طوبى ☕شارع القهوة☕

الجزء_التاسع_والتسعين

#طوبى  "جنة طوبى"
#جمان_فريد
#الجزء_التاسع_والتسعين"حمامة بيضا"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
‏قال شيخ الإسلام ابن تيمية:
السكوت بلا قراءة ولا ذكر ولا دعاء ، ليس عبادة ولا مأمورا به؛ بل يفتح باب الوسوسة، فالاشتغال بِذِكْر الله أفضل من السكوت.
📙 الفتاوى | ج 23  ص 286 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "إنَّ الأمُورَ لَهَا رَبٌّ يُدَبِّرُهُا
‏وَكُلُّ شَيءٍ بأمرِ اللهِ مُؤتَمِرُ

‏فَلَنْ يُفِيدَكَ أنْ تََحتَاطَ مِنْ قَدرٍ
‏وَلَنْ يَرُدَّ القَضَا حِرصٌ وَلَا حَذَرُ

‏وَالجَأ لِرَبِّكَ فِي الضَّرَّاءِ مُعتَصِمًا
‏مَا رَدَّ رَبُّكَ مَن لِلعَونِ يَفتَقِرُ!"🍃
________________________________________
وتعدي الأيام وحال البلاد كما هو عليه..
الحرب أبت ان تضع اوزارها..لامجال للسلم والمصالحه لكن لأن عيد الأضحى قرب كان في اتفاق ع هدنه..
هالهدنه خلت الناس ياخدوا نفس ويحاولوا يعيشوا أجواء العيد..
🍃وفي نفس الوقت خلال هالأيام..
بدت سدرة تاخد في حصص العلاج الطبيعي في الحوش..
وتدرب ع المشي بالمشايه في حديقة فيلا خوها اللي كان اقوى داعم ليها..
مرته فاتن كانت مركزة ع حماس مختار وجهاده في محاولاته تقويه علاقة بأخته..
ولاحظت سدرة كل مالها تزيد تلين ناحيته وتقربله اكثر من قبل..
وهالشي لاحظاته حتى صفيه اللي فرحت بيه وخلاها ترجع بذاكرتها لأيام حلوة حستها وكأنها ولت من جديد..
🍃10اغسطس..سنة2019..
التاسع من ذي الحجة...
يوم السبت...
8:30مساءا..
في حديقة الفيلا..
كانوا كلهم مقعمزين حوالين الطاوله..
امينه تلف عليهم وهي تحطلهم في العشي..
وبعيد عنهم بمسافه كان الأقجم واقف مع الحراسات المنتشرين حوالين الفيلا يراقبوا في الوضع.
مختار:اني لليوم مانعرفش نذ.بح اما هي كل شي
سدرة :الا الذ.بح..برغم ان جي في خاطري نتعلمه..
فاتن بضحكه:جبارة انتي ياسدرة.
سدرة عقدت حواجبها وهي تشوف لصونيتهاوتقول..
/لالاجبارة لاشي..كله كفر "غلاف"من يغركش.
هو قعد ياكل بابتسامة خفيفه مرسومه ع وجهه..
وصفيه تشوف لسدرة بنظرات حزن..
امينه؛عايزين حاجة تاني..
مختار قام عيونه فيها وقال..
/يعطيك الصحه..
هزت راسها وهي تقول.
/بالهنا والشفا..ومشت خشت داخل..
قعدوا لحظات ملتزمين الصمت وهما ياكلوا..
لعند ماحطت سدره كاشيكها وقالت بشي من القلق..
/زعمه كيف دايرين توا كيف بيعدي عليهم العيد!؟
صفيه:كيف يعني!؟
سدرة:من بيعاني معاهم كان حسين في الجبهة جدي راجل كبير..
ابتسم ع جنب وقال..
/عندهم نسابه وعندهم جيران..
سدرة تنهدت بضيق..
فاتن؛انتي تبي تروحي وخلاص..
سدرة بلهفه وضيق:ايه والله حق معاش ليه لزوم قعادي هني..
مختار:مش انتي اللي تقرري شي زي هدا..الدكاترة..تاني شي معاش تخممي عليهم قادرين يتحملوا مسؤولية انفسهم..غير نظره لطاسه العصير وخداها وقال..مش محتاجينك في شي..وشرب من العصير..
