طوبى ☕شارع القهوة☕

الجزء_الحادي_والتسعين

#طوبى  "جنة طوبى"
#جمان_فريد
#الجزء_الحادي_والتسعين"نهوض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#القرآن_المجيد
ثمُ إن القرآن أعظمُ مارُتّبت به بعْـثرة الأرواح  وأجل ما هُذّب به شَعث السرائر وأنقى ما جُمع به شتات القُلوب فالزموه في الشدة والرخاء

🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 - ماذا فعلت بعد خيبتك الأولى؟
‏- لا شيء، دخلت لخيبتي الثانية بكامل إرادتي.🍃
________________________________________
كانت مقعمزه ع سريرها تخيط في الوساده متاعها..
اندق عليها باب الدار..قالت.
/خشي..
انفتح الباب وخشت صفاء وهي تقول..
/فاضيه؟
عواطف وهي لاهيه تخيط..
/تعالي..
سكرت الباب..
ومشت قعمزت مقابلتها..
صفاء:حقه مش ماشيه الليله؟
عواطف:ايه.
صفاء سكتت شويه بعدين قالت..
/باهي بنخبرك بحاجه..
رفعت عيونها فيها..
صفاء بشي من التوتر:اني حامل..
عواطف:مبروك..ورجعت تخيط..
تنهدت صفاء وقالت..
/علاش ماتبيش تمشي..
عواطف:ممكن حبيبتي تطلعي.
صفاء بضيق..
/اني اسفه..عارفه مش من حقي ندخل..لكن راهو مش اخر الدنيا..
عواطف بهدوء:صفاء اطلعي..
صفاء بإصرار:اسمعيني بالله عليك..شوفي طوبى بنت الواعر تعرفي اللي مرت بيه شي يمرض صعب عقلك يستوعبه ومع هذا بتمشي تحضر وتحط عيونها في عيون الناس اللي كانوا سبب في كل اللي عاشاته..اللي قاعدين لعند اليوم يقولوا عليها في كلام مش كويس..تعرفي هي علاش دير هكي! ماتبيش تبان ضعيفه ولاتبي حد يصخف عليها ولايقول عليها مكسورة..تبي تخلي الكل يعرف ان اللي مرت بيه ماقدرش عليها بالعكس هي اللي قدرت عليه..
نزلت عواطف عيونها وهي شاده دموعها بقوة..
صفاء:سامحيني لو تخطيت حدي..لكن نبي نردلك اللي درتيه معاي يومها بس..وناضت ومشت طلعت من حداها وهي تذرف في الدموع..
وعواطف تأثرت لأبعد حد بكلامها وقعدت تبكي بألم بعد ماطلعت وخلتها..
🍃🍃🍃🍃🍃
وفي مكان طبيعته حلو يبان منظر الغروب الساحر..
كان سامي مداير جلسة تصوير لعبد القيوم ..وعبد القيوم مستمتع بمنظر الغروب ومرات يسرح معاه وين يتفكر ايام رحلات الصحرا والبر..ياما شاف منه هالمنظر وعاش اجوائه..
وهالشي ساعد سامي يبدع في تصويره..
وبعد ماخداله كذا صورة..ختم بصورة سيلفي ليهم التلاته مع بعض..
ربيع..عبد القيوم..سامي..
🍃🍃🍃🍃🍃
بعد ماحط اصحابه في شارع القهوة روح لشقته..
بدل حوايجه ودار حاجه سريعه كلاها..بعدين بدي يجهز في نفسه بش بيولي للشارع..
فجأه..يجيه اتصال..
طلع من دار متوجه للمدخل اللي كان محطوط عليه هاتفه..
خداه شاف المتصل..عقد حواجبه..بعدين فتح الخط ورد..
/السلام عليكم..
"وعليكم السلام..معك سلافه"
عبد القيوم؛ايه عارف حافظ رقمك عندي..
"كيفك"
هو قال:الحمد لله..شنو حالك انتي وحال هلك..
"الحمد لله الكل مناح..عم عطلك عن شي"
هو قال:لا..تفضلي..
