#طوبى "جنة طوبى"
#جمان_فريد
#الجزء_التاسع_والتسعين"حمامة بيضا"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
قال شيخ الإسلام ابن تيمية:
السكوت بلا قراءة ولا ذكر ولا دعاء ، ليس عبادة ولا مأمورا به؛ بل يفتح باب الوسوسة، فالاشتغال بِذِكْر الله أفضل من السكوت.
📙 الفتاوى | ج 23 ص 286
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃جعلك الله شيئاً لا يُغادر قلبي 🍃
________________________________________
في شقته الملك...
كان واقف قدام مراية الدولاب يلقي في أخر نظرة على طلته..
يبي يكون اليوم في احلى حالاته من برا ومن داخل..
رفع حاجبه وابتسم وهو يفكر في شي ناوي عليه..
خدي نفس عميق..طلعه..بعدين مشي للزيانه خدي مفاتيحه ونظاراته وتليفونه وطلع من الدار..
🌼🌼🌼🌼
في هالوقت..
هي كانت واصله لمكان المعرض..
لما خشت للقاعه اللي فيها المعرض تفاجئت بالزحمه..وحست بشي من الرهبه وين شافت الكاميرات وناس مميزين بمظهر معين وفي ايديهم لواقط صوت "مكيرفونات" عرفت انهم مراسلين..
قالت في نفسها..
"ياريتني ماجيت"..
قعدت تمشي ودور بعيونهاع نفيسه مالقتهاش..
شويه وبدت تشوف اللوحات المعروضه..ابتسمت ع قد ماعجبوها..
مرت عليهم وحده ورا وحده لعند ماوقفت قدام لوحة جذبتها الفكرة متاعها..
كانت لطفل في يده سلة العاب يمر بيها ع اشخاص شادين اسلحه واخد من كل واحد سلاحه وعاطيه فمكانه لعبه..
"عجباتك"
استاقظت طوبى وشافت جنبها لقت بنيه ملامحها طفوليه بشوشه ابتسمتلها وقالت..
/انتي رسمتيها؟
؛ايه اني..شن شفتي فيها؟
ردت طوبى نظرها للوحه وقالت..
/شفت البيبي هدا وكأنه مبعوث سلام..
ضحكت وقالت:صح..هي هادي فكرتها..
طوبى بإبتسامه؛حلوة بالمرة وفيها هلبه تفاصيل تخلي اللي يشوفها يحس كأنه فيها..
بإنفعال فرحه قالت..
/شكرا بجد..انتي اول وحده توقف ع لوحتي وتشوفها كيف مااني شايفتها..
طوبى بضحكه؛باهي تعالي نوريك لوحتي بش تقوليلي شن شفتي فيها..
:رسامه؟
طوبى بضحكه:مش هلبه..هي تعالي..
ومشوا مع بعض وطوبى دور في لوحتها...
وهي ماشيه وقفت فجأه لما جو عيونها ع لوحه استغربت وجودها في المعرض وتفاجئت في نفس الوقت..
:شفتيها!؟ حتى اني استغربت علاش عارضينها هادي كانت في المعرض اللي فات..
ع جية نفيسه اللي شافت طوبى من بعيد..
وصلت فيها وقالت..
/اهلا بطوبى..
طوبى شافتلها وقالت..
/شن دير اللوحه هادي هني ابله نفيسه!؟
نفيسه خدتها من يدها وقالت..
/تعالي توا تعالي..
ومشت بيها والبنت وراهم...
🌼ع خشة عبد القيوم وسامي للمعرض..
عيونه طول جو عليها وهي ماشيه مع نفيسه ابتسم من قلبه..
سامي بإبتسامه؛فرصتك اليوم..
عدل ياقة قميصه الأخضر الزيتي..خدي نفس ومشي ناحيتهم..
☘فهالوقت وصلت نفيسه بطوبى لمكان لوحتها اللي كانوا واقفين عليها بعض الزوار ومن بينهم واحد يبان عليه شخصية مرموقه..
نفيسه بإبتسامه؛هادي هي..طوبى هدا الفنان عصام ***** سامعه بيه اكيد؟
طوبى بإبتسامه ريبه..
