#طوبى "جنة طوبى"
#جمان_فريد
#الجزء_السابع_والتسعين"الأوركيد الأبيض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
عن أبي موسى الأشعري رضي الله عنه، قال: قال رسول الله صلى الله عليه وسلم: (مَثَلُ الذي يَذْكُرُ رَبَّهُ وَالَّذِي لا يَذْكُرُ رَبَّهُ، مَثَلُ الْحَيِّ وَالْمَيِّتِ) (رواه البخاري) .
🌿🌿🌿🌿🌿🌿🌿🌿🌿🌿🌿🌿🌿🌿🌿
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃عد تنازلي🍃
________________________________________
حط يده ع مقبض الباب بهدوء..
وفتحه بسرعه...
"اهو تشوفي فيا قدامك حالي باهي"
"مانطمنش لين نشوفك بعيوني غدوة جاياتك"
رفع مختار يده اعتذارا وجي بيطلع..
رضا:خليك..
"علاش ماتبنيش نجيك؟"
غمض عيونه وفتحهم وهو يقول بشي من الربكه..
/مش عليك استاذ مختار توا خش عليا وين شافني نكلم فيك جي بيطلع قتلك خليك..
"تمام حبيبي غدوة نكون عندك..حمد لله ع سلامتك مرة تانيه"
رضا:الله يسلمك..تصبحي ع خير..
"وانت من اهله حبيبي"..
نهي رضا المكالمه وشاف لمختار وهو يقربله..
وصل فيه وطبس عليه وطبع قبله ع راسه بعدين قال..
/اخر من يعلم!
رضا:عارفك وراك شغل مهم مابيتش نعطل ع فاضي..
مختار؛مختار شن تقول انت!؟ عارف قيمتك عندي معاش تقوله كلام زي هدا..
ابتسم رضا وهو يقول..
/اللي تشوف فيه كله حاجات بسيطه مادورهاش..
مختار مسح ع شعر رضا وهو يقول..
/حمد لله ع سلامتك..
رضا:الله يسلمك..
🍃وتحت قدام المستشفى..
ركبت صابرين سيارة فاتن وهي تقول بإنزعاج..
/من قاله!؟
فاتن؛مش عارفه..
امينه؛يمكن حد يعرفوا هنا سمع وبلغه..
فاتن؛وراد..وشغلت سيارتها وتحركت..
وصابرين تأففت بإستياء..
🍃فوق في حجرة رضا..
رضا:عارفني مانحباش ومستحيل نحطه في فم ..ممكن سكري ولاضغطي هبطوا واني نسوق..
مختار:صح انت الفتره الاخيره مش مهتم بصحتك زي قبل..
مرر نظره ع الحجره..من اول ماخش شم ريحة عطر نسائي يعرفه..
رد نظره لرضا وقال..
/في حد كان عندك ؟
رضا:مدام فاتن كانت عندي طلعت قبل لتجي ممكن بعشرة دقايق..
مختار:امم..تمام خل نمشي نشوف الدكتور المسؤول عن حالتك بش نفهم منه وضعك بالزبط..
هز رضا راسه بصمت..
مشي مختار وطلع من الحجره..
استنى رضا حوالي تلاته دقايف بعدين اتصل بصابرين..
🍃كانوا مازال قاعدين في الطريق..
لما اتصل بيها طول ردت عليه..
/ايوه رضا..
التفتت امينه تشوفلها..وفاتن تسرقلها في النظر من مراية السيارة..
"ايوه حبيبتي وينك توا"
صابرين؛في الطريق مروحين..
"تمام قولي لمدام فاتن خبرته انها جتني زيارة قبله"
صابرين؛تمام تو نقوللها..شن حسيته ماشك في شي؟
"في شن بيشك وهوخش عليا لقاني نكلم في ياسمين"
صابرين بغيره..
/حتى هادي عرفت!؟ غدوة بطب عليك من الصبح..
"نديرلكم نظام توكات هي تجيني الصبح وانتي في الليل'
صابرين بضحكه:تافه..