كلهم وجهوا انظارهم ليه بعد اخر جملة قالها..
ونظراتهم كانت بين الضيق والإستغراب..
هو نزل الطاسه وشاف نظراتهم ضحك وقال..
/مش بالمعنى الحرفي للجمله نقصد انهم قادرين يعتمدوا ع ارواحهم..ركز بنظره عليها وقال..طوبى ينعبى عليها راهو..
فاتن بإبتسامه:صح..
وجهت سدرة نظراتها اللي مركز عليهم مختار لفاتن..
فاتن:طوبى قويه وجريئة وعندها دماغ مليح زي خوها..فيها شبه كبير منه حتى في نظرات عيونه..ممكن لو مختار كانت عنده بنت مش حتجي تشبهه زي طوبى..
غيرت سدرة نظرها للصونيه متاعها وبدت ع وجهه ملامح الضيق..
مختار بضحكه؛غارت سدرة..
قامت سدره عيونها فيه وقعدت تشوفله بصمت..
صفيه بضحكه:كله ولا طوبى بنيتها وهي ربتها ع ايديها..
مختار ابتسم وشاف لسدره لقي في عيونها نظرات غريبه خلت ابتسامته تخف شويه..
فاتن بإبتسامه؛ربي يحفظها..ع العموم ياسدرة انتي توا فكري في علاجك بس مازال عليه شهرين وتكمليه ماتستعجليش..
صفيه:صدقت..سيورك مروحة  سديرة..
سدرة غيرت نظرها عن مختار لصفيه وهي تهز في راسها وتقول..
/أمري لله..تنهدت بعدين قالت..ايه حقه شن صار في موضوع يوسف..
صفيه بإبتسامه:رابع يوم العيد بنمشوا نخطبوا..
فاتن بإبتسامه؛حلو..
ابتسمت سدره..
مختار اللي كان مركز بنظره ع سدره غيره عنها وقال لمرت عمه..
/ع خير..
كلهم بأصوات متقطعه قالوا..
/إن شاء الله..
ورجعوا ياكلوا بصمت ومختار يسرق في النظر لأخته..
🍃🍃🍃🍃🍃
ومن فيلا مختار في النمسا لحوش طوبى في ليبيا..
بعد صيام يوم عرفه التموا ع سفرة الفطور..وكانت لمتهم حلوة وكلها هدرزة لطيفه وضحك..
بعد العشي تعاونوا ع غسل الماعين وضم الحوش وبعدين اللي هادي صلت صلاتها..
بعد الصلاة التموا كلهم في الجنان جهة الكوجينه ماعدا طوبى اللي كانت في الكوجينه دير في القهوة..
🍃اميمه؛ماما تشكر فيها قالت محترمه ومحافظه..
مطيره:المهم تكون بنية حلال وعوض خير لخوك..
اميمه:إن شاء الله..
هاديه:الفال لحسين ياربي..
غرفه بضحكه؛عبد الرؤوف يبي يزوجه حتى هو..
فايزة:الحق عطل وهو ربي عاطيه وماناقصه شي..
فردوس:مسكر راسه ع الزواج..
ع طلعة طوبى بسفرة القهوة وهي تقول..
/ياناس خلوه ع راحته كترة الزنين تكرهه في الزواج بكل..
وبدت تفرق عليهم..
مطيره:عندك حق هدا علاش معاش بيت نكلمه عليه..
اميمه:تي غير ربي يفكنا من هالحرب وبعدين ساهل..
فردوس:يارب..
خدوا كلهم القهوة والحلاوات وطوبى كانت اخرهم..
قعمزت وشافت جهة الخرفان اللي كانوا مربوطات بعيد عنهم شافت مروة شاده مهاب وتاله شاده اواب والزوز واقفات حدا الخرفان ابتسمت..
ع طلعة اريج وهي رافعه جنه في حضنها..
مطيره:ناضت الرتيتيله..
شافت طوبى لبنتها وقالت..
/النو مايخلي حد يرقد..
اريج:خل نمشي بيها حدا الخرفان.
ضحكت طوبى..
فردوس:ردي بالك..
ومشت اريج وهي تلاعب في جنه وتضحك وهما معاها بعيونهم..