"اول شي اني بدي خدمه اذا ممكن"
عبد القيوم؛كان نقدر عليها مش حنوخر..
"تمام..عندي ابن عم قرر يستقر هون وصارلو فتره عن بيعمر بيت بمنطقه وادي الربيع..هو وصل لمرحلة تركيب الكهرباء وعم بيدور ع مهندس يراعيه شوي..مابعرف ليه خطرت ع بالي وقلتلو رح شفلك حدا بعرفوا.."
شاف للمرايه وقال..
/ماعنديش مشكله..انتي عطيه رقمي وتو نتفاهموا..
"عنجد شكرًا كثير الك"
عبد القيوم؛العفو..
"طيب..في شغله تانيه حكا معك استاذ سامي عن شي!؟"
عبد القيوم:اها..حكالي بس يعني كيف ماقتلك قبل انا مش متفرغ..يعني للأسف ماعنديش وقت نعطيه..
"هو مشروع خيري ..يعني اي نشاط بنعملوا في ناس بتستفيد منو كثير..مثلا باواخر شهر آذار مارس يعني رح يكون في معرض خيري رح نبيع فيه لوحات اللي حيطلع منه رح نتبرع فيه لمرضى الكلى..."
عبد القيوم ابتسم تعجبا وقال..
/قصدك في ناس عندنا مهتمه وتشري!؟
"ايه في وكتير كمان..يعني صح في اللي بيحب الفشخره بس بينفعنا"
ضحك ضحكه خفيفه بعدين قال..
/تمام..
"يعني رح تنضم لجمعيتنا"
عبد القيوم:إن شاء الله..
"كتير حلو عن جد كثير انبسطت"
هو قال:شكرا..في شي تاني؟!
"لاخلص مافي شي غير هيك..ايه رح سكر منك وابعتلك رقم ابن عمي"
عبد القيوم؛تمام...السلام عليكم...ونهي المكالمه..حط التليفون ع طاولة المدخل ورجع للدار..
🍃وسلافه نزلت التليفون وهي تضحك وتسمع في اختها تقول..
لبانه:بصراحه عندك صوتو بيجنن وطريقة حكيوا جذابه بس شاايف حالو كتير..
سلافه ردت عليها وهي تغني..
/بيلبقلك لو شفت عليهن حالك..
ضحكت اختها بعدين قالت..
/هلأ رح يصير قريب كتير...
تنهدت سلافه وقالت..
/تعرفي لبون..بعمري ماحسيت هيك..يعني اللي عم عيشوا هلأ خلاني حس اني بحياتي ماحبيت ولاقلبي دق لحدا..
لبانه:يمكن هاد حب العمر مثل مابيقولوا..
بإبتسامه قالت..
/يمكن...
🍃🍃🍃🍃🍃
ومن حب العمر..لفرحة العمر اللي عايشتها حنان الليله وهي تراجي في الكسوة تجي..
مقعمزة بين قريباتها وهي لابسه البوردي وكانت في قمة السعاده..
وسط الخيمه اللي كانوا معازيمها مقعمزين ع كراسي ومنهم عيلة الواعر..
مطيره..وفردوس وبناتها..وغرفه.. وأميمه...وطوبى وجنتها..
ومعاهم فايزة وبناتها...
ع خشة نجمه مع صفاء..
مروة:ماما صفاء جت..
وجهت فايزة نظرها لبنتها..شافتها كيف محاديه عزوزتها وتسلم معاها ع المعازيم..ابتسمت..
وقعدت صفاء تسلم ع الناس مع عزوزتها لين وصلت في امها وخواتها..وعيلة الواعر..سلمت عليهم وقعمزت عزوزتها جنب مطيره بعدين مشت قعمزت حدا خواتها وامها..
طوبى وهي تشوفلها توقعت عواطف تجي..وحست بشي من الضيق لما خاب توقعها وخافت يكون وضعها مع صفاء قاعد متأزم...
غيرت نظرها عن صفاء لما سمعت اميمه قالت..
