طوبى ☕شارع القهوة☕

الجزء السادس والستين

#طوبى "جنة طوبى"
#جمان_فريد
#الجزء_السادس_والستين"إنتفاضة الأقحوان4"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 فضحتهم بقع الصدأ ..
أولئك الذين أقنعونا بأنهم من ذهب.🍃
------------------------------------------------------------------------------
ماشي بإتجاه مكتبه بسرعه..
فات من قدام السكرتيره من غير مايلقي عليها التحيه..
هي استغربت ولاحظت عليه العصبيه..
وتأكدت لما خش للمكتب وسكر الباب بقوة..
في مكتبه..
قعمز وطلع تليفونه من جيب جاكيته..وخش ع سجل المكالمات..
حط ع رقم اخته واتصل بيها..
نادى مرتين وانفتح الخط..
"ايوه جالي"
الجالي بحده؛كلمتي الزفته هديكا امس قلتليها تجي الشركه؟
"ايه قلتلها..لكن اسمع خلي معاك شهود وانت ترمي عليها فاليمين"
الجالي:مش محتاج من يوقظني..
وسكر ع اخته وحط التليفون ع الطاوله وهو يشوف في الفراغ بغضب وقعد يمسح ع لحيته اكثر من مرة من العصبيه..
🍃ونجاة كانت تبي تقهره اكثر..
لهدا قررت تفوته وماتمشيش للشركه ولهت روحها بالشغل في مكتبها بعد ماحست انها حققت انتصار كبير الليله اللي فاتت.
☘☘☘☘☘☘
الساعه 1:00ظهرا..
مروح من المدرسه مع خوه وواحد من صحابه يسكن في نفس الشارع..
كان كلامهم ع الكورة وكله تحليل لمباراة في وحده من الدوريات الأجنبيه..
قدامهم بنات جيرانهم مروحات مع بعض..
هو مرة مرة يشوف لوحده منهم بالذات وين يجوا فايتين من جنب مجموعه شباب..
ويقعد هالحال لين يخشوا الشارع..
ولما يوصلوا البنات لحوشهم..
هي تخلي خواتها يخشوا قبلها وهي تقعد اخر وحده..
تشوفله لما وهي تبعتله في ابتسامه حلوة..
وهو يردها بدون مايخلي اللي حواليه يلاحظوا..
🍃محمد؛تمام نشوفك بعدين..
؛تم..اوينا..
ومشي ولد جيرانهم..
يزن:تعرف محمد خاطري نزور قبر امي..
محمد وهو يخفي غصته في قلبه وين تجي سيرتها:متفقين حني وبوي ع جمعه وحده كل شهر..
يزن بضيق:هلبه والله هلبه..
محمد تنهد بضيق وقال؛بوي غدوة ماشي مع صحابه للبر وبيقعد للسبت..
يزن؛نقولوا لنضال يرفعنا..
حط محمد يده ع رقبة خوه من الخلف بعدين هز راسه وقال:باهي..تعال نخشوا..
ومشوا الزوز خشوا للحوش...
🍃ع جية سيارة آلاء..
كانت فيها مع طوبى...وصلوا للحوش..
نزلت آلاء فتحت الباب بعدين دخلت السيارة..
☘نزلت طوبى من السيارة ومشت بتخش للحوش من جهة باب الكوجينه..
والاء نزلت من السيارة زوز كياس وبوكس حلو..
ولحقتها..
☘خشت طوبى للكوجينه لقت فيها فردوس تحط في اخر لمساتها ع طاجين الدجاج..
قالت:السلام عليكم.
فردوس وهي مشغوله:وعليكم السلام..شني جاوبتي؟
طوبى:الحمد لله..عطيك الصحه..
فردوس:سلمك..
جبدت طوبى كرسي وقعمزت وحطت شنطتها جنبها..
ع خشة الاء وهي مبتسمه بسعاده وقالت:ماما..
التفتت فردوس شبحتلها وشافت الحاجات اللي جايبتهم قالت؛انباعوا؟
حطت بوكس الحلو وقالت؛كلهم وهدا الحلوان.
ابتسمت طوبى..
فردوس بإبتسامه؛الله يبارك..شن خديتي تاني..
الاء؛حاجات ع الماشي..ومشت طول طلعت من الكوجينه..
فردوس:كسرتهم ع الدوة الفاضيه.
ضحكت طوبى ضحكه خفيفه..
فردوس وهي تشوفلها بإبتسامه؛خشي بدلي حوايجك وصلي الظهر وقعمزي مع غرفه تو نديرلكم صفيره متكمه..
طوبى بضحكه؛ايه ديري جنونتي جعانه..
وناضت خدت شنطتها وطلعت وهي تضحك..
وفردوس معاها بعيونها..
بعد ماطلعت اختفت ابتسامتها ودعت من الحسرة ع اختها..
يورينا فيهم يوم ياحي ياقيوم..
🍃وفي الدار اللي مقعمزه فيها غرفه..
الاء وهي طارحه بلوزه قدامها قالت؛هادي ب75..
غرفه؛مش عاديه مش خساره فيها..
الاء:والوشاحات اللي قدامك الواحد منهم ب30 مش حاجه كبيره..بس الشنطه هي الحاجه الصح ب100 بعد الماكسه..
غرفه بضحكه:تعلمتي من اريج..
الاء بضحكه؛كيف مايجيك الزمان تعالا يقولوا..
ع خشة امها عليهم قالت..
طبعا ع شني يمشوا الفلوس عندك انتي..
ناضت الاء وقالت؛يامظلوم معاك الله..
ومدتلها فلوس وهي تقول65 جني بحالهم خليتهملك..
امها؛قصدك هدا ماقعدلك؟
الاء:غير خودي ياماما..
فردوس خدتهم وهي تقول؛خير من بلاش..
مررت نظرها ع الدبش بعدين حركت راسها يمين ويسار ومشت..
غرفه:حق هدا ماقعدلك.
الاء:كلهم ع بعضهم 300..
غرفه؛باهي كيف بديري في الطلبيات التانيات منين بتجيبي حق المواد..
الاء؛تو نتصرف..
غرفه؛اني تو نعطيك.
ابتسمت بفرح وقالت؛حقه!؟
غرفه؛مالا كذب!؟ صاحب عبد الرؤوف اليوم بيجيب فلوس المحلات تو نعطيك منهم..
الاء بضحكه؛تبي الحق امس سمعتك تدوي عليهم قلت خلاص ناخد منها هي..
قعدت تضحك غرفه..
مشت الاء تلم في الحوايج وهي تقول..
دوم الضحكه روفي..
هدت غرفه ضحك وقال؛اني هني نضحك وهو غادي مش عارفه شن صاير فيه..وحطت ايديها ع وجهها وقعدت تبكي..
وآلاء جنبها تشوفلها بحزن..
🍃ومن غرفه اللي افرجت عن دموعها قدام بنت اختها..
لطوبى اللي كانت في الحمام تبكي بألم وصوت مية الدوش مغطي ع صوت بكاها..
ومن لحظه بكاء وحزن..لوقت كله هدوء..
لوقت تخفيف من رب العالمين..
وهدا اللي عاشوه غرفه طوبى وهما مقعمزات ع السفره اللي دارتهالهم فردوس بش ياكلوا هما والارواح اللي قاعده تكبر في داخلهم..
وحداهم عمتهم مطيره تهدرز بعد ماروحت من مشوار قضاته..
مطيره؛رمضان مازال عليه شهر بس وحني نبدوا من توا نديروا البسيسه..والطعميه والهريسه بعدين..
فردوس:كلهم بينباعوا هكي ولافي محلات؟
مطيره:الهريسه تفاهمت اني وصاحب في ***** هو بياخدها قال اللي درتها المرة اللي فاتت باعها كلها وجاه عليها طلب..
الاء:زي كيكاتي..
مطيره بإبتسامه تعجب:الله!..
فردوس:معناها مفروض نبدوا طول ناخدوا بضاعة البسيسه حسب الطلبيات اللي بنبيعوها ...
الاء؛تبوا اعلان ماما بش تحصلوا زباين..
غرفه؛صح..
وطوبى تسمع في حديثهم وهي تفكر..
مطيره:باهي من بيديره؟
الاء؛قولوا لأريج ديرلكم عندها صفحه ع انستقرام فيها هلبه متابعين..
مطيره؛وينها هي؟
فردوس؛ماشيه تجيب معتز..