/الحق لا..اسفه اني مش ملمه هلبه..
هو ابتسم وقال:مش مشكله..شاف للوحتها وقال..شن هدا ياطوبى؟..فكرة مميزة..رسم دقيق جدا مليان تفاصيل معبرة لدرجة انها تاخد اللي يشوفها ليها..اني متخيلهم توا بيطلعوا..
طوبى بإبتسامه خجل..
/شكرا..
هو قال؛كيف جاتك الفكرة؟
☘في هاللحظه وقف عبد القيوم وقعد يتفرج ع اللوحه..
لاحظ بعض التغيير في الأسلوب..
غير عيونه ليها لما سمعها تقول..
طوبى بإحساس وعاطفة عاليه..
/في اي حرب مش غير اللي في بلادنا في كل مكان من قبل وتوا ديما اقسى المناظر اللي تطلع في التلفزيون ولانشوفوها في الصور سوا كان جرايد زمان ولا ع وسائل التواصل توا تكون للأطفال تعابير وجوههم مليانه مشاعر توجع..خوف..جوع..ضياع..وسؤال هكي يبان في عيونهم..وحني شن ذنبنا؟..تخيلتهم يفكروا لو يقدروا يغيروا الواقع ويخلوا هالحروب تم..شافت للوحه متاعها..هكي تخيلتهم فكروا...
شافوا معاها للوحه..
كانت راسمة حمامه بيضا كبيره فارده جوانحها مغطيه بيهم نص السمي اللي كانت وراها..سمي سودا معبيه نجوم..
ع جناح كل حمامه مجموعه اطفال..يرموا في غصون الزيتون ع الأرض اللي كانت تحترق بنار الحرب..
غيرت نظرها عنها ومرراته عليهم شافتهم كلهم يتأملوا في اللوحه وعصام بدي يعقب ع كلامها..
وهي مازال تشوف للي حواليها ثبتت نظرها عليه لماجوا عيونها في عيونه..
وترجع تعيش حالات الارتباك التوتر والخجل..
والقلب يبدا يرجف..
ابتسملها ابتسامه خفيفه زادت اربكتها وخلتها تغير نظرها عنه لعصام وهي تظاهر انها مركزه مع كلامه..
بإبتسامه عبد القيوم قعد يراقب في علامات خجلها..
اللون الأحمر اللي كسي وجهها..وتشابك اصابع ايديها المغطيات في بعض..
هالحالة تزيد ذوب في قلبه اكثر ماهو ذايب فيها...
بغيره..غير نظره لعصام لما سمعه يقول..
عصام؛ الفنان بشكل عام ديما يحط احساسه فالعمل الفني اللي يخدم عليه..بس مش كل فنان يقدر يعطي من روحه للوحه متاعه...اللوحه فيها روح منك انتي..انتي طالبة او خريجة فنون؟
طوبى بإبتسامه؛لا..اني طالبه في السنه الاخيره في كلية التربيه تخصص رياض اطفال..
عصام بضحكه؛هي هادي..في شي يعنيك في اللوحه..
نفيسه بإبتسامه؛فكرة المعرض ليها..
هز عصام راسه وهو مبتسم..
وطوبى ابتسمت بخجل وعيونها بعيده عنه..
هو قال:باهي سؤال اخير علاش اخترتي الليل مش النهار؟
طوبى:بشكل عام..الليل يخوف..وفي الحرب يولي يخوف اكثر..والحرب والظلام شي واحد..
عصام بإبتسامه:استاذة شريتها اللوحه هادي..
ابتسمت طوبى وهي تشوف لنفيسه اللي كانت طبطب ع ظهرها وهي مبتسمه..
عصام؛في معرض برا اني حنشرف عليه للرسامين الليبين في ***** حنعرض فيه اللوحه هادي خل العالم يعرفوا الفن والفنانين اللي عندنا ويحولوا الفكره اللي واخدينها علينا اننا جهله ومانفهموا في شي..
نفيسه:فعلا الفكرة هادي موجوده في عقول العرب والغرب..باهي استاذ في لوحه نبي نوريهالك ونبيك تعطينا رايك فيها..
عصام:اكيد لوحة فارس الصحراء..