/حضر الشياطين..
شافت لمدخل الخيمه..لقت مغليه وبناتها وراما ومعاهم نجاه وجوري وسدرة المهدي خاشات....
ركزت بنظرها ع مغليه..قاعده هي هي بنفس الانفه والكبر تشوف للناس من فوق وماعاجبها حد..
ارتسمت ع وجهها ابتسامة استهزاء خفيفه بعدين غيرت نظرها عنها لكروسة جنه..
🍃الحاضرات كانوا مركزين بنظرهم ع العيلتين..وردود افعالهم اتجاه بعض..
عيلة الواعر متجاهله وجود عيلة شنيبه تماما..وعيلة شنيبه تعاملوا بالمثل..
سلموا ع الكل وصفة عيلة الواعر ماشافوش ناحيتها حتى بالغلط..
قعمزوا ع كراسيهم اللي كانت جايه في صدر الخيمه اما كراسي حوش الواعر كانت جايه يمينها..
🍃مرت اول ساعه عاديه جدا..وجت كسوة حنان..
كانت كسوة كامله ماناقصها شي عجبت اهل حنان وحتى الحاضرات...
دارو عليها شوط حلو..بعدين دخلوها..وبدت تتوزع الضيافه ع اهل الكسوة...
فاقت جنه..وطوبى طلعتها من الكروسه سكتتها وقعمزتها في حجرها..وحواليها اميمه واريج يلاعبوا في جنه..
ضحكت عليهم..ورفعت عيونها بنظرة عابره جو في عيون نجاه اللي كانت نظراتها كلها حقد..
تجاهلتها طوبى وكأنها ماشافتهاش..وغيظها يزيد..
نفسه غيظ راما تجاه مروة اللي كانت بتموت غيرة منها..
ومروة ولا حاسبتها موجوده لاهيه مع اختها صفاء وخلاص..
☘وبعد لحظات..
طلعوا حنان وهي مغمومه بالحولي ودارولها باقي العادات المعروفه..
بعد ربع ساعه..روحوا اهل الكسوة..وطلعت حنان وهي لابسه في يدها حديده ثقيله ذهب هدتهالها عزوزتها..
ومشت قعمزت جنب قريباتها..وهما عاد  حبوا يعيشوها اجواء حلوة فهالليله لاتنسى..
شغلوا اغاني شعبيه..ونوضوها ورقصوها معاهم..
وفي الحاضرات يصفقوا...
فجأه..تنوض نجاه لما تسمع اغنية "خلي يقولوا ساحراته" وتنوض معاها راما ويخشوا فيهم ويبدوا يرقصوا..
مروة:ماجمع الاماوفق..
ضحكت صفاء..
اميمه؛بجديات بدت تصخف فيا..
طوبى:اساسا هي ماتستاهلش غير الشفقه..
فردوس؛ان شاء الله تتكردس..
غرفه بضحكه؛مريضه رسمي راهو..
الاء:من غير شك..
"خل يقولوا سحراتني..سحرتني ونموت عليها"
وتهيج نجاة وترقص بمبالغه..وراما وقفت بعيد عليها شويه وتصفقلها..
اريج:خسارة راما كيف انقلبت هالقلبه..
الاء:بنت خديجه شن تتوقعي منها...
🍃وباقي الحاضرات يتفرجوا ويتهامسوا...وكلهم يراجو في رد من طوبى...
وتم الاغنيه اللي هيجت نجاه وتجي بعدها اغنيه زمزامات...
"عزوزتي محلاها"..
ناضت صفاء ومشت لنجمه تنوض فيها..
ونجمه ناضت معاها وهي تضحك..
شدت ايديها صفاء وقعدت ترقص فيها ..
وامها وكل اللي حواليها يتفرجوا عليهم بحب..
🍃خديجه؛الفرخه هادي شيطانه..
مغليه؛ريتيها ريتي..
شافت خديجه لطوبى لقتها تصفقلهم وهي مبتسمه..
التفتت طول لنجاه وقالت.. /نجاه يما نوضوا ارقصوا..
