طوبى ☕شارع القهوة☕

الجزء_الثامن_والثمانين

#طوبى  "جنة طوبى"
#جمان_فريد
#الجزء_الثامن_والثمانين "سجن يوسف/صبر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
قال شَيخ الإسلام #ابن_تَيمِيَة -رحِمَه اللّٰه- :  🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 من الصعب جدا أن تتصرف أنك لا تحب أحد
و أنت تحبه.. 🍃
___________________________________________
في واحد من محلات عبد الرؤوف..
كان موجود عبد القيوم يراجي في جيته...
بعد انتظار دام لبضع دقائق خش عبد الرؤوف سلم عليه ورحب بيه وقعمز مقابله..
🍃عبد الرؤوف؛وينك ياراجل وين اختفيت وكيف تحول من الشارع هكي من غير ماتعطي علم!؟
عبد القيوم:كله جي فجأه..المهم شن اخباركم مافش جديد؟!
عبد الرؤوف حرك راسه بالنفي..
مرر التارقي نظره ع المكان بعدين تنهد وشافله وهو يقول..
/شن صاير في نسيبتك؟
عبد الرؤوف عقد حواجبه وقال..
/اهو نسمعوا في اخبار عنها مرة مرة تقول عايشه..
عبد القيوم؛مافي حد منكم عدى شورها!؟
حرك رؤوف راسه بالنفي..
عبد القيوم؛من جدكم! كيف تخلوها هك!؟
عبد الرؤوف قعد يشوفله وهو ساكت..
عبد القيوم :رؤوف انت واعي لوضعه عارفه كويس..عارف المخلوق هذى كيف خطير ..خلا غضبه يزيد واصراره ع اللي يبي يوصله يكبر اكثر...
حتى لو انجبرت تردله ماتخلوهاش وحدها..ماتخلوهاش له يدير فيها مايبي..
عبد الرؤوف:من قالك خليناها!؟
هو قال؛انت توا قلت ما حد منكم عدى شورها!..انا سمعت ان باته وخوته تغدوا عندهم مرة وحده...تنهد بعدين قال..هو هك يفهم انكم تخليتوا عنها ماعندها حد يخاف منه ويديرله حساب..
عبد الرؤوف؛مأمنك عمي الله يرحمك من قبل عليهم لأنه عارفك راجل وقد الثقه اللي تنحط فيك..واني توا بنأمنك ع سر مايعرفه حد غير اني وياها وتوا انت ثالثنا
زادت دقات قلب عبد القيوم من الخوف وقاله..
/سر !؟
🍃🍃🍃🍃🍃🍃
"شن ديري قلبي؟"
طوبى وهي تشوف في الشيت
/ بنهرب..قاعده نتكبعش فالسور..
سمعت صوت ضحكته..
مطت شفايفها بملل..
هو قال..
"تقري"
هي ردت من فوق نفسها..
/امم..
"وجنو"
طوبى:تلعب..
"تمام شن تبي نجيبلك عشي من برا"
طوبى:اي شي..وبالله معاش تعطلني..
"تمام تمام..بوسيلي جنو"..
هي طول نهت المكالمه مش قادره تتحمله نهائي..
ضيق عليها الخناق الايام اللي فاتوا..وقاعد يحاول يتقرب منها وهي كل مالها تزيد تكرهه وتقرف منه...
🍃🍃🍃🍃🍃
من اللي سمعه معاش قدر يتكلم..مش قادر يستوعب المخاطره اللي دارتها بش ماتسلمش في امانة بوها وتخالف وصيته..كيف قررت تجيب حريتها بيدها وتحافظ ع وجود بنتها معاها..!
زاد خاف عليها وفي نفس الوقت..زاد عشقه اكثر من قبل وهادي المصيبه...
عبد الرؤوف:اني والله ماراضي لتوا لكن هي اصرت واصرارها ماتقدرش تكسره..
عبد القيوم وهو يشوف في الفراغ؛طبعها عنيد..
بدت ع وجه عبد الرؤوف ملامح التعجب من الطريقه اللي تكلم بيها التارقي..
شافله عبد القيوم وقال..
/وكان كشفها فكرت شن حيدير فيها!؟
عبد الرؤوف؛هي تعرف تتصرف فطينه وعقلها كبير..وزي ماقتلك متفاهم معاها لو صار شي تكلمني طول..
تنهد عبد القيوم بقلق..
عبد الرؤوف؛تعرف اني شن مكتفني حق!؟ ان هالمريض مخلي جماعه من****** محاوطين الشارع متاعهم يعني لو جيت بنتصرف المراة وامها حيولوا في خطر اكبر..اكيد حتصير مواجهه ومرات لاقدر الله هما يكونوا ضحايا هالمواجهه..مانستبعدش ع واحد متخلف زي الجالي يديرهم دروع بشريه بش يسلم ولامرات يقتلها هي وبنتها المهم ماياخدهم منه حد..
عبد القيوم بخوف اكبر..
/بتصير المواجهه  هذي في كل الحالات يارؤوف !؟
عبد الرؤوف بضيق..
/وقتها نكون مجبر عليها مش اني اللي بادي بيها ونضحي بيهم..
مسح عبد القيوم ع وجهه بقوه..حس روحه بيفقد عقله من الخوف عليهم....
عبد الرؤوف؛قتلك قبل مش راضي..لكن الثقه اللي كلمتني بيها مع اصرارها حسيتها تقدر دير اللي قالت عليه..نسيبتي هادي ع صغر سنها قويه ايمانها قوي هلبه..قالتلي ربي مش حيضيعني..
شافله عبد القيوم بنظرات حزن وخوف فيهم لمعة الحب واضحه..
عبد الرؤوف حس في نظراته شي غريب لكن ماباش يدقق ولايفسر..
تنهد عبد القيوم وقال..
/ونعم بالله..باهي الخال محجوب شن حاله؟
عبد الرؤوف:احسن من قبل ولى للخدمه..
هز راسه وقعد ساكت..
عبد الرؤوف:مش حنندم اللي حكيتلك ولا؟
حرك راسه بالنفي بعدين قال..
/بالله عليك كان صارت حاجه كلمني..
عبد الرؤوف ابتسم خفيفه وقال..
/اكيد..
🍃🍃🍃🍃🍃
طلعت من دارها متوجهه للكوجينه..
