#طوبى "جنة طوبى"
#جمان_فريد
#الجزء_السابع_والسبعين "إفك مفترى الأخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الصلاة_الابراهيميه
أكمل وأجمل وأفضل وأشمل صيغة للصلاة على النبي ﷺ🤎
اللهم صلَّ على محمد وعلى آل محمد
كما صليت على إبراهيم وعلى آل إبراهيم
إنك حميد مجيد،
اللهم بارك على محمد وعلى آل محمد
كما باركت على إبراهيم وعلى آل إبراهيم
إنك حميد مجيد.
🤎صلوا عليه وسلّموا تسليما ﷺ🤎
اللَّهُمَّ صَلِّ وسَلِّمْ وَبَارِكْ عَلَى سَيِّدِنَا مُحَمَّدٍﷺ وَعَلَى آلِهِ وصَحْبِهِ وَسَلِّمْﷺ
#رزقنا_اللــــــــــه_واياكم
شفاعته ومرافقته في الجنة..{ﷺ} ❤️🤍
🌿🌿🌿🌿🌿🌿🌿🌿🌿🌿🌿🌿🌿🌿🌿
🍀🍀🍀🍀🍀🍀
ويمر من هداكا اليوم تلاته ايام...
وينتشر بين ناس شارع القهوة خبر تهجم مطيره ع حوش شنيبه وضربها لخديجه وهي حامل..
والخبر انتشاره كان بروايات متعدده كلها تصب في مكان واحد...تشويه صورة وسمعة بنات الواعر...
☘يوم الاثنين..
الساعه 11:00صباحا..
في دار المعيشه في حوش الواعر..
كانوا مطيره وبنات خوها مقعمزات مع الجارة الحشريه رقيه اللي نادتها مطيره بش جت وقعدوا يسمعوا منها..
:هادوا الناس يقولوا مش كلامي انك وسامحيني يابنتي سامحيني مدايرة سريب انتي وولد عمك وطلبتي الطلاق من ولد شنيبه بعد ماتبليتي عليه بش يطلقك وتاخديه..
مطيره وهي منفعله؛ريتي بالله ريتي!
طوبى وهي تحاول تخفي ألمها ورا ملامح الثقة بالنفس عاقده حواجبها وتقول بنبرة واثقه..
/وشن تاني؟
؛هدا هو يابنتي مافيش تاني..
طوبى؛متأكده خالتي رقيه!..
مسحت رقيه ع فمها وقالت..
/والله ماني عارفه كيف بيقولها لساني بالله عليكم سامحوني راهو هدا اللي سمعته..
طوبى؛قولي ياخالتي رقيه..
:ووك ياربي استغفر الله..قالوا انك درقتي وماقلتيش انك حامل الا بعد ماطلبتي الطلاق ع خاطر....وسكتت..
فردوس بريبه؛ع خاطر شني تكلمي يارقيه!..
:ووك عليا وخلاص...قالوا مانكش حامل من راجلك..
خبطت فردوس بيده ع خدها بقوة..
ومطيره قعدت تشوف لرقيه بصدمه..
اما غرفه حطت يدها ع رقبتها وهي مفجوعه فجعه من اللي سمعاته..
لكن طوبى اللي وقتها حست بصاعقه نزلت عليها لما سمعت شن قالت رقيه..بكل ماعندها من قوة تماسكت وردت تقول..
/وشن تاني..
قعدوا يشبحولها بنظرات ضيق وحزن..
:هدا هو يابنتي والله مافي غير اللي سمعتيه مانزيد عليك كان النفس..
مطيره بقهر وصدمه؛ياويلهم من ربي ياويلهم عندهم ولايا وهما ولايا..
فردوس بغضب والم:يلقوه ويتلقوه وزمان الطويل.
طوبى وهي شاده ع قبضة يدها بقوة قالت..
/من اللي يعاود في الدوة هادي ويقول فيها؟
رقيه:اكثر شي بنات الجعفري وبنات خليفه وعتيقه مرت الشيخ جويده..
ابتسمت طوبى تهكما..
مطيره؛عاد هديكا قلبها اسود علينا! سبحانك ياربي بنتها الله يرحمها لقبل يسفروا سدرة وهي تجيها للمصحه...ياقليلة العقل يامريضه كان سدرة ضارة بنتك شن يخليها تقعد مصاحبتها وتواصل فيها!..
رقيه:تقول بنتي درويشه وع نياتها..
فردوس:اييه ع نياتها توا هي بين ايدين ربي..لكن مافي حد مايعرفش شن دارت عيشه في سدره..
طوبى:الله يرحمها سكرواع سيرة عتيقه المراة هادي مرفوع من عليها القلم زيها زي مغليه وبنتها..
رقيه:باهي ياطوبى يابنتي انتي علاش طالبة الطلاق!؟
شافولها عمتها وخواتها وهما يراجوا في ردها..
وطوبى قالت:خليه الموضوع هدا ع تركينه مانبيش نحكي فيه معليشي..بس نبي نسألك ع حاجه..
رقيه؛على شني!؟
طوبى:نجاة قاعده في شقة عمر؟
رقيه؛ايه قاعده ماهو خلاص بتعيش فيها قالوا..
طوبى مررت نظرها ع عمتها وخواتها وهي تقول..
/ سمعتوا..!بتعيش فيها!؟
رقيه بفضول؛علاش شن صاير بش جت هني!؟
طوبى شافت لرقيه وقالت..
/علمي علمك..لكن غريبه..علاش توا بالذات جابوها تسكن عندهم !
مطيره قعدت تشوف لطوبى وهي تحاول تفهم عليها..
فردوس:اني بوي الله يرحمه ماكانش راضيلي سكنتي مع صغاري في حوشي اللي حدا حوش شيابيني وفي الاخير حكم علينا نقعدوا في حوشه..
غرفه:خطرتي عليا قصة قريتها بكري ع الفيس مراة مسكينه تحكي ع ارملة سلفها اللي خدت منها راجلها قالت قعدت تتمسكن بالصغار لين تمكنت وخداته...
طوبى برفعة حاجب:في اللي تتمسكن..وفي اللي تخرب بش توصل...
