طوبى ☕شارع القهوة☕

الجزء_الرابع_والتسعين

#طوبى  "جنة طوبى"
#جمان_فريد
#الجزء_الرابع_والتسعين"أوراق متساقطه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#التسبيح
التسبيح يحمي القلب من أثر الكلام السئ و يورثك شعور رضا يستقر في القلب:

ـ🔖 " وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ* فَسَبِّحْ بِحَمْدِ رَبِّكَ وَكُن مِّنَ السَّاجِدِين " سورة الحجر.

ـ🔖 " فَاصْبِرْ عَلَىٰ مَا يَقُولُونَ وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ الْغُرُوبِ " سورة ق.

ـ🔖  " فَاصْبِرْ عَلَىٰ مَا يَقُولُونَ وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ غُرُوبِهَا ۖ  " سورة طه.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃‏وَلمْ نســتَطِع عندَ الوَداعِ تَصَبُّرًا
وَقَد غالنَا دَمعٌ عَنِ الْوَجهِ ناطِقُ
وَقَــفنَا لِتَودِيعٍ فَــكانَت نُفوسُنَا
لِأَجسَادِنَا قَبلَ ‎#الْودَاعِ تُــفارِقُ
فَبَاكٍ لِمَا يَلقاهُ مِن فَــــــقدِ إِلفِهِ
وَشَاكٍ لَهُ ‎#قَلبٌ بِهِ الوَجدُ عـالِقُ 🍃
_____________
الحسين بن عقيل
__________________________________________
مقعمزين مع بعضهم في المربوعه الخوت الاولاد يتناقشوا في موضوع مهم..
الكبير فيهم قال..
/مستحيل نفكر في حاجة زي هادي توا،هدا يقعد حوش العيله..
والاوسط قال..
/رايي من رايه..لكن مناسك ومالك كيف بيصير فيهم!؟؟
مازن؛اني وعيالي بنقعدوا هني..
خوته التزموا الصمت وماعلقوش.
ومازن كمل يقول..
/مانبي حد يجي في باله حتى بالكذب ان عندي غرض من الشي هدا..شاف لخوه الكبير وقال..كلنا عارفين ان مرتك ماتتفاهمش معاهم وماتحبش تحتك هلبه بالعيله..غير نظره لخوه الاوسط وقال..وانت مرتك لازم تقعد قريبه من حوش ماليها ع خاطر امها المريضه..اما اني وضعي يختلف عنكم ومرتي قريبه من خواتي والحق مراة بالها واسع وماتشوبش..
الكبير قال..
/اول شي حول من دماغك الظن السيء مستحيل نفكروا فيك هكي..بس تقعد في مشكله مالك عزري واكيد بيقيد المراة وهي بتقيده..
مازن؛حني نقعدوا في الدور الاول وهما التاني وبعدين مالك اغلب وقته برا الحوش..
تنهد الاوسط بضيق وقال..
/الله يسامحك ياامي درتيها فينا..
الكبير شد دموعه بقوة..
مازن بحزن؛الله غالب هذا الجهل لما يحكم..المهم توا متفاهمين ع الموضوع هدا خلاص!؟
الزوز هزوا روسهم بالموافقه..
مازن:تمام ونهار تبوا الحوش ينباع وتاخدوا حقكم تعالوا قولوا طول ووقتها نحلوها مع بعض المهم مانخلوا شي يفرق بينا ويشتننا..
ابتسم خوه الكبير وهز راسه بإيجاب..
وخوه الاوسط سرح بتفكيره في امه فوزيه اللي خلت فراغ كبير في حياتهم اكبر من اللي خلاه موت بوهم..
🍃🍃🍃🍃🍃
صب الشاهي الاخضر في الطاسه ومدهاله..
خداها منه وهو يقول..
/بارك الله فيك..رشف رشفه وكمل يقول..يعلم الله باللي نحس بيه ياتارقي..بعيد عن كل شي طرابلس هادي مدينتي اصلي منها وين بيجي اي حد يغير عليها بعيد عن اللي يبيه لازم نوقفله..واني ع خاطرها هي وخاطر الصغار تنازلت ع الحاجه هادي وقعمزت نتفرج وقلبي محروق..هي...تنفس بانفعال وقال..هي ضغوطات ع بعضها..حاجه فوق حاجه قعدت نحط فيهم ونكمد..ولما جيت ننفجر انفجرت في الوقت الغلط وقربعتها مرة وحده..تعرف شن اللي مرضني..انها عاودت الدوة لماليها..مش عارف كيف بتولي نظرتهم ليا توا..
عبد القيوم وهو عاقد حواجبه..
/الحاج علي عنده علم!؟
عبد الرؤوف؛لا لتوا لا..وان شاء الله مايصير شي يخليه يعرف..ماعندي باش نقابله بعدين..اني نسيبتي الصغيره اللي بيني وبينها بابور قالتلي كلام خلتني نحس روحي اني الصغير مش هي...
عبدالقيوم حاول يتمالك نفسه بش مايبان عليه شي..حط يده ورا رقبته وقعد يدلك فيه..ومازال عقدة حواجبه ع وجهه..
عبد الرؤوف بضيق..
