طوبى ☕شارع القهوة☕

الجزء_الخامس_والتسعين

#طوبى  "جنة طوبى"
#جمان_فريد
#الجزء_الخامس_والتسعين"مراد قلبي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الأذكار
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه.“
- ابن كثير. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 عندما رأيتُها أوَّلَ مرَّةٍ قلتُ
هذه هي التي خُلِقَتْ من ضِلعي
أنا متأكد من هذا !
الرافعي🍃
_________________________________________
سمع صوت حركه وقف بسرعه لوح السيجار من فوق..
ورجع قعمز وخدي المصحف ع البلوكه"طوبه" وفتحه ع اساس يقرا فيه..
ويوصل عمه..ويشوفله ويمشيله..
وقف عليه وقال:نوض ترا..
رفع عيونه في عمه وقال..
/علاش!؟
اشرف؛قتلك نوض..
ناض محمد..وبحركه سريعه جبد اشرف المصحف وقرب شمه ومحمد يرجف من الخوف وهو يقول..
/شن في!..
تباعد عنه اشرف وخبطه بقوة ع ظهره وهو يقول..
/دخن! وفي نهار رمضان يامسخ!..
ودفه قدامه وهو يقول..تفي عليك وع ربايتك المعفنه..
محمد نزل راسه لما شاف ولد عمه..
وكان في قمه الغضب ولأنه يخاف من عمه اشرف ماردش بكلمه..
مشي نزل واشرف وراه..ضربه بقوة ع قفاه وهو يقول..
/عمل يهود يايهودي يافاسد..ويرجع يضربه ع قفاه..
محمد ماتحملش..بدي يبكي وهو يقول بعصبيه..
/خلاص...وقال لفظ نابي..
اشرف جبده وقعد يكر فيه وهو نازل من الدروج..
مد المصحف لولد عبد الفتاح وهو يقول بعصبيه..
/شد..
خدي الولد المصحف وهو خايف..
ويبدا اشرف في محمد ضرب وين مايجي ومحمد يقول بوجع وخوف..
/خلاص..خلاص..والله معاد نعاودها...
🍃صوته وصل للكوجينه عماته وصفاء وسميره اللي كانوا فيها سمعوه وانفجعوا..
نجاح؛هدا شني!؟؟
ومشت طلعت من جنان الكوجينه وعواطف بس اللي لحقتها تبعوا الصوت لين بان عليهم اشرف وهو واخد عصا ويضرب في محمد..
نجاح بصدمه؛اشرف!
اشرف بغصب:اسكتي مانبي نسمع صوت حد..
ويخبط والولد يصيح من الوجع..
🍃وتطلع خديجه من الشقه وهي مرعوبه تقول..
/صوت ولدي هدا!؟
شافولها حمواتها بدون مايتكلموا..
هي نزلت تجري وبنتها وراها..
وصلت لوطا وقدمت تجري..وتوقف في مكانها لما تشوف ولدها تحت رجلين عمه وهو يضرب فيه بالعصا..
خديجه بذعر:علاش ياأشرف شن دار!؟
وقف اشرف ضرب وخر عنه وقال..
/شن مادارش قولي! ولدك اللي نسمع فيه عنه يدرق منه الشيطان وجهه وتوا بعيني نشوفه في نهار رمضان يدخن..
خواته انصدموا..
ومحمد حاط وجهه ع الارض وهو يبكي ويقول.
/كذب كذب..
ضربه عمه برجله وقال..
/ضم فمك ياحيوان ضم..
خديجه وهي ترجف..
/متأكد ياأشرف! شفته بعينك مستحيل ولدي يدير هكي!
اشرف؛لاولدك يدير اكبرمن  هكي! لكن الكلام مع بوه لازم يديرله حل..يربيه من اول وجديد..ومش غير هو..اشر بالعصا ع راما وقال..حتى هديكا..لبسك ولى معفن والشكالات اللي مصاحبتيهم ماينفعوش..نشوف في كل شي وساكت ونقول بالك يتصلح الحال..لكن الحال قاعد يولي من سيء لأسوأ وطيتوا رووسنا الزفت!..
🍃وصفاء وسميره طلعوا وقفوا فم الكوجينه وهما يسمعوا في اشرف شن يقول..
مش بس هما..
حتى سميرة من جنان حوشها واقفه وتسمع وهي مصدومه..
وتنصدم زياده لما تسمع رد خديجه عليه..
🍃خديجه بمكابره وتهكم..
/صار حني اللي وطينا راسك ياسيد اشرف!!برا اسأل عن اخت مرتك وشوف شن دايره بعدين قول من اللي وطا راسك حق..