ورقيه تسمع فيهم وهي تحلل في كلامهم..
تنهدت طوبى وقالت؛مانقول غير حسبي الله ونعم الوكيل..اني مفوضه امري لله اللي قال فيا كلمة خير ونصفني ربي يجازيه عني خير الجزاء..اما اللي خاض في عرضي وافتري عليا يوتي روحه للمحاكم...
🍃🍃🍃🍃
بعد ماطلعت من عندهم رقيه...
دار بينهم نقاش...
فردوس؛غلطه عمرك تدريق الحمل ياطوبى تو بيديروهالك غناية..
غرفه:غلطه كبيره..
طوبى بضيق شديد.
/عارفه والله عارفه...لكن وين درقت مانحسابش بيصير هكي..
مطيره؛حتى لو كنتي قاعده معاه حركه زي هادي تركبك الف حق وتخليه يطلق حتى الطلاق..
نزلوا دموع طوبى مسحتهم وهي تقول..
/مافكرتش صح وقتها...مافكرتش اصلا..
مطيره تنهدت وحطت يدها ع ظهر طوبى وقالت..
/خلاص ماتاكليش روحك اللي صار صار ..
فردوس:باهي دوة المحاكم مامحاكم اللي قلتيها حق بديرها!؟
طوبى ضمت ايديها ببعض وقالت..
/معلومه ونبيها توصل ولوصار والحكايه زادت عن حدها تولي الدوة فعل..
غرفه:اما انتي يارتيله مش ساهله بكل وصلتي اللي تبيه من غير ماتقولي حاجه تنشد عليك..
ابتسمت طوبى من وسط دموعها وقالت..
/فردوس لقطتها ع الطاير..
فردوس:طول فهمت عليك لما سألتي عنها..
مطيره؛قعدت غير اني !؟ الله لايربحكم ياعيلة كلاب خليتوا دماغي بالهون..
ضحكوا البنات..
شويه بدوا يعيطوا صغار غرفه..
غرفه بتذمر؛وااك ياربي هلكت..
ناضت مطيره وهي تقول..
/معاش تقولي واك اسكتي..
ومشت تشوف فيهم وهي تقول.
/ايه فردوس بالله كلمي وحده من البنات تجيب معاها حلاوات وهي مروحه سميره جايه العشيه..
فردوس؛تو نقول لآلاء.
وناضت طلعت من حداهم..
وقعدت طوبى مقعمزه تشوف في عمتها كيف تعاون في غرفه وفي داخلها كانت داسة قهرة وبكي ودموع مش قادرة طلعهم قدامهم..
🍃🍃🍃🍃🍃
"نعم يام"
فردوس:هاه روجه امتى تروحي!؟
"زي قبل 2يام"
فردوس:باهي بالله سلم بنتي وانتي مروحه جيبي معاك سفيرة حلاوات خالتك سميره صاحبة عمتي جايه العشيه..
"وعلاش ماكلمتيش آلاء!؟"
فردوس؛الاء تروح مأخر امتى بتجيبهم!؟
"تمام تمام..حاضر سلام توا عندي خدمه"
فردوس:بالسلامه..وسكرت عليها ومشت ولت للدار..
🍃🍃🍃🍃
وكملت اريج دوامها في المركز..
وروحت..
وفي الطريق تفكرت طلب امها
اريج بتذمر:واااك ياربي! استغفر الله وخلاص..وين بنمشي توا...
وقعدت تفكر وقالت...
/خل نمشي للمعمل اللي تخدم فيه الفرخه آلاء ناخده منه ونخليها تنقصلي في السعر كان ماخديتاش منها بلاش..
ورقصت حواجبها...
🍃🍃🍃🍃
"تشفط عليا انت!؟"
نضال بضحكه؛لا ندوي جديات غير هاتي يدك خل نقرالك..
هي بتعجب مدت يدها وقالت:
/حيه عليك تطلع تتحنط..
نضال؛تحقي فيا مومياء!
ضحكت وقالت..
/صامت..
وهو خدي يدها وقعد يشوف في كفها وع اساس بيقراه..
🍃ع خشة اريج للمحيط المعمل وهي تتكلم بالتليفون..
/خلاص جايتك..
"لالاماتجيش اني تو ندير سفره ونروح توا"
اريج؛خلاص توا خشيت للمعمل جايتك..وسكرت..
وقعدت تمشي بإتجاه باب المعمل..
سمعت ضحكة البنت اللي كانت ملفته..
شافت جيهتها بنظرة عابره..
بعدين وقفت...
ورجعت شافت لنفس الجهة...
كان واقف علي البنت ويدها فيده ويضحك معاها..
الحاله هادي اول مرة تشوفه عليها من بعد الانفصال..
كان يوقف ويهدرز ع البنات بس بحدود يبان وكأنه غصب عنه..
بس توا شنو!؟...
والبنت هادي بالذات!؟
ع طلعة الاء شافتها واقفه جتها تجري
وقفت جنبها وشافت جيهته..
اريج؛هدا علاش ماتبنيش نجي!؟
الاء قعدت ساكته وهي مضايقه
شويه البنت وهي تهدرز مع نضال شافت جيتهم جو عيونها ع اريج ابتسمت ورفعت يدها وقالت..
/روجه.
هو طول شاف جيهتها..
قلبه ولى وكأنه مدفعية...
البنت قالت؛شويه ونجيك نضال..
ومشتلهم...
هو ماسمعهاش شن تقول..ولاعاد حس بوجودها..
يشوف لأريج وهي تسلم عليها وتبتسم عادي ولاكأن في حاجه..
شويه وخشوا اريج واختها..
وولت البنت مرة تانيه لنضال..
/معليش عديت عنك وخليتك بس البنت هذي تعز عليا واجد وليا وقت ماشفتها..
نضال شافلها وهز راسه وهو ساكت..
هي استغربت تبدل حاله وقالت..
/كنك!؟
تدارك نفسه وابتسم وقال:شي..ايه ع شني كنا نحكوا.
وقعد يهدرز ويسمعلها وهو يسرق في النظر لباب المعمل..
لين شافها طلعت ومعاها اختها وفي يدها سفرة حلويات..
وكأنت عاديه جدا ومش فارق معاها شي..