/مش عارف كيف ندير ولاكيف نتصرف حاس الدنيا صاغره بيا هلبه..
نزل عبد القيوم يده وقال..
/توا خليها عند هلها لعند ماتلقى مكان لعيت عمتك وبعدين اعرف كيف ترضيها وتشرحلها موقفك..بالنسبه لموقف هلها منك..مااظنش عيلة الواعر كان نعرفهم كويس يحقدوا عليك او يغيروا نظرتهم ليك..راهو تصبايتك معاهم كبيره واجد..راك درتلهم اللي ماقدروا يديروه ولادهم..مستحيل يمسحولك الباهي اللي درته ع غلطه ماتسواش
عبد الرؤوف بضيق..
/مانحسش هكي ياتارقي
عبد القيوم؛لاهك ونص صدقني غير خل اللي صار ياخد وقته وكل شي بعدين يرد كيف ماكان واحسن..بس في عندي حاجه بسيطه نتمنى ديرها ممكن تساعدك..
عبد الرؤوف؛شن هي؟.
عبد القيوم؛انت قلت ان في حساسيات بين مرتك وبين بنت عمتك..ننصحك لو فيها كيف تخلي اختك تجي تقعد معاهم وانت تجيني هنا..المهدي ماتفكرش فيه..
عبد الرؤوف بتفكير..
/كلامك في مكانه..كان صار واختي قعدت معاهم اني نقعد مع راجلها في حوشه وخلاص..
عبدالقيوم؛ع راحتك انا كنت نبيك تم قريب عليهم..
عبد الرؤوف بإمتنان..
/بارك الله فيك..نقولك حاجه..في شي في خاطري تمنيته وقلت ان شاء الله يصير..بس ربك الباين مش مقدر..
عبد القيوم بإستغراب..
/شن هو؟
عبد الرؤوف بضحكه..
/خلاص انسى ..
ابتسم عبد القيوم بإستغراب بعدين قال..
/على كيفك..تتغدا؟!.
عبد الرؤوف؛ياريت جعان وحرق الدم زادني.
عبد القيوم ناض وهو يقول..
/نصيبك اليوم تاكل صياديه اول مرة نديرها وجت حاجه لاقوة الا بالله..
عبد الرؤوف بضحكه وحماس..
/تي جيب ياراجل جيب..
ضحك عبد القيوم وهو يقول..
/ثواني بس...
ومشي طلع من حداه...
خفت ضحكه عبد الرؤوف ورجعت حل محلها ملامح الضيق...
🍃🍃🍃🍃
وقعدت غرفه بالساعات بروحها حتى ولادها خلتهم لخواتها..
حاولت ترقد ماقدرتش من التفكير واللي صار قاعد بين عيونها..
🍂بعد العصر..
توضت وصلت..بعدين لبست حجابها ومشت طلعت للجنان..
🍃جو عيونها ع شجرة الفل..غرقوا بالدموع..
مشت وقفت قدامها وهي تتفرج عليها وتخطر عليها كل ذكرياتهم مع بعض..كانت تبي لدموعها ينزلوا بس هما قعدوا محبوسات في عيونها..
غيرت نظرها للطاوله والكراسي..بعدين مشتلها..وصلت فيها جبدت كرسي وقعمزت...وسرحت بتفكيرها...
قطع عليها تفكيرها صوت جرس الحوش مع دقة الباب..
خافت..
شويه شافتها عمتها..لابسه حجابها وطالعه بتفتح..
سمعتها قال..
"شكون"..لكن ماسمعتش اللي رد عليها وخلاها تفرح ..
فتحت الباب ويخش حسين وهو لابس البدله العسكريه..
ناضت طول وخشت للكوجينه..
🍃لقت طوبى فيها دير في الشاهي الاخضر..
غرفه؛حسين جي..
طوبى بفرح؛الله!..
غرفه؛توا شفته خاش عمتي فتحتله.
طوبى مشت بتطلع وهي تقول..
/معناها هو اللي ضرب الجرس..
غرفه غيرت نظرها عنها وشافت للبراد..مشت شافت اللي فيه بعدين حطاته ع النار..
🍃🍃🍃🍃
في الجنان..
طلعت طوبى بعد مالبست حجابها وهي تقول بفرح..
/السلام عليكم..مرحبتين..
رفع نظاراته حطهم ع راسه وقال بإبتسامه..
/وعليكم السلام..شن جو ياقيادة..
ضحكت وقالت..
/تمام الحمد لله..خفت ضحكتها وقالت..انتم شن صاير فيكم..
حسين بأسف..
/من اللي مايعرفش شن صاير..نقول يستر الله وخلاص..
مطيره بقلق..
/الباين اللي جاي احرف..
حسين؛الوضع معقد هلبه ومش باينها حل توا..
طوبى بضيق؛ربي يلطف بيكم وبينا..انت ماخشيتش جبهه؟
حسين؛لا في غرف العمليات بس..
طوبى؛ربي يحفظك بحفظه..
مطيره؛آمين..
حسين؛مافيش اخبار عن اسكندر؟
طوبى:يكلم في اريج..
حسين بقلق:الوضع في المحور اللي هو فيه يخوف..
