طوبى ☕شارع القهوة☕

الجزء_الخامس_والتسعين

#طوبى  "جنة طوبى"
#جمان_فريد
#الجزء_الخامس_والتسعين"مراد قلبي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الأذكار
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه.“
- ابن كثير.

🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "لا أملُك في الدُنيا إلا قلبي
‏وقَلبي عَزيزٌ لا يَأخذهُ إلَّا عَزيز.."🍃
______________________________________
"العيله بتبات في حوش ماليها قلت نجيبك نتسحروا عندي في المطعم ونطلعوا للجامع"
عبد القيوم وهو واقف في باب الشقه..
/لانبي الهدوء..خش انت تسحر معايا..
ولف وخش ولحقه ربيع وسكر الباب وهو يقول..
/شن داير للسحور؟
عبد القيوم من الكوجينه..
"تعال.."
مشي ربيع للكوجينه وخش..
ابتسم بإستغراب وين شاف سفره معبيه بالأكل الشامي وقال..
/فكرتني بالذي مضى..
ابتسم عبد القيوم وهو يصب في العصير..
ربيع؛من عيلة العربجي؟
عبد القيوم؛الكسابكجي..كسا..بكجي..
ربيع؛اللي هو..المهم عيت السوريين..شافله وقال..تحسهم ناس كويسه..
عبد القيوم:الراجل كويس وراقي ومثقف ماتملش من حكاويه وكلامه..
ربيع بإبتسامه؛وتطيبهم!؟
عبد القيوم وهو يدير في الشاهي..
/واكل قبل اكل شامي وعجبني لكن كان اكل مطاعم مش كيف اللي كليته اليوم شي عجيب..
وغطا البراد وشغل الغاز وحطه ع النار..
ربيع بضحكه؛سهفتني..
خدي عبد القيوم السفره وطلع من الكوجينه وربيع وراه يقول..
/مش ملاحظ حاجه..
خشوا للدار مع بعض وعبد القيوم يقول..
/حاجة شني؟.
قعمز ربيع وقال..
/بديت تقرب شويه  من البنت السوريه..
عبد القيوم مسح ع ذقنه بعدين قال...
/هذي تاني مرة تلمح شور فكرة تبيها تخش راسي بالغصب..
ربيع حرك راسه بالنفي وقال...
./مش هكي..اسمعني جاي..اني اكبر منك ب 12 سنه..ويقولوا اللي اكبر منك يوم أعلم منك بسنه واني نشوف ان مصلحتك بعيده عن بنت الواعر..
بدت ملامح التجهم تبان ع وجه عبد القيوم وهو يسمع فيه..
ربيع:الحكايه مش حكايه الجالي بس ولو انها مش ساهله بكل..عندها منه بنت لو فكرت تاخد بعده اول حاجه يحاربها بيها بنتها وتعرف القانون كويس وشفت بعينك شن دارت بش تخلي بنتها معاها بعد الطلاق..!وزي ماقلتلك حول الجالي ع جهه في عندك مختار..نعطيك معلومه تصدمك!..
عقد عبد القيوم حواجبه بقلق..
ربيع؛اللي صارلي..خسارتي لرزقي برا كان وراها مختار..
رفع حواجبه بصدمه..
ربيع بضحكه متهكمه..
/ايه والله هو..المعلومه وصلتني من عبد الرؤوف الفترة اللي فاتت وأمني مانقولش لكن من خوفي عليك ولإني نبي مصلحتك خبرتك...
عبد القيوم بعدم استيعاب..
/ليش دار معاك هك..شن في بينكم!!؟
ربيع؛والله مادرت حاجه واني اصلا عمري ماضريت بنادم..حاولت نفهم ونعرف بروحي السبب مالقتيش الاسبب..بصراحه مايستاهلش نهائي..زمان قبل اكثر من عشرين عام..عطيته وعد اني نخليه يهاجر معاي،اني كنت مرتب اموري للهجرة وبوي ساعدني اما هو بوه الله يرحمه ماكانش يبيه يهاجر حاول فيه بش يساعده ماباش..جاني وقالي اصبر عليا فتره واني الحق وقتها ماقدرتش،التأجيل مش في صالحي،استسمحت منه لكن حسيته زي اللي خدي مني موقف..وشكله قعد حاقد عليا من يومها..
عبد القيوم بإزدراء..
/مريض هذى..مريض اكثر من الجالي واخطر منه..
ربيع:ايوه..هدا اللي نبيك تستوعبه..واضح انه حاقد ع عيلته وع اخته الصغيره بالذات..لوصار منكم القدام مش حيخليك في حالك..
عبد القيوم بنبرة تحدي واصرار..
/انت عطيتي سبب جديد يخليني نتمسك بيها اكثر من قبل بواجد..ربيع..اسمعها ورد بالك تنساها..والله والله العظيم ماني مخليها ولو من يصبي بيني وبينها ندير المستحيل بش نشيله من طريقي وناخدها..وتو تحق بعيونك مش تسمع بس.
وخدي طرف كبة وحطه في فم واحد..
ابتسم ربيع وبدي يغني..
/الحب وناره الحب وناره مازلت صغير ياخساره..
عبد القيوم ضحك غصب عنه وحرك راسه يمين ويسار..
وربيع خدي طرف كبه وكلاه وهو مبتسم..
🍃🍃🍃🍃🍃
"عمتي مش عاجبها ماخلت ماقالت"
أريج بضيق..
/ قوليلها الدنيا آخرتها موت مافيها شي يستاهل
آلاء تنهدت وقعدت ساكته..
اريج:بتمشوا غدوة لحوشكم؟
آلاء:حوش بوه مش حوشه..يبي يدير طله ع عيلته كله وناس اصحابه كل يوم عند حد..
أريج:امم..باهي لتوا مافي حاجه..قصدي حمل..
آلاء:لالا متفاهمين اول ثلاثه شهور مانفكروش في الموضوع بكل ع الأقل لين ناخد ع الوضع غادي..
اريج هزت راسها وقالت..
/مزبوط..
آلاء:مايكلمش فيك معتز بكل شكله!.
اريج:اني قريب ننسى ان عندي خو اسمه معتز..ريته مرة وحده ف العزي بس..
آلاء:اني نبي نعرف كان قاعد في باله موال السفر.
اريج؛خالك مختار تبخر بكل..
آلاء:ايه معاش كلمني بكل لكن يكلم في عزيز ع الخدمه..
اريج بتفكير..
/زعمه عادي ولافي إن!؟
آلاء :مش عارفه..وبصراحه اخر همي..
اريج بإستغراب..
/خيرك!
آلاء بضيق:مش لشي بس معاش نبي في حياتي حد يجيني من وراه مشاكل..
اريج؛ بيقعد في حياتك مادام يخدم مع راجلك..
آلاء تنهدت وقالت..
/ربي يعطيني خيره ويكفيني شره..
اريج حطت راسها ع كتف اختها وقالت..