وزادت قهراته اكثر ماهو مقهور...
🍃الاء:اريج ابكي عادي راهو مافيها شي..
اريج وهي تشغل في السيارة قالت..
/والله ماني منزله عليه دمعه...هلبه فيه الدفال يابال دمعه تنزل من العين..
وتحركت طول بالسياره وهي تقاوم في نفسها وتتصنع في القوة..
واختها حاسه بيها وعارفتها ومضايقه ع الآخر ع خاطرها...
🍃🍃🍃🍃🍃🍃
الساعه6:30مساءا..
في حوش الصيد..
كانوا الجارات جايات لخديجه يطمنوا عليها بعد ماسمعوا باللي صار..
ومن بين الموجودات..
مغليه ونجاة اللي كانت محط نظر الجميع ونظرات الكل ليها مريبه وهي حست بيها..
وشويه وتخش نسرين اللي تفاجئوا بجيتها امها واختها وصابهم التوتر...
🍃وحده من الجارات؛شن اللي صار بينك وبينها بالزبط ياخديجه!..
خديجه وهي مستاءة بتصنع؛نقاش عادي مش عارفه كيف صار ولقيتها هاجمه عليا..
مغليه؛شلولح من يومها وحرفة..
:شكلها الدوة اللي طالعه ع بنت خوها ماتحمتلهاش..
مغليه:تجي تفش غلها فينا حني !!؟
نسرين؛لحظه شويه..دوة شني هادي ياخالتي سالمه!! مافي حد فينا يرضى تنجبد سيرة كنة من كناينا بسو...
:قصدي الدوة اللي ناس تقول فيها يابنتي..
نسرين بحده؛وصلتني الدوة وسمعتها..وبنقولها في هالمجمع والحاضر منكم يخبر اللي غايب اي حد يوصل في مرت خوي الجالي ماناش ساكتينله..هادي مازالت كنتنا وبتولي ام بنيتنا مانرضوا فيها شي ولانرضوا حد يوصل فيها من كان يكون ان شاء الله راجلها نفسه..بعدين التفتت لأمها وقالت..
/ولالا يام!
نجاة قعدت تشوف لنسرين بحده..
وخديجه التزمت الصمت ومن داخلها تسحن عليها..
اما مغليه بعد ماحطتها في الأمر الواقع قالت..
/صح ياما غلطت فينا وياما دارت..لكن مانرضوش فيها تقعد ام بنتنا ..
نسرين مررت نظرها عليهم وقالت..
/سمعتوا امي شن قالت..وخل بنزيد عليها طوبى قالت بترفع قضية في الناس اللي طلعوا عليها الدوة هكي قالتلي يافايزة قالت عندها بالإسم..
:وخيتي قضايا شني ومحاكم شن بتحبس الشارع كله!
نسرين:والله ياخالتي كان لزم الامر الشارع كله يتحاسب اعراض هادي راهو اعراض...
النساوين ارتابوا وخافوا من كلام نسرين وفي نفس الوقت شككوا في صدق كلام مغليه...
نجاح اللي اول مرة تحضر مجمع ينحكى فيه ع الموضوع قعدت تسمع في الكلام اللي قالاته نسرين وعجبها وراجتها لين تكمل كلامها بش تقول اللي عندها...
نجاح:معليشي بنقول حاجه..
الانظار توجهت ليها..
نجاح؛طوبى بنت شارعنا وتربت قدامنا وعارفين اخلاقها كويس اني شخصيا تربطني بيها علاقة صداقه رغم فرق السن وعرفتها كويس بغض النظر عن المشاكل اللي صايرة بينكم ياخالتي مغليه لكن طوبى بنت اصل ومتربيه وتخاف ربي وغلط زي هدا مستحيل ديره حتى في صغرها وين كانت تقرا في المدرسه اللي نخدم فيها ماكانتش زي بنات جيلها بكل وكل من قراها يشهد ع الحاجه هادي بنيه محترمه ومؤدبه ومستقيمه..
نسرين؛مافي حد مايعرفش الكلام هدا يانجاح كلهم عارفينه..
نجاح:ايه لكن في من ينسى واجب نذكروه...
نجاة كانت مقعمزة ع اعصابها مش قادرة تتحمل تسمعهم وهما يشكروا ويمدحوا فيها..
اما خديجه وامها كانوا ناقمين ع نسرين اللي طلعتهم كذابات قدام الناس...
والناس اللي تسمع في منهم من خاف من الكلام اللي سمعه..
وفي اللي انحرج..وفي اللي ماعجباش..
وفي اللي حاصر مغليه وخديجه بنظرات الشك...
نجمه:مانقولوا غير الله يبعد الشيطان ويهدي النفوس ويلم الشمل..
هما بأصوات متقطعه ردوا عليها..
"ايه والله..آمين..إن شاء الله"
🍃🍃🍃🍃🍃🍃
"لاياوخيتي انا كان نقعمز في الحوش نموت"
مطيره بضحكه؛من يومك ماعندكش روح مع التنسريف..
سميره:خير من غمة الحوش وتطبيق الخلوق..
فردوس بإبتسامه:بما انك تطلعي هلبه قوليلنا شن دارو جديد في البلاد..
سميره؛ماغير طياح السعد ورقاد الريح ماداروا حاجه..
مطيره:الضي هارب ليه 4ساعات الحمد لله مبردها علينا كان هدا راحت ليل..
سميره بحسره؛بلاد منكوبه من كل تركينه والناس تعيط من الغلاء والمرتبات ماتنزل كان كل 3شهور مرة الوضع مأساة بمعنى الكلمه..
مطيره:ربي يفرج ع عباده..
سميره؛ايه والله..بعدين بإبتسامه قالت..لكن الله يبارك ع قهوتكم معبيه المحلات والناس تاخد فيها..
مطيره:الحمد لله رب العالمين..
ع خشة اريج بسفرة الضيافه..
فردوس:اهي جاتك القهوة.
سميره بإبتسامه؛نشم في ريحتها ونراجي في جيتها..
ضحكوا..
واريج مدت القهوة وهي تقول..
/تفضلي.