صفاء بعدم استيعاب:شن تقول هادي!..
ومشت ناحيتهم وسميره لحقتها وهي تنادي..
/صفاء!..
اشرف بإزدراء:بالله تعالي بري اركبي لشقتك ماتخلنيش نديرها معاك..
راما بغيظ..
/برا اسأل عن واحد اسمه مالك**** واعرف من هو وشن علاقته بمروة!
وقفت صفاء وهي تشوف لراما بصدمه..
التفتت راما لعمتها نجاح وقالت..
/نفسه الولد اللي شديتوها معاه ياعمتي ورا المدرسه..
صفاء بعصبيه ودموعها..
/سكري فمك ياقليلة ادب والربايه تحسابي اختك زيك تهدرز بتليفون مع الولاد..!
خديجه؛ضمي فمك خيرلك! بنتي متربيه مش زيكم انتم اللي مش لاقيات حد يلمكم..
صفاء فقدت اعصابها قدمت لخديجه بتضربها شدوها عنها حمواتها..
بإنفعال شديد قالت..
/مش غريب عليك ياما افتريتي ع الناس وطعنتي فيهم لكن ربي فوقك وتو تشوفي كيف يردهولك كله انتي وبنتك الضايعه..
نجاح بغضب:خديجه خودي صغارك واركبي..
رفعت حاجبها بمكر وهي تشوف لصفاء بعدين التفتت ع ولدها وقالت..
/تعالى ولدي تعالى..
ناض محمد بشي من الصعوبه وهو متشمت في عمه..
اللي قعد واقف في مكانه يفكر في اللي سمعه من راما..
هو  يعرف مالك من مشكلة صفاء...عزموه حتى ع الفاتحه وحفلة الدخول في عرسه..وصار بينهم مشي وجي مؤخرا..
وصفاء ولا مرة لمحت حتى التلميح بقصة علاقته مع اختها..
حست للحظه انه مستغفل..حس بشعور فيه شي من النفور اتجاه صفاء وامها وخواتها..
لوح العصا ومشي طول لباب الحوش فتحه وطلع..
🍃وخديجه ركبت ببنتها وولدها وهي تقول..
/حاطين صغاري في رووسهم واضحه..كان تبوا تجلونا قولوا نطلعوا ونخلوهالكم واسعه وعريضه..
وصلوا في الباب وهي تقول..
/خش ولدي خش..
خش محمد وهو يمشي بتعب وخشت بعده اخته..
وخديجه قالت قبل لتخش..
/حسبي الله ونعم الوكيل..
وخبطت الباب بقوة..
🍃وصفاء خدوها حماواتها لجهة الكوجينه..
قعمزوها ع كرسي..وبكت بحرقه وهي تدعي ع خديجه وراها..
🍃🍃🍃
خديجه اللي بعد ماخشت شقتها ماخلت ماقالت لولدها من هزايب ومسبات وهو تعارك معاها وخش داره وسكرها عليه..
التفتت بعده لراما شدتها من ذراعها بقوة وهي تقول..
/شن تقول الحقيره هديكا!!؟
راما؛قصدك صدقتيها ماما! بلعاني تبي تبعد الكلام عن اختها قالت هكي..
خديجه تمعنت فيها بنظرات شك وحده بعدين طلقتها وقالت..
/انتلفي لدارك وياويلك نشوف عليك شي.
مشت راما وهي خايفه خشت دارها وسكرت الباب..
وامها مشت للكوجينه بعصبيه وهي تقول..
/شيطوا ريقي الله يشيط ريقكم..
🍃🍃🍃🍃🍃
في هالوقت..
روح التارقي من الخدمه..درس سياره قدام حوش المهدي وهو يشوف في الحاج علي ماشي لحوشه..
نزل من السيارة وتوجهله..
"خير ياتارقي"
عبد القيوم بإبتسامه..
/خير ياوجدي خير..
سمع علي صوته وقف والتفت بش يشوفه لقاه جاي ناحيته ابتسم..
وصل فيه وقال بإبتسامه..
/حاج علي شن حالك..
علي الواعر:الحمد لله ياولدي الحمد لله..
عبد القيوم بإبتسامه..
/ليا وقت ماشفتك ولاعاد تلاقينا..
علي:انت اللي لاهي علينا..
عبد القيوم؛العمل واخد اغلب نهاري بين الشركه وبين الخدمه في حوش واحد نعرفه..لكن اليوم فاضي ومعاش عندي شي كان يعني بتعزموني مش حنقول لا..
