#طوبى "جنة طوبى"
#جمان_فريد
#الجزء_الحادي_والستين"رسايل_انتقام☆"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
••••••قبل نصف ساعه••••••
🍃في حوش الصيد...
تحديدا في دار نجاح وعواطف...
كانت نجاح راقد في سريرها من غير نوم...
سرحانه تفكر..
وعواطف اختها كيف خشت سريرها بعد ماكانت تحدد في ملايتها..
شافت اختها كيف سرحانه سألتها..
نجاح..وين سافرتي؟..
شبحت نجاح لعواطف وقالت؛لتوا مش مستوعبه موت عيشه..
عواطف:الله يرحمها ويغفرلها..اني مش مستوعبه كيف درقت مرضها معقوله مافي حد حس بيها!؟
تنهد نجاح ورجعت تفكر بعدين قالت؛الحق غبطتها ع موتتها خاطري نعرف شن دارت بش ختملها ربي عمرها بهالخاتمه..
تغطت عواطف وهي تقول:الصبر..صبرت هلبه..
وعطت اختها بظهرها...
وخلت اختها تفكر في كلامها هلبه..
🍃وفي جنبهم..
في شقة عائشة والمهدي..
كان المهدي قاعد فايق...
يطلع في حوايجه من الشنطه ويرد فيهم لدولابه..
بعد كمل..
جي لشنطة عائشه..تردد قبل مايفتحها..
بس بعدين قرر يفتحها ويطلع حوايجها ويردهم للدولاب كان يبي كل شي ليها يقعد لصغارها يشموا عليهم ريحتها..
وين فتحها..
جت قدامه ملايتها..اخر حاجه لبستها وماتت بيها..
ماقدرش يتحكم في دموعه..نزلوا غصب عنه وطول مسحهم..
طلع الملايه..ومشي علقها في شطار...وحطها في دولابه بين حوايجه...
بعدين قعد يطلع في باقي حوايجها وحطهم في دولابها هي..
وكان كل مايطلع حاجه يتفكرها وهي لابستها ويتألم..
بعد مافضا الشنطه..
شاف فيها حاجات خلاته يستغرب..
مذكره..بيروات...واوراق مطويه..
قعمز ع رووس صباعه وهو يشوفلهم..
بعد مد يده وخدي الاوراق المطويه..
اول ورقه كان مكتوب عليها اسم..
محمد..
حولها وشاف اللي بعدها..
كان مكتوب عليها يزن..
حولها حتى هي وشاف اللي بعدها..
وكان مكتوب عليها..سدرة بنتي..
حولها..
وشاف اخر وحده..وتفاجئ هلبه..
هالورقه كان مكتوب عليها..
"سدرة صاحبتي"
رجعوا عيونه تعبوا بالدموع وفاضوا..
مسحهم بظهر رسغ يده اليمين..
ومرر نظره ع الرسائل والاسماء المكتوبه عليها..
بعدين شدهم كلهم بيد وحده وخدي المذكرة بالتانيه..
ومشي قعمز ع السرير..
حط الرسائل جنبه..وفتح المذكره..
وقعد يقلب فيها..كانت فاضيه تماما مافيها شي..
اخطا صفحه وحده وكانت الاخيره..
لقاها كاتبه فيها...
🍃أودّعكم وأُعلمكم بوجدي
وقلبي عندكم والجسم عندي
وقصدي لا أفارقكم ولكن
قضــاء الله غالب كـل قصد🍃
معاش قدر يتحكم في دموعها ولايمنعها..
خلاها تنزل جاريه تبلل لحيته...
وبحداه بنته راقده..راقده بقلب مفطور من الحزن...
🍃وبعد عنهم بمسافه..
في حوش علي الواعر..
كانت اميمه الوحيده اللي فايقه..
اللي صار معاها حرمها النوم والراحه..
لكن اللي داراته بش تقاوم الألم والمشاعر البشعه اللي كانت تحس بيها فهاليوم مايديراش الا صاحب قلب متعلق تعلق تام بربه..رافض يعترض ع قضائه ومكتوبه..
في كل مرة تحس فيها انها وقفت ع رجليها وصارت اقوى وقادره ع التجاوز..
تضربها ريح الاقدار وطيحها ع وجهها...
وبرغم الألم..
كانت ترفض رفض تام تقول بينها وبين نفسها..
"علاش ياربي دير فيا هكي"
او تساؤل فيه شي من الاعتراض..
اللي داراته اميمه..
هي انها شدت تليفونها وحطت ع تطبيق القرآن..
وقعدت تقرا من سورة لسورة..لين وصلت في سورة الرعد..
يوم كامل من لما روحت للحوش لعند هاللحظه...
وصلت في القرايه لآية..
¤وقد مكر الذين من قبلهم فلله المكر جميعا يعلم ماتكسب كل نفس وسيعلم الكفار لمن عقبى الدار¤
انهارت بالبكي بعد الآيه هادي..
وهي تتفكر في كلام الناس عنها ونظرتهم ليها بعد طلاقها من عمر..
واللي شافاته اليوم في عيون ناس حضرت الفضيحه اللي صارت في المستشفى..
نظرات شك واتهام..
طبعا وحده يجيها راجلها ويهجهم عليها في مكان عام ويقول مرتي..
غالبا حيفكروا فيها تفكير سيء قبل ليفكروا فيه هو هي..
"الله اعلم شن لقاها دايره"
"اشبح شن شاف بش دار هكي"
"مش قالوا طلقها لما سمع ان عندها علاقه بواحد من الدكاترة"
وهي من غير شي طالعه عليها دوة واشاعات عمر باللي داره اليوم اثبتها...
غمضت عيونها وهي تبكي بألم وقالت بصوت يدوب طالع..
ياربي انت عارف كل شي..انت عارف ياربي...
" طول حياتي تبكي عيني..هكي ياغالي تخليني
فيك انت وش ينسيني..زيك ماضنيت نلاقي....
زيك ماضنيت نلاقي..."
وين سمعت اللي سمعاته..فتحت عيونها ووقفت بكي وهي تحاول تتأكد من اللي تسمع فيه..
بعدين خلت تليفونها وناضت ومشت فتحت باب الدار وطلعت..
وتسمع في صوته وهو يغني وقالب الشارع..
حطت يدها ع خدها بصدمه..
ع طلعة حسين وامها من ديارهم..
حسين وهو عاقد حواجبه؛هدا شني!؟
"اميمه"
شهقت صفيه بصدمه..
واميمه حطت يدها ع فمها وهي مصدومه ودموعها ينزلوا..
ع جية جدها علي من داره وهو يضرب بعكوزه في الارض ويقول بغضب..
"فرخ الكلب عمر"
حسين بغضب شديد وصدمه؛نهار امه احرف!.
وطلعله يجري..
والحاج علي وراها وكان في قمة الغضب وشعره منكوش..
صفيه بصدمه؛خيره بلاه هدا هبل !!؟
وطلعت برا..
واميمه نزلت يدها وطلعت وراها..
🍃في نفس الوقت..
حوش لطفي كله ناض لما سمعوا غني عمر وعياطه..
وكلهم طلعوا للجنان..
ماعدا لطفي ومعتز ولد فردوس اللي طلعوا برا الحوش..
🍃ع طلعة محمد شنيبه والجالي ونضال ومحمد ولد المهدي..
وزوز رجاله من اقاربهم بايتين عنهم..
أب واخ دنيا مرت عمر...
🍃في حوش المهدي..
وقف التارقي في الروشن المقابل للشارع وشاف عمر كيف يترنح بحركاته وسمعه يعني وينادي في اسم اميمه..
وتلقائيا قال بإزدراء..
" عيله منتهيه"
بعدين شاف حسين وهو طالع من حوشهم..
🍃ويقول بغضب شديد؛يافاسد..
ويشده وهو يقول:نهارك اللي دور فيه..
وطاح فيه ضرب..
وعمر يتلقى في الضرب وهو يقول؛نبي مرتي..
حسين؛تبي هادي ياكلب ..وعطاه بقبضة يده ضربه ع بطنه قريب طلع احشائه برا..
ولطفي يتفرج وهو متشفي فيه..
وبوه علي يقول..عطيه..زيده..ربيه كان مالقاش من يربيه..
🍃وفوق السطح في دار الخزين..
النساوين يتفرجوا من الروشن وهما مصدومات..
ومطيره؛عطيك الصحه ياولد خوي..ايه زيده..ان شاء الله ماتسلم فيه عظمه..
اريج بخوف؛حي عليا نضال جاهم..
آلاء:حتى راجل خالتي..
🍃ويجوا نضال والجالي يحاولوا يفكوا خوهم من ايدين حسين..
الجالي:خلاص ياحسين عاد..
ويخبط حسين ع صدره ويدفه وهو يقول بغضب:حول غادي..
وبجبد عمر ويضربه مرة تانيه..
🍃عبد القيوم؛ ياريتك مخلطهم ع بعضهم..
نضال وهو يحز؛حسين خلاص ياحسين..
عمر بصوت مترنح:خش طلع اختك..
فنص نضال في خوه وقال: يا حمار!
وحسين ينعمي بالغضب وبصوت عالي يصيح..ويجبده ويضربه مرة تانيه..
🍃نجاح؛ووك عليا حسين زي الغوله الهايجه..
عواطف وهي تضحك؛عصده تعصيد..
🍃ومن جنبهم يطلع عبد الرؤوف من الحوش وهو لابس شبشب صبع يجري..
وجي بيناتهم وفك عمر وشد حسين عنه..
حسين وهو يحاول يخلص روحه:تي خليني خلي..حول..هل نقتله الفاسد السكار....
وعمر شدوه خوته...
الجالي:ياكلب ياحيوان شن درت في روحك وفينا..
عمر:نبي مرتي..نبي نردها..
حسين؛ياعنبوك..
وجي بيمشيله غير عبد الرؤوف شده بقوة وقاله؛خلاص ياحسين ليل وشهدرة..
لطفي بصوت عالي:شن هدا يامحمد شن هدا !؟
ومحمد شنيبه كان يلقى الارض تنشق وتبلعه من الموقف اللي حطه فيه ولده قدام نسيبه وجيرانه في الشارع..
صاح في ولاده بصوت عالي يقول؛جيبوه دخلوه داخل..
🍃وفي روشن دار ولاده...
كانوا واقفات مغليه وبناتها يتفرجوا ومرت خوها معاهم..
مغليه وهي تندب؛ياحشمتي..ياكشايفي...
خديجه وهي مصدومه ومعصبه؛الله لاتربحها هي اللي وصلاته لهني الله لاتربحها..
🍃ودنيا حداهم مقعمزه ع السرير وحاطه راسها بين ايديها وتبكي وامها تشوفلها بألم وحسرة..
🍃عمر؛حولوا خلوني..مانيش خاش الا بمرتي اميمه قاعده مرتي ومن حقي نردها..نبي نردها..
ضربه الجالي ع ظهره وقاله:تي ضم فمك واسكت..
عمر:علاش تبني نسكت ع حقي؟!
حسين غمض عيونه بنفاد صبر وقال؛تي حول ياعبد الرؤوف..
عبد الرؤوف بعصبيه؛تي دخلوه الزفت داخل ياراجل دار العار..
عمر:يا حسين..اني ماغلطش في اختك راهو...ماضربتهاش...
خوته قعدوا يجبدوا فيه بش يدخلوه وهما يسبوا ويلعنوا..