هاديه:حال اريج ولى خير من قبل بهلبه الله يبارك..
فردوس:الحمد لله..اني توا نخمم في آلاء الحمل متعبها..
طوبى:عزوزتها مراة كويسه وراجلها حاطها في عيونه ماعندك علاش تخممي..
فجأه سمعوا عيطة تاله..
كلهم شافوا جيهتها لقوا واحد من الخرفان انطلق..
هاديه بفجعه:ووك عليا ووك..وناضت تجري للكوجينه..
مطيرة بتعجب:تي تعالي جاي مش عندك سعي انتي!
هاديه من الكوجينه..
"مش اني اللي نرعى فيه"
ع جية البنات يجروا بالصغار..
ناضت مطيره وهي تقول..
/من هي اللي فكاته مني..
مروة بضحكه:انطلق بروحه..
مشت مطيره وهي تقول..
/شكله اللي ربطهم ماشدش الحبل كويس..
فردوس؛تي وين ماشيه ياعمتي!..
شافوا الخروف جاي يجري..
تباعدت مطيره وهي تعيط.
وهما كلهم خشوا داخل يجروا.
طوبى بقلق:عليك عملة!
اريج مدتلها جنة وقالت..
/خوديها خودي.
فردوس؛وين ماشيه!
اريج:بنرده لمكانه مع عمتي يام..
طوبى خدت نفس وقالت..
/عطيها لفردوس وتعالي..
ومشت طلعت..
فايزة بضحكه:حي!
اريج عطت جنه لأمها ومشت لحقت طوبى..
هاديه:مقوى قلوبهم ياكبدي..
"تي تعالى جاي يابهيم"..
ضحكوا كلهم ع الجمله اللي قالتها مطيره..
🍃وقعدوا يتجاروا الثلاته ورا الخروف لين شدوه وردوه لمكانه وربطوه كويس جنب خوته..
طوبى بضحكه:مش مصدقه روحي!
ضحكت اريج..
مطيره:هو خروف مني هدا!؟
اريج:خروف عمي عبد المطلب..
مطيره:واخده بالرخص غصب عن صاحبه هدا علاش..
ضحكوا البنات..
جاهم صوت الهاديه وهي تقول..
"شن صار فيكم"
مطيره:كلانا..
قعدوا يضحكوا..
بعدين طلعوا مرة تانيه برا وكملوا باقي سهريتهم...
🍃🍃🍃🍃
وفي حوش شنيبه..
كانت الأجواء لطيفه لكن صار فيها شي غريب..
خديجة جت حضرت معاهم الموسم ..اغلب الوقت كانت ساكته ولو تكلمت تهدرز عادي مع سميره حتى انها وين يجوا بيغسلوا الماعين ماخلتش سميرة تغسلهم وطلعتها بأسلوب محترم..
سميرة استغربت هالتغيير هلبه بس حاولت تفسره ع ان خديجة تبي ترجع تكسب رضا بوها..
اما امها قاعده زي ماهي ماتبطلش تلقيح وحركات مستفزة وكالعاده سميرة تتجاهل وبس..
🍃خديجه رشفت من القهوة بعدين قالت..
/قالوا بيمشوا يشوفوا حياشهم عمي ماخلاهمش..
مغليه:الوضع قاعد مش مزبوط مش كان داروا هدنه معناها خلاص..
نسرين:صح مافيهمش امانه..
خديجه:سلفي عبد الفتاح مايبيش يقتنع...
مغليه بنبرة ساخره:قاعده مرته التانيه دير في طروحها..
سميره شافت لمغليه بطرف عينها ونسرين تشوفلها وهي شاده ضحكتها..
خديجه؛سبحان الله يام كيف قدرت تغير موقفهم منها كان تشوفي عمتي كيف تتعامل معاها ماتقولش كانت تكرهها بكل..
مغليه:اللقاقات هما اللي يمشي حالهم ياخديج..
قلبت سميره عيونها بملل ورشفت من فنجانها..
خديجه:تصدقي معاش ولت مدورة عبد الفتاح همها كله العزوز والحماوات...
مغليه:دور في مصلحتها ياماما كان كسبتهم الراجل تحصيل حاصل..
نسرين؛يللا ربي يسعد ويبعد انتي عليك في عيلتك بس يادوجه..