"هيا قولي الكلمه هديكا قاعد نراجي فيها"
صابرين بضحكه..
/انت في شنو ولا في شنو..
"هيا قوليها مش مسكر لين نسمعها"
صابرين شافت لأمينه وفاتن لقتهم مبتسمات..ابتسمت بخجل وقالت..
/نروحوا ونكلمك..
"مش راقد لين نسمعها"
صابرين بضحكه:باي..ونهت المكالمه وهي مبتسمه بحب وخجل..غيرت نظرها للروشن..تتفرج ع الطريق وهي عايشه مشاعر الحب..
وكأنها عمرها ماعاشتهم..هي فعلا عمرها ماعاشت حب صادق ونظيف..
كل مايخطر عليها ماضيها تكره نفسها وتتنمى لو يرجع بيها الزمان بش تصون شرفها وتحافظ عليه وماتسلمش نفسها الا للي يستاهلها بالحلال..
بس للأسف لايمكن يرجع..لكن الحاضر مازال موجود..الفرصه مازالت موجوده بش تعوض شويه من اللي خسراته...
🍃🍃🍃🍃
في الصاله..
مقعمزة قريبه ع شباكها المفضل..
شاده مصحف الحفظ الميسر وفاتحه ع سورة القلم..
وحاطه في وذانها السماعات وتسمع في السورة بصوت
"احمد العجمي"..
كانت تبي ثبت الحفظ في راسها بالطريقه هادي..
كل ماتقدم في الحفظ تكون السور اطول وحفظها يبي بذل جهد بزياده..
تمت السورة..حولت السماعات وبدت تقرا فيها عن ظهر قلب لين كملتها..تنفست براحه وقالت..
/واخيرا..
سكرت المصحف وضماته..كل ماضمه لقلبه تحس وكأنه قلبها شاد فيه بقوة...
رفعت عيونها للشباك وشافت للقمر اللي قاعد مااكتملش وبدت تقرا في سورة الفلق..
بعد ماكملتها ناضت بالمصحف حطاته في مكانه..
وحطت تليفونها جنب بالسماعات..
طلعت من الصاله وتوجهت للشماعه اللي عند المدخل خدت البشت والشاربه لبستهم..ومشت طلعت من الحوش..
☘☘☘☘
خشت السطوح ومشت لدار الخزين اللي كان بابها مفتوح..
خشتلها ووقفت قدام اللوحه اللي ليها فترة طويله ترسم فيها...
تتأمل فيها بإيتسامه حب..
كانت اللوحه لبنتها جنة..راستمها مقعمزة في مكان كله زهور اقحوان..وشاده في ايديها حاجتين كانت تشوفلهم..
زهرة اقحوان..و لعبة الشكشاكه اللي ع هيئة شمس..
مشت خدت الغطا وغطت بيه اللوحه بعدين رفعتها ومشت بتطلع بيها..
🍃وهالوقت كان وقت نوم عبد القيوم..
وكعادته لازم يسكر رواشن الشقه كلها بش يفتح المكيف..
وين جي عند الروشن اللي يطل ع سطوح حوشها..
شافها وهي ماشيه ورافعه حاجه في يدها زاد ركز فيها لقاها لوحه مغطيه..
قعد معاها بعيونه لين ادرقت من قدامهم..
تنهد بإبتسامه..وسكر الروشن..ولف بيمشي للدار..
في لحظه..وقف في نص الطريق..
خطر ع عقله فجأة يفكره بحكايه اللوحه متاع قاصرة الطرف..
رجع الشك يراود فيه انها تكون هي صاحبتها..
شك..ولاتمني..مش واضح..
وبش مايستسلمش لهالفكرة اللي يشوف فيها مش منطقيه طردها من عقله وكمل طريقه لداره..
🍀🍀🍀🍀🍀
وتعدي الأيام..
ورضا قاعد في المستشفى..
والزيارات تتوالى عليه من خطيبته واهلها..ومعارف واصدقاء في عالم المال والاعمال..
ولأن مختار كان يوميا عنده معاش قدرت تزوره صابرين..