/آمين كلنا يارب..امي الفتره هادي حسيتها خاشه حالة كآبه زي اللي مرت بيها زمان لاعاد تدوي ولاتبي حد يكلمها ..
آلاء بحزن؛لاحظتها...
🍃وقعدوا يحكوا ويشكوا لبعض وهما مقعمزات ع حصيرة في الجنان من القدام..
🌼وطوبى ع صلايتها تحت شجرة الياسمين وضي الكاشف المفتوح كانت منشغله بحفظ سورة نوح من جزء( تبارك)..
🍃🍃🍃🍃
بينما نضال كان مقعمز قريب ع روشن داره وهو عايش في عالم جديد لإبن القيم..
كتاب "الداء والدواء"..
يتكلم ابن القيم في الكتاب هدا عن تهذيب النفس واصلاحها ويعرف الانسان عن النفس الامارة بالسوء...عن عيوبها والشهوات اللي تسيطر عليها ويتكلم عن مكائد العدو الاكبر الشيطان اللي يعاون النفس الاماره بالسوء ع صاحبها وتخليه يضيع في سجن الهوى والذنوب والمعاصي..
تكلم ابن القيم عن هدا كله حتى بعلم النفس بس بطرح ديني واثبت كلامه بأدله منطقيه وعقليه تشوق وتقنع اي حد قلبه مشروح للهدايه يقراه..
🍃وع سيرة نفس الأمارة بالسوء..
صابرين اللي كانت واقفه في هالوقت فحديقة الفيلا بروحها
تلوم في هالنفس ع اللي خلتها ديره زمان..
استغربت في روحها كيف شغلها الموضوع لهالدرجه..ووجعها لدرجة انها حست بالنفور من نفسها..
صابرين كانت تبي ترمي احمال الماضي كلها وترتاح...واكبر حمل شايلاته توا..هو اللي صاير لسدره..
الكلام اللي سمعاته من امينه خلاها تتفكر اللي صار الفتره هديكا..
تتفكر كيف تعجبت هي واختها من السحر اللي ماعطاش مفعوله مع طوبى رغم انهم كانوا عارفين قوته..وعارفين حنكة الساحرة الملعونه اللي داراته..
وتوا عرفت السبب وبطل العجب..
سدره تخطت السحر مكان اختها وهدا احتمال وارد وياما صار لناس قبل..
صابرين توا..تبي دير شي تكفر بيه ع هالذنب العظيم...
قعدت طول الليل بروحها في الحديقه وهي تفكر..
فجأه..
قطع عليها هو وحدتها لما قعمز جنبها بمسافه..
رضا؛خيرك مقعمزة هني بروحك!
صابرين وهي تشوف القدام قالت..
/بنسألك سؤال..
شافلها وقال..
/شن هو؟
صابرين؛لو جاتك فرصه تصلح غلطه درتها في حق حد بريء زمان وانت تبي تصلحها بس خايف تواجهه..شن دير؟
شاف القدام وهو يفكر..وهي تراجي في اجابته..
شويه قال..
/لو نقدر نصلح هالغلط من بعيد نصلحه من غير مانواجه..
شافتله وهي تفكر..وهو غير نظره ليها وقعد يشوف لعيونها..
صابرين؛صح..حتى من بعيد..غيرت نظرها بعدين تنهدت وناضت..
"مرتاحه معاه؟!"
صابرين:انت مرتاح معاها؟
رضا بنظرة حزن مخالطه النظرة القاسيه اللي ديما ملازمه عيونه..رد عليها وقال..
/لا..
هي شافتله بإبتسامه وقالت..
/اني مرتاحه..
ومشت وخلاته بعد ماحطت ع جرحه ملح وكبست عليه بكل قوة..
🍀🍀🍀🍀🍀🍀
وتعدي الأيام الأولى من رمضان.
وطرابلس عايشه بوجهين..وجه جميل ورايق ماطالاتاش الحرب وناسه تعودوا وتكيفوا ع سماع اخبار..
وجه متشوه وحزين ناسه يعانوا من ويلات الحرب اللي مابتش تهدا..كر وفر..ويوم تكون المعارك فيه عنيفه ويوم عاديه..ومافيش مجال لالصلح ولاهدنه...
🍂🍂🍂🍂يوم السبت🍂🍂🍂🍂
18مايو...سنة 2019..
كان اليوم الثاني عشر من شهر رمضان...
في هالليله من رمضان..قرروا خوت مناسك يحتفلوا بذكرى ميلادها بمفاجأه تفرح قلبها لأنها اكثر من تأثر بالظروف الصعبه اللي مروا بيها..
وهالمفاجأه مش حتصير من غير اقرب الناس ليها..مروة..
اتفقوا..
ان الاحتفال يكون برا الحوش في وحده من المطاعم لمركز تجاري..حجزوا وحضروا كل شي وبدي تنفيد خطه المفاجأه فهالليله اللي كانت كالتالي..
..يجيبها مازن للمول مع مرته..وفايزة تجي مع مروة وتاله في نفس الوقت..
في البدايه يظاهروا بإنهم بيشوفوا البضاعه اللي نازله من لبس بالك ياخدوا من توا للعيد..
بعدين مروة خدت مناسك لمحلات تانيه وقعدوا يدهوروا برواحهم...
🍃مناسك؛في فوق واحد عنده حاجات حلوة..
مروة:خلاص نركبوا نشوفوه..
ركبوا دروج عاديات..وخشوا للمحل وقعدوا يتفرجوا ع بضاعته اللي عجبت مروة هلبه..
☘في هاللحظه...
يوصل معين للدروج ويركب وهو يتكلم بالتليفون..
/ايه توا ماشيله بش ناخد منه الفلوس...
وصل فوق وهو يدور ع اللي ماسك المحل ويقول..
/باهي اني ناخدهم منه ونطلع طول لحوش نساباتك..كون هاني..ربي معاك..ونهي المكالمه..
وكيف جي بيقيم راسه..كتفه يضرب في شي..
يسمع بعده صوت شماعة اوشحه وشاربات تجي طايحه باللي فيها..
هو شافلها بإستياء بعدين قام عيونه ويجوا في عيونها وهي تشوفله بنظره غضب واستنكار..
حس في شي من داخل انفزع فزع..عقد حواجبه ومشي كمل طريقه بدون مايقول كلمه ولايهتم باللي داره..
مروة تبعاته بعيونها وهي تقول بهمس وعصبيه..
/متعجرف..
ع جية واحد من اللي يخدموا في المكان..
نهض الشماعه واللي طايح منها وهو يقول لمروة.
/ان شاء الله ماصارلك شي ياأبله!..
مروة بدون ماتشوفله؛لامافي شي..
ومشت من حداه وهو يتبع فيها بعيونه ويقول في نفسه..
"عيونها يقتلوا"..
وصلت في مناسك لقتها هايمه مع بلايز عجبوها..
مروة لما شافتهم نست اللي صار قبل شويه وقالت..
/يهبلوا..