خديجه؛قداش ليا مطلعه روحي منهم نمشيلهم مرتين في السبوع ساعه ولاتنين ونروح..
مغليه:هكي خير..
ع خشة معاذ جي لسميره وقف عندها وقال..
/ميه..
سميرة:باهي حبيبي..ناضت خطت فنجانها ع الطاوله بعدين طباته وطلعت بيه من الصاله..
خديجه:امهم معاش اتصلت..
مغليه حركت راسها بالنفي..
ونسرين رشفت من قهوتها وهي مستاءة وموجوعه ع حال صغار خوها..
🍃🍃🍃🍃
"شني عمتي!؟"
هدا سؤال ابتسام لعزوزتها وهي ديرلها في تدليك لرقبتها..
نجمه وهي مغمضه عيونها..
/خير من بكري كملي كملي بنتي..
وسلفاتها مقعمزات حداهم ويراقبوا فيها بصمت...
🍃في جنان الكوجينه..
سميرة ودموعها في عيونها..
/والله لما نحرش عمتي الله..
عبد الفتاح بضحكه صدمه..
/سميرة!
عواطف بقلق:عندها حق وخيي بالله فكنا من الغشاش والرعاش بالله عليك..
نجاح؛تحسابهم كان داروا هدنه خلاص!
تنهد بضيق وقال..
/باهي خلاص خلاص..
سميرة:عبد الفتاح..
ضحك وقال..
/والله خلاص خلاص فتت الموضوع..بتمشي لمتاعينك غدوة نجاح..
نجاح هزت راسها وقالت..
/بإذن الله..
وقعد عبد الفتاح يهدرز ع خواته وسميره ملتزمه الصمت وهي تشوفله بنظرات قلق..
🍃🍃🍃🍃
"ع قد ماحاولت فيه ماباش يقول ياجيداء"
جيداء برفعة حاجب..
/لالا مش بلاش خوك ياشايف ياسامع حاجه..
مناسك بضيق..
/بيني وبينك ملاحظه مرت خوك مازن معاش تبي تقعد هني..
سكتت جيداء وهي مضايقه..
ماتقدر دير شي..ولاتقدر تتكلم في اللي قاعد يصير خوف تصير مشاكل كبيره وينجبروا بعدها يبيعوا حوش العيله لهدا قالت لأختها وهي متجاهله كلامها.
/ارفعي سفرة الميه وطلعيها..
مناسك كانت فاهمة وعارفه الوضع خدت السفره ومشت طلعت بيها وهي تبلع في ريقها خوف من اللي جاي..
تنهدت اختها وهي تقول بحزن..
/الله لايسامح اللي كان السبب..
🍃🍃🍃🍃
11اغسطس..سنة 2019
يوم الأحد..
اول أيام عيد الأضحى..
🍃لأول مرة بعد عشرين سنة يعيد مختار ويشري اضحيه..
كان مهمة ذ.بحها للأقجم لكن وين جي حط الموس ع رقبة الضحيه حط مختار يده فوق يد الأقجم اتباع للسنة..
🍃فاتن بضحكه؛شوفي كيف معكرش وجهه..
سدره:مختار مايحبش يشوف الدم..
خفت ضحكت فاتن وتبدلت لإبتسامة أسف..
علت سدره صوتها وهي تقول..
/التشويط لمختار ياشباب ماحد يجي من يالاه..
شبحوله رجاله وع وراسهم الأقجم اللي كان شاد ضحكته..
وهو شاف لأخته برفعة حواجب..
سدره حطت سبابتها ع فمها وقالت..
/ولاكلمه..اشرت عليه وقالت..تعرف تشوط انت تشوط يعني انت تشوط..
صفيه وفاتن قعدوا يضحكوا بكتمان..
وهو وزع نظره عليهم..لما شاف لرجاله طول غيروا عيونهم..
حط ايديه ورا ظهره ورفع حاجبه بعدين غير نظره لسدرة وابتسم ابتسامه واسعه وهو يهز في راسه بالموافقه..
ابتسمت سدرة برفعة حاجب وهي تشوفله بكبر بعدين غيرت نظرها للأقجم وقالت..
/هيا خف روحك ياولد سيدي.
الاقجم بحاضر:حاضر..