وبرغم شوقها لشوفته وانشغالها ع حاله وغيرتها عليه ظاهرت بعدم الاهتمام لأمره وخلت الوضع يبان طبيعي زي ماكان..وكذلك رضا وهدا كان بناءا ع اتفاق بيناتهم..
☘لكن لبانه مامشتش ع الاتفاق بينها وبين ميار..رفضت تعطي معز فرصه برغم مشاعر الحب اللي في قلبها اتجاهه خوف تفتح ع نفسها وع عيلتها باب يجيب ريح شر دمرهم..
وبرغم هدا التزمت ميار بالإتفاق وماوصلت شي من اللي عرفاته لخوها ولا واجهت فاطمه بشي وقعد قلبها واجعها ع خوها الصغير وحظه..
☘زي حظ نسرين اللي مش مكتوب عليها دوام الاستقرار والراحه قاعده تعاني بصمت من معاملة عزوزتها وحمواتها ليها..مجبوره..ديما صاحبة تجربة الطلاق لما تتزوج مرة تانيه يزيد خوفها من تكرار تجربة الطلاق وهالخوف يجبرها تتحمل وتتنازل...
☘اما ابتسام بعد ماقعمزت مع نفسها وفكرت في وضعها مع اهل راجلها قررت تتبع تكتيك جديد يقربها ليهم ويخليها مرضيه عندهم..واول خطوة اتبعتها هي سحب نفسها من خديجة شويه شويه..
☘خديجه اللي بدي شغلها الشغل انها تلقى طريقه تخلصهم من مرت بوها اللي في نظرهم هي امها بادية تشكل خطر عليهم..
☘ومازالوا عيلة الواعر وفايزة عايشين في هدوء وحياتهم ماشيه بروتينها معتاد..
الشي الوحيد اللي جد عليهم هي التقويه اللي بدوا يعطوا فيها اريج وطوبى لطالبات الشهادة الاعداديه منهم مروة ومناسك...
🍃🍃🍃🍃🍃
يوم الخميس..
13يونيو...سنة 2019..
واشتعلت جبهات القتال من جديد..ورجع روتين الحياة مع الحرب...
ناس وسط النار..وناس تقرا عنها في الاخبار...
وفي من اخر همه اللي صاير مادامه عنه بعيد.
وفي اللي يبي يساعد ويدير اللي بيطلع بالإيد..
🍃الساعه 6:00مساءا..
في الطريق..
كان سامي مرافق عبد القيوم في سيارته متوجهين لمقر المنظمه الخيريه للمبدعين..
وفي طريقهم كانوا يحكوا عن وضع الناس النازحه..
سامي:مآسي قسما بالله وهما مازال يحشدوا لبعض..
عبد القيوم:اساسا الفترة متاع الهدنه داروها لهالسبب..
سامي:صح كانوا ياخدوا في نفس..
سكتوا شويه بعدين عبد القيوم قال..
/كان تعرف جهات موثوق فيها تساعد في النازحين قولي عليهم..
سامي:تو نعطيك ارقامهم ناس نعرفهم شخصيا اهل ثقه..
هز عبد القيوم راسه بصمت..
سامي شاف لساعة السيارة وقال..
/شكلنا بنوصلوا اخر الناس..
عبد القيوم:اناوالله مافاضيلهم بكل لكن فات فيا ودبست معاهم معاش نقدر نوخر..
سامي ضحك وقال..
/انت ولا قلبك!؟
عبد القيوم؛سامي ارجوك..
سامي بضحكه..
/بيني وبينك وماتطلع مني لحد مافي شي بكل؟!
رد عليه يقول..
/والله العظيم والله..مافي حاجه لامن قريب لامن بعيد..لامني لامنها..والله العظيم..
سامي:اممم..باهي مازال ماعرفتش من صاحبة اللوحة اللي رسمت صورتك؟
عبد القيوم بإبتسامه..
/شن خطرها عليك؟!..
سامي بضحكه:الحقيقه ديما خاطر عليا لسبب ليا فترة نبي نقولك عليه..