مناسك بإبتسامه؛ولا!..بناخد منهم مادخليش..
شافت مروة السعر قريب طلعوا عيونها من الفجعه..
🍃بعيد عليهم شويه ع الكاصه..
:الناس الفتره هادي مضايقين زي ماتشوف وحركه البيع مش قويه فهمتها كيف...
معين؛فاهم وعارف حتى اني في البلاد زيكم..عطيني الفلوس وتو نزيد من عندي..
:تمام راجيني شويه..ومشي خش داخل..
ومعين واقف ع اعصابه وهو ياكل في شفه السفلي..
🍃ووراه بمسافه بسيطه..
يخشوا اخر الناس اللي ممكن تتوقع مروة تشوفهم في هااليوم..
اسماء وزوز بنات من قروبها..
من اول ماخشوا وهما ع ضحك وبصاره بصوت عالي..
وريحة عطورهم عبت المكان..
والشباب اللي يبيعوا عيونهم عليهم عشره ع عشره ماعدا واحد فيهم يشوف لمروة ويراجي فيها تقرب بش يكلمها..
🍃اسماء؛مش هداكا الشي يابنات هيا ننزلوا..
وحده منهم كانت لاهيه مع واحد من اللي يبيعوا تمل عليه في رقمها..
والتانيه قالت لأسماء؛هياهي..هيا انتي..
ابتسمت صاحبتهم للشاب وقالت..
/جيتكم..
؛فيسع لقيتي واحد جديد..
اسماء:تبي تقهر الاكس متاعها..
:ونبي نكسد مليت من الوحده..
ضحكوا..
وتمرر اسماء نظرها ع المكان..
ثبتوا عيونها ع مروة لما شافتها..ولعت فيها نار الغيره والحقد وهي تقول..
/شوفوا من في هني يابنات!
شافت لوين تشبح..عيونهم جت ع مروة ومناسك..
:شكلها قاعده مع مالك..
:باين عليه مكبد فيها حق ياسوما اللي خلاها تصاحب اخته..
وزادوا صاحباتها من نار حقدها ع مروة وخلوها تمشيلها طول وهما قعدوا واقفات في مكانهم يتفرجوا..
🍃مروة:هادي تبي بنطلون واسع..وهادي البنطلون هو شن رايك؟
"والله وصار منك ووليتي تخشي الأماكن هادي!"
شافوا الزوز لأسماء..
مناسك استغربتها لأنها ماتعرفهاش..
امامروة قعدت تشوفها بنظرات كره وازدراء..
اسماء بإبتسامه متهكمه..
/اكيد بتاخديه ع حساب صاحبك الصايع اللي صاحب بنات طرابلس كلهم..
مناسك؛هادي مني!؟
مروة:وحده مسكينه..
رفعت حاجبها وقالت..
/مسكينه!..من هي المسكينه يامسكينه انتي..وقدمت لمروة..
🍃:هما هادم كاملات..
خدي معين الفلوس وقبل ليبدا عد..مرر نظره ع المكان..
شاف اسماء واقفه ع مروة ومناسك وتبان تبي دير مشكله مع مروة..شافها قدمتلها..ومروة وخرت..
حط الفلوس ع الكاصه ومشي جيهتهم..
🍃مناسك بحده؛هيي انتي مني تحسابي روحك!
اسماء:اني كبدي عليك دم ومش مخلياتك تطلعي من هني الا بطريحه ويصير اللي يصير..
وكيف جت بتمد يدها..
"هييه!"..
التفتت مروة شافاته..
ومناسك انصدمت لما شافاته كانت تخاف منه زي ماتخاف من خوها.
وصل فيهم وقال..
/لمي بعضك وتسقدي بإحترامك أحسنلك..
واسماء لأنها تعرف معين كويس ومن يكون..بدون ماتنطق بحرف لفت بتمشي.
"نسمع بيك جايه جيهتها ماتلومي لنفسك"
مشت اسماء بسرعه وهي خايفه..
هو قعد معاها بعيونه لين طلعت مع صاحباتها بعدين مشي للكاصه..
مناسك تنفست بقوة وقالت.
/واك ياربي نخاف منه..
مروة بإمتعاض..
/يحساب روحه خميس القذافي..
مناسك بضحكه:علاش هالمقارنه!؟
مروة بإبتسامه اعجاب؛ماهو خميس هيبه وشخصيه..
مناسك بضحكه:هدا اللي هازيه عليه يرقد في هلبه ناس من المغرب..
مروة بلامبالاة:اللي هو..خلينا نطلعوا بحاجه من هني..
مناسك شافت للبلايز وهي تفكر..
قامت مروة تليفونها تشوف الساعه وقالت في نفسها..
"شن يديروا هدا كله!؟"
"عجباتك هادي!؟"
التفتت لقاته نفسه اللي قام الشماعه..
عقدت حواجبها وقالت..
/لا.
وخدت صاحبتها وتباعدوا..وهو لحقهم..
:والله قصدي شريف ونيتي صافيه..
مروة بإستياء:هيا مناسك..
مناسك:فوتيه ماتعدليش عليه..
🍃ومعين كمل عد الفلوس ودسهم في ظرف وحطهم في جيب سرواله القدامي..
بعدين شاف جهة مروة ومناسك ويشوف شي يرقي الدم لراسه اكثر ماهو راقي بالطبيعه..
ويمشيلهم طول..
اللي واقف ع الكاصه قال..
/تمتله..
🍃"غير اسمعيني شويه خودي واعطي معاي"..
ومايندريش بروحه الا وهو مجبود من الخلف..
معين؛نطلقك توا...تختفي من قدامي..
ومجرد ماطلقه طلع الولد وهو يجري ومايدري..
شاف معين للباقي وقال..
/اطلعوا توا مانبي حد هني .
كلهم مشوا طلعوا..
شاف معين للي واقف ع الكاصه واشر بإبهامه للخلف وهويقول..
/شوف شن يبوا..
طلع الشاب من ورا الكاصه..ومعين مشي قعمز مكانه وهو يراقب فيهم..
:تفضلوا شن تبوا..
مناسك؛خل نشوفوا قبل..
وولت لجهة البلايز ومروة وراها وهي تقول..
/حسني خفت..
مناسك بضحكه؛مافي شي يخوف..بالعكس قعدنا ع راحتنا..
ويجي لمروة اتصال..لما شافاته جاها من امها..
ابتسمت وخدت يد مناسك وقالت..
/ترا تعالي نسوكي..
مناسك استغربت فيها وقالت..
/من اتصل بيك؟
مروة بإبتسامه..
/تو تعرفي..
ومشوا الزوز طلعوا مع بعض..
معين ناض واشر للشاب يولي مكانه..ومشي وراهم طول يبي يعرف وين ماشيين..
🍃🍃
يمشوا الزوز وهما يهدرزوا..
وهو وراهم بمسافه بسيطه بعض الشي..
شويه وشاف مجموعة شباب مناظرهم توحي بفسادهم..