مطيره بخوف:ياربي اني قلبي قابضني الايام هادي..
طوبى قعدت تشوفلها بخوف لدرجه ان لون وجهها انخطف.
مش متخيله كيف حيعيشوا فاجعة موت جديده وكسرة جديده لحد من العيله...
اريج بالذات اللي قاعده عايشه ألم فقدان بوها كيف حتتحمل الم فقد جديد لراجل ولى ليه في حياتها مكانه كبيره..!؟
مابتش تتخيل اكثر..وقالت..
/لاقدر الله..
شافولها الزوز..
طوبى بخوف؛ربي مايقدر ع اريج تعيش هالوجع مرة تانيه..
مطيره برجاء وخوف..
/يارب يارحيم.
زاد انغم حسين من اللي سمعه..اللي عاشه الفترة اللي فاتت اسوأ من اللي مر بيه في 2011..الحرب هادي ماتفرقش بين مدني وعسكري تاخد اللي يجي قدامها والخوف الاكبر لو طال امدها وتكون العاقبه تدخل عسكري اجنبي وضيع البلاد مرة وحده..
وفي عز همه يسمع اصوات محببه لقلبه مجرد سمعها حس الهم تجلى..
قام عينه وشافهم الزوز..واحد شاد الحيط ويمشي معاه..
والتاني يزحف..
ضحك من قلبه وقال..
/اوووو..
ومشالهم طول..
التفتوا مطيره وطوبى ولما شافوهم ابتسموا..
شافوا فرحتهم بشوفته..حتى من عيونهم ضحكوا..
هو خدي اواب الاول..بعدين مشي لمهاب خداه ورفعهم الزوز وهو يهدرز عليهم وهما يقلدوا في كلامه..
ومطيره وطوبى يضحكوا عليهم..
حسين:عفاريت..وين جرانتك ع قولة جدي..
طوبى شافت للباب لقتها طالعه بالجراي..
فنصت عيونها ومشتلها تجري وهي تقول..
/لايانهاري!..
هربت منها جنه..لكن هي لحقت عليها..شدت الجراي وطلعتها منه..
حسين بضحكه؛عفريته العفاريت..
☘وشويه وجي الحاج علي قعمز هدرز معاه شويه لعند ماآذن المغرب..طلعوا للجامع...
وفي طريقهم تلاقوا مع عبد القيوم وعبد الرؤوف والسلام بينهم كان حار وكملوا مع بعض الطريق وهما يحكوا عن وضع الحرب والسياسه لين وصلوا للجامع...
🍃🍃🍃🍃🍃
بعد المغرب...
طلعت طوبى للجنان..
لقت غرفه تحت شجرة الياسمين مقعمزه ع الصلايه وهي سرحانه..
مشت وقفت حداها وقالت..
/نقعمز عادي؟
هزت غرفه راسها بإيجاب..
قعمزت طوبى...خدت نفس تشم فيه ريحة الياسمين..بعدين شافت لأختها وقالت..
/شن جو توا؟
غرفه؛مش كويس..
طوبى تنهدت وقالت..
/عندك حق..اللي صار مش ساهل..لكن رؤوف يحبك هلبه راهو..
غرفه بضيق..
/عارفه..وقبل كنت حاسده ع روحي عليه ع حبه ليا..بس بعد اللي صار...مش كرهته ولاحقدت عليه لا...لكن في شي في داخلي مش عارفه كيف..شي هكي من ناحيته زي اللي تحول مني..
عقدت طوبى حواجبها وهي تسمع فيها وتشوفلها كيف تحاول تشرح بش توصل اللي تحس بيه..
غرفه؛تعرفي علاش كنت نحب ناديه روفا..لأنه زي روفي اسم الدلع متاعي اللي نحبه..يحسس فيا ديما ان اني وياه واحد..برغم الاختلاف اللي بيني بينه..عبد الرؤوف كان كل مايدير معاي ومعاكم حاجه كويسه يزيد يكبر في قلبي وعيوني ونزيد نحبه اكثر ونندم ع اللي درته معاه قبل ونحاول ع قد مانقدر نعوضه ونسيه..حتى اني تحملت عمته الشيطانه وبنتها الوقحه ع خاطره هو..وصدقيني حتى لما يلقحوا عليا ويهينوا فيا قدامه وهو يسكت نعصب هلبه بعدين ننسى فيسع ونقول معليشي..هو يحب عمته ومايبيش يوجعها تحملي يابنت زي ماهو تحمل..والله لعند ماعابت في اصلي وهو ساكت ماانوجعت منه..لكن وين قال كلامه هداكا..تعرفي شن شفت قدامي..
رفعت ايديها قدامها وهي توصف وتقول..صورته تكسرت تهشمت تهشيم...
طوبى بضيق..
/لاغرفه ماتقوليش هكي..راهو هدا عبدالرؤوف..
غرفه بضيق شديد ودموعها نزلوا قالت..