نجاه شافت لمغليه..ومغليه مررت نظراتها الحاقده ع كناينها القدم وقالت..
/نوضي..
وناضوا الزوز..
وتزغرد خديجه..وراما تصيح بصوت عالي..
ونسرين مربعه ايديها وتتفرج عليهم بإمتعاض..
نجاه وهي ترقص مع مغليه كانت تغني مع الأغنيه..
/اطيب عزوزة..عزوزتي محلاها..
ومغليه ترقص من جدها...
والناس كلها تتفرج بحماس واثارة..
نجاه..
/مافي منا اللي يشوفنا مايقول عزوز وكنه..
نساوين ديما دوم تحكي عنا..هي راضيه واني نزيد رضاها..
وتنوض خديجه تلف عليهم وهي ترقص وتخمس بإيديها..
مطيره وهي تغني بنفس اللحن..
/وااه يامحلاها فيها الضره..
ضحكوا فردوس وغرفه...
وطوبى تتفرج عليهم وهي مبتسمه ابتسامه خفيفه مختلطه بين المكر والسخريه..
جي بين عيونها ايام عرسها ومحضرها..فرحتها هداكا الوقت كيف كانت ترقص بسعاده...وهي غافله..مضحوك عليها..ترقص ع خيبتها الكبيره وفرحانه بيها..
الشعور اللي حست بيه توا كانت تبيهم الزوز يحسوا بيه..
مغليه وخديجه ويشربوا من نفس الكاس اللي شربوها منه...
🍃🍃🍃🍃🍃🍃
"واهو فضي الجو حجي..هات ماعندك"
تنهد مالك وقال..
/من الاخير ياصاحبي راني مكبد وغارق لوداني..
معين بضحكه؛عارف..غير كنت نراجي فيك تجي تعترف..
مالك بضيق:الوضع معقد هلبه والحكايه خاشه بعضها ومفركسه تفركيسه..
معين بإستغراب..
/كيف يعني..عندها حد ولامخطوبه!
مالك؛لامش هكي بكل..حك رقبته بعدين قال..صايرلي معاها موقف خيي زفت خلا نظرتها ليا مش حلوة بكل..
معين؛شن هو؟!
تأفف بعدين قال..
/تتفكرها اسما..
معين:خيرها!..
مالك؛هي كانت تقرا معاها..
معين؛تمام فهمت شايفاتك معاها ولا..
مالك وهو يمرر في نظره حواليه قال..
/امم..نوعا ما..
معين:قصدك انت صاير فيك هدا كله من ورا هادي بس!..تي برا كلمها قوللها اسما كنت نفوت بيها في الجو وانتي اللي نبيها جديات وتمت..
مالك:شن صبلي نشرب هي!
معين؛تي كان وحده من اللي تعرفهم اسما تلقاها تراجي فيك تأشرلها..
مالك؛منك جد! اني بنكبد في وحده من هالنماذج!ياطيري افهم..البنت هيا مش زيهم..مش زي بنات هالوقت بكل...
معين:الحكايه خشت بعضها عندي راهو!
مالك:حجي افتح مخك معاي شويه..البنيه الله يبارك عليها بنت عيلة وناس ومتربيه ربايه صح..مش متاع وجيج ودوة فاضيه واحد زيي اني ماتشوفلاش بطرف عينها..
معين؛طز فيها بكل..الف وحده خير منها تتمناك..
مالك غم وجهه بيده وهو محبط من صاحبه اللي ماباش يفهم عليه..
معين؛ندوي معاك جديات..انت راجل..مايصيرش فيك هكي ع خاطر انتايه...
نزل مالك يده وقال..
/هدا علاش مابيتش نحكيلك..
معين؛اني مانحبش نشوفك هكي مرخي ودموعك في عيونك ع خاطر بنت..
مالك:افهم ياغالي تربح..اني نحبها ونبيها بالحلال ..البنت دارت فيا اللي ماقدر يديره حد..نبي نكمل عمري معاها مانبيش اكثر من هكي فحياتي..