ونفد امر سدره واللي حواليه يساعدوا فيه..
ومختار واقف يتفرج عليهم وع وجهه ملامح الإزدراء..
🍃🍃🍃🍃🍃
واجواء العيد في ليبيا تحديدا في شارع القهوة مافيش احلى منها..
في حوش طوبى..
ضحوا عبد المطلب والحاج علي وطوبى وفايزة..
واللي ذب.حوا الخرفان..
حسين اللي عطوه إذن بش يحضر العيد مع اهله وعبد القيوم..
اما عبد الرؤوف ذب.ح ضحية بروحه في حوشه..
🍃طوبى بضيق:ماتمنيتش يصير هكي بكل..
مطيره:ع اساس هو ماباش يذبح معانا ع خاطر اللي صار! هو كان يبي يعيد مع عمته ولما قالتله اختك لا ذبح بروحه..
فردوس:صح ياطوبى..
ع خشة الهاديه بقصعة المعاليق وهي تقول..
/وسعوا وسعوا..
تباعدوا عن الطاوله وهي حطت الصونيه عليها..
هاديه وهي داهشه..
/عمي قال سقدوا بفطوركم..
مطيره بإستعجال؛هيا هي..هيا سقدوا يابنات..
وتعاونوا مع بعض ع الفطور وهاديه تقرض في المعلاق..
شويه قالت..
/حسين ذب.ح خروف بوه وجده وعبدالقيوم ذبح خروف طوبى وفايزة.
وتخش اريج وتجي في وذنها اخر جمله طول شافت لطوبى لقتها تستف في الفطيره ووجهها احمر..ابتسمت..
مطيره:الله يربحه ويفتح عليه..
خشت عليهم فايزةوقالت..
/حطيت العصبان ع النار..وقفت حدا هاديه وقالت..الله يبارك..
هاديه بإبتسامه؛ريتي الله يبارك ويزيد..
اريج حطت يدها في نصها وقالت..
/اني بنشوط..
فردوس:قعمزي وهني روحك..
هاديه:يراجوا غير فيها باديين تشويط قداش ليهم..
اريج بتذمر:شن الكساد هدا!
طوبى وهي ترقص في حواجبها..
/جاياتك البطون 4ماشاء الله كسدي عليهم.
مطيره؛اييه..
اريج وهي تشوف لطوبى..
/خليك في الفطور الجماعه يراجو..ورقصتلها حواجبها..
طوبى هربت بعيونها عنها وهي مرتبكه..
شدت اريج ضحكتها..
🍃ومن الكوجينه لجنان الحوش القدامي..
علي:لولا هالحرب راك معيد في الكفرة..
عبد القيوم وهو يشوط في راس خروف طوبى..
/من حظي السمح بش نحضر العيد معاكم..
ابتسم علي الواعر...
حسين:توقعتك تعيد في *****..
عبد القيوم شافله بإمتعاض..
علي:علاش!؟
عبد القيوم؛فوته ياحاج حفيدك هذى ماني عارف كيف عابيين عليه في هالحرب..
حسين قعد يضحك..
عبد المطلب وهو يعلق في السقيطه متاعه..
/الله يبارك كله لحم مافيشي كان شوية شحم..
علي:ايه الله يبارك كلهم هكي..
رن تليفون حسين..مشي طول للكرسي اللي كان محطوط عليه خداه ومشي ناحية القيطون رفعه وخش داخل..
وخلى جده وبوه يهدرزوا ع الضحايا..
وعبد القيوم يشوط وهو سرحان بإبتسامه ويتخيل لو العيد جاي يكون فيه حق من العيله مش مجرد صديق مقرب..
🍃🍃🍃🍃
وفي جنان حوش محمد شنيبه..
تعاونوا المهدي وخوته وولاده الضحايا..
وسميره في الكوجينه تعول وسدرة تعاون فيها ع قد ماتقدر..
اما مغليه كانت مقعمزه حداهم تاكل بس وماتبي تمس شي...
🍃وفي حوش جيرانهم..
كانت ابتسام خاشه الجو بقوة واندفاع وتعول وتجري هني وهني وسلفاتها يسحنوا عليها بصمت وع راسهم خديجه..عكس ضرتها مش مهتمة لأمرها نهائي وقاعده دير اللي يجي قدامها وبس..