طوبى شافت لنفيسه وهي تفنص فيها..وعبد القيوم مركز معاها وهو مبتسم..
تجاهلت نفيسه طوبى وقالت..
/ايه اللي وريتهالك اول ماجيت..
هو هز راسه وقال..
/تمام..
نفيسه؛تفضل..وخدت يد طوبى ومشت بيها ..
طوبى بهمس:استاذة نفيسه!.
نفيسه بنفس الهمس:بعدين بعدين..
طوبى بتوتر غيرت نظرها عنها شافت القدام لقت عبد القيوم سابقهم..حست روحها بتفقد الوعي..
وصلوا في اللوحه..
وطوبى تحاول ع قد ماتقدر تقعد متماسكه..
عصام:تشدك من اول ما تشوفها تعبر عن الرجل التارقي هلبه ع حسب معرفتي بيهم بس اكثر شي لفتني في اللوحه هادي هو تفاصيل الملامح..
عبد القيوم؛ملامحي..
طوبى نزلت عيونها لوطا وهي في قمة التوتر والخجل..
عصام بإبتسامه؛ليك اللوحه؟
عبد القيوم بإبتسامه؛لا..لطوبى الواعر..
قامت عيونها فيه وهي تشوفله بصدمه..
ونفيسه تشوف لعبد القيوم وهي شاده ضحكتها..
عصام بتعجب:جديات!؟
عبد القيوم شاف لطوبى..
هي هربت بنظرها لعصام..استجمعت شجاعتها وقالت..
/ايه..ليا اني شاركت بيها المعرض اللي فات ولأنها اول مشاركه خليتها بإسم مستعار وتوا تشجعت وشاركت بإسمي..
عصام:في اختلاف..بس زي ماقتلك بكري الروح نفسها..رسمتيه مباشرة!؟
طوبى في لحظتها كانت تبي تهرب اول مرة تنحط في موقف محرج ومخجل لهالدرجه..تجنبت النظر لعبد القيوم وقالت..لا..طلعت معاها بصوت ضعيف حمحمت وعاودت تقول..لا..عن طريق صورة..
عصام هز راسه وبدي يحكي عن تفاصيل اللوحه..
وعبد القيوم يشوف لتفاصيل اللوحه الخجوله اللي قدامه كان باين عليها تتجنب تشوفله...
عصام:برافو طوبى ونتمنى انك تستمري..
طوبى بلعت ريقها وقالت..
/شكرا..
نفيسه:هي نشوفوا باقي اللوحات استاذ..
عصام؛اكيد.
ومشوا مع بعض..
طوبى تبي تهرب وفي نفس الوقت تبي تواجه..كانت ترجف بمعنى الكلمه من الخجل والتوتر..
"طلعتي فنانه مش رسامه بس"
طوبى في نفسها..
"الحمد لله"..التفتت للبنيه اللي كلمتها وقالت..
/تعالي نتفرجوا ع باقي اللوحات ..
بإبتسامه؛تمام..
ومشت هاربه منه مع البنت..
وهو كان مازال واقف في مكانه يراقب فيها توقعها تهرب منه ماباش يزيد يوترها ويلحقها..
ع جية سامي قاله..
/برا شن تراجي!؟
عبد القيوم بإبتسامه؛متوترة ومرتبكه واجد خليها تريح شويه بعدين ساهل..
سامي بضحكه:حتى انت افكارك شيطانيه حطيتها في الامر الواقع...
عبد القيوم:نبيها تفهم اني مركز معاها ومهتم بيها..
سامي ابتسم بعدين قال..
/خل نمشي نصور لوحتها فضت الزحمه اللي كانت عليها..
مشي سامي..وعبد القيوم لحقه وعيونه ع طوبى..
☘كملت جولتها ع اللوحات مع البنت وهما يتعارفوا ع بعض..
لعند ماوقفوا ع لوحه عجبتهم وقعدوا يحكوا عنها..
وعبد القيوم ماخلاهاش تغيب عن عينه لحظه..
شويه شاف الشاب نفسه اللي سأل في الاجتماع عن صاحبة فكرة المعرض لو بتشارك فيه..شافه واقف عليهم..