وهو مكمل في كلامه بصوت عالي:حتى..كان ضربتها..شن فيها...اهو بوك..ضرب امك في الشارع وقاعده معاه..
حط الجالي يده ع فم عمر بش يسكته وهما يجبدوا..
عمر قعد يعافر في خوته وهما يجروا فيه..
وبوه..وبو دنيا يشبحوله بغضب..
هو قدر يفك يده الجالي وكمل يقول..
قوله خليك زي امك..حصلتها طريحه في الشارع وصبرت..وسكتت..
علي بغضب: لعنه الله عليك..وطبس خدي رشاده..
وحدفها عليه..
جت في جبهته..
خوته انفجعوا..
وهو صاح بصوت عالي من الألم..
علي:بصطاردي..قليل ربايه..وسخ..لعنة الله ع اليوم اللي ناسبناكم فيه..
التفت الجالي وشاف لعلي بحده..
ولطفي مشي لبوه بسرعه وقعد يدخل فيه..
ومن جهة تانيه يطلع المهدي من الحوش اللي ماكانش ناوي يدخل من البدايه بس لما الحكايه وصلت حدها...
طلع طول لخوه..
المهدي؛عمر..
ويشده من مرفقه وينزل ع وجهه بصفعه..
جمدت الدم في عروقه..وقاله بصوت كله غضب:خش داخل ياحيوان..
عمر حط يده ع وجهه ونزل راسه ومشي خش داخل..
وبوه لحقه ووراهم خوته..
اما خو مغليه وولده..كانوا يشبحوا لحسين وهما مازال مصدومين من الموقف ومش مستوعبين اللي صار..
ولاحسين مستوعب اللي سمعه من عمر...
المهدي جي لخاله وولد خاله وقال بإحراج؛امسحوها في وجهي..
خاله شبحله من فوق لتحت بعدين مشي خش داخل..
ووراه ولده..
ومحمد المهدي معاهم بعيونه..
المهدي:خش محمد..
محمد هز راسه ومشي خش..
والمهدي وراه..وين وصل في الباب..
شاف برا..
جو عيونه ع حسين وعبد الرؤوف...
كانت نظراته نظرات ضيق واحراج..
بعدين سكر الباب...
اما حسين اللي كان يشوف في الفراغ وهو يفكر في كلام عمر..
لف ومشي وخش طول لحوشهم وسكر الباب بقوة..
عبد الرؤوف بضيق؛استغفر العظيم وخلاص..
ولف بيمشي جو عيونه ع الروشن اللي واقف فيه التارقي..
عبد القيوم حرك راسه يمين ويسار بأسف..
وعبد الرؤوف مط شواربه للأسفل بعدم رضا..
بعدين مشي لحوشه..
وعبد القيوم سكر الروشن وهو يقول بحسرة..
وكان يعرفوا اللي نعرفه...
🍃🍃🍃🍃🍃
وعرف حسين شي الكل كان عارفه ماعدا هو..
والطريقه اللي عرفه بيها خلت نار غضبه تقوا..
خش للحوش وكان قاصد بوه...
قابل عمه وجده وهو خاش..
علي قال؛حسين..
وحسين مايسمع في شي..مكمل طريقه والغضب مسيطر عليه..
وبوه كان واقف بكروسته في الممر وهو يسمع في دوشه والعراك..
قبل مايشوف حسين جايه بغضبه..
شاف اميمه واقفه في واول مرة...
علاش واقف اميمه هالوقفه؟!
السبب خلا عبد المطلب يشوفلها وهو مش مستوعب..
حسين وين شافها واقف اول الممر وقف..
امه جاته وقالت بخوف؛حسين..
هو قال؛هو سؤال نبي تجاوبي عليه طول يام..طول..حق ضربك في الشارع!!؟
علي:وانت دور في قطاف واحد سكار نكار!
حسين بعصبيه؛يام نسأل فيك..صار ولاماصارش..
لطفي:حسين ولدي صل ع النبي..
هو بإنفعال وعيونه معبيه دموع؛معناها صار..وكلكم عارفين واني اخر من يعلم!!؟..شبح لجده شويه بعدين قال..معناها هدا علاش لزيته ولا..هدا علاش..
علي قعد يشوفله بضيق ومش عارف شن يرد..
حط يده ع صدره وقال؛امي تنضرب في الشارع! امي اني تنضرب في الشارع والناس تتفرج عليها!؟ امي اني تنضرب في الشارع واني اخر من يعلم!.. اشر بسبابته ع الباب وهو يقول...لا ونعرف من واحد ف..اسد زي هدا في موقف مس.خ زي هدا!؟؟
شبح لبوه..
لقاه منزل راسه..وباديه ع وجهه ملامح الخوف..
قاله؛كيف دير هكي انت كيف..
ومشاله..
ولطفي وجده يكلموا فيه..
"حسين..حسين وين ماشي!"
وين قرب بيفوت امينه..
وقفت في وجهه..
هو شبحلها بإستغراب..
اميمه ودموعها في عيونها؛حسين استهدي بالله..
هو قال؛حولي من قدامي..
اميمه؛شن بدير كان حولت؟
هو ابتسم سخريه وقال:من امتى!؟ كان في فالحوش حد يكرهه انتي..
هو سمعه شن قال..حس بشعور مؤلم تجمع في صدره وكتم ع انفاسه..
هي ردت خوها تقول:وانت كان خليتك تمشيله شن بدير..تضربه!؟
هو غير عيونه وشبح لبوه بحقد وقال؛ياريت نقدر...
علي شاف لحسين بضيق شديد..
ولطفي قعد يشوف لعبد المطلب اللي قعد منزل راسه وهو يسمع في حسين يقول..
لكن بنقوله كلمتين حاصلات هني..واشر ع رقبته..بعدين قال..ليهم سنين..نبي نقوله اني عمري ماحسيت بيه ولاحاسب ان عندي اب..ومعاملتي ليه بالحسنى هي معامله مع ربي بس..لولا غضبه وبعدين كلام الناس..لولا ان هالحوش مش حوشنا راني ماخلتيكش فيه دقيقه وحده..لكن تعرف كيف..اللي صار فيك كله عقاب من ربي..عقاب تستاهله..ع قياسك وقياس افعالك..ومافيش اعدل من هكي..مرر نظره عليهم وقال..ماتراجو مني شي نديره للراجل هدا..
ودف اميمه ومشي بإتجاه داره وهي قعدت وراه لين وصلت في كرسي بوه وقفت حداه..
وحسين فات من حداهم ومشي لداره..
وسمعوا كلهم صوت باب الدار وهو ينخبط بقوة..
شافت اميمه لبوها..
لقاته قاعد منزل راسه..بعدين تباعد بكرسيه..ولف بيه ومشي لداره..
وهي تبع فيه بعيونها...
وجدها وعمها كان يشوفوله..
والزوز كانوا يتفكروا في ايام شبابه..
كيف كان يتعامل مع امه..كيف كان نافر منها ومش متقبلها وياما قهرها بمعاملته القاسيه..
دار الزمان وربي عطاه تلاته صغار..ولاواحد يكنله شعور مودة او حب..
كلهم كانوا يحسوا اتجاهه بالواجب لكن قلوبهم ناحيته خاليه..
وان كان قلب اميمه حاليا بادي يشفق عليه ويحنله..
صفيه بضيق؛حسبي الله ونعم الوكيل فيك ياعمر ياولد محمد ومغليه..الله لايسامح هداكا النهار..
علي:باهي اللي صار هكي..
التفتت اميمه وشافت لجدها بإستغراب..
ولطفي كذلك..
علي مرر نظره عليهم وقال؛باهي اللي صار هكي بش عرفت الناس الباهي من البطال والحق مع من..ومن ع باطل..
قعدوا ساكتين وهما يفكروا في كلامه..
واميمه وهي تفكر جت في عقلها آخر آية قرتها...
¤وقد مكر الذين من قبلهم فلله المكر جميعا يعلم ماتكسب كل نفس وسيعلم الكفار لمن عقبى الدار¤
🍃🍃🍃🍃🍃🍃
"علاش جيتي لبنتي يامغليه علاش"
مغليه بإرتباك؛وخي بالله عليك وسع بالك خل نفهمك..
ولده؛شن مازال بتفهمينا ياعمتي كله واضح راهو..
محمد شنيبه؛ابعدوا الشيطان وخلونا نقعمزوا نتكلموا بالهادي ياالله..
اخ مغليه؛معاش في بيناتنا كلام بعد هالفضيحه والعار..تي ولدكم يسكر يسكر هدا بروحه سبب يخليني ناخد بنتي ونطلب طلاقها..
عمر وهو شاد قطنه محطوطه ع الجرح اللي في جبتهه؛خودها ماعندي ماندير بيها اصلا اني واخدها بش نقهر بيها بنت الواعر..لكن بنت الواعر هادي تقهر وماتنقهر..
مغليه؛يرزيني فيك..
وبوه بغضب قال:ضم فمك ياكلب ضم..
مط شواربه بملل..واتكا ع المندار اللي كان مقعمز عليه..
بو دنيا بعد ماكان يشبحله بغضب قال بصوت عالي؛يامراة وتي روحك انتي وبنتك توا..
ومشي وولده شاف لعمر بإزدراء وقال؛وسخ..
ولحق بوه..
مغليه ودموعها في عيونها؛يرزيني فيك ياعمر بتقطعني من خوي..
ولحقت خوها تجري..
محمد شنيبه وهو يشوفله بغضب؛جالي..ياجالي..
خش عليهم الجالي وهو يقول:نعم..
اشر ع عمر وقال؛تلف هالجايف من قدام وجهي في الحوش معاش نبي نشوفه الكلب هدا....
ودفل "بصق"عليه ومشي وخلاهم..
عمر: انت ياقنين..ياعاجبني...ياللي بأسلوبك غالبني..
تعرف كانك تسيبني..نقعد طول حياتي شاقي...
الجالي بإزدراء:نوض نوض ياغبي نوض..شوف وين وصلت روحك ياح.مار..
هو تنهد وقال:حمار..وحمار كبير..راحت من بين ايديا خلاص..واني قاعد نرقص في رقصة الديك المذبوح...
شبحله وقال..رد بالك تخلي بنت الواعر تريح من بين ايديك..كان راحت معاش تقدر تردها ياجالي معاش تقدر..
الكلام مامرش مرور الكرام ع الجالي..
خوفه..وحسسه بهداكا الشعور المخيف المزعج...
🍃وفوق..
كانت دنيا طالعه بشنطتها وهي تبكي..
وخديجه تقول؛والله قاعدين تغلطوا في غلطه كبيره يامرت خالي..
هي قالت:الغلط اننا عطيناكم من الاول..
خديجه؛صار هكي يامرت خالي!! تمام...تفكريه كلامك هدا باهي ردي بالك تنسيه..
ودنيا تسمع وتبكي بحرقه وبالعبره..
المراة تحطمت من داخل تماما..واللي صار اليوم اهدر كرامتها واهانها...
طلعت مع ماليها في عز الليل وهي مكسورة القلب والخاطر والنفس...
🍃وفوق..
قدام دار عمر ونضال..
حموات مغليه اللي ماكانوش يطيقوها حصلوا فرصتهد اللي قداش ليهم يراجوا فيها بش يتشفوا فيها...
؛هدا نيتنا لاحضرونا ولادورونا لما خدوهاله وشوفي شن صار فيهم..