تباعدوا البنات عنهم ونزلوا عيونهم..
وواحد منهم وين جي فايت جنب مروة..
تحرش بيها لفظيا بكلام فاحش..
ويجيه معين ويجبده من رقبته ويطيح فيه ضرب..
هما الزوز هربوا يجروا..
وهما يجروا .التفتت مروة..شافت معين بارك ع الولد ويعطي فيه بالبوني" بوكس"..
التفتت القدام وقالت في نفسها..
"يخوف"..
مناسك؛كرهونا في السوق كرههم في جلودهم..حي عليا تو كله بيعاوده لمالك..
مروة:علاش الخوف..حني مادرنا شي!..
مناسك؛عارفه..لكن المرة هادي مالك حيلحلف ع السوق..
مروة ابتسمت وقالت..
/غير تعالي من هني تعالي..
وخشت بيها للممر ومناسك بإستغراب تسأل..
/شن في مروة!؟
مروة دور بعيونها وتردد في عقلها وصف امها للمكان وهي تقول..
/راجي شويه...
ويخشوا الزوز للمطعم..
وتشوف مناسك خوتها وخواتها بصغارهم يراجوا فيها..
بدت ع وجهها ملامح الدهشه..
مروة شافتها وضحكت..بعدين خدتها للطاوله اللي هما فيها..
مجرد ماوصلت غادي بدوا يغنولها..
دموعها نزلوا وهي تبتسم..بعدين ضحكت وشافت لمروة وضمتها ومروة طبطب ع ظهرها وهي تضحك..
🍃وضحكة مروة في عيون محمد المهدي عالم وين يخشله يتمنى مايطلع منه...
واقف من بعيد هو ومؤيد صاحبه اللي عطاته مروة علم عن طريق اخته الصغيره صاحبة اختها..
كانت مروة تبي تفرح مناسك بكل الوسائل..
مؤيد وهو يشوف في دموع مناسك وفرحتها قال..
/ياريت نقدر نكون قريب عليها ونضحكها..
محمد وعيونه ع مروة..
/كان تحبها حق معاش تجيبلها مشاكل واصبر لين يجي اليوم اللي تقدر تكون فيه معاها ومايقدر حد يبعدك عنها..
مؤيد؛مانعرفش شن يصير بعدين لكن البنت هادي خاشه خاطري هلبه ومتمنيها من ربي..
ابتسم محمد وقال؛ربي يعطيك ماتتمنى..
مؤيد؛اجمعين..
🍃وفي باب المطعم وقف معين يدور عليهم لين شافهم وسط عيلتهم..جو عيونه ع مروة وهي رافعه ولد اخ مالك توكل فيه من التورته..
غير نظره عنها ولف ومشي وهو ياكل في شفه السفلي..
وشاد ع قبضة يده اللي تغير لونها من قوة ضربه للولد اللي تحرش بيها..
وقعد يمشي ويمشي لين طلع من المول..وتوجه للموطو"موتور..دراجه ناريه"..ركب وشغله وتحرك طول..
🍃🍃🍃🍃🍃
في اللي يهرب من مشاعره..وفي اللي يجري وراها..
يجري وراها من غير مايشوف شكل الطريق اللي ماشيه فيه..
☘هادي سلافه..
بوها وامها طلعوا بعد الفطور يشوفوا شقه للإيجار دلهم عليها معز اخ ميار..هما شبه حاسمين امرهم وبينتقلوا ليها خلاص..
وسلافه ماتبيش..ماتبيش تفارق مكان في بصمة الراجل اللي تحبه وتفاصيله..
رقدت اختها لبانه..
وهي قعدت دور بروحها في الشقه وتشوف لكل ركن فيها بنظرات حزن..لين وصلت لدار النوم..
وقفت قدامها ..ونفسها تلح عليها بش تخش..
حطت يدها ع المفتاح..غمضت عيونها..ولفت المفتاح..
وغيرت يدها للمقبض وفتحت الباب..
فتحت عيونها شويه ورفعتهم القدام..
زادت فتحتهم وهي متفاجئه في اللي شافاته..
ماتوقعتش يكون حبه كبير للون الأسود لدرجة يدخله في ديكور داره..
خشتلها وهي تمرر في نظرها عليها..شمت ريحة عطره اللي قاعده فيها..
شافت للزيانه مالقتش عليها الاحاجتين..
شيشة عطر لونها اسود..ومشط اسود..
قدمت بفضول للزيانه..وقفت عليها وخدت شيشة العطر..
ابتسمت وهي تقول..
/سوفاج ديور..مااستغربت..
تنهدت وردتها لمكانها..رفعت عيونها للمرايه وقالت بعدم رضا..
/شو عم تعملي سلافه!؟ اطلعي يللا اطلعي..
ومشت بتطلع من الدار.. فجأه وقفت لما شافت ورا الباب لوحه صغيرة..
ماقدرتش تمنع فضولها عنها..قدمتلها وخدتها..
قلبتها وشافت المكتوب فيها..بدت ع وجهها ملامح الضيق وهي تقول..
/طوبى..من هي طوبى!..يمكن تكون امه او اخته اكيد هيك..مو مبين انو في بحياته حدا..
وردتها في مكانها زي ماكانت وهي مضايقه ع الآخر..
بعدين مشت طلعت من الدار وسكرتها بالمفتاح...
🍃🍃🍃🍃🍃
وفي حوش طوبى..
كانت آلاء خاطمه عليهم بعد ماتعشت في حوش جدها حسن
وجابت معاها خوها معتز..او بالأحرى معتز هو اللي كان يبي يجي..
قعد مع الرجاله شويه..بعدين خش للنساوين..
ماكانش في حد وقتها غير امه وخواته وخالاته والعمه مطيره..
🍃واقف في الصاله وهو حاط ايديه في جيوب سرواله ويقول..
/يام..بنسافر مع عزيز وآلاء..
فردوس قعدت تشوفله بتعابير وجه مش مفهومه..
واريج وطوبى شافوا لآلاء اللي بادلتهم نظرات الضيق..
اما غرفه ومطيره كانت عيونهم ع فردوس..
فردوس؛كيف بتسافر معاهم وعلاش!؟..غيرت نظرها لآلاء وقالت..شن يقول خوك؟.
معتز؛امي الموضوع ليا فتره نبي نعطيك بيه علم..اني نبي نقعد مع خالي مختار..
تبدلت ملامح وجه طوبى للحده ورفعت حاجبها وهي تغير في نظرها لمعتز..
فردوس بعدم استيعاب:مع مني!!؟
معتز بشي من الانفعال بعد ماخاف من معارضه امه
/اني مش متريح هني..لاعندكم ولافي حوش جدي غادي نبي نعيش في مكان نرتاح فيه ومع حد يجيبلي اللي خاطري فيه من غير مايمن عليا ويحسسني اني رزين عليه..نبي نعيش زي صحابي وولاد عمامي وعماتي مانبيش نعيش محروم وناقص مانبيش حياة البهدله اللي انتم عايشينها..