علي:ياسيدي خالتك مطيره قبل ناويه فطورك يوصلك من عندنا كل يوم لكن انت غيرت ع السوري
هو تلهف لهفه خفاها في نفسه لما بهدوء مصطنع مع ضحكه..
/لا الموضوع مش هك..القصه ومافيها انهم معتبرين اللي درته معاهم معروف ويبوا يردوه ليا تموا يعزموا ويحسبوا في ع الفطور..
علي:فيهم خير..حط يده ع كتفه وقال ..خلاص فطورك عندنا اليوم.
ضحك وقال تصنعا..
/لالا كنت نابش بس...
علي؛واني نحكي جد انت بتفطر معاي اليوم..
عبد القيوم بضحكه..
/خليها يوم تاني مرات مش دايرين حسابهم..
علي؛لاديما الخير عندنا بزايد والحمد لله..خلاص معاش تناقش تعال قبل المغرب..
ابتسم وقال:إن شاء الله إن شاء الله..بارك الله فيك..
طبطب ع كتفه..
عبد القيوم بإبتسامه:السلام عليكم..
علي؛وعليكم السلام..
وكمل علي طريقه لحوشه..وتوجه عبد القيوم لحوش المهدي وهو فرحان ومزهزه..
وين وصل في الحوش وخش وقف في مكانه لما سأل في نفسه..شن بيرفع معاه..!..
فكر شويه ولما وصل لنتيجه بدي طول في تنفيدها...
🍃عجن خبزة فرن ودار منها خمسه فردات كبار يشهوا..
بعدين طلع لمحل حلو..وخدي بكلاوة..وعسلة وزلابيه..
وهو مروح وقف ع سنفاز..خدي منه تلاته فردات كبار..
وماوصل في الشارع الا والمغرب ع وشك..
طول درس سيارته قدام حوش حبيبة القلب..🌼
☘☘☘☘☘
مطيره بإبتسامه بهجه:الله يبارك ع الخبزة..
اريج بشهيه:تسهف..ولاالسفنز!
فردوس بإبتسامه؛مافكركش بأيام زمان عمتي كيف كان بوي الله يرحمه يروح قبل المغرب بالعسله والزلابيه والسفنز..
مطيره وهي مبتسمه بحنين..
/والله من لما شميت ريحة السفنز تفكرت هديكا الأيام..
اريج؛عندها حق الاء صراحه الراجل هدا جنتل ولطيف هلبه..
🌼وطوبى تسمع فيهم وهي تزين في صونيه البسيسه بالمكسرات والشاميه..
قلبها وين تجي سيرته يرتبك..وتوا وهما يمدحوا فيه حست ان صوت نبضاته مسموع في الكوجينه كلها بالذات بعد ماربطوا اللي داره بأكثر راجل حباته في حياتها..
🍃وعبد القيوم اللي داره ماكانش صدفه..كان مقصود..
ياما سامع لطفي الواعر وبوه يهدرزوا قدامه عن ايام زمان وذكرياتهم فيها..وهو حب يستغل الشي هدا اليوم بش يوصل اشاره لأم العيون الحايره لعلها تناشب قلبها وتخليه يلفتله..
🍃🍃🍃🍃🍃
بعد المغرب..
مشت صفاء لجناحها وقعدت..كانت حاسه بضيق وتعب..
وهي متمدده ع السرير كانت تفكر في اللي صار اليوم وردة فعل راجلها بعد اللي سمعه من بنت خوه..
خافت هلبه..خافت تتغير نظرة اشرف ليهم..خافت يتغير عليها...
وفي نفس الوقت تسائلت عن حقيقة اللي قالاته راما..
تفكرت الفترة اللي كانت فيها مروة مش ع طبيعتها وقعدت مده قاطعه علاقتها بمناسك..
ناضت قعمزت وخدت تليفونها من ع الكامدينو...
حطت ع رقم اختها واتصلت بيها..
🍃ومروة وقتها كانت في الكوجينه توتي في سفرة العشي بعد ماصلت المغرب..
خشت عليها اختها تاله بالتليفون وهي تتكلم بيه وتقول..
/اهيا..مدت التليفون لمروة وقالت..صفاء..
خدت مروة التليفون وحطاته ع وذنها وردت..
/صح فطورك صفو..
"سلمك..صح فطوركم"
مروة:سلمك ياحنه..
"مروة نبيك تجيني بعدين"
مروة بإستغراب..
/علاش؟
"لما تجي تعرفي"
مروة:حسك خوفتيني..
"ماتخافيش حاجه عاديه.."
مروة؛باهي..هو حني الليله قبل بنسهروا في حوش جدي لطفي بس تو نقول لماما تمشي هي وتاله ونجيك..