☘الشاب بإبتسامه..
/صار انتي صاحبة فكرة المعرض..
طوبى بجديه هزت راسها بدون ماتتكلم..
:نهنيك عليها فكرة حلوة هلبه ومختلفه..ولوحتك تصدرت..
طوبى:شكرا..
ابتسم وشاف للوحه اللي قدام وهو يقول..
/هادي ليا اني..
البنت قالت:حلوة وبسيطه وكأنك راسمها للأطفال بس..
هو قال؛صح...اللي يشوفها يحس هكي هو نفسه حيحس روحه طفل لما يتعمق فيها..شن رايك طوبى؟
طوبى ماارتاحتش لنظراته كان يمعن هلبه بالنظر فيها هزت راسها بدون ماتشوفله وهي تقول..رايي من رايها..
وفجأه تشم ريحة عطر مميزة شمتها قبل ع بنتها..
وتشوف صاحبها جاي للشاب وهو يقول..
/ترا شويه ياغالي..
حط يده ع ظهره وخداه معاه..
طوبى بعد مااسترخت شويه رجعت توترت..
البنت بإبتسامه:حلوة هلبه رسمتك لأستاذ عبدالقيوم
طوبى ووجهها احمر..
/شكرا
التفتت البنت شافاته جاي ناحيتهم قالت..
/كأن جاي هني..
طوبى بتوتر:لالا..هي تعالي..
شافتله البنت بإستغراب..لاحظت عليها الارتباك والتوتر..
هو ركز ع طوبى ناويه تهرب مرة تانيه سرع خطواته ووصل فيهم.. وجه كلامه للبنت وهو يقول..
/معليش تخلينا شويه..
طوبى قعدت تشوفله بمفاجأه وتوتر..
والبنت بإبتسامه قالت..
/تمام..ومشت من حداهم..
طوبى لحقتها بعيونها وكأنها تقوللها ارفعيني معاك..
وقف عبد القيوم في مكان البنت وقال بإبتسامه..
/آنستينا..
هي لفت وجهها ليه لكن عيونها كانوا لوطا وهي تقول.
/شكرا..
حط ايديه ورا ظهره وهي ركزت بعيونها ع الخاتم لين درق عنها..
عبد القيوم:كيف حالك وحال جنة؟
طوبى:الحمد لله..
عبد القيوم:امورك تمام؟
طوبى:الحمد لله..
عبد القيوم عقد حواجبه وقال بإبتسامه..
/شن صار في قرايتك؟
طوبى:شي..وقفت قيدي..
قال:ان شاء الله تنتهي الحرب وتعوضي اللي فاتك كله..
هو كان يلمح بكلامه الأخير لكن هي ماوصلها شي..
طوبى:إن شاء الله..جمعت شجاعتها وبجرأة رفعت عيونها فيه وقال..اني اسفه مفروض مارسمتكش بدون علمك بس هي فكرة الحت عليا لما شفت صورة ليك في صفحة المصور سامي شاركت بيها بدون مانعرف انك هني..يعني معاهم..اسفه جدا..
كانت تحاول تبان عاديه وتحافظ ع ثباتها بس لون وجهها فضحها عيونها اللي يهربوا عنه فضحوها..
هو كان يلقى يقعد هكي..هي تتكلم وهو يسمع..تقعد قدامه..قدام عيونه..هاللحظه هادي عنده بعمره كله..
ابتسم وقال..
/حصل خير...
الابتسامه والنبره الهاديه..خلوا طوبى للحظات تنسى نفسها وهي تشوفله..جذبها بشكل مش طبيعي..
هني القلب اللي كان ع غير طبيعته ضرب جرس الانذار..وكأنه يقوللها النظرة وين طول تهلكنا اني وياك..
نزلت عيونها طول وقالت..
/تمام..نستأذن..
هو بلهفه قال..
"طوبى استني"
قبل شويه لما قال اسمها صدمتها ماخلتهاش تركز ع نطقه ع
ليه..بس هالمرة..وكأنها اول مرة تسمع اسمها منه..كأنها اول مرة تسمع اسمها في حياتها..
نبرة صوته الخشنه الرخيمه والحلوة في نفس الوقت..
