبك بكل مافيا ومعاش قادر نعيش من غيرك..اني عرفت قبلك هلبه وفي وحده كنت ع وشك نتزوجها بس ماصارش نصيب صدقيني ياالاء ولاوحده فيهم دارت فيا ربع اللي درتيه..مافيش وحده خلتني نشوف الحياة وقفت عندها غيرك..ونرجع ونقولك ربي يشهد..الاء اني عارف عنك كل شي بالتفصيل الممل عارف قصتك كامله ومايعنيني منها شي كله ماضي وراح لحاله وانتي غلطتي وعرفتي غلطتك والدليل رفضك ليا انتي رفضتي بش ماتكرريش نفس الغلط او خفتي تكرريه..ابتسم وقال..عارفك وفاهمك كويس..الاء اني تفكيري مختلف وعقليتي تفرق وتربيت تربيه تخليني نعرف كيف نحكم ع الناس وع تصرفاتهم..ماتخافيش مني بكل..
هي كانت متفاجئه فيه..وحست بشي من مشاعرها تحرك معاه وهي تسمع في كلامه..كان هالمرة يدوي من قلبه وبعفويه يطلع في اللي يحس فيه واللي يفكر فيه كله وخلاها تطمنله...بس كان في تردد كبير..
عزيز:آلاء..اني مش مروح لين تعطيني اللي جاي ع خاطره..
الاء:شن هو؟
عزيز ابتسم وقال:فرصه..من حقي ناخد فرصتي معاك..
قعدت تشوفله بنظره خلت قلبه يذوب في صدره هو من غير شي عيونها سالبات عقله يبال تشوفله بنظره لطيفه زي اللي يشوف فيها توا..غيرت عيونها عنه خجلا وقعدت ساكته..
هو بإندفاع..
/نخطبك..وفي فترة الخطوبه تعرفيني اكثر صدقيني مش حتندمي واني متأكد حنخليك تقتنعي بيا وحتحبيني عاجلا ام أجلا..
رجعت شافتله لقت ع وجهه ابتسامة ثقه وغمزلها بعينه..
نزلت عيونها خجلا وقالت..
/امم..خالي يعرف..
عزيز:اكيد عطيته كلمه مايصير شي من غير علمه..
تنهدت بعدين قالت..باهي..
ضحك من قلبه بدون مايتكلم..
وهي ابتسمت خجلا بدون ماتشوفله..
تنهد بعدين قام تليفونها وقال.. شن هو الرمز ؟
الاء شبحت لتليفونها في يده بعدين ابتسمت وقالت..
7098..
هو ابتسم وكتبه بعدين خش ع لوحة الارقام وبدي يسجل في رقمه وهي تشوفله..
كانت حاسه اتجاهه بشعور راحه عجيب اول مرة تحسه..
هو قال:الاء رمزك مواليدك ومواليد بوك صح؟
لمعوا في عيونها دموع وقالت:صح..
شبحلها وقال:دورتوا عليه هلبه؟
الاء بألم:سنين..
مدلها التليفون وقال:اسف..
خداته وقالت؛ولايهمك..
عزيز:نبي نمشي ومش قادر ماصدقت رضيتي عليا..
قامت عيونها فيه وضحكت..
هو تنهد بإبتسامه وناض..
وهي ناضت معاه..
عزيز:الايام الجايه حتولي امي بس مش بروحها حيجوا معاهل مرت بوي وعماتي..
نزلت عيونها وهي مبتسمه خجلا..
عزيز بإبتسامه:بري لسيارتك..
مشت من قدامه لسيارتها وهو وراها..
شافها ركبت هو مشي ركب..راجاها لين طلعت بسيارتها وهو طول لحقها....
🍃🍃🍃🍃🍃
الساعه 4:30قبل العصر..
مقعمزات في دار المعيشه يشربوا في الشاهي الاخضر..
طوبى:تسلم عليكم خالتي سالمين..
مطيره؛كلماتك؟
طوبى:ايه قالت مرات تجي الايام الجايه مش اكيد..
فردوس:ليها وحشه..
طوبى:هلبه..