/لأنه عبد الرؤوف ياطوبى..عبد الرؤوف ماتوقعتهاش منه والله ماتوقعتها..اني ممكن تتوقعي مني اي شي نجرح نوجع ..نضايق ..تتوقعي مني كل شي..لكن هو..هو لا..اني ياطوبى حاسه بخيبه امل..حاسه باللي داره وكأنه فصلنا عن بعض وبني بينا زي الحاجز..معاش نقدر نحكيله شي..ولانبيه يخشلنا في اي شي..وبنبدا نخاف يصير اي شي تاني معانا هو يعرفه..بش مايعايرنيش بيه بعدين..
طوبى قعدت محتفظه بصمتها..ماعرفتش تبررلها شي..اللي قالاته غرفه حقيقي..هي نفسها حساته..حست ان من بعد اليوم لازم معاش يدخلوا عبد الرؤوف في أي شي يخصهم ويحطوا حدود بينهم وبينه..
غرفه مسحت دموعها وقالت..
/مفروض الواحد مهما شاف خير من حد مايعطيشي اكبر من حجمه ويقعد ديما متوقع منه كل شي بش ماينصدمش فيه..
طوبى:ممكن قاعد مانساش اللي صار زمان..
غرفه؛ولامرة نساه حتى وين يقولي نحبك نشوف في عيونه نظرة كره..
طوبى:ماينلامش..مش ساهل ع البنادم اللي يحب ويعطي من قلبه يكتشف انه كان تسلايه وتمشاية وقت..اللي مريت بيه يشبه شويه اللي مر بيه عبد الرؤوف هدا علاش عاذراته وحطي في بالك ان هدا راجل الموضوع عليه حيكون اصعب..
غرفه بألم:علاش ياخدني من الاول!؟ انتقام..باهي طلقني وخلاني نمشي ع حالي..
طوبى؛لأنه يحبك هلبه..حب حقاني لاقدر ينساه ولاقدر يطلعك من قلبه..في النهايه دارك مرته وام صغاره وحطك في عيونه وعمره ماخلا حاجه في خاطرك..لو تحبيه حق تعذريه وتسامحيه..صدقيني هالغلطه هادي معاد يكررها..
غرفه:مش توا..
طوبى:عندك حق..ادبيه وشعفيه عليها بش يتعلم من غلطه لكن ردي بالك تقسي قلبك عليه..
مسحت غرفه دموعها وقالت..
/نقولك حاجه بعيده عني..
ابتسمت وقالت..
/شن هي؟
غرفه:نتمنى ربي يرزقك براجل يحبك وتحبيه ويعوضك عن كل شي..
طوبى ابتسمت بحسره وقالت..
/وينه الراجل اللي بيرضي بيا!؟
غرفه بإستنكار:شني!!؟
طوبى:قصدي بوضعي..مراة عندها بنت بوها شخص غير سوي مستعد يدير اي شي بش ماياخد منه حد حاجه كانت ليه..هدا غير جنه لو تزوجت مش حيخلوها عندي..واني نموت ولانفرط في بنتي..
غرفه:ماتندريش ع اللي يصير القدام خليك متفائله..
طوبى تنهدت وقالت..
/مخليتها ع الله مانبي نفكر في شي توا..كان عندي نصيب في حاجه حيجيبهالي لعندي..
غرفه هزت راسها مواقفة ع كلامها..
طوبى؛هي نوضي نخشوا داخل..
غرفه:باهي..
وناضوا الزوز..وغرفه خدت المصليه ومشوا خشوا للكوجينه..
🍃🍃🍃🍃🍃
"والله توقعتها كثر خيرها اللي صبرت عليهم اسبوع"
عبد الرؤوف بضيق:المهم توا بتمشي ولالا؟
نبيله بقلة حيله:بنمشي الله غالب ماعندي ماندير..من الاول والله من الاول ماكنت متريحه للموضوع عمتك وبناويتها حاطينها في روسهم في مرة تلاقينا فيهاا الا وهما يلقحوا عليها..
هو بشي من الانفعال..
/باهي شن تبيني ندير قولي..اتصلت بيا قالت تعالى ارفعني حوش حماتها ولا مش عارف مني مايبوهاش تقعد عندهم وكانت تبكي..مراة كبيرة تبكي وعمتي اخت بوي هادي ماقعدلنا منه تبيني نقوللها سامحيني مرتي ماتبيكش دوري وين تقعدي!..قدري يانبيله الوضع..قدري الحاله اللي اني فيها..خوك وتعرفيني ولا..اقسم بالله..حط يده ع صدره وقال..هني جبل قاعد ع قلبي جبل..
نبيله بضيق؛فاهمه عليك وعارفه اللي فيك..انت توا درت عيله وخيي هما اولى بيك..
تنهد بوجع وقعد ساكت..
طبطت ع يده وقالت..
/خلاص..خلاص حبيبي..
غمض عيونه بشده بعدين فتحهم وجبد يده من تحت يدها وناض طلع لجنان حوشها بش ياخد نفس..
اما ناضت وهي مضايقه ومشت بتاخد تليفونها بش تكلم راجلها...
🍃وسمحلها المحجوب تمشي...
رفعها عبد الرؤوف في الحوش ومشي طول بدون مايخش معاش طايق يشوف لاعمته ولابنتها..
هديكا الليله قعد يدور في شوارع طرابلس البعيده عن الاشتباكات..لعند ما خش في الطريق سمع فيها صوت الضرب بس كان بعيد..