ونغمة فصاحه اللغه العربيه الغالبه ع كلامه خلاته يطلع منه بشكل مختلف وحلو بالمرة..
شبكت ايديها في بعض وقالت..
/نعم!
ع جية نفيسه وهي تقول..
/هاه شن صار تفاهمتوا..
عبد القيوم:كان عطلتي شويه بس رانا تفاهمنا..
شافتله طوبى بإستغراب وعدم فهم..
نفيسه بضحكه:سامحيني طوبى انجبرت نحطك في هالموقف بش يتحول الاحراج بينك وبين استاذ عبد القيوم
طوبى هزت راسها وقالت..
/مش مشكله..
نفيسه وهي تمرر في نظرها عليهم
/اهم شي يكون زال الاحراج بس!
طوبى بإبتسامه مجامله: ايه..خلاص..وهكي احسن شكرا..
عبد القيوم قعد يشوفلها وهو مبتسم وعيونه يغزلوا في الحب غزل..
نفيسه بإبتسامه؛باهي كويس..شافت لعبد القيوم وقالت..ايه بنقولك قبل شويه كلمتني ميار قالت بو سلافه رقي عليه الضغط في الخدمه ورفعوه المستشفى..
عبد القيوم بقلق: لاحول ولاقوة الا بالله..شن حاله توا؟
نفيسه تنهدت وقالت..
/تعبان شويه..
عبد القيوم:ماقتلكش في مستشفى شني!.
نفيسه:في ****** ميار وخوها معاهم غادي..
عبد القيوم تباعد عنهم وقام تليفونه بش يتصل بمعز..
وطوبى تشوفله بضيق..
نفيسه:هادي بنيه سوريه معانا هني..هي وبنيه تانيه ليبيه تكون صاحبتها كانوا شادين معاي تنسيق المعرض..
طوبى حست بضيق شديد بعد اللي سمعاته من نفيسه شافت لعبد القيوم كيف يتكلم بالتليفون بإهتمام وقلق..
مش عارفه علاش وقتها كان خاطرها تبكي..
شافت لنفيسه وقال..
/ربي يشفي بوها ويعافيه..اني نستأذن استاذه لازم نروح توا..
نفيسه:خودي راحتك حبيبتي وماتقطعيناش..
طوبى:إن شاء الله..السلام عليكم..
ومشت طول..
وين فاتت من جنبه سمعاته يقول..
"شويه وجاي"..
سرعت خطواتها لين لقت روحها برا المكان...
خدت نفس..وكملت طريقها لسيارتها..
ركبت فيها وشعور الضيق ملازمها..كانت تبي تبكي لكن مش قادره..
شغلت السيارة وفتحت المنظومه ع القرآن..وتحركت طول...
🍃داخل..
هو نهي المكالمه والتفت بيولي شاف نفيسه واقفه ع مذيعة ومصور..
قدملها وقال..
/استاذة..طوبى وين؟
نفيسه:روحت..
بدت ع وجهه ملامح الضيق والأسف..
نفيسه:كلمت سلافه؟.
عبدالقيوم؛كلمت اخ ميار...نستأذن..
ومشي طول لسامي..
نفيسه تبعاته بعيونها بعدين التفتت للمذيعه لما نادتها...
🍃🍃🍃🍃🍃
الساعه 9:30ليلا..
شقة التارقي..
تحديدا الكوجينه..
عبد القيوم:والله كنت خلاص بنقولها مش عارف من وين طلعت نفيسه..
ربيع بضحكه:انت كانك اول ماوقفت عليها قلتها مش خير..
عبد القيوم:ماهو ساهله..قسما بالله تميت تشحت في الكلام من عقلي شحاته..نشوف فيها متوترة قلت نخفف التوتر متاعها شويه..
ربيع بضحكه؛معليش ياغالي هو الحب هكي مرمده وتشحيط..
عبد القيوم بضيق..
/ليا سنين متشحط ومتمرمد..كبدي ذابت..
ربيع بدي يغني..
دايبه عليهم كبدي..دايبه عليهم كبدي..
دايبه واللحيه ولت شايبه عليهم كبدي..
عبد القيوم:غير جيت في عمر باتي..