خشتلها لقت فيها سفرة طواسي شاهي مش مغسولات.
عواطف؛ياسلام ياسلام!!..
وطلعت ومشت طول لجناح خوها..
وصلت فيها وبدت دق ع الباب بقوة..
🍃صفاء داخل كانت مقعمزة تقرا صوت دق الباب فجعها..
ناضت طول ومشت فتحت الباب وتلقى عواطف اللي ولت شوفتها تسببلها مغص في البطن..قدامها..
عواطف:شن ياللا خازنه هني ومخليه الكوجينه تضرب تقلب!
صفاء بخوف؛لاوالله غسلت الماعين وضميتها كويس..
عواطف؛وماعين الشاهي لمن مخليتهم للخدامه عواطف!؟
صفاء بإرتباك؛لا والله ماهكي لكن عندي امتحانات معاش لحقت..
رفعت عواطف حاجبها وقالت..
/والله يازينه ماقالك حد تزوجي قبل لتكملي قرايتك! وتوا ماتكتريش دوة وتحركي للكوجينه..
ومشت وخلتها..خلتها والعبره خانقتها ودموعها ينزلوا..
🍃ولازم تبلع وتغص ودير اللي قالتلها عليه اتقاءا لشرها...
🍃🍃🍃🍃🍃
"شن في صارحني!؟"
مهند بضيق:مافي شي..
اياد بشي من الانفعال؛لافي مادرقش عليا نعرفك من عيونك..
تنهد وقال:ماتفاهمتش معاها معاش نبيها..
رفع بوه حواجبه تعجبا وقال..
/وهدا وين اكتشفت انكم ماتتفاهموش!!
مهند؛مع العشرة يبان كل شي..
اياد عقد حواجبه بغضب وقال..
/للاسف اللي كنت خايف منه صار وخيبت ظني..لكن تعرف اني الغالط الوحيد..اني اللي سايرتك واني عارف شن فيك..
مهند بعصبيه؛علاش شن فيا!!؟.
اياد؛انت فاهم قصدي كويس..قدمله وهو يشوف لعيون بغضب وقال..بالك تحساب اللي فعقلك بيصير منه! البنت خلاص مشت فحالها وشافت نصيبها مستحيل مازال توليلك..
مهند بغضب وارتباك..
/عن شن تحكي انت!!؟ من هي هادي!! اني لافي عقلي شي ولانبي شي..القصه ومافيها اني ماتفاهمتش مع بنت الناس ونبي نسرحها بإحسان..
اياد بغضب:غير اعبى..هدا زواج مش لعب صغار..طلاق مش حطلق ولو سكرت راسك ودرتها..انساني..احسبني ميت زي امك..وهز راسه بتهديد وهو يشوفله بغضب بعدين مشي وخلاه
🍃🍃🍃🍃🍃
"مددلها بتقعد شهر تاني"
مطيره:والله احسنلها وكان تروح تشوف ضرتها تنجلط..
ضحك يوسف..
مطيره:ابعتلي صورة لسديره..
"حاضر.." تنهد بضيق وكمل يقول.."طوبى شن حالها"
مطيره بحزن:حالها باهي ياولدي عايشه عادي وتمشي لقرايتها..
"جديات ياعمتي!؟اني مش مستريح بكل"
مطيره؛والله مانقول كان في الحق..وكانك ع الراحه كلنا مش مستريحين لكن الله غالب مابإيدينا شي ياولدي..
"لاحول ولاقوة الا بالله العلي العظيم وخلاص"
☘ومن قدام الباب الخلفي للمحل لداخل المحل..
اللي كان ربي مبارك فيه وزباينه كل يوم في الزايد..
كانت حنان تخدم بدون رغبه..من لما سمعت ان التارقي سيب الشارع وهي عايشه حالة خيبة وشبه فقدت الأمل منه..بس ماقدرتش تسيب الخدمه لانها كانت زي المتنفس ليها...
من جهة تانيه..كانت آلاء تصور في المنتجات وتنزل ع صفحة المحل ع الفيس صور وفيديوهات...وكان اول الداعمين خطيبها عزيز..اللي بدي ياخد حيز كبير في قلبها وفي عيونها قاعد يكبر يوم عن يوم....
🌸اما اختها اريج اللي كانت في خدمتها في المركز...
☘اريج:ياريت تمشولها تشوفوها..
منيه وهي تحاول تخفي ارتباكها..
/ان شاء الله حبيبتي..بس زي ماقتلك طمني بالك خالتك مرتاحه في حياتها..
اريج بضيق؛إن شاء الله والله نتمنى..المهم هي تكون مرتاحه..شافتلها شويه بعدين قالت..دكتورة بنسألك سؤال وانتي حرة تجاوبي ولاتفوتي..
منيه؛أسألي؟
اريج:يومها شفت عمر طالع من المركز كان هني؟
منيه تنهدت وهزت راسها بإيجاب..
هزت اريج راسها وقعدت ساكته..
منيه؛اني وعمر اصدقاء مش اكثر..
اريج شافتلها بنظرات استغراب..
منيه:ماكانتش اول مرة يجي فيها للمركز..جاني قبل وهدرزنا..حكالي قصتها كلها..حكاها بصدق..وطلب مني نعطيه فرصه..
اريج:كيف تعطيه فرصه بعد اللي عرفتيه عنه؟
منيه:في شي فداخلي خلاني نحس انه صادق..لكن طلبت نكونوا اصدقاء مش اكثر..
اريج:مقتنعه بالشي هدا!؟
منيه:لحد الان ايه..وهو بصراحه ولا مرة تجاوز حدوده ولاحاول معاي بأي شكل..
اريج؛اني نبي نرضي ضميري ع الاخر ونقولك..حتى لو كان كويس عيلته مش حتهنيك بكل..
منيه بضحكه؛يابنتي اصدقاء والله اصدقاء بس..ع العموم مشكورى ع النصيحه..
اريج بإبتسامه اسف:العفو..
🍃وعيون منيه اللي يكون يقولوا في عكس كلام لسانها اكد لأريج ان علاقتها مرحله مش حيوقف عند مرحله الصداقه🍃
كملت شغلها مع اخر حالة جتهم..وطلعت بتروح...
وتتفاجئ بإسكندر يستنى فيها برا...
قدمتله بخطوات متردده بعض الشي لين وقفت قدامه وقالت..