خدت منها القهوة وقالت؛يزيد فضلك ياغزيله..وخدت من الحلويات بعدين قالت..خوي خميس قالي ع العياده متاعكم..
اريج وهي تفرق ع الباقي قالت..
/ايه قال بيجيبك الاسبوع هدا..
سميره؛ايه بندير تنظيف ونشوف كان في عندي حاجه نلحق عليها..
مطيره؛السوسه فتفت الجرس اهو..واشرت عليه..
حطت اريج السفره ع الطاوله وهي تقول..
/قتلك تعالي نقلعوهالك لكن انتي خوافه..
مطيره:خوافه في عينك يارزيله..
قعدوا يضحكوا..
سميره بضحكه؛وخيرك ماتبيش تقلعيها!
مطيره بمكابره:ماعنديش خلوق..
ضحكوا عليها..
سميره لأريج؛ماعليكش فيها تو نعرف كيف نجيبها..
مطيره برفعة حواجب:العبد الواثق...!
سميره:تو تشوفي..
والحديث هدا تسمع فيه طوبى وهي تاكل في اصبع "كورن فيلكس" وهي مستمتعه وتضحك معاهم..
شويه قالت سميره:وين التويمه ؟
غرفه؛راقدين..شافت لآلاء وقالت..تجيبهم للوش..
سميره؛لالا خليهم توا بعدين نشوفهم..تنهدت وقالت..اني جايه بنفتح معاكم موضوع..
وجه اريج انخطف لونه وقلبها قعد يدق بقوة من التوتر.
مطيره:موضوع شنو؟
ابتسمت وقالت؛مشيريع صغير...
مطيره؛مشروع شنو؟
سميره حطت فنجانها ع الأرض حداها وقالت..
/زي ماتعرفي يامطيره امي الله يرحمها كانت تحب دير حرارتها وتوابلها في الحوش حتى الفلفل المرحي والكركم واني خديت منها هالصنعه وزدت عليها شويه وقعدت نبيع والحمد لله ماشي سوقهم..لكن توا فكرت نكبر الخدمه..وبإبتسامه فيها شي من الخجل كملت تقول..وانتم عندكم مطحن كبير الله يبارك كان دخلتوا مع القهوة التوابل تستفيدوا هلبه زي مااني بنستفيد..
مطيره : ايه هلبه مطاحن توا للقهوة والمكسرات مدخلين التوابل وحني دخلنا في مطحنا حتى البسيسه..
سميره؛معناها عجبتكم الفكرة؟
توجهت انظارهم ليها صاحبة كلمه في نظرهم في موضوع زي هدا..
هي مررت نظرها ع خواتها بعدين قالت..
/شن رايكم؟
فردوس؛ماعنديش مشكله..
غرفه:اني عندي راي كان تعطينا عينه نجربوها وبعدين نقرروا..
سميرة قالت؛فكرت فيها وجبت من كل حاجه كويسه صغيره بش تجربوهم..
طوبى؛بس نبيك تعرفي حاجه خالتي سميره..المطحن عندنا فيه شريك لو جربنا التوابل ومشي الحال بيقعد الموضوع معلق بموافقته هو..
سميره هزت راسها وقالت؛ان شاء الله يوافق وانتم حاولوا معاه وقنعوه قولوله قتلك سميره والله ماك خاسر حاجه وذوقوه بالمرة من اللي بيطبوه بيهم كان ماقال باهي ويخي خطبني بعدها مانبداش اني هي..
ضحكوا..
ومطيره بضحكه قالت؛يعطيك الهني الراجل متزوج..
سميره؛هو قنين ولاشين!؟
فردوس بضحكه؛حتى من العيون ملونه..
سميره؛الشرع حلل اربعه ياكبدي..
ضحكوا عليها..
ومطيره قالت وهي تضحك؛شوفوا وين رفعتنا..خلينا في توابلك ياحنه..
سميره ابتسمت وقالت؛خلاص جربوهم وخبروني شن تقرروا..
🍀وخدتهم الهدرزة الحلوة اللي نستهم همهم..
ماعداها..همها ماينتساش..يدوب تضحك وع وجهه ترسم في ابتسامه مجامله..
وكلمه تسمعها وكلمه لا..وصلت لمرحله معاش تقدر فيها تتناسى همها حتى شويه...
☘سميره؛هدا خميس يتصل..بالله وحده فيكم تجيب عبايتي.
مطيره:ماينوض حد بتقعد تتعشى.
سميره بإبتسامه؛مرة تانيه مطيره..
مطيره:والله ماك طالعيتها من هني قبل لتتعشي..
سميره؛غير علاش تحلفي بس..
مطيره؛كلمي خوك قوليله عشاك هني وبالمرة نطيبوا من حرارتك وتعرفي راينا فيهم بكري بكري..
ضحكت سميره وقالت؛باهي..شافت تليفونها وقالت..اهو اتصل مرة تانيه..
مررت نظرها عليهم وهي تقول..تليفوني بيلا مانحب غيره جو اللمس والكاميرات مامشاش معاي..
فتحت الخط وهي ترد ع خوها وتقول..
/فسدت تلاته تليفونات بهداكا الحساب..هاه خميس..
"مالا اقعدي ودوري من يروح بيك"
ضحكت وقالت..
/باهي اسكندر اسكندر ياودي..اسمع..
"شني"
سميره؛شدتني خالتك مطيره ع العشي..
"ايواااه"
سميره؛فكنا عاد..
"باهي كان تعزمني حتى اني نخليك تقعدي تتعشي"
سميره؛قالك اعزميني..
"تي لااا نبصر يانهاري الاحرف"
وسميرة تضحكت عليه..
وهما يشوفولها ويضحكوا وعاجبهم جوها بالذات اريج..
مطيره بصوت عالي:تفضل تفضل ولدي الحوش حوشك..
سميرة بضحكه؛سمعتها..
"ايه ايه..خلاص سكري"
سكرت وهي تضحك وتقول..
/نحب نطيرهاله..
اريج بفضول؛عندك خوت غيره؟
الاء شافت لأختها بإستغراب..
سميره؛ايه..خوت وخوات بس اني اللي قعدت معاه بعد ترملت فتت الزواج وسريبه وقعد معاه هو وامي الله يرحمها..