بدي يدربك ربيع ع الطاوله وهو يغني في نفس الأغنيه..
خلا عبد القيوم يضحك غصب عنه..بعدين خدي كاشيك حدفه بيه..
خواه ربيع وقال..
/ديرلنا سبيقه..
عبد القيوم بضحكه؛ماعنديش غيرها..ضيق عيونه وقال..ايه حق شن صار فيك!؟
تنهد وقال:قلت خلي يعدي السبوع هدا وبعدين نطلع بيهم للشقه اللي قتلي عليها..
عبد القيوم:كويس يكون فات سبوع ع العزا..
ربيع بضيق:حال المهدي يوجع..
عبد القيوم:هو وولاده تفكروا زوجته..
ربيع هز راسه بعدين قال..
/ربي يصبرهم..
عبد القيوم:آمين..
🍃🍃🍃🍃
"ياروحي ع سدرة خاطره عليها امها هلبه"
نسرين بضيق؛نفكر نقول لبوها يرفعها لعمتي..
سميره؛وين بيرفعها في هالحرب والبلي..معليشي فترة وتعدي..
تنهدت نسرين وقعدت ساكته..
سميره؛سيورها تفراج..
نسرين ودموعها في عيونها..
/حاسه روحي مقهورة ياسميره..هداكا حوشي اني وراجلي معقوله حني اللي نطلعوا منه وهما يقعدوا فيه!
سميره؛الله غالب ماليه ما يقدرش يلزهم..
نزلوا دموعها وهي تقول..
/تعرفي اني شن اللي زايد قاهرني كيف تغيروا معاي هكي ياريتك ريتهم لما جو خطبوني ولا اول فترة زواجنا والله كانوا كويسين هلبه فجأه انقلبوا عليا..داروا عرقوبي عرقوب سو لما خسر ربيع خدمته في السويد..وبعدين وين صارت المشاكل مع ماليا بدوا يضربوا عليا في المعاني ويجبدوا في رواحهم..قصدي المشاكل اللي صارت اني شن ذنبي فيها بس!
لا وفوقها يقولوا خلاته يحصل في صغارها! ماهو من الاول كنتوا فرحانين وتبوه يعوض اللي ربي حرمه منه! علاش توا انقلبوا هكي فهميني!؟
سميره:كلهم هكي يانسرين.. في الاول يديرولك العسل في الرواني وبعدين يوروك نجوم الليل في عز الظهر..
نسرين بألم؛اني حاسه ربي يخلص فيه مني..
سميرة قعدت تشوفلها بأسف..
بدموع ندم كملت تقول
/اللي يسكت ع الغلط ويعاون ع الظلم ظالم وربي ياخد الحق منه..
تنهدت سميره وقعدت ساكته..
مسحت نسرين دموعها وقالت..
/ربي مايخلي شي..
سميرة؛وربك غفور رحيم واللي يندم ويتوب مايعاقباش..المهم توا راجلك جاي معاك ويدور في راحتك شن مازال تبي في ماليه ودره..
نسرين قعدت تفكر في كلامها..
ع خشة نضال وهو يقول..
/السلام عليكم..
ردوا عليه:وعليكم السلام..
ركز ع نسرين وقال..
/نانسي خيرك!
نسرين رشفت وهي تقول..
/خطرت عليا عيشه الله يرحمها..
نضال:الله يغفرلها ويرحمها..امي وين؟!
نسرين:روحت من حوش الحاج جويده رقدت طول..
هز راسه وقال:سدرة شن جوها؟
سميره:رقدت بالسيف..
نضال:الله المستعان..
سميره بضيق؛حتى صغار طاهر مقطعيلي قلبي امهم هادي مش ام بكل ماعندهاش قلب شوفوا قداش ليها مسافره مااتصلت كان مرتين بس معقوله!
نسرين:هدا حالها مش جديد عليها..زمان اختها هي اللي راده بالها منهم مش هي..
سميره؛حتى هادي معاش اتصلت بكل وجوري ديما شاده التليفون وتتصل بيها ع هدا الماسنجر تلقاه مسكر..اليوم قتلي حتى خويله صابرين نستنا..
نضال بضيق:لاحول ولاقوة الا بالله..