🍃🍃🍃🍃🍃
طلعت للجنان متوجهه لللاوندينو اللي برا بش تغسل الدوارة..
وقفت في مكانها لما شافت ربيبها الصغير مداير عرض بهلواني برجلين الخرفان والصغار واقفين يتفرجوا عليه..
سميره بضحكه؛يعطيك الهني يانضال شن اللي دير فيه هدا!؟
وهو لاهي باللي يدير فيه والصغار يتفرجوا عليه بإنبهار.
محمد المهدي بضحكه..
/كان يشوفك جدي..
نضال:اسكتوا خلوني نركز..
سميره وهي تضحك جت بتكمل طريقها للحوش شافت المهدي جاي من بعيد وهو يشوف للي يدير فيه نضال بعقدة حواجب..
لين وصل فيه..ضربه ع قفاه..
طاحوا منه الرجلين لوطا..
المهدي:امتى تكبر قولي!..
نضال بضحكه ربكه؛للصغار ياراجل خيرك شوف كيف عاجبهم الجو..شافلهم وقال..عجبكم ولا..
جوري:ايه عمو خليه يكمل..
المهدي:قيم البلي حاشا النعمه وبرا شوط خير مانشوشطك.
محمد ولده كان شاد ضحكته بقوة..
اما يزن ومحمد حامد وحمزة كانوا يضحكوا...
طبس نضال لم الرجلين وهو يقول
/بتمون ع الدمعه والك بتمون حرك المهدي راسه يمين ويسار ولف ومشي وهو يقول..
/محمد تعالى..
مشي طول محمد لحق بوه وهو يضحك..
نضال التفت شافهم تباعدوا لين ادرقوا.
رجع نظره للصغار وقال بضحكه..
/شوفوا الحركه هادي.
ورجع يلعب بالرجلين..
"نضال"
لما سمع صوت بوه ينادي ارتبك وشدهم كلهم وضمهم قبل ليطيحوا ومشي وهو يقول..
/جايك ياحاج..
ومشي بسرعه وخلا الصغار وسميره يضحكوا عليه..
🍃برغم التغيير الكبير اللي طرأ عليه في علاقته بالله سبحانه وتعالى واسلوب حياته الا انه قعد محافظ ع روحه الطفوليه المرحه اللي تخلي فيه يدخل في السرور ع قلوب اللي حواليه..
وشن احب الاعمال لله..سرور تدخله ع قلب مسلم🌿
🍃واريج برغم كل شي عاشاته ومرت بيه قاعده محافظه ع روح الطفوله والبهجه اللي لازم تملي بيها المكان اللي تكون فيه..
☘وهي ملتمه بوشاح كانت تنظف في البطون بعد ماكملت قالت بأشمئزاز..
/الشعب الوحيد اللي مايلوحش في البطون..
طوبى؛خلاص مالا ماتاكليش العصبان..
اريج:انتي خليك في حالك خيرلك..ورقصتلها حواجبها
طوبى غيرت نظرها عنها لبنتها اللي كانت مقعمزة تاكل في الفطيره وهي تقول بإرتباك..
/مبردك..
هاديه بضحكه:كان نعرف شن شاده عليك..
طوبى احمر وجهها وهي تقول..
/ماعندها ماتشد الباردة هادي..
ضحكت الهاديه وهي تبل في اللحم..
شافت طوبى لأريج بحده لقتها واخده راس الخروف وجايه بيه للهاديه..
فنصت وعضت ع شاربها وهي تضحك..
وقفت جنبها بالزبط وقالت..
/خالتي هاديه..
هاديه بإبتسامه؛نعم حبيبتي..وشافت جنبها ويجي راس الخروف بين عيونها وتصكها عيطه ع طول رقبتها وطول تجري للكوجينه..
وطويى واريج يضحكوا وجنه مفجوعه..
"خيركم شن في!"
بلعوا ضحكهم لما سمعوا الرجاله يكلموا فيهم وخشوا طول يجروا..
ع خشة حسين وهو يقول..
/تي شن في ياهو!!
ماجاشي رد..
قدم القدام وشاف جنه مقعمزة تاكل وعيونها عليه.