:ربك في الوجود وياما جايها مغليه هادي..هي خل ننزلوا نشوفوا محمد..
؛هيا..
ونزلوا الزوز من فوق...
🍃ومن ورا باب جناحها...
طوبى..
كانت تسمع فيهم..
طوبى اللي حبسها خوفها في الجناح وماخلهاش تطلع..
الخوف من شني!؟
الخوف من انها ماتقدرش تضبط نفسها لو سمعت اهانه في حق بنت عمها..او اهلها..
الخوف من عواقب ردود الفعل اللي مش محسوبه..
اللي صارلها مع عتيقه امس..خلاها تحسب حساب كل شي..
اكثر من قبل..
لهذا اختارت تقعد في جناحها وماتطلعش منه بكل..
لكن جاها اتصال...
مشت شافاته من مني..
بعدين فتحت الخط وردت..
طوبى بنبرة مرتجفه؛ايوه اريج شن صاير؟
"حتى اني كلمتك بش نسألك نفس السؤال شن صار غادي"
طوبى بضيق:انقلبت الدنيا..خو عمتي تعارك معاها وخدي عيلته وبنته وروح بيها..
"لاحول ولاقوة الابالله"
طوبى؛وانتم شن صاير عندكم
"مافي شي توا..بس شفتي الطريحه اللي كلاها عمر قريب مات بين ايدين حسين"
طوبى:عار مابعده عار..اني اكثر حاجه صدمتني ان عمر يشرب..
"حتى حني ماكانش باين عليه"
سكتت طوبى وفي نفسها كانت تقول..
"كلهم ماكانش باين عليهم يااريج"
🍃ولوطا..في دار المعيشه..
خديجه ماضيعتش وقت في التبرير لخوها والباسه دور المظلوم المجني عليه وهي تقول..
كله منها هي..كله من منها الله لاتربحها ضيعت وخيي..كلكم عارفينه عمر كلكم عارفينه من امتى كان هكي!..اني خوتي كلهم عمرهم ماحطوا في فامهم دخان وديما مستقيمين ومحترمين بالذات عمر..خلط ع هالشيطانه ضيعاته الله لاتسامحها...وقعدت ترشف وهي تبكي بصمت..
بعدين قالت..حني ماصدقنا طلعناه من الحاله اللي كان فيها نحسابوا رواحنا تريحنا عليه لكن شوفوها الحقيره شن دارت..دارت روحها جايه تعزي وهي جاياته هو الله اعلم شن دارت بش قلبت الراجل هالقلبه وخربت حوشه الله يخرب ديارها...
وقريباتهم يسمعوا..اغلبهم اقتنعوا بكلامها لأنهم استغربوا جيتها للعزي بعد اللي صار بيناتهم..
وخديجه لاحظت ان كلامها اثر فيهم..هدا علاش اعتمداته بش تقوله لأمها وتخليها تقوله قدام كل من يجي غدوة وهي معاها...
🍃 ظلم الناااس شديد عقابه..
وعاقبته من الله كبيره..
واللي ايعنقر في منقابه..
ونفسه محتاله وحقيره..
قولوله الدنياقلَّابه..
تبرم هالدنيا وصغيره..🍃
🍃🍃🍃🍃🍃🍃
"اللي واجعني ان صار هدا كله في عزي امي"
المهدي قعد يسمع في محمد شن يقول وهو ساكت..
محمد بضيق؛تعرف بوي..حاس روحي مخنوق كاره كل شي..
المهدي؛تعوذ من الشيطان ولدي..
محمد تنهد وقال؛اعوذ بالله من الشيطان الرجيم..
طلع المهدي من جيبه ورقه ومدهاله.. لما شافها استغرب..
بوه قاله:من امك..
هو شبح لبوه ودموعه عبوا عيونه..
بعدين خدي منه الورقه بلهفه..
ناض المهدي ومشي وخلاه يقراها بروحه..
ومحمد اول مافتحها نزلوا دموعه..
قعد يقرا فيها..كلمه كلمه...وبتمعن..
ودموعه مابطلوش نزلوا..
كان شاد روحه بش مايبكيش بالصوت..
ضم فمه بقوة وفمه قعد يرجف..
وكل مايقدم في قرايتها سطر يفقد القدره ع التحكم بمشاعره..
لعند ماشاف اثر دمعه لأمه ع كلمة من كلماتها..
انهار تماما..
🍃والمهدي مقعمز في الدار يسمع فيه وهو يمسح بيده اليمين ع ذراعه اليسار..
ماباش يطلعه..خلاه يطلع كل مافي قلبه..كل مايطلع مشاعر الحزن كل مايكون افضل ليه...
🍃🍃🍃🍃🍃
وتعدي هالليله الطويله...
ويطلع الفجر..
وطوبى ماقدرتش ترقد لهاللحظه..
صلت..وطلعت للفيرندا قعمزت فيها وقعدت سرحانه وتفكر بس...
انقطع سرحانها..لما سمعت باب الحوش انفتح..
شافاته..لقت راجلها خاش..
ناضت..وخشت داخل وسكرت الفيرندا..
بعدين مشت طلعت من الجناح..
ونزلت لوطا..
وهي نازله تلاقت مع مغليه..
وقفت وهي مرتبكه وقالت؛صباح الخير عمتي..
مغليه اللي كان واضح اثر البكي في عيونها؛صباح الخير..وين ماشيه؟
طوبى؛طالعه الجالي شفته خاش توا..مافي حد براني ولا؟..
مغليه؛لا مافي حد..ديريلي قهوة اني وياه وطلعيها للجنان..
هي ضايقت هلبه بس مابينتش وقالت؛حاضر..
ونزلت..وخشت للكوجينه..
ومغليه طلعت للجالي..
~~~~~~~
مغليه؛مانحساب بوك الايموت رقي عليه الضغط..
الجالي بأسف؛لاحول ولاقوة الابالله..اني يام اللي قاهرني ضعف الشخصيه اللي عند خوتي..في الاول المهدي وتوا عمر..شوفي الحال اللي وصله ع خاطر مراة..
مغليه تنهدت بحسره وقالت:محسوده عليكم ياوليدي..كل واحد فيكم احسن من التاني..اللي تاجر..واللي مهندس..واللي طيار واللي استاذ في الجامعه..العياط عليكم وصابوكم الله لايربحهم واحد ورا التاني..
سكت الجالي وهو مضايق..
ع جية طوبى بسفره القهوة لما شافاته قالت..
صباح الخير..
دق قلبه بقوة..وشبحلها..
وتسارعت نبضات قلبه..
ليه عليها ايام ماشافها ولاسمع صوتها..ووين شافها توا وسمع صوتها حس وكأنه كان ميت وتوا ارتدتله الروح...
حط قدامه السفره وقالت؛رقدت كويس؟
هو قعد يشوفلها بدون مايرد..
امه شبحتله بحزن...
باين من عيونه حبه ليها...وخافت لو يجيه يوم ويصير فيه ماصار لخوته..حاله حيكون اسوأ منهم..
طوبى خجلت من نظراته وقالت؛تبوا فطور توا ولابعدين؟
مغليه؛ديرله هو توا اني بعدين نفطر مع العيله..
ناضت وهي تقول؛خل نمشي نكمل نومي..
ومشت وخلتهم..
طوبى قعدت تشبحلها لين خشت بعدين شافت للجالي وقالت؛شن حالك؟
تنهد من قلبه وقال في نفسه..
"توا بس ولى باهي"
هز راسه وقال..الحمدلله..
قعمزت قدامه وقالت:مش لازم تمشي للخدمه خود اجازة..
هو قال:مانقدرش عندي مواضيع لازم نتمهم...وشرب من القهوة ..
طوبى:باهي بنطلب منك طلب..
نزل الفنجان وقال:شني؟
طوبى:نبيك تعرفني نشوف ولد نسرين في زحمة اللي صار نسوه..
هو سكت شويه بعدين قال؛باهي..
هي ابتسمت وقالت؛شكرا..
هو قال؛خيرك تتكلمي هكي!؟
طوبى؛كيف!؟
الجالي:برسميه شويه..
طوبى:لاعادي زي قبل..
هو شبحلها شويه بعدين قال؛في داعي نرجع نقولك ان مهما يصير بين اللي حوالينا حني مالناش علاقه..
طوبى بضيق؛اكيد..بس اللي داره عمر غلط كبير في حق ماليا..
هو قال؛عندك حق..بوي قال بنمشي نستسمح منهم..
طوبى؛هو خيره شن اللي خلاه يدير هكي!؟ مش طلقها بإرادته وتزوج بعدها بإرادته..شن ذنب دنيا مسكينه تعيش اللي عاشاته امس؟
هو قال؛اموره..ماليش بيه علاقه ولانبي ندوي في مواضيع ماتخصنيش..
هي فهمت انه يردلها فيها تجاهلت وقالت؛باهي امتى ترفعني للعياده؟
هوقال؛مع 11..
هزت راسها وقالت؛تمام..ضيقت عيونها وقالت..ايه حقه شن صار في نجاة وولدها؟.
بلع ريقه وعقد حواجبه وهو يقول؛الحق من بعد موت عيشه معاش نندري عليهم..
هي استغربت بصمت..
وهو استرسل يقول:بس اكيد بوي يسأل عنهم..
هزت راسها وقالت؛باهي..نديرلك فطور؟
هو قال؛ديري..
ناضت..بس لما ناضت حست بوجه في ظهرها بان ع وجهها..
هو لاحظه وقال؛خيرك؟
هي بدون ماتشوفله قالت:شد عضلي..
مشت وهي تقول...اشرب قهوتك لبين ماوتيتلك الفطور..
وخشت للكوجينه ..
وهو معاها بعيونه اللي نظراتهم كلها قلق..
🍃وهي داخل خافت وقعدت تقول بهمس..
يارب سترك يارب...
وتت للجالي فطوره وطلعتهوله..
الجالي؛قعمزي سايرني..
هي قالت؛باهي..شويه وجايه..ابدا ابدا..
ومشت خشت للحوش..
وركبت لجناحها..
اتصلت بالدكتورة متاعها..
🍃طوبى؛صباح الخير دكتورة..سامحيني دكتورة فيقتك..
"صباح النور مدام طوبى..لاولايهمك حبيبتي فهالوقت ديما فايقه"
طوبى؛باهي كيف حالك..
"الحمد لله..شن حالك انتي والبيبي"
طوبى بقلق:دكتورة اليوم حسيت بوجع في ظهري من لوطا
"حسيتي بمغص"
طوبى؛لالامغص لا..
"درتي مجهود؟"
طوبى؛صراحه ايه عندي حالة وفاة تحركت فيها هلبه..
"اول شي عظم الله اجركم وغفر لميتكم"
طوبى:آمين..اجرنا واجرك دكتور..
"تاني شي ياطوبى لازم ترتاحي ومعاش تجهدي نفسك زياده عن اللزوم ولو حصلتي فرصة تعالي للعياده نشوفك..
طوبى سكتت شويه وهي تفكر بعدين قالت؛ان شاء الله..تمام صحيتي دكتورة واسفه ع الازعاج..
"ولايهمك حبيبتي اتصلي في اي وقت"
طوبى:مشكورة..سلام..
"سلام"
سكرت طوبى وتنهدت بقلق وقعدت تفكر كيف تقدر تحصل فرصه تمشي فيها للعياده
🍃🍃🍃🍃
"ماقدرتش تراجي لبعدين"
هادي الاء وهي راقده في سريرها وتكلم في وليد..