نسرين بحزن؛بختهم زي بخت بوهم..
☘☘☘☘☘
في داره..
مقعمز ع السرير وحاط ع رجليه اللابتوب يتابع في مسلسل "الحفره"...
قطع عليه انسجامه الاتصال اللي جاه..
خدي تليفونه شاف المتصل رقم غريب فتح الخط ورد..
مالك؛ايوه..
مارد حد..
مالك؛الو..
كذلك لارد..
سكر الخط ورد التليفون لمكانه ورجع شغل المسلسل..
شويه خطر عليه يدير شاهي..وقفه مرة..وناض طلع من داره ومشي للكوجينه..
دور ع الشاهي مالقاش..
تأفف بضيق وقال..
/اكيد لوطا..سكت شويه وهو يفكر بعدين قال..الساعه 2راقدين توا..
ومشي طول نزل لوطا..
وصل للدور الاول وتوجه للكوجينه متاعه وخشلها..
دور ع الشاهي لين لقاه..خداه وهو جاي بيطلع بيه..
خشت مرت خوه وكانت من غير حجاب لما شافاته انفجعت وطلعت تجري..
مالك بإستياء..
/الزفت..هادي تاني مرة..
ومشي بسرعه ركب الدروج يجري..
شويه وولت مرت خوه وهي لابسه حجابها خشت للكوجينه وقالت بهمس..
/عليك دراه كبد الواحد مايقدرش ياخد راحته حتى في الليل..!
وصبت ميه وشربتها بعدين مشت طلعت لدار النوم..
🍃🍃🍃🍃🍃
"اصر يظل مع بابا بالمستشفى"
شاديه بضيق؛ياريت لو ماكان بقسم الرجال ماكان حدا ظل معه غيري..
سلافه:المهم هلأ انه وضع بابا صار أحسن..
ولبانه حداها مقعمزة وسرحانه وهي تفكر في بوها واللي صار معاه...حست انه مايخدمش بياع في المحل زي ماهو مفهمهم...واضح خدمته فيها جهد وتعب وتعرض للشمس..
شافتلهم وقالت..
/بابا ماعم يشتغل بياع بالمحل..
شافولها الزوز وامها قالت..
/لكان شو بيشتغل!؟
لبانه ودموعها في عيونها..
/أجير بيرتب بضاعه يدخل بضاعه وهيك..
امها غيرت نظرها عنها وهي مضايقه..
سلافه:اللي بتحكيه لبانه مزبوط ماما!؟
شاديه هزت راسها ودموعها نزلوا..
لبانه غير عيونه عن امها وقعدت تبكي..
وسلافه تمرر في نظرات الحسرة والحزن بيناتهم...
🍃🍃🍃🍃🍃
"طوبى"
لفت راسها ناحيه اريج وقالت..
/نعم؟
اريج؛خيرك مارقدتيش!
طوبى بضحكه؛لنفس السبب اللي مسهرك هو في حد يقدر يرقد في هالنو حتى الفرارة مش دايره حل..
اريج:بيبو فوتي الطروح واحكيلي شن صار في المعرض!؟
طوبى وهي تحاول تخفي ربكتها..
/مش بكري سألتيني نفس السؤال وجاوبتك
اريج بإبتسامة خبيثه:حاسه في جزء من النص مفقود..
طوبى:ف عينك..ارقدي ارقدي وخليني نعرف نرقد تو قريب تنوض هالبطشه وطوف ليلتي..
وحطت ذراعها ع جبهتها وغمضت عيونها..
واريج تشوفلها بشك...
🍀وتعدي ساعه وترقد اريج..
وطوبى تقعد سهرانه..مش قادرة تنسى شي من اللي صار اليوم..هو مش رايح من بين عيونها..
ووين تخطر عليها لهفته وخوفه لما سمع باللي صار لأب البنت السوريه..قلبها ينغم...
"ياربي اللي اني فيه بدي يخوف فيا..ياربي مانبيش اللي في بالي يصير يارب ساعدني ارجوك "
غمضت عيونها..خدت نفس..بعدين فتحتهم...
فكرت تنشغل شويه بالفيس مدام شحن تليفونها كويس المهم معاش تفكر فيه..
