طوبى ☕شارع القهوة☕

الجزء_السابع_والتسعين

#طوبى  "جنة طوبى"
#جمان_فريد
#الجزء_السابع_والتسعين"الأوركيد الأبيض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
عن أبي موسى الأشعري رضي الله عنه، قال: قال رسول الله صلى الله عليه وسلم: (مَثَلُ الذي يَذْكُرُ رَبَّهُ وَالَّذِي لا يَذْكُرُ رَبَّهُ، مَثَلُ الْحَيِّ وَالْمَيِّتِ) (رواه البخاري) 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃كأنكَ الروح ، وكأني بدونكَ لاشي!🍃
_______________________________________
اربع ساعات كانت مسافة الطريق من هالشتات لفيينا..
قطعتها فاتن وهي تسرق في النظر لصابرين اللي كانت خاشة في حالة صدمه ودموعها مانشفوش..
وتسمع في ادعية وبكي امينه اللي كانت مقعمزة جنبها..
وهي حزينه وقلقه ع وضع رضا وتفكر في مختار لما يوصله خبر شن يصير فيه!؟
رضا دار الحادث بعد ماخش لفيينا والناس اللي شهدت ع الحادث ساهموا في إسعافه فورا للمستشفى..
وكان اول من وصله الخبر صابرين واللي معاها..
يعني لاخطيبته ولاأهلها عندهم علم..
🍃🍃🍃
وصلوا للعاصمه..وقفت فاتن سيارتها قدام المستشفى..
طول صابرين وامينه نزلوا يجروا من السيارة..
وفاتن بعد ماسكرت السيارة لحقتهم...
☘☘☘
بعد ماسألوا عن مكانه في الاستعلامات ودلوهم..
توجهوله وقلوبهم كلها قلق وخوف من اللي حيعرفوه عن حالته..
🍃واللي قاله الدكتور المشرف علي حيلته طمن فاتن بعض الشي وهي بدورها خبرتهم عن وضعه بطريقه طمنهم اكثر..
فاتن؛الحمد لله مافي شي خطير كسور وإصابه في جنبه الايسر الحمدلله ماوصلتش في الاعضاء الداخليه داروله عمليه بسيطه وبإذن الله ع قرب الظهر يفيق ونطمنوا عليه..
صابرين وهي تبكي قالت برجاء..
/تقولي في الحق ولا!؟
فاتن؛والله العظيم الكلام اللي قاله الدكتور وصلته..
امينه ودموعها ينزلوا قالت بأمتنان..
/الحمد لله..الحمد لله..
صابرين رشفت وقالت..
/باهي نبي نشوفه ثواني بس قوليلهم فاتن بالله عليك..
فاتن هزت راسها بالموافقه وهي تقول..
/حاضر حبيبتي تو نكلمهم توا..ومشت وهي تقول بهمس..
/شن درت فيهم بس!..
وامينه جت لصابرين وهي تقول..
/اهدي ياحبيبتي خلاص اطمنا عليه..
صابرين ضمتها وهي تقول ببكي..
/قالي جيتك لأخر مرة..اخر مرة ياأمينه..حسيت روحي خدوها مني..
امينه زادت ضمتها بألم وهي تقول..
/بعد الشر عليكوا ياحبايبي..
🍃🍃🍃🍃
وبعد الشر...
بعد الشر عن الناس الطيبه المسالمه اللي ماتبي شي غير انها تعيش مستورة وفي سلام..
لكن مع الاسف..الناس هادي بالذات اصحاب الشر والنفوس الخبيثه مايخلوهمش في حالهم..
🍃🍃
خشت ع اختها للدار..لقتها مشغله اغاني حب حزينه وراقده ع سريرها تسمع فيهم وهي تبكي..
قعمزت قريبه عليها وقالت..
/تامي ياسرك نكد نوضي..
فاطمه "بنت عمة ميار" ردت ع اختها بنبرة باكيه..
/مش مصدقه كيف نساني بسرعه هكي كيف!
:والله اسألي روحك..
ناضت قعمزت وهي تقول بإنفعال..
/بترجعي تعاودي نفس الدوة اطلعي..
؛انتي ماتبيش من يواجهك بالحق..انتي اللي ضيعتيه من يدك انتي اللي سيبتيه وبدلتيه بواحد مايسواش..
هي ببكي قالت..
/ماكنتش نحساب روحي نحبه هكي اني بنموت عليه حسي بيا بالله عليك..
:معاش ينفع الكلام هدا ياتامي..الولد حبك بنيه صافيه ودار ع خاطرك اللي مايندار وانتي لعبتي بمشاعره ودرتيله موقف حقير فوته ونساه واحد غيره كان طلعه من عيونك..كيف تبيه يرجعلك بعد اللي صار قوليلي..!
مسحت دموعها وقالت بشي من الانفعال..
/هو يبي..يبي يولي صدقيني لكن يبي يشعفني قبلها..فكري فيها كويس..ميار تعرفنا مانطيقوش صاحبتها السوريه واختها لكن عزمتهم معانا امس تعرفي علاش!؟ معز يبي هكي يبي يقهرني بهديكا الفرخه وميار تساعد فيه..
فكري زيدي فكري..حركة لما بعتلهم الطلبيه علاش دارها!!؟ امم!!قوليلي!!؟ انتي لاحظتي ميار كيف عاجبها الجو وتضحك لما هما يردوا علينا..كله انتقام صدقيني..
:باهي فرضنا كلامك صح..هدا مايعنيش انه يبيك ترجعيله..
رفعت حاجبها وقالت بتحدي.
/حنرجعه وتو تشوفي كيف...
:في حاجه في بالك!؟
ردت تقول..
/امس سمعت اخت الفرخه هديكا تقول لميار تبي تخدم..تبيها تشوفلها خدمه...خطرت ع بالي صاحبة ماما اللي عندها بوتيك في****** مش قبل صارلها موقف مع وحده سوريه في تركيا خدت منها عملاء ولاخدمه مش عارفه..المهم بعدها كرهت السوريات ومايجي منهم..
:ايه..!
بمكر قالت؛اني نبيها تفش غلها من السوريات فيها وذلها وبعدين نكمل من عندي..