"باهي تمام سلام"..ونهت المكالمه..
استغربت فيها مروة وهي تقول..
/غريبه ماسألتش شن درنا فطور!..
تاله:تبيك تجيها؟
مروة:ايه..نحس فيها تبيني نديرلها حاجه..
"وين العشي يامروة"
مروة:توا بنجيبه..تاله ارفعي المفرش..
خدت تاله المفرش ورفعاته..ومروة حطت العصير في السفره بعدين رفعتها وطلعت بيها...
🍃🍃🍃🍃🍃
وع الفطور ملتمين محمد شنيبه وعيلته ماعدا محمد المهدي ويزن اللي يفطروا برواحهم في شقتهم..
المهدي:يحكي ع الدمار قال شي رهيب..
محمد شنيبه:واحد نعرفه  قال الخله ولت خراب..
نضال:شن صار في المفاوضات اللي قالوا عليها؟
محمد؛دوة فاضيه ماتفاهموا ع شي..
المهدي:في آليات عسكريه وصلت اليوم..
سميره:كان هكي معناها الحكايه مازال مطوله..
المهدي:كان قعدت ع الكر والفر اكيد..
سميره بضيق:غير يخلوا الناس تاخد نفس في العيد حتى نهار..
نضال:ماريحوهم في هالشهر المبارك بيريحوهم في العيد..
سميره بحسره؛حسبنا الله ونعم الوكيل..
مغليه بإنزعاج؛معاش تمزرط ياولد اركح..
كلهم شافوا لمعاذ اللي انفجع من صوت مغليه..
خداته سميره حطاته ع حجرها وعطاته خبزة وهي تقول..
/خود هادي حبيبي...
خداها وبدي ياكل فيها..
وحمزة وجوري يشوفوا لخوهم بضيق..
تنهد محمد شنيبه وقال..
/لما بتمشي لحوش الواعر بعدين ارفعيهم معاك.
سميره بإبتسامه؛حاضر..
سدرةبفرحه؛بنمشوا لأبله طوبى؟
ابتسم المهدي..
سميره بضحكه:ايه..
جوري بحماس:بنرفع معاي قطوستي..
سميره:مغلى عليها القطاطيس ارفعي ارفعي..
ضحك محمد شنيبه وقال..
/استاحشت قطوستنا حني..كان فيها كيف تجيبيها مرة تانيه..
المهدي:ليا وقت عليها..
نضال بضحكه:كان تشوفها كيف ولت الله يبارك..
سدره؛عيونها زرق زي البجر..
المهدي بضحكه:الله يبارك..
ومغليه تسمع فيهم وهي ع اعصابها وقداش تمنت لو تقدر تقلب عليهم السفره...
🍃🍃🍃🍃
وفي حوش خالة جنة...
اللي كانت مقعمزة تفطر بصمت مع راجلها..وصغارهم حداهم مفرشه تحتهم مفرش كبير وملبستهم مرايل ومخليتهم ياكلوا برواحهم..
تنهد عبد الرؤوف وقال..
/شن رايك نطلعوا بعد التراويح..
غرفه وهي تاكل..
/امم..ياريت..
عبد الرؤوف:خلاص..نرفع الولاد نحطهم عند نبيله ونوليلك..
قعدت تشوفله وهي ساكته..
وهو ياكل عادي..
غرفه؛قصدك خديت موقف!؟
شافلها وهو يمضغ بعدين بلع وتنهد وقال..
/نهائي كنت متوقع الشي هدا..
غرفه؛وهدا المفروض..
عبد الرؤوف قعدت يشوفلها بصمت..
غرفه؛الجرح لما يجيك من حد تحبه صعب تتجاوزه وتنساه وانت ادرى مني بالحاجه هادي..
هز راسه وقال..
/عندك حق..ورجع ياكل مرة تانيه.
وهي لما حست ان فهم اللي تبي توصله ارتاحت..ارتاحت لما خلاته يعرف حجم غلطته..ويحس باللي هو ياما خلاها تحسه قبل...
🍃🍃🍃🍃🍃
رافعه بنتها في حضنها وخشت بيها للكوجينه..
غسلتلها فمها وايديها وهي تغني..
/هالصيصان..
وجنه دير في صوت يشبه الصوت اللي يطلع في الاغنيه بعد هالمقطع
طوبى :شوحلوين..عم بيدوروا حولا امن مبسوطين..
"يختلفوا مش كيف بعضهم".
سمعت صوته وسكتت مرة وحده..
وجنه مازال دير في الصوت متاع الاغنيه لما امها معاش غنت عيطت..