مطيره كان تشوفله بصدمه..مش مستوعبه ان كلام زي هدا يطلع من ولده عمره ماتعداش 12سنه..!
لكن امه كانت تشوف قدام عيونها صورة مصغرة عن نفسها يوم ما..وط وعن خوها الكبير..خاله مختار..
طوبى مااستغربتش في كلامه لأنها تعرفه كويس طبعه وتفكيره من زمان واضحات رغم صغر سنه ..
تربية فردوس ليه اللي خلاته يتعود ع تنفيد طلباته مهما كان الثمن..والبيئه الغير متكافئه اللي عايش فيها واللي خلاته يحس بالفرق بينه وبين اقرانه من الأقارب وهما نفسهم زادو كبروا عقد النقص بمعاملتهم ليه ع انه اقل منهم..
وغياب الاب اللي زاد كبر هالعقده..هدا كله ساهم في صنع معتز اللي واقف قدامهم...
بس الغريب والمخيف بالنسبه ليها هو دخول مختار ع الخط..
وهدا اللي خوف اريج وغرفه...
فردوس رفعت حواجبها بعدين عقدتهم وقالت..
/باهي..برا..لكن من الساعه هادي نبيك تنساني وتحسبني ميته..
تأفف بملل..
وآلاء قالت بضيق..
/ماما مش هكي..
انفعلت فردوس فجأه وقالت..
/لاهكي ونص..اني خلاص نسيت اني جايبه ولد معاش يفرق معاي يمشي ولايقعد.
معتز بلامبالاة:ولا اني فارق معاي شن رايك!
غرفه:معتز!
معتز:هدا الحق لولا جدي وجداي اللي قالولي لازم تخبر امك راني ماجيتش اصلا وخليتها تعرف من غيري..
فردوس كانت مصدومه في اسلوب ولدها وكأنه مش ولدها اللي حملت بيه وجاباته وتعبت عليه !..
واخته الكبيره بدون ماتشعر ناضتله وصفعاته بقوة وبغل شديد..
كلهم انصدموا..وهو شافلها بلامبالاة مصطنعه وقال..
/شكرا..
اريج بغضب ودموعها في عيونها..
/ياريتها ماجاباتك ياريتك متت ياحقير..امك هادي امك اللي مرمدت روحها بش ماتخليك محتاج لحد ولا تخلي حاجه في خاطرك..
معتز:هي كانت تبي هكي..
اجابته هادي وصلت اريج لأقصى مراحل الغضب جت بتضربه.مرة تانيه شدوها عنه مطيره وآلاء..
اريج وهي تبكي بعصبيه..
/مافيكش خير زريعة شر...
وامها تشوفله ودموعها ينزلوا زي السيل..
مطيره بضيق:خلاص يابنتي خلاص اهدي.
آلاء بتوتر:برا اطلع انت..برا..
ابتسم تهكما وجي بيطلع..ماحسش لا بيد شداته بقوة من رسغه يده اليسار وقاعده وتجبد فيه..
هو انصدم وقعد يشوف لخالته طوبى اللي مالاحظش وسط الدوشه وقت اللي ناضت من مكانها وجاته..
معتز يحب طوبى هلبه..ومش متعود منها الا ع اللطف في المعامله..
بس قسوة شدتها ليده وجرها ليه فاجئوه فيها..
وصلت بيه لدارها..
فتحت الباب وخشت بيه داخل وسكرت الباب وراها..
طلقاته وقالت بحمقه..
/تحسابني بنقولك ماتمشيش ولابنعطيك محاضره عن بر الوالدين وعن كيف تولي راجل!!؟ لاالا مش حنقولك هكي بكل..بس بنحكيلك قصه قصيرونه..
واحد زمان دار زيك وهاجر وخلا امه وخواته وراه وهما بأمس الحاجه ليه..باعهم بش يوصل للي بيه..ومرت السنين ووصل للي يبيه وولى عنده فلوس وجاه ومع هدا قعد ناقص روح للشي اللي ناقصه مالقاشي وتوا مستعد يدفع عمره كله بش يلقاه..ومش حيلقاه لين يموت..
فتحت الباب وقالت..اطلع..
قعد يشوفلها بنظرات حاده بان فيهم خوف..بعدين مشي طلع من الدار..
طلعت وراه لقاته توجه لباب الحوش وطلع منه بكل..
وقعدت تسمع بألم في بكي اريج وكلامها اللي كره ع خوها الصغير..وهي قلبها زاد كره لخوها الكبير...
🍃🍃🍃🍃🍃🍃
ومختار في هالوقت كان طالع من داره متوجه للصالون..
وهو ماشي شاف صابرين وهي متأنقه متوجهه لباب الفيلا قاللها..
/طالعه مع ايهم..
وقفت والتفتله وقالت..
/ايه..
هز راسه وكمل طريقه للصالون..
وهي طلعت من الفيلا..
🍃خش للصالون..
لقي سدره وصفيه يتفرجوا ع التلفزيون..
مختار؛كساد صح؟
صفيه؛لين خلاص..
سدرة شافتله وقالت..
/طلعنا لمكان مافيشي ناس تربح..
ضحك لما فهم قصدها  وقال؛حاضر..نراجي فيكم برا..
ومشي طلع من حداهم..
سدرة؛فهالبلاد مافي حد يستحي ولايتحشم الطلعه كلها وحني متخزرطين..
صفيه بضحكه؛صدقتي..بري قدامي..
مشت سدره بكرسيها وهي تقول..
/استاحشت ليبيا..
صفيه:مستاحشة النكد..
سدرة:بنكدها وهمها والبلي اللي فيها مايسواها حد..
ابتسمت صفيه..
🌼ومشوا مع بعض لدارهم...
🍃🍃🍃🍃
روح عزيز بمرته ونسيبه..
بعد ماروحوا فردوس حست بشي من التعب..طلعت للجنان بش تاخد نفس وهما حواليها..
طوبى بقلق؛دوسه شني توا؟
هزت فردوس راسها وقالت بشي من التعب.
/خير من بكري..
اريج ودموعها في عيونها..
/حسبي الله ونعم الوكيل..
"غرفه"..
ناضت اريج وخشت تجري..
"مطيره"
مطيره؛تعال يابوي تعال..
ويقدم الحاج علي ومعاه عبد الرؤوف بعد ماشافهم كلهم بحجابهم..
علي بقلق؛فردوس بنتي خيرك!؟
مطيره رفعت حاجبها وهي تشوف لعبد الرؤوف..
فردوس بضيق؛تعب عادي ياجدي..
عبد الرؤوف وهو عاقد حواجبه قال..
/صارت مشكله تخص معتز؟
مطيره؛معليشي هادي امور عائليه..
كلهم شافوا لعبد الرؤوف بما فيهم مرته..
والحاج علي قعد يشوف لبنته وهو مصدوم..