عبد القيوم لف بالسيارة للطريق اللي ترفع للجهة المقصوده بعدين قال..
/ان شاء الله خير..
سامي بإبتسامه:ان شاء الله..هدا ياسيدي تاني يوم بعد اخر معرض خيري درناه مشيت بناخد صور لباقي اللوحات..المهم لما وصلت غادي شفت طوبى بنت الواعر طالعه ومعاها لوحه صغيره..
شد عبد القيوم الفرينو "الفرامل" ووقف بالسيارة قدام مبنى المنظمه بالزبط..
شاف لسامي بصدمه وقال..
/من!!؟
سامي:طوبى الواعر..مش عارف علاش وقتها خطر عليا شي غريب شويه..مش عارف علاش تخيلتها هي اللي راسمه صورتك..
غير عبد القيوم نظره للفراغ..تخيلها وهي تتأمل في صورته بش ترسمها..كيف حفظت تفاصيله واتقنت رسمهم...فكرة اللوحه بحد ذاتها لو كانت ليها..حتما حتكون نفسها نظرتها ليه..
اشتعلت في قلبه مشاعر حبه الشديد ليها..توهجت توهج بان في نظرات عيونه وع وجهه اللي ارتسمت عليه ابتسامه حب حلوة بالمرة..
سامي:عبدو..
رد نظره لسامي..
سامي بإبتسامه:انزل بعدين نكملوا كلامنا..عطلنا..
تنهد عبد القيوم من قلبه..بعدين جي بيفتح الباب وينزل..
سامي بضحكه:خود المفتاح..
شاف عبد القيوم المفتاح لثواني بش يستوعب بعدين خداه وفتح الباب ونزل..
ونزل بعده سامي وهو يضحك..
☘🌼
داخل...
نفيسه:اني مازال طامعه انك تكوني معانا..
طوبى بإبتسامه؛لو نقدر نلتزم صدقيني حنكون معاكم لكن ظروفي متحكمه فيا..
نفيسه بإبتسامه؛ياودي حتى هكي باهي نكسبوا شوفتك ونتمتعوا بإبداعك..شمري ع ايديك وابدي شغلك من توا للمعرض الجديد..
طوبى وهي مبتسمه قالت..
/بإذن الله...
☘ويخشوا سامي وعبد القيوم..
ويجوا عيونه عليها يوقف في مكانه..
استغرب سامي وشاف وين يشبح..ابتسم بمفاجأه..
عبد القيوم وهو يشوف فيها كيف واقفه ع نفيسه وتكلم فيها..
تفكر اليوم اللي جي فيه لمكتب نفيسه وطلب منها تقوله عن هويه صاحبة اللوحه..
اليوم نفسه اللي حكي عنه سامي..تسائل في نفسه..
هل هي نفسها اللي شرت اللوحه متاعه!!؟
عقله مش قادر يتسوعب شي..وقلبه من الفرحه قاعد يرفرف وسط ضلوعه..
تفكر المواقف اللي جمعاته بيها الفترة الاخيره..بالذات اللي صارت تاني يوم العيد في المنتزه..وهني فهم...
ان طوبى بدت تتأثر بيه..مافيش تفسير غير هالتفسير بعد اللي عرفه..
🌼نفيسه:حتى المرة هادي بإسم مستعار..
طوبى:ايه هكي احسن..
نفيسه هزت راسها بإبتسامه غيرت نظرها عنها وكيف جايه بتتكلم شافت سامي وعبد القيوم واقفين يشبحولهم..
نفيسه بمزح؛حي عليك اهو جاك استاذ عبد القيوم..
طوبى انصدمت وطول التفتت تشوف وين تشبح..
عيونها جو في عيونه..
نظرتهم كانت غريبه هلبه بس اثرث فيها لدرجه حست فيها قلبها بيطلع من قوة نبضاته..
غيرت نظرها عنه بسرعه لنفيسه وهي متوترة ومرتبكه..
نفيسه بضحكه:نقوله؟
طوبى بضحكه توتر:ربي يهديك..