غير نظره عنها وشاف لباب الكوجينه طلعت مطيره وقالت.
/مافي شي ولدي مافي شي غير خالتك الهاديه وهي تقص في اللحم ناشت صبعها..
حرك راسه يمين ويسار بعدين لف وولى وين ماكان..
مطيره التفتت للي فالكوجينه وهي تقول..
/حشمتونا..
اريج وطوبى ضحكوا بكتمان وهما محرجات..وهاديه حداهم مقعمزه وهي شبه دايخة وتشرب في مية وسكر..
🍃🍃🍃🍃🍃
ولأنه اول عيد بعد وفاة عتيقه ام عائشه المهدي وصغاره بعد العصر ومشوا لحوش جدهم جويده..
وكذلك العيد الأول بعد وفاة اسكندر اخ سميره اللي رفعها راجلها لحوش اهلها بش تكمل باقي اليوم غادي ويروح بيها تاني يوم العيد..
🍃🍃🍃🍃🍃
الساعه 12:15ليلا..
في جناح أشرف وصفاء..
قعمزت ع السرير وهي تقول بإمتعاض..
/جو رامض دير فيه.
اشرف قعمز جنبها  هو يقول بضحكه..
/وانتي علاش حارقه دمك؟
صفاء بغيظ؛تنرفز فيا نوعيتها..
ابتسم وقال..
/فوتيها وفوتي الجو هدا كله وخليك في امتحاناتك..
صفاء بقلق:علاش تفكر فيا اشرف خليتني نرقد بالي مرتاح..
ضحك وقال..
/بإذن الله ناجحة حبيبتي اني..
ابتسمت بخجل..
وهو كمل يقول..
/بعدين ع خاطر الوضع اكيد حيسهلوا الاسئله..
صفاء برجاء:يارب..يارب..والله خايفه لين خلاص..
اشرف بخوف:لالا صفو فكينا تو تصيرلك حاجه امتحانات زيهم زي غيرهم مافيش فرق..
دمعوا عيون صفاء وهي ساكته..
اشرف بنفاد صبر:ايااااه..خلاص بلاش منهم مرة وحده مش لازم تمشي..
فنصت فيه..
هو عقد حواجبه بضحكه وقال.
/غير تعالي تعالي ماهدرزتش ع ولدي اليوم..
ضحكت ومسحت دموعها وقربتله شويه..
وهو طبس راسه لبطنها وقعد يتكلم..
/شن جو ياسبع...والله عارفك تبي تطلع وتفتك من نكد امك.
لالا خلاص هانت هانت معاش مازال شي.
وصفاء تسمع فيه شن يقول وهي تضحك وخلاها تنسى الامتحانات وتوتر الامتحانات ومايجي منهم..
🍃🍃🍃🍃
"اني لتوا مش مقتنع يامالك وحاس ان في شي تاني"
مالك بضحكه:غير شن بيكون في بس يامازن اني نبي ندير مشروع جديد خير من مشروع المقهى ومربحه اكبر والحكايه تبي مني سفريات ومشي وجي هو هدا..
هز راسه وقال:تمام بنحاول نقتنع بكلامك ونشوفوا شن اخرتها..
طبطب مالك ع كتف خوه وقال..
/خير للجميع ان شاء الله..غير بالله يامازن رد بالك ع مناسك ارجوك..
مازن:اختي زي ماهي اختك..
ابتسم  وبانت في عينه لمعة الدموع وقال..
/سلملي عليها..
مازن:قاعده فايقه ناديهالك تسلم عليها؟
مالك عقد حواجبه وقال..
/لالا مش لازم مش لازم..تصبح ع خير.
ولف ومشي طول لسيارته وخلا خوه يتبع فيه بعيونه وهو يقول..
/قدامك كل خير..
قعد معاه بنظره لين ركب السيارة وتحرك..
هز راسه وقال:تو نعرف شن في وراك..
ولف وخش للحوش وسكر الباب..
🍀🍀🍀🍀🍀
ويعدي من هداكا اليوم اسبوع..
اختفي فيه مالك وخوه ماحصلش عنه اي معلومه..
وخلا اهله عايشين حالة خوف وقلق عليه حتى فوزيه اللي فقدت اتصالاته هدا كله صار بالتزامن مع تصاعد وتيرة الاشتباكات بعد خرق الهدنه ايام العيد والحرب بدت تزيد شراسة...