اما عبد الرؤوف كلام مطيره كان زي الصفعه ليه
هز راسه وقال:عندك حق اسف سامحيني
ولف ومشي..
علي التفت وهو يشوفله لين طلع من الحوش.
وطوبى ركزت ع غرفه كيف ماحمقتش ع خاطره ولالحقاته..
التفت علي لبنته وقال..
/كيف تكلميه هكي!
مطيره:مهما دار يقعد نسيب يابوي مش كل شي لازم يعرفه..
غير علي نظره لغرفه اللي كانت ملتزمه الصمت وع وجهها ملامح الضيق..
ولأنه قوي ملاحظه ومايعدي عليه شي تأكد ان عبد الرؤوف غلط غلطه كبيره  مخليه غرفه اللي ماتتحمل فيه شي ماتحمقش ع خاطره في الموقف هدا..
وشبه فهم شن تكون الغلطه هادي..
ماباش يسأل اكثر برغم انه ضايق هلبه من عبد الرؤوف حده قال لبنته..
/عندك حق..
طوبى من رده عرفت ان جدها فهم كل شي واستائت ع الآخر..
علي:فردوس بنتي خشي ارتاحي..وحتى انتم خشوا معاها..
ولف ومشي وهو يضرب بعكازه ع الأرض..
مطيره:هيا نوضي فردوس..خشي ارقدي..
ناضت فردوس ومشت خشت مع عمتها..
ع طلعة اريج وهي تشوف لغرفه بضيق..
طوبى:غرفه..
غرفه شافتلها وقالت..
/لازم يتحمل نتيجه غلطته..صح وليتله بروحي لكن ماصفيتش من ناحيته وزي ماهو جبرني نتحمل اهانات عمته هو يتحمل كلام عمتي..
ومشت خشت داخل..
أريج بأسف:خسارة..
طوبى بضيق؛قالتلي في حاجه وقفت بيني وبينه نحسابه كلام في وقت زعل..
🍃وفعلا في بعض المواقف جرحها لما يوصل في الكرامه لاتنسى وتبني الف حاجز وحاجز...
وهادي ضريبة الكلام في لحظه غضب..هدا علاش الرسول صلى الله عليه وسلم قال وكرر تلاته مرات...
إذا غضبت فاسكت..إذا غضبت فاسكت..إذا غضبت فاسكت
🍃🍃🍃🍃🍃
خشوا للمطعم ويدها في يده..
ايهم:ياسمين ورضا سبقونا..
شافت جيهتهم..
لقت ياسمين تشوفلهم بإبتسامه..لكن رضا كان يمرر في نظره ع المكان..
وصلوا فيهم وقال ايهم..
/مساء الخيرات..
ياسمين بإبتسامه؛مساء الورد..
رضا رفع عيونه فيه وقال..
/مساء الخير..ونزل نظره لإيديهم المتشابكه..
صابرين بإبتسامه..
/شن جو ياسمين..
ياسمين:تمام شن جوك انتي..
صابرين:حلو..
وخر ايهم الكرسي وشافلها بإبتسامه..
هي قالت؛شكرا..وقعمزت مقابله ياسمين..
وأيهم قعمز مقابل رضا..
أيهم:عطلنا عليكم..
ياسمين:لا حني اللي جينا بكري..
صابرين؛طلبتوا؟
رضا برفعة حاجب..
/راجينكم..
هي ابتسمت بجديه بعدين شافت لخطيبها وقالت..
/خاطري في لازانيا..
ايهم بضحكه؛تجيك احلى لازانيا..
ابتسمت..
رضا؛وسلاطة..
غيرت نظرها لرضا..
هو ببرود مصطنع؛واهم شي يكون فيها بنجر تحبها هلبه..
ايهم شاف لصابرين..
هي ابتسمت وقالت:صح..
ايهم هز راسه وقال..
/تمام اني بنطلب زيها..وانتم شوفوا شن تبوا..
ياسمين؛فوتشيني بالصلصله البيضا والكريمه والخضار..
رضا:تمام اني بناخد معاهم لازانيا وانتي فوتشيني..
واشر للنادل يجيه..
صابرين بدت تضايق بس حاولت تخفي هالشعور..وايهم يشوفله وهو يفكر...
🍃شويه وجاهم العشي..
تعشوا وهما يحكوا مع بعض بإبنسجام ماعدا رضا اللي كان مركز ع صابرين وايهم..
شويه شاف صابرين كملت السلاطه متاعها ومعاش كلت بعدين..
خدي الصونيه متاعه وحطها قدامها..
وهما يشوفوله..
رضا؛ماتاكلش من غير سلاطه..
ايهم شاف لصابرين..
هي حمحمت وخدت الصونيه وفي نفسها تقول..
"تبي القتل"
ياسمين؛علاقتكم ببعض قويه هلبه..
صابرين بإبتسامه..
/رضا خوي اللي ماجابتاش امي علاقتنا علاقة خوت حرفيا حتى في عراكتنا مع بعض..
هو رفع حواجبه وقال..
/صح نادرا مانتفقوا زي الخوت..لكن كان حد فينا صارت معاه مشكله ولامرض نوقفوا لبعض ونهتموا ببعض..
ياسمين بإبتسامه..
/محلاكم..
ايهم:صح..حلوة علاقتكم ببعض..
رضا؛فوق ماتتصور..
صابرين قعدت تاكل بش تخفي توترها..
ايهم بإبتسامه:مع هكي لاانتي حضرتي حفلة خطوبته ولاهو..
صابرين بلعت وقالت..
/لااني حضرتها..ماهو تعارفنا غادي.
ايهم بإبتسامه..
/وكان احلى يوم في حياتي.
ابتسمت ياسمين..
ورضا يشوفله بنظرات حاده..
ضحكت صابرين وقال؛شكرا..المهم اني حضرت لكن هو ماحضرش..
رضا؛اني كنت مشغول..لكن انتي ماكمليتهاش روحتي طول..
صابرين:بسبب البرده اللي جتني لكن انت ماجيتش بكل..
رضا:عوضتك بهديه..وانتي ماعوضتيني بشي..
وياسمين يمرروا في انظارهم بيناتهم وهما يتحادفوا بالكلام..
صابرين؛في عرسكم ان شاء الله نحضر ونجيب هديه..
ياسمين بضحكه:لاماتقدريش..
رضا شاف لياسمين بأستغراب..وصابرين شافتلها بصدمه..
ياسمين بإبتسامه..
/حتكوني العروسه حتى انتي..
شافت صابرين لأيهم بعدم فهم..
ايهم ضحك وقال:هدا علاش طلعنا مع بعض الليله بس نفتحوا معاكم الموضوع هدا..فكرنا نديروا العرس مع بعض اخر يوليو..
رضا شاف لصابرين بصدمه وبلع ريقه..
وصابرين كانت تشوف لأيهم وهي مش مستوعبه وين خش الموضوع في الجد حست انت مش راغباته نهائي. توترت وبان هالشي في ردها لما قالت..