طوبى قربت لوذنها وقالت..
/اص ياماما عمو هني..
جنه ردت عليه بلغتها الخاصه..
طوبى:من عمو..عمو دو دو..وضحكت..
ع خشة اميمه قالت بضحكه..
/شن توشوشوا..
هي كملت سؤالها من هني الضي يهرب من هني..
طوبى:بالله اميمه كان عندك فلاش ولعي تليفونك..
اميمه:هي شويه بس..
ولعت اميمه الفلاش..
شافت طوبى وجه جنه كيف يبان عليه الفزع ضمتها وقالت..
/ياروحي..
ع خشة مطيره وهي تدعي..
/اهرب هريبهم واضرب ضريبهم..
طوبى:مش بيدهم هما مساكين..
مطيره:اني ندعي ع  اللي تسببولنا فيه..
اميمه شافت لطوبى وهي مبتسمه بشك..
شويه وسمعوا اصوات علي الواعر والتارقي قريبه..
شافت طوبى للروشن..عيونها جو عليه وهو فايت..
طبست راسها وهي ضم في جنه وابتسامتها غالبه عليها..
مطيره بهمس:شكله بيولع المولد هي نطلعوا.
ومشوا التلاته طلعوا مع بعض...
🍃عبد القيوم شغل المولد تحت ضي فلاش تليفونه..
بعد ماولع الضي في الحوش..قعد يتفحص في المولد وقال..
/هذى نوعيه ممتازه..
علي:لكن دارها فينا قبل..
عبد القيوم؛عاديه يتصلح بسهوله ومازال يتحمل..
ويسمعوا صوت المؤذن ينادي لصلاة العشاء..
علي:هيا خل نجهزوا انفسنا..
عبد القيوم:هيا ..
علي:توكلنا ع الله..
ومشوا مع بعض بإتجاه المربوعه..
تلاقوا هما وقطاطيس طوبى ياكلوا من صونيه وحده..
علي:حتى هما بسريبهم..
ضحك عبد القيوم..بعدين ابتسم بشي من الحزن لما تفكر بينكا...
🍃🍃🍃🍃🍃
بعد التروايح..
كانت مروة في حوش الصيد..تحديدا في جناح اختها..
وكان يدور بيهم حديث محتد بعض الشيء..
صفاء بصدمه..
/ومازال مصاحبه اخته ومخلتينا نمشوا عليهم ونجوا!
مروة بضيق..
/ع خاطر مناسك ماليها ذنب في شي..
صفاء:انتي فاهمه صحبتك ليها بعد اللي صار هدا كله شن معناها!؟
مروة:مناسك توا عايشه ظروف صعبه بوها مات وامهم خلتهم مانقدرش نخليها ياصفاء ..
صفاء بضيق:انتي هكي بضريني يامروة اشرف بيقلب عليا ونظرتها فينا بتولي خي..
مروة بجرأة:اني نكلمه..
صفاء تأففت بضيق ودموعها في عيونها.
مروة:نعرف شن نقوله ياصفاء هو يتحشم مني تو يسمعلي.
نزلوا دموع صفاء وهي تقول..
/كله يهون عليا ولاحد يوصل في ربايتنا..
مروة شدت يدها وقالت..
/مايوصل فينا كان ناقص الربايه اصلا وراما وامها معروفات..وصدقيني اشرف حيتفهم هو عارفك كويس ياصفاء..
سكتت صفاء وهي تشوف ليد اختها اللي شادتها بخوف وقلق..
🍃وتعدي ربع ساعه..
ويطلعوا مروة وصفاء للجنان يتمشوا فيه..ع خشة اشرف للحوش..
لما شافهم بان ع وجهه الضيق..
مروة جبدت يد اختها وقالت..
/تعالي.
ومشوله الزوز..وهو قدم ناحيتهم بخطوات متردده..
وصلوا فيه ومروة قالت .
/كيف حالك اشرف..
هو بعقدة حواجب ونبره جافه..
/الحمد لله..
مروة:حكتلي صفاء ع اللي صار اليوم وع الدوة اللي طلعت عليا..اول شي اني نعرف اخت مالك قبل لنعرفه والقصه اللي صارت في المدرسه كانت سوء تفاهم هو كان جاي لغيري ووحده الله لايوجهلها الخير دارتلي زي الكمين اني وياه بش تشوه سمعتي والقصه كلها وضحت بعدين واسأل ابله نجاح عليها..تاني شي..حني تربينا كويس امي ماقصرتش في تربيتنا بكل وانت الادرى بالحاجه هادي اظن فهمت قصدي..صح حني ما عندناش لابو ولاخوت لكن عرفنا نولوا رجالة رواحنا مانخلوا حد يوصل فينا بكل..