"تي فوتت الليل كله نراجي امتى يطلع الفجر بش نبشرك..صححي حبيبي..وبري قول لامك امي بتكلمها بش تعطيها علم"
هي قالت؛لالا ماتخليهاش تكلمها اني مش ضامنه امك صراحه..
"لاحبي حطي في بطنك بطيخه صيفي امي معاش تشوفي منها يضايقك"
الاء؛الاحتياط الواجب..خليني اني نوصل المعلومه لماما وخلاص..
"Ok..حبيبتي ع راحتك اللي تبيه ويريحك يصير"
بدت ع وجهها ملامح الحقد وقعدت تهز في راسها وهي تقول؛تمام..
🍃🍃🍃🍃🍃🍃
ومر اول النهار في حوش شنيبه بهدوء نسبي...
وبعد ماطلعت طوبى..
بدوا الجيران يجوا..ويسألوا ع اللي صار امس..
والرد كان واتي..والاداء كان احترافي..
واللي يسمع يقتنع بجزء من كلامهم..
وهو ان اميمه سبب جيتها لحوش شنيبه في العزي هو عمر..
🍃واميمه اللي صار معاها كان ثقيل عليها هلبه..
خلاها حابسه روحها في دارها ومانبي حد يخش عليها ولاتشوف حد..
حتى ع اتصالات زملائها وصديقتها حسناء رافضه ترد..
وخلت امها مكلمتها دعي ع عمر هي ومطيره...
اما حسين..اختار يطلع برا طرابلس خدمه كم يوم لين يهدا بعدين يروح...
🍃🍃🍃🍃🍃
"ياعمري عسل يهبل الله يبارك.."
الجالي وهو يشوف في ولد نسرين اللي كان في حضن طوبى:صغير هلبه..
طوبى بإبتسامه؛ايه ياروحي..
هو قعد يشوفلها كيف ملهوفه وفرحانه بالعيل في حضنها..
شكلها كان حلو هلبه..
تخيلها شاده بين ايديها طفلهم هما..وحس بشعور الحلو بالمرة..
قاللها؛ربي يعطينا زيه..
هي شبحتله..وفي هديكا اللحظه حست روحها تبي تقوله...
بس في شي قوي كان يمنع فيها..
ابتسمت مجامله وقالت؛ان شاء الله..
وشويه وعطوه للممرضه رداته للحضانه..
وطلعوا هو وياها من العياده..
🍃في الطريق..
طوبى؛بنتلاقى اني وياها في المدرسه ناخد منها الشتيتات ونخليها تروح بيا..
الجالي؛تمام..لكن ردي بالك تعطلي..
هي بإبتسامه؛حاضر...
🍃وحطها الجالي في المدرسه..
هي خشت..دارت دورة ع وضع المدرسه في فترة غيابها وخدت المفيد..
وبعدين جتها عبير وطلعت هي وياها...
🍃عبير:لاباس؟
طوبى:حاجه بسيطه مافي شي يخوف..راجيني في السيارة شويه ونجيك..
عبير ضحكت بإستغراب وقالت؛ماتبنيش نخش معاك؟
ابتسمت طوبى وقالت؛كان نعرفك تحبي جو المستشفيات راهو قتلك تعالي معاي ..
عبير بضحكه؛نبصر عليك..هي انزلي بسرعه وماتعطليش..
نزلت طوبى بدون ماتتكلم وسكرت الباب ومشت خشت للعياده..
~~~~~~~~
الدكتورة:الامور تمام ووضع الجنين كويس هلبه..
طوبى براحه:الحمد لله..بس بنسألك على حاجه دكتوره..حسيت الوحم شبه راح معاش زي قبل..
الدكتورة:انتي بتخشي الرابع توا..وغالبا الوحم ينتهي في الفترة هادي..وع فكره وقت الوحم والوحم نفسه يختلف من مراة للتانيه ومن حمل للتاني احيانا..في اللي وحمها يطول..وفي اللي يجي واعر وفي اللي يجي ساهل..وفي اللي ماتتوحمش بكل..
طوبى؛تمام..يعني وجع ظهري هدا مافيش منه خوف..
الدكتورة؛لاتحذير حبيبتي ردي بالك ماتجهديش نفسك زياده عن اللزوم وماتهمليش الادويه والفيتامينات اللي عطيتهالك..
طوبى هزت راسها وقالت؛ان شاء الله..
🍃🍃🍃🍃
وطلعت لعبير..اللي وصلتها لشارع القهوة..
واول ماخشوله قعدت دور بعيونها عن التارقي بالك تشوف صدفه..
طوبى:حطيني قدام حوش جدي..
عبير؛تمام..بس قبلها قوليلي عبد القيوم وين يسكن..
طوبى؛شن تبي تمشيله!؟
عبير بضحكه؛يابارده نبي نعرف بس..
تنهدت طوبى وقالت؛ريتي المطعم هدا اللي واجهته حمرا..
عبير وهي تقرا في اللافته؛سونيك..خيره؟
طوبى؛الشقه اللي فوقه يسكن فيها عبد القيوم..
درست عبير السيارة قدام حوش الحاج علي وقالت؛اها..
طوبى:هي انزلي عبورة..
شافتلها وقالت بإبتسامه؛لاوالله مافيها كيف حبيبتي..مرة تانيه في ظروف احسن ان شاء الله..
تنهدت طوبى وقالت؛ان شاء الله..هي سلام توا..
عبير؛سلام ياقلبي..
نزلت طوبى..وعبير تحركت طول..
وقفت طوبى ع باب حوش جدها وقعدت دق عليه..
لين فتحتلها صفيه ودخلتها..
🍃وفي الحوش اللي جنبهم..
في الدور التاني..
كانت فايزة مقعمزة بروحها في الحوش.
خاشة في حالة حزن وكآبه..مش قادره لتوا تستوعب موت عائشه..
وذكريات ايام زمان ملازمتها في كل لحظه..
واكثر شي كانت تتفكر فيه عراكها هي وياها ع اللبس والمكياج..
ونصائحها اللي ديما تعطيلها فيهم وهي طنش ومش مقتنعه..
فايزة ببكي:ياااه ياربي حاسه روحي بنموت..مقوى نارك ياعويشه..مقوى نارك ياوخيتي موعرها..ااه ياسديره وينك تجي تشوفي شن صار في عويشه..ربي مايذوقني حزنك حتى انتي..ننهد هد كان انتي تصير فيك حاجه..
🍃وسدرة في البلاد البعيده..
قاعده عايشه في الفضاء الخالي..
مافيش ذكريات...غابت عنها..
ليه يومين يوسف مايخشش عليها ويحكي معاها..
خاف يخبرها عن موت عائشه. او يمررلها رسائل حزن..وحالتها ماتبيش هكي..
لهدا اختار يكون بعيد هاليومين لين يخف حزنه ويرجع زي قبل يحكي معاها بحماس عن ذكريات حلوة بس..
🍃🍃🍃🍃🍃🍃
"نهاره احرف!"
اميمه ببكي:قريب متت ياطوبى امس قريب متت..اني مش عارفه كيف صدقت ان واحد زي هدا يحبني..ولايعرف يحب من اصله..هدا واحد اناني متكبر..مارضاش ع روحه اني نسيبه..وماتحملش يشوفني عايشه حياتي من بعده وماانقهرتش ع قد مادار فيا..اني اصلا كيف حبيته كيف..شن هالقلب الغبي اللي عندي!
طوبى بحزن:هو مش ليك..ومايستاهلش قلبك..كلام سدرة توا بس اقتنعت بيه..كانت ديما تقول..مش ليها والله ماهو ليها..
اميمه وهي ترشف؛ربي يردهالنا عاجلا غير آجل يارب..
طوبى ودموعها في عيونها؛يارب..بس نبي نقولك حاجه..خليك زي مانعرفك قويه..طيحي وترجعي تنوضي اقوى من قبل..
تنهدت اميمه بحزن وهزت راسها بإيجاب وهي ساكته..
ناضت طوبى وقفت وقالت؛خل بنمشي توا عطلت..
ناضت اميمه وقالت؛معاش تتحركي هلبه مش باهي ليك..
ابتسمت وقالت؛ان شاء الله..
سلمت عليها بالخد وقالت؛خليك قويه..
يدوب ابتسمت وقالت؛ان شاء الله..
🍃وطلعت اميمه سقدت طوبى..ورجعت مرة تانيه لدارها وسكرت عليها..
🍃🍃🍃🍃🍃
ومع عصر هداكا اليوم..
مشي محمد شنيبه لحوش علي الواعر واعتذر منهم..
الحاج علي ماتجاوبش معاها..لكن لطفي تدارك الموقف وقبل الاعتذار ...
وقعد عمر في فندق لليله تانيه وحجز بش يسافر يوم الخميس..بدون مايفكر في مرته ولايعبرها...
🍃وتمر باقي ساعات هداكا اليوم..
بالحزن..والغضب..والقلق..والانتظار..
انتظار لحظه الانتقام اللي خططتله الاء تخطيط دقيق مافيشي ولا ثغره..
🍃🍃🍃🍃
الخميس..
8 من شهر مارس...سنة 2018
الساعه 5:00عصرا..
دق جرس فيلا فاخره في احد احياء العاصمه..
فتحت عامله اسيويه الباب..
خش مختار طول وكأنه من اهل المكان..
وتوجه للصالون بش يقعمز فيه ويستنى صاحب الفيلا..
بس وين خش شاف مفاجأه..
وقال...
OOO...Nooo..impossibol...
هي قعدت تضحك وناضت وقفت..
مختار:فاتنه بجلالة قدرها تنازلت وجت لليبيا..
فاتن بضحكه؛ريت تواضعت واخيرا..
وصل فيها وسلم عليها بالخد وهو يقول؛مش مصدق..
هي بضحكه؛ولا اني..
تباعد عنها ومرر نظره عليها وقال:احلويتي هلبه بعد الطلاق يامحتاله..
هي بضحكه؛ماهو افتكيت منك..
هو ضحك وقال؛نعترف..عندك حق..
قعدت تضحك بعدين قال:قعمز..
قعمزوا الزوز وهو قال:شن جوك شن اخر اخبارك؟
هي وخرت شعرها خلف وذنها وقالت؛تمام...اخباري تعرفها لاجديد..انت شن جوك وشن صاير فيك طولت هلبه هني..
هو بإبتسامه؛عندي خدمه هلبه هني..
هي قالت؛لاهو واضح من قعاد بابا هني..
ع خشة بوها قال؛مخ..جيت.
مختار شبحله وقال؛اوو خطير البوس اليوم..
فاتن بضحكه؛بابا ديما خطير..
بوها؛حبيبتي..هيا نوضوا عطلنا..
مختار؛ماشيه معانا فاتن؟
فاتن؛علاش عندك مانع؟
ناض وقف وهو يقول؛بالعكس فرحت..
؛هياانت وياها عطلنا ع الناس..
ناضت وهي تقول؛تواني بس نجيب شنطتي وجايه..
ومشت طلعت من حداهم..
مختار؛كيف قدرت تقنعها؟
؛درت طروح ..
ضحك وقال:بوالطروح انت..
"هيا اني واتيه"
مختار:هيا بوس..
ومشوا طلعوا مع بعض من الفيلا...
🍃🍃🍃🍃🍃
مقعمزة تتفرج ع التلفزيون ومبرده اعصابها ع الاخر..