مطيره:ماكلماتكش غرفه؟
طوبى بضحكه:ايه فيديو وهدرزت ع عزارة وهي هدرزت ع جنونه..
ابتسموا..
شويه قالت فردوس:تعرفوا..الايام هادي حاسه بشي مش عارفه شن هو بش هكي مريحني هلبه..
مطيره:والله نفس الشي وحتى بوي اليوم نهدرز عليه قالي نحس في روحي الايام هادي جوي كويس هلبه..
طوبى بإبتسامه؛سبحان الله نفس الاحساس..
فردوس بضحكه دهشه:زعمة علاش!؟
طوبى بتفكير:الله اعلم..
سكتوا وهما يفكروا..
كل وحده فيهم كان في بالها سبب..هو نفس السبب بس مابوش يفصحوا عنه..ممكن من الخوف..
خوف يتأملوا في شي وفي الاخير مايصير..اختاروا يكتموه ويخلوا الامر لله وبس..
ع خشة فايزة:السلام عليكم..
كلهم ردوا عليها السلام..
قعمزت وهي تقول:شن جو اليوم..
فردوس:الحمد لله تمام..انتي شن صار معاك اليوم..
فايزة:الحمد لله الامور تمام والامن مستتب..
طوبى ابتسمت وقالت:الحمد لله كل ساعه وفرجها..
مطيره:ايه والله الحمد لله..نصبلك شاهي..
فايزة:لالا..تنهدت وقالت..اليوم جوني اللفع الزوز للمركز خديجه وهديكا السنكوحه..
طوبى عقدت حواجبها بضيق..
مطيره بكره:شن يبوا؟
فايزة تهكما؛جايات يصدروا..
فردوس شبحت لطوبى..
فايزة:لولا نسرين راني لزيتهم لكن قلتلها في الجديد بنديرها..
طوبى:هما معاش يجوك...اللي يبوا يصلوه وصلوه..
فايزة:اني قلت مانبيكش تعرفي من برا وتزعلي.
طوبى:ماعندي علاش نزعل عارفه كيف يفكروا ولشن بيوصلوا..
مطيره بغيظ؛وكان نوصل فيهم بس ربي يعطيني فيهم فرصه..
فردوس قعدت مركزه ع عيونه طوبى كانوا عكس ملامح وجهها اللي تبان عاديه..
مطيره؛معناها بيمشوا مع عيت الساحلي بيرفعوا الكسوة!
ابتسمت طوبى تهكما..
فردوس:ماتستغربيش ياعمتي الناس هكي ولوا دينهم النفاق..
فايزة بضيق:سامحيني طوبى..
طوبى بضحكه؛وسعي بالك خيرك شن صار مافي شي مهم بكل.
خلونا نغيروا سيرتهم وقوليلي عروسة هداكا اليوم مااتصلتش بيك؟
فايزة بضحكه:لااتصلت ياحنه وماخلت ماشكرت واسمعي احتمال يطلبوك بالإسم..حاولي تفكري في الموضوع..
طوبى:في شن نفكر!؟ ماعنديش ليه وقت..وقتي كله بين قرايتي وبنتي..
مطيره وهي تسمع فيها كانت تقول في نفسها..
"ياريت تسمع منها وتخدم معاها وضع المطحن بالهون والباين معاش بيصير منه والحوش يبي مصروف"
فايزة:زيدي فكري وحاولي مرات تقدري..
طوبى:لالا مافيهاش كيف ماتفكريش فيا بكل..
فايزة:براحتك...
هي ناضت وقالت:خل نمشي نشوف جنونه..ومشت بتطلع..
فايزة:كان ناضت جيبيها..
طوبى من برا..
"باهي"
مطيره بصوت منخفض..
/عطيهم مايقطف شتلتهم..
فردوس بألم وغضب:آمين..
فايزة بحزن:حسبنا الله ونعم الوكيل...
🍃🍃🍃🍃
بعد العصر..
في حوش شنيبه..
تحديدا جناح الجالي..كان مقعمز ع السرير..
في يده اليسار تليفونه يتفرج فيه ع صورة جنة..
وفيده اليسار سلسلة امها و"فولار" لطوبى كان مقربه لأنفه ويشم في ريحتها..