/السلام عليكم
اسكندر بإبتسامة:وعليكم السلام..بتروحي خلاص؟
اريج هزت راسها بإيجاب
تنهد بعدين قال:شوفي فكرت هلبه الفترة اللي فاتت..الصراحه ماكانتش تقدم ولاتوخر عندي تجربتك الاولى..اللي يهمني انتي..انتي تكوني مقتنعه بيا ومتقبلتيني..
نزلت عيونها جو ع راحة يده اليسار..ابتسمت بعدين شافتله وقالت..ع شن موصياتك اختك..
ضحك ورفع يده ومدها ليها بش تشوفها..
قرت المكتوب وبضحكه قالت..
/كريم باستيري..شافتله وقالت..عندنا منه هلبه..
نزل يده وقال:كان نجيكم تبيعولي..
اريج بإبتسامه؛قول هديه..
اسكندر بإيتسامه؛يعني..سكر في شاهي!؟
ضحكت وقالت وهي تهز في راسها:امم..
ضحك بعدين قال؛خلاص بري اركبي سيارتك واني لاحقك بسيارتي..بش ناخد هدا..ورفع يده..
ضحكت اريج تاني ومشت لسيارتها..
وهو معاها بعيونه اللي كانت نظراتهم كلها فرح..شافها ركبت مشي ركب سيارته وقعد فيها لين تحركت وطلعت وهو شغل سيارته وطلع وراها...
🍃وبعد ماقطعوا مسافه لاباس بيها..
وصلوا لشارع القهوة..
دخلت اريج سيارتها للحوش..
وهو قعد مدرس سيارته "التندرا ليميتد"  قريبه من محل جنة...
ونضال اللي كان واقف في روشن المقهى متاعه يراجي في مرواحة اريج وين شافها مروحه وهو وراها كاد يفقد السيطره ع نفسه ويمشيله يطلعه من سيارته ويفش غله فيه..
قعد واقف يراقب في السيارة لين شاف اريج طالعه وفي يدها كيسه معبيه شادتها بإيديها الزوز...
واسكندر نزللها وخداها منها..شافهم وهما يتبادلوا في الكلمات والابتسامات..بعدين ولت خشت للمحل..وهو حط الكيسه في السياره وركب وتحرك طول..
وعيون نضال اللي كانت نظراتهم بين شرار نار الغيرة ودموع الألم مع السيارة لين درقت من قدامهم..
🍃🍃🍃🍃🍃
روح الجالي فهاليوم متأخر..
خش للفيلا وهو شاد بين ايديه صندوق هدايا مستطيل الشكل وكبير الحجم..
ركب بيها للدور التاني..ومشي طول لدار جنه..
شاف طوبى راقده بين شيتاتها..وجنه جنبها تلعب بلعبتها..
ابتسم..ومشي حط الصندوق ع الكرسي..
قرب لجنه وطبس عليها باسها من خدها بعدين قال بهمس..
/بابا..حبيبة بابا..ورجع باسها من خدها التاني وقال..عسل..
وجه نظره لأمها ابتسم وقال..امك حلوة هلبه..واني نحبها هلبه..رجع شاف لبنته وقال..وزي ماردتيها ليا حتخليها تحبني ولا بابا..
وجنه تسمع في بوها وهي تشوفله..
بعد عنها ولف ع السرير لين وصل في طوبى
قعد يتأمل فيها..بعدين..حط يده ع شعرها وقعد يمسح  عليه..
طبس وقرب لجبينها وطبع عليه قبله..
استاقظت طوبى..وين فتحت عيونها وشافاته انتفضت من الفجعه وقالت..
/شن دير؟!
وخر عنها وقال..
/نوضي صلي المغرب يذن..
ناضت قعمزت وهي تشوفله بريبه..
وهو كان مضايق ومعصب منها في نفس الوقت..
غيرت نظرها عنه لبنتها..مدت يدها وشدت يد بنتها..
الجالي حمحم وقال..
/زي ماتعرفي الخميس اللي بعد الجاي حفلة دخول حكيم صاحبي اخته بتتصل بيك بش تعزمك..
طوبى:ماعنديش خلوق للعراس الخميس بنكمل امتحاناتي ونبي نرتاح..
تنهد وقال..
/طوبى ماتعصبنيش زياده..هدا عرس اقرب صحابي ومرتي لازم تحضره..
طوبى شافتله بنظرات متهمكه وقالت.
/وانت قلتها مرتك لازم تحضره ومرتك هي نجاه بس..
تبدلت نظرات عيونه للغضب..
قربلها وشد ذراعها بقوة وقال..
/وانتي مرتي تبي ولاماتبيش تقعدي مرتي اني..
طوبى ابتسم بسخريه وقالت..
/صح مرتك بالغصب..
زاد غضبه..وشدة ذراعها ولت قرصه قويه..
وجعتها هلبه بس هي كانت تقاوم..وهو يزيد..وهي تقاوم وهو يزيد..لين نزلوا دموعها لكن ماسمعش منها كلمة"آه" وحده..
الجالي بغيظ؛حسي..حسي باللي نحس بيه..الوجع نفسه واقوى منه يجيني منك كل يوم واني متحمل..
طوبى مابتش ترد خافت تستفزه اكثر..ودموعها من الوجع مابطلوش نزول...
وهني جنتها ادخلت لما بدت تقول..
"با..با.."
طلق الجالي طوبى بالشويه وهو يشوف لجنه بدهشه..
/شن قلتي ياروحي..
ومشالها طول..
وطوبى قعدت تتحسس في ذراعها وهي تتوجع..
قعمز قريب ع بنته وعيونه الملهوفات عليها..
"با"
عاودت قالت نفس الحرفين بس من غير تكرار..
🍃الطفل فهالعمر ينطق هالحروف ويكرر بدون مايعرف شن تعني هي بس بدايه تعلمه لنطق بعض الحروف السهله..لكن حني نربطوا فيها عاطفيا بمعناها بابا..وماما🍃
رفعها الجالي وضمها وهو يقول؛حبيبة ماما..
وطوبى ناضت من جنبه ومشت طلعت من الدار للحمام..
خشت وسكرت عليها الباب..
وقفت قدام المرايه..رفعت كم يدها اليسار فوق..
شافت اثر قرصته اللي كان لونها بنفسجي غامق ومكانها طايب من قوة القرصة مررت يدها عليها ودموعها ينزلوا..