☘هو ابتسم ومشي ناحيتهم وسامي معاه..
وصل فيهم ووقف وهويقول..
/السلام عليكم..
نزلت طوبى عيونها ووجهها اكتسي باللون الاحمر..من الخجل والتوتر ماقدرتش ترد عليه السلام..
نفيسه؛وعليكم السلام..كل سنة وانتم طيبين..
سامي وعبد القيوم..
/كل عام وانتي بخير..
نفيسه بضحكه:هو خلاص العيد الكبير قريب يجي لكن ان تصل متأخرا خير من الا تصل ابدا..
عبد القيوم وهو يشوف لطوبى..
/صدقتي..
سامي بإبتسامه:شن مازال مابدبتوش..
نفيسه:ايه كلهم في القاعه انتم اخر الناس..
عبد القيوم:تعرفي وقتي ضيق وقتلك قبل مانقدرش نلتزم بالمواعيد..
نفيسه:اها شفتي ياطوبى حتى هو مايقدرش يلتزم لكن حبه لموهبته مامنعاش يولي معانا..
ابتسم وهو يشوفلها كيف شبكت اصابع ايديها المغطيات ببعض وهي تقول بصوت يدوب طالع..
/في فرق..
عبد القيوم:عندها الحق..هي عندها مسؤوليات واجد واهمها بنتها..هي اولى بوقتها من كل شي..
نفيسه بمفاجأه:كيف!؟ تعرفها قصدك؟
عبد القيوم بإبتسامه:جارتنا..
شافت نفيسه لطوبى بدهشه..
هو قال:سبقناك..ومشي وسامي معاه..
الابتسامه اللي كانت ع وجهه وقتها اللي يشوفها يقول هدا ياحصل جائزة كبيره ولا فاز فوز عظيم..
سامي بإبتسامه..
/اللي في بالي صح..
وقف عبد القيوم قدام باب قاعة الاجتماعات وشاف لسامي..
وسامي يشوفله بإبتسامه..
عبد القيوم؛واضح لهالدرجه!
سامي:اللي يركز يزبط..
ضحك وحط يده ع كتف سامي بعدين خش داخل وسامي خش وراه..
عبد القيوم بنبرة مبهجه..
/السلام عليكم..كل سنه وانتم طيبين..
ويردوا عليه كلهم بأصوات متقطعه..
ميار:تحسي جوه مليح..
سلافه بإبتسامه حب:ابتسامته بتجنن..
شافوهم كيف قعمزوا هو وسامي جنب بعض..
وهو بدي يهدرز ع زملائه وملامح البهجه مسيطره ع وجهه..
🌼وفي نفس الوقت عند ام العيون الحايره..
نفيسه ضيقت عيونها وقالت..
/صار هكي ياطوبى!؟
طوبى بخجل..
/اسفه بس الموقف كان محرج ليا اني ماقدرتش نقولك..
نفيسه بإبتسامه؛حصل خير..مش مشكله..لكن قوليلي توا مازال تبي تشاركي بإسم مستعار..
طوبى بقلة حيلة؛لا مافيهاش كيف حنشارك بإسمي وياريت لو حاول فيك مرة تانيه يعرف من هي اللي رسمت صورته ماتقوليلاش..
نفيسه بإبتسامه..
/حاضر كوني هانيه..
ابتسمت طوبى وقالت..
/شكرا..السلام عليكم..
نفيسه:وعليكم السلام..
ومشت طوبي وهي في حالة يرثى من الاحراج والخجل..
وعاد حالة قلبها بروحها..
☘☘طلعت لسيارتها..
وبعد ماركبت تفكراته كلامه..اسلوبه..نبرة صوته وهو يتكلم..
اول مرة تركز ع التفاصيل هادي..
كل شي فيه كان مميز وجذاب لأبعد حد..
خدت نفس بعدين قالت..
/يارب..يارب..لاحول ولاقوة الا بالله..
مسحت بإيديها ع وجهها..بعدين خدت نفس..وشغلت السيارة وتحركت...
#الاوركيد_الابيض
#طوبى
....يتبع....