تنهد بحرقه..بعدين خدي تليفونه..حط ع رقم غرفه وقعد يتفرج عليه وهو يفكر..
يتصل ولالا..
اخر شي قرر يكتب رساله ويبعتها...
كتبها وبعتها..بعدين تحرك بالسيارة لحوش المحجوب..
🍃وغرفه اللي كانت متكيه جنب صغارها وتتفرج عليهم بحزن..
سمعت صوت نغمة الرساله من تليفونها..
خداته من جنب المخده وشافت الشاشه لقت الرساله منه طول فتحتها..
(مرتاحه توا) كانت حاسه تجاهه بشعور يشبه النفور...تجاهلت الرساله وردت تليفونها لمكانه وغمضت عيونها..
🍃🍃🍃🍃
"هي حساسه زياده عن اللزوم وسامحيني فيها يانبيله واضح ماتبيناش"
نبيله:طبيعي تكون حساسه زياده اللزوم وماعندهاش قدرة تتحمل حتى نفسها..المراة حامل وتتوحم..
انصدمت لميس..
وامها قالت:تكدسهم فوق بعض وتحصل فيهم وهي ركيكه ماينعباش عليها تعاني صغار وتربيهم..
نبيله؛من الاخير ياعمتي شن ماكانت خوي راضي بيها ويحبها  وهي تحبه ومتفاهمين مع بعض..
لميس:علاش تقولي هكي!؟
ابتسمت نبيله وقالت..
/نطمن فيكم عليه بس..
سكتوا الزوز وهما معصبات ع الآخر..
🍃🍃🍃🍃🍃
تاني يوم..
الجمعه..
19إبريل...سنة 2019...
الساعه 10:00صباحا..
طلعت طوبى من الحمام وهي لافه الفوطه ع راسها وع وجهها ابتسامة راحه وفرح..
وانقضت العده...
واخيرا..اليوم تحررت تماما من قيود زواجها التعيس..
تحررت من قبضة الجالي نهائيا...
مشت بإتجاه دارها وخشتلها..لقت اريج تلاعب في جنه..
ابتسمت من قلبها وهي تغني..
/ياخواتي ياخواتي..ياخواتي بحبها..دي حبيبة امها..
🌼🌼🌼
برغم وضع البلاد واللي صاير حواليها ماقدرتش تمنع نفسها من اظهار الفرح..
لبست فستان كم طويل لونه ازرق خافت مورد..فيه حزام ..
رفعت شعرها فوق ذيل حصان وحطت لمسات بسيطه ع وجهها..وجنه لبستها فستان نفس اللون وتوكه صغيره من نفس اللون مزينه شعرها الجميل..
🌼الكل لاحظ عليها عليها الراحه والفرح..وكلهم كانوا عارفين السبب من غير مايسألوها...
☘☘☘☘
بعد الظهر..
جت سميره تغدت عندهم..وبعد الغدي خدت طوبى بروحها بش تطلب منها طلب..
🍃طوبى بضيق:صعب هلبه..
سميره:معقوله تخافي عليها معاي اني!؟
طوبى سكتت وهي متخوفه..
سميره:والله نحطها في عيوني يابنتي شن ماعندكش ثقة فيا !!؟
طوبى بضيق:مش هكي..وسكتت..
سميره:ساعتين بس يشوفها جدها ويلاعبها وصغار عمامها حتى هما والله يراجو فيها..حتى نضال..الشعب كله يطالب بجنه...
طوبى بضحكه؛شكلك كبدتي!..
سميره بإبتسامه؛نكذب عليك لو نقولك لا..راجل رايق ومتفهم ومدلعني ومشخلعني..
ضحكت طوبى..
سميره بضحكه:هاه شني!؟؟
ابتسمت طوبى بتنهيده بعدين هزت راسها بالموافقه...
🌼وترفع سميره جنه لحوش جدها..
☘اول ماخشت وهي ضامتها قالت بلغة طفوليه...
/عرب الحوش جيتكم اني راهو..جنونه جتكم..
جتها سدره تجري وهي فرحانه..
/جنونه ياربي محلاها..وخدت يدها وباستها..
سميره؛هي خل نخشوا بيها لجدك..
ومشوا مع بعض خشوا للصاله..
سميره؛جيتك ياجديده جيتك..
محمد بضحكه؛مرحبا..مرحبا..
وصلت بيها ليه وعطتهاله..خداها وهو يقول..
/ماتستغربش..
سميره:ايه..تاخد ع الناس فيسع..
وتخش جوري وهي متردده وخايفه من سدره اللي ماكانتش تبي تشوف لوجهها..
شافتها سميره قالت..
/اقربي جوري حبيبتي..
رفعت سدره حاجبها وبدت ع وجهها ملامح الكره..
محمد شنيبه؛تعالي شوفي بنت عمك..
قربتله جوري وجت لجنه ابتسمت من قلبها وقالت ببراءة..
/محلاها...كبرت هلبه..
سدره بحده؛قولي ماشاء الله..
جدها وسميره شافولها..
وجوري قالت بضيق..
/ماشاء الله...
☘☘☘
لعب محمد شنيبه مع حفيدته لين جي وقت طلعته لمحلاته..