غرفه؛قصتكم تشبه قصة عبد الرؤوف ونبيله..
سميره بضحكه؛اول ماتعرف ع رؤوف قالي نفس الشي..
ابتسمت غرفه..
مطيره؛هي ياحنه نوضي نوضي شمري ع ذرعانك وخشي معاي الكوجينه نطيبوا العشي..
سميره؛ولاعندي ايتها مشكله..
وناضت وهي تقول..
/ياكريم..
وناضت معاها مطيره ومشوا للكوجينه وهما يهدرزوا..
اريج:قداش خاشه خاطري..
فردوس؛كلنا..
غرفه؛جوها هي وعمتي راكب ع بعض هلبه...
فردوس:من قال يتلاقوا بعد هالسنين..
اريج؛المصاروة يقولوا مسير الحي يتلاقى...
ويسمعوا صوت المؤذن ينادي لصلاة المغرب..
ناضت طوبى وهي تقول..
/ياحي ياقيوم لاإله إلا انت..
ومشت طلعت من حداهم وهما بعيونهم معاها..
تنهدت فردوس بقهر...
واختها وبناتها بدي ع وجوههم ملامح الضيق..
🍃🍃🍃🍃
والله تفرحوني بجيتكم خالتي نجمه"
نجمه بإبتسامه مجامله:ان شاء الله بنيتي ان شاء الله..
نجاة بإبتسامه؛بالسلامه توا..
مغليه؛هي بالسلامه نجمه توا..
نجمه؛تصبحوا ع خير..
ومشت معاهم سقدتهم بعدين ولت خشت داخل ومشت لخديجه طول..
نجمه:علاش تعزم فيا نجاة ع عرس اختها؟
خديجه بضحكه استغراب؛وشن فيها عمتي عادي!
نجمه؛مافيش بينا هديكا المعرفه بش تتصل اختها تعزم وهي تعاود تعزم تاني..
تنهدت خديجه وقالت..
/هي اختها مش دايره عرس حفلة بسيطه وخلاص وماعندهمش ناس هلبه تجيهم هي تبي تكثر معازيمها قدام عيلة راجل اختها..
قعمزت نجمه وقالت؛اها عازمنتنا بش تعبي بينا مكان!
خديجه؛اعتبريها جبر خواطر عمتي وبعدين انتي حرة تبي تمشي ماتبيش براحتك..
نجمه سكتت شويه وهي تفكر بعدين قالت..
/خلاص تو نمشي ونشوف عواطف كان تبي تمشي حتى هي..
نجمه؛اهو ع الاقل تطلع وتغير جو وبالك تصير حاجه غادي ماحد يعرف النصيب وين..
سكتت نجمه مجبوره بنتها منبهه عليها مايطلعش موضوعها لخديجه بالذات زي مانبهت ع خوها..
ناضت خديجه وهي تقول..
/خل نركب نتكا شويه عييت من التقعميز..
نجمه؛خشي اتكي داخل..
خديجه؛لاالا في شقتي ناخد راحتي اكثر..تصبحي ع خير عمتي..
نجمه؛قدامك كل خير..وقعدت تبع فيها بعيونها لين طلعت من الحوش..زفرت بعصبيه بعدين قالت..
/الصبر...
🍃وبعد ماركبت خديجه لشقتها اتصلت طول بأختها بش تعطيها ع راسها لين تفش غلها..لكن نسرين خلت غيظها يزيد ومابتش ترد عليها...
🍃ونسرين فهالوقت..
طيب في العشي لخوها عمر اللي جايها زياره وناوي يبات عندها..
مقعمز حداها في الكوجينه وحداهم يحيى في القعماز..
وهي تهدرز وهو يسمعلها..
نسرين؛وصلت بيهم يتبلوا ع المراة في شرفها في عمر..
عمر ؛شن يقولوا!؟.
نسرين:قالوا كانت تخون في خوك وهي ع ذمته مع ولد عمها..
عقد حواجبه بإستياء وقعد ساكت.
نسرين؛خوك الجالي لو طلقها وخلاها تمشي ع حالها ماصارش هدا كله لكن نعرفه مش راضيها ع روحه مراة تسيبه..
عمر بضيق:لا يانسرين مش هكي..الجالي يبي طوبى بجديات..
نسرين بسخريه:ايه مسكين مقطعه الحب!..خلي الدوة الفاضيه اني شفت بعيني ونعرف خوك هدا لايحب ولايعرف الحب اصلا..
عمر:ماتظلميشي يانسرين اني عايش معاه وشايف اللي صاير فيه..
نسرين حطت الطاجين في الكوشه بعدين التفتت ع خوها وقالت..
/اللي يحب مرته يحترمها ياعمر يصونها ومايسمحش لنفسه قبل الغير انه يغلط فيها..وانتم خوتي ماشاء الله عليكم ولا واحد دار خير في المراة اللي خشت ذمته ولاكانت تعنيله يوم الايام..تعرف ياعمر اكبر غلطه درتوها في حياتكم انكم تزوجتوا..اللي زيكم مفروض يقعد بروحه.
عمر بضيق:مزوديتها شويه..
نسرين؛لاوالله لتوا ماقلت شي ياعمر..
عمر:جيتك بش نغير جو طبقتي خلوقي..
نسرين:كلمة الحق طبق الخلوق..
عمر شبحلها بإمتعاض وهو ساكت..
وهي قالت..
/تسأل عن دنيا؟
شاف ليحيى وقال..
/نتواصل مع العياده اللي تابع عندهم ومصروفها يوصلها كل شهر..
نسرين هزت راسها بضيق بعدين قالت..
/تشرب قهوة..
عمر وهو يلاعب في يحيى؛ياريت..
بدت دير في القهوة..
وهو سألها:شن صار في ربيع؟
نسرين بضيق؛وضعه بالهون..
عمر:لهالدرجه؟
بضيق قالت:اختك عتبه ياعمر ماصارش فيه هكي الا بعد ماخداني..
عمر:فوتي الدوة الفاضيه هادي معاش تفكري هكي...
تنهدت بضيق وحطت البكرج ع النار..
🍃وفي حوش لطفي الواعر.