دموعه في عيونه والحزن اللي يحس بيه ع عمقه كان مرافق لغضب شديد..
ومقابله...
كان التارقي خاش للدار اللي فاتح الفيرندا متاعها كان ناوي يبدا يخدم ع لوحات للمعرض..وهو ماشي بيسكر الفيرندا يجوا عيونه ع الجالي والحاله اللي هو فيها..
ويحس بنار ولعت فيه من رجليه ركبت لراسه...سكر الفيرندا.
ونزل السيرانتي..
يتلفت الجالي يشوف للفيرندا متاعه..رفعه حاجبه بعدين هز راسه بوعيد..
🍃تحت في الدور الاول..
طلعت مغليه من دار نومها وهي بكامل اناقتها لابسه تركيبه حرير لونها ارزق ملكي ومطلعه قصه"جمة" لونها بني غامق..
كانت طالعه حلوة بمعنى الكلمه..قعدت تمشي تكبرا كعادتها..
ع خشة ولدها نضال اللي راها عجباته وبدي يغنيلها...
تاتك تاتك ياسمحه في خواتك..راني عليك نغني يابنيه بابتك ياتاتك..وصل فيها وهويقول..
/تي شن هدا يام شني..وضمها وباسها ع راسها..
وهي تضحك..
تباعد وقال:وينك ياحميدا وين..
ضرباته ع صدره وهي تضحك..
ع نزله الجالي ووراه عمر..شافوها كيف طالعه ابتسموا..
عمر:اشيه اشيه اشيه تي شن هدا ياموغي شنو..
مغليه بضحكه احراج:خلاص انت وياه عاد..
الجالي اتكي ع سياج الدروج وبدي يغني..
/كل ماتكبر تحلى وتصير احلى احلى..
هي ضحكت بعدين قالت..
/مرتك في شقتها برا شوفها..
هو ابتسم غصبا وهز راسه ومشي طلع من الحوش..
تنهدت مغليه بضيق..
عمر:يللا..المهم اني طالع وبنعطل ماتنشغلوش عليا..
مغليه:في امان الله..
مشي عمر..
ونضال قال:راكب..
مغليه:غداك في الكوشه..
هز راسه وركب الدروج..وهي بدت تلبس في عبايتها..
🍃الجالي وين خش الشقه وشاف نجاة بالبدله الصغيره عجباته..بس عيونه خلوه يتخيل طويى اللي تطلع في العربي حكاية تانيه..صورها قاعدات عنده ولازم يوميا يشوفهم ويتأملهم..
قدم لنجاه..وطبع قبله ع جبينها قدام عيون صغارها اللي كانوا فرحانين..
بعدين طلع من جيبه علبة مجوهرات فيهم حديده ثقيله ولبسهالها وهي بطير من فرحتها..
🍃🍃🍃🍃🍃
"صار وجه شر يااشرف الشياطين! لكن باهي تو نفضالكم"
راما:خلينا منهم..مامي طالعه تحفه..
خديجه بضحكه:حتى ببطني هادي؟
راما:زاداتك زين.
قرصتها من خدها وقالت:حتى بنتي اللي قاعده تكبر وتزيد حلاوة..البسي عبايتك هي..
لبست راما العبايه والوشاح..ع خشة محي الدين..
/تو بالله هدا وقته تقدريه انتي هدا وهدا وضعك..
خديجه بضحكه:نقدر نقدر غير هيا معاش في وقت..
محي:بابا راما بري انتي الاولى..
راما طلعت..
وهو جي لخديجه وساعدها في لبس عبايتها وبعدين طلعها...
🍃ويصبح حديث الساعه في شارع القهوة نجاة اللي مشت صدارة مع عيلة شنيبه...
وتزيد الدوة بعد مايشوفوها في السهريه في الليل وهي لابسه افارول اسود لماع ومدايره تسريحه حلوة وكانت طالعه جدا جميله..هدا غير المجوهرات اللي كانت تلبس فيهم..
الناس وين شافوا وضعها هدا كان مضمون احاديثهم اللي دور عليها..
:شكله يحبها حق ياكبدي شوفي شن ولت تلبس بعد خداها..