وقعدت جنه تلعب مع سدره اللي كانت مانعه جوري تقرب منهم..
وجوري قعدت تتفرج من بعيد..
🍃خشت بعدين سميره بالحاجات الحلوة اللي دارتهم للصغار..
فرشت مفرش كبير قعمزوا عليه وبدوا ياكلوا..
ويزن وحمزة ومحمد محي الدين حطتلهم ياكلوا في الجنان..
هدا كله..ومغليه شاده تلفزيون دار المعيشه وماتبيش تطلع منها..
ع خشة خديجه وفي حضنها ولدها ومعاها بنتها للحوش...
راما:حس دوشه في الصاله..
مشوا الزوز بإتجاه الصاله وخشولها..
خديجه بشهقه..
/شن هدا!؟؟ هدا مكان ماكله وتمزريط مفرخ!..
البنات شافوا لعمتهم ..
وسميره تجاهلت وجودها وقعدت توكل في جنه وهي تقول..
/مم..ياسمحه..
خديجه بسخريه..
/ماعليكش لوم مازال مش متعوده..تو نعلمك كيف كل شي لازم يكون ليه نظام واصول..
سميره؛بالله الدونات من حداك ياسديره..دونات خالتك طوبى اللي مافيش زيهم..
مدت سدره الدونات لسميره..
خدت سميره طرف وبدت تاكل وهي تقول..
/امم...سلم ايدياتها هالطويبه يلتفوا بالحرير..
طلعت خديجه وهي معصبه..
وراما بعد ماعطتهم نظرات ازدراء لحقتها..
🍃خشت خديجه ع امها وهي تقول..
/خلاص هادي استولت ع الحوش ودايره فيه ماتبي!..
مغليه بإمتعاض؛قداش ليها..
خديجه حطت ولدها وقالت..
/وانتي خيرك مستسلمه هكي!؟
مغليه؛بوك يدورلي في المشاكل وهي فرصه وتراجي فيها يش تخليه يطلقني..والله مانعطيهالها وتقعد هم ع قلبها..
راما:شفت بنت خالي الجالي هي جابتها؟
مغليه:ايه..بالله رويمه خودي نقالي وصوريها..
مشت راما خدت تليفونها حناها وطلعت من حداهم..
🍃خشت للصاله وقربت من جنه بش تاخدلها صورة
دفت سميره يدها وقالت..
/هييه حولي غادي..وخدت جنه في حضنها..
راما بتعجب:خيرك!حنينه تبيني نصورها..
سميره:لالاا...لاتصوريها لاتصورك..
راما؛خيرك انتي!!؟ اني بنت عمتها واللي تاخدها صور حناها انتي مني!؟
سميره بإزدراء:بري اقلبي وجهي بري خير مانعطيك كف ينسيك انتي مني..
راما؛هدا اللي ناقص وحده زيك انتي تلزني!؟
سميره:قليله ربايه يابنتي..
ع خشة خديجه وهي تقول..
/انتي احترمي نفسك خيرلك.
سميره:اتعبي وعلميه لبنتك الاحترام..وبسخريه كلمت تقول..حتى اني نضحك كيف بتعلميها وانتي تبي من يعلمك..
خديجه بغضب..
/كلمة تانيه نرقدك في مكانك..
مشت سميره جت حنه في مكانها وقعمزت حتى هي وقالت..
/كولوا بنياتي كولوا..
خديجه بعصبيه؛جوري نوضي..
جوري فوق خوفها اضايقت..
سميره ابتسمت بسخريه..
خديجه:جوري نوضي انتي امك مخلياتك امانه عندنا نوضي..
جوري:اني نبي نقعد..
فنصت فيها خديجه وقالت..
/قتلك نوضي..
سميره:بالشويه ع البنت..
خديجه؛سكري فمك انتي..ساداتك هديكا اللي عايمه ع عوم هدوكا العقارب..لاعاد عدلت لاع جده ولاعمه ولاعاد تبي تشوف لوجوهنا...
سدرة دمعوا عيونها وهي تشوف لعمتها كره وقالت..
/نسيتي شن درتي لخوي!!؟.
خديجه؛ماشاء الله وتعلمتي تردي!!! نسيتي انتي خوك شن داير يافالحه!؟
سميره:ياسر عاد بلاعار..بتحطي عقلك من عقل عيل..
خديجه:انتي اطلعي منها خيرلك..وانتي اني لتوا ماقلتش لبوك ع عملة خوك ماتخلنيش نقولهاله..
سدره بغضب:خوي مادار شي..
راما بدت تتوتر وهي تسمع في سدره تقول بغضب..
/وهادي كذابه كذابه زي امها..
سميره بحزم؛سدرة!
سدرة ببكي:حرام ياسيما والله محمد مادار حاجه والله..
خديجه قدمت بتجبد جوري بش طلعها معاها وهي تقول..
/تو يروح بوك ونوريك..
"سدرة"..
سمعوا يزن ينادي ردت عليه سميره..
/خيرك يايزن..
"شن في!؟"
سميره:مافي شي..
خديجه وهي تجبد في جوري:تي تعالي يافرخه..