تحديدا المربوعه الخارجيه..
كانوا ملتمين الحاج علي وعبد المطلب وعبد الرؤوف واسكندر ومعاهم عبد القيوم اللي شدوه ع العشي..
🍃عبد المطلب؛هدا اسمه تبذير والمبذرين اخوان الشياطين.
اسكندر بضحكه؛لا مش هكي ياحاج لكن الواحد ربي يعطيه يخليه يشوف اثر نعمته عليه..
عبد المطلب؛بالمعقول ياولدي بالمعقول..
اسكندر وهو يساير فيه..
/مرات عندك حق..
عبد المطلب:اكيد مش مرات..
عبد الرؤوف وعبد القيوم شادين رواحهم عن الضحك بقوة..
علي؛خلاص غيروا السيره غيروا السيره..
اسكندر:ياريت والله..
فنص عبد الرؤوف فيه..
وعبد القيوم رفع حواجبه وهو يشوف لاسكندر..
وعبد المطلب يشوفله بربع عين..
🍃ومن المربوعه للحوش..
في الكوجينه سميرة ومطيره مابطلوش هدرزة وهما يديروا في العشي وفردوس معاهم مستمعه مستمتعه..
☘وفي دار المعيشه..
غرفه لاهيه مع صغارها واريج وآلاء يعاونوا فيها...
اما طوبى..
كانت في الدار التانيه متكيه ع السرير والمروحه دور عليها..
الوساده تحتها مبلله بدموعها..
وهي سرحانه تفكر في حالها..
وكلام الجارة رقيه مش قادرة تنساه للحظه..
🍃وقعد ع هالحال لين نادوها ع العشي طلعت سايرتهم مسايرة..
فردوس:يعطيكم الصحه..
اريج؛بنة زايده يوم..
الاء:صح..
سميره؛وانتم يابنات طوبى غرفه؟
غرفه بضحكه؛الله يبارك الحق..
طوبى بإبتسامه؛رايي من رايهم..
سميره؛معناها قعدت ع الشريك طيبوله وابعتوله وين ماهو..
فردوس:تو يجي ان شاء الله ونذوقوه..
طوبى تمرر في نظرها بيناتهم وهي تقول في نفسها..
"هونا في المربوعه ياكل..اشبح يقول باهي ولا يوقفلنا فيها"
🍃"لاحانطة وماشاء الله عليها بس التوابل زياده يتعبوا فيا شويه"
علي؛لا كان هكي فوتها كله ولادي البطن..
عبد الرؤوف؛هي البطن هو المصران الغليظ..الحمد لله ع كل حال..
عبد القيوم؛مفروض ماتتعشاش كان هذى حالك..
عبد الرؤوف؛مادورشي ماشيه الامور..
ضحك اسكندر وهو ياكل..
🍃وبعد العشي..جتهم الطاسه الخضراء شربوها..
بعدين طلع اسكندر وروح بأخته..
ومشي عبد الرؤوف يشوف غرفه في جنان الكوجينه..
وعبد المطلب روح للحوش بش ياخد دواه ويرقد...
وقعدوا عبد القيوم وعلي يراجعوا في حسابات المطحن الشهر هدا..
علي:الحمد لله المربح يزيد شهر ورا شهر..
عبد القيوم بإبتسامه:الحمد لله...
علي:لكن المحل مازال مش عاجبني وضعه.
عبد القيوم؛وضعه معقول..
علي هز راسه وقال؛يمشي الحال..
عبد القيوم:مع الوقت ينعرف ويتحسن وضعه..
وناض وهو يقول..هي خل بنعدي توا خلاص ماتبي شي؟
علي؛لامانبي شي بارك الله فيك..
عبد القيوم؛تصبح ع خير..
علي:قدامك كل خير..
ومشي التارقي طلع من المربوعه وعلي الواعر وراه..
لما طلع من الحوش بكل وسكر الباب..
طلعت طوبى اللي كانت تراقب من فتحة الباب وتراجي في طلعته..
طوبى:جدي..
شافلها وهو يراجي فيها توصل فيه..
وصلت فيه وقالت:معليشي جدي نبيك في موضوع..
هز راسه وقال؛تعالي..
ومشي ولى للمربوعه...وهي خشت وراه...
🍀🍀🍀🍀🍀🍀
بعد يومين...
الساعه 4:00قبل العصر..
في حوش مروة اخت صابرين..
كان الكل ع قدم وساق يجهزوا للحفله حتى وان كانت بسيطه حتكون متعبه مع اجواء الصيف..
☘صابرين مابتش تمشي لمزينه كانت تبي دير كل شي في الحوش..مش قلة فلوس لكن ماعندها رغبه في شي...
مقعمزه جنب فستانها الابيض المطروح ع السرير وهي تبكي..
مش قادره تحوله من بالها ولاتنساه..
وهي عنده ماتسوى شي..مش اكثر من حاجه ياخد بيها في مصلحته ويشبع في ونزواته...
اخر مرة كلمها وخدي منها مايبي من معلومات ولما خبراته ع موعد العرس بكل برود باركلها ووعدها
بهديه...
☘وكان عند وعده..
خشت عليها بنت خوها ببوكس الهديه وقالت..
/شوفي خويله الهديه اللي جاتك توا جابها مندوب..
هي قالت بتوتر:حطيها حبيبتي واطلعي..
:خاطري نشوفها معاك..
صابرين؛تو نقولك عليها بعدين..
:حاضر ياعروستنا..
ابتسمت صابرين...وبنت اختها طلعت وسكرت الباب..
شافت للهديه بخوف..
بعديت خدت الكرت المحطوط فوقها وقراته..
"تهانينا"
فتحت الناسترو بعصبيه بعدين رفعت الغطا وشافت اللي فيها انصدمت..
دموعها قعدوا زي السيل.
شافت ورقه طبست خدتها وفتحتها وفعدت تقرا..
"خلي الراجل يعيش حياته"
عكرشت الورقه بغضب ولوحتها وسط البوكس وبدت تبكي وهي تقول..
/حقير..سافل..
🍀وبرا من دارها..
نجاة بسخريه:سكينه اللعينه اتصلت بيا امس وقالت علاش ماعزمتوني..