وامها مع عمتها مقعمزات في دار المعيشه يخيطوا في المنادير..
واختها في دار خالاتها تقرا..
وخوها في الكوجينه يتغدا لأنه كيف روح من المدرسه..
اما جدها..كان موجود في المطحن..
وهو طالع منه..
شاف سيارة غريبه ع الشارع جايه..
ووقفت قدام حوشه.
استغرب زياده وهو يشوفلها..
وينزلوا منها..سلف فردوس..ومعاه مرته ثريا..وفي يدها باقة ورد وعلبة شكولاته غاليه..
قدملهم وهو يقول؛السلام عليكم..
جاه سلف فردوس وصافحه وهو يقول؛وعليكم السلام..كيف حالك ياحاج لطفي..
لطفي:الحمدلله..الحمد لله..
طلق يدها وفتح باب الحوش وقال؛تفضلوا..تفضلوا..
خشوا هما الزوز..
وهو سكر الباب وقال؛لحظه..
ومشي خش داخل..
ثريا مررت نظرها ع الحوش بتكبر..
وراجلها كان اعصابه..
~~~~~~~
فردوس بإستغراب؛شن يبوا جايين؟
لطفي؛مش عارف يابنتي حتى اني استغربت..
مطيره؛شكلهم جايين يستسمحوا..
فردوس بتهكم؛ثريا وراجلها..!
بعدين قالت؛اطلع معاي بوي بس دخله..
لطفي؛باهي اطلعي..
ومشوا لطفي هو وبنته فردوس.
وفاتوا من قدام الصاله وين ماكانت واقفه آلاء وهي تشوفلهم بإبتسامه مكر خفيفه..
🍃فردوس؛تفضلي تفضلي..
استغربت ثريا استقبال فردوس ليها بقفطان حوش عادي..
دخلتها داخل وقعمزتها في الصاله..
وقعمزت حداها..
فردوس؛ان شاء الله خير شن مازال في خاطركم تاني تبوا ديروه فيا ولاحقيني ع خاطره لهني!؟
ثريا؛ياريت يافردوس توا نحطوا المشاكل كلها ورا ظهرنا وزي مايقولوا نفتحوا صفحة جديده..
فردوس بتهكم؛وشن المناسبه!؟
ثريا بإبتسامه كاذبه:بنولوا عيله..
ضحكت بآستغراب:بنولوا عيله!؟ كيف هادي مافهمتهاش..
استغربت هلبه تريا وحست ان فردوس فعلا ماتعرف شي..
ع خشت مطيره بالضيافه وهي تقول:اهلا وسهلا..
ثريا شافتلها وابتسمت مجامله وقالت:اهلا بيك..
مدتلها مطيره الضيافه هي خدتها بس حطتها حداها لاشربت ولاكلت...
وهما لاحظوها بس تجاهلوا..
فردوس:ايه فهميني كيف بنولوا عيله؟!
ثريا:كيف بنتك ماقالتلكش؟
فردوس بأستغراب اكبر:شن بتقولي؟
ثريا؛لارسمي انتي مش عارفه..حني اليوم جايين نخطبوا آلاء لوليد...
شافت مطيره لفردوس بتعجب..
وفردوس شافتلها وهي متفاجئه بعدين قالت؛ماعنديش علم بالموضوع هدا بكل..شويه بس..آلاء..ياآلاء..
شويه وخشت الاء اللي كانت لابسه توته ورافعه شعرها كعكه..
وين شافت ثريا قالت تصنعت الصدمه وقالت؛شويه ماما..هادي كيف دخليها هني!؟
فنصت ثريا وشافت لفردوس..
فردوس:قصدك ماتندريش بجيتها؟!
وهي مازال متصنعه الصدمه قالت؛لانندري بس ماتوقعتش دخلوها للحوش بعد اللي داراته..
ثريا بعدم استيعاب:شن تقولي انتي!..انتي مش متفقه مع ولدي اليوم نجوا ونتكلموا فيك؟
ضحكت ساخره وهي تقول؛شنو!؟ ولدك هدا مريض جديات..
فردوس:قعمزي وفهميني شن في!؟
قعمزت الاء وقالت وهي مبتسمه بتهكم؛هو قداش ليه يجري في جرتي بعد ماعرف اني فسخت..ويقولي بنخطبك..واني نقول لا..وكل مانديرله حظر يكلمني برقم جديد..ولدك مش طبيعي راهو..اليوم ع الفجر كلمني وقالي ماليا بيجوا بعد العصر يخطبوك سكرت عليها وحطيته في الحظر بكل..
ثريا تسمع وهي مصدومه ع الآخر..
الاء؛اولامس بعتلي صوره وهو في مستشفى ومكسر ويقولي درت هدا كله ع خاطرك..
وطلعت التليفون وحطت ع الرسايل وقالت؛اهما ودرتله حظر بعدها..
وورتهم الصور..
وثريا من صدمتها قلبها كان حيوقف..
شافتلها فردوس وقالت وهي رافعه حاجبها:صار قلتي بنتي هي اللي تجري في جرة ولدك!؟
مطيره قعدت تشوف لثريا بنظرة حاده..
وثريا تشبح في الفراغ وهي تفكر ومش مستوعبه الموقف اللي انحطت فيه..
الاء وهي تشوف لتعابير وجهها قالت:توصلك وتوصل ولدك وتتعداكم..
شبحتلها ثريا..
الاء بحده:لو تنزلولي نجمه من السمي مستحيل نرضى بيكم ولابولدكم...
وناضت ومشت طلعت من الصاله طول..
فردوس:حتى لو رضت اني مانرضاش لو بطلع الروح قدامي مانرضى نعطيها لناس زيكم..
ناضت ثريا وهي معصبه ومشت طلعت من حداهم..
وين وصلت في الباب..لبست كندرتها وطلعت وهي تقول بصوت عالي...
هيا يابشير..
🌿راجلها لما سمعها استغرب..
وناض طول من قدام لطفي ومشي طلع من المربوعه..
شافها برا واقفه وبادي ع وجهها ملامح الغضب قاللها متسائل:خيرك!!؟
هي بعصبيه؛هيا ياراجل هيا..
ومشت طلعت من الحوش بكل..
وهو لبس كندرته ع السريع ومشي لحقها..
لطفي طلع وراه وقعد واقف يشوفله كيف طلع بعدها وهو مستغرب..
بعدين التفت لباب الحوش الدخلاني..
لقي بنته واخته واقفات في الباب سألهم؛شن صار!؟
🌿🌿🌿🌿
"صحه لإيدك"
الاء وهي متفاجئه:قصدك عادي اللي درته مش معصبه مني؟
اريج بضحكه شماته؛بكل بكل اول مرة ديري حاجه تعجبني..
الاء بضيق؛بس خايفه كان عرفت تزيد تزعل مني..
اريج:ومن وين بتعرف!؟ كملي في اللي ماشيه فيه للأخير..
ابتسمت الاء وقالت؛وخيتي سلمها ياربي فرحتيني..
عقدت اريج حواجبها بقلق وقالت؛لكن تعالي هني وليد متجقجق "مجنون" ردة فعله كيف بتكون؟
الاء سكتت شويه وهي تفكر تقول لأختها انها استعانت بمختار ولالا بعدين تفكير دام للحظات قالت:كلمت خالتي غرفه تقول لعبدالرؤوف وهو يتصرف..
ابتسمت أريج براحه وقالت:كويس..
فجأه رن تليفون اريج بنغمه رساله ماسنجر..
طول قامت التليفون ولهت بيه..
وفي بال آلاء انها تراسل في نضال..
تنهدت..وناضت من حداها وتليفونها في يدها وهي تفكر في اللي بيصير القدام...
وين جت بتطلع من الدار..
انفتح الباب وخشت امها بإندفاع..
انفجعت اريج ونزلت تليفونها لوطا وشافتلها.
فردوس برفعة حاجب وبحزم قالت؛توا توا تحكيلي كل شي بالتفصيل..
غمضت آلاء عيونها وفتحتهم بعدين هزت راسها بإيجاب...
🍃🍃🍃🍃🍃🍃
"خيره ظهرك"
طوبى:محصله عليه ملصه..
نجاح؛شكلك قايمه حاجه رزينه..
طوبى:مش عارفه مش متفكره بالزبط شن قمت وشن حطيت..
نجاح؛في الجديد ردي بالك..
هزت طوبى راسها وقالت؛ان شاء الله..
نجاح؛باهي قوليلي شن اخر اخبار المدرسه..
طوبى:اخر مرة اتصلت بيا ابله زينب وقالت....
🍃وبعيد عنهم في نفس الصاله..
كانت عواطف قارنه الراس مع وحده من بنات الجيران وهي تقول...
تبوديع عيت شنيبه جايبه واقفات اليوم..
:اسكتي قالوا اليوم بدير شي ماصارش.
عواطف؛عطيهم البلي عزي هدا ياهمي..
:معاش في فرق بين عزي ومناسبه في بلادنا هادي كله توا للفشخره والتبوديع..
تنهدت عواطف وقالت؛صدقتي..
ويخشوا الواقفات بسفر ذهبيات معبيه كياس حلو وحنه..
خديجه خشت وراهم وقالت بصوت مسموع للكل..
وصيتها الله يرحمها قالت مانبي حد يحزن فوق تلاته ايام..
كلهم بأصوات متقطعه قعدوا يقولوا..
الله يرحمها..
🍃نجاح شافت لطوبى وقالت؛حق..
طوبى بحزن؛مزبوط..
🌿وكانت هادي من ضمن الوصايا اللي كتبتهم لمحمد في الرساله..وكانت قاصده توصي محمد بالشي هدا بش يتقبل موتها ويخف حزنه ويقاوم...عارفه مدى تعلقه بيها وتوقعت يكون حزنه عليها اكبر من حزن اي حد من اهلها واحبابها🌿
بس في من قلوبهم من حزنهم عليها مش متقبله أي شي..
زي فايزة ونسرين اللي كانوا متلحفات بالحزن
وعيونهم وادي يسيل...وقلوبهم تذرف في دموعها دم...
اما امها كانت زي مذهوبه الشيره..
وسط الزحمه والدوشه..مازال مش مستوعبه موت بنتها..
وممكن تستوعب تماما...بعد ماتخف الزحمه وتهدا الاصوات..
ويقعد بس في مسامعها صوتها...وفي عيونها طيفها...
🍃🍃🍃🍃🍃🍃
وفي مزرعه كبيره...
يتوسطها حوش..مبني ع الطراز الاوروبي..
وكل شي فيها يخلي اللي يشوفها مايصدقش انها في ليبيا من الاهتمام بيها والتنسيق الرائع..
المزرعه هادي..
كانت لصديق مختار..اللي عازمهم ع حفلة "شواء" بسيطه..
هو وشريكه وطليقته...
وع طاوله خشبيه دائريه كبيره وسط منظر خلاب..
كانوا مقعمزين..
هو وياهم..ومعاهم صاحب المزرعه ومرته..وولده...
عزيز..
فاتن وهي تشوف حواليها؛تفاجئت بالمكان صراحه كل شي فيه خيالي ماصدقتش ان ليبيا فيها هكي..
مختار:Me to..
اب عزيز بإبتسامه؛تقدري تحولي اي مزرعه هني لجنة لو اهتميتي بيها صح..
مرته؛وجبتي متخصصين للحاجه هادي..