سميره قدمتلها وجبدت جوري منها وحطتها وراها وهي تقول..
/امشي اطلعي بالطيب خيرلك ماتخلنيش نقولك حتي اني راجي بوك لين يروح ونقولك..
خديجه قعدت تشوف لعيون سميره بنظرات حقد بعدين قالت..
/زي ماجيتي حنطلعك وهدا وعد مني..
ومشت بعصبيه طلعت من الصاله وبنتها وراها..
التفتت سميره لجوري وضمتها وهي تقول..
/خلاص ماما خلاص بنتي..
"معاش خاشاته الحوش لين ينظاف.."
وسمعوا بعدين باب الحوش انفتح وتسكر بقوة..
وبعده بشويه سمعوا باب دار مغليه تسكر بقوة حتى هو..
سميره بأسف..
/خسارة ماينقال عليهم جده وعمه..التفتت شافت لجنه لقتها شاده طرف دونات وتلحس فيه..وخدودها وايديها وفستانها كلهم شكولاته..
سميره:شن دايره في عمرك انتي!؟
شافولها بنات عمها وضحكوا...
☘☘☘☘
حطتها في حجرها وهي تمسحلها في وجهها "بالوايبيس"..
وهما بحداها يتبادلوا في النظرات..
نظرات كره من سدره..ونظرات حزن من جوري..
غيرت جوري عيونها لسميره وقالت..
/سيمو..
سميره:نعم..
جوري بحزن وضيق..
/بنقولك حاجه..راهو..محمد حق مادار شي لراما.
سدره بإنفعال:عارفاتك كذابه ياحقيره..
سميره بحزم:سدره!..
سكتت سدره وهي معصبه..
سميره بهدوء:باهي علاش قلتي دار هكي ياجوري !؟
جوري ودموعها ينزلوا..
/ماما قالتلي نقول..هكي يانقول هكي ياتقتل قطوستي..
انصدمت سدره..
اما سميره قالت؛والله مااستغربت..
جوري مسحت دموعها وقالت..
/واصلا راما هي اللي تبي محمد يكلمها..
سدره:الضايعه!!..
سميره هزت راسها وقالت..
/مانبي حد يعرف بالدوة هادي ماتقولوا لحد توا هدا سر بينا حني التلاته..
جنه دارت صوت فيه عيطه..
سميره:سر بينا الاربعه ياودي...نسيتك بكل
ضحكوا البنات...
🍃وطوبى..
تمشي وتجي في الجنان وهي تراقب في الساعه..
لعند ماقرب آذان المغرب..
رن الجرس..مشت بسرعه فتحاته..
لقت سميره بجنه قدامها..
/هي هاكي فزغولتك..
ضحكت وخدتها...
🍃 ع طلعة التارقي من حوش المهدي..عيونه جو عليهم..ابتسم ابتسامه خفيفه..
خشت طوبى بجنه وسكرت الباب...وسميره ولت بسرعه لحوشها..اما هو تنهد..ومشي بطريقه لحوش علي الواعر..
🍃🍃🍃🍃
واميمه اليوم عندها مناوبه في المصحه..
في وقت استراحتها قعمزت ع تليفونها تشوف في اخبار الحرب..
وهي تتصفح..جي قدامها فيديو شافت فيه وجه حد تعرفه
ومكتوب فوقه..رسالة...الدكتور اسامه لأبناء المهنه..
فتحت الفيديو طول..هو..ايه نفسه اسامه زميل الدراسه اللي لايمكن تنساه..
كان يشجع ويحفز في الاطباء ع القيام بواجبهم ع اكمل وجه في هالوقت الصعب ويبذلوا كل مافي وسعهم..
وفي نهايه الفيديو شكرهم وقال..
"وربي يسخر ونجتمعوا مرة تانيه"..
وهادي كانت نهايه الفيديو..استاقظت اميمه لنفسها كانت مبتسمه ابتسامه واسعه..ضحكت وغطت عيونها بيدها بعدين نزلتهم وقالت..
/نوضي اخدمي خدمتك سلمي بنتي..
وناضت ومشت وهي شاده ضحكتها...
🍃🍃🍃🍃🍃
قدام الجامع في المنطقه اللي فيها شارع القهوة..
كان عبد القيوم واقف ع معتز اخ ميار اللي هدا وين صار لقاء بيناتهم..
سلموا ع بعض..وسألوا الاحوال والوضع..بعدين معتز سأل التارقي عن سلافه واهلها..
🍃عبد القيوم؛المنطقه اللي هما فيها بعيده كل البعد عن الحرب منطقه حيويه وكل شي قريب عليهم..
معتز؛باهي كويس..مايبوا شي مايحتاجوا شي!؟.
عبد القيوم:لا الحمد لله عندهم الخير كله..
معتز:الحمد لله..تمام مانعطلش عليك..
عبد القيوم:تعال اشرب عندي شاهي..شاهي لاذقت لاقبله ولابعده يخليك ماشي جاي عليا..
معتز بضحكه؛مرة تانيه مرتبط بشويه مواضيع لازم نتمهم..
عبد القيوم؛براحتك..المهم افطن لروحك..
معتز؛ان شاء الله..هي نشوفك ع خير..السلام عليكم..