:تخطر عليا بنت الواعر في عرس نجاح الصيد كيف كانت مسلوبه وشوفي هادي مدندشه بالذهب..
:ايه متفكرتها واستغربت فيها..ياحنه مغصوب عليها غصب مش زي هادي اللي يبيها ومشى كلمته ع ماليه وخداها..
:وعلاش مايطلق بنت الواعر؟
:ع خاطر بنته قالوا مايبيش يطلقها ع خاطر البنت..
//////
وفي من يقول..
:وجعتني طوبى الحق مسكينه مقلب كلاته في عمرها اني اللي مادخليش انحرقت.
:الحق ع ماليه عارفين يبي نجاة خلوه ياخدها..
:صدقتي..نصيبها الله غالب .
:لكن هالنجاة عطيها دعوة ماتنعطى عمرها بكل..
:صدقتي..شفتيها كيف طالعه..؟
:الحق ماينلام الجالي...
ضحكوا الزوز...
🍀وغير هالاحاديث في هلبه وكلها تتلخص في شي واحد
ان اللي صار عادي ومافيشي مشكله وفي النهايه الجالي معذور..ويادار مادخلك شر....!🍀
🍃🍃🍃🍃
"بصراحه عجبني"
الاء ابتسمت وقالت؛وانتي بيبو شن رايك؟
طوبى بضحكه:الراجل هدا دعائك اللي ديما شادتيه..
اريج بضحكه؛صح صح والله صح..
لمعوا عيونه الاء بفرحه وهي تقول..
/زعمه؟
طوبى بإبتسامه:الحق اني مستريحه وحاساته شاب كويس بغض النظر عن معرفته لمختار..
اريج:ومادام مصر عليك هكي معناها يحبك بصدق..عطيه فرصته زي ماقالك..
تنهدت وقالت:ان شاء الله خير..
الزوز قالوا:ان شاء الله..
سكتوا وهما يسمعوا في الزمزامات..
طوبى:خاطري في عرس..
قعدوا يشبحولها شويه بعدين اريج قالت..
/عندنا عرس في العيله..
طوبى بإبتسامه؛مش حترجعوه كان قعدتوا عنه وهو الله يرحمه كان يحب يتفائل واني زيه..بروا للعرس ومادوروا شي..اصلا خلاص سكر خمسه شهور متوفي والحزن تلاته اياك بس..
الاء:عادي تمشي معانا؟
شدت دمعتها بقوة وخفتها بإبتسامه وهي تحرك في راسها بالنفي..
هما مابوش يصروا عليها واريج طول غير الموضوع..
وهدرزوا في حاجات تانيه لين جاهم النوم ورقدوا وقعدت طوبى سهرانه مع جنتها اللي ناضت عطشانه..ومع دموعها اللي طلقت سراحهم...
🍃🍃🍃🍃🍃🍃
ويجي يوم الخميس..
وكان يوم الدخول في الصاله..
وتطلع نجاه بطله اجمل من اللي قبلها والفستان اللي لبستها كان محط انظار الحاضرات غير طقم الذهب اللي كانت لابساته...
وهي وين تشوف نظرات الناس ليها تنفش ريشها بزياده وخلت كل من يشوفها يعذر الجالي ع اللي داره الف مرة..
🍃في جنان حوش شنيبه..
كانت ماشيه بأتجاه شقتها مع جوري..
وقفت فجأه..لما سمعت نسرين تنادي فيها..
رفعت حاجبها والتفتت..
وصلت فيها نسرين وقالت:جوري قلبي اسبقي ماما للشقه.
جوري شافت لأمها هزت نجاة راسها مواقفة وهي طول مشت..
نسرين راجعت لين البنت اختفت وقالت..
/ديري ماديري مش حتغيري شي..ولاحتقدري اصلا..كل اللي يدير فيه الجالي معاك هدفه منه يحرق قلب طوبى زي ماهي حرقت قلبه اللي بيهبل عليها..ع باله الجالي ان طوبى تحبه وباللي يدير فيه مش حتتحمل وتوليله مسكين وانتي مسكينه اكثر منه..
نجاه تنهدت تهكما وقالت..
/كملتي؟
نسرين:ايه..ابتسمت استفزازا..