مروة بتعجب؛من امتى حني حاسبينها ولاهي حاسبتها!
نجاة؛تتلصق هالقرادة..
مروة بقرف:ودرة...هي تعالي معاي..
☘وقعدوا ساعه وهما يجروا ع الحوش بعدين ع ارواحهم..
وبعد العصر تم عقد قرانها..وحفلتها بدت بعدها بساعه..
☘الخيمه ماكان فيها حد الا الاقارب واقارب بعض الاقارب..
زي خديجه وامها ومعاهم نجمه اللي جت بروحها..
واصحاب الاقارب..
زي ابتسام اللي جت ببنتها للحفله...
وين شافتها خديجه عرفتها طول..
بس هي ماركزتش ع خديجه..
شويه نادت بالاشارة ع نجاة...جتها..
طبست عليها وقالت..
شن تبي!؟
خديجه؛من هي االلي لابسه قفطان ازرق؟
نجاة شافت لابتسام بعدين ردت ع خديجه تقول..
/صاحبتي تعرفت عليها المدة الأخيرة..بنتها تقرا مع جوري
خديجه:اها..باهي بري اجري ع حالك..
رفعت عيونها وقلبتهم بغرور ومشت..
وخديجه مركزه بنظرها ع ابتسام اللي كانت لاهية بتليفونها..
شويه ناضت..ومشتلها..
ومغليه ونجمه كانوا لاهيات بالهدرزة مع خالة نجاة..
🍃"ابتسام"
رفعت عيونها في اللي كلمتها ووين شافتها انصدمت..
خديجه بإبتسامه؛ابتسام كعبار ولا؟
بلعت ابتسام ريقها وهزت راسها وهي تقول..
/ايه..
خديجه بإستغراب؛شكلك ماتفكرتنيش..
ابتسام وهي تحاول دير روحها عاديه ابتسمت غصب وقالت..
/انتي خديجه شنيبه ولا..
ضحكت خديجه وقالت:ايه خديجه شنيبه..
قعمزت جنبها وقالت؛فاتت اكثر من عشرين سنة لكن قاعده زي ماانتي الله يبارك..
ابتسام وهي مبتسمه مجامله قالت؛حتى انتي ماشاء الله..
خديجه؛شن حالك وشن دايره وشن اخبار امك وخواتك من لما حولتوا من المنطقه معاش نندروا عليكم..
ابتسام هزت راسها وهي تخفي في ارتباكها..
/الحمد لله..الحمد لله...
🍃ولت نجاة للخيمه وهي دور بعيونها فيها وتشوف في المعازيم..جو عيونها ع خديجه وهي مقعمزة مع ابتسام..
استغربت..وقعدت واقفه تشوفلهم..
☘خديجه؛الله يبارك هديكا بنتك؟
ابتسام؛امم..بنتي..
خديجه وهي مركزة ع البنت..
/مش عارفه وين شايفتها!..
البنت كانت طالعه في الشبه لعيلة جدها الصيد قريبه في الملامح لعمتها نجاح..
ابتسام بلعت ريقها وهي ساكته..
خديجه بإبتسامه؛الله يبارك عليها..اني عندي بنية ووليد وتوا حامل..
ابتسام؛الله يبارك..عقدت حواجبها وقالت بتساؤل..اقاربك العيله؟
خديجه؛هومش اقارب بمعنى الكلمه..اخت العروسه كان مرت خوي الله يرحمه..
توسعوا عيونها بدهشه بعدين قالت..
/الله يرحمه مني فيهم!؟
خديجه؛خوي من بوي..
ابتسام؛اها..الله يرحمه..وقالت في نفسها..
"هي هادي حماتها اللي حكت عليها! اخر حاجه كنت نتوقعها انهم نفسهم عيلة شنيبه اللي فشارع القهوة!"
خديجه:اني خدوني عيت الصيد تزوجت محي الدين كان تتفكريه خو عبد الفتاح الوسطاني..
ابتسمت بتوتر وقالت؛اها ايه تفكرته..
خديجه:وانتي شن امورك شن درتي في حياتك خبرينا..
قعدت ابتسام تهدرز مع خديجه وهي متوترة شويه..
وخديجه حست انها مش ع بعضها وفسرت هدا على انها تفكرت عبد الفتاح وقصتها معاه..
قطع عليهم هدرزتهم خشة صابرين...
قعدوا مركزين معاها..ونظرات خديجه ليها كلها ازدراء وتعالي..
اما صابرين كانت كارهه روحها..ابتسامه المجامله اللي ع وجهها ماقدرتش درق حالتها...
وصلوها خواتها للكوشه وقعمزت..
وشغلوا الاغاني وبدوا يرقصوا..
والبنات الصغار مشاركات حتى هما ومنهم بنت ابتسام اللي كانوا عيون امها عليها وهي ترقص..
والبنت وهي ترقص تحمست شويه وعترت في وحده البنات اللي كانت ترقص معاها وطاحت..
نجمة وين شافتها طاحت قالت بتلقائيه...
/اسم الله!..
وامها ناضتلها تجري ونجاة جتها حتى هي..
قعدت نجمه تشوفلهم وركزت في المراة اللي جت نهضتها..
شويه مغليه قالت؛والله الا هي..
نجمه وهي تشوف لإبتسام قالت..
/بنت كعبار ولا؟
مغليه؛ايه هي بنت كعبار خديجه عرفتها طول.
ونجمه قعدت تشوفلها بعدم تقبل بسبب اللي صار في ولدها ع خاطرها زمان ولأنها ام عارفه وحاسه بتأثير ولدها عليها لعند اليوم..
☘وخديجه تراقب في عزوزتها كيف تشبح لإبتسام..
لعند مافجأة رن تليفون جنبها..
التفتت يمينها وشافاته كان محطوط ع الكرسي حطاته ابتسام لما ناضت..
وعيونها ع الشاشه شافت المتصل..
(عبد الفتاح ) وفي جنبه رمز القلب التعبيري..
توسعوا عيونها بصدمه وطول شافت لأبتسام وبنتها..
ونجاة واقفه عليهم تعطي فيها طاسة مية بش تشربهالها..
ركزت خديجه في البنت وقالت بهمس..