معين قعد يشوفله شويه بعدين قال..
/لاالموضوع رسمي..رسمي..باهي..كان الحكايه واصله معاك لهني..خليك ذكر وبرا اوقف قدامها وقوللها يابنت الناس راني نبيك وناوي الحلال واي شي عرفتيه عليا كان ماضي نسيته وانتي انسيه وراني تبت على ايديك وتمت..مافيش بنت تقاوم الجو هو لما تحس روحها هي اللي غيرت الراجل وهكي..وبعدين انت الله يبارك ولد عز وزين حمارة لو طنشك..
حذفه بظرف سكر صغير وهو يقول..
/ادوي زين..
معين بضحكه:المهم هو هدا..الموضوع بسيط هلبه مش محتاج من يساعدك فيه...
تنهد مالك بضيق ووجه نظره لباب المقهى..
معين ضيق عيونه وقال..
/الا اذا في حاجه تانيه انت ماحكيتهاش..
شافله وحرك راسه بالنفي وهو يقول..
/لالا..شن بندرق عليك يعني!
معين:باهي قولي البنت من نفس العيله اللي خشيت في مشاكلهم المدة اللي فاتت..
هز مالك راسه بإيجاب..
غير معين نظره عنه وهو يهز في راسه وياكل في شفه السفلي..حركه تلقائيه يدير فيها لما يفكر..
🍃🍃🍃🍃🍃
"اني مش حنبرد لين نشد خديجه نمرجها مرجة باهيه"
طوبى وهي تلم في شعرها كعكه..
/جايتها مرجه باهيه تمرج كبدها غير يعدي هالشهر بس.
فردوس بضيق:معاش نبي نتفكر ان مازال شهر وبناتي يمشوا ويخلوني..
قربتلها طوبى وضمتها وهي تقول..
/واني شني..
خدتها فردوس في حضنها وهي تقول..
/سلمهالي هي وبنيتها..
ع خشة آلاء وهي ترفع في سوستة التوب متاعها وتقول..
/شفتوا الطيحه اللي طاحتها حنان..جلايت الجنتل اللي حتى العرسان اللي يجيبهم غير..
طوبى حست بشعور غريب اجتاح صدرها خلا خدودها سخنوا فجاه...
مطيره بضحكه؛ايه والله..عيلة الله يبارك ومدام معارف عبدو معناها ناس كويسه..
طوبى سرحت وهي تتفكر كيف شافاته اليوم..اكثر مشهد قعد راسخ في عقلها ضحكته وهو منزل راسه للأسفل والعمامه السودا "الشاش" زايداته منظره جاذبيه..
ورجع قلبها يرتبك بدقاته..
فردوس:ان شاء الله يطلعوا ناس كويسه وتتهنا معاهم..
مطيره:آمين..
🍃وبعد ساعه كلهم كانوا غارقين في النوم..
ماعداها هي..بعد ماصلت القيام..طلعت مذكراتها اللي ليها وقت طويل ماكتبت فيها شي..
خدتها من الدولاب ومشت بيها للصاله وقعمزت قرب الروشن وبدت تكتب..
"اسفه..ايه اسفه ماقدرتش نكون زيك..ماقدرتش ماناخدش حقي بإيدي من كل حد آذاني وظلمني...ماعنديش القدرة اللي عندك..ماقدرتش نهجر ونصفح الصفح الجميل..ربي سبحانه خير المظلوم..واني اخترت الخيار التاني..لازم ينحط لكل ظالم حد..لازم يأدب المظلوم الظالم وياخد الحق منه...تعرفي..اني مرات نحس ان ربي مسخرني بش نكون عقاب للناس الظالمه المحاوطه بيا..ايه اني عقابهم في الدنيا..عقاب مغليه واللي معاها..وعقاب الجالي..وعقاب مختار..وحنكون عقاب أليم ياسدرة..أليم هلبه...نتمنى لو جي يوم وقريتي هالكلام مايوجعكش خاطرك مني..سامحيني..اني طوبى ومش حنقدر نكون زيك مهما حاولت.."