نجاه بنفس الابتسامه:تصبحي ع خير رويجلي يراجي فيا.
ولفت ومشت بغرور..
ضحكت نسرين سخرية وقالت..
/مسكينه..ولفت ومشت بتطلع لراجلها...
🍃🍃🍃🍃🍃
يوم الأحد..
7اكتوبر...سنة 2018...
الساعه 7:30مساءا..
في شقة فايزة..
تحديدا في دار مروة وتاله..
كانت مروة لاهيه في القرايه...لكن تاله طارحه كتاباتها قدامها وسرحانه بتفكيرها بعيد عنهم...
استاقظت من سرحانها وشافت لأختها وقالت..
/مروة..
مروة شافتلها..
تاله:نبي نتحجب..
ابتسمت مروة بإستغراب..
تاله:شوفي سدرة اصغر مني ومتحجبه حتى شرت عبايه..
مروة:يعني انتي تبي تتحجبي زي سدرة؟
تاله:ايه..ونحس فيه هكي احسن..
مروة وهي مبتسمه:كيف هكي احسن؟
تاله:نحس هكي البنت تولي محترمه اكثر..
ضحكت مروة..
تاله:ندوي بجد..
مروة بضحكه:عارفه..اني فرحانه بيك اللي فكرتي في الحاجه هادي بكري..
تاله ابتسمت؛بنقول لماما..
مروة بضحكه؛بري..
ناضت تاله متحمسه ومشت طلعت من الدار..
وخلت مروة تتفكر كيف خدت قرار لبس الحجاب..
تنهدت وقالت في نفسها..
"الخير الوحيد اللي مستحيل ننساهوله"
☘في نفس الوقت في دار صفاء..
فايزة:تعرفي علاش جو نجاح وسميرة ولا؟
صفاء هز راسها بإيجاب..
فايزة:متفاهمه انتي واشرف؟
صفاء:ايه ماما..وشايفه ان هكي خير..
فايزة تنهدت وقالت..
/حتى اني بالذات بعد اللي صار اخر مرة...كلمت بنات عمي لطفي وعطوني الاذن بس ياماما حندير يوم واحد في الصاه حفله مشتركه بينا وسهريه بسيطه مش هاين عليا فوق الحزن ع جدك لطفي حال بنته..نزلوا دموعها وقالت..سدرة كانت ديما تقول اني بنقيم عرس صفاء...نزلت عيونها وقعدت تبكي..
ودموع صفاء نزلوا زي السيل..
تماسكت فايزة وقالت:حتى اني ياماما تزوجت من غير عرس لكن عشت احلى ايام عمري مع بوك الله يرحمه راجل لاقبله ولابعده..حتى اشرف راجل كويس وان شاء الله يكون قدرك خير من قدر امك يارب..
صفاء جت لأمها وقفت حداها وضمتها وباست راسها..
وفايزة تبكي بصمت في حضنها..
ويدق باب الدار..
تباعدت صفاء وهي شاده امها وقالت..
/خشي..
فتحت تاله الباب وخشت وشافتهم يبكوا انفجعت وقالت..
/خيركم؟
فايزة بضحكه من بين دموعها..
/بنديروا عرس صفاء..
تاله بفرحه؛حقه!؟ وقعدت تزغرط.
ضحكوا امها واختها..
وهي بضحكه قالت..
/واني بنتحجب ماما..
فتحت فايزة حضنها وقالت..
/تعالي ياقلبي تعالي..
ومشت جري لأمها وخشت حضنها وفايزة ضمتها بقوة..
وصفاء تشوفلهم بحب وهي تمسح في دموعها...
🍃🍃🍃🍃🍃
واقفه في البالكونه وفيدها تليفونها تشوف في ستوريات اختها اللي خدتهم من عرس اقارب راجلها..
كانت حاقده عليها لأبعد حد..
فجأه جاها اتصال..
خشت طول داخل وسكرت الباب وردت..
صابرين:ايوه شن صار معاك..
"بالحباب والكباب لقيتلك موعد غدوة العشيه بعد العصر تكون غادي"
صابرين:خلاص خلاص..صحيتي حبيبتي..