صفاء كانت تسمع في اختها ودموعها ينزلوا..
واشرف تأثر بكلام مروة اللي كانت تقول فيه بحرقه..
مروة:امي لما خديت صفاء كانت خايفه منك بس بعدين ارتاحتلك وارتاحت ع اختي معاك..ان شاء الله ماتخيبش ظنها..
هو تفكر كلام فايزة ليه بعد زواجه من صفاء..غير نظره لصفاء لقاها تبكي بصمت تنهد وقال..
/اني نعرفكم كويس يامروة هدا علاش ناسبتكم غير تفاجئت باللي سمعاته وحسيت بشي من مزبوط وانتي توا وضحتيلي  الرؤيه..
مروة:زيد اسأل ع الموضوع بش ترتاح..شافت لأختها وقالت..خلاص اني بنروح توا باهي..
صفاء رشفت ومسحت دموعها و تقول:تصبحي ع خير حبيبتي..
مروة؛قدامك كل خير..تصبح ع خير..
ومشت وخلتهم وصفاء قعدت معاها بعيونها لين طلعت بعدين شافت لأشرف..
ابتسم وهو يشوفلها..قربلها طبع قبله ع جبينها وقال..
تعالي..
وحاوطها وقعدوا يتمشوا ويحكوا عن نفس الموضوع بهدوء..
🍃في نفس الوقت..
في الشارع...
كانت القهوة زحمه..والمطعم زحكه..والشارع كله حيويه..
مامفسد روعة اجواء هالليله الرمضانيه غير اصوات المولدات..
☘قدام مطعم ربيع..
كانوا ربيع والتارقي وااقفين يهدرزوا..
عبد القيوم:مخلي مكانه.
ربيع:راجي لبعد العيد بش يروح..
عبد القيوم؛كان طلقوه هله يرد لطرابلس..
ربيع:قالي قبل مانحبش نقعد غادي..
عبد القيوم هز راسه وهو ساكت..
مد نظره القدام..
شاف ولاد االشارع جايين ومعاهم الولد صاحب الكرة وهو شاد الكرة متاعه..
عبد القيوم؛ماني عارف شن لاقيين في هالمكان بش يلعبوا فيه..
ربيع وهو يشوفلهم قال:
/واسع والاهم في الوقت هدا فيه ضي..
عبد القيوم سكت وهو يشوفلهم كيف باديين يلعبوا..
🍃وتطلع مروة من حوش الصيد..
تشوف لمحل جنه تلقاه مفتوح مشتله طول ع امل تلقى طوبى فيه..
فتحت الباب وخشت وهي تقول..
/السلام عليكم..
كلهم ردوا عليها بما فيهم طوبى..
المحل كان زحمه بعض شي..كلمت طوبى وحده من البنات تشد مكانها وقدمت لمروة..
طوبى بإبتسامه؛نورتينا وآنستينا ياحنه..
مروة بضحكه؛بوجودك ياحنه..
طوبى:امك قالت مشيتي لصفاء..
مروة؛ايه كنت عندها..
🍃🍃🍃
عبد القيوم:الراجل انحرج من الوضع لكن انا والله ماعندي مشكله يقعدوا فيها براحتهم..
ربيع:حسها ثقيله شويه وبارك الله فيه اللي قاعد عنده احساس نعرف ناس  ربي عاطيهم قاعدين بالبراده وصحة الوجه في حياش غيرهم..
عبد القيوم؛معليش الظروف ولت صعبه واجد والواحد يدس القرش للأسوأ...
ربيع:وضع النزوح مداير ازمه ومعاش في حد متحمل حد..
عبد القيوم بإستياء:ربك يفرج قريب ان شاء الله..
ربيع تنهد وقال:آمين..
🍃🍃🍃
طوبى:معروفه خديجه هادي صنعتها..خليها لربك هو اللي يرد عليها..عجبتني منك كيف وقفتي لأشرف ووضحتيله كل شي لازم يعرف انكم قد رواحكم وماتسكتوا لحد يوصل فيكم..
مروة بإبتسامه:ريحتيني..
ابتسمت طوبى وقالت؛شويه نكملوا ونخشوا مع بعض..
مروة:نعاون..
طوبى:لاخليك مقعمزه هني..وكيف جت بتمشي شافت ولد حواء الصغير واقف برا يتفرج علي حاجه..شافت وين مايشوف لقاته يشبح للدونات..
ردت نظرها ليه واشرتله يجي..