وقفت كتابه ورفعت نظرها للسمي وهي تشوف للنجوم. بنظرات ألم...
🍃🍃🍃🍃🍃
تاني يوم...
الخميس..
21فبراير...سنة2019..
الساعه 1:30بعد الظهر..
كانت صفاء واقفه ع الغدي تشوف فيه..تأكدت انه طاب..
طفت عليه..
جاها صوت عواطف وهي تنادي فيها..
استغربت وطلعت بإتجاه الدار...
وصلت فيها وخشت..لقت عواطف طارحه زوز فساتين ع السرير وهي تقول..
/شن رايك اما اكثر واحد فيهم يمشي مع الحفله!؟
ابتسمت صفاء وقالت..
/البترولي..
عواطف؛حتى اني هكي نقول..شافتلها وقالت..متعلمه من امك حاجات!؟
صفاء بضحكه؛اكيد...بس ع قدي..
عواطف؛مش مشكله مانبيش شي مبالغ فيه..
صفاء بإبتسامه؛خل نمشي نجيب قفطاني ومكياجي ونحطهم عندك..
عواطف هزت راسها بصمت..
وصفاء مشت طلعت بسرعه وهي متحمسه وفرحانه..
🍃🍃🍃🍃🍃
الساعه 9:00ليلا...
وصل حسين بسيارته قدام قاعة الافراح اللي فيها حفلة حنان..
نزلوا عمته واخته وبنات عمه واريج والاء..وتوجهوا طول لباب القاعه..
هو طلع...خش عبد الرؤوف وبعد مانزلت غرفه لحقه...
🍃🍃🍃🍃
بفستان سهره اخضر جميل وشعر مرفوع بطريقه حلوة وخصلات نازلات ع وجهها المزين بمكياج ناعم..
طلت طوبى وهي حضنها جنه اللي كانت لابسه معاها نفس اللون ..
كالعاده..ساحره في طلتها وجذابه..واللون الاخضر عكس ع العيون الحايره وزادهم بهاء..
العيون كانت عليها لين وصلت هي وعيلتها لطاولتهم..
تركيز الناس غالبا يكون ع المراة المطلقه حديثا لما تحضر مناسبه بالذات لما تبدا ورا قصه صعبه..
رغما عنهم حيعجبوا بالمراة اللي تبان قويه وتخطت اللي صار فيها..بس ابداء هالإعجاب يكون صعب عليهم..
هما هكي تربوا وتعلموا ان المطلقه لازم تكون مكسورة ومثيرة للشفقه...
عواطف اليوم حتى هي مسحت هالنظره لما شافوها لأول مرة بعد طلاقها بشكل مختلف تماما..
كانت تبان محلوة ورايقه ومنسجمه مع الكنة الصغيره..
🍃فردوس:حي عواطف! الله يبارك كيف طالعه!
وجهوا انظارهم لوين ماتشوف فردوس..
طوبى ركزت ع جوها مع صفاء ابتسمت براحه وعرفت ان اللي فكرت فيه امس ماكانش في محله..
شويه وجتهم فايزة مع بناتها خدوا كراسي من الطاوله اللي جنبهم وانضمولهم..
فايزة:شيانه اريج!؟
اريج؛مالا شنو خلاص مازال شهر بس..
الاء؛حولت نشين روحي ماقدرتش جمالي غلاب..
اريج:ننننن..
قعدوا يضحكوا...
🍃ومن فم القاعه..
يخشوا عصابة مغليه ومعاهم نسرين اللي كانت مش طايقه وجودها معاهم..
قعمزوا في طاولتهم..
وقعدت نجاة دور بعيونها في طوبى لين شافتها..
ترقص في بنتها وهي مقعمزه في حجرها..جمال طلتها خلا الغيره والحسد ياكلوا نجاة ماكله..
طوبى وهي تمرر في نظرها حواليها جو عيونها في عيون نجاه.. غيرت نظرها عنها عادي وكملت تجاهلها ليها..ونجاه تزيد قهر ع قهرها منها...