فاتن بإبتسامه؛لا اني مانحبش نتعب روحي عندي وحده زيها في اسكتلندا وعايشه فيها..
مختار:هدا علاش قاعده ديما صغيره..
ضحكوا..
عزيز بإبتسامه قال؛في هني اللي احلى من ريف اسكتلندا..
اب فاتن بضحكه؛وسعت منك ياعزيز..
ضحك مختار..
اب عزيز؛خليه يكمل كلامه بعدين علق..
هو قال؛اها اسف..كمل ياعزيزي.
ضحك عزيز ضحكه خفيفه بعدين قال؛ندوي جد..ولا مرة شفت مزراع المرج وضواحيها دور ع الغوغل واني نأكدلك انك حتتفاجئ..
مرت بوه قالت:صح كذا مرة صادفتني صور ليهم في الفيس وكأنك تتفرج ع ريف أوروبي..
عزيز:وياما فيها البلاد اماكن تخلي السياحه عندنا ناجحه جدا وتتفوق ع هلبه دول قريبه وبعيده....
بوه علق يقول؛البلاد لوحصلت حد يدير قلب عليها تولي حاجه تانيه...تريحنا من الغربه للأبد..
اب فاتن؛البلاد بدون امن وامان مش حتقوملها قائمه..والسياحه بالذات معتمده ع هادم الزوز
عزيز؛مزبوط..
مختار؛بس الفكره مش فكرة امن وامان بس..الفكرة فكره ثقافه..وعقول تبي من يبنيها صح..حني هني مازالت عقولهم متحجره معشش فيها العنكبوت..
فاتن؛ع حسب مانشوف الوضع شويه تغير والبلاد متوجهه للإنفتاح اكثر من قبل بعلامة تسيد المراة لمناصب حساسه في البلاد..
مختار؛ومش سالمه من لسانات المتخلفين الظلاميين اللي يشوفوا للمراة على انها..جاريه مش اكثر..
اب عزيز ضحك وقال؛نقولك حاجه يافاتن..اني مع الناس اللي يحاربوا في فكرة قيادة المراة لأي مؤسسة ومنصب في البلاد..
تفاجئوا..
وعزيز نزل راسه وابتسم..
مرته قالت؛وعلاش ان شاء الله!؟
فاتن بضحكه؛جاوب..
هو قال:المراة هني كان شدت منصب تتفوق في حاجه وحده وتفوت فيها الرجاله وماتخليلهمش معاها فرصه..
مختار:اللي هي ؟
مرر نظره عليهم وقال:اللهت..
كلهم قعدوا يضحكوا..
هو قال:نعدلكم قداش وحده شدت مكان ولهتت منه ارقام فلكيه وبعدين سيبت وطارت برا..
مختار بضحكه:عارفينهم كويس..
فاتن؛ع هكي خليهم دابهم داب الكوجينه...
اب عزيز؛هدا الصح..
اب فاتن؛هدا جزء من التخلف اللي حكي عليه مختار الناس هني مازال مش مؤهلين بش يبنوا بلاد..
مختار؛صح بالذات وهما ماشيين بقواعد وعادات اكل عليها الدهر وشرب..الناس برا وصلت للمريخ وحني هني مازال نتعاركوا ع عصيده الميلود بدعه ولاسنه حسنه..
فاتن:فعلا..
اب عزيز؛الخلاف الديني هدا بروحه..
مختار:مدخلينه في كل شي في الحياة وهاتلك يافتاوي من العصر الحجري تردنا الف سنه لتالي..ياريت يشبحوا حواليهم ويشوفوا ان الناس مابنتش حضارات الا لما فكت قيودها المصديه..
عزيز؛قصدك الدين؟
ابتسم مختار وقال؛الدين شي شخصي بين البني آدم وربه لايخش في سياسه ولاقوانين وانت عشت برا ياعزيز وشايف بعينك الفرق..
عزيز؛معليشي..دينا حني مايتقارنش بغيره..ولاقواعده وقوانينه بعيده عن الحياة..اصلا اغلب القواعد والقوانين اللي ماشيين بيها برا موجوده في دينا..وطبعا لاتقارن قواعد وقوانين حطها بشر بقواعد وقوانين حطها خالقهم...الصانع ادرى بصناعته..
عقد مختار حواجبه وقال؛نعرفك مستقيم بس طلعت فوقها متدين!..
عزيز؛مش بالمعنى الحرفي للكلمه..بس عارف ديني ومعتز بيه وعايش بقواعده وقوانينه ولاقي الاحترام...
فاتن بإبتسامه؛يحترموا اللي يحترم هويته..
عزيز ابتسم وقال:مش الكل بس اغلبهم..
اب دنيا بضحكه:باهي ياعزو قولي كيف داير مع الجنس الناعم..
دنيا وهي تضحك؛ايه صح واحد زيك مايخلوشي في حاله برا..
مختار:جاوب..
عزيز بإبتسامه؛عادي جدا بس حاط حدود..
بوه ابتسم وهو يشوفله..
دنيا؛يعني بتقنعني انك ماعشتش تجارب صداقه وارتباط؟
مختار:جاوب..
بوفاتن؛مختار يراجيلك في غلطه..
ضحكوا..
ومختار يشوف لعزيز بإبتسامه..
عزيز ضحك ضحكه خفيفه وقال؛كانت عندي تجربه مع بنت هولنديه مشروع زواج بس فشل..
مختار:اكيد خنتها..
بوعزيز؛مختار ريح روحك ..
مختار:اسكت انت..وجاوب انت..
عزيز بضحكه؛تو انت عارفني كويس علاش دير في الجو..
مختار؛شن نعرف عنك غير اللي انت توري فيه!..
عزيز بإبتسامه:علاقتنا كانت بحدود والشاهد ربي اني ماتجاوزتش هالحدود وممكن هدا اكثر شي شدها ليا لانها ضمنت اني مانخونش
فاتن؛باهي علاش انفصلتوا؟
بوه قال؛كانكم زودتوها خصوصيات هادي !
عزيز؛لامافيش مشكله عادي..تنهد وشاف لفاتن وقال..ياستي تبينا بعد الزواج كل حد فينا يعيش في حوش بروحه..
هما بصدمه..
"لااا..قول والله"
هوضحك باستغراب وقال؛والله!.
بوه بصدمه؛صار هدا هو السبب!؟ قسما بالله ياولدي انك غبي
مختار؛وجحش..
بو فاتن؛ماعندكش مخ ياعزيز بكل..
مرت بوه:شن قصدهم هادم يافاتن..
فاتن بضحكه؛واضح والله واني معاهم..
مختار:ياغبي..فكرتها هادي تخليكم تستمروا مع بعض للأبد..
بوه؛لامشاكل لانكد لانقان..وتتلاقوا مرة ومرتين في اسبوع وانتم مستاحشين بعض..
مختار شبح لفاتن وقال؛تعرفي كان درنا هكي رانا قاعدين مع بعض لتوا..
فاتن بضحكه؛خسارة فاتتني..
مرت اب عزيز؛خيرك سكتت عزيز رد ع العبرج اللي يقولوا فيه..
بضحكه قال؛عبرج مابعده عبرج ياخالتي..علاش اسمه زواج كان بنديروا هكي!!؟
فاتن؛شكله ليك نظره تانيه في الزواج..
عزيز؛مش نظرة تانيه الزواج هكي اصلا....ومن آياته ان خلق لكم من انفسكم ازواجا لتسكنوا اليها..لانفسكم ازواجا..يعني نص التاني في كل شي في حياتك..شريكك في كل شي مش بس في الحوش..في الحياة كلها..اني وياها روح وحده نفس وحده في جسدين..ندير معاها عيله وين تخنقني الخدمه نهربلهم وننعزل بيهم عن الدنيا كلها...
بو فاتن؛خليتني نفكر في الزواج مرة تانيه
مختار بإبتسامه؛رد بالك ديرها انت مش عاطفي وحساس ومستقيم زي عزيز..
بو فاتن؛ولا بوه زيه..
بو عزيز؛السترة ياخوتي..
مرته قعدت تشبحله بطرف عينها..
وولده شاد ضحكته..
فاتن؛يابختها اللي بتكون من نصيبك ياعزيز غير جيت اكبر منك بشهرين بس..
ضحكوا ومختار قال:شهربن بس!
هي بضحكه؛بس..
مختار؛كبرتي روحك ياشيخه..
قعدوا يضحكوا وهي قالت بضحكه؛بارد..
🍃🍃🍃🍃🍃🍃🍃
في دار الخزين..
مقعمزة وفي يدها تليفونها تشوفله بعيونها الغارقات بالدموع..
كانت حاطه ع رقمه.....
تبي تتصل بيه..وخايفه...
في لحظه اندفعت..واتصلت...
🍃"شدني هلبه عنوان الحلقه اليوم"
مهند وفي يده مق قهوة:حيشدك اكتر لما تسمعيها..
ارام بضحكه؛باهي عطيني فكرة عنها العنوان غريب شويه..
مهند:لا...اسمعيها وتو تعرفي بروحك..
ارام؛جو تشويق..
شرب من المق وهز راسه..
هي قالت بإبتسامه؛تمام..اني مروحه ماتبي شي..
هو ابتسم وقال؛اني نقولها هادي مش انتي..
ضحكت وقالت:ياسيدي ساير ومشي وانت واقفلي ع الكلمه..
هو قال؛ردبالك من روحك هدا اللي نبيه منك.
هي ابتسمت بخجل وقالت؛شكرا..تصبح ع الخير..
هو قال؛وانتي من اهله..
ومشت هي..
وهو قعد معاها بعيونه لين درقت..
ويرن تليفونه..
طلعه من جيب سرواله وشاف المتصل..
لقاه رقم غريب...
عقد حواجبه وفتح الخط ورد..
ايوه..
لارد...
هو قال؛الو..
كذلك لارد...
هو سكت شويه..وقلبه بدي يدق بقوة دقات موجعه...
نزل التليفون وسكر الخط..وحط الرقم في الحظر..
ومشي خش للأستديو..
🍃وهي حست انه عرفها..
وبش تتأكد عاودت اتصلت..ولقاته حاطها في الحظر..
نزلت التليفون وقعدت تبكي بصمت...
بس تليفونها فجأه رن..
بلهفه شافت الشاشه...لقاته رقم غريب..
عرفت انه وليد..طول سكرت عليه وحطاته في الحظر وهي تقول بحقد؛والله ندمك عمرك كله ع اللي درته فيا ياحقير..
واتصلت طول بخالها مختار...
🍃ومختار في المزرعه منسجم في الهدرزة مع صحابه..
مختار:شغلي هني مازال مطول..
اب فاتن؛ياخوفي ديرها وتتزوج هني..
هو ضحك ضحكه ساخره مضحكه طلعت منه بطريقه غريبه..
فاتن بضحكه؛حي ع الضحكه..
مرت بو عزيز؛متاع واحد سمع نكته ع غفله..
مختار بضحكه؛حلو التشبيه..
بو فاتن؛ع العموم هو مايقدرش يقعد من غير مراة اسألوني اني..
مختار؛ومن يقدر يعيش غيرهم!؟
بو عزيز؛صدقت..
شافت فاتن لعزيز اللي كان واقف بعيد عنهم ويتكلم بالتليفون وقالت؛ولدك مايشبهلكش..
بوه؛في الشكل ولا الاطباع؟
هي قالت؛لا في الشكل يشبهك هلبه ومايشبهكش في غيره..