عبد القيوم:وعليكم السلام..
ومشي معتز وهو يقول في نفسه..
"الله يسامحك يالبانه "..
قام تليفونه وقال..
/خل نجرب ونشوف..
اتصل بيها ممكن للمرة الميه ف تسعه وتسعين اللي قبلها ماردتش عليه..
حط التليفون ع وذنه..وخدي نفس عميق..
وتصير المفاجأه..الخط ينفتح ولبانه ترد..
"شوبدك  يامجنون ياابو عقل جوزتين بخرج "
هو بضحكه..
/ااه ياقلبي واخيرا لبونتي رضت عليا..ليتك تؤبري قلبي ان شاء الله..
"والله لولا هالحرب كنت قلت ان شاء الله"..
هو بضحكه؛مانهونش عليك ياغالينا..
"تركنا من ثقالتك وقلي وينك هلأ"
هو قال؛في خلة الفرجان تعرفيها؟
"اولي ع قامتك!!؟ شو اخدك لهنيك!!؟"
ضحك وقال..
/يانجيلي العبيط ياربي كاني غادي كيف نكلم فيك عادي وجوي مليح..
"الحق مو عليك..الحق علي انا الهبله اللي عطيتك وش"..
وسكرت في وجهه الخط...
هو بضحكه قال..
/يؤبري وشك..ااه قداش نحبها المخلوقه هادي..ياربي ياربي خليها حلالي.ومشي كمل طريقه وهو قلبه طاير من الفرح...
🍀🍀🍀🍀🍀
وتعدي الايام...
والحال بين غرفه ورؤوف كما هو عليه..جدها علي شك في الوضع وسأل مطيره وهالمرة قالت ان في بينهم شويه مشاكل مش كبيره وغرفه بتقعد عندهم فتره لين تهدا وبعدين تروح..
اما المحجوب..فعرف بتفاصيل المشكله من مرته اللي قصت اهم جزئيه فيها وبرغم استيائه من اللي صار لكن فضل مايدخلش..
🍃ومازال عبد الفتاح صامد في حوشه مع عيلته اللي بدوا يتعايشوا مع الوضع لكن امه مستحيل يهدالها قلب لين يطلع من غادي...
🍃وقلب اريج ماهداش من الخوف والقلق الدائم ع راجلها...
🍂🍂🍂🍂
فجر يوم الخميس..
25ابريل...سنة 2019...
بعد ماكملت صلاة...مشت للدار...
خشتلها وخدت تليفونها من ع الزيانه لقت رساله واصلتها من راجلها..
بلهفه فتحتها وقرتها..
"ادعيلي بنيتي..نحبك"
دمعوا عيونها وقلبها انقبض...اتصلت بيه..لقت رقمه مقفل..
بخوف قالت..
/يارب..يارب احفظهولي يارب...
🍃وقبلها كان مكلم اخته سميره..خلاها تسكر منه وتنهار بالبكي..
نضال وهو خاش للحوش مع بوه مروحين من صلاة الفجر..
سمعوا صوت بكاها..خافوا ومشوا طول للصاله..
لقوها مقعمزه تبكي..
قدملها راجلها وهو يقول..
/سميره خيرك!.
سميره ببكي..
/توا كلمني خوي وقعد يوصي فيا ع مرته..
نضال حط ايديه في جيوب السوريه العربيه وهو مضايق..
محمد شنيبه؛علاش شن في!؟ بيهجموا ولاهجموا عليهم..
سميره رشفت وقالت .
/مش عارفه شكلهم بيهجموا..لكن مش عارفه علاش المرة هادي قلبي مش مرتاح يامحمد..الحرب هادي سودا غبرا يامحمد حتى لون الدنيا نشوف فيه مولي اسود كله..
نضال:تعوذي من الشيطان خالتي سميره وتفائلي خير.
سميره:اعوذ بالله من الشيطان..مش قادره ياولدي مش قادره..مافي شي يخليني نتفائل..
راجلها قال..
/نوضي معاي للجناح ارقدي شويه..
سميره بضيق؛من وين بيجيني النوم بس..
نضال:غير نوضي معاه ارقدي في دارك وريحي عقلك شويه من الافكار السودا ماهناك الا الخير ان شاء الله..
مابتش تنوض ودموعها مابطلوش نزول..
نضال؛نمشوا للبحر؟
محمد؛نوضي نمشوا للبحر تشمي هوا نظيف..
بضيق قالت؛باهي..وناضت ومشت طلعت من حداهم..
محمد بقلق...
/يستر الله..
ونضال احتفظ بصمته وهو قلق وخايف...
🍃🍃🍃🍃
شويه وطلعت سميره وهي لابسه ووشاح ورفعوها الزوز مع بعض..
وخلا نضال امه وراه تسحن عليه..
/حرام فيكم الحليب اللي راضعينه انت مخويك الكبير..
🍃🍃🍃🍃🍃🍃🍃🍃
وتعدي الساعات ع شارع القهوة في هدوء لوقت الظهر..
ويخترق هدوء الساعات صوت صرخه فجع عاليه سمعوها اهل الشارع كلهم....

#اوراق_متساقطه
#طوبى

....يتبع....