"معقوله!"
فصلت المكالمه ع جية ابتسام ببنتها..
رفعت خديجه حاجبها وقالت؛عوينه عوينه..
ابتسام خدت تليفونها وقعمزت وهي تقول..
/خليك حداي ماما..
وبالبنت تمسح في دموعها وتشهق بعبراتها وخديجه تشوفلها..
شويه رن تليفون ابتسام من جديد..
وين شافت المتصل ردت بسرعه وهي تقول..
/ايوه...تمام طالعين توا..
وسكرت وناضت وهي تنادي في نجاة..
وعيون خديجه وهي مضيقتهم عليها..
جتهم نجاة وهي تقول..
/نعم حبيبتي..
ابتسام؛بالله جيبي الكاب متاعي
نجاة؛مانقوليش بتروحي!
ابتسام؛قتلك من الاول مش معطله المسافه بعيده..
نجاه بأسف؛خسارة مالحقناش نهدرزوا..باهي شويه وجاياتك..
ومشت بسرعه خشت داخل..
خديجه:قعمزي لين تجيك..
قعمزت ابتسام وهي مرتبكه هلبه..
وبنظره عابره عيونها جو في عيون نجمه من الخوف طول غيرتهم..
وخديجه مركزة معاها...
شويه جت نجاة بالكاب ومعاها بنت اختها وفي يدها اكياس..
نجاه؛خودي حبيبتي..
ناضت ابتسام خدت الكاب وقعدت تلبس فيه..
خديجه في نفسها..
"شكلها قاعده ماتحجبتش"
نجاة خدت الكياس ومدتهم لإبتسام وهي تقول..
/تفضلي بسومه حصتك..
ابتسمت وقالتلها؛صحيتي..وخدت منها الكياس وقالت..
ان شاء الله ربي يهيني وخيتك..
نجاة؛آمين..
ابتسام؛هيا بنتي بوك يراجي..
ومشت ابتسام بسرعه مع بنتها ونجاة معاهم تسقد فيهم..
وخلوا خديجه تفكر في اجوبه ع تساؤلاتها..
مغليه:خيرها العفو ماجت سلمت!
نجمه:ماعندنا مانديروا بسلامها..
مغليه؛معقوله لتوا يانجمه قاعده مدايرة منها!..
نجمه سكتت وهي منزعجه..
ع جية نجاة..اشرتلها خديجه تجي..
مشتلها وقعمزت جنبها..
خديجه؛من امتى صحبه انتي وياها!؟
نجاة:مش هلبه من قريب شهر..انتي شكلك تعرفيها!؟
خديجه بخبث؛ايه من زمان هلبه.. قوليلي هادي نفسها اللي مرة عزماتك تتعشي عندها؟
نجاة:ايه هي نفسها..
خديجه؛شايفه راجلها!؟
نجاة بإستغراب؛شن الاسئله هادي كلها!؟
خديجه شدت يدها وقالت؛غير جاوبيني شايفه راجلها!..
نجاة بآستغراب شديد؛ايه في صورة..
خديجه؛اصبري شويه..
قامت تليفونها وفتحت الفيس..
وخشت ع صفحة راجلها وقعدت دور في الصور لين عترت ع صورة ليه هو وخوته يوم فاتحة نجاح..
وورتها لنجاه وهي تقول..
/زي هدا اللي لابس زبون ذهبي..
قعدت دقق نجاة في الصورة وهي تتفكر في الصورة اللي شافتها في حوش ابتسام بعدين قالت بتعجب..
/ايه هو نفسه..
بعدين بصدمه شافت لخديجه وقالت...
/سلفك هدا؟
خديجه ضحكت بشماته وهي تقول..
/ايه ياحنه سلفي الكبير راجل سمورة الباهيه اكثر من تحب عمتي في كناينها..
وقعدت تضحك..
ونجاه تشوفلها بصدمه وخوف لما تفكرت الهدرزة اللي صارت بينها وبين ابتسام..
خديجه وهي مبتسمه بمكر قالت..
/واخيرا بيولى في آكشن في حوش الصيد..ناري عليك ياسمورة طيبه ياوخيتي ماتستاهلي اللي صاير فيك..
"نجاة"
ناضت نجاة بسرعه لما نادتها اختها وهي ترعش من الخوف..
وخلت خديجه عايشه متعة الشماته في سلفتها االكبيره اللي عمرها ماشافت منها الا كل خير..لكن كانت تحقد عليها بسبب مكانتها عند نجمه وحماواتها اللي مقدمينها في كل شي..
🍃واستمرت الحفله..
وعشوا المعازيم...ورقصوا وغنوا واستعدوا لجية اهل عريس صابرين..
لكن...مرت الساعات وتأخر الوقت وماجي حد...
ومروة تتصل بأهل العريس..وراجلها يتصل بالعريس نفسه ومايرد عليهم حد...
وصارت ربكه قدام الناس..
مروة بقلق؛خيرهم مايردوش ياهمي شن صاير.
ونجاة ساكته وهي تشوف لأختها بضيق..
وصابرين تشوفلها بقلق واستغراب..
شويه مشت نجاة لأختها خدتها ودخلتها داخل..
والمعازيم بدوا يتهامسوا بين بعضهم..
🍃صابرين بصدمه؛كيف مايردوش!..
نجاة بغضب؛مايردوش نتصلوا بيهم لاهو ولاماليه يردوا..
مروة وهي قريب تبكي..
/ياعليك فضيحه قدام الناس..
وصابرين مقعمزه وهي مصدومه..
"مروة يامروة"
نجاة؛نوضي لراجلك شوفيه!..
ناضت مروة بسرعه وطلعت لراجلها..
🍃لقت وجهه منسود وباين عليه ملامح الغضب وهو يقول..
/توا الراجل رد عليا وقالي البنت عندكم معاش نبيها ..
خبطت مروة بيدها ع وجهها وقالت..
/علاش!..
هو بغضب قال..
/اسألي اختك..
ومشي طلع من حداها وهو معصب ع الآخر..
وخلاها من صدمتها جامده في مكانها ومش قادرة تتحرك...
#افك_مفترى
#طوبى
......يتبع....