🍃16اغسطس..سنة 2019..
في حوش طوبى اللي كان متزين بأحلى زينه للإحتفال بمرور عام ولادة جنة..
عزمت طوبى صغار الشارع كلهم وع راسهم صغار عيلة شنيبة وصغار حواء...
"هالصيصان شو حلوين...عم يدوروا حولا امن مبسوطين"
كانت طوبى واقفه بجنه ع الطاوله قدام تورتة كبيره مكتوب عليها اسمها وتاريخ ميلادها...
تمرر في نظرها ع الصغار حواليها وهما يغنوا في اغنيتها المفضله  وع وجهها ضحكه في غاية البراءة والجمال..
وقدامها خالتها اميمه شاده تليفونها وتصور فيها فيديو بالكاميرا متاعه...
🌼هالفيديو وصل للنمسا..
كانت صفيه وهي مقعمزة في الصالون تتفرج عليه وهي تضحك وعيونها مدمعات..
☘☘☘☘
بعد ماتفرجت عليه اتصلت بأميمه اتصال فيديو..
صفيه:لالا سدره برا يمشوا فيها..هيا وريني جنيوه..
"امي جنة رفعوها للمصور"
صفيه بأسف:خسارة..بعدين تنهدت وقالت..وين ريتها بالقفطان الابيض فكرتني بأمها اول مرة ريتها فيها..دمعوا عيون صفيه وهي تقول..الله ياربي تقول امس روحت من بنغازي مع لطفي ووردة الله يرحمهم مسرع الوقت يجري امتى كبرت وتزوجت ودارت بنيه..ااه بنيتي غير بختها جاها بالهون ..
"ربي يعوضها خير"
صفيه:يارب العالمين..امالا خل نسكر توا ونطلع نشوف سديرة شن صار فيها..
"سلمي عليها هلبه"
صفيه:يوصل بنتي..حتى انتي سلمي علي اللي عندك كلهم..بالسلامه..
"يوصل في امان الله"
ونهت صفيه المكالمه بعدين تنهدت وقالت..
/وكان قال حسين مازال نبيها ماضاله الا خاطبتهاله وطز فيهم كلهم...
ناضت وجت بتمشي بإتجاه الباب جمدت في مكانها..
لما شافت سدرة بكرسيها المتحرك واقفه قدامه وفي عيونها نظرات عدم استيعاب غارقة بالدموع....
🍃🍃🍃🍃🍃🍃🍃🍃🍃🍃🍃
وفي دولة ما..
في احد مراكز الصحة النفسيه..
كان في جلسه مشتركه لعدد من المرضى يتوسطهم مريض نفسي يسمع فيهم واحد واحد..
:يعني فيك تقول انك تغلبت ع جميع مخاوفك..
تنهد الجالي وقال..
/ليا وقت لما تحديتها ع خاطر اكثر انسانه حبيتها في حياتي وتوا نحس في روحي معاش عندي شي نخاف منه غير خسارتها..
:يعني رح ترجع تحاول من جديد..
الجالي:اساسا اني قبلت نخش ونتعالج في المستشفيات بعد ماكنت رافض الحكايه هادي رفض قاطع بش نرجع نحاول معاها من جديد..
ابتسم الدكتور وقال.
/الجالي كان عنده حافز قوي جدا للعلاج وهو اللي خلاه يتحسن يوم عن يوم..وكل واحد فيكم محتاج يكون عنده حافز يساعده ليتعالج هلأ كل واحد فيكم يفكر شو هو اكثر شي خلاه يجي لهون ليتعالج...
واستمر الطبيب يتكلم مع باقي المرضى والجالي يسمع فيهم لعند ماانتهى وقت الجلسه..
طلع بعدها من الحجره ومشي قعمزه ع كرسي طويل في واحد من الممرات مقابل الفيرندا المطله ع الحديقه.
طلع من جيبه صورة لطوبى ورفعها لمستوى نظره تأملها بنظرات عيونه اللي تلمع فيهم الدموع بعدين قال...
"موليلك ياعمري موليلك"...

#حمامة_بيضا
#طوبى

....يتبع.... 🌼🌼🌼🌼