🍃🍃🍃🍃
وبعد نص ساعه..
تخش حنان..كانت طالعه جميله جدا..وزفتها حلوة..واهم شي الفرحه اللي ماتقدرش درقها باينه فيها هلبه..
طوبى وهي تشوف فيها كيف مقعمزه ع الكوشه وهي في قمة السعاده دعت من قلبها..
"يارب هنيها واجعل فرحتها دوم مش يوم"
☘ويعدي الوقت..والحفله مستمرة بأجوائها الجميله..
والامر لايخلو استعراضات نجاة وخديجه ولحقت عليهم حتى راما..لكن مافي حد اهتم لأمرهم من عيلة الواعر.
وهالشي لاحظوه الناس وحسبوه نقطه ضد عيلة شنيبه لعيلة الواعر..
🍃ويستمر هدوء الاجواء لعند ماناضت مروة ومع تاله للحمامات بش تساوي شعرها ..
🍃خشوا لواحد من الحمامات..
مروة:هيا عطيني ظهرك..
عطت تاله اختها بظهرها..وقعدت مروة تساويلها في ضفيرة السنبله متاعها..
وتخش عليهم راما اللي لما شافتها تاله بدت ع وجهها ملامح الغضب..
راما؛مروش..
رفعت مروة عيونها فيها..بعدين وقفت ع حيلها وهي تشوفلها من فوق لتحت..
راما:سمعت بيك ارتبطتي..
بدت ع وجه مروة ملامح الازدراء..
راما:مالك..
تبدلت ملامح وجهها للغضب مع الخوف..
راما:بجديات ماصدقتش..يعني كيف صار مافهمتش! ياترى من قبل مدايره فيها جو الخضرا الشريفه وانتي تلعبي من تحت لتحت..ولالقتيه فرصه..حتى هو واحد واصل وين طيحوا في مصيبه يجيكم يجري..
مروة شافت لأختها وقالت..
/هيا تاله..
وقفت قدامهم وقالت..
/مافيش طلوع لين تقوليلي كيف حبيتي واحد كان صاحب اسما وتسببلك معاها في فضيحه هكي كبرها..
مروة بعدم استيعاب..
/شن تخرفي انتي!؟؟
راما؛قصدك ماتعرفيش ان مالك كان صاحب اسما!!!؟
حست ببرودة رهيبه سرت في جسمها كله..وكأنه دقات قلبها بدت بطيئة..
راما؛سيباته بعد ماحفرتلك معاه...لكن اني نبي نعرف كيف صار منكم انتم الزوز نبي نعرف..!سألت خالتي وقالتلي خو صاحبتك وتقرا معاك في نفس المدرسه!؟ دماغي استك ومعاش فهمت شي..بالله عليك ماتخليها في خاطري واحكيلي..كيف تصاحبتي انتي وياه! مامحبه الا بعد فضيحه!.
تاله كانت تسمع وهي مصدومه وتشوف لأختها..
ومروة كانت حاسه روحها من الصدمه وكأنها طاحت في بير غريق مظلم..تسمع في صوت راما بالصدى...
راما: ولانقولك مش لازم تحكي نقدر نعرف بروحي شن صار! في النهايه انتي واختك زي بعض..في الاول دارت روحها العاقله وبعدين جابت عمي للطريق وخلاته ياخدها..وانتي توا درتي زيها المهم راجل تشبطوا فيه بش تعوضوا النقص اللي عندكم...لكن بننصحك نصيحه اخيره كنتي صاحبتي يوم من الايام...مالك هدا عايش بالطول والعرض مامخلي مامداير تو ياخد منك اللي يبيه ويلوحك..انتي ماوراك حد ردي بالك..
ولفت ومشت وخلتها..
بعد مافرغت سمها في قلبها وفي روحها وصدمتها صدمة من قوتها دمرت فيها ماقعد فيها من حاجات حلوة..
"مروة"
نزلوا دموع مروة وهي تتفكر في مالك كيف ديما تشوف فيه بهيئه وحده ماتغيرتش..