مازالت اثار صفعاته موجوده ع وجهها ليلحقهم هالآثر الجديد..
في النهايه هالاثار تاخد وقتها وتختفي..
لكن الاثر اللي فالنفس ياخد سنين من العمر على مايزول ومرات يقعد لأخر العمر...
🍃🍃🍃🍃🍃
وفي بلاد بعيده..في قارة تانيه..
في واحد مم بيوت الليبين الاغنياء في هديكا البلاد..
كانوا مختار وفاتن ورضا مقعمزين حوالين طاوله جمعتهم بأهل البنت اللي بيخطبها رضا.."ياسمين"
لقائهم كان عفوي وطبيعي وحب الظهور اللي عند مختار خلاه يسيطر ع اللقاء..
🍃مختار:نعترفوا ان العمر ليه دور يعني لازم نبدا نركز ع كل شي بالذات الماكله..
اب ياسمين؛وهدا الصح بش تقعد محافظ ع لياقتك الله يبارك عمرك مايبانش عليك..
ياسمين بضحكه؛لو يسمع مني ويفكر في موضوع جاكلين طاير عقلها فيه..
ام ياسمين بضحكه؛يجدد شبابه معاها..
مختار بإبتسامه؛اني كل يوم متجدد وشبابي دائم لايكبر ولايقدم ..ولو جيت بنتزوج بعد فاتن فمش حتنزوج الافاتن .
ضحكت فاتن بخجل..
وهما ابتسموا..
ياسمين؛تستاهل فتون جمال وثقافه ورقي..
فاتن بإبتسامه؛كلك ذوق حبيبتي..
مختار:ياام العيون اللوزيه اشبحيلي..تشوفي في خطيبك كيف شخصيه راكزه قليل الكلام..لكنه طيب ورومانسي ولطيف والاهم من هدا كله مثقف ومتعلم احسن تعليم  وعنده طموح حطيه في عيونك وردي بالك تزعليه..
شافتله ياسمين بإبتسامه وهو ردها مجامله..
ياسمين وعيونها في رضا:واضح عمو..رجعت شافت لمختار وقالت..لكن وصيه حتى هو عليا..
مختار:مش محتاج توصيه رضا ونعرفه كويس حيحطك في عيونه ويحرسك برموشهم..
☘بوها وامها شافوا لرضا..لقوه منزل نظره للطاوله وهو مبتسم مجامله..كان عاجبهم هلبه..راكز ومحترم وشخص يعتمد عليه..
اما ياسمين كانت معجبه بيه ع الاخر من وقت طويل وحاولت تتقربله قبل ومختار لاحظ هالشي في البدايه تجاهله بس بعدين اهتم  وخطط للإرتباط الرسمي بيناتهم☘
مختار:خليك ع ثقه باللي يقوله عمك مختار..
هي بضحكه:اكيد..
ابتسم مختار وهو يشوفلها وبدي يغني..
🌸البنت الشلبية .. عيونا لوزية
بحبك من قلبي .. ياقلبي انتي عينيا
☘وفاتن تتأمل فيه وهي تسمع في صوته اللي كان جميل وفيه نغمه مميزة...
صفقتله ياسمين وهي تضحك..وهما حواليها مبتسمين..
وكملوا هدرزة وعشي وسط اجواء حلوة ودافيه..عكس الجو اللي برا..الثلج مغطي كل مكان..
🍃الثلج اللي كان مغطي قلب صابرين المجروح..
هي توا قاعده تحاول تتخطاه وتنسى برغم الذكريات اللي قاعده تلاحق فيها..وتعزي في نفسها لما تقنعها ان اللي صار هو الاصح وفي الخير للجميع...
🍃🍃🍃🍃🍃
وطوبى واثقه ومتأكده ان اللي صار معاها هو الاصح..
فكرة انها تخش محاكم وترفع قضايا لو خدت بيها كانت حتخلي طريقها تطول اكثر..وممكن بالحيل والمكايد لشياطين الانس تخسر كل شي..
واهي محاكمنا مليانه بالقضايا اللي استمرت سنين بسبب المماطلات والتلاعب وغالبا كانت نهايتها الخسارة..
طوبى اختارت اقصر الطرق اللي ممكن تكون خطيره للغايه بس كانت عندها ثقه عالية بالله ثم نفسها انها حتنجح في الآخر وتوصل في هدفها ولاباس لودفعت ثمن لحريتها الحريه اللي ياخدها الانسان بعز لابد ينعطى مقابلها ثمن غالي..
🍃🍃🍃
خش عليها الدار..سمعها تقرا في القرآن وهي مقربه التليفون لفمها..
كانت تقرا سورة العصر بالأحكام..السورة اللي وصلتها في الحفظ كانت تسجل فيها وتبعت لزينب...
قعمز ع الكرسي وهو يشوفلها بإستغراب..
هي كملت وبعتت التسجيل..
هو قال:شن ديري..
مابتش تجاوبه..
غمض عيونه وتنهد..بعدين فتحهم وجاها..قعمز جنبها ع السرير..حط يده ع راسها ومسح ع شعرها وقال..
/اسف..
ابتسمت بتهكم..
الجالي:انتي اللي تخلي فيا ندير فيك هكي..اني كان نلقى ماتنخصكش شوكه..لكن انتي تعذبي فيا..عذاب جهنم اهون من عذابك..
هي استغفرت ربي همسا..
الجالي؛باهي سامحيني..
تنهدت وقعدت ساكته..وصلها تسجيل صوتي..
هو عقد حواجبه وقال:افتحيه..
هي قالت؛لا..
حط ايديه ع بعضهم وتأفف بعدين قال..
/طوبى..افتحيه..
طوبى؛مراة باعتتلي التسجيل مانبيكش تسمع صوتها..
رفع حاجبه وقال..
/خايف نقولك تغاري تسمعيني كلمه زي السم..
طوبى ؛ممكن لوسمحت تطلع..
الجالي؛لامش ممكن ومش حنسمح..
طوبى بنفاد صبر..
/إنا لله وإنا إليه راجعون..
الجالي قعد يشوفلها بنظرات وجع غارقات بالدموع..
وهي تشوف القدام بنظرات امتعاض..
تكلم وقال:خديتلك قفطان نبيك تلبسيه في العرس..
قعدت ساكته..