لكن هو قعد تابت في مكانه ماباش يتحرك..
مروة بضحكه:متحشم..
طوبى بإبتسامه؛نطلعله اني وخلاص..
🍃🍃🍃
ربيع:ياراجل قسما بالله اقل من حقها وكلها زواق حشاهوله مسكين..
عبد القيوم:مفروض ترافق مع حد عنده خبره في السيارات..
ربيع:صح بالذات مع الهوام هادم اللي همهم الفلوس بس..
وفجأه تجي الكورة قريبه منه..
؛شوطها ياعمي ربيع..
عبد القيوم بضحكه؛خليها ليا انا..
عطاه ربيع الكرة برجله..
عبد القيوم حط رجله ع الكرة وقال..
/كان مازال حقيتها..
ضحك ربيع...
🍃في هاللحظه تطلع طوبى ببوكس صغير فيه دونات لولد حواء وهي تقول..
/اهو جيتك بروحي..
ومروة تتفرج عليها من الباب وهي مبتسمه..
لكن في لحظه تلاشت ابتسامتها لما شافت الكرة خبطت وجه طوبى وطاح منها البوكس باللي فيه ع الارض..
🍃الولاد اللي يلعبوا في الكرة قعدوا يتفرجوا عليها بصدمه..
ومحمد المهدي اللي كان يتفرج عليهم كان مصدوم زيهم..
اما ربيع..مجرد ماشاف الكرة متوجهه لطوبى قال بفزع..
/لالالا..بعدين غمض عيونه بشده..
🍃والراجل اللي يخدم في الغذائيه جنبهم قال..
/ياساتر..
مروة بقلق
/طوبى!
طوبى شدت خدها اللي معاش حست بيه ومشت خشت للمحل ومروة معاها وسكرت الباب وراها..
هدا كله صار وعبد القيوم فاقد الاحساس بنفسه وكأنه مش واقف ع الأرض..
وين شاف باب المحل تسكر..لاعاد فكر ولاعبر ولادورشي..
مشي طول قص الطريق وقلبه من قوة الدق حسه بيطلع من مكانه
وصل في المحل دق الباب
ربيع يشوفله بقلق ويقول..
/ان شاء الله ماصارلها شي..
🍃انفتح باب المحل وطلعت وحده من البنات..
عبد القيوم بخوف..
/بالله عليك شن صار فيها!؟
:داخت دخلوها للحوش..
خبط الباب بيده بعصبيه بعدين التفت شاف للصغار بغضب.
الولد خدي كورته وهرب وصحابه لحقوه..
🍃🍃🍃🍃
"طوبى..بيبو!؟"
طوبى وهي متمدده ع مندار في الصاله وهما حواليها مررت نظرها عليهم وقالت..
/مافي شي..دوخه ومشت ع حالها..
مطيره بحمق:كورة الشياطين هادي عنده حق بوي لما كان يفلق فيهم زمان..
"طوبى"..
طوبى:جدي..
اميمه؛تعالى جدي تعالى..
ناضت طوبى قعمزت..
فردوس:بالشويه عليك..
ع خشة علي الواعر شافها وقال..
/شن صار فيك!
طوبى:ماصار شي حالي باهي..
علي:والله كيف تكيت في الجنان ويدق عليا التارقي الراجل صايره فيه حاله ومتحشم وقعد يتعذر ويتأسف...
مطيره بصدمه؛ان شاء الله هو اللي ضربها!؟
طوبى وجهها ولى من لون حبات الرمان وكانت محرجه ع الاخر..
اريج بضحكه:عليك عمله!
علي:انتي شن طلعك برا؟
طوبى بإحراج؛جيت بنطلع حاجه لواحد من الصغار جت عينه فيها..
مروة؛ولد خالتي حواء قالتله يخش ماباش طلعته وتجيها الكورة طايره..
ضحكت تاله..
فايزة وهي شاده ضحكتها..
/تاله..
تاله بضحكه؛يضحك ياماما..
ضحكوا كلهم معاها وكأنهم يراجوا فيها..
اما طوبى فكانت خجلانه ع الآخر ومتوتره وقلبها يدق بسرعه...
🍃🍃🍃🍃🍃
وفي قهوة مالك..
كان مقعمز مع صاحبه معين وهما يحكوا مع بعض..
معين؛استغربت لما شفتها امس.
مالك:خليتها تمشي المرة هادي ع خاطر المفاجأه والجو اللي داروه بش يغيروا نفسيتها..ابتسم وقال..فكرة صاحبتها..
معين ربع ايديه وقعد محتفظ بصمته..