/موضوع زي هدا مايجيش تاخد فيه قرار بروحك لازم نتفاهموا مع بعض عليه..
هو بضحكه تعجب؛ايه اكيد اني قتلك فكرنا ماقررناش..
ياسمين؛مجرد اقتراح حبيبتي..
ورضا مركز مع صابرين وحالتها وهو محتفظ بصمته..
صابرين وخرت شعرها ورا وذنها وقالت..
/اسفه..بس زي مايقولوا هي ليلة العمر واني نبي نكون العروس الوحيده يوم عرسي وهدا من حقي..
ايهم هز راسه وقال:صح حقك..
رضا ابتسم نص ابتسامه وهو يمرر في نظره القدام..
ياسمين؛هو اني عادي عندي لأن كل وحده فينا حتبان مميزة عن التانيه..بس زي ماقلتي من حقك..شافت لرضا وقالت..اني مش حنغير موعد الفرح..
رضا هز راسه بإبتسامه فوق من نفسه..
ايهم شاف لصابرين وقال..
/وحني!؟
صابرين وهي تحاول تخفي توترها..
/اخر الصيف بدايه تسعه شن رايك؟
ايهم بإبتسامه؛حاضر اللي تبيه نديره..
ابتسمت صابرين وقالت..
/شكرا..ورضا يشوفلها وهو مضيق عيونه..
🍃قعدوا ربع ساعه يحكوا عن خطط ياسمين لعرسها ورضا يساير فيها مسايره وفي نفس الوقت يضبط في اعصابه وهو  يسمع في ايهم كيف يتغزل في صابرين..
وطلعوا روحوا بعد ماتبادلوا الاماكن..
ياسمين ركبت مع خالها..وصابرين مع رضا..
🍃في الطريق..
رضا؛شن رايك نكمل للحدود ونهرب بيك..
صابرين:اسمع تصرفاتك ولت مش راكزه بكل..
رضا؛ع خاطر تصرفات المنعنع هداكا راكزه..
صابرين تأففت بضجر..
رضا:تمنيتك بدلتيني بواحد يستاهل مانستخسرش الطاقه اللي نصرف فيها عليه..
صابرين؛طاقة شني!؟
رضا ؛طاقه الغيره وحرق الدم..
تنهدت بملل وشافت للروشن..
رضا ابتسم وسكت..وشغل المنظومه وخلا وائل كفوري يحكي منه..
...لوحبنا غلطه...
من اول ماسمعتها وحست بمشاعرها تحركت بقوة..
مر قدام عيونها ذكرياتها معاه بحلوها ومرها..
احساسها بيه..وقلبها اللي ماتعلقش براجل غيره خلو دموعها غصب عنها تنزل..
وهو جنبها يسمع في الاغنيه وكان متردد يشوفلها..
خايف يشوف ملامح اللامبالاة والبرود ع وجهها ويزيد وجع قلبه..
قعد هالحاله لين تمت الأغنيه..ولما سكت الصوت..
سمع صوت بكاها..شافلها..ونار اللي في قلبه نشرت حرارتها في جسمه في كله..
وفي لحظة جنون...غير الطريق..
صابرين ركزت..وقفت بكي وقالت..شن دير!؟
هو بإنفعال:اللي كان لازم نديره من زمان..
هي بخوف:لالا..رضا بالله عليك لا..
وهو مايسمعش الا في صوت قلبه..
صابرين وهي مذعورة..
/رضا والله يقتلك والله..مختار مايرحمش يارضا..
رضا:طز فيه وفيهم كلهم مش حنعيش حياتي ع هوا حد..
صابرين بتوسل..
/ارجوك لا..بالله عليك رضا والله يقتلك..اني مش هامتني نفسي والله ماهمتني مانبي يصير فيك شي يارضا بالله عليك..
رضا؛حتى اني معاش هامني شي غيرك انتي نبيك انتي نبي نكمل عمري معاك انتي..هو علاش دار هكي علاش! عارفني نحبك ونبيك زابط كل شي..
صابرين ببكي؛لأنه يحبك دار هكي هو يبيلك وحده تستاهلك..
سكت وهو يسوق..
صابرين شافت للطريق بعدين رشفت وقالت..
/رضا..
رضا وقف السياره ع تركينه..
شافلها وقال بغضب وحب ونظرات قسوة وحزن وقال من قلبه..
/نحبك..افهمي..نحبك انتي..مانقدرش نعيش مع غيرك..تعرفي علاش خطبتها ياسمين..بش ننساك هربت بش ننساك لأنك انتي تبي هكي..وكنت حمار لما درت هكي..حمار..
صابرين...اني ع خاطرك مستعد نبيع الدنيا ومافيها..
صابرين ببكي..
/مانقدرش نفرط فيك..مانقدرش..اني معاش هامتني الدنيا عشت ولامتت كله واحد..لكن انت لازم تعيش وتكمل حياتك انت بنادم نظيف هلبه من داخل تستاهل تاخد فرصتك في الحياة..
رضا بألم وحب:انتي فرصتي الوحيده ياصابرين..اني قبلك راهو كنت عايش هكي وخلاص صدقيني..بنادم جامد مافيشي روح لين خشيتي حياتي..
صابرين ببكي..
/شن حبيت فيا قولي!..وانت تعرفني كويس اني شني!!؟ مافيش راجل يقبل ع نفسه الشي هدا..انت نفسك ياما عايرتني..مش حتتحمل صدقني..اني لو رضيت نكون معاك حنهين نفسي للمرة المليون وانت حتندم واخرتك الموت..
رضا:كلام فاضي..اللي قلتيه كله كلام فاضي..اني نحبك ومتقبل ماضيك لإني مش ملايكه حتى اني ياما داير..ولو وجعتك قبل من وجع قلبي لأنك بعيد عليا لما تولي معاي شوفيني شن ندير..اما مختار قبل قلتهالك مش حيقدر يمنع حاجه ربي يبيها..انتي بس قولي باهي نهرب معاك وشوفي شن يصير..
تمعنت بالنظر في عيونه شافت فيهم الصدق والحب والرجاء..بس بعدين شافت وجه مختار وهو يقول..
《هكي احسنلك》..
خافت هلبه..خافت عليه هو..
غيرت نظرها القدام وقالت..
/لا..خل نكون معاك صادقه..اني نبي نبدا حاجه جديده مع ايهم مانبيش نكمل حياتي هاربه وخايفه...
قعد يشوفلها للحظات بصمت..بعدين غير نظره عنها القدام..
قعد مايقارب الدقيقه ع حاله هدا وبعدها شغل السيارة وتحرك...
ولف ورجع للجهه اللي ترفع لفيلا مختار..
طول الطريق الصمت كان سيد الموقف لعند ماوصلوا..
هي طول نزلت من سيارته ومشت تجري فتحت الباب وخشت..
وهو نزل من السياره وكانت ملامح التجهم باديه ع وجهه..
ومشي خش بعدها ...