تنهد وقال؛الحمد لله...
بو فاتن قال؛عزيز رباته امه..
فاتن؛يعني عايش معاها؟
بوه؛ايه..بعد الطلاق خليته لأمه واني مرتاح امه مراة مختلفه في كل شي وفريده من نوعها..قليل النادر تلقوا مراة مثقفه وواعيه ومتعلمه وملتزمه في نفس الوقت..
شافت فاتن لمرته..
وهي قالت؛ماعنديش مشكله يحكي عليها هكي قدامي..اني متصالحه مع نفسي هلبه ام عزيز رغم انها عايشه برا ونصها مش ليبي لكن عرفت تربي عزيز اكثر من هلبه نساوين عايشات هني في بيئة محافظه حتى اني نبي خوته يختلطوا بيه بش يطلعوا زيه..
ابتسمت فاتن..
ومختار وهو يسمع في مرت اب عزيز عيونه ع عزيز..
اللي المكالمه وجاهم..
قعمز في مكانه وهو يقول؛تسلم عليك..
ابتسم بوه وقال؛سلمتلي عليها..
عزيز بإبتسامه؛اكيد..
رن تليفون مختار..
شبحتله فاتن..
هو شاف المتصل رفع حواجبه وابتسم بعدين خدي التليفون وناض..
هي قالت:شني مني موخيتو باشا؟
بوها؛اللي نحكي عليه من بكري..
فاتن؛واضح من الابتسامه..
ابتسم ع جنب وقال؛ريحي روحك..بنت اختي..
ملامح الابتسامه ع وجه عزيز خفتت وهو يشوفله..
وهو مشي من حداهم وتباعد. وعيون عزيز معاه..
🍃مختار:ايوه خالو..
جاها صوتها وهي تبكي..
"خالي امتى تبدا في اللي قتلي عليه"
هو قال؛بديت حبيبتي..انتي خيرك تبكي شن دارولك تاني!؟
"اكثر من اللي داروه شن مازال بيديروا..خالي بالله عليك وليد هدا ريحني من دوشته"
هو قال؛اهدي بنتي اهدي..اني مش مخلي حد قهرك وبكاك ووجعك ووجع خوتك وامك لين ندفعهم الثمن غالي..وهدا وليد مادوريشي بكل نعرف طبه..
قعدت تبكي بدون ماتتكلم..
هو قال؛الاء خلاص عاد..خليك قويه..ماتخلي حد يبكيك لوحيهم كلهم ورا ظهرك وعيشي حياتك وحطي في بالك خالو..احسن واحد يتمنى تكوني من نصيبه ..
هي قالت بنبرة باكيه..
" شكرا خالو"
هو قال...شن شكرا متاعك هادي راك بنت اختي معناها بنتي..
"ربي يخليك ليا"
ابتسم وقال؛يارب..ويخليك ليا..يللا حبيبتي بطلي بكي واغسلي وجهك وديري كوبايه بابونج واشربيها تروق اعصابك وطنشي وعيشي..
"حاضر..سلام خالو"
هو قال؛سلام حبيبتي..
وسكر...وقعد يشوف للتليفون لحظات..
بعدين التفت..
جو عيونه ع عزيز وهو يشوفله..
ابتسم مختار..
وعزيز رد الابتسامه بشي من الارتباك..بعدين لف وجهه القدام..
وهو مشي ولى لمكانه...
🍃🍃🍃🍃🍃
الساعه 9:00ليلا...
في حوش شنيبه..
اللي طلعوا كل مالذ وطاب في عشي الفرق...
قعاد كسكسي ورز بالبصله واللحم مغطي الوجه كله..
صواني مغلفه مشكله ومنوعه موالح..
فواكه...ومشروب..
والناس تاكل بنهم وفجع ومش هكي وبس..
"بالله جيبولي قصعه رز مانحبش الكسكسي.."
"كان فيها كيف تجيبولي هبره صافيه من غير عظام"
"زيدونا حكاك مشروب"
طلعت طوبى من الصاله وهي مش طايقه روحها..
كانت تذرف في الدموع وهي تتفكر في عائشه..
وتتفكر في هالدنيا اللي ماتستاهلش يتعلق بيها البنادم ولايتحسر ع شي فاته فيها..لانه اخرته مخليها ومش واخد معاه منها حاجه ويمشي في طي النسيان مع الايام وكأنه ماجاش للدنيا من اصله...
🍃توجهت للحمام بش تغسل وجهها..
خشتله وسكرت الباب عليها..
وين جت بتفتح الشيشمه..
سمعت حديث يدور بين زوز نساوين الباين انهم طالعات يغسلوا في ايديهم في الحوش الخارجي..
:ريتي الهيلوله اللي دارتها كلها بلعاني يش تنسي الناس العار اللي دار ولدها..
؛مرت خوي ونعرفها زين مانغباش في حركاتها..
؛والله مابيت نحط في فمي منه حاجه حدي وكلت الصغار..
:لااني كليت رزق وخيي ياحنه مش من جيبها..
:صدقتي..انتي ريتي خواتها كيف مسيطرات..
؛هما وهالعقرب اللي ينقاللها خديجه..رتيها شن قالت للناس ع طليقة عمر
:ووه عليا اني صدقتها تصدقي تمثيلها فضيع..
؛جاباته من برا ع اساس..امها امها فولة وانقسمت ع اتنين..
"ماما"
:هيا ماما جايه..هي تعالي نخشوا...
وسمعت اصوات خطواتهم وهما يتباعدوا...
بعدين فتحت الشيشمه وهي تفكر في كلامهم..
وطبست راسها وقعدت تغسل في وجهها وعقلها يفكر وبس...
🍃🍃🍃🍃🍃
"لما كنا صغار..عنوان حلقة الخميس هدا..نبي نولي بيكم الليله للسنين الخوالي..ايام كان اكبر همنا الكورة اللي ضربها كابتن ماجد خشت قول ولا...والبنات طبعا واجعتهم سالي ويفكروا شن مازال بدير فيها منشن وجماعتها..
ضحك وكمل يقول...نبيكم تحكولي عن الطفوله متاعكم وين كانت ومع مني كانت وشن عشتوا وقتها..ومن كان بطل هديكا المرحله في حياتكم"
وطلع فاصل غنائي...
كانت اغنيه شارعنا القديم..
🍃اللي تسمع فيها وتتفكر في ايام طفولتها...
تتفكر في هديكا المرحله كيف كان مهند مهتم بيها اهتمام خاص..وفي نفس الوقت كان ديما يحب يتشاكل معاها ويبكيها بش يرجع يرضيها..
ذكريات كانت راكنتهم الاء ع الرف..وماكانوا يعنولها شي بس توا ماتذكر غير فيهم هما..
🌟خل نبدا بيا اني..اني عشت فترة طفوله حلوة..واحلى ايامها كانوا في شارع اعتقد ماسمعتوش بيه قبل..شارع القهوة..نتفكر في روحي كنت خجول ومعقد شويه وانطوائي مانعرفش نختلط بولاد الشارع وهما لهالسبب كان ينبذوا فيا ان صح التعبير..بس في مراة جارتنا هي..المراة هادي هي بطلة هديكا المرحله بالنسبه ليا حنينه وطيبه وقويه..كانت ديما تشجع فيا وتكلم في ولاد الشارع عليا تبيهم يدخلوني معاهم في اللعب ويخلوني نندمج معاهم..وشويه شويه طلعت مع عقدتي ووليت اجتماعي للمليون...وضحك بعدين قال..اني توا هني بفضل ربي بعدين المراة هادي..مانقدرش نقول اسمها ع الهوا بس نبيكم تدعولها ربي يشفيها ويردها لاحبابها وهي في احسن حال ارجوكم..المراة هادي ليها مكانه خاصه في قلبي وياقداش تمنيت تكون امي بعد امي الله يرحمها اغمروها بدعواتكم...
🍃والاء تسمع وتبكي..
وفي جنبها اريج حتى هي كانت تسمع في البرنامج وتبكي وتقول..
الله يسامحك يامهند..
🍃🍃🍃🍃🍃
"هج مرة تانيه هج في جرتها الله لاتربحها"
:هي مادخلهاش ولدك المريض هو اللي يبي يفرض روحه عليها فرض..
ثريا ببكي؛خوك هدا ياعديمة الاحساس..
؛بالعكس ياماما حاسه بيه اكثر منك ومعاش نبيه يدير في روحه هكي ع خاطر واحد بايعاته وعمرها ماحاباته ياماما..
ثريا وهي تبكي؛حسبي الله ونعم الوكيل فيها..
؛سامحيني ماما..انتم اللي بديتوا لازم تتحملوا..
بعصبيه قالت؛نوضي من حداي نوضي.. ناضت بنتها وهي مضايقه ومشت من حداها..
وقعدت هي تبكي ع ولدها اللي حملهم ذنب كل شي داراته الاء وطلع وخلالهم الحوش..
🍃🍃🍃🍃🍃🍃
الساعه 10:30ليلا...
في دار نوم نجمه..
كانت فيها هي ونجاح مسكرات عليهم الباب..
نجاخ؛شن في يام خوفتيني..
نجمه:مافي شي يخوف..غير مانبيش اختك تسمع..
نجاح بقلق:علاش؟!
نجمه:الراجل جي لخوك الكبير وكلمه..
نجاح؛اما راجل؟
نجمه بنفاد صبر:تي عبد الحفيظ ياودي..
بضيق قالت لأمها؛مش سكرناه الموضوع هدا يام؟
نجمه؛نجاح بنتي اسمعيني..ماضيعيش ع روحك فرصه مرات ماتجيش مرة تانيه عارفاتك انتي تبي بينك وبين خاطرك لكن ع خاطر اختي سكرتي الموضوع..
نجاح بضيق؛لايام اني مانبيش..
نجمه؛ماتكذبيش عليا واضح راك بنتي ونعرفك زين..صدقيني يانجاح لو كانت عواطف مكانك راهي وافقت طول..
نجاح ودموعها في عيونها؛مانقدرش يام والله مانقدر نكسر قلب اختي ونوجعها..اني نفرح وهي متنكده لالا يام والله مانقدر..
نجمه بانفعال؛تي شن واخدتيه منها انتي!؟..
مسحت نجاح دموعها الي نزلوا وقالت:بالله عليك سكري الموضوع ومعاش تكلميني بكل..
"عواطف شن ديري واقفه هني"
الزوز شبحوا للباب وهما مفزوعات..
وينفتح..واللي فتحه الصيد..
وبانت عواطف ع امها واختها وهي تشوفلهم بصدمه وعيونها مليانات دموع...
🍃🍃🍃🍃🍃
🌟ومعانا اتصال جديد..ونقول...خميسكم فل..
"وخميسك عسل..كيف حالك استاذ مهند"
اها..تمام تمام...ياستي الحمد لله..من معاي قبل..
"عرفتني من صوتي عارفه"
ضحك وقال..شن جو ياارام..
"تمام التمام"
عرفتي توا عن شن تحكي الحلقه..
"عرفت عرفت..والموضوع سهفتي نتصل"
غير دقيقه خل نشرح للمستمعين حني على شن نحكوا..زي ماتعرفوا هادي زميلتي مقدمه برنامج "بورتيريه" اللي يجي كل اسبوع واني المخرج متاعه..المهم بكري سالتني ع موضوع الحلقه قالت العنوان غريب عطيني فكره عليه يامهند..قلتلها راجي لين تسمعيه وتعرفيها بروحك..وتوا ارام ليك المايك هدرزي..