كيف من البدايه قرب منها! كيف مناسك من دون بنات المدرسه كلهم هي اللي تبادر وتتعرف عليها وتصادقها!..
شن اللي قاعد يصير معاي ياربي!!
علاش هكي!!؟ علاش هكي يصير فيا!..
مروة وهي ترجف:بري قولي لماما مروة مريضه وتبي تروح.
تاله بخوف؛مروة!
مروة بشي من الانفعال..
/بري..
مشت تاله تجري..
ومروة طلعت بعدها وهي تمشي بخطوات ثقيله..
انسدت بكتفها ع الحيط وهي تشوف للارض ودموعها ينزلوا دمعه ورا التانيه ع الارض..
شويه وجوها امها واميمه وصفاء يجروا..
فايزة بخوف:خيرك ماما شن تحسي..
مروة ودموعها ينزلوا..
/شكله العذر ياماما..نبي نروح..
اميمه:تو نكلم حسين يجي يروح بينا..
فايزة بقلق:بسرعه يااميمه بالله عليك..وضمتها بنتها لحضنها..
تاله:كل من..
مروة بحده ودموعها ينزلوا:تاله بري جيبي عبايتي..
تاله بضيق:باهي..ومشت طول
وصفاء تشوف لمروة بشك..
🍃بعد عشرة دقايق جي حسين روح بأميمه وفايزة وبناتها ومع اريج والاء..
وقعدت طوبى مع مطيره وفردوس بش يروحوا مع غرفه..
وصفاء روحت مع اهل زوجها في سيارة شيبانيها...
🍃طول الطريق ومروة مفصوله ع العالم تسمع في كلام راما بس..وتشوف قدامها في كل المواقف اللي جمعتها بمالك..واكثر شي تفكراته اخر مرة ركبت معاه السياره لما شكت فيه لوهله..وقالت في نفسها بندم ياريتها صدقت احساسها..
🍃🍃🍃🍃
وصلوا لشقتهم..
خشت لدار صفاء اللي ولت دارها حاليا..
وسكرت الباب..
قعمزت ع السرير وطلعت تليفونها من شنطتها..
حطت ع رقم مناسك وهي ترجف من الغضب والالم..واتصلت بيها..
كانت وقتها الساعه 12..ولأنها ليلة خميس سهرت مناسك ع فيلم تتفرج فيه ع اللاب توب..
وين رن تليفونها..خداته من ع الارض..ولما شافت مروة متصله ابتسمت بضيق وقالت..
/اكيد بتحكيلي ع الحفله..
فتحت الخط وردت..
/مروشي..
"ياكلبه ياحقيره انتي وخوك يامسخين..تحسابوا ربي مش حيفضحكم! شن تبوا مني شن مازال يبي خوك الحقير الله لايربحه ولايسامحه ع اللي داره فيا!! ان شاء الله ربي ينتقم منه فيك انتي ياربي..امسحي رقمي ياوسخه امسحيه معاش نبي نعرفك بكل ياواطيه انتي وخوك الفاسد"..
وسكرت عليها..وخلتها جامده من الصدمه ودموعها ينزلوا.
نزلت التليفون وقعدت تشوفله ومازال مش مستوعبه اللي صار قبل شويه..
"شن ديري فايقه لتوا"
رفعت عيونها فيه وهي تشوفله بنظرات حاده..
خشلها وقال..
/خيرك تبكي!
ناضت وهي ناسيه اللابتوب اللي كان ع رجليها طاح منها ..
وقفت قدامه وقالت..
/ياريتك مش خوي..
هو عقد حواجبه بصدمه..
مناسك بكره..
/عرفت شن درت لمروة وحتى مروة عرفت وخسرتها في جرتك وجرة صياعتك وضياعك..دعت عليا بسببك انت..قالت ربي ينتقم منه فيك..بجديات..ياريتك مش خوي..
ومشت من حداه وهو يلحق فيها بنظرات عيونه المصدومه...الغارقه في الدموع...دموع الندم والحسرة...

#نهوض
#طوبى

....يتبع....