مالك ؛روحت امس وهي تضحك وجوها حلو ارتحت لما شفتها هكي..
فرد معين ايديه وحطهم ع الطاوله وقال..
/لعند امتى بتقعد راخي دقنك هكي!؟
عقد مالك حواجبه بإستغراب وقال..
/مافهمتش!
معين عقد حواجبه وقال.
/ع صاحبة اختك..دير موقف تصرف..حسسها انك تبيها جديات..
مالك؛البنت ماتبيش تشوف لوجهي وين نطلع في وجهها تقلبه عني.
معين:مش مهم..انت افرض عليها روحك..دير لقطه قويه تهزها من داخل..اخطبها .
مالك بدهشه..
/كيف!؟ لالا مستحيل..
معين بإستغراب:علاش!؟
مالك؛بعدين تاخد موقف مرة تانيه وتقطع علاقتها بأختى بكل واني ماصدقت ولوا هي واختي غير هكي بوي مالاش 40يوم ميت تبيني نخطب!
معين بشي من الانفعال.
/باهي بتقعد هكي تتفرج!!تحرك دير موقف يخليها تعرف انك شاد فيها..لو مكانك ياراجل نحارب علي خاطرها حتى الحرب.
مالك بيأس؛لو نقلبها فوقي لوطي مايتغير موقفها..البنت شخصيتها صعبه هلبه وفوق هكي عندها حق..انت بروحك قبل قلت انساها وحولها من راسك..
معين سكت وهو يشوفله بنظرات انفعال .
مالك:اهم شي عندي توا تقعد علاقتها قويه بأختي بس..
معين؛مسلم فيها انت!؟
مالك بضيق:مش مني ياصاحبي..انت عارف اللي فيها..
مرر معين نظره ع المكان..كلي شفه السفلي شويه بعدين شاف لصاحبه وقال..
/حاول مرة تانيه وماتسلمش بالساهل..
هز مالك راسه وقال..
/إن شاء الله خير...
🍃🍃🍃🍃
وفي الوقت اللي هو يشجع فيه صاحبه ياخد موقف جدي مع البنت اللي يحبها ويحطها في الأمر الواقع..كانت امه تخطط تحطه هو في هالأمر الواقع...
☘فهيمه:هي مادام مسكره المزين متاعها معناها نمشولها الحوش
:خلاص نكلم اختها توا..
فهيمه؛ايه كلمها ومادابيك تاخدي موعد فهاليومين..
:حاضر يام...
🍃🍃🍃🍃
ويعيش التارقي حالة من الغضب والضيق والقلق..
معاش عرف يدير شي..حتى السحور جهزه وخلاه في مكانه..
اكثر شي ضايقه ووجعه من الموقف اللي صار ان الأذى جاها منه وهو اللي يخاف عليها من النسمه تجرح خدها..حس روحه وكأن دار جريمه مش قادر يسامح نفسه عليها..
قعد حايس ومتوتر يبي يطمن عليها ومش عارف كيف..
فجأة..خطرت عليه صفيه..
طول مشي فتح الماسنجر..لقاها اون لاين..
خشلها وكتب السلام عليكم..
شويه وردت..
(وعليكم السلام عبدو كيفنك)
(زي الزفت الأسود)
(بسم الله كنك!؟)
وحكالها الموقف اللي صار بإختصار بعتتله ملصق ضاحك..
(مانبيش نفصل عليك عدي كلميها وردي بالك تبيني شي فاهمه)
(فاهمه فاهمه ارجى دقيق) وفي النهايه الرساله حطت سمايل يضحك..
🍃وطوبى في هالوقت تتصفح في الفيس وتشوف في الاخبار..
وتحيها رساله ع الماسنجر.
لما شافت المرسل صفيه حست بشعور حلو فيه شي من الفرح لما تخيلت ان هو باعتها بش يطمن..
خشت ع الرساله..
(السلام عليكم بيبا)
(وعليكم السلام صفصف صح سحوركم)
(سلمك ياقلبي شن دايرين في رمضان فهالحرب)
(الحمد لله خير من غيرنا قاعدين في حوشنا وامنين )
(يدوم عليكم يارب..شن خبار السمحه جنونه).
(بدت تكبر ويزيدوا شطناتها)
(ربي يحرسها ويحميها..بالله شن حال اريج)
(الحمد لله صابرة ومحتسبه)
(ربي يقويها ويعوضها خير..باهي مانعطلك خل نعدي نوتي روحي للفجر بالسلامه)
(بالسلامه)
🍃تنهدت وقالت:عليك هبله اني وتفكيري..

#مراد_قلبي
#طوبى

....يتبع...