ضحكت وقالت..
"تمام..شوف اني طفولتي مع حوش جدي من بابا بإعتبار ان كلنا نسكنوا في قطعه وحده واني كنت اقرب الاحفاد لحناي ودلوعتها زي مايقولوا عشت معاها تفاصيل طفولتي كلها ولتوا ريحتها قاعده في انفي..بين عيوني كعكها الحلو وطاسة الحليب والشاهي اللي تعطيني فيهم كل صبح..الحلوات اللي تحسبني فيهم وين ماتروح من اي مناسبه عرس مانكونش معاها فيها..تعرف حناي كانت تحب توصلني المدرسه وتحلف حلف ع الحاجه هادي..تلبس فراشيتها وتاخدني في يدها وترفعني للمدرسه..الله يرحمها ويغفرلها"
وسكتت لانها كانت تبكي..
هو قال...الله يرحمها ويغفرلها...واني نقول علاش كل ديما جايه بالكعك الحلو للقناه بشمتنا كعك حلو ياياسر ولا...حلوة الحلقوم ايه ايه صح..ارام..
وهي تضحك..
"نعم"
هو قال..شن قصة حلوة الحلقوم..
"لاهادي اني نحبها ونبيكم تحبوها معاي"
هوقال..مش قتلك ياياسر طاغيه ارام راهو ماتعرفهاش زي مااني نعرفها..
🍃شافت اريج لآلاء..شافت في وجهها ملامح الغيره وهي تاكل في اظافرها ودموعها ينزلوا..
بعدين ناضت ومشت طلعت من الدار..وعيون اريج اللي كانت تشوفلها بحزن معاها...
🍃🍃🍃🍃🍃
"ابله طوبى"
طوبى وهي ماشيه لدار المعيشه وقفت والتفتت لما سمعت صوت مروة تنادي فيها وقالت:نعم حبيبتي..
مشتلها مروة وقفت قدامها وقالت بشي من الخجل؛نبي نعطيك حاجه..
طوبى؛شن هي؟
مدتلها مصحف متوسط الحجم وقالت بخجل:عطيه لمحمد..
طوبى خداته وهي تشوفلها..
مروة ودموعها في عيونها؛مرة سمعت فتوى تقول ان اللي يقرا ختمه ويبي اجرها يوصل للميت توصله ان شاء الله..واني من يوم سمعتها قعدت نختم في ختمتين وحده ليا ووحده لبابا الله يرحمه..نبيك تعطي المصحف هدا لمحمد يخليه معاه وكل مايفضى يقرا منه لأمه..وقوليله كل مايمر ع ايه فيها كلام ع الجنه يدعيلها بيها ولما يكمل الختمه يقول يارب اجعل ثوابها لأمي عائشه بنت جويده..
ابتسمت طوبى ودموعها ينزلوا..
مروة وهي تمسح في دموعها وتفرك في ايديها ببعض لما درتها..قعدت نحلم ببابا هلبه ونشوف فيه فرحان هلبه في الحلم..
طوبى وهي شاده بكاها بقوة؛الله يبارك..
"مروة"
شافوا لفايزة الزوز..
فايزة بملامح حزن ؛هيا ماما ليل خلاص..
مروة؛حاضر..شافت لطوبى..
طوبى؛خلاص ولايهمك..
مروة؛شكرا..تصبحي ع خير..ومشت لامها..
فايزة؛تصبحي ع خير طوبى..
طوبى وهي تمسح في دموعها؛قدامكم كل خير..
ومشوا الزوز طلعوا..
وطوبى معاهم بعيونها..بعدين شافت المصحف شويه..
وبعدها مشت ركبت لجناحها...
🍃🍃🍃🍃🍃🍃
الساعه11:30ليلا..
🌟ومعانا اخر اتصال قبل السحب ع اسم الفايز معانا الليل..
ونقول...خميسكم فل..
"خميسك عسل"
هو انطمس مرة وحده..ولون وجهه تغير..
"معاك مرجان استاذ مهند"
هو حط قبضة يده ع فمه وحمحم..بعدين قال..
تفضلي يامرجان ليك المساحه..
"شكرا استاذ مهند..اني طفولتي كانت حلوة بالمرة كنت مدللة من كل اللي حواليا..بابا وماما..وخالاتي وعمامي وعماتي وجدودي بالذات بو امي ربي يطول في عمره لعند هاليوم وهو يدلل فيا...بس بطل هديكا المرحله ماكانش هو..كان جار حوش جدي واني صغيره هو كان كبير كان وين يشوفني في الشارع لازم يجيبلي حاجه حلوة...ولو شافني ماشيه للدكان ناخد حاجه لازم يخش ويدفع عني..كان يحب يزعلني هلبه بش يرضيني واني ماكنتش متقبلاته نهائي..بس جرت السنين واني كبرت..وراد ربي يكون في نصيب وخطبني واني وافقت عليه وحسيت من بعدها ان ربي يحبني اللي خلاه نصيبي"
سكتت...وهو قعد ساكت ماعقبش..
والمخرج يكلم فيه..
"مهند"
هو شبحله واشرله يقطع المكالمه..
طول المخرج قطعها وقاله..قطعتها..
هو قال..
ايوه..اخت مرجان قاعده معانا..فصل..فصل الخط..تمام..هيا بينا ع اسم الرابح الليله ياياسر..خليكم معانا ماتغيروا القناه..
طلع المخرج فاصل موسيقي..
وهو حول السماعات طول..
وحط ايديه ع وجهه..
والمخرج يسأل فيه.."مهند..مهند"..
حول مهند ايديه عن عيونه اللي كانوا مغمضات..
وقعد مغطي بيهم انفه وفمه..
"مهند الامور تمام"
هو هز راسه وحول ايديه..بعدين فتح عيونه ورجع لبس السماعات مرة تانيه..
المخرج..نولوا..
مهند؛ايه...
اشرله المخرج.....
وهو قال...ورجعنالكم ياعيله وتوا ركزوا معاي واسمعوا زين زين زين ياقنينين..
🍃🍃🍃
وطلعت اريج للجنان وهي دور في آلاء..
لقتها مقعمزه تحت شجرة الياسمين..وهي حاطه ايديها ع وجهها وتبكي..
مشتلها طول وقعمزت حداها وقالت؛علاش مافكرتيش في اليوم هدا..
حولت ايديه وقالت ببكي؛مانحسابش روحي بنحبه هكي يااريج..وحضنت اختها وهي تقول..حبيته هلبه هلبه اريج..
واريج ضمتها بقوة وقعدت تبكي معاها بصمت...
🍃🍃🍃🍃🍃🍃
"ايوه جالي اني في الجنان جهة الكوجينه"
شافت يمينها لقاته جايها وهو يسكر في المكالمه..
قدمتله ..
وين وصلوا في بعض وقفوا..
الجالي؛شن الجو..
طوبى؛ماشيه الحمد لله..
الجالي؛ظهرك قاعد يوجع فيك..
طوبى:شويه مش هلبه..
الجالي:جبتلك مصادجو..
طوبى؛تمام..
هو قال؛نقدر نبات فوق الليله مافي حد في الحوش ولا؟
هي قالت:ايه كلهم روحوا ماقعد حد..
الجالي؛معناها بايت فوق..
طوبى؛تمام بس نبي نطلب منك طلب..
هو قال:عيوني..
ابتسمت وقالت؛ناديلي محمد..
هوقال؛علاش؟
طوبى:بنعطيه حاجه..
رفع حواجبه ونزلهم..بعدين رفع تليفونه واتصل بيه..
وطوبى تشوفله..
الجالي؛هاه حموده..تعالالي حدا الكوجينه من برا...
نزل التليفون..
وهي قالت:تعشيت كويس..
الجالي بضيق:ماخاطري في شي..نبي ترقد بس..
طوبى بحزن؛حتى اني..
ع جية محمد وهو يقول:عمي..
الجالي التفت وقاله؛تعالى تعالى مافي حد...
قرب منهم ووقف حدا عمه..
طوبى:كيف حالك محمد؟
محمد وعيونه لوطا؛الحمدلله خالتي..
طوبى بإبتسامه؛محمد عندك مصحف صغير؟
شبحلها وقال:لا..
والجالي يشوفلها بإستغراب..
هي طلعت من تحت الشال المصحف متاع مروة ومداته وهي تقول؛خليه عندك..
خداه وهو مستغرب..
طوبى؛هو مش مني صراحه..من بنت ابلة فايزة مروة..
شاف الجالي لمحمد لاحظ كيف وجهه ولى احمر وانحرج هلبه..
ابتسم ابتسامه خفيفه..
طوبى:قالت ديما دير ختمات وتهدي في اجرهم لبوها..
الجالي:تقريبا هادي بدعه ولا
طوبى؛لالامش بدعه بس مسأله فيها خلاف تأكدت منها بروحي...هلبه قالوا توصل وتنعد من الاعمال الصالحه اللي يديرهم الابن لوالديه..
الجالي:اها..
طوبى شافت لمحمد وقالت؛قالتلي قوليله يقرا ختمه لأمه ولما يكمل يدعي ثوابه يوصللها ولما توقف ع ايه توصف الجنه ادعيلها بيها..
هو هز راسه وقال؛ان شاء الله..بارك الله فيك خالتي..
طوبى؛فيك بارك الله..
محمد:تصبحوا ع خير..
ولف ومشي..
وهما ردوا عليه؛وانت من اهلك..
الجالي وهو يشوفله؛يقولك خالتي وبينك وبينه 4سنين بس..
ضحكت ضحكه خفيفه وقالت؛بتخش توا؟
شبحلها وقال:ايه..قدامي..
ابتسمت ومشت خشت..
وهو خش وراها وسكر باب الكوجينه...
🍃🍃🍃🍃🍃
"سافر التافه "
مغليه وهي تبكي:ياقهرتي ع ولدي شن دار في روحه..
محمد شنيبه؛غير مابيتش ندوي بكري..لكن كله من بنتك خديجه..
مغليه؛شن دخلها خديجه وانتم حاطين في راسها كل شي..
هو قال:ناسيه شن دارت بنتك!!؟
سكتت مغليه وهي ترشف ومش راضيه في بنتها..
محمد شنيبه؛حطت راسها براس بنت الناس اللي خربت عليها..وياما دارت قبلها في مرت المهدي الله يرحمها نص السبب في مرض المراة خديجه هادي..
مغليه؛كترتها وخثرتها..
هو قال؛طبعا كلام الحق مايعجب حد..
وفتح الباب بيطلع..
مغليه؛وين ماشي..
هو قال:للخلا..
وطلع وسكر الباب..
مغليه بحمق؛ياريت ومعاش تلقى طريق تولي منها...
🍃🍃🍃🍃🍃
وفي احد شوارع طرابلس..
كان وليد مدرس بسيارته في تركينه مستخطيه..
منزل كرسيه..ومشغل اغاني في السيارة ويسمع..
وهو مكتئب جدا...
وبين عيونه آلاء مش قادر يفكر غير فيها..
وفجأه..
بدون سابق انذار..
ينفتح باب سيارته ويجبدوه منها الزوز..
وهو مفجوع يقول..
شن في..شن في..من انتم..
ويسكروله فمه..ويجروه لسيارة عاليه مظلمه يحطوه فيها..
ويتحركوا بيه لمكان مجهول...