🍀وهو فهالوقت كيف نزل منشور..
بعد مانزله خش ع الخاص لبنت عمته وبعتلها..
(ديري مشاركه لأخر منشور)
شافها تفاعلت بضحكه ع رسالته ضحك وقال..
/تضحك التافهه..
رجع للصفحه الرئيسه وقعد يتصفح وهو متوتر بعض الشي..
🌼وهي تتصفح وتقرا في اخبار في الحرب..
دارت تحديث للمنشورات..وتجي مشاركه صفيه لمنشور ولد خالها في اول الاخبار..
تفاجئت وقلبها تسارعت دقاته وهي تشوف في صورة لرسمة "فارس الصحراء" وهو كاتب فوقها ابيات شعر...
🍀سوا واعية وإلا فـ سابع نومه
خاطي غرامك ما غرام نرومه
ما نوالف والي ..
لا اندير غيرك في حياتي غالي
فـ العين من كيفك اللي يحلالي
و منهو اللي كيفك أنعلّي سومه
يا من بدع فيك العظيم العالي
من خزرتك ينسى الحزين همومه
ما نروم حبايب ..
بلاك عـ المحبة و الغلا نا تايب
يا اللي المحاسن فيك ربي جايب
أوجيهك قمر حاذى جميع نجومه
في غيّتك عاشق حبيب و ذايب
والعين صارت بـ الغلا ملزومه
🌼تلقائيا ابتسمت وين قرت الابيات وقلبها يدق بقوة..
تفاعلت مع منشور المشاركه بعدين قالت في نفسها..
"زعما الكلام هدا يكتب فيه لوحده بعينها ولاغير هكي وخلاص...شن نسيتي كيف خاف لما سمع شن صار في بو السوريه واكيد فات المعرض ومشالهم...اني مش عارفه علاش انتي هبله هكي ياطوبى..معاش تبعي تفكيرك الغبي هدا!؟"
تنهدت بضيق..
وبدت تكتب في منشور..كملت ونزلاته..
( لم يُرهقني شيء كما فعلت أفكاري)
🍃صفية وقتها صورت لولد خالها تفاعل طوبى ع المشاركه صورة شاشه وبعتتها..
هو لما شافها ابتسم من وسط قلبه..
/ااه كان تحسي بس..كان تعرفي..
شويه جاته رسالة صورة تانيه.
فتحها شاف منشورها الاخير..
تبدلت ملامح ابتسامته الألم وهو يقول..
/ااه وكان ربي يقربك نسيك معنى التعب والهم والحزن..غير كان يقربك بس..
🍃وهي حطت تليفونها جنبها..غمضت عيونها وبدت تقرا سرا في اللي حافظاته من القرآن لين ارتاح قلبها وخداها النوم..
🍃🍃🍃🍃🍃
تاني يوم..
الساعه 4:00قبل العصر..
وصلت سلافه اختها للبوتيك..
طول لبانه خشت تخدم تخدمها اللي ولت تحبها وتنسي فيها همومها...
بعد ساعه..
خشت صاحبة البوتيك مشت طول لمكتبها..
ووحده من العاملات تراقب فيها وتراقب في لبانه..
وتعدي نص ساعه وهي ع هالحال..
لين شافت صاحبة البوتيك طالعه..نادتها وحده من العاملات بش تكلم الزبونه..
العامله مليحه وهي تتسحب وتوزع في نظرها ع المكان لين خشت للمكتب..
وبسرعه فتحت ادراج المكتب مالقت فيهم شي..
شافت للباب بحذر بعدين شافت للشنطه وخدتها فتحتها لفت فيها مبلغ مش بسيط..خداته وسكرت الشنطه..
دساته في حواجبها بعدين مشت طلعت بسرعه..
رجعت تمشي بهدوء هي تمرر في نظرها عليهم..
شافت لبانه لاهيه مع زبونه..مشت للغرفه متاع العاملات..
خشت وقعدت دور ع شنطة لبانه لين لقتها حطت فيها الفلوس بعدين طلعت من غادي..
ولامش شاف ولامن دري...
#حمامة_بيضا
#طوبى
...يتبع....