🍃وهدا كله تحت نظر مختار اللي كان مقعمز ع الكرسي الطويل في اخر حديقة الفيلا...
🍃🍃🍃🍃🍃🍃
خشت ع بنتها وهي دير في السحور وقالت..
فهيمه:مش عارفه خيره..روح طول خش لداره ومعاش طلع منها وتوا نوض فيه للسحور يقولي مانبيش..
بنتها؛من هو؟
فهيمه؛جدي!..خوك ياراس البصل..
ردت عليها بقلق..
/ان شاء الله مش واحد من خوتي صارتلي حاجه..
حركت سبابتها بالنفي وقالت
/لالا..كان هكي يقولي طول مايدرقش عليا..ماصارتلاش الحاله هادي الا مرة وحدة وهو في الاعدادي لما بوك الله يرحمك ضربه قدامنا..
:حي! معناها في حد ضاربه..
فهيمه برفعة حاحب .
/خوتك يضربوا ماينضربوش..مستحيل واحد من ولادي اني يخلي حد يضربه..
بنتها بحيره:مالا خيره!؟
فهيمه؛ياغبيه..ياغبيه كان نعرف علاش نسأل!!؟
:بالله يام خليني ندير السحور قبل ليأذن علينا الفجر وحني نحللوا في حالة ولدك..
سكتت فهيمه ومشت طلعت للجنان خدت نفس وبدت تفكر...
🍃🍃🍃🍃
"باهي اللي طلعتي ياحنه وشفنا وجهك.."
راما قعمزت حدا امها وقالت..
/كنت نهدرز ع سوما كان نقولك شن حكتلي..
خديجه؛شني!؟
راما؛الفرخه مروة اخت هديكا صفاء مصاحبه واحد صايع من جماعة الفلوس ويصرف عليها..
خديجه برفعة حواجب..
/بنت فايزة؟!
راما؛ايه..شافتها اليوم خاشه لمول كل شي فيه غالي نار وكانت مع اخت صاحبها..
خديجه؛حيه حيه!..
راما؛عندك علم ان الولد هدا كان يبي اسما ومروة خداته منها..نفسه اللي يجيهم هني مرة مرة..
خديجه بعد تفكرت..
/اهاا..هدا مرة ريته واقف ع عمك اشرف!
راما؛شوفي العار..
خديجه:مانستغربش ديما اللي دايرات رواحهم متربيات العفن كله تلقيه عندهم..
راما بتهكم..
/وعمتي نجاح تضربلي بيها في المثل..
خديجه:عماتك هادم من يومهم مضروبات ع رووسهم.
ع خشه محمد ولدها للشقه..
شافهم مقعمزات وسط الحوش..مشالهم انطرح ع المندار وقال..نوضي ديريلنا ماناكلوا..
خديجه؛وين كنت؟..
محمد؛واقف مع وليد في راس الشارع..تي نوضي انتي.
ناضت راما وهي معصبه..
شاف محمد لأمه وقال..
/خوك استشيخ..
خديجه:مني؟!
محمد:نضال..كان تشوفيه وتشوفي بوستاته ع الفيس..قال ابن القيم قال مش عارف مني..وقرآن وجو مش ليه بكل..ردي بالك شكله خاش ع مشروع الدعشيش..
خديجه بخوف:نهار اسود!
محمد؛انا هكي حسيت..
وحط ذراعاته الزوز ع عيونه وخلا امه تشوفله بريبه..
🍃🍃🍃🍃🍃
" كل مانبي نخفف ماكله في السحور تطلعيلنا بحاجه تخرب علينا.. "
سميره بإبتسامه؛كول كول رمضان مرة في العام.
نضال:مافهمتش الحكمه اللي قلتيها توا لكن حاضر تو ناكل..
ضحكت بعدين قالت..
/قولي علاش ولد المهدي الكبير مايخشش هني بكل .
نضال؛قصة طويله..
سميره في نفسها..
"نقوله ولامانقولاش؟..لالا ياسميره هدا خالها مرات مايرضاش فيها ولا مرات يدير ردة فعل تقربع الدنيا..اني مفروض نحكي لخالتها..لكن هديكا ماعنديش فيها ثقه"..
ع خشة راجلها للكوجينه قال..
/تمر وحليب ماعندي نيه في شي.
سميره بقلق؛علاش..
نضال:شن في!؟
محمد بضيق:الحال بيوقف في جرة هالحرب..
نضال:ربي رزاق تضيق وتفرج ان شاء الله..
هز راسه وقال؛ان شاء الله..ومشي طلع من الكوجينه.
ع خشة مغليه اللي سمعت شن وقالت..
/ربي مايخلي حق حد..
نضال بدت ع وجهه ملامح الاستياء..
وسميره تجاهلت وقعدت توتي لراجلها في سحوره..
مغليه:الحمد لله ع نية البيضا اللي ديما تخدم فيا..
وخدت دواها وطاسه ميه ومشت طلعت..
سميره:بالله بعد تكمل حط الماعين في اللاوندينو.
ومشت طلعت بسفرة الفطور..
نضال تنهد وقال:ربي يهديك يام وخلاص..
🍃🍃🍃🍃🍃
ومع ساعات الفجر الأولى.
خش عبد الفتاح بسيارته لشارع القهوة..
سميره والولاد حسوا رواحهم وكأنهم كانوا طايحين في حفره وطلعوهم منها..
وصل بالسياره لحوش بوه لقي اشرف يراجي فيه وطول فتحله الباب وهو خش بسيارته للحوش..
🍃🍃🍃
عبد الفتاح؛شن بنحكيلكم دمار بمعنى الكلمه.
سميره؛جيهتنا ولت مدينة اشباح..
نجمه:الحمد لله اللي طلعتوا منها طيبين..كله يتعوض وليدي كله يتعوض..
اشرف:هي هادي المهم انتم سلمتوا..
عبد الفتاح بإستياء؛حسبنا الله ونعم الوكيل..
الصيد:توا ارقدوا وارتاحوا لاحقين ع الهدرزة..
نجمه؛ايه..نوضي سموره نوضي..
ناضت سميره وخدت شنطتها ومشت مع نجمه..
والصيد ناض بولاده واحفاده ومشوا للمربوعه...
🍃🍃🍃🍃🍃
وتمر الساعات لين يجي وقت العصر..
واحد من ولاد عبد الفتاح ركب بيشوف الخزان..اول ماخش السطح شاف منظر صدمه..
محمد ولد عمه في نهار رمضان يدخن..!
ولى ونزل وهو مصدوم ع الآخر..
وصل لوطا تلاقي مع عمه اشرف..
اشرف:شفت الخزان!
الولد من التوتر والصدمه اللي هناك قاله طول..
/ركبت شفت محمد يدخن فوق..
اشرف:كيف!!!
:اركب شوفه بالك اني نتخيل..
واشرف قداش ليه يراجيله فيها وجاته لعنده وطول ركب يجري وولد عبد الفتاح لحقه...

#مراد_قلبي
#طوبى

....يتبع....