"اني في الخدمه بيرو..ماتبي شي قلبي"
صابرين:سلامتك حبيبتي..تصبحي ع خير..وسكرت عليها..
ع دقه باب دارها..
صابرين:خش..
انفتح الباب وخشت الشغاله..
/استاذ مختار عاوزك في المكتب..
هي هزت راسها وقالت..
/تمام..
طلعت الشغاله...وهي خدت نفسها ولحقتها..
🍃نزلت لوطا ومشت للمكتب خشتله لقت فيه رضا واقف ع مختار يوري فيه ملف..
قعدت تشوفله بكره..
مختار وهو لاهي بالملف..
/خشي..
خشت..ورضا ماقامش عينه فيها..
قعدت واقفه تستنى لين كملوا..
مختار:خلاص غدوة وصله..
رضا:تم..
مختار:تقدر تمشي..
رضا مشي طلع بدون مايشوف لصابرين..
مختار بعد ماطلع قدم لصابرين وهو يشوف لخدها قال..
/لاخلاص رجعنا حلوين زي ماكنا..
يدوب ابتسمت..
مختار شاف لعيونها وقال..
/ليك مدة مجافيه..
هي قالت..
/نفسيتي ملخبطه شوي..
مختار بإبتسامه..
/نعدهالك..
هي قالت..
/اسفه..حاسه روحي مانبيش..
هو قعد يشوف لعيونها هلبه..
وهي نزلتهم هربا منهم...معاش يسحروا فيها زي قبل بدت تضايق من نظراتهم..
هو تنهد وقال..
/تعرفيني بالاجبار مانحبش..مش مشكله تقدري تمشي ترتاحي..
صابرين شبحتله وقالت..
/غدوة بنمشي مشوار مع وحده من صاحباتي..
هو قال..
/خودي راحتك وغيري جوك..
بمجامله ابتسمت وقالت:شكرا..تصبح ع خير.
هو قال:وانتي من اهله..
مشت من قدامه بسرعه وطلعت..وهو قعد يشبح للباب اللي طلعت منه وعقله يفكر..
🍃ركبت الدروج وهي تقول في نفسها..
"مش حتقربني مرة تانيه الا بالحلال بعد مانولي مرتك غصبا قهرا"..
ووصلت في دارها وخشت سكرتها عليها..
ومنها طلعت للبالكونه بش تاخد نفس وتطرد التوتر..
فجأه سمعت صوت اغنيه..
نزلت عيونها..شافت رضا في مكانه المعهود قدامه لاب توب وهو اللي مشغل فيه الاغنيه..
وفيده نفس الملف اللي خداه من مختار يشوف فيه..
قعدت تشوفله وهي تسمع في الأغنيه...
شو بحبك لما بتحكي..ترسم ع شفافك ضحكه..
شوبحبك لما بتبكي وتشكي وعم تغلغل في..
هو هني علا الصوت لأخره...
رفعت حواجبها تعجبا..
هو قام عيونه وقعديشوفلها بنظره ظاهرها ساخر..
ومعاش نزل عيونه...
قلبت عيونها كرها وغرورا وغيرت نظرها القدام..
هو ابتسم ابتسامه جانبيه..
وقعدوا عيونه عليها معاش نزلهم..
لعند ماسمع مختار وهو يقول..
/اوو وائل..
وقدم وبدي يغني مع الاغنيه وقف جنب رضا وقام عيونه في صابرين لقاها تشوفله..
وبدي يغنيلها ويأشر عليها..
ياحبيبي انت الغالي انت قمر الليالي..
وكمل يغني.
وصابرين قعدت تضحك عليه وع حركاته..
ورضا يضرب بأصابعه ع الطاوله بعصبيه..وياكل في شفه السفلي بغضب..
ومختار مكمل في الفيديو الكليب متاعه هو وصابرين.
لعند ماجي فاصل..نزل راسه لرضا وقدم نقص الصوت وقاله..
/كويس انك تراجع فيهم..
هو هز راسه بصمت...
مختار:اني طالع ومش مروح الليله...
ورجع علا الصوت لأخره..وتوجه بطريقه لسيارته..