:كان تندري ماما تشوفي شن دير فيك.
قالتلها:مش حتعرف كان انتي ماقلتيش مش حتعرف..
:باهي اني معاك في اللي بديريه اصلا مش طايقتها لاهي ولااختها ومش متقبله فكرة ان اشكال زي هادم يخشوا العيله..
فاطمه بإبتسامة مكر..
/اني بنهججهم من ليبيا كلها ومعاش نخليهم يخشوها مرة تانيه...
🍃🍃🍃🍃
"اخر مرة تخليني نحرج البنات هكي"
معز:علاش مكبرتيها هكي عادي راهو..
ميار:لامش عادي بنات عمتك وعمك ماهنوش لساناتهم قعدوا طول الوقت يلقحوا ويسمعوا فيهم كلام مستفز..
عقد حواجبه وقال..
/شن قالوا!؟
ميار:كلام تافه وسخيف تعرفهم انت سطحيات ورافعات خشومهم ع الفاضي..
ضيق عيونه وهو يفكر بعدين قال..
/مش عارف علاش حاس ان اللي اسمها فاطمه ليها يد في قلبة لبانه عليا..
ميار:حتى اني حسيت هكي لكن ع قد مادرنا في لبانه اني واختها ماتبيش تقول شن غيرها عليك هكي..
سكت شويه وهو يفكر بعدين قال..
/اني تو نعرف بروحي..خدي منها طاسة النسكافيه متاعها وطلع...
ميار بصدمه:هييه جيب جاي خيرلك!..
ومشت بسرعه طلعت وراه من الكوجينه..
🍃🍃🍃🍃🍃
واقفه ع شباك غرفة العنايه وهي تشوف في حالته من بعد الحادث وتبكي..
تتفكر في حديثهم الاخير وكلامه بصوته قاعد يتردد ع مسامعها وقلبها اللي يحبه..
《صدقيني مش حتلقي بنادم في الدنيا يحبك زي مااني حبيتك..هدا علاش رضيت بالامر الواقع بش نشوفك عايشه مرتاحه وسعيده بس..معاش نبي شي تاني غير هكي..》
ردت عليه في نفسها وهي تقول..
"حتى اني كنت نبيك تعيش سعيد مع وحده خير مني تستاهلك..ماكنتش نبيك توصل لهني ماكنتش نبيك تنضر بسببي ياروحي انتي"..
غطت وجهها بإيديها وقعدت تبكي بألم..
وبعيد عنها بشويه فاتن وامينه يشوفولها بحزن..
🍃🍃🍃🍃
قعدوا في صالة الانتظار..
صابرين قالت لفاتن..
/خبرتي حد؟
فاتن؛لتوا لا..
صابرين:احسن خلي يولي حاله باهي قبل..
امينه؛بس استاذ مختار لازم يعرف..
صابرين:هو برا البلاد ومازال عنده خدمه نقولوله مافي شي مهم نشغلوك بيه عن خدمتك..
فاتن:حتى اني هدا رأيي مختار مش حيتحمل يشوف رضا في هالحاله خل يولي حاله كويس زي ماقالت صابرين بعدين نخبره..
امينه؛اللي تشوفوه..
فاتن؛في مطعم قريب من هني نمشوا ناكلوا اي حاجه ونولوا..
صابرين:اني ماعندي نيه في شي بروا انتم..
فاتن؛صابرين مايجيش هكي تبي تمرضي!!؟
صابرين بضيق:بالله ماتصريش عليا..
امينه؛انتي عاوزاه يقوم يلاقيكي تعبانه وهفتانه كدا..تعرفي قد ايه بيخاف ع صحتك..
شافت صابرين لأميمه بحزن ودموعها نزلوا..مسحتهم بعدين هزت راسها وقالت..
/باهي نوضوا..لكن هاه مش معطلين..
ناضت فاتن وهي تقول بإبتسامه..
/حاضر ياستي.. وناضوا امينه وصابرين معاها ومشوا مع بعض..
🍃جي اتصال لصابرين وهي ماشيه..لما شافت المتصل طمست الصوت ورداته للشنطه..وهي تسكر فيها شافت للدبله..بعدين حولتها ودستها في الشنطه وسكرت عليها..
🍃🍃🍃🍃
طلقت شعرها وهي تقول..
/قلت مدام في عندي وقت فراغ خل نستغله والقرش اللي يخش يخش..
خدت شيشة صغيرة من ع الزيانه فيها زيت حطت منها شويه ع اطراف اصابعها دهنتهم..ونزلت راسها لتحت وقعدت دلك في فروة راسها..
وبنتها تتفرج عليها وهي حاطه صبعها في فمها..
اريج:باهي عادي لو خشيت معاك!؟
طوبى:وين المشكله بتقري بنات وهما اللي بيجوك للحوش..
اريج قعدت ساكته وهي تفكر..
رفعت طوبى راسها  وشعرها نزل عليها..
فجأه سمعت ضحكت جنه..شافتلها وقالت بضحكه..
/عجباتك..
نزلت راسها مرة تانيه وقعدت تحرك في شعرها وجنه تضحك..
رفعاته مرة تانيه وهي تقول..
/تيي..
وجنة تضحك بالصوت..
اريج بضحكه:نجيها ياربي..شافت لشعر طوبى وقالت..الله يبارك ع شعرك زاد طول وكثر الله يبارك..
طوبى:الحمد لله مع العلاج والاهتمام والرقيه تحسن هلبه ومعاش زاد الشيب..
اريج: كويس الحمد لله..باهي شن هو الزيت اللي درتيه توا..
طوبى وهي تلم في شعرها..
/هدا ياحنه زيوت مخلطه لافندر وجوز هند..كويسات لكل انواع الشعر وفروة الراس...
☘وقعدت طوبى تحكي بحماس ع فوائد الزيت واريج تسمع وهي تتأمل فيها..لاحظت انها قاعده تبذل في جهد بش تتعافى وتتعايش مع وضعها الحالي برضا تام..
وكأنها تحارب في اي شعور بالنقص ممكن تحسه..تبي تكون مكتفيه تماما بنفسها وعيلتها...
🍃مش ساهل..بل صعب جدا..بالذات ع مراة في عمر طوبى قاعده في بداية شبابها..اكيد حتكون مفتقده لهلبه اشياء ومشاعر تحتاج تشبعهم...مشاعر خلقنا الله سبحانه وتعالى بيهم وهما جزء لايتجزأ من طبيعتنا مانقدروش نتجاهلوهم ولانستغنوا عنهم...
🍃🍃🍃🍃🍃
"من بكرا بنرد للعمل وعندي غيره مشاغل تانيه "
هدا عبد القيوم يكلم في عمه هاتفيا..
"ربي يساعدك وييسر امرك..ياريت فيها كيف طقيت فينا ولاطقينا فيك"
عبد القيوم؛ادعي ربي يهديهم و تحز هالحرب..
"هذى اللي عندنا الدعاء ليل نهار ندعوا ربي ينجي الابرياء ويهدي النفوس"..
عبد القيوم:آمين..انتم اموركم تمام غادي؟!
"الحمد لله الوضع مستقر"
عبد القيوم؛الحمد لله..
"المهم انت افطن لروحك وكان نقصاتك شي حاجه قول طوالي"
عبد القيوم بإبتسامه..
/حاضر ياعمي حاضر..
"ايه حق نسيت نقولك صاحبك عبد الله يسلم عليك.."
عبد القيوم بضحكه..
/رد من مصر؟
"جا زيارة لهله..جانا هنا وسأل عنك وقال سلملي ع الطير المهاجر".
ضحك وقال:الله يسلمه..وصله سلامي وعطيه رقمي.
"ان شاء الله ان شاء الله..سلم ع اللي عندك وعيد عليهم..ارالساغت"
عبد القيوم؛ارالساغت.."مع السلامه"
نزل تليفونه بعد مانهي عمه المكالمه..
حطه جنبه وخدي اللاب توب حطه ع رجليه ورجع يشوف في خريطة الحوش اللي يخدمله في الكهرباء..
🍃🍃🍃🍃
حطتله فنجان القهوة وولت لطنجرة الغدي وهي تقول..
زينب:ايمان قريب عفست فيك..
ع خشة ايمان عليهم وهي تقول..
/دايرة روحك شيخه وتقرمي!..
زينب:قعمزي واسكتي..
قعمزت ايمان مقابله خوها وقالت..
/تو اني حكيتلك اللي صار بالتفصيل حسيتني درت حاجه غلط!؟
عدي بإبتسامه..
/ع كلام زينب لبزتي شويه في الدوة..
ايمان؛اني بلعاني نستفز فيها بش نشوف شن يطلع منها..مش يقولوا يستفزونك ليخرجوا اسوأ مافيك اني كنت  نبي نشوفها ع حقيقتها..
زينب بتهكم؛وشفتي حقيقتها شن شكلها ترا!؟
ايمان؛الحق تبان مراة عاقله واكبر من عمرها..لكن تجربتها الاولى معقدتها شويه..
زينب:المراة مالهاش سته شهور مطلقه..
عدي:مش مهم حتى اني معقد من الزواج نتفاهموا...
ايمان بتعجب:اووو
زينب بضحكه؛الموضوع معشش في راسك مش غير خير خاش..
هو ابتسم وخدي فنجان القهوة ورشف منه..
ايمان؛خلاص افتحي معاها الموضوع..
عدي نزل الفنجان وقال..
/لا..
شافوله بإستغراب..
عدي:نبيها تقتنع بيا قبل..
زينب:وكيف بديرها هادي!؟
عدي:مش شورك خلاص انتم اطلعوا منها.
زينب:عارفاتك عاقل وراجل بمعنى الكلمه هدا علاش مش خايفه منك..
ايمان؛ماتصدقهاش قالت هكي لأنها خافت.
زينب:انتي خيرك ماتسكتيش!؟
هو بضحكه قال..
/نوض نقعمز حدا امي خيرلي..وخدي فنجان القهوة وطلع من حداهم..
زينب بقلق:ان شاء الله مايحشمنيش معاها..
ايمان؛حي عليك زينب خيرك! هدا عدي راهو..اني عارفاته في شن يفكر..
زينب:شني؟!..
ايمان:اقرب طريق لقلب طوبى ماليها..
عقدت زينب حواجبها بإستغراب..
ايمان بضحكه:تو نفهمك...
🍃فعلا بنات الواعر عندهم ارتباط قوي جدا بعيلتهم..بالذات طوبى اللي من لما ولى حوش بوها ملكها وهي حريصه ع ان اللمة والعزايم والمناسبات يكونوا فيه..مافي حد من العيله  يمنعه شي عنه...بس ياترا هل حب عيلة الواعر حيكون هو تأشيرة دخول عدي لحياة طوبى!!؟
🍃🍃🍃
تأشيرة دخول سميرة لقلوب افراد عيلة راجلها كانت الكلمه الطيبه والضحكه..
سميره حتى وهي عايشه حزنها ع خوها كانت تبتسم وتضحك في وجوههم وتملى الحوش بهجه..خلتهم يحبوا يروحوله بعد ماكانوا يهربوا منه...اليومين اللي عدوا عليهم وهي مش فيه حسوا بفراغ رهيب كبار وصغار..الوحيده اللي ارتاحت منها مغليه..
بس اليوم روح بيها راجلها من الصبح..
وين فاقوا الصغار وشافوها طاروا من فرحتهم..
وسدره نزلت طول مش شقتهم ومشتلها بشوق عارم..
وين خشت لحضنها بكت غصب عنها وخلت سميره دمع معاها..
سميره نفسها تعودت عليهم وحبتهم وحست في بعدها عنهم انها حياتها ناقصة هلبه بدونهم..
☘☘☘
فطرتهم..وضمت الحوش وجوري وسدرة يعاونوا فيها..
بعدين خشوا معاها كلهم للكوجينه وقعمزوا حداها وهي دير في الغدي وهما يهدرزوا عليها..
☘نزل نضال من داره بعد ما فاق من نومه هنيه بدت من بعد صلاة الفجر ...
شم ريحة تطييبها..خش للكوجينه وهو يقول بفرحه..
/مرحبتين مرحبا..مرحبتين بعد جيتينا..
ضحكوا..
نضال بضحكه:شن جو؟.
سميره بإبتسامه:بشوفتكم حلو..انت شن جوك؟
نضال:تمام..وتوا ولى تمام التمام..وقعمز جنب معاذ اللي كان ياكل في الكيكه..
سميره:شويه ونديرلك حاجه تاكلها..
نضال:بالله دحي مقلي..
سميره بضحكه:حاضر..
ع خشة مغليه وجهت طول كلامها لنضال..
/باهي اللي نضت ياسيدي.
نضال بضحكه ارتباك..
/صباح الفل ع ست الكل..
مغليه:غصب عن اللي يبي واللي مايبيش .
سميره شدت ضحكتها..
والبنات يشوفولها..
مغليه:اليوم بيجوني الجيران يعيدوا عليا..
نضال:نعرفه شن يبي اجتماع  الختايره..حاضر يام كله من الاف للباء يكون عندك بعد الظهر..
جوري:من الالف للياء مش الباء..
نضال:ع قد بساطي ياسمحه اني بساطي يتفرش من الالف للباء..
مغليه:خود من بوك الفلوس ع قلبه زي الهم اللي حطه ع قلبي..
ومشت طلعت من الكوجينه..
نضال:ربي يهديها وخلاص..
سميره التفتت وقالت بضحكه..
/تبي هريسه؟
نضال:لاسادني هريسه جيبها حاف حتى طماطم لا..
ضحكوا عليه..
وهو شاف لولد خوه..
/قاعد ماكملتهاش!؟عطيني نتشه ياسفتول..
🍃🍃🍃🍃🍃
في الكوجينه تغسل في ماعين الغدي الدور كان عليها..
طول الوقت وهي بروحها كانت تفكر في معز وحركات معز اللي واخده قلبها..
بس وين تخطر عليها فاطمه ينغم ع قلبها وتخاف..
وتتفكر في الحديث اللي صار بينهم قبل فترة طويله من العام اللي فات في لمة جياب اخت ميار..
كانت وقتها واقفه ع مراية الممر تعدل في شعرها..
وتستفرد بيها فاطمه...
🔺️🔺️🔺️في وقت سابق🔺️🔺️🔺️
فاطمه بسخريه..
/كيفك ياحلوة يامنمشه..
نزلت لبانه يدها عن شعرها وهي تشوفلها بحده..
فاطمه؛ارخي عيونك حبيبتي وانتي تشوفيلي هدا اولا..تانيا نبي نقولك راني مستاقظه بالجو اللي ديري فيه بش طيحي ولد خالي..
لبانه بحده..
/احترمي حالك..معز صديق مو اكثر من هيك..
فاطمه؛فوتيه ع غيري..بعدين ياروحي انتي هني في ليبيا حني ناس محافظه مش دايرين ع حل شعرنا..
لبانه بغضب ودموعها في عيونها..
/لولا اني عامله خاطر لميار واهلها كنت وريجتك قيمتك وحده بلاادب..
فاطمه:اللي بلا ادب اللي تتلصق ع الرجاله زيك توا..تبي تصطادي عريس ياحلوة بري شوفي جماعة **** هادم بس اللي يرضوا بيك مش ولاد الناس..
شدت لبانه دموعها بقوة وجت بتمشي وتخليها خوف من انها تبكي قدامها او يفلتوا اعصابها وتضربها..
هي شدتها بقوة من ذراعها وقال..
/فوتي معز خير مانهججكم منها..
وطلقتها بقوة بعدين مشت وخلتها...
🔺️🔺️🔺️في الوقت الحاضر🔺️🔺️🔺️
لبانه ودموعها في عيونها..
/الله لايسامح اللي خلانا نسكت ع الذل والأهانه..
🍃كملت شغلها في الكوجينه..
وطلعت للدار..
لما خشت لقت اختها غارقه في النوم..
مشت تمددت ع فراشها وخدت تليفونها وخشت ع الفيس..
قعدت تتصفح بملل..
لعند ماجتها رساله ع الماسنجر..
خشت شافتها لقت معز باعتلها مقطع فيديو..
ماقدرتش تمنع نفسها من انها تفتحه ..
فتحاته..وبدت تسمع في اغنيه "بدأت بضحكه صغيره" التركيه اللي كان مركبها ع صور رحلة داروها زمان للبدة..
غادي كان اول لقاء ليهم...
تفكرت هديكا الأيام ولاإردايا ارتسمت ع وجهها ابتسامه حلوة..وقلبها تفاعل مع المشاعر الحلوة اللي حست بيها..
تم الفيديو..لكن الشعور الحلو اللي حست بيه استمر مع الذكريات الحلوة اللي كانت تشوف فيهم قدامها..
بعتلها رسالة..
شافتها طول..
(فاطمه قالتلك شي!؟)
هي اتفاجئت وماعرفتش بشن ترد عليه..
بعتلها..
(ردي..صارت دوة بينك وبين فاطمه)
فكرت شويه بعدين بعتت..
(الباين انها بتحبك)
بدي يكتب وهي تراجي في رده لين وصلها..
(اسمعي بنتصل بيك توا ضروري تردي عليا ارجوك)
تنهدت وبدت تكتب وبعتتله..
(OK)
عدوا بضع ثواني واتصل بيها..
فتحت الخط وردت..
/مرحبا..
"اهلين لبونتي شن جو"
لبانه:شو بدك تقول..
"تمام من غير مقدمات..اني كنت نبي فاطمه زمان"
فتحت عيونها ع وسعهم بصدمه وقالت.
/كيف!!؟
"تو نوضحلك..اني وياها كان في بينا علاقه وكانت صافيه وجديه بنت عمتي اكيد مانضيعش معاها في الوقت..لكن هي طلعت هكي ضيع معاي في الوقت لما خطبتها رسمي رفضتني..
قاطعاته وقال بصدمه..
/مااحقرك!!؟ عم تنتقم منها فيني..يعني كل اللي عم تعملوا معي مشان تغيظا!؟ لهيك ميار مبارح عزمتنا وهي بتعرف ان بنات عيلتها مابيطيقونا ولابنطيقون..
"غير.. راجي شويه بالله عليك"..
قاطعاته وهي تبكي وتقول بغضب..
/الله لايوفقكن..حقراء..
وسكرت عليه وسكرت تليفونها مرة وحده..
سلافه فاقت مفجوعه وهي تقول..
/شو في!؟
لبانه وهي تبكي..
/كرهت حالي كرهت حياتي ياسلافه..
ناضت وقربتلها مسحت ع شعرها وهي تقول..
/خلص حبيبتي اهدي..خدتها في حضنها وهي تقول..ياعمري..
🍃🍃🍃🍃🍃
فتح عيونه..ورجع غمضهم..فتحتهم مرة تانيه والرؤيه قدامه بدت تتوضح شويه شويه لين ولت واضحه تماما..
لما شافها ..قال في عقله انه راقد يحلم بيها زي كل ليله..بس بعدين تفكر اخر حاجه صارت معاه الحادث اللي داره بالقصد..او محاولة انتحار..
"رضا"..
تأكد ان اللي هو فيه واقع مش حلم..
صابرين بقلق..
/رضا..تسمع فيا.؟
قعد يشوفلها بصمت..كان يقدر يتكلم..بس توا مايبيش غير يشوفها بس..
صابرين بقلق بالغ:مش قادر تتكلم؟
هو رد عليها: تؤ..
ضحكت بفرح وهي تقول..
/باهي قولي شن تحس توا؟
وعيونه يشوفوا لعيونك قال..
/بالحب..
نزلت عيونها وهي تضحك خجلا..
هو قال..
/اني في غيبوبه...ولا قاعد راقد ونحلم..؟
صابرين بإبتسامه..
/ماتدويش هلبه خلاص..
رضا:شن صار!؟..فهميني!؟
صابرين ناضت وهي تقول..
/وضعك مايسمحلكش تتكلم هلبه..
هو قال بشي من الانفعال..
/خليك...تجعد وجهه بوجع..
هي ولت قعمزت وقالت..
/خلاص خلاص..قاعده لكن اقعد ساكت ارجوك..
هز راسه بالموافقه وهو يتأمل فيها..
وهي هربت بعيونها عن حصار نظراته...
☘ ورا شباك الحجره  كانوا امينه وفاتن واقفات يتفرجوا عليهم بإنسجام..ناسيين كل شي وعايشين معاهم مشاعرهم...
🍃🍃🍃🍃
"مستحيل..ميار مابتعمل هيك مو اخلاقا"
لبانه بنبرة باكيه:طيب فسريلي اللي صار تفسير اقتنع فيه..
سلافه؛قبل مافسرلك انتي بدك تفسريلي ليش مع حكيتي عن اللي صار بينك وبين هديك الوقحه!؟
لبانه:ماكان بدي تصير مشاكل بينك وبين ميار..
سلافه؛شو ماكان مفروض حكيتي وخلتيني حطلها حد لهالتافهه..
ويرن تليفون سلافه..
مشت لفراشها وشافاته قالت..
/ميار..
فتحت الخط وردت..
/الو..
"ايوه سلافه شن جو لبونه حداك"
سلافه:ايه وعاملتلي دراما طويله عريضه.
بدت ع وجه لبانه ملامح الامتعاض وهي تشوف لأختها..
"بالله افتحي المايك"
نزلت سلافه التليفون وفتحت المايك ..
/فتحتوا..
"لبانه ياهبله اسمعي..فاطمه بنت عمتي هادي بنت تافهه وانانيه وكانت غلطة عمر خوي معز وتوا معاش تعنيله حاجه غير انها بنت عمته وبس.."
سلافه:تمادت معها بالحكي كتير ياميار..
" قصدك ع امس!؟"
سلافه:لا من مدة طويله بأسبوع ابن اختك...
"ترا بالله قوليلي شن قالتلها"
🍃وعاودت سلافه الكلام اللي سمعاته من اختها..
"والله مافايته هكي يالبانه تو ناخدلك حقك منها
لبانه فزت بخوف وهي تقول..
/لابترجاكي ماتحكي معا شي..ولاتحكي لمعز شي انا مبارح حطيته بحجما..بترجاكي ميار لاتحكي معا شي..
سلافه:ليش هيك خايفه!
لبانه؛مابدي مشاكل ووجع راس افهمي عليي..
"باهي يالبانه اني بنسكت لكن بشرط افتحي تليفونك وكلمي خوي.."
لبانه تنهدت:طيب بس مو اليوم ماني رايقه لشي..
"باهي اليوم بس لبونه باهي..ارجوك اعطي خوي فرصه راهو صادق معاك ونيته صافيه"..
لبانه:إن شاء الله خير..
"ان شاء الله..يللا سلام..ايه دقيقه دقيقه..سلافه في اجتماع للمنظمه الاسبوع الجاي قالولك عليه"
سلافه؛ايه اتصلت بأستاذه نفيسه لعيد عليها خبرتني..
"تمام نتلاقوا الاسبوع الجاي ان شاء الله..سلام.."
سلافه:سلام..نهت المكالمه وتنهدت بعدين شافت لأختها لقتها مبتسمه..ابتسمت وقالت..
/رقتي!؟
لبانه بإبتسامه..
/انبسطت مشانك رح تشوفي الاسمراني ..
ضحكت سلافه وحركت راسها يمين ويسار..بعدين ابتسمت وسرحت بتفكيرها في الاسمراني..
🍃🍃🍃🍃🍃
وبعد العصر..
يلتموا الجارات في حوش محمد شنيبه..
اغلبهم جايات من باب الفضول يبوا يشوفوا وضع الضراير مع بعض وع راسهم قناة الجزيرة فرع شارع القهوة..رقيه..
كانت مغليه كعادتها نافشه ريشها..لابسه ومتأنقه..وتمشي وتقول..
"ياارض اشتد ماحدا قدي.."
استقبلت جاراتها ودخلتهم للصاله وقعمزت تهدرز معاهم..
وخديجه بنتها في الكوجينه جايبه معاها وحده تعول ع الضيوف..
سميره وين!؟..قاعده في جناحها من بعد الغدي ماطلعتش منه...
☘☘☘
طلعت خديجه من الكوجينه للصاله وقعمزت قريبه ع امها..
وهي هالبنت لأمها في كل شي..حطت رجل ع رجل وقعدت تسأل في هادي وهديكا ع احوالهم ولازم بطريقه او بأخرى تفكر اي وحده دارت فيها جميل بجميلها..
خشت البنت بالضيافه وبدت تفرق عليهم
اول من خدي رقيه اللي كانت بتموت وتسأل عن سميره..
ولأنها ماتعرفش تصبر ع معلومه تبي تعرفها قالت..
/مغليه..
شافتلها خديجه برفعة حاجب عرفتها بتسأل عن سميره..
مغليه:نعم يارقيه..
وقبل لتسأل رقيه سؤالها..جاها الجواب لما خشت عليهم سميره..
طلتها كانت بسيطه بس طالعه حلوة حتى بدون مكياج..
طلقت السلام وبدت تسلم عليهم ..
غمضت خديجه عيونها بنفاد صبر بعدين فتحتهم..
وامها حاولت دير روحها عاديه ع قد ماتقدر لإن العيون عليها..
سلمت سميره ع الضيوف اللي عزوها..بعدين قعمزت..
رقيه:كيف جايه بنسأل عليك:شن حالك شن دايره؟
سميرة:الحمد لله ع كل حال..
رقيه:الله غالب هدا حال الدنيا.
سميرة:ايه هدا قضاء الله وقدره اللهم لااعتراض..
بأصوات متقطعه ردوا عليها..
"ايه والله...ونعم بالله"
رقيه:خل نعرفك ع نساوين الشارع وحده وحده خلاص عاد وليتي منا وفينا.
ابتسمت وهي تقول..
/ليا الشرف..
وبدت رقيه تعرف فيها ع الجيران ..
وهي منسجمه وتتعرف عليهم وتهدرز معاهم..
ومخليه خديجه وأمها ع أعصابهم..
رقيه:قعدت نجمه مش موجوده لكن اكيد تعرفيها.
سميره؛نعرفها كويس ونعم المراة..
رقيه:ايه حق ياخديج قوليلنا شن دايرات سلفاتك الضراير مع بعض..سميره متقبله الوضع عادي!؟
وطبعا هني رقيه ماتقصدش سلفات خديجه..
لكن خديجه انتهزت الفرصه كعادتها بش تمرر كلامها المسموم..
/سميره الله يخلف عليها بنت اصول مادور في شي قد راحة راجلها ورضاه ورضا حوش عيالي..
مغليه؛نجمه الله يبارك عندها حظ في الكناين..
خديجه:صدقتي يام بالذات في سميره اللي لما جاها راجلها قال بنتزوج سهلت عليه لاقالت طلقني لادارتله العار..
مغليه:مراة مقومه معاش في زيها..
سميره هني تكلمت وقالت..
/ايه والله مراة مقومة لكن في اللي زيها وخير منها..انتي يامغليه..
مغليه وخديجه قعدوا يشوفولها بإستغراب وعدم فهم..
سميره مررت نظرها ع الحاضرات وقالت..
/وين جاها محمد وقاللها بناخد يامغليه قالتله حقك عطاهولك ربي دير اللي يريحك..ومش هكي بس خلتني نسكن معاها في نفس الحوش وعطتني اكبر جناح فيه..
بجديات لاقبلها لابعدها..
نظرات نساوين الشارع كانت بين الريبه والاستغراب وهما يسمعوا في كلام سميره..
يعرفوا مغليه كويس..ويعرفوا علاقة سميره بحوش الواعر اللي هما حاليا ألد اعداء مغليه..
وسميرة مازال مكلمه تقول..
/وبعدين بيني وبينكم الراجل لما يكون كويس وواضح وعيلته ناس باهيه المراة تتحمل ع خاطرهم كل شي حتى الضرة واني عرفت نجمة وبناويتها وسمعت عن ولادها ناس الله يبارك عليهم تعيشي معاهم بقدرك واحترامك باهيه كنتي ولاعافنه..
رقيه وهي تشوف لمغليه قالت في نفسها..
"جتكم اللي تقدكم يامغليه" وبصوت مسموع كملت تقول..
/صدقتي ياوخيتي..
سميرة ابتسمت لرقيه وهي تسمع في نساوين الشارع يقولوا..
"مزبوط..كلامك صح.."
وخديجه ومغليه يغلوا غلي من الغضب وتمنوا لو يقدروا ينوضوا لسميره يشبعوها ضرب حتى الموت..
☘☘☘
وسيطرت سميرة ع اللمه وخلت النساوين ينسجموا مع حكاويها الممتعه...خلتهم يضحكوا من قلوبهم ع تعليقاتها ومايحسوش بالوقت لين آذن المغرب..عكس مغليه وبنتها اللي عدوا عليهم هالساعتين سنين..
وختمت سميرة هاللمة لما ناضت سقدت النساوين وهكي خلتهم كلهم يفهموا انها تسيدت ع الحوش  باللي فيه..
🍃سكرت باب الحوش بعد ماسقدت اخر مراة..
ولفت بتمشي لجناحها..شافت خديجه جايه بتطلع..
كانت مجهزة نفسها لإنفجارها..
لكن اللي صار ان خديجه وين جت فايته من جنبها عطتها نظرة شر وكره بدون ماتنطق كلمه وطلعت من الحوش..
هي استغربت بس ماوقفتش عندها هلبه..
بعدين شافت مغليه طالعه من الصاله ومتوجهه لدارها خشتلها وسكرتها عليها..
ضيقت سميره عيونها بشك وقالت..
/اممم...
ع طلعة جوري ومعاذ ومعاهم سدرة من دار المعيشه..
سدرة:واخيرا روحوا..
ضحكت سميرة وقدمت لمعاذ خداته ورفعاته في حضنها وقالت..
/شويه نصلي المغرب ونديرلكم كاكاو...
🍃🍃🍃🍃🍃
بعد صلاة المغرب..
في حوش طوبى الواعر..
كانت اميمه حاطه اللاب توب ع طاوله حاطيه..
وكلهم مقعمزين قدامه ويستنوا..
لحظات وجي اتصال سكايب فتحت عليه اميمه..
وبانت عليهم سدرة مقعمزة ع كرسيها وحاطه يدها تحت خدها وهي تشوفلهم بإبتسامه..
ضحكوا وقالوا مع بعض..
"سدرة..سديرة..ياعمري"..
ردت عليهم..
"كل سنة وانتم طيبين"
ردوا عليها مع بعض..
"كل عام وانتي بخير"
هي قالت..
"شن اخباركم"
مطيره:الحمد لله بنيتي حني في خيار خيرنا انتي شن حالك..
"حتى اني الحمد لله صامده وقويه..سبحانك ياربي كتبلي نحارب الانس والجن في حياتي"..
ضحكوا..
طوبى وهي تضحك ودموعها في عيونها..
/كملتي الجلسات؟
"الحمد لله..بس العلاج مازال مستمر"
فردوس؛تعبتي هلبه؟
"طبيعي بتعب لكن شاده في ربي ومتقويه بيه"
طوبى:ايوه خليك ديما هكي..
"بإذن الله..غرفه"
غرفه بإبتسامه:نعم؟
"حالك باهي امورك تمام وضعك مع راجلك كويس"
غرفه؛الحمد لله رب العالمين والله عايشه مرتاحه وماناقصتني حاجه..شافت لصغارها وقالت..اوبا هوبا..تعالوا ماما..
جوها ولادها وهما شادين العابهم..
كانوا يشوفوا للاب توب بتعجب واستغراب..
قعمزوا في حجرها وامهم قالت..
/ديروا باي لخويله..
"اللهم بارك اللهم بارك ع الصناديد"
غرفه؛هيا ديروا باي..وحركت يدها اتجاه الشاشه..
طوبى رفعت يدها للشاشه وهي تحي في سدره وتقول..
/باي..
هما شافولها بعدين قلدوها وقالوا مع بعض..
/باي.
"ياعمري..يوسف نبي نروح روحوا بيا"..
ضحكوا..
"الله يبارك عليهم ويسلمهم يارب ارقيهم ديما ياغرفه"
غرفه بإبتسامه..
/من غير ماتوصي..
"كويس..ايه فردوس وين معتز ولا مرة ريته معاكم"
حاولوا يحافظوا ع ابتسامه بقوة..
وهي قالت..
//ديما مع ولاد الشارع هدا علاش..اما اليوم مشي لحوش جده..
"اها سلميلي عليه هلبه..روجه"
اريج بإبتسامه..
/خويله..
"حبيبتي..روح راجلك عيد معاك"
كانت اريج محتاجه قوة كبيره بش ترد ع هالسؤال وهي مبتسمه بدون ماتذرف دمعه..
وهما يترقبوا في اجابتها بالذات امها..
وبكل قوة اريج حافظت ع ابتسامتها وثباتها وهي تقول..
/ايه روح..
مطيره:حتى حسين روح من اول يوم واليوم الصبح ولى..
"ربي يحفظهم ويحميهم"
ردوا بأصوات متقطعه..
"آمين"
🍃واستمر الاتصال بضع دقائق نهوا بعده المكالمه وهما مطمنين عليها وفي نفس الوقت كانوا في حيره من امرهم..
طوبى:انتم ادرى مني بيها تعرفوها كيف تبدي فينا ع نفسها لو عرفت شي صدقوني حتنهار..خلوها تكمل علاجها وتوقف ع رجليها وتروح وحتعرف كل شي..
اميمه:مافكرتيش بصدمتها بعدين؟
طوبى:حني بحداها وقتها تشوف فينا وتعرف حالنا..مش زي لما تكون بعيده صدقوني حتقعد ديما تخمم وخايفه ومعاش يولي عندها رغبه في شي..
اريج:اني مع طوبى في رايها انتم شفتوها كيف تسأل علينا شفتوها كيف سألت ع خالتي غرفه..
طوبى:فاهمه ان السحر صابها في عرس غرفه يعني تخمم فيها وخايفه عليها..
غرفه:صح طريقة سؤالها واضحه..
مطيره بإقتناع:ماعندي مانقول في كلامكم..ربي يشفيها ويردها سالمه وبعدين ساهل..
فردوس بقلق؛وين ساهل ياعمتي وين..
طوبى بقوة وثقه:إن شاء الله حني نخلوه ساهل عليها يافردوس..
ابتسمت مطيره وهي تشوفلها وقالت..
/مدام انتي وراها ماينخافش عليها..
كلهم شافوا لطوبى بإبتسامه..
طوبى بإبتسامه..
/مادام كلنا ورا بعض ماينخافش علينا يامطمط..
مطيره:هاتي خشيم يارتيله هاتي..وضمتها وباستها من خدها 
وطوبى تضحك...
🍃قوة الشخصية لا تعني التحكم بالآخرين والسيطرة عليهم
بل تعني أن يراك الناس شخص قوي متزن ويثقون بك وبأرائك واستقلاليتها.🍃
🍃🍃🍃🍃🍃
الساعه11:00ليلا..
في جناحها تحدد في حوايج راجلها..
وهو خش عليها وقال..
/يشكولي منك..
سميره بضحكه..
/خيرني العفو شن درت؟.
محمد قعمز ع السرير وقال بإبتسامه..
/اني نبي نعرف منك شن درتي..
سميره:هي شن قالتلك 
محمد؛ماقالتش اللي صار..قالتلي قوللها خليها في حالها..
سميره؛واني والله في حالي ياحميدا ماجيت جنب حد..
خطت المكواة ع تركينه وقالت..توا الجيران اللي جو اليوم مش جيراني حتى اني!..عيب يجوا ومانطلعش ولا؟
محمد؛باهي بعد طلعتي شن صار؟
سميرة:شي قعمزنا هدرزنا هدرزة قنينه ووالله والله شكرتها وقريب قلت فيها شعر..
محمد بضحكه؛هني مربط الفرس..شن قلتي..
سميره؛ انشدها شن قلت عليها..
محمد:معاش تذكريها لابخير لابشر وفكيني من صداعها.
سميرة؛سلامتك ياغالي من الصداع..حاضر ياعيوني اللي تبيه اني فيه المهم راحتك..
قعد يضحك..
وهي خدت المكواة وكملت شغلها وابتسامتها ع وجهها..
🍃🍃🍃🍃🍃
"مرتاح كدا ياحبيبي"
رضا:ايه..وين صابرين؟
امينه:زمانهم ع وصول..
رضا تنهد وغير نظره للسقف الحجرة وسرح بتفكيره..
امينه بضيق:انت كنت عاوز تموت نفسك مش كدا؟
بدت ع وجهه ملامح الحزن..
امينه؛ليه مش عايز تنسى ياحبيبي وتعيش حياتك..استاذ مختار عمل اللي فيه مصلحتكم..
رضا:وينها مصلحتنا ياامينه تشوفي فيها!؟.
امينه؛يابني الحب مش كل حاجه..ده انت كل مابتتعصب منها تعايرها..كنت بتراقبها وتمشي وراها في كل حته لأن ماعندكش ثقه فيها...بالشكل ده مش حترتاحوا مع بعض ولاتقدروا تكملوا..هو شايف كل ده وعارفوا..شايف انك تستاهل وحده زي الست ياسمين وهي تستاهل واحد يحبها ويقدرها ومايهموش ماضيها
غير نظره لأمينه وقال..
/انت مش فاهمه شي ولاهو فاهم شي...امينه اني وليت مش قادر نتنفس من غيرها..مستوعبه! ياسمين عمري ماحسيت بيها ولاعبتلي عيني رغم كل المميزات اللي فيها..وهداكا مش حيقدر يخليها تحبه ولا هو يقدر يحبها ربع الحب اللي في قلبي ليها..اني اصلا هكي ولاهكي بنسيب ياسمين مانقدرش نكمل معاها وقلبي مع غيرها حنتعبها معاي
امينه:دلوقتي يابني بعد ماتحدد معاد فرحكم!؟
رضا:توا خير من بعدين..
ويدق باب الحجرة..
بلهفه غير نظره ليه وهو يراجي في خشتها..
انفتح الباب وخشت فاتن وهي تسلم..
وصابرين خشت بعدها..شافتله بإبتسامه حلوة بالمرة..
ضاع معاها..
فاتن؛شن حالك توا..
تنهد وشاف لفاتن وهو يقول..
/احسن حال..
فاتن بإبتسامه:باهي الحمد لله ع سلامتك..
هو قال:الله يسلمك..
فاتن؛يللا امينه؟!
ناضت امينه وهي تقول..
/يللا..شافت لرضا وقالت..حمد لله ع سلامتك ياحبيبي..طبطبت ع يده ومشت للباب وهي تقول..
/تصبحوا على خير..
ردوا عليها رضا وصابرين..
/وانتي من اهله..
ابتسمت فاتن وهي تحي فيهم بيدها وقالت..
/Good naigth..
ومشت طلعت من الحجرة وسكرت الباب..
التفتت صابرين لرضا..لقاته يشوفلها..
ابتسمت وقعمزت ع الكرسي وقالت..
/كيف درت الحادث؟
احتفظ بصمته وهو يتأمل فيها.
صابرين؛جيت بتنتحر ولا؟
ومازال ع حاله حتى بتعابير وجهه ماردش 
صابرين:باهي انت مافكرتش فيا لو صار فيك شي شن يصير فيا اني بعدين..
رضا:كان نهمك من الاول ماتخلنيش..
صابرين بإنزعاج:ميت في راسك حمار..
رضا:هذا الحق..
تنهدت وقالت..
/باهي شن رايك اني ليلة امس قررت نكون معاك ويصير اللي يصير..
بدت ع وجهه ملامح الدهشه..
ابتسمت وهزت راسها تأكيدا لكلامها..
ضحك وتوجع في نفس الوقت..
صابرين بقلق:خيرك!؟
رضا خدي نفس وزفر..ورجع توجع مرة تانيه بعدين قال..
/فوتي مادوريش مش حاس بيه بكل..عاودي مرة تانيه شن قلتي..
هي بضحكه؛قتلك..بنهرب معاك ونكون ليك انت وبس ويصير اللي يصير..ابتسمت وقالت..حتى لو متت المهم نموت واني جنبك..
ضحك من قلبه وتجاهل وجعه من فرحته ولمعة الدموع بانت في عيونه وهو يقول..
/نحبك..نحبك نموت فيك..
صابرين بضحكه..
/حتى اني..
ابتسم وقال:حتى انتي شني قولي توا..
🍃في نفس الوقت..
بعد ماركبوا فاتن وامينه السيارة..
شغلتها فاتن وجت بتتحرك..لكن تراجعت لما شافت سيارة مختار خاشه للمستشفى..
قعدت معاها بعيونها لين درست..
بعدين نزل منها السواق ومشي فتح الباب الخلفي..وينزل مختار..
امينه اللي ركزت عليها وين تشوف لما شافت مختار قالت بصدمه..
/يانهار اسود!..
فاتن وهي تشوف لمختار خاش للمستشفى قالت لأمينه..
/كلمي صابرين بسرعه..
قامت امينه التليفون وهي ترجف من الخوف..
حطت ع رقم صابرين واتصلت بيها..
🍃رضا؛غاوية عذابي يامراة انتي...
صابرين بضحكه؛مش هكي بس مش عارفه علاش متحشمه نقولها..
حط يده ع مكان الجرح وهو يضحك..
ويرن تليفون صابرين..طلعاته من الشنطه وشافاته قالت.
/امينه..
رضا؛فوتيها متاع النكد هادي..
🍃امينه بخوف..
/ردي ياصابرين ردي.
تأففت فاتن بخوف وعصبيه..
🍃🍃🍃
وينفتح باب المصعد ويطلع منه مختار..
ويمشي بإتجاه القسم اللي قاعد فيه رضا..
وصل فيه..وخشله..وقعد يدور ع رقم الغرفه اللي قاعد فيها رضا لين لقاها..
ووين جي بيفتح الباب عقد حواجبه لما سمع اصوات هدرزة خلاته واقف في مكانه..

#الأوركيد_الأبيض
#طوبى

....يتبع....