طوبى وهي متفاجئه:مروح؟
فردوس بضيق؛لا جاي يقعد للجمعه وبيروح..
كلهم شافوا لفردوس بضيق..
بعدين طوبى غيرت الموضوع لما قالت؛باهي بنقوللكم ع حاجه خطرت في بالي وانتم تتكلموا توا..
كلهم انتبهوا معاها..
ومطيره قالت؛شن اللي خطر في بالك؟
طوبى:القهوة متاعنا علاش مادخلوها في المشروع متاعكم؟..تشوفوا في وضعها كيف ولى بالهون..
غرفه؛احني اللي طيح سوق قهوتنا قهوة عيت شنيبه الحق المرة اللي فاتت ذقتها لقيتها مختلفه عن متاعنا وخير منها بهلبه..
مطيره بحسره؛الله يرحم ايام كانت تجيب في الناس من كل مكان فيك ياليبيا تي شن قهوة عيت شنيبه جنب قهوتنا ولا حاجه..
طوبى تسمع في كلامهم ودمها يغلي ويفور..
غرفه بضيق: ماحال يدوم..
سكتوا شويه وهما يفكروا في حالهم..
بعدين مطيره قالت؛المهم توا خلونا في موضوعنا..
وقعدوا يتناقشوا بخصوص مشروعهم الجديد..
وطوبى بعقلها مش معاهم....
🍃🍃🍃🍃🍃
"مشيت وقالولي ماجتش"
مغليه؛اكيد خوك قاللها معاش تمشي..
نسرين؛ممكن..
وهما يهدرزوا..
كانت حداهم راما مقعمزه لاهيه بتليفونها بعدين فجأه فزت وهي تقول..
حي!! شوفوا دنيا شن منزله..
مغليه؛من دنيا؟
نسرين بنرفزة:بنت خوك يام من دنيا يعني..ترا وريني راما..
مشت طول لخالتها وعطتها التليفون..
خداته نسرين وقعدت تقرا في سرها..
مغليه؛قولي شن كاتبه؟
نسرين بضيق:دوة فاضيه..
راما؛تدعي عليكم حنينه..
مغليه بفزع:دعوتها تفقشها إن شاء الله..ترا هاتي نشوف..
مدت نسرين التليفون لراما وهي تفنص وتقول:بري للدار تلقي الكيسه اللي تبيها امك خوديها وروحي..
خدت راما التليفون وقالت وهي مش عاجبها؛باهي..
ومشت طلعت من حداهم ونسرين معاها بعيونها وهي مستغربه في تغير اطباعها اللي بادي يبان هلبه الفترة الاخيره..
غيرت عيونها لأمها لما سمعتها تقول؛اسمعي هييه..
نسرين؛نعم!
مغليه؛افتحيلي الفيس حتى اني..
نسرين بتعجب؛كيف!؟
مغليه:ايه في شن خير مني عماتك اكبر مني ودايرينه وبعدين نبي نشوف كل شي بعيوني..
نسرين:شن تحسابيه ساهل يام!؟
مغليه بكبر:الحمد لله نعرف نقرا ونكتب...
نسرين بضحكه؛مش هدا قصدي يام..اللي نقصده مش ساهل تعرفيهم كلهم شن ينزلوا ..
مغليه؛انتي غير ديريلي فيس ومادخلكش بالباقي..
نسرين بإبتسامه استسلام؛ياودي باهي..
وقربت منها وقعمزت جنبها وخدت تليفونها وبدا بعمليه فتح حساب ع الفيس لأمها مغليه..
🍃🍃🍃🍃🍃
الساعه 2:45بعد الظهر..
متجمعين ع طاولة الاكل وهما يتغدوا وفاتحين حديث..
منيه؛كله مع بعضه 900..
بوها هز راسه وقال:باهي والزراعه؟
منيه؛لابوي الزراعه قصه بروحها تكلف فوق 1000..
قاللها؛تمام تو نقوله وانتي عادي راعي انه صاحب بوك..
منيه؛عاد بوي كان صاحبك عسل ماتلحساش كله..
جميله؛عندها الحق المركز ولى لصحابك ومعارفك وفي قولة راعي ونقصي شن ربحت منها..
بوها ضحك وقال؛ياجاحده لولا صحابي ماجاك حد.
منيه فنصت وهي تقول؛نعم!!؟
جميله قعدت تضحك..
منيه وهي تشوفلها:تضحكي يام!
جميله بضحكه؛ماقال الا الحق صحاب بوك هما اللي جابولك الزباين..
منيه غيرت عيونها عنهم وشافت لصونيتها وهي تاكل وشاده ضحكتها..
وبوها يضحك عليها..
شويه وامها قالت؛شن دايره معاك بنت اخت جارتنا؟
منيه بحماس؛هديه من ربي هالبنت يام شاطره وفالحه وعارفه شغلها كويس مريحتني ع الاخر..ضحكت وقالت..الدكتور اللي يخدم الفتره الصباحيه قداش ليه يتحايل يبيها بش نخليها تخدم معاه..
بوها؛بنت اخت مني من جيرانا..
جميله وهي تحاول تخفي ضيقها؛جارتنا اللي قدامنا..
بوها؛اها الباش مهندس..
جميله في سرها"طيح سعده":ايه هو..ليها مده لاشفتها ولاسمعت صوتها شكلها مش قاعده في الفيلا..
راجلها بشي من الانفعال؛وانتي مالك بيها قاعده ولامهناش جميله ارجوك فكينا من الخلطه الزايده بالجيران ساد اللي صار معانا قبل..
منيه:خيرك بابا ماما ماقالت شي تسأل عادي..
:عارفها وعارف اسئلتها تقعد تحشر روحها في حياة غيرها وتجيبلنا المشاكل.
جميله بإنزعاج؛خلاص سكتنا سكتنا..
وناضن وخلت الغدي..
منيه بضيق؛ربي يهديك يابابا..وناضت لحقت امها.
اما هو مط شواربه بملل ورجع يتغدا..
🍃🍃🍃🍃🍃
الساعه 4:00قبل العصر..
في صالة حوش شنيبه..
خش نضال ع امه وهو يقول؛حويجه شن جو؟
مغليه وهي لاهيه بتليفونها؛باهي..
قعمز وهو يشوفلها بإستغراب قال؛ماتقوليش شن ديري اللي من بكري وانتي مغطسه راسك في التليفون..
ساوت نظاراتها وشبحتله وهي تقول:شن اسمك ع الفيس؟
هو ضيق عيونه وقال بضحكه؛علاش؟
مغليه؛بش نضيفك..
ضحك بصدمه وقال؛شني!!؟
مغليه؛اسمع جاوب ع قد السؤال وفكني من برادتك..
هو بضحكه قال؛نضال شنيبه بالانجليزي قبل كان اسم تاني بعدين غيرته..
مغليه؛ضايفاتك نسرين؟
نضال بضحكه:اكيد..تلقي صورتي في البروفايل..
هي شافت لتليفونها وقعدت دور..
ونضال يضحك وهو يقول؛ياالله عليك امي وخلاص..
مغليه؛بعتتلك اقبل..
هو طلع تليفونه من جيبه وخش ع الفيس..
شاف طلبات الاضافه..
لقي اخر طلب..
أم العيله...وصورة البروفايل لمراة مسنه لابسه عربي شاده عكاز مش باين وجهها..ومكتوب ع الصورة..
"ام العيله نجيها..عمار الحوش الا بيها"
نضال بضحكه؛من اقترح عليك الاسم..
مغليه؛اني اللي فكرت فيه..
نضال بضحكه؛والله نحبك الله..
ابتسمت وهي رافعه حاجبها وقالت؛اقبل هيا..
قاللها؛ع شرط يام..رد بالك تعلقيلي ولاديريلي مشاركات وتاقات تمام..
مغليه:هدا اللي مازال نخش فوسط كمشه عزارا ونقعد نهدرز..
قعد يضحك نضال وقبل الطلب بعدين قال:اهو قبلناه..
وناض وهو يقول؛ماتبي شي..
مغليه؛وين ماشي؟
نضال؛مشوار يام ماتبي شي؟
مغليه؛سلامتك..ورجعت لهت بالفيس..
هو مشي طلع وهو يضحك..
بعد ماطلع خشت نسرين وهي تقول؛يام بنصلي وبنرقد يحيى وبنرقد..
شبحتلها وقالت؛وين بترقدي!!؟في مراة جايتني بعد العصر..
نسرين بضحر:واك يام..مش خديجه جايه بعدين خلاص ماعندك ماديري بيا..
ومشت من حداها..
مغليه حركت راسها يمين ويسار بخيبه..ورجعت انشغلت بالفيس..
🍃🍃🍃🍃🍃
ومن حوش الواعر..
طلعت اريج بسيارتها من الحوش متوجهه لعملها..
ونضال اللي كان مقعمز في سيارته يراجي فيها طلع وراها طول...
فاتت سيارته من قدام عمر والمهدي وعبد القيوم اللي كانوا واقفين قدام المطحن يهدرزوا..
عمر:كان نحصل وين ندك راسي معاكم..
عبد القيوم بإبتسامه مجامله:كان مافيش نديرولك..
عمر بإبتسامه قال؛منور تارقي..
المهدي:خلاص كل شي واتي..
عبد القيوم؛تمام بكرا الساعه عشرة نتلاقوا هنا..
وبعد مااتفقوا ع كل شي يخص طلعتهم للبر توجهوا للجامع..
🍃في الجامع اهل الشارع لما شافوا عمر خاش يصلي قعدوا يشبحوله بنظرات عدم قبول واستنكار..
وهو كان عارف روحه محط نظرهم لكن تجاهل..
بالذات الحاج علي اللي كان يبي يطلع ويخلي الجامع بكل...
بس اللي انحطوا في موقف محرج وقتها محمد شنيبه والمهدي اللي حاولوا يديروا اوراحهم عاديين وكأنه ماصار شي...
🍃🍃🍃🍃🍃
ويجي وقت زيارة ام ربيع لحوش شنيبه..
جابها ربيع وحطها قدام حوش شنيبه..
استقبلتها خديجه من فم الباب ودخلتها للحوش..
وكان استقبال مغليه ليها حار..رحبت واهلت وسهلت..
وهالترحيب ريحها وشجعها تفتح الموضوع اللي جايه ع خاطره بس في شي خلاها تستغرب وتتسائل في نفسها
نسرين وين؟!
ونسرين واصله في سابع حلم وماتندري ع حاجه..
🍃🍃🍃🍃🍃
"استغفر الله..استغفر الله..استغفر الله"
شافت للمسبحه وقالت..مازال تلاته ع الألف..
استغفر الله..استغفر الله..استغفر الله..
صفرت عداد المسبحه وبدت من جديد وهي تردد..
"اللهم صل وسلم على محمد...اللهم صل وسلم على محمد"
ويجيها صوت امها وهي تنادي..
"عواطف حطيتي الستارات في الغساله"
عواطف بإنزعاج قالت بصوت عالي..
وااك يام..وانتي كان قعدتي تنقي تحفري في الراس..باهي باهي..
ولوحت من يدها المسبحه ع السرير وناضت طلعت من الدار..
🍃وبنت خوها فوقهم..
في دارها...
وهي تتكلم بالتليفون..
"قريتيها؟!"
راما بهيام؛ايه تهبل تهبل وهو كيف يحبها يهبل..محلاه الموقف لما شدها في الكوجينه..
"اني متت في اللقطه اللي دارها وقتها وين لصقها ع الحيط وقعد يهمس في وذنها"
راما بضحكه؛تصدقي تخيلت روحي واني ومحمد حتى هو ولد خالي ونتلاقوا في حوش جدي.
"سعدودك ياريتني زيك نشوف حبيبي كل يوم"
راما بضيق؛لكن اني مش عارفه كيف ندير مع محمد نحس فيه مايفكرش في غير مروة وبس لما يلحق فيها في المرواح نحس في روحي بنموت..
"تعرفي قصه مروة هادي مش عارفه شن عاجبه فيها انتي احلا منها بوين"
راما سكتت وهي مضايقه..
"تو نفكرلك في طريقه تخليه يكره شبح وجهها "
راما بقلق؛اسمعي اني مانبيش تصيرلها حاجه مش كويسه نبيه هو معاش يعدل عليها بس..
"عبيطه مش دايرتلها شي المهم انتي توا الفتي انتباهه "
راما؛باهي قوليلي كيف ماعرفتش اني لما نشوفه نتحشم نتلخبط..
"وواك من هالحشم اللي قاتلك..اسمعي شن بنقولك ديري وطبقيه باهي"
راما :باهي..
🍃🍃🍃🍃🍃
"والله شن بنقولك ياوخيتي فاجئتيني الحق"
ام ربيع بإبتسامه؛اني عارفه الظروف اللي مرت بيها وربيع حتى هو عارف..وراهو قالي يام نبيها بولدها بنديرع ولدي..
خديجه من داخل تزغرد من الفرحه ومن برا..
كلهم يقولوا هكي في البدايه بعدين يقوللها ياأني ياولدك..
ام ربيع:كلهم الا ربيع..مانخفيش عليكم ربيع ربي مش رايدله بالذريه وان شاء الله يعوضه في ولد نسرين..
خديجه في سرها..
"أحسن"
مغليه؛باهي كان صار نصيب نبي بنتي حداي في الشارع..
ام ربيع؛تتفاهم هي وياه بعدين..هاه شن قلتوا..
مغليه:والله شن بنقولك..القول لصاحبة الشان..
ام ربيع بضحكه؛هي وينها بس..
خديجه بإبتسامه؛يسهر فيها ولدها طول الليل وماهناك ماترقد وتنوض تمشي للمدرسه ماتصدق تحصل هالسويعات ترقد فيهم..
ام ربيع بإبتسامه؛ربي يعاونها..خلاص في الجيه التانيه بإذن الله نشوفها..
مغليه بإبتسامه؛ان شاء الله خير..
🍃وشويه وروحت ام ربيع..
وبعد ماطلعت وسقدوها الزوز..
خشوا وهما يهدرزوا بفرح ومش مستوعبات اللي صار..
مغليه بفرحه:اه ياربي قداش كبير عوضت بنتي خير الحمد والشكر ليك ياربي..
خديجه بضحكه؛خل نمشي نفجعها هالمتخلفه..
ومشت تجري..وامها مشت وراها وهي تضحك..
🍃🍃🍃🍃🍃
في الطريق..
ام ربيع؛شكلها مش عارفه..
ربيع بضحكه؛ماخدتش كلامي جديات يومها..
امه قالت؛ايه حقه امها قالت نبيها تقعد في نفس الشارع..
ربيع بضحكته المميزه؛واني هدا اللي نبيه يام..
امه بإبتسامه؛ربي يكمل ع خير..
ربيع تنهد وقال؛آمين..
~~~~~~~~
نسرين وهي مندهشه؛حي هدا من جده!؟
مغليه؛كيف من جده؟
نسرين ضحكت وهي تقول؛يومها كلمني وفتح معاي الموضوع وقالي نبي نعرف رايك قتله جيب ماليك يخطبوا قبل..
خديجه؛واهو طلع قد كلمته..
مغليه؛عاجبك انتي مقتنعه بيه؟
نسرين مسحت ع شعرها وهي تساوي فيه قالت بخجل:هو كويس الحق وطيب ونعرفوه من زمان..
خديجه بضحكه؛مقتنعه ونص يام..
مغليه بإبتسامه؛تو نفتح الموضوع مع بوك الليله وان شاء الله ربي يكمل ع خير..
خديجه:امين..
ونسرين قعدت تشوف لولدها وهو راقد جنبها بإبتسامة حب..
🍃🍃🍃🍃🍃
الساعه 7:30 مساءا..
درست سيارة تندرا سودا قدام حوش علي الواعر..
نزل منها اسكندر وسكر الباب بيد والتانيه حط بيها التليفون ع وذنه وهو ماشي لباب الحوش..
ع جية سيارة اريج ووراها نضال..
هو مشي بسيارة للقهوة..
وهي درست قدام حوش جدها..
اسكندر وهو يشوفلها ابتسم وقال بصوته الرخيم اللي فيه شي من البحه؛ايوه حسين اني قدام الباب...
هي نزلت من السيارة ومشت طول للباب وهو بعيونه معاها..
شافها تفتح في الباب بتخش..
اسكندر:Ok..Ok جاي..
وسكر الباب وسرع مشيته وهو يقول:استني ماتسكريش..
اريج وهي خاشه سمعاته اتفاجئت..
شافت قدام لقاته واقف وهو منزل عيونه وع وجهه ابتسامه خفيفه..
"اسكندر"
اريج شافت لحسين فنص فيها..
هي تحشمت ونزلت عيونها وخشت تجري..
وقف حسين في الباب وقال؛تفضل..
اسكندر خش وهو يقول:يزيد فضلك..
سكر حسين الباب..
اللي قعدوا عيونه نضال المليانات غضب وغيره عليه..
🍃🍃🍃🍃
داخل في دار المعيشه.
اريج خشت وهي تقول؛استغفر الله العظيم صاحب راجلك حاجه مش مفهومه..
غرفه ضحكت غصب عنها وقالت؛جي!؟
قعمزت اريج وهي تقول؛ايه..الله يبارك عليه متزوج؟.
الاء:راك متزوجه ياهمي..
اريج؛والحمد لله بسيد التريس وعاجبني ومالي عيني..بس استغفر الله جو عيوني على هدا بالغلط..المهم كان مش متزوج نشوفله صاحبتي اماني تموت في الجماعه هادم..
غرفه بضحكه؛لا مش متزوج...
~~~~~~~
اسكندر؛غدوة بإذن الله بنشوفه ماتبوا نوصله شي؟
حسين؛نشوف عياله وبعدين نرد عليك المهم توا كيف صار وخلوك تشوفه؟
اسكندر:بعد ماحمرنا العين..
حسين بضيق:شكلها مطوله حكايته..
اسكندر؛والله شن بنقولك مش باينلها انفراجه قريبه لكن مش مخليينه بإذن الله نطلعوه نطلعوه..
حسين:إن شاء الله...
🍃🍃🍃🍃
وفي دار البنات..
طوبى:هادي اسمها انانيه..
معتز؛لامش انانيه اني مانبيش نقعد محتاج ونكون اقل من غيري..
طوبى:كيف محتاج..ترقد جعان..قاعد في الشارع..عريان حفيان ماعندك ماتلبس!..
معتز بضيق؛مش هكي..بس..
قاطعاته قالت:معتز..معتز..انت تبي تولي راجل ولا؟
معتز:اكيد.
طوبى:والراجل يصبر ويتحمل ويعيش في كل الظروف..امك وخواتك بعد غياب بوك انت راجلهم انت اللي بعدين بيلجأوله ويتحاموا بيه بعد ربي...
عيب هلبه يامعتز لما تشوف اختك اريج البنت ناسيه نفسها وحارمه روحها من الف حاجه وتقرا وتخدم بش تعاون وتصرف عليكم وانت مقعمز حاط راجل ع رجل تطلب وتتمنى..
عيب هلبه امك وهي في هالعمر تقعد تجري وتخدم عليكم وتحاول ع قد ماتقدر تعيشكم حياة كريمه وتحافظ ع كرامتكم وانت تسيبها بروحها وتعيش بعيد عنها ع خاطر مصلحتك..
حتى الاء اختك الاء وانت تعرفها كويس برا شوفها توا كيف ولت وشن قاعده دير بش تساعد امك..
عيب عليك وانت اللي مفروض تكون راجلهم مخليهم بروحهم وماشي دور ع راحتك..
معتز بضيق:شن تبيني ندير براكة خضرة ونبيع!؟
طوبى؛الراجل بس يدير حاجه زي هادي ..
معتز؛امي ماتخلنيش..
طوبى:اكيد مش حتخليك لأنك مش محتاج..معتز حبيبي لااني ولاامك ولافي حد يبيك تخدم ولادير شي كل اللي نبوه انك تقعد مع امك ماتشغلهاش عليك وتخليها مستاحشاتك.
معتز؛تو نجي كل خميس وجمعه وخلاص..
تنهدت طوبى وقالت؛براحتك عزو..تقدر تطلع..
ناض وهو يقول:مافيش زعل..
ابتسمت وقالت؛مافيش..
ابتسم وجاها وحضنها..
وهي ضماته وقالت:ربي يهديك حبيبي.
بعد عنها وهو مبتسم بضيق بعدين مشي طلع..
طوبى بضيق وقلق:ربي يهديهولك يافردوس ومايخليش مصيرك معاه زي مصير امي مع مختار..
🍃🍃🍃🍃🍃
ومختار في بلاد بعيده..
كان حاضر لاجتماع في شركه هو احد مؤسسيها..
دامت مدة الاجتماع هدا ساعه..
بعد الاجتماع..
كان طالع برا القاعه وهو يشوف في تليفونه..
وقفه صوت عزيز وهو ينادي فيه..
"مختار"
التفت وشبحله برفعة حواجب بعدين نزلهم وابتسم.
وصل فيه عزيز وقال:مستعجل؟
مختار:لا..علاش؟
عزيز بإبتسامه؛نبيك في موضوع..
مختار مرر نظره حواليه بعدين شبحله وقال:تمام..تعالى..
ومشوا الزوز مع بعض وهما يهدرزوا ويسألوا عن احوال لبعض..
لين وصلوا في مكتب مختار..
خش هو وعزيز وقعمزوا ع الصالون اللي دايره مختار في مكتبه..
مختار:قهوة عصير شني؟
عزيز:لاشكرا شربت في الاجتماع..
مختار:معناها نخشوا في االموضوع طول..
ضحك عزيز بشي من الارتباك وقال؛مزبوط..
مختار:نسمع فيك..
سكت عزيز شويه بعدين تنهد وقال..
بصراحه اني معجب ببنت اختك هلبه..
رفع مختار حواجبه شويه وقعد ساكت..
عزيز وهو يتكلم بسرعه بتوتر:نيتي صافيه والله وكلامي مبني ع اساس جدي اني نبي نرتبط بيها رسمي..
مختار وهو يحرك في يده فوق ولوطا بسرعه قاطعه وهو يضحك ويقول؛هدي هدي خيرك!..نزل يده وقال..علاش متوتر هكي اول مرة نشوفك بهالحاله..
عزيز؛مانبيكش تفهم غلط..
مختار؛مانفهمكش غلط نعرفك كويس عزيز وواثق في اخلاقك..كمل..
تنهد تاني وقال؛تمام..اني مشتيلها للكليه وصارحتها بس هي ردت بالرفض وفهمت منها انها كانت مخطوبه ولما زدت سألت عرفت لمن كانت مخطوبه والخطوبه ماطولتش بس مش عارف من فيهم فسخ هي ولاهو..
مختار؛وفي شن تهمك الحاجه هادي؟
عزيز؛مهم عندي هلبه..شوف مختار اني مصمم ومصر عليها ومقتنع بيها هلبه ونبيها هي تقتنع بيا وتتقبلني والحاجه هادي حتكون صعبه هلبه لو كانت مش هي الطرف اللي فك ارتباطهم..
مختار؛هي اللي فسخت وبصراحه صارت مشكله اجبرتها..لكن نضمنلك حاجه وحده انها مش حتوليله نهائي..
عزيز قعد يشبحله وهو يفكر في كلامه بعدين قال..
شوف ونكون صريح معاك اكثر مادام هي مش مرتبطه حاليا اني حنقعد وراها لين تقتنع بيا وانت عارفني كويس.
مختار بإبتسامه؛مش في قاموسك كلمة استسلام عارف..
عزيز؛تمام..اني لأني نحترمك وتعز عليا ومانبيش ندير شي من وراك بما انها بنت اختك نبي نعطيك علم اني حنحاول معاها لعند ماتقبل بيا وبعدها بإذن الله نخطبها طول..
مختار:لاني واثق في تربيتك مش حيكون عندي اعتراض لكن..رد بالك ياعزيز ينط منك العرق الشرقي وتتعامل معاها معامله تجرحها بعدين وانت فاهم قصدي..
عزيز؛اول شي اني شرقي ونعتز بشرقيتي تاني شي اللي قلت عليه هدا مايديراش الا واحد عديم اخلاق ورجوله ومالقاش من يربيه واني مش هكي بكل..
ضحك مختار وقال؛كويس ريحتني..بنعطيك معلومه اخيره بنت اختي الاء صح مولوده في ظروف عاديه وبنت عيله بسيطه بس هي في نفسها princess هكي تحسها حاجه مميزة فريده خاصه جدا وغاليه وياما صار ع خاطرها راهو في ناس ادخلت اني شخصيا بش نخلصها من ازعاجهم..
المهم انت عاملها ع هالاساس واني نوعدك انك حتكسبها..
عزيز بآبتسامه؛-صراحه واضح جدا جدا..
مختار؛كويس..نتمنالك التوفيق ويارب تكونوا نصيب بعض مش حنلقى لبنت اختي خير منك..
عزيز بإبتسامه ونظرة عيون تلمع بالفرح؛ان شاء الله..
🍃🍃🍃🍃🍃🍃
"قداش هادم"
غرفه؛الحمد لله مبلغ كويس..
أريج؛اني نوحل في الناس منين يجيبوا في الفلوس في ظروف هيا معروفات محلات راجلك بضاعته اصليه وغاليه..
آلاء:يامسكينه في اللي يستلفوا بش يلبسوا الماركات..
اريج؛متخلفين..
الاء؛ماعلينا..هاه شن روفي..
غرفه خدت منهم شويه وعطتهم لآلاء وقالت؛سادات هادم..
خدتهم آلاء وقالت؛وزياده يخي.
اريج؛ردي الزياده..
غرفه؛اريج بلاخترفه..
آلاء وهي تعد في الفلوس؛مش معدله عليها فوتيها..
اريج وهي تشوف لأختها بإمتعاض حركت راسها يمين ويسار بعدم رضا...
🍃وبرا..
كان حسين طالع من الحوش..
بس وقفاته طوبى ..
حسين؛نعم؟
طوبى:ترا اطلع شويه..
طلع وهو مستغرب وهي معاه ووقفوا قدام الباب..
طوبى:حسين بنسألك ع حاجه وان شاء الله تكون عندك خلفيه عليها..
حسين بآستغراب؛اسألي..
طوبى؛علاش القهوة متاعنا معاش ولت زي قبل؟
تنهد حسين وقال؛والله ياطوبى اني نتمنى يتحول المطحن هدا لحاجه تانيه مش جاي من وراه غير الخسارة..
طوبى بضيق؛علاش باهي!؟
حسين؛القهوة معاش ولت بجودة قهوتنا ايام زمان الماكينات قديمه المواد معاش بجودة المواد الاولى المطحن كله يبي تجديد والحكايه تبي فلوس وع عينك الوضع هدا غير المنافس قهوة الزعيم توا واكله السوق كله مافيش قهوة تنافسها يجوها من كل مكان وتصدر برا البلاد ولت تصدقي!..
طوبى بضيق شديد ودموعها في عيونها؛ خساره..
حسين ابتسم بحسرة وقال؛الله يرحم ايام سدرة..
قلبها وجعها لما سمعت اسمها..
حسين؛نتفكر فيها زمان لما شدت المطحن رفعاته لمكان تاني بكل..قهوة جنه هادي ماتنحطش جنبها لاالزعيم ولاغيرها.
بين عيوني توا وهي تاخد بيدها في حبوب البن وتحطهم في المكينه وكل مرة تحط عليهم حاجه...تتأكد بروحها من كل شي التحميسه الخلطه تفرق بينهم في النكهات الحطان في الكياس شكل الكياس نفسهم..المطحن هدا اللي انقام بيها طاح معاها..
استاقظ لنفسه لما سمعها وهي ترشف..
شبحلها لقاها تمسح في دموعها..
عقد حواجبه بضيق وقال:معليشي سامحيني سرحت شويه ونسيت..
مسحت دموعها كويس وقالت بصوت مرتعش:من اللي نساها بش تفكره!
حسين تنهد بضيق وقال:عندك حق..
خدت نفس بعدين قالت؛باهي مافيش كيف يتصلح الوضع؟
حسين؛مافيه مايتصلح..اساساجدي وعمي يفكروا يغيروه لمحل مواد غذائيه..
انصدمت طوبى وقعدت ساكته..
حسين بضيق؛هكي خير اهو حاجه تدخل فلوس..
نزلت عيونها وهي تفكر في اللي سمعاته بصدمه..
حسين ركز عليها وقال؛ماتشغليش بالك..هيا اني ماشي ماتبي شي؟
حركت راسها بالرفض بدون ماتتكلم ولفت ومشت خشت داخل...
هو تنهد بضيق بعدين مشي طلع من الحوش...
🍃🍃🍃🍃🍃🍃
"شوفي نجاح"
غطت نجاح الطنجره وخدت الكراسه من ولد عبد الحفيظ وقعدت تشوفلها بعدين قالت:الله يبارك الله يبارك..
هو بتساؤل بريئ فيه رجاء:نمشي نلعب عادي..
ضحكت وقالت؛برا..
ماصدق طلع يجري..
وهي وراه بعيونها تقول بضحكه:وين ماشي خود كراستك..
وهو كان بعد عنها ومعاش يسمع فيها..
سكرت الكراسه وهي تضحك بعدين حطتها فوق الثلاجه..
وولت تشوف في عشاها..
ع خشة عبد الحفيظ للشقه وكان جايب معاه حاجات..
مشي للكوجينه طول وهو يقول؛عطيك الصحه..
وهي تحرك في الرز قالت بإبتسامه؛الله يسلمك..
حط الحاجات ع الطاوله وقال؛شن عشانا؟
غطت الطنجره وقالت:كل خير..رز ابيض ودبابيس دجاج في الكوشه وشربة عدس..
هو قال:باهي مازال ميت جوع..
هي قالت؛بعيد السو..اهو خلاص ع وشك..
هو ابتسم وجاها وطلع من جيبه فلوس ومدهولها وقال:هادوا فلوس الخدمه اللي درناها اليوم..
خدتهم وقالت؛ركبتوا خلاص؟
هوقال:ايه واخيرا..
هي قالت؛ربي يفتحها عليكم...
هو تنهد بإبتسامه وقال:تصدقي والله ومن غير مجامله من لما خطبتك والخدمه في المكتب زادت وبعد خديتك زادت اكثر من قبل تعرفي شريكي اليوم قالي ياريتك درتها من قبل..
ضحكت..
هو قال؛جديات نجاح من لما خشيتي حياتي واني حاس كل شي فيها انقلب نفسيتي تغيرت نفسية ولدي خدمتي شكل حياتي كله...
ابتسمت بخجل ومعاش عرفت شن ترد..
هو قال بإبتسامه؛بصدق نجاح والله تقول تزوجت بركة..
هي قعدت تشوفله بنظرة فيها شي من الدهشه..
الكلمه اللي قالها حسستها بشعور حلو بالمرة..
شد يدها وقال؛نجاح..والله مانجامل فيك اللي في قلبي يطلع ع لساني..
ع خشة ولده وهو يقول؛نجاح ترا شوفي هادي خيرها..
نجاح طلقت يد راجلها وقالت؛شن هي..
عطاها الايباد خداته وقعدت تشوف فيه..بعدين نزلتله شويه وقعدت توري فيه شن يدير..
وعبد الحفيظ يتأمل فيها بحب..
نجاح؛زبطتها كيف؟
هو قال؛ايه.. شكرا نجاح..وخدي الايباد وطلع..
عبد الحفيظ؛خليه ع الاقل يناديك خالتي..
نجاح؛قلنا خليه ع راحته شن يبي يناديني هو حر المهم متفاهمين وجونا مليح..وانت هيا برا بسرعه بدل حوايجك وخليني نوتي العشي..
ضحك وقال؛حاضر..ومشي طلع من حداها..
وهي بعد طلع انشغلت بتجهيز العشي وهي تفكر في كلامه اللي اثر فيها هلبه وفرحها..
وقعدت تردد في نفسها..
"الحمد لله..الحمد لله"
🍃🍃🍃🍃🍃
وفي حوش لطفي..
كانوا في دار المعيشه ملتمين كلهم..
ومعاهم صفيه وأميمه..
يهدرزوا ع مشروعهم الجديد وشن بيديروا فيه..
كلهم كانوا يشاركوا بحماس..
ماعدا زوز..
غرفه اللي كانت تساير فيهم بإبتسامتها الباهته..
وطوبى اللي كانت تمرر في نظرها عليهم وتسمعلهم وبس..
شويه...
خش عليهم معتز وهو يقول..
خالتي طوبى..
كلهم شبحوله..
معتز؛عمي الجالي في المربوعه..
فردوس واميمه شبحولها وهي قاعده معلقه عيونها ف معتز..
يعني مانقدرش نعيش يوم واحد من غير مانشوفك فيه ولانسمع سيرتك!؟
نبي ننسى اني مربوطه بيك وع ذمتك ولو ليوم واحد..
معتز؛قالك جدي ديري قهوة..
هي قالت؛حاضر..
مشي معتز..
وهي ناضت بتطلع..
مطيره؛شدوه ع العشي عيب اكثر من مرة يجي فهالوقت ويروح من غير عشي..
فردوس في سرها..
"يبي سم مش عشي"
طوبى؛باهي..
ومشت طلعت من حداهم..
صفيه؛باهي يامطيره بنوصلوهم ولاهما يجوا ياخدوا..
وردت مطيره ع صفيه ورجعوا لنقاشهم الاول..
واميمه التزمت الصمت وعقلها مع طوبى..
🍀وطوبى خشت للكوجينه وبدت دير في القهوة وهي معصبه..
من العصبيه اطرافها كانوا يرتعشوا..
طيبتها..وبعد ماطابت خطرت ع بالها حاجه ديرها وتبرد بيها ع قلبها..
🍃🍃🍃
في المربوعه..
لطفي:صاحبه قال غدوة بيتلاقى ويشوف شن صاير فيه..
الجالي؛ان شاء الله خير..واني زي ماقتلك تو نشوف الراجل اللي حكيتلك عليه ونقولك شن يصير معاي..
هز لطفي راسه وهو ساكت..
دق باب المربوعه..
وخشت طوبى وفي يدها سفرة القهوة..
ناض لطفي وهو يقول:اني بنستأذن عندي مشوير للشارع اللي ورانا..
هو وعيونه ع طوبى:خود راحتك عمي..
طوبى وهي تشوف لبوها؛بتعطل؟
لطفي:ايه ماتحسبونيش في العشي متعشي برا..
طوبى:صحتين..
لطفي؛سلمك بنتي..السلام عليكم..
ومشي لطفي طلع من حداهم..
بعد ماطلع..
هي التفتت للجالي وع وجهها ملامح الامتعاض..
ومشتله مدتله القهوة ..
الجالي بنبرة هاديه لعوبه؛استاحشت قهوتك..
وخدي الفنجان متاعه..
وهي زي ماهي ماتحرك فيها شي..
مشت حطت السفره..
وقعمزت بعيد عنه بس مقابلاته..
هو بدي يرشف من القهوة وعيونه عليها..
وماأن نزل الفنجان الاوعيونه توسعوا ع الاخر لين قريب طلعوا من مكانهم..ودموعهم عبوهم..
وقعد يكح "يسعل".. والقهوة تتبزع ع صونية الفنجان...
ناض ورده وهو حاط يده ع فمه ويكح..
وقعمز وهو يقول؛نبي ميه..ويرجع يكح مرة تانيه..
وطوبى تشوفله وهي رافعه حاجبها اليسار بإزدراء وتشفي..
شبحلها بعيونه اللي دمعوا وهو يقول؛ميه..ورجع يكح..
طوبى ببرود؛خيرك!
الجالي قعدت يتنحنح ويمسح في دموعه وهو يقول؛شن دايره فيها؟
طوبى؛شن بندير فيها بن ومية وسكر...بعدين غمضت عيونها وقالت..حي..فتحت عيونها وقالت..سكريه القهوة غيرتها اختي للفلفل الاسود قالتلي عليها غير اني انذهبت شيرتي ونسيت..
هو قعد يمسح في دموعه ويقول؛نسيتي!؟
ابتسمت ابتسامه مستفزة وهزت راسها بإيجاب..
حط يده ع فمه وهو يشوفلها.
وهي تشوفله بنظرات تحدي تحاول تخفي بيهم خوفها من نظراته..
نزل يده وقال؛ارجوك ميه..
تنهدت وبدت تنادي:معتز...عزو..
وهو يشوفلها بنظرات فيها اعجاب شديد..
خش معتز وقال؛نعم خالتي..
طوبى؛طاسة ميه..
هو قال؛حاضر..ومشي..
هي رجعت شافتله وقالت؛مانقدرش نوض ونخليك بروحك نندري عليك شن تحط هني ولاهني..
وهو يبدا يضحك ويضحك ع كلامها..
وهي تشوفله بنظرات ازدراء..
ع خشة معتز بالميه..
طوبى؛عطيهاله..
هو مشاله وقال؛تفضل..
هدا الجالي ضحك وخدي طاسة الميه وقال؛خالتك هادي تحفه ياعزو..
شبح معتز لخالته وقال؛ مافيش منها..
طوبى بإبتسامه؛ايوه..شبحت للجالي وقالت..مافيش..
الجالي قعد يشوفلها وهو متنح فيها..
وطوبى غيرت عيونها لولد اختها وقالت..خلاص برا عزو..
مشي معتز طلع..
والجالي قال؛طوبى..
شبحتله برفعة حاجب..
الجالي شرب الميه كلها وبعدين قال..
طوبى..خلي نقعمزوا مع بعضنا في مكان هادي ونهدرزوا بالعقل تمام انتي تقولي اللي عندك واني نقول اللي عندي صدقيني حنوصلوا لحل يخلينا نفتحوا صفحه جديده مع بعض..
سكت وهو يراجي في ردها..
وهي تشوفله ببرود..
هو قال؛شن رايك؟
هي قالت:كان ماعندكش شي تاني تقوله تسقد..
ملامح وجهه تعكرت بعدين قال؛باهي ردي ع خواتي وامي لما يتصلوا بيك عيب بالذات امي مراة كبيره وراهو بعيده عن كل شي
طوبى؛مانيش راده ع حد
الجالي؛طوبى انتي مش هكي التصرفات هادي مش ليك انتي بنت متربيه كويس..
طوبى:من اليوم وبرا غادي اعتبرني مش متربيه..
هو صدمه الرد..
وهي بحده وعيون مليانات دموع؛شفت تربيتي شن خلتني نحصل منكم...
هو بلع ريقه بعدين ؛طوبى اسمعي..الموضوع كله هبال..نزوة..مش عارف..
سكتتاته لما قالت بغضب مكتوم؛ولاكلمة زياده..اقسم بالله ياجالي تزيد حرف واحد نطلع نعيط في الشارع ونلمه عليك ونفضحك انت وماليك..اني خلاص راهو ع شعره منك..
خوفه تهديدها..نبره صوتها الغاضبه المنخفضه ونظرات عيونها اللي كلها غضب خلوه بحس انه لو زاد كلمه تانيه في هالموضوع مش حتكون العاقبه خير...
خدي نفس..بعدين رمي نظره للطاوله..
وناض حط الطاسه بعدين قال؛تصبحي ع خير..
ومشي طول فتح الباب وطلع من المربوعه..
هي بقرف؛وقح..
وناضت للباب وسكراته..
بعدين لفت بتمشي تطلع..
عيونها جو ع كيسة لمحل مجوهرات في المكان اللي مقعمز فيه..
مشتلها..وخدتها..
طلعت منها علبه مستطيله متوسطة الحجم..
فتحتها..
لقت فيها تعليقه ذهب ناعمه حلوة..
عقد..واقراط..وخاتم..
وهي تشوفلها..
جي بين عيونها طقم ذهب نجاه..
تفكرت وين شافتها بيه وامتى..
تفكرت وين شافت صورته في تليفون الجالي..
تفكرت لما سألتها عنه شن قالولها هي وخديجه..
وياقداش بانت غبيه وهبله في نظر نفسها..
بدت ع وجهها ملامح البكاء ودموعها نزلوا..
بعدين خفتهم ومسحت دموعها بقوة..
ردت العلبه للكيس..ورفعت السفره..
بعدين مشت طلعت بيها من المربوعه للكوجينه..
حطت السفره..وبعدها توجهت طول للدار..
خشتها وسكرت الباب..
وطلعت العلبه...فتحتها وحطتها ع الزيانه..
بعدين طلعت تليفونها من جيب البيجامه..
وحطت ع الكاميرا..وخدت لقطه حلوة للتعليقه..
عدلت في الصورة..وطول خشت ع الفيس بش تنزلها..
وكتبت فوقها...
عيني سلم راجلها...راجل باهي ومدللها..
عيني سلم راجلها..مايرضى حد يزعلها...
ودارت خاصية الاستثناء بش مايشوفش المنشور..
ونزلاته..
دارت هدا كله وهي محروقه ودموعها مابطلوش نزول ع قد مامسحتهم قعدوا ينزلوا غصب عنها..
بعد مانزلاته..
حطت التليفون وردت العلبه للكيس وهو حطاته في الدولاب ورا الحوايج..
بعدين مشت طلعت من الدار للحمام بش تغسل وجهها...
🍃بعد ماطلعت من الحمام تلاقت مع عمتها مطيره..
مطيره؛علاش ماشدتيشي ع العشي..
طوبى وهي تحاول دير روحها عاديه قالت؛قالي معزوم..مرة تانيه ان شاء الله..
مطيره؛ان شاء الله..بوك طلع؟
طوبى:ايه قال ماشي للشارع اللي ورانا وبيتعشا برا..
مطيره هزت راسها ولفت ومشت..
وطوبى خدت نفس وزفرت..بعدين مشت وراها للكوجينه..
🍃🍃🍃🍃🍃
اما هو خش لحوش ماليه وكان معصب ع الآخر..
كان متمني لو يشوف قدامه نجاة ويدفنها في مكانها..
خش داخل..
مشي طول لدار خواته..
وصل فيها ودق الباب..
جاته نسرين من وراه وهي تقول؛-جالي..
التفت وقال؛تعالي..
بعدين فتح باب الدار وخش وهي خشت وراه..
سكر الباب وقال..
الزفته هديكا مااتصلتش بيكم اليوم؟
نسرين؛لا..
غمض عيونه وفتحهم بغضب..
نسرين؛ماجتش ولا؟
الجالي؛ايه..
نسرين؛امشيلها لمكان خدمتها وحطها في الأمر الواقع..
الجالي بتفكير؛هدا اللي بيصير بش نحول هالهم عن كتافي..
نسرين بإبتسامه؛باهي قولي شن سر حب والدلال اللي بينك وبين طوبى الفتره الاخيره..دونات وتعليقه وشتاوات..
هو بإستغراب شديد؛من قالك؟
قامت تليفونها وهي تقول: راجي شويه..
خشت ع الفيس وحطت ع المنشور..
وورتهوله..
هو خدي التليفون وشافه..
وتفاجئ ع الآخر..
نسرين بإبتسامه خبيثه؛ماترضى حد يزعلها صار!؟
هو قعد يشوف للبوست بعدين خش ع صفحتها وشاف منشور الدونات..
قعد يحاول يفسر اللي دير في طوبى...
خش ع الاصدقاء عندها طلعوا الاصدقاء المشتركين اللي من ضمنهم كانت نجاه..
ابتسم لما فهم هي شن تحاول دير..
برغم ان كل تصرفاتها كانت ضده ومش في صالحه بس كانت تعجب فيه هلبه..وتخلي فيه ينجذبلها اكثر ..
طلع من الفيس ومدلها التليفون وقال..
ماتخليش امي تشوفهم..
نسرين:تو بتشوف كل شي بعد دارت حساب ع الفيس..
هو بصدمه قال؛شن دارت!!؟
نسرين قعدت تضحك...
الجالي بتعجب؛خلاص معاش لقت مادير!؟
نسرين بضحكه؛ماتبي شي يفوتها...
حرك راسه يمين ويسار وقال؛هي المشرحه ناقصه قتلى..
ومشي فتح الباب وطلع ونسرين لحقاته وهي تضحك..
شويه وقف والتفت لأخته وقال؛ايه تعالي هني ردوا بالكم هديكا تعرف بحمل طوبى..
نسرين؛ماتخافش حاطين في بالنا الحاجه هادي..
هو هز راسه ولف ومشي بيطلع من الحوش..
نسرين:حتى اليوم في شقة عمر..
هز راسه وطلع من الحوش..
🍃لقي عمر كيف خش..
الجالي:كابتن..
عمر:باش مهندس..
وقفوا قدام بعض وقاله؛تعشيت؟
عمر:لا نطلب من برا؟
الجالي؛احسن..ومشوا الزوز بإتجاه دروج الشقه..
عمر:شن صار جديد.
الجالي بضيق؛الوضع كل ماله يتعقد اكثر..
عمر:جبته لروحك..
"كيف يصير تطلق طير وتجري تحته"
الجالي؛روح المتخلف..
عمر ابتسم ابتسامه خفيفه بعدين قال:تصدق خايفه عليه من مصيره مع مرته..
الجالي زاد ضايق وماباش يعلق..
وركب الدروج..وعمر ركب وراه..
🍃🍃🍃🍃🍃
"اني بنموت ونعرف شن يقوللها شن يقوللها بش تصدقه هكي.."
صابرين بضيق:خلاص ياسرك قهرتي روحك بما فيه الكفايه اطلقي منه نجاه اطلقي وعيشي حياتك حرام عليك عمرك اللي قاعد يضيع في جرة واحد زي هدا مايسواش قشرة بصله..
نجاه وهي تبكي بألم حطت يدها ع صدرها وقالت بمرار...
نحبه ياصابرين نحبه حسي بيا بالله عليك..
صابرين بشي من الانفعال؛وهو شني يانجاة هو شني..
مدتلها التليفون وهي تقول..
شوفي..اقري...افتحي عيونك..مهما صار تقعد طوبى هادي مرته رسمي وقدام العالم كله..لكن انتي شني قوليلي ولاحاجه يانجاه..فيقي ع عمرك فيقي..طلقي واخدمي وكبري اسمك غدوة يجيب سيد سيده اللي يخليك تدفلي ع روحك وين تتفكري اللي درتيه ع خاطر ع هالمعفن..اسمعيني المرة هادي بس بالله عليك..
قعدت نجاه تهدي في روحها ..
واختها تشوفلها بقلق..
بعدين رشفت ومسحت دموعها وقالت..
اكتبي رساله وابعتيها لنسرين قوليلها تخبره اني غدوة جاية للشركه..
صابرين وهي دور في التليفون؛ايوه سلم وخيتي هدا احسن شي ديريه في حياتك..
وخشت ع رقم نسرين..
وبدت تكتب في الرساله..
🍃🍃🍃🍃🍃
"مش قتلك اني خلاص كرت احمر"
الجالي؛مش بالسهوله هادي بيني وبينها عيل..
عمر؛باهي نقولك حاجه خليها..تباعد عنها الفترة
هادي وخليها تهدا كان بتقعد تطلعلها ديما في وجهها تفكرها باللي صار و تزيد تعصبها وتخليها تكرهك بزياده..ابعد وخليها تفكر بهدوء بالك تفكر في العيل وتغير رايها بعدين..
الجالي وهويفرك في ذقنه ويفكر:مش عارف...كلامك مقنع شويه..شبحله وقال..لكن نموت ونعرف من اللي قاللها ان كنت مع نجاة في الفيلا يومها!؟
عمر:مرات هي كانت تبع فيك..
الجالي:لا..مش هكي اللي صار كله وين نرجع نفكر فيه نتأكد في حد شافنا وقاللها..
عمر:معناها في حد تاني يعرف بقصتك انت ونجاه غير اللي تعرفهم..
قعد ساكت وهو يفكر في كلام خوه..
جي بين عيونه شخص واحد بس..
تفكر الموقف اللي جمعه بيه في عزاء عائشه..
نظراته ماكانتش مريحه...
فتح الجالي عيونه زين وقال..
هو مافيش غيره..
عمر بتساؤل؛من هو..
ناض الجالي وهو يقول..
فوت..
ومشي للدار..وسكرها عليه..
طلع تليفونه من جيبه وخش ع سجل الاسماء وقعد يدور لين طاح في رقم مختار..
لما لقاه اتصل بيه طول هو متوتر وخايف..
ردت عليه البداله..
"الرقم المطلوب مقفل"
نزل التليفون وهو يفكر بخوف ويقول..
معقوله هو!؟باهي كان هو علاش سكت علاش مادارش شي من البدايه!؟..
ضيق عيونه وبدت ع وجهه ملامح الندم وهو يقول..
غير شن درت في روحي بس!..
فجأه..
رن تليفونه..
قامه شافه نسرين تتصل..
رد عليها..
الجالي:هاه؟
"توا هديكا بعتتلي رساله قالت بتجيك غدوة للشركه"
الجالي:تمام..
وسكر عليها..وحط ع رقم تاني واتصل بيه...
🍃🍃🍃🍃🍃
وتعدي الساعات..
والليل يغماق لونه...وفي اللي الحياة بكبرها ولى لونها غامق في عيونهم..
اسود قاتم..
وهما يدوروا فيه ع بقعة نور يهتدوا بيها للطريق اللي طلعهم لهالسواد..
وهدا اللي دير فيه طوبى..
اللي كل ماتشتد عليها..تشد في الذكر والدعاء والمصحف..
تشد في حبل الله وهي واثقه ومتأكده انها بيه حتنجى مهما كان حجم المصايب اللي نزلت عليها..
🍃من جهة تانيه..
كان عبد القيوم يوتي في روحه لرحله البر اللي حتكون لمدة يومين..
خدي معاه اللازم كله...
والمهدي وربيع ونضال وعمر تجهزوا للرحله هديكا الليله قبل ليرقدوا..
🍃الجالي بتهكم؛ومن امتى هالصحبه!؟
عمر حط الشطنه في مكانها وقال؛علاقتي بيه كويسه من قبل..وخش السرير..
الجالي ابتسم تهكما..
ومشي طلع من حداه للصالون..
وهو رقد ع ظهره وعطي بوجهه للسقف وقعد يفكر لين خداه النوم ورقد..
🍃🍃🍃🍃🍃
"نضال عاد فكنا مم الغيره العبيطه"
نضال؛غيره عبيطه!..
"ايه لما تبدا ع الفاضي..الراجل ماقامش عيونه فيا اصلا ولاعبرني"
نضال سكت شويه بعدين قال؛تمام سكري ع ام سيرته وقوليلي غدوة عندك محاضرات..
"ايه محاضرة وحده بعدين زي ماقتلك بنرفع ماما وعمتي وخالتي صفيه للسوق"
نضال؛ردي بالك ع روحك بنقعد مشغول عليك راهو..
"اني اللي بنقعد مشغوله عليك بتطلع برا طرابلس بكل"
نضال؛مش اول مرة ماتشغليش بالك..
"اسمع صورلي كل شي وابعت اول بأول باهي نبي نحس روحي معاكم"
ضحك وقال؛حاضر..نحبك..
"نموت فيك"
🍃🍃🍃🍃
"انت شن رايك فيه"
محمد شنيبه؛الراجل كويس وماريتش منه عيب لكن المهدي يعرفه اكثر مني راجي لين يروح من الزرده متاعه بعدين نشوفوا شن يصير..
مغليه؛ان شاء الله خير..خلاص للأسبوع الجاي ان شاء الله..لكن هاه ياحاج رد بالك طلع الموضوع لحد قبل ليصير منه..
هز راسه وقال؛عندك حق...
مغليه؛خل ربي يكلملها ع خير..
محمد:ان شاء الله واهم شي عندي يحيى مايبيشي يقعد بيناتنا معزز مكرم..
مغليه؛امه قالت يبيها بولدها..
محمد؛بالك غير كلام وخلاص..
مغليه ؛تو بعد يروح المهدي ونخبروه هو يهدرز معاه ويفهم منه..
محمد:ع قولتك..هي تصبحي ع خير..
مغليه:قدامك كل خير..
🍃🍃🍃🍃🍃
تاني يوم..
الساعه9:45صباحا..
المهدي؛مانوصيكش عليهم نسرين..
نسرين؛راهم صغاري حتى اني طمن بالك عليهم في عيوني..
المهدي هز راسه بعدبن تنهد وقال؛هي السلام عليكم..
نسرين؛وعليكم السلام..
وقعدت واقفه تشوفله لين طلع من الحوش..
🍃وكانوا سيارات ربيع وعبد القيوم في الانتظار..
ركب مع عبد القيوم المهدي ونضال وعمر وربيع..
وسيارة ربيع اللي فيها البضاعه يسوق فيها "محمود" الراجل اللي معتمد عليه المهدي في اغلب في اشغاله..
عبد القيوم؛هاه شنو نتوكلوا..
المهدي؛توكل..
وتحرك عبد القيوم ..
ووراه سيارة ربيع..
طلعوا من شارع القهوة وهما يهدرزوا عن الطرق المختصرة.والآمنه اللي توصلهم لوجهتهم..
عبد القيوم؛خلاص نطلعوا من غادي..
المهدي؛صح الطريق بتطوال لكن آمنه..
عبد القيوم؛مش مشكله المهم آمنه..
نضال:باهي خلونا من آمنه وكميله وحركوا الجو شويه زردة راهو..
ربيع ؛بالله شغل نك لغ الزمن..
نضال؛شن هدا!؟
عبد القيوم بإبتسامه؛اغنيه تارقيه..
ربيع؛ديما نسمع فيها منه لين نزلها وقريب نحفظها كلها..
المهدي:سمعنا..
عمر:وبعدين يترجم..
عبد القيوم بإبتسامه:تمام..
وشغل منظومة السيارة ع الأغنيه..
وقعدوا يسمعوا..
من البدايه كانت غريبه عليهم بعدين انسجموا معاها..
🍃🍃🍃🍃🍃
الساعه11:30صباحا..
خشت للشركه وهي تمشي بغرور..
ركبت ع طريق الاصنصير للدور اللي فيه مكتبه..
وصل بيها وطلعت منه وقعدت تمشي بإتجاه المكتب..
وصلت في السكرتاريه وقالت..
نجاة برفعة حاجب؛الباش مهندس موجود؟
؛ويراجي فيك تفضلي..
خدت نفس ومشت لمكتبه ودقت الباب وخشت وسكراته وراها..
هو لما قام عيونه وشافها خاشه قال؛علاش ماجبتش امس..
قعمزت ع الكرسي وحطت رجل ع رجل وقالت..
لهالدرجه مستعجل..
هو ماردش عليها..قام سماعة تليفون المكتب وقال..
بري جيبي الراجل..
وسكر السماعه..
نجاه؛حتكمل عمرك نادم..
هو كان يشوفلها ببرود بدون رد..
نجاه ودموعها في عيونها؛بعد اليوم خلاص معاش في خط رجعه ياجالي..
هو قال:ماتحاوليش تقنعيني نولي في كلامي.
نجاه؛لهالدرجه خايف من ماليك!؟ راضي تكمل عمرك مع وحده ماتبيهاش بش بوك مايغضبش عليك وياخد منك كل شي..
هو ولاكلمه..
نجاه؛صدقني طوبى ماتمشيش معاك مش حتلقى فيها الحاجات اللي تحبها في المراة..انت بروحك ياما قتلي انك تحب المراة القويه الطموحه وطوبى ابعد ماتكون عن المراة هادي..
هي تتكلم عليها وهو يتفكر في المواقف الاخيره اللي جمعاته بيها..
نظرات عيونها..اسلوبها...حتى ابسط تفاصيلها زي مشيتها..
راسخات في دماغه من كثر ماعجبوه..
نجاة ودموعها في عيونها؛الندم واعر ياجالي لانه يجي بعد مايفوت الفوت..
دق الباب..
الجالي:ادخل..
انفتح الباب وخش راجل كبير في العمر..
وين شافاته عرفاته..
الجالي:بالله سكر الباب وتفضل..
سكر الراجل الباب وقعمز مقابل نجاه..
الجالي:سامحنا ياشيخ مالقيش غيرك حد ثقه يشهد معاي..
شبح لنجاه وقال..تتفكريه الشيخ اللي دارلنا عقد القران..
نجاه وهي تشوفله..
تفكرت هداكا اليوم..وتفكرت قداش كانت فرحانه فيه..
الجالي؛نجاة..
حركت عيونها ليه..
وقلبها يدق بقوة..وكل دقه كانت تسمع فيها..
صقعت كلها مع بعضها...وكانت حاسه روحها بتفقد الوعي..
"انتي طالق"
ونزلت المصقله ع رقبتها وقطعتها..
حست روحها ماتت..بس قاعده تتنفس..
وانفاسها تطلع متسارعه..
الجالي فتح درج المكتب طلع منه ظرف فلوس وحطه قدامها وقال..
مؤخرك كامل...
هي بصعوبه ناضت وقفت وقالت بصوت مخنوق..
مانبي منك شي..
ولفت ومشت طلعت من المكتب..
الجالي شاف للشيخ وقال؛في النهايه نصيب مفروض ماتعترضش ع قسمة ربك..المهم اني عداني العيب ودرت معاها الواجب وزياده..
المأذون هز راسه وقال؛فعلا عداك العيب...
هو ابتسم وقال..ع العموم بارك الله فيك اللي عطتيني شويه من وقتك وان شاء الله مرة تانيه نحضرك في الفرح...
🍃🍃🍃🍃
وهي بعد طلعت من عنده..
كانت منهارة تماما من داخل..
قعدت تشد في روحها بالقوة بش تطلع واقفه ع رجليها..
طلعت برا الشركه بكل..
وقفت تاخد في نفس بعدين قالت بنبرة مرتجفه..
والله لما نخليك تبكي معاي اليوم ياطوبى والله..
ومشت طول لسيارتها...

#انتفاضة_الاقحوان
#طوبى

....يتبع...