لف وقعد يمشي للخلف ورفع نظره لصابرين وكمل يغنيلها في الاغنيه..
لين وصل في السياره وفتح الباب وقعد واقف يغني.
وصابرين منسجمه وتضحك...
هو رفع يده وحياها بعدين ركب السيارة..وتحرك..
هي غيرت نظرها عنه لرضا..
لقاته يشوفلها..هالمرة نظراته كانت غريبه ماقدرتش تفهمها قعدت تشوفله وخلاص وهو  يشوفلها...
ومجرد ماتمت الاغنيه هي استاقظت تبدلوا نظراتها للحده ولفت خشت داخل..
اما هو سكر اللاب بقوة من الغضب...
🍃🍃🍃🍃🍃🍃
تاني يوم..
الاثنين...
مع العصريات..جو ام وزوجة اب وعمات عبد العزيز لحوش لطفي الواعر بش يطلبوا آلاء..
الاء في هداكا اليوم كانت حاسه بشعور راحه فقط لاغير ..
لبست وتأنقت وطلعت للنساوين..
ام عزيز كانت فرحانه بيها والباقي عجبتهم هلبه..
وهي زاد شعورها بالراحه...
بعد ماطلعت..اتفقوا النساوين موعد يتلاقوا فيه الرجاله..
وطبعا فردوس خلتهم يتواصلوا مع حوش اهل راجلها بش تكون الفضانيه غادي وحتى هي كان الموضوع عاجبها ومرتاحتله هلبه..
☘فردوس:ناس كويسه الحق..
طوبى:حتى اني عجبوني بس امه اكثر مراة محافظه وراقيه بزياده..
فردوس بإبتسامه:صح..
مطيره بفرحه:ربي يكمل ع خير وربي يكثر افراحنا يارب..
كلهم آمنوا ورا دعائها..
☘عند البنات في دارهم..
الاء وهي تكلم في غرفه فيديو..
/الحمد لله نحس في روحي مرتاحه.
"وهادي اهم حاجه..وعاد اهو جاك المعبي اللي عايش برا اللي بيهججك برا ليبيا"
ضحكوا اريج وآلاء..
والاء لما حست ان ربي استجاب دعائها وزادت تفائلت اكثر واكثر..
☘اما عزيز فكان فرحان بشكل لايوصف حس ان كل شي حواليها ولى يضحك جماد ولاكائن حي..
وقعد يراجي بفارغ الصبر امتى ربي يجمع بآلاء بالحلال وتكون معاه وين مايكون.....
☘☘☘☘☘
في احد الاحياء الشعبيه المجهوله...
كانت تخش من زنقه تطلع من زنقه وهي لابسه ملايه بخمار..
وين خلاص قربت توصل لعنوان الدجاله اللي دلتها عليها صاحبتها..
ماتندريش ع روحها الا وهي مسحوبه من يدها بقوة..
من الرعب حست قلبها طاح في احشائها..
انخبط ظهرها ع حيط خشن بقوة..
والخمار اللي لابساته انقام بعصبيه..
هي انصدمت لما شافاته قدامها يشوفلها بنظرات كلها غضب.
رضا بغضب:كل شي حقير في الدنيا درتيه ماخليتي شي..
هي قالت بحده..
/انت مادخلكش مادخلكش..
نزللها خمارها ع وجهها وجبدها وقعد يجر فيها لين وصلها للسياره..فتح الباب وركبها وسكره بقوة...ومشي ركب..
كانت السياره"دبل قابينه مظلمه"
وهو كان لابس كاجوال هالمره سوريه هاديه وسروال جينز وطاقيه.. هدا كله بش مايلفتش نظر..
تحرك بالسيارة..
والزوز ولاكلمه...
مجرد ماتباعدوا ع المكان هو بدي يتكلم..
رضا:دوري شن تبرري للأستاذ دوري..
هي رفعت الخمار وقالت بعصبيه..
/انت هدا اللي تبيه تبي طلعني من غادي وخلاص لكن بعدك والله ماهي صايره..
كانت تتكلم بعياط وصوتها نوعه رقيق ومبحوح..
هو قعد يقلد فيها..
/بعدك والله ماهي صايره..وقعد يعيط بطريقتها..