#طوبى "جنة طوبى"
#جمان_فريد
#الجزء الثامن_والسبعين "حق الرد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
#الدعاء
📌قال الشيخ ابن باز رحمه الله-:
"الإلحاح وحسن الظن بالله، وعدم اليأس، من أعظم أسباب الإجابة. فعلى المرء أن يلح في الدعاء، ويحسن الظن بالله -عز وجل-، ويعلم أنه حكيم عليم، قد يعجِّلُ الإجابة لحكمة، وقد يؤخِّرُها لحكمة، وقد يعطي السائل خيرًا مما سأل".
[📚فتاوى ابن باز (١٢٢/٢٦)].
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 للّهِ سلَّمتُ أمراً لستُ أَعلمهُ !
مالي على حملِه لكن سَأرضاهُ
ربّـاهُ لولاكَ لا سنـدٌ و لا أحـدٌ ،
فأنتَ حَسبي وَ حَسْبِي أنّكَ اللهُ🍃
___________________________________________
متكيه في دارها والمروحه مقابلتها..
سرحانه في همها اللي هو هم صغارها وتندب في حظها وحظهم بينها وبين نفسها..
فجأة سمعت باب الحوش يدق..
صفيه بتذمر:من لما داروله هالقيلا وهو مش مريحنا..
ناضت ومشت طلعت من الدار وهي تمشي بعصبيه..
طلعت للباب الخارجي اللي قاعد يدق..
وطول فتحاته..وتفاجئت..
لما شافت زوز نساوين هيئتهم حلوة ونازكات..
ابتسمت بآحراج وقالت..
/تفضلوا..
وحده فيهم قالت..
/حوش علي الواعر؟
صفيه؛ايه وصلتي..
ابتسمت المراة وقالت مازحه:باهي دخلينا عادي..
ضحكت بإحراج وقالت..
/سامحوني..تفضلوا تفضلوا..
:يزيد فضلك..
وخشوا وصفيه تتفحص فيهم وهي تقول في نفسها..
" ووه ع منظري قدامهم ياحشمتي "
بعدين قالت وهي ترحب بيهم..
/تفضلوا خشوا تفضلوا...الله غالب الضي هارب والجو حريقه.
؛لابالعكس ولى لطيف توا..
وخشت هي وياهم داخل والتانيه تقول..
/سامحينا جينا من غير موعد..
صفيه:معليشي مش مشكله..هي تفضلوا قعمزوا..
وقعمزوا الزوز وهي قالت..
/شويه وجايه..
ومشت لدارها..بعد مامشت..
:ريتي ذوق ولدك!
وهي تتفحص في الحوش..
/اسكتي فكينا ماصدقت قال نبي نتزوج..
:باهي انتي عاجبك..قالتها وهي توزع في نظرها ع المكان..
؛لامش عاجبني لكن ماعندي ماندير..
ع جية صفيه وهي مبدله فستانها وجايه بالمروحه تجري وهي تقول..
/والله مراوح الشحن هادوا داروا فينا خير..
ابتسموا الزوز مجامله..
وهي شغلت المروحه وقعدت تفكر في اللي جايين خطيره واضح جدا ولمراة عندها خبره في الحياة السبب اللي جايين ع خاطره...
🍃🍃🍃🍃🍃
وفي حوش تاني قايمه فيه الافراح..
كانت فايزة مع المراة اللي تخدم عندها لاهيات بتزيين صاحبة المناسبه وبعض قريباتها..
☘في الوقت اللي فيه مروة لاهيه مع مناسك وصاحباتها وقريباتها..
كانوا عالم تاني غير اللي تعرفه..
عالم الحياة المرفهه..الكلام كله عن الطلعات والسفر واخر صيحات الموضه...
برغم انبهارها بالعالم متاعهم لكن ماحستش معاهم براحه وكانت تبي تطلع من حداهم..
ناضت وجت بتطلع وقفتها مناسك لما قالت..
/وين ماشيه؟
مروة؛بنمشي نشرب ميه..
هزت مناسك راسها..
ومروة مشت طلعت من حداهم وكانت ناويه تمشي للدار االي فيها امها تقعد معاها لين تكمل ويروحوا..
☘ومن الدور التاني للأول اللي كانوا الشغالات يحوسوا فيه..
خش مالك ونادى ع وحده فيهم جاته طول..
مالك؛كلهم فوق ولا؟
:ايه كلهم..
حك حاجبه وقال؛اسمعي اركبي لمناسك قوليلها قالت مالك نبي السوريه المغربيه اللي لونها زي الرصاصي مع السروال القنتشي..
:حاضر..
ومشت للدروج ركبت..
وهو مرر نظره ع المكان..بعدين مشي ركب حتى هو...
☘ومروة متوجه للمكان اللي فيه امها سمعت صوت عيل يبكي..
وقفت في مكانها بعديت تبعت مصدر الصوت..
🍃اللي وصل لمالك وهو راكب الدروج عرفه كان لولد خوه اللي يحبه حب كبير..
نسي روحه وركبله يجري..
☘ومروة وصلت في الولد اللي كان عمره مايتعداش السنتين لقاته صباع يده حاصلات في حديد سياج الدروج..
جاته تجري وطبست عليه وهي تقول..
/ياروحي..خلاص حبيبي خلاص..
وقفت عليها الشغاله وقالت..
/خيره!؟
مروة وهي تخلص في صوابعه بحذر..
/صباعه حاصلات تو نحولهم..اهوا حولناهم حبيبي خلاص هي..
وخداته رفعاته في حضنها وقعدت تسكت فيه..
🍃ع وصلته هو قال بعصبيه وخوف..
/عدي!
ويجوا عيونه عليها وهي شاده ولد خوه طول ولى نزل وهو مرتبك..
هي التفتت شافاته نازل وهو عاطي بالظهر وخرت عن السياج وقالت للشغاله..
/خوديه..
:هاتي خل نرفعه لامه..
ولما جت بتعطيه للشغاله الولد تمسك بيها وماباش يطلقها..
ضحكت مروة وقالت..
/مايبيش..
الشغاله بإبتسامه؛خليه ارفعيه انتي لأمه..
"خليه عدي يامنجيه!؟"
مروة بصوت هامس:بوه هدا!
:لاهدا عمه..علت صوتها وقالت..كويس كويس مافيه شي..
"جبيه جيبي"
مروة؛هدا مالك؟
الشغاله بشي من الاستغراب..
/ايه..
مروة ابتسمت وقالت..
/قوليله رفعوه لامه..ومشت بيه من حداه..
استغربت هلبه الشغاله..بعدين مشتله..
وصلت في الدروج وقالت..
/رفعوه لامه..
مالك؛قتلك جيبيه اني!
:شد البنيه معاش يبي يطلقها شن بندير!
مالك بإستعباط؛اما بنت!.
:هادي صاحبه مناسك بنت المزينه..
عقد حواجبه وقال..
/باهي هو علاش كان يعيط؟
:صوابعه كانوا حاصلات في حديد الدروج.
مالك بنرفزة؛وامه لاهيه بالزواق والستوك ومسيباته كان جي طايح من الدروج ولاصارتله مصيبه ينفعها العفن اللي دير فيه..سكت شويه بعدين قال..خلاص بري انتي ديري اللي قتلك عليه..
:حاضر..ومشت بسرعه..
اما هو نزل وقف في المستراح وقعد يراجي..
《 شد البنيه معاش يبي يطلقها شن بندير!》
ارتخت اعصابه وابتسم لما تفكر كلام الشغاله عنها وجي بين عيونها شكلها وهي تسكت في ولد خوه..
حط صوابعه الوسطى والسبابه ع مكان القلب وخبط عليه وقال..
/انت مولي مش تمام ياغالي..تنهد وقال..مش تمام...
🍃🍃🍃🍃
حطت فنجان القهوة اللي خدت منه رشفه وقالت..
/هو ولدي كان مسكر راسه ع الزواج كان لاهي بالقرايه والخدمه وتوا الحمد لله وصل للي يبيه كون نفسه ودار اسم لروحه ومعاش قعد عنده غير انه يكمل نص دينه ويستقر..
صفيه اللي كان بطير من الفرحه ظاهرت بالعكس قدامهم وقالت..
/ربي يبارك..
بنت المراة قالت..
/حني نعرفوا كل شي ع بنتك وكون انها مطلقه مانشوفوش فيه عيب زي باقي الناس اللي يقولوا كيف يعني عزري وياخد وحده متزوجه من قبل حني اللي يهمني راحة خوي وهناه..
حست صفيه ان الكلام كان فيه اهانه مبطنه..
والابتسامه اللي كانت راسمتها ع وجهها من اول ماجو بدت تخفت..
امه قالت:ايوه هادي همنا ان يستقر ونتريحوا عليه..
صفيه؛والله شن بنقولك الموضوع هدا ماعنديش فيه كلمه.
الكلمه الاولى والاخيرة لصاحبة الشأن..
امه قالت؛اكيد اكيد..قاعده هي؟
صفيه:ايه قاعده غير اليوم يوم راحتها لكن تو نمشي نكلمها..شويه بس..وناضت ومشت طلعت من حداهم..
بعد ماطلعت..
:شن الكلام اللي قلتيه هدا!..
:ماقلت الا الحق..
:اسكتي معاش تدوي بكل مانبيش نسمع صوتك..
🍃وفي دار اميمه...
خشت صفيه وهي مضايقه وجت لبنتها ونوضتها من نومها..
اميمه بتساؤل:ضيوف شني!؟
صفيه بنفاد صبر؛غير نوضي تحركي بدلي حوايجك وتعالي للصاله...
ومشت طلعت من حداها بسرعه واميمه معاها بعيونها وهي مستغربه اكثر بعد مالاحظت انها مضايقه..
🍃ناضت ومشت للحمام غسلت وجهها ع السريع بعدين طلعت لدارها طلعت بلوزه بيضا وسروال بيج لبستهم..
بعدين مشطت شعرها ورفعاته..وحطت عطر وطلعت للصاله..
☘وين خشت عليهم وشافوها..
عجبتهم كانت مميزة شكلها وهيئتها تشبه للأوروبيات لكن هالشي ماشفعلهاش عند اخت الخاطب وامه تقعد ناقصه في نظرهم وهلبه فيها ولدهم العزري...!
سلمت اميمه عليهم ومشت قعمزت قريبه ع امها..
هني اخت الخاطب تكلمت وقالت..
/اني اخت الدكتور قصي وهادي امي..
عقدت اميمه حواجبها بإبتسامه استغراب وقالت..
/اهلا وسهلا..اني قبل تعرفت ع وحده من خوات الدكتور..
:ايه هديكا الصغيره حكتلنا عليك..وحتى خوي حكالنا عليك لما قرر يتزوج ودلنا ع مكانك وحني جينا نتموا ع خير ان شاء الله..
شافت صفيه لبنتها بضيق..
واميمه ضحكت بإستغراب وقالت..
/لحظه شويه..اني الموضوع هدا كلمني فيه دكتور قصي قبل واني..رفضت..
بدت ع وجوههم ملامح الاستغراب والمفاجأة..
اميمه:اكيد مش لعيب فيه بس اني نشوف فيه اخ كبير فرق العمر بينا مش شويه وبعدين اني حاليا مانفكرش في الزواج نهائي..
قعدت تشوفلهم صفيه بنظرات تشفي بعد ماقلبها برد..
اخته قالت:الحق حني فهمنا انكم متفاهمين..
اميمه؛هو قال هكي!؟
:لاماقالش بس حني هكي فهمنا منه..
صفيه:معناها فهمتوا غلط..
شافولها الزوز وهما يحاولوا يكتموا غضبهم..
اميمه:ربي يعطيه احسن مني..
امه قالت:ان شاء الله وانتي اشاء الله ربي يعوضك خير..
شافت اخته لأميمه بنظرات فيها شي من المكر بعد ماقالت امها كلام برد ع قلبها حتى هي..
اميمه بإبتسامه غصب:بارك الله فيك..
صفيه:سامحونا بالله الله غالب نصيبات لكن ولدكم الله يهديه هو اللي حطكم في هالموقف..
شبحت اميمه لأمها بدهشه..
وهما حمقوا وناضوا والام قالت..
/لاياوخيتي لاموقف شي نصيبات ع قولتك..
ومشوا الزوز طلعوا وهي طلعت تسقد فيهم وع وجهها ابتسامة تشفي..
اميمه بضيق..
/تو هدا شن يبي بالحركه هادي!؟
شويه وجت امها وهي تقول..
/يستاهلوا هالمعنطزات ماحاسبات في رواحهم..
اميمه:شن قالوا قبل لنجي..
صفيه:يلوحوا في الدوة زي ماسمعتي..لكن.الدكتور هدا علاش يبعت في اماليه بعد ردتيه..
اميمه؛وين نندري ع دعوته مش ناقصاته بكل..
ومشت من حداها لدارها..
تنهدت صفيه بحسرة وقالت..
/عليك بخت بختك يابنتي وزادو طيحوا سعدك هالعيله المعفنه اللي خلطنا عليهم حسبي الله ونعم الوكيل..
🍃🍃🍃🍃🍃🍃
وعند هديكا العيله..
اللي كانوا مقعمزين كلهم مع بعضهم في الصاله بحضور خديجه اللي جت بعد جيتهم بشويه..
هدرزوا شويه وضيوفهم...
وطول القعده عيلة محمد شنيبه كلها كانوا ملاحظين ان في صدورهم كلام يراجوا في اللحظه.المناسبه بش يطلعوه..
ومحمد خوهم عطاهم هالفرصه لما قالت..
/نشوف فيكم مش كيف قبل..حتى جيتكم فيها حاجه مش مزبوطه..
شافوا لبعض..
ومغليه والمهدي وخديجه يراجوا حد فيهم يتكلم..
وتكلم الكبير وقال..
/البارح يامحمد انحطيت في موقف لأخر عمري ماننساه..
محمد بقلق:موقف شن؟!
قاله؛جاني عمك الحاج وحيده**** ومعاه نسيبكم علي الواعر مدخله واسطه بينكم وبينه بش تخلوا ولدكم يطلق حفيدته..
كلهم انصدموا..
محمد ومرته وصغاره..
وكامله واختها مركزين بنظرهم ع ردود افعال مغليه وخديجة بالذات..
وخوهم الكبير مكمل يقول..
/عليش تخلي الموضوع يوصل لهنى يامحمد علاش ماحليتوش المشكله بين بعضهم بالعقل والحكمه! معقول يامحمد ماعندكش حكومه ع ولدك وهلك ومخلي موضوع كيف هدى يحكمن فيه النسوان ويطلقن!
محمد وهو يحاول يكتم غضبه..
/خودني بحلمك ياطه..افهم اللي صاير مني بعدين احكم.
كامله؛بعد اذنك ياطه معليشي..
شبحوا لكامله..
خوها قال:تكلمي ياكامله..
كامله وجهت نظرها لمحمد وقالت..
/سامحني يامحمد ياخوي كل شي واضح مايبيش توضيح اكثر من هكي..المراة جت لحوش اختك صالحه الايام فاتوا اقسم بالله حالتها كانت تبكي الحجر...ياريتها الحكايه وقفت ع المشكله اللي بينها وبين راجلها الحكايه واصله في الشرف ياخوي..
اختها كملت تقول..
/والله هديكا الليله مارقدت واني نتخيل في وحده من بناتي مكانها بعيد وبر..وجعتني وسط كبدي لما قالت اني مانبيلاش الفضيحه وسترت عليه ع خاطر بيولي بنتي كيف هما رضوهالي بالظلم والافتراء..
مغليه قاطعتها وهي تقول..
/غير شويه شويه ياصالحه..تو انتم مصدقينها ع خاطر نزلت دمعتين وجابين ضد ولد خوكم! من اللي تعرفوه كويس ولد خوكم ولا وحده ماعرفتوهاش وماشفتوهاش كان مرتين تلاته في حياتكم!..
كامله؛قصدك تبينا نوقفوا معاه في الغلط لأنه ولد خونا!
جت خديجه بترد امها شدت ذراعها وقالت.
/توا طلع الجالي ماينفعش ياكامله..انتم كلكم ياما قلتوها ياريت ولادنا زي الجالي! توا بيطلع مش كويس!..
صالحه؛قالتلك المشكله اللي بينه وبين مرته مانبوش نحكوا فيها حني كلامنا ع الطعن في الاعراض يامغليه..
مغليه:انا لله وانا اليه راجعون..راني مراة حاجه بيت الله ونخاف من ربي ياكامله وبناويتي مستحيل يوصلوا في عرض حد حتى لو كانوا عدوينهم مش كنتهم وام صغارهم! كيف تصدقوا حاجه زي هادي مش عارفه!..
محمد شنيبه بأسف..
/اخر حاجه كنت نتوقعها منكم..المفروض لما جوكم لزيتوهم مش تجوا في صفهم وتكونوا معاهم علينا!
واحد من خوته قال..
/باهي كان العيله ماتنفعش وهي ماتصلحش ليش ولدك ما يطلقها !؟
محمد؛اني لازه لز ع خاطر الحاجه هادي وقتله ماتخشش للحوش لين طلقها..
كامله:وشن معناه هدا يامحمد! المراة لو كانت عافنه علاش ولدك شاد فيها!؟
وهالمرة كذلك جت خديجه بترد شدت امها ع ذراعها شافتلها بعصبيه..
زادت مغليه شدت ع يدها وهي تشوف لكامله..
محمد؛وين نندري ع بلاه اني شن صايرله ولاشن مديورله..
صالحه:بالله ياخودي ماتحط في ذمتك راك عندك ولايا تربح..
محمد بإنفعال؛وشن سمعتيني قلت!
كامله؛صل ع النبي يامحمد واسمع مني بعيد عن كل شي حلو هالموضوع بينكم خير مايخش المحاكم..
محمد بغضب:اعلى مافي خيلهم يركبوه..
خوه الكبير..
/شن جيتنا هدي ماليهاش قيمه عندك ولاشنو!
محمد بضيق؛ع عيني وع راسي ياخوي وانت اكثر واحد عارف قدرك عندي..لكن اللي بينا وبين عيله ولت مسألة كرامه مادام وصلوها لهني..
واحد من خوته قال..
/هما دخلونا في الموضوع بعد ماروا منكم حد دار فيه شي لاانت ولاولدك المهدي كبيرك..
المهدي زاد غضب ع غضبه وقعد يصارع في نفسه بس يلتزم الصمت خوف يقول كلام يندم عليه بعدين..
محمد شنيبه؛لأنهم ناس ماتقدر حد كيف تبيني نقدرهم..مغليه مشتلهم لعزي بوها لزتها..مشتلها مرة تانيه بش تهدي النفوس ويوصلوا لحل لزتها مرة تانيه وحده زي هادي لامحترمه ولامتربيه اصلا كيف تبينا نديروا معاها!.
خوه قال..
/خلاص خلي ولدك يطلقها غصب عنها وعطوها حقوقها وارتاحوا..
محمد شنيبه؛حق شني! ماليهاش عندنا قرش واحد وحده زي هادي..
مغليه:هو هدا الحقوق طامعين في المؤخر والفيلا..
محمد هز راسه وقال..
/ولت واضحه يامغليه الحكايه تجارة..
المهدي حط يده ع فمه وقعد يحك فق لحيته بعصبيه..
كامله؛ياخوي هادوا حقوقها شرع وقانون..
محمد؛لما تكون ع حق ياكامله ! تي هي تبلت ع ولد خوك وفبركتله قصه تشوه سمعته بش تطلب الطلاق
صالحه:من قالك مفبركه! المراة عارفه روحها شن تقول وراهو لمحت في كلامها ان ولدك غالط مع وحده قريبه عليكم هلبه..
ضحك بسخريه وقال..
/ياوالله عليك حاله! علاش تلمح علاش ماتقولش هي مني طول! وحده زيها واصلين في شرفها ع قولتها مفروض اللي هناك حطاته..
مغليه؛سامحوني الموضوع واضح هلبه لكن انتم جايين متحاملين..
كامله:لاحول ولاقوة الابالله..
صالحه:العفو!
وسلفها قال..
/حتى حني بينا وبينكم ثار يامغليه بش تقولي هكي!
محمد بصرامه:مغليه اسكتي بكل..
سكتت وهي تشوفلهم بعجرفه..
وهو كمل يقول..
/سامحني ياخوي الموضوع هدا مانبي حد يدخل فيه حيقعد بين ولدي ومرته بس والحاج وحيده وصله ان الناس هادم مافيهم تراس يحكم الحكومه عندهم لنساوينهم هما اللي يمشوا فيهم والذكورة يهزوا في روسهم..
ناض خوه وقال..
/مادام هكي معناها خلاص الكلام في الموضوع تم وخلصوها بيناتكم..
ناضوا معاه خوته وخواته..
محمد ناض وهو يقول .
/وين ياطه؟
:لحوش خوك بايت عنده الليله..
هو قال؛بتطلع من حوشي وخاطرك مش طيب!
:لامحمد بالعكس وقاعدين ع موعدنا بكرا ان شاء الله..هيا..
ومشي طلع من الصاله وخوته لحقوه ومحمد وراهم..
بعد ماطلعوا..
خديجه بعصبيه؛ريتوها شن دارت ريتوا!!
مغليه بغضب..
/طلعت شيطانة رجيم..
المهدي:تو انتم مصدقين اللي تقولوا فيه!
شبحولها بإستغراب..
هو بغضب..
/انتم مااستغلتوش طوبى وماليها بس استغفلتوا حتى بوي اللي انحط في هالموقف بسبب دبايركم السود..
مغليه؛شن تقول انت!؟
ع خشة محمد شنيبه اللي كان في اقصى مراحل الغضب..
/هادي اللي ع نياتها!هادي بنت العيله متربيه هادي!..
تي هادي وحده...سكت شويه بعدين قال..استغفر الله العظيم..
المهدي؛بوي رد بالك تحط في رقبتك ذنب وليه مظلومه..وتناصر اللي ظلمها حتى لو كان ولدك واهل حوشك..
مغليه؛طول عمرك هكي من يومك يامهدي ماتقولش امك وخوتك ماتقولش ماليك ديما مع الناس علينا وخلاص..
المهدي:بالله يام فوتيها الغنايه اللي شدتهالي هادي..
بوه قال:تكلم مع امك كويس!
المهدي شافله وقال..
/معاش خلوا فيها احترام يابوي بعد اللي عرفته..
امه واخته قعدوا يشوفوله بقلق..
وبوه قال:شن هو اللي عرفته!
المهدي؛تتفكر في محمد لما قال انه شاف الجالي مع وحده اكثر من مرة في الحوش! تعرف الوحده هادي طلعت مني يابوي..
محمد قعد قلبه يدق بقوة من التوتر..
ومغليه وخديجه مركزين عليه بنظراتهم بالغة القلق..
"نجاة يابوي"
تحولت ملامح محمد شنيبه الغاضبه للجمود بعد ماسمع شن قال ولده..
وخديجه ومغليه مع القلق تملكهم خوف كبير..
المهدي؛المراة اللي مخليها تخش علينا وتطلع وتوا جبتها وسكنتها عندنا..هادي هي اللي ماتنفعش يابوي مش بنت الواعر..ويشهدوا ع كلامي امي..وخديجه..
خديجه:من قالك هالكذب الكبير هدا كله!
المهدي:اطلع منه الجو هدا ياخديجه خلاص كل شي ولى مكشوف وواضح..شاف لبوه وقال..وبنت الناس اللي وصلت فيها بكلام غلط يابوي..لعند هاللحظه قاعده ساترتنا وساتراته حتى بعد ماوصلوا في شرفها..
مغليه بدت تبكي من الخوف وهي تقول..
/لالا انت مش ولدي مانكش ولدي..في ولد هكي يدير في خوته وامه ياناس يصدق في امه كلام كذب ويتهمها بحاجات زي هادي!!..لا والله مانك صافي يامهدي..فجأة قعدت تتنفس بسرعه وحطت يدها ع قلبها وهي تقول..
/جعنكم تلقوه ياعيلة الواعر جعنكم تلقوه..
خديجه بخوف:امي خيرك!
والمهدي بخوف قال..
/يام!..
مغليه وهي داهشه..
/لااني امك ولانعرفك لااني ولانعرفك..طلعه يامحمد ولا والله نطلع اني..
خديجه بدت تبكي وهي تقول..
/خلاص يام خلاص..وبعصبيه قالت..امشي اطلع برا..
بوه جاه وشده من ذراعه وقال..
/تعالى..
وخداه ومشي والمهدي كان حاس وقتها بشي من الاجهاد والارهاق صابوه بسبب الانفعال..
وين طلع بيه بوه برا قال..
/اسمعني جاي..موضوع خوك الجالي معاش نبيك تدخل فيه بكل خليك برا منه!
المهدي قعد يشوفله بشي من التعب وبدي يحس بالوهن..
وبوه مكمل يقول..
/ولو صار وخشيت فيه ودرت حاجه من وراي وقتها ندير مادار لطفي الواعر مع ولده مختار..
حاول يجمع قوته ورد علي بوه وقال..
/اني اللي بنديرها مش انت..من اليوم..من هاللحظه..لاعاد نعرفكم ولاتعرفوني..
ومشي وخلا بوه في حالة يرثى لها..
بعد ماطلع من الحوش..
بغضب شديد ولى خش للحوش..
وصل في الصاله وخشلها وقال بصوت غاضب..
/خديجه!
التفتت وهي مفجوعه..
محمد:تتصلي بالكلب اللي ينقاله الجالي وتقوليله بوك يبيك تجيه توا..توا كلميه وقدام عيونه..
خديجه بخوف..
/حاضر..حاضر..
مغليه في نفسها..
"يانهاري الاسود يانهاري الاسود"
محمد:وانتي يامغليه كلمي نجاة قوليلها تسيب اللي عندها وتجي بطولها ماتجيب معاها حد من الصغار..
مغليه:يامحمد..
قاطعها بغضب وقال..
/ماتناقشنيش ديري اللي قتلك عليه وانتي ساكته..
مغليه بخوف:حاضر..حاضر...
خديجه وهي تحاول تخفي خوفها ردت علي خوها وهي تقول..
"ايوه جالي وينك انت"
~~~~~~~~
نجاة بقلق:باهي ياعمتي حاضر شويه وجايه..
نزلت التليفون بعد ماسكرت مغليه وهي تقول..
/صوتها مش طبيعي..حي عليا كان الحكايه ليها علاقه بفالطه صابرين..عطيك ماينزعك ياصابرين...
ومشت بسرعه للدار...بدت حوايجها بعدين طلعت وصت صغارها ع بعض ومشت طلعت من الشقه..
🍃نزلت للجنان ومشت بسرعه بإتجاه الحوش..
وين قربت توصله..
انفتح باب الحوش الخارجي..
شافتله..لقت الجالي خاش ..
وين شافاته قعدت جامده في مكانها ونست كل شي..
اما هو وين شافها جايه بإتجاه حوش اهله في الوقت اللي نادوا عليه فيه..
عرف اللي مستنيه من بوه داخل....
#حق_الرد
#طوبى