هو قال؛نبيك تقيسيه نشوفه يجي عليك ولالا..
هي قعدت تفكر ومازال محتفظه بصمتها..
الجالي:ارجوك..
تنهدت بعدين قالت؛وينه...
الجالي شاف للبوكس وقال..
/اهو هني قدامك..
طوبى ناضت وقفت وقالت..
/باهي اطلع..
الجالي:البسيه في الحمام..
قعدت تشوفله بصمت..
الجالي؛بالعاده تبدلي في الحمام ولا!؟
طوبى:مرات يطيح مني ينبل ويفسد..
مرر نظره القدام بعدين قال..
/بري قيسيه في جناحك..
تنهدت بعدين مشت خدت الصندوق وطلعت بيه من الدار..
ابتسمت ابتسامه جانبيه وسرعت خطواتها لين وصلت في الجناح..خشت وسكرت الباب بالمفتاح..
مررت نظرها عليها وقالت..
/شكله اللي في بالي صح..هزت راسها بعدين قالت..خل نقيس الشلتوته اللي جايبها ان شاء الله مش عريان بس..
ومشت حطت الصندوق ع السرير..
فكت الشريط المربوط وهي تقول..
/مش عارفه كيف يفكروا الرجاله يغلطوا غلطع اكبر من رووسهم ويبوا المراة تسامحهم بهديه..لكن حني نستاهلوا حني اللي ديما متنازلات..
رفعت الغطا..حطاته ع السرير..بعدين طلعت القفطان..
رغم عنها عجبها..كان حلو بالمرة ومميز ومستور ويبان مجسم..بس اللون خلاها تستغرب..اسود..
رفعت حاجبها وهي تفكر وفي الاخر فهمت ان في من حاكيله عن #فستان_الانتقام..
🍃هو في دار بنته كان متمدد بنص جسمه ع السرير ورجليه لوطا محل نظره السقف والدموع ينزلوا..
فجاه سمع دقة الباب..مسح دموعها وناض قعمز ويجوا عيونه عليها...
بألم وهيام قال..
/جميله في كل حالاتك جميله وتاخدي العقل..
طوبى:يجي عليا مافيشي مشاكل..
الجالي:انتي اللي حلتيه..
طوبى:ع فكرة وبصدق نجاة مازال اجمل بهلبه غير كبيره شويه..
قعد يشوفلها وهو ساكت..
طوبى:خديتلها؟
الجالي؛يهمك تعرفي؟
طوبى:ايه نبي نعرف حتى هي ماشيه ولالا..
الجالي؛ايه..وامي وخواتي.
هزت راسها وهي ساكته..بعدين مشت طلعت من حداه..
غمض عيونه بألم ورجع انطرح ع السرير مرة تانيه..
🍀🍀🍀🍀🍀🍀
ومرت الايام...
🍃والجالي كان قاعد يتحمل في جفاء طوبى وقسوتها لهدف معين ناوي يوصل يوم حفلة عرس صاحبه..
وهي كانت منشغله بامتحاناتها وبنتها وحفظها القران..ارتاحت نفسيتها بعض..وارتاحت للمراة اللي تجي تقعد مع جنه حتى هي بس كانت ملاحظه عليها الرسميه الشديده في المعامله وشبه فهمت ان الجالي اما مخوفها او مهددها...
🍃واريج خلت اسكندر يأجل الخطوبه لبعد الامتحانات تكون عطلة نص السنه خشت وهي تولي متفرغه تماما..
🍃وصفاء كانت مش قادرة تتنفس من الضغط بين القرايه وحوش شيابينها..ولان نجمه مازال مش بصحتها عبت ع عواطف وماكانتش تعرف ان عواطف مخليه كل شي ع المسكينه صفاء...
🍃والتارقي اللي لاكان ليله ليل ولانهار نهار من خوفه ع ام العيون الحايره..فكر هلبه ان يمشي لوين ماساكنه يراقبها وين تطلع يعرف شن صاير فيها..بس كلها تقعد افكار مجنونه مستحيل تتنفد..
☘☘☘☘
يوم الخميس..
20ديمسبر...سنة 2018...
الساعه 11:00صباحا..
في مكان عمل عبد القيوم...
جاه صاحبه عيسى بفنجان قهوة وقال.
/خود عدل راسك من صبح ربي وانت ع رجل وحده..
خدي القهوة وقال؛ربك في العون..
عيسي شرب من فنجانه وقال..
/قولي يابو صاحب..
عبد القيوم؛امم..
عيسى:ماتعرفش حواليك ناس عندهم بنت يبوا يعطوها..
عبد القيوم؛تبي ثني!؟
عيسي بضحكه؛لا اعوذ بالله اني موحد..
ضحك وقال؛باهي لمن تبيها؟!
عيسى؛ياسيدي لخوي طلعتله بعثه برا وقال نبي نتزوج ونسافر..بس عنده شروط يبيها تكون قد المسؤوليه وتتحمل الغربه..
عبد القيوم:كم مواليده؟
عيسى؛89..
عبد القيوم قعد يفكر شويه بعدين قال..
/خلي الموضوع شوري..
عيسى؛وهو عندك غير بالله استعجل..
عبد القيوم هز راسه بعدين رشف من القهوة...
🍃🍃🍃🍃🍃
الساعه 9:00ليلا.. جميلات الجميلات بفستان ازرق فيه تول وشريطه حلوة ملفوفه ع راسها كانت في قعمازها تشوف لامها اللي كانت تحط ع لمساتها الاخيره ع طلتها..
فستانها كان كم طويل ضابط ع جسمها..موديل شعرها خلاته غجري ورفعاته كله فوق...وكعادتها اتقنت في زينة وجهها وكانت طالعه جميله وجذابه جدا..
كملت ولمت المكياج وحطاته في العلبه متاعه..بعدين خدت العلبه ورفعتها لدار الملابس..
دستها في الدرج..والتفتت لركن الاحذيه..شافت كندرة كعب سودا فيها ع الجنب زي البروش لونه فضي..
خدتها وطلعت بيها للدار..شافت لجنه وقالت..
/ياخواتي ياخواتي بحبها..دي حبيبة امها..وخدتها لحضنها وقعدت ترقي فيها..
☘ع خشة بوها..اللي لما شاف امها وهي عاطية بالظهر بس قلبه انجن عليها..
قدم لين بانت عليه من القدام..قلبه ذاب وسط ضلوعه..
طوبى انتبهت لوجوده شافتله بطرف عينها بعدين غيرت نظرها عنه وكملت قرايه ع بنتها...
هو ابتسم بعدين مشي لدولابه..
وهي كملت وحطت بنتها ع بطانيه تلتبس لبس...
لبستها البطانيه ورفعت السوسته..
هو طلع حاجه من الدولاب وسكره بعدين جاها وقال..
/شوفي..كانت علبة مجوهرات...فتحها..شافت فيها طقم ذهب ابيض فخم..
هو قال:البسيه..
بدون ماتشوفله خدت منه العلبه ومشت للزيانه..
حطاته عليها..
فكت الحلق اللي كانت لابساته..بعدين خدت حلق الطقم ولبساته..وهو يتأمل فيها..قرب منها وهي تلبس في الخاتم والحديده..وين جت بتلبس العقد..هو خداه قبلها..
تنهدت بملل..
وهو جي وراها ولبسها العقد شافها من المرايه وقال..
/رقيتي روحك..
هزت راسها وتباعدت عنه ومشت بتاخد عبايتها متاع الكاب..
تنهد بعدين قال..
/نزل جنه؟.
طوبى وهي تلبس في العبايه..
/راجي ننزلوا مع بعض...
ابتسم لما سمعها تكلمت بصيغة الجمع وقال..
/حاضر..
استناها لين لبست العبايه..بعدين خدت كندرتها وقالت...
/ارفع جنه..
هو جي لبنته رفعها وقال..
/روح بابا..شاف لطوبى وقال..اطلعي..
مشت طوبى طلعت وهي رافعه عبايتها وهو مشي وراها وعيونها ع رجليها الحافيات..
وصلوا في الدروج ونزلوا ..
هو قعد مركز عليها كيف تنزل حفيانه والكندره في يدها وطول الوقت مبتسم بشوق وقلبه حالته بالويل..
وصلوا لوطا..مشت طول للباب..حطت الكندره ولبستها..بعدين فتحاته ووخرت..
هو طلع بجنه..وهي وراه وسكرت الباب..
🍃🍃🍃🍃
وطول الطريق وكاظم يغني...احبيني..وهو يغني معاه..
وهي مش طايقه روحها..
فجأه رن تليفونه..شاف اسم المتصل ع شاشه في السياره..ضغط ع زر تحت الشاشه ورد..
/ايوه..
"وينك حبيبي"
الجالي شاف لطوبى بطرف عينه بعدين رد نظره للطريق وقال..
/في الطريق..
"حتى احني في الطريق"..
الجالي:من رافعكم؟
"راجل خديجه"
الجالي:وانتي تتسهوكي حدا راجل خديجه هكي..
ابتسمت طوبى من ورا خمارها تهكما..
"مايسمعش فيا"
الجالي:باهي سكري سكري..وهو اللي فصل عليها..ولى كاظم يغني وهو يغني معاها..
وطوبى مخنوقه..
اما جنه السياره خلتها تريح في النوم...
🍃🍃🍃🍃🍃
وصلوا محي الدين والجالي مع بعض..
نزل الجالي كروسة جنه..بعدين نزل جنه وحطها فيها وعطاها لأمها..
طوبى خدت الكروسه وخشت داخل..
ونساوين عيت شنيبه وراها..
نسرين بصوت منخفض..
/اللي تجي جنبها ولاتكلمها نديرلها العار...
الزوز سكتوا وهما ماسكين اعصابهم بقوة..
اما مغليه فكانت تسحن ع طوبى سحن..
🍃في الحمامات..
حولت طوبى عبايتها الكاب..ودارت اخر طلة ع روحها..
وين جت بتطلع..
خشوا عليها..
هي تجاهلتهم..بس نسرين وقفتها وقالت..
/معليشي لازم نخشوا مع بعض..
وقفت طوبى تراجي فيهم ولهت عنهم ببنتها وهي تلاعب فيها..
نجاة وهي تحول في عبايتها كان تسرق في النظر لطوبى تشوف فيها شن لابسه وشن مدايره.
غيرت نظرها عنها للمرايه وهي تشوف في مكياجها .
حتى هي لبست فستان اسود بس كان جلد ومش مستور..وشعرها كله حطاته للخلف ومثبتاته تثبيت..
وفي يدها شاده شنطه لونها احمر راكب مع احمر الشفاه اللي حطاته..
مغليه؛هيا..
ومشت طلعت هي الاولى..
وهما طلعوا وراها..خديجه تجاهلت طوبى تجاهل تام زي مادارت امها..
اما نسرين كانت تبي تهدرز عليها وتعرف حالها مع الجالي لكن عارفه ان طوبى مش حتتجاوب معاها..
☘نجاه:حلوة الصاله..
خديجه:صاحبتي داروا فيها دخول ولد اختها تشكر فيها هلبه..
مغليه؛ايه قنينه..
..وصلوا للقاعه وخشوا...
والانظار توجهت ليهم...
نجاة كانت جميله وملفته للنظر هلبه بطلتها الجريئه...
بس في من اللي يعطيه ربي فوق حسن الوجه والجاذبيه بهاء يخلي حضوره يطغى ع الجميع..
هادي كانت طوبى وهي تمشي بكروسة بنتها..
تلقوهم نساوين عيلة حكيم ورحبوا بيهم..وكان واضح جدا ترحيبهم الحار بطوبى..يعرفوها قبل..وعارفين قصتها من حكيم ومتعاطفين معاها بكل جوارحهم..
اخت حكيم؛الله يبارك ع الزين والبهي..لمن بتطلع يعني النحله ماتجيب كان العسل..
طوبى بضحكه خجل:تسلمي يارب..عيونك الحلوة..
ونظرات نجاه الحاقده عليها كانت تلقى تاخد روحها وتخلص منها..
ومغليه وخديجه يحاولوا ع قد مايقدروا يبانوا باردات...
☘بعد السلام رفعوهم لطاولتهم..
قعمزوا حواليها ونسرين كانت جنب طوبى..
تشجعت وقالت:تعطيني جنه شويه..
طوبى فكتها الحزام وطلعت بنتها وعطتها لعمتها..
حناها وعمتها التانيه ابتسموا من قلوبهم لما شافوها..
اما مرت بوها كانت مدايره روحها مركزه ع الصاله..
☘وشويه بدوا يجوا اقارب حكيم ويسلموا عليهم..
وفي الحقيقه كان عندهم فضولهم يشوفوا نساوين الجالي عن قرب ويقارنوا بيناتهم...
:طوبى صغيره وحلوة وجذابه ع الاخر..
:حتى نجاه مافيها ماتلوحي..
:لكن فرق العمر واضح..
:صح..وفي النهايه مارابح كان الجالي..
ضحكوا وكملوا طريقهم لطاولاتهم...
🍃🍃🍃🍃
مشت الحفله في البدايه وسط هدوء حذر وضبط نفس بين جميع الاطراف..
لعند ماجي وقت استعراض المواهب..
ناضوا خديجه ونجاه مع بعض ومشوا للمسرح..
مغليه:ماشيه لأم حكيم..وناضت من حداهم حتى هي..
نسرين تبعت امها بعيونها لين تباعدت..بعدين شافت لخديجه ونجاه لقتهم لاهيات باستعراضهم..
غيرت نظرها لطوبى لقتها تتفرج عليهم وع ملامح ابتسامه فيها شي من السخريه.
نسرين:طوبى..
شافتلها..
نسرين خدت شنطة طوبى..وحطت فيها تليفونها سامسونج قديم شويه..
طوبى قعدت تشوفلها بصدمه..
نسرين شافتلها وقالت.
/هدا من عبد الرؤوف دسيه كويس..
تعبوا عيون طوبى دموع وهي تشوف لنسرين..
ونسرين سكرت الشنطه زين وحطتها ع الطاوله بعدين ربعت ايديها وهي تشوف للي يرقصوا وتقول..
/كان بدوري ع شي دوري في تلاته اماكن..دار النوم..او المكتب او السيارة..
طوبى حست جسمها صقع من الصدمه..ماتوقعتهاش من نسرين نهائي..
نسرين:نعرف خوي كويس لو حس ان في شي حيهدد مستقبله يتخلى عنه طول..
غيرت طوبى نظرها للمسرح...
نسرين ودموعها في عيونها..
/مش هاين عليا خوي..لكن قدر سدرة عندي مش شويه..
بعدين ناضت ومشت للمسرح حتى هي كانت تقاوم في شعورها بالوجع ع خوها..لكن خلاص يكفي مانصراته ع ظلمه بسكوتها..لازم تحطله حد وتكفر عن اخطائها..
اما طوبى فكانت حاسه بشعور امتنان كبير..مش لنسرين.
بل لرب نسرين اللي يسخرلها في الاسباب..
☘بس لابد ياطوبى تمري بلحظات صعبه تشوفي فيها من المخلوقات الضيم والجبروت وتصبري وتحتسبي بش توصلي مش بس لهدفك بل لمكانه عظيمه عند العظيم الاعلى☘
🌸قال الله تعالى؛ ‏"إِنَّمَا يُوَفَّى الصَّابِرُونَ أَجرَهُم بِغَيرِ حِسَاب"
- الزمر (10)
قال العلامة عبد الرحمن السعدي -رحِمهُ الله-:
وهذا عام في جميع أنواع الصبر:
- الصبر على أقدار اللّه المؤلمة فلا يتسخطها،
- والصبر عن معاصيه فلا يرتكبها،
- والصبر على طاعته حتى يؤديها.
فوعد اللّه الصابرين ‏أجرهم بغير حساب أي: بغير حد ولا عد ولا مقدار.🌸
🍃🍃🍃🍃🍃🍃
نزلوا من ع المسرح بعد مادهشوا..
ولوا قعمزوا حوالين طاولتهم..ولحقتهم مغليه..
نجاه كانت تشوف لطوبى بغيظ تبي تستفزها وتحرق اعصابها بأي شكل..
ابتسمت سخرية وقالت..
/ فيفي عبدو ماورتناش مواهبها اليوم!
خديجه ومغليه قعدوا يشوفوا لطوبى بنظرات مكر..
ونسرين تشوف لنجاه من فوق لتحت..
طوبى شافتلها بنظرة بارده مع ابتسامه بارده وقالت..
/مخليتهم لحوشي راجلنا قالي معاش ترقصي لغيري..
رفعت خديجه حواجبها بصدمه..
ومغليه فنصت عيونها..
ونسرين شدت ضحكتها..
اما نجاة قعدت تشوف لطوبى بحده..
وطوبى تشوفلها بكبر وبرود وع وجهها نفس الابتسامه..
نسرين:طاكمك حلو هلبه شكله من*****
طوبى بإبتسامه؛ايه...فاجئني بيه الغالي قبل لنطلعوا..
خديجه شافت لامها هي مش مستوعبه..
وامها تشوف لطوبى وهي مصدومه لابعد حد..
نسرين:يعيش ويجيبلك..
طوبى:تسلمي..وغيرت نظرها للمعازيم..
ونظرات نجاة الحاقده علي الطقم اللي لابساته..
🍃ومرت باقي الحفله..نجاة معاش كلمت طوبى..
وخديجه ومغليه استمروا في التجاهل..
وطوبى يا تتفرج ع الاجواء يالاهيه ببنتها...
بعد العشي...
جابوا عروسة حكيم...
ماكانتش جميله..بس دمها خفيف وجذابه...
علقوا عليها نجاه وخديجه ومغليه تعليقات ساخره وقعدوا يقارنوا فيها بحكيم اللي كان شكله وسيم..
طوبى معاش قادرة تتحمل..لدرجة انها قعدت تراجي امتى تروح لسجن الجالي المهم تخلص منهم..
ويتصل الجالي..
طلعت تليفونها من الشنطه فتحت الخط وردت..
/ايوه جالي..
نجاة شافتلها بنظرات غيره وغيظ..
"اسمعي بنروح بالعيله معانا"
ناضت ومشت تباعدت عنهم لاخر القاعه وهما يشوفولها..
طوبى:شن هي!!؟ تبي دكني مع اختك ومرتك لالامانقعمزش معاهم..
"ياودي حاضر قعمزي القدام.."
طوبى:تعرف لو نلقاك تساير فيا نقعد والله ماني متحركتها..
"والله لما تقعمزي القدام..نقولك اطلعي انتي وجنه توا بعدين ساهل"
سكرت عليه ومشت ولت للطاوله..
وصلت فيها خدت عبايتها وبدت تلبس..
نسرين؛قالك هيا..
هزت طوبى راسها بإيجاب..
لبست العبايه وخدت الكروسه ومشت بيها بدون ماتقول كلمه..
🍃طلعت برا لقت الجالي يراجي فيها..
خلاها تركب السيارة..بعدين طلع الجنه من الكروسه وعطهالها..وحط الكروسه في الكوفني..
ومشي ركب..
الجالي؛شوفي ع خاطرك شن قاعد ندير..
قعدت ملتزمه الصمت..
هو تنهد واتصل بنسرين وقاللها ان محي انشغل وماقدرش يجي وهو بيروح بيهم..
شويه وطلعوا..
مغليه وخديجه انصدموا لما شافوا طوبى قاعده القدام..
ركبوا من الخلف وهما مقهورات من الجالي ع الآخر..
بس نجاة ركبت وراه مباشرة..
هو تحرك طول من سكات..
والصمت خيم عليهم طول الطريق....
🍃طول الطريق ونجاة تحاول تلفت نظره الجالي وهي تشوفله من المرايه..وهو عقله مع طوبى بس..
وبسرعه قصوى وصل لشارع القهوة..
لما خشوله دموع طوبى نزلوا طول...قعدت تراجي امتى تشوف حوش اهلها..قعدوا عيونها معلقات فيه لين نزلوا مغليه واللي معاها..والجالي انطلق بسرعه مروح للفيلا متاعه..
🍃🍃🍃🍃🍃
بعد ماروحوا للفيلا..
عقل طوبى ماكانش يفكر غير في التليفون اللي وصلها من رؤوف..وين ممكن درقه بحيث مايطيحش في يد الجالي..
حطت بنتها في سريرها ومشت للجناح والجالي وقتها ماكانش معاها..
خشت وسكرت الباب ومشت طول لدار الملابس..
فكرت انه اخر مكان ممكن يخطر ع بال الجالي يلقى فيه شي..
ردت الشنطه بعد ماحولت منها المكياج لمكانها وخلت التليفون فيها مؤقتا..
فجأه سمعت باب الجناح بدق..
طلعت تجري لين وصلت فيه..خدت نفس ودارت روحها عاديه بعدين فتحت الباب..
هو لما شافها ابتسم وقال..
/باهي ماغيرتيش..جاها وحول العبايه..
هي قالت بخوف؛خيرك!
لوح العبايه ع االسرير وقال..
/تعالي معاي..خدي يدها ورفعها معاه..
طوبى بتوتر؛شن في!؟
الجالي:اصبري بس..وصلوا في الدروج رفعها بين ايديه ونزل بيها..
وهي مرعوبه ع الاخر..
وصل بيها تحت..نزلها...
وخداها من يدها وقدم بيها القدام شويه..
شافت في ركن من الصاله الكبيره..زينه وشموع وورد منثور
ولاب مفتوح وجنبه تسالي..
الجالي:تسهري معاي ع فيلم..
طوبى شافتله..لقت في عيونه نظرات ازعجتها..جبدت يدها من يده وقالت..
/تعبانه نبي نرقد..
ولفت بتمشي..هو جبدها من ذراعها ليه وقعد يقول بإنفعال..
/شن تبيني نديرلك اكثر من هكي قوليلي..شن تبيني ندير..نقتل روحي قدامك!!؟
طوبى وهي تتوجع من مسكة يده القويه لذراعها..
/مانبي شي..قتلك مانبي شي..قداش مرة بنعاود ونقول..انت جبرتني نوليلك جبرتني جبر..اني معاش نبيك معاش نبي..
الجالي نزلوا دموعه وهو يقول..
/حرام عليك اللي ديريلي فيه والله حرام..اني نعشقك نموت ع تراب رجليك افهمي..حسي..خبطها ع ظهرها بقوة بايديه الزوز وهو يقول بصوت عالي..حسي..
وضمها بقوة وهو يبكي...وهي تتوجع من قوة ضربته وضمته الخانقه ليها..مش قادرة تتحمله مش طايقاته..قعدت دف فيه وهي تقول بوجع..
/مش بالسيف..مش بالغصب..اني مانبيكش مانبيكش..
بعد عنها وهو شادها ويشوفلها بغضب من وسط دموعها..
طوبى وهي تشوفله..
/انت لاتعشقني ولاتحبني ياجالي انت تبي تملكني وخلاص..تعرف علاش اللي درته كله رغم انه حلو هلبه مااثرش فيا!؟لانك دايره ع خاطرك مش ع خاطري انت تبيني نسامح وننسى ونولي زي قبل..وصدقني لو صار هكي..انت مش حتولي زي قبل لا..اسوأ من قبل بوين..
الجالي بغضب:انتي وحده ظالمه..ظالمه..وجاحده..
هي بعداته عنها وقالت..
/ومش حتشوف مني غير الظلم والجحود ع قولتك..
ولفت ومشت للدروج وركبت وهو معاها بعيونه اللي كانت نظراتهم مجنونه..طول ركب وراها يجري..
لما قربت توصل للدور التاني..سمعت صوت الجري ع الدروج عرفت انه جايها..طول هربت تجري للجناح بتسكره عليها..
هو لحق عليها وخش شدها وقال..
/في من حق مايتاخدش الا بالقوة..
طوبى بذعر؛لالا..لا بالله عليك..
ويصفعها بكل قوته لين طيح ع السرير...
☘ومنيه في دارها كانت حترقد خلاص..انفجعت لما سمعت صوت عياط طوبى..ناضت قعمزت وفتحت الروشن..
"لابالله عليك لا....لا.."
وسمعت صوت صرخه عالي..بعدين سكت صوتها مرة وحده..
منيه بخوف؛ياربي شن دارلها!؟؟
ناضت وطلعت تجري من دارها..
نزلت لوطا..سمعت حس بوها وامها يتعاركوا..
"شن دخلنا بيهم شن دخلنا يقتلها ولايحرقها مالناش علاقه"
"حط بناتك مكانها!"
"اسمعي يامراة بتكتري دوة تاخديها كلمتك توا"
وينفتح باب الدار وتطلع امها وهي تبكي وتمشي للصاله..
ومنيه قعمزت بإحباط ع الدروج وقلبها موجوع ع طوبى...

#سجن_يوسف
#طوبى